الاثنين، 17 شعبان، 1429 هـ

العيّل البَاوّوّ !!؟

قاعد باستجم في الساحل الشمالي وعلى شط البحر وانا باشربلي سجاره كولوباطرا بوكس ولابس الشورت والفاللـه .. والاقي موبيلي بيرن .. لقيت اللي بيكلمني بيقولي انت اتشتمت يا سوووو
يووووه .. تاني !!؟
ماكدبتش خبر .. خدت بعضي وسألت اذا كان في أي انترنت كافيه هنا .. وفعلا رحت وقعدت على جهاز وفتحت البلوج بتاعي .. والاقي التعليق ده على موضوع
أكاديمية الشرطة

...غير معرف يقول

بطلو بقى كل شوية كلام عن الظباط وشتيمه فيهم
ماهم دول اللي مخلينكم تعرفو تنامو كل يوم وانتو مرتاحين
ولو حد فيهم وحش ماهو ده في كل الدنيا

وبعدين كل مواضيعك بتشتم في النظام مع ان النظام عمل حاجات كتير
روح العراق وانت تشوف بعد ما امريكا دخلت عملت ايه
العراق اللي ايام صدام ماكانش فيها موبيلات ولا دش وانت عايش عالدش والموبيلات
ده صدام واللي زيه هم اللي يعرفو يحكموكم ويشكموكم كويس
ولا انتو عايزين جنازة وتشبعو فيها لطم
وبعدين على فكرة انت دمك تقيل
وعامل فيها راجل وكل الناس داخله بتطبلك وتهيصلك
نصيحه روح هاجر ولا سيب البلد مادامت مش عاجباك
مصر هتنضف منك ومن اللي زيك
-------
بقولك ايه والنبي - ده انا بكلم الواد بتاع السايبر - مالاقيش عندك نيسكافيه بلاك .. قاللي لا والله .. في عندنا نيسكافيه تلاته في واحد .. قلتله ومالو .. هاتلي سلطانيه عشان الواحد يقرا ويفهم ايه الحوار
قريت التعليق مره في التانيه في التالته .. ولقيت ان اللي باعتلي التعليق ده فعلا فعلا .. عيّل بَاوّوّ

وهقولكم يعني ايه (بَاوّوّ) عشان ماتقولوش اني حارمكم من حاجه
الجاموسه لما تخلف عِجل صغير .. والعِجل ده نتيجة أي أزمة صحيه يموت ولا حاجه .. يقومو صحاب الجاموسه .. سالخين جلد العِجل الصغير ومخيّطينـُه ومالينـُه تبن وقش .. ويوقفوه على اربع عصيان ويحطوه جنب الجاموسه .. تقوم هي تشوفو قدامها وتشم ريحته .. تفضل تديهم لبن وماتقطعش .. يعني البَاوّوّ هو مجرد خيال مآته .. وياريت خيال مآته في مزرعه قمح ولا رز ولا ان شالله برسيم .. لأ .. ده خيال مآته عند الجاموس

ولصاحب هذا التعليق اقولو اني هعمل فيك خدمه لايمكن تتخيلها
أي والله لايمكن تتخيلها يا باوّوّ ياخويا
ليه بقى .. لأني هخليك تشتهر وتقرا تعليقك عندي كموضوع .. ومش كده وبس .. لأ .. ده انت ساعتها هتروح لـ رؤساءك وتقولهم انك بتعمل شغل اهو .. بدليل ان كلامك اتنشر
لكن ماعتقدش ان رؤساءك هيفرحو لما هيشوفو ردي وتفصيصي على كل كلمة من كلامك

استعنا عالشقى بالله
--------
...غير معرف يقول
بطلو بقى كل شوية كلام عن الظباط وشتيمه فيهم
ماهم دول اللي مخلينكم تعرفو تنامو كل يوم وانتو مرتاحين
ولو حد فيهم وحش ماهو ده في كل الدنيا

----
دلوقتي يابهيمه ياجحش .. انت قريت الموضوع اللي انا كاتبه أصلا ؟؟؟
طب فهمت حاجه من اللي انا كاتبها اساسا ؟؟؟
يعني انت اصلا مش ضد ان واحده تتخطف جهارا نهارا ولا أي حاجه ؟؟؟
وكل اللي انت ضده .. اني اقول ان اللي خطفها كان راكب عربيه عليها ستيكر أكاديمية الشرطة ؟؟؟؟
ده انت فعلا مش متأمر واهبل وبس .. ده انت باوو .. ولطخ كمان
- سيلي شرح لفظ (لطخ) في مواضيع لاحقه ان شاء الله -
لكن عموما .. انا هقولك انا وغيري بنتكلم بسخط ليه على بعض ظباط الشرطه
لأن لما يكون في طبيب فاسد ولا مهندس فاسد ولا محامي فاسد .. لازم اللي يمسكهم يكون ظابط شرطه .. ولازم يكون كويس .. لانه لو كان فاسد هو كمان .. يبقى احنا رحنا في الكاظوظه
ولما يكون اخو طالب في أكاديمية شرطة بيعمل اللي بيعملو ده - مع العلم اني شاكك انه هو أصلا اللي في كلية شرطة - ويخطف بنت في الشارع هو وصحابه وأخوه لسه طالب ومابقاش ظابط رسمي .. امال لما يبقى ظابط هيعمل ايه .. هيقلع بنات الناس في الشارع بقى ولا ايه ؟؟؟؟؟
----
وبعدين كل مواضيعك بتشتم في النظام مع ان النظام عمل حاجات كتير
----
تصدق انك عملت في معروف بالكلمتين دول .. آه والله العظيم .. لأن في ناس كانت فاكراني مع الحكومه لاني باتكلم في حدود هامش الحريات اللي مسموحلنا بيه كشعب .. ومعتقدين اني مندس على عالم التدوين من الحكومه .. لكن انت لأنك عيل باوو .. عملت في معروف وانت مش عارف
وسوف يتم قريبا ان شاء الله .. عمل سلسلة مواضيع توضح .. عمل ايه النظام .. فينا
ولكن وعلى أي حال .. ارجع واقولك انه مش عيب ان الواحد كفرد في مجتمع .. يتكلم ويقول سلبيات النظام .. بشرط انه مايشتمش ولا يجرح ولا يقول لفظ خادش للحياء .. ولو انت أو اللي باعتينك أيا كانو هم مين .. قلّبو في المدونه وجابو عاليها واطيها .. مش هيلاقو لفظ واحد خادش للحياء في حق أي مسئول في النظام .. إلا بقى لو لفظ أوبجشكن في موضوع ياخي أوبجشكن .. اعتبرتوه لفظ خادش للحياء .. اذا كان عندكم حياء اصلا
----
روح العراق وانت تشوف بعد ما امريكا دخلت عملت ايه
العراق اللي ايام صدام ماكانش فيها موبيلات ولا دش وانت عايش عالدش والموبيلات

----
عراق ايه وأمريكا ايه ياهبل اخواتك انت واللي باعتينك؟؟؟
انتو فاكريننا بناخد بالكلام الاهبل اللي بتضحكو علينا بيه ده .. وكل ماحد يقول حاجه يتقال انه عميل وبياخد تمويل من أمريكا .. والمشايخ بتوع الحكومه يطلعو ويقولو انصر أخاك ظالما أو مظلوما .. ويذكرو آيات الموالاة واللي بيستنصرو بغير المسلمين
!! طب ماهو الحكومه بتاخد دعم من أمريكا اصلا
!! والمعونه الامريكاني اللي بتيجي سلاح للجيش
!! واتفاقية الكويز اللي أُجبرت الحكومه - من أمريكا - فيها على انها تشارك اسرائيل
!! والغاز المصري اللي بيتصدر لاسرائيل - بتراب الفلوس - بأمر من أمريكا
وإجبار ان التعاملات التجاريه الخارجيه تبقى بالدولار الأمريكي .. في الوقت اللي كل الناس بتتعامل بعملة بلدها او بتتعامل باليورو أو حتى بـ سلـّة العملات
دا غير الحاجات اللي من تحت لتحت
انتو فاكرينا مش شايفين ولا مش عارفين!!!؟؟؟؟

وبعدين خد هنا ياد انت .. دش ايه وموبيل ايه يا اهبل اخواتك !!؟؟؟
الناس مش لاقيه رغيف عيش حاف وانت تقولي دش وموبيل .. ده انا شفت بعيني واحده ست عجوزه وغلبانه بتشتري من محل فرارجي بنص جنيه مصارين فراخ .. ولما سألت الفرارجي وقلتله شكلها مابيدلش على انها عندها قطط ولا كلاب عشان تديهم المصارين دي .. الراجل بصلي وهو بيتحسر وبيقولي قطط وكلاب ايه يا باشمهندس .. دي بتسلقهم وتحط عليهم بصله وتأكلهم لعيالها

وبعدين معلش يعني .. هي الحاجت دي داخله ببلاش ولا الحكومه موزاعاها شفقه ورأفة منها بحالنا مثلا
ماهي الحكومه بايعه الهوا لشركة اتصالات عشان تعمل الشبكه التالته بعد ما اتأجلت مره في التانيه في العاشره .. وكل مره كانت بتتأجل كانت الحكومه بتاخد قد كده من موبينيل وفودافون

واصلا اصلا يا أذكى اخواتك.. الدش والموبيلات دول أمن عام .. يعني موجودين عشان يلهو الناس ويخدروهم .. النهارده جايبين فيلم مش عارف ايه على روتانا سينما .. بكره الحلقه الجديده من مسلسل نور .. ولو على الموبيلات .. خد عندك .. واحد بيحرم نفسه يركب مواصلات محترمه طول الشهر عشان يجيب كارت موبيل يقدر يتصل بيه بصحابه .. وواحد تاني بيدخل العدة بتاعته في عدة تانيه اقل منها وياخد الفرق عشان يقدر يشحن او يقدر يعمل أي حاجه بالفرق
وخللي الناس تتخدر وتعيش في الغيبوبه
-----
ده صدام واللي زيه هم اللي يعرفو يحكموكم ويشكموكم كويس
ولا انتو عايزين جنازة وتشبعو فيها لطم

-----

ماهو ده اللي انتو عمالين تزرعوه فينا عن طريق كل الوسائل المشروعه والغير مشروعه
ولكن للأسف .. يؤسفني أن أقول لك وللي باعتك .. اننا كنا فاكرين كده زمان
لكن لما ابتدينا نتشجع ونفكر ونكسر التابوه والتمثال اللي عملناه بنفسنا .. ولما ابتدينا نشوف ونسمع كويس .. لقينا ان المصري لما بيتحط في ظروف مناسبه بيطلع كل اللي عنده
بدليل انجازات المصريين بره مصر في الدول المتحضره والمتقدمه .. واللي بتؤكد بما لايدع مجالا للشك .. اننا لما بنلاقي مناخ نضيف بنقدر نبدع ونشغل عقلنا
واللي اقصده بمناخ نضيف .. انه يكون فعلا نضيف .. مش مناخ أحمد نضيف
-----
وبعدين على فكره انت دمك تقيل
-----
مش عارف ليه افتكرت المثل الشيعبي اللي بيقول .. مالقوش في الورد عيب .. قالوله ياحمر الخدين
وعلى فكره .. انا مش قصدي اني ورد ولا قصدي ان خدودي حمرا .. ولا أي حاجه تانيه حمرا برضه

----
وعامل فيها راجل وكل الناس داخله بتطبلك وتهيصلك
----
والله يا باوو .. انا ولا عملت فيها راجل ولا حاجه .. وقلت في الموضوع بتاع أكاديمية الشرطة إني ماعملتش حاجه غير الجري ورا العربيه وانا بقول حرامي .. ولولا فضل ربنا في وجود عربية التين ووجود كابينة التليفون .. كان زمان البنت دي في صفحة الحوادث .. والحاجه الوحيده اللي يمكن اكون عملتها في الحوار ده .. اني وضحت للناس - لما كانو هيفكو الواد من البنت اللي مكلبشه فيه وهي بتصوت وكلامها مش مفهوم - وقلتلهم ان العالم دول كانو خاطفينها .. ساعتها البنت اتشجعت وعرفت تتكلم بدل حالة الهيستيريا اللي كانت فيها والناس عملت الواجب
وبعدين اساسا اساسا .. انا الحمدلله راجل .. ولو مش مصدقني تعالالي وانا اوريك البطاقه اللي مطلعهالي الحكومه .. هتلاقي مكتوب جنب خانة النوع .. دكر
يعني راجل في نظر الحكومة .. لو انت بقى معترض .. يبقى اعترض على الحكومه
هااا .. هتقدر تعترض على رؤساءك .. ولا هتطبللهم وتهيصلهم .. ومش بعيد تتحزم وترقصلهم عشره بلدي .. وتبقى فعلا فعلا .. ونعم الرجال .. وهز يا وز
----
نصيحه روح هاجر ولا سيب البلد مادامت مش عاجباك
----
انا بس عايز افهم .. ليه كل مايجي حد ويقول للنظام لأ او اللي انتو بتعملوه غلط .. تقولوله هاجر وسيب البلد
لو عندك أي تفسير يا باوو للحته دي - غير ان النظام عايز البلد تفضى من الناس اللي عايزه مصلحة البلد مش مصلحة الكرسي ولا مصلحة الفرد الحاكم - يبقى قوللي وتكسب في ثواب .. وليك عندي ياسيدي إني مش هقولك يا باوو .. هقولك يالطخ بس
----
مصر هتنضف منك ومن اللي زيك
----
باوو يا ضينايا .. انت بجد صعبان علي .. لأن اللي هينضّفو مصر بجد .. هم الناس اللي عايزه مصلحة البلد .. وأول ناس هينضّرو من النضافه دي .. هو انت واللي زيك .. لأن اللي هينضفوها مش هيبقو محتاجين مساحين جوخ ولا حد يلحسلهم جزمهم
هيبقو محتاجين ناس بجد بجد بجد .. بتحب مصر وخايفه عليها
وانت للأسف .. ماتفهمش في أي حاجه غير انك تبوس الجدم وتبدي الندم
عيل باوو بصحيح
----
.. شكر خاص لكل من
فاتيما .. اختي واللي بجد كل يوم بتزيد مكانتها في قلبي .. ربنا يحميكي ويسعدك يارب
آآبي بتنجاني .. واللي سبق وقلت انها عدت مرحلة الجدعنه بمراحل .. ربنا يخليلك خرفانك
عيله مفتريه سابقا .. واللي خفت احسن تاكل الواد الباوو وتفتري عليه .. لكن طلعت فعلا دماغ
حنين القلب .. واللي بصراحه اتفاجأت انها ردت غيبتي .. خصوصا وانها ماتعرفنيش شخصيا
إبن منتقتي ابو الصبابيغ .. الف شكر ليك ياصباغ وان شاء الله نردهالك في الافراح .. أو في البورصه
----
توضيح مهم جدا
الناس اللي بتيجي تعلق عندي وترميلي إعلانات على هيئة تعليقات وتقولي تعالى زور مدوناتنا وشوف مواضيعنا .. الله يكرمكم .. علقو الاول على اللي انا كاتبه وقولو رأيكم قبل ماتطلبو مني اقول رأيي في مواضيعكم .. عيب بجد يعني

آه .. ملحوظه قبل ما أمشي
لما جيت احاسب بتاع السايبر قاللي الحساب تسعه جنيه ونص .. ليه ياعم الحاج .. قالي ساعة النت بسته جنيه وانت قعدت خمسين دقيقه يعني خمسه جنيه .. طب وباقي التسعه جنيه ونص !!؟؟
!!! قاللي النيسكافيه التلاته في واحد - الباكو بخمخه وسبعين قرش - باربعه جنيه ونص
والسبب ايه .. اني في الساحل الشمالي .. و آدي إنجازات النظام

سوووو

هناك 82 تعليقًا:

Do not Press F1 يقول...

السلام عليكم
اولا اشكرك على توضيح معنى بااوو دى
واشكر العيل الباووو من معاميق قلبى عشان خلاك تكتب البوست اللذيذ دا


واحب اوجه دعوة للعيل الـــــــــــــــــبـــــــــاوو انه يشرف المدونة عندى عشان بجد محتاجة اى فكرة لبوست جديد.

سلاموز

MeDoOoOoOo يقول...

سوووو
بص يا حاج انت أولا وصفت الأخ ه بكلمتين جامدين جدا الأولي طبعا الاسم باوو و التانيه متأمر و أهبل . عامة أنا عارف انك مبتتأثرش بعيال لا موائخذه خالص و رساله شخصيه مني للحاج باوو الكبير "بتمني انك تزورني علشان أعمل معاك الواجب مع ان انت لو عندك دم مش هتقرب منكمبيوتر تاني "
غير كده يا سوو يعني انت تكتب بوست علشان واحد سفيه يا أخي ده انت قلبك طيب عامة احنا كلنا عجبنا البوست بتاع أكديمية الشرطه و انت دمك خفيف غصب عن عين الطخين منهم - معلش بيقولوها كده -

سلامووووز

صباح الصباح يقول...

بجد رد مفحم
وان كنت حسيت شوية كدة فى ردك بحبة غرور فى موضوع احمر الخدين.. بس انت فعلا دماغ حلوة ودمك خفيف.

appy يقول...

ههههههههههههههههههههه
هههههههههههههههههههههخخخخخخ
هههههههههههههههههههه
همووووووووووت منك لله ايه الباااااااو دى جبتها منين
بص يا ساسو يا ابنى العزيز هههههههه
كل اللى بيحصل ليك ده سببه الكام قوقعه اللى لمتهم من الساحل علشان تبنى بيهم الفيله بتاعتك ههههههههه
والله العظيم لتقولى انا كمان مسمى على ذوات الاربعه اللى جه عندى النبى يا شيخ
ولا تزعل نفسيتك ده عيل باااو حد يزعل من باو
تشاااااااو بقى

مهندس مصري يقول...

و لا يهمك يا سوو يا غالي سيبك من المخبرين بتوع مباحث النت لأن كلامهم لا حيقدم و لا حيأخر
و عموماً انت إديتهم له في عضمه و أشك انه يبرز بدماغه تاني
ميت فل يا باشا
:)

امل يقول...

السلام عليكم
هوه اللي دمه تقيل وشكله ماقرأش الموضوع ولا حاجة هوه بس شم ريحة
الشرطة في الموضوع راح كاتب تعليقه
تحياتي

A.SAMIR يقول...

في ميزة و ايجابية من تعليق الاخ دة انت مش واخد بالك منه
ان الاجهزة الامنية بقت بتدخل ع النت..يعني اتطوروا جامد وقرروا ان مش كلهم يمسكوا خرازانات وان شوية منهم يمسكوا كيبورد
دة كويس في حد ذاته
تحياااتي

ست البيت يقول...

منور يا سوووووووووووووو
وبعديك اديك قلت باعوو
يعني بعوووو وهو في حد يزعل من بعووو
قولي يا سوو هودا البعووو قريب أبو رجل مسلوخة؟؟؟؟
وبعدين يا سيدنا ولا تزعل ...
الناس اللي زي دي في الغالب بيبقى محدش معبرها أو في يوممن الأيام دخل مدونتك ونفضتله ..قوم ايه الواد ابو سويلم الجعر دا ...يدخل يعمل فيها ميلص ...ويشتمك يمكن تعبره...
وبعد كام مرة نلاقي مدونتة محطوط فيها لينك لسوووووووووو اللي اتشتم
كبر دماغك يا سووووو افندي
ودمت بحفظ الرحمن

Ahmed Al-Sabbagh يقول...

سوووووووووز

هههههههههههههههههههههههه

الله يحظك يا فتى

فى مثل شعبى دارج بيقولوه فى منطقتنا

بمناسبة الغسيل والمكوة اللى انت عملتة فى الأخ : مستخبى

بيقول :

فضحة فضيحة المطاهر يوم طلوعة عالمعاااش

هههههههههههههههههههههههههه

ابن حـجـر الـعـسـقـلانـى يقول...

ابو سوووو

دة انت غشلقت الواد .. الله ينور عليك يا برنزززز

بس بجد أنا مت من الضحك .. قاعد فى الشغل فى أمان الله و طقت قى دماغى ادخل عندك فى خلسة من الوقت .. لاقيت هجوم من أغراب عن المنتقة .. و لاقيت رد الهجوم منك بصراحة كان بروفيشينال .. بصراحة شوية اكسبريشنز فى العنب

بس بجد اللى خلانى اسخسخ من الضحك الفقرة بتاعة المثل الشيعبى بتاع الورد و علاقته باللون الأحمر

ربنا يكرمك و يحفظك دايما يا ابو سوووو .. و يبعد عنك أى كلب .. سواء كان كلب حقيقة أو مجازا

سلا(موزّة)

mayada يقول...

هههههههههههههههههه
مع اني المفروض ازعل يعني عشان اللي قاله الواد ابو مخ غلط ده بس ضحكتك ضحك لما فطست علي حكايه البو دي هي البوبيهات دي بقت كتير ليه يااخويا في مصر اللهم احفظنا يارب الهي لاتكسب ولاتخسر ياواد يابو عشان انت ضحكتني وانا قرفانه منك
النبي علي قلبك ياسو متزعل ده حته باو ولايسوي
ملحوظه
البوبيهات جمع باو لو عاوز تمشيها ياغير معروف بوبي اللي اوك مفيش مشاكل بوبي
اه قبل ماانسي بقي كل سنه وانت طيب عشان عيد ميلاد انت ولماضه طلع معايا ابي اديتني احباريه بالموضوع ده
يعني اسده لو عاوز نقطع لك الواد نقطعه مفيش مشاكل بس مايستهلش ده حتي باو وفي نفس الباو عند غاده عاوز تتجوز وعند ابي مش انت اطمن ياسو
حر بقي والحشرات لازم تنتشر ابقي رش بيرسول

رحــــيـل يقول...

سوووو

لاء رد جامد جامد الصراحة

اعتقد انه مش هيفكر يدخل تاني اصلا على بلوج سبوت نهائى

رصيف نمره خمســــــه يقول...

هههههههههههههههه حلو انك رديت على الباوو دى اللى اول مرة اسمعها بس ومنك نستفيد

على الرغم انك بترد على اللى ميتسماش ده الا انك ضحكتنى جاااااااامد جدا ومش قادرة ابطل ضحك

ولا على تفسيرك وردك على كل كلمة للباووو حاجة ميه ميه

انت لسه فى الساحل والنبى هاتلى قوقعتين ينوبك ثواب

ايمى

سلاااام ياسوووووووو

maiosha يقول...

ههههههههههههههههههه
خلاص يا سووو أنا هموت من الضحك
الواد ده زمانه دلوقتى رمى الكمبيوتر بتاعه من البلكونة
انت بهدلته خالص يا سووو
هههههههههههههه
يالا مش مهم يستاهل
أصل برضة اللى عايز ينتقد ده ينتقد بإسلوب محترم شوية .. إنما قلة الأدب مش هتجبله غير التهزيئ
بس إنت ضبطته يا سووو جامد جدا
ههههههههههههههه
وبعدين لو هو متضايق علشان إحنا بنشجعك .. أو بلغته بنطبلك .. ولا يهمك منه أدينى جيت تانى أهو وبحييك
سووووووووووو سووووووووو او أوه
أحسن من أحسن إعلان إريال
وسيبك إنت بس من المرضى دول

سلام

يوميات فنانه مفروسه جداا يقول...

والمصحف الشريف كنت هموت واعرف يعني ايه بووووو
اصلي كانو بيشتموني بيها زمان وانا صغيره هشششش متقولش لحد
عرفتهااااااااااااا اخيرا
اكيييد طبعا مكانش قصدهم ولا انت شايف ايه ههههههههههه
والله رجوووله يا سوووو وربنا عرفت تاخد حئك منه بصحيييييح

كل جزء بخلصه كنت بقووول اديله يا سووو احسن يستاهل ابن الذينا ده

سيبك منه ربنا جعلك سبب تمشي في الطريق ده عشان تنقذ البنت الغلبانه ديه اللي من غيرك الله اعلم مصيرها ايه دلوقتي
وطووول مافي ناس زيك يا سووو بيخافو علي بنات الناس زي اخواتهم والله هنبقي مطمنين
بس حلوه بوووو جامده

بس الله يسهلووووووووو الساحل الشمالي مره واحده وفيسكافيه وسيبر ايه ده كله ايه ده كله
انا مش بحسد ولا بقر انا بنق بس عليك بس ربنا يكرمك
يلا سلام

ADAM يقول...

هاااااااااااااااي

ازيك يا سووووو

أنا آدم يا مولانا

أنا بس حبيت آجي أسلم عليك

وأطمن عليك


هعهعهعهع


شلووووووووم



آدم

سومه...مجنونه فى بلد عاقل يقول...

هههههههههه منك لله يا سوو ايه يا ابنى دا حنفيه التهزيق والشتايم دى دا انت شركته خالص
دا الواد حيتعقد فى عيشته
وشهرت الواد على قفاك
بعدين انا اول مره فى حياتى اسمع كلمه باوو يمكن انت تقصد العيل الواو يمكن فرقت حرف؟؟؟
على فكره يا سوو انا شاكه انك تكون مخابرات قرعيه سفليه مستخبيه
ههههه

الله يعينك على اللى بتشوفه
تحياتى ليك سومه_87

وومن يقول...

سوووو

مش قولتلك الرد علي الناس دي ملوش لزمة بس انت من طيبة قلبك حبيت تعملة مقام

اهو الناس هاتدخل تشرك الواد وتقعد تفكر مين هو ولية وياتري ويا هل تري
وهايفتكر نفسة مهم

بس بجد انت جامد جامد الرد فظيع اول مرة اعرف حكاية باوو دي

بالنسبة للإخوة اللي اشتروا حق الإعلان علي بلوجر شوية ذوق واقروا الموضوع الأول

لماضة يقول...

ههههههههههههه
باوو دي تتفك بكام واو
الله يرحمه
بس استمخيت جامد من الرد بتاعك الصراحه
ديله متقولش لأه

عيله مفتريه سابقا يقول...

بأوّوّ

يخرب مطنك يا اسمك ايه انت

لا ومحلل ومحص ومفشفش وبتاع ايه يا عم ده
انا مش قولتلك كلام اسمو ايه ده محدش بيسمعه

ولما الناس بتمشى الهوهوات بتهبل لوحدها

انا بس كان فيه كلمه نسيت اقولها يعنى اذا استمحنتنى اقولها يا باشو مهندس

طــــــــــــــــــظ

بس كده استريحت

المهم قولى البحر اخبارو ايه يا عم المصيف
عايزة اروووووووووح البحر يا بشرررررررررررر

سلامون عليك ومنحرمش العمر منك ابدا يا صديكى

جبهة التهييس الشعبية يقول...

انا كنت عايزة اكلمك في الموضوع ده يا سو
يا راجل حرام عليك يا مفتري
انا لو كل واحد شتمني عملت له تدوينة يبقى ح اعمل مدونة اسمها الرد على الشتامين
دي مش اول مرة حد يسيب لك تعليق شتيمة وتعمل له بوست
امال انا اعمل ايه انا بيتكتب فيا بوستات شتيمة في مدونات وباعمل عبيطة ويدخلوا ناس ناقصية يشتموني في المدونات دي عشان ياخدوا وش وانا اعمل عبيطة ويدخلو عندي بانونيمس يشتموا وانا عارفة الاي بي ادرس بتاع كل واحد وواحدة فيهم وبرضه اعمل عبيطة
عشان لو كل كلب عوى القمته حجرا لكان مثقال الحجر بدينار
وكفاية انه يشتمني بانونيمس وللا في مدونة نكرة وفاكرني مش واخدة بالي وييجي في وشي يتملقني كأني رئيس وزراء وانا ربنا يعلم باطي والنجم
مش كل واحد يدخل يسيب لك تعليق شتيمة عشان زهقان وللا قرفان من عيشته وبيفش غله فيك تقوم تعمل له بوست وتنهار ع الكرسي يا مرسي بالطريقة دي انت فرفور وللا ايه؟
ثم بالذمة واحد امن دولة سايب لك تعليق بيقول لك الشرطة هي اللي بتخليك تنام وانت مطمن
يعني بذمتك ودينك يا شيخ انت بتنام وانت مطمن؟ اذا كان مجلس الشعب والشورى ولعوا والشرطة قاعدة فاتحة بقها لحد ما الدبان كله دخل فيه
يعني واحد زي ده لما يشتمك يبقى شرف ليك
وبعدين يا اخي ناس اعصابها تعبانة او معقدة او مريضة نفسيا ولقت مدونة تفش فيها غلها ما تسيب الناس تفك عن نفسها بكلمتين انت زعلان ليه
انا والله لولا ان الزوار بيتضايقوا من الاستاذ بهيج اللي هو مدون معروف وكان في يوم من الايام صاحبي بس هو اذا خاصم فجر كنت سبته والله وشلت المودريشن بس الناس بتدخل وتقول لي احنا ذنبنا ايه نشوف قلة الادب دي
اتعلم تكبر دماغك والا ح تتعب في دنيتك قوي
الشتيمة مش بتلزق
والا ما كنتش عرف حد خالص ولا بصيت في وش حد

wa7ed 2ensan wnsan يقول...

بصراحه يا عم سوو الرد بتاعك دا جامد جدا عالواد الباوو دا

بس اللي انا ملاحظه ان هذا الباوو خياله واسع حبتين .. قال ايه الشرطه بتخلينا ننام مطمئنين ..

محسوبك محلاوي وشاف البلطجيه واقفين مع المخبرين وامناء الشرطه بيخمسوا في سيجارة ملفوفه واحده .. قمة الأمن والامان .. بس واضح انه اهبل اخواته فعلا بس انت اديتلوا بارك الله فيك ..
بس تقريبا كده انت حققت له هدفه انه ياخد حجم قدام كل اللي بيزوروا مدونتك واديتله بوست كمان ياعم مذكرات طفل طخين كانت احسن خساره في عينه البوست دا .. بس اهو ضحكنا برضه على هذا الباوو

A7MeD F@hMy يقول...

ههههههههههههههههههههههههههههه
ههههههههههههههههههههههههههههه
الواد اتغسل يا عيني
بس اديك شهرته ع الفاضي كدة
ياللا بس اهو خد علي دماغه
هههههههههههههههههه
بس حلوة يا باووو دي

سيبك انت مفيش اجمل من قعدة البحر و الواحد يسمع حكاياتك يا عم سووووو
تحيااااااااتي

ـ-ـ- أحمد عبد العدل-ـ-ـ يقول...

أجازة سعيدة ياسوو
حد برضه يرد على حد باوّوّ
والله كنت بحييك على انك مردتش عليه فى البوست اللى فات..يلا غيّر الموضوع بقى

maha zein يقول...

اذيك يا عم سوو
بقه يا جدع اروح اصيف بتاع خماشر سنة في اسكندرية اجي الاقي الدنيا اتغيرت
طب ينفع كده طيب
يعني اللى يروحوا الساحل الشمالى بيتعمل فيهم كده طيب
مترد يا رادل
عموما انت شخصية كويسة اوي
وجدعه
وده بان من خلال قيمة ساعة قبلتك فيها في اللقاء
احب اقول لعمو البعو الباو
يا ريس
وحياه ابوك
وحياه الغالين
ورحمة الحجة
براحة علي عمنا وعم عيالنا سو
مش عشان اي حاجة
ولا لاني معاه
ولا لانه كان كويس في اللقاء
ولا لانه علق عندي في اخر بوست
ولا عشان اي حاجة
بس عشان هو كان جدع يومها
لولاه كانت البنت بح
لولاه
مكنش بتاع التين استرزق وباعله بتلاتة جنيه
ولولا انه قال حرامي حرامي مكنش رجعنا بالزمن ورا لافلام الابيض واسود الجميلة
ماشي يا ريس
تحياتي يا عم سووو
يا مكبرنا ومقوينا

Two in One يقول...

:))

هو انا كل مااجي الاقيك ماسك واحد بتغسله .. اعتقد الغير معرف دول هيحرموا يخشوا مدونتك بعد اللي بتعمله فيهم

بس انت ماشاء الله قاموس ودسم كمان :D
ماشاء الله عشت زخرا للوطن
كل مااجي هنا لازم اطلع بكلمة جديدة .. ده انا طلعت مااعرفش عربي يا شيخ .. شكرا علي معنى باوور
ومفيش كلام يتقال بعد الذي قيل وقال
كفيت ووفيت
---
بس اعتقد انك لو كنت ظابط شرطة وشايف الناس كلها بتسب وتلعن فى مهنتك .. اكيد غيرتك علي مهنتك ومهنة عائلتك هتعميك عن الحقيقة اللي شايفها الكل .. انا مش بدافع عن الغير معرف بالعكس هو اعمى مش شايف كارثة خطف بنت بنية اغتصاب وبص للي يخصه واثار غيرته فطلع الكلمتين دول

عموما ربنا يهدي الجميع
وكل سنه وانت طيب

mostafa rayan يقول...

بص يا عم سو
اولا صاحبك غلط لأنه كلمك وقالك على حاجة زي كدة وهو عارف انك في المصيف يعني رايح تريح اعصابك مش تزيدها توتر كمان الشخص الباو دة ماسيتهلش انك تعمل عنه بوست كامل لأنه باو وكلامه لا هيودي ولا يأخر انا عارف انه مجرد تنفيس ودة من حقك لكن بقولك اصلا المفروض كلامة مايعصبكش للدرجة دي خسارة فيه ربع جنيه مخروم مش تدفع 9 جنيه ونص
ولا يهمك يا جميل وكمل
ربنا يوفقك
اخوك : مصطفي

بطوط حبوب يقول...

يا باشا الراجل ده كان معايا وقعد يشكر فى المنافيه اوى الصراحه

وده يشفع له طبعا
ومعدش هيعملها تانى




( المره دى هعديهالك بس ابقى اتكلم عن حد منوفى تانى ماشى يا بووووووووووووووب
)

هههههههههههههههههههههههه

مع اصرارى يقول...

انت سلخت الشاب كدة ليه؟
وكمان عملت إيه فى جلده؟
كدة ممكن يتعقد
وبعدين حكاية بو دى قديمة
قالهالى صديق أسوانى مقيم فى أسيوط
ومقطع الصعيد
لكن لطخ فعلا معرفهاش
ويا ريت تترجمهالنا بسرعة
لحسن أزق عليك البو

تقبل تحياتى
السلام عليكم ورحمة الله

هيثم الدهشان يقول...

سو

انا اسف جدا لتقصيرى معاك اليومين دول

ثانيا ده واحد داخل يستهبل فاكر انه عايش فى الجنة تحت رجلين النظام . ربوه على حاضر ونعم وانا تحت امرك يافندم وبس .

الناس حرام تكون موجودة اساسا فى مصر

وبعدين ياعم الحاج الباوو ده دخل شاف الاسم اكاديمية الشرطة دخل لزق الكلمتين وخلع وهو لو دكر بصحيح مكنش دخل ( غير معروف ) كان دخل باسمه الحقيقى اما بالنسبة لظباط الشرطة فعليهم كلام كتير يابنى انا ليا واحد صاحبى كان معايا فى ثانوى لما كنا بنلعب كورة كنت احب اشوطها فى وشه دايما ولما دخل شرطة محدش عرف يكلمه اول واحد حب يفترى عليه يكون انا ( ههههههههههه) بس من ساعتها مشفتهوش فى البلد تانى شكله اتنقل ده غير اللى بيحصل جوه الاقسام من بهدله والظباط فاكرين نفسهم هما الكل فى الكل مفيش حد يقدر يقولهم اى حاجة بس الكويس عندنا فى الصعيد بيعفوا يتفاهموا معاهم هيا طلقة بشلن
( هههههههههههههه )

تحياتى لاجمل سو

سلامووووووووووووز

سمر الشافعى يقول...

سووو انا تعليقى هيكون بعيد شويه عن البوست والباوو وكدا

بجد انا لاحظت انك انت المدون الوحيد اللى الكل اتفق على اخلاقه وشخصيته ربنا يارب يكرمك وسعيده لانى اتعرفت على مدونتك دى

كل سنه وانت طيب

فاتيما يقول...

يا سوووو
يا جرع بتشكرنى على إيه
طب دا الواحد لازم يقول اكتر من كدا بس أنا مرضتيش يعنى و قولت إنت لما ترجع هتعرفه مقامه
و قد كان
مش عارفة أشكرك إزاى على مشوار إسكندرية دا
إنت من الناس اللى الواحد بيتونس بوجودهم
و كلامهم
و صدقهم
تحياتى ليك بالنيابة عن البنت اللىىكانت هتروح فى شربة مية دى و كان ممكن تكون أخت الباوو دا و لا بنت خاله و لا حتى خطيبته و هوه مش فاهم
و مستقوى القلب كدا
تحياتى يا غالى

د/مروة المعداوى .....قباحة سابقا يقول...
أزال المؤلف هذا التعليق.
د/مروة المعداوى .....قباحة سابقا يقول...

اولا
يخرب بيت اللى يزعلك يا شيخ

تانيا
عرفت موضوع الباوو ده منين

تالتا بقى
موضوع العراق دا و ان النظام عملنا كتير و احنا اللى ناكرين الجميل فكرنى بمسرحيه عادل امام لما كان على السطوح

بيقولوا : احنا..... احنا ولاد كلب ....مزهقين الزعيم

اللهم كتر من سلطاته و بابا غنوجه

امييييييييييييييين

وصلنى تعليقاتك من البت لماضه و تم بدا التنفيذ

تحياتى
هيييييييييييه

بهيصلك اهو
عندا فى المحموء على بلده و النظام

ياخى ابو اللى جاب ابو النظام

يلا بخاطرها

تشااااااااااووووووووووو

Eman Eltaher يقول...

السلام عليكم

هالللووووووووو
انا جييييييييييت
بس يا خسارة واضح انى جيت ف الوقت الغلط
يا سووووووو خلى اللى يقول يقول و اللى يهرتل يهرتل و اللى يتغاظ يتغاظ
ما انا والله و ربنا عالم بييجى ناس معرفهاش نهائى و يقلوا أدبهم على صفحات المدونة من لا شئ
و العجيب انى مبردش على شتيمتهم غير بأصلى و أخلاقى و بحاول أمسك ف أعصابى و ياريتهم بيحترموا نفسيهم شوية
و أبقى مش عارفة مين اللى باعتهم و لا حتى هما هيستفيدوا إيه لما يقولوا كلام زى ده

عموما متشغلش ف بالك
حسابهم على ربنا

انت أخبارك إيه؟؟
و الله مدونتك لها وحشة
فينى من زمااااااااااااان
ده انا اتأخرت اوىىىىىىى الظاهر
بس ياللا آدينى جيت و ادعيلى ربنا يخليك
متأخرش تانى و أداوم على التدوين أطول فترة ممكنة و متحوشنيش اى ظروف و لا أى مشاكل
الحمد لله على كل حال

بس انت بجد مشكلة
كلامك و خفة دمك لسه زى ما هما
ما شاء الله عليك
حلوة أوى العيل الباوو دى
بصراحة انا اول مرة كنت أعرف المصطلح ده
بس بجد لذيذ
ههههههههههههههه

ياللا انا شكلى طولت عليك

enjy يقول...

امممممممممم طب اعلق اقول ايه دة انت سلخته يا معلم...على العموم حصيلتك اللغوية جامدة...على فكرة انا مش كنت قريت الموضوع اللى فات بس لما قريته اذبهليت يا نهار اسوح الله يكون فى عوننا...........

بيقولوا سايكو يقول...

يا سوووو سيبك من الناس الهبلة دى .. و الله دى ناس فاضية و مش عارفة حاجة فى حياتها و كل همها إنها تدخل تقول بقيتن أهبل من بعض قال يعنى جابو الديب من ديله .. بلا نيلة

تانى حاجة . انت لو لسة فاكرنى ..فأنا آسفة فعليا حقا إنى مش قادرة اقرا المذكرات لإنى مصابة بحالة غريبة يعلم الله وحده متى تنتهى .. مش قادرة اقرا أى حاجة بتعد أكتر من 5 دقايق اللهم لو كنت متابعة الحاجة دى من قبل ما الحالة الغريبة تحصلى .. عامة البلوج موجود و إن شاء الله الحالة تنتهى قريبا .. علشان كده أنا باترجاك رجاء شخصى جدا ياريت بجانب المحطات تكتب فى مواضيع متنوعة زى ما بقالك فترة بتعمل .. خلينى أعرف اقرأ وأعلق عندك كتير :)

شكرا و ربنا يكتر من أمثالك

شفقة هانم واحسان بك يقول...

تعرف كل اللى حصل ده بسبب الساحل الشمالى هههههههههه
امال لو رحت الجنوبى ولا الغربى كانت المدونة انفجرت
لا بس بجد انا بحيك على جراءتك وعلى ردك الممتاز على الباوو لا صحيح رجل ذو حجة
تسلم
شفقة

روز يقول...

مكنتش عارفه اسيبلك الرغيف فين قلت اسيبوا هنا وخلاص
طبعا شرفنى جداا زيارتك لمدونتى بس هى فعلا غلسه اوى بدليل ان اللينك دخلك على موضوع قديم(اللى هوه فيه الاغنيه) مش اخر الموضوعات...عشان اخر موضوع كتبت فيه عن يوم اسكندريه...عموما انا بطوط بيعملى مدونه هنا وهعزل اجى عندكوا ان شاء الله

Soooo يقول...

Do not Press F1

وعليكم السلام ورحمة الله وبركاته

اي خدعه ياستي
ولو انك صعيديه والمفروض تبقي عارفاها وعارفه كلمة لطخ كمان
لكن يلا بقى

وبلاش توجيهيله دعوة .. ده حافظ مش فاهم يابنتي وهايجيلك يقرفك

والف شكر على زيارتك وعلى كلامك الجميل وربنا يسعدك ويكرمك ويبسطك دنيا وآخره
وكل سنه وانتي طيبه




سلاموووووووووز

Soooo يقول...

MeDoOoOoOo

ميدو ابن اختي
ازيك ياد وعامل ايه وكده
بقولك .. فاضي بعد بكره نلف شوية
هنروح العتبه ومنها على مدينة نصر وبعدين نرجع عالزمالك ونطلع عالدقي .. وممكن بعدها نشرب كوباية فيسكافيه عالبورصه
نرجو الافاده


سلاموووووووووز

Soooo يقول...

صباح الصباح

اعوذ بالله من الغرور والكبر
اعوذ بالله من الغرور والكبر
اعوذ بالله من الغرور والكبر

بجد انا مش قاصد ده خالص وربنا يعلم والله العظيم
كل اللي قصدته انه جاب حاجه تانيه بعيد عن الحوار خالص
انما انا ولا ورد ولا شايف نفسي حلو ولا اي حاجه
وفي احسن مني كتير ان ماكانش الناس كلها احسن مني

والف شكر على كلامك وربنا يسعدك ويكرمك ويبسطك ويوفقك




سلاموووووووووز

Soooo يقول...

appy

الحمدلله ان ربنا قدرني وخلتك تضحكي
بس خدي هنا
انتي بتضحكي على ايه بالظبط يا ام خرفان

وياستي انا والله العظيم ولا معصب نفسي ولا حاجه خالص
بالعكس
انا في الروقان اهو

وربنا يسعدك ويكرمك ويبسطك ويرضيكي دنيا وآخره




سلامووووووووووز

Soooo يقول...

مهندس مصري

حليب هارتييييييييييي بالقوي ومن جوا كمان
ازيك ياباشا وايه اخبارك
كل سنه وانت طيب وربنا يرجعك لاهلك سالم غانم ويكرمك في غربتك يارب

وفعلا كلام مخبرين النت لا هيقدم ولا ينيل
بس الغباء بقى لما يستفحل مع واحد حافظ مش فاهم

سيبك انت .. والله العظيم ليك وحشه


ربنا يسعدك ويكرمك ويبسطك ويوفقك ويرضيك دنيا وآخره




سلامووووووووووووز

Soooo يقول...

امل

وعليكم السلام ورحمة الله وبركاته

وبجد مش عارف اشكرك ازاي على كلامك الجميل ده


ربنا يارب يارب يسعدك ويبسطك ويكرمك ويرزقك ويرضيكي دنيا وآخره يارب



سلاموووووووووز

Soooo يقول...

A.SAMIR

يابو حميد انا مش ضد انهم يدخلو عالنت ويقرو المدونات
انما ضد الغباوه في التعليق
يعني كان ابسط حاجه لو هم عايزين يهبطو الحوار .. انهم يقولو استنى لغاية ما الحوار يخلص خالص والعدل ياخد مجراه ويمنعوني اني اتكلم عشان الموضوع ياخد حقه
انما يقولي العراق وامريكا والنظام
ده عيل باوو ياجدع

سيبك انت .. وحشتني طلتك عندي والله
طمني .. الجواز حلو ولا ايه النيظي ؟؟؟

ربنا يسعدك ويكرمك ويوفقك ويرضيك دنيا وآخره يادكتره




سلامووووووووووز

Soooo يقول...

ست البيت

ياقهلا ياقهلا
طب والله ليكي شوقه

ياستي صدقيني ولا فارق معايا شغل العيال دي والله
وانا لما رديت عليه مش رادد على شتيمته لي في شخصي
انا بس حبيت اوضحلو ان المنطق اللي بيتكلم بيه ده منطق اهبل ومايتقالش لعيل صغير
ده بيقول عراقو امريكا
انا يتقاللي عراق وامريكا
أما عيل باوو صحيح

وانتي ازيك وفينك وفين اراضيكي
يارب تكوني بخير يارب
منتظرين زيارتك وتنويرك لقاهرة المعز



سلامووووووووووز

Soooo يقول...

Ahmed Al-Sabbagh

صبابيغووووو

والله انا حاولت على قد ما اقدر اكون محترم عشان الناس اللي بتقرالي
بالك انت الواد ده لو جالي المنطقه
يالهوووووي
والله ماهيعرفو يلمو اشلاؤه

وانت ازيك وايه النيظي؟؟؟



سلاموووووووووز

Soooo يقول...

ابن حـجـر الـعـسـقـلانـى

ابو العساعيس حليب هارتي
ايه ياد (غشلقت) دي؟؟
دي حشلمت كده ولا متشابهه في الوزن مختلفه في المعنى؟؟
وايه حشلمت اللي انا قلتها دي اصلا

هتنسينا اللغه ياعم الحاج

واحشني ياد والله
سلامي للباحث وللتمنياوي طه



سلامووووووووووز

Soooo يقول...

mayada

ميااااااااااااااده
انتي فين يابنتي
انا قلت تلاقيكي نسيتي مدونتي وخلاص
لكن فيكي الخير والله

وياستي وكل سنه وانتي طيبه والف مبروك على ابن اخوكي وعقبال مانفرح بيكي وبولادك يارب

وفعلا لازم الواحد يشوفلو حر في الحل ده .. قصدي حل في الحر ده
الفينيك شغال ولا حشراتنا عايزالها ديتول من المستورد؟؟؟؟




سلامووووووووووز

Soooo يقول...

رحــــيـل

ياستي ولا يخش
انا الحمدلله مادام كلامي من دماغي ومش متحفظ من حد اكبر منني .. يبقى قل لن يصيبنا الا ماكتب الله لنا
وانتي ازيك وازي الحياه
لا ياشيخه
طب مش كنتي تقولي
طاب فل قوي




سلامووووووووووووز

Soooo يقول...

رصيف نمره خمســــــه

الحمدلله انك ضحكتي ياستي
وأي خدمه .. باشرحلكم كلام متعوب عليه قوي والله
لكن مافيش حاجه تغلى على اخواتي

وياستي انا جايب معايا شوية قواقع بس منها لله اابي .. فرقتهم على خرفانها البينك وعماله تقول يلعبو شويه
حاجه غريبه خالص




سلاموووووووووووز

Soooo يقول...

maiosha

ياستي اضحكي براحتك ولا يهمك
وهو اللي جاب لنفسه الكلام
لو كان اتكلم في الحياه او في الموضوع عموما .. كنت هقولو ماشي ودي وجهة نظرك
انما يقولي نظام وامريكا والعراق
لا بقى

والف شكر على الاعلان ده وربنا يستر ما القيش الحاج اريال جايلي بنفسه يتخانق معايا
وربنا يسعدك ويبسطك ويكرمك ويرضيكي دنيا وآخره يارب




سلاموووووووووووز

Soooo يقول...

يوميات فنانه مفروسه جداا

هههههههههههههههه

لا فشر
انتي عمرك ماكنتي باوو ولا هتكوني كده

وربنا يسعدك ياستي ويبسطك ويكرمك ويرضيكي دنيا وآخره

ومنتظرينك في حفلة توقيع كتاب المدونين في الساقيه يوم السبت ان شاء الله


ملحوظه
بتحسدي وبتقري على ايه .. مانا اديني اهو مشتوم وحاله مرار




سلاموووووووووووز

Soooo يقول...

ADAM

من أرى؟؟
أآدم هنا
يامرحبا يامرحبا
كيف حالك يافتى
وكيف حال الحياة معك
على الله تكون فل بعون الله



سلامووووووووووووز

Soooo يقول...

سومه...مجنونه فى بلد عاقل

طب انا راضي ذمتك
لو انا مخابرات سفليه علويه .. كان ده هيبقى حالي
ده اقل واجب .. كنت هعرف اجيب موبيل ثري جي

وياستي اسمها عيل باوو .. مش واو .. واو ايه بس
اتعلمي قراية وتعالي ابصمي




سلامووووووووووز

Soooo يقول...

وومن

يا ميرا ولا شهرته ولا بتاع
انا بس حبيت اوصل رساله معينه لناس معينين
هم مين بقى
ماعرفش

واه الله يكرمك .. أكدي على الناس اللي بتيجي ترمي تعليق بره الليله خالص وتسيبه وتمشي دي

وانتي عامله ايه في المذاكره؟؟؟
ربنا يوفقك ويكرمك ويسعدك ويبسطك ويرضيكي دنيا وآخره




سلاموووووووووووز

Soooo يقول...

لماضة

الباوو الواحد ببتاع عشرطاشر واو
بس انا خليتها اتنين واو بس

اصله لسه باوو على خفيف

وانتي ازيك وايه الاخبار
لا ياشيخه
بقى كده
طب مش كنتي تقولي
خلاص لا تقلقي انا هتصرف بمعرفتي
يلا عايزه حاجه؟؟



سلاموووووووووووووز

Soooo يقول...

عيله مفتريه سابقا

والله ياسمك ايه انتي
انا ماعملتش الحوار لاسمه ده
انا عملت الحوار عشان اوصل لاسمهم ايه دول
اني مش خايف من اسمه ايه ده

فهمتي حاجه من اللي قلته؟؟؟




سلامووووووووز

Soooo يقول...

جبهة التهييس الشعبية

تصدقي وتؤمني بالله يا نواره يا بنت عمي
انا لو اعرف ان اللي دخل وهفلط بالكلام ده هيخليكي تنوري مدونتي .. كنت اتحايلت عليه من زمان انه يجي

اقولك انا بقى ياستي عملت الموضوع ده ليه .. والموضوع الاولاني بتاع زمان قوي ليه

الموضوع الاولاني بتاع زمان .. انا عملته عشان اوضح حاجتين .. أول حاجه إني لقيت في مدونين كتير بيتوجه لهم نقد غير موضوعي وبيسكتو .. وانا شايف ان ده غلط والسكوت عليه غلط أكبر .. ولو وقفنا كلنا للي داخل يهسهس وقلناله بطل هسهسه .. هيفهم ان اللي بيعملو ده هبل وهيزهق ويمشي
تاني حاجه بقى حبيت اوضحها .. اني مش باحب الطريقه المباشره في التوجيه او في الكلام .. وباحاول على قد ما اقدر اني اخلي الكلام يبقى في اسلوب الى حد ما ساخر .. واللي كان داخل زمان عايز حاجه مباشره وصريحه زي كلام جرايد المعارضه
وعشان تبقي عارفه يا نواره .. انا بعد ماعملت الموضوع بتاع زمان .. اللي اتكلم دخل وشتمني وشتم كل المدونين والفاظ ايه .. الفاظ انا اللي تقريبا متربي في الشارع .. اتكسفت انها تفضل على المدونه .. رحت حاذف تعليقه من سكات وقافل التعليقات لاي شخص مجهول

الموضوع بتاع دلوقتي بقى .. انا ماعملتوش عشان انا اتشتمت في شخصي ولا بتاع .. لأ .. عملته عشان المنطق الاهبل اللي اتكلم بيه العيل الباوو .. هو المنطق اللي بيقولوه ناس كتير قوي .. ولازم يتوضعلو حد .. سواءا مني او من غيري .. ولازم نفهم اللي بيفكرو كده .. سواءا كانو من اتباع النظام او من محبين النظام .. انه منطق اهبل قوي .. او مش منطق اصلا

حته على جنب بقى .. انا باتشتم ولما الشتيمه بتبقى في شخصي باحذف التعليق من سكات .. لاني عارف ان الشتيمه مش بتلزق واللي دخل شتمني ممكن يكون حد انا اعرفه في الحياه .. ولما مش باتكلم في الحاجات دي بيهبط وبيسكت
انا اه من المعادي .. بس للأسف مش فرفور
طب والله تصدقي انا كان نفسي ابقى فرفور واتخانق باللبانه

سيبك انتي .. نورتي المدونة وكتاب الله



سلامووووووووز

Bannoura يقول...

بسم الله
أحمد
يا أحمد
يااااا أحمد
الله يهديـــــــــــــك
سبق و قلتلك
إنت كده بتديله أكبر من حجمه
الناس دي
ضعاف النفوووووووووس
وعتاب الندل اجتنااااابه
ازبله
مش تفردله بووووووووووست كامل
أنا فاهمة قصدك كويس
ولكن
سيبك منه ولا ترد عيه حتى في الكومنت
هتلاقي ألف من يرد عليه بدالك
وياخدلك حقك
حبايبك كتير
ماتلتفتش عمرك للناس دي
ولا يفرق معاك أصلا
الكبيــــــــــر كبيـــــــــــر
يا كبيــــــــــــــــــــــــــــر
تحياتي

Soooo يقول...

wa7ed 2ensan wnsan

والله ياعبده انا في القاهرة وفي المعادي اللي هي منطقة مساعد وزير الداخليه .. ولا باعرف انام وانا متطمن ولا بتاع
انت نسيت الحوار بتاع سفاح المعادي اللي فضل عايش ومقضيها بيضرب مؤخرات البنات بالمطاوي

ومين قالك اني اديته حجم .. انا اديته على نافوخه هو واللي باعته .. وضحتلهم اننا بقينا فاهمين وبنتكلم ومش خايفين

وحاضر ياسيدي .. انا عارف ان المذكرات طالت غيبتها .. وان شاء الله على نص الاسبوع او بالكتير قوي على يوم الاربع هكون منزل بتاع تلات حلقات ورا بعض

اي خدمه يابرنز



سلامووووووووووز

Soooo يقول...

A7MeD F@hMy

حليب هارتي
طب والله انا اللي كنت مبسوط بمعرفتك
انا دخلت على مدونتك صحيح ونزلت الكليبات اللي انت عاملها على فكره بس مالحقتش ارد عليك .. هاعلق وادخل عندك اتفسح شويه
اجيبلك حاجه معايا ؟؟؟؟؟



سلاموووووووووز

Soooo يقول...

-ـ- أحمد عبد العدل-ـ-ـ

الله يخليك ياباشا
بس صدقني انا ماردتش عليه عشان حاجه غير اني عايز اقوللو هو واللي بيفكرو بالاسلوب ده .. انكم بتستعبطو وبتقولو كلام اهبل

وانا ياسيدي غيرت الموضوع بعدها بمافيش تمانيه واربعين ساعه .. لأن الحوار ده مش موضوع اساسا

منورني والله




سلامووووووووووز

Soooo يقول...

maha zein

عارفه يا مها
انتي من أكتر الشخصيات اللي تلاقيها في التدوين زي ماهي في الحقيقه
وقت الهزار عسوله ودمها خفيف
ووقت الجد تبقى اجدع من أجدعها جدع

بجد سعيد اني اتعرفت عليكي واكتسبت صداقة انسانه محترمه زيك


ملحوظه
انتي اللي مشيتي بدري بدري يوم سنكريه .. انما احنا قضيناها كلام وحوارات واييييه .. زيطه ياريس



سلامووووووووووز

Soooo يقول...

Two in One

ههههههههههههههههه
تصدقي اه
يعني اول مره اتعرفت عليكي في مدونتك القديمه برضه كانت حاجه زي كده
وبعدها اختفيتي في ظروف غامضه ورجعتي تاني اهو .. وبرضه في حوار في السكه اياها
بس والله انا مقضيها مواضيع وحياه عادي مش فارق معايا الباوو ده او اي باوو تاني

وبخصوص الظباط وانهم بيشوفو الناس بتتكلم عنهم بشكل وحش .. فده لان المهنه بتاعتهم ماتحتملش اي خطا
وكمان ماتنسيش المبدأ اللي احنا بنتعامل بيه
الحسنة تخص والسيئة تعم
وبعدين هو اسمه ظابط .. يعني المفروض يظبط ثباته انفعاليا مع حياته مع شغله
ولا ايه؟؟

بقولك ايه .. فين حوارات شهرزاد وشهريار ؟؟؟؟



سلامووووووووووز

Soooo يقول...

mostafa rayan

بص يابو درش
صاحبي لما قالي الحوار ده ماقالهوش بمبدأ انه بيعكر دمي ولا حاجه .. لأنه عارفني كويس وعارف ان الحوارات دي مش هتفرق معايا في حاجه ولا هعكر دماغي وانا في الساحل عشان حد دخل شتم ولا قل ادبه ولا قال حاجه وحشه
وبعدين مين قالك اني شهرت الباوو بالموضوع ده .. انا شهرت - بتشديد الهاء - بيه .. ووضحتله انه اهبل ولا فاهم اي حاجه
وعلى فكره .. التجربة بتاعة التسعه جنيه ونص انا استفدت بيها بحاجات كتير .. اهمهم اني خدت كام فيلم من صاحب السايبر على الفلاش كي اللي معايا

والف شكر على دعوتك لي بالتوفيق وربنا يسعدك ويبسطك ويكرمك دنيا وآخره




سلامووووووووووووز

Soooo يقول...

بطوط حبوب

بطابيطو
احنا ماصدقنا ضربنا صحوبيه مع بعضينا .. تقوم تقولي ان الباوو ده منوفي وصديق
لأ
كده هزعل منك واوصي دكتورة عواطف عليك وهي مش ناقصه

وحشتني والله يابطبوط




سلامووووووووز

Soooo يقول...

مع اصرارى

انا ولا سلخت ولا عملت حاجه
انا بريء يابيه

وعلى فكرة .. كلمة باوو دي في ناس كتير عارفينها .. بس برضه في ناس مش عارفاها
والواجب يحتم علي اني كصعيدي لازم اعمل على انتشار اللغه
واخد بالك من كلمة لغة دي

اما بقى لطخ .. فهوضحها قريب ان شاء الله
بس شوفلنا انت اي حاجه في رغيف





سلاموووووووووووز

Soooo يقول...

هيثم الدهشان

ربنا يكون في عونك يابو هيثم .. انا عاذرك عشان الحوار اللي قلتلي عليه وربنا يقويك

وبعدين انت مش ملاحظ حاجه
دايما وزراء الداخليه بيبقو محافظين سابقين لمحافظة اسيوط
ليه بقى؟؟؟

فكر كده وابقى قولي





سلامووووووووووز

SKOBL- Little Lazy Me يقول...

بص يا سوووو ..
من حسن حظ اللي بيشتموك انك كل ما بتتشتم أبقى عندي مشاكل بي سيهية و مش عارف أقعد خالص .. أصل من يوم ما جيت مصر و أهل مصر الكرام ابناء النظام و محرري الحاجة الساقعة من تحت سيطرة الكان علموني كل حاجة من أول يا كلب لحد يا ابن اللي بيه و عليه و اللي .. و انت عارف و دي ذخيرة حية في بعض ناس بتلاقي نفسك مضطر تتعامل بلغته و تديله كام كيلو شتايم كده يدلعوه ..
أنا أول مرة اسمع كلمة باوو دي و لذلك أنا استفدت معلوماتيا .. بص يا عم سوووو .. الكلام الاهبل ياما و ما يستاهلش تزعل عشانه يا عم .. افهم ، ده كل اللي همه انك جبت سيرة الشرطة .. مش فارقة معاه البنت اللي كانت رايحة في داهية لولا ربنا كرمها براجل - و سيبك بقى من كلامه لأن اللي زي ده كان ممكن يقوللهم أخمس معاكوا ولا ألم عليكوا الناس- .. ده ا،ا من يوم ما قريت الحكاية دي و أنا خايف على أختي الصغيرة .. احنا ما ننكرش ان لولا الشرطة ما كناس ننام فس أمان يس برضه لولا الشرطه ما كناش سمعنا عن اللي اتبهدلت كرامته في القسم و اللس اتعامل معاملة غسر ادمية و اللي و اللي .. و ما كانش حللي أول مرة فكرت أكتب مصر في اليو تيوب لقيت فضايحنا في الاقسام متسجلة و ملعلعة .. أيوه لازم يكون فيه الوحش لكن لو الوحش ده من الاول اتسك على قفاه و خد العقاب دوبل ولا تريبل ما كانش الوحش غطى على الحلو ..
أنا بقى مش عارف ايه دخل أمريكا و العراق و مش فاهم مغزى التشبيه غير انه عايز يقلنا ان نحن لدينا ملائكة لأنهم ما عملنولناش مقابر جماعية زي صدام .. كفاية بقى علينا لحد كده .. ليه كل ما نبص فوق تلوحوا رقبتنا تحت و تقولولنا شوفوا و شوفوا .. عاملين زي الطالب اللي طالع قبل الاخير و عمره ما بص للسبعين طالب اللي فوقه - و دي برضه من افرازات النظام - انما يبص للأخير و يقول أنا ميه ميه و كله تمام و اللي يبص فوق يقع على نفوخه يتفشفش ..
يا تقل دمك يا سوووو!! .. بص يا ابني انت فاكر النظرية النسبية .. هو قاس دمك لنفسه و هو ما عندوش دم فطلع دمك تقيل .. بس بصراحة لو تقل الدم كده فاني أدعو من هنا أن أكون " أبو دم تقيل "
شفت يا سوووو .. أدينا كمان اتقلت قيمتنا و بقينا مجموعة من المهيصاتيةو المجاملاتية .. يكونش الواد باوو ده فاكر انك بتجمعنا كا اخر شهر و تدينا عن كل رد المعلوم .. بس خد بالك أنا بعد كده حاتحاسب بالسطر لأني باسيب ردود طويلة شوية اتنين تلاتة ..
ما تهاجر يا سوووو .. يا ريت يا ابني ، و هو حد عارف يهاجر و لا ياخد فيزا ده احنا فضايحنا في السفارات زيها زي الاقيام كده - انجاز كمان للنظام- طب أنا عايز فييزا لبلاد الواقواق و أنا أهاجر علطول .. يا ابني ده احنا لا بقى عندنا اقتصاد و لا قوة عسكرية و لا ثقل سياسي و لا رياضه - أحمدك يا رب ع الميدالية البرونز دي لا كان عيالي يعايروني و يقولولي روح العب و انت من جيل الصفرين .. صفر المونديال و صفر بكين !- و كل اللي احنا فالحين بيه نقول حضارة 7000 سنة و النيل و عاش الجيل الصاعد عاش .. يا اخي انا مستعد أبدل الهرم بالواد الاسترالي اللي نط في الغطس و خد 112 .. بلا اهرامات بلا خيبة .. أ بقى قاعد باشحت و أقول جدي ال18 كان باشا ..
مصر تنضف مين يابا .. مصر بصراحة ما عادش ينفعها حموم .. احنا عايزين حد يخترعلنا جرثومة تقتل كل من جواه هبل و ميل الى التخلف الازلي و حتلاقي مصر زي الفل .. نسيت أقول و تقتل الناي اللي من نوعية الباوو
ياه .. ده النت في الساحل رخص كتير .. مش دي اس ال و تكنولوجيا يا سو .. تلاقيه لقاك حلو و مسمسم افتكرك سايح و قال يستغلك .. اه صحيح مش انت بتقول عشت فترة في السعودية .. احمد ربنا انها جت على قد كده .. يا ابني أنا مرة واحدة فكرت أروح أشوف الهرم اللي بيقولوا عليه دخلت سوبر ماركت لقيت واحدة بتسأل عن ازازة مياه ، الراجل قالها وان دولار و هي بجنيه و نص ايام ما الدولار كان داخل في سته جنيه .. ده احنا البلد الوحيدة اللي دليلها السياحي عبارة عن تسعيرة التاكسي و ان لو سواق تاكس غلى عليك تقوله " خدني على أقرب قسم" يروح جاي مديك هو فلوس! - ضفها بالله عليك لانجازات النظام- بلا خيبة .. معلش يا سوووو طولت عليك بس الموضوع جه في وقت أنا فيه متضايق من كل حاجة فقلت افش غلي مني الحكومة فيها

و لك كل التحيات

Soooo يقول...

سمر الشافعى

عارفه ياسمر .. انا قريت تعليقك بعد ما كتبتيه ببتاع خمس دقايق بس .. وقفت قدامه متنح مش عارف اقول ايه

ويمكن هو السبب اني لغاية دلوقتي ماردتش عالتعليقات اللي موجوده عالموضوع ده او على الموضوع اللي فات .. ومع ذلك رحت منزل موضوع جديد .. مع اني مش متعود انزل موضوع جديد غير لما ارد عالتعليقات القديمه

بس لما قعدت كده فكرت .. وطلعت بالاستنتاج ده
لو كل واحد مننا عرف انه مسيره في يوم هيموت .. يبقى لازم على قد مايقدر يخلي علاقته بالناس كويسه .. عشان ابسط حاجه .. يقرولنا الفاتحه ويدعولنا بالرحمه لما نموت .. لأننا هنبقى محتاجين قوي لده


وبجد بجد .. الف شكر على كلامك وربنا يارب يارب يسعدك ويكرمك ويبسطك ويرضيكي دنيا وآخره يارب




سلاموووووووووووز

Soooo يقول...

فاتيما

لا بقى
ده انا اشكرك واشكرك واشكرك كمان

اي نعم مافيش بين الاخوات تشكرات .. بس انا باشكرك برضه

سلميلي على ماما العزيزة وبوسيلي ايدها وقوليلها سوووو بيقولك كل سنه وانتي طيبه




سلاموووووووووز

Soooo يقول...

د/مروة المعداوى .....قباحة سابقا

يخرب بيت فقرك
دي مش حاجه وحشه .. بالعكس .. انا اقصد يخرب بيت اللي يزعلك
طب تصدقي وتؤمني بالله .. انا كنت عايز اتعرف عليكي لما رحت سنكريه عشان اشوفك انتي ولماضه بتتعاملو ازاي مع بعض
لأ وبجد بقى نفسي اشوفكم في المستشفى بتتعاملو ازاي
ده انتو تلاقيكم قالبينها مراجيح خالص

يلا بقى المرات الجايه ان شاء الله
وكل سنة وانتي طيبه




سلاموووووووووووز

Soooo يقول...

Eman Eltaher

ايمييييييييييييي
ليكي وحشه متوحشه بوحشنه وحشه قوي
ايه يابنتي اختفيتي كده ليه
قلقتيني عليكي يابنت منتقتي وكتاب الله

وربنا يسهلك كل أمر عسير وينورلك طريقك ويسعدك ويكرمك ويبسطك ويرضيكي دنيا وآخره يارب


ملحوظه
انا ياما اتشتمت لشخصي والتعليقات اللي باتشتم فيها باحذفها من سكات .. انما قلت اكسب ثواب في اللي علق ده وافهمو انه حافظ مش فاهم





سلامووووووووووز

Soooo يقول...

enjy

اللي زي ده مايتقاللوش اكتر من اللي اتقال
وفعلا والله ربنا يكون في عوننا
ده انا خايف على بنات اخويا من اللي جاي

ربنا يسترها

وانتي ازيك وكده وعامله ايه
لا ياشيخه
طب مش كنتي تقولي
طب فل فل فل




سلاموووووووووووز

Soooo يقول...

بيقولوا سايكو

؟؟؟
لو لسه فاكرك ؟؟؟
انتي بتهزري مش كده؟؟؟

معقول انساكي ياللي نفضتيلي وقولتي هتديني شوية روايات من اللي عندك وانا هاجبلك مجلد ميكي القديم؟؟؟

لأ طبعا ماينفعش انساكي

بس ايه مالك وايه اللي حصلك؟؟؟
في ايه يابنتي قلقتيني عليكي والله؟؟؟

وحاضر ياستي .. ان شاء الله جنب المذكرات هابقى انزل مواضيع وهراعي انها تكون قصيره نسبيا

ربنا يشفيكي وينورلك طريقك ويريح بالك ويسعدك ويكرمك ويبسطك ويرضيكي دنيا وآخره يارب



سلاموووووووووووز

Soooo يقول...

شفقة هانم واحسان بك

لأ بقى يا شفقه هانم
الساحل الشمالي مالوش اي ذنب
ده حتى الساحل ده من نتايج النظام
وصدقيني .. طول ما الواحد مؤمن بفكره وعايز يقولها .. هيقدر يقولها حتى لو كان هيقولها قدام فرعون نفسه

سعيد جدا اني اتعرفت على حضرتك وعلى الاستاذ احسان بيك في حفل التوقيع
وكان نفسي اننا نتكلم مع بعض لكن ان شاء الله ملحوقه



سلاموووووووووووز

Soooo يقول...

روز

والله ياروز انا فعلا دخلت على اول موضوع وكنت فاكر اني اعلق او ابعتلك ايميل اقولك فيه وجهة نظري
لكن لقيت الاغنية حلوه قوي لدرجة اني نسيت اعلق على الموضوع بتاع الواقع والخيال اللي كنتي قايلاه .. معلش بقى كبرنا وخرفنا

والحمدلله انك بقيتي على عالم بلوج سبوت عشان نعرف نعلق بروقان
وعقبال هيليوم هي كمان لما تعزل وتيجي على بلوج سبوت

سعيد جدا اني اتعرفت عليكي وكان نفسي تقعدو اكتر
لكن ان شاء الله الجايات اكتر من الرايحات





سلامووووووووووز

Soooo يقول...

Bannoura

يا بنورا انا والله ولا فارق معايا الباوو ده ولا اللي وراه ولا اي هسس من اللي هسهسه
انا بس قلت افضحه وافضح الهطل اللي قالو لأن اللي زي ده حافظ مش فاهم

وياستي انا عارف ان صحابي الجدعان قادرين يردو غيبتي زي ماحصل
بس انا ولا كبير ولا حاجه
انا مجرد واحد بيشخبط في اي كلام والسلام





سلامووووووووووز

Soooo يقول...

SKOBL- Little Lazy Me

بص بقى ياعم انت
انا مش هقدر اقول اي حاجه على تعليقك
لا استنى
اه
وحشتني ياعمنا
فينك وفين اراضيك ومختفي كده ليه

ربنا يطمننا عليك ونسمع عنك كل خير يارب




سلامووووووووووز

عايزه اتطلق و يقول...

هو موضوع الباووو او الباعوو ده حصل امتى هو انا مش دنيا المدونات ولا ايه بعدين هو اليى بيشتمك بتكتب فيه بوست طويا عريض كده طب مش كنت تعرفنى كنت سبقت الباعوو..بهزر الله الغنى عن دى بوستات..بس انا لو اعرف انه شتمك يا سووو عارف كنت هسكت علطول انا ناقصه يطول لسانه عليا انا كمان بعدين انا لادى منتوفة الجناح ..بس بتصيف فى الساحل ومقضيها بحر ليه تشغل بالك بالباعوو ياابنى احنا كده شعب مبنعرفش نفرح ولا نعيش لحظه حلوه لازم لازم ندخل الغم فى الموضوع طب كنت استنى لما تروح بيتكوا اديك غرمت تسعه جنيه ينفع كده الا قولى هو لسه الربع كيلو زلابيه فى مارينا بتلاته جنيه ولاا الزلابيه كمان غلية ..طمنى الهى يطمن قلبك ومتزعلش من الباعوو الباوو ده لو شتمك تانى محدش هيرد الا ابنى مش انا ..وكل رمضان وانتا طيب يا سووو والباووو الوحش ده لا لا ولا تزعل نفسك..