الاثنين، ١٩ ذو القعدة ١٤٢٩ هـ

هو في حاجه ؟؟؟

كنت مروح البيت وانا منشكح وزي الفل بعد ماشفت فيلم زي النهارده .. وانشكاحي زاد لما ركبت المترو ولقيت مكان لروحي عشان اقف بروقان .. وابص كده على يميني الاقي واد وبنت عمالين يبصو ناحيتي ويضحكو وكأنهم بيتريقو على البيريه اللي انا لابسه .. والواد كان من نوعية الشباب المتتامر اللي حاطط شعر على جِلّو .. قصدي حاطط جل على شعره وموقفه زي القنفد .. والبنت لابسه هدوم تكني كلر ومحزقه وملزقه .. وقال ايه لابسه حجاب ايراني عباره عن عدد اتنين كوفرتا صوف العسكري

في الاول قلت لروحي ياد كبر دماغك .. لكن لقيتهم عمالين يضحكو ويكركعو ضحك وبان قوي انهم بيتريقو علي .. قلت لأ بقى .. رحت متجه ناحيتهم .. وعلى فكره .. انا عمري ماكنت ضد ان واحد يحط جل على شعره ولا واحده تلبس حجاب ايراني ولا اسباني حتى .. لكن لما الحوارات تدخل في الدح .. يبقى ماحدش يقول أح

دخلت عالواد اللي اول ما شافني هو والبنت قلقو مني وكتمو ضحكهم
سوووو : هو في حاجه ؟؟
الواد : - وهو بيداري ابتسامته وبيحط مكانها نظرة اللامبالاه - انت اللي في حاجه ؟؟
سوووو : لأ اصل لقيتك انت واللي معاك عمالين تبصو ناحيتي وزي ماتكونو بتتريقو علي او حاجه كده
البنت : - وعينيها بتقول يكاد المريب يقول خذوني - وهنتريق عليك ليه يعني !!؟؟
سوووو : مانا برضه قلت اجي واسألكم .. لو انتي شايفه في حاجه غلط .. قولي
الواد : لو احنا عايزين نقول حاجه هنقول .. ومش هنخاف
سوووو : اه مانا عارف طبعا .. وعارف برضه انك لو هتتريق على البيريه اللي انا لابسه .. هتكلمني .. وانا ساعتها ممكن اتريق على شعرك اللي انت موقفه بجل كأنك قنفد متكهرب
!!!!! الواد : نعم
سوووو : ومش بعيد كمان اتريق على حجاب الانسه اللي معاك .. واللي شكلها هربانه من قضية تار في الصعيد ومتلفحه بجلابية العمده وفاكراها حجاب
البنت : هو في حاجه ؟؟؟؟؟
سوووو : لأ ابدا .. انتو في حاجه ؟؟؟؟


ملحوظه

بعد ما قلت الكلمتين اللي قلتهم .. لقيت في كام واحد حوالي بيبصو وهم منشكحين قوي .. تقريبا انبسطو من اللي عملته .. وشكل الواد والبت كانو عمالين يتريقو ويضحكو على كل اللي في المترو
انا شفت فيلم زي النهارده واتكلمت عنه شويه في سينماتك .. صحيح رغيت كتير قوي قوي قوي .. بس قلت يمكن حد يحب يقرا اللي كتبته

سوووو

هناك ٣٨ تعليقًا:

Alkomi يقول...

اقفشك اولا و بعدين ارد عليك


قفشتكككككككككككككككككك

Alkomi يقول...

يا سو يا جامد ياللي مثبت الفرافير و الامامير و التمامير

ايه ياد الانحراف ده كله

انا كماتن انشكحت لما لقيتك روحت و عكننت عليهم

اسسسسسسسسسسسسسسسسسسسسسسسسسد

سلامي لحمزة اهم من القنفد اللي انت هبيت فيه هو و العرسة اللي معاه

Unknown يقول...

هههههههههههههه

والله جدع
يستاهلوا
حاكم العيال دي بتجيبلي حساسيه اصلا
وهما مش شايفين روحهم في المرايه عاملين ازاي

الا قولي يا سوو
هو ايه البرييه ده الي انت كنت لابسه يا خويا

TAFATEFO يقول...

والله انت راجل عسل .. وقعدتك ميتشبعش منها

:D:D:D

حاجات جوايا يقول...

ههههههههه
برافو عليك
فيه ناس فعلا فاكرة نفسها محصلتش ولو دوروا على نفسهم هيتكسفوا ينزلوا من البيت

خمسة فضفضة يقول...

السلام عليكم ورحمة لله وبركاته

احسن يستاهلو

بس ايه الحجاب الايراني ؟؟تقصد الاسدال يعني ؟؟
وازاي حجاب ايراني ومحزقه وملزقه ؟؟؟؟

نرجو التوضيح للاهميه
ههههه

Mony يقول...

هههههههه

شاطر و الله

اصل في ناس ماتجيش غير بالسك علي دماغها

د. إيمان مكاوي يقول...

أحييك إنك مسبتهمش ..ولقنتهم درس في الأدب
والأشكال دي موجوده كتير في كل مكان ..وخاصة البنات إللي عاملين نفسهم محجبات ..وهما بيقولوا للناس تعالوا بصوا عليَ
تحياتي

Z_Diva يقول...

mashy ya 3am , bt3rf tat3al inta wllahy :D

bas ahm 7ga felila de, in fe new cinnematik post :D

la wana asln hmout brdo washof zay elnharda -bma innny fe blad elwa2 wa2 welaflam elhind wel farsy awla mel3rby felcenimat hna :'(

mostafa rayan يقول...

باشا
اهم حاجة انك ماسكتش في ناس كدة يا سو يا اخويا لازم تنسك على دماغها علشان تحترم نفسها

me يقول...

الله ينور عليك والله
انا برضو العيال دول بيجنونى
انا بيتهيالى انى لو كنت هناك كنت هبقى مبسوطه برضو من تصرفك

اما فيلم زى انهارده انا شفته و طلعت مبسوطه برضو
اه الموضوع مكئب بس جامد جدا انهم يثوروا على الريتم المعتاد فى السينما اليومين دول

ربنا يقويك على فكره لماضه حكيتلى
انت قدها
و يقوى والدته

يلا تشااااااااوووووووو

خالد المصري يقول...

الناس دي شكلهم هيرجعونا لايام زمان وشقاوة زمان يا معلم سوووووو

عموما انا مش هتكلم التاريخ هو اللي بيتكلم وبيشهد

وانا عارف وانت عارف واحنا الاتنين عارفيين


بيس

Doba يقول...

حركة جاااااااااااااامدة موووووووووت
بجد برافو عليك
أفحمتهم

سلامات
هبة

ست البيت يقول...

يا سلام سا سلام
ازيك يا واد يا سوووووو
اخبار جنابك ايه ؟
اولا ودا المهم الواد حمزة عامل ايه؟
اسمع الكلام واتأكدوا قبل ما تزحولوا الواد بالكيماوي
بعد الشر عليه طبعا من كل سوء

وبعدين حلوة قوي الشو دا بس هو ايه اللي كنت لابسه
اصل اللغة بتفرق في اسكندرية انا مش عارفة هو ايه بالضبط
بس اعتقد انه الكاست
بس بجد انا بتضايق قوي من الاشكال دي
طب انت قاعد مع واحدة مالك بالناس اللي احسن منك
وطبعا دا مش معناه انت انت اللي احسن منهم
وش مطلع لسانه
عموما انا بدأت اكون كده برضه ايجابية
يعني مس حسيب حقى بعد كده

صحيح يا سوووو
تصور انا نسيت اطلب رقم تليفونك او تليفون مكتبك؟
واضح اني الوحيدة اللي مصر معرفش تليفون سووووو
عموما تليفوني في الفيس بوك او خده من اي حد مش فارقة
بس عشان تطمني على حالة حمزة
شفاه الله وعافاه

Crystal Lobna يقول...

يا جامد، يلا مش خسارة فيهم، واحد متتأمر و واحده عمله أيرانية، هو أيه الحجاب الأيرانى ده؟

ميرا ( وومن ) يقول...

هههههههههههههههههههههههههههههه

حلوه القنفد المتكرب دي

بس علي فكر يا سووو البونيه الصوف ده مش إيراني ده اختراع طلع علينا من فرنسا بعد مامنعوا فيها الحجاب يعني أوربي بحت

لا بس موقف جامد ويارب يجي اليوم اللي نبطل نشوف فيه المناظر اللي تحرق الدم دي

سلام فراوله

Unknown يقول...

ههههه
حلو الموقف اللى عملته بس محتاج جرائة
كبستهم بس بجد جدع
هم يستاهلوا ان حد يكسفهم جايز يحسوا ان اللى بيعملوه غلط

انا حره يقول...

طيب البيريه وعرفته

ايه الحجاب الايرانى دااااا؟

حلو ولا وحش يعنى ولا شكله ايه

فاتيما يقول...

يا سوووو
ازيك
و النبى يا شيخ احملك امانة
اول مرة أشوفك فيها تدينى دورس فى الشجاعة دى
و تقولى بتجيبها منين و أزاى بتقدر تعمل كدا ؟؟؟
أصل أختك بتحاصر بالنظرات الرذلة دى يمكن من شكلى و مكياجى و لا حاجة مبعجبش ناس كتير و ببقى متغاظة زيك و نفسى اروح اكلمهم بس بخاف
بخاف الموقف يتطور و اللى قصادى يقل ادبه و معرفش ألم الموقف
تبقى تقولى سر الصنعة و حياتك حتى لا أتعرض للكبسة دى بإستمرار
بدعى لحمزة من قلبى و مش ناسية
تحياتى ليكى يا غالى

مهندس مصري بيحب مصر يقول...

قشطة عليك يا معلم على الفرافير
اخبارك ايه ؟ و اخبار حمزة ؟
و ايه الحجاب الإيراني ده ؟

حمامة يقول...

ههههههههههههههه

بجد انت مية مية

قبل ما حد يتريق على خيره يبص لنفسه

غير معرف يقول...

يا ابن الايه

ايه الحركات دي؟ هههههههههههه
لأ جامد جمودية يا سوووو

عموما المترو ده منه لله اللي ان شاء الله هرقعه بوست قريب قول يا رب عملني طولة اللسان والايد كمان :) بيربيني وربنا يا سوووو

سيبك انت ،، اخبارك ايه يا سوووو؟
ربنا يطمنا عليك ويروق بالك
ونسمع عنك كل خير يا سوووو

مها ميهوووو

maha zein يقول...

يعني اتضربت من الاخر ولا ايه
وبعدين يا جدع انت انت غاوي خناق
ولا ايه يعني
مالك انت ومال خلق الله
عجايب يا زمن
يا عم روح كده بقه

3ala asm masr يقول...

نفسى أعمل كده أنا كمان
ساعات ناس بتبص وبتغيظنى لدرجة أنى بحس أنى جايه من عالم تانى لكن مبعرفش أعمل زيك يا سوووو

قوس قزح يقول...

هههههههههههههههه
و الله انت فئرى
انا متخيلة شكلك و انت رايح تبرق لهم
و تقولهم هو فى حاااجة

و بعدين يعنى ما تغير البرييه و خاليك على الموضة انت كمان و البس ايس كاب ولا حتى هوت شورت هههههههههه
روش نفسك كده ده فى الاخر هتلاقى بينك و بين العيال دول اربع خمس سنين من الاخر

عيش يا عجوز حياتك
و بردو اللى يبصلك بعين بص له باتنين
لا اربعة :)

غير معرف يقول...

مدونتك كلمة رووووعة .. قليلة عليها
اان متباعها بس مش برد
بجد اسلوبك حلو اووووووووووى
...
بالنسبة للبوست: فى ناس كده كتير فعلا .. ويحسسوك انك جاى مثلا من المريخ

بس كويس انك خدت بحقك .. انا لو مكانك مبعرفش اخد حقى ... وديه مشكلتى.. ايزة لسانى يطول شوية

بعبعه يقول...

هو الطرح الي بتبقى البنات لابسها دي عامله زي اون الاسد دي تبقى اسمها ايراني ؟؟

ده الايام دي وربنا ما كنت اعرف

بس حلوه موت جلابية العمده
ههههههههههههههههه

Known as PHYSCO يقول...

صراحة مش عارفة بجد أنا معاك ولاضدك .. بس مش قادرة غير إنى أقول إنك لما حبيت تعمل حاجة صح منوجهة نظرك عملتها وماخفتش ود شئ حلو أهنيك عليه

على فكرة .. أنا طول عمرى فى الأفلام والروايات بيعجبنى مساعد البطل أكتر من البطل :)

عاشقه وغلبانه يقول...

كويس انك مش تسيب حقك وخصوصا مع اللي يخاف مايختشيش
بس سؤال برئ ممكن تترجملي اللي كنت لابسه....؟؟؟
مدونتك جميله وانا متابعه ليها من زمان بس ماكنش ينفع ارد غير بعد ماعملت مدونه

shahy يقول...

السلام عليكم

ازيك ياسوووو عامل اية؟

اول مرة اقعد على الكمبيوتر من كتير اوي وكالعادة دخلت عندك اول واحد وكنت ناوية اكتب بوست جديد لكن دلوقتي نفسي اتسدت
عموما ربنا قادر على شفاء حمزة بأذن الله وربنا يقوي مامتة وباباة وانت طبعا

حاجة اخيرة بقى انا زعلت جدا من دوبة وخيخة علشان مفيش حد منهم قالي وبجد بجد هاخاصمهم علشان المفروض انهم عارفين اني مش بدخل على النت خالص والمفروض اني بعرف اخبار اصحابي المدونين منهم

معلش تعليقي بعيد عن البوست

اهو ده عيبه يقول...

مين ده ياريس اللى يستجرى ويتريق عليك ولا على البيريه ده لا عاش ولا كان
دى عيال اصلا هئ ومئ وطبلة وشخاليل
يعنى واحد زى ده من كف حيتكوم على الارض ويغطوه بعباية الاخت مخيمر اللى معاه

بس كويس انك عملت معاهم كده عالم متجيش غير بالعين الحمرا
سلام ياكبير

kochia يقول...

هي شجاعة طبعا
بس كانوا طلعوا لسانهم طويل ومجرمين بالفطرة
كنت هتعمل ايه ؟؟

الغلباويه يقول...

ههههههههههههههههه
بجد برافوا عليك انك كلمتهم
المدونه حلوة اووووووووى

shiko يقول...

والله تستحق جائزة اسكار لاحسن راكب ولسملى بقى على التورماى

ojg يقول...

جدع وأبو الجدعان
:))
هما فعلا ماكانوش هيتلموا الا كده
وبعدين البيريه ده بقى أحلى حاجه في سوووو
ايش اخششهم هما؟؟
أحيي فيك دفاعك عن بيريهك
ونقدك للقنفد والجلابية الصعيدي
:)

فكرتني بمثل سمعته زمان بيقول
لو الجمل شاف سنمه كان قطمه
بس الظاهر انهم مش عارفين ان سنمهم اعلى كتير من سنم اللي حواليهم
:)
ربك عليه صلاح الأحوال

mohra يقول...

و الله برافو عليك
انا اشجع البشر الايجابيه العدوانيه اللى زيك...بهزر و الله
تحياتى

شـــــهد يقول...

بجد بجد جدع يا سووووو.. طريقتك تفرس تنقط تشل ؟؟ تعل وده اللي ينفع معاهم .. بس ما تحرقش في دمك ولاتحط في بالك خالص.. عشان دي ناس فاضية.. وزي ما بنقول في اليمن طنش تعش تنتعش والا فلا تعش

احترامااااااااااتي

شهــــــد

غير معرف يقول...

مرحبا بكم
يسعدني ان ارد على الموضوع و مواضيعك حلوه
بس ايه الحجاب الايراني ؟؟تقصد الاسدال يعني ؟؟

ايه يعني الاسدال؟
اخوك من السعوديه

وازاي حجاب ايراني ومحزقه وملزقه ؟؟؟؟ الحجاب الايراني ما يجي مجزق و ملزق اصلا غريبه طريقة لبسه

حجاب ايراني اعرفه اشوفه في المدينه المنوره

اعجبني طريقة الكلام المصري
موضوع الريس و هو في حاجه سويتها ايميل و ارسلتها الى الاصدقاء

على فكره ايه يعني البيريه

و شكرا لك