السبت، ١٩ جمادى الأولى ١٤٢٩ هـ

تاجين فـ البوست .. ينفع؟؟

بعد مادخلت عالم التدوين او العالم الافتراضي - قبل مايحصل تجمعات ويتحول لعالم واقعي - اتعرض علي كزا تاج عشان أجاوب عليهم .. وانا كنت حاسس ان معظم الناس بتحط في دماغها ان إجابتها لازم تكون منطقيه .. او بيراعو في الاجابات المثاليه الزايده
يمكن لرغبة معظم الناس انها تبان بالشكل اللي عايزه الناس تعرفها بيه .. صحيح مش كل الناس عملت كده لكن نسبه كبيره برضه
ولما كان حد بيقوللي انه بيباصيلي تاج وعايزني اجاوبه .. كنت بستغرب واقول تاج ايه .. ده انا مفضوح خلقه في المواضيع اللي باكتبها .. أو بمعنى تاني .. اتعريت قدام كل اللي بيقرالي ومابقاش في حاجه مستخبيه عشان يعرفوها عني
لغاية ماجالي تاج من مدونه جديده .. وأول مره تدخللي المدونه راحت هوووب .. حادفالي التاج في وشي .. وطلعت تجري ولا على بالها اللي هيحصل في لما اشوف التاج بتاعها .. المدونه دي هي
ست البيت
الحقيقه اول ماقريت اسئلة التاج لقيتها اسئلة سخنه بجد .. كل سؤال منهم عايزلو مواضيع الواحد يتكلم عنها .. منهم سؤال هو اللي حفزني اني اجاوبه .. وبالتالي قررت اني اغير وجهة نظري واجاوب عن التاج الساخن جدا جدا بتاع ست البيت .. وربنا يستر
-----
السؤال الأول : من أنت؟ وكنت تحب تكون حد غير نفسك؟
إجابة السؤال : أنا هتلاقوني في الموضوع
ده .. ولغاية فتره قريبه كنت اتمنى اكون أي حد غيري .. لكن دلوقتي انا باحمد ربنا اني زي مانا
-----
السؤال التاني : بتدون ليه - امتى - لمين وفين؟
إجابة السؤال : بدوّن عشان اقول اللي جوايا .. اللي حاسس بيه .. ولمزيد من التوضيح .. ارجو الذهاب للموضوع
ده
-----
السؤال التالت : منظر أو موقف مش قادر تنساه عمرك؟
إجابة السؤال : اكتر موقف فاكره زي مايكون امبارح .. لما كانت امي الله يرحمها عيانه .. وكان المرض تمكن منها قوي .. ومن كتر ماهي تعبانه وبتتألم كانت بتقوللي (شيل الوجع منني .. شيل الألم اللي جوايا) وانا واقف عاجز .. مش عارف اعمل اي حاجه غير اني ادعي ربنا انه يلطف بيها .. لأنها تعبت قوي وعارف انها مش هتخف وانها مجرد لحظات او ساعات أو ايام وتفارق الدنيا .. موقف حسسني بالعجز بجد .. حسيت اني عجوز فعلا .. عجوز وعندي تلاتين سنه
وهو ده السؤال اللي قررت اني اجاوب التاج عشانه .. عشان اوضح للناس ان العجز مش بالسن .. العجز باللي بنعيشه وبنشوفه في حياتنا .. وكمان عشان اقول لكل اللي امهاتهم عايشه وربنا يديهم الصحه وطولة العمر .. قومو فزو من عالنت وروحو بوسو ايد امهاتكم .. خدوهم بالحضن عافيه وغصب .. حتى لو كنتو متخانقين معاهم .. ابسط حاجه .. بصو في وشوشهم وابتسمو وافتكرو شكلهم واحفظوه في عقلكم وقلبكم
والله العظيم والله العظيم والله العظيم .. انا نفسي امي تطلع من القبر عشان ابوس ايدها .. واقولها سامحيني على كل حاجه عملتها وضايقتك
-----
السؤال الرابع : أمنية شبة مستحيلة نفسك تتحقق؟
إجابة السؤال : امتلك قطعة أرض .. وازرعها كل حاجه .. واربي فيها طيور وخرفان .. بس مش زي خرفان اابي .. لا خرفان بجد من اللي بتنونو .. واعيش فيها انا ومراتي وولادي .. ناكل من اللي بنزرعه بايدنا
-----
السؤال الخامس : تحب تكون مكان حد مشهور؟ مين؟ وحتعمل ايه وقتها؟
إجابة السؤال : احب اكون وزير الثقافه .. وانزل على المناطق الشعبيه ومعايا طلبة الكليات الفنيه واقولهم نضفوها .. وضبوها .. ازرعو في الناس البسيطه دي حب الجمال .. رجعو المناطق المصريه الشعبيه الاصيله دي للجمال اللي كانت عليه زمان قبل ما يجتاحنا طوفان اللامبالاه والتنفيض وتكبير الدماغ
-----
السؤال السادس : شايف مستقبلك إزاي ؟
إجابة السؤال : شايفني شخص بسيط .. عادي ييعني مش هخترع الذره .. ممكن ابقى سيناريست .. بس اعتقد ان الحاجات اللي هاكتبها مش هتاخد حقها في وقت مانا عايش .. ممكن بعد ما اموت يقولو كان في واحد اسمه سوووو .. كانت دماغه متاكله ومتمرد .. لكن كان عايز يقول حاجه
-----
السؤال السابع : تختار زوجتك على أي أساس؟ المال /الدين/الجمال/ المستوى الأجتماعي ؟
إجابة السؤال : الزواج هو مشروع بناء اسرة صالحه .. يبقى بالتالي اول حاجه هختارها في الزوجه انها تكون متدينه عشان تربي عيالي تربيه قوامها الدين الصحيح .. بعد كده لازم يكون المستوى الاجتماعي متقارب عشان يبقى في تواصل في الفكر وفي الحياه مع بعض .. بعد كده الجمال قبل المال
وعلى رأي المثل .. يا واخد القرد على مالو .. يروح المال ولازم تضرب القرد بالجزمه بعدها .. تفضل تضرب فيه تضرب فيه لغاية مايقولك جاي ويمشي بنفسه .. هتخليه جنبك بتاع ايه .. هتسرح بيه يعني
-----
السؤال التامن : امتى يكون الحب أعمى؟
إجابة السؤال : لما يكون حب صادق
-----
السؤال التاسع : شايف الدنيا إزاي؟
إجابة السؤال : شايف الدنيا فيها ناس بتحب الخير .. بس خايفين يقولو كده عشان الناس ممكن تستغلهم .. شايف الدنيا حلوة بس لو فهمنا انها مجرد ممر بنعديه ولازم نسيب عند الناس ذكرى حلوة يفتكرونا بيها ويترحمو علينا لما نموت
شايف الدنيا عامله زي ماتكون بيت من قزاز .. فاكرين نفسنا مستخبيين ومحميين والناس مش شايفانا .. مع ان اقل طوبه هتفتضحنا وتكشفنا .. وكأن القزاز كان مانع ان حد يشوفنا
-----
السؤال العاشر : صفة أو عمل جميل نفسك نشاركك فيه؟
إجابة السؤال : نفسي الناس تساعدني في اننا نرسم ابتسامه على وشوش بعض .. نضحك شويه .. نشيل الهم والنكد والغم حبه
---------
لحاد هنا خلص التاج
وبما انها ليلة تيجان .. قلت بالمره اجاوب التاج اللي جاني قبل كده من اربعه باحبهم قوي وباعزهم قوي قوي قوي قوي
.. والتاج بيقول
اذكر عشر حاجات عن نفسك
----
.. لا انا نبي ولا انا صعلوك
ولا هرضى اني اكون مملوك
-
.. فاكرني ناصح عامل فاهم
بس الحقيقه .. ساعات باتغاشم
-
.. دمي خفيف وجايبلي الكافيه
واستلم الناس قافيه فـ قافيه
-
.. ممثل فاشل في مسرح الدنيا
اتعصب بسرعه واهدى فـ ثانيه
-
.. كنت شايفني زمان فنان
بس الكلام ده .. كان زمان
-
.. طفل كبير وعقل مافيش
هاتجن في يوم زي الدراويش
-
.. اتحمق لصاحبي بسرعه رهيبه
واطلع غلطان .. بطريقه غريبه
-
.. اعز الاكل .. وواد ذواقه
مانا شاب بكرش وكللي رشاقه
-
.. احب الضحك واضحك غيري
وغيري يضحك .. على مناخيري
-
كان نفسي اقول عن نفسي كتير
بس بلاش اسراري تطير
-----
ملحوظه مهمة جدا
----------
اكتشفت اني باعمل زي باقي الناس .. وباراعي ان إجاباتي لازم تكون مثاليه
.. وعشان كده .. قررت اني مش هجاوب اي تاج تاني
ومعلش اعذروني
سوووو

هناك ١٠٥ تعليقات:

Mafrousa يقول...

هييييييه اول تعليق
التاجين احلى من بعض يا عم السيناريست
ان شاء الله تكون سيناريست كبير
بس ساعتها يارب تفتكرنا
ههههههههه
و بعدين ان كانت على وزارة الثقافه روح بسرعه سجل اسمك...المقعد حيبقى خالى

اجاباتك حلوه و باين عليها الصدق
ربنا يوفقك لما يحبه و يرضاه

Empress appy يقول...

عارف لما تقول ادخل الموضوع ده بتفكرنى بايه فى المدرسه لما يقولك الاجابه انظر من صفحه 13الى 15 هههههههههههههه
مالها بقى خرفانى آبى دى زى السكر وبتنطح خالص على فكرة دى حقيقه انا بموت فى الخرفان من ان ريحتها يععععععععععع

على فكرة يا سو التاجين انت مش جاوبت اجابه مثاليه انت قولت عن سووو اللى كل الناس عارفاه من المدونه واللى انا شخصيا وبتكلم بلسانى بس
عارفاه فى الحقيقه هى دى انت بالظبط
بس نسيت تقول انك حد حساس قوى لدرجه كبيرة وغير كده كمان دايما بتبان عاقل وبتقول للناس الكلام الصح يعنى النصيحه الصح على الرغم من انت ساعات بحسك مجروح من جواك ومش عارف تداوى نفسك
يالا فضايح بقى
تعيش وتفتكر ماما يا رب وربنا يرحمها
كفايه لولوك كده منى اصلى لو قعدت اقول اللى فيك من هنا لبكرة مش هيكفينى وانت عارف انك واد رشيق قوى ومش عاوزين تسييح هههههههههه
لا بجد ربنا يخليك لينا وفى وسطنا يا حلى اخ فى الدنيا

كاميليا بهاء الدين يقول...

-----
السؤال التامن : امتى يكون الحب أعمى؟
إجابة السؤال : لما يكون حب صادق
.............

تعرف ان الجملة دى اكتشاف؟؟

ربنا يحقق كل احلامك يارب
ويسعد قلبك

وتفضل دايما ابتسامة المدونات المشرق
وحكيمها كمان

انت طلعت حكيم فى افكارك

فى افكااااارك
مش حاجة تانية يا دكتور

D:

تحياتى واحترامى
لاخى العزيز

فاتيما يقول...

كدا يا سوووو؟؟
بقى خيخة و كامى و نيجرو بس اللى باصلوك التاج ؟؟
و أنا يا جرع ؟؟
دنا بعتاهولك من ييجى خمس بوستات و شوية وانت مطنش ....
مااااااااشى
مردودالك يا باشمهندس
و إنتظر الأنتقام الشنيع الفظيع المريع
و كالعادة إجاباتك متفردة و مختلفة عن أى حد بس عجبنى قوى موضوع الحب الأعمى الصادق دا أصل ناس كتير بتتصور إن الحب أعمى فعلاً مع إن عين المحب بتشوف فى حبيبها ما لا تراه العيون الآخرى و بتحب بدون غرض أو لسبب معين
و ربنا يعلى منزلة الوالدة فى الجنة كمان و كمان على قدر الدعاء و بر الأبن الجميل اللى زيك
و ربنا يحسن سيرتنا فى الدنيا عشان نمشى منها من غير ندم ...
تحياتى يا اخويا الغالى
يا عجوز و قلبك كله شباب

يوميات فنانه مفروسه جداا يقول...

بسم الله ما شاء الله
ايه يا عم ده

دانا اكون سايبه التعليقات 59أتلفت بس ألاقيها75

أكون لسه قافله الكومبيوتر وقايمه وأفتكتر حاجه أفتحه واتورب بس الاقي بوست جديد

هوا فيه ايه يا عم الحج انت حرام عليك عقدتني.

وبعدين مين قالك اني مكنتش هاجي حفلة التوقيع عشان امتحانات وزفت يا بني اليوم الحلو ميطعوضش وبعدين المذاكره مش مقطعا بعضها يعني.

كفايه ار ندخل في التاج

تعرف انا قمت ادور علي ماما عشان ابوس ايدها لاقيتها نزلت الشغل ههههههههههه اه والله.
أن شاء الله اما تكون وزير ثقافه أنا معاك ماشي انا فنون وهبقي مع العيال اللي انت هتقولهم وضبوها وننتطلق مثل الجراد أنا مش هطلب الطلب ده تاني ماشي هي مره واحده يعني اما تعمل مشروع وعايز شباب خريجين عوطليه امثالي ابقا ابعتلي ok
نيجي لست الحسن اللي هتختارها ان شاء الله تبقي كويسه كده ومتدينه وترضي يعني عندك تلاتين سنه يعني عجوووز وبيتأمر
وأكتر حاجه صح بقي هي الحب الصادق المعمي ده
أنا مجربتوش بس حسيت الكلمه قوي
بجد تاجين مالهومش حل يا عمو سو والله وبجد بقي تسلم عليهم
سلام

أبو خالد يقول...

سيبك يا أحمد بلا تاج بلا صولجان
أجمل لحظات العمر عندما كنت جالسا بجوارى أتمنى لك مستقبل باهر
أبنى الحبيب شكرا على هذا اليوم الجميل

هناء يقول...

ان شاء الله تنول الي في بالك يا رب

رئـــــيسـة حزب الأحلام يقول...

هههههههههههههههههههه
تاجين حلوين اوى وبيعبروا عن شخصيتك المرحة ربنا يوفقك
واتشرفت جدا بمعرفه حضرتك
تحياتى لك

قوس قزح يقول...

ربنا يرحمها يارب
ادعى لولدتك كتير ده الاهم اكتر من انها تسامحك
و حلم البيت جميل اوى ربنا يحقق احلامك

اما عن العشر صفات فانت فظيع فى وصفك لنفسك
بجد وصفت نفسك بطريقة جميلة و صادقة و بخفة دم

انا شايفة انك مجاوب عادى لا بمثالية ولا حاجة خصوصا التاج التانى
هو ليه اسمه تاج صحيح ؟ مفروض كان يبقى اسمه كرسى الاعتراف :$

همس الاحباب يقول...

اخى العزيز / سووووووو
مع انى معرفتى بك منذ فترة بسيطة
لكن بحس انى اعرفك منذ دهر فانت انسان بسيط وتلقائى ومحب للاخرين وعلى طبيعتك بدون رتوش ولا اقنعة
وملاحظ ان اجاباتك عادية بل اقل من حقك بكثير وهذا نبل منك
واجابات على التاجين جميلة جدا وعجبتنى هذه الاجابات قوى قوى
اكتر موقف فاكره زي مايكون امبارح .. لما كانت امي الله يرحمها عيانه .. وكان المرض تمكن منها قوي .. ومن كتر ماهي تعبانه وبتتألم كانت بتقوللي (شيل الوجع منني .. شيل الألم اللي جوايا) وانا واقف عاجز .. مش عارف اعمل اي حاجه غير اني ادعي ربنا انه يلطف بيها .. لأنها تعبت قوي وعارف انها مش هتخف وانها مجرد لحظات او ساعات أو ايام وتفارق الدنيا .. موقف حسسني بالعجز بجد .. حسيت اني عجوز فعلا .. عجوز وعندي تلاتين سنه
ربنا يرحمها ويدخلها فسيح جناته وانت ادعيلها وتصدق على روحها واكيد هى مسامحك وتعيش وتفتكر .
امتلك قطعة أرض .. وازرعها كل حاجه .. واربي فيها طيور وخرفان .. بس مش زي خرفان اابي .. لا خرفان بجد من اللي بتنونو .. واعيش فيها انا ومراتي وولادي .. ناكل من اللي بنزرعه بايدنا
دى امنية جميلة قوى ويا رب تحققها وربنا يسعدك
اما التاج التانى كله خفة دم وتعريف جميل قوى قوى بنفسك
تحياتى وتقديرى
اه على فكرة هو عنوان مدونتى صعب قوى مع انى ساكن وسط المدونات جنب العشوائيات هههههههههه
سلامووووز

غير معرف يقول...

أثرت فيا يا سوووو
تصدق بأه
والاجابات كانت في الجون في الجون يعني
وبالنسبة للسيناريست انا قلت كده ف عقل بالي،، شفت عقل بالي دي؟
قلت يا بت يا مها سوووو ده ينفع بتاع سيناريو تمام يعني
ححححححححححححححح
بس سيبك انت كله كوم ووزارة الثقافة دي كوم تالت

إيمان يقول...

تعرف بقى يا سووو ...إن كل إجابة من إجاباتك عايزا تعليق لوحده

بس بجد إجابات صادقة وتلقائية...وربنا يقدرك على إسعاد الناس ومساعدتهم...
عرفت من كلامك إنك مريت بتجارب كتير خلتك تحس كأنك عجوز وعنده ثلاتين زى ما تقول....بس بالعكس دى اللى خليتك حاسس بغيرك وبتحب تساعد ...ربنا يناولك اللى فيه الخير....المزرعة والزوجة المتدينة والعيال ويكونوا دستة ودمهم خفيف زيك...وتكون كاتب سينارست كبير........ونقول والله كنا بنعلق عنده فى المدونة ويرد علينا...لأن بعد كده أكيد مشاغلك هتكتر,,,ويادوب تشوف أسامى الناس اللى بتعلق

تحياتى وتقديرى

حمادة زيدان يقول...

سوووووووووووو
والله ليك وحشة
أنا أسف اني مش بدخل كتير ... وده طبعا تقصير سوري فيه
التاج إجابته منطقية وجميلة
وفكرتني بحجات كتير موجدة فيا
تسلم يا زعيم

بنوته مصرية يقول...

ازيك يا سووو

اجابتك في التاجين

الحلم بتاع البيت وانك تاكل من اللي بتزرعه الحلم ده بحلم بيه انا وزوجي
ويارب يتحقق لينا وليك

تانيحاجه انت مش مجمل نفسك ولا حاجه هو ده سووو اللي عرفته ويمكن فيه حاجات كتيرة جميلة انتي متكلمتش عنها
الاخ اللي بجد وخوفك علينا وطيبتك ووشك البشوش وضحكتك الجميلة حتي لو مضايق

حاجات كتيرة متكلمتش عنها بس بما ان الناس شافتك عرفتها

ربنا يحميك ويحفظك وتحقق كل حلمك
وربنا يحرم الست الولده ويدخلها فسيح جناته آآآمين

تحياتي لك

رندا يقول...

سووووووو

ياااااااة ليك اراء رائعة بجد
واسلوبك جميل فى التعبير عنها
احيانا يكون فى عقلنا الكثير ولكن ان نعبر بيها زيك لا صعب قوى
وبالذات بقى البوستات الى فتحها
اركب الحنطور درجن درجن هههههه
وكان من 2007 ياخبر تعبيرك اخاذ بجد
وبجد صراحتك جميلة فى وصفك لنفسك
شخص بسيط جدا لة حكمة فى حياتة يعيش من اجلها انت صاحب قضية يامعلم
اشكر كل من اعطاك التاج لكى نقرا عنك الكثير والكثير
ورحم الله والدتك وادخلها فى اعلى مكان فى الجنة

تحيات كبيرات قوى

رندا

Unknown يقول...

يا سووو يا جااااامد
لا والله الاجابات جامده بجد
ضحكتني ووجعتنى واديتني امل
عملت كوكتيل يعني
وايه بقى التهديد اللي في الاخر ده
يعني ايه اي تاج بعد كده مش هتجاوب عليه
طيب اول تاج هيوصلني همررهولك
واياك يا واد يا عجوز متجاوبش عليه
هحرمك من وجبه الغدا

الـجـدة فـصـيـحـة يقول...

السلام عليكم ورحمة الله وبركاته

إجاباتك بجد جميلة جدًا
خصوصا جزئية الكلام عن مامتك رحمها الله
وفعلا العجز ليس بالسن أبدًا

وكمان السال بتاع التاج التاني واجابتك بالشكل ده جميلة



تحياتي

عبده الرايق يقول...

ههههههههههه
فضيحه من العيار التقيل
مهندس ومش عارف صوت الخرفان
سووووووووو يا بيبول بيقول الخرفان بتنونو
هههههههههههههه
صوت الخرفان صهيل يا باشا
وزى ما الشاعر الكبير عبده الرايق قال

صهل الخروف قمت اشوف ليه الخروف بيصهل
لقيت الخروف واقف مكسوف لانه كان بيسهل

ابو العربى يقول...

تقبل تحياتى واحتراماتى
الهم ارحم والدتك وادخلها فسيح جناتك امين يارب العالمين
مخوضوع وزير ثقافه دى بلاش منها احسن
وبجد رائع قوى شعرك وتوصيفك لنفسك بالقافيه الرائعه دى احسن يكون مش شعرك بس خلاص اهى طلعت منى ومش هرجع فى كلامى
تحياتى
ابوالعربى

الـسـيـدة نـون يقول...

التاج بتاع ست البيت ده
اتبعتلى انا كمان بس من حد تانى
السؤال اللى استفزك وخلاك تجاوب على التاج
هو نفس السؤال اللى مخلينى مش عايزة اجاوب على التاج
اصل برضه الموقف اللى اترضتله كان موقف منيل بنيلة وماحبش انه يتكرر


بالنسبى بقى لاجابتك على التاج التانى اللى انا بعتهولك
اجابتك عليه ولا اروع

تحياتى يا واد يا سوووو

هاموت واعرف الاوضة المقفولة دى فيها ايه

وعايزة اعرف حكاية دراكولا

تحياتى ليك
اختك خيخة

Rehab Mostafa يقول...

علشان كده مش بترضى تجاوب التاجات :)
بس بجد بجد بجد من غير مجاملات يعني .. أنا عارفه انك مش بتكتب اجالات مثاليه وعارفه ان الاجابات دي بمنتهى الصدق منك
والسؤال اللي خلاك تجاوب التاج بجد أثر فيا أوي
والتاج التاني جامد جداً يا سوووو :))

PrInCeSS BeRy يقول...

ازيك يا سو اشكرك اولا على زيارتك مدونتى وبجد ميرسى على النصيحة وان شاء الله اتعلم منك واما بالنسبة لمدونتك مش معقول اقدر اقيمها لانى حاجة نونو اوى انى اقول راييى بس انا هتعلم منك

رحــــيـل يقول...

سووووو
فعلا الحب بيكون اعمى لما يكون صادق
مش بنشوف غيره
ربنا يرحم والدتك ويجعلها من اهل الجنه ان شاء الله

على فكره اجاباتك بجد جميله جدا محستهاش يعنى مثاليه او مرسومه بالعكس حسيتك كده بتفضفض كانك مع نفسك
عادى عادى ولا كأننا هنا متاخدش فى بالك

ربنا يكرمك يارب ويحققلك كل اللى بتتمناه دايما

تحياتى وتقديرى

Soooo يقول...

واحدة مفروسة

لو كنت فعلا باتغر ولا حاجه .. ماكنتش اقعد افطر مع الصنايعيه في وسط الشغل واهزر معاهم مع مراعاة الحدود طبعا

بس صدقيني لو ربنا رايدلي حاجه في السكه دي .. ماعتقدش اني هتغر على ناس وقفو جنبي وساندوني حتى ولو كان بمجرد تعليق او دعوة

وماعتقدش ان كرسي وزير الثقافه اللي كنت باتكلم عنه هو نفس الكرسي في الوقت الحالي .. يمكن وزير الثقافه في عهد نظام حاكم آخر غير النظام المبارك اللي احنا فيه

وربنا يكرمك ويسعدك ويوفقك ويرضيكي دنيا وآخره يارب




سلاموووووووووز

Soooo يقول...

appy

بس بذمتك حركة في الجون ولا لا الحركة بتاعة انظر صفحة كزا
افتكرت الجغرافيا لما كانو يوقولولنا انظر الخريطه صفحة 123 واحنا نكون في صفحة تسعه مثلا

وبعدين خرفان ايه اللي بتحبيها؟؟
اما انك بتنجاني صحيح

ربنا يكرمك ويوفقك ويسعدك يا احلى اخت بتنجاني في الدنيا



سلاموووووووز

Soooo يقول...

كاميليا

والله يا كاميللو ياختي هو من ناحية الاكتشافات فأنا عبقرينو القرن السبعه وعشرين يعني
بس كنت باداري نفسي عشان العين

ربنا يسعدك يا كاميللو ويكرمك ويوفقك ويباركلك دنيا وآخره يارب



سلامووووووووز

Soooo يقول...

فاتيما

طب بصي كده كويس هتلاقي اسمك موجود وسط الناس
ولا انا يعني هكون باكذب
يمكن اكون باكذب
ماداهيه اكون باكذب

جل من لايسهو يا ام يوسف .. معلش كنت ناسي بس بمجرد ما افتكرت والله رحت حاطط اسمك .. ده انتي اختي الكبيره يام يوسف
اي نعم مش كبيره قوي .. واللي يشوفك يقول انك اصغر مني اصلا
بس اختي برضه

وربنا يكرمك ويسعدك ويوفقك ويرضيكي دنيا وآخره يارب

سلامي لماما العزيزة وبوسيهالي من هنا ومن هنا



سلاموووووووووز

Soooo يقول...

يوميات فنانه مفروسه جداا

خبر ايه يا ياسمين
خبر ايه
انتي سايبه مذاكرتك وجايه تقري هنا

طب يلا من هنا
هنرش ميه


وياستي ماتقلقيش .. ان شاء الله المدونين هيتجمعو تاني وتالت ورابع وان شاء الله تيجي وتفرحي معانا كلنا
وبالنسبه للشغل .. اتجدعني انتي وخلصي كليتك وان شاء الله شغلك موجود .. لما امسك وزارة الثقافه يعني

ربنا يوفقك وينجحلك مقاصدك ويكرمك ويرضيكي دنيا وآخره يارب


سلاموووووووووز

Soooo يقول...

أبو خالد

بابا العزيز
اجمل لحظات عمري لما كنت حضرتك بتكلمني وبتحكيلي عن ايام شبابك .. كنت حاسس ابويا بيصاحبني وبيحكيلي اللي ماعرفهوش عنه
بجد والله العظيم .. باحبك وباعزك وباحترمك قوي قوي قوي

ربنا يارب يسعدك ويبسطك ويرضيك دنيا وآخره يارب



سلاموووووووووز

Soooo يقول...

هناء

من اجمل مميزات المدونات .. اني الاقي ناس باعزها وباحبها وباحترمها في اخر بلاد الدنيا .. وانهم يتمنولي الخير

ربنا يكرمك يا هناء ويسعدك ويوفقك ويبسطك ويرضيكي دنيا وآخره يارب




سلاموووووووز

Soooo يقول...

رئـــــيسـة حزب الأحلام

لا استني بقى
معلش يعني بس ايه حضرتك دي؟؟؟
لا
الله يكرمك ماتحسسينيش اني عندي تلاتين سنه قاف ميم

بلاش حضرتك دي عشان بتكبرني قوي .. وانا لسه شباب .. اي نعم اقرع وبكرش .. بس لسه شباب يعني

وانا اللي سعيد اني اتعرفت على انسانه محترمه زيك ياستي

ربنا يكرمك ويسعدك ويبسطك ويرضيكي دنيا وآخره يارب




سلاموووووووووز

Soooo يقول...

قوس قزح

ربنا يكرمك يارب
وربنا يرحم موتانا وموتى المسلمين ويجمعنا بهم في جنة الفردوس الاعلى وفي صحبة سيدنا محمد عليه الصلاة والسلام يارب

ملحوظه
خطوبة نور من نور بااااااااطل .. طب الناس هتعرف تفرق مابينهم ازاي يعني؟؟؟

ربنا يخليلك نور باشا منافسي ويكرمك فيه ويباركلو فيكي يارب



سلاموووووووووز

Soooo يقول...

همس الاحباب

خالد باشا

ياعم اخجلتم تواضعنا والله بكلامك الجميل ده

ربنا يباركلك ويكرمك ويسعدك ويوفقك ويبسطك دنيا وآخره يارب

سلامي لهمس بنت اخويا



سلاموووووووووز

Soooo يقول...

maha miho

ربنا يكرمك يارب
وتصدقي انا برضه في عقل بالي قلت انك بنت زي العسل والله

ملحوظه
هو انتي في حد دلق على قفاكي ميه ساقعه عشان حححححححححححححح


ربنا يكرمك ويسعدك ويبسطك ويوفقك دنيا وآخره يارب



سلامووووووووووز

بنت مصريه يقول...

بجد يا سوووو
الله عليك انت
انسان رقيق قوى
وحساس جدا
ويارب يرحم والدتك يا رب وموتى المسلمين اجمعين
ويرزقها الجنه بأذن الله
وايه يا عم المواهب المدفونه دى بجد كلمات جميله
بوست حلو قوى واتمنى تنورنى دايما زى زمان
سلامووووووز

Soooo يقول...

إيمان

ربنا يكرمك يارب

ولا تقلقي ياستي .. لو ربنا اراد وبقيت سيناريست مش هقدر انسى الناس اللي شجعتني من غير ماتعرفني واتمنتلي الخير من قلبها

وربنا يارب يكرمك ويسعدك ويوفقك ويرضيكي دنيا وآخره يارب



سلامووووووووز

Soooo يقول...

حمادة زيدان

حماده باشا
ولا يهمك ياحماده .. وربنا يكون في عونك وتظهر للحياه تاني بعد الاختفاء الرهيب ده

وياعزيزي كلنا لصوص .. قصدي كلنا جروح


تسلملي ياحماده وربنا يكرمك ويباركلك ويوفقك ويسعدك دنيا وآخره يارب



سلاموووووووووز

Soooo يقول...

بنوته مصرية

ربنا يكرمك يا حماتي العزيزه يارب

وبما ان حلم الارض الزراعيه حلم مشترك .. يبقى احنا نشتري ارض انتو وانا .. واهو بالمره بنتك ماتبعدش عنك ويبقى بينها وبينك ترعه

وياستي اخجلتم تواضعنا والله
ربنا يكرمك ويسعدك ويباركلك ويوفقك دنيا وآخره يارب

سلامي لخطيبتي



سلاموووووووووووز

Soooo يقول...

رندا

لااا
انا كده هتغر قوي يا رندا
انا مش حمل الكلام الجميل ده كللو والله
ياستي انا اقل وابسط من كل ده والله

وربنا يرحم موتانا وموتى المسلمين يارب ويجمعنا بهم في جنة الفردوس الاعلى وفي صحبة سيدنا محمد عليه الصلاة والسلام


ربنا يكرمك ويسعدك ويبسطك ويرضيكي دنيا وآخره يارب




سلاموووووووووز

Soooo يقول...

لماضة

طب الحمدلله اني اديتك امل في الاخر
وربنا يكرمك ويبسطك ويسعدك ويوفقك يا اعسل اخت صغنونه ولمضه في الدنيا

ملحوظه
انا عامل رجيم .. يعني برضه مش هجاوب على اي تاج تاني



سلاموووووووووز

Soooo يقول...

الجدة فصيحة

تصدقي اني ماشفتش ولا جده من جداتي وانا صغير
بس الحمدلله ان ربنا عوضني بجده زيك بتتابعني وبتاخد بالها مني ومن اللي باقوله

وربنا يرحم موتانا وموتى المسلمين يارب

وربنا يكرمك ويسعدك ويبسطك ويرضيكي دنيا وآخره يارب



سلاموووووووز

Soooo يقول...

عبده الرايق

تصدق انا اللي هكهربك بقى يارايق
يعني اول مره تيجيلي وبتكدبني وبتغالطني في معلوماتي الهندسيه

وبعدين انا مش غلطان .. راجع مادة الهندسه الوصفيه قسم الاصوات الحيوانيه باب الخرفان
هتلاقي معادلة فيثاغورث لما لقى خروف وقع عليه من الشجره وقال قانون النسبيه وساعتها لقى الخروف بينونو

دي معلومات مصدقه من المخابرات الامريكيه ياباشا مش اي حد

وبعدين اصلا اصلا اصلا .. الصهيل ده مش صوت الخروف
ولو روحت اي غيط وسألت اي فلاح هيقولك ان الصهيل ده صوت شجر المانجه العويسي

وعلى رأي الشاعر الكبير احمد سوووو

رحت الغيط لقيت شجر المانجه العويسي بيصهل
سألت ليه قالولي روح عنده ياحلو واسأل


ربنا يسعدك ويكرمك يارايق ويبسطك ويروق بالك دنيا وآخره يارب



سلاموووووووز

Soooo يقول...

ضد الظلم

ياه عليك يابو العربي
انت ياجدع بتختفي كده ليه

وربنا يكرمك ياسيدي ويسعدك ويبسطك ويوفقك دنيا وآخره يارب

ملحوظه
الشعر ده كلامي وكتاب الله .. وروح عالبروفيل بتاعي عالفيس بوك هتلاقيني كاتبه


سلاموووووووز

Soooo يقول...

بت خيخة وأى كلام

لو موقف زي بتاع العشرين جنيه ماتقوليش .. احنا ماصدقنا الحياه هديت شويه

وربنا يكرمك ويسعدك ويبسطك ويوفقك دنيا وآخره يارب

اسكتي .. مش البنت نور عيانه وخيخه تعبانه و....



سلامووووووووووز

Soooo يقول...

Rehab Mostafa

ايوان .. عشان كده ماكنتش باجاوب على اي تاج
وصدقيني انا لما باقرى الموضوع ده دلوقتي بالاقيني الى حد ما برضه كنت بجمل نفسي وباقول اجابات مثاليه

وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه الصلاة والسلام يارب

ربنا يكرمك ويسعدك ويوفقك ويبسطك ويرضيكي دنيا وآخره

وماتبقيش تغيبي كده تاني




سلاموووووووووووز

Soooo يقول...

PrInCeSS BeRy

؟؟؟
بتشكريني على ايه يابنتي
انا لو ماكنتش حاسس ان كلامك في حاله حلوة ماكنتش هتكلم ولا هعلق عندك
وبعدين ياستي كلنا نونو
وكلنا بنساعد بعض
وصدقيني .. كلنا بنتعلم من بعض

ربنا يوفقك ويكرمك ويسعدك دنيا وآخره يارب



سلاموووووووووز

Soooo يقول...

ra7eel

دخلتك في الكلام مش حلوة ياساره

وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه الصلاة والسلام

----
ولازم نفضفض مع نفنسا ونتكلم ونشارك الناس همومنا وحيرتنا

ربنا يسعد قلبك ويريح بالك ويبسطك ويكرمك ويوفقك ويرضيكي دنيا وآخره يارب

ملحوظه
بابقى سعيد جدا انك بتعلقي عندي دايما والله .. وبافكر اجبلك كرسي ولا كنبه اسطنبولي .. قلتي ايه؟؟



سلاموووووووووز

Soooo يقول...

بنت مصريه

يالهوي .. ده انا لسه راجع من عندك اهو ومن غير ماتقولي ولا حاجه

اهو انتو كده يابنات حوا
يبقى الواحد لسه يادوبك معلق عندكم وبرضه تقولو مش عارف ايه


ربنا يكرمك ويسعدك ويوفقك ويرضيكي دنيا وآخره يارب



سلامووووووووز

WhItE HeArT يقول...

اجابات مميزة احييك عليها بجد

سنووايت يقول...

أجمل حاجة في التاجين كلامك عن والدتك رحمها الله وغفر لها
وموضوع المثالية الزايدة طبيعي اي حد هيتكلم عن نفسه هيحاول يقول احسن حاجات فيه بس المهم انها ما تكونش حاجات مش حقيقية

يارب تبقي وزير ثقافة يارب

سمية يقول...

اسطورة

بجد اسطورة يا سووووووو

بس يا رب تفضل كدة على حالك و متتغيرش بعد ما تتجوز و المسءوليات تتراكم عليك ولو ان معتقدش ان الموضوع ده هيغيرك لانك اولريدى شوفت كتير و عافرت مع الدنيا كتير

انا معاك فى انك جاوبت شوية اجابات مثالية و لكن ده حصل فى نوعية معينة من الاسئلة .. اللى هيا بتتضمن حاجات مستقبلية و احلام و طموحات

و انا شايفة انه مش عيب ان الواحد يتمنى و يحلم بالحاجة المثالية

فمن قنع بالدون لا يصل الا للدون
ومن طلب العلا علا

بجد التاج ده خيش فى دماغى اوى

سلام
فتكتك بتصبح عليك

المـــفـــــــقــــــــوعـــــة مــرارتـهــا يقول...

ربنا يحققلك كل اللي تتمناه ويبقي عندك مزرعة ومعاها زوجة طيبة تسعدك وفوقيها شوية كتاكيت تلعب معاهم

تحياتي لشخصك الطيب

دكتور كسلان يقول...

ازيك يا سوووو

كلامك جميل ومعقول
مقدرش اقول حاجة عنه

ربنا يغفر لوالدتك ويرحمها
ويدخلها فسيح جناته
وان شاء الله تمون بن بار ليها فى وفاتها
زى ما كنت بار ليها فى حياتها

اجاباتك كلها جميلة ومش مثالية ولا حاجة
بس اكتر اجابة عجبتنى
هى طريقة اختيار الزوجة
ربنا يكتبلك السعادة
وان شاء الله تحقق كل احلامك

ما تنساش تدعيللى بالزوجة الصالحة

سلاااااااااااااااااااااااااااااااااااااااااااااااااااااااااااام

اهو ده عيبه يقول...

يا عم سوووو
بادئ ذى بدء احب اعبر عن خالص سعادتى انى شفت طلعه حضرتك البهية وقابلتك ودى حاجه بجد اسعدتنى وارجو انها تكون اسعدتك برضه والا مش هيحصل طيب :)

تانى حاجه اجاباتك على التاج عبرت عنك مش مجرد اجابات منطقيه وبعدين كل تاج وانت طيب وبعوده الايام يعنى

وبعدين يا سيدى انت طلعت شخصية لذيذه فى الواقع زى ما انت فى المدونة يعنى مفيش اختلاف وده فى حد ذاته شئ جميل

انا بس حبيت اقولك انى سعيده بلقائك جدا ويارب تفضل ما بينا الاخوة والصداقه والسندوتشات

مع تحيات راجى عفو الخلاق الاسطى داليا الحلاق

Dr. Ibrahim يقول...

اولا يا عم سووو انت دخلت فى موضوع تانى خالص

انا عارف انت تقصد غيه من العبارة انك تشيل التهمة عنك ماشى

بس تذكر العبارة صح بن يعقوب

مش يعقوب وانا مش اقصد التعصب ولا حاجة ولا اى حاجة من دى خالص اظاهر ان انت مش فهمت انا قصدى غيه

وما علينا ...

انت ليك عندى تاج وانا مقرر االإهداء ليك ومش هيحتاج إجابات واحدة ولا حاجة دا تاج عن احلامك وطبعاً محدش هيحلم زى التانى

د/هيما

ومترفضوش والله ما هو راجع

Miss. Sosa يقول...

تصفير حااااااااااااد

اجابات هايلة بصراحة وانا كمان مابحبش اجاوب التاجات علشان بحس فيها مثالية مبالغ فيها وزي ماقولت انت بوستاتك فعليا بتعبر عنك بقوة
علشان كدا لماا جالي تاج قلبته في الخلاط وجاوبت اجابات هستيرية تدخل السراية الصفرا
وبصراحة انا شيفاك شخصية واضحة بتعبر عن نفسها بمنتهي الشفافية بدون تكلف او تمثيل

والله يرحم والدتك ويدخلها فسيح جناته ويرزقك بالزوجة والذرية الصالحة

""""" يقول...

اولا انا سعيده فعلا انى دخلت على مدونة حضرتك

انا عملت فيها جوله وفعلا بوستاتك بتعبر عنك

بس على فكره مهما الانسان حاول يظهر المثاليه فى ردوده فهى مش اكتر من انها المثاليه من وجهة نظره هو

المثاليه انت ممكن تشوفها فى شئ وغيرك يشوفها فى شئ تانى

لان حتى المثاليه صدقنى شئ نسبى
يعنى برضه بتعبر عنك وعن اراءك ووجهات نظرك البحته

يعنى ممكن نقول انها بتعبر عن شخصياتنا اللى نحب نكون عليها واللى غالبا بنسعى للوصول اليها وده مش عيب

عموما كنت عايزه اسال حضرتك لانى جديده هنا فى عالم المدونات
فى حد قالى اهديتك تاج بس انا مفهمتش اهدانى اذاى
يعنى انتوا بتوصلكوا الاسئله اذاى انا مش فاهمه
اعذرونى لسه جديده

يوميات فنانه مفروسه جداا يقول...

يعني أنا اعطل نفسي وأسيب مذاكرتي وتقولي هنرش ميه !!!!!!!!!!!!!!!!!

THANK YOU SOOOOO SO MUCH

Asmaa mahaba يقول...

رحم الله والدتك وادخلها فسيح جناته وجمعكما على خير فى الجنه باذن الله تعالى
حلو قوى الشعر دا لا انا نبى ولا صعلوك لالا جامده زحيح يعنى
انا خلصت امتحانات وحفاضلكم
تحياتى ليك سومه_87

الساحرة يقول...

طيب لما ابقي التعليق59



اقول ايه خلصوة كل الكلام


اقولك التاج الاول اجاباتك هايله

واجمل ما فيها كلامك عن والدتك

ربنا يرحمها

وكمان امتي يكون الحب اعمي

اجابتك في الجون يعني خدت الكاس

ههههههههه بعينك الزمالك خدة خلاص

التاج التاني اجابته غيرتقليديه

من الاخرالتاجين احلي من بعض

Soooo يقول...

WhItE HeArT

الف شكر واهلا بيك في مدونتي المتواضعه واتمنى انك تعتبرها زي مدونتك وتنورني دايما

وربنا يكرمك ويسعدك ويبسطك دنيا وآخره يارب



سلامووووووووووز

Soooo يقول...

سنووايت

اهلا بيكي في مدونتي واتمنى انك تعتبريها زي مدونتك وتشرفيني دايما بتعليقاتك

وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه افضل صلاة واتم تسليم

ملحوظه
المشكله مش في ان الواحد بيبن احسن مافيه .. المشكله اننا بنبين نفسنا خاليين من العيوب

وربنا يكرمك ويسعدك ويبسطك دنيا وآخره يارب



سلاموووووووووز

Soooo يقول...

سمية

ياستي ولا اسطورة ولا بتاع
وماتنفخيش في قوي كده لاحسن اتغر وانا لما باتغر باكل اي حاجه قدامي

وربنا يكرمك ويسعدك ويبسطك ويرضيكي دنيا وآخره يارب

وبوسيلي فتكات وقوليلها خطيبك بيقولك
ختىهعخلاىلةعغبغف6ل67 عهالهعابعهالضصثق



سلاموووووووووز

Soooo يقول...

المـــفـــــــقــــــــوعـــــة مــرارتـهــا

سوسو هانم عندنا .. يامرحبا يامرحبا

وربنا يكرمك ويسعدك ويوفقك ويرضيكي دنيا وآخره يارب



سلاموووووووووز

Soooo يقول...

دكتور كسلان

يارب يخليك يارب
وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه الصلاة والسلام

وربنا يسعدك ويكرمك ويبسطك ويحققلك كل امانيك يادكتره .. زوجه وبيت وعربيه وصاروخ وشاليه في مارينا و .. وكل اللي في نفسك يارب



سلاموووووووووز

Soooo يقول...

اهو ده عيبه

ربنا يخليكي ياداليا يارب

ويافندم انا اللي سعيد اني اتعرفت عليكي والله وكان نفسي انتي وشيمو تيجو معانا عالبورصه وتقعدو مع الناس الحلوة اللي كانت موجوده
لكن ان شاء الله ملحوقه .. وهنجيلكم بور سعيد في الكتاب القادم وعايزين بقى نشوف الشغل العالي .. مش سندوتشات .. لا .. عايزين نروح معمل البرج

وربنا يسعدك ويبسطك ويكرمك ويرضيكي دنيا وآخره يارب



سلاموووووووووز

Soooo يقول...

Dr-hema

وبعدين ياهيما
ياعمنا قلتلك حصل خير ولو انا غلطان حقك علي والمسامح كريم

بس ايه ده .. تاج تاني؟؟؟
يعني انا ياهيما طلع عيني في التاج ده .. تقوم انت تقولي تاج تاني
جاااااااااي منكم

وربنا يسعدك ويكرمك ويبسطك ويرضيك دنيا وآخره يارب



سلامووووووووووز

Soooo يقول...

Miss. Sosa

ربنا يخليكي ياسوسه يارب
وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه الصلاة والسلام

ملحوظه
ده انتي شحورتي التاج االلي جالك مش جاوبتيه اجابات هيستيريه

وربنا يسعدك ويكرمك ويبسطك ويرضيكي دنيا وآخره يارب



سلاموووووووووز

Soooo يقول...

amal

بادئ ذي بدئ .. اهلا بيكي ياستي ويارب تكون مدونتي المتواضعه عجبتك وياريت تعتبريها زي مدونتك تمام وتنوريني بتعليقاتك دايما

بعد كده .. الله يكرمك بلاش حضرتك دي .. بتجبلي حساسيه وبتحسسني اني عندي تلاتين سنه قاف ميم .. عشان كده خلي البساط احمدي وقولي سوووو على طول

وتصدقي فعلا نظريتك صح .. وفعلا المثاليه شيء نسبي بيختلف بين واحد والتاني وانا ماكنتش واخد بالي من دي
يعني اديني استفدت من حضرتك اهو

ملحوظه
لما حد يباصيلك تاج او يقولك ليكي تاج عندي .. يبقى معناه انه بيبقى عايز يعرف بعض الحاجات عنك عن طريق مجموعة اسئلة .. وعادة بيكون الشخص ده جاوب الاسئله في موضوع عنده .. تقومي انتي تروحي على مدونته وتاخدي الاسئلة دي وتعمليلها موضوع وتجاوبي عنها زي مانتي شايفه في الموضوع بتاعي

وربنا يسعدك ويكرمك ويبسطك ويوفقك دنيا وآخره يارب



سلامووووووووز

Soooo يقول...

يوميات فنانه مفروسه جداا

انا كنت بقولها بهزار والله مش قصدي حاجه
وكنت قاصد انك تروحي تذاكري شويه خصوصا ان امتحاناتك قربت

واسف بجد اذا كنتي فهمتي اي حاجه وحشه والله

وربنا يوفقك ويكرمك يارب



سلاموووووووووز

Soooo يقول...

سومه...مجنونه فى بلد عاقل

ربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه الصلاة والسلام يارب

والحمدلله انك خلصتي امتحاناتك وان شاء الله بالتوفيق يارب

وربنا يكرمك ويسعدك ويبسطك ويوفقك دنيا وآخره يارب



سلاموووووووووز

Soooo يقول...

الساحرة

والله العظيم انا مابيفرق معايا تعليق رقم كام .. اول تعليق زي اخر تعليق وكفايه انك جيتي وقريتي وعلقتي وتعبتي نفسك

وسبحان الله .. انا كنت عندك في المدونه وقريت موضوع الثانويه العامه وكنت لسه هعلق وادعي لبنتك ربنا يكرمها ويوفقها لكن حصلت ظروف وقمت من عالجهاز وماعلقتش .. وبمجرد مارجعت لقيت تعليقك عندي قلت سبحان الله

ربنا يسعدك ويكرمك ويوفقك ويبسطك وبنتك تنجح وتجيب مجموع عالي وتدخل الكليه اللي هي تحبها يارب

وعلى فكره .. انتي التعليق رقم ستين مش تسعه وخمسين
وش واحد بيطلع لسانه




سلامووووووووز

يوميات فنانه مفروسه جداا يقول...

هعلق تالت الناس كده هتزهق مني

وربنا وانا كمان بهزر

لو سمحت اما تبقي فاضي كده ابقي بص بصه عالبوست الجديدعنديok

انت زي اخويا يا سوو وزعلت اوي اما لاقيتك بقول اسف ليه يعني

معلش هوا هزار الصعايده تقيل شويه
ههههههههههههههههه مش ههزره تاني بس اعمل ايه الجينات بقي
سلام يا باشا

Doba يقول...

اولا السلام والتحية
ثانيا - ربنا يرحم مامتك ودائما وابدا تكون فخورة بانجاب شخص مميز فى فكره وتفكيره زى جنابك

ثالثا - ربنا يرزقك بالزوجة الصالحة ذات الدين والمستوى والجمال الخلاب وسيبك من القرود لانها مش بتنفع خالص وبتجيب الكافية

رابعا - يارب يرزقك بارض كبيرة وواسعة وتصممها كلها من افاكرك ويكون عندك مزرعة حلوة صغنونة تربى فيها اولاد حلوين وتزرع كل اللى نفسك فيه

خامسا- انت انسان متميز ولما الواحد بيوصف نفسه بيخاف بس يجرح الاخرين بعيوبه فبؤثر انه يقول الحاجت الحلوة اللى تفرحهم

ربنا يجعلك دايما سبب لبسمة الآخرين ويرزقك بمن يضع البسمة والفرحة فى قلبك

كن جميلاً ترى الوجود جميل

امل يقول...

السلام عليكم
اجابات ظريفة قوي ودمها خفيف
وتجديد فعلا لملل التاجات
سعدت جدا بزيارتك مدونتي
واتمنى تتكرر الزيارة
خالص تحياتي وتقديري

Unknown يقول...

ازيك يا باشا
عمال أيه ؟ يا رب تكون بخير

الجزء ده المنى اوى (والله العظيم والله العظيم والله العظيم .. انا نفسي امي تطلع من القبر عشان ابوس ايدها .. واقولها سامحيني على كل حاجه عملتها وضايقتك )

معلش هو ساعات الواحد بيقدر قيمة الى حواليه بعد فوات الاوان ثم ان الام هى المخلوق الوحيد الى انسى انه ممكن يقسى عليك

اجابة سؤال امتى يكون الحب اعمى لما يكون حب صادق .. كشفتلى عن فيلسوف لا يستهان به

----------

اجاباتك كلها طالعة من القلب و بشكل فطرى و تقولى فى الاخر برده قربت من المثالية ... يا عم خليك زى ما تعملش حساب لحاجة قول الى عايز وتقولوه و تكالك على الله المهم انك مثالى قدام نفسك

سلامووووووووووووز

غير معرف يقول...

يا تاجاتاك يا سووووووووو
:))

حلوة اجاباتك
وانشاءالله تبقى سيناريست يكسر الدنيا

وربنا يرحم والدتك وجميع اموات المسلمين
وجعتنى اوى جملتك دى يا سوو

والله العظيم والله العظيم والله العظيم .. انا نفسي امي تطلع من القبر عشان ابوس ايدها .. واقولها سامحيني على كل حاجه عملتها وضايقتك

ربنا يكرمك يارب يا سوووو ويسعدك دنيا واخرة ياااارب


سلامى
:))

mostafa rayan يقول...

انت حد حلو قوي من جواك
ربنا يوفقك ياصاحبي

Rosa يقول...

:)
كان لازم تجاوب عن التاجات دي يا سوووو
:)
----
انا متأكده انها راضيه عنك و فراحنه بيك مش ناقصها غير تشوفك انت راضي و فرحان
انا متأكده من كده
----
احلامك جميله بس مش مستحيله
if u think u can do , or u can`t, u r right :)
صدق قوي الي انت عايزه و امسك في احلامك و انت هتحققها
بجد
صدقني
ربنا يوفقك لكل الي فيه الخير يا رب :)
و اهمحاجه يبقى عندك الخرفان الي بتنونو دي
هبقى اجي اشتري منك واحد منهم
وآدي قوي ديل بيزنس تعمله تبع المزرعه
يلا اي خدعه
:D

sebofy7alo يقول...

أول تعليق
أجمل حاجة في إجاباتك أنك أجبرتني على قرايتها بسبب أسلوبك المختصر جدا وجي من معاميق المشاعر اللي جواك.
وأسلوبك سهل وجميل
سلام يا سووووووووو
sebofy7alo

كيكى عوووووو يقول...

اخيييييييييييييييرررررراااااااااا.......على فكرة بخش كتير...ولمة اجى اعمل كومنت المدونة كلها توقف وتهنج.....اجاباتك موثرة اوووووووى بجد.....خصوص بتاعت والدتك...اللة يرحمها...الدنيا كدة....ونبى ماتزعل نفسك....مش عارفة اقول اييية تانى...اة صحيح اخر بوست عندى بجد كان ضعيف ولا اييييييية..مش عارفة اتضيقت منة حاسة انو ضعيف...عاجبتنى اوووووووووى...انتقام ابن برعى وتفيدة...وروح برعى..هههههه.....افكارك جميلة اووووووووووى....اة صحيح اية حكاية التوقيعات...وفلفلة

Unknown يقول...

سوووووووووووووو
عمي الغالي ,حبيب قلبي
ماشاء الله اجابات من القلب فعلا ومثاليتها في انها تعبر عن نفسك فعلا ,واضح جدا ان مفيهاش اي تكلف علشان كده معبرة
ربنا يبارك فيك ويحفظك
وجزاكم الله خير

shreen يقول...

سووووووو
انا جيت اسلم عليك
واشكرك بجد
على كل اللى عملتة
انت انسان جميل جدا

انا طبعا قريت اجباتك التاج
بس ما حسيتش انك بتراعى ان اجاباتك تكون مثالية ولا حاجة

انا حسيتها انها صادقة
وبتعبر عنك بجد

يعنى باختصار مش بتزوق كلامك

انت واضح وصريح
دى احلى حاجة فيك

دمت لى دائما يا صديقى

دعاء مواجهات يقول...

بجد بجد حضرتك طلعت اجمل كتير مما سمعت او تخيلت عنك

وعلى فكرة انت مش بتحاول تكون مثالى بس الى انا حساة ان دى طبيعتك اللى بجد بحييك عليها اوى بجد

وبتمنالك ربنا يحققلك امنيك الصغيرة

تقبل تحياتى

Soooo يقول...

يوميات فنانه مفروسه جداا

ياستي علقي تالت ورابع وعاشر ولا يهمك
دي مدونتك وتنوريني في اي وقت

وهو احنا الصعايده دايما كده مابنفهمش بعض .. مع اننا لو فهمنا بعض يالهوووي .. هنبقى اكتر من البني ادمين والله

ملحوظه
قريت اخر بوست وشرحتلك فيه اسرع طريق للوصول للمكتبه .. وبصراحه مش عارف هقدر اجي ولا لا .. بس في العموم انا هبقى في البورصه لو تحبي تيجي وتقعدي مع المدونين اللي ممكن مايروحوش

وربنا ينجحك ويوفقك ويكرمك يارب



سلاموووووووووز

Soooo يقول...

Doba

وعليكم السلام والتحيه

وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا ونبينا محمد عليه افضل صلاة واتم تسليم يارب

وبجد مش عارف اقولك ايه على كلامك وتعليقك

ربنا يكرمك ويبسطك ويعطيكي مايحرمك ويوفقك ويرضيكي دنيا وآخره يارب

سلامي ليوسف افندي
وماتختفيش كده يا اختي .. ولا انتي مش اختي؟؟؟


سلاموووووووز

Soooo يقول...

امل

الحمدلله ان ربنا قدرني وقدرت ارسم ابتسامه على وشك
والحمدلله انك ما اتضايقتيش من تعليقي عندك

وياريت تعتبري مدونتي زي مدونتك تمام وتشرفيني دايما

وربنا يكرمك ويسعدك ويبسطك ويرضيكي دنيا وآخره يارب



سلاموووووووووز

Soooo يقول...

عاليا حليم

اهلا بسيدة الرومانسيه كلها

وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه افضل صلاة واتم تسليم

وياستي انا ولا فيلسوف ولا حاجه .. انا قلت الاجابه اللي حسيتها

وكنت زعلان منك عشان كنت مستنيكي تبقي موجوده في حفل توقيع كتاب مدونات مصريه للجيب .. لكن شكلك ظروفك ماسمحتش

وربنا يكرمك ويوفقك ويسعدك ويرضيكي دنيا وآخره يارب


سلامووووووووز

Soooo يقول...

shayma

الله يكرمك ياشيمو
وربنا يرحم موتانا وموتى المسلمين ويجمعنا بيهم في جنة الفردوس الاعلى في صحبة سيدنا ونبينا محمد عليه افضل صلاة واتم تسليم

واعتقد بعد التاجين دول ماتقوليليش لي تاج ومش عارف ايه
كفايه كده

وربنا يسعدك ويكرمك ويبسطك ويرضيكي دنيا وآخره يارب



سلاموووووووووز

Soooo يقول...

mostafarayan

الله يخليك يامصطفى
وبجد الف شكر على كلامك الجميل ده
وياريت تعتبر مدونتي زي مدونتك وتنورني بتعليقك وبكلامك الجميل دايما

وربنا يسعدك ويكرمك ويبسطك ويرضيك ويوفقك دنيا وآخره يارب



سلامووووووووووز

Soooo يقول...

Rosa

ربنا مايحرمني من تعليقاتك اللي بيبقى ليها طابع خاص .. انا باسميه الطابع الروزي

وربنا يرحم موتانا وموتى المسلمين ويجمعنا بيهم في جنة الفردوس الاعلى وفي صحبة سيدنا محمد عليه الصلاة والسلام

ملحوظه
ماحدش خد باله من الخرفان اللي بتنونو غير الرايق وانتي .. وليكي ياستي خروفين مره واحده .. ولا يهمك

ربنا يسعدك ويبسطك ويكرمك ويرضيكي دنيا وآخره يارب



سلامووووووووز

Soooo يقول...

sebofy7alo

شيكوووووووووو
حليب قلبي
اخيرا ياعم جيت وعلقت .. ماتتصورش انا سعيد قد ايه اني قريت مواضيعك .. ده انت اتاريك مش مجرد مهنس آلات طبيه وبس .. ده انت فيك كاتب ساخر عايز ينطلق ويبرطع

ربنا يسعدك ويكرمك ويبسك ويرضيك دنيا وآخره يارب

ملحوظه
انا حاولت باستماته اعلق عندك ماعرفتش .. شوف الغلط من ايه وصلحه عشان الناس تعلق .. والمزيكا بتاعة المدونه دي جبتها منين؟؟


سلامووووووووز

Soooo يقول...

كيكى

مش عارف اذا كان العيب من المدونه عندي ولا من الانترنت اكسبلورر بتاعك .. بس هحاول اشوف ايه اللي متقل الصفحه واخففها

والحمدلله ان اجابات التاج عجبتك
وعلى فكره .. انتي بتكتبي باسلوب ساخر حلو قوي .. وطبيعي ان الكاتب الساخر يبقى شايف ان مستواه بيقل .. بس انا شايفك ماشيه في طريق كويس .. اهتمي انتي بمذاكرتك وامتحاناتك وبعدها ان شاء الله لينا قعده مطوله مع بعض عشان اوضحلك بعض الحاجات اللي لو خدتي بالك منها هتبقي عشره على عشره

والحوار اللي عند فنانه مفروسه .. انها ماعرفتش بموضوع حفل توقيع كتاب مدونات مصريه للجيب وبتقول هتروح يوم الخميس اللي هو بعد بكره والنهارده فجر التلات .. لو تحبي تيجي تنورينا .. والتفاصيل هتلاقيها في مدونة خالو احمد الصباغ

وربنا يسعدك ويكرمك ويبسطك ويوفقك ويرضيكي دنيا وآخره يارب



سلامووووووووز

Soooo يقول...

الفاتح الجعفري

جعفريييييييييييييي
حليب قلبي والله
انا باعزك قوي قوي قوي انت واليعقوبي وربنا يعلم والله بمعزتي ليكم

وربنا يكرمك ويبسطك ويوفقك ويسعدك ويرضيك دنيا وآخره يارب


سلامووووووووووز

Soooo يقول...

shreen

شيرييييييييييييييييييييين
يااااااااااه
انا مبسوط قوي قوي قوي قوي انك قمتي بالسلامه
ربنا يارب يتمم شفاكي على خير يارب

وانا ماعملتش اكتر من اللي اي حد بيعزك وبيحترمك كان هيعملو

ربنا يسعدك ويبسطك ويوفقك ويكرمك ويرضيكي دنيا وآخره يارب



سلاموووووووووز

Soooo يقول...

دعاء مواجهات

ربنا يكرمك يارب
بس الله يخليكي بلاش حضرتك دي
بتحسسيني اني عندي تلاتين سنه قاف ميم

وربنا يكرمك ويسعدك ويبسطك ويوفقك ويرضيكي دنيا وآخره يارب

وياريت ماتختفيش كده تاني .. وتنوري المدونة بزيارتك وبتعليقاتك الجميله على طول



سلامووووووووووز

الباحث عن الحقيقة يقول...

اولا موقف والدتك ده اثر فيا جدا
لاي من فترة قريبة بدأ يجينى نفس الالم اللى بييجي لوالدتى
وألم فظيع جدا
بقيت بستغرب امى بتستحمله كانت ازاى طول عمرها
ربنا يرحم والدتك ويشفي والدتى ويشفينى
انا عرفت الفلسفة بتييجي منين
من انك تضرب الدنيا صرمه
وتبقى عارف انك مش لازم تاخد كل حقك في الدنيا وانت عايش
اقصد الثمرة بتاعته
علشان كده بتعيش للحياة غير مهتم بالنتيجة
كل اللى يهمك انك تحافظ على انك تكون سعيد ومبسوط
قشطة عليك يا سووو
احب يكونلى صاحب زيك

Soooo يقول...

الباحث عن الحقيقة

عارف .. انا قريت تعليقك ده وفضلت متنح مش عارف ارد عليه

تصدق ممكن فعلا ايماني ان ربنا هيعوضني عن كل اللي باشوفو وشفته في الدنيا .. وهيعوضني عنه ان شاء الله في الآخره او في الدنيا وانا بافضل الاخره بصراحه .. تصدق المنطق ده بيخليك تبقى مرتاح قوي نفسيا

انا اللي يشرفني اني اكون صاحبك

ربنا يشفيك ويشفي والدتك وكل مرضانا ومرضى المسلمين .. ويرحم موتانا وموتى المسلمين يارب




سلامووووووووووز

سلوى يقول...

أصعب إحساس في الدنيا بالنسبه لي
هو إنك تشعر بقله الحيله
وإنك عايز تعمل حاجه ومش قادر

ده اللي حسيته وأنا بقرأ كلامك عن والدتك رحمها الله

مش عارفه إنت اتحملته إزاي

على فكرة إنت دوختني بين الصفحات

وعلى فكرة كمان

رغم إنك بتكتب كتير
والتعليقات ما شاء الله كتير

إلا إني بشعر إنك لسه ما كتبتش

يمكن أكون غلط

المهم واضح إنك شخصيه طيبه
ربنا يحفظك دايما

Soooo يقول...

Salwa

عارفه ياسلوى
في ايه في القرآن انا للاسف مش فاكر نصها بالظبط .. بس قريبه لـ (والذين اذا اصابتهم مصيبة قالو انا لله وانا اليه لراجعون تتنزل عليهم الملائكة ألا تخافو ولاتحزنو)

انا فعلا كنت حاسس ان ربنا جاعل الملايكه محاوطاني بجد
وعارف ومتأكد ان ربنا ان شاء الله هيعوضني عن اللي حسيت بيه
ربنا كبير قوي
وحنين قوي
----
تصدقي انك اول واحده تاخد بالها فعلا من جزئية اني لسه ماكتبتش ولسه ماتكلمتش
انا كل يوم بابقى عايز اكتب واكتب واكتب واكتب
بس مش عارف اكتب اقول ايه


ربنا يحميكي ويسعدك ويبسطك ويكرمك ويوفقك ويرضيكي دنيا وآخره يارب


وماتختفيش كده .. ده انتي من أوائل الناس اللي وقفت جنبي وشجعتني .. ولا انتي نسيتي موضوع النيولوك اللي انتي بناءا عليه رحتي عامله مدونه بحالها؟؟؟؟



سلامووووووووز

سلوى يقول...

فعلا ربنا كبير قوى وحنين قوى زي ما قلت يا سووو

بس إنت فاجأتني كنت فاكرة إنك مش هتقرأ التعليق لأنه على بوست قديم

المهم بخصوص إنك عايز تكتب ومش عارف تكتب إيه

إكتب اللي إنت عايزة وحاسه
مش اللي عايزاه الناس
وخلي دايما امامد إنك تفيد الناس
وتكون المدونه كصدقه جاريه

يعني إنت بتكتب شعر جميل جدا

وبتكتب نقد رائع زي اللي لسه شايفاه الوقت في بوستك الأخير

ده غير إنك لو رجعت لأول بوستات كتبتها
كانت مميزة جدا

والمفروض إنك بتطور للأفضل

بصراحه كنت عايزة اقولك كده من فترة

بس حسيت إن كلامي مش هيكون مسموع
نظرا للتعليقات الكتير ما شاء الله

فممكن حد يفسر كلامي غلط

كمان مش عايزة انقدك أمام الجميع
فكان البوست ده قديم وفرصه
أتكلم ومحدش هياخد باله
وياريت كمان تحذفه بعد ما تقرأه

إكتب يا سووو بجد
إنت عندك فكر وخفه ظل وحب الناس ما شاء الله

وممكن توصل اللي إنت عايزة بأيسر الطرق وأجملها وأرقاها

وأنا مش بختفي ولا حاجه

أنا بزور مدونتك كتير والله
بس بعلق على الموضوعات اللي بتكتبها بجد وبتكون فيها سووو

أوعى تزعل منى
وياريت تحذف التعليق ده بعد ما تقرأه

دمت بكل الخير

سلوى يقول...

نسيت معلش ودخلا بــ فري هارت

أنا سلوى
بس كنت داخله بإيميل مدونه كلام البنات

إبقى زورنا :)

سلام بقى أحسن أنا طولت قوى :)

Soooo يقول...

free heart

الخمينا بقى وادخلي كل شويه ببروفيل شكل

اولا .. انا باقرى كل التعليقات اللي بتجيلي وبحاول على قد ماقدر اني ارد على اللي بيعلق خصوصا لو كان عايز يوصل بتعليقه عندي حاجه معينه

وثانيا .. انا مش ضد انك او غيرك ينتقدني .. ومش باتوه وسط كلام الناس .. بالعكس .. اللي بينتقدني باحترام زي مانتي اتكلمتي دلوقتي باشيله على راسي من فوق .. لانه هو ده بجد اللي بيحب يقرالي

ثالثا بقى وهو ده الاهم .. انا عارف اني كنت بادي كويس في اول مواضيعي .. لكن ما اكدبش عليكي يا سلوى انا في حاجه حصلت كسرتني من جوايا وخلتني اتجه للكتابه في ناحيه ناس بتبصلها انها تهييس .. لكن انا باصصلها انها محاوله لرسم البسمه على وشو اللي بيقرولي

اللي كسرني اني كنت زمان لو قلبتي في مواضيعي القديمه ولو كنتي متابعاني ساعتها .. موضوع صحابي المدونين .. كنت عايز اعمل حاجه خير للناس اللي باشوفهم في الشارع .. وكنت عايز صحابي المدونين يبقو معايا .. ولما عرضت الفكره كل الناس او معظمهم قال احنا معاك وشغال وحاجات .. ولما قلت نتقابل كللو كان عنده ظروف في حين اني ساعتها كانت ظروفي منيله من ناحية مرض والدي وزيارة قبر والدتي الى جانب اني كنت مزنوق في الشغل ساعتها .. لكن برضه فضيت نفسي وروحت عشان اقابل الناس اللي عايزين يبقو صحابي في الحياه .. ومن وسط خمسين واحد علقو وقالو جايين وبتاع .. ماجاش غير تلاته بس
متخيله احساسي ساعتها كان عامل ازاي؟؟؟

ومن ساعتها وانا قررت اني هاكتب اي حاجه وخلاص لمجرد الكتابه وتمرين نفسي لحاجه باعملها دلوقتي وقولي يارب تمشي وتتعمل .. الحاجه دي هي اول مجموعة مقالات ساخره لي ان شاء الله

وبعدين على فكره .. انا ناوي والنيه لله .. اني بعد ما اخلص المذكرات دي اسيب التدوين .. او على الاقل اسيب المدونه دي واعمل مدونه تانيه ماحدش يعرفني فيها بشخصي الحقيقي .. واكتب فيها كل اللي عايزه .. لاني حاسس اني اتعريت هنا وفي ناس كتير نهشو في لحمي
ومش هم السبب
انا السبب
عشان كنت باتعامل مع كل الناس بحب .. لكن اكتشفت انه مش كل الناس هتقدر ده .. وناس قليلين قوي هم اللي بيخافو على مشاعر غيرهم وبيحبو يساعدوهم

مش عارف فهمتي كلامي ولا لأ
بس اتمنى انك تكوني فهمتي قصدي

وربنا يسعدك ويكرمك ويبسطك ويوفقك دنيا واخره يارب

ملحوظه
لو عايزه تنتقديني في اي وقت وفي اي موضوع وقدام اي حد قولي .. ده رأيك .. ومادمتي بتتكلمي باحترام وبتنتقديني بمنطقيه .. يبقى لازم اسمع كلامك واشيلك على راسي من فوق



سلامووووووووز

سلوى يقول...

يعني لازم تدوخني لحد ما لقيت موضوع صحابي المدونين

أنا للاسف مش قرأته
لكن الآن
أنا قرأته وقرأت التعليقات كمان
واضح من الموضوع إنك كنت متحمس
وطبعا التعليقات حمستك زياده
وأكيد رفعتك لسابع سما

وطبعا فضلت تحلم وتحلم وتتخيل إيه اللي ممكن يحصل
وطبعا كان حلم جميل ومثالي

لكن في الآخر صحيت منه مكسور زي ما قلت

أولا إنت قصدت خير
وكان لازم تحاول تاني وعاشر

وهقولك سر
طبعا لو تلاحظ إن أغلب اللي علقوا كان عندهم نفس الفكرة

أنا كمان عندي نفس الفكره لكن بصورة مختلفه

كنت نزلت بوست زمان ومش فاكراه أصلا

بس كنت بسأل إيه اللي ممكن الشباب يعمله بدل ما احنا قاعدين نلعن البلد والزمن ونندب الحظ

وكان في تعليقات كتير

بس من وقتها وأنا برضه الموضوع في دماغي
واتولد حلم
ومن وقتها وأنا بحاول أوصل لطرق تحقيقه

عماله أسأل إزاي ؟ واستفسر

ولسه مش قلت لأي حد إيه الحلم ده

منتظره لحد ما يكمل في دماغي
وبعدين أنشره
لأنه مش هيتحقق غير بنا جميعا

كمان مش عايزة أنشره الوقت لأني خايفه أنكسر
وألاقي ناس طالعه شغلتها بس هدم الأفكار وتعقيد الناس وخلق المشاكل اللي من الإحتمال إني أقابلها في مشوار تحقيق الحلم

إنت اتسرعت يا سووو بعرض فكرتك

عارف لو كنت قلت
يالا نتقابل ونتعرف ونقضى يوم ظريف

كنت هتلاقي ناس كتير حضرت
مع احترامي لكل الناس اللي ما حضرتش

زي كان في تجمع من فترة في ساقيه الصاوى
وحضر عدد كبير

شكلي بكتب بقالي ساعه
وآخرتها هتقول إيه اللكاكه دي :)

بس يا ريت ما تعتبرش كلامي نقد
لأني مش أنا اللي أنقد

أنا بس حبيت ألفت نظرك لشئ
وهو إنك تكتب اللي إنت عايزة وتكتب إحساسك ومش مهم الناس عايزة إيه

المهم ربنا يوفقك في مجموعه مقالاتك

بس لو عملت مدونه جديده إبقى سيب لي اللينك في السكريت
والسكريت في بييييييير
وبلاش حكايه تسيب التدوين دي

طولت عليك معلش بقى

ربنا يحفطك يا سووو

سلوى يقول...

نسيت أهم حاجه


لو جيت أحقق الحلم

إنت إن شاء الله معانا

أنا من الوقت بحدد مين معايا

وبتابع من بعيد

وعارفه مين اللي هيكون أد كلامه ومين بيتكلم وخلاص

يالا سلام بقى
أنا دوشتك إنهارده :)