الاثنين، ٢٩ ربيع الآخر ١٤٢٩ هـ

خبر ايه !!؟

بعد ما اتشتمت بالانزليجي في الموضوع اللي قبل الموضوع ده .. رحت لواحد صاحبي شغال صحفي في احدى جرايد المعارضه .. وقلتله اني اتشتمت وكده .. وبالرغم من اني رديت على اللي علق وشتمني بالانزليجي .. وطلعت كل شحنة الغضب فيه .. وقلت لصاحبي ان اللي شتمني ده فعليا ولا فارق معايا رأيه في حاجه .. ولا هو اللي يعطلني عن الكتابه وعن التدوين .. يعني كأنه ماحصلش من اصلو .. بس حاجه بطارخ كده وخلاص .. لقيت صاحبي بعدها بيضحك قوي
!!!!!
.. قلتله انت بتضحك على ايه .. قاللي تعالى وانا افهمك انا باضحك على ايه
دخلنا على الايميل الشخصي بتاعه اللي مكتوب في الجرنان .. ووراني كمية اميلات بيتشتم فيها بابشع الالفاظ وأقذع الشتائم
ولو اني مش عارف يعني ايه أقذع بس هي شتايم قذعه بصحيح
لما قريت الكلام اللي بيتقالو لقيت ان معظمه بعيد عن مجال كتابة صاحبي .. وبعيد عن اي نقد موضوعي .. ومجرد محاولات لكسر عزيمته .. واثناءه عن الاستمرار في الكتابه
ولما استغربت قوي قلتله طب وده من مين يعني .. حد انت تعرفه ولا حد في المطلق؟؟
قاللي من ده على ده
قلتله ازاي ؟؟؟
قاللي في ناس ممكن تكون بتكرهك لشخصك ومابتصدق انها تلاقي مخرج لنفسها عشان تفرغ شحنة الكره اللي جواها وتروح هارياك شتيمه .. وبتستغل انك مش هتعرف تجيبهم ولو حاولت تجيبهم مش هتستفيد بحاجه .. وهتلاقي نفسك اتعطلت عن الكتابه حصيل فاضي
قلتله طب ده (ده) الاولاني .. مين (ده) التاني ؟؟
قاللي بعض الاجهزة المعنيه واللي ممكن اكون انا انتقدتها باسلوب مباشر او غير مباشر .. بيكون ليها وسائل ملتويه في الهجوم عليك .. يعني مثلا مثلا .. لو اتكلمت عن شركة معينه في القطاع العام فيها سرقة ونصب وكلو على ودنو وعلى عينك يا تاجر .. شركة زي دي تروح باعته حد من ناحيتها عشان يكسرني
قلتله معلش بس يكسرك ازاي ؟؟
.. قاللي زي اللي حصل معاك .. لو انت اسلوبك ساخر يبعتولك حد يقولك ان دمك تقيل
لو واحد تاني شاعر .. يبعتولو حد يكتب تعليق يقولّو انه ولا بيفهم في الشعر ولا ليه فيه
-----
خلصت قعدتي مع صاحبي وروحت .. وانا مروح قعدت افتكر كل المدونين اللي اتشتمو وحاولت اربط اللي حصل لهم باللي سمعته .. لقيت ان في مدونين كتير انا اعرفهم اتشتمو .. لما قعدت اترجم الحاجات لقيت ان كلامه صح
لقيت انه هو ده اللي كنت باسمع عنه زمان قبل مارجلي تيجي في الخيه واكتب واتجه للتدوين
.. هو ده الارهاب الفكري
.. هو ده الاسلوب في كسر اي قلم لاي كاتب
.. اشوف ايه اكتر حاجه بيحبها وبيتكلم عنها بصدق
واروح شاتمو فيها او اسخر منه عشانها
اشوف هو بيكره يتقال عنه ايه .. واقولو عنه
اشوف ايه اكتر حاجه بيحبها .. واروح شاتم الحاجه دي
او ادعي عليها انها يحصلها حاجه
.. اشوف ايه ظروفه وحياته الشخصيه من كلامه
واسخر منه واكسره
-
مدونين كتير قوي اتشتمو .. لو حبيت اتكلم وافسر ازاي ومين اللي شتمهم يبقى عايزلي عشرميت موضوع
.. لكن مش مهم اني انا اللي اتكلم
.. المهم ان اللي اتشتم واتكسر جواه حاجه
.. يقوم يقف ويقول للي شتمو او ضايقه
.. انا اهو
.. باتكلم
.. باقول
.. ولو انت مش عاجبك كلامي
شوف اقرب حيطه .. واخبط دماغك فيها
.. ويقولّو بعلو صوته
.. طز فيك
مش انت اللي هتكسرني ولا هتقلل مني
.. ويقولّو .. انا معايا حاجه مش معاك
معايا فكر حر .. طالع من دماغي
------
ملحوظه
.. لما قلت لصاحبي الصحفي اني هتكلم عنه وهجيب سيرته في الموضوع
قاللي ابوس ايدك .. ما تقولش لا اسمي ولا اسم الجرنان اللي باشتغل فيه
قلتله ليه ياعم ؟؟؟
قاللي عشان مش عايز اتشتم من بتوع المدونات .. كفايه علي بتوع جرايد المعارضه
سوووو

هناك ٤٧ تعليقًا:

Nani يقول...

السلام عليكم
ينصر دينك يا استاذ نفيسسسة
انت كفيت ووفيت يا باشا
زانا اول وحدة
للللووولللوووليييششش

الـسـيـدة نـون يقول...

عجبنى الموضوع ده اوى يا سوووو
وده موجه لاى مدون ممكن يتعرض لأقذع الشتايم
الا صحيح يعنى ايه اقذع
عايزين نستفسر احسن تتطلع كلمة ابيحة واحنا مش واخدين بالنا

وياريت فعلا محمود يقرا البوست ده ويرتجع عن قرار اعتزال التدوين
ويرمى ورا ضهره اى تعليق سخيف
ومش محمود وبس
كل المدونين ياريت فعلا ميخدوش كل كلمة على صدرهم اوى كدة ويتأثروا

وانت قلتها ده فعلا ارهاب فكرى
الناس اللى متغاظة مننا بتعملهولنا
وانت حلتها لما قلت ان احنا عندنا فكر حر
بس هى الفكرة ان فعلا لما واحد بيتعرض لنقد شديد خصوصا لو كان مالهوش دعوة بموضوع البوست اللى كاتبه
هو ده اللى بيوجع اوى

المهم
تحياتى ليك
ومن نجاح لنجاح دايما يا سوووو
بس تعالى هنا
مش هو النهاردة الاتنين برضه
يعنى معاد الحلقة الجديدة
ولا ايه النظاااااااااااااااام

سلام
اختك خيخة

سلوى يقول...

أعتقد إنه طالما الإنسان صح

وكتابته صح .. نابعه من فكر ومبدأ

إذا فاليكن ما يكون

وليقل عنه الناس ما يريدون

دمت بكل خير سوووو

همس الاحباب يقول...

سووووووووو
سوووووووووسووووووو
لا انا باهتف بس
بجد برافو عليك وفرت عليه كتير قوى
ووفرت عليه بوست بحاله هو ده اللى مفروض يحصل مننا
بجد طز ومية طز فى كل اللى بيشتم ولا يهمنا طالما احنا مؤمنين باللى بنكتبه
كده انتى بجد صعيدى وراجل كمان
هى كلمة طز دى شتيمة يا سوووووو هههه

بس بجد برافو برافو
كفاية كده علشان الرقابة والتحيز
سلاموووووووووز يا سووووووو

الـسـيـدة نـون يقول...

ايه يا عم سووو
اروح اشوف اجاباتك على سؤالى
الاقيه توضيح واضح جدا كدة
وبيدل على غباء المتساءل اللى هو انا يعنى

لما تلاقينى سألتك سؤال غبى بيدل على غباء خالص
جاوبنى فى السكرتة
متخليش كل اللى رايح واللى جاى
يعرف من اجاباتك مدى غباء سؤالى


بس شكرا على التوضيح
ودلوقتى فهمت هتعمل ايه لما تكمل واحد وتلاتين سنة
هتسمى نفسك شريف مش كدة؟؟؟؟

اوعى حد يضرب


سلام
اختك خيخة

Soooo يقول...

Nani

وعليكم السلااااااااااام
اتفضل شاي عالنار والبيبس في الكشك

وايه الزغروته الغريبه دي
اما انتو يا اردنين عليكم حاجات

والف شكر على تعليقك وعلى زغروتتك




سلامووووووووووز

Soooo يقول...

بت خيخة وأى كلام

قذع الشيء اي جابو وقعد يقولو ياقصير يا قذعه
واعتقد انها ليست بالكلمة القبيحه قوي
زيها زي انشكاح
والله اعلى واعلم

والموضوع ده مش لمحمود لوحده فعلا .. الموضوع ده لكل المدونين
اه ازعل يوم ولا اتنين
انما ترجع اقوى من الاول


ملحوظه
اصل انا قررت ان الحلقه تبقى يوم الاربع مع اخترنالك
فاكراه؟؟؟




سلاموووووووووز

Soooo يقول...

Salwa

الله ينور عليكي
اهم حاجه ان الواحد من جواه يكون مقتنع بالموضوع اللي بيتكلم عنه
ولا يخشى لومة لائم

الف شكر على تعليقك وعلى مشاعرك الجميله والنبيله دي بجد




سلامووووووووووووز

Soooo يقول...

همس الاحباب

خالد باشا
منورني والله
وفعلا طز في اي حد يدخل ويقول اي كلام غير مبني على حقائق ونقد موضوعي


وبعدين هو حد شكك في اني صعيدي؟؟؟
اعمل سكان للبطاقه وشهادة الميلاد يعني ولا ايه ياجرعان؟؟؟


سلامووووووووووز

Soooo يقول...

بت خيخة وأى كلام

يلا ياخيخه من هنا
يلا هفجر النت
هدمر المدونه كلها
هغتال بلوج سبوت بذات نفسياته
----
لا طبعا مش هسمي نفسي شريف لما ابقى عندي واحد وتلاتين سنه
هو انا عبيط
انا هسمي المدونه شريف



ملحوظه
المدونه هيفضل اسمها زي ماهي





سلاموووووووووووز

رندا يقول...

سوووووو

سيبك من الناس الشيريرين دول
دول ناس فاضية مش وراهم غير الهجوم و بس
وصحبك
هو صحفى حلو
يبقى عرفتة
حتى لو مش كتبت اسمة
اكيد واحد بيقول كلمة حق
فى زمن اتغربت فية كلمة الحق
وهاجرت بعيد

ربنا يستر على الحق كلمة وخلصت من زمان

ياريت تقولة عن لسانى
الشجرة المثمرة عارف الباقى
بس وصّلة تحياتى

بقولك اية
فين باقى الحلقات بقى حضرتك
انا مستنية اهو

دمت بكل ود

رندا

دكتور حر يقول...

هو صحيح ارهاب فكري يا عم سوووو

لكن انا شايف
ان المشكله اساسا
في تقبل العقول للحوار الهاديء


نفسي فعلا كل واحد ياخد نفس عميييييييق لجوه اول ما يسمع الحاجه ويحاول
ويحاول

يمكن

وحقك على يا ريس
سيبك منهم

انين الحزن يقول...

سووووووو

جدع ياسوووو وعسل كمان

بس لو تعرف ايميل محمود او تعرفه شخصيا كلمه خليه مايمشيش

كنت هاقولك يعني ايه اقذع بس نوران سبقتني


سلامووووووووووز

وزة

Layla يقول...

هههه...من الاخر كده مينفعش يكون عندك مدونة من غير ما حد يشتمك فيها

تقدر تقول كده ان الشتيمة هي ختم الاعتراف بالواحد كمدون

:)

غير معرف يقول...

جااااااااااامد الموضوع ده يا سووووو بجد
خلانى اركز فى حاجه مكنتش واخده بالى منها

بجد تحفه واحييك
ويارب فعلا محدش يضايق لدرجه انه يبطل تدوين

سلاخووووووووووووووخ
:))))))))))

Desert cat يقول...

هههههههههههههههههه
يا سوووووووووووو
مين فينا مش اتشتم ولا اتهزء بس انا مهما وصلنى من شتيمة واخرها انت شايفها من شوية بعاند اكتر
وبيخلينى انزل بوستات كتير
علشان برضه اقول للى بيتم طز فيك عمرك ما هتكسرنى
حتى لو مشغولة فى الوقت اللى بتشتم فيه بخرج من عز مشاغلى واتابع المدونات واحسس الجميع انى موجودة

كاميليا بهاء الدين يقول...

إرهاب فكرى
تكسير قلم
تكميم فم

أسلحة شديدة الفتك
تقتل الفكر
تشرد العقل
تؤلم القلب

ولكنها فى ساحة الحق .. تُسحق
ويعبر فوقها كل جرئ

قول لمحمود رئيس جمهوريه نفسه يرجع
قول له القضية مش ضد مجهول

لإنك فى البوست ده
كشف الفاعل

برافو عليك ياسوووو

تحياتى

أبو خالد يقول...

أبنى الحبيب /الأستاذ أحمد سوووو
تحياتى و احترامى
من قبل عمل مدونتى كنت أتابع
هذه المعارك و لا أحب الخوض فيها
و كنت أرجوا البعض بالكف عن الهجوم
و الخروج عن اللياقة .و الحل كما قال
زميلك الصحفى لا يجب علينا الدخول فى
مهاترات لا نفع من ورائها..
و لقد أرسلت نداء لمحمود من مدونة آبى
ولى رأى لو أى إنسان دخل و سب و شتم
ألغى تعليقه بمنتهى البساطة
و أحتسب أجرى عند الله ..
يا جماعة سنقف جميعا أمام الله
و يال حظه العثر من كان لأحد مظلمة عنده..و لاننسى أنه على مر العصور
يوجد من يسب و يشتم ..
أفضل الخلق سيدنا محمد صلى الله عليه و سلم يسب حسبنا الله و نعم الوكيل
و من عندك ياأحمد أوجه نداء إلى أبنى
الحبيب رئيس جمهورية نفسه محمود أن يعود
لنا جميعا و يحتسب مظلمته عند الله ..
أطلت عليك حبيبى أحمد بالعشم

اهو ده عيبه يقول...

يا لهوى يا لمبى
هى الحكاية وصلت للاجهزة المعنية والحكومية والمهلبية
انت فعلا عندك حق فى كل اللى قلته هما عايزين يكسروا الناس وخلاص ويوجعوهم فى اقرب حاجه ليهم

بس كده مش هيلاحقوا يدخلوا ناس يشتموا فى كل المدونين الناجحين واللى كلمتهم صادقه
فانا من موقعى هذا اقترح عليهم يوفروا العماله المقنعه دى وكل جهه حاقده تجيبلها شتامه بالكهربا

المـــفـــــــقــــــــوعـــــة مــرارتـهــا يقول...

بأعتباري واحدة مشتومة قديمة
وغالباً أنا وسوووو أخوات في الشتيمة العانجليزي ... هو حد يطول يتحط هو وسو في كادر واحد ... ده كادر أجمد من كادر الرايق
أحييييك من كل قلبي علي الموضوع الجامد ده
احنا اللي دخل عندنا قال انه إسرائيلي ... وانا أشك انه كان بيكدب في كدة ؟؟
لأنه لوكان بيكدب هايتجاب من الموساد وهايتجند عندهم ويبقوا بالصلاة عالنبي كسبوا واحد جاسوس متأصل
وفي نفس الوقت هايتجاب من المخابرات المصرية ويتراقب لحد ماينول مصير إعدام ميت
شفت إللي ييجي علي سوسو وسووووووو بيجراله أيه ؟
هايتعدم
نظرية مش كدة ؟

Mafrousa يقول...

سوووووووووو
هوه ده الكلام اللى المفروض ان المدونين المفروض انهم عارفينه مش كده و لا ايه و بعدين بصراحه انا بقى حاسه ان حكومة اللهم احفظنا البلد اللى فيها عفاريت اللى يهمها ان تكسر مقاديف اى حد محبوب و نشط و شاطر و بيفكر و بيشعر و بيفن...ديه بلد عايزه اصلا تدمر شبابنا و المشكله انه لسه فيه ناس بتزعل و بتقفل المدونات و بتعمل بالظبط اللى الجهات مختلفه عاوزاه
هوه يعنى لما واحد يدخل يشتم و يجرى ...غرضه ايه اكتر من انك تقفل المدونه....و لا حاجه.....فتلاقى بعض المدونين قفلوا المدونه...او بمعنى اصح نولوهم مرادهم...
لاحول و لاقوة الا ب الله...بقولك ايه انا لو حد دخل يسلخنى حصفر بس تتلموا كلكم تقطعوه و تخرطوه...ماشى سلااام يا سوووووووو

رحــــيـل يقول...

ٍسوووو

اجدع كلام بجد فى الوقت الحالى ووسط الازمه اللى بيمر بيها مدونين كتير من شتيمه وقله ادب

بجد اى مدون يشتم يكبر دماغه عشان هو لما يحرق دمه كده بيعمل اللى الشخص المتخفى ده عايزه

تحياتى لك

خمسة فضفضة يقول...

السلام عليكم ورحمة الله وبركاته

لا فض فوك يا سوو
هو ده الكلام الصح

Rehab Mostafa يقول...

والله صاحبك قال كل اللي في نفسي ومش عارفه أقوله
الله ينور عليك وعليه

فاتيما يقول...

يا سوووو
يسلم لسانك يا صديقى
و معلشى نبتدى حصة اللغة العربية
أقذع
مشتقة من الفعل قذع يقذعه قذعاً
يعنى رماه بالفحش
و سوء القول و شتمه
طبعاً اللى فات دا موش شطارة أنا حاطة معجم ألفاظ على المكتب جنب الكمبيوتر فقولت نتعلم حاجة سوا
و تعرف يا سووو الأرهاب الفكرى و التعليقات السمجة دى
بتفكرنى بواحد محترم
بيتعمل جنبه خناقة كموفلاج كدا عشان يتلهى فيها و حرامى تانى يعرف يسرقه وسط الهوجة ....
تقريباً دا اللى بيحصل
الشتام دا بيغلوش على صاحب الرأى عشان يعرف يسرق منه الأنتباه و الوقت لحاجة أهم ...
و تحياتى ليك يا صديقى الغالى

Soooo يقول...

رندا

سلامك وصللو وهو متابع المدونه بتاعتي وعاجباه قوي لكن ابن الذين مش راضي يكتشفني
وديني لاحرمو من المصروف




سلاموووووووووز

Soooo يقول...

دكتور حر

حبيبييييييييييييي
اي والله حبيبي انت يادكتره
المشكله يادكتور مش في الحوار الهاديء وبس
المشكله انه من كتر الفساد في الحياه السياسيه والاجتماعيه .. بقى في تخبط في التعاملات الانسانيه بين الناس والحكومه من جهة .. وبين الناس والناس من جهة تانيه
فاهم حاجه؟؟؟

نورتني يادكتور




سلامووووووووووز

Soooo يقول...

انين الحزن

والله يا وزه انا عارف الحاله النفسيه اللي عند محمود دلوقتي ومتخيلها
وعارف برضه انه صعيدي وراجل
ومتأكد انه هيرجع للتدوين تاني وولا هيهمو حاجه
دع صعيدي يابنتي
يعني الاصل .. وعالاصل دور

نورتيني والله يا توأمتي




سلاموووووووووووز

Soooo يقول...

M@RV3L

والله ممكن يكون منطقك فيه نسبة صواب
لأن الهجوم على المدون معناه وجود اعداء
اعداء النجاح




سلاموووووووووووز

Soooo يقول...

shayma

الله يخليكي ياشيمو
وياستي ولا جامد ولا حاجه
ده بعض مما عندكم

وطول ما المدون بيكتب عشان هو عايز يكتب وعايز يتكلم ويقول
يبقى عمره ماهيبطل تدوين ولا كتابه




سلاموووووووووووز

Soooo يقول...

Desert cat

لما قلت انك قطة بمليون غضنفر ماكدبتش

بس انتي ياقطة بجد اتعرضتي لشوية حوارات
يالهووووي
تاخدي عليهم جايزة اوسكار والله

يلا هاسيبك تروحي تتشتمي .. قصدي تروحي تدوني

وش واحد بيطلع لسانه يغيظك .. لكن انتي مسكتي مقص وقصيتي لسانه وقعدتي تضحكي عليه




سلاموووووووووووز

Soooo يقول...

كاميليا

يا كامي انتي والله دايما تعليقاتك بيبقى ليها اتموسفير خاص

ولا تقلقي
محمود راجع ان شاء الله
وبكره تقولي سوووو قالها



سلامووووووووووز

Soooo يقول...

أبو خالد

وانا باقرى تعليقاتك يا استاذي باشعر بكمية حب وحنان لا يمكن الاقيهم في اي تعليق
باحسك بجد منني وانا منك والله
مش عايز اكبرك واقول باحس انك ابويا .. هنقول اني باحس انك اخويا الكبير اللي بجد بينصحني وبيكلمني وبيوجهني وباحب اسمع لكلامه ولفكره ولآراؤه

ربنا يخليك لينا يا استاذي ويباركلك في صحتك ومالك وكل حالك يارب

ومحمود سامع وشايف كل اللي الناس بتقولو اهو
وربنا يرجعه بالسلامه




سلاموووووووووووز

Soooo يقول...

اهو ده عيبه

في اوروبا والدول المقدمه بيعملو على كل مدونه شتامه بالكهربا وسقافه بالكهربا
عندنا احنا مش هيجيبو شتامه وبس
لأ
دول هيجيبو شتامه وضرابه وسجانه وخراسه .. عشان تخرسنا



سلامووووووووووز

Soooo يقول...

مفقوعة مرارتي من حماتــــــــــــي

اسرائيلي؟؟
طب والله ممكن يكون عندك حق
عشان هو فعلا دخل وشتم على المذكرات وانا باتريق في المذكرات على اغنية شعبان عبرحيم .. انا باكره اسرائيل

طب وجايلنا ليه .. مايروح لشعبان في محل المكوه بتاعته
اما اسرائيلي غبي صحيح


ملحوظه
ده انا اللي لي الشرف اني اتحط في كادر واحد مع انسانه جميله واحساسها الساخر جميل زي احساسك

الف شكر يا سوسو يا اختي



سلامووووووووووووز

Soooo يقول...

واحدة مفروسة

الظلم وقته ساعه .. لكن الحق وقته باقي اليوم .. عشان احتمال باقي الاسبوع يروح الساحل الشمالي

ولا تقلقي
اي حاجه تحصل عندك ابعتيلي رسالة .. الحقني شكرا




سلامووووووووووووز

Soooo يقول...

ra7eel

الازمة دي مش دلوقتي وبس
الازمه دي بقالها فتره بس احنا ماكناش واخدين بالنا
ولما ابتدى الهجوم يتحول لشراسه .. استغربنا الموضوع

على اي حال
ادينا اتعلمنا

وربنا يسترها بقى




سلاموووووووووووووز

Soooo يقول...

خمسة فضفضة

وعليكم السلام ورحمة الله وبركاته

الله يكرمك يارب ويسعدك دنيا وآخره



سلامووووووووووووز

Soooo يقول...

Rehab Mostafa

ياستي الله يكرمك يارب
وهو بيقرا التعليقات واكيد شاف كلامك



سلاموووووووووووووز

Soooo يقول...

فاتيما

زين فتحه زا
ريه فتحه راا
عين فتحه عااا
زاراعااا
زاراعا الفلاح البانجو
----
شفتيني وانا في فصول نحو الاميه
----
وتصدقي ان المثل اللي ضربتيه ده فعلا صح
وتصدقي اني كنت مستغرب علبة السجاير بتاعتي راحت فين؟؟؟
يلا هي ماكانش فيها غير بتاع سيجارتين



بتسلميلي على مامتك ولا لأ ؟؟؟




سلامووووووووووووز

dodda يقول...

وفيها ايه لما تتشتم؟؟؟؟
احنا حننسى ان الشجره المثمره هى اللى بتتحدف بالطوب؟؟؟
بس عمر الشجره ما اتقمصت وقالت مش طارحه
طب حننسى ان كتير اوى ملهومش لازمه اتشهروا بالطريقه دى ..طريقة الصوت العالى والكلام الخارج؟؟؟
انا اعرف ان فى بلاد سيرتها بتيجى كتير اوى دلوقتى عشان بتشتم فى الاسلام والرسول عليه الصلاة والسلام
لا هم متقدمين فكريا ولا اى حاجه بس الشتيمه عملتلهم قيمه!!!!
اذا كان الرسول اتشتم...عمرنا ما حنتكسر
واذاالاسلام اتحارب مش حنكفر ....
متسيبش الواطى يعلا ويطلع على كتافك لان دى حتبقى غلطتك مش غلطته

أسيرة الأقدار يقول...

على فكرة صاحبك الصحفى ده جامد مووووووت .. ورأيه حلو اوى ومعاه حق دلوقتى الناس بقت بتستعمل اساليب كتير اوى علشان يهاجموك مش لازم يعنى يسلطوا عليك اتنين قد درفة الدولاب زى الافلام العربى .. الهجوم الفكرى اصعب وتأثيره أقوى .. اشكر لى صاحبك ده اوى :d واشكرلى نفسك علشان نقلت لنا كلامه :p

Dr. Ibrahim يقول...

صح اى واحد ناجح معرض انه يصاب بنوع من الإحباط بواسطة شرذمة من المعتوهين اللى عايزين يرجعوا البلد والإبداع لورا

أحيييك يا سووو
وأحى شباب مصر الناهض الواعد
وأحييكم من مقرى هذا
وهبقى أشوفكم بعدين

د/هيما

أشوفكم فى الجنة ان شاء الله

Soooo يقول...

dodda

اللهم صلي على سيدنا محمد

مشكلة الشتيمه في انها حاجه كده تخنق
لكن اللي يتشتم لو حط في دماغه مين اللي شتمو وليه وبتاع ايه .. يبقى هو كده بيعطل نفسه


سعيد بزيارتك وتعليقك واتمنى انك تعتبري مدونتي زي مدونتك تمام وتشرفيني دايما بتعليقاتك




سلامووووووووووووز

Soooo يقول...

أسيرة الأقدار

ياستي نقلته كلامك وبيقولك الف شكر
انا بقى بقولك مااااااشي
هحرمك من الميراث



سلامووووووووووز

Soooo يقول...

Dr-hema

شرذمه
!!!
دي زي أقذع كده؟؟؟

اتاريك بتعرف لغات ياهيما وانا مش واخد بالي

نورتني يا دكتره وربنا مايحرمني منك ومن تعليقاتك



سلامووووووووووووز

جيهان علي يقول...

السلام عليكم ورحمة الله وبركاته

بغض النظر عن اللى كاتب تعليق على اي موضوع ايه هدفه من ده خاصة الهجوم والتجريح
كل واحد فينا عنده عقل يقدر يميز به اللي بينقد بجد وفاهم هو بيقول ايه وعايزك تكون افضل بجد وبين اللي بيهاجم لتحطيم وبين بقى اللي بيشتم بس
الأولاني أنا أحترمه جدصا وأناقشه أوي للإستفاده
التاني هاناقشة عشان افهمه بس انه مش فاهم حاجة اصلا
الثالث ده بقى مش هاقدر استخدم اسلوبه مهما حصل
لكن هاقدر استعمل اسلوب التجاهل تماما

لن طول ما عندي كلام هاكتبه وطول ما عندي رأي هاقوله

تحياتي