السبت، 29 صفر، 1431 هـ

!! رُبع قرش .. خيال

" وهكذا قرر عوّاد أن يهتم بزراعة أرضه , وأن يعيش كما الأنبياء , يأكل مما يزرع "
. اكتب موضوعا لا يقل عن ثلاثين سطرا ينتهي بهذه الجملة

كان ده سؤال التعبير اللي جالي في اولى اعدادي , ونتيجة لفُرجتي على أفلام رعب و فضاء مع
!! اخواتي .. قلت لروحي أكتب موضوع في الخيال العلمي

قمت كاتب ان "عواد" ده عيّل صغير من الأرياف .. كان بيلعب في الغيط بتاعهم في يوم .. وشاف كورة مضيئة ورا شجرة جميز .. قام استغرب من شكلها و راح مخبّط عليها .. وفجأه انفتح باب في الكورة دي وطلع منها كائن شكله غريب .. قال لـ "عواد" انه جاي من الفضاء عشان يكتشف كوكب الأرض

قام "عواد" أخد الكائن الفضائي عشان يتفسحوا في البلد .. و طلعوا عالشارع الجديد - كل بلد فيها "الشارع الجديد" مع انه أول شارع اتعمل اصلا !!- وشافوا المحلات اللي مشغلة أغاني شبابية هابطة لمغنيين لابسين تريننجات - كانت موضة حميد الشاعري والناس الحلوة دي - وبعدين راحوا على كافيتيريا البلد اللي بتعرض أفلام هندي و كاراتيه .. والناس بتتفرج عليها وهي بتشرب الأرجيلة
!! اللي هي الشيشة بس باللغة العربية الفُصحى , مانا كنت شاطر بقى ساعتها وباقرا فلاش

وختموا اليوم بالفُرجه على مصنع الطوب الأحمر بتاع العُمدة , واللي بيعتمد في تصنيع الطوب على
!! حرق الطمي المأخوذ من تجريف الأرض الزراعية .. بتاعة الفلاحين اللي بيأرجلوا

طبعا الكائن الفضائي بعد ما شاف البهدلة دي قال لـ "عواد" بلدكم هتبوظ ياعم الحاج .. وهتبقى خرابه زي الكوكب بتاعي .. ولازم تتصرفوا , و ودّعوا بعض .. و ركب الكائن الفضائي مركبتة
!! الفضائية وضرب بلانص في الهوا .. وخلع

" وهكذا قرر عوّاد أن يهتم بزراعة أرضه , وأن يعيش كما الأنبياء , يأكل مما يزرع "
--
لمّا ظهرت النتيجة لقيتني جايب درجة منيّله في العربي - مع اني كنت شاطر وعارف ان الشيشه هي الأرجيلة !!!- وطبعا ابويا و امي - الله يرحمها - شافوا الدرجة دي من هنا .. وصباحو ضرب مُبرح
!! من هنا , نفس الضرب بتاع افلام الكاراتيه اللي شافها "عوّاد" وصديقة الكائن الخرافي

لمّا سألت مدرس العربي - بعد فترة العلاج والنقاهة - ايه الغلط اللي عملته عشان اجيب الدرجة
!! الوحشه دي .. و ازاي ده يحصل وموضوع التعبير كتبت فيه كزا كزا
!!!! أنا عايز اعمل اعادة تصحيح ورق .. عايز اقابل السفير

لسه لغاية دلوقتي فاكر نظرة استاذ العربي لمّا قلتله : كتبت في التعبير كزا كزا !! , كان ساعتها بيصطبح وبيضرب شقة فول بالبتنجان .. اللقمة وقفت في حلقه و وشه احمرّ كما التنين الاسطوري - او التنين البرشومي .. أيهما اقرب للاحمرار - و راح زاعق وقال : انت اللي كتبت الهبَل ده !!؟؟

فهمت بعدها اني أخدت صفر في التعبير .. عشان الكائنات الفضائية والخيال العلمي , ومن يومها قلت
!! جاي يا خيال .. لا عربي ولا انجليزي ولا كيميا , مع ان الكيميا أساس الخيال .. بس لأ برضك

حتى مادة الرسم .. كنت على طول بارسم بندقية ودبابة في أكتوبر , و نخلة و بيض ملوّن في شم
!! النسيم , وخروف و بقرة في عيد الأضحى .. أو عيد العُمّال مش فاكر الصراحة

ولمّا اتجننت مرّه و رسمت نهر النيل و في الخلفية بتاعته الأهرامات .. بعد ما صدّقت أستاذ التاريخ لمّا قال إن أحجار الأهرامات .. تم نقلها عن طريق نهر النيل من أسوان , انضربت علقة موت من "مسز سعاد" بتاعة الرسم - مسجله خَطَر "عَبط طلبه" - وكانت بتقول وهي بتعبُطني على منطقة حسّاسة جدا
: حمار مين اللي قال ان النيل جنب الهرم ؟؟؟
!! وانضربت نفس "العبطه" من الحمار - أستاذ التاريخ - لما قلتله على اللي حصل

!!! الغريب في الموضوع .. ان الغرب ماوصلش للتطور التكنولوجي .. إلا بالخيال

يعني حد كان يصدق ان حتة حديده .. تبقى وسيلة اتصال زي الموبيل , أي نعم احنا هنا في مصر بنتكلم مع ناس تانيه غير اللي بنتصل بيهم .. بس خيال ده ولا مش خيال !!؟؟
لا واللي يغيظ .. حتة الحديدة دي بتدخل عالنت بدال الكومبيوتر اللي حجمه كان قد كده .. وبتدخل
!! عالنت من غير لا سلك ولا سحر ولا شعوذه
!!! طب والله لما كنا بندخل النت بالتليفون الأرضي .. كنا بنقول خلاص القيامة هتقوم بكره

ليه هربنا من الخيال وبقينا بندفن نفسنا بنفسنا في الواقع !!؟؟
ليه مافيش فيلم مصري عليه القيمة - أو ماعليهوش قيمة حتى - بيتكلم عن الخيال والفضاء !!؟
.. ده آخر فيلم مصري كان ليه علاقة بالفضاء .. كان فيلم "أونكل زيزو حبيبي" .. بتاع الشاشاهات
!! الشاشاهات يا خاله
ده حتى أفلام الكارتون اللي بنعملها هنا في مصر , بدل ما نستغل اننا كده كده بنرسم .. ونرسم شخصيات خياليه او حتى حيوانات .. رسمنا كارتون لشخصيات واقعيه زي بكار و بسنت
!!! و دياسطي و سوبر هنيدي

ويوم ما ربنا كرمنا و رسمنا حيوانات في كارتون .. رسمنا المِعزة رشيدة بتاعة بكار .. وجبناها بتمأما كمان !!؟
حتى الكتابه .. مُعظم اللي بيكتبوا ساخر .. معتقدين ان الكتابه الساخرة هي نوع من أنواع
!! الخيال والفانتازيا .. مع انها فانتازيا واقعيه برضه

.. اللي أغرب وأغرب بقى .. اننا ماهربناش من الخيال وبس .. لأ
!! الأغرب .. اننا هربنا من الخيال .. والواقع هو راخر

: ملحوظة
حد يشوفلي معاه رُبع قرش حشيش .. لزوم الخيال !!؟

سوووو

هناك 42 تعليقًا:

adel يقول...

ههههههههههههههههه

موضوع جحامد قوي يا اخ سوووو

صيدلانيه طالعه نازله يقول...

هههههههههههههههه
اقولك انت خدت صفر ليه فى التعبير
مفيش كائن فضاء يا ابو خالو بيضرب بلانص فى الهوا و يطير
اكيد دى كانت النقطه محل الخلاف و الجدل
و بعدين مش مكسوف و انت بتقول مس سعاد عبطتنى و مستر مش عارف مينضربنى
طيرت التابوووو اللى كنت راسماهولك فى خيالى يا سوووووووووووو

بالنسبه للحشيش حابقى اتصرفلك بعدين عشان البلوج سبوت ملغم مخبرين

Che يقول...

بوست جامد جدا يا سوووو .... الفكره ان حتى الخيال بيبقى بيهرب مننا ... يعنى مثلا لما تيجى تتخيل حاجه دلوقتى تلاقى الدنيا بتوديك لحاجه واقعيه ... اقول على رأى منتج العصر الحاج السبكى الله يخرب بيت الواقعيه اللى بوظت دماغ الناس

كيكى عوووووو يقول...

الأغرب .. اننا هربنا من الخيال .. والواقع هو راخر
انت جبت من الاخر

لولا وزهراء يقول...

ايه الكلام الجامد اوى ده كله
تقريبا اول زياره لنا هنا
وفى الاخر الاقيك بتدور على على قرش حشيش
ياترى لو فى حشيش ممكن تقول ايه اكتر من كده

على فكره كلامك جامد
ان شاء الله تتكرر الزيارات

ENG./ELSAYED,PMP يقول...

ليه هربنا من الخيال وبقينا بندفن نفسنا بنفسنا في الواقع !!؟؟

لأن الخيال يحتاج إلى جراءة ... وفى ظل الحكومات القمعية ... لا يجروء أحد على التفكير فى الواقع ... فما بالك فى التفكير بخيال

أى حد بيفكر بخيال فى البلد دى بيتهم بأنه ... ثورجى ... لاسع ... مخه ضارب ... وهكذا مما تجود به قريحة المتخلفين عقاياً ... اللى مش مخلصهم من ربنا نتحرك خطوة

كنت كاتب حاجة ظريفة زى كده ... هيكون ليه الشرف لو قريتها

http://goodpractice-pmp.blogspot.com/2010/01/blog-post_11.html

مواطن شووجااع يقول...

هههههههههههههههه

جميلة جداً

هربنا من الواقع ومن الخيال

وحالياً واقفين في بُعد خامس

لا طول ولا عرض ولا إرتفاع ولازمن كمان

nor يقول...

بص يا اخ سووو
حاليا انت الوحيد اللي بيقدر يخليني اضحك
بجد ربنا يكرمك
و ايه ضرب بلانص دي هههه
تسلم ايديك
ما تنزل كتاب بقي
انا بفتخر ان تطبيقة طلعتك يا احمد بجد
لانك زومل
تحياتي و مودتي

Muhammad Saber Abdou يقول...

هو الواضح ان انت بتصطبح من زمان
تقريباً من اعدادي

الله معك

سبايدرمان spiderman يقول...

حبيبيي .... حبيبي
من اصحاب الفشل في اللغه العرببه
ههههههههههههههههه
لا انا بقي عكسك شويه
كانت البلاغه عندي (( وحشه وشحه ))
بيتهيألي جبت فيها صفر
هههههههههههههههه

سبايدرمان spiderman يقول...

و بعدين يا عم هو فيه وقت دلوقتي للخيال
الوقت كله بقي لتشجيع المنتخب وبس ^_^

و بس عشان منروحش في داهيه

...

اه على فكره

الحشيش بقي سهل دلوقتي تجيبه

اطلب حاجه صعبه

زي ابنوبه مثلا

هههههههههه

خواطر شابة يقول...

بيننا وبين الغرب سنوات ضوئية قارن مناهجهم الدراسية بمناهجنا وسترى الفرق الشاسع نحن مدرسونا يؤمنون بمبدأ بضاعتنا ردت الينا ويقتلون فيك اي اتجاه ومنحى للتفكير او التحليل او اضافة من عندك وهذا نكتشف اننا في النهاية نكون أستغفر الله العظيم كالكلب يحمل أسفارا
تحياتي لقلمك

Wanda يقول...

:-)))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))))

انا عرفتها علشان الترننج:-)))))
المهم انت كنت بتضرب من الكل ليه ؟:-)))))
محبوب قوى كده من يومك حتى مدرسة الرسم:-)))

بس تعرف باين عليك كنت شاطر عرفت منين ان الكميا خيال :-))))

فكرتنى لما قالولنا تقريبا فى امتحان الاعدادى ارسم غلاف كتاب اعجبك
رسمت غلاف كتاب : على باب زويلة
سور و بوابة اثرية وواحد مشنوق متعلق فيها :-))))))))))))))))))))
معرفش ليه كنت مستبيعه المادة :-)) ساعتها بس نجحت على الحرركرك اصلها كانت الشهادة تلاقينى صعبت عليهم :-))))))))))))))

الا مين دول بتوع الكارتون ؟؟معرفش الا بكار
انكل زيزو ده بتاع محمد صبحى؟؟ ايه شاشاهات ؟؟
عايزة اشترى القاموس بتاع اللغة السوووية الاقية فين ؟:-)))))

اه معنديش هنا لاقروش و لا اربع و لا حشيش فيها اصناف اخرى
اخطف رجلك لسيد درويش حتلاقى طلبك

maioya يقول...

يعني كتبت الارجيله وقولت فصحي
وجي علي بلانص ومعملتهاش فصحي
هوا ده سبب الصفر
ههههه ضحكتني وانا كنت مكتئبه :)

.. اللي أغرب وأغرب بقى .. اننا ماهربناش من الخيال وبس .. لأ
!! الأغرب .. اننا هربنا من الخيال .. والواقع هو راخر

احنا اصلا بنهرب من نفسنا

حـــلـــم كــــان يقول...

ههههههههههههههههه

يخرب بيتك بوستك ده موتنى من الضحك

بغض النظر ان عواد باع ارضه اللى هو المفروض يزرعها دىمن زمان

وبغض النظر عن الجميز اللى معرفش شكله لحد دلوقتى

بس والله موضوع تعبير جامد

واحلى حاجه فيه الأرجيلة دى

بس معتى كنت باقرا فلاش

سمع هوص (Abo 3li) يقول...

اولا الصفر ده قليل.. كان المفروض صفرين.. ولا تلاتة...
لأن سيدتك مخدتش بالك من اهم حاجة في السؤال.. "لا يقل عن ثلاثين سطرا"...
مهو اصل احنا بنهتم ب الكم اكتر بكتير من الكيف... (مش فيلم الكيف بتاع محمود عبدالعزيز)....

يعني انا مثلا... كنت ديما في امتحانات العربي وبالتحديد التعبير.. بهتم بأني اكتب اقبر قدر ممكن من الجمل والكلمات...
يطلب مني تلاتين سطر اكتبله خمسين... منا عارف ومتأكد اني لو كتبت قليل.. ممكن المدرس يقري ال انا كتبته... وساعتها هيحصلي زيك كده تمام...
انما لو كتبت كتيييييييييييير هيكسل يقري وهيقيس بالشبر..

ثانيا: انت مهتمتش ب انك تظهر اخلاق ابن الريف وكرمه.. ومخلتش عواد يعزم الفضائي علي حجرين معسل.. ولا حتي شيشة تفاح...

ثالثا: بالنسبة للحشيش.. عايزوه افغاني,, ولا مغربي؟؟

تحياتي

صوت من مصر يقول...

سووووووووووووووووووووووووووووووو
عاوز اقولك انى لما بتخيل بتخيل فى سرى خوف من ان الناس تقول ده اهبل وطفل
بس تقريبا فقدت الخيال بعد ما القرش خلص
هايل بجد

أبو حميد يقول...

:))

تحفة يا سو كالعادة
ياريت ماتطولش المدة بين بوستاتك التحفة دى

فاتيما يقول...

كالعادة احييك يا سووووو

انا دايما اقول الجملة دى للى حواليا
يا ريت نستفيد بنعمة الخيال
و نستمتع بيها
عشان الحياة تحتمل شوية


و على فكرة بقى ...لمعلومات مدرسين الرسم الكفتة بتوع زمان

النيل كان جنب الأهرامات فعلا
بس زمااااااان قوى
قبل الأخ على مبارك ما ييجى
و يقرر يغير الإتجاهات
و المحاور ...و يعملوا الدائرى
فإنت صح يا بنى و مغلطتش
و لازم تعيد تصحيح ورقك


الخيال نعمة للى يصونها
و يعرف قيمتها
و مش محتاجة و الله
و لا ربع قرش

Heba يقول...

ههههههههه

ضحكتنى بجد

wella يقول...

ههههههههههههههههههههههه
لا جامد

والله معاك حق تقريبا الشعب كلة عاوز حشيش عشان يتخيل ويعيش فى الخيال ويهرب من الواقع
دة حتى فى افلامنا كلها واقعية بحتة


والله لو لقيت حشيش ابقى افتكرنها بحتة

صبرني يارب يقول...

قرش بحاله يا سو

طب لو حد شافلك يا سو ابقى افتكر اختك برضه


بس خلي بالك انا ماليش فى الخيال خالص على فكره

هاحقد عليك كده

انا حاولت مرارا وتكرارا اعيش فى الخيال لم استطع ذلك البته

وبعدين بذمتك فى كائن فضائي برضه لما ينزل الارض يعمل جوله سياحيه مع واحد اسمه عواد

ويكون الكوره بتاعته بتضرب بلانص فى الهوا

ده ايه الخيال الخصب الى من اعالي وادي النيل ده
ههههههههههههههههه

غير معرف يقول...

عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى عبقرى

يا فنّان .... يا أستاذ .... يا يا يا .... أقول إيه يا جزمة (وسامحني يا حبيبي علي اللفظ دة بس إنت السبب وإنت أكيد مقّدر إنفعالي ) .... من أول الصورة وإنت مصمم تبهرني.... بس دي مشكلة يا احمد إنت ( بعبرت ) عن كل اللي جوايا .... تحياتى... خالد بوند ... بتاع الفيس بوك او بمعنى أدق بتاع مسرحية خط النار

رامى ظاظا يقول...

حرام عليك بقة عقدتنى بحلاوة كيبوردك... قصدى قلمك ده

صدى الصمت - عاشقة الورد - يقول...

على فكرة انا بتعجبنى أفكارك وكتاباتك وبأدخل أستمتع كتير بيها
تحياتى

حسبى ربى يقول...

حقولك ايه .... رائع والله وجاى عالجرح ... اصل انا من يومين قلت ادخل سينما فطبعا مالقتيتش ولا فيلم عربى يستحق الوقت والفلوس اللى حتضيع فيه ..... فدخلت الفيلم اللى مجنن العالم " افاتار " ... ومن يوميها بجد اتجننت .. خرجت من الفيلم وانا بقول اننا مش عالم تالت .. دا احنا عالم 121 اه والله !!!!!

المهم ما تشلش فى نفسك من التعليم..... المصريين كلهم بيتعلموا فى المدارس كيف يصبحون بتنجان !!!!؟؟

ست البيت يقول...

لو بطلنا نحلم نموت
لو عاندنا نقدر نفوت

ولذا قررت دولة بتنجانة العظمى معاقبة اللي ناوي يحلم
بخمناشر سنة سجن مع العبط والهبل ومشاهدة ميلودي افلام واغاني
ومين ابو الليف دا كمان اللي غزالي بقول عليا
رحمتك يا رب

غير معرف يقول...

السلام عليكم
كل سنة وانت طيب
واصدقائك
وكل زورار مدونتك
وكل سنة وانت بتتمتع بخيال واسع وواقع افضل
ههههههههههههههه
ربع حشيش مرة واحدة
اوعي حد يضحك عليك احسن المضروب فيه كتير اوي

أحمد عاطف يقول...

السلام عليكم يابو حميد

احنا مهربناش من الخيال والواقع

احنا اتزنقنا في الخيال

اسف جدا في التعبير اللي هاقوله

عمرك شفت حالة تحرش جماعي

بيلفوا حوالين البنيه كده من كل الجهات

واللي بيطول حاجه بيلمسها

وبيكون هدف البنت حماية أغلى ما في جسدها من وجهة نظرها

المصريين بقوا زي الفتاه

بيتم التحرش بيهم جماعيا ... من الحكومة ومن الاقتصاد ومن الفكر المحيط ومن كل حاجه محيطة بهم

فبتكون النتيجة انهم بيحاولوا يحموا اغلى ما يملكون من وجهة نظرهم ويتخلوا عن اي موضع اخر لن يضير مسه في شيء

اللي هو الاسرة والبيت

فبينسوا كل حاجه الا الحاجه دي

فبينغمسوا في قاع الواقعيه اللي بتتحول لسواد

تحياتي

شاب فقرى يقول...

عارف يا سوووو
زويل لما جابوه فى اخر لقاء مع منى ومحمود سعد
كان بيحكى لهم عن واحد بيصنع ميكروسكوبات
احسن صانع ليها فى العالم
بياخد مرتب خيالى
المهم الراجل دا ساب الجامعة اللى بيدرس بيها واستقال من شغله
ولما زويل كلمه وقاله هتروح فين
قاله وانا صغير كنت بحلم اعمل عربية بتطير
فهروح افتح شركة لاختراع العربيات دى
ودا اللى حصل فعلا والشركة موجودة فى ايرلندا دلوقتى
يعنى الخيال دا اهم حاجة
انا بقى من كتر ما عشت فى الخيال بقيت بهرب من الخيال للواقع
لانى اتعودت عليه وبقى انتيمى اللذيذ
وبقيت بشطح فى كل حاجة
فقرقرت انى اهرب من الخيال وابطل اعمل فيها بتاع خيالات
بالنسبة للملحوظة :
لو لقيت ربع قرش ابقى هاتلى معاك
لان الخيال وحشنى اوى
فقرى

سومه...مجنونه فى بلد عاقل يقول...

بص يا صبحى انت تشوفلك عقد فى السعوديه :)))

Baskouta يقول...

Hiiiiiiiii
I just wanted to say hi and I was so much delighted to meet you
Here is the link of my blog
http://pinkysequins.blogspot.com/
hope you visit my blog

شكرا حضرتك
تحياتي البسكوتية لحضرتك
ههههههه
حضرتك حضرتك حضرتك

فيشة بنت كبس يقول...

loooooooooooooooooooool تحفة:)

غير معرف يقول...

البوست جااااااااااااااااااااامد اخر حاجه انا خاصت كلام المجيح اللى عندى ومش عارفه اعمل ايه شكلى لازم انزل السوق عشان اشترى كل ماهو جديد فى عالم المدح بس عشان الاقى كلام اعرف اقولهولك
ROKA

Bee يقول...

وضرب بلانص في الهوا .. وخلع

انت بتجيب الكلام ده منين ؟؟
ده منتهى الكوميديا والخيال كمان!!!!!

خالد المصري يقول...

عمنا سوووووووووو
وحشني يا معلم

بقالي كام يوم بسال نفسي نفس السؤال
هو ليه كله بيكتب كتابه ساخره
هل لان واقعنا الحالي لم يعد يحتمل الا السخرية
ولا اثبات لنظريه ان المصري ابن نكته وحدق ويعرف يضحك على الدنيا كلها وهو بيضحكها في نفس الوقت

خوفي يا سوو يكون هو ده السبب
متزعلش مني
لو فعلا احنا معدش عندنا غير السخريه
تبقى كارثه
لان المره دي هنبقى بنضحك الناس علينا واحنا فاكرين انهم بيضحكولنا

وحياك

SAYED SAAD يقول...

ازيك يا سووووو عامل ايه
هو مش هروب من الخيال والواقع هو مبقناش عرفين يعني ايه خيال ويعني ايه واقع وعلى فكرة الحاله دية مش محتاجة حشيش دي محتاجة تغير مخ
كون بخير
سيد سعد

غير معرف يقول...

مين قال انه مفيش افلام خيالية مصرية؟ امّال فيلم السفارة في العمارة موش خيالي؟ ده ما فيهوش صحون طائرة ده فيه افيال بتطير وتماسيح كمان!!! اخد اغنية ضربت السوق وركّب عليها فيلم، مش خيال ده؟موش بس كان بيحشش في عدّة مشاهد ده كمان اتعرض عليه قرش حشيش علشان يكيّف مزاجه هو واصحابه، ده موش خيال؟ هو ضروري لازم يكون فيه مخلوقات فضائية علشان يبقي الفيلم خيالي؟ صحيح افلام فيها العجب!!!! وبتحس كده انهم بينصبوا على الناس ويستهزئوا بذكاءهم. الظاهر ان الفيلم ده ما اتعرضش على الرقابة!!!!!! خيالي بقى!! 

Rania يقول...

و الله دمك عسسسسسسسسل يا احمد
موضوع تحفة بجد فوق الرائع
فكرتنى بذكريت الافتكاسات بتاعه زمان و المدرسة و المدرسين و المدرسات اللى جايين من قصر محمد على راسا اليك


بجد تسلم سطورك

Container Entsorgung يقول...

حابيييييييييييييين نشوف الاخبار والمشاركات الجديدة !

Kellerentrümpelung Wien يقول...

شكراً جزيلاً ع المجهود ... :)

entrümpelung wien يقول...

شكرا على الموضوع
entrümpelung
entrümpelung
entrümpelung wien