الأحد، ١ ربيع الأول ١٤٢٩ هـ

(7)مذكرات طفل .. طخين

!!! المحطة السابعه .. عايزين بليله
------------------

في ميدان رمسيس .. وقفنا على ناصية محل عصير قصب انا ومصطفى شعبان ومنى زكي .. ولقيت مصطفى بيبص للناحية التانيه من الشارع وبيقولّي
.. مصطفى شعبان : الناحيه اللي هناك دي هتلاقي واحد بيبيع بليله
.. منى زكي : هتعدي الشارع وتروحلو
.. مصطفى شعبان : هتلاقي جمبه ميكروبازات حلوان
.. منى زكي : هتلاقيه واقف بعربية صغيره عباره عن فاترينه فيها اطباق بليله
.. مصطفى شعبان : هتروحلو وتقولو عايز بليله بالمكسرات بس من غير بندق
.. منى زكي : خلي بالك .. بالمكسرات من غير بندق
.. مصطفى شعبان : هيقولك مافيش بندق .. ينفع من غير فسدق
.. منى زكي : هتقولو لأ .. انا عايزها بجوز الهند
.. مصطفى شعبان : وتاخد الطبق وتيجي هنا تاني
.. منى زكي : من غير ما يقع منك ولا بليلايه
.. مصطفى شعبان : المهمه دي وقتها خمس دقايق
.. منى زكي : - تمسك استوب ووتش وتظبطها - يبدأو من دلوقتي
سوووو : - صمت على تناحه طبيعي
مصطفى شعبان : في ايه ؟؟؟
سوووو : انتو بتتكلمو بجد ؟؟؟
!! منى زكي : اكيد مش جايين رمسيس عشان ناكل كبده وسجق من عند على بركة الله
سوووو : - بسخريه شديده - يعني مهمه وجهاز امني وستوب ووتش .. وفي الاخر عايزين بليله؟؟؟
مصطفى شعبان : خلي بالك .. الوقت ده كللو من المهمه بتاعتك .. وانت بتضيع الوقت عالفاضي
!!!! سوووو : ياعم وقت ايه .. ده انا يادوبك هعدي الشارع اجيب الطبق واجيلك
مصطفى شعبان : انت مغرور
سوووو : انتو اللي بتهرجو .. ده انا اروح واجي في اقل من دقيقه .. مش خمس دقايق
مصطفى شعبان : - وهو ينظر لي بتحدي - طب ورينا شطارتك
بصيتلهم وانا باضحك ورحت رايح ناحية الراجل بتاع البليله .. عديت الشارع ووقفت قدام الراجل بتاع البليله بقولو
سوووو : وحياة ابوك عايز طبق بليله بالـ .. بالـ
يانهار اسود .. طبق بليله بايه .. بمكسرات ولا بندق ولا فسدق .. انا مش فاكر
صوت منى زكي : خلي بالك .. بالمكسرات من غيربندق
سوووو : ايوه صح .. من غير بندق .. الف شكر يا منى
صوت منى زكي : أي خدمه .. بس خليك فاكر بقى
... سوووو : ياسلام .. ودي حاجه تتنسي .. طب انا هقولك على موقف حصل معايا زمان
!!! صوت مصطفى شعبان : - بيقاطعنا وهو متنرفز قوي - انتو هتتسايرو .. اخلص ياعم قدامك خمس دقايق
سوووو : خلاص يا درش ماتقفشش كده ياجدع - ثم نظرت لبتاع البليله - عايز طبق بليله بالمكسرات من غير بندق
بائع البليله : مـ مـ ما فـ .. مافـ .. مافـيـ .. مافيـ .. مافيـش .. بـ .. بـ .. بنـ
سوووو : - متنحا كمن ضُرب على أم رأسه بعصاية الغليه - يا نهار اسود انت هتهتهلي .. اخلص الله يكرمك مش ناقصه عطله
بائع البليله : انـ .. انـ .. انت .. جـ .. جـ .. جاي ..تتـ .. تتـ .. تتر .. تتريق ؟؟؟
صوت منى زكي : خلي بالك .. قدامك خمس دقايق بس
!!! سوووو : انتي مش شايفه .. ده طلع بيتهته في الكلام
بائع البليله : لأ .. لأ .. انـ .. انـ .. انت .. بتـ .. بتـ .. بتـ
سوووو : - بمنتهى الغضب - اهو انت اللي بت وستين بت كمان
واخدت طبق بليلة من اللي موجودين قدامه .. وطلعت أجري عشان اعدي الشارع واروحلهم الناحيه التانيه .. لقيت مجموعة اشخاص بيهجمو علي .. افتكرتهم في الاول طمعانين في البليله .. لكن لما بصيت ورايا لقيت ميكروباز بينادي حلوان حلوان حلوان .. قمت مراوغ الناس اللي بيهجمو علي ومزوغ منهم وعديت الميكروباز ولسه هعدي ناحية الشارع لقيت تاكس بينزل واحد وبيتخانق معاه
سواق التاكس : - وهو ممسك في ملابس الراكب - يعني ادِبّ المشوار ده كللو .. وفي الاخر تقولي العداد ؟؟
الراكب : - يحاول ان يخلص نفسه من بطش السائق - ولما انت مش مشغله بتركب الناس ليه ؟؟؟؟؟

وفجأه لقيت امم داخله علي .. كلهم عايزين يسخنو الخناقه ويلهفو اي حاجه تتنطور قدامهم .. ولكنني زفلطت منهم بأُعجوبه .. واستمريت في طريقي لعبور الشارع .. لقيت اتوبيس بيقف في وسط الشارع بينزل واحده ست كبيره في السن وهي بتقوللو
الست الكبيره : - يبدو عليها الغضب - طب مش تنزلني على جنب بدل مانت منزلني في وسط الشارع
سائق الاتوبيس : - وهو يغلق الباب - اهو انتو كده ياستات .. مايعجبكمش العجب ولا الصيام في فبراير
أحد الركاب : ياعم دي ست كبيره .. ممكن عربية تخبطها ولا حاجه
الكمسري : - وهو يجلس جنب السواق ويشعل سيجاره سوبر - مش في محطه .. تنزل في المحطه مش على مزاجها

ابتعدت عن الاتوبيس وانا اراوغ العربيات التي تمر بلا هواده في الشارع .. وعندما اصبح بيني وبين الرصيف الذي يقف عليه مصطفى شعبان ومنى زكي اقل من نصف متر .. ارتطمت بي عجله يسوقها طفل يحمل قفص فيه عيش .. ووقع مني طبق البليله .. ووقع الواد بقفص العيش .. ووقعت انا شخصيا .. واتلم الناس اللي في الشارع كللهم .. ماتلموش علي ولا على طبق البليله .. لأ .. دول اتلمو عايزين يخطفو العيش اللي وقع .. والواد اللي كان شايل قفص العيش عمال يحوش فيهم وهم ولا معبرينه .. زي مايكونو شافو فلوس ولا جنيهات دهب مرميه عالارض
نظرت الى مصطفى شعبان .. وجدت في عينيه ابتسامه شماته .. فقمت مفزوعا ومتجها اليه وقلت له بصوت غاضب
سوووو : - وانا بازعق بعلو حسي - انتو عايزين مني ايه؟؟؟؟
مصطفى شعبان : عايزينك تبقى بني ادم
سوووو : انا بني ادم غصب عنكم
منى زكي : حاسب على كلامك .. احنا عايزين نساعدك
مصطفى شعبان : - موجها كلامه لمنى - سيبيه .. وريني هتعمل ايه يا شاطر
وما ان هممت عليه كي اضربه بوكس على مراخيره .. راح باعد في آخر ثانيه ورحت واقع عالارض زي اللطخ .. ونظرت لهم وكلي اسى وحزن .. فاقترب مني مصطفى شعبان ومد يده الي كي يقومني من عالارض
مصطفى شعبان : لازم تركز في التمرين .. وتعرف ازاي تفصل
سوووو : أفصل !! .. بس انا عمري ما ضربت مخضرات !!؟
ينظر مصطفى شعبان لمنى زكي ويبدو عليهم الدهشه .. ثم تنظر منى زكي ناحيتي وتقول
منى زكي : يلا بينا نروح
سوووو : - وانا باتشحتف من العياط وبمسح دموعي - طب مش هنتعشى ؟؟؟؟؟
-------
يتبع

سوووو

هناك ١٠٠ من التعليقات:

فاتيما يقول...

طب و كتاب الله للى بتعمله دا إفترا
حرام عليك يا سووو
هىيا دى المهمة الوطشنية المطلوب من سوو تنفيذها و لا دا بس تسخين يعنى؟؟
هيودوه فين بقى بدل أسوان ... الطلبية و لا مصر عتيقة ؟؟
بس و الله عندهم حق
تعدية ميدان رمسيس دا موضوع فيه فدائية و إستبياع كبير
و لا يصلح لها الا سوو بطلنا الكبير
كمل يا واد
يللى تلتربع وزنك خفة دم و خفة روح
تحياتى و إعجابى المتزايد حلقة ورا التانية

فاتيما يقول...

آه
المذكرات دى لازم تنطبع فى كتاب
مينفعشى غير كده
هه

SKOBL- Little Lazy Me يقول...

ايه ده .. التعليق التالت .. قشطة .. بصراحة يا سووو .. جن يا أخي .. أنا فطست على نفسي كام مره .. قال ايه .. صوت منى زكي بيفكره و بعدين يقولله أي خدمة .. كانت جامده .. و حتة العيش دي .. هههه .. بجد تسلم ايدك .. بس بقولك ايه .. ما تغمزني بواحد بليلة .. بل .. بلل ..
-صوت منى زكي : بليلة بالمكسرات من غير بندق .. هو أنا حاقعد أفكركوا دايما .. اتعلموها بقى
- شكرا يا منى .. نجاملك في حلمي ان شاء الله

SKOBL- Little Lazy Me يقول...

و بعدين يقول له *

غير معرف يقول...

جامدة جامدة جامدة
3 جامدة

فعلا إثارة تشويق متعة

يوميات تحبس الأنفاس من فرط الغموض

D:
وماتزعلش على ال...الب...البب

شد حيلك وكمل يا سوووو عايزين حلقة كل يوم
أنا خلاص اتشويت من كتر الولعة اللي بستنى عليهاالحلقة الجديدة

ojg

Empress appy يقول...

راح باعد في آخر ثانيه ورحت واقع عالارض زي اللطخ .. ونظرت لهم وكلي اسى وحزن

بص دى اللى ضحكتنى والمكتب كله سمع صوتى عجبك كده بس هايله كنت متوقعه ان البليله دى سين بينهم طلعت بتضحك عليا

خمسة فضفضة يقول...

السلام عليكم


ههههههههه
والله حرام عليك اللي انت قاعد تعمله في الواد ، دا زمانه خس النص

د/اجدع بنوته يقول...

ههههههههههههههههههههههههههههههه

زى اللطخ

ههههههههههههههههههههههههههه

اهم حاجه اتعشيتوا ولا لا

كالعاده زى العسل ياسووووو

عهههههههههههههههههههههههههه

اهو ده عيبه يقول...

مهو لو كان مصطفى قالك الطبق فى كام حباية بليلة مش كان الوضع اختلف

بس هما اختاروا المكان الصح فعلا لاختبار زى ده

walaa يقول...

ههههه ههههه هههه
كل ده علشان البليله وامال لو رايح تجييب لحمه هتعمل ايه يعنى
وكل ده يحصل وانت بتعدى الشارع
ولا الناس اللى تلموا على العيش يسرقوه من الولد ماانت السبب برده
بس ايه ده
دا انت على كده تنفع كاتب سيناريست
تحياتى ليك وابقى خلى بقالك المره الجايه
وركز كويس علشان متعورش حد تانى
تحياتى ولاء

الـسـيـدة نـون يقول...

يا خسارة طبق البليلة

بس انت ماقلتلناش هى سونيا جراهام لما وقفت قدام الباب وكانت عايزة تدخل
فراح سامبا اداها نظرة محذرة من الدخول
كنت عايزة اعرف هى كانت هتدخل ليه وليه مادخلتش وليه سامبا اداها نظرة محذرة
ياريت متنساش تقولنا على الموضوع ده الحلقة الجاية

تحياتى
اختك خيخة

مهندس مصري بيحب مصر يقول...

هههههههههههههه
ايه الحلاوة دي
أنا اول مرة آجي هنا
بس بجد كوميديا تمام
و لسه حاقرأ بقية الحلقات من الأول
:)

ghalia يقول...

هههههههههههههههههههه
يخخخخخخخخخخخرب عقلك يا سوووو
كنت ناوي تضربو في مراخيرو؟
هههههههههههههههههه
ده انت قتلتني من الضحك
لا بجد مينفعش كدة
لازم الكلام ده يتنشر فى كتاب
مستنيين الباقي

cinderella يقول...

ههههههههههههههه
ايه المغامرات دي كلها يا سوووو
لالالالالالا
ده احنا كده هنستغلك أشد إستغلال
بس لما نعرف أخر الجري ايه
قصه هايله
منتظره الباقي

غير معرف يقول...

عاااااااااااااا

ماليش دعوة انا عايزة بليله بقى

:))))))))
بجد يخرب عقلك يا سوووووووووو
بتجيب الكلام ده منين

جامده يا سووووو
استمر
:))

بس المرة الى جايه تجيبلى بليله معاك
:))))

سلاخووووووووووخ

dina seliman يقول...

هههههههههه
ايه الجمال ده
بجد جميله جدا
وسو ده زى العسل
لولازلت اتابع

كاميليا بهاء الدين يقول...

وما ان هممت عليه كي اضربه بوكس على مراخيره ))

ههههههههههه

أول مرة أعرف ان مفرد بليلة يعنى بليلاية
هههههههه

انا مع فاطيما
المذكرات دى لازم تطبع فى كتاب

تحياتى لأجمل بسمة فى عالمنا المعاصر

كاميليا

shahy يقول...

يعني وقعت البليلة وبوظت العملية والتدريب ومش فارقة معاك وبتدور على العشا هو انت لسة ليك نفس


تسلم ايدك ياسوووووو
ويسلم تفكيرك ومذكراتك

تحياتي ياولدي الكبير والي الأمام دائما

3ala asm masr يقول...

يا مسكين ؟
بعد المهمه الصعبه دى وكمان مفيش عشا وانا اللى كنت فكراهم فنانين وحساسين
اخص على كده

simple girl.. ..simple dream يقول...

بت ...بت ...بت...
اهو انت اللى بت وستين بت



هههههههههه

مسخرة يا سوووو

Soooo يقول...

fatima

افترا وحرام؟؟
ليه بس كده يا ام يوسف .. ده انتي بنفسك بتقولي تعدية ميدان رمسيس دلوقتي بقت عمليه انتحاريه
ما بالك بقى وانا ماشي في الشارع ومعايا طبق بليله ؟؟؟

الف شكر بجد على متابعتك وعلى تشجيعك الدائم .. وربنا يارب يقدرني اني اساهم في رسم ابتسامه على وشك وعلى وشوش كل اللي بيقرولي مواضيعي

ملحوظه
جبتي منين لفظ مصر عتيقه ده .. اللفظ ده عتيق قوي يا ام يوسف .. وانا معلوماتي عنك انك لسه شباب




سلاموووووووووووووز

Soooo يقول...

SKOBL- Little Lazy Me

منورني ياباشا الحقيقه
ولعلمك انت تعتبر تاني تعليق لان ام يوسف خدت اول وتاني تعليق ورا بعض .. يعني اتنين في واحد
وغير كده اول تعليق ولا تاني تعليق ولا عاشر تعليق مش مهم
المهم انك علقت .. والحمدلله ان الموضوع عجبك لدرجة انك علقت عليه
والف شكر على كلامك وتشجيعك وربنا يقدرني اني اساعد في رسم ابتسامه على وشك وعلى وشو كل المتابعين لمذكراتي ولمدونتي


ملحوظه
انت واخد تالت ورابع تعليق .. يعني زي ام يوسف برضه .. اتنين في واحد


سلامووووووووووز

Soooo يقول...

ojg

الحمدلله ان اخيرا في حاجه من اللي باكتبها عجبتك

والف شكر على تشجيعك لي وعلى متابعتك وعلى كلامك الجميل ده
بس ماينفعش انزل حلقه كل يوم .. خصوصا اني هبطل تدوين بعد ما المذكرات تخلص
وانا بصراحه مش عايز ابطل تدوين بسرعه كده



سلامووووووووووز

Soooo يقول...

appy

الحمدلله انك ضحكتي
واضحكي بصوت عالي براحتك ياستي
الضحك ده احلى حاجه في الدنيا
ولو اللي في المكتب استغربو انتي بتضحكي ليه .. قوليلهم مبسوطه شويه .. ولا اقولك .. خليهم يقرو المذكرات .. مش يمكن يضحكو هم كمان والضحك يبقى جماعه

هو انتي ضحكتي على منظري وانا واقع زي اللطخ .. ولا على نظرتي ليهم بكل آسى وحزن؟؟؟



سلاموووووووووووز

Soooo يقول...

خمسة فضفضة

وعليكم السلام ورحمة الله وبركاته


حرام علي ايه .. الحق علي اللي عايزو يخس ويعمل حاجه لبلده .. بلده اللي اتزرع فيها البليله واتعملت فيها مصانع الاطباق اللي اتحطت فيها البليله

وبعدين خليه يخس شويه ياستي .. ويبقى شاب موز وحليوه بدل ماهو تخين ومكعبر واقرع



سلاموووووووووووز

Soooo يقول...

د/اجدع بنوته

اضحكي براحتك يا دكتوره
اضحكي قبل الضحك مايغلى ويبقى زي الزيت القزازة بعشره جنيه وربع وكيلو الرز باربعه جنيه ونص

وبعدين علمك علمك علمك
اللطخ دي كلمة عربية فصحى
لطخ يلطخ فهو لطخ

والف شكر على متابعتك لمحطاتي وعلى كلامك الحلو ده



سلامووووووووووز

Soooo يقول...

اهو ده عيبه

لا مانتي مش واخده بالك
هو قاللي انك هتقوليلي في التعليق بتاعك .. كام بليلايه في طبق البليله

كام بقى؟؟؟؟

والف شكر على متابعتك للمذكرات .. ويارب تعجبك



سلاموووووووووووز

Soooo يقول...

walaa

استغفر الله العظيم من كل ذنب عظيم
لحمه؟؟؟
لحمه؟؟؟
سامحها يارب
اغفرلها
المدونه دي طاهره
وهتفضل طول عمرها طاهره
قال لحمه قال
-----
الف شكر بجد على تشجيعك وعلى تعليقك الجميل ده
ويارب تكون المذكرات عجباكي ويارب تتابعيها لآخرها



سلاموووووووووووووز

Soooo يقول...

بت خيخة وأى كلام

ازيك يا ام شريف
وازي شريف
سلميلي عليه قوي الله يكرمك

وبعدين انتي مستعجله على ايه
ده الجزئيه اللي انتي بتتكلمي فيها دي هي الاساس في الحدوته
وهتعرفيها في آخر حلقه اصلا

تابعي بقى المذكرات ونبقى نتكلم بعدين




سلامووووووووووز

Soooo يقول...

مهندس مصري

حبيب قلبي
ازيك ياهندسه
وانا اقول المنوره مدونه ليه .. قصدي المدونه منوره ليه
اتاري الهندسه مشرفني هنا
الحمدلله ان المذكرات عجبتك
وارجوك تعتبر مدونتي زي مدونتك تمام وتشرفني دايما بزيارتك وبتعليقاتك وبضحكتك الجميله دي



سلاموووووووووووز

Soooo يقول...

ghalia

بقى عايزه عقلي يخرب زياده ماهو خربان برضه يا غاليه
وبعدين هي اسمها مراخير .. وده اسم علمي على فكره
-----
الحمدلله انك متابعه معايا المذكرات والحمدلله انها عاجباكي
ويارب دايما تفضلي منوراني بزيارتك وبتعليقاتك الجميله دي



سلاموووووووووز

Soooo يقول...

cinderella

الحمدلله انك ضحكتي وان القصه عجبتك
وبعدين انا اصلا طول عمري مغامرات اساسا
بس ايه تستغلوني دي .. اوعي تقوليلي انك عايزاني اقفلك في طابور عيش ولا حاجه
لا
الكلام ده والمغامرات دي كانت زمان وانا شاب
انما انا دلوقتي عجزت خلاص يابنتي



سلامووووووووووز

Soooo يقول...

shayma

ايه ياشيمو
انتي جايه تاكلي هنا
وبعدين البليله دي اصلا اصلا مضره بالصحه وبالجيوب الانفيه
ولو مش مصدقاني اتفرجي على برنامج خمسه لصحتك اللي بيتذاع عالقناة الاولى في التلفزيون المصري الساعه سته وربع الصبح
ولو اني ماعرفش مين بيصحى يتفرج عليه ده
-----
الحمدلله ان القصه عجبتك
ويارب تتابعيها وتعجبك اكتر ان شاء الله


ملحوظه
بتدعي علي يتخبر عقلي اكتر من ماهو خربان خلقه .. ده انتي يالهوي عليكي




سلاموووووووووووز

Soooo يقول...

dina

الف شكر يا دوندون ويارب تفضلي منوراني بضحكتك الجميله دي
وربنا يكرمك دنيا وآخره يارب على كلامك اللي زي العسل ده



سلاموووووووووووز

Soooo يقول...

كاميليا

مالها بقى مراخيره ؟؟؟
وايوان .. مفرد بليله .. بليلايه
ارجعي للمعجم الوجيز او لقاموس الياس العجيب او لدليل التليفونات هتلاقي ان كل كلامي صح
هو انا هاسرح ولا اهجص عليكم مثلا

والف شكر على كلامك الجميل وعلى ضحكتك الحلوة دي وعلى تشجيعك



سلامووووووووووز

Soooo يقول...

shahy

يوه يا ماما شاهي
طب جعان اعمل ايه
اجتر مثلا ؟؟؟
وبعدين انتي مع مين يا ماما شاهي
معايا انا ابنك العزيز .. ولا مع الاسف


سلميلي على اخواتي
الشنيور بيك
الجباره هانم
البرنسيس رايقه




سلامووووووووووووز

Soooo يقول...

3ala asm masr

شفتي بقى يا هند ياختي
اتاريهم بيبلطجو علي ولا حاسين بمعاناتي وبعذاباتي وبرغباتي المكبوته في الاكل بافترا

وانتي ايه اخبارك
وعامله ايه
ومختفيه ليه
كده يعني



سلاموووووووووووووز

Soooo يقول...

simple girl.. ..simple dream

الحمدلله انك ضحكتي
ايوه اضحكي يابنتي كده ونوريني دايما في مدونتي وفي مذكراتي
وشيلي السواد اللي في مدونتك يابنتي
واعملي زي ماقلتلك
قولي يارب
يارب




سلامووووووووووووووز

صوت من مصر يقول...

المهم يا سووووووووووووو
اكلت كام رغيف قولى بسرعه
بجد انا متبع بشغف ونفسى اشوف المذكره نمره 8 يا يريسنا

مشمش يقول...

لا لازم تتعشي انت صعبت عليا اوي لية بيبهدلوك كدة حراااااااام

Soooo يقول...

صوت من مصر

؟؟؟؟
كام رغيف ايه ياعمنا؟؟؟
انت قريت الحلقه كويس ؟؟؟؟
اصلها مافيهاش اني كلت اي حاجه خالص
يعني حد بيبقى في تمرين في ميدان رمسيس وفي وسط الزيطه دي كلها وهيعرف ياكل برضه؟؟؟؟


منورني ياباشا والحمدلله انك متابع المذكرات



سلاموووووووووووز

Soooo يقول...

مشمش


الله عليك يا صاحبي
فعلا
هي دي الصحوبيه والا فلا
بس هنعمل ايه بقى
انا مش عشاني .. انا عشان مصر




سلاموووووووووووز

فضفضة يقول...

صراحة ابداااااع

اول مرة اجى هنا

وفطست ضحك

بس لازم اقرا البوستات السابقة

عشان افهم الموضوع بالكامل

بصراحة

لازم تنزلهم فى كتاب
تحياااااااتى

سمية يقول...

الظاهر ان الضحك غلى يا سوووو فعلا...

لكن ولو..
مهما كبرت الهموم و المشاكل كفاية انى ادخل و اقرا البوست بتاعك..


تحياتى
سمية لطفى..

Unknown يقول...

بس بجد موضوع البليلة دة مهمة انتحارية
المهم ركز فى التمرين كويس دة مستقبل مصر بس برضة لسة مش عارفين سونيا عايزة منك اية

فرنسا هانم يقول...

ايه يابنى انت مطلع عنين الواد الغلبان الطخين سوووووووو
وفى الاخر تقوله لطخ
حرام عليك
الواد كده يعينى مش هيكمل المهمه

انين الحزن يقول...

البدايه كدا
انا كمان لاحظت سلامووووووووز بردك في نهايه التعليق وجيت هنا مره بس جيت اسيبلك تعليق واقولك وكدا الكهربا قطعت حظي وحش بقه وبعدين النت فصل لسه جايه اهوه شوفت بقه وانت سبقتني وقولت مع اني انا الا كنت جاي اقولك الا انت قولته
فاهمه حاجه من الا انا قولته
ما علينا
المهم دلوقتي في حبك لاسكندرية وانك عايز تعيش هناك وانا كمان بحبها اكتر من اي حد اكتر من الاسكندرانيه نفسهم وبحقد عليهم من كل قلبي
عايزين نشفوووك بقه علي طول بما انك بتحب الحاجه الا انا بحبها
سلاموووووووووووز
وزة

قبلة الحياة يقول...

بص يا سووو اللي انا مستغرباه انك عديت في المرة الاولانيه زي الشعره من العجين

ايه بئه اللي حصل وانت جاي بالبليله خلاااص على حظك الشارع اتزحم فجأتن والناس جات من كل حته ..

وبعدين قولي رضيت الطفل المسكين بتاع العيش ورحت اشتريت له عيش تاني يا حبلظ ...

;P<<<<<<<<<<< لسان

المهم ايزاك يا ابني تطلع من فيلم مافيا اللي انت مغرق نفسك فيه دا وتشوف مستقلك المشرق يا ابني

بجد اسلوب لذيذ

ال ايه منى زكي ومصطفى شعبان ملقوش غيرك يجيب لهم بليله

وعايزة افهم بليله ايه اللي ياكلها دي

هما دول يا ابني بتوع بليله بردك

والله انت باين عليك مسكين

يلا بئه لاحسن انت صعبت عليا

وانا اللي كنت مفكرة نفسي غلبانه ومش في الدنيا

والله صدق من قال اللي يشوف كعبله غيره تهون عليه دعبولته

ربنا يوفقك يا سيدي وعذرا على الاطاله

وسلام بئه الحق اكل طبق البليه اللي ماما حبيبتي عاملاها لي

سلاااااام

قبلة الحياة يقول...

حبلظ ما تزعلشي مني انا بهزر معاك احنا اخوات طبعا في الحبلظة وانت عارف

بس انا باين عليا تقلت الهزار شوية تؤ تؤ دول شويتين

يا لهووووي مين قال قال تلت شويات

ما تزعلشي مني يا خويا وياسيدي منى زكي منى زكي هنبلعها بئه بس ما تضايقشي نفسك

Soooo يقول...

فضفضة

الف الف الف مليون شكرا على كلامك الجميل ده وعلى مجاملتك لي ولمدونتي المتواضعه

وشرفتيني ونورتيني واتمنى انك تعتبري مدونتي زي مدونتك تمام وتعلقي هنا براحتك خالص

والحمدلله ان الموضوع عجبك .. واتمنى انك تتابعيه للآخر


سلاموووووووووووز

Soooo يقول...

سمية

عمر الضحك ماغلي ولا هيغلى
اللي بقى غالي هي راحة البال
ربنا يريح بالك يارب
ويكرمك دنيا وآخره

وماتختفيش كده .. نوري المدونه بتعليقاتك الجميله دي يا شيخه



سلامووووووووووز

Soooo يقول...

ايوية

اكيد طبعا مستقبل مصر في البليله .. وربنا يسترها علينا يارب

تابعي القصه وانتي هتعرفي سونيا عايزه مني ايه .. وليه



سلاموووووووووز

Soooo يقول...

فرنسا هانم

مين ده اللي مايكملش المهمه
هي سايبه ولا سايبه
ده جهاز امني رفيع المستوى مش اي كلام يافرنسا .. يعني لو هو فكر ينسحب هيصفوه جسديا .. يعني هيبقى رفيع


تصدقي ممكن والله .. واهو بالمره يوفر حق عملية شفط الدهون

سيبك انتي .. منوراني والله
تشربي فيسكافيه معايا؟؟؟؟؟



سلامووووووووووز

Soooo يقول...

انين الحزن

يا قهلا بقريني ياقهلا
منوراني والله
وياستي انتي اللي تبدأي ولا انا اللي ابدأ
المهم اننا عرفنا اننا اخوات توأم وخلاص

منوراني وارجوكي تعتبري مدونتي هي مدونتك تمام
وانتي كمان قلبي في المدونه .. مش يمكن تلاقي في صفات مشتركه تانيه وانا مش واخد بالي



سلامووووووووووووز

Soooo يقول...

قبلة الحياة

منوراني .. ده اولا
ثانيا .. هنمسك مع بعض الحدوته حاجه حاجه
في مقدمه في اول المذكرات بقول فيها ان المذكرات دي بيحكيها الطفل الطخين اللي جوايا .. واني عايزكم تقروها بالطفل اللي جواكم .. مش بعقلكم الناضج بتاع دلوقتي

وبعدين انتي مش ساعات بتبقي خايفه من حاجه تقوم تحصللك .. اهو ده نفس اللي حصللو بعد ما جاب طبق البليله ورجع بيه .. خاف انه يتأخر قام لقى الدنيا اتكركبت عليه

العيل اللي شايل العيش مش هو المهم قد ماهو المهم اني اصور حالة الهجوم على العيش من الناس اللي بقت بتقف طوابير بالساعات وبالايام والناس بتقتل بعض عليها

وبعدين مين قاللك اني انا اللي في فيلم مافيا .. ده الطفل الطخين اللي جوايا هو اللي في الفيلم .. وتابعي القصه وانتي هتلاقي حاجات تانيه .. او اقولك .. اقري البوست اللي اسمه (كريبا) وانتي هتفهمي ايه الحوار

اي نعم .. منى زكي ومصطفى شعبان مالقوش غيري اللي يجبلهم البليله .. لان مستقبل مصر بقى في البليله دلوقتي
وتابعي القصه او اقريها من أولها وانتي هتعرفي ان في سبب لاختيارهم للطفل سوووو للمهمة دي

وبعدين ياستي ولا اصعب عليكي ولا حاجه .. هاتيلي انتي بس طبق بليله من اللي مامتك عملهولك

------

نورتيني بجد .. واتمنى انك تتابعيني وتتابعي مدونتي وتنوريني بتعليقاتك دايما



سلامووووووووووووز

moory-mero يقول...

السلام عليكم ورحمة الله وبركاته

عثل عثل عثل
سكريبت هايل بجد وتصوير لموقف رائع
حقيقي أبدعت أنا موش قدرت أعمل أي شيء غير اني أركز فيها أوي لانها شدتني جدا عشان الاسلوب وطريقة العرض والافيهات واللقطات التخيليه للموقف وعشان بحب البليلة اووووووي

حقيقي حلوة أوي ودي اول زيارة ليا هنا بس موش الاخيرة خالص ان شاء الله شان سيفتها في الفيفوريت وبجد انت مشكلة اسلوبك رائع جداااااااااااااااا
استمتعت بالقراءة اوي
ربنا يوفقك يارب

Soooo يقول...

mariem_mero

اها .. اعترفي وقولي ان اللي شدك في الموضوع هي البليله

------

منوراني ياستي وتقدري تعتبري مدونتي هي مدونتك تمام
والحمدلله ان مواضيعي المتواضعه عجبتك
وربنا يقدرني اني اقدر ارسم البسمه على وشك وعلى وشوش كل اللي بيقرولي وبيتابعو مواضيعي



سلاموووووووووووز

hamssah يقول...

دمك خفيف بجد وخياااالك وااااااسع قويييي
موهوب وفنان
همسه

Soooo يقول...

hamssah

الف شكر على زيارتك وعلى تعليقك وعلى مجاملتك دي
ونورتيني وشرفتيني وياريت تعتبري مدونتي هي مدونتك تمام .. وتقول فيها كل اللي تحبي تقوليه



سلاموووووووووووز

moory-mero يقول...

السلام عليكم ورحمة الله وبركاته

ربنا يخليك بجد كلك ذوق انا لسه مبتداه وشرف ليا اكتب رايي المتواضع في مدونة بالجمال ده
وصدقني استرسالي فيها بيعلمني انا كتير

ميرسي لحضرتك على ذوقك وربنا يوفقك يارب

zordeak يقول...

ههههههههههههههههههه


ههههههههههههههههه

يخرب عقلك دمك خفيف بجد
حوار لذيذ جدا ومحبوك

باشاااااااااااا

:D

Doba يقول...

انا زعلانة جدا

Known as PHYSCO يقول...

سوووو ... مش معقولة كده أنا ما قريتش أى حاجة من المذكرات .. كل ما اقول اقراها بتحصل حاجة .. بس باوعدك إنى هاقراها إن شاء الله

مجداوية يقول...

أنا مسمية ميدان رمسيس يوم القيامة مش ممكن وكمان بتاكل فيه بليلة,,محتاجة أقرأ الحكاية من أولها بس قولت أوقع حضور نورتنى وصوتك ملا المدونة كلها اظاهر وجودك فى ميدان رمسيس خلى الطبقات عندك ولا بافاروتى

Soooo يقول...

mariem_mero

استرسلي براحتك خالص ياستي ولا يهمك
وخشي على مدونات الناس اللي انا كاتب انهم صحابي المدونين واتعرفي عليهم وعلقي عندهم وعبري عن وجهة نظرك وتفاعلي وتواصلي معاهم

وبعدين ماهو كلنا مبتدأين ياستي

وميرسي على تعليقك وعلى تشجيعك وعلى رأيك ومجاملتك


سلاموووووووووووز

Soooo يقول...

zordeak

الف شكر يابو حميد على تعليقك وعلى كلامك ومجاملتك
والحمدلله ان الموضوع عجبك
وياريت تعتبر مدونتي زي مدونتك تمام وتنورني بتعليقاتك ياباشا



سلامووووووووووز

Soooo يقول...

Doba

يالهوي
اختي ام يوسف افندي زعلانه
ليه كفى الله الشر
اوعي اكون انا اللي مزعلك
لا يا ستي انا ماقدرش على زعل اختي ام يوسف
ولو زعلتك في حاجه الله يكرمك سامحيني .. انا ظروفي في الفتره اللي فاتت دي كانت متلخبطه خالص وربنا هو اللي شاهد
وحقك علي ياستي
وسلميلي على يوسف افندي




سلاموووووووووووووز

Soooo يقول...

بيقولوا سايكو

ياستي كفايه انك جيتي
دي المدونه نورت بتعليقك ده
ولما الظروف تتظبط معاكي ابقي اقريها براحتك
يعني هي المدونه هتروح فين


ملحوظه
انا جبت شوية اعداد ميكي وميكي جيب قديمه انما ايييييييييييه
اصليييييييييي
تبادليني؟؟؟؟




سلامووووووووووز

Soooo يقول...

مجداوية

مجداوية عندنا .. يادي الهنا يادي الهنا

منوراني ومنوره المنطقه بحالها
وياستي اقري الموضوع من اوله براحتك
وكفايه تشريفك لمدونتي المتواضعه وكفايه تعليقك الجميل

ملحوظه
انا اصلا اللي معلم بافورتي الغناء الأوبرالي




سلامووووووووووووووز

رحــــيـل يقول...

سوووو

هههههههههههه
ضحكتنى بجد وانا عندى حالة اكتئاب طحن
وقريت الحلقات اللى فاتتنى

ومت من الضحك
ومتابعه الباقى طبعا

ربنا يكرمك سوووو

رئـــــيسـة حزب الأحلام يقول...

السلام عليكم اية الجمال دة واية الشقاوة دى ياعم

moory-mero يقول...

السلام عليكم ورحمة الله وبركاته
حاضر هقرا المدونات وميرسي بجد على تشجيعك
بس زي ما قلت بلاش حضرتك
انا بقى بجد كلامي كله موش في اي مجاملة خالص مليش فيها والله

فاتيما يقول...

واد يا سووووو
ملك ما كنا كويسين ؟؟
إنت إتنشيت عين و لا إيه؟
مين زعلك ...
إلهى ينشك فى قلبه من قيل ما اعرف هو مين
فيه إيه؟؟؟
ادينا أمارة و فسر شوية

غير معرف يقول...

استاذنا الغالي
الف سلامة عليك من الخنقة
انا لقيت حضرتك قافل العتليقات على البوست قلت اعلق هنا ويارب تشوفه

حضرتك كنت طلبت في مدونة عالم الكمبيوتر بتاعة سلوى موضوع عن برامج التحميل
الموضوع نزل يا فندم ياريت تشوفه واتمنى يفيدك

على فكرة مدونتك جميلة جدا ما شاء الله

اخوك محمود
:)

غير معرف يقول...

سووو
يا تبطل كتابة نكت بالمنظر ده
يا حتلاقي خبر في الأهرام الصفحة الأولي: "يموت قتيلاً من كثرة الضحك"

يا ابني حرام علي فشتي طارت من كتر الضحك

ToOoKa يقول...

السلام عليكم ورحمة الله وبركاته

أزيك يا سوووو والله ليك وحشة يا راجل
معلش فات عليا متابعة المذكرات بس والله الواحد مشغول اوى يلا معلش سامحنى

المهم انت عامل ايه وايه أخبار الشغل وولاد أخوك
هما دا كلو لسه بيدورو على عروسة
؛)
انا بس كنت عاوزه أسلم عليك وأطمن على حضرتك
ويارب تكون زى الفل وبخير
يلا خلى بالك من أخونا سوووو

أختك توكا

Doba يقول...

هقولك انا زعلانة ليه
انا زعلانة علشان بتقول بعد المذكرات هتبطل تدوين

وكمان دلوقتى زعلانة اكتر علشان بتقول مخنوق وانت فى وسط كل الناس اللى بتحبك وتحترمك دى ولو ناديت على واحد فيهم هتلاقيه فورا جنبك

بطل لعب عيال وتعالى طمننا عليك
فاهم

لانى بجد هزعل
سلام يا اخى المخنوق
هبة

الـسـيـدة نـون يقول...

مخنوق من ايه يا سووو
وليه قافل التعليقات هناك
يا واد طمنا عليك

انين الحزن يقول...

سووووووووووو

ايه دا مالك انت زعلان من ايه ومين الا خنقك وبعدين فيه حد بيحب اسكندرية وبيتحخنق
طب غير جو روح اسكندرية اكيد هترجع مبسوط
يعني اول ما نتعرف علي بعض تتخنق كدا انت زعلتني وبعدين قريت تعليق لحد هنا بيقولك انك بعد المذكرات هتبطل تدوين ليه كدا ياسووو خليك والنبي للغلابه دنتا عسل بجد اوعي تمشي
.........
طب تيجي نروح اسكندرية مع بعض

روق كدا بقه محدش واخد منها حاجه

سلامووووووووووووووز .. وزة

SKOBL- Little Lazy Me يقول...

بص بقى يا سووو .. مخنوق من ايه يابني .. بص هي الحياه كده .. يوم حلو و يوم مر .. و لو ما دقتش المر ما كنتش تعرف طعم الحلو .. ماشي الكلام .. بعدين يعني أما تفضل متضايق كده الواد سووو الطخين يفضل من غير أكل كل ده يخس و ما يرضاش يكمل الحلقات .. لا بجد فكها لأن الدنيا ما تستاهلش بص عامل الدنيا دي كأنك في قطر .. انت بتبص من شباكه .. اللي يعجبك بص عليه لحد ما يفوت ، و اللي ما يعجبكش طنشه .. تمام الكلام

SKOBL- Little Lazy Me يقول...

ايه .. حتبطل تكتب بعد المذكرات .. ده مش حيحصل أبدا .. انت فاكر البلوج دي ايه .. دي وراها رجالة ياكلواالبليلة .. بجد مش عارف أقولك ايه .. بس فعلا في ناس كتير أوي بتدخل هنا و بتحبك .. انت أول بلوج بابص عليها بعد اللي باكتب فيها و ساعات قبل .. يا ريت تعمل كده زي حسام حسن و ترجععن قرار اعتزالك .. و ساعتها الجماهير الغلابة دي حتتبسط جدا و حيهشتكوك .. بجد فكر تاني و تالت لحد ماترجع عن قرارك :)

ka2en Makboot يقول...

السلام عليكم ورحمة الله وبركاته

انا اسفة يا سوووو مقصرة في المتابعة الفترة اللي فاتت بس غصب عني والله.
بس دخلت النهاردة لاقيت بوست مخنووق ده .. بجد زهلتننى .. تلاقيك زودت في الاكل في نفسك قفش .. بلاش تتقل في العشا يا سووو علشان الكوابيس :)

ربنا يشرح صدرك يارب ويفرج كربك ويبدل احزانك افراح .

سلااااااااام

زُمُرده يقول...

من غير تعليق
انت عارف ارائي

------------------
مش لازم اطمن عليك عشان تتكرم وتزورنا

ممكن تبعت كلمتين من غير زياره تقضية الواجب

اوك

كل سنه وانت طيب

Yahia يقول...

هههههههههههههههههههه يا سيدي لو على البليله ممكن نعمل جمعيه ونجبلك طبق بليله تصبر بيه نفسك ، بس الراجل اللي بيتهته ده مشكله ..... والتعامل معاه اصعب كتتتير من موضوع طوابير العيش ابو شلين.

تحياتي

غير معرف يقول...

مش حقولك غير الحكمة الخالدة اللي كتبوها علي جدران محلات البليلة .. آ .. قصدي معابد قدماء المصريين

لو زنقت يوم و حكمت
و قلت لازم أفوق
سيبها تبلبط تلحلس
مسيرها يوم تروق

روووووووووق

مجداوية يقول...

أخيرا قرأت الحكاية من أولها لحد هنا حاقولك رأيى بصراحة ,وأول حلقة هى أكتر واحدة عجبتنى جدا لأنها تعكس واقع بأشوفه حواليا وكان معايا زمااااااااااااان زميل ليا فى ابتدائى اسمه طارق لسه فاكرة اسمهبالكامل كمان بس طبعا مش حاقوله كان كلبوظة ووشه على طول أحمر وعرقان وكان حساس جداأى حاجد يكلمه يعيط وفى نفس الوقت كان طيب جدا تعرف أنا لسه فاكراه ليه لحد دلوقت لأنه انتقل من المدينة اللى كنا فيها عشان والده توفى وعمرى ما نسيت بكاءه انه ماشى وسايب المدرسة واصحابه أعتقد انه كان خايف يروح لناس متحبهوش زينا ,,سبحان الله عدت سنين مش فاكرة عددها ولسه فاكره طارق ..كان نفسى تكمل فى نفس اطار الواقعيه بتاعة الجزء الأول مع خفة الدم المتناهية اللى تملكها كانت حتبقى مذكرات ملهاش حل مذكرات طفل معجزة تخين ,,بس برضه أنا حآجى واشوف أخرتها ايه مع الفيلم الأكشن المصرى ده بتاع تختخ ولوزة ونوسه ومحب وعاطف والشاويش على والمفتش سامى ,,دول أبطال سلسلة المغامرون ,,متوعاش انت عليها ,,بس رجعتنى لزمن كان أكبر همنا ازاى نحوش عشان نشترى قصة من دول ب 15 ,,ياللا أياموووووووووز بقى وعدت

فرنسا هانم يقول...

مخنوق
برضه سوووووو يبقى مخنوق ؟؟؟
ربنا يفك كربك اخى العزيز سووووو

SaSo يقول...

انا موش عارفه انا علقت ع المذطرات دى قبل كده ولالآ
بس انا متباعها وطبعا دى حاجه جامده جدا
انت قولت هتنزل ف كتاب المعرض الجاى تبع الشروق ايه؟
;)

MarwaAshraf يقول...

أنا جيت يا سوووووووو بيه

انا الست بتاعت الودع.. ها حد كلمك ولا لسة

لسة.. طيب.. اصبر الصبر طيب

تحب اشوفلك الودع النهاردة.. بتقول ايه.. مخنوق .. طيب يا أخويا مرة تانية .. ربنا يحفظك من الخنقة يا سي سوووو.. يلا انا قايمة أشوف زباين تانية

أوشوش الودع والقلب اللي إنخدع.. أوشوووووووووووش

رئيس جمهوريه نفسى يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يا واد يا مزفلط برضو يا سو مش بتضرب مخضروات عينى فى عينك كده طب وطبق السلطه بتاع كل يوم مش مخضروات برضه
بس خطيره بجد

الـسـيـدة نـون يقول...

يارب يفك كربك ياسوووو
وتحن على الغلابة اللى زينا
وتقولنا مالك مخنوق من ايه
مش احنا برضه اخواتك
ربنا يسعدك يارب
تحياتى
اختك خيخة

مروة الزارع يقول...

يخرب عقلك يا سو

انا هطبع كل المذكرات دى

ما تعملها كتاب يابنى

فظيعةةةةة

انين الحزن يقول...

ياسووووووووو
ما تروق بقه وتفكك من الخنقه دي


يابني طمني عليك وارجع اتخنق تاني

تعالي بقه

سلامووووووووووز
وزة

مشمش يقول...

لا اله الا انت سبحانك اني كنت من الظالمين
رب اجعل القران العظيم نور صدري وجلاء حزني وذهاب همي
قول كدة وسبها علي الي خلقك وبكرة تروح وتحلي مش دة كلامك فاكر

كلاكيت تانى وتانى يقول...

فية مشكلة فحدوتك المرة دى مصطفى شعبان ومنى ذكى مبيطقوش بعض ولا بيشتغلوا مع بعض
خد بالك من دى
جميلة المذكرات كلها برافو

حمامة يقول...

ههههههههههه

حلوة موووووووووت

اول حاجة اقراها

وان شاء الله هاقرا اللى فات كمان

Wael يقول...

ههههههههه
اول مرة ليا هنا برضو
جميلة " فحت " D:

gooooo on & keeeep posting

shreen يقول...

سووو
انا مش عارفه ده صح ولا قلة ذوق منى
انا جيت بس اسلم عليك
علشان انت كنت سايبلى تعليقين
وانا كنت مش فاتحه المدونه

انا ما قريتش البوست
وبجد مش قادره اقرا او اركز عند اى حد

انا بس جيت علشان اقولك انت فى بالى ومش نسياك

Asmaa mahaba يقول...

وبعدين صحيت من النوم لاقيتك عاوز تتغطى ....ههههههههه
على فكره انا بحب الاطفال المكلبظين وكنت تختوخه وانا صغيره....بس اتصفت لما كبرت....يالله اصل ايام العز تولى سريعا ولا يبقى لينا الا عز وبس...
احييك على اسلوبك الجميل
سومه_87

Dr. Ibrahim يقول...

فعلا العيش الوقتى بقى من الحاجت النادرة فى الشارع المصرى تلاقى الواحدة من دول راحة تزاحم على فرن العيش
والأخر تلاقى العيش رايح للفراخ على السطح
حاجة تفقع المرارة