الأحد، ١٤ ربيع الأول ١٤٣١ هـ

عصام عبدالله - 1

"الكلمة إيد .. الكلمة رِجل .. الكلمة باب .. الكلمة نجمة كهربيّه فـ الضباب"

.. لما عمنا صلاح جاهين قال كده .. كان عارف ان في ناس هاتشيل على كتافها هَمّ الكلمة
!! وما أصعبه من هَمّ

من الناس اللي شالوا على أكتافهم هَمّ الكلمة .. كان الشاعر الراحل عصام عبدالله

.. بداية عصام عبدالله الحقيقية .. كانت من خلال تعاونه مع المخرج محمد شبل في أول أفلامه
فيلم أنياب , ولأن فكرة الفيلم قائمة على التجديد والابتكار والفانتازيا .. كان لازم الكل يلعب

الفيلم ده كان فيه اختبار صعب جدا لـ عصام عبدالله .. لأن الأغاني بتتخلل أحداث الفيلم , كفاية أغنية كل شيء يشبه لبعض اللي بيغني فيها كل أبطال الفيلم , علي الحجار .. طلعت زين .. عهدي صادق .. ونجم الأغنية الشعبية .. الدراكولا أحمد عدوية
ونجح عصام عبدالله بمعاونة حسين و مودي الإمام في الاختبار ده .. وكانت البداية

بدأ بعدها عصام عبدالله في التعامل مع حسين و مودي الإمام .. وعملوا أكتر من أغنية ناجحة .. وكان هدفهم الأساسي هو كسر التابّوهات الموجوده وقتهم .. والانطلاق والتجديد
.. ومثال على ده كانت اغنيتهم .. وماله
"عُمر ماشيء يثبت على حاله .. مهما عملوا ومهما قالوا .. وماله يا دنيا وماله"

ابتدا نجم عصام يسطع في وسط الغناء بالنسبة للمطربين الجدد وقتها - النجوم دلوقتي - عمرو دياب و محمد فؤاد و علي الحجار و محمد منير

ونتيجة لتمرد عصام ورغبته في الخروج عن النمطية والاستسهال .. بالإضافة لحبُّه للعب في الكلام والألفاظ .. عمل مع عمرو دياب أحلى أغانيه على الإطلاق .. باحب الحياه
" باحبك لأنك وهبتي بِحُبِك لقلبي مُناه .. بقيت يا حبيبتي با حب الحياة"
!!! طب بالذمه .. مش ده كلام واحد حاوي .. آه والله حاوي مش شاعر
.. مجموعة كلمات بسيطة جدا ومتداولة في الحياة .. استطاع انه يضفرها مع بعضها بشكل ما
ويطلع ليها معنى وقيمة .. وقيمة كبيره كمان , حاوي ده ولا مش حاوي !!!؟

قمة عبقرية عصام اللغوية وبراعته في استخدام مختلف اللهجات المصرية .. كانت في تعاملاته مع محمد فؤاد , خصوصا ان طبيعة شكل فؤاد مصرية قوي .. يعني ممكن يبان فلاح .. أو قاهري من السيدة زينب ولا مصر العتيقة .. ولو لبس جلابيه وعِمّه صعيدي .. بقى صعيدي ونص
!! وده اللي عمله معاه عصام .. كتبله مجموعة أغاني .. على كل لون يا باطسطا
.. يعني مثلا أغنية صابر من ألبوم في السكة بيقول فيها
صابر تَنّي آني صابر .. لما يبان لها آخر , يا صابر إتّاخر .. خُدني جاريك نتحمّل"
"والنبي لـ اسكت ساكت .. ربك عادل باسط , بالك انت إن صابت .. كان المُنى يتكَمّل
!!!!
!!! تني و آني و اتاخر و جاريك !! , جاريك يا عصام .. جاريك
!!! طب ماشي .. انا هـ اسكت ساكت .. بس بالك انت ان صابت .. كان المُنىَ يتكمّل
!!!!!!! طب ورحمة امي فلاح ابن فلاح ابن فلاح .. على رأي يوسف بيك وهبي

بعدها كتب عصام لـ علي الحجار بالتعاون مع مودي الإمام أغنية في قلب الليل .. والاغنية دي ما اتصورتش وقتها زي ما الناس فاكره وبتعتقد انها اتصورت زمان .. بس هابقى احكي الحوار بتاع التصوير ده بعدين , خلينا في "قلب" الأغنية .. قصدي .. في قلب الليل
الاغنية دي مصريه قوي .. قوي يعني .. والدليل على مصريتها .. كلمة "قلب" اللي بتتقال
.. في مختلف أقاليم وفئات مصر , يعني ساعات مثلا واحده ست تقول
كنت سايبه الفلوس في "قلب" الدولاب
أو واحد تاني يقول : قابلت فلان في "قلب" محطة القطر
!!! كلمة مصرية بجد .. مش مجرد كلمة لتعديل وزن الأغنية لأ .. دي كلمة من "قلب" مصر

الألبوم بتاع في قلب الليل .. كان فيه اغنية تانيه تحفة , وأصل الحكايه ان علي الحجار جاب لحن أغنية راي جزائري عجبه .. وقال لـ عصام انه عايزه يؤلف كلام على المزيكا دي , زي ما عمل عصام في أغنية أشوف عينيكي لـ عمرو دياب لما طلب منه يوظف الموسيقا البورسعيدي او السمسمية في عمل غنائي

.. قام عم عصام عمل تحفه غنائية .. اغنية اسمها روحي فيكي
"إن قلت وداع أنقسم اتنين .. فارس متمرد عـالقوانين .. و كسير مسلِّم ما بيبوح"
ازاي .. ها .. ازاي .. ليه يعني !!؟؟
!! الاغنية دي يتعمل فيها رسالة ماجستير .. لا رسالة واحده ايه .. رسايل .. و دكتوراه كمان
.. الاغنية دي فيها مزج فظيع بين الفُصحىَ والعامية الصعيدي .. عملوا لغة جديدة
لغة إنسانيه في المقام الأول والأخير

.. لغة مايقدرش يعملها غير فارس استطاع أن يركب صهوة حصان اللغة .. بل ويسيطر عليه
.. ويطوّعه لخلق لُغة خاصة به فقط , هذا الفارس هو الشاعر الراحل جسدا ولكنه باقي فكرًا
عصام عبدالله
---
يُتبع الاسبوع القادم .. ان شاء الله
-------
ملحوظة

كنت سعيد جدا لما اتعمل جروب محبي الشاعر عصام عبدالله , لكن لما لقيت معظم المشتركين بيعملوا مشاركات عبارة عن موضوع فيه كلمات أحد أغاني عصام عبدالله .. وتحتها لينك الأغنية .. وشكرا على كده , اتضايقت جدا
.. خصوصا ان الهدف من التفاعل .. اننا نتكلم عن الشاعر ونمسك أغانيه أغنيه أغنيه
ونفصصها .. ونشوف الابداع فيها جه ازاي .. وبكده نبقى بنتعلّم كلنا من بعض

.. لكن بالنظام المُتبع في الجروب حاليا .. الجروب هايتحول لمنتدى بتاع أفلام
.. واحد يحط اسم الفيلم وأسماء الممثلين اللي فيه .. وبعدين يحط لينك التحميل
!!!!! والناس تدخل تقول مشكووووووووووور .. وتمشي


سوووو

هناك ١٢ تعليقًا:

Alkomi يقول...

سوو

انت كتبت فعهلا تعليق هايل عن الجروب و اللي بيحصل فيه

ده برضه اللي في دماغي

مثلا

انا شخصيا عندي تفسير لاغنية وحداينة

باحس اني اكتر واحد في الدنيا فاهمها

بس مش عارف اتفاعل

حاسس ان العملية هي تحول من كتاب اغاني مش عارف مين من على اي محطة ترمواي بجنيه و نص

الى جروب اغاني مش عارف مين

بس انا حاسس ان الجروب هيتطور اكتر من كدة

اشطة صباحية بالمهلبية

و سِلْو بَلابِل عِنَّاب

adel يقول...

بعلق علي الفيس بس مينفعش معلقكش هنا رخامة
وكفاية عض فيا بقي :):)

محمد فؤاد (صاحب عمود النور) يقول...

انا اول مرة اسمع عن عصام عبد الله
بس اغانيه معروفه

ياريت يا سوو كل مرة تعمل بوست عن ناس اعاملهم معروفة بس هما مش معروفين

sony2000 يقول...

ياريت بجد تكتب عن الناس الغير معروفه فبلدنا ياسو لاننا بجد محتاجين لأمثله ذي دي وممكن يكون دا تكريم بسيط ليهم بس كفايه انهم اثرو فينا بأفعالهم وكلماتهم من غير مانعرف
تقبل مروري وتحياتي

كيكى عوووووو يقول...

مشكووووووووووووووووووووووور

Unknown يقول...

بالنوسبة للملحوظة وبالذات اخر جملتين فيها فالتعليق عليها: هه

قيس بن الملووووح يقول...

نحن في حاجه الي رايك في مشاكل القراء علي مدونة "دقات قلب بعد الخمسين"

z!zOoOo يقول...

السلام عليكم

ازيك يا سو يارب تكون بخير

وتكون لسه فاكرنا

تصدق انا فعلا كنت مستغرب من فيلم انياب كله

يعني فريق العمل والممثلين والاغاني والاستايل والديكور والاضاءه

والاهم الفكره
بصراحه انا ماعرفوش قوي

بس انا لما شفت الصوره من بعيد قولت مين ده الي شبه دكتور احمد خالد توفيق

D:

أما اغنيه في لقب الليل ديه حاله مختلفه جدا

وكلماتها حلوه قوي قوي واللحن كمان والصوت والاحساس

وحاله الاغنيه نفسها حاجه فوق الوصف

ومافي حد في الشارع سوي مهر إتربط جازع

بجد مبسوط جدا يا سو إنك بتفتكر الناس الي سابت بصمه جوانا حتي ولو من غير ما نعرفهم

وإنك بتفتكرهم وتذكرهم بعد غير نسيان وجحود الاعلام ليهم

برافو يا سو

:)

تحياتي

Alkomi يقول...

sony2000

الناس الغير معروفه

مندهش جدا

عصام ممكن يكون مش معروف بالنسبة لحضرتك

بس عصام معروف جدا في اوساط مواليد التمانينيات المجيدة

ser_el7ayah يقول...

thx for this nice blog

طبعا عصام عبدالله شاعر عبقرى

أعتقد ان له دبوان وحيد - عبايه الشروق

أرجو اى معلومات عنه

مدونتى تحت اسم - قلب اللبل

http://alb-ellil.blogspot.com/

إيمان يحيى يقول...

الله يرحمه بجد ...
شاعر لحروفه طعم ولون وريحه كمان ... والله ما عارفه أوصفه بس يكفى إنك بتسمع كلماته مغناه أو بتشوفها مكتوبه تحس بنبض الروح فيها ومش بتعدى زى غيرها ..
تسلم إيدك

Container Entsorgung يقول...

حابيييييييييييييين نشوف الاخبار والمشاركات الجديدة !