السبت، ٢٧ ربيع الآخر ١٤٢٩ هـ

ليه يا دنيا !!؟

بتسألين ليه يا دنيا مالي !؟
وجوابي ليكي .. شوفي حالي
-
العمر فايت من جنبي
والقطر دايس على قلبي
-
حاسس بموت جوا عيوني
والخوف ما فارق مره جفوني
-
حاسس اني بموت علشان اعيش
أو يمكن اموت وهمّي لسه مابينتهيش
-
يمكن حياتي دي تكون سراب
ومن بعد عذابي هشوف عذاب
-
وفوق ده كللو لازم اعيش
أعيش وعيشتي ماتساوييش
-
واعيش ازاي ولمين وليه
مجروح في قلبي ومين يداويه
-
وللا يمكن اعيش بس وخلاص
وعمر عمري مايشوف الخلاص
-
سيبيني في حالي يادنيا بابكي
ابكي بدال ما الاقيني باشكي
-
واشكي لمين وازاي وليه
مجروح في قلبي ومين يداويه
-
واشكي ايه ومين يجاوبني
ماهو حالي يادنيا .. مش عاجبني
-
أقولك يا دنيا .. ادعيلي دعوة
إني في يوم الاقيلي غنوة
-
غنوة حالها يكون موّالي
وبالي فيها مايكونش خالي
-
أمانة عليكي يادنيا سيبيني
ومسير سنيني .. هي تداويني
-----

.. تحديث
.. المدونه الجميله والرقيقه كاميليا
كتبت تعليق لم استطع ان أرد عليه
فآثرت أن اضعه كتحديث لكي تقرءوه معي
---
لا قلبى مليان ولا خالى
عايش .. ومهما جرالى
من يأسى أقول وأنا مالى
-
والغريبة ان الحياه ماشية .. مش عارف رايحة فين
وانا واقف مكانى هنا .. باتفرج عليها من سنين
-
وكل يوم اقول اهى جاية ناحيتى
الاقيها تختار طريق غير سكتى
-
أكونش انا اللى واقف فى مكان مجهول؟
او معرفتش اعلى صوتى وادق الطبول
-
.. وادخل معركتها
احاربها باسلحتها
-
يمكن فى يوم ألفت نظرها
تلف ناحيتى وانا ف انتظارها
-
وتاخدنى بالاحضان
قبل فوات الآوان
-
كل شئ ممكن
وحتى لو مستحيل
لسة عندنا الليل
والحلم فيه ممكن
-
الف شكر يا كاميللو على مشاعرك الرائعة
ربنا يحميكي يارب
سوووو

هناك ٩٨ تعليقًا:

اهو ده عيبه يقول...

يا لهوى يا لهوى يا لهوى على رايك
انا اول واحدة مش ممكن

رئيس جمهوريه نفسى يقول...

اول كومنت

اهو ده عيبه يقول...

ايه الكلام الجامد ده يا عم سوووو
بس انت شكلك زعلان من الدنيا قوى
هى كده بقى الدنيا هنعمل ايه اذا اقبلت باض الحمام على الوتد واذا ادبرت بال الحمار على الاسد

ربنا يعديها على خير

رئيس جمهوريه نفسى يقول...

طار يا سو
كان حيبقى شعور لذيذ وانا اول كومنت
قبل بس ما علينا
بص يا غالى لو خليت
والخوف ما فارق مره جفوني
بقيت والخوف مفرقش جفونى
حتبقى اسهل فى النطق
--------------
وجروح فى قلبى ومين يدويه
خلتها وجرخ قلبى مين يدوايه
بس عموما حلوه قوى يا عجوز
سلاموز يا غالى

AHMED SAMIR يقول...

لونك حزايني ليه كدة يا فسواني
دة انت لمفروض تكون منتعش ومبتهج
دة بكرة عيد ميلاد فخامته
افرح يا راجل...وارمي ورا ضهرك
تحياتي

wanna b a physician يقول...

وفوق ده كللو لازم اعيش
أعيش وعيشتي ماتساوييش


حلوه الجملة دى بس نسيت تقول حاجة عن العيش نفسه
تحياتى

Empress appy يقول...

ولما تبقى انت اللى سيبت الدنيا يبقى بتلومها ليه بتديها ضهرك انت حر اللى عملت كده
اقلع النظارة السودا والبس البمبى هتلاقيها كده
متقعدش تحط ايديك على خدك وتشوف عمرك بيجرى من غير ما تمسكه اللى بيفرط فى حقه ميستهلش يعيشها

koko يقول...

عارف يا سوووو الدنيا بتبقى حلوة امتى؟ لما نلاقى الى يشاركنا مشاعرنا و اوقاتنا و احلامنا .. الدنيا بتبقى حلوة و النضارة الوردى بتشتغل علشان الهم بيتقسم على اتنين و الفرح بينضرب فى اتنين .. لما تحس ان فيه حد معاك مهما حصل .. و ان كل شئ ممكن يتعوض ..

الى بيخلى الدنيا حلوة ان يكون فيه امل فى بكره احلى و اوحش حاجة فى الدنيا ان مايكونش فيه حلم لبكره و الايام كلها شبه بعضها .. مش فارقه كتير ..

سلوى يقول...

سيبيني في حالي يادنيا بابكي
ابكي بدال ما الاقيني باشكي
-

تعرف إني مش عارفه أعلق وأقول إيه

بس كلام جميل رغم إنه حزين

إيييييييه
آدي حال الدنيا

إكتب كتير يا سوووو

دمت بكل خير

الساحرة يقول...

اول مرةاجي هنا الاقي الدنيا غامقه

كدةليه

بص كبر دماغك وحاول تحلي الدنيا

الدنيا احنا اللي بنحليها مش هي

اللي حلوة

سكر احناههههههههه اضحك وبكرة ربك

يفكها

Soooo يقول...

اهو ده عيبه

انتي جايه تلهوني عندي زي مانا لهونت عندك؟؟؟
يالهوي عليكي

وبعدين ياستي ولا كلام جامد ولا بتاع
دي حاله عاديه معايا من زمان والموضوع ده انا كاتبه من زمان بس الايام دي الحاله زادت قوي .. قمت منزله

وفعلا هي دي الدنيا .. ولو اني باحب المثل اللي بيقول .. وما الدنيا الا شاشة عرض ال سي دي .. صيني



سلاموووووووووووز

فاتيما يقول...

أيه اللون الغامق دا يا سووو ؟؟
ربنا يروق الأحوال
و بعدين بتقول للدنيا تسيبك فى حالك و مسير السنين تدوايك ؟؟
طب مالدنيا و السنين حاجة واحدة يا سوووو ...
الأتنين بياخدوا منك و يدولك برضو إنت و نصيبك معاهم ...
و حالة الخنقة دى يا رب تنتهى
يا صديقى

Soooo يقول...

رئيس جمهوريه نفسى

ياسيدي ولا طار اول تعليق ولا حاجه
وهنعتبرك برضه اول مكركر .. ولو اني مش باعترف بأول تعليق وكل التعليقات اللي بتيجيلي باعزها وباقدرها
----
نخش بقى لكلامك ولنقدك وانا بحب الحوارات دي موووووووووز

انت بتقول كان ممكن اقول
والخوف مفرقش جفونى
بدل
والخوف ما فارق مره جفوني

نمسكها من ناحية الوزن اولا
الكلام ده عاميه .. والوزن في العاميه بيتحكم فيه بحر فعولن
يعني اوزنها هتلاقيها جايه
فعولن فعولن فعول

حاسس بموت جوا عيوني
والخوف ما فارق مره جفوني

بينما لو قلت
والخوف مفرقش جفوني
هبقى كسرتها بالشين والكسره اللي وراها

نيجي بقى للمعنى

الفرق بين
ما فارق مره جفوني
وبين
مفرقش جفوني
فرق شاسع
ازاي بقى
ممكن تعزم على واحد بسجاره يقولك مابشربش .. يعني ممكن زمان كان بيشرب بس هو حاليا مش بيشرب .. بينما لو قالك ماشربتش مره سجاره .. يبقى عمره ماشرب سجاير في حياته
هي نفس الحكايه
الخوف مافارقش مره جفوني .. مش كان مفارق وبعدين جه على حين غره
حلوة حين غره دي
-----
الجزئيه التانيه
البيتين بيقولو
واعيش ازاي ولمين وليه
مجروح في قلبي ومين يداويه
وكلمة (مجروح) مش معطوفه بحرف واو العطف كزياده على الشعور للبيت الاولاني .. لأ دي على اسم مفعول لأنه تقرير حاله

والفرق بين
مجروح في قلبي ومين يداويه
وبين
وجرح قلبي مين يداويه
زي الفرق بين واحد مولود بابتلاء من ربنا وعنده مثلا مرض من اول ما اتولد .. وواحد جاله المرض ده لما كبر

يعني البيت بيقول ان الشخص ده مجروح في قلبه ومش جرح واحد لأ دول عدة جروح ومن زمان .. يمكن من اول ما اتولد .. لكن (وجرح قلبي مين يداويه) يعني ان هذا الشخص اتجرح مؤخرا في قلبه .. جرح واحد فقط
----
وعموما يابو حنفي .. دي كلها شخابيط يعني
ولا هتجيب ولا هتودي

ولا انت شايف ان الكلام اللي قلته ده ممكن يتباع ويجبلي قد نص خروف مشوي ومحشي بالرز والمكسرات؟؟؟




سلاموووووووووووز

Soooo يقول...

A.SAMIR

لأ
انا زعلان منك ومخاصمك كمان
بقى ياجدع تختفي الاختفاء الرهيب ده وماتعبرنيش كده ولا مره واحده
ليه ياعمنا
هو انا خطفت شندوشت شاورما كان في ايدك ؟؟؟

وبعدين على فكره
اللون الحزايني ده انا عايش فيه من زمان بس مش بابينو للناس وبحاول اخليهم يضحكو
يعني
الناس مش ناقصه هم وغم
بس هي طلت معايا اديها شوية نكد
مره من نفسي يا جرع
ولا هو حرام ولا ايه؟؟؟

سعيد بزيارتك بجد وياريت ياعمنا ماتختفيش كده مره تانيه



سلامووووووووووووز

Soooo يقول...

wanna b a physician

العيش والعيشه واللي عايشنها ياجرع
اي خدمه يادكتره

وبعدين بقولك ايه ماتجوعنيش وتخليني اقوم اجيب رغيف عيش واحشيه بأي حاجه
انا مكتئب
سيبني اكتئب شوية قبل الغدا





سلاموووووووووووووز

Soooo يقول...

appy

مافيش انسان في الكون بيسيب الدنيا وبيديها ضهره وبيفرح بقعدته يندب حظه

لكن المشكله ان الدنيا مش بتدي فرصه للانسان انه يقولها هو عايز ايه منها
او حتى يقولها وهي ماتبقاش واخده بالها او واخده بالها لكن مش عايزاه

في ثانيه تبقى معاه فل الفل ويبقى خلاص بيقول اهو وشايف انه ممكن احلامه تتحقق

لكن هوووووب

بتروح الدنيا نفسها ضارباه على قفاه وبتقولو فوق .. انا مع غيرك
ماتحلمش
ماتفكرش
ماتقولش
؟؟؟

يعمل ايه الانسان ساعتها
يروح يخطف الدنيا غصب عنها ويجبرها انها تسمعه وتسمع كلامه وهي بتقولو انها مع غيرو .. ولا يقولها سيبيني يا دنيا وروحي لغيري .. بما انك عايزه كده بمحض ارادتك

حاجه كمان
الحكمه اللي بتقول .. تؤخذ الدنيا غلابا .. يعني بالعافيه والغصب دي حكمه فاشله
لسبب بسيط جدا
ان لو الانسان حب ياخد كل حاجه بالعافيه من غير تراضي .. يبقى هنعيش في غابه .. وانا مش انسان الغاب طويل الناب

وبعدين انتي داخله سخن ليه
ده بدل ماتطبطبي علي وتعزميني على شندوشت شاورما ولا فاهيتما من كوك دور

يالهوي عليكي وعلى بخلك





سلاموووووووووز

Soooo يقول...

koko

منورة البلوج سبوت كللو والله يا كوكو
-----
الله ينور عليكي
الدنيا بتبقى حلوة فعلا لما نلاقي اللي يشاركنا احلامنا وحياتنا وافكارنا وضحكنا وبكانا

وبالنوسبة للأمل في بكره دي .. المشكله ان الواحد كل مايقول في أمل .. يلاقي ولا أمل ولا عمر ولا حتى كتاب المطالعه بتاع اعدادي
وحتى لما بيجي يحلم .. بيلاقي الدنيا بتقولو اياك تحلم بي
اياك
خليك عايش زي مانت كده
انا مش هسمعك

ساعتها الانسان بيقول ان فعلا .. الايام كلها شبه بعضها
ومش فارقه






سلاموووووووووووووووووز

Soooo يقول...

Salwa

مابلاش اكتب احسن
بلااااااااش

انا جوايا حزن يكفي الكون كللو ويزيد
خليني احاول اضحك الناس
اضحك غيري بما ان الضحك نسي طريق قلبي

وبعدين مش مهم اضحك
انا واحد بطوله
المهم ان الناس تضحك


نورتيني والله والمدونه كانت مفتقده طلتك وتعليقاتك




سلامووووووووووووز

Soooo يقول...

الساحرة

منوراني وياريت تعتبري مدونتي زي مدونتك تمام وتشرفيني دايما بتعليقاتك الجميله وبتشجيعك

اما بقى اني قالبها نكد .. فصدقيني غلطه وكل ما اقول انا مش هنكد على حد واقضيها ضحك عشان الناس تضحك .. اقوم انسى وقالبها نكد

لكن ان شاء الله مش هكررها تاني وده وعد مني

وخلي الشعب يعيش
خلي الناس تضحك





سلاموووووووووووووز

Soooo يقول...

فاتيما

ياستي ولا لون غامق ولا بتاع
دي مجرد حالة عابره وخلاص

وعلى فكره
الدنيا مش هي السنين
الدنيا هي الواقع اللي عايشينه دلوقتي
السنين .. هي الواقع اللي لسه ماعشناهوش ومانعرفش مخبيلنا ايه

فهمتي حاجه؟؟؟
وبعدين قوليلي هنا .. بسلميلي على والدتك ولا بتنفضي؟؟؟؟؟




سلاموووووووووووووز

Z_Diva يقول...

soooo, maza 7adas lak, a2asabtak 3dwa elekt2ab anta aydan, taban lhazih el7yah, tk2b elmfrfeshen, wala tferfesh elmkt2been :S, m3lesh kollo by3dy, wes2al el5obra :D

Empress appy يقول...

بكرهه فيك ضعفك
لان قوتي انا من قوه اللى حوليه
وانت من القريبين ليه

Soooo يقول...

Z_Diva

كلا يا سيدتي لم تصبني هذه العدوى
وذلك لانني مصاب بهذا الداء منذ الصغر
ولكنني كنت احاول اضحاك الناس كيلا يقال عني انني كئيب كما يقال الآن

ولذلك فقد اعدت حساباتي وقررت انني لن اتحدث فيما قد يصيب الناس بالغم والهم والنكد
ولأكتفي بمحاولاتي البسيطه في رسم ابتسامة على وجوه قرائي ومتابعيني

ومن فرج عن مؤمن كربة من كرب الدنيا .. فرج الله عنه كربة من كرب يوم القيامه





سلامووووووووووووز

أبو خالد يقول...

عبقريتك يا أستاذ
أنك تعبر عن حالة جيل بالكامل
على فكرة أنا لا أجاملك يا فنان
و لكن أعمالك تدل على عبقريتك
***
لى رجاء يا سوووو
عايزك تتابعنى و تبدى رأيك
بدون مجاملة فأنا أشهد لك
أنك ناقد كبير

رحــــيـل يقول...

سوووو

كلامك جاى على الجرح قوى قوى بجد

انا تعبت من كتر الشكوى تعرف مبقتش تفيد

كلمات جامده بجد

سلامووووووووووووووووووووووووووز يااحلى عجوز

انين الحزن يقول...

سووووووووو

هيا كدا الدنيا دي وحشه دايما مزعلانه منها بس معلش خلينا احنا الاحسن نستحمل وبتاع

سووووووو سؤال بليز هيا مدونه شاب شنكوتي مش بتفتح ليه هو قافله ولا عيب عندي انا

سلاموووووووووز وروق كدا ماشي ياعسل
وزة

Nani يقول...

السلام عليكم
شوف يا سوو موضوع الدنيا وتطنيشها مش سهل
طبعا كل واحد رح يرد بناء على تجربته ورغباته
ما في واحد بالدنيا بتركها هاد كلام صحيح
وانا باكد على كلامك لما تكون هي اصلا ما بدها انا شو اعمل شو اسوي يعني؟
الحل الوحيد اني استنى فرج الله من فوق ولحينها بده الواحد يمشي يوم بيوم
من غير اي طعم او لون - رمادي فقط-

اما بالنسبة لآبي من بعد اذنك
اذا كان سوو من المقربين الك المفروض تدعميه وتساعديه من باب الصداقة او الاخوة او اي شعور انساني، فيك تنتقدي لكن من غير ما تجرحي
"لان قوتي انا من قوه اللى حوليه" انت قوية بوجودهم حولبكي طيب هم اقوياء بوبجودك معهم؟

Rehab Mostafa يقول...

ايه الكلام الجامد ده يا سوووو
مع انه حزين بس حلو

أقولك يا دنيا .. ادعيلي دعوة
إني في يوم الاقيلي غنوة
-
غنوة حالها يكون موّالي
وبالي فيها مايكونش خالي

عجبني أوي الكلام ده

بس مش من مصلحتك تزعل من الدنيا :)
سلام يا سوووو

Esraa Hamed يقول...

بداية
سعيدة جداااا بمعرفتي مدونتك
بجد رااائعة و كان نفسي اتابع الحلقات اللي كنت بتنزلها من الاول
بس ياللا حصل خير
اخلص بس امتحانات و هابقي اعد اقراهم كلهم علي رواقة كده ان شاء الله

بالنسبة للبوست الأخير ده بجد تحححححححفة
عجبني جداااا
الكلمات و الصياغة رااائعة
بغض النظر طبعا عن الحزن اللي باين جداا في الكلام


ان شاء الله هتابع مدونتك دائما
و في انتظار جديدك عن قريب ان شاء الله

دمت بتألق

زى الهوا يقول...

فكرتنى بحال الدنيا فى عز ماكنت عاملة نفسى مش واخدة بالى , كلام حضرتك رائع وبيدوووووس على الوجع اوى

سلوى يقول...

يا سووووووووو
إكتب اللي إنت عايزة

حزن فرح

ماهو الدنيا من ده وده
صحيح الحزن رزل وبيطول حبتين تلاته كده

بس أهو هنعمل إيه يعني؟؟

إكتب اللي جواك

وزوار المدونه خلاص بقوا إخوانك وإخواتك

أهو تحس إن في ناس معاك
ومش لوحدك

خد راحتك واكتب إنت بس

تحياتي أخي ودمت بكل خير وسعاده

زُمُرده يقول...

انا قلبي برج حمام هج الحمام منه
________
بيتهيألي قلوبنا خلاص رحل الفرح منها

---------------
بالنسبه للبوست
اولا اكتر من رائع
وفي الجون يا سوووووو

بحب لما بتكتب كده اكتر
------
حاسس اني بموت علشان اعيش
أو يمكن اموت وهمّي لسه مابينتهيش
-----------
غنوة حالها يكون موّالي
وبالي فيها مايكونش خالي
-------------
ايوه ياعم عايزه يتشغل
غمزه

--------
ومسير سنيني .. هي تداويني

-----------------
سيبها لربنا
اشكيله وابكيله

سهر الليالى يقول...

يااااااااااه يا أحمد
لأول مرة مش هقدر أهون عليك لأنك جيت ع الجرح أوى

بس الكلام جامد اوى يا أحمد بجد
بحييك يا فندم

shreen يقول...

عارف يا سووو
كنت باقولك
انى مش باجى عندك من فترة
علشان انت دمك زى العسل

وانا فى مود كئيب
وما حبيتش اجى اغلس عليك وعلى خفة دمك

لقيت انت كمان مودك بايظ

كلامك دة يا سوووو خلانى اعيط

هى ليه الدنيا بجد بتعمل فينا كده

انا متأكدة ان قلبك طيب
وانى انا كمان طيبة
طب ليه الدنيا بتبهدلنا وتقسى علينا كده

بالرغم من ان الناس اللى ما عندهاش قلب

تلاقيهم عايشين مبسوطين
والدنيا مهاودة معاهم

عارف يا سوووو
البيت دة

حاسس اني بموت علشان اعيش
أو يمكن اموت وهمّي لسه مابينتهيش


بجد انا حاسة كده
استغربت ان دة يكون احساسك فى نفس الوقت

سوووو
نعمل ايه علشان نخرج من المود ده؟


بص انا هاقلك
حاجه بس من قلبى

انا اللى هدعيلك انك تلاقى الغنوة اللى بتدور عليها يا سوووو

ربنا يشيل عنك الهم يارب
ويديلك اللى انت عايزة

ما تستناش دعوة الدنيا يا سوووو

الدنيا غدارة

دعوة الاصحاب اللى بيحبوك من قلبهم زيى
هى اللى بتكون صادقه

دعواتى ليك من كل قلبى

Eldebug يقول...

ايه ده ... ده كله بعد التلاتين ... انت هتخوفنى ليه ياعم الحاج

----------
أقولك يا دنيا .. ادعيلي دعوة
إني في يوم الاقيلي غنوة
-
غنوة حالها يكون موّالي
وبالي فيها مايكونش خالي
----------

مصرى مصرى يعنى مش هزار ... دايما بنحب نترجم مشاعرنا ... فى غنوة بقى ولا نكتة ...مش فارقة بس المهم بترجمها

Soooo يقول...

أبو خالد

انا أقل من كل الكلام الجميل ده والله يا استاذي
والله العظيم انا أقل من كل ده
انا واحد بيشخبط اللي بيحس بيه
ماقدرش اتكلم عن جيل ولا حاجه
لان لو كل الجيل بتاع مصر بالحاله دي
يبقى على مصر السلام
----
متابعك ومستمتع بطريقه انت مش متخيلها
بتوديني بمواضيعك لمرحلة مهمة في تاريخ مصر تم تجاهلها عن عمد عشان العلاقات الدوليه
بجد باشوف المواقف اللي بتتكلم عنها وبابقى متخيلها قوي

وصدقني يا استاذي .. انا مش ناقد ولا حاجه
مجرد اني بقول اللي باحسه




سلاموووووووووووز

Soooo يقول...

ra7eel

كلنا مجروح يارحيل
كلنا مجروح

ولو فعلا كلامي عجبك .. يبقى ممكن يكون صادق لانه طالع من معاميع قلبي

يالهوي علي .. ايه معاميع دي وانا قالبها نكد بالشكل ده ؟؟




سلاموووووووووز

Soooo يقول...

انين الحزن

الدنيا لفظ جاي من الدناوه او الدينونه
يعني حاجه قليله قوي
ومع ذلك احنا في لحظات بنبقى شايفينها مهمة قوي
في حين انها ولا الهوا
-----
انا برضه استغربت زيك ومش فاهم ايه اللي حصل لمدونة شنكوتي
بس اعتقد انه بيعمل نيو لوك ولا حاجه كده
وربنا يبعد عنه وعن كل المدونين الازمات اللي ماشيه فينا كلنا




سلاموووووووووز

Soooo يقول...

Nani

وعليكم السلام ورحمة الله وبركاته
تصدقي يا ناني
انتي بنت جدعه وبمليون راجل والله

وياستي اابي نظامها في التشجيع والشد من الازر كده
مش بتحب حد يطبطب عليها وشايفه ان الواحد لازم يبقى قوي طول عمره
ولو ضعف مره
يبقى يسيب القطر يدوس عليه احسن
وجهات نظر



سلامووووووووووووز

Soooo يقول...

Rehab Mostafa

ياستي ولا كلام جامد ولا حاجه
دي خطرفة راجل عجوز مش اكتر
وبعدين هو عيب اني اقول لون حزايني شويه وافضي جزء من مليار جزء من حزني
ده حتى يبقى حرام

وبعدين لو انا زعلان من الدنيا من وجهة نظرك .. هل تعتقدي اني هطلب منها انها تدعيلي ؟؟؟




سلاموووووووووووز

Soooo يقول...

Esraa Hamed

بجد سعيد بكلامك الجميل ده واتمنى انك تعتبري مدونتي المتواضعه زي مدونتك تمام وتنوريني بزياراتك وتعليقاتك يارب

وبعدين هو اللون حزايني شويه .. يعني كنوع من الفضفضه
بس هي شكلها قلبت نكد بطريقه انا مش متخيلها
واعتقد انها هتكون آخر مره افضفض فيها
واحاول ارسم ابتسامه على وشوش الناس واساعدها انها تضحك شويه مادمت انا مش قادر اضحك من قلبي

بجد سعيد جدا بزيارتك وربنا يوفقك في الامتحانات يارب وتبقي تيجي على اقل من مهلك والمدونه مش هتطير ان شاء الله




سلاموووووووووز

Soooo يقول...

زى الهوا

المشكله اني عارف حال الدنيا تقريبا من اول ما اتولدت
لكن كنت بحاول اعمل حاجه لغيري اكتر من اني اهتم بنفسي
عايز اخلي غيري يضحك حتى لو انا مش عارف

ملحوظه
الله يكرمك بلاش كلمة حضرتك دي بتجبلي حساسيه وبتحسسني اني عندي الفين سنه ق م




سلامووووووووز

Soooo يقول...

Salwa

الناس مش ناقصه هموم على همومها ياسلوى
وفي ناس كتير قوي بتدخل عندي عشان تضحك شويه وتنسى وجعها
اقوم انا انكد عليهم؟؟؟
دي تبقى عيبه في حقي وانا صعيدي وافهم في الاصول

وصدقيني .. مافيش حاجه اسمها اخوات في عالم التدوين
كل واحد مجروح وفي همو
يبقى احسنلي ادفن همي
واحاول اشيل هموم غيري .. وربك كبير

لا تقلقي
عمر الشقي بقي




سلامووووووووووز

Soooo يقول...

زُمُرده

والله ما عارف اقولك ايه
بس بجد شكلي كده مش هتكلم عن احزاني خالص
عشان ماحدش يفسرها بتفسير غلط او اني ضعيف
حاكم الضعف دلوقتي بقى بيخلي الناس تشمت وتفرح في الواحد

وعلى فكره
انا كده طول عمري بس بحاول اخلي غيري يضحك مادمت انا مش قادر اضحك




سلاموووووووووووووز

Soooo يقول...

سهر الليالى

تهوني علي؟؟؟
انا يابنتي في الحاله دي من زمن
امال انا قايل اسم المدونه عجوز ليه
من كتر العجز اللي انا عايشه

الحكايه ومافيها اني كنت بحاول اضحك غيري مادمت انا مش قادر اضحك

لكن واضح اني مش هتكلم عن حالتي وخليني في محاولتي لرسم الابتسام على وشوش الناس
الناس اللي زيي ومجروحين

نورتيني ياستي والف شكر على تعليقك




سلامووووووووووووز

Soooo يقول...

shreen

عارفه ياشيرين
انتي ماتعرفينيش قوي
الناس اللي تعرفني قوي وبتشوفني وجها لوجه لما باتكلم في الحياه من غير ما اهزر بيقولو ان في عنيني حزن عمره مليون سنه
ودي حقيقه
انا تقريبا مش فاكر يومين حلوين على بعض بجد
ولا حتى يوم واحد

ونتيجة لده حاولت اعمل لغيري اللي ماحدش عملو معايا
حاولت ارسم ابتسامه على وشوشهم
حاولت اضحكهم من قلبهم مادام قلبي نسي طعم الضحك والفرح

وحتى لما جيت اتكلمت
ناس كتير اتضايقت

يبقى الاحسن اني انفذ مخططي الاصلي واستمر في خططتي في اضحاك الناس
وربك كبير



سلاموووووووووووز

Soooo يقول...

Eldebug

وحياتك انت كل اللي انا فيه ده من وانا عندي اقل من عشر سنين
متخيل؟؟
انا ماوصلتش لاسم مدونتي عجوز وعندي تلاتين سنه من فراغ
لا
ده من كتر الوجع والهموم
بس حبيت اني اخلي غيري يضحك ويفرح مادمت انا مش قد الضحك

وعلى فكره
المصري الوحيد اللي يقدر يضحك الناس وقلبه مليان بوجع وهموم واحزان




سلاموووووووووووووووز

هناء يقول...

أنا فهمت علاش عجوز و عندي 30 سنة...
كثيرا ما نكابر لنخفي احزاننا و لكنها تظهر عندما نتعب منها خصوصا اذا كان عمرها من عمرنا.
سلام

Doba يقول...

دوس عالدنيا وامشى عليها
انا ولا انت لينا ايه فيها

طنش
تعش
تنتعش

طنش الكآبة
تعش سعيد
تنتعش بالراحة لنفسية

سيب نفسك لربنا وقرب منه قوى
وتأكد انه الوحيد اللى هيريح بالك
===============
بس سيبك انت اخيرا جبتلنا حاجة جديدة غير المذكرات - ده انت كنت قايل هتنزل موضوعين تلاتة فى الاسبوع

فى انتظار موضوع مشرق لو سمحت
كله نقد نقد مفيش حبة موضوعية

سلام يا صديقى
هبة

Unknown يقول...

بعتذر جدا للتعليق خارج الموضوع
أرجوا زيارتى لأمر هام ضرورى

و لكم جزيل الشكر

Mafrousa يقول...

هش يا دنيا هش يادنيا يا وحشه كده تزعلى سوو..
ماتزعلشى يا سو ما هيه الدنيا كده مره تضحكلك و كتير تكشر فى و شك و الصراحه هيه بقالها شويه مكشره ..وانا مش عارفه اعمل معاها ايه...بس السنين للاسف عايمه على عوم الدنيا ..وانا قررت انى اكون اقوى انا حاطه كل الافلام اللى تضحك و المسرحيات اللى تضحك لغاية لما اضحك غصب عنى اقوم افوق و انت ممكن تدعبس فى المدونات فيه حاجات بتضحك ممكن تخفف عنك شوية ....

همس الاحباب يقول...

طبعا بما انى مش فاهم الموضوع ايه
اسلم وامسى واصبح على اجدع سوووووو فى الدنيا
وكلماتك بتعبر عن حاجات كتير وتفصح عن انسان راقى فى مشاعره ونبيل فى اخلاقه
كلمات رائعة ومعبرة قوى يا سوووووو
وربنا ينوللك اللى فى بالك
ويخلفك خيرا منه ان شاء الله
سلاموووووووووز يا سووووووو
وحشتنى على فكرة

ابو على يقول...

منووووووووووور يا عم سووو
قولى الاول اسمك ايه ولا اغنيلك سو يا سو حبيبى افترسوه
تعرف انا حاسس انى بعد تلت او اربع سنين هابقى زيك كده واقول نفس كلامك
كلامك بجد بحس فيه انه بيكلمنى انا
نفسى القطر يقف شويه نفسى اقف ارجع ابص ورايا شويه واتفرج ع الحاجات الحلوه الى فاتتنى
لكن القطر عمال يجرى يجرى مش لاحق ابص هنا ولا هنا
وف الاخر هاقولك
اوعى القطر يا عم الحج:D
تحياتى يا باشا

جيهان علي يقول...

السلام عليكم ورحمة الله وبركاته


كلمات جميلة جدًا
أجمل ما فيها إنها بتعبر عن حالة ناس كتير
وده اللى المفروض يكون في أي كاتب ناجح أنه لما يكلم بلسانه يعبر عن ناس كتير مش مجرد حالة تخص شخص واحد فقط



تحياتي

بنت مصريه يقول...

ايه يا عم الجمال ده
بص شوف سووو بيعمل ايه
بص شوف سوو بيقول ايه
هههههههههههههههههههه
ربنا يخليلك دماغك يا رب
احييييييييييييييييييييك

حسبي الله ونعم الوكيل يقول...

حلوة حلوة حلوة
وياريتها تستجيب وسيدى ياسيدى على الاشعار انت ناوى تغير ولا اية

Dr. Ibrahim يقول...

ليه يا دنيا دستى على دراعى
كان مال ومال اللى جرالى
كنت ماشى دايما فى حالى
معرفش وقعت ايه اللى جرالى

وأه من من وقعتى على دراعى
اتكسر وجبسته
هههههههههههههه

د/هيما

Soooo يقول...

هناء

اي نعم
كلامك كللو صح ميه في الميه

وانتي ازيك وايه الاخبار؟



سلاموووووووووز

Soooo يقول...

Doba

عارفه ايه اكتر حاجه بيعاني منها الاطباءالنفسيين
انهم لما بيصابو بتعب نفسي او بشد عصبي
مش بيبقو عارفين يعالجو نفسهم
بالرغم من انهم عارفين العلاج كويس قوي
----
وهي دي نفس حالتي
عارف ايه علاجي
بس مش قادر



سلامي ليوسف افندي




سلاموووووووووووز

Soooo يقول...

عاليا حليم

قريت موضوعك وكنت قبل كده بلغت محمود مايهتمش بالكلام ده ويقفل التعليق لغير المعرفين او يعمللو موديريشن
وانا متأكد انه مش بالضعف ده وهيرجع تاني
هو تلاقيه بس بيريح اعصابه شويه




سلاموووووووووووووز

Soooo يقول...

واحدة مفروسة

عارفه لما الدكتور يوصفلك الدوا ومن جواكي تبقي شايفه انه مالوش لازمه العلاج
او مافيش حافز عشان تخفي وتبقي كويسه
وتقتنعي انه عادي تعيشي زي مانتي عايشه واهي ايام وبتعدي

اهو هو ده بقى
شعور هايل هايل هااااايل
شوفولي تربه ادفن نفسي فيها يا جرعان






سلامووووووووووز

Soooo يقول...

همس الاحباب

موضوع ايه يابو همس ؟؟
دي قصة حياتي ياعمنا
انا حياتي كده اصلا بس مافيش حد عارفها وكللو عايز يشوف الوش اللي بيضحك ويضحك معاه

انما انا من جوايا مراجيح سيدي الظرظوري


سلامي لهمس بنت اخويا




سلامووووووووووووز

كاميليا بهاء الدين يقول...

تسألينى ليه يا دنيا مالي !؟
وجوابي ليكي .. شوفي حالي
.......
لا قلبى مليان ولا خالى
عايش .. ومهما جرالى
من يأسى أقول وأنا مالى

والغريبة ان الحياه ماشية مش عارف رايحة فين
وانا واقف مكانى هنا باتفرج عليها من سنين

وكل يوم اقول اهى جاية ناحيتى
الاقيها تختار طريق غير سكتى

أكونش انا اللى واقف فى مكان مجهول؟
او معرفتش اعلى صوتى وادق الطبول
وادخل معركتها .. احاربها باسلحتها
يمكن فى يوم ألفت نظرها
تلف ناحيتى وانا ف انتظارها
وتاخدنى بالاحضان
قبل فوات الآوان

كل شئ ممكن
وحتى لو مستحيل
لسة عندنا الليل
والحلم فيه ممكن

تحياتى وتقديرى
لاخى اللى مش ممكن

كاميليا

Soooo يقول...

ابو على

لو عايز تعرف اسمي .. روح لموضوع انا كاتبه اسمه (يعني ايه سوووو) وانت هتعرف انا فين مين ليه

وعلى فكره .. الحكايه مش انك هتبقى كده بعد تلات ولا اربع سنين .. الحكايه انك تحاول ماتبقاش كده
وماتسألنيش ازاي عشان انا مش عارف والله ياريس



ملحوظه
انا من سوهاج




سلامووووووووووووز

Soooo يقول...

جيهان علي

وعليكم السلام ورحمة الله وبركاته
والله احرجتيني بكلامك
بس في حاجه قالها نجيب محفوظ الله يرحمه
قال ايه
قال ان الوصول للعالميه بيكون من التوغل في المحليه
وبالقياس
اعتقد انه للتعبير عن آراء وافكار الجيل بتاعنا
يبقى لازم كل واحد مننا يغوص جوا نفسه ويتكلم عنها
هيلاقي ان كلامه مش عن نفسه وبس
لأ
ده عن الجيل كللو





سلامووووووووووووز

Soooo يقول...

بنت مصريه

اشكركم اشكركم اشكركم
هابنيلكم مستشفى وجامع
والمستشفى هايكون استثماري والجامع هيكون صندوق التبرعات بتاعته لجيبي الخاص
ايوان .. ماهو كللو مشاريع

نورتيني




سلاموووووووووووز

Soooo يقول...

حسبي الله ونعم الوكيل

ربنا يحلي ايامك يارب
وياستي انا ولا ناوي اتغير ولا حاجه
هي بس حاجه شخبطتها وخلاص
طلعت كده
والحمدلله انها عجبتك

نورتيني




سلامووووووووووووز

Soooo يقول...

Dr-hema

الف سلامة على دراعك
ماتاكلش سمك ولا بيض بالبسطرمه
قضيها قرنبيط وفلفل متحمر





سلاموووووووووووز

غير معرف يقول...

جامده اوى يا سووووو
بس ليه حزاينى كده

دانا بدخل عندك اغير جو
الاقى كده

بس حلوة اوى

سلاخووووووووووووووخ
:)))

رئـــــيسـة حزب الأحلام يقول...

العمر فايت من جنبي
والقطر دايس على قلبي

هو فايت من جنبك انت كمان ياسو ودايس على قلبك يلا كلنا لها
تحياتى لك ياسو انت باين عليك حزين

Rehab Mostafa يقول...

من حقك طبعاً ياسوووو
أنا كنت فاكره انك زعلان منها .... بس كويس انك مش زعلان ... كده أحسن كتير ... ارضها عنها علشان ترضى عنك وتعرف تعيشها
وربنا يرضى عننا جميعاً يا سوووو :)

بنوته مصرية يقول...

ايه يا سووو
امال بتفضل تقولي بلاش تشائم وبتتكلم معايا علي الالم والتفائل
انت بتضحك عليا بقي



بجد مش هقدر اقولك رئي لانه مش هيديك حقك بجد

اكثر من رااائع يا سووو

تحياتي اخي العزيز

رندا يقول...

دنيتى

لية واقفة فى سكتى
عايز ارجع واحب واعشق مطرحى

ازاى اقدر احس بدنيتى
تايهة فى دنيا بلاد الله اسئل على نفسى

وابعد بخيالات وارجع لخيالى
الاقيتكى واقفة فى سكتى

وارجع انادى واندهك
زى طفل واخد بخطوتك

وان عطفتى دة يكون من محبتك
وان حضترتى الاقى روحى فى حضرتك

فرسمت خيالى فى جنتك
ولازم افضل اسئلك

لية كسرتى قلبى بقسوتك

واسئلك نفس السؤال
الاقيكى جاية بكسفتك
ارجع واحبك واعشقك

واسامحك وارحمك
جوبيتى وانا راح اسمعك
رغم جمودك وقسوتك


تحياتى لكلامتك الجميلة

رندا

الـسـيـدة نـون يقول...

مال لونك حزاينى كدة ليه يا سوووو
انا اغيب اسبوع الاقى اغلب المدونين حزانا كدة
مالكم يا شباب مصر
جرالكم ايه

الكلمات طبعا اكتر من رائعة يا سوووو
بس بجد مالك

الـسـيـدة نـون يقول...

سوووو
يعنى ايه المدونة هيفضل اسمها زى ما هو بس لوحدها
واضح ان دى اجابة ليها عمق فلسفى
انا مقدرتش اوصله
ممكن توضحلى اكتر
ولاحظ فى اختيارك لالفاظك انك بتخاطب واحدة خيخة
يعنى نقى كلام مباشر وواضح وصريح حتى يسهل على امثالى من الخيخة فهمه بسهولة ويسر دون تعقيد


فى انتظار توضيحك يا سوووو
اختك الخيخة خيخة

مشمش يقول...

مكنتش اعرف انك كمان شاعر جامد كدة دة كتير علينا احنا هنعيط لازم نعيط باة
بجد الكلام جميل وحزيين اوي ربنا يعينك

سمية يقول...

أوعى تفكر فى يوم من الايام اننا معاك علحلوة و بس ... و اننا مش عايزين نسمع منك غير اللى يضحكنا وبس ..

لاننا لو فعلا كده يبقى ملناش دور فى حياتك زى ما انت ليك دور كبير فى حياتنا ..

اشركنا فى همومك زى ما بنغرقك فى همومنا.. وللا احنا يعنى بنتقل عليك اما بنشتكى؟!!

تحياتى لك و لما كتبت..

المـــفـــــــقــــــــوعـــــة مــرارتـهــا يقول...

جميلة كلماتك ياسو وكلمات كايليا كمان جميلة
بس انت ليه زعلان ... ربنا يسعد أيامك ونشوف أبتسامتك مالية مدونتك دايماً

Soooo يقول...

كاميليا

عجزت ان ارد على كلامك الجميل ومالقتش غير اني احطه جنب كلامي .. يمكن كلامي يتعدي منو ويطلع في حلاوة وعذوبه ورقة مشاعرك

وربنا يسهل ويكون اتعدى منه وبقى حلو زي كلامك






سلاموووووووووووووز

Soooo يقول...

shayma

مره من نفسي يا شيمو انكد عليكم
مانا اكتشفت اني عندي مشاعر واحاسيس برضه
تخيلي؟؟

نورتيني ياشيمو والف شكر على كلامك وعلى تعليقك الجميل




سلاموووووووووووز

Soooo يقول...

رئـــــيسـة حزب الأحلام

والله ياسيادة الريسه انا حزين من فتره طويله مش دلوقتي وبس
لكن كنت باحاول اني اعمل للناس اللي فشلت اني اعمللو
ازرع فيهم الابتسامه والضحكه

بس هنعمل ايه بقى
علاج نفسي ولازم افضفض




سلاموووووووووووز

Soooo يقول...

Rehab Mostafa

ربنا يرضى عنك وعن كل الناس يارب

ولا تقلقي
انا صحيح متنكد ومكتئب .. لكن الحياه بتستمر ولازم نعيشها الى أن يقضي الله امرا كان مفعولا



سلامووووووووووز

Soooo يقول...

بنوته مصرية

باب النجار مخلع يارودي ياختي
هنعمل ايه بقى
وماكنتش عايز اتكلم حزايني ولا ازعل الناس عشان لو سبت نفسي واتكلمت هبهدل الدنيا
واهو حصل
لككن ان شاء الله هحاول اني ماكبرش الحياه بالشكل ده من منطق اني برج الاسد ولازم اكتم مشاعري عشان ماحدش يتضايق

سلامي لعروستي



سلاموووووووووووووز

Soooo يقول...

رندا

تصدقي وتؤمني بالله يا رندا
انا دلوقتي بس اكتشفت ليه كاميليا عملت موضوع كامل عند في مدونتها انت في عيوني

لانك انسانه جميله المشاعر ونبيلة الاحاسيس وفريده من نوعك
واللي زيك بجد لازم الناس كلها تحطها في عيونها

ربنا يكرمك يا اختي العزيزه




سلاموووووووووووووز

Soooo يقول...

بت خيخة وأى كلام

اهلاااااا
طب والله ليكي وحشه يام شرفنطح
وبعدين ياستي ولا حزايني ولا حاجه
دي حاجه انا كاتبها بقالي ردح من الزمن اصلا
ولما الفتره اللي فاتت الحياه كانت مش متظبطه معايا قمت نزلت الموضوع

اما بقى بالنسبه لشباب مصر
فأنا هنزل موضوع حالا عن الحالة دي
او عن حالة المدونين المصريين اللي بيتفلقطو


ملحوظه
هو شريف لما يكبر ان شاء الله ويبقى عنده خمستاشر سنه .. هتغيري اسمه ولا هيفضل شريف؟؟
لو جاوبتي السؤال ده هتعرفي انا هعمل ايه في المدونه لما ربنا يكرم وابقى عندي واحد وتلاتين سنه
ان شاء الله


سلامووووووووووز

Soooo يقول...

مشمش

لا لا لا يا مشمش يا صاحبي
كده انا ازعل قوي والله
لو حد عيط انا مش هسامح نفسي ابدا

كفاية حزن وعياط ونكد وكئابه
وخلينا نضحك حبه




سلاموووووووووز

Soooo يقول...

سمية

عارفه ان كلامك ده خلى جسمي قشعر قوي
والله العظيم جسمي قشعر بجد

حسيت انكم فعلا اخواتي واصحابي بجد

ربنا يكرمك ويباركلك ويوفقك ويعطيكي مايحرمك




سلامووووووووووز

Soooo يقول...

مفقوعة مرارتي من حماتــــــــــــي

عارفه يا سوسو
انا بقالي كتير قوي ماضحكتش ولا ابتسمت من قلبي

وكنت بحاول اخلي غيري يضحك عشان مايحسش باللي انا فيه

لا تحسبن رقصي بينكم طربا
فالطير يرقص مذبوحا من الألم

او كما قال الشاعر




سلامووووووووووووز

ojg يقول...

إنت كمان؟؟
:(

Soooo يقول...

ojg

لاحول ولاقوة الا بالله
هو كاس وداير عالكل

ربنا يخرجنا من دار البلا بلا بلى





سلامووووووووووووز

Dr. Ibrahim يقول...

قرنبيط ايه يا عم وبسطرمة إيه
مفيش أحسن من الطعمية يا سلام
وشويةفول
يا حلاوز
د/هيما

زُمُرده يقول...

Soooo

ازيك
اتمنى انك بخير وباحسن حال

من حقك تتكلم عن احزانك وافراحك
وكلنا بنعمل كده مهما اختلف الاسلوب
انت مسئول تفسر لو حد لبس عليه الفهم خصوصا لو كان شخص يهمك
مين فينا مش ضعيف؟؟
مين فينا معندوش احزان ومشاكل؟؟
مين فينا متجرحش ومتظلمش؟؟

بس اكيد توجع اكتر لو حد يعرفك اللي عمل كده
الانسان اللي يشمت في حزن او مرض او اي مصيبه
فكره ان ربنا ممكن يرفع عن صاحب الهم مصيبته او مشكلته ويبتلي بيها الشامت
بالاضافه ان اللي بيشمت ده اصلا معتقدش انه انسان بيحس ويفكر
عنده قلب وعقل

اعتقد اني وضحت معنى تعليقي اللي فات

كونك تقدر تسعد الناس دي نعمه وهبه من ربنا تقدر تخليك تنسى حزنك ولو لحظات لما تشوف بسمه وضحكه ناس شايله الهم ووياك نسيته

حافظ عليها
وربنا يكرمك
سلامو عليكم

من بقايا زمرده

Soooo يقول...

Dr-hema

فول وطعميه؟؟
قوم ياهيما من هنا
قوم همسح المدونه
هفيرس النت

فول ايه ياعم وطعمية ايه
شايفني حزين ومكتئب وحالتي مرار
هاتلي بيتزا
طاجن عكاي
اسكالوب بانيه
فتة شاورما


قوم يا هيما


ملحوظه
انا باهزر يادكتره واياك تزعل




سلامووووووووووز

Soooo يقول...

زُمُرده

تعليقك التاني بيؤكدلي انك انسانه قويه وعندها القدرة على التعاييش في الحياه
يبقى ايه لازمته التوقيع باسم بقايا زمرده؟؟؟

ملحوظه
هقرى كلامك بتأني وهرد عليكي رد موضوعي




سلاموووووووووز

Dr. Ibrahim يقول...

عارف ياباشا ان انت بتألس عليا بس مزعلتش لأن ده رد طبيعى على ردى الغلس
لان الحقيقةانا كنت بغلس وده مش رد الحقيقى على القصيدة
وعلى العموم القصيدة تمام

والرد بتاع كاميليا تمام التمام ومن حقها ان يتحط مكان القصيدة
ههههههههههههه


د/هيما

زُمُرده يقول...

وانا هستنى ردك
هنا
وهناك

بقايا ..... ؟

Soooo يقول...

Dr-hema

كويس انك عرفت

-----
زمرده

همممم
بالنسبه اني افضفض للي باعزهم واتكلم معاهم
انا فضفضت اهو
بس ماكنتش احب ان حد يسخر من مشاعري وكلامي زي ما حصل .. واقري التعليقات وهتفهمي قصدي

اما بقى اني اكون زعلان من حد اعرفه .. فالحقيقه انا اكتشفت اني ماعرفش حد وده نفس المثل اللي بيقول تعرف فلان قال اه اعرفه قالو عاشرته قال لأ قالو يبقى ماتعرفوش
واللي عاشرتهم وبقو فعلا صحابي مايتعدوش عالايد الواحده

والحمدلله اني باسعد بردود الناس اللي بيقرولي وبيشجعوني .. ودي في حد ذاتها عندي ليها معاني كتير .. اكتر من مجرد واحد يقرى ويمشي

وبالرغم من استمرار حالة الحزن والكئابه بل ووصولها الى ذروتها فعليا .. لكن مش هعلنها وخليها في قلبي ماهو ياما شال

نورتيني يا زمرده




سلامووووووووووز

شـــــهد يقول...

سووووووووووووووووو.. حقيقة لا ادري ما أقول

تاهت الكلمات وتناثرت العبارات من بين أناملي

فانا لا املك أمام أسلوبك الراقي إلا أن انحني بكل إعجاب وتقدير



برغم الشجن بين طيات سطورك.. برغم أنين كلماتك ... رائع بكل ما تعنيه الكلمة وستظل دائما متميز..

بارك الله في موهبتك وزادك فوق ما وهبك إضعافا مضاعفة وحقق

شـــــــــهد