الأحد، 25 محرم، 1429 هـ

!! إفتكاسات سووووويه

.. حدثني صديقي فيما حدثني
حلوه قوي الدخله دي .. محسساني اني طه حسين ولا عباس العقاد ولا حتى محمود الليثي المطرب الشعبي الشهير
ام هند .. ولا بلاش ام هند عشان هند ماتزعلش .. المهم .. حدثني صديقي فيما حدثني .. ودار بيننا حوار صغير
صديقي : ايه ياعم الشغل العالي والافتكاسات اللي انت عاملها دي
سوووو : افتكاسات ايه ياد اللي انا افتكستها ؟؟
صديقي : يعني الاعلان اللي انت عامله ده .. اصل انا ماشفتش حد بيعمل اعلان عن موضوع هينزلو في المدونه بتاعته .. وانت تقريبا اول واحد يعمل الحوار ده .. يعني بتفتكس
سوووو : همممم .. بافتكس
----
روحت البيت وكل همي افهم والاقي تعريف صريح لكلمة افتكاسه .. وعندما قمت بتصريف العفل افتكس .. فوجدته كالتالي
افتكس يفتكس فهو مفتكس .. واسم الفاعل ليس فاكس كما يعتقد البعض .. بل الادق لغويا ان يكون مفتكس
والفرق بين مفتكس وفاكس كثير وكبير .. فالمقصود بـ مفتكس هو مخترع ولكن باللغه الدارجه
بينما المقصود بـ فاكس هو مالوش لازمه
وهي فاكس وليست فاكس موديم .. بل هي بفتح الفاء ومد حرف الالف .. فاااكس
والاصل اللغوي لـ فاكس هو .. فكس يفكس فهو فاكس .. أي مالوش لازمه وشوال البصل احسن منه
وعندما بحثت في المفتكسات الحديثه وجدتها كثيره جدا .. فعلى سبيل المثال في مجال الطعام مثلا
البطاطس الصوابع .. اهي دي افتكاسه ولا في الاحلام .. يعني مين ابن اللذين اللي قال ان البطاطس تتقطع طرنشات وتتقطع صوابع وتتحمر في الزيت .. جابها ازاي ده ؟؟؟
وفي مجال الطعام ايضا .. محشي ورق العنب .. وجميع انواع المحاشي .. مجرد التفكير في الحشو نفسه في حد ذاته افتكاسه .. والغريب انه بيبقى طعمه حلو
ومن نفس منطق الافتكاس .. ممكن يكون عقلي الباطن هو اللي خلاني افتكس اني اعمل اعلان عن مذكراتي كطفل طخين .. لكن انا الحقيقه لما عملت الاعلان كنت قاصد حاجه معينه .. غير اني اجذب الناس يقرو في البلوج او المدونه بتاعتي .. كنت قاصد اني اشجع نفسي بنفسي اكتب حاجه ابقى عايزها تكون ساخره ومعبره عنني .. وفي نفس الوقت هو تنبيه باحب اوجهه لبعض الناس اللي للاسف بيحكمو على الآخر من شكله وما بيكلفوش نفسهم يعرفوه اكتر
وانا ياما ناس بهدلتني وحكمت علي من شكلي ومن طخنتي .. وماكلفوش نفسهم يدوني ولو فرصه واحده بس .. اني اعمل اللي عايز اعمله او اعبر عن نفسي صح
شوية ملاحيظ بقى عالماشي
باشكر كل اللي شجعوني وعلقو على موضوع كريبا .. وبقولهم والله العظيم والله العظيم انا مع كل تعليق قريته ومع كل ضحكه حد بيكتبها .. كنت باحمد ربنا وبادعيه انه يقويني اني اكتب حاجه تعجبكم .. وتعجبني
تاني ملحوظه .. آسف جدا على التأخير بس الحقيقه انا بامر بظروف عائليه صعبه جدا وهي مرض والدي بالفشل الكلوي لدرجة اني بقيت بانفض للشغل اللي باعمله عشان ابقى جنبه وعشان اجهزلو الاكل .. خصوصا انه مش بياكل غير اكل معين .. وكمان عشان اقدر اساعده وادخل معاه الحمام وكده .. وكنت طول الفتره اللي فاتت مابين معامل التحليل ومابين الدكاتره عشان نحاول نلحق والدي قبل مايدخل في مرحلة غسيل الكلى خصوصا ان سنه مايسمحش بالغسيل وممكن لا قدر الله حالته تسوء
وارجوكم ادعو ليه ان ربنا يغفرله ذنوبه بمرضه ده .. وان ربنا يحسن خواتمنا جميعا يارب
تالت ملحوظه .. نظرا لان المذكرات في حد ذاتها عددها كتير وداخله لغاية دلوقتي في حوالي خمستاشر عشرين حلقه .. واني لو هنزلها بس في المدونه يبقى همنع نفسي عن الكلام في اي مواضيع تانيه .. خصوصا ان ممكن حد يبقى متابعها ومهيأ نفسه على قرايتها ويدخل مدونتي يلاقي موضوع تاني .. فينسى اللي حصل في الحلقه اللي قبلها .. وعشان كده انا قررت اني ان شاء الله هبقى انزل كل يوم اتنين حلقه .. وبكده يبقى فاضي لي باقي الاسبوع اقدر اتكلم في اي موضوع تاني لو قدرت او لو حبيت
اخر ملحوظه بقى .. شركات النت كانت عماله تعمل مشاكل لكل الناس اللي داخلين النت بوصلات سواءا واخدينها من انترنت كافيه او من حد جارهم وبتحارب الاسلوب ده .. واتضح انهم نفسهم واخدين وصله من أوروبا
واللي قطع الوصله شكله كده صاحب الانترنت كافيه بتاع اوروبا نفسه عشان مابيدفعوش
سوووو

هناك 43 تعليقًا:

A.SAMIR يقول...

اولا الف الف سلامةلوالدك العزيز وان شاء الله دوام الصحة والسعادة
ثانيا:
مدونتك اكتر من روعة...وانا اتوقع باذن الله ان انت الكتاب القادم للشروق ان شاء الله بعد عايزة اتجوز وارز بلبن لشخصين
اخيرا:
احلى واروع ناس هم التخان..وعلى فكرة اللي بيتريقوا عليهم بيحقدوا عليهم
تحياتي واحتراماتي

بت خيخة وأى كلام يقول...

الف الف سلامة على والدك يا سوووو
وان شاء الله يخف وتكون صحته كويسة
وياريت تطمنا على احواله اول باول
اختك خيخة

بت خيخة وأى كلام يقول...

سوووو
من فضلك عايزة الميل بتاعك
شكرا
اختك خيخة

Awdhal يقول...

7aram 3alik ya Soooo

MerMaid يقول...

طبعا الف الف الف سلامة علي والدك
و ربنا يشفيه ويشفي مرضي المسلمين جميعا
----------------------------------
بالنسبة للافتكاسات فهمنا ليه بتفتكس
:)
تحياتي ليك
فينك من زمان؟
زيارة واحدة لا تكفي سا سوو بيه

منور دايما

صوت من مصر يقول...

الف سلامه لوالدك وعموما ياسيدى احنا معاك كمحشى ورق عنب او زملخويه كلها افتكاسات لكن حصه العربى الى انت اديتها كانت هايله فوق الوصف وطبعا انا مفهمتش حاجه لانى من المانيا العظمه

Rain man يقول...

سلمت و غنمت و سلمت لنا افتكاساتك
و شكرا على توضيح الفارق بين فاكس و مفتكس و فى كلاهما خير ..
سلاماتي و دعائي للوالد بالشفاء و وجودك معاه اهم طبعا من وجودك فى اى حتة تانية مش فى الشغل بس .. و دى مش افتكاسة على فكرة ده واقع ..
بالنسبة للنت فكويس انك صححت معلوماتى .. لانى كنت فاكر ان الشركة بتعمل دونلود عشان كده النت بطىء

سوووو ..
الوجود هنا متعة
انت كنت فين من زمااااان

بحبك فى الله و منتظر يوم الاتنين
لان واضح انك هتأجز النهاردة

Doba يقول...

عادة لما باجى ازورك والاقيك منزل حاجة جديدة بروح الاول واقرا ردودك عالتعليقات ولما جيت المرة دى وانا بقراها لقيتك بتتكلم بعقل وبسكوت كده وحسيتك متضايق

وعلى آخر التعليقات حسيت انك فوقت وابتديت تدخل فى مود المدونات وتنسى شوية الهم اللى مالى قلبك ورجعت تضحك شوية

ولما جيت دلوقتى اقرا البوست بقى عرفت اللى فيها وايه اللى حاصل بالظبط

ربنا يطمنك على والدك ويتم شفاه على خير ويغفرله ما تقدم من ذنبه وما تأخر وربنا يكرمك ويراضيك بحق ما بتتقى الله فى والدك

وفى انتظار افتكاساتك الجديدة بالاضافة لكريبا ومذكرات العيل الطخين

لك منى كل تحياتى وامنياتى بكل الخير والقوة والعزيمة والارادة خلال الفترة الجاية

هبة

ToOoKa يقول...

السلام عليكم ورحمة الله وبركاتة

هييييييييييييييييه نورت المدونه يا سوووو
والله انا داخله وفاقدة الامل انو يكون فى موضوع جديد بس الحمد لله لقيتك منور مدونتك

يلا عذرك مقبول يا سيدى والف الف سلامه لعمو وان شاء الله كلو حيبقى تمام ووعد ان شاء الله وانا فى الحرم حدعيلو بس انت بقه ادعيلى انو بابا يفضلنا شوية علشان نعمل عمره

اما بقة بالنسبة للافتكاسه فهى فى حد ذاتها افتكاسه من مفتكس ولو دورت فى معجم الافتكاسات الحديث حتلاقيها افتكاسه متفكسه من متفكس مفكوس

ايه ياعم اللخبطه دى يلا مش مهم بس والله ضحكتنى

وعلى فكره انا مستنية اى حاجه حتكتبها سواء المذكرات ولا غيرها
لانو اسلوبك بيضحكنى

ماتغبش علينا كتير كده ان شالله تدخل تسلم وتمشى

اما بالنسبة للمصاصه فخلصت يا معلم بس فى ايس كريم تمشى حالك

احنا تحت امرك ياباشا

ملحوظة عالماشى
لو حد حكم عليك من شكلك بس
فأنت مش محتاج تعرفو اساسا
لانو الواحد بأخلاقو وبشخصيتو

سلامى لوالدك ولاهلك وسلام مربع للمعلم سوووو

أختك توكا

Che The Hermit يقول...

على فكرة انا على طول بعدي بس من غير ما اعلق ( معرفش ليه ) ودايما بتديني أمل ان فى لسه قادر يضحك ويضحك الناس معاه المرة دي بقي قولت لازم ادخل واعلق
ربنا مع والدك ويا رب يقوملك بالسلامة ويشوفك كدا يوم فرحك وانت زى القمر
شكرا كمان على تبيان ( حلوة تبيان دي ) الفرق بين مفتكس وفاكس وانت بقي كدا طلعت مفتكس
اه صحيح بدل ما تعمل حلقة كل اتنين ع البلوج اعمل بلوج جديد للمذكرات وبس ويمكن بعد ما الحلقات تخلص تحس انك عايز تضيف او تكملها شاب طخين وبعدين متجوز طخين وبعدين عجوز :D
دا اقتراح بس

بلوجك بيخرج الواحد من مود الكأبة وهو الوحيد اللى بضحك بصوت عالى وانا بقرا فيه

تحياتي كتير
وإن شاء الله شفاء قريب لوالدك
تشي

Nani يقول...

السلام عليكم
الف سلامة للوالد وان شاء الله في ميزان حسناته وحسناتك
ثانيا شكرا لتوضيح معنى بعض الالفاظ التي اقابلها ولا افهم معناها
انتظر مذكراتك

Marvel يقول...

بعد السلام والذي منه

الف سلامة على الوالد ويا رب يتم شفاه على خير

وشكلها كده دبي كمان كانت واخدة وصلة من نفس الراجل التنح اللي قطع عننا النت..عشان كده لازم كلنا نكون ايد واحدة ضد اي حاجة..الاتحاد قوة برضه

وفي انتظار المذكرات كريبا

أحمد المصري يقول...

ألف مليون سلامة لوالدك يا سوووو
إن شاء الله حيقوم ويتحسن و عليك بربنا زيادة..
-------
بالنسبة لموضوع الإفتكاسة ده فمفيش أحسن من كلام mtm:
أول حاجة احب اشرح معنى كلمة افتكاسة
متخفوش يا جماعة ملهاش دعوة بالسياسة
افتكاسة يعني لما تعمل حيلة في الخباثة
و انت مش فاهم ايه معناها اساسا

حد فاهم حاجة؟
--------
تحياتي و السلام ..و ألف سلامة لوالدك مرة تانية0

لماضة يقول...

اولا يا ريس الف الف سلامه على باباوربنا يشفيه ويعافيه يارب
وعذر مقبول ولايهمك وراك رداله

ثانيا
النهارده الاتنين يعنى المفروض الحلقه تنزل لو منزلتش هحرمك من وجبة الغدا زى ماقلتلك قبل كده

ثالثا
بالنسبة للوصله
روح يا شيخ ربنا ما يقطعلك وصله
صحيح يعملوها ويخيلوا
هنعمل ايه بس اهو الحمد للهشغال كويس النهارده يعنى ملكش حجه
المذاكرات تنزل بالتي هى احسن

Rosa يقول...

الف الف سلامه على والدك و ان شاء الله تعدي على خير و يقوم بالسلامه
المهم المتابعه
و يشرب مايه على قد مايقدررر
في علاج دلوقتي اسمه العلاج بالماء و لو مش هيفيد مش هيضر بالعكس
خليه يشرب مايه قد ما يقدر بعد ماتسأ الدكتور , لو حالته تسمح و ربنا يشفيه ان شاء الله

ايوية يقول...

ربنا ان شاء الله يشفى والدك وكل مرضى المسلمين يارب العالمين
ثانيا منتظرين الحلقات على احر من الجمر
ثالثا احنا ممكن نتبرع لسداد ديون النت قبل ميشيلوا العدة مع الاعتظار لعادل امام

Soooo يقول...

A.SAMIR

الله يسلمك ياباشا والف شكر على كلامك الجميل ده

وبعدين انا ماجيش حاجه جنب برايد ولا جنب اللي الف او اللي الفت ارز بلبن لشخصين

وكفايه علي اني بلاقي ناس بتقرالي وبتضحك .. ويارب يكون ضحكها من قلبها

شرفتني بجد وارجوك ماتغبش وتعلق عندي دايما

ملحوظه
اللي بيتريقو على التخان ناس كتير قوي .. تفتكر كل الناس دي حاقده بجد ولا ده انطباع عام؟؟؟


سلامووووووووز

Soooo يقول...

بت خيخة وأى كلام

الله يسلمك من كل شر يارب
وربنا يباركلك في حالك ومالك قادر يا كريم



سلاموووووز

Soooo يقول...

Awdhal

حرام علي ايه بالظبط؟؟
ده بدل ماتدعي دعوة بسيطه لوالدي .. يبقى حرام علي؟؟
عموما الف شكر على اي حال
وهنزل المذكرات دلوقتي
وربنا يستر


سلاموز

Soooo يقول...

MerMaid

الله يسلمك من كل سوء يارب

ومعلش مقصر في حقك .. بس ظروفي مش متظبطه



سلامووووووز

Soooo يقول...

صوت من مصر

الله يسلمك يارب من كل شر
وبعدين مش عيب تبقى صوت من مصر .. وماتفهمش لغة بلدك
وسلامي الى جرمانيا العظمى وضواحيها



سلامووووووز

Ahmed Mubarak يقول...

الف الف الف سلامه على والدك

Soooo يقول...

Rain man

الله يسلمك يارب من كل شر
والف شكر على كلامك الجميل ده وعلى دعاءك لوالدي

وبخصوص النت .. يمكن انت اللي صححتلي معلوماتي


سلاموووووووز

Soooo يقول...

Doba

عارفه يا ام يوسف
انا اول مره الاحظ النقطه دي
اني لما بـ أرد على التعليقات بافك تدريجيا لغاية ما اوصل لمود التدوين

بس هتصدقيني لو قلتلك اني مش عارف افك فعليا .. وبافك من بره بس


دعواتك لوالدي يا ام يوسف



سلاموووووووووووز

Soooo يقول...

ToOoKa

مدونتي منورة بيكي وبالناس الجميله اللي بجد بحس انهم اكتر من اخواتي اللي مش معبرينني ولا معبرين ابوهم .. ولا عبرو امهم - الله يرحمها -زمان لما كانت عيانه

وياريت لو عملتي عمره تدعيله ان ربنا يغفر الذنوب لوالدي ولوالدتي ربنا يرحمها
ويقويني اني اقدر اتحمل الابتلاءات اللي بيبتليني بيها



سلاموووووووووووز

Soooo يقول...

Che The Hermit

منورني يا تشي .. وعادي جدا انك تعدي من غير ماتعلق
المهم انك بتيجي عشان تضحك وتعيش الامل

والف شكر على دعاءك لوالدي
بس مش عشان جواز ولا بتاع
عشان اعرف ارتاح يومين على بعض مش اكتر



ملحوظه
بالنسبه اني اعمل مدونه مخصوص للمذكرات مش مستاهله .. وبعدين سوووو هو نفسه الطفل الطخين .. مش مستاهله اني اخد حيز من عالم النت عشان مجموعة مواضيع على هيئة مذكرات



سلامووووووز

Soooo يقول...

Nani

الله يسلمك يارب من كل شر
والشكر لله ياستي .. انا ولا عملت حاجه ولا محتاجه
انا بس كنت بافتكس .. مش اكتر



سلامووووووووز

Soooo يقول...

Marvel

الله يسلمك يارب

وانا معاك في اننا نتحد ونبقى قوة واحده .. تيجي مانستخدمش النت خالص؟؟؟

المذكرات هتنزل حالا ان شاء الله



سلاموووووووز

Soooo يقول...

أحمد المصري

الله يسلمك يارب .. والف شكر على توضيحك الزياده بخصوص الافتكاس

واكيد مادام ام تي ام هم اللي قالو الكلام ده .. يبقى مافيش حد هيفهم حاجه



سلاموووووووز

Soooo يقول...

لماضة

الله يسلمك يا لماضه من كل شر يارب

وان شاء الله بعد ما اخلص الردود هنزل اول حلقه من المذكرات
وربنا يستر وتعجبكم يارب



سلامووووووز

Soooo يقول...

Rosa


الله يسلمك يارب من كل شر
والله يا روزا بالنسبه لموضوع الميه هو دلوقتي ماشي على علاج ونظام غذائي .. وهبقى اسأل الدكتور على موضوع الميه ده

وربنا يعمل اللي فيه الخير




سلامووووووووووز

Soooo يقول...

ايوية

الله يسلمك من كل شر يارب
وهنزل اول حلقه من المذكرات حالا
بس على الله تعجبك وتعجب كل الناس يارب



سلامووووووووز

Rehab Mostafa يقول...

أولاً ألف سلامه على والدك بجد ربنا يشفيه
ثانياً ايه الكلام والافتكاسات دي كلها :) :)
أه مش عيب على شركات النت دي :) عيب بجد :)))

ra7eel يقول...

سوووو

الف سلامه على والدك ربنا يشفيه ويخفف عنه ويجعل المرض ده فى ميزان حسناته ويلهمه الصبر

اما بقى بالنسبه للمذكرات فاحنا فى انتظارها بجد

وبالنسبه بقى لموضوع النت اى ان كان مين السبب فى المشاكل دى فالله يحرقه بجد

سلاموووووز

سهر الليالى يقول...

سوووو
كنت متضايقه لما حسيت انى فاتنى كام بوست بسبب قطعه النت

أولا ألف سلامة على والدك وياريت تطمنى عليه وعليك

البوست جامد اوى وطبعا انا من أوائل المنتظرين لليوميات
بس فى أول البوست حسيت حاجة واحدة
تعرف تقول
ارنبنا فى منور انور وارنب انور فى منورنا

هههههههههه
تحياتى يا جميل

غير معرف يقول...

ربنا يشفي والدك يارب وكل مرضى المسلمين

د/اجدع بنوته يقول...

الف سلامه ع الحاج .. ربنا يقومهولك بالسلامه يارب

ويخلهولك ويخليك ليه ويفرحه بيك يارب

ويشيل اولاد اولادك

مستنيين كل يوم اتنين باذن الله

ومستنيين برده باقى الاسبوع

وربنا يجازيك خير ع نيتك الطيبه ف اسعادنا

خالد المصري يقول...

الف سلامه للوالد يا احمد
ويارب يقومهلكم بكل سلامه

اللهم اني اسالك بانك انت الله لا اله الا انت ان تذهب عنه البأس انك على كل شيء قادر

بنوته مصرية يقول...

الف الف سلامه علي والدك يا سوووو

بدعيلة بلشفاء ويارب يخلية ليك ويفرح بيك وانت عريس ويفرح باولادك
علي فكرة انا منتظرة المذكرات بفارغ الصبر



وعلي فكرة كمان انت بكاش بعت الايميل فين انا مش عارفه بتقول بعتهولك فين يعني

A long distance يقول...

ربنا يشفي والدك ياباشا
ويقومه بالسلامه
كل حاجه في الدنيا دي افتكاسات
اتمنى زيارتك يا سوو لمدوناتي
على فكره
مدونتك جامده اوي اوي
وانا بستخدم برنامج قاريء المدونات
علشان اجمع المدونات الحلوه فيها
وتوصلني اخبارها اول باول
واقراها
mrgkiller2020

3ala asm masr يقول...

الف سلامه على والدك يا احمد ان شاء الله ربنا يشفيه ويبقى كويس
على فكره انا اتكلمت مع صاحب الانترنت كافيه بتاع اوربا عشان نخلى الشركات تقسط لكن ما امكنش واضح ان المبالغ جامده موز

الشنكوتي الكبير يقول...

الف سلامه لوالدك
شفاه الله وعافاه
وربنا يغفرله ويجعله في ميزان حسناته
ويجعل رعايتك ليه في ميزان حسانتك ويرزقك الجنه

الكتاب هيبقى تحفه لو عملته
وانشاء الله هتابعه
انت عارف انا كسلي صحيح بس هابقى اتابع واقرأه انشاء الله

انا عارف متأخر بس مش مهم صاحبك بقى هتعمل ايه

ربنا يوفقك

بخصوص النت دي عالم معندهاش دم

سلاااااااااااااااااااام

Dr-hema يقول...

إفتكاسات

ألف سلامة للحاج الوالد وربنا يقومهولك بالسلامة
لوان الرد متأخر شوية بس حبيت أتابع المسلسل بتاع التختوخ من الأول
وعلى فكرة مدفعوش شهرين وتمن السللك ولا تمن السويتش اللى محطوط فى البحر
^_^
د/هيما