الاثنين، 17 صفر، 1431 هـ

!! الضرب في الميّت

أول مرّه قابلت فيها احمد الصباغ .. كانت ساعة الحوار ده , و ما اتكلمتش معاه غير يادوب كلمتين تلاته على بعض , لكن بعد اليوم ما خلص والكل مروّح .. استغربت لما لقيته مروّح معايا للمعادي الجديدة .. واستغربت اكتر لما اتكلمنا مع بعض واتضح انه خِرّيج نفس الإصلاحية - عفوا - المدرسة الثانوي بتاعتي .. مدرسة أمين الراعي الثانوية "مجرمين" .. بس هو كان الدفعة الاصغر مني بسنتين تقريبا
سوووو : لا يااا رااااجل .. طب تعرف فلان و فلان و فلان !!؟
!! الصباغ : الحقيقة لأ

فلان و فلان و فلان اللي سألت الصباغ عليهم دول .. مجموعة من أرجل مجرمين المدرسة .. أي والله أرجل مجرمين المدرسة , لكن لما لقيت الصباغ مش عارفهم .. قلت الواد ده تلاقيه كان من نوعية العيال اللي بيقضوها مابين المكتبة ومعمل الكومبيوتر وغرفة النشاط الزراعي بتاعة استاذ نعمان جوز ابله فايزة بتاعة الجغرافيا , واحقاقا للحق .. نوعية العيال دي كنا ايام ثانوي بنشوفهم
!!! عيال خنيقه .. وده كان أول انطباع عن الصباغ عندي

دارت الايام واتفقت مع الصباغ و الدوح و الدهشان - حاسس انها اسماء مجرمين .. زي ابو دقشوم و الدفاس مثلا !! - على اننا نروح اسكندريه ندوة هناك - ماعرفش كانت بتاعة ايه والله !! - وبعد ما روحنا وخلص الحوار خلاص .. قلنا نتفسح شوية
يومها المرشدة السياحيه بتاعتنا .. كانت لماضة , ونظرا لأني مدمن فيسكافيه وماشربتش فيسكافيه طول اليوم .. الصداع كان هايفرتكني .. ومش عارف ايه اللي حصل بصراحه ولقيتني باتخانق مع الصباغ وهو بيتخانق معايا .. وناس تحوش من هنا وناس تحوش من هنا
!!! مجرمين مجرمين يعني .. متخرجين من إصلاحية واحده بقى

قطعنا مع بعض بعد الحوار ده كام يوم .. ولما قابلته بالصدفة في البورصة .. قلت لروحي اتحاشى
!! الكلام معاه .. عشان مش طالبه خناق قدام الناس مره تانيه , وتقريبا هو راخر قال لروحه كده

لكن لأن طريقنا واحد و ولاد منطقة واحده .. كان لازم يحصل حوار .. على الاقل قدام الناس اللي هاتركب معانا المترو , وكلمة جابت كلمة .. جُملة جابت جُملة .. هزار جاب ضحك
!! وبيس يا مان احنا في رحلة

الخناقة اللي حصلت بيني وبين الصباغ على مرأى ومسمع من الدوح و الدهشان و لماضه - وكتاب الله الاسماء دي اسماء مجرمين مش مدونين خالص !!- كسّرت داخل كل واحد مننا .. حتة الأنا .. وابتدينا نتعامل مع بعض بعدها بتلقائية , نتقابل عالقهوة بتاعتنا في المعادي أي وقت فاضيين فيه .. نضرب شندوشتات كبده وسجق - راجع الحوار ده - من أي بتاع سُمّيات
!!! لدرجة اني حاسس اننا أكلنا بتاع حمارين لوحدنا
ده من كُتر تأثرنا بشندوشتات الكبده .. لما عرض عليّ الصباغ اكتب أي موضوع معاه في جرنان
!! المال والبنون ولا المال والعقار اللي كان بيكتب فيه .. كتبت نظرية شندوشت الكبده

لما قعدت مع نفسي وحللت شخصية الصباغ .. لقيته شخص غلبان جدا وبسيط جدا جدا , وبساطته دي .. هي اللي عملت ليه قبول عالي عند الناس اللي بيحبوه

شخصية الإنسان اللي والده مات - الله يرحمه - قبل ما يوعى عالدنيا .. وبالتالي كان لازم يبقى راجل وماعندوش وقت يضيّعه , ويمكن عشان كده لم ينضم لمجرمين الاصلاحية .. أو المدرسة
!! واكتفى بمجرمين الشارع اللي يعرفهم

شخصية الإنسان الجدع ابن البلد .. اللي لسه لغاية دلوقتي فاكره لما اتحمق لـ احمد البوهي يوم
.. حفلة توقيع أول عدد من مدونات مصرية للجيب .. لما نفخ صدره وقال
!! كلنا احمد البوهي .. كلنا احمد البوهي .. فليبق كل مُدوّن في مكانه :
!!!!!! حسيت ساعتها ان مكتب قيادة الثورة .. هو مكتبة عمر بوك ستورز

.. شخصية الإنسان اللي لما احد المدونين شتمه في موضوع عباره عن تلميحات وشغل نسوان
!!! ما ردش عليه الشتيمة .. واكتفى انه كتب الموضوع ده .. وكان أبلغ من أي رد

.. مع اني متأكد من قدرة الصباغ على السخرية من أي شخص وبأسلوب قمة في الكوميديا
!!! والإفيه .. ان نفس الشخص اللي شتم الصباغ .. شتمني في الموضوع اللي بعده وش كده
يخرب بيت كده يا أخي .. يعني حتى في الشتيمة متجمعين يا صباغ !!؟؟
-
.. صباغ يابن منطقتي .. يعلم ربنا اني باحبك ياض
وفرحت جدا لما قلت على الحوار بتاع الكتاب بتاعك

!! يا جرع ده انت يوم ماعملت جروب للكتاب بتاعك .. مصر كسبت الكاميرون
!!! ويوم ما مسكنا الكتاب عالقهوة بعد ما طلع من المطبعة .. مصر كسبت الجزائر
!!!! ويوم ما قلت على أول حفلة توقيع للكتاب .. مصر كسبت غانا .. وكسبت كاس الامم
!!!!!!! ياجدع ده انت الكتاب بتاعك من كُتر وطنيته ومصريّته .. طالع من دار المصري للنشر

.. صباغ .. هتلاقيني - ان شاء الله - جنبك يابن منتقتي يوم حفلة توقيع الكتاب بتاعك
هتلاقيني من النجمة معاك .. اخوك الكبير بقى ولازم اتطمن على فرحك

!!!! عُقبال ما أشوفك كاتب كبير و بتكتب في ميكي جيب يارب
-
ان شاء الله حفلة توقيع كتاب "الضرب في الميّت" لـ أحمد الصباغ .. هاتكون الساعه أربعه يوم السبت الموافق سته فبراير لعام ألفين وعششه , في دار ليلى سراي كندا
وهايكون معاه - في نفس التوقيت المحلّي - حفل توقيع ثاني كتاب للمدوّنة اللي باعزها زي اختي
سحر غريب .. وكتابها .. تعيش وتاخد غيرها
ها .. مين قال جاي !!؟؟؟؟

ملحوظة

.. ظهر مؤخرا .. بعض الأقوال من اخواننا المدونين .. بيعترضوا على تجمعات المدونين
.. وبيقولوا ان التجمعات دي بتكون منطقة للقيل والقال .. والكلام اللي مالوش لازمة
.. وتقريبا الناس دي نسيت - أو تناست - أن أي حاجه فيها الكويس والوحش
!!! و نسيت كمان .. اننا احنا البشر .. بإيدنا نحوّل الوحش .. لـ كويس

سوووو

هناك 34 تعليقًا:

اسماء رمضان يقول...

مبروووووووووك لخال المدونين كلهم
والله يا سو انت جبت من الاخر الراجل ده جدع جداويستحق بجد كل النجاح ربنا يكرمه والكتاب يحقق النجاح يارب

غير معرف يقول...

المهمّ ايمتى حفل توقيع الكتاب بتاعك؟؟؟

فاتيما يقول...

إن شاء الله معاكو يا سوووو

ربنا يبارك فيك

و يبارك لصبابيغو
زى ما انت بتقول


الف مبروك عليه و على سحورة

و إن شاء الله نيجى
نتمحك فى الفرحة دى
الواحد ما بيصدق الصراحة
يلاقى عالم حلوة كدا زيكم
عشان يكون ينسب ليهم
و يتشرف انه منهم


عقبال حفل توقيعك عن قريب
يا رب

Muhammad Saber Abdou يقول...

الف مبروك له

سبايدرمان spiderman يقول...

أحادل اجاي ان شاء الله
بس اديني رقم موبايلك عشان نبقي نكلمكم
و ياريت كمان يعني عشان اخوك الغلان ده
خريطه ازاي اوصل للدار دي ؟؟
اصل انا بتوه في المعرض ده
و مش بعرف اماكن القاعات كويس ؟؟ :(

سبايدرمان spiderman يقول...

و مليونمبرووك على كتاب الصبغ و سحر

Desert cat يقول...

مبروك يا صبابيغووووو انت بجد شخصية عبقرية وتستاهل كل خير
الف مبروك الكتاب
وعقبالك كدا يا احمد لما نفرح فى كتب كتابك قصدى بصدور كتابك

صبرني يارب يقول...

مبروووووووووك لصباغ ومبرووووووووك لسحر حبيبتى

ويارب دايما متجمعين فى الخير يا سو حتى ال... خليها الجواز ياعم هانشوفلكم اثنين اخوات بقى

ههههههههههههههههه

طبعا زي ما قلتلك لو كنت فى القاهره يوم السبت هاجي ان شاء الله

faissl يقول...

وانا بحبكوا انتوا الاتنين والله
ووحشتني قعدة البورصة اللي ما قعدتش فيها معاك الا مرة واحدة كان هو فيها :D
بالتوفيق دايما دايما على طول يا ألذ ناس :)

faissl يقول...

وكل الشكر والتحية والإمتنان للبنت اللي فوووووووووق خالص دي اسماء اللي كانت سبب معرفتي بيكوا كلكوا :)

bos bos بسمه عبدالباسط يقول...

مبرووووووووووووووك وجاية إن شاء الله

وإن شاء الله هيبقى يوم جاااااااااامد

اقصوصه يقول...

مسيو عجوز

مبروك كتاب الصباغ

كان ودي احضر حفل التوقيع

بس للاسف تفصلنا المسافات :)

Zika يقول...

كم انت عظيم يا ابن المعادي

Ahmed Al-Sabbagh يقول...

قد إيه حاسس بسعادة غامرة
مش عشان كلامك اللى يوزن تقله دهب فى حقى
ومش عشان انت ابن منطقتى وجارى اللى بلجأ له فى اى لحظة بكون محتاجه فيها
ومش عشان اتخرجنا من مدرسة واحدة ورضعنا من (إجرام) واحد
ومش عشان اللى قال الكلام ده فنان حقيقى فاهم فن حقيقى وكلامه العادى بيشنع فن وحياة
ومش عشان انت شخصيتك محبوبة ولها قبول عند كل اللى يعرفوك

ولكن
عشان دول كلهم
وعشان فى عز ما الواحد شاف ناس ما يستحقوش ياخدو لقب ناس
ألاقى حد زيك .. اعتقد إن لو ليا أخ ولد من أمى .. لا كان قال عنى الكلام ده .. ولا كنت أعزه المعزة دى .. ولا كان شاف تفاصيلى بالطريقة دى زى ما انت شوفتها
صحيح انا فرحان بالكتاب جداً
لكن مش هكدب لو قولت ان فرحتى بالكتاب هى جزء من فرحتى إن فى ناس لسه نضيفة وبيضا من جوا
واللى عاجبنى أكتر ان كل الاحداث اللى ذكرتها متسجلة بردو فى دماغى وفاكرها لحظة بلحظة.. ومش بس دى .. لكن أغلب قعداتنا مع بعض فاكر تفاصيلها .. وده لاننا عمرنا ما قعدنا ساكتين .. ياراجل ده احنا ما رحمناش القطط .. ده انا مش هنسى ابدا يوم ما كنا فى المعادى وكان فى قطيع كلاب بيطارد كلب شايل فى بقه عضمة .. وانت وقفت تترقب الكلب هيعمل ايه.. وكإنك كنت متوقع .. وبالفعل الكلب راح مهوهو عليهم .. وراحت العضمة واقعة من بقه .. وراحت الكلاب واخده العضمة وطلعوا يجروا

انا بعتز بيك جداً يا احمد
وبعتز اننا ولاد منطقة واحدة
وهقولك حاجة يمكن انت ما تاخدش بالك منها .. إن تشجيعك الدائم ووقوفك جنبى فى حاجات كتير كانت دايماً سبب لحاجات كتير انا بعتبرها نجاح وتوفيق من الله..

ابن منطقتك واخوك
احمد

shayma يقول...

انا مبسوطه اووووووووى مش بس لخالو عشان كتابهبس كمان عشان الروح الحلوة دى تسلم يا سو دايما شخص جميل وتسلم يا خالو وتسلم ايدك .. شكل الكتاب رائع انشاءالله والف الف الف مبروك وبالتوفيق دايما انشاءالله
وانشاء الله هكون موجوده :)
سلامى ليكو الجامد اووووى :)

عصفور المدينة يقول...

احترامي وتقدير لكما
ومبروك لأحمد

wella يقول...

مبرووووووووووووووووووك


وعقبال كتابك ياسوووو

كان بودى احضر لكن المسافة كبيرة اوى ياخال

رز وملوخيه şóŁó يقول...

والله كان نفسي اجى
بس المشكله ان انا فى اسكندريه وبسبب ظروف الشغل عندى السفر للقاهره المعز صعب عليا شويه
بالتوفيق يا سو
وبالتوفيق للصباغ وسحر غريب

غير معرف يقول...

السلام عليكم
انا شاب مصري بتابع مدونات من فترة ولاحظت انكوا مهتمين بالقراية كتب من نوعية الكتاب دا وتعيش وتاخد غيرها
حبيت اعملكوا اهداء
كتاب صدر في الغرب لسه النسخ اللي هنا قلبلة اوي في الشرق الأوسط
بعنوان
تعيشوا وتاخدوا هه
كتاب ممتع جدا بيتكلم عن مجموعة اطلقت علي نفسها
ecancar
ايكانكارو فيها
sorry
دا وصف الكتاب
المجموعة دي لها زعيم روحي عبارة عن شاب تافه منحل مع اول قلم عيط زي البنات اللي يعرفهم
المجموعة استماتت في اخفاء شخصيته بس اتكشف بسرعة جدا
اما وصفه المجموعة وهي ايه ونشاطها ايه فمساحة التعليق مش هتكفي

هو هيصدر قريب عن دار هنولولو للنشر
ههههههههههههههههههههههههههه

مختار يقول...

السلام عليكم ورحمة الله وبركاته
ياجماعه انا بحب وبعشق كتابات الصباغ بجد دا حد رجعنى أقرأ تانى انا كنت نسيت القراية أساشا والموضوع وما فيه ان الكتاب ده أكيد هيبقى ملوش حل وأكيد هشتريه و هقراه وهقولك رأى ومن غير ما قراه انت جامد يا أحمد --- ولو مش مصدق إسأل صحابك اللى شايفينك كده دلوقتى لا حد بينافق ولا بيعرعر عايز منك مصلحة وبالتوفيق وبالدوام على طووووووووووووووووووووووووووووووول السلام السلااااااااااام
هههههههههههههه
مختار

غير معرف يقول...

معلش بس ال Eckankar حركة دينية جديدة مبادئها مش ولا بدّ و ولا بعد مليون سنة تقدر تدخل مصر لا هي ولا كتبها، ف ايه دخلها بموضوع البلوغ ده؟  

همس الاحباب يقول...

الف مبروك للصباغ
وعقبالك يا باشا
وان شاء الله هاكون موجود فى حفل التوقيع
تحياتى

لماضة يقول...

كلنا احمد البوهي .. كلنا احمد البوهي .. فليبق كل مُدوّن في مكانه :
!!!!!! حسيت ساعتها ان مكتب قيادة الثورة .. هو مكتبة عمر بوك ستورز

انا فطست من الضحك لما افتكرت
الف مبروك للخال وعقبال ما نشوف ليلتك يا عم
للاسف كان نفسي اجي بجد اليوم ده لاني مستنياه زي يومك برضه
بس العلمين علينا حق نعمل ايه
امانه عليك
توصل للصباغ سلامي من حداكي لحداكم

أم .. بوبه يقول...

ربنا يديم عليكم الصحوبية والأخوية

وألف مبروك للصباغ ولسحر غريب وعقبال باقى المدونين يارب

مهندس مصري يقول...

و الله بجد أنا سعيد اني عرفت اتنين محترمين زيكم
ربنا يخليكم لبعض و يخليكم ليا
يارب
مبروك للصباغ و عقبالك يا سوو و منتظرين كتابك

!!! عارفة ... مش عارف ليه يقول...

الف مبروك للصباغ على كتابه

والف مبروك للصباغ على صداقتك له

----------------

أما عن الجماعة المتحزلقين بتوع القيل والقال دووول

فال.... تعوي
والقافلة تسير


وليد

صوت من مصر يقول...

محدش من المطريه ومساجين المطريه يا سوووووو
ينزل حتى كتاب او ربع او اى حاجه
عموما مبروك للصباغ اخوك الصغير واخويا الكبير
وعموما يا كبير عاوز اقولك انى هكون موجود

محمود الدوح يقول...

اه واه واه
مش عجبك الاسامى ياسو
الدو اسم بديل لا ابو دقشوم
مكنش العشا ولا الغدا
انا مش هحكى على التفاصيل بتاع الخناقة
عارف ليه
لانى مش فاكرها بالظبط
لكن هسامحك عشان كلام الصباغ اللى كان هيخلينى اعيط على نفسى من العياط
هروح اجيب المناديل وارجع

SAYED SAAD يقول...

انتوا الأثنين محترمين روبنا يوفقكم يا جميل
وحسنة وانت والصباغ والله يا سو

Rania يقول...

ربنا يخليكوا لبعضو مش يحرمكوا من بعض ابداااااااااا

غير معرف يقول...

بيضة كبيرة انت وصاحبك ومحتاجين قلاية علي حجمكم

Container Entsorgung يقول...

حابيييييييييييييين نشوف الاخبار والمشاركات الجديدة !

Kellerentrümpelung Wien يقول...

شكراً جزيلاً ع المجهود ... :)

entrümpelung wien يقول...

شكرا على الموضوع
entrümpelung
entrümpelung
entrümpelung wien