الجمعة، 1 صفر، 1429 هـ

صحابي المدونين

تحديث
-----------
يا جماعه الف شكر ليكم كلكم على تشجيعكم سواءا من خلال حضوركم ان شاء الله يوم الجمعه .. او من خلال تشجيعكم لي ولكل المدونين في تحقيق الحلم ده
ارجع تاني واقول .. احنا مش هدفنا اننا نعمل مجرد مدونه تجمع كل المواضيع ولا تجمع كل الافكار وتبقى جرنان ونختلف في رئاسة تحريره والمنسقين والمحررين .. انا باتكلم اننا نتحول من مجرد مدونين لصحاب .. وبعد كده نبدأ نعمل اي حاجه مع بعضحاجه زي دي مش هتكون غير عن طريق اننا نخرج من حالة القوقعه اللي احنا زانقين نفسنا فيها من خلال شاشات وكيبوردات واجهزةلألازم نتعرف ببعض .. ومافيش حد يقول انا مش عارف اعمل ايه ولا انا مافهمش في حاجهكلنا اكيد فاهمين في اصول التعامل الانساني .. يبقى نتعامل باسلوب انساني مع بعض ونتحول لصحاب بجد .. بدل ماحنا صحاب عن طريق النت وبس
المعاد زي ماهو واللي عايز يجي اهلا وسهلا .. ولو مافيش حد جه خالص مافيش مشكله
ونتقابل لما ربنا يريد
-----------
لما جيت اعمل القائمة بتاعة صحابي المدونين اللي في المدونه من عالشمال .. ماكنتش باعملها من باب اني اجامل الناس اللي حاطين اسم مدونتي في مدوناتهم
لأ
بدليل ان في ناس انا حاطط اسامي مدوناتهم وهم مش معبرينني وعادي خالص مش فارق معايا مدى رغبتهم في انهم يكونو اصدقاء او صحاب لي ولا حاجه .. بس انا كنت عاملها لحلم جوايا .. حلم مش صعب انه يتحقق خالص .. حلم يبدأ باننا فعلا نكون صحاب
نساعد بعض .. نقف جنب بعض .. نسند بعض .. نقرب من بعض .. نحول كتاباتنا وأفكارنا ونقط تلاقينا واختلافنا في وجهات النظر لشيء ملموس .. واقع ونبدأ بيه المشوار
حلمي اننا ممكن بعدين .. بعد سنه ولا اتنين نتحول لجمعيه اهليه تساعد وتعلم وتنفذ .. نعمل مشاريع خيريه صغيره على قد امكانياتنا
.. مانبقاش بنتكلم وخلاص
.. مش نشجب وندين ونستنكر واخرنا نعمل مظاهره لمنع التوريث او لمنع بيع القطاع العام
او اللي فاضل منه
-------
بنوته مصرية كتبت في تعليق ليها عندي انها عايزه ايميلي عشان عايزاني اساعدها في حاجه تتعلق بمجالي .. لقيت ان هو ده مفتاح الحلم .. هي دي البدايه
دلوقتي بنوته مصريه عايزه تسألني عن حاجه في مجالي .. بكره استشير دكتوره روزا في شيء متعلق بالتحاليل ونتيجة تحاليل والدي او حد من اهلي .. بعد بكره حد مننا هيحتاج استشاره طبيه ممكن يسأل لماضة ولا د\أجدع بنوته .. اسبوع كمان وحد مننا يبقى محتاج استشاره قانونيه يسأل رئيس جمهورية نفسي او اي محامي مدون نعرفه
كمان شهر ولا شهرين تلاته نعمل جمعيه خيريه ويكون ليها اهداف تنمويه وتثقيفيه ودور في محاولة اصلاح المجتمع .. ويكون في فرع في كل محافظه .. وفي كل دولة سواءا عربية او غير عربية .. يبقى لينا كيان في الحياه
-------
انا مش باتكلم اننا نعمل مدونه لينا كلنا ونقعد نسلم على بعض ونشكر في مواضيع بعض
مش باتكلم في اننا نحبس نفسنا ورا شاشات وكيبوردات ونقول ونتكلم ونشجب ونزعق ونصرخ
باتكلم في حلم بسيط .. ابسط مايكون .. حلم انساني مشروع
اننا نبقى فعلا صحاب .. وبنعمل حاجه للناس واحنا صحاب
-------
ممكن نتخيل مع بعض حاجه صغيره .. بعد سنه ولا حاجه مثلا حبينا نعمل مشروع خيري .. وليكن مثلا مشغل او ورشة صناعات يدويه بسيطه .. واتزنقنا في التمويل ومش معانا فلوس .. نعمل مجموعة قصصيه واحنا المدونين اللي نألفها ونحاول نطبعها على حسابنا او بمساعدة دار من دور النشر والتوزيع ونكسب من وراها للجمعيه .. نعمل حفلة غنائيه يغني فيها فرق الهواة ومحترفين الهواة .. ونشترط عليهم انهم ما ياخدوش اجرهم كامل عشان بنعمل بيه عمل خيري من اعمال جمعيتنا الخيريه .. والحفله تنجح والكتاب يتباع .. ونبدأ في تنفيذ المشروع
وننفذ المشروع ونخلص منه .. ولما الناس الغلابه اللي يشتغلو في المشروع حد يسألهم ويقولهم مين ساعدكم
يردو عليه ويقولو .. دول صحابي المدونين
-
-
شوية ملاحيظ عالسريع
انا باقترح اننا نتقابل مثلا يوم الجمعه اللي جاي في كافتيريا المجلس الاعلى للثقافه واللي موجوده في الاوبرا جنب مركز الابداع .. والمكان مايتوهش .. لو حد هيجي بالمترو ينزل في محطة الاوبرا ويطلع يسأل على بوابة الاوبرا اللي قدام بوابة نادي القاهره .. يدخل منها ويفضل ماشي على طول على طول على طول لحد مايلاقي الكافتيريا .. واللي انا هبقى فيها يوم الجمعه اللي جاي ان شاء الله من الساعه تلاته العصر لحاد الساعه عشره مساءا .. حتى لو كنت لوحدي
سوووو

هناك 35 تعليقًا:

الشنكوتي الكبير يقول...

فكره جامده قوي
صحيح انا مش عارف هاقدر اقدم حاجه ولا لأ بس يمكن ربنا يكرمني واقدر
الحلم بتاعك جميل قوي
وانا نفسي حلمت بيه برده بس انا بقى مكنتش متحمس قوي زيك كده انا كسلت بدري بردي
لأني لقيت صعب ناس كتير من المدونين تتجمع
ولقيت حتى التجمعات اللي بيقولوا عليها دي بتبقى للناس اللي اصلا عارفين بعض في الحياه الحقيقيه قبل التدوين
ومره رحت حضرت حفله كانت وينكي عماله تقول عنها انها تجمع بلوجري وان المدونين هيكونوا هناك وهنتقابل وبعدين طلعت نصابه هي واصحابها كانوا يعرفوا نا من المغنين فتقابلوا مع بعض وانا رحت لا حد عارفني ولا انا عارف حد ولا اصلا لقيتهم
اهو يعني نوع من الدعايه بعديها عرفت ان اصلا مفيش حد هيقابل غير الي يعرفهم فعلا
بالنسبه للمقابله يوم الجمعه
انشاء الله لو كنت مش في الشغل لازم هاجي
ربنا يكرمك يا احمد فكره جميله قوي
ولو محدش جه هناك اهو نتقابل انا وانت ونتعرف
سلاااااااااااااااااااام

د/اجدع بنوته يقول...

ههههههه تصدق ان فينا حاجه لله بقى

ف نفس الوقت اللى كتبت فيه بوست عن المدونين

انا كتبت بوست عن المدونين برده

وف نفس الوقت اللى بتحلم بيه

بالمدونين يتجمعوا وينزلوا يعملوا نشاط بجد

انا م قبلك بحقق ف الحلم ده .. وكلى ثقه وايمان بالله ان ربنا هيقدرنا

وهيتحقق ان شاء الله

فلو عندك استعداد تبقى معانا

http://hnro2masr.blogspot.com/

يشرفنا طبعا

بعيدا عن الهاتفات والبوستات

ناويين نروق مصر .. ونروق بعض

اما بقى الميتنجات بتاعتكم دى

دايما تكون ف القاهره معرفش ليه

بس بأمر الله بنسبة 50% ممكن اجى

بس مينفعش تهزوا المعاد شويه

وتخلوه صباحا

علشان نقدر نيجى ونروح

تحياتى وتمنياتى ليكم بيوم جميل

وياااااااااااااااارب اعرف اجى

موجة يقول...

انتا قلت ان فيه مدونات انتا ضايفها و هما مش معبرينك
لكن انا بقى معبرك و انتا و لا سائل فيا
ههههههههههههه
ايه رايك في الحالة دي بقى

خالص تحياتي
احمد

A long distance يقول...

موضوع جميل يا سوو
وياريت بجد يبقى فيه مدونه تجمع المدونين
ونتناقش ونساعد بعض بجد
ونبقى كلنا ايد واحده

koko يقول...

ماشى انا موافقة .. و ممكن كمان نعمل موقع و نحط عليه الانشطه بتاعتنا و اعمالنا و كل واحد ممكن يساعد ازاى .. لو عايزين مصمم مواقع محترف انا فى الخدمة.

لماضة يقول...

والله يا سوو نا كنت بفكر فى حاجه زى كده بس مفكرتش بالتوسع بتاعك ده
فكره جميله جدا وانا موافقه ومعاك
بس مقابلة يوم الجمعه صعبه عليا اوى انا رحت معرض الكتاب بجد كانت مرهقه جدا جدا جدا وكان نفسى اشوفك هناك يوم الجمعه اللى فات
بس هحاول قد ما ربنا يقدرنى اكون معاكم

ايوية يقول...

تحياتى للفكرة الجميلة ويارب تتحقق

Rehab Mostafa يقول...

تصدق بالله... لا اله الا الله .... أنا أول مره أخد بالي ان اسمي موجود في صحابي المدونيين عندك والله
بالنسبه للفكره.. الفكره جامده بجد .. وانا مستعده للمساعده أون لاين أهو :)

صحييح... الحاج أحمد اغريق بيسلم عليك أوي ... أصل انا روحت سألته عن الحضاره دي وقالي أه هو اللي عملها ... ده راجل طيب أوي على فكره :)))

shahy يقول...

اهي دي بقى افتكاسة سوووووية بجد

حقيقي فكرة رائعة وانا مستعدة للمساعدة بجد بس حكاية يوم الجمعة دي هاتبقى صعبة شويتين لكن انا في الخدمة

تحياتي لأبني المفكر المفتكس

ابن حـجـر الـعـسـقـلانـى يقول...

كلنا وراك يا كبير

انت لو قريت تعليقى عند مدونة "مهندس مصرى" كنت هاتلاقينى اتكلمت فى موضوع النشاط المشترك

أحمد الصباغ برضه اقترح فكرة اللقاء الدورى

و نتقابل فى التحتوس البرانى يا كبير

3ala asm masr يقول...

حلمك ده يا احمد ان شاء الله هيتحقق وكلنا جمبك ومعاك والمدونين يقدروا يعملوا حاجات كتير اوى انا عارفه ان حلمك ده مش من النهارده ولا امبارح ده من زمان وانت كلمتنى عنه من فتره
وان شاء الله يتحقق

fatima يقول...

العزيز سووو
كنت أتمنى انى آجى ..بس مقدرش
لأنى بمنتهى الصراحة أعترف بأنى أجبن من أن أظهر ..تنقصنى الشجاعة ولكنى أحييك على حلمك الجميل ..
و أرجو أن تسمح لى أن أشارك فيه يوما ما...
تحياتى واعتذاراتى

Che The Hermit يقول...

سوووو
بجد ممتاز اوى كلامك وفكرتك جامدة وبصراحة انا ع الويب ومن التدوين كونت صداقات بجد احسن من مائات على ارض الواقع واتمني اقابلهم في يوم من الايام بس انك تعمل لقاء دي هتبقي محتاجة تظبيط شوية لان مينفعش نقول بعد يومين نتقابل لان مواعيد الناس مش هتكون مظبوطة ممكن نقول مثلا بعد اسبوعين ونشوف الميعاد اللى يناسب اغلب الناس وفى المكان اللى يناسب اغلبهم برضو وكمان فى حاجة يا ريت تتنفذ يبقي فى تنظيم يعني يتعرف العدد اللى جاى وبتطلب ان محدش ييجي من غير ما يكون قايل قبل كدا علشان نشوف المكان كبير او صغير واسع ولا ضيق كدا يعني
كمان فى بلوجر صديقي قالي ان فى لقاء للمدونين يوم الجمعة سبعة مارس بساقية عبد المنعم الصاوي بس مش عارف الجمعة امتى بالظبط لو اتأكدنا من الكلام دا ممكن نجتمع هناك واهو يكون فى شهر مهلة كل واحد يظبط مواعيده ولو اللقاء دا مش هيتم نظبط لقاء كويس بس مينفعش نقول بعد بكرة كدا لانه مش هيكون منظم ولا مناسب

تحياتى كتير
تشي

مشمش يقول...

يارب كل دة يتحقق دي هتبقي اجمل حاجة نعملها وعشان حب الاستطلاع الي هيموتني اني اشوف اصحابي المدونين بجد

RAMA يقول...

فكرة حلوة أوي يا سووووووووو.. خصوصا إن فيها مشاريع وأنا بموت في المشاريع والأفكار

بس على فكرة أنا حشارك من وراء الشاشة يمكن لأسباب كتير... ولكن المهم إني عاوزة أشارك

على فكرة بقالي كتير ماجتش هنا وعارفة إن المدونة ضلمة من غيري... بس انا مش حتاخر تاني إن شاء الله

سلام عليكم

appy يقول...

انا ان شاء الله هاجى بس قولى اركن عربيتى فين ولا ادخلها معايا

Desert cat يقول...

عارفااااااااهاااااااااااا
وشربت فيها قبل كدا نسكافيه
فعلا اختيار المكنا حلو وعلشان يبقى سها على اللى من المحفظات
انا مش عارفه ظروفى ايه بصراحة
عموما هشوف ظروف رفيق الدرب وابقى أأكد بقى بعد كدا
فكرتك هايلة يا سووو
ربنا يوفقك ويوفق الجميع

rainbow يقول...

عحمد اللى كان تفل طخين

سعيدة لدرجة وجود ابتسامة عريضة غير مبررة على وشى

سعيدة بالفكرة اللى خليتنى احلم معاك بكل التواصل الرائع المفيد ده

صحيح هو ايه فايدة الصحاب غير كده ؟ مجرد سلامات وطيبات ودمتم .. لع يا ولد العم لازم يكون لينا دور او ادوار الله اعلم كام بس لازم ان شاء الله

شوف موضوع الجمعة ده مستحيييييل مش عندى بس عند ناس كتير لانه غالبا اليوم العائلى بتاع زيارات بيت العيلة وبتتجمع فى العائلة حاول تزحزحه شوية يا عحمد

كلنا ايد واحدة يا بهجت ... قصدى يا عحمد !!0

تحياتى ودعائى الخالص

هدى

Noony يقول...

فكرة جميلة
أنا عن نفسي سايبة الميل بتاعي في البروافايل عندي
وفيه كتير بعتولي بيسألوني عن حاجات هم عارفين إن ممكن أعرف أساعدهم فيها إزاي
وبفرح جداً لما حد يسألني عن حاجة ويقولي إنه أخد الميل من البلوج

أما بالنسبة للمقابلة
في مدونين كتير قبل كدة اتقابلوا وأكتر من مرة بس الموضوع ماستمرش
أنا عن نفسي كان نفسي أبقى موجودة..بس غالباً مش هابقى موجودة في القاهرة الأسبوع الجاي إن شاء الله
لما تكرروها إن شاء الله هاجي

كدة جميل؟
سلام يا صاحبي المدون
:)
نوني

كلاكيت تانى وتانى يقول...

مساء الخير دى اول مرة ادخل مدونتك والسبب قطة الصحراء اللى كنت بكلمها عن اجتماع شهرى للمدونين نعملة نتعرف وكمان نحاول نجمع افضل افكاروكتابات كل واحد فينا حاسس انها افضل ما كتب ونعرضها ع احد دور النشر من باب اننا عاوزين احنا اللى نفرض نفسنا وفكرنا ع المجتمع مش همة اللى يختاروالنا وطبعا قالتلى انك كتبت نفس الكلام ع مدزنتك وكطل ما اقولها فكرة تقولى سو برضة قالها ماشى يا عم سو لو توارد خواطر يبقى خير المهم التنفيذ سعيدة لمعرفتك وتمنياتى ان الفكرة تتحقق بجد مستنية ردك تحياتى

Eman Eltaher يقول...

هيا الفكرة جميلة جدا
انه يبقى فيه اجتامع بس للاسف فاتنى
ان شاء الله المرات الجاية يمكن ينفع

حلمك جميل و ان شاء الله يتحقق
معلش أنا آسفة على التأخير بتاعى ف كتابة المواضيع و ربنا عالم انه غصب عنى وقتى حاليا مش مكفى غير مشاكل النت
بس

ان شاء الله الموضوع الجديد قريب اوى

رئيس جمهوريه نفسى يقول...

العزيز سو انا معاك وجاى اقولك وحشتنى

shayma يقول...

اولا انا سعيده انى من ضمن اصحابك المدونين
:))
ثانيا فكرة بجد استاذة
انا كمان نفسى من زمان دورنا يتعدى الكلام ونقدر نعمل حاجه
بجد بجد احييك على الفكرة ومعاك فى اى حاجه ويارب نفيد ونحقق حاجات كتييير
:))))
ثالثا موضوع يوم الجمعه ده جميل بس مش هقدر اعمله لان شغلى الجمعه
بس معاكو بقلبى انشاءالله
:))))))))))
سلامى يا سوووووووو
:))

كاميليا يقول...

تعليقى جملة واحدة بس

سوووو

إنت إنسان جميل.


كاميليا

سهر الليالى يقول...

فكرة جامدة يا سوووو
وربنا يوفقنا للى فيه الخير يارب ويجعله فى ميزان حسناتك
بس للأسف مش هقدر أكون معاكو يوم الجمعه ده لان مسألة السفر بالنسبالى صعبه فياريت تبقى توافينى بالتفاصيل وخلينى على الخط يعنى

وربنا يجمعنا على الخير دايما يارب
تحياتى

بنوته مصرية يقول...

يلهووووووووووي يا سو
فضحتني اوعي تقول اني هقسم معاك العموله ههههههههههههه


بجد فكرة حلوة اووي
وانا هاجي ان شاء الله وهجيب عروستك معايا وقولي هتعلن الخطوبة امتي علشان اكلم باباها هههههههههههه


بجد فكرة حلوة اووي وانا معاكم ان شاء الله ويارب اقدر اساعد علي قدر ما اقدر

انت طيب اوي يا احمد علي فكرة

تحياتي لك
اختك
رودي

لولا يقول...

حلم جميل اوى ومش مستحيل انه يتحقق
لو كلنا حطينا ايدينا في ايد بعض
يارب بجد الحلم ده يتحقق
ونبقى كلنا اسرة واحده

Ahmed Essawy يقول...

فكرة كويسه يا سووو ... يا ريت تحطني معاكو ... كمبرمج كمبيوتر :)
يعني لو احتاجت استشاره برمجيه كدا علي السريع ... ولا حاجه ...
بس مش اقدر اوعدك اني جاي لاني فعلا مشغول جداً ... و متابع المدونات بالعافيه ...
ربنا يكرمك الي الخير ان شاء الله .

ra7eel يقول...

سوووو
هى فعلا فكره جميله جدا
انا لو كنت فىا لقاهره كنت اكيد جيت
على فكره احنا برده اقترحنا الفكره وهنتقابل فى القاهره برضه بس فى الاسبوع الاول من شهر تلاته وبدأنا تقريبا برضه ننشر الفكره
انا هجى بقى مره واحده عشان السفر وكده وياريت بجد تكون موجود معانا فى المره التانيه اكيد هبلغك المعاد والمكان
انت احلامك حلوه قوى بجد
ربنا يوفقك

Rosa يقول...

:) :) :) :) :)
حلم من عندي من زماااااااااااااان
بس ماكنتش اعرف ان ممكن حد يشجعني عليه او حتى يتحمس له
مش عارفه اقولايه بس بجد مبسوطه قوي قوي لاقتراحك يا سوووو
و انا اول المنضمين للرابطه ديييييييي
بسيا رب فعلا فعلا يتحقق مش يقف بس عند حدود كونه فكره و بس
am innnnnnnnnnnnnnnnnnn

صوت من مصر يقول...

فكره حلوه بس انا مليش دور وانا عارف ده

بت خيخة وأى كلام يقول...

حظى منيل بستين نيلة
انا للاسف يا سوووووو
قريت البوست ده النهاردة بس
لو كنت قريته بدرى شوية كنت هاجى يوم الجمعة
وخصوصا ان انا عارفة الكافتيريا دى وياما قعدت عليها مع اصحابى
يعنى بالنسبالى المكان مألوف
عموما انا متفقة معاك فى فكرة انشاء جمعية خيرية مننا احنا المدونين واللى عنده اى حاجة يقدر يقدمها ياريت مايترددش لحظة
انا بس عندى مشكلة فى التخطيط
يعنى ماعرفش اخطط
لكن قولولى ايه اللى اقدر اعمله وانا هاعمله علطول
وبجد بجد تسلم افكارك الجميلة
وشكرا ليك يا سوووو على تعليقك عندى
بجد ونعم الاخ
تحياتى ليك
اختك خيخة
اه صحيح
لو هتعملوا يوم مقابلة تانى فى كافتيريا المجلس الاعلى للثقافة ياريت تدونى خبر قبلها بفترة علشان يكون عندى علم واعرف اظبط احوالى

Soooo يقول...

يا جماعه الف شكر ليكم كلكم على تشجيعكم سواءا من خلال حضوركم ان شاء الله يوم الجمعه .. او من خلال تشجيعكم لي ولكل المدونين في تحقيق الحلم ده

ارجع تاني واقول .. احنا مش هدفنا اننا نعمل مجرد مدونه تجمع كل المواضيع ولا تجمع كل الافكار وتبقى جرنان ونختلف في رئاسة تحريره والمنسقين والمحررين .. انا باتكلم اننا نتحول من مجرد مدونين لصحاب .. وبعد كده نبدأ نعمل اي حاجه مع بعض
حاجه زي دي مش هتكون غير عن طريق اننا نخرج من حالة القوقعه اللي احنا زانقين نفسنا فيها من خلال شاشات وكيبوردات واجهزة
لأ
لازم نتعرف ببعض .. ومافيش حد يقول انا مش عارف اعمل ايه ولا انا مافهمش في حاجه
كلنا اكيد فاهمين في اصول التعامل الانساني .. يبقى نتعامل باسلوب انساني مع بعض ونتحول لصحاب بجد .. بدل ماحنا صحاب عن طريق النت وبس


سلامووووووووووووووز

إيمان يقول...

فكرة كويسة جدا وفعالة يا سووو
أنا لسة قادرة اتابع النت لان بيفصل كتير جدااااااااا عندى
شوفوا اية الخطوات وانا معاكم باللى اقدر عليه

تحياتى وتقديرى

maii bahaa يقول...

أجدع سلام لسوووووووو

أنا أشجع الفكرة بشدة

وشايفة ناس كتير متحمسة

ياريت تأكد على المعاد بس تاني يا فندم

وإلى الأمام
:)