الخميس، 15 ذو القعدة، 1429 هـ

!! مساعد البطل

في فترة منصرمه في حياتي - وماحدش يستغرب من كلمة منصرمه دي ولا يربط مابينها وبين فردة الصرمه - كنت شايف نفسي زي مساعد البطل في الافلام العربي
وقت الهزار يقعد يهزر مع البطل ويضحكه ويخرجه من الموود الكئيب اللي هو فيه نتيجة انه بيعيش ضغوط في حياته .. راجع فيلم اسماعيليه رايح جاي

ولما بيروح هو والبطل أي انترفيو لشغلانه بيقوللو عليها مساعد البطل .. بيشغّلو البطل ويسرّحو مساعد البطل او يشغّلوه أي شغلانه عبيطه .. راجع فيلم أصحاب ولا بيزنس

ولما البطل ومساعد البطل بيروحو مكان ويشوفو بنت حلوة ولا حاجه .. يقوم مساعد البطل يقترح على البطل انه يروح يتعرف عليها .. يقوم البطل مكشّم في وش المساعد ويقوللو بلاش هطل .. ويقوم مساعد البطل يتعرف على البنت دي عشان يظبط البطل والبنت ويتعرفو ببعض ويعيشو قصة حب تبقى هي الفيلم .. راجع فيلم رحلة حب

ولو ظهر قريب للبنت دي وعادة بيكون شرير وعايز يتجوز البطله عشان طمعان في فلوس ابوها والمصانع والمزارع والشركات اللي باسمها .. يقوم مساعد البطل هو اللي يتحمق للبطل ويتخانق مع الشرير وينضرب ويتدغدغ مليون دغدوغه .. وعادة بتكون خناقه كوميدي وبيرمي افيهات وهو بينضرب عشان يسلّي المشاهدين .. راجع فيلم أحلام عمرنا

ولو البطل اتخانق مع البطله يقوم مساعد البطل هو اللي يصالحهم على بعض وفي الاخر يتريقو عليه وعلى قميصه وهو ياخدها بضحك وهزار .. راجع فيلم الحب الأول

واللي يغيظ بجد .. ان على آخر الفيلم .. مساعد البطل ده بيختفي .. وبيتحول البطل لتنين خرافي وبيحارب عصابات المافيا وبينقذ البطله من براثن العدو
!!!!! وياريت حد يقوللي يعني ايه (براثن) عشان عاجباني وعايز اعرف معناها
ولو ظهر مساعد البطل مره تانيه .. بيظهر عشان يرمي افيه ولا بتاع يقفل الفيلم عليه .. والبطل بياخد البطله في حضنه
وتنزل اغنية الفيلم .. واللي بتكون عادة اغنية لمدحت صالح
-----------
كنت بافتكر الحاجات دي والاقي نفسي متضايق واقول امتى هبقى البطل بقى ؟؟؟؟
امتى تنزل صورتي على أفيش وجنبي بطله بطله .. مش بطله من بتوع أفلام المقاولات

لكن لما قعدت مع نفسي وفكرت بروقان .. اكتشفت حاجه كانت غايبه عن بالي
لقيت ان لولا مساعد البطل .. البطل ما كانش هيبقى ليه لازمه
!!! لولا مساعد البطل .. البطل كان هيبقى متنكد ومش لاقي اللي يخليه يضحك
والجمهور هيتنكد ويسيب الفيلم
!!! لولا مساعد البطل .. البطل كان هيفضل عاطل ومش لاقي شغل ومافيش أي دراما
والجمهور هيزهق ويسيب الفيلم
!!! لولا مساعد البطل .. البطل ما كانش هيتعرف على البطله ويعيشو قصة حب
والجمهور هيتخنق ويسيب الفيلم
باختصار شديد .. لولا مساعد البطل .. البطل ما كانش هيبقى بطل
ولولا مساعد البطل .. ما كانش هيبقى في فيلم

ياترى في حد فكر في الحياه زي تفكيري .. ولا انا لوحدي !!؟؟

سوووو

هناك 29 تعليقًا:

ojg يقول...

أوووووول تعليق
أنا عايزة جايزة
:))

Crystal Lobna يقول...

أنا طول عمرى شايفة أن مساعد البطل ده مش واخد حقه و بتخنق أوى من المخرج لما يتجاهل دوره جامد بس أنت معاك حق من غير مساعد البطل مش حيبقى فيه بطل

Z_Diva يقول...

tab omal ana leh mesh 3rfa anshek7 awy mn eny combarce el7yah ???

matediny drsen 3mk we 7kma allah ykrmk, bdal mna 3ysha badrab nafsy belnar kol yom elsob7 :D

حمامة يقول...

ايه الدماغ دى
تصدق عندك حق
زى ما قولت لولا مساعد البطل
مكنش هيكون في بطل اصلاً

احييك على دماغك :)

صبرني يارب يقول...

والله هو اساسا الابطال كلهم بتوع اليومين دول مالهمش لاااااااازمه

وبعدين يا سو كل واحد فينا يوما هايبقى بطل ويوما مساعد بطل ويوما كوبارس

المهم لما تكون انت البطل تكون وقتها عندك مساعد بطل زيك كده

تحياااااتي يا سو

ojg يقول...

موضوع فلسفي عميق يا أحمد
شوف أنا هقولك رأيي
مع اني أعتقد انك عارفه
:)
مساعد البطل ضرورة في السينما
وفي الحياة كمان
وكون اسم البطل بيتكتب ع الأفيش أكبر
مش معنى ده ان دوره الحقيقى أكبر
مساعدتك لأبطال كتير ماتنفيش كونك بطل في حياتك الخاصة
إن مكنتش هي اللي بتأهلك انك تكون بطل بجد
مش بطل من ورق
يعني بتخليك تكون مستعد انك تتحمل حاجات في حياتك يمكن ناس تانيه ماتقدرش عليها
عشان كده انت فعلا عندك حق انك تنبسط بكونك كنت مساعد بطل في أفلام كتير
مبروك يا أحمد وعقبال البطولة المطلقة
:))

طالب ثانوى يقول...

فعلا ياسو ومساعد البطل دة بيصعب عليا اوى وكمان فى منهم كتير فى الافلام الاجنبى


انتا مبتكتبش فى سينامتيك لية

ojg يقول...

صبرني
******
حلو أوي تعليقك
وحشتيني
استني هجيلك مدونتك
:))

^ H@fSS@^ يقول...

انا عمري ما كنت بمانع اطلع قبل الاخيرة في الفصل كله
يعني كنت دايما اقول لو كل ابهاتنا بيقولوا انهم كانوا اوائل فصلهم طيب مين التاني و مين العاشر و مين اللي بيجووا في ذيل القائمة
فحبيت اجرب ذيل القائمة ده و عجبني
بيخليك تعيش حياتك و تروق و متحملش هم اي حاجة
و في الاخر كلنا جبنا نفس المجموع و دخلنا نفس الكلية و اشتغلنا نفس الشغلانة
طيب ليه وجع الدماغ بالذمة؟؟
صح؟

تحياتي

همس الاحباب يقول...

هههههههه
حاسس ان الفسكافيه اللى انت شربته مضروب مش عارف ليه
بيخليك بتقول حكم ومواعظ
وحاجات جامدة قوى
تسلم دماغك يا سوووووو
تحياتى

زهرة الياسمين يقول...

كل ميسر لما خلق له
وقبل ما تفكر تغير دورك لازم الأول تحس انه عمره ما كان هامشى ساعتها مش هترضى تبدل الأدوار ابدا

enjy يقول...

لا انت لوحدك..........انا بكره اللحظات اللى بكون فيها سنيدة لاى حد ... متاخدش فى بالك المهم ان لما تلاقى حد يقوللك معنى براثن ابقى اعلمنى -حلوة اعلمنى دى-لغتى بتتطور مش ملاحظ؟؟؟

واحد من البلد دى يقول...

انا بعتذر عن التأخير بس و الله اول ما بلاقى فرصة انى اتنفس بدخل على طول
حتى لو مش بقدر اعلق لضيق الوقت
لكن بقرء البوستات الجديدة

تحياتى

mony يقول...

انا رأيي ان مساعد البطل ده بطل

لان لو هو ماكنش بطل الفيلم هيقع زي ماقلت


بس الكلام ده في الحياه العامة الاجتماعية بين الناس

بس الحياة الخاصة ماينفعش تكون مساعد البطل ابدااااااا


لازم تكون البطل

أحمد كمال يقول...

الحقيقة يا أبو حميد ، أنا ماشفتش من الأفلام اللي انت بتقول عليها دي غير اسماعيلية رايح جاي ، شفت جهل سينيماتيك أكتر من كده ؟

زمان قوي كان البطل بيبقى في الحقيقة نجم غني و عايز يعمل فيلم ، طبعا يكون فيه البطل ، علشان كده طلعت موضة إن المطربين مثلا لما يعملوا أفلام - و عادة كان يبقى دمهم يلطش - كانوا يجيبوا مساعدين للبطل لهم شهرة شباك تخلي الناس تيجي تشوفهم .

فمثلا كنت تلاقي مساعد البطل ده اسماعيل ياسين ، أو شكوكو ، أو فؤاد المهندس ، و بعد كده بقى سمير غانم أو عادل إمام ، بينما الباش بطل بيبقى فريد الأطرش ، أو التلباني ، أو كارم محمود ، حتى محمد فؤاد عمل كده في اسماعيلية رايح جاي !

تيجي بعد كده تشك في مساعد البطل ؟ ده احنا ماكناش بنشوف الفيلم إلا علشانه ، ده غير إنه عادة مش بتكون عنده مشاكل البطل ، و في الآخر برضه بيتجوز مساعدة البطلة من غير أي مجهود .

سومه...مجنونه فى بلد عاقل يقول...

شوف يا سوو بصراحه ربنا البوست دا صعيب قوى على عقليتى يعنى فى براثن ومراهم وكلام كدا مكلكع بص اكتبه انجليزى عشان انا ثقافتى فرينش ياله سلام:))

maha zein يقول...

طبعا طبعا يا بطل
اكيد من غير التمرجي الدكتور مكنش هيعرف ينسق مواعيده ويدخل الناس ويقطعلهم الفزيتا
اكيد من غير الجرسون مكنش صاحب المحل عرف يبيع الينسون والحركات دي كلها
اكيد من غير بتاع البورنيطة كان سووو هيحث بسعادة وهو لابس البورنيطة بتاعته

شاطر يا سووو
مساعد البطل فعلا بطل
جيت علي الجرح

انت عامل ايه بقه
كويس
طيب

ňįĝŗő يقول...

آه
انا كمان جالي و لسه بيجيلي التفكير ده
بس عارف
من كتر مابقيت مساعد البطل
بقيت مستمتع بالحكاية
بقيت مش شايف نفسي في صورة البطل
بس عارف
كل ده ما هو إلا مجموعة البرد المُسكّنة اللي بناخدها لما بيبقى عندنا انفلونزا
و بقينا مدمنين مجموعة البرد
ولا عمرنا هنخف من الإنفلونزا

عطسسسسسسسسسسسسسسسي
أنا جالي برد باين
إيه التعليق اللي يمرض ده
اتكلفت كويس و انت بتقراه يا أحمد



يلا سلام

mostafa rayan يقول...

سو متفق معك جدا
فاكر اسماعلية الناس طلعت تتكلم على هنيدي اكتر من محمد فؤد وكذلك في رحلة حب اتكلمو على احمد حلمي وكذلك في صعيدي في الجامعةالأمريكية محمد لطفي والسقا خطفو الضوء من هنيدي
يا صديقي لو المساعد ماكانش فيلم
ثم ان المساعد بعد كام فيلم بيكون هو البطل
بدليل ان في دلوقتي نجم شباك اسمه رامز جلال كان بيطلع مساعد لمصطفي قمر وحمادة هلال
وكمان في نجم طالع بسرعة الصاروخ اسمه احمد مكي كان كل دوره يقول يو يو يو مع تامر وشوقية
وقبلهم كان في واحد اسمه محمد سعد كان بيطلع مساعد لمحمود عبد العزيز في الجنتل ومساعد تاني - بعد احمد حلمي - لعلاء ولي الدين في الناظر
دلوقتي هو نجم الشباك الأول واجره وصل ل 8 مليون جنيه
تحياتي ليك يا جميل

EmY يقول...

ههههههههههههههه
بجد يا سووو انت عسل بس ولا يهمك انا هاديك بطوله مطلقه و الفيلم كلو لوحدك حتي من غير بطله يااالااا مش خساره فيك

kochia يقول...

متفقة معاك تماما

محمد الكومي يقول...

ايه يا عم البوست اللي خسسني النص ده

كل ما افكر في جملة اروح اشوف فيلم

معلش يا سو هي الدنيا كدة

و كلامك كتير اوي بيحصل لنا

رحــــيـل يقول...

سوووو

تفكير غريب

انا بقى طماعه عايزه اعمل كل الادوار ابقى انا البطل ومساعه البطل

وانا اللى اعمل حياتى كلها ههههههههههههه


كنت اتمنى تيجى بورسعيد يالا هنتسناك فى لقاء المنصوره ان شاء الله

حنين القلب يقول...

انا متفقه معاك يا سووو

بس انا شايفه انه صعل اوى تكون علطول مساعد البطل اكيد بيجى عليك وقت وبتشوف نفسك بطل برضه
بس النبى لما تبقى بطل مش تنسى اختك الغلبانه بدور كده حتى لو كانت بايعه بليله

بس قولى انت فاطر ايه ؟؟
ايه الدماغ العاليه دى؟؟؟
تسلم يا باشا

حاجات جوايا يقول...

ههههههههههههههه
والله مساعد البطل بيبقى أفضل كتير من البطل نفسه فى معظم ان لم يكن كل الافلام

ولو قلبت الصورة هتلاقيه هو البطل بس ضاحكين عليه هههههههههه

الشنكوتي الكبير يقول...

هأ هأ هأ

انت يا فقري
مساعد بطل ايه بس
انت اجدع بطل بقى انا شفته في المدونات
لما اتعرفت بمدونتك اول لما بدأت ولحد دلوقتي ممكن اتنح في ككلامك وافضل اضحك اضحك لما بقي ووشي يوجعوني وافضل افكر في معاني كلامك المداريه وابتسم تاني عليها
واما اشوف مواقفك مع الناس دايما الاقيك انت البطل بتاع البراثن دي وشوفلنا حد يقولنا براثن يعني ايه من الأخر كده يا معلم انت لا مساعد ولا حاجه انت بالنسبه ليا بطل بحق وحقيقي

انت ناسي الفلام اللي فيها بيكون البطل نظام انتي هيرو
يعني اللي تحسبه مساعد بطل بيطلع هو البطل
وبعدين يا سيدي متزعلش مساعد البطل بيتجوز الخدامه او الصديقه او اي مزه في الفيلم وساعات بتبقى اجمد من البطله المسلوعه
يعني في رد قلبي مريم فخر الدين كانت احلى من صباح
واللي احلى منهم هم الجوز كانت المزه التالته دي اسمها هاله مش عارف ايه كده
ياريت انا اتجوز هاله دي

سلااااااااااااااااااااااام

اخوك ايهاب

Eldebug يقول...

هييييييييييييه دنيا
زمان وانا صغير كنت بحب اوى فكرة اننا مركز الكون ... يعنى كل حاجة بتلف حواليا ... يعنى مثلا سور المدرسة اتهد فى الاعدادى علشان اعرف اطفش براحتى ونفس الكلام حصل فى الثانوى ... ومش لازم اقولك طبعا ان الاهلى لما خسر من انبى كان بيغيظنى علشان انا كنت متراهن مع واحد صاحبى على كنزاية ... ده غير ان امريكا دخلت العراق مخصوص علشان انا كنت فاضى اياميها وكنت عاوز حاجة اتفرج عليها فى التلفزيون

انا اقصد يعنى من الكلام ده انى دايما كنت حاسس من جوايا ان انا البطل ... ودى الحاجة الوحيدة اللى هتخلى الناس تصقفلى وانا مساعد البطل

فى حاجة غريبة اوى بتحصلى اليومين دول ... بقيت دايما لما اكتب حاجة وارجع اقراها مافهمهاش ...

قوس قزح يقول...

مش مهم البطولة
المهم انك تكون سنيد و انت عارف ان ده اسم مساعد البطل
بيسنده
المعنى ده هو اللى مهم
انك تكون سند لغير
من غير ما يكون همك يتقال انك بطل


ماهو اصل البطل مش هيكون بطل من غيرك ؛)

kiki يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品