الاثنين، ١١ صفر ١٤٢٩ هـ

(3)مذكرات طفل .. طخين

المحطه التالته .. أضواء الشهرة
---------------------

وقفنا في المحطه اللي فاتت عند سيادة اللوز .. لما قاللي انهم مستعدين ينفذو كل طلباتي .. وبيني وبينكم انا مافيش في دماغي أي حاجه غير اني اقول للناس ان الريحه دي مش منني .. وان المصدر الاساسي وخام الرائحه دي هو الواد المسلوع .. بس ازاي اقوللهم كده وهم مكلفين نفسهم وجايبين عربيات الأمن المركزي ومأجرين ماكرافون من الراجل بتاع الروبابيكيا عشان يكلموني بيه .. ده غير القنوات الفضائيه اللي جاية تغطي الحدث المهم ده - الجزيره والعربيه والحُره وسبيس تون - قنوات كتير كتير يعني .. بالاضافه الى اربع طيارات هولوكبتر عمالين يلفو في السما زي الغربان .. طبعا مع وجود الحاجات دي كلها .. صعب على أي حد انه يسمع أي حد
وعشان كده انا نزلتلهم في الحوش وانا ماسك شاندوشت اللانشون ابو زتون في ايدي اليمين .. والشنطه بتاعتي في ايدي الشمال .. وبمجرد ما نزلت الحوش
.. سمعت اجزاء السلاح الآلي اللي معاهم وهي بتتشد
.. وسمعت صوت الطيارات وهي بتقرب
.. وسمعت صوت المذيعين وهم عايزين يعرفو ايه الموضوع
.. وسمعت صوت واحد بيبيع فيشار للناس اللي واقفه عشان تتفرج
!!!!!!!
.. لكن انا ماهمنيش أي صوت .. واستمديت شجاعتي من شندوشتي
.. وقلتلهم بعلو صوتي .. وبدون أي خوف
سوووو : - وعيني مغرورقه بالدموع - أنا ماليش دعوة .. أنا عايز اروح لامي
-------
بعد ما المشكله دي اتحلت عن طريق تدخل بعض المدرسين اللي كانو يعرفو أهلي .. وبعد ما شرحو لسيادة البيه اللوز .. ان اللي حصل ده هو مجرد سوء تفاهم .. وان اكيد الغرض من البلاغ ده هو بلبلة الرأي العام .. وزرع الفتنة بين ابناء الشعب المتنافر واللي مش طايقين بعض من اساسه .. قرر سيادة اللوز والجيش اللي معاه انهم يروحو يقعدو على أي قهوة قريبه يصطبحو ويشربولهم حجرين .. وبعدين يروحو بيوتهم من برا لبره عشان ما يمضوش على دفتر الحضور والانصراف

طبعا المدرسة قفلوها في اليوم ده .. مش كده وبس .. لأ .. دول ادونا اجازه مفتوحه على غرار اجازة .. سيدي زلزال اكتوبر
وطبعا انا كنت السبب في الأجازه دي .. وكل الطلاب اتصاحبو علي من يوميها .. واعتبروني ابوهم الروحي .. وبدال ما كانو بيعاملوني بشكل مستفز ومنفر .. ابتدو انهم ينظرولي نظرة احترام .. بل انني تحولت لنجم ساطع في سماء المنطقه التعليميه ككل
وعلى النقيض مني تماما .. تحول التلميذ المسلوع لعدو المدرسه وعدو الطلبه
والعيال كلها كرهته وماحدش بقى بيعبره

وبعد الحادثه دي .. وفي احد الايام .. كنت على موعد مع القدر
موعد مع الشهرة والتضحيه
كنت بالعب كورة في الشارع مع اصدقائي .. وطبعا لأني طخيــن .. وحركتي قليلة .. كان مركزي في اللعب .. هو حارس المرمر .. وده تقريبا لان الفريق اللي انا بالعب معاهم بيعتقدو ان وجودي في الجون بكرشي ده .. هيسد الجون .. كما ان مجرد استنشاقي للهواء بشده في حالة اي هجوم على الجون بتاعنا كان بيسبب اختناق للاعب المنافس اللي قدامي .. وده تقريبا لانه وعلى حسب الفيزياء الذرية ونظرية فيثاغورث .. حجم رئتي اكبر من مجموع احجام رئات الفريقين مجتمعين
لكن الغريب والمريب .. اننا دايما كنا بنتغلب بنتايج تدخل موسوعة جينيس ريكورد
مره اتغلبنا خمسه واحد .. ومره سبعه اتنين .. واكتر هزيمه حاقت بالفريق اللي لعبت معاه كانت اربعتاشر تلاته
.. تقريبا الغلطه في الفريق اللي بالعب معاه هي خط الهجوم
مابيعرفوش يلعبو خاااااااااااااالص

في اليوم ده حصل لي موقف غريب
موقف رهيب
موقف شديد
موقف لا يمكن أن انساه ماحييت

الموقف ده كان واحنا بنلعب كورة .. او بمعنى اصح .. واصحابي بيلعبو كورة .. لأني كنت واقف في الجون باكل شندوشت سلمون بالطحينه واللمون والبصل .. وفي اثناء ما الكورة كانت مع الفريق بتاعنا .. لقينا عربية لونها احمر سقفها مكشوف .. وسايقاها حتة بنت انما اييييييييييييييييه
واخده من كل بنات الاعلانات احلى حاجه فيهم .. البنت مافيهاش ولا غلطة .. طبعا كلنا تنحنا .. لقينا البنت دي راحت واقفه بالعربيه في وسط الشارع مكان ما احنا بنلعب كورة .. وراحت قالعة نضارتها الشمش .. وعاديكم بقى على اللي حصل فينا لما شوفنا عينيها
عينيها حاجه كده من اللي احنا بنشوفها في مذيعات قناة ميلودي روتانا مزيكا المحور الطريق الدائري ..
حاجه كده تهبلللللللل
البت قلعت نضارتها وقعدت تبص علينا واحد واحد .. لغاية ما جات عيني في عينيها
تارااان تارااااااااااااااااااااااااااااااااااااااا ... رااااااا
موسيقى اغرااااااااااااااااااااااء

بمجرد أن تلاقت عينانا .. حسيت ان روحي بتتسحب منني .. مش كده وبس .. لأ .. لقيت البنت بتشاورلي بصباعها الرفيع .. طبعا صباعها بالنبسه لي رفيع .. مش صباعها وبس .. هي كللها على بعضها كده ما تجيش وزن فخدة رجلي اصلا
-- تشبيه جزار ماشي مع جاموسه بلدي --
لقيت البنت بتشاورلي من هنا .. ولقيت كل خفة الدنيا بقت في .. كنت باجري عليها وكأني غزال سكران لما شرب بُق حلبة بحليب .. ولما وقفت قدامها وانا متنح وعلى وشيي ابتسامه بلهاء معبرة عن مدى التخلف اللي انا فيه .. راحت مبتسمه قوي وقالتلي
المزه : هو انت سوووو ؟؟
انا طبعا تنحت وفتحت بقي بابتسامه بلهاء والاكل كان هيقع من بقي .. لولا اني انتبهت لما لقيت العيال كلهم سابو الكورة وسابو اللعب وجم ناحيتي وعايزين يشوفو مين المزه دي وعايزه مني ايه .. رحت بالع الاكل في ثانيه وقلتلها
سوووو : ايوه انا سوووو - وبنظرة كلها مكر ودهاء - يلزم خدمه ؟
المزه : انت ساكن فين يا سوووو ؟
ساعتها بقى حسيت اني ولا فالنتينو عصره واوانه .. دي في ثانيه عايزه تعرف انا ساكن فين شكلها كده معجبه بي وبكرشي
قربت من العربية بتاعتها ورحت لازق كرشي في الباب اللي من ناحيتها وقلتلها
سوووو : انا ساكن في العماره دي - شاورتلها على بيتنا - بس مش نتعرف الاول؟
وياللهول .. قلت الكلمه دي لقيتها راحت ضاحكه ضحكه تفرتك الفراتيك .. وقالتلي
المزه : هنبقى نتعرف بعدين .. يو آر سوووو كيوت
طبعا بما اني نبيه وافهمها وهي طايره .. قلتلها وانا رافع ايدي بالشندوشت
سوووو : لأ والله .. ده سلمون بالطحينة
!!!!!!

بس انا وقفت مستغرب .. ومش فاهم هي سألتني انا دون عن الناس كلها ليه .. بس اقنعت نفسي انها ممكن تكون اتفرجت علي لما قناة الجزيرة عملت معايا الحوار التلفزيوني بعد موضوع المدرسه .. وانها اعجبت بي وبوسامتي .. وبكرشي

ولكن القدر كان يخبئ لي مالم يخطر على بال بشر
نعم يا حضرات القراء
ماحدث لي بعدها لا يمكن ان يتخيله انسان او حيوان
ولكن قبل ان احكي ماحدث لي .. هستأذنكم اروح اضربلي رغيف حواوشي عشان افتكرت اني بقالي فتره ماضربتش حواوشي .. وممكن بالمره اجبلي رغيف طرب على رغيف كفته .. لو في سمين مافيش مانع اضربلي رغيف على استحياء
وهبقى اكمللكم الباقي بعدين ان شاء الله

سوووو

هناك ٤٥ تعليقًا:

Unknown يقول...

منتظرة اعرف الامورة دة كانت عايزاك لية مش تتاخر وبعدين المرة الى فاتت كلبت منك شوية شندوشتات مش جبتها منتظرة الحواوشى

بنوته مصرية يقول...

احجز تاني تعليق وارجع تاني



مااااااااااااشي


رودي

الـسـيـدة نـون يقول...

ههههههههههههههههههههههههههههههه
هههههههههههههههههههههههههه
هههههههههههههههههههههههه
هههههههههههههههههههههههه
لا والله ده صاندوتش سلمون بالطحينة
هههههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههه
ياواد خلتنى اشرق من كتر الضحك
والبونبوناية اللى فى بقى اتبلعت مرة واحدة
وانا كنت لسة حاطاها فى بقى وبمزمز فيها
تحفة يا سوووو
اسلوبك يجنن
هاموت واعرف ايه اللى حصلك والمزة دى عملت فيك ايه
ايه النظاااااااام
شغاااااااال
هههههههههههههههههههههههههههههه
انت تجنن
ماينفعش تخلى الحلقة الجديدة بكرة
هو انا هاستنى لحد الاتنين الجاى
طب ابعتهالى ميل لو جاهزة
الفضول هيقتلنى
وانا اساسا نيتى وسخة وعقلى الباطن هيصورلى حاجات مش ولابد
سلام
اختك خيخة

Rain man يقول...

آتانا شغل التشويق
سامحك الله يا سوووو .. الا ترى ان الانتظار اسبوع كامل اشبه بالتعذيب ؟

جميل ان تلعب في مركز حراسة المرمى
لم اكن العب سوى مهاجما
و الواقع يشهد اني مهاجما فزا
فاطمة قالت انني كذلك حينما اخبرتها ان اخر مبارة لعبتها كمهاجم خسرتها بخماسية نظيفة و الهدف الخامس احرزته فى مرماي بعد فاصل من استعراض المهارة الفردية ..

..

اعتذر لك عن عدم مجيئي يوم الجمعة الماضية
و الله كنت قد عقدت العزم رغم تكاتف الظروف ضدي
اتمني ان يحالفني الحظ في معرفة تفاصيل اللقاء

احبك كثيرا ايها العجوز الطخييين

ghalia يقول...

هيييييييييييي
لولولولولولولييييييشش
مش مصدقة إنى قدرت أقفشلك تعليق فى الأول
هو الخامس بس بردو يعتبر رقم قياسي
بحجز على ما اقرأ وراجعة
D:

خمسة فضفضة يقول...

السلام عليكم ورحمة الله وبركاته

هههههه
ماشاء الله تحفه ، اوعي تقولي بقي ان طنط دي عاوزاك تعمل اعلانات في التليفيزيون زي اعلان كلبز كده

باقولك ياسو ماتفكر تعمل المذكرات دي كتاب وتنزله معرض الكتاب السنه الجاية

صدقني هايفرتك الدنيا
هههههههههههههه

Empress appy يقول...

hi ya soooo gamda awi kael ya man we will wating for u
ana gbt lab top bagrab fek hehehheheh

bs mabektabsh arabic
ho ant hatamel alan melody sah

زى الهوا يقول...

هههههههههههههههههههههههههههههههههههههههههههههههههههههههههههههههههههههههههههههههههههههه قرأت فصلين , ياحضرتك اللى بتكتب بسرعة ياأنا اللى مشغولة وبزنز وومن ( وش محول )

تحفة بجد , شوقتنا اووووى لمعرفة اللى هيحصل , فى انتظار الفصل الجديد

Desert cat يقول...

روح اضرب اللى نفسك فيه بس اوعى تضرب البواب بالمرة اصله بينفع ويجيب طلبات للجيران ...
انا قاعده هنا مستنية علشان عايزه اعرف المزة دى كانت عايزه ايه

زى الهوا يقول...

معلش نسيت اقولك على حاجة , الموسيقى منرفزانى اوى مش عارفة ليه , عصبتنى كدة الخمسة اللى باقرأ فيهم ( وش مطلع لسانه)

Unknown يقول...

الله يسهلللللللللللللللك يا عمممممممم
ما تجيب شندوتش لاختك الغلبانه يا سووو
وبعدين استنى هنا
انت محكتليش عملتوا ا يه فى التجمع
مش قلتلك تبقى تقول اتفقتوا على ايه عشان لو اقدر اشارك من موقعي فى اقصى الارض
اوعى تكون اكلت المزه
:(
ما تجيب شاندوتش بقى

Lemonada يقول...

يا عم اي ده
والله انا وقعت من الضحك مش كده
بس اي التشويق ده
على فكره انا نازله مصر لازم تشوف المدونه بتاعتي بتاعت ليموناده
فيها حجات عني وعن ناني
سلالالالالالالالالام يا معلم

ابن حـجـر الـعـسـقـلانـى يقول...

أيوة .. أيوة يا عم ... طول عمرك مدوخ الحريم .. أسيبك أنا بقى و اروح أجيب لك ستة بيرة على رأى اللمبى

قال و أنا اللى فاكرك أشفور زى حالاتى .. طلعت ولد من يومك .. طب لى خدمة عندك لو سمحت .. فى الحلقة الجاية أوصيك تبقى تسأل الأمورة هى ليها أخت صغيرة و لا لأ

صوت من مصر يقول...

شكل الموزه دى صاحبه شركه السالمون يا سووووو وانت كنت بتشكك او عامل لهم ازمه صح
بجد بحب طريقتك فى الكتابه جدا بتفكرنى بنفسى زمان بس على مسلوع

سهر الليالى يقول...

انت بقيت تعمل زى المسلسلات يا سوووو
تعلقنا وتقوم تسيبنا متشوقين
طب وراك وراك لحد ما اعرف البت دى عايزة اية
"وقلت ياواد طنس خالص وشوف البت دى عايزة يه "
:)

تحياتى ومستنية بقى
بس هى كانت بت على قد الواد ولا كانت كبيرة؟؟؟

فاتيما يقول...

سووووو
أوعى تقولى ان الأخت هتطلع مدرسة و هتديك درس خصوصى و جاية تستكشف المنطقة و تشوفك بالصدفة ....
فى اى حال مفيش قدامنا غير الانتظار
طبعا مش هسألك على الى حصل الجمعة الى فاتت لان واضح ...
اننا طلعنا أقل بكتير مما تمنيت و قررت تعاقبنا بتطنيشنا خالص و متقولش حاجة
عملا بمبدأ ..عقاب الندل إجتنابه ...
مش هالومك ...
عذراك ... و ياريت انت كمان تعذرنا
تحياتى
و كالعادة دمك زى السكر يا سووو
تحياتى

مشمش يقول...

انا مستنية علي احر من الجمر اعرف عايزة اية وابقي هاتلي معاك سندوتش كفتة

Nani يقول...

السلام عليكم
ما معنى ما يلي طرب سمين حواشي؟
عليا النعمة ان البت كانت عينها على الشنتويتش الي في ايدك اوعى تدهولها يا واد
:)

Unknown يقول...

سوووو

اية اخبارك سيادتك يافندم

اية رايك فى حبة الادب دول

يارب تكون بالف خير

انا عارفة انى قليلة الذوق لانى بقالى كتير مش بزورك بس بجد اعذذذذرنى

انا جيت امسى عليك وهرجع تانى اديللك كومنت على كل البوستس اللى فاتونى

دومت بالف خير

نوراى

كاميليا بهاء الدين يقول...

هستأذنكم اروح اضربلي رغيف حواوشي عشان افتكرت اني بقالي فتره ماضربتش حواوشي .. وممكن بالمره اجبلي رغيف طرب على رغيف كفته .. لو في سمين مافيش مانع اضربلي رغيف على استحياء

وهاتضرب كل دول ليه؟
فتونة يعنى مثلاً؟

هههههههه

طيب .. بالهنا والشفا
بس مش تكمل اول ما تخلص
علشان أكيد الحالة هاتبقى مش مظبطة يعنى ... أصل كل دول على بعض ممكن يسببوا قليلاً من التوهان ههههههه

إنت

جميل

اوى

يا

سوووو

تحياتى

كاميليا

اهو ده عيبه يقول...

ازيك يا عم سوووووووووووو
بجد بجد مت من الضحك،بس الحاجة الى محيرانى انت كان على ايامك لانشون من ابو زيتون
المهم عايزين نعرف المزة دى عايزة ايه

cinderella يقول...

إوعي تقول طلعت اختك في الراضعه وكنت ناسيها
ولا جارتكم فى العماره بس كانت تايهه
هههههههههههههههههههههههه
انت بجد سووووو يا سووووووو
على رأي اصحابك النوبيين
بس شكلها هتطلع حد عارفه وكنت ناسيه برده
انا متأكده مع انى اتمنى انها تكون معجبه عاشقه ولهاااااااااااانه
ومستنيه اخر الاخبار

ghalia يقول...

ههههههههههههههههههههههههههه
بألف هنا وشفا
يعنى ما تفتكرش تضرب حواوشى الا فى الحتة دى
بتعمل فينا زى المسلسلات وتقطع الحلقة على أحلى حتة
ماااااااااااشى
مستنيينك يا عم سوووو

shahy يقول...

لية كدة ياربي كل اولادي العيال بيضحكوا عليهم وبيوقفوهم حراس مرمى

ههههههههههههه
اصل الشنيور كمان مش بيعرف يلعب كورة وبيقف جون بس العيال بيزعقولة لما بيدخل فية اجوان
تفتكر في امل يادكتور قصدي ياسووو

كان نفسي اخلف لأبو الدراويش ولد زي حسني عبد الربة اللي هايتجنن علية

تحياتي

صحيح
حد ياكل سلمون بالطحينة
احنا كنا بنأكلة بالزيت والليمون والبصل

سمية يقول...

اسلوبك اكثر من رائع..

بجد كتاباتك دمها خفيف مووت..


سمية

المـــفـــــــقــــــــوعـــــة مــرارتـهــا يقول...

ده انت مسخرة
هاتابع حكاياتك

المـــفـــــــقــــــــوعـــــة مــرارتـهــا يقول...

فكرة اننا ممكن نتقابل دي مخولتني خالص عارف في معرض الكتاب كنت واقفة علي بوابة دار الشروق اللي كانت غادة عبد العال بتوقع كتابها فيها
وعشان عارفة ان المدونين هايتقابلوا بقيت واقفة ذي الهابلة بأسأل اللي داخل واللي خارج انت مدون ؟
وطبعا الناس بقت تسألني يعني ايه مدون
وكانت كاسفة كبيرة

shreen يقول...

سووو
وانا كمان جعانه
وانت لو تعرفنى
دى حاجه نادره جدا

هاتلى سندوتش كفته معاك
عايزة اعرف بقى البنت دى حكايتها ايه
ولو انك شكلك هتاخد
خابوووووووووور كبير

بصى يا سيدى
فى بنت تانيه بقى عسوله
ده لينك مدونتها
http://gannah77.blogspot.com
ووالله هى لا صاحبتى ولا عمرنا اتكلمنا
هى زارتنى النهارده فى المدونه بتاعتى
رحت عندها
حسيت ان روحكم واحده
بتكتب هى بنفس اسلوبك ده
فكرتنى بيك

فقولتلها عليك
وانت فكرتينى بيها
فبقولك عليها

مستنيه باقى المذكرات
وسندوتش الكفته

سلااااااااااااام كبير

شهـــــرزاد يقول...

السلام عليكم
ديه اول زيارة ليه بس مش هتكون الاخيرة ان شاء الله :)
بس بجد ماشاء الله دمك خفيف جدا , هم كل الكلابيظ دمهم خفيف كدا

اوعى تطلع البنوتة طمعانه في شاندوتش اللانشون ولا تكون عايزاك في عملية ارهابية وعايزة تخطف البوي فريند بتاعهاوتطالب بفدية :D
وملاقتش اشرس منك تخوف بيك العيال :D
في انتظار البقية ..
سلاااااام

شهـــــرزاد يقول...

تكونش البنوتة عايزاك فتى اعلانات :D
وتطلع في اعلان قلبظ :)
ايوه يا عم ماشية معاك

سلااااام

simple girl.. ..simple dream يقول...

سووو
اخيرا شوفت مدونتك قبل ما اموت
ايه يابنى المسخرة دى
حرام عليك
انا صوتى جاب لاخر الشارع وانا بكركر اوى من الضحك لما قالتك يو ار سوو كيوت وانت قلت لا والله دة سلمون بالطحينة
بجد انت دمك خفيف مووت انا ماكنتش متخيلة انك لذيذ كدة
بس اتخنقت منك لما ماكملتش الزة كانت عايزة ايه ورحت تاكل حواوشى
ودة وقت اكل يا راجل
مش تقولنا الاول هى كانت عايزة بيتكو ليه
يلا انا مستنية اعرف باقى الحكاية
سلام يا سوووو

د/اجدع بنوته يقول...

مش ممكن

مبحسش انى ف مدونه

ههههههههههههههههههههههه

روائه الاكل وبتخيل مؤائد م الطعام

والسندوتشات والمحمر والمشمر

مصممه انك تحط صوره ليك وانت طفل ف المدونه

علشان بجد حرااام الناس بقت متخيلاك

بمنظر صعب اوى ههههههههههههه

ماشاء الله عليك يديك الصحه يارب

وكمان علق قرن شطه ع باب المدونه

الناس كده هتحسد فيييييييييك

مش ع انك تخين ..

لا ع انك لاقى الاكل ده كله

تحياااااتى

وويتنج الحلقه الجايه

هههههههههههههههههههههههه
ههههههههههههههههههههههه
هههههههههههههههههههههه

Sha2loob يقول...

سووو
يعني انت وانت صغير كان بن لادن ارهابي وكان في الجزيرة وميلودي والمحور وكمان آل ايه كان في مزز
و عايز كمان تقنعنا انك كنت صغير
ماشي يا عمنا هعديهالك المرادي
بس ابقى حطلنا صورة المزه الجامده دي في البوست اللي جاي علشان بصراحة خيالي مش واسع للدرجة دي

جامد موووووووووووووووووووت

3ala asm masr يقول...

سوووو يا سوووو
والمزز دوخووووه

غير معرف يقول...

تحفففففففففففففففففففففة يا سوووو
بجد موتني ضحك
بس أبوس إيدك أي هينت عن المزة رقم تليفونها كده ولا حاجة طيب
أقصد يعني أي هينت عن نواياها ايه تجاه الطفل البرررررررررريء سوووو

مع إنه خلبوص كبير ونخاع قوي وطفس مووووت بس برضو زي العسل

مستنية اللي هيحصل بكرة على أحر من الفحم :))

ojg

شيماء الجيزى يقول...

سو

ازيك يا جميل
بص انا عايزاك فى حاجه ضروريه جدا جدا جدا
ومحتاجه ايميلك بشكل فظيع
ومقدرش اقول حاجه هنا احسن المفاجأة تتعرف

ده ايميلى
jornalest23@hotmail.com
ياريت تبعتلى عليه رساله او تضيفنى سرررررريعا

مستنياك

سلام

Rosa يقول...

:)
مبروك الميوسك الي بقيت شغاله توماتيكي توماتيكي
:D
و مستنين نشوف البنوته الجامده عملت ايه

غير معرف يقول...

باقي من الزمن دقائق على قدوم يوم الاتنين ،،، أين أنت يا سوووو

عايزة البوووووووووووست بسررررررررررعة وعايزة أكون أول المعلقين كمان ماليش دعوة

وإن شاء الله أكون أول المهنئين على الكتاب الجديد ان شاء الله أو مبدئيا النشر في جريدة كبيرة

من بقي لباب أكبر دار نشر فيكي يا محروسة

قولوا آمييييييييييييييييين


ojg

واحده من الناس يقول...

ها وبعدين
عايزين نكمل ضحك بقه
فينك؟؟

تحياتي

gigi يقول...

thank y for your message
my paintings is for sail

gigi يقول...

thank y for your message
my paintings is for sail

gigi يقول...

thank y for your message
my paintings is for sail

gigi يقول...

thank y for your message
my paintings is for sail

gigi يقول...

thank y for your message
my paintings is for sail

Dr. Ibrahim يقول...

شكلى النهاردة هنام على الكمبيوتر لما أخلص المسلسل ده لنهايته
لوان ورايا مشغوليات ومذاكرة وكلام فاضى ياراجل
^_^
د/هيما