الأحد، ٤ ذو القعدة ١٤٢٩ هـ

!! دبور و بوكسر .. ولنضه

من كام يوم كده كنت قاعد باشرب فيسكافيه في اوضتي وباتفسح عالنت وفاتح شباك الاوضه والحياة منجهه عالآخر .. واذ بي أُفاجأ .. بدبور راح داخل علي الاوضة .. واتجه فورا على اللنضه بتاعة الاوضه واللي كانت منوره .. وعمال يخبّط فيها
والحق اقول .. واقول الحق .. خفت شويه عشان احنا بنسمع ان الدبور لدغته والقبر .. قمت طافي شاشة الكومبوتر وفاصل الماوس عشان بينور .. ومشغل التكييف على اسقع درجة - وهقول ليه شغلّت التكييف على اسقع درجة - وغطيت نفسي بقميص مرمي على الارض جنبي – وبرضك هقول ليه القميص كان مرمي عالارض – ومسكت الماج بتاع الفيسكافيه في ايد .. وحطيت علبة السجاير والولاعه في جيب منطلون الترينك .. واتجهت على باب الاوضه ورحت فاتح الباب ومطفّي النور بتاع الاوضه وخارج .. وقفلت الباب ورايا

التوضيح : اللي جه في دماغي ان الدبور بما انه اتجه عاللنضه .. واللنضه سخنه .. يبقى بيحب الجو السخن .. وبناءا عليه رحت مشغل التكييف عشان الجو يبرّد والدبور يسقع ويسيب الاوضه .. ولأني فنان بوهيمي ومهندس ديكور لاوذعي .. فاللي يدخل اوضتي يلاقيني معتبر الدولاب ده شيء ثانوي .. وكل هدومي عالارض بتعمل لوحه سوريالية المعالم .. عشان كده القميص اللي اتغطيت بيه كان مرمي عالارض جنب المكتب

لما خرجت بره الاوضه ومعايا الفيسكافيه وعلبة السجاير .. قعدت أفكر شويه .. هو ايه اللي جاب الدبور للدور التاسع في العلالي .. أمّا دبور ناقص وعنده تطلع طبقي صحيح .. واساسا اساسا منطقتنا نضيفه .. الدبور ده جه ازاي .. هم مافيش غيرهم البوابين لما كترو في المنطقه وبقو بيزبّلو الدنيا .. قامت الدبابير كترت .. يلا انا مش هعمل عقلي بعقل بحتة دبور .. زمان الدبور خرج من الاوضة دلوقتي بعد مانا طفيت النور وشغلت التكييف .. انا هدخل الاوضه بقى واكمل فسحتي عالنت ومش هاسمح لحتة دبور انه يعكنن مزاجي .. بس قبل ما ادخل الاوضه .. هاجيب علبة مبيد حشرات عشان بعد مايخرج الدبور ارش الاوضه .. يقوم يحرّم أي دبور لطخ يمكن أن تسوّل له نفسه المريضه .. ان يدخل غرفتي السورياليه .. ويعمل راسه براس اسياده البني آدمين

جبت علبة مبيد الحشرات .. واتضح انها علبة مبيد حشرات زاحفه وصراصير .. لكن مش مشكله .. الدبور عباره عن صرصار بس طلعله جناحات ودهن نفسه اصفر في اسود .. وده تقريبا لأنه كان عايز يشتغل تاكس في اسكندريه

دخلت الاوضه وكلّي حذر وحِيطه – يالهوي على كلمة حِيطه دي .. طب والله تعبت عشان اجيبها – وولعت اللنضه .. بصيت على الاوضة كويس .. مافيش أي حاجه والحمدلله .. رحت عالمكتب وقفلت التكييف اللي تلّج الاوضة وقلبها فريزر .. وشغلت شاشة الكومبوتر ووصلّت الماوس .. ولسه هكتب عالكيبورد .. لقيت الدبور راح خارج من تحت المكتب

يالهوي .. ده دبور غتت قوي .. يعني اضافة على انه ماعندوش أي احساس وشكله لاقط على حلاليفي وما حسش بالسقعه .. اتضح انه غتت وغبي كمان .. لكن لأ بقى
المره دي انا مش هخرج بره الاوضه واسبلو الجمل بما حمل .. دي أوضتي .. وهو اللي لازم يخرج منها

وعنها .. ورحت ماسك بوكسر كان مرمي عالارض – راجع التوضيح اللي بقول فيه ان هدومي مرميه عالارض وعامله لوحة سورياليه – وحادف البوكسر على الدبور .. قام عمل زي الشبكه اللي بيرميها الصياد على القرد اللي بيتكلم .. لما بيصطادوه من أدغال شومبونجو .. وراح واقع على الارض .. والدبور محبوس ومزنوق بين ثنايا وطَيّات البوكسر
- علي النعمة أنا حلو قوي في اللغة العربية الفصحى .. ثنايا وطَيّات .. وحِيطه -
ورحت جايب علبة مبيد الصراصير وقاعد ارش عالبوكسر عشان الريحة تتغلل جوا الانسجه وتخنق الدبور .. وارش ارش ارش .. لغاية ما المبيد خلص خالص .. قمت شايل البوكسر .. وبصيت عالدبور لقيته لسه في الرمق .. قمت جايب علبة بادي سبراي وقلت اهو كللو رش برضك .. وقعدت ارش ارش ارش .. لقيت الدبور بيرفعلي رجليه وجناحاته .. وتقريبا بيقولي حط شويه هنا كمان .. قلت لأ بقى .. طب علبة المبيد وكده كده مالهاش لازمه قوي .. انما البادي سبراي لأ .. كللو إلا العطر يافتى
ورحت جايب علبة سجاير كولوباطرا بوكس كانت فاضيه .. وبـ حتة ورقة شلت الدبور وحطيته جوا العلبه الفاضيه .. وقعدت أرج في العلبه .. واسمع الدبور بيتخبط وبيترزع جواها .. أرج وهو يتخبط ويرزع .. ويستغيث .. انا أرج وهو يستغيث .. أرج ويستغيث .. لكن أبدا .. أنا قاسي جدا .. ولا يونكن أبدا أرحمه .. فين وفين .. لغاية ما الدبور سكت .. والسر الإلهي طلع

طبعا بعد ما ريحة البوكسر كلها بقى مبيد حشرات .. قررت إني أرميه في الزباله وقلت مش مشكله .. واساسا اساسا .. طلع ولا نزل .. حتة بوكسر .. يعني مش حاجه كبيره

وآدي صورة الدبور .. لكي يكون عبره لغيره من الدبابير التي تسوّل لهم أنفسهم المريضة على الدخول في أوضتي .. والتخبيط في لنضتي
وبناءا عليه .. أحب أوجه نصيحة لكل شاب وكل فيتاء .. لو جالكم دبور وقعد في أوضتكم بالعافيه .. إياكم تسكتوله .. ادولو على نافوخه .. أوعو يصعب عليك .. مايصعبش عليكم بوكسر

.. كام ملحوظه

ألف شكر لكل الناس اللي توجهت بالدعاء لربنا عشان يعفو عن حمزه ابن اخويا .. وللي بيسأل هو مالو أو عنده إيه .. أقولهم هو عنده ورم في المخ .. وحجم الورم كبير نسبيا بالنسبه لطفل .. ومكانه صعب جدا وبالتالي مانقدرش نتدخل جراحيا عشان نستأصلو .. وكل اللي نقدر نعملو إننا نعالجه بالإشعاع مع متابعة التحاليل وعمل أشعه مقطعيه بعد كل جرعة علاج بالإشعاع .. عشان نشوف تأثير الإشعاع على الورم .. وربنا يعفو عنه وعن كل مريض

ملحوظه تانيه .. ممكن ناس تستغرب ازاي وأنا في الحالة اللي فيها دي .. لي نفس أتكلم واعمل مواضيع واهزر .. وللناس دي أقولهم .. في ناس بتستسلم وبتسيب نفسها للهم والغم .. وفي ناس بتحارب ده بانها تحاول تضحك .. أو على الأقل .. تحاول ترسم ابتسامه على وشوش الناس

ملحوظه تالته وآخيره .. بافكر اخد حد من صحابي ونروح ناكل في مكان حلو زي تِكّا مثلا .. وبعد مانخلص الاكل ونشبع والحياه تبقى فل .. أروح رامي جثة الدبور في وسط بواقي الأكل .. وأنادي صحاب المحل أقولهم ده اسمه كلام !!!؟؟؟
!!!!! دبور في الأكل .. ده إهمال .. ده تسيب
!!!!! أنا عايز أقابل الأستاذ تِكّا حالا

سوووو

هناك ٥٣ تعليقًا:

ojg يقول...

أحجز بسرعة مادمت جيت الأول
:))

AHMED SAMIR يقول...

ايه يا عم سووو الحرب الدبورية السوووية دي؟
بس بيني وبينك
انا بأترعب من الحاجات دي وبقعد اتشال واتهبد لو في اي حشرة في الاوضة
ويا سلام بقى لو كانت فراشة
بتبقى مصيبة
هو احنا يا عم قادرين ع البني ادمين لما هتغتت علينا الدبابير؟
سيبك انت
وانت عامل ايه؟
مابتجيش ليه في مدونتي المتواضعة؟
مش عيب كدة؟
تحياتي

ojg يقول...

اولا بقى
مبروك مقتل الدبور
وحمدالله على سلامتك
ويغووووور ألف دبور
ثانيا
شكلك كنت كاره البوكسر ده اصلا
طيب ايه اللي خلاك تجيبه بس؟؟
حد يجيب لنفسه وجع الدماغ؟
وبالنسبة للنضة أحييك على دفاعك المستميت عنها وعن أوضتك
:))

على فكرة عجبني قوي تعريفك للدبور
بس صدقني لو اشتغل تاكس
محدش هيرضى يركبه
يععععععع

سيبك انت لغتك العربية تحففففففففة
إستمررررر

همس الاحباب يقول...

الف سلامه على حمزه وربنا يشفيه ويطمنكم عليه
ربنا يتم شفائه على خير
تحياتى

همس الاحباب يقول...

ههههههههه
هههههههه
يا جدع عيب عليك تعمل عقلك بعقل دبور
بس اوعى يكون دبور الدكش
اتبقى وقعتك هباب
والتار ولا العار يا ولدى
وهوارة مش اتسيب تارها بتوتا
هههههههه
تحياتى

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك.
ضع بنر الحملة علي مدونتك.
البنر موجود علي مدونتي

Mony يقول...

طبعا انت حاطت علبة السجاير الي عليها شكل الراجل اللي في الانعاش ده علشان كل دبور يعرف ان ديه اخرته

طبعا الاعلان ده نازل مخصوص للدبابير مش المدخنين خاااالص


فكرة و الله موضوع الدبور في الاكل ده

طيب اختار حاجة غالية شوي علشان تكون استفدت من الدبور الاستفادة القصوي


و ربنا يشفي ابن اخوك يا رب و يطمنكم عليه

و في الاخر افكرك بالحديث اللي بيقول:
داوو مرضاكم بالصدقة

و الموضوع متجرب بس السر في المواظبة و النية

ربنا معاكم جميعا

رئـــــيسـة حزب الأحلام يقول...

حد يخاف من الدبور فى الزمن دة
دة حاجة بسيطة احسن حاجة انك تتخذه صديق دة دمه خفيف جدا
والف حمد الله على اللسلامة لابن اخوك وربنا هو الشافى المعافى
تحياتى

كاميليا بهاء الدين يقول...

هههههههههههههههه

هههههههههههه

ده ايه المعركة الجامدة دى؟؟

لا وايه عايز تستفيد من الغنيمة



ول حمزة حبيبى اقول
اللهم رب الناس اشفي حمزة ، شفاء ما بعده سقما يارب
اللهم انت الشافى ولا شفاء إلا شفاؤك
اللهم امين

احترامي اخي العزيز

صبرني يارب يقول...

سو يا سو الله يسامحك

اولا فى داهيه الدبور بقى عشان انا جيت على اخر ا لبوست واتقفلت

احيك الاول على صبرك علىا لابتلاء وان شاء الله ربنا ينجيه ربنا قادر على كل شيء
احب اقولك انى عشت التجربه دي من كام شهر فات
بن اخو جوزي يعنى ابن اخويا برضه والله مش كلام
بس هو يا حبيبى عنده لوكيميا وربنا قدرله النجاه لحد دلوقتي وخلص كورسات الكيماوي وخرج ولله الحمد حالته مبشره جدا
يارب عقبال ما تشوف حمزه واقف قدامك كده زي ما شوفت انا محمد من كام يوم

حقيقى انا اول ما شوفت صورة بن اخوك وكلام يا سو مش عارفه ليه حسيت

يارب يشفيه هو ومحمد ابن اخويا وسيف اخويا الى مش من امي وابويا الى عنده نفس حالة ابن اخوك بس برضه الحمد لله الاشعاع جاب نتيجه والورم صغر وحددوله عمليه بعد اسبوعين

ياااااااااااااااارب اشفيهم كلهم واشفي كل مرضى ا لمسملين
وشيل عننا ياااااااااااااااارب
وقلبي معاكم يا سووو ومن قلبي هادعيله مع محمد وسيف ربنا يشفيهم يارب قادر ربنا على كل شيء
واسفه لو طولت عليك

زهرة الجنة يقول...

ازيك سوو
الف سلامة علي حمزه وربنا يكرمه يارب

شكلك اعلنت الحرب علي الدبابير
بس سيبك انت طلعت مثقف وبتتكلم باللغة العربية الفسحة (:

بس طلعت أسد يا سوو وقضيت علي الدبور
بس هوا نت كنت بتموته والا بتعذبه؟؟

كراكيب يقول...

سووو يا سوووو
حبيبي حبااسوووووووه

دبور؟؟؟ يييييييع
وبعدين انت ازاي ماتصورش اللوحة السوريالية اللي على الارض بهدومك
هه؟؟؟ خايف لا نسرق فكرتها يعني واللا ايه؟؟؟؟

سووو يا سوووو
دعيت لحمزة على فكرة وربنا يخليهولكم ياااارب ويبقى تمام وكويس وفل الفل

miro el niro kwaniro

اه صحيح.. اللغة العربية بتاعتك
فزززززززيعه

الـسـيـدة نـون يقول...

انا ممكن اجى معاك تكا

مش علشان اكل لا سمح الله
بس علشان اشوف الحج تكا بذات نفسه

Hannoda يقول...

ألف سلامة على حمزة و يارب تتطمنوا عليه و تخلص الحكاية ده كلها و يرجع زي الفل يااااارب

حلوة طريقة الهروب من الهموم ده و عد الاستسلام ليها

بس انا شفت حد قبل كده كل ما يتخنق قوي قوي يهزر قوي قوي

و كنت بستغرب ازاي بيعرف يعمل كده

هو الهم ما بيأثرش فيه أبدا؟؟

بس مرة شفته فلحظة بكا كان عجيب جدا جدا.. الناس ده أنا يقلق عليها


ولمعلومات حضرتك... الدبور حشرة نضيفة جدا مالهاش علاقة بالزبالة و لا الكلام ده خااااالص.. ده حشرة نباتية وجوها كله عسل و زهور

يعني انت كده غلطت في الدبور ولزمننن تعتذر

وبعدين ما كنت ظلمت الاوضة وفتحت الشباك و هشيته بفوطة و سبته يطلع بسلام

بس واضح انك عندك ميول عدوانية و اتأكدت من اللي انت ناوي تعمله في المطعم

:)

تحياتي

انا حره يقول...

اه ياقاسى ياراجون يوووو قصدى ياسوووو

بقى عامل عقلك بعقل حته دبور ايه يعنى لما تسيبه يقرصك يعنى مالقرص للرجاله وانت سيد الرجاله كلهم

هههههههههه اول ماقريت العنوان قلت يالهوى دبور دخل فالبوكسر بتاع احمد ياعينىىىىىىىى الله يكون فى عونه وكنت بقى هعمل الاصول بس قلت اقرا الاول

ومن هذا البوست نستنتج ايضا ان احمد سوووو بيشرب كوكو الضعيف

انا حره يقول...

اه صحيح لو موضوع تكا دا اخده حد غيرى هزعلللللل وهخامصك اه

خمسة فضفضة يقول...

السلام عليكم ورحمة الله وبركاته

في الاول الف الف سلامه علي حمزه ويارب يشفيه ويقومه بالسلامه ويطمنكم عليه

بالنسبه للدبور علي فكره بقي ده مش دبور الدبور بيبقي جسمه رفيع وطويل وجناحاته طويله

تحسه حشره رشيقه كده وشيك وبنت ناس ، انما اللي انت حاطه ده مكلبظ ومفعكش ( ماتسالنيش يعني ايه) وقصير وجناحاته قصيره
ولا ده بسبب المعركه ؟؟؟


عموما مبروك علي النصر سينا رجعت كامله لينا واحنا اليوم في عيد

Unknown يقول...

بذمتك يا شيخ ده دبور

هههههههههههههههههههه
ده انت قلبته نحلة

بس الموضوع ملوش دعوه بالدبور واللنضة
الموضوع ليه بعد اخر
وصلت
يا خساره اكل الصراصير
قصدي رش الصراصير

Asmaa mahaba يقول...

ربنا يشفيه يا رب يا سوو ويرفع عنه ويصبر اهله يا رب
بص يا سوو انا ليا قريبتى والدتها برضو سنها صغير وحالتها صعبه ورد عظام وشبه بتتوفى وبتضحك علدى وتتكلم معانا وتتفسح اللى انت بتعمله دا مش غلط بالعكس دا صبر من عند ربنا بينزله على قلوب العباد
زيها كدا تمام والحزن مهما كان فى القلب مش بالوش حتى احيانا لو حزننا زاد بنحاول نهرج او نخرج يمكن ننسى اللى فينا
اللهم صلى وسلم وبارك على سيدنا محمد نسال الله العظيم رب العرش العظيم ان يشفيه نسال الله العظيم رب العرش العظيم ان يشفيه اللهم انه عبدك ابن عبدك ابن امتك ناصيته بيدك ماض فيه حكمك عدل فيه قضاؤك نسالك بكل اسم هولك سميت به نفسك او انزلته فى كتابك او علمته احدا من خلقك او استاثرت به فى علم الغيب عندك ان تجعل له من كل داء دواء وان تنجيه يا رب العالمين وان تشفيه وان تجعل القران شفاؤه وصبرا لاهله ومجاورا له فى الدنيا والاخره اللهم صلى وسلم وبارك على سيدنا محمد

Asmaa mahaba يقول...

اما الدبور فانت طلعت مبتعرفش فى الحشرات دى نحله يا سووو نحله تدوخك الدوخه دى
بس لاحظ ان الدبور مماتش من البيرسول ومات من السجاير هاا بطل السجاير يا دبور:))
...........
اما بالنسبه لتكا فانا معنديش مانع فى شرط ناخد ايبى وانت طبعا جينتل مان فحتدفع الحساب:))) يا صعيدى يا بتاع فوزى

اهو ده عيبه يقول...

اولا سلامه حمزة الف سلامه وربنا يشفيه ويعفى عنه يارب

ثانيا انا حبعت لكل جمعيات حقوق الحيوان والدبابير فى العالم علشان تتضامن وترفع عليك دعوة تعذيب وقتل للدبور المسكين
وانت معترف بجريمتك انك حطيته فى العلبة وهزيت-العلبة طبعا- لحد ما مات

وبناء عليه التهمه ثابته عليك ثابته حتى لو طلع الدبور من عرب اسرائيل او دخل اوضتك غصب عنك لانك اللى سبت الشباك مفتوح

واطالب بتحميلك مصاريف القضية وتعويض مادى للدبور قيمته 5001 قرش صاغ مصرى لاغير

Alkomi يقول...

ودهن نفسه اصفر في اسود .. وده تقريبا لأنه كان عايز يشتغل تاكس في اسكندريه


ايه ياض الحنان ده كله يالة

بتستظرف على اسكندرية

يا نهارك دبابير

ايه رايك بقى اننا كنا باعتينهولك غتاتة

يستفاد من الموضوع برضه انك ماتواجهش الدبور ببوكسر اثناء تادية عمله لان ممكن يطير فيها رقاب و يضيع مستقبل اسرة كاملة

و بعدين من الاول بدل كل التكلفة دي كنت ولع سيجارة كلوبطرا و اكيد الدبور كان هيجيلوا تسلخات في رئة اللي جايبينه بدال المبيد و الحبشتكانات القديمة دي

و عموما حوار التكا

سعيد صالح سبقك و عمله هو و رغدة في باريس في فيلم بناتنا في الغربة يا بتاع السينما يا جامد

سلامي و دعائي و امنياتي القلبية بعاجل الشفاء لحمزة

Z_Diva يقول...

لا كله كوم و "انا عايز الاستاذ تكا حالا" دي كوم تاني

بص يا باشا مدام عندك الدنبور ده, ليه تخلي احلامك تكا, يا عم نطلك على اكبرها و افخهما فندق في الجامهورية, و اعزم كل اللي انت عايزهم كمان, و اطلب فواجرا و كافيار و استكوزا, ثم نفذ ابيريشين دبورز

-و متنساش نصيبي في الوليمة يتبعتلي فيديكس لو سمحت-

شـــــهد يقول...

ههههههههههههههههههههههههههههههههههههههههههههههه

ضحكتني بجد ياسووووو..بس مش حرام عليك تعمل كووووول ده في الدبور الصغنن الأمور ..كنت تقعد معاه وتشوفه عايز ايه مش يمكن يكون جيحان تديلة ساندوكتش ولا عشطان تديلة شوية فيسكافيه اهم يدفوه شويه .. ياحيني عليك يا دبابيوروووو


مع تحيات شـــــــهد

من امام جمعية حماية الدبابير الغلابة

محمد فاروق الشاذلى يقول...

قبل أى حاجة
يارب نسألك بكل اسم هو لك علمته لأحد من خلقك أو استأثرت به نفسك أن تشفى حمزة وتقيه من كل سوء.

داوم على الصدقة يا أحمد بنية شفاء حمزة وإن شاء الله يخف مصداقا لقول الحبيب صلى الله عليه وسلم داوا مرضاكم بالصدقة

وأخيرا
ربنا يخليك يا أحمد ابقى صور عم تكا أو عم كنتاكى أو عم ماكدونالدز علشان نفسى اتعرف عليهم قوى
ومتنساش تاخد الدبور معاك وانت ماشى علشان المطعم اللى بعده.

Unknown يقول...

يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

فاتيما يقول...

إيه يا سووو الشياكة دى فى قتل الدبور
تخلص علبة مبيد بحالها
و كمان إسبراى
و قبل منها تكييف و بوكسر أترمى كل دى خساير مادية فزيعة
يا بنى و إين ذهبت المقشة
دا غختراع هايل و بعيد المدى أنا شخصياً بستخدمه لما اكون عاوزة اموت صورصار و أنا اصلاً بترعب منهم بس بقيت أدي الصورصار ضربة بالمقشة و أنا بعيده عنه كام خطوة يترنح و افضل اديله فى ضربات متواصلة لحد ما يبقى جثة هامدة ...
إيه الأسلوب التعذيبى اللى جواه علبة السجاير دا ...الله يخربيت اليوم اللى حد يزعلك فيه يا شيخ
دا هيتمخمض على الآخر
المهم جت سليمة و ربنا ستر و كل الخساير فدى سعادتك ....
ربنا يطمنك على حمزة يا رب و يشفيه و يعافيه ....
و خدونى معاكم تكا ...بس أنا معزومة على حساب الحاج ...

Unknown يقول...

سلامة حمزة ياسوو
على فكرة فعلاً الصدقة والدعاء فرقوا مع ناس كتير أوى
ــــــــــــــــــــــــــــــــ
وبالنسبة للدبور انت كنت شرس جداً معاه..بس هو يستاهل المفروض يسأل الأول عن صاحب الأوضة؟

تحياتى

أميرة يقول...

السلام عليكم ورحمة الله وبركاته

زي ما صبرني قالتلك كده

سيف تقريبا كده نفس الحالة وشاب زي الورد لو اقدر اقول عليه احسن واحد في الدنيا .. الحمد لله علي كل حال

سيف عنده في مكان حساس علشان قريب من النخاع الشوكي و الجراحة صعبة و خطر جدا واهو بقاله ما يقرب من 3 شهور كل يوم بياخد حقن كيميائي و بعدها بفترة اخد اشعاع و ليزر و ان شاء الله التحاليل اللي قبل العملية كمان يومين ان شاء الله ربنا يعفو عنه يارب

اللي عايزةاقوله عليك بالدعاء والصدقات ولوتقدروا تخلوه يشرب من ماء زمزم بنية الشفاء و حافظوا ان يكون عندكم حسن ظن بالله

ادعوا وانتم موقنون بالاجابة .. كنا بندعي لمحمد ابن اخو جوز صبرني و كلنا امل ان ربنا هيشفيه و من بعده اللي حصل لسيف و ربنا اعلم بالمه و عذابه و ملناش غير ربنا

الجأوا لله هو وحده اعلم بيهم و بألمهم و ان شاء الله العلاج يجيب نتيجة كويسة بس عليكم بالصبر " ان الله مع الصابرين " ، " وقال ربكم ادعوني استجب لكم " ، " واذا سألك عبادي عني فاني قريب اجيب دعوة الداعي اذا دعان، فليستجيبوا لي وليؤمنوا بي لعلكم يرشدون"

ولازم اليقين وانت بتدعي ان ربنا سامعك دعائك و ان شاء الله هيستجيب له و الرسول صلي الله عليه وسلم قال " الدعاء يرد القدر" وان شاء الله قضاء الله كله خير

ان شاء الله ربنا هيعفو عنه و يستجيب دعائنا ويشفيهم جميعا يارب و يخفف المهم وهو السميع المجيب

أسال الله العظيم رب العرش العظيم ان يشفي سيف وحمزة ومحمدو مرضي المسلمين اجميعين

اللهم اكشف عنهم الضر كما كشفته عن سيدنا ايوب
اللهم نجهم من المرض والالم و الطف بيهم و استجب دعائنا
لا اله الا انت سبحانك انا كنا من الظالمين
اللهم نجهم كما نجيت سيدنا يونس من بطن الحوت

اللهم تولهم وكن لهم و ارفع عنهم الابتلاء و عافهم وارزقهم الصبر و هون عليهم الالم

اللهم استجب .. بالله عليك تطمنا عليه اول بأول ولو في حاجة ممكن نعملها .. مش عزومة والله .. المساندة النفسية من الحاجات المهمة اوي و بيحتاجوا يكون جنبهم ناس بتحبهم ويحسوا بحبهم دا.. اي حاجة بجد لو اقدر اساعد باي حاجة ..

الله يصبر اهله ويصبرنا جميعا علي الابتلاء ولله الحمد علي كل قضائه فرحمته وسعت كل شيء

ميرا ( وومن ) يقول...

كل المعركة دي علشان دبور

مره اخويا واحنا صغننين لقي دبور علي حيطة سلم في بيت خالتي ( كانت عروسة جديدة وراحين نبارك لها ) راح قفشة وقفل علية ايدة وخالتي جاية تسلم علية حاطة في ايدها

طبعا كنت متوقعه خالتي هاتتنطط من الخوف وتصرخ ونقعد نضحك احنا

بصت له كده وكان بيرفرف ولسه هايهرب وراحت رمايه علي الأرض وداست علية وقالت لأخويا ايه الهزار البايخ ده

هع هع هع هع

طبعا الموقف ده لا يقارن بموقف ماما لما موتت تعبان من النوع الضخم كان معشش
في السطوح عندنا وده لأنه غره طولة وافتكر انه ممكن يخوفها

مش عارفة ليه وانا بحكي الكلام ده جالي احساس ان عيلتنا دي سوبر بس واضح اننا ناس قلبها ميت انا لا بخاف من نمل ولا صراصير او مشابه ولا فيران او تعابين
لو دخل اوضتي الدبور دة معنديش غير ابو وردة

ربنا يشفيلك حمزة يارب ويتمم شفاه علي خير

mohra يقول...

الف سلامه لحمزه يا سو
و ربنا يديم عليك نعمه التفأول
تحياتى

SKOBL- Little Lazy Me يقول...

أولا ألف سلامة على حمزة ... و ربنا يعافيه و يؤجره ..
ثانيا بقى بصراحة حلوة الحكاية دي كنت بقرا مبتسم لحد ما وصلت لـ " وتقريبا بيقولي حط شويه هنا كمان " رحت ضحكت .. بجد جت حلوة و تسلم ايدك ..

و لك كل التحيات و لحمزة الدعاء بالشفاءو الأجر

بنوته مصرية يقول...

الف الف سلامه علي حمزة يا سوو
ربنا يشفية يارب
ويقوم ويتنطط ويلعب كدا
ويكبر وتفرحو بيه ان شاء الله


بقي يا سوو تعمل عقلك بقي عقل دبور

بس اوعي يا سوو تكون آبي مسلطه عليك الدبور والنحلة بتوعها هههههههههههههه

علي فكرة صورة الدبور جمب بيومي تجنن ده لو شافها هيرفع عليك قضية ههههههههههههههههههه

Zianour يقول...

الف سلامة لحمزة
وربنا يعفي عنه يا رب ويشفيه هو قادر على كل شئ..
أما عن المرحوم الدبور
فهو اللي زن على خراب عشه

ضحكتني بجد

وخد بالك من لوحاتك السوريالية ومن التكيف

دكتور كسلان يقول...

ازيك يا سوووو

وحشتنى جدا مدونتك ووحشتنى بوستاتك الجميلة

انا سعيد جدا ان لقيتك ع الفيس بوك

ربنا يشفى حمزه ان شاء الله ويتم شفاه على خير


سلااااااااااااااام

خالد المصري يقول...

الحق يا معلم

في اخبار بتتردد ان عائله الدبور القتيل تطالب بمحاكمتك اسوة بهشام طلعت وحسام ابو الفتوح

والناس بتقول ان الدبور مدخلش قوضتك خلسه لا الموضوع فية علاقه سريه وانك قتلته عشان مرضيش... ( استغفر الله العظيم)

والدليل البوكسر...

اهرب يا سو

mostafa rayan يقول...

حبيب قلبي ربنا يسعد ايامك
بس يا سوو بدل ما ترمي البوكسر ما كنت تجيب شبشب او اي حاجة وتقتل بيها الدبور وتريح نفسك بدل حوار الرش وخسارة البوكسر
ربنا يشفي حمزة وياعم ماتحطش في دماغك اي كلام من اي حد دماغه فاضية
ربنا يوفقك يا صاحبي

Lyssandra يقول...

أولاً : أحييك جداً علي براعتك في اللغة العربية الفصحي

:)

ثانياً : أهنئك بالانتصار الغالي علي الدبور الوقح

:)

ثالثاً : لاحظت ان الدبور بعد ماخدرته ورجيته في علبة السجاير ان جناحه اتقطع
ده بعد عملية التصفيه يعني ولا أثناء محاولة الاغتيال ؟؟

:)

رابعاً : حاة الدبور متبهدلة ع الاخر وعليه ده هاينفعكجداً في الخطة بتاعت بقايا الأكل

:)

خامساً : لما تروحوا القسم اطلب تحليل الطب الشرعي اللي هايثبت ان الدبور ده مات مسموما ومرجوجاً
وده بالتأكيد هايشمّع المحل بالشمع البنفسجي

:)

---------------

دعواتي لحمزة يارب يشفيه ويتمم شفاءه علي خير
ربنا قادر علي كل شئ
ربنا يطمنك ويطمنا عليه يارب

والله دعاء صادق بجد
ربنا يستجيب لنا كلنا

-------------

علي فكرة عجبني جداً تعليق وومن

عائلة سوبر فعلاً

:)

==============

تحياتي

Lyssandra

maiosha يقول...

ههههههههههههههههه

مش قادرة ابطل ضحك

ده إنت طلعت مفترى يا سوو
ههههههههههههه
ده الدبور ده كانت امه داعية عليه وقالتله روح ربنا يوقعك فى إيد اللى مبيرحمش
هههههههههه

فى حاجة تانية بقى

ألف ألف سلامة على حمزة وربنا يقومه بالسلامة إن شاء الله .. ويكتبله الشفاء

بس بالله عليك إبقى طمنا عليه أول بأول

سلاام

rainbow يقول...

يااااه ازيك يا عحمد

ضحكتنى من قلبى والله
ولما جيت الم الابتسامة لما قريت عن حمزة ربنا يشفيه ويخفف عنه .. رجعت تانى اوسع واعمق وفيها احترام لعقلك الجميل قدام كلامك عن الناس اللى بتتعجب من مواجهة الالم والابتلاء بصدر رحب وقلب مفتوح لهزائم الحياة

بجد يا عحمد انا سعيدة بموضوعك من كل النواحى ربنا يسعد قلبك ويطمنك على كل حبايبك

دعائى وتحياتى اخى العزيز

هدى

شفـقــة و إحســــان يقول...

البوست دمه خفيف اوى بس تصدقى انا صعب على الدبور اصل انت عذبته
وربنا يشفى ابن اخوك يارب
تحياتى

The Führer يقول...

أولا دعائي لحمزة وكل مرضانا بالشفاء وخللي أملك ف ربنا كبير.

ثانيا الدبور عدائي جدا والظاهر ان صاحبنا دة كان شارب حبايتين إيفانول علشان محاولش يلسعك ، خللي بالك لسعته ح تورملك وشك وح تبقي شبه سكان المريخ!

مدونتك رائعة وخفيفة الدم جدا ، برجاء تقبل مروري الأول.

دمت بكل الخير

Miss. Sosa يقول...

ههههههه والله يااخي انت فظيع

اولا ربنا يشفي حمزة يارب .. بجد انت زعلتني .. ربنا يشفيه يارب ويعافيه

اما بخصوص البوست الاكشن ده

انت عارف الدبور ده يبقي مين ؟!



يبقي فوزى هههههههههه

فكرك لو كانت نحلة كنت قولتلك بتوع كلنا ليلي مسلطينها عليك

لكن ده فوزي بقي .. روح شوف حزبك المنشق ده ولا مين الدبور العميل ده يمكن تبع السي اي ايه ولا الجوستابو
وجي يشوف التنظيم الداخلي للحزب حداكم :))

عبدالرحمن فارس يقول...

اللهم عجل بشفاء ابن أخونا أحمد وخفف عنه

تحياتي
و
محبتي

ابو النجوم يقول...

سوووووووووو
أيه الدمويه دى والله ماشفتها الا فى فيلم القاتل الندل بتاع احمد المليجى
(دى مقصوده ااقصد احمد ذكى لما كان بيقلد المليجى فى مسرحيه ) عموما ياترى فيه حد عرف انك اللى قتلت الدبور خلى بالك فيه ناس هنا فاتنين ولو أهل الدبور شموا خبر هتبقى زى الدبور اللى زن على خراب عشه والدبابير هتجيب لك قوات التحالف الدبوريه وسوف يتم قصفك بالقنابل العنقوديه وحتى لو استسلمت لهم هتروح أبو غريب الواقع تحت سيطره الدبوش الاعظم وهناك أنت عارف ..... دى اول مره اشوف الجريمه الكامله عقبال مانشوف الدبور الاعظم ملاقى نفس المصير .

ابن حـجـر الـعـسـقـلانـى يقول...

أنا قريت الموضوع دة مرتين .. امبارح و النهاردة .. الموضوع شيق جدا

طب بص ... أنا هاسأل كذا سؤال

-انت صورت الدبور .. على عينى و راسى .. طب ليه ما صورتش البوكسر ؟؟

-ما دلالة و جود جثة الدبور و هو فاقد الحياة جنب صورة حمدى بالالا و هو فاقد الوعى ؟؟

- انت ليه افتريت على الدبور بالشكل القاسة دة .. دة شكله كدة دبور "مكسور الجناح" ؟؟ حتى بص على صورة الدبور هاتلاقى جناحه فى حتة و هو فى حتة

كفاية كدة أسئلة بقى

فى النهاية .. هناك وصفة سحرية بتقول: داووا مرضاكم بالصدقة .. و الله العظيم عملت معانا معجزة

Unknown يقول...

يارب يشفى حمزة يارب ويخللى اهله يقاموا كدة ويبقوا جدعين ....... حلوة فكرة تكا وانا ممكن اقوم بدور صاحبك

حنين القلب يقول...

يخرب بيت كده
كل ده علشان دبور دحنا مش كنا عيال على كده يا ابنى الدبور اللى انت عملت ليه فرح ده وبوظت بوكسر وعلبه مبيد حشرى وبرفنته كمان بعلبه اسبراى وقعد ساعتين تموت فيه
كنا بنمسكه من جناحاته ونربطه بخيط وهو يطير وانا نقعد نلعب بيه
صحيح رجاله مدلعه
وايه حكايه القوضه اللى هدومك عامله لوحه فيها دى
دى ولا لوحه ولا غيره ده اهمااال
والله لما تتجوز مراتك هتعلقك فى النجفه فى لوعملت كده

بجد بوست دمه زى العسل وحلو اوى صورة الدبور اللى اتعذب فى سجن ابو غريب قصدى سجن سووووو

وربنا يشفى حمزة ويتمم شفائه على خير
وصح يا سوووو وانا معاك الانسان لو استسلم للحزن هيقضى عليه
اسفه للاطاله اصلى وحشتنى مدونتك

حمامة يقول...

الأول الف سلامة على حمزة
وفعلاً زى قولت مش معقول اى مشكلة او ازمة تمر بالأنسان يستسلم ليها
ويوقف الدنيا علشانها
لأنها رضى او مرضيش الدنيا هتمشي

انت بجد ضحكتنى وانا كنت متضايقه
ربنا يكرمك ويشفي حمزة يارب

:)

غير معرف يقول...

أول مرة اجى.. مش هتبقى اخر ان شاء الله

بجد مدونتك حلوة اوى
هضيفك عندى

3ala asm masr يقول...

انا بعد ما ضحكت قريت اللى بتقوله عن ابن اخوك اضايقت
وماليش نفس اكتب تعليق حلو
سورى يا سو

nor يقول...

ايه ليه كده يا قاسي
بقي علبه مبيد حشري عشان دبور
فين حقوق الحشرات

غير معرف يقول...

على يديَ
سوووو كان هناااا
والدبوووور كان هناااا
: D
بس نسيت تقووووووووووووول إيه السبب اللي جاب الدبووووووووور فوووووووووق
أفتن...؟؟
هاااا
أفتن ؟؟؟؟؟
hehehehehehehehehehehehehehe