الاثنين، ٤ صفر ١٤٢٩ هـ

(2)مذكرات طفل .. طخين

المحطة التانية .. الوحده القاتله
--------------------------

وقفنا في الحلقة اللي فاتت عند لما نزلت رشق في الأرض .. والمترو وقف لمدة غير معلومه
شركة المترو الفرنساوية بعتت مهندسينها وخبراؤها عشان يطلعوني من المكان الي انا وقعت فيه .. واكتشفو اني ممكن اساعدهم .. ومن هنا طلعت فكرة انهم يعملو خط مترو تاني .. وفعلا تم افتتاح خط (شبرا – الجيزة) وبعدها خط العباسيه اللي بيعملوه حاليا
وقريبا جدا خط (نويبع – جمصه) ودي عرفتها من الكنترول
والحمد لله كان لي دور كبير في حدوث هذا التقدم في المواصلات حيث أنني كنت من ألهمهم بهذه الفكره اللوذعيه

بعد الحادثة اللي حصلتلي دي .. كرهت حاجه اسمها المراجيح او الملاهي .. وبقيت احب اقعد مع نفسي كتير
طبعا مش مع نفسي مع نفسي .. لازم يكون معايا قد عشرين شندوشت يهوونو علي وحدتي
ولعله من الطرائف والنوادر ان يقوم طفل لم يتجاوز الاربع سنوات بصنع الشندوشتات لنفسه
نعم .. كنت اصنع الاكل بنفسي تطبيقا للحكمة القائله
ليس الفتى من قال هذا انا .. ان الفتى من قال هذا شندوشتي
وكدت ان اصل لمرحلة العالميه عندما كنت اقوم بصنع الشندوشتات لاخوتي الاكبر مني لكي يأخذوها معهم المدرسه .. ليس هذا فحسب .. بل والتفنن في صنعها ايضا حتى كان حلم حياتي ان افتح محل شندوشتات

بعد فترة زمنية ليست بالقصيرة .. وليست بالكثيرة برضه .. يعني بعد فترة متوسطلة .. كان لازم ابقى زي أي طفل وادخل المدرسه واتعلم
تطبيقا للموروث الشعبي الغامض .. العلمو نورون

.. اول يوم لي في المدرسه ده لا يمكن انساه خااااااااااااااالص .. وانساه ازاي وهو اول يوم لي في التعامل مع الأعداء

أيوه أعداء .. وده لاني باعتبر اي حد بيتريق علي وعلى طخنتي وعلى شكلي .. عدوي اللدود .. عشان هو ضد التحضريه وضد حريات الانسان

بعد أن دخلت المدرسه في اول يوم لي .. لقيت في حاجه فاشله اسمها طابور الصباح
.. وما ادراكم ما طابور الصباح
.. حاجه مراااااار
.. والأفضل انهم يسموه طابور النياح .. او طابور الجراح
انما مش طابور صباح خالص
وقفت زي أي حد في الطابور .. وطبعا كل فصل دراسي بيتكون من مجموعة صفوف منتظمه .. ماعدا الصف اللي انا كنت فيه .. كنت واقف في النص .. لو حد شاف الصف كان يلاقي انه مظبوط وتمام لحاد ما ييجي عندي .. يلاقيني واقف زي ما اكون حيطه .. وفعلا لما مدرس الالعاب جه عشان يشوف مدى محازاة الطلاب .. كان شايف أي صف مظبوط ومافيهوش أي مشاكل .. ما عدا الصف الي انا كنت واقف فيه .. عشان كنت باظظ من الصف .. ويقعد المدرس يقول بعلو صوته
مدرس الالعاب : كل واحد يقف وحده .. ماتقفوش مجموعات خالص !!!؟؟
وانا طبعا متضايق ومحرج .. وانا لما حد بيحرجني مش باسكت خالص .. باكل أي حاجه قدامي .. بس الواد اللي قدامي كان قفاه غير مشجع بالمره للأكل .. عشان كده مسكت اعصابي وما قرمتوش
الحمدلله طلعنا الفصل .. طبعا بعد ما اوهمت مدرس الألعاب ان اللي واقفين معايا دول اخواتي في الرضاعة .. وماينفعش اننا نفترق عن بعض .. وتقريبا اقتنع بالفكره وصدقها

طلعت الفصل بتاعي .. ولقيت كل الطلبة قعدو في دكك مميزه .. وكل الاماكن القريبه من السابوره خلصت .. وبرضه كل الاماكن اللي عند الشبابيك خلصت .. ومافيش ولا مكان ليه لازمه .. مافيش غير مكان في آخر الصف ومش من ناحية الشباك .. لأ ده من جوه .. في الركن البعيد الهادي
اتجهت عشان اقعد هناك .. واول ما قعدت في الدكة وابتديت اظبط نفسي .. لقيت صوت مكتوم بيقول
الصوت : اني اتنفس في الاعمااااااق .. اني افطس افطس افطس !!!!؟
قعدت مستغرب ربع ساعه .. هو عبد الحليم حافظ رجع للدنيا تاني !! وايه اللي خللى صوته مكتوم كده ؟؟
قعدت ابص حواليه .. مافيش حد .. ومره واحده سمعت الصوت المكتوم تاني وهو بيقول
الصوت : ياعم قوم فطستني
قمت وانا مرعوب .. لقيت في عيل مسلوع كان نايم عالدكه وانا قعدت عليه من غير ما آخد بالي .. لسه جاي عشان اعتذر له .. لقيت مدرس راح داخل علينا الفصل .. وكل الناس سكتت خالص
في اثناء ما المدرس واقف وبيكتب عالسبورة .. ابتدت ريحه غريبه منفرة في الظهور .. المدرس اتدور ناحية الفصل ووشه كان باين عليه الخنقة .. وراح قايل بنبرة صوتيه مكتومه من الخنقه
المدرس : انا مش قلتلكم ميت مره ماحدش ياكل فول بالبيض عالصبح !!؟؟

وابتدا يمشي المدرس في الفصل وهو بيحاول يعرف فين مصدر الريحه دي .. وكان ماشي وهو بيشمشم كأنه كلب وولف بول دوج اسبايدر مان تو
ولما قرب ناحيتي .. راح باصص ومعالم وششه كللها قلبت .. بعدها بثانية واحده لقيت الواد المسلوع اللي قاعد جنبي واللي انا قعدت عليه اول ما دخلت الفصل - واللي كانت الريحه منبعثه منه في الاساس - قام من جنبي وجري ناحية الاستاذ وعمل انو جالو تشنجات .. وراح مشاور ناحيتي وقايل للمدرس
الواد المسلوع : - وهو بيمثل انه بيحتضر وبيفرفر عالارض - هو ده يا استاذ .. هو ده

طبعا المدرس شاف منظر الواد وهو بيتشنج على الأرض خاف على روحه .. وطلع يجري من الفصل .. وبعدها حصلت حالة هياج تامة في المدرسة .. وكل المدرسة طلعت تجري .. وكل واحد منهم يقول
طالب : الحقووووو .. أمريكا ضربتنا بالنووي
طالب تاني : اجرو يا عيال ده هينفجر فينا
مشرف الدور : - وهو مدرس لغة عربية – انجو بنفسكم يا قوم .. الغوث .. الغوث
!!!!!
طلعت عشان ابص على الحوش .. لقيت المدرسة كلها فضيت .. وقفت مستغرب ومش فاهم .. وبعد اقل من خمس دقايق .. لقيت عربيتين أمن مركزي دخلو الحوش .. ونزل منهم حوالي خمسين صاعق من قوات الصاعقة .. طبعا غير خبراء التفجير والمفرقعات .. ولقيت لواء اركان حرب صاعقة .. ماسك مايكروفون وبيقول
سيادة اللوز : اطلع من عندك يا بن لادن .. احنا عرفنا مخططك الارهابي اللي هاتعملة

طبعا انا كنت خايف وهاين علي اعيط .. لكن مسكت اعصابي وانا باكل ساندوتش اللانشون اللي في ايدي .. وبمجرد ما حطيت الساندوتش في بقي .. لقيت كل قوات الأمن بتنبطح أرضا .. ولقيت اللوا ده ماسك المايكروفون وبيقول وهو مرعوب
سيادة اللوز : مافيش داعي لاستخدام القنابل .. احنا مستعدين ننفذلك كل طلابتك
!!!!!!!!!!!!!!!!!!!!!!!!!!
ولنا هنا وقفة
أن أن أن آآآآآآآآآآآآآآآآآآآآآآآآآآآآآآآآآآآآآآآآآآن ... تششششششششششششششششش

في ثانية تحولت من مجرد واحد طخيـــن كل الناس بتتريق عليه .. لواحد كل الناس عاملاله ألف حساب .. مش كده وبس .. ده انا لو كنت طلبت ساعتها كيلو لانشون حلواني اخوات .. او كيلو بسطرمه مستورده .. او حتى كيس شيبسي لايس كرانشي الحجم العائلي كانو هايجيبوه فوراااااام

ساعتها بس عرفت اني لما هاكبر هايكون لي شأن كبير في البلد .. واني ممكن اكون رئيس مجلس محلي .. عضو مجلس شعب .. أو جرسون في مطعم

ومش عايز اقوللكم اللي حصل معايا بعد كده .. حاجه غريبه جدا
لكن مش هاقدر اقوللكم عشان بطني بتصوصو .. ولازم اكل أي حاجه حالااااااان
اشوفكم بعدين ان شاء الله


سوووو

هناك ٤٦ تعليقًا:

بنوته مصرية يقول...

هيييييييييييييييييييييييي

اول تعليق

احجز واجي


سلامووووز (*_^)

الدرويش المرووش يقول...

ألف هنا و شفا يا جامد
مذكرات مغذيه جدا

shahy يقول...

مفيش تعليق انا بضحك ومش فاضية اعلق

بس بما انك صاحب فكرة المترو العظيمة وبتجيب الاخبار من الكنترول ابقى اعرفلي هما هايعملوا مترو اكتوبر امتى


تحياتي ياولدي العزيز وليك عندي كيلو لانشون المراعي فراخ مدخن كمان

صوت من مصر يقول...

ياراجل بلاش تريقه على المسلوعين لانى مسلوع
وتانى حاجه شكرا ياعم على اضافه مدونتى فى قائمه الاصدقاء ده شرف كبير يا سوووووووووو

صوت من مصر يقول...

ياراجل بلاش تريقه على المسلوعين لانى مسلوع
وتانى حاجه شكرا ياعم على اضافه مدونتى فى قائمه الاصدقاء ده شرف كبير يا سوووووووووو

الـسـيـدة نـون يقول...

يااااااااااااااااااه
بقى انت بقى سبب سعادتى
ده انا كل ماركب المترو بحمد ربنا ان الناس عرفت اختراع اسمه المترو
واتاريك انت السبب
بس انا معرفش ان بن لادن من زمان اوى كدة
انا فاكراه طلع من كام سنة بس ايام حداشر سبتمبر
اتاريه من زمااااااااااان ايام ماكنت انت فى اول سنة مدرسة
عموما الف هنا وشفا
ولو انى حاسة انك مش هتطلع كلبوظ اوى كدة
وانك بتشتغلنا
سلام
اختك خيخة

Unknown يقول...

والله فعلا مذكرات تستاهل تبقى قيلم تراجيدة او بوليسى بما ان الامن المركزى تتدخل المهم اعملنا معاك شوية
شندوشتات

Unknown يقول...

ههههههههههههه
صراحة انا شبعت على الريحة اقصد الاكل اللى اكلته يا راجل يا عجوز
يا خبر ابيض انا نسيت كنت هعلق اكتب ايه من كتر الضحك
معكش سندوتشين بلوبيف؟؟

رحــــيـل يقول...

سوووو
صاحب اخف دم
بجد هايله مذكراتك

متابعه لاخر الحلقات ان شاء الله

تحياتى

rainbow يقول...

عحمد .... حرام عليك فطستنى من الضحك !0

عمرى ما ضحكت كده من زماااااان تعرف كمان كنت بضحك على نفسى جدا لما اكتشفت انى بدل ما اقرأ الواد المسلوع كنت بقراها الواد الملسوع !!!!! ههههههههه بجد هيستيريا ضحك وعمتى هنا اتخضت وقالت البت اتهبلت على كبر

الله يسعدك ويملا قلبك سعادة حقيقية بقدر ما منحته لنا من لحظات مشرقة

هدى

ToOoKa يقول...

السلام عليكم ورحمة الله وبركاتة

ازيك يا راجل يا عجوز
انا لسه راجعة حالا من المدينة وربنا يعلم دعيتلك ودعيت لولدك أد ايه ولكا اصحابى المدونين

التعليق دا الصراحه على الموضوع اللى قبل كده

بجد بجد سبحان الله والله يا أحمد انا كان فى بالى الموضوع دا وكنت حقولكو عليه
بس منعنى سببين

الأول
انو خوفت لو احنا اتقابلنا وعرفنا شخصيات بعض ما أكتبش اللى فى نفسى بصراحه لانى بتكسف او تقدر تقول ما بثقش فى نفسى علشان كده مش مديه حد من اللى يعرفونى عنوان المدونة بتعتى
بس انا دلوقتى غيرت رأى وخصوصا لو حنترجم كل طاقتنا لحاجات احنا فعلا عاوزنها وحتفيد بلدنا بجد

تانى سبب منعنى

انو انا عايشة فى الاسماعيليه وما أعتقدتش انو أخويا يوافق انى اسافر القاهره لوحدى دا استحاله
عارف لو كان فى حد او مجموعة اروح معاها كان ماشى بس ما فيش حد

على العموم ان شاء الله انا حقضى أجازة الصيف كلها فى القاهره انا وماما علشان حاخد دورات تبع قصر العينى ان شاء الله وسعتها بجد ممكن نتقابل كلنا

يااااااااااااه والله ياريت

على فكره يا سوووو انا ممكن اجبلك مية زمزم بس المشكلة حاتخدها ازاى

انا حروح اقرأ بقة الحلقة التانيه واسفه على التأخير

ملحوظه بقه
مش معنى انو حد من المدونين مش حاطت عنوان مدونتك على جنب انو مش معبرك
ماشى
حسابك معايا بعدين

أختك توكاااااا

ToOoKa يقول...

السلام عليكم ورحمة الله وبركاتة

ضحكتنى ياأبن ايه؟
ربنا يسعدك دنيا واخره

اول يوم دا بيكون ملىء بالمغامرات بس مغامراتك انت من نوع خااااااااص

تسلم ايدك على الكتابة والسندوتشات

احلا سلام
أختك توكا

ابن حـجـر الـعـسـقـلانـى يقول...

انت بصراحة شوقتنى إنى آكل سانداوشتين من عمايل ايديك

يا أبو سوووو .. شكلى كدة مش هاقدر آجى الجمعة الجاية فى التحتوس البرانى ... طلعت لى سفرية للتحتوس السويسى .. يا ريت تتقابلوا مرة كمان عشان نفسى أشوفكم

Unknown يقول...

ليس الفتى من قال هذا انا .. ان الفتى من قال هذا شندوشتي

يا نهار ابيض عليك
بس انا مش معاك فى عقدتك من المراجيح يا ابنى دى احلى فسحة عندى الملاهى المكان الوحيد الى بصوت فيه و اخرج كل الكبت الى جوايا من غير ما حد يقولى بتصرخى ليه :))))

3ala asm masr يقول...

جامد بجد يا سوووووو
انت لازم تكتب قصص ومتخافش كل المدونين هيقفوا جمبك ويقروها
متنساش اصحابك المدونين فى الشيبسى

Rosa يقول...

هقولك نفس التعليق الي قلته في المذكره الأولى
كتير يا سوووو كتير
ماتكملهاش بجد بليز :(
مش عارفه بقى انا عارفه ان ماليش اني اتدخل و دي مدونتك و ات حر و ممكن بمنتهى البساطه ماقرهاش و خلاص , بس ماعرفش بقى
بتوجعلي قلبي يا سوووو

فاتيما يقول...

سوووو
يا جميل
ايه يا عم ..خفة الدم دى أصلها أختراع مصرى مية فى المية و الله..انا لسه مخلصة فرجة على غادة برايد فى العاشرة مساءا ..وكانت حاجة تفرح..
مدونتك ان شاء الله هتنزل كتاب فى المعرض الجاى ..و خدها منى تنبئوية كده على قد حالى ..وانت تستاهل بجد
أختك مدمنة قراية أدب ساخر ..أسلوبك بيفكرنى ب محمد عفيفى العظيم ..و يارب تبقى فى خلود كتاباته و..والله ما تقل عنه ظرف و لطافة ..يا بنى قولتلك خفة الدم فى جيناتك بالوراثة ...
تحياتى و الواحد قرب يختفى خجلا من ذوقكم يا جماعة ..شرف ليا تحطنى فى قايمتك .. يا رب أكون عند حسن ظنك

سهر الليالى يقول...

ههههههههههههه
فطستنى أنا على روحى من الضحك

بقى كنت باظظ من الصف
هههههه
يخرب عقلك تعبير يهلك من الضحك ... يعنى على أساس مثلا أن الصف كان ضاغط عليك
هههههههههه

بس لما تبقى تطلب طلباتك من الأمن المركزى ابقى فوتلى شنجوشت
ولون الحته دى وراها كتير كلام ومعانى

ولا حكاية انك كنت بتعمل السندوتشات دى .. عبقرى من يومك وسابق سنك
ههههههه

تحياتى

Empress appy يقول...

هى دى السيطرة ولا فلاااااا
شاطر كنت بتعرف تعمل سندوتشات ولا ايه يالا بقى خلينا نشوف لك عروسه على المقاس او نحشيها بومب علشان تبقوا مربع متساوى الاضلاع ههههههههههههه
والله انت سكر بجد يا بشمهندس

كاميليا بهاء الدين يقول...

أنا أحييك لأكتر من سبب
أولا: طريقتك فى الحكى رائعة فوق التصور
ثانيا: ماشاء الله عليك فاكر تفاصيل كتير ربنا يحفظك يارب
ثالثا: كل يوم بتزيد قرب .. من القلب

تحياتى لك دوما

كاميليا

Doba يقول...

بعد مالواحد فاق من كتر الضحك انا ليا تساؤلين

الاول: ايه اخبار والدك طمننى على صحته اذا سمحت

ثانيا: انت المفروض بتكتب مذكرات طفل طخين - انا شايفة شكل قصصى ساخر لمغامرات يومية ولكن مؤلفة من سيادتكم بشكل جميل

فايه بقى - انت بتحكى واقع بشكل ساخر ولا تأليفات

مهو اكيد انت مكنتش توزن اطنان لدرجة تفحت المترو يعنى

فى انتظارك دائما
تحياتى
هبة

غير معرف يقول...

انت بجد بتسعدني اوي وبتفرحني من قبل حتي مااقرا كلامك قبل ما افتح مدونتي لازم اجي اشوفك كاتب اية ربا يوفقك ويكرمك يارب

شيماء الجيزى يقول...

بجد كانت صدفه بمليون جنيه
الصدفه اللى خلتنى ارجع لمدونتى واشوف تعليقك بالصدفه
وادخل مدونتك الجميله
يا سو او يا احمد انا قرأت المدونه كلها ..(مكنتش اتوقع انى الاقى حد ممكن يعترف بتخنه )

مذكرات طفل تخين فكرتنى بنفسى واللى كنت ناويه اكتبه

مش هعلق عليها دلوقت
بس هقولك سعيدة انى دخلت مدونتك
تحياتى ليك

aya يقول...

اتاخرت انا اوى يا سوووو مش كده؟؟

المهم انى جيت
وبجد ضحكت من قلبى لما كنت هافطس فعلا

عارف
الحكاية ديه على قد ما هى عملالى ازمة نفسية قوية جدا
لدرجة انى بفكر اعمل مشروع الحياة من منازلهم

ده طبعا عشان مشروع الريجيم فاشل بالنسبالى وغير وارد


لكن لما قريت مذكراتك بجد ضحكت لما كنت هاموت

وجايز لانى مش فاكرة ايه مؤسويات لطفولتى بالنسبة للموضوع ده


بس بجد مذكرات غاية فى الروعة

ومستنيا يوم الاتنين الجاى على احر من الجمر

تحياتى وسلاماتى لك القلبية

Unknown يقول...

انا مش معقول يعنى كل مرة ادخل على مدونتك اضحك كده و اقعد اقولك انك اخف دم فى الدنيا دى كلها
بس أعمل ايه انت فعلا زى العسل ياسوووو ياجامد المذكرات فى تألق دائم
ياااحلى طفل طخين فى الدنيا
متابعة باستمرار
احلى سلااااام

MarwaAshraf يقول...

ايه المذكرات الجامدة دي

أنا حتابع بس عاوزة نهاية سعيدة أصلي خلاص حفطس من الإكتئاب

يارب على طول متألق

غير معرف يقول...

هههههههههههههههههههههههههه
يخرب عقلك
جامده موووووووت

بجد وقعتنى على روحى من الضحك

مستنيه الجديد يا بن لادن
:))))))))))))))))))))

سلاخووووووووووووووخ
:)))

Che Ahmad يقول...

بعد وجبه ضحك فى الصميم قلت ادخل اسئلك
باباك دلوقتى عامل ايه
يا رب بألف خير

خالص امنياتى وتحياتى
تشي الحزين

بنوته مصرية يقول...

ههههههههههههههههه

حاسة انك مش كلبوظ ولا حاجه
وفي الاخر هتسرح بينا

بس بجد تحفة ودمها خفيف

عمال تاكل تاكل مش تعزم يعني

احدف اي سنكوتش اشلا حتي سنكوتش شوربة ملوخية اي حاجه الواحد يتسالي فيها معاك هههههههههههههه

مستنين باقي المذكرات

سلاموز
(*_^)

ahmed mefrh يقول...

انتا من طريقه كلامك عن نفسك ازداد فضولى لرؤيتك
ههههههههههههه
تحياتى ابو مفراح

خمسة فضفضة يقول...

السلام عليكم ورحمة الله وبركاته

هههههههههه
جامده موت ، فكرتني باللذي مضي ، ولاونه لسه ماماضاش اوي يعني :-)

اول مره ليا هنا بس مش الاخيره ان شاء الله

Desert cat يقول...

الا هو كان مين سيادة اللوز اللى هينفذ كل طباتك ده
اصلى نفسى اعمل حاجه جامدة اوى
يمكن سياددة اللوز ينفذها لى
تعرف يا سوو صعب عليا الواد المسلوع اللى كان بيفطس يفطس يفطس
ربنا يدي الطفل الطخين الصحة علشان يفطس لى كل اللى انا متضايقة منهم
الا هو عنوانة ايه علشان استعين بيه فى شغل التفطيس

Rosa يقول...

يمكن مقدرتشاوضح وجهت نظري
ماقصدش انها وحشه او ممله بالعكس تماما
انا كل قصدي اني
مقدرتش اضحك المره دي

يمكن عشان ممكن اضحك على اي حاجه في الدنيا غير اني اضحك على حاجه مالهاش صله بإرددتنا أو اختيارنا
و الطفل التخين الكلبوظ دا ماكنش بإيده و لا كان نفسه يبقى تخين
سوري لو مش عارفه اوصل وجهة نظري
كل الموضوع انها بتوجع

غير معرف يقول...

ليس الفتى من قال هذا انا .. ان الفتى من قال هذا شندوشتي



اني اتنفس في الاعمااااااق .. اني افطس افطس افطس !!!!؟



عليك مصطلحات تحفففففففففففففففة

ههههههههههههههههههه ضحكتني والله


تحياتي

شـــــــهد

Nani يقول...

السلام عليكم
مش ملاحظ حاجة؟
تقريبا 23 تعليق من صبايا حلوين
كل سنة وانت سالم بمناسبة الفلانتينووو
:)

Nani يقول...

اضافة لما سبق
انا مش بقر عليك
انا بنبر بس
:)

Arabia يقول...

ههههههههههههههههههه

بجد حلوه اوووووووووى

ده اكيد هيبقى ليه شان كبييييير فى المستقبل

ممكن يبقى جارسون ويخلص كل الاكل والعمال تروح بدرى :))

د/اجدع بنوته يقول...

مدرس الالعاب : كل واحد يقف وحده .. ماتقفوش مجموعات خالص !!!؟؟

لا انت تحطولنا صورتك بقى علشان نتخيلك

ماهو مش ممكن يكون ف طفل بالحجم اللى انت صورتهولنا ده

ههههههههههههههههههههههههههه

ويتنج بقية اليوميات

3ala asm masr يقول...

فينك يا احمد مش باين ليه
طمنا عليك

شريف طلال يقول...

هههههههههههههه
حلوه اوى
موضوع جامد
تحياتى

MKSARAT - SAYED SAAD يقول...

يا ابنى
خفة الدم دية مش اية حد يملكها ربنا يبارك في موهبتك يا بتاع السندوتسات
تحياتي

Omnia Khalil يقول...

مش عارفة اقولك ايه
بس بجد دى من امتع الحاجات اللى قارتها على النت
بجد عندك طريقة جميلة اوى لرسم صور حقيقية قدام العين
استمعت جدا بكتاباتك
أمنية

الـسـيـدة نـون يقول...

النهاردة الاتنين
فين يا عم سوووو
الحلقة الجديدة
اييييييييييه النظااااااااااااااام
شغااااااااااااااال
يعنىىىىىىىىىىى
ههههههههههههههههههههههه
هههههههههههههههههههههههه
ههههههههههههههههههههههه
مش هاكمل انت عارف بقى
سلام
اختك خيخة

shreen يقول...

سوووووووووو
عسل انت
صحيح انا ساعات بتأخر عليك
بس بعوض لما اتأخر واقرا اللى فاتنى

بص بقى
انت تستاهل
ما انت لما قعدت على الواد
الانتفاخ اللى عنده
فشششششششششششششش
وطلعت بسببه الريحه دى

يعنى فى الاول والاخر
انت سبب الريحه

لو ما كنتش فطست الولد
لا كان بقى فى ريح او ريحه

استحمل بقى يا عم
امن مركزى وصواقع

بص انا لو مكانك
كنت طلبت كيس كرانشى
بالشطه والفلفل

ولعلمك
انا ما باكلش اى حاجه فيها حادقه
ولا مخلل
ولا شطه

لكن كرانشى وشيبسى بالشطه والليمون هم الاستثناء بتاع القاعده بتاعتى
:)

not crazy يقول...

كوميديان
فنان

Dr. Ibrahim يقول...

أهو انت بتفكرنى بحلمك انك عاوز تعمل محل ساندوتشات وبعدين لما هتكبر تبقى حاجة
بالفنان سلفادور دالى لو تعرفه وهوبيقول فى مذكراته
"وأنا فى السادسة كنت أحلم أن اصير ديك وفى السابعة كنت أحلم أن اصير نابليون "


وكلمة في الركن البعيد الهادي
بتفكرنى برده بأستاذ الثانوى عندنا كان دايما يقولها للركن المشاغب بتاعى انا وزملائى ربنا يمسيهم بالخير الوقتى حاجة مفيش بعد كده الوقتى
فمهوش الواحد اتقال عليه حاجة يبقى هو كده زى ما انت بتقول لازم يعرفونا أكتر
وطلعنا الحمد لله الركن ده من الأوائل ولا اى حاجة وبقينا فى السنة التانية الركن الممتاز وسبحان الله مغير الأحول