الجمعة، ١٣ ربيع الأول ١٤٢٩ هـ

سينماتك .. تاني

بقالي فتره مزمزق ومخنوق وعندي حالة اكتئاب .. لاسباب كتير ومش ده موضوعنا
لكن جيت وقلت لروحي لا ياعم سوووو .. هتتخنق يبقى هتخنق على نفسك .. واتخذت قرار اني يوم الخميس هروق اعصابي واعيش اليوم واحاول على قد ما اقدر ما اتعصبش ولا اتنرفز ولا اشيل هم حاجه .. وفعلا .. رحت رايح على السبوبه اللي باعملها ولقيت في مشاكل قمت مهدي اللعب ومريح المسائل وحالل المشاكل .. وخدت بعضي ورحت على وسط البلد .. اتمشيت شويه ولقيت رجلي بتاخدني لتجمع شباب الجامعات في سينما اوديون .. ولقيتهم عارضين فيلمين عايز اشوفهم .. وفعلا .. قطعت تذكره ودخلت اول فيلم .. وكان فيلم .. نقطة رجوع



مبدأيا .. انا باعشق شريف منير وشايف انه مش من ممثلين الشباب قد ماهو من جيل الوسط .. اللي معظمهم اتجه للتفلزيون او مسرح الدوله او اعتزلو التمثيل .. ولسه لغاية دلوقتي فاكر اقوى دورين عملهم من وجهة نظري وهم دوره في فيلم ابناء وقتله ودوره في فيلم الكيت كات .. وبالرغم من انه ليه ادوار قويه كتير لكن دول اكتر دورين معلمين في نافوخي

نيجي بقى لفيلم نقطة رجوع .. الفيلم سمعت عنه من ناس صحابي ومعظمهم أكد على اني لازم اروح اشوفه لاني بطبعي مهتم بالسينما عموما وبالسيناريو بشكل خاص .. واحب اشكر صحابي دول واقولهم فعلا .. انا استمخيت قوي من الفيلم ومن السيناريو
من اول لقطة في الفيلم واللي بيبان فيها عربية بتمشي بشكل مش مستقر وبيبان ان اللي سايق العربيه مش قادر يحكم سيطرته عليها وكأنه سكران او مسطول .. ومع تقطيعات وزوايا التصوير وحركة الكاميرا المهتزة .. اضافة الى شريط الموسيقا .. بتلاقي نفسك اتشديت غصب عنك وابتديت تركز لغاية ما العربيه بتخرج عن طريق سيرها وبتقع من فوق هضبة المقطم وبتتقلب كذا مره وبتدشدش خالص .. وبعدين بينزل تتر الفيلم
القصه والسيناريو تأليف اتنين اخوات .. ابراهيم حامد .. ومحمود حامد .. واعتقد انه اول عمل ليهم زي ماهو تقريبا برضه اول عمل لمخرج الفيلم حاتم فريد .. وانا اعز اول تجارب سينيمائيه دي قوي .. باحس فيها بتمرد القائمين على العمل وخروجهم عن المألوف وعن السائد في شغل السوق .. وفعلا الحدوته جديده والحبكه هايله قوي .. ولو اني لقطت الحدوته من اول تلات مشاهد لاني اتربيت على روايات اجاثا كريستي البوليسيه وعلى افلام الفريد هيتشكوك .. لكن برضه فضلت مترقب ومتابع ومستمتع جدا بالعمل من ناحية التمثيل والسيناريو
------
لما جيت اقيم الفيلم ككل لقيت اني قدام تجربه جريئه تعتبر امتداد لاتجاه قائم في السينما حاليا بداية من فيلم ملاكي اسكندريه ومرورا بفيلم كده رضا والشبح .. وهو الاتجاه لابهار واشغال عقل المشاهد بالسيناريو عن طريق الحبكه الدراميه اللي بترمي مجموعة خيوط قدام بطل الفيلم وعليه هو انه يفصص الخيوط دي لغاية ماتتحل العقده في اخر لقطه في الفيلم
بطل نوعية الافلام دي بيكون تلات حاجات .. القصه والسيناريو .. المونتاج وايقاع الفيلم .. الاخراج وسيطرته على احداث الفيلم وتوجيهه للممثلين
القصه والسيناريو والحوار .. تسعه من عشره .. وماقدرش اديهم الدرجة الكامله لوجود بعض الحاجات اللي حسيت انها اتكروتت شويه .. زي بعض الحاجات في شخصية ليلى اللي بتمثلها في الفيلم الممثله نور .. وزي انهم جايبين تفاصيل كتير قوي بتشتت المتفرج .. وزي شخصية عادل شريك هاشم او شريف منير واللي ماتفهملوش هو ايه ولا ليه .. وكان ممكن مايكونش موجود من الاساس .. وزي لمحة بتظهر في اول الفيلم بوجود صورة لشريف منير في غرفة المكتب وهو بيشرب سيجار وبعدين لما جه يشرب سيجار ابتدى يكح .. لكن سبحان الله .. في باقي المشاهد كان بيشرب السيجار عادي خالص ولا كأنه كح ولا حاجه .. لكن والحق يقال .. ليس في الامكان افضل مما كان
المونتاج .. كان الى حد ما متوافق مع الحدوته ومع الايقاع العام .. خصوصا ان الفيلم ايقاعه سريع ومافيهوش تطويل ولا رومانس ولا مناظر طبيعيه تخلي المونتير يهدي الايقاع .. وكل الجو كان في منطقتين تلاته نفسيتين بيلعب فيهم .. واديلو تمانيه ونص من عشره
التصوير .. في المجمل معقول .. لكن يعيبه ان في بعض المشاهد كانت محتاجه اضاءه افضل من كده .. خصوصا في اخر اربع مشاهد في الفيلم .. اما بالنسبة لحركة الكاميرا وزوايا التصوير فكانت موفقه ومعبره وبتؤدي الغرض بدون فزلكة وكادرات مالهاش لازمه .. تمانيه ونص من عشره
الموسيقى التصويريه .. بالرغم من ان شريط المزيكا كان حلو في اول نص الفيلم .. لكن استمرار التيمه نفسها طول الفيلم خلى الواحد يحس انه بيتفرج على فيلم قديم لهيتشكوك .. واعتقد ان ده مش مقصود خصوصا واني زي ما قلت بيعجبني المخرجين اللي بيخرجو لاول مره عشان بيهربو من الاكلاشيهات القديمه .. لكن هنا تقريبا ماهربش واستسهل الموضوع .. سبعه ونص من عشره
الديكور .. ماخرجش عن تلات او اربع لوكيشانات او مواقع .. فيلا هاشم بيه او شريف منير اللي عايش فيها هو ومراته ليلى او نور .. فيلا المقطم واللي الديكور بتاعها اتكروت قوي وحسيت انهم بيصورو في بير السلم مش في فيلا .. وشركة هاشم بيه وشريكه عادل .. ومع ذلك ما جابوش مكتب عادل بيه ده فين في الشركه ولا اهتمو بده وجابو عادل في لقطة قاعد على مكتب هاشم وكأنهم في ازمة مكاتب .. وكام شوت في مغسله محمد شومان والمكتب الفاخر بتاعه في المغسله .. وماحدش يستغرب من وجود مكتب فاخر في مغسله .. الديكوريست عايز كده .. وانا عايز اديلو سبعه من عشره
التمثيل .. نقطة رجوع لشريف منير في مجال الدراما الانسانيه وتصريح قوي منه بانه ممثل يستاهل ياخد فرصة اكبر من انه يظهر مجرد مساعد او بطوله مشتركه .. اما نور .. فبالرغم من ان الدور فيه بعض الاخطاء بالنسبه ليها لكن هي برضه ما اجتهدتش واكتفت بتوجيه المخرج ليها واعتقد انها لو كانت شدت حيلها شويه .. كان هيطلع الدور ده .. دور عمرها .. اما هايدي كرم اللي كانت عامله دور سهام وتعرف هاشم وعادل من زمان كانت هايله في بعض المشاهد .. وصوتها عالي في مشاهد تانيه .. اضافة الى ان ردود فعلها كانت عايزه تتظبط شويه .. وكارثة الفيلم بجد .. هو محمد شومان .. واللي ظهر من خلال اعلانات الضرايب وفوترني وماتلبسينيش العِمه .. واللي عمل دور انا شايف انه من اقوى ادواره في السينما وأكد بما لايدع مجال للشك .. ان الكوميديان سهل جدا جدا انه يبقى تراجيديان ويكسب تعاطف المشاهدين .. والدليل على قوته كممثل ان حكمة الفيلم بتتقال على لسانه في آخر مشهد .. لكن ماينفعش اقولها لاني بكده هبقى حرقت الفيلم كللو .. بس هي جمله قويه جدا جدا .. والممثلين في المجمل ياخدو تسعه من عشره
الاخراج .. اول تجربه لحاتم فريد .. وتجربه مفيده بالنسبه ليه انه يعمل فيلم بالتقل ده ومع الممثلين النجوم شريف منير ونور وشومان .. واستغل فرصته صح .. واتوقع انه هيبقى امتداد هايل لمخرجين لعبو في نفس المنطقه وكان ابرزهم المخرج الراحل .. يس اسماعيل يس .. وادي حاتم في الفيلم الاول ليه .. تمانيه ونص من عشره .. واتوقع انه لو استمر على المستوى ده .. ممكن يوصل لتسعه ونص .. وعشره من عشره
-------
.. كنت اتمنى اتكلم عن الفيلم التاني اللي هو فيلم عشرآلاف سنه قبل الميلاد .. لكن اعتقد انكم زهقتم من رغيي
.. وان شاء الله هتكلم عنه في اقرب فرصه
لان الفيلم بيقول مابين السطور حاجات مهمة قوي .. والغريب انها عن مصر
بس مش من عشرتلاف سنه .. لا
ده بيتكلم عن مصر دلوقتي
سوووو

هناك ٦٤ تعليقًا:

ka2en Makboot يقول...

السلام عليكم

سينامتيك من الطفل السمباتيك :)

مرور سريع ولى عودة بعد القراءة

بس عموما انا ماليش في السينما ولا في اي حاجة
وده احد اسباب حبي للميه انها عديمة اللون والطعم والرائحة ولكن من غير ما نقدرش نعيش :)

تحيـــاتى ولى عودة

صوت من مصر يقول...

يا سووووووو
ممكن سؤال هو هاشم يبقى شريف منير وليلى تبقى نور
بجد انا متفرجتش على الفيلم يا سو لكن اعتقد انه مهما اجتهد لن يوصل حتى فيلم الكت كات لشريف منير لانه بصراحه دور عمره

Asmaa mahaba يقول...

انا قلت احجز التالت اول مره اعملها
هههههه وبعدين ابقى اعلق

MAKSOFA يقول...

البوست حلو بس أيه هضبة المهضم دي تبقي لامؤاخذه غير هضبة المقطم اللي أعرفه
===================
اضافة الى شريط الموسيقا .. بتلاقي نفسك اتشديت غصب عنك وابتديت تركز لغاية ما العربيه بتخرج عن طريق سيرها وبتقع من فوق هضبة المهضم وبتتقلب كذا مره وبتدشدش خالص

Asmaa mahaba يقول...

كويس والله اننا يكون عندنا فيلم محترم من بعد مهزله حين مسخره....؟؟ولحظات عنوسه سورى اقصد انوثه
تحياتى ليك يا سووو وابقى فوت شوف اول تخريفه فى تخاريف مجنونه..؟؟
يمكن تعجبك
سومه_87

DayDreaming يقول...

محرقتش الفيلم ليه؟ انا كنت عايزه اعرف الاحداث

بس حلو النقد السينمائي ده
دي اول زياره ليا للمدونهه اللي دمها خفيف دي وان شاء الله متكونش الاخيره

3ala asm masr يقول...

بما انى بحب اروح سينما كتير لكن الدراسه وخدانى الا انى هحاول اشوف الفيلم ده والفيلم التانى لان من اسمه واضح انه جامد جدا

Soooo يقول...

كائن مائي

انتي عرفتي منين اني سمباتيك؟؟؟
انا فعلا بافكر اروح ارقص باليه من كتر سمبتكتي

ومنتظر عودتك بعد ماتقري الموضوع

ملحوظه
السينما بطبعها وسيله .. زي الكتابه .. لو بصيتي على الافلام بنظرة شموليه هتلاقي انها تجسيد لبعض لحظات الواقع .. يعني زيها زي الميه .. بالرغم ان مالهاش لا لون ولا ريحه ولا طعم .. لكن ماينفعش نعيش من غيرها



سلاموووووووووووز

Soooo يقول...

صوت من مصر

اي نعم
شريف منير عامل دور في الفيلم باسم هاشم الجوهري .. ونور عامله مراته واسمها ليلى
وفعلا فيلم الكيت كات من اقوى ادواره .. لكن دوره في فيلم ابناء وقتله قوي برضه

نورتني يابرنس





سلاموووووووووووز

Soooo يقول...

somaa

ياستي تالت ولا عاشر ولا مليون
المهم انك علقتي
وبعدين لسه بيتعرض افلام هابطه برضه
زي فيلم بنات وموتسيكلات .. انا ماشفتوش الحقيقه
ومش هشوفه
بسبب البوستر الاهبل بتاعه
بيعملو اعلان عن رجول الستات
اه والله

عموما نورتيني واتمنى انك تفضلي منوراني على طول

وقريت اول تخريفه .. وكتبتلك تعليقي كمان ياستي




سلاموووووووووووز

Soooo يقول...

MAKSOFA

!!!! هضبة المهضم
انتي بتجيبي الكلام ده منين؟؟
انا ماقلتش كده
ولا عدلت البوست
ولا باضحك عليكي
ولا اي حاجه
انا بريء يابيه
-----
يعني اول ماتعلقي تمسكيلي على الغلطة الكتابيه دي .. جل من لايسهو ياستي



ملحوظه
هي فعلا كانت مكتوبه غلط وانا صلحتها .. بس قلت خدوهم بالصوت عشان ماتحرجينيش تاني .. وبالمره قلت اهزر معاكي في مدونتي واشوفك هتتقبلي هزاري ولا هتقفشي



سلامووووووووووز

Soooo يقول...

DayDreaming

لا ماينفعش احرق الفيلم
لازم تروحي تتفرجي عليه بنفسك وتستمتعي بيه بمزاج

ونورتيني في اول زياره ليكي
ويارب تفضلي منوراني على طول

ملحوظه
يعني انتي عامله مدونه عشان تقفليها؟؟
اتكلمي يابنتي وقولي
فضفضي واكتبي
ومنتظر مواضيعك .. وبطلي دلع بقى




سلامووووووووووووز

Soooo يقول...

3ala asm masr

ياقهلا ياقهلا
ازيك يابنتي
فينك وفين اراضيكي
وبعدين لو على السينما .. اهي قاعده ياستي .. لما تروقي شوية من امتحاناتك ودراستك .. روحي اتفرجي براحتك
والفيلم حلو قوي بصراحه

وياريت ماتختفيش كده مره واحده



سلاموووووووووووووز

اهو ده عيبه يقول...

ازيك يا عم سووووو

بصراحة انا مشفتش الفيلم بس انا زيك بحب شريف منير وبحس انه ممثل محترف فعلا مش بيهزر
ونقدك للفيلم هايل، لا تقولى احمد صالح ولا رفيق الصبان

بالتوفيق الدقن

غير معرف يقول...

والله طمنتني
ورغم اني زعلانة منك جداااااااااا
ومش هقول ليه
إنت عارف وأنا عارف
بس برضو طمنتني
مش بس علي ان الفيلم ده حلو
بس كمان علي إني لسه ليا نظرة في السينما والأفلام
وفعلا نقدك عجبني قوي

تعيش وتنقد

بس بلاش تزعلني :)

ojg

فرنسا هانم يقول...

تسعه من عشره
وسبعه من عشره
وتمانيه ونص من عشره
ومش عارفه ايه
سووووووووووووووووو
فوق
اصحى
يانهار كحلى
نايم طول الليل فى المطبخ جنب حله المحشى وعماله تقول اكششششششششششششن ؟؟؟؟

رئـــــيسـة حزب الأحلام يقول...

السلام عليكم
اية ياعم السيما والافلام

سهر الليالى يقول...

أزيك يا سوووو
إيه يا ابنى الروائع دى كلها بقى أغيب أرجع ألاقى كل دة
طبعا أكيد أفتقدتنى صح ولونك تلاقيك قلت البت دى طفشت أحسن
بس الكمبيوتر بتاعى كان بعافيه حبتين مع أنك مسالتش بس أنا قلتلك أهو

المهم بجد الحلقات تحفه وبقيت عامل بالنسبالى زى المسلسلات بستنى الحلقات الجديدة كل يوم ومليش دعوة من هنا ورايح أنا عاوزة حلقه كل يوم

أما عن التحليل السينمائى الرائع صحيح أنا مشفتش الفيلم بس انت جامد اوى
اصل أنا كمان متزوقه كدة برضو للافلام ولى نظرة بس أنا بيلفت نظرى حاجات تانية مش بالتحليل الدقيق دة
بس برضو السيناريو والحوار بيشدنى اوى

عارف يا أحمد
اللبنانيين بقى بيعملو شوية حوارات فى أفلامهم رائعه بجد يمكن تكون مشفتش حاجة منهم بس نصيحه منى جامدين زى مثلا فيلم أحبينى لو شفتو هيعجبك اوى فيه السيناريو اللى بتقول عليه

يلا رغيت على قلبك كتير بس قلت أسلم بعد الغيبة
تحياتى ومستنية المزيد

غير معرف يقول...

أخى الحبيب /سوووووووو
أنت ناقد عظيم و هذا ليس مدح أنه أقل تقدير.
سبق و علقت عندك و لم ترد على و حزنت فأنا أحبك من قلبى لانك إنسان نبيل ..فقررت القرأة دون تعليق و لكن
وجب على أن أعلق بعد قرأة هذا البوست ..أنت إنسان جميل.
أبو خالد

MAKSOFA يقول...

هزر ولا يهمك ، مافيش حد واخد منها حاجه ، وأنا كتير بأغلط برضه والقراء بيصلحوا لي عادي يعني بس أنا حبيت أهزر معاك

Empress appy يقول...

مزمزق ومخنوق وعندي حالة اكتئاب
اممممممممم عادى تستاهل هههههههههه محدش قالك ابقى لوحدك الا قولى هو انت ليه كنت كده ههههههههههه بالعند فيك

بص بقى بما انك خاين ورحت السينما لوحديك من غير آبيك اللى هو انا
يبقى عليك ليا واحد سينما وصلحه
بس مش الفيلم ده لانك كده وضحت ليه احنا نشوف فيلم يكون عن الاشباح يمكن حاجه تطلع وتأخدك وابقى خلصت منك ههههههههههه

لا بجد رؤيتك وشرحك كلامك عن الفيلم عجبنى جدا ومن هنا احى شريف منير حبيب قلبى بتاع جيل الوسط والقديم والجديد

غير معرف يقول...

ممكن اعرف حاجة ايه حكايتك مع السينما انت كان نفسك تطلع ممثل ولا ايه
بس الفيلم بجد جميل جدا وانت اجمل طبعا
لما تدخل سينما تانى ابقى احجزلى معاك ممكن ماترحش لوحدك
تحياتى
ريهام

Soooo يقول...

اهو ده عيبه

يا مراحب يا مراحب

فعلا شريف منير ممثل قوي وانا اتضايقت بصراحه لما لقيته طالع في فيلم شورت وفانله وكاب في دور مالوش اي لازمه في الحياه .. بس برضه كان عامل لنفسه جو خاص وصابغ شعره وكان تقريبا اول واحد بيعمل الحركه دي والباقي قلدوه

وياستي ده مش نقد ولا بتاع قد ماهو نوع من انواع الفضفضه وابداء الرأي
وانا اجي ايه جنب الناس اللي قلتي عليهم دول
منوراني بجد واتمنى انك تفضلي منوراني على طول



سلاموووووووووووووز

Soooo يقول...

ojg

الحمدلله ان الموضوع عجبك
وياستي انا ماقدرش على زعل اي حد من اخواتي واصحابي اللي بيقرو خطاريفي
وهابقى اجبلك باكو بكسويت شمعدان .. من ابو ربع جنيه
وانشالله ماحد حوش



سلاموووووووووووز

Soooo يقول...

فرنسا هانم

يعني انتي لازم تفضحيني عالملأ كده
علمك علمك علمك .. انا احسن واحد بيقول اكشن جنب حلل المحشي
بس دي ما كانتش حلة محشي .. كانت حلة رز مفلفل

ملحوظه
تصدقي انا نفسي بجد في محشي .. هابقى اتعلم طريقته واعملو ان شاء الله



سلاموووووووووووووز

Soooo يقول...

رئـــــيسـة حزب الأحلام

وعليكم السلام ورحمة الله وبركاته
ياستي ولا عم ولا خال
اهو الواحد بيهرتل اي حاجه
يعني .. احسس نفسي اني حاجه وبتاع



سلامووووووووووووز

Soooo يقول...

سهر الليالي

والله العظيم كنت مفتقدك
وبجد والله كنتي واحشاني وواحشاني تعليقاتك
ولما كنت باروح عندك في مدونتك الاقيكي مش منزله حاجه غير موضوعك انتي والاخت المدونه لماضه .. قلت تلاقيكي مزنوقه في الشغل ولا في الحياه
عموما حمدلله على سلامة الكومبيوتر وربنا يعفو عنه يارب

----

الحقيقه ماشفتش الفيلم اللي بتقولي عليه .. بس كنت بافكر اروح فيلم سكر بنات بس للاسف لقيته اتشال من سينيمات كتير .. قلت ابقى استنى لغاية ماينزل دي في دي واجيبه

ونورتيني بجد .. وياستي ارغي زي مانتي عايزه
دي مدونتك اصلا



سلامووووووووووووز

Soooo يقول...

ابو خالد

انا بجد آسف جدا جدا جدا على عدم ردي على تعليقك واللي بجد فعلا انا فرحت بيه وفرحت بزيارتك لمدونتي المتواضعه وفرحت اكتر بكلام حضرتك وانا اعتبرها شهادة تقدير ووسام على صدري بجد
بس زي ماحضرتك شفت .. انا كنت ساعتها بامر بلحظة خنقه على اكتئاب .. وكنت خايف ارد اقول اي حاجه وخلاص
خصوصا وان حضرتك من اكبر الناس المتابعين للمدونين .. وماينفعش ان شخص زيك يترد على تعليقه بأي حاجه وخلاص
وانا اسف مره تانيه بجد

ملحوظه
انا مجرد واحد بيتكلم وبيقول اي حاجات جواه وخلاص .. انما لا انا ناقد .. ولا عظيم .. والعظمه لله وحده سبحانه وتعالى



سلاموووووووووووز

Soooo يقول...

MAKSOFA

طب الحمدلله انك كنتي بتهزري والحمدلله انك قبلتي هزاري
وفعلا والله عندك حق
ماحدش واخد منها حاجه
نورتيني تاني .. عقبال ماتنوريني تالت وعاشر ومليون



سلاموووووووووووز

Soooo يقول...

appy

والله يابنتي مافيش حد بيختار انه يبقى لوحده
دي ارادة ربنا وانا ماليش اعمل حاجه

وبعدين خدي هنا .. مش انتي اللي خلعتي وسافرتي البلد ولا فكرتي في حتى
وانتي اللي خنتيني بعد ما كنا اتفقنا نروح فيلم سكر بنات ونفضتيلي ورحتي رايحه لـ ايمو حبيب القلب

وعموما ياستي انا هطلع احسن منك وهقولك شوفي الفيلم اللي تحبي نروحه .. ونروح سوا .. وهعزمك على بوب كورن كمان


ملحوظه
فين الوز والفراخ البلدي والحمام واللحمه الضاني وشوال الرز وشادر الفاكهه والعيش اللي قلتلك عليه يابنتي ؟؟؟؟



سلامووووووووووز

Soooo يقول...

ريهام5008

منوراني يا ريمو
انا ياستي ولا حكايتي حكايه ولا حاجه
كل العباره اني زمان كنت فعلا بامثل في الجامعه وخدت احسن ممثل في جامعة حلوان تلات مرات ورا بعض منهم مرتين ممثل اول على مستوى جامعات مصر .. وكنت باكتب شعر والفت مسرحيتين تلاته واخرجت مسرحيه على مستوى الهواه .. وبعدها اتعلمت كتابة السيناريو وخدت كام دورة تدريبيه في المجال ده

ولما اتخرجت من الجامعه حاولت اقدم في معهد سينما لكن ماكانش معايا واسطه وما اتقبلتش بعد اخر اختبار اللي هو الورشه

وياستي انتي اللي جميله بتعليقك الجميل ده .. وشوفي ياستي اي فيلم تحبي تشوفيه وانا تحت امرك
ولا اقولك .. تيجي نعمل رحلة جماعيه للسينما؟؟؟؟




سلاموووووووووووووز

انين الحزن يقول...

سووووووووووو

ازيك ياباشا واخبارك ايه
كل سنه وانت طيب

انا عايزة اقول بالظبط كدا زي فرنسا ما قالت

بس

سلامووووووووووز وبتاع
وشاي بالنعناع
وزة

Reham Mahmoud يقول...

خلاص اوكى انا موافقه وال يرجع
ربنا يوفقك يارب
باااااااااااااااى
ياسلامووووووووووووز
تحياتى
ريهام

سمية يقول...

اولا سلامتك من الخنقة و ربنا يوسعها عليك..

ثانيا
استغربت اوى ان الواحد اما يروح يتفرج على فيلم يطلع منه بكل التحليل و التفحيص و التمحيص ده..

بجد براوة عليك..ما شاء الله

دانا طلعت سطحية اوى فى الفرجة على الافلام...بطلع من الفيلم حافظة صم دى كانت مسرحة شعرها ازاى و دى كانت لابسة ايه ودى كان الميكب بتاعها رسمته ازاى..شغل ستات فاضية بقى..

كاميليا بهاء الدين يقول...

عرض شيق وجميل الحقيقة

ناقد هادى جدا

وكريم فى الدرجات كمان

بس

كنت قولت الفيلم بيتكلم عن ايه

الحدوتة يعنى

اشوفه فين انا دلوقت؟

ابقى احكيهولى طيب

تحياتى وتقديرى

رئيس جمهوريه نفسى يقول...

سيبك انا ما شفتش الفيلم بصراحه بس كلامك بيدل عن انى حسك السينمائى كبير يا معلم حسيت انى بقر مقال نقدى بجد
تحياتى

دينا حامد يقول...

من كلامك انا اتشديت للفيلم وان شاء الله قريب جدا اشوفه
بس للاسف الافلام دلوقتي اغلبها هابط جدا
الواحد بيخاف يدخل اي فيلم دلوقتي لانه بيبقى متوقع صدمه
تحياتي

فاتيما يقول...

يااااااه
يا سووو
انت عارف انا مدخلتش سينما من سنة كام
من سنة99 ...كان فيلم عبود علىالحدود ...و من يوميها بشوف الافلام فى الكمبيوتر و الدش بس ...
طب موش كنت تعزمنى أجى ادخل الفيلم معاك أصلى بيعجبنى شريف منير ممثل مجتهد و كويس ...
تعرف انى خرجت مع ماما مشوار من كام يوم و كان فى ميدان رمسيس ... و احنا بنعدى الشارع حكيت لماما على حلقة المذكرات بتاعتك ... و فطست على روحها من الضحك
و قاللتى متبقيش تحكيلى حاجة على صحابك المدونين دول الا فى البيت بقى عشان الناس هتتفرج علينا ...
انا جبت فى سيرتك و تلاقيك شرقت ...
بس دعيتلك ربنا يسعد قلبك زى ما بتسعد قلبى انا و غيرى ...
تحياتى يا واد يا غالى

موناليزا يقول...

ايه التحليل الدقيق ده قولتلى انت بتشتغل ايه؟

aya يقول...

بيعجبنى تحليلك اوى يا سوووو

بجد شوقتنى ادخل الفيلم

غالبا هاروح بكرة ادخله لوحدى عشان انا هطق من الزهق

فى انتظار تحليل الجزء التانى
عشان نعرف ايه حكاية مصر دلوقتى وعشر الاف سنة قبل الميلاد

سلام

الـسـيـدة نـون يقول...

ازيك يا سووو
معلش انا لسة مقريتش البوست
بس حبيت ارد على سؤالك هنا
ياسيدى انا مقريتش غير تعليقك النهاردة لما رجعت من عند ماما
والنهاردة الصبح كان فيه لقاء مدونين فى ساقية الصاوى
لكن يوم التبرع بالدم هيكون زى
ما اتفقنا يوم خمسة ابريل

هاروح اقرا البوست وارجع تانى
اختك خيخة

Empress appy يقول...

ملحوظه
فين الوز والفراخ البلدي والحمام واللحمه الضاني وشوال الرز وشادر الفاكهه والعيش اللي قلتلك عليه يابنتي ؟؟؟؟

ههههههههههههههه خخخخخخخخخخخخخخخ ولا كأنى شايفاها يا ابنى هو انت فاكرنى رايحه الصين دى المنصورة وبعدين ايه الطلبات الكتير دى هو انا جايه اطلب ايديك ولا ايه هنزرى معايا وبعدين ما تحمد ربنا جبت لك بجنيه عيش بس شكلى هأكله خخخخخخخخخخخخخخ

وملكش دعوة بايمو حبيه قلب خالتو ده انا بحنذرك اهو

مشمش يقول...

انا مشفتوش ياخساااارة

Soooo يقول...

انين الحزن

وانتي طيبه ياستي
وانا هارد عليكي زي مارديت على فرنسا بالظبط
بس مع اختلاف اني اتعلمت اعمل المحشي الحمدلله


سلاموووووووووووووز

Soooo يقول...

Reham Mahmoud

ياستي شاوري انتي على اي فيلم وقوليلي انا عايزه اروح الفيلم ده
... واللي يرجع بقى يبقى



سلاموووووووووووووز

Soooo يقول...

سمية

مين قال انك سطحيه
بالعكس
انتي اهتمامتك بالفيلم كلها من ناحية الاستايل واللبس واللوك اللي عامله الممثلين
وده على فكره ليه اسقاطات ورمزيه تانيه بشكل اكبر

مثال
فرضنا واحد من بيئه شعبيه او واحده من منطقه شعبيه .. استحاله انها تعمل شعرها مش عارف ايه او تلبس من كريستيان ديور الا لو ليها مصدر دخل او فلوس او حد بيديها الهدوم دي

يعني انتي مش سطحيه .. بس لو سبتي خيالك هو اللي يفكر هتلاقي الموضوع متحدد وواضح معاكي

وبعدين انا ياستي باخطرف .. مش شرط يكون كلامي صح



سلامووووووووووز

Soooo يقول...

كاميليا

الله يكرمك يا كاميللو يارب
وبعدين انا ماحبتش احرق احداث الفيلم عشان الناس تستمتع بيه لما تشوفه زي مانا استمتعت بيه
ولو عايزاه ليكي عندي ياستي اول ماينزل دي في دي اشحنهولك على حسابي

ولو عايزاني احرقلك الحدوته انا مستعد احكيهالك
هو انا عندي كام كاميللو بس



سلامووووووووووز

Soooo يقول...

رئيس جمهوريه نفسى

ربنا يكرمك يابو حنفي يابلدياتي يارب

بس انا ياعمنا ولا ناقد ولا هايل
دي شوية خطاريف باخطرفها وبس

نورتني ياريس والله



سلامووووووووووووز

Soooo يقول...

دينا حامد

منوراني في اول زياره ليكي
اعتقد يعني ان دي اول زياره
بس ياريت ماتكونش اخر زياره وتفضلي تنوريني بتعليقاتك وتعتبري مدونتي هي مدونتك تمام

وادخلي الفيلم ده وعلى ضمانتي
ولو ماعجبكيش .. اتغرم بعزومه على اي فيلم تاني تحبي تتفرجي عليه




سلامووووووووووووز

Soooo يقول...

fatima

اقسملك بالله العلي العظيم ان عيني دمعت من فرحتي لما قلتي انك ووالدتك ضحكتو على الحاجات اللي باكتبها

ربنا يارب يخلي ايامكم كلها فرح وضحك
ويرجعلك شريف راجل ملو هدومه ويفرح قلبك يارب

سلميلي على مامتك قوي وقوليلها سوووو بيقولك كل سنه وانتي طيبه
وكل سنه وانتي طيبه يا ام يوسف



سلاموووووووووووز

Soooo يقول...

monaliza

ياستي ولا تحليل دقيق ولا حاجه
وانا يافندم باشتغل مهندس ديكور .. وهاوي سينما

منوراني في اول زياره ليكي تقريبا وياريت ماتكنش اخر زياره
وتفضلي تنوريني بتعليقاتك دايما


سلاموووووووووووز

Soooo يقول...

aya

وانا بيعجبني تعليقك قوي
وياستي روحي ولو ماعجبكيش ليكي عندي عزومه على اي حاجه

وبعدين لعلمك .. مافيش احسن من الواحد يروح السينما لوحده
وانه يعيش لوحده
وياكل لوحده
ويموت لوحده


ملحوظه
ان شاء الله هتكلم عن الفيلم التاني بعد ما اتفرج عليه مره تانيه عشان في حاجات فاتتني في اول الفيلم



سلامووووووووووووز

Soooo يقول...

بت خيخة وأى كلام

انا ماخدتش بالي اني كتبتلك التعليق يوم الجمعه وباستفهم منك على حوار انكم هتتقابلو
وده لانك قلتي انك في الوقت ده بتكوني تقريبا عند حماتك او عند والدتك .. يعني مش بيبقى في قدامك نت

وعموما انا قابلت الناس اللي راحت عالبورصه وزعلت جدا جدا اني ما قابلتكيش
اصل يوم السبت ده يوم مقتول
اول الاسبوع وشغل ومتعب

وقلت للصباغ يقول للناس اننا نتقابل يوم الجمعه اللي جاي في الاوبرا عشان تقريبا حصلت مشاكل لما العدد كتر في الساقيه
وياريت تبقي تيجي



ملحوظه
لسه منتظر تعليقك على البوست
وسلامي لشرفنطح



سلامووووووووووووووز

Soooo يقول...

appy

انتي تطولي تطلبي ايدي
طب ده انا عريس مثالي
كفايه الكرش والنضاره القعر الكبايه
وكل ده عامل شغل عالي مع القرعه ما اقولكيش بقى

وحسك عينك تمدي ايدك على رغيف واحد
انا بقولك اهو
عض قلبي ولا تعض رغيفي
ولا هتلاقيني جاي اعضك



سلامووووووووووز

Soooo يقول...

مشمش

ولا خساره ولا حاجه
انا مستعد اتفرج عليه تاني ياستي
شوفي تحبي تعزميني امتى وانا تحت امرك



سلاموووووووووووز

زى الهوا يقول...

ناقض عظيم باحييك بجد , الديكور والموسيقى وكل حاجة حللتها , برافو عليك والله , انا يوم ما باتفرج على فيلم عربى باقول ياحلو ياوحش , وساعات ما بعرفش اقرر كمان , لكن عمرى ماحللته بالجمال دا , بوست هايل فى انتظار تحليل الفيلم التانى وماتقلقش اسلوب حضرتك شيق ومش بيزهق

الـسـيـدة نـون يقول...

بجد
يعنى
انا لما بقرالك حاجة كاتبها عن فيلم سينمائى
والله بحس انى بقرا لناقد فنى محترف
وبجد يا سوو
انت لو رحت اى مجلة فنية وعرضت عليهم كتاباتك دى
ممكن جدا تلاقى سكة جديدة فى حياتك المهنية
ربنا يوفقك يارب
وانت كدة شوقتنى انى اتفرج على الفيلم

تحياتى ليك
اختك خيخة

إبـراهيم ... يقول...

مبدئيًا كده شكلك بتتكلم ع الفيلم إنه حلو، وبما إني مابحبش حد يحرق لي الفيلم، فهدخله، ثم أقرا اللي حضرتك كاتبه ...
جمممممممممممممممممم
وعندي مدونة كلام سيما ، منكن أبقى أنقلكلام حضرتك عنه، ده لو ماكتبتش أنا
.
.
تحيااااتي
وفراولة بالزبادي

................
(على الهامش : كان نفسي أقعد مع حضرتك كثيييير، وأكيد تجمعنا لقاءات تانية )

Soooo يقول...

زى الهوا

ميس موووحه
ازيك يا ميس
والله ليكي وحشه
وياستي انا ولا ناقد ولا عظيم .. العظمه لله سبحانه وتعالى
انا بس باخطرف بشوية كلام وخلاص
والحمدلله انك شفتي ان اسلوبي شيق وما زهقتيش منني ولا حاجه

وماتختفيش كده كتير يا ميس



سلاموووووووووووووز

Soooo يقول...

بت خيخة وأى كلام

هقولك حاجه يا ام شرفنطح
مشكلتي مع حوارات الصحافه اني مجنون اصلا .. ما اكتبش غير لما ابقى عايز اكتب .. اما الصحفي فلازم يكتب بشكل دوري وبتكليف من رئيس التحرير وبتكليف من القائمين على العمل ككل

بالك انتي لو خلوني رئيس تحرير مره واحده .. انا ماعنديش اي مانع


سلامي لشرفنطح ابن اختي



سلاموووووووووووووز

Soooo يقول...

إبـراهيم ... معـايــا

مبدأيا كده .. شوف كام كلمة (حضرتك) انت كاتبها .. وعلى فكره .. انا مش كبير قوي يا هيما .. انا لسه شباب واقدس الحياه الزوجيه واشارك في الاثاث

ولو انت قريت الكلام اللي انا كتبته هتلاقيني ماحرقتش الفيلم من ناحية القصه ولا الاحداث .. بس برضه من حقك تشوف الفيلم وبعدين تبقى تحكم بنفسك .. يمكن انت هتشوف تفاصيل ادق من اللي انا شفتها وهتتكلم عنها بشكل مختلف

وياسيدي الجايات اكتر من الرايحات وهنبقى نقعد مع بعض كتير ان شاء الله
خصوصا انك شكلك بتحب السينما زي حالاتي



سلاموووووووووووز

moory-mero يقول...

السلام عليكم ورحمة الله وبركاته

سؤال بعد اذن حضرتك
انت دارس ايه بالظبط

نقدك ممتاز
رؤيتك ده مجال دراستي ف انت ما شاء الله متفرج بارع ناقد ممتاز وعندك رؤية بتثقب محور الحدث في كل الأركان التي تتجمع في العمل الفني وبتقدر تقيمها على ما يرام
بجد ما شاء الله عليك
ده غير قدرتك القوية على التحليل بطريقة سلسة وفيها رؤيتك الموضوعية والشمولية للاخداث وتصورك الدقيق لما كان سيكون مفضلا
بالاضافة انك القيت الضوء على اشياء قليل ما قدر يدركوها ويراعوها اهتماما
حقيقي ربنا يكرمك ويبارك فيك
جزاك الله خيرا
بس ملحوظة
انت قلت لفظ كلمة موش فهمتها
استخميت تقريبا او استمخيت موش متذكرة اوي
بس يعني ايه دي بقى ؟؟

وبجد كل اللي اقدر اقوله اني بستمتع بمدونتك وسبحان الله اول ما بدخلها مهما كنت حزينة برتاح فيها من اللي بقراه
ربنا يحفظك ويبعد عنك اى حزن وهم يارب اللهم آمين انت وكل المسلمين اجمعين

طلب شخصي بعد اذن حضرتك

ياريت موش تزعل ابدا او تتخنق
لاني حقيقي زعلت لما لقيت حضرتك كاتب مخنوق

ربنا يبعد عنك الهم والكرب يارب ويجعل ايامك سعاده دايما

Soooo يقول...

mariem_mero

الله يكرمك يارب ويباركلك ويوفقك على تعليقك الجميل ده

وبخصوص اجابتك على سؤال مجال دراستي
انا متخرج من كلية فنون تطبيقيه قسم اثاث وانشاءات معدنيه وباشتغل مهندس ديكور .. وقبل ما ادخل الجامعه كنت بامثل في فرق الهواة وفي مسرح قصور الثقافه والثقافه الجماهيريه .. ولما دخلت الكليه اشتغلت مهندس ديكور مسرح بالاضافه الى استمراري في مجال التمثيل المسرحي وعملت كام اعلان هابط كده .. وبعديت اتعلمت ازاي اكتب مسرحيات وسيناريوهات وحاولت ادخل معهد سينما قسم سيناريو لكن ماعرفتش لاني ما كانش معايا واسطه .. بالرغم من اني استمريت لاخر مرحلة في الاختبارات واللي هي مرحلة الورشه وكنت من اكتر المرشحين لدخول المعهد من قبل العديد من الطلبه والمعيدين اللي بيشرفو علينا زي الاستاذه نشوى محسن زايد بنت السيناريست الراحل محسن زايد اللي كتب سيناريو مسلسل حديث الصباح والمساء
لكن مانفعش ادخل نظرا لان كل اللي كانو مقدمين كانو ولاد مخرجين او منتجين او ليهم معارف وقرايب فنانين وانا ولا ليه حد اشتغل كومبارس حتى

والحمدلله على كل شيء

سعيد جدا بكلامك وبمتابعتك لمدونتي المتواضعه وربنا يقدرني اني اساعد في رسم ابتسامه وحالة رضا لكل اللي بيقرو كلامي ومواضيعي البسيطه



ملحوظه
لفظ استمخيت جاي من كلمة مخمخه .. يعني الموضوع دخل في المخ والواحد اتكيف منه وعجبه .. وده لفظ دارج عند كل المخمخين





سلاموووووووووووز

moory-mero يقول...

السلام عليكم ورحمة الله وبركاته

واااااااااااااااااااو ما شاء الله ربنا يزيد ويبارك أنا قلت كده برده أكيد فنان موش فطرة بس لكن دراسة وموهبة ما شاء الله روعه بجد ربنا يحميك ويوفقك ومبسوطة كتيييييييييييييير إني في مدونة حضرتك وبحاول أتعلم وأستفيد منها على أد ما أقدر

بشكرك لاهتمامك بالرد والتوضيح
جزاك الله خيرا