الاثنين، ١٨ صفر ١٤٢٩ هـ

(4)مذكرات طفل .. طخين

المحطة الرابعه .. أين المزه ؟؟
--------------------


طلعت البيت بعد ماخلصنا الماتش واللي الحمدلله خسرناه بس بنتيجة معقوله شوية .. عشرة اربعه .. وده لان خط الهجوم بتاعنا زي ماقلت مش قوي بمافيه الكفايه .. وبمجرد ما دخلت بيتنا شميت ريحة الاكل .. كان قلقاس ولحمه بتلو .. وانا اعز القلقاس .. واعز اللحمه البتلو .. بصيت في المطبخ لقيتهم في البيت عندنا اتغدو وسايبين باقي الاكل .. رحت مسخن الاكل ونازل اكل لغاية ماخلصت حلة القلقاس وصينية اللحمه .. ولسه بافتح التلاجه بادور على أي حاجه حرشا احبس بيها سمعت جرس الباب بيرن .. نفضت طبعا للباب وقلت اكيد في أي حد هيفتحه خصوصا اني كنت خلاص فتحت التلاجه ولقيت صينية كنافة بالكستر .. وانا اعز الكنافه .. واعز الكستر .. لكن اللي بيرن عالباب شكلو مش بيعزني لانه ماسابنيش اخلص الصينيه وقطع على تسلسل الاكل بعد ماكنت يادوبك كلت بتاع خمس ست حتت بس .. قمت فاتح باب الشقه وبمجرد مافتحت باب الشقه لقيت اتنين طوال عراض لابسين بدل سوده ونضارات سوده راحو مندفعين جوه البيت وبيدخلو كل الاوض وانا واقف متنح مش عارف دول مين وبيعملو ايه وعايزين ايه وازاي مافيش حد في البيت ولا في الاوض اللي هم بيفتشو فيها .. لسه هقولهم انتو مين لقيتهم راحو جايين ناحيتي وراح واحد منهم مطلع لاسلكي من جيبه وقال بصوت جهوري
احدهم : تمام يافندم .. مافيش في البيت حد غير سوووو
تملكتني الدهشة التي اخرست لساني عن النطق .. وقبل انا اصرح بدهشتي لقيت الشخص التاني راح ناحية باب الشقة وشاور وقال
أحدهم التاني : اتفضل يافندم – وضرب تعظيم سلام
وفجأة .. دخل شخص تالت .. لابس بدلة رمادي وحاطط نضاره شمس على عينيه .. وداخل البيت بالحركة البطيئة .. جدا .. وبمجرد ما قلع النضارة بتاعته .. عرفته
الشخص التالت ده .. كان
مصطفى شعبان
------
المكان .. مخزن قديم ذو هيكل عدني .. وسقفه عالي .. ويبدو انه منشأه صناعية مهجورة .. في اعلى المخزن غرفتين ذاتا ابواب زجاجية غامقة اللون .. وفي الاسفل غرفة يجلس امام بابها على كرسي .. شخص ضخم الجثة عريض المنكبين .. ويبدو انه يحرس الغرفه المغلق بابها
في داخل هذه الغرفه .. كانت عائلة سوووو
-------
سوووو : ايوه شفتها .. مزه كده وراكبه عربية حمرا .. دي حتى سألتني على بيتي فين
قلت هذه الجملة لـ درش - او مصطفى شعبان الذي ما ان دخل بيتنا وقلع نضارته راح واخدني على جنب وقعدنا انا وهو في الصالون راس لراس عادي خالص ومن غير أي حد معانا - لما سألني اذا كنت شفت أي واحده حلوة في المنطقة .. لكن بمجرد ما قلتله اجابتي دي .. وشه قلب وبان عليه التوتر وقام وقف وهو بيفكر وبيهرش في دماغه
سوووو : - مستفهما - هي مين المزه دي يا درش .. وانت بتسأل عليها ليه؟
.. نظر الي درش وقال لي بنبرة هادئه
مصطفى شعبان : دي مجرمة محترفه .. وقاتلة مأجورة .. اسمها سونيا جراهام
سوووو : سونيا مين .. الاسم ده انا سمعته قبل كده بس مش فاكر فين !!؟
.. جلس مصطفى شعبان على الكرسي المقابل لي وقال موضحا
مصطفى شعبان : دي كانت شغاله مع نبيل فاروق في قصة رجل المستحيل اللي هو أدهم صبري .. لكن نبيل فاروق لما عرف انها كانت ماشيه مع ادهم صبري من ورا ضهره .. وحبو بعض واتجوزو في السر وخلفو واد اسمه تامر .. راح قالش سونيا جراهام من الحدوته بتاعة رجل المستحيل خالص .. ومن ساعتها وهي شغاله حر مع نفسها .. تخطفلها حد من هنا .. تقتل حد من هناك .. أي سبوبه عشان تعرف تصرف على تامر وتأمنلو مستقبله
سوووو : طب وسونيا دي كانت بتسأل على بيتي ليه .. وايه مصلحتها انها تخطف اهلي !!؟؟
مصطفى شعبان : الكلام ده كللو هتعرفو لما تيجي معايا
سوووو : آجي معاك فين يادرش ولا مؤاخذه؟؟
وقف مصطفى شعبان وقفة عسكرية وقال بنبرة تكاد تكون نبرة آليه
مصطفى شعبان : على مبنى الجهاز الأمني رفيع المستوى اللي في البلد
-------
تدخل سونيا على الغرفه التي محبوس بداخلها عائلة سوووو .. وتنظر اليهم وهم في حالة إغماء ومربطين على كراسي خشبية ومكممة أفواههم .. ثم تنظر لحارس الغرفه الذي دخل وراءها وتقول له
سونيا : عايزاك تاخد بالك منهم قوي .. اوعى تضايقهم .. دول غاليين علينا قوي
الحارس : حاضر يافندم
صوت رنة موبيل على اغنية انا باكره اسرائيل للمغني العالمي شعبان عبد الرحيم .. تخرج سونيا الموبيل من جيب البنطلون .. وتنظر على الشاشه ويبدو عليها الاهتمام .. وترد على الموبيل وهي خارجه من الغرفه بعد ان تشير للحارس ان يغلق الباب جيدا
سونيا : الو
صوت : ايوه يا سونيا .. نفذتي العمليه !؟
سونيا : نفذتها يافندم .. وماحدش خد باله .. ولا حتى سوووو شك في الموضوع لما سألته عن عنوان بيته
صوت : خلي بالك يا سونيا .. العملية مش سهله .. اللي احنا بنعمله ده ممكن يفتح علينا ابواب جهنم
سونيا : - بابتسامه ساخره وشريره - لو جهنم فتحت ابوابها لينا يافندم .. ده طبيعي .. لاننا عفاريت
صوت : عفاريت ايه يا سونيا .. انتي فاكره نفسك لسه شغاله في رجل المستحيل .. يابنتي دي عمليه كبيره ومأجرين مخزن وعربية ميكروباز عشان تخطفي الناس .. تقومي تقوليلي عفاريت .. هو احنا بنلعب خمسه مليم ولا قفاشة الملك !!؟
سونيا : - يبدو عليها الاحراج - مش قصدي حضرتك .. انا قصدي اننا
صوت : - مقاطعا - بلا قصدك بلا بتاع .. واخلصي بقى ونفذي اللي اتفقنا عليه عشان انا موبيلي قرب يخلص شحن ونسيت الشاحن في البيت .. خلصي الحوار وكلميني
سونيا : - يبدو عليها الاحراج - بس انا مش معايا رصيد يافندم
صوت : ابعتيلي (كلمني شكرا) وانا هكلمك .. دي شغلانه سوده .. سلام
سونيا : سلام
تغلق سونيا الموبيل وتضعه في جيبها وهي تتمتم بصوت منخفض
!!!! سونيا : انا موبينيل .. ماينفعش ابعت (كلمني شكرا) غير لموبينيل وبس
-------
.. يتبع

سوووو

هناك ٣٣ تعليقًا:

Empress appy يقول...

الحق اول تعليق ههههههههه واغتت بس شكلها جامده دى فيها مصطفى شعبان يا نهار بس ليه انت دايما بتهاجم خط الدفاع بتاعك ولا الهجوم هو ايه الصح انا ناسيه
طيب استنى اكمل واجى بسرعه

بنوته مصرية يقول...

احجز تاني كرسي

وارجع علطوووووووووول

سلام

Empress appy يقول...

هههههههههههههههههههههه ههههههههه
لا بجد ايه ده هو انت اتأثرت بأدهم صبرى وسونيا
بس ليه انا بتخيل بجد الاحداث دى كانها حقيقيه بص بجد مش هزار انا لما بقرأ لك مذكرات دى بلاقى نفسى تخيلت الموقف قدامى كأنه فيلم
كمل مستنيه مش عارفه ليه حسه انك هتقول كنت بحلم او حاجه

shahy يقول...

ههههههههههههههههه وانا كمان موبينيل زي سونيا

انت فاجئتنا بصراحة
انا ماكنتش متخيلة ان الاحداث هاتتطور بالشكل دة ابدا

انت تحفةيابني ماشاء الله عليك وعلى افكارك

تحياتي

غير معرف يقول...

هههههههههههههههههه
لا جامده كمان دخلت رجل المستحيل فى الموضوع

هههههههههههههه
بس انا مبحبش مصطفى شعبان
مش مشكله هتغاضى عن النقطه دى
:)))))))))))
بس سونيا دى شكلها جامده وهتبهدلك يا سوووو
مستنيه الجديد بسرعه

:)))))))))))))))

سلاخوووووووووووخ يا سوووو

الـسـيـدة نـون يقول...

هههههههههههههههههههههههههههه
ههههههههههههههههههههههههههههه
هههههههههههههههههههههه
ولا يا سووو
انت فظيع
هو انت عمرك ما جربت تكتب سيناريو افلام كوميدى
لا بجد انت مش معقول
تحفة
مستنية الحلقة الجديدة
سلام
اختك خيخة

Rain man يقول...

سونيا جراهام ؟؟

وحشتني البت دي

ما تعرفشي انا بقيت بحب يوم الاتنين ده اد ايه يا سوووو
و ده طبعا عشان بقي يوم اجازتي من الشغل ( حسبت هذا مفهوما )
..
ملحوظة
قلت انك هتخصص يوم الاتنين للمذكرات عشان ما تأثرش على الموضوعات التانية
و لحد دلوقتي ما شوفناش موضوعات تانية
يا كسول
:D

غير معرف يقول...

سوووو
قشطات
طيب والله العظيم انت اجمل م العسل ات نفسه ( بس اوعى تاكلك انت عسل مش للأكل )
بجد كل مرة بادخل بضحك من قلبي
وبخصوص سونيا طلعها من الموضوع بسرعة علشان ادهم خد خير ومفيش فى دماغه حد غير تامر هو عايز تامر وناوي يقتل سونيا ومصطفي شعبان والصوت ونبيل فاروق واحمد خالد توفيق كمان
وهيحرق نهضه مصر بحالة
يعني م الاخر كدا ربنا يستر عليك وعلينا ادهم ما بيرحمش
اللهم بلغت ... اللهم فأشهد

تحياتى كتير
تشي

Unknown يقول...

لا الموضوع بداء يدخل فى الجد وتدخلت الجهات الامنية
مستنية اعرف باقى القصة بسرعة ويابختك قابلم مصطفى شعبان والنبى سلملى علية لما تشوفة تانى

خمسة فضفضة يقول...

السلام عليكم ورحمة الله وبركاته

هههههههههههه
ينهاااااااار الوان
دا الموضوع دخلت فيه سونيا وادهم صبري وعم مصطفي شعبان
لا د الحكايه كبرت اوي وعاوزه قعده
طيب بقي استني لما اروح اجيب ساندوتش الحلاوه بالقشطه و أجي اريح هنا شويه لحد الحلقه الجايه

:-)

شهـــــرزاد يقول...

السلام عليكم

ههههه هي وصلت لصونيا يا صوووو .. اهي هي ديه اللي هتخرب الدنيا.
سؤال اخوي كدا علشان فضول القراء :D
هو الطفل الطخين ده كان كام كام طن؟؟
مافكرتش تتبرع لاخواتك اللي في الصومال يا صووو ؟؟ اللي يطخن لوحده يزور :)

تحيــــــاتى يا صوووو

Desert cat يقول...
أزال المؤلف هذا التعليق.
غير معرف يقول...

"ومن ساعتها وهي شغاله حر مع نفسها .. تخطفلها حد من هنا .. تقتل حد من هناك .. أي سبوبه عشان تعرف تصرف على تامر وتأمنلو مستقبله"

بشعه دي يا سوووو ،،، جامده موووووت يعني،،، حسستني بتدهور حال الولية أم تامر الغسالة بعد ما تخلى عنها سيدها نبيل فاروق بيه ورماها لكلاب السكك


"تغلق سونيا الموبيل وتضعه في جيبها وهي تتمتم بصوت منخفض
!!!! سونيا : انا موبينيل .. ماينفعش ابعت (كلمني شكرا) غير لموبينيل وبس"

إيه ده يا واد يالعيب مش ممكن كده
الرحمة الرحمة يعني،، أنا كنت بتخيل وشها وعليه أقسى علامات خيبة الألم والتحسر على كونها يا حرااااام موبينيل ،،، والله والله صدقت

هو انا مانكرش اني اتفاجئت مووووت بموضوع سونيا وأدهم وشعبان بس ملعووووبة وفي الجون يا جميل،،، جون إيه دي في التمانيااااات

هنرجعلكوا بعد إستراحة الشوط الأول:D
أقصد يعني الحلقة الجاية اللي هستناها من دلوقتي على أحر من الولعة :))


ojg

أم أحمد يقول...

هو انت منهم
هههههههههههههههههه

مشمش يقول...

والله ياسووو ياخويا مبقتش لاقية تعليق اقولهولك انا اول حاجة بعملها اول ما بشوف جهاز كمبيوتر اني افتح اشوفك كاتب اية ربنا يخليك لينا ويقويك علي سونيا دي سلام ياصاحبي

Doba يقول...

بما انك غايب عن الساحة بقالك مدة يبقى واضح طبعا انك مشغول مع والدك يارب يكون بخير

الموضوع بقى لذيذ قوى
بس برده انا عاوزة اعرف هو ايه النظام لانك بتعمل شكل ساخر

مش تقولى مصطفى شعبان ونظام لاينكن

تحياتى
هبة

صوت من مصر يقول...

بجد انا اتخضيت عليك من رجل النار والماء الى اسمه درش يا سو
بس بامانه مش درش ده راجل كده وكده
بيشتغلنا ولا انت ايه رايك

جهاد خالد يقول...

هههههههههههههههه
يخرب بيت كدا

تحفة اوي بجد

متابعة

Rosa يقول...

ههههههههههههههههههههه
جامده جامده يا سوووو
و كمان سونيا عامله تمويه وحطه نغمة بكره اسرائيل !!
لا فعلا شكله شغل جامد و الموضوع اكبر من مهمة رجل المستحيل بكتير كتير
ههههههههه
جامده يا سسووو

ka2en Makboot يقول...

السلام عليكم

ميرسي يا صوووو علي زيارتك ورأيك الجميل في مدونتى يا بخييييل
تيجي المدونة وايدك فاضية مفيش اي ساندوتشتين لا نشون ولا بسطرمة في السريع , علي العموم هعديهالك المرة ديه .
واديني جيتلك بالمدونة السودا اللي بحبها ومش همسحها علشان بتعبر عني وبلاقي فيها نفسي وعلي فكرة انا بكتب مذكرات طفولتى من قبلك بس انا كسولة .

يالا سلااااااااام

فاتيما يقول...

سوووو
يا سوووووووو
فى قلبى قعدوووووو
يا واد بتضحكنى وانا مليش ضحك و متحرج عليا ...
يسلم قلبك و لسانك وخفة دمك
حبى و تقديرى اللى بجد بجد

عروسة ننوسة يقول...

ميرسى لك كتير لكن يعنى ايه فى ناس بيعتبرونى انا انت والعكس؟

Unknown يقول...

سوووو يا سووووو دة سووووكر اندهوة

سوووو بجد انا كل ما بعرفك اكتر بحس اد اية انتا انسان محترم جدااا

بص بداياتا بالكومنتس اللى انتا بتعلق بيها عندى اد اية بحس انك انسان بتاع ربنا جدا وكل كلامك دعوات ومليان حنان وحب

كانك اخويا الكبير وعمال يدعيلى

تانى حاجة شعورك الرقيق ناحية كاميليا تعرف انا قريت كل الحاجات اللى اتكتبت فى كاميليا منهم الحاجات اللى انا نفسى كاتبتها لكن انا متاثرتش غير بالكلام اللى انتا كتبة اوى
اد اية بسيط واد اية مليان حب وحنان

بص بقة رضيت او لم ترضى انتا من النهرضة اخويا العزيز جدااااااااا

ثم اية انك لغايت دلوقتى ما كتبتش الحلقة التانية من مسلسل يوميات طفل طخين

احنا كلنا مستنيين بما فينا كاميليا

يابنى دة انتا الوحيد انتا ولى لى اللى بيخلونا ننسى كل الهم والحزن اللى جوانا ونضحك معاكوا لغايت ما نفطس من الضحك

يالا بقة نزل الحلقة الجديدة علشان كاميليا مضايقة الايام دى وعايزة تضحك مستخسر فيها انها تضحك يعنى
يالا بقة وبطل دلع

ثم فية حاجة تانية يعنى اية بعد ما تخلص يوميات طفل طخين خلاص هتبطل تدوين

دة يا جميل مش بمزاجاك انتا ناسى انك علقت بيك بحكاويك ناس كتير انتا ممكن تكون السبب الرئيسى اللى بية بينسوا همومهم واحزانهم

بص انا رغيت النهرضة كتير بس معلش بقة

بحترمك وبحبك فى الله جداااااااا

دومت اخى العزيز دايما

نوراى

simple girl.. ..simple dream يقول...

على فكرة انا بعت اللينك بتاع الكلام دة لنبيل فاروق وعجبته جدا وقال انه هيكلمك
يلا ياعم هتتشهر ومحدش هيعرف يكلمك

Unknown يقول...

هى وصلت لسونيا ياسوووووو
لا انت المرة دى فقت الخيال
وكمان ادهم حبيب قلبى دخل فى الموضوع احترس بقى يحسن انت كده بتقطع على نبيل فاروق وهوا مش هيسكتلك هيجيب ادهم ويقوموا بمهمة استخباراتية على المدونة
ههههههههههههههههههههههههههه
دمك شرباتيك ياسوووووو
نفسى مرة ادخل مدونتك ومااموتش من الضحك زى كل مرة
بس لا بلاش الدعوة البايخة دى يارب دايما مضحكنا ومزقططنا كده ياسوووووو ياعجوز
احلى سلاماتى

رئيس جمهوريه نفسى يقول...

يا سو 10/4 يا غالى يعنى لا هجوم ول دفاع ولا هجوم ولا حارس مرمى اساسى او احتياطى بص يا معلم العمليه فى النميله والعباره فى الدوباره فى انتظار التكمله التكمله

غير معرف يقول...

جامدة مووووووووووووووووووووت
يا سووووووووووووو
هااااااااااااايلة
تحفة تحفة تحفة آخر حاجة
تحياتي
وحدانية

Eman Eltaher يقول...

ههههههههههههه
لا لا لا لا
خفة دم جميلة و من كتر ما هو مكتوب حلو كنت هصدقه
؟؟؟؟؟؟؟؟؟؟؟؟؟

تحياتى ليك

Unknown يقول...

هقرا الموضوع وجاية بس عايزة اقولك بس شكرا علي كلامك الجميل
وتعليقك عندي الفظيع بجد مبسوطة بية
وان شاء الله نبقي اصدقاء
وجامد قوي تعاطفك مع كاميليا جاب نتيجة اهو ورجعت
سلام

Unknown يقول...
أزال المؤلف هذا التعليق.
كاميليا بهاء الدين يقول...

سووووو

يا أجمل سووووو

طيب
شدتنى من ودنى ، وسمعت كلامك ورجعت
وخليت كل البوستات القديمة اللى انت بتحبها
ولا مديت ايدى على حرف منها

وكتبت لك بوستات جديدة

طيب مش ترجع انت بقى

خصيمك النبى ياشيخ ترجع
(على الفكرة - الجملة دى - هى اللى خليتنى افتح المدونة فوراً)

انت مستنياك يا سوووو
مستنية اخويا شقيقى اللى لو احتاجته فى يوم ممكن ألجأ له بدون تفكير

كاميليا

SKOBL- Little Lazy Me يقول...

عسل والله أنا فعلا ضحكت طحن .. مشكور بجد .. بس باقولك ايه .. هو لما سونيااتجوزت أدهم كان من ورا نبيل فاروق و لا كان عارف .. أصلي سمعت انه هو اللي كتب الكتاب بس ما ما كانش يعني عايز يقول بعد ما أدهم حلقله و ما سماش الواد على اسمه .. مش عارف
عجبتني أوي أنا باكره اسرائيل رنتها زز ههه زز حلوة دي

Dr. Ibrahim يقول...

هههههههههههههههههههههههههههههههه
النهاية لذيذة
حلوة هحول ليها 5 جنيه بحالهم عشان تكلمه ونخلص
ههههههههههههههههههههههههه