السبت، 24 ذو القعدة، 1429 هـ

Stomp doing this !!

من كام يوم كده كنت في الاوبرا .. وشفت اعلان عن فرقة كنت اتفرجتلهم على كام كليب على اليوتيوب .. فرقة بتعمل مزيكا ايقاعيه بس بتجديد .. بيطبلو على صناديق زباله ومقشات .. يعملو ايقاع بصوت ارتطام كرة السلة .. يعملو مزيكا بأدوات المطبخ
.. الفرقة دي اسمها ستومب .. وهتلاقو كام لينك لكام كليب من حاجاتهم موجودين تحت

.. على يافطة إعلانات
!!! زبالة عالمسرح
!! حرب المقشات
!!! حرب المقشات .. عالمسرح
كرة الباسكت .. والمطبخ

.. ام هند .. بعد ما روّحت البيت .. قلت طب والله فكرة .. انا بقالي كتير ماحضرتش حفلات ولا بتاع
انا هدخل على موقع الاوبرا واشوف المواعيد امتى والتذكرة بكام !؟

وفعلا .. دخلت على الموقع
ده .. وزي ماهو باين .. ماعملوش أي تجديد ولا تحديث في بيانات برامج مسارح الاوبرا من سنة الفين وخمسه
!!!!!!!!!!!!!!
قلت مش مشكله .. انا هتصل بمية واربعين دليل تليفونات مصر .. واسألهم شخصيا

سوووو : لو سمحت عايز رقم استعلامات الاوبرا
بتاع الدليل : استعلامات ايه .. الاوبرا !!؟؟
!!! سوووو : ايوه .. الاوبرا
بتاع الدليل : طب ثانيه واحده
وراح سايبني وشغلّي مزيكا اسمعها .. واغنية اعلان اتكلم ارضي يابن بلدي .. شويه ورجع
بتاع الدليل : الحقيقة هو مافيش استعلامات الاوبرا .. ينفع استعلامات مسرح الجمهورية ؟؟
سوووو : ايه اللي جاب الاوبرا لمسرح الجمهورية ياعم الحاج ؟؟؟؟
ولسان حالي بيقول .. ايه اللي جاب القلعه جنب البحر!!!؟؟؟؟
بتاع الدليل : للأسف هو دا اللي عندي

قلت خلاص بقى .. انا هنزل يوم للأوبرا اشوف ايه النظام .. وقعدت شوية عالنت ودخلت العب عالفيس بؤ .. لقيت اعلان عن الفرقه .. قلت فل قوي .. دوست طلعتلي الصفحه
دي

طبعا اول حاجه بصيت عليها هي اسعار التيكت
!! وجالي شلل رعاش بمجرد ما شفت الصورة دي وعرفت الاسعار

المترجم الفوري
التذاكر
.. الآن متاحة
في دار الأوبرا المصرية
كرسي جانبي بـ 400 جنيه مصري
بلكون بـ 600 جنيه مصري
لوج بـ 800 جنيه مصري
مش عارف ايه بـ 1000 جنيه مصري


واعتقد ان (مش عارف ايه) دي .. اللي هو اني اقعد معاهم عالمسرح .. واخبّط زيهم
... ماهو انا دافع الف جنيه بحالهم بقى يا كفره يا ولود يا ولود يا ولود

ايه ياجدعان الاستعباط ده .. امال كمية الرعاة الرسميين والرئيسين دول دفعو ايه ولمين؟؟؟
لما التيكت توصل للمستهلك بالمبلغ ده .. يبقى اسمه ايه !!!؟؟
لما موقع الاوبرا بذات نفسه .. ما قعدش عليه أي مُدخل بيانات يحط برامج الشهر ولا يحط أي برامج من سنة الفين وخمسة .. يبقى اسمه ايه !!!؟؟
لما بتوع دليل تليفونات مصر نفسهم ماعندهمش أي معلومات عن استعلامات الأوبرا .. ومافيش أي مسئول من الأوبرا يعمل ده .. يبقى اسمه ايه !!!؟؟
الف جنيه على ايه يا ولود يا ولود يا ولود
؟؟؟؟؟؟؟؟؟؟؟
!!! ومش عايز حد يقوللي دي فرقة عالمية وبتاع .. طب ما انا عالمي
!!! وأي حد عنده مدوّنه يعتبر عالمي
!!! اه طبعا .. مش مفتوحين عالعالم .. يبقى عالميين
قلنا لأي حد من اللي بيقرالنا .. هات ربع جنيه مخروم !!!؟؟؟

!!! واساسا اساسا .. يعني ايه شوية تخبيط في علب وبراميل زباله بـ ألف جنية
.. طب مانا باقعد اتخبّط في الميكروباظ كل يوم
.. وباسمع اصوات مايعلم بيها الا ربنا
!!! وبريحة كمان
!! أي نعم الواحد بيوصل لمرحلة العمى على آخر المشوار اللي هو رايحه .. بس كان بيشم ريحه برضك
ومش بادفع اكتر من خمخه وسبعين قرش .. او جنيه ونص لو مشوار طويل
وساعتها هسمع تخبيط وترزيع فترة أطول .. وهشم ريحة أكتر كمان
!!!!؟؟؟؟!!!!
!! وبعدين ازاي حفلة لباند كاجوال تتعمل في المسرح الكبير
وليه ألبس بدلة وكرافته عشان اسمع ناس بتخبّط في براميل زباله ؟؟
.. ده انا اصلا اصلا بافكر لو اتجوزت.. اعمل فرحي عالبحر
!!! وألبس قميص هاواي وبنتكور .. وكاب عشان أداري القرعه

والعالم ولود الذين بتوع الباند دول .. جايين من أمريكا عشان يخبطو ويرزعو هنا ويدوشونا ليه !!!؟؟؟
!!! ما يروحو أي دوله تانيه .. حبكت يعني يعملوها في قاهرة المعز
.. ماحنا عندنا أعلى مستوى ضوضاء في العالم كللو
!!! ولو مش مصدقينني انزلو أي منطقة شعبيه .. هتسمعو سيفونية عزف منفرد
منادي بطاطا .. على واحده بتبيع جبنه قديمه .. على تبّاع على ميكروباظ .. على خناقة بألفاظ قمة في الأدب ..على صوت كلاكسات عربيات .. على سارينة مطافي ولا اسعاف مزنوقه ومش عارفه تتحرك
سيفونيه الكلام ده ولا مش سيفونيه !!؟؟؟؟

انا فهمت دلوقتي بس هم اسمهم ستومب ليه
.. أكيد أكيد أكيد .. قصدهم
Stomp doing this !!
!!! واحذف الحرف اللي باللون الأحمر
-----
ملحوظة

لو فعلا ماعندناش نصب وسرقة في كل مرفق من مرافق الدولة .. كانت هتبقى أقصى تيكت للفرقة دي .. في حدود ميه أو ميه وخمسين جنيه .. بما ان في شركات واخده حق الدعاية والإعلان بالكم ده .. بس هي دي مصر فعلا

آه .. ياريت كل واحد وهو خارج من المدونة يسبلي خمخه جنيه .. وتسعين قرش
!!! ماهو كل كليب حطيت لينكايه ليه بجنيه .. والتسعين قرش الباقيين .. تمغة

سوووو

هناك 32 تعليقًا:

ojg يقول...

أوووووووووووووول تعليق
:))

TAFATEFO يقول...

mmmmmm
هو المشكله ان ثقافتي على أد منير و أنغام وشوية اللي بيغنوا أغاني عربي

أصل كان في ايدي 5 دعوات .. سألت ناس على الجايكو حد يعرف ايه البتاع ده؟ محدش جاوب

قمت مرجعهم لصاحبهم قلتله شوف حد ليه خلق للرزع ده

عاشقه وغلبانه يقول...

والله لو التكت ب400 قرش مش 400 جنيه برضو ماحدش هايدفع
هو الشعب لاقي ياكل لما يسمع تخبيط علي صفايح الزباله والحلل
طيب ماحنا ممكن نلم عيال الشوارع ومعاهم صفايحهم وزبالتهم وعلب المناديل ونعمل احلي شغل وباقل من كده بس هي الحكومه بس تديهم الفرصه ان شالله يارب علي باب الاوبرا مش علي المسرح الكبير
وهايلموا اكتر من كده
ولا هي عقده الخواجه
وبعدين انت ايه يخليك تسمع الحاجات دي
عنده حق بتاع الاستعلامات مايعرفش الرقم لان هو اساسا مش عارف الاوبرا
انت اقف في اي اشاره مرور وقت ضهريه كده وهاتسمع احلي غناء اوبرالي وباليه كمان لو تحب ومن غير ولا مليم
ههههههههههههههههه

riri يقول...

أنا فعلا شفتهم مرة على التلفاز.. تليفزيون يعنى بس طالبة معايا لغة عربية... انا عجبنى نظامهم بصراحة.. جديد وفيه حرية ... بس مش للدرجة اللى ادفع فيها كده

أنا أمنية حياتى انى ابقى اول تعليق :(

البوست بيبقى لسه طالع من الفرن.. وتلاقى الرد من اول فسوة

:(

ojg يقول...

والله صح
ستوب دوينج زيس بقى
فرستونا
:))
طيب تصدق بإيه يا سوووو ياخويا كنت ناوية ادخل العرض ده خاصه انه خلاص اخر يوم ليه بكره
بس الحمد لله انك لحقتني وجبتلي الأسعار عشان لو كنت عرفتها لوحدي
كنت هبطل اروح اوبرا خالص
وكان في احتمال ابطل حاجات تانيه كتير برضو
:)
وانطلاقا من هذه المخمضة التي أحسستها وأنا بقرأ البوست
بفكر جديا
إني في ميعاد الحفله بتاعتهم بكره
أدخل ميكروباص من تمانيه لـ 12
واهو كله تخبيط
:))
ها ايه رأيك؟
أحجزلك جنب السواق؟

Dr Ibrahim samaha يقول...

وركز على الدمغة

أو فوت علينا بكره

:):)

د إبراهيم

بنت مصريه يقول...

يخرب عقلك يا احمد
مش قادره اقولك انا فطست على روحى من الضحك قد ايه
يا بنى دا احنا اللى اخترعنا السينفونيات
انت نسيت المبدع عماد بعرور ولا ايه
اهو دا الوحيد اللى اثبت ان الغناء اصله ترجيع مش صوت
هههههههههههههههههه

احييك يا سووو
ومعلش انى مقصره معاك ومع بقيت المدونين
اصلى مشغوله والله
ربنا يوفقك يا رب
ومرسى عالضحك ده يا سوو

صبرني يارب يقول...

يخرب عقلك يا سوو


اوبرا ؟؟؟

هي حصلت للدرجه دي ؟؟؟

اهو الى عامل فيك كده يا سوووووو قلة الجواز يا ضنايا

شوف حالك وصل لايه ؟؟

حلل وصناديق زباله ومقشات ؟؟؟

طب جايبينهم معاهم ولا هايشحتوا مننا ؟؟

طب باقولك ايه انا الصندوق بتاعي اتكسر ما تاخده تديه لهم وهما يدخلوك ببلاش

قال اوبرااااااااا قااال

بت خيخة وأى كلام يقول...

انا بحب اوى الانواع دى من الفنون

بيفكرونى بالمثل الشعبى وهنعملك من الفسيخ شربات
ببقى عايزة اعرف ازاى فعلا هيطلعوا ايقاع فيه انسجام من شوية علب زبالة ومقشات

وكنت فاكرة بقى انك رحت وهتحكيلنا على اللى انت شوفته
لاقيتك الحمد الله ترجمتلنا الاسعار

لاقيت نفسى بقول احيييييه
على ايه يعنى
دول فى الاخر فعلا شوية صفايح زبالة على كام مقشة

ومسرح كبير كمان؟

هو احنا مالنا كدة محترمينهم اوى بتوع المقشات دول



ده احنا لو عملنا تجمع تدوينى
وكل واحد فينا طلع ابداعته من صوت وريحة
هنستفيد اكتر من خبرات بعض
ومن غير ما ندفع ولا مليم


انا سبتلك الخمخة وتسعين قرش
تحت عنوان البوست
الحق خدهم بقى قبل ما حد يجى يلهفهم

سلام
اختك خيخة

ست البيت يقول...

ربعميت ايه؟
ربعميت عفريت لما يبقى يركب الرتام الصفرا بتاعتنا - يمكن تمشي بسرعة بعدها_
انا لو املك 400جنيه دلوقيييت
كنت رحت على الواجة كوستا في استانلي وشربت لي واخد كابشتينو او واحد اورن جوووز ودلعت الست امي كده شوية
بدل ما قرفاها في حياتها ومش نافعهاها ببصلة
والعجب يا واد يا سوو انها صابرة ليها الجنة
وبعدين هي الفرقة دي ما تعرفش ان احنا عندنا اونكس
ولا يكونوا من نفس الشركة بما انهم بيخبطوا على صفافيح الزبالة
اقولك
احنا لينا اولوية ندخل الحفلة دي بلوشي
قلتلي ليه لأن احنا اساسا بندفع حق شركة اونكس مع فاتورة الكهبرا
وهن هذا المنطلق اهيب بكل واحد يا خد وصل النور بس يكون دافع الفاتورة ويتأنتك ويدخل الأوبرا
ويبقي يحاول ياخدلنا كام صفيحة احسن الحكاية مزنقة قوي في البلد
وبعدين متعملوش حسابي
انا اساسا مش بحب الاوبرا
لني أساسا أشاسا مش بسمع اغاني

يا لا كل عام وانتم بخير
اخبار حمزة ايه يا سووو؟
يا بني انت مكسل تطمني عليه ؟
طيب ابعتلي على الفيس بوك
ودمت بحفظ الرحمن

ست البيت يقول...

ألا صحيح يا سوووووووو
انت حاطط لينك لمدونتي د.منوسي
انت ما تعرفش اني نا عندي بنوتة تانية اسمها أنا أهتم ؟
I care

مهندس مصري يقول...

ليه يا بني هو حد اتجنن يدفع المبلغ ده
اصحاب العقول في راحة و المجانين في نعيم
:)
و مش شايف الكليبات علشان ما يستاهلوش الخمخة جنيه
و الدمغة حأديها لك لما أشوفك
:)

الشنكوتي الكبير يقول...

عايزك ضروري

اخوك ايهاب

حمامة يقول...

على رأيك والله
انا اقعد اسمع حبة ترزيع وتخبيط ولو حتى في ابداع ب1000 جنيه
لا ياخويا انا اولى بيهم
والله ولا عشرة جنية كمان :D

رحــــيـل يقول...

ههههههه
مش غلطتهم غلطه اللى بيروحلهم ياسو

انا هعملك حواله بالخمخه جنيه وتسعين قرش اشمعنى انت يعنى مهو انت عالم برضه

انا حره يقول...

اوبرا ومقشات وصفايح زباله

خخخخخخخخخخخ

قربت خلاص ياسوووو استمر انت بس

فاتيما يقول...

نعممممممممم
أيه غل التقليب دا
خمسة جنيه إيه و بتاع
حرام عليك يا سوووو
دنت اللى تستوب دوينه زيس لو سمحت
أختك و لا فخر عاوزة أعانة بطالة مش تقولى هاتى ؟!
و بعدين و الله البوست دا فيه أفكار طليعية كدا
يعنى شوية غجر بيدقوا على صفايح الالة بالمشقت بيلفوا لدنيا أهو و بيدفعلهم ألافات عشان يدقوا على الصفايح
يعنى شوف الإبتكار
و الفهلوة
و الجنون فنون فعلاً
...حكاية موقع الاوبرا دا عندك فيها ألف حق
أصل التدوين دا علمنا أزاى الاحد ممكن يحدث المعلومات فى ثوانى ...
يبقى هما اللى مكان محترم و المفروض كل العالم بيهتم بنشاطاته يعنى يكون متميز و مش بالاهمال دا
بس نقول إيه
إشمعنى هما اللى هيكونوا تمام يعنى
دعواتى لحمزة بالشفاء
و تحياتى ليك يا صديقى و يا ريت تيجى يوم الجمعة يا فنان و تحضر المسرحية يتاعة الاطفال لأن عينك ناقدة و وجودك بيضيفلنا كتير على المستوى الفنى و الاهم الإنسانى يا كبير
سلام مؤقتا

A.SAMIR يقول...

انت بقى قلت لنفسك يا عم سووو
انا اروح ادفع بتاع 20 او 30 جنيه واحضر الحفلة واعمل دماغ مقشات يا معلم
معلش بقى....قدرك انك راجل مصري
كفاية قوي انك تتفرج ع الناس اللذيذة دي ع اليوتيوب ببلاش
معلش بقى
كل ستومب وانت طيب

kochia يقول...

اتاري محدش بيروح ولا يعرف يعني ايه اوبرا
حتي الدليل ميعرفهاش

يا سيدي
هي ستوب

mony يقول...

هههههههههههه


انا بأه ساكنة قدام مدرسة
و كل يوم الصبح من الساعة 7 ل 8
و بعد الضهر من 2 ل3 بسمع احلي سمفونية ممكن حد يعزفها

ده غير الفواصل اللي شغالة طول اليوم
ايشي جرس الحصة طرب طرب
و الفسحة

و الحمد لله طلعوا ناس ذوق ذوق ذوق

ماطلبوش مني ولا مليم


ممكن اعزمك عندنا تسمع اللي نفسك فيه

و انا بأه هطلع ذوق انا كمان و مش هاخد منك حاجة
و الشاي و الكيك علينا يا فندم
و ممكن غدا كمان


بذمتك فالاوبرا بيقدمولكم حاجة ببلاش


بالنوسبة للخمخة جنيه و السبعين قرش انا مش هدفعهم

اصل انا مادستش علي ولا وصله من اللي انت حاطتهم
بجد و الله ما دوست

يبقي كده تمام

خالصين

enjy يقول...

المفروض اى تعليق هنا يسيب لك كام قلت لى؟؟؟؟
امممممممممممممممم انا كنت متحمسة للفرقة من بعيد لبعيد طبعا بس بعد البوست دة انا ولا اعرفه ولا عايزة اعرفه هو مين؟؟؟
شفيق يا راااااااااااااجل... ايه الكلام مش متظبط ولا مترتب؟ ماهو دة طبيعى بعد البوست دة يا عم الحاج يادى النيلة يللا مش مهم قدر ولطف

بطوط حبوب يقول...

ليك وحشه يا مان جامد والله بجد
انا مستعد ان اجى لحد عندك واخبطلك بالزباله نفسها مش بالصناديق بس

واخد 103 واربعين قرش بس

ايه رايك فى الدسكونت الجامد ده


هههههههههههههههههه

البت المشمشية حلوة بس شقية يقول...

انا اخرى عبد الباسط حمودة ياعم اسمع اغانى اوبرا فى البيت ووفر الفلوس هات بيها كباب وكفتة واكلنى معاك

maha zein يقول...

يا لا الهول
اوبرا في شبرا
لا
لا
هزلت
وماله المسرح القومي
ولا مسره الهناجر
ولا الطليعة
ولا البرلمان الصغير
اي حاجة بقه
تقضي الغرض

قال اوبرا ومعرفش ستومب وكلام ميصحش يتقال
لا مينفعش كده بجد

عيب
خلي حد غيرك يقول الكام ده
هزلت
هو كده عادي الاستهبال بقه عيني عينك
هي يعني عقدة الامريكاني مش اكتر
فكرك انت لو الفرقة نفسها كانت من الصومال كانوا خلوا الحفلة مجانية
وخلو المعرفش ايه ده بتسعين قرش
ويدوك خمخة كمان وانت خارج

حسبن عليهم
حسبن

حمادة زيدان يقول...

سوووووووووووووووووووووووووووووووو

ههههههههههههههههههههههههههههه

والله مش عارف ازاي جالك قلب وقولت اروح اشوف مجانين زي دول ... تعرف بيجبولهم كريب على "زوم ومزيكا" حاجة كدة تصدع وتجيب شلل سداسي وليس خماسي يا معلم ... وبعدي ايه الاسعار دي يا خراشي أدفع 1000 جنية علشان اتصدع كتيرة اوي كدة داحنا بنتصدع كل دقيقة على ارض مصر من ختم وافراح في شوارعنا المحروسة .. ده غير طبعاً التلكسات اللي في الشوارع اللي كل واحد فرحان بعربيته بيقرفنا بيها ... الصداع ارخص حاجة في مصر يا معلم

طولت عليك بس عنجد وحشتنا يا بوب

قلب مصرى يقول...

عندك حق فى الكلام اللى قلته بخصوص موقع دار الأوبرا وتليفونات الاستعلامات، وبخصوص التذاكر أديك اتفرجت على اليوتيوب ببلاش.

بخصوص الخمخة جنيه وتسعين قرش فانا مادخلتش على اللينكات اللى انت حاططها ... أدفع برضو؟؟؟ ولا هى الحكاية إنك بتحاول تلم حق التذكرة (وش بيضحك).

هاشوفك إن شاء الله يوم البؤجة؟؟؟

Z_Diva يقول...

la walhy... bgad y3ny.. fe3lam fe3lam a2al tzkra be 400 gondy ????????????

wana elly knt 7azina iny mesh hal72h
tb kwayes iny mesh bfe watany elomm wehma hnak b2a :D

الراجية عفو الله يقول...

السلام عليكم ورحمة الله وبركاته
لدي مشكلة عرضتها في مدونتي
http://la7zat200.blogspot.com/
ارجو اعاطئ رأيك

شكرا

3ala asm masr يقول...

طيب ما احنا كمان نعمل باند ونجيب صفايح زبلانه ومغرفتين ومحدش احسن من حد
احنا ميهمناش حاجه لامؤاخذه

Primero Guillón يقول...

Nice Blog. Please visit my Blog: www.guilloncity.blogspot.com. I hope your visit and commentary. Best regards. Wilfredo

عقل مهوي يقول...

اسف يعيني .. بس أنت بتتكلم بجد؟؟؟؟؟؟؟؟؟؟؟؟؟؟؟؟
يعني الاسعار دي بحق وحقيق يعني؟؟؟؟؟؟؟؟؟؟
ال وانا اكمني من الاقاليم بحسدكم واقول مقضينها بقي اوبراااااااااااااااا
واتاريكم ياحسره

kiki يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品