السبت، ٨ شعبان ١٤٢٩ هـ

أكاديمية الشرطة

آخر تحديث في الليله

العربيه طلعت فعلا بتاعة طالب في اكاديمية الشرطه .. ويقال انو الاخ الاكبر للي كان سايق العربيه وهرب .. ولو اني شاكك انهم هم الاتنين شخص واحد .. خصوصا وان اللي هرب لسه هربان .. واخوه او صاحب العربيه واللي في كلية الشرطه .. مسافر .. يعني الاتنين مش موجودين
اللي كان جنب اللي سايق العربيه أو اللي رجله اتكسرت .. في المودرن اكاديمي في سنه تانيه .. ومتحفظ عليه في مستشفى خاص مخالفة لتعليمات وزارة الداخليه وانه يتم التحفظ عليه في مستشفى حكومي مع وضع حراسه عليه .. لكن هنقول ايه .. الواد غلبان ورجله اتكسرت كسر مضاعف وهيعمل عمليه وهيركبولو شريحه ومسامير .. يعني يا حبة عين امه مش هيقدر يمشي ولا يهرب
اللي كان قاعد من ورا طالب فاشل في ثانويه عامه وقدم السنه دي على المودرن أكاديمي .. وشكله هو اللي هيلبس القضيه لانه هو الوحيد اللي متحفظ عليه في القسم .. وكمان لمحت امه بتعيط وبتدعي على صحابه اللي بوظوه .. لكن في محامي ماعرفوش - تقريبا تبع الناس الهربانه - خدها وطلع بيها بره القسم وبعد كده رجع لوحده .. شكله اداها فلوس ولا عمل اي حاجه
ابو البنت طلع مستشار في وزارة الزراعه وليه علاقات ومش هيسيب حق بنته .. ولما قلتله اني مدون ولي علاقات بناس مدونين ومنهم ناس صحفيين .. قاللي لو الموضوع مامشيش قانوني هنحتاج لمساعدتك ومساعدتهم

نصيحه بقى .. كل البنات .. ياريت ياريت ياريت يكون معاهم اي حاجه يحمو نفسهم بيها .. سلاح كاتر مثلا .. قزازة مية نار ياخدو منها بؤ ويبخوه على اي حد هيخطفهم .. انشالله حته قشرة تين شوكي ويشرحو بيها اللي جاي يخطفهم
زي مانا ايدي باظت من قشر التين الشوكي وانا باساعد الواد وباشيل معاه التين من عالارض
!!!! تقريبا في حد كان باصصلي في الكام تينايه اللي كلتهم

تحديث

انا نازل رايح قسم البساتين عشان اشهد عالمحضر لأن المحضر اللي اتعمل في النقطه تم اعتباره اثبات حاله فقط

وعلى فكره .. انا ولا فكرت في اي حاجه من اللي بتقولو عليها لما جريت ورا العربيه .. طلعت اجري وبس وانا مش عارف ايه اللي هيحصل ولا هعمل ايه .. طلعت اجري وراه وخلاص .. اضافة الى اني ماعملتش حاجه خالص ولولا ستر ربنا ووجود عربية التين الشوكي اللي لخمت اللي سايق وارتبك وعمل الحادثه .. كان لا قدر الله الموضوع ده هيبقى في سكة تانيه .. خصوصا اني ولا لحقت احفظ نمر العربيه ولا لحقت احفظ شكل الواد اللي شفته .. يعني جريي وراهم زي عدمه

------

هيثم صاحبي الأنتيخ راجع الكويت بعد ما قضى معانا حوالي شهر أجازة .. ورحت عشان اسلم عليه لاني بقالي يومين مثلا ماشفتوش.. خلصت سلامات واحضان وحركات وراجع عالبيت تاني
----
الساعه تقريبا اتنين الضهر .. نزلت من الميكروباظ على اول شارعنا وقلت بدل مانا باروّح البيت من الطريق اللي بامشي منه على طول وكللو شمس ومافيهوش شجره واحده تِسُرّ القلب الاعور الحزين .. امشي من شارع تاني مليان شجر وضِلّ وحاجه طراوه
بمجرد مادخلت الشارع لمحت قدامي ببتاع خمسه سته متر .. واحده بنت - محجبه ولابسه تايير واسع وقميص واسع - ماشيه في الشارع وعلى جنبها الشمال ناحية الشارع .. عربيه قزازها كللو فيميه ماعدا القزاز القدماني .. ومحطوط ستيكر او شعار (أكاديمية الشرطة) على القزاز الوراني .. وفي جزء من الثانيه .. واحد نزل من الكرسي القداماني اللي جنب السواق ولقيت الباب الوراني بتاع العربيه اتفتح .. وواحد في الكنبه الورانيه قام ساحب البنت جوا العربيه غصب عنها وبيساعدو الأخ اللي نزل من الكرسي القداماني .. واللي بمجرد ما حس البنت ابتدت تزعق ولسه هتصوّت قام زاققها جوا العربيه وقافل الباب وهو باصص علي .. ونط في الكرسي بتاعه وراح صاحب العربيه مدور العربيه ومشي

انا شفت المنظر ده وبالرغم من اني باكره الجري كره العمى وطول عمري في المدرسه كنت باكره حصة الالعاب ومدرس الالعاب اللي بيخليني اجري طول الحصه وما العبش كوره ولما باجي العب بيوقفوني حارس مرمر .. لكن لقيت نفسي باجري ورا العربيه دي وانا باقول حرامي - وماحدش يقولي حرامي ايه اللي بقولها عشان هي اللي جات في بالي ودايما بنشوف في الافلام لما واحد يجري ويقول حرامي .. الناس بتظهر وبتجري وراه في اتجاه الحرامي - أي نعم ماكانش في ناس اصلا في الشارع ومنطقتنا من اكتر المناطق هدوءا في غير ايام الدراسه عشان الدنيا بتبقى زحمه على حس المودرن أكاديمي - المودُن أكاديمي زي مابيقولو بتوع الميكروباظات - لكن انا كنت باجري وانا بقول حرامي على أمل ان أي حد يظهر من أي حته .. وسبحان الله
الواد خلص الشارع ده وداخل شمال في اتجاه الشارع اللي يطلعه عالاوتوستراد ومنها على أي مكان وانسى ان حد يقدر يجيبه بعدها .. ولقى قدامه عربية تين شوكي واقفه .. قام خابط فيها على خفيف واتلخفن ماعرفش يعمل ايه وبيحاول يتفاداها قام راشق في كابينة ميناتل .. ستر ربنا ماحدش كان واقف جنب عربية التين الشوكي وتقريبا صاحب العربيه راح يوصـّل طلب في شقه من العماير اللي في المنطقه .. وستر ربنا ان مافيش حد كان بيتكلم في كابينة الميناتل

اخينا اللي سايق العربيه لما لمحني لسه باجري وراه ولقى الناس ابتدت تظهر - الناس ابتدت تظهر لما سمعت صوت الخبطه والفرمله مش على صوتي وانا بقول حرامي - قام ساب العربيه وطلع يجري .. اللي قاعد جنبه بقى واللي هو نفس الشخص اللي زق البنت اللي كانت ماشيه .. الباب بتاعه اتزنق ناحية كابينة الميناتل ومش عارف ينزل ولا قادر يتحرك لانه تقريبا في حاجه زانقه على رجله من تحت .. البنت نزلت من العربيه وهي عماله تشتمهم وبتستنجد بالناس عشان يودوهم في ستين داهيه

الظريف بقى ان اللي اتزنق قدام ده لقيته بيستنجد بي وبيقولي طلعني وباين عليه انه بيتوجع وبيتألم قوي .. طبعا الواد اللي كان في الكنبه الورانيه طلع سليم ولسه هايجري قامت البنت ماسكه فيه

الاظرف بقى ان الناس كانت متعاطفه معاهم وصعبان عليهم البنت عشان فاكرينها زعلانه على اللي حصل للي معاها في العربيه .. لكن لما انا شرحتلهم باختصار انهم خطفو البنت وكانو طالعين يجرو وخبطو في عربية التين وبعدها رشقو في الكابينه .. الناس تحولت لوحوش مفترسه وعايزين ياكلو الوادين دول بسنانهم

نسيت اوضح ان نقطة شرطة صقر قريش بينها وبين المكان اللي حصل فيه الحوار ده مافيش خمسين متر .. ومافيش قدامها غير عسكري شطرنج مش عارف هو فين اصلا - لو سألته فين شارع الشهيد ميكي ماوس هيقولك أخر الشارع الجاي - يعني تقريبا كأن النقطه دي مالهاش وجود
-----
اقتادت الناس الأخين الحلوين وطلعو بيهم عالنقطه .. والبنت اتصلت بأهلها - واللي ساكنين في نفس الشارع - وجه ابوها واخوها تقريبا وطلعو مع الناس على نقطة صقر قريش

السؤال اللي بيطرح نفسه بقى .. هل العربيه دي بتاعة حد فعليا في كلية شرطه ولا صاحب العربية لازق الاستيكر وخلاص ؟؟
والسؤال التاني .. هي النقطه دي محطوطه وجاهة اجتماعيه ولا الظباط مركزين في تطبيق قانون المرور وسايبين البلد تضرب تقلب ؟؟
----
لقيت نفسي محتار من كتر التفكير .. ولمحت الواد بتاع عربية التين رجع ومش فاهم ايه اللي قلب عربيته ووقع التين عالارض .. قمت رايحله وجايب بتلاته جنيه تين شوكي وحطيتهم في التلاجه

حد يحب ياكل معايا تين شوكي ؟؟؟

سوووو

هناك ٨٢ تعليقًا:

ابن حـجـر الـعـسـقـلانـى يقول...

و الله مش عارف أقول إيه غير حسبنا الله و نعم الوكيل

بس ربنا يكرمك يا سوووو عل اللى عملته ... لولا إنك و زعقت و قلت "حرامى حرامى" ما كانوش ارتبكوا و لا خافوا و لا خييشوا فى الكابينة

ربنا يحفظنا

و أكاديمية الشرطة فى خدمة الشعب

Z_Diva يقول...

la bas wallahy i'm so proud of u ink etsarft
rbna satr welbnya bnt 7alal we rbna strha m3aha
rbna yostrna gami3an donya we a5ra
we tb3an el ********************************************************************************* ely kan say2 da -pardon ma frensh, though the rekaba had 7azft my words :D- da lazm ytgab mn afaaaaaaaah, wet7l2 lo 3alziro

nigro يقول...

راجل رجولة مرجلنة يا سوووو
ربنا يكرمك يا أحمد على جريتك دي و اللي أنا حاسس بكم الصعوبة اللي قابلتك في الحركة دي
بس هما الناس خدوا ولاد الكلب دول وش على النقطة كده ولا سكعوهم العلقة التمام
هأزعل قوي لو قولتلي إنهم ماتسكعوش
هأضايق بجد و اتحسر على حالنا أكتر ما أنا متحسر
ربنا يسترها علينا و على ولايانا


يلا سلام

رحــــيـل يقول...

مهى الشرطه فى خدمة الشعب
اومال ياسووو بيدخلو يتعلموا ايه دلوقتى فى الاكاديميه

انا لما بقرا عن حاجه زى دى بتحصل بجد بشستغرب ان ممكن الناس توصل للمرحلة دى
يخطفوا بنت عادى كده بقى شئ عادى قوى للدرجادى

يانهار اسود

كويس انك جيبت تين كل كويس عشان الجرى اللى جريته

وبعدين كده برده تزوغ يوم مدونين الدقهلية ماشى ماشى

غير معرف يقول...

قولى انك مفبرك سيناريو مع انى متأكده انه بيحصل اسوأواسود من كده بس احنا بنسمع المصيبه كأننا مسمعناش مصايب قبل كده ربنا يلطف بينا ويلطف بالبنت دى وتعدى الازمه والخضه دى على خير بس انتا فضلت تجرى ده كله ازاى هو كان ماشى بالعربيه على سرعة 20 ولا ايه بعدين الاهم بقه من ده كله ابتسم انت فى المحروسه والله احنا المفروض نسرق اللقب من الهند دا احنا اليى بلاد العجايب ...فى رعاية الله ..سلام اصل انا لسه مذهوله بعيد عنك

سمر الشافعى يقول...

هيا الدنيا جرا فيها ايه يعنى لولا ستر ربنا والعربيه اللى طلعتلهم دى كانت البنت المسكينه راحت فيها

بس الحمد لله ربنا ستر وربنا يكرمك ويجازيك كل خير على اللى انت عملته دا والله الواحد بيفرح لما بيحس ان زى مافى شر لسه فى خير كتير فينا ومش كل واحد بيقول وانا مالى زى مابنسمع

تحياتى ليك

Empress appy يقول...

لااااااااا عاوزه اعرف ايه القصه مش تروح الاسم مش انت شاهد عااااااا طيب اجي توديني والنبى
بص يا سوو فيه شباب مزفتين بيحطوا الحاجات دي كده الباجات يعني علشان كده العربيه دي لما بتتقفش فى كمين بيطلع روحهم بجد
وقانون المرور الجديد منع موضوع الباجات والفيميه اثلا الوزير مانغه بس فيه ناس بتسيبه زي واحد غلس انت عارفه هههههههههه
المهم ربنا يجازيك خير وانا جاي اكل التين معاك يا ريس ههههههههه

Diyaa' يقول...

أنا عايز تين عشان إنت عارف يعني
لول
المهم..مبروك يا ريس
اتمسح عنك سيئات كتير وخدت حسنات كتير
وأثبت لنفسك قبل أي حد إنك رجولة
وساعة الجد بتجري بتجري يعني
والحمد لله إن ربنا سترها مع البنت الغلبانة..ميروحوا يستلقطوا واحدة الفجر من شارع الهرم ولا جامعة الدول..ولا هيا مبتجيش إلا في ولاد الناس
الحمد لله الحمد لله الحمد لله
ويا رب يكونوا اتضربوا ضرب متضربهوش حد قبل ولا بعد
وحسبي الله ونعم الوكيل في حبيب العادلي واللي مشغلينه واللي وصل البلد للوضع ده :(

محمد الهادى غانم يقول...

السلام عليكم يمكن اول مرة ادخل عندك بس الناس بيشكروا فيك اوي
المهم قررت اسفا ان انا ادخل عندك والاقس ده اول موضوع اقراه .
عكرت دمي والله ان احنا وصلنا لحد كده من السفاله بس الحمد لله انهم مخطفوش حطرتك كانت البت والا عبرتك والا جرت وار العربية جدع يا سوووو ياجامد .
بس ممكن اسأل سؤال هو انت جريت وارا العربية برجليك الجميله اللي كانت في القبقاب والا العربية هي اللي كانت لابسة قباب .
ويجعله عامر ابقي شرفنا

3ala asm masr يقول...

سوووووو الله يكرمك وحدتين تين عشان نعرف نقول البوقين اللى عندنا
بص ياسيدى هو شكل الواد لازق الستيكر وخلاص عشان لو كان صحيح فى كليه شرطه كان عمل فيها صايع ومجريش
وانت بتقول لابسه جيب واسه وبلوزه واسعه ومحجبه واتخطفت عشان الناس بس اللى بتقول ان البنات السبب يطلعوا صوتهم ويورونا نفسهم
واحده تين بقا كمان عشان اعرف ادعى على العيال دى كويس
ايوه دى طعمها حلو
حسبى الله ونعم الوكيل يارب يتعمل فيهم زى ماكانوا عاوزين يعملوا فى بنات الناس
تحياتى وشكرا على التين

دعاء مواجهات يقول...

تين شوكى مين بس فى الليلة دى ياعم

ياخبر أبيااض

وتقولولى اية محببك ف المنوفية

اهو سبب بسيط اوى

انى عمرى ما ممكن يحصلى كدة وانا ماشية ف اى مكان ف نص الليل حتى ..

ربنا يسترها معانا ياعم..

بس احلى حاجةف الموضوع انك جريتلك شوية حلوين..

نورتنى..

ست البيت يقول...

بسم الله ما شاء الله
راااااااجل والله يا بني .. ربنا يحميك ويرفع درجتك في الجنة ويظلك بظله يوم لا ظل إلا ظله

رااااااااجل وكتير ممكن يمشوا ويبصوا بامتعاض ويروحوا يناموا ولماضمايرهم
تنقح حبه ...
يدوها بنادول ويناموا
راجل والله يابني

ربنا يحميك ويجعل بكل حبة عرق دي جهاد في سبيل الله بإذنه
دمتم بحقظ الرحمن

حمامة يقول...

كويس والله
على فكرة اى حد ف مكانك
كان ممكن يجيله حالة بلاهه من المنظر وميتحركش
الحمد لله ربنا ستر
وبعدين خلاص شعار الشرطة ف خدمة الشعب ده اتلغى
دلوقتى الشرطه والشعب ف خدمة الوطن
يعنى يا عينى بقوا زينا زيهم
قصدى زيهم زينا :D

Unknown يقول...

تصدق انى اول مرة اعيط بضمير بجد البوست ده انا اتعرضت ليه بس اللى خلى دموعى تنزل غصب عنى انى افتكرت موقف مشابه حصل معايا على الدائرى بس على افظع شوية وللأسف حاولت انى اخلى السواق بتاعنا يوقف العربية وننزل نتصرف واحنا كدهكده معانا سلاح لكنه مرضيش ومشى وقال احنا مالنا للأسف يا سو مصر بقت حاجة تقرف كل شاب همه ازاى يوقع البنت دى والناس اللى فوق مش هاممهم اللى تحت فكل شئ مستباح وده شئ لازم يتغير .

بص بقى علشان قرفتك معايا وطولت عليك احجزلى شوية تين شوكى معاك اكلهم لما اجى الخميس اللى جاى .

سلاموووووووووووووووووووووووز

Mahmoud البطراوى يقول...

الحمد لله انك كنت هناك
مين عارف يمكن لو مكنتش هناك كان حصل

بث تجريبي يقول...

السلام عليكم
اولا
احييك على شجاعتك حيث ان الجرى نص الجدعنة

وكلامك دا خلى الواحد يخاف يمشى فى اى شارع لوحده
لازم الواحد بعد كدا يتعلم طرق دفاع
يعنى يربى ضوافره مثلا
يحد سنانه
يمشى بشراب منسى فى جذمة اخويا الصغير يومين
اى حاجه من سبل المقاومة يعنى
وبالنسبة للجوز الحرس الشرفى دول
اهو الناس دى بتبقى اغلب من الغلب نفسه
مش بتشوف مناظرهم بتبقى ازاى
اه والنبى صح دول بيعينوهم ازاى فى الشرطة
المفروض جهاز الشرطة ناس بتشيل حديد
مش ناس قاعدة عشان تقولك تروح فين وتيجى من فين.

وبالنسبة للتين الشوكى
جريت ريقى على السيرة.
بالهنا والشفا.

سلاموز بالدين الشوكى.

2ensan wnsan يقول...

ايه يا عم سووو جو الشوارع الخلفيه دا دا ولا كأننا في شيكاغو

عادي كده بنت ماشيه في حالها ينلزوا اتنين من العربيه عشان يخطفوها ..

ايه دا ( وش مذبهل بقرف ما تسألش ازاي )

هي بقت كده ... بالنسبه لأكاديمية الشرطه وماشرطاش تذكر يا اخي حكمتك اللي انت قلتها

الباشا مش بمذاكرته الباشا بعيلته وسلطته

بس السؤال اللي بجد عايز اعرف اجابته العيال دول راحوا القسم مضروبين ولا عادي كده .

Asmaa mahaba يقول...

الله يطمنك يا سووو صقر قريش دا عشر دقايق نكون هناك يعنى المنطقه واحده اتوستراد ايه دا بعدين بمفيش ميت متر
كويس منفعه انى بمشى بكاتر قال وانا لسه بتخانق مع ماما عشان عربيات الملاكى المهكعه اللى بتشتغل اجره من عند المترو واقولها عمرى ما اركبها
شوف اهو كان معايا حق
ربنا يحفظنا يا رب ويسترها معانا وحسبنا الله ونعم الوكيل
بص انا عاوزه اقولك حاجه
الشرطه دى مش مصلحه حكوميه والظباط موظفين زيهم زى الموظفين المصريين
نفس الاهمال ...نفس الغباء ...نفس الروطين....نفس الكسل...
اذا احنا منلومش عليهم بس دا لمفروض نلوم على الدوله كلها اللى الاهمال فيها بقى من اول الزبال لحد الطبال
طبعا عارف الطبال
اه كل عام وانت الى الله اقرب
تحيتى ليك سومه_87

ماء تشرين يقول...

والله الحمد لله انو لسه فى رجاله في بلدنا انا صحبتى اتسرقت منها شنطتها وتثبتت بمطواه وفى خمس ولاد واقفين بتبصلهم محدش اتحرك منهم عادى جدا واهلا بيك في مصر بلد الجدعنه والرجاله والشرف واكاديمية الشرطه وسمعنى سلام حلاقاتك برجلاتك
عايزة اعيط
تحياتى

فاتيما يقول...

واد يا سوووو
زمان و لحد النهاردة كنت بسمع مثل و ليه معنى واحد فى دماغى ...
النهاردة بعد ما قريت البوست دا
شوفت المثل دا بشكل تانى و بحق و حقيق
المثل بيقول
الجرى نص الجدعنة

ربنا يكتبهالك فى ميزان حسانتك و يذهب بهن كل سيئات
تحياتى للراجل الجدع سووووو
القاطن بمنطقة شيكاغو
( صقر قريش سابقاً )

غادة يقول...

حسبنا الله ونعم الوكيل
دا اللى نقدر نقوله
طب لو انت ما كنتش موجود ساعتها كان ايه اللى حصل للبنت دى
خلاص احنا يتقال علينا يارحمن يا رحيم
حاجه تحسر والله العظيم
ربنا يكرمك يا سوو ويجعله فى ميزان حسناتك
تعرف لو كنت بحب التين كنت قولتلك هات حته يلا بقى من حظك
سلام مؤقت

maha zein يقول...

ويل يا ويل ويل يا ويل
يا مصيطنا ومظبطنا
جدع اوي
بجد جدع
ماشي انا زعلانة عشان البنت وكده
وطبعا منهم لله
بس النظرية بقه اني عرفة احساس شاب شاف جريمة امامه
يعني
اكيد الوطنية والشهامة ضربت وكده
الله
جدع
وشاطر
بس كنت مسكتهم اديتهم علقة محترمة
مش عشان مثلا هما خطفوها
بس عشان خلوك تجري ده كله
انتوا كنتوا فى المعادي ولا فين
تسلم يا سوووو

aya يقول...

حاولت الاقى تعليق مناسب ملقتش

غير انى تخيلت نفسى مكان البنت

ساعتها هابقى ديونالك بحياتى

احمد ربنا يارب يارب يارب يجازيك خير على انك انقذت مسلمة

اللهم امين اللهم امين

صدقنى كل البوست اللى انت حكيته ده عادى بقينا بنسمع منه اسواء من كده

لكن اللى انت عاملته هو اللى مش عادى

مش هاقولك انك سوبر مان ولا بمدحك

لكن انت عاملت حاجة تعتبر حاجة عجيبة فى زمنا ده

كان زمان يقولك لما حد مننا يقع فى شكلة تلاقى الف مين يساعده

دلوقتى

ولا يعرفوه


بجد يااحمد
انا فخورة انى اعرفك

ربنا يكرمك يااحمد

(المهاجر الى الله) يقول...

ادعوكم لزيارة مدونتى المتواضغة والمساهمه بتعلقاتك وارائك
www.eyuon.blogspot.com
وشكرا

SKOBL- Little Lazy Me يقول...

يا لهوي هي وصلت لأختطاف .. وواحدة محجبة كمان .. ايه اللي بيحصل يا مصر .. ربنا يستر بناتك يا سو زي ما سترتها ، و أما عن أجابة أول سؤالين فأنا مش لاقي تعليق .. أما عن حكاية التين فلو صحراوي أجيلك حالا
و لك كل التحيات

ميرا ( وومن ) يقول...

يا نهار ابيض

بجد يا سووو ده حصل

بجد مش قادرة اصدق انا ابتديت اصدق ان البلد دي مفيهاش امان

الحمد لله ربنا بعتك ليها نجدة

اقولك ايه ربنا يكتر من امثالك

قوس قزح يقول...

ربنا يبارك لك يا احمد
و يمكن قوة الجرى اللى جاتلك دى كانت من عند ربنا

و سبحان الله انهم يخافوا كده من انك تلحقهم

و الله كفاية ان يترفع لك العمل ده فى شهر شعبان

جزاك الله كل خير

Unknown يقول...

السؤال اللي بيطرح نفسه بقى .. هل العربيه دي بتاعة حد فعليا في كلية شرطه ولا صاحب العربية لازق الاستيكر وخلاص ؟؟

الأكيد انها بتاعة حيوان متنكر .. دى ملهاش علاقة بالمهنة

والسؤال التاني .. هي النقطه دي محطوطه وجاهة اجتماعيه ولا الظباط مركزين في تطبيق قانون المرور وسايبين البلد تضرب تقلب ؟؟

مين قال كده ؟ امال مين اللى حاطط عربية التين وكابينة الميناتل فى الحتة دى بالذات وبعدين انت متعرفش ان عسكرى الشطرنج بيتحول ويبقى سبايدرمان ولا ايه؟


حد يحب ياكل معايا تين شوكي ؟؟؟

بالهنا والشفا

تحياتى واحترامى لشهامتك لكن حاول دايما تفتكر التليفون فى المواقف اللى زى كده .. يعنى كان المفروض تتصل على عسكرى الشطرنج يقابلك من الناحية التانية

غير معرف يقول...

يا لهوىىىىىىىىىى
دى ربنا بيحبها والله ربنا بيحبها

ايه النيله السوده دى فى عز الضهر والبنت لابسه محترم ويعملو كده امال لو متنيله مسخره كانو عملو ايه

بس بجد بجد ربنا يكرمك يا سوووو
وقفت وقفه رجاله جدعه صحيح

ربنا يسترنا حميعا يارب فوق الارض وتحت الارض ويوم العرض عليه انشاءالله

شيلى شويه تين بقى وانا جايه اهو

غير معرف يقول...

جدع يا سوووو .. المهم انك طلعت ايجابى و جريت ورا العربية مش الناحية التانية ..

son's egypt يقول...

السلام عليكم
في زمانا ده محدش يستغرب من اي حاجة ممكن تحصل
نقطة عليها عسكري ممكن ميعرفش اي حاجةغير اللي يتقاله عليها بس

shahy يقول...

ولدي الغالي
طمنا عليك عملت اية؟

اما عن موقفك دة
مش هاقول اي حاجة
كل اللي عاوزة اقولة هاقولة بيني وبين ربنا

ربنا يحفظك يارب

أبو خالد يقول...

أبني الحبيب أحمد
بارك الله في عمرك و جعل عملك هذا في ميزان حسناتك
تستحق مني هدية حين نلتقي
دمت أبن شهم و رجوله
و حسبنا الله و نعم الوكيل في الحثالة
يجب أن يطبق عليهم حد الحرابة
إلي أن نلتقي أستودعك الله الذي لا تضيع
ودائعه

3ala asm masr يقول...

بما أنك رايح قسم الشرطه أنا عوزاك تقول كل حاجه عشان أنا نفسى يروحوا فى داهيه وأفرح فيهم ويبقوا عبره لغيرهم
ياريت توافينا بالتفاصيل

AHMED SAMIR يقول...

االسؤال هنا
هم الاخوة الضباط او الافاضل طلبة اكاديمية اشرطة بيحبوا قوي يعلقوا البادجات بتاعتهم دي على اللوح وعلى الزجاج وناقص كمان يحطوها ع الفتيس ليــــــــــــــه؟
من باب الرعب والارعاب بقى وكدة؟
تصدق اني بخاف من كدة
تحياتي

همس الاحباب يقول...

لا حول ولا قوة الا بالله
حسبى الله ونعم الوكيل
بارك الله فيك يا سوووووو
وجعله فى ميزان حسناتك
على قد ما هو الواحد محروق دمه على البنت وفرحان بموقفك البطولى
بس بصراحة متعرفش تبقى وقور للنهاية
لازمن تفطسنى من الضوحك
وجبت 3 جنيه تين شوكى
حد يجى ياكل معايا
هههههههه
يا جرع حرام عليك احنا فى ايه ولا ايه
يلا سلاموززززز

همس الاحباب يقول...

لا حول ولا قوة الا بالله
حسبى الله ونعم الوكيل
بارك الله فيك يا سوووووو
وجعله فى ميزان حسناتك
على قد ما هو الواحد محروق دمه على البنت وفرحان بموقفك البطولى
بس بصراحة متعرفش تبقى وقور للنهاية
لازمن تفطسنى من الضوحك
وجبت 3 جنيه تين شوكى
حد يجى ياكل معايا
هههههههه
يا جرع حرام عليك احنا فى ايه ولا ايه
يلا سلاموززززز

د. إيمان مكاوي يقول...

البادجات دي أي حد بيحطها ولا أعتقد إن عليها رقيب...
ربنا يحفظنا من كل سوء

Rehab Mostafa يقول...

الحمد لله الحمد لله الحمد لله
ربنا ستر بجد
بس على فكره الناس بطلت تجري وراء اللي بيقول حرامي ولا وراء الحرامي
وكمان احتمال ضعيف ان حد يعمل اللي عملته ده... الناس بقت تخااف .. طبعاً مش كل الناس
ربنا يكرمك يا سوووو

وجهة نظري يقول...

جدع، ربنا يباركلك. وياريت كل المصريين كده، خلاص الواحد فقد كل أمل في الرجوله والمجدعه.

تحياتي الشديده.

مجداوية يقول...

السلام عليكم

ربنا بيسبب الأسباب يمكن جريك وراهم زى ما بتقول مش هو السبب فى ضبطهم لكن له أهمية كبيرة فى :

أولا أثبت انك شهم ومعندكش مبالاة اللى بقت مرض العصر فمبروك عديت من اختبار كشف الشهامة

ثانيا: لولا جريك وراهم مكناش عرفنا الموضوع ولا نهايته ولا كنت كتبت التدوينة دى
ثالثا : مين أدراك ان جريك وراهم وانه ممكن يكون لمحك فى المراية خلاه يرتبك وميركزش ويخبط فى عربية التين الشوكى اللى ثبت برضه ان الباعة الجائلين لهم فايدة واحتلالهم الشارع ساعات بينفع والحمد لله الازالة مجتش شالته والعساكر أكلوا التين بشوكه
رابعا : انك استفدت واشتريت التين الشوكى وأفدت البياع فهى صفقة تجارية رابحة من كل الجوانب

بغض النظر عن مدلول الحكاية واللى بيؤكد نظرية اللون الخروبى عندى الا ان ناس زيك بشاهمتهم وبدون تفكير ولا حسابات بتخلى دايما فيه نقطة بيضا وسط اللون الخروبى ده كله


لفت نظرى تعليق الأخ هيثم وبكاؤه وأقوله طالما الانسان حى يقدر يصلح أخطاؤه فلم تفت الفرصة أبدا على مساعدة الغير وان كنت تحس بالذنب على عدم تقديم المساعدة أو الاصرار عليها وأنت محق فى هذا فما بال السائق الذى رفض التوقف !!!!!!!!!!!!

سبحان الله

المهم جبتلك هذه المعلومات عن التين الشوكى حتى تأكل وأنت مستمتع بكل الذى حدث فالخير على الجميع والحمد لله رب العالمين


التين الشوكي من الفواكه الصيفية التي يحبها الكثيرين وهو يمد الجسم بربع ما يحتاجه من عنصر البوتاسيوم والماغنسيوم الذي يقي الجسم من مشاعر التوتر وينظم درجة الحرارة. ويساعد علي بناء وتقوية العظام وهو امر هام بالنسبة للمرأة والاطفال.
ويقول د. سمير امام مدير الطب الوقائي بالمنوفية ان التين الشوكي له فوائد صحية متعددة يمكن الاستفادة منها عند تناوله خلال هذه الايام التي يكثر فيها انتاجه في الاسواق.. فهو مفيد للاشخاص المصابين بقرحة المعدة ويحمي الاغشية المخاطية للجهاز الهضمي من تأثير الاعراض الجانبية لبعض العقاقير.. وهو يقلل من احساس الفرد بالظمأ في الجو الحار.. وان احتوائه علي نسبة عالية من عنصر البوتاسيوم يساعد علي انقباض العضلات واحداث حالة من التوازن والهدوء العصبي.. بالاضافة الي امداد الجسم بعنصر الحديد وفيتامين سي وب1، ب2
ويضيف.. ان التين الشوكي يعتبر من اغذية الرشاقة حيث يحتوي علي نسبة ضئيلة من السعرات الحرارية فالثمرة الواحدة تعطي 30 سعرا حراريا وبه نسبة منخفضة من ملح الصوديوم.. وبالتالي فهو يفيد في انقاص الوزن ويساعد علي خفض سكر الدم والكوليسترول..


ياللا بالهنا والشفا

Unknown يقول...

انت واد
اسفة رجل جدع
بجد ربنا يحميك
وحسبى الله ونعم الوكيل فى الناس القذرة دى
اما عن شعار الكلية فأعتقد ان مش كل اللى حاطينة فعلا فى الشرطة ممكن يكون صاحب العربية القديم وباعها
ممكن يوكن من باب الوجاهة او الهرب من قانون المرور الجديد
او حتى التخفى والتستر ويعمل اللى فى كيفة
اما عن نقطة الشرطة
يعنى ياسووووووووو
بصراحة انت بتحب تدقق هى جت على دى
!!!
تحياتى واحترامى
وتقديرى لك بجد انت جدع

Unknown يقول...

جدع يا سووو
احدفلي بقى وحداية تين رغم اني مبحبش التين الشوكي عشان بيجيبلي اسهال
بس هاكله جدعنه معاك
اشمعنى انت جدع يعني
ولا هتاخد الجدعنه كلها لوحدك

ka2en Makboot يقول...

السلام عليكم

والله يا سوووو يااخوية انا كنت معتزلة التعليقات من فترة ومابمدش ايدي علي كيبورد خالص بس متابعه الكل متابعه صامته (حالة تأمل فكري) بس الحادثة ديه وموقفك شدوني من ايدي اني اعلق

بجد ربنا يكرمك ويجزيك كل خير

وعايزين البوست الجاي بقى عزيزتي المأروصة كيف تدافعين عن نفسك في شوارع المحروسة
نشيل كاتر ولا حامض الكبريتيك المركز ولا كبريتيد الهيدروجين ولا نروح ناخد دورة كونغ فو

هي الدنيا بقت وحشة كدا ليه ؟!
لا حكومة ولا شعب !! نروح فين بس ؟!

صباح الصباح يقول...

طب وانتا عمرك سمعت عن نقطة شرطة فى منور عمارة.. انا عارفها .. دى عاملة كانها مهجورة.. واعتقد ان الناس اللى فوق بينزلزا لهم الاكل بتاعهم فى السبت من فوق.. يا راجل دة مواسير الصرف الصحى بتاعة العمارة فى مدخل القسم..
بجد حاجة زى الزفت.. اما الستيكر الملزوق .. هاتلى انت بس عشرة جنية وانا اجيب لك كبشة منهم من شارع بيروت.. محلات متخصصة فى الحاجات دى..
صباح البطييييخ..
تدوينة تحفة.. ودمت بالف خير.

Ehab يقول...

يا نهار ابيض يا سووو
ما انا قلت بلاش تنزل لوحدك يا اخويا انت صحتك بقت على قدك خلاص

عموما ربنا ستر والحمد لله لكن مش عارف لو مكانتش عربية التين ظهرت كان حصل ايه بس للي كانت هتضيع دي
خلاص الدنيا بقت تغيظ
يعني لما يبقى الحرام متاح في كل مكان ليه بقى الأغتصاب تفتكر ايه الداعي لما هو يقدر يروح يجيب اللي هو عاوزه وبتراب الفلوس

الناس دي تقريبا بتستمع بالظلم اكتر من الجنس

ربنا يسترها على بنات المسلمين

اخبارك ايه يا نجم عندي ليك خبر جامد مش هتصدقه
سلااااااااااااااااااااااااام
اخوك ايهاب

مطلق يقول...

الجدعنه شئ كويس بس بلاش يا ابني في الزمان ده محدش ضامن الظروف
ممكن ترشق في حد مهم
و تتاخد و تتحط علي الخراره

عيله مفتريه سابقا يقول...

مش عارفه يا سو مش متخيلاك بتجرى وبتقول حرامى حرامى

بس تخيل لو كانوا تفادو عربية التين وجريوا ..كان هيكون احساسك ايه؟

بجد البنت ربنا كاتبلها النجاة ..المشكلة انى عجبنى التلميح بتاع لابسه تايير واسع وجيب واسع

عشان بس الناس تفهم وتبطل اتهامات

جعله الله فى ميزان حساناتك وجعلك فى الخير دائما يا سو

ويحفظ كل بنات المسلمين من شياطين الانس
سلامى

maiosha يقول...

سلام عليكم

لا حول ولا قوة إلا بالله
الحادثة دى أنا بسمعها بمعدل كل يومين مرة
بجد دى كارثة
على فكرة مش لازم بيقى الشارع فاضى ولا سكون ولا أى حاجة
دول ساعات بينزلوا من العربية ويفضلوا يضربوا البنت ويقولولها عايزه تهربى من البيت فضحتينا
لغاية ما الناس اللى فى الشارع هم اللى يساعدوهم ويدولهم البنت

بس مية مية والله يا سووو
لو مكنتش موجود كانوا الناس فى الشارع رجعولهم البنت تانى

الحمد لله ربنا ستر

أما التين الشوكى بقى -إهئ إهئ- قهرنى والله
هاتلى إتنين معاك بقى ربنا يخليك لحسن نفسى فيه

Unknown يقول...

ياخبر يا احمد
دا الموضوع كدة
ممكن يقلب بكوسة تانى
وانا زهقت من الكوسة اللى بتدخل فى كل حاجة حتى مع التين الشوكى

ربنا يستر
سلامة ايدك
بس ياريت لو ما فيها رزالة
ابعت لى التين مع بابا ابو خالد وهو جاى النهاردة

موناليزا يقول...

سبحان الله
يعنى انت كنت سبب رئيسى فى انقاذها بدليل لبختهم والحادثة اللى عملوها
بجد الحمدلله ان ربنا انتقم منهم فى الحال
وجميل انك عرضت الموقف ده عشان يبقوا عبرة لمن لايعتبر
اصل فيه ناس كتير نست ان ربنا موجود وقادر ينسفهم فى ثانية
ربنا يكرمك ويعزك

غير معرف يقول...

تقدر تقولي كان هيبقى موقفك ايه لو اللي اتدلق من العربية فراولة مش تين؟؟ وهتغسل ايدك فين؟. ولا هتسمح في هدومك؟
تقدر تقولي كان هيبقى موقفك ايه لو ما عكش فكة واديت الراجل خمسة جنية وهو كمان ماعوش فكة؟؟
كان هيبقى موقفك ايه لو كنت لابس شبشب مش جزمة في اليوم ده وكل ما تيجي تجري ورا العربية الشبشب يتقلع منك وما تبقاش عارف تركز مع ايه ولا ايه؟
تقدر تقولي كان هيبقى موقفك ايه لو كنت مشيت في الشارع ابو شمس مش ابو ضل؟ كان مين هينقذ الموقف ويشوفه ويحكيهولنا؟
تقدر تقولي كان هيبقى موقفك ايه لو كان عندك برد وصوتك مبحوح ومش قادر تنده وتزعق وتقول حرامي حرامي؟

مها ميهوووو

Ehab يقول...

ربنا يحفظك يا ابو حميد وكويس ان الموقف حصل وحد عنده دم معدي من المكان وربنا يسترها على بنات المسلمين

علشان بس كانوا عاملين لنا مسلسل ان ابن الوزير اخد اعدام ادي دقني لو حتى شخطوا فيهم
حسبنا الله ونعم الوكيل

اتمنى فعلا لو احتاجوا مساعدة المدونين نقدر نعمل ليهم حاجه بجد وانا انشاء الله اول واحد معاك

ربنا يحفظك
سلااااااااااااااااااااااااام
اخوك ايهاب

Unknown يقول...

السلام عليكم
فى رأيى انا مش المفروض نركز على موضوع أكاديمية الشرطة .. لأن الأهم
الثقافة التى مهدت للحادثة واستشراء التدنى الأخلاقى فى كل المستويات (ضابط ومودرن أكاديمى وثانوية وواضح انهم من مستويات مختلفة)
والغباء الأمنى حيث تحول دور الأمن لحماية (النخبة) وليس الشعب واقتصر بالنسبة للشعب على التواجد أمام عدسات التليفزيون فقط
والأهم من كل ذلك الفساد و تحالف المال والسلطة (الولد المصاب فى مستشفى خاص ومحامى المتهمين يتفاوض مع أم الولد )(ابو البنت طلع مستشار في وزارة الزراعه وليه علاقات ومش هيسيب حق بنته*طيب لو ملوش علاقات ؟*)

أرجو متابعة القضية لفضح أى تلاعب يمكن أن يحدث على غرار ما يحدث فى قضية العبارة

وأتمنى اننا منسمعش عن استخدام الرأفة مع الأولاد حفاظاً على مستقبلهم
كسر رقبتهم على رقبة اللى مش فاضيين يربوهم..آسف
آسف للإطالة ولتكرار المشاركة
تحياتى

Unknown يقول...

ياخبر ياسوووو
ايه اللى بيحصل ده..ده انت عايش فى قضية راى عام ولا ايه ؟
انت حد جدع اوى ياسووووو والله الجرى بياخد معاك مجهود ورغم كده جريت والتين الشوكى بوظ لك الايدى الناعمة ورغم كده شيلته
انت ماعتش فى منك
هههههههههههههه

بجد والله انت انسان جميل وجدع والخ والخ الخ
مش هاقعد اوصف بيك بقا
كفاية عليك كده :)
وانا عارفة ان كله باصص فى التين الشوكى فانا مش عايزة دين شوكى
انا بحب اخد حقى ناشف D:

ربنا يحميك ياسووو

مصر يا موكوسه .....يا مزارع الكوسه يقول...

ارجو من كل المدونين زياره مدونتى للاهميه

رصيف نمره خمســــــه يقول...
أزال المؤلف هذا التعليق.
رصيف نمره خمســــــه يقول...

ايه الموضوع اللى يخوف ده

بجد ياسوووو انا هسمع كلامك واحط مطوة فى شنطتى كنا بشتغل بالدبابيس
دلوقتى مطوة يافرحتك ياللى منتيش غرمانه

ولااقولك انا مش هطلع من بيتنا تانى

حسبى الله ونعم الوكيل فى الاهل اللى مربوش عيالهم على الصح والغلط والحرام والحلال

يالااااااااهوى المجتمع انحل واللى كان كان

والله انا خايفة جدا جدا دلوقتى

ربنا يحفظنا بلا شرطة بلا هبولى

ربنا يجازيك ياسووو على انك جريت (مش عارفه ازاى ) المهم انك عملت حاجة


صحيح انا عايزة تين شوكى عشان يشيل الخدة اللى انت خدتنى بيها دى

سلاااام ياسووو النوووو كونووووو

PrInCeSS BeRy يقول...

سو الجميل تحياتى لك


اما عن البوست فا مش لاقية غير منهم لله وحسبنا الله وهو نعم الوكيل واشكرك انك عرفتنا وجة اخر للناس

كراكيب يقول...

حد باصصلك في تين شوكي؟؟
ده تين شوكي من على عربية يا سووو مش مانجة جايبها من مزرعة في الاسماعيلية

ماعلينا يعني
انا بس كنت عايزة اقول انهم علطول بيرموا اللوم على البنت كانت لابسة مش عارفة ايه وبتمشي مش عارفة ازاي
اهي كانت محترمة ومحتشمة وبنت ناس اهي وبرده يعني ما اتسابتش في حالها
حاجة تقررررررف بصراحة

وبعدين انا اصلا كنت داخله اقولك حاجة
اصل انا النهارده لقيت بورص على السلم اول ما شوفته... افتكرتك :) وقعدت اااااضحك,, راح بابا قايلي ايه يا مرام ده بورص يا ماما مش فراشة
قولتله طب اضربه يا بابا بسرعه علشان "سووو" قال لو سيبناه هيكبر ويبقى ديناصور
راح قايل:سوووو؟؟ وبعدين بصلي بصة كدة اللي هي "بيتحسر فيها على بنته يا عيني اللي في عز شبابها وعقلها خف خلاص" وسابني وطلع وقالي اطلعي يا هبولي اطلعي,,
شوفت؟؟؟ اديك جيبتلي الكلام

miro el niro kwaniro

غير معرف يقول...

يا خراااااااااااابى
يعنى طلع البادج صح بحق وحقيق
حسبنا الله ونعم الوكيل فى ده ناس مش متربيه لا عندها دين ولا اخلاق

ربنا يستر يا سووو
والله ضايقتنى

بس الحمدلله الى اتقفشوا وانشاءالله ياخدوا جزائهم
........

اه اه انا انا يا سووو الى عينى كانت فى التين
الامؤاخذه
:)))))))))

سلاتييييييييييييين
:))

مصر يا موكوسه .....يا مزارع الكوسه يقول...

بسم الله الرحمن الرحيم
يقوم مجموعه من المدونين وانا من ضمنهم بتكوين رابطه لانقاذ ومساعدة اطفال الشوارع
التفاصيل كلها هنا
http://awraqwasrar.blogspot.com/
يسعدنا انضمامكم

فاتيما يقول...

سووووو
انا قولت أعدى أطمن عليك بعد حكاية مرواح القسم دى أصلى عارفة المعاملة و المنظر هناك شكله إزاى
و خلى بالك من روحك انا مش بخوفك يعنى بس لو العيال دى اكداديمية الشرطة زى ما هوه باين كدا يبقى توقع اقذر ألأساليب و احطها هيحصل عشان يخرجوا منها زى الشعرة من العجين
لو هيلبسوها للولد التالت تبقى خلصت على كدا ....
أنا مصعبشى عليه غير أمه بس
أهو بهدل نفسه و عيلته كلها و لو ليه اخوات بنات يبقى الفضيحة بقت عامة و على الكل
بس يعنى بنت المستشار دى مش بنت برضو و سمعتها و حياتها كلها ملهاش تمن
ربنا ينصرهم فى قضيتهم و يوقفلهم ولاد الحلال اللى زيك يا سووووو
عارف رغم جمال الحدوتة لحد دلوقتى ...
بس المؤلم فيها جدا إن العدل ماشى بالبركة و ولاد الحلال بس ...
لا قواعد و لا تروح بيتك تحط راسك على مخدتك و إنت متأكد إن حقك هيجيلك لحد عندك
و لا حتى إنت هتروح تجيبه
انا مش عارفة القصة هتخلص إزاى ..
بس بتمنى خير للبنت و عقاب رادع للولاد كلهم
كلهم
مش الحلقة الأضعف فيهم
و سيبك إنت
الراجل و عربية التين بتاعته عمل شغل جامد قوى
و ربنا يخلى أمثالك يا سوووو
تحياتى يا اخى العزيز

Nani يقول...

السلام عليكم
حسبي الله ونعم الوكيل فيهم الزبالة
الحمدلله انه الموضوع انتهى على هيك مش اكثر
اولا انا بنصح اي بنت تستعمل شنطتها للدفاع عن نفسها
ومن غير شر لو صار هاد الشي لا تقول حرامي لازم تقول حريقة ... حريقة الناس بلتمو هيك اسرع
هاد الموضوع برفع ضغطي وبجيبلي بلهارسيا وكساح
يعني معقول يا ربنا في رجال من غير نخوة؟؟؟
مرة في كان مجموعة بسيارة بس يشوفو صبية بسرقو الشنطة من ايدها وهي ماشية
طبعا الصبية بتوقع وبتكسرلها ايد او رجل وبتتبهدل
ضلت الشرطة تترصدلهم وخصوصا الشرطة النسائية لعبين ما مسكتهم المهم لما انمسكو بتعرف اشو عملو فيهم؟؟؟
ما في عسكري او شرطي الا ونمرة كندرته طبعت على وجههم
بلا حقوق انسان بلا ... ء
احينا الحل السلمي غير مجدي ولا بد من الضرب بيد من حديد او من بسطار عسكري نمرة 55!ء

غير معرف يقول...

good blog & good post

mercii moot

حنين القلب يقول...

والله يا سوووو ربنا يكرمك ويجعل اللى عملته ده فى ميزان حسناتك
احنا اصلا مش بقينا فى دنيا دى غابه
لو مش كانت موجوده عربيه التين وانت مش لحقت العربيه كانت البنت دى هيحصل ليها ايه؟؟
هيكون مصيرها زى مصير مئات البنات اللى اغتصبوا وطبعا الجانى اما يتجوزها واما السجن كام سنه
انا شوفت منظر شبه ده
وفيه جارة لينا حصل ليها تقريبا نفس اللى حصل للاخت دى
بس مش فيه حد جدع زيك طلع يجرى وراه العربيه
وعادى خالص حياتها ادمرت وطبعا ولا حد حاسس بيها
وحسبيا الله ونعم الوكيل

وانت لسه فيك نفس تشترى تين شوكى
ده انت اعصابك جامده يا اخى
هاااااااااااااات حته

غير معرف يقول...

بطلو بقى كل شوية كلام عن الظباط وشتيمه فيهم
ماهم دول اللي مخلينكم تعرفو تنامو كل يوم وانتو مرتاحين
ولو حد فيهم وحش ماهو ده في كل الدنيا

وبعدين كل مواضيعك بتشتم في النظام مع ان النظام عمل حاجات كتير
روح العراق وانت تشوف بعد ما امريكا دخلت عملت ايه
العراق اللي ايام صدام ماكانش فيها موبيلات ولا دش وانت عايش عالدش والموبيلات
ده صدام واللي زيه هم اللي يعرفو يحكموكم ويشكموكم كويس
ولا انتو عايزين جنازة وتشبعو فيها لطم
وبعدين على فكره انت دمك تقيل
وعامل فيها راجل وكل الناس داخله بتطبلك وتهيصلك
نصيحه روح هاجر ولا سيب البلد مادامت مش عاجباك
مصر هتنضف منك ومن اللي زيك

فاتيما يقول...

الأخ الغير وعرف دا
من كان يؤمن بالله و اليوم الآخر فليقل خيراً او ليصمت
يعنى عندك كلمة حلوة قولها
معندكش تسكت احسن
و تريحنا
يعنى كلامك كله مليان حقد بدون سبب واضح
و عمال تقول رأيك فى الراجل بدون ما حد يسألك عن رأيك
و بتستقل دمه كمان
طب لما مش عاجبك سوووو و كتاباته داخل ليه
و مكلف نفسك دقايق قراية
و كمان دقايق تانية بتكتبله تعليق فيه السخافات دى
بتنصحه يسيب البلد و يمشى احسن
يسيبها لمين ؟؟
ليك إنت !!!
لواحد زيك بيجرح فى الناس
و يهينهم
و يحقد على كم الحب و الإحترام الموجه ليهم
واضح إن محدش يعرفك أصلاً
و لا تملك الشجاعة لتعريف نفسك
و اللى يعرفك واضح إنه مبيحبكش
لكن سوووو
كلنا عارفينه كويس
و عارفين إنه راجل
و جدع
و يستاهل كل الإحترام
بدل ما تقعد ترخم على خلق الله
أشتغل على نفسك و شوفلك حاجة تانية تعملها احسن بدل رمى الناس بالباطل
سوووو
معلش متزعلشى من تعليقى لو فيه حجاجة بايخة
بس بصراحة الواحد مبقاش طايق المناظر دى
تحياتى

مصر يا موكوسه .....يا مزارع الكوسه يقول...

السلام عليكم ورحمة الله وبركاته
حملة كى يكونو حقا احياء
لمساعدة اطفال الشوارع ستبدا هذا الاسبوع
باقى التفاصيل هنا
http://awraqwasrar.blogspot.com/
للاشتراك يرسل الى
quloobrhema@yahoo.com
لنقم بالاتفاق على تحديد مكان وزمان
اللقاء
يسعدنا اشتراك الجميع

الـجـدة فـصـيـحـة يقول...

السلام عليكم ورحمة الله وبركاته

تعرف إني مش عارفة أقول إيه
لما بنسمع ولا نقرأ عن حاجات شبه كدة بيحس انه بيسمع عن حاجات بعيدة كدة وغريبة لكن لما يكون حد تعرفه ويحكيلك عن حاجة زي كدة وهو متأكد منها لأنه شافها بجد مش عارفة أقول ايه
لكن ممكن أقول الحمد لله لان زي ما في ناس زي اللي ممكن يخطفوا بنت ماشية في حالها وكمان محجبة يعني ملهمش حجة ولا عذر خاصة أن الحالة المادية واضح طالما في عربية يبقى في قدرة مادية يعني مفيش اي عذر نهائي المهم زي ما في دول في كمان اللى شاف الغلط ومقلش وانا مالي هي كانت من أهلي يعني
وقد يكون ربنا جعلك سبب انك تلخبط الولاد دول لحماية البنت من أيدهم

ربنا يصلح حالنا
ويهدي شبابنا

--------------------
اللهم بلغنا رمضان
--------------------

دمتم في رعاية الله

Empress appy يقول...

الي مشوطب الاسم او الانونيمس الاهطل
==================================

الا والنبى يا خويا قولنا الواد ده بيذاكر من ورانا وبشتم فى ام نظام مين تقصد الدش ولا الموبيل اصله مش بيشتم فى حد وانا عارفه
وبعدين لما تنظف تنظف من اللى زيك يا كميله انتى
علشان اللى زيك جاهل ومش شايف ولا بيفهم وبعدين كان احسن يسبها يعنى البنت هى دى الرجوله ولا تكونيش واحده وظابط مظبط دماغك الساعه دي ادعيلك بقى يسبك ويتف على وشك علشان تعرفى المستوي اللى هو وانتى فيه
ولو انت واحد يبقى يا خويا اكيد عندك امين شرطه مظبطك برضه وساعتها يبقى برضه بكره يديلك بالشوز

ولما دمه تقيل بتدخل هنا ليه وتتحفنا بردك يا عم الامور بقى
بص روح اتعالج والنبي وتعالى رد او اعرف اقري شويه

واذا كان عجبك صدام يبقى حصله ولا اقولك اسال الناس اللى خكمهم
ربنا يوعدك بظابط لسه فرحانه بام الدبوره اللى على كتفه علشان يعرفك ان الله حق

ثانيا يا جاهل هو مقلش طل الظباط وانت متعرفش ده ابن مين ولا هو ايه علشان تفوله البلد تنظف منك لان اللى زيه هو اللى المفروض يبقى فيها واللى زيك ينتحر
يالا ياى يا اموره ولا يا امور

عيله مفتريه سابقا يقول...

يا آبى انتى وفاتيما تاعبين نفسكم ليه مع واحد مش عارف يكتب كلمتين على بعض

معلش يا سو يابن عمى انا داخله اقول الكلمتين دول للاخ اللى مبيعرفش يكتب
ولا اقولك ونقوله ليه ده ونوجهله كلام ليه

ده الافضل له اننا نسكت اساسا

المهم يا عمنا انت اخبارك ايه وعامل ايه

طمنى عليك انت بس

الـسـيـدة نـون يقول...

يا نهار اسود ومطين ومقندل

فى عز الضهر
والبت لابسة واسع وطويل
وفى شارعها يعنى مش فى حتة بعيدة عن بيتها
و صاحب العربية فى اكاديمية الشرطة
وكانت هتتخطف؟؟؟؟؟؟؟؟؟؟؟؟؟؟
يعنى حاميها حراميها

احييييييييييييييييه
بجد احيييييييييييييه عليكى يا بلد وسخة


سووووو
يمكن اى حد تانى يشوف انك معملتش حاجة
بس انا شايفة انك عملت كتييير
كفاية انك جريت وقلت حرامى
كفاية انك كتبت البوست ونبهت ناس كتير
كفاية انك رحت تشهد مع البنت
ربنا هيكرمك ان شاء الله

Lyssandra يقول...

بوست دمه خفيف كالعاده علي الرغم من انك بتحكي عن موقف كن ممكن يتحول لمأساه لولا ستر ربنا ومحاولتك للتدخل

بجد اللي انت عملته شئ يحسب في ميزان حسناتك
وكويس جدا انك اتصرفت بسرعه قبل حتي أي تفكير

مش عاوزة اقول ان اللي حصل للولد اللي كان قاعد قدام يستاهله
اللهم لا شماته

لكن ربنا عاقب البعض منهم دلوقتي
ولسه عقاب الباقي منهم

====================

كله كوم بقي وانا باقرأ وعاوزة اجيب نهاية الحكايه دي
وذكراياتك عن حصة الألعاب دي كوم تاني فعلا


علي العموم برضه مازلت تستحق الشكر لما فعلت علي الرغم ان محدش سمعك وانت بتقول حرامي

بس الحمد لله جت سليمة

تحياتي

lyssandra

رؤية يقول...

بصراحة الواحد مش متصور ان احنا وصلنا للدرجة دى،
بجد بجد ماليش تعليق غير انها حاجة تقرف،

وسبحان الله ان كان ربنا سترالمرة دى فالمرات التانية ايه اللى كان هايحصل،

بصراحة كتر خيرك ولو انه ما ناباكش فى الاخرغير التين الشوكى،

تحياتى لك.

حنين القلب يقول...

غير معروف
اموت واعرف انتوا بتدخلوا عند الناس ليه
لما الكلام مش عجبكم
ودم صاحب الكلام تقيل
طيب خليك انت يا خفيف مع اصحابك الانتيم يا كميله واقعدى على جنب يا حلوة
انما مش تدخل تغلط فى ناس دفرهم برقابتك
طبعا لو انت مكانه ولا كنت جريت ولا غيره كنت قعدت على جنب تترقع بالبانه وتقول اخيه عليكم وحشييييييييين
سوووووووووو
ربنا يحفظك وتنور بلدك اللى لو ربع شبابها زيك اكيد حالها هيتغير
اسفه يا سوووو على طريقه ردى بس هو مستفز اصلا

Ahmed Al-Sabbagh يقول...

ابن منطقتى العزيز سوووز

اسمح لى فى بؤين واجعنى اوى

بس البؤين دول مش ليك

البؤين دول لواحد انينيموس داخل المدونة برجلية الشمال
------

ياسيد : مستخبى

والنبى عشان خاطر النبى قبل ما تعلق ابقى خد لك لفة فى المدونة

عشان انت واضح انك كنت قاصد تعلق فى مدونة تانية

وبعدين حتى يا اخى لو بينتقد النظام وايه المانع يعنى .. هما حتى فى الدول الديمقراطية المحترمة ما بينتقدو الانظمة اشد انتقاد

وبعدين انت مين اصلا صفتك ايه فى البلد يعنى عشان تقولة سيب البلد ..

لو انت موظف كبير ودفيان يعنى فى غيرك مش دفيان ونفسة البلد كلها تدفى

عييييب

ابقى اقرا بعنيك وافهم دماغك قبل ما تكتب برجلك قصدى بإيدك

قششششطات

مطلق يقول...

يا احمد متفتكرش انه قاصدك مخصوص ولا انه مخبر ولا حته ظابط لانهم مسمعوش عن الاختراع الرهيب الي اسمه كمبيوتر اصلا عشان ربنا ينفخ في صورتهم و يسمعوا عن المدونيين ده عيل فاضي و عايز يعاكسك بس و مش بعيد يكون بيدخل عندك كل يوم و يضحك علي الناس الي بترد عليه و اذا كان يقدر كان عمل حاجه من غير ميقول ولا اقول لك
انا بقوله هو و كل الي بعتينه
a7a a7a و صدقني عمره محيفهمها
متخدش في باللك

Ahmed Fahmy يقول...

ده ايه الغابة اللي احنا عايشين فيها دي
مجرد نص ساعة بس تهييس تقضي علي حياة واحدة كاملة و تخليها تعيسة طول عمرها
ربنا يرحمنا يا رب
و الحمد لله انها بقت بخير و فعلا لازم يبقي كل واحدة معاها حاجة تحميها
هات تيناية بقي
هههههههههههههه

•√أريـ السمر ـج√• يقول...

ربنا يكرمك يارب بجد .. سبحان الله على ترتيب الامور بجد ربكتهم من انك وراهم و بتصرخ ب حرامي مع عربية التين كانت من لطف ربنا بالبنت ..


عجبني جدا ان وضحت لبس البنت لان للاسف كتير اوى بيتصوروا ان معنى بنت تتخطف او تتعرض لموقف زي ده ان لبسها بيه مشكلة و لا اسلوبها او طريقتها


اما التعليق السخيف المتاثر اوى بالكلام عن ان الولد شرطة او لاء . بيدل عن سطحيته و مش محتاج يترد عليه لانه فارغ مثل حديثه


دمت بكل الخير

دعاء مواجهات يقول...

كويس ان الموضوع خد وجهة قانونية

وربنا ياارب يجيب حقهاا

مش بترد ع التعليقاات لية

طمننا عليك

نورنا ياعم

مش هنشحتك يعنى

بيس

أسيرة الأقدار يقول...

حتى المحجبات والبنات المحترمة مش عاتقينهم .. مش عارفة يعنى البنات يعملوا ايه علشان يحموا نفسهم نبطل ننزل الشارع بئا
بجد الناس بقت غريبة وبئا فى كمية بجاحة مورتدش قبل كده
بس والله برافو عليك يا سووو انت صحيح فضلت تجرى واتقطع نفسك من غير ماتاخد رقم العربية بس اهو فى الاخر جه بفايدة وشهدت مع البنت
..
بالنسبة بئا للغير معروف اللذيذ اللى رد ده .. مش عارفة انا هو محموق كده ليه وبعدين يا عم مش عاجبك الموضوع اخرج منه وانت ساكت او الاريح متدخلش خالص يعنى
..