الجمعة، 26 ربيع الأول، 1431 هـ

!! حلاوة الريّس

"كنت راجع البيت و راكب المترو .. وكان في شخص واقف جنبي ماسك جرنان "المساء
.. العنوان الرئيسي بيقول .. وفاة شيخ الأزهر , لقيتني بدون ما أشعر باقول وانا مستغرب
غريبه .. حسني يتعب .. طنطاوي هو اللي يموت !!؟؟

تقريبا صوتي كان عالي شوية .. لأني لقيت تلاته اربعه سبعة من اللي واقفين جنبي - وجنب
الراجل اللي معاه الجرنان -
باصيين علينا وبيبتسموا .. ومن هنا بدأت حالة نقاش بيننا وبين
بعض , وسرعان ماتحولت حالة النقاش دي لحالة عامة في عربية المترو .. وأعتقد في
.. عربات المترو المجاورة , حالة نقاش مابين مؤيد ومعارض .. مؤيد لمبدأ مرض الريّس
!! ومعارض لفكرة ان الريس عنده مراره اصلا

هنا لقيتني وقعت بين شقي الرحا .. اندمج مع الشعب المصري المتلاحم في عربات المترو وريحتهم مرار .. ولا أدافع عن صاحبي - راجع الموضوع ده - باعتبار ان الصاحب ليه عند صاحبه تلات حاجات !!؟

قلت لروحي بدال ما ادافع عنه في وسط حشود الركاب .. وساعتها ممكن روائحهم تتحول
لأفعال .. اكتب جواب للريس هنا , أي نعم احترت وسألت روحي .. هل في حد بيقرالي من
عائلة الريس !!؟
ولا في حد هايتطوع - مشكورا .. ومدفوعاً - ويبعت الحوار ده .. ويبعتني معاه بالمرّه !!؟

بس هاقول ايه في الجواب .. اكيد طبعا هاقول الف سلامة عليك يا صاحبي .. واكيد هاقول
ان مرضك يا ريس بيؤكد انك مصري أصيل بتعاني نفس معاناة المصريين .. بدليل ان
!! مرارتك - لا مؤاخذه - اتفقعت اهي

بس بعد كده هاقول ايه .. هل اقول للريس ان في ناس بتفتي وبتقول ان سبب فقعان مرارتك .. انك ما استحملتش تشوف البرادعي بياخد نصيبه من الزيطه والاعلام وقلقت منه .. هوب مرارتك - لا مؤاخذه - اتفقعت !!؟
مع اننا - انت وانا وباقي أعضاء الحزب الوطني - عشان أُوتينا مفاتيح الحكمة ؛ عارفين كويس
ان البرادعي هو السبب الرئيسي في حوار التيفود اللي حصل هنا في مصر من كام يوم , بدليل
!! ان الحوار ده حصل في قرية البرادعة .. وهو برادعي .. يبقى هو السبب وش

ولا اقول للريس .. ان في ناس بتقول ان مرارتك اتفقعت .. لما عرفت الضريبة العقارية اللي اتقدرت على قصر الرياسه !!؟
.. مع ان الناس دي لو كانت اخدت بالها .. كانت عرفت ان قصر الرياسه اساسا مش بتاعك
!! ده ايجار قديم

ولا اقول للريس .. ان في ناس بتقول ان مرارتك اتفقعت .. لما عرفت ان هشام طلعت احتمال يطلع براءة بعد الحوار اللي حصل , وقال ايه .. انت السبب في اللي حصل له .. عشان مارضيش يشارك ابنك علاء باشا !!؟
طب بالذمه ده اسمه كلام .. بقى معقول واحد صاحب مول تجاري كبير .. هايشارك واحد مأجر محل عنده .. وفاتحه محل بقالة !!؟

ولا اقول للريس .. ان في ناس بتقول ان مرارتك اتفقعت .. عشان المنتخب اتغلب من انجلترا , مع ان الماتش كان محبه يابو صلاح !!؟
وكمان انت ياما استقبلت الفريق في المطار بعد أي بطولة خدوها .. ده انت تقريبا أكتر رئيس
!!! مصري – أو غير مصري - استقبل المنتخب بتاع بلده في المطار

ولا اقول للريس .. ان في ناس بتستغرب انك سافرت تعمل العمليه في جرمانيا .. ويقولوا هو انت شايف الاهمال بقى منتشر في مجال الصحه عندنا .. لدرجة انك قلقت تعملها هنا !!؟
.. مع انك لو عملت العملية دي هنا .. نفس الناس دي هتعمل زيطه في مجلس الشعب
!!! ويقولوا علاج على نفقة الدولة
.. هي الناس دي ماتعرفش ياريس انك مارضيتش تعمل لروحك تأمين صحي
.. وفضلّت أن يستفيد بهذا الغطاء الصحي .. أحد أبناء مصر الذين يستحقوا الدعم
!!! ده انت بتطلّع اللقمة من بؤك يا ريّس وبتديهالنا

وبعدين أساسا أساسا .. كلنا - انا وأعضاء الحزب الوطني - عارفين انك كنت معزوم عالعملية
دي في جرمانيا .. وعارفين ان بتوع بلاد بره لما بيعزموا حد .. مش بيعملوا زيّنا هنا وبنعزم
!! على شاي وبيبس .. لأ .. بتوع بلاد برّه بيعزموا على عمليات
, بدليل انه في عيد تحرير سويسرا .. بيعزموا الناس على عملية زايدة
, وفي عيد الثورة الفرنسية .. بيعزموا الناس على عمليات لِوز و بواسير
.. لدرجة ان الظاهرة دي ابتدت تنتشر عندنا في مصر .. واعرف ناس في عيد الحب
!!! بتعزم بعمليات سيليكون

.. ولا اقول للريس .. اني بمناسبة الحدَث ده .. كتبت رباعية كده على ما قُسُم .. قلت فيها
مرارتي فدا مرارتك يا ريّس
ويارب تعيش بـ مرارتي كويس
سامحني لو كانت مش قد المقام
!! اصلها مرارة .. واحد مهيّس


ولا اقول للريس .. اني مستغرب من العالم بتوع الفيس بؤ اللي مافكروش يعملوا خاطر لمرارتك الراحلة - في جنة الخُلد ان شاء الله - ويعملوا جروب بإسم .. تعاطفا مع مرارة الريس !!؟

ولا اقول للريس .. اني عن نفسي عملت اللي اقدر عليه .. وعملت ايميل لتلقي تبرعات المواطنين المصريين .. وتبرعات أعضاء الحزب الوطني - خصوصا نبيل بباوي اللي حسيت وهو بيتكلم في المجلس .. انها مرارته هو مش مرارتك انت يا ريس !! - و الايميل اهو
Mararet_el-rayes@hotmail.com

.. ولو اني معترض على لفظ "مرارة" ذات نفسه .. وشايف انها المفروض يبقى اسمها حلاوة
و ياسلام بقى لو يتعمل عيد قومي بهذه المناسبه , ويتم الاتفاق مع مصانع بير السلم انها تبتكر
!! نوع جديد من الحلاوة يحمل اسم "حلاوة الريس" .. زي حلاوة المولد كده

أصابتني الحيرة التي مبعثها – "أصابتني" و "مبعثها" .. نَحَوي نَحَوي يعني !!- ان عندي كلام
كتير عايز اقوله للريس .. بس محطة المعادي جات ولازم انزل , اتجهت على الباب عشان انزل
وبحركة تلقائية بصيت على اسماء محطات المترو اللي فوق الباب اللي هانزل منه - بالرغم من
اني تقريبا حافظهم -
ولما بصيت اندهشت اندهاشة مندهشه .. تخيل يا ريس لما الاندهاشة بذات
!!! نفسها .. تبقى مندهشه
.. اندهاشي كان سببه الصورة دي
.. بعد ما اندهشت .. لقيتني ابتسمت في مرارة .. وقلت ربنا يشفيك يا ريّس
!! ويعفو عن مصر

ملحوظة

.. لو ما ظهرتش في خلال الكام يوم الجايين .. تعرفوا ان في حاجه حصلت معايا
لألألأ .. ماحدش يفهم غلط
.. اللي اقصده اني ممكن اكون مختفي بسبب اني هعمل عملية استئصال للمرارة
!! من الجحود اللي باشوفه من شعب مصر .. تجاه صاحبي .. حسني مبارك

سوووو

هناك 39 تعليقًا:

adel يقول...

اول تحليق

والموضوع مش قد كده يابني P:P:
هههههههههههه

لا جامد ياسوو

يجعل يومك عيدا و نفخك سعيدا :)

البنفسج الحزين يقول...

اوكيه وانا باوعدك اول ما مصانع بير السلم تنتهي من عملهاوتنزل الحلاوة الجديدة(ماركه حلاوة الريس )في السوق جري هاخدلك علبه مع خمس ست ارغفه سخنين
واجيلك ازورك في كلوب الريس اللي اعتقد ان صاحبك حبيبك هيستضيفك فيه قد 10 /15 سنه كده عشان انت واحشه قوي قوي ...
ههههههههههههه...حلوة بجد

حسبى ربى يقول...

"ده انت بتطلّع اللقمة من بؤك يا ريّس وبتديهالنا".............. يع

ايه القسوة دى .. حرااام عليك موتنى من الضحك .. بوست راااائع

يس انت نيتك مش تمام.. الريس سافر يتعالج فى فرع مستشفى مصر فى المانيا .... مش تقولى الطب فى مصر والكلام ده
طيب خد المفاجأة بقى .. اصلا الريس عمل العملية دى كنوع من انواع الدعاية لمستشفيات المنيا قبل ما تفلس ويقفلوها من قذارتها ومن تأخر الطب فيها .. عشان كدة كان واخد معاه الجبلى عشان يعلمهم اى حاجة ويرتقى بمستوى الطب الالمانى .........!!!!!!

_ بس حلاوة الريس دى الناس حتجيب فلوس منين عشان تشتريها ؟؟؟

المهم فى معرض الكتاب السنة دى حسيت كدة انى السنة الجاية لازم اجيب كتاباك يا سووو .... ما تتأخرش علينا

كيكى عوووووو يقول...

ادعوله
ادعوله
ادعوله

سمع هوص (Abo 3li) يقول...

الف سلامة علي صاحب وحبيبك.... دحنا شعب عاوز ضرب الجزمة... بقي فيه شعب محترم يفقع مرارة ريسه... خلاص مفيش اصل... بورريييه من ده شعب...
ميعجبوش العجب... ال ومش عاجبه انه يعمل العملية بره مصر... يعني انتو عاوزين تساوو الرأوس؟؟ بقي الريس بجلالة قدره يتعالج كده زيكم علي الارض في القصر العيني مثلا... لأ طبعا.. ده ريس ياجهلة.. شعب جاهل صحيح ياسوووو... سامحهم لجهلهم ياكبير...
بس متنساش توصل سلامي لجنابه..

مي يقول...

هو مين اللى جاب للتانى المرارة
ده احنا جالنا بلاوى سودا

بس ارجع واقولك والله هتوحشنا اووووووى ياه ده انت كنت طيب وابن حلال يلا دنيييييا


اشوفك على خير ويجعل ايامك مباركة وفيها جمال (((؛

بوست رائع

الحلم العربي يقول...

هههههههههههههههههه
و الله كنت كويس يا أحمد
يا سلام عليك كده بالبدلة البيضا و انت بتتحاكم محاكمة عسكرية
علشان تبقى تدخل نفسك بين مرارة الريس و مرارات الشعب
انت ايه حشرك انت ؟ المرارات بتضايق بعضها و بعدين بتتراضي

Wanda يقول...

سلامة مرارتك مسبقا
و سلامة المترو معاك :-)) اصل بعد الصورة ديه ممكن يلغوه :-))

sony2000 يقول...

هههههه
بجد ضحكتني وانا متضيقه
لا وحلوه اوي الروباعيه اللي عاملها
توحفه توحفه يعني
لااااذم تعملك رباعيات كدا ذي جاهين
وتبقي رباعيات سوووووو وتتنشر فكتاب
بجد هتتباع بييييييع
ربنا يسهلوو ياعم
تقبل مروري وتحياتي

Baskouta يقول...

بوست جميل اوي
والرباعية تحفة
وبصراحة بعد البوست ده
بقول الحمد لله ان شايلة المرارة
تحياتي البسكوتية

Kontiki يقول...

تحفة بجد ياسوو وخصوصا الصورة
:)

صيدلانيه طالعه نازله يقول...

هههههههههههههههه
مش ممكن
انت مصيبه يا سوووو

بص من الاخر احنا شعب ميستاهلش النعمه اللى ربنا مديهاله
فضلنا نضغط على الراجل نضغط نضغط لغايه اما فرقع يا عين امه

بس متقلقش بكره يعملوا نصب تذكارى لمراره فخمته و يحطوا عليها الورد فى عيد العبور العظيم
و ساعتها حتبقى فلرصه لكل مصرى اصيل شريف انه يعبر عن حبه

حماتك

هراء لا داعى له ..... يقول...

جاهدت نفسى كتير بس فى الأخر مقدرتش أمنعها من تذكر بل و التلذذ بقصيدة أحمد فؤواد نجم ( سلامتك يا ريس )

koko يقول...

lollllllllll

حلاوة الريس .. دى حلاوتك انت يا سوووو

أم .. بوبه يقول...

حسني يتعب .. طنطاوي هو اللي يموت !!؟؟


فعلا غريبة انا لاحظت كدة برده

يمكن كان حسنى محتاج نقل أعضاء كتير ولا حاجة .. فالطنطاوى عمل الواجب

أم .. بوبه يقول...

بس الأهم إنهم ميكونوش نقلوله مخ الطنطاوى

mostafa rayan يقول...

بما ان صديق صديق صديقى فانا من هنا منعند صديقى سو بقوللصديقى مبارك سلامتك يا بو جمال وترجعلنا بالف سلامه يا برنس
ههههه
تحياتى ليك يا سو يا جميل

فاتيما يقول...

و النبى انتا ما هتسكت غير لما نجيبلك احنا حلاوة الريس و العيش و نيجى نزورك فى واحة الأستجماااااااام دى اللى هناك بعيد كدا معرفش فين


( الف بعد الشر عليك يا رب )

الله يحظك يا سوووو



بس لم التعابين بقى
احنا عاوزينك يا بنى

أحمد عاطف يقول...

بص م هاتختفي متقلقش

هو مولد كل فترة الانتخابات دا بيسيبوا الناس تقول كل اللي في نفسهم

لانهم بيعملوا كل اللي في نفسهم

لا حسني هايمشي لا هو ولا عياله

وصدقني مش بعيد مع الانتخابات الجديده ياخدوا باقتراحك ويعملوا حلاوة الريس

وهايكون 3 يوم بعد مولد النبي عشان يوفروا للشعب الحلاوة

Tears يقول...

كل المصريين تقريبا بيكلموا فى الموضوع ده حتى اللى عايشين بره مصر لان فعلا ده حديث الساعه

زمان كنت فاكرة ان بس الساعات اللى ممكن تبقى ضد الميه بس مع الوقت اكتشفت ان فيه بنى آدمين ممكن يبقوا مش بيموتوا

ساره يقول...

انا بشكر عادل انه عرفني على مدونتك (اصلي دخلت عليك من عنده) :))

اول مره اقرا لك مع اني مش مصريه بس لكن كلنا في الهوا سوا :)

تحياتي ل اسلوبك الشيق

غير معرف يقول...

انت بجد مشكله والله كنت مفتقده انى اضحك بالشكل ده وسبحان الله كل ما ادخل معرفش امسك نفسى وكل اللى ف البيت يضحك عليا وانا بضحك على كلامك ربنا يارب يجعل ف كلامك القبول ياسووو يابن ام سووو ويوفقك قول امين
ROKA

عاشقة الذكريات يقول...

ههههههههه والله هايلة يا احمد تستاهل عليها ايس كريم بالبلح

A32L MaGNoNa يقول...
أزال المؤلف هذا التعليق.
A32L MaGNoNa يقول...

هههههههههههههه
بجد مدونة تحفة واسلوبك يجنن
حاجة جميلة اوووى
وربنا يستر وميعملوش محطة قادمة ان شاء الله باسم مبارك
و Cover me and Cry my mom ^_^

z!zOoOo يقول...

السلام عليكم

ايه يا عم سو

انا سمعت انك عيان

الف الف سلامه عليك

ربنا يطمنا عليك

وتبقي دايما بخير

أدي اخره الشماته في مراره الريس

D:

ابقي طمنا بقي يا احمد بيه

علي الله تنفض بقي

ربنا يقومك بالسلامه

:)

تحياتي

мαησηα يقول...

امممممممم .. كده انت اتاخرت

ربنا يستر

والله كنت رائع يا سوووووووووو

هههههههههه

I'm The CraZy One يقول...

بجد جامد اخر حاجه....موتني من الضحك بجد و الرباعيات مسخره جدا D:

غير معرف يقول...

انت لو تعرف انا قريت الموضوع ده كام مره ممكن تقول عليه مجنونه وكل مره اضحك على نفس الافيهات وافكر ف نفس الافكار كأنى بقرأه اول مره بجد انت اكتر من رائع بكلامك باخلاقك بافكارك بكل حاجه فيك
ROKA

غير معرف يقول...

طبعا مينفعش كل مره اقرأ الموضوع اسيبلك كومنت كده هاتتخنق منى واحتمال تعتزل التدوين بسببى وانا ميرضينيش بصراحه بس اللى عايزة اوصلهولك انك بجد احدثت فرق كبير جدا ف عالم التدوين بكلامك البسيط اللى بيدخل مبارشره القلب
ROKA بردو

سومه...مجنونه فى بلد عاقل يقول...

هههههههههههه سلامتك يا سووو بعد الشر على مرارتك ومراره سونه

:) QŁp 7āZēŋ يقول...

Don’t be sad ,don’t be blue...Frankenstein was ugly too.

محمود المصرى يقول...

محمود المصرى بيمسى عليك وبيقولك خالى بالك انت هتروح فى ابو نكله او ابو شلن متفرقش بس تعال زورنى وانا هحميك
www.mahmodalmasre.blogspot.com

nour shahen يقول...

هههههههههه
هايل يا سوو
والخواطر اللي كتبتها فى جنابه جميله بجد
وشكله اتفقعت مرارته مننا
ولقيت عندك اجابه لسؤال هو الريس اتعالج علي حساب مين
وليه سافر يتعالج بره
للاسف طلع مش مواطن زى ما كتبت اقصد مواطن زيينا يعنى

يلا هنقول ايه كتبت الموضوع بروح جميله وقلب صافى

واخيرا وليس اخرا نقول

طويل العمر يطول عمره ويزهزه عصره فيخرب بتنا وينصره علي مين يشتكيه هاى هىء

دكتور حر يقول...

تسلم ايدك يا معلم

شر البلية ما يضحك

غير معرف يقول...

انت مصيبه
انت كارثه
انت حتة سكره مكرره مكرره مكرره
3 مكرره
انا حسه اني هولد من كتر الضحك
بجد انت عسل وكلامك مؤدب ومحترم
وياريت الناس كلها تبقي في زوقك وادبك واحترامك لنفسك وللغيرك وللناس اللي بتقرالك


تحياتي
أم العيال

Container Entsorgung يقول...

حابيييييييييييييين نشوف الاخبار والمشاركات الجديدة !

Kellerentrümpelung Wien يقول...

شكراً جزيلاً ع المجهود ... :)

entrümpelung wien يقول...

شكرا على الموضوع
entrümpelung
entrümpelung
entrümpelung wien