هدى صاحبة مدونة (فبدال مانطق يا ولا .. لأ نضحك) .. واللي انا باعزها جدا جدا
.. يمكن باعزها لانها مقتبسه جمله من اجمل ما قال شاعرنا صلاح جاهين
واللي كل كلامه حكم بصراحه
.. ام هند .. هدى قالت في تعليقها على اخر موضوع .. انها مش فاهمه يعني ايه سوووو
.. وعشان نوصل مع بعض لمعنى الكلمه .. هنرجع مع بعض سبعتاشر سنه .. وتحديدا
لاول يوم لي في مصر .. بعد مارجعت من السعوديه
------
كنت طفل كلبوظ كده ولابس نضاره .. نفس شكلي دلوقتي مع اختلاف اني ساعتها كنت بشعر مش اقرع
ونتيجة لاني متربي طول عمري في السعوديه فمكنتش باعرف اتكلم مصري وكانت لهجتي سعوديه
اضافة الى كده ان المدرسين كلهم كانو فاكرين اني فعلا سعودي بعد ما حصل اني نزلت اولى اعدادي بعد ما قعدت في تانيه اعدادي لمدة اسبوع .. والمدرسين لما عرفو حكايتي واللي قلتها في الموضوع اللي فات .. تعاطفو معايا
وطلعو علي اسم .. احمد سعودي
فضل الاسم ده معايا لغاية الكليه .. وفضلو الناس بينادوني بيه لدرجة ان صحابي كانو فاكرينه اسمي فعليا
ولما كانو بيتصلو بي في البيت كانو بيسألو على احمد سعودي وش كده ..
ودي كانت بتعمللي مشاكل مع والدي ووالدتي الله يرحمها
لانهم اعتبرو اني باتبرأ من جنسيتي ومن اصلي المصري
------
.. لما اتخرجت من الكليه وجيت اتعامل مع التكنولوجيا واعمل ايميل
فضلت لمدة يومين باختار اسم يكون معبر عني مالقتش
خصوصا اني كنت عايز ابعد عن رمزية اسم سعودي دي عشان الناس ماتعتقدش خطأ اني سعودي الجنسيه ولا حاجه
.. الى ان وجدت ضالتي في اسم سوووو
.. واللى لو مكتوب بالانجليزي هتلاقو ان في اربع دوائر اللي هي بتمثل علامة عربيات أودي الالمانيه
رحت ضايف قبل الاربع دواير دول حرف (اس) .. فبقى شكلها كده
Soooo
واللي لو اتنطق طبقا لرمزية الاربع دواير هيتنطق سعودي أو
Saudi
لكن اللي حصل ان كل اللي يشوفه مايفهمش قصدي ويفتكره سوووو
------
.. ومن حوالي خمس سنين تقريبا كنت قاعد مع جماعة صحابي من النوبه .. وبنغني وبنهزر ومقضينها مراجيح
.. وزي ماتقولو كده كنت انا في اليوم ده مبسوط شويه وبهزر بزياده والناس كانت مبسوطه منني
لغاية ما واحد منهم قاللي ده انت سوووو بجد يا سوووو
!!! لقيت الكل بيضحك .. وانا الوحيد اللي مش فاهم حاجه
اتاري بقى كلمة سوووو في اللهجه النوبيه يعني مصيبه او كارثه .. مش كده وبس
دول فسرولي كمان اغنية سوووو يا سوووو .. حبيبي حبسوه
وانها فلكلور نوبي ومعناه يا مصيبتي يا مصيبتي .. حبيبي حبسوه
وان كوثر مصطفى مؤلفة الاغنيه خدت الجمله الاساسيه دي وركبت عليها بعض الكلمات ذات الاسقاط السياسي
.. وهشرحلكم ازاي
بس ثانيه اروح الحمام عشان انا من الصبح مادخلتش الحمام خالص
وعمال اشرب في شاي وقهوة ونيسكافيه وحاسس اني هنفجر
-------
ورجعنالكم تاني في برنامجكم .. كلمات ومعاني .. في اصل الاغاني
كلام اغنية سوووو يا سوووو بيقول كالتاتي
احم احم .. باتنحنح مش باخبط على حد في الحمام
.. احم احم
سوووو يا سوووو
حبيبي حبسوه
يعني .. يامصيبتي يا كارثتي
حبيبي حبسوه
***
حبيبي عايزلو سكر .. ومنين اجيبله سكر
باب الحكومه مسكر حبسوني وحبسوه
يعني .. الناس او الشعب واللي بيترمز ليه على انه الحبيب .. الشعب عايز سكر .. يعني عايز تموين من سكر وخلافه
والحكومه قفلت باب التموين ده .. وحبسو اللي بيغني .. وحبسو الشعب
***
حبيبي عايزلو ترتر .. ومنين اجيبله ترتر
ده الواد بياع الترتر حبسوني وحبسوه
يعني .. الشعب عايز يفرح ويلبس هدوم بترتر ويرقص .. بس الحكومه حبست اللي بيغني .. وحبست الشعب اللي عايز يرقص ويفرح
***
حبيبي عايزلو مرايه .. ومنين اجيبلو مرايه
دول عرفو بالحكايه .. وحبسوني وحبسوه
يعني .. الشعب عايز يشوف نفسه حلو ويبص لنفسه في المرايه .. لكن الحكومه لما عرفت ان الشعب عايز يبقى نضيف وبيطالب بالنضافه .. حبسو اللي بيغني .. وحبسو الشعب عشان عايز يشوف نفسه
***
حبيبي عايز ياسمينا .. ومنين اجيب ياسمينا
دول علّو السور علينا .. وحبسوني وحبسوه
يعني .. الشعب عايز يشم شوية هوا نضيف ويشوف خضره قدامه .. لكن الحكومه علّت سور الجناين .. ومنعت الزراعه والاستصلاح الزراعي .. وحبسو اللي بيغني .. وحبسو الناس في بيوت ومصانع وسجون
***
حبيبي عايزلو لولي .. ومنين اجيبلو لولي
دول سرقو اللولي يالولي .. وحبسوني وحبسوه
يعني .. الشعب عايز فلوس .. والحكومه سرقت الفلوس .. وحبست اللي بيغني .. وحبست الشعب اللي بيطالب بالحق
--------
دي مجرد اغنيه من اغاني منير .. مش مجرد اغنيه يترقص عليها وقت الافراح وخلاص
لأ
اغنيه فيها كلام كتير كتير كتيييير
ومش ممكن مقص الرقيب ياخد باله منه
اغنية محتاجه مننا اننا نقرا اللي مابين السطور
.. ولو انا فعلا عايز اعمل حاجه واقول حاجه .. حتى ولو مابين السطور
يبقى لازم ابقى سوووو
سوووو
هناك ٨٠ تعليقًا:
السلام عليكم ورحمة الله وبركاته
الحمد لله اخيرا اكون اول تعليق دى معجزه
أول تعليق يا سوووو
وشكر خاص لدى اللي كان نفسي اعرف اسمك ليه سوووو ومعناه ايه وليه 4 وووو :)
بس أحمد والله اسم جميل برضه
التاج فين يا أحمد يا سعودي :) ؟؟؟ مشتنيه التاج يا سوووو
:( هي الناس ليه مستقصداني ومش بتديني أول تعليق :(:(:(
معلش يارحاب والله دى اول مره ليا انا مش مصدقه اصلا وان شاء الله المره اللى جايه تكونى انتى
اما بقه بالنسبالك ياسى سووووو فانا مش حتنازل عن العزومه وكمان مصاصه فوق البيع
والله ربنا يكرمك انا كنت دلوقتى بذاكر علشان عندى امتحان بكره وقولت ادخل لانى كنت بعيط من كتر الضغط بس والله فرحت اوى انى اول تعليق والهم راااااااااح الحمد لله
على فكره انا اتولدت فى السعوديه بس كان كل جيرانا فلسطينيين ولبنايين وبردو لما جيت مصر كانو بيفكرونى مش مصريه بس ما كانوش عارفين يحددو لهجتى لانها كانت كوكتيل
واسم توكا دا كان بيدلعونى بيه جيرانا هناك علشان مره بقول لصحبتى هاتيلى توكا ماعرفوش معناها ولما قولتلهم على معناها اعدو يضحكو ومسكوهالى ومن وقتها وانا بقه اسمى توكا
خلاص بقه انا حقوم اكمل وادعيلى بقه يا سووووو
تصدق أن كان نفسى فعلا أعرف يعنى ايه سوووو وأخدت بالى أنها لازم أربعه بس مرضتش أسأل بأعتبار أنها ممكن تكون حرية شخصية
بس بجد ما شاء الله عليك عجبتنى جدا جدا فكرة الأسم وفعلا إللى بين السطور دايما بيبقى له طعم تانى خالص
وكمان أول مرة أعرف معنى الأغنيه بجد يا سوووو ولا يا أحمد تسلم ايديك وعجبنى جدا البوست
أة وعلى فكرة بالنسبه للبوست اللى فات كان ليا تعليق بس على خوفك من أن تكون زى والدك مثلا فى حاجات بتكرهه انت منه
هقولك أن الواحد لما بيخاف أنو يبقى زى حد فى حاجة بيكرهه بيفضل واخد بالو من نفسو اوى وبيحاول انو يصلحها فى نفسو وساعات بتوصل لدرجه العند يعنى ممكن يعمل عكس ما يكره عشان يبعد ما يكره فيوصل فى الاخر انو يكون حاجة جميلة
دة احساس عن تجربة
تحياتى يا أحمد سوووو
مهندس ولا شاعر ولا ناقد ولا مفسر اغاني
انت ايه حكايتك يا جدع انت :))
بس سيبك انت مفيش احلي من اسم أحمد ودلع أحمد :)
صحيح يا سوووو ايه حكايه التاج اللي بتطالبك بيه الأخت رحاب ؟ شكلك كده حرامي حله :)) ما هو ده اللي ناقص
تحياتي يا سوووو
لخيرا عرفت الحقيقة
يا سووووووو
خالص تحياتي
و الله يا سيد سوووو أنا بالفعل كنت باحسبك تقصد باسمك دة أغنية محمد منير .. لكن ماكنتش أعرف إنى عشان أفهم معنى اسمك لازم أحل معادلة تفاضلية من الدرجة العاشرة فى تسعين مجهول
بس بصراحة .. عجبتنى تركيبة اسمك
و بخصوص محمد منير .. أغنية "شجر اللمون" .. الجملة اللى بتقول "شجر اللمون دبلان على أرضه" .. دى أنا سمعت و مش متأكد من حقيقة الكلام دة إنه يقصد الآتى
معروف عن شجر اللمون إنه شجر نقى و ما بيسمدوش الأرض بتاعته بسماد بلدى .. لأنه لما بيتسمد بسماد بلدى بيدبل .. فكأنه لما بيقول "شجر اللمون دبلان على أرضه" يقصد إن النجس و الفساد توغل إلى أن وصل إلى "الأرض"ا
بس روح يا راجل .. انت راجل زى العسل .. انت راجل ما يتشبعش من القعدة معاك .. و يالا .. أشوفك أمس
لا والنبى
يعنى المفروض ان انا بقى اشوف اسمك واول ماشوف الاربع دواير اقول يبقى اودى ونحط عليها اس تبقى سعودى..لا والله
والله العظيم بتهرج
:))))))))))))))
مااااااااشى هعديهالك
بس موضوع الاغنيه دى جديده فعلا ... اول مره اعرف الحكايه دى
بس حلوة اوى طيب كده بقى مش هيحبسو الى بغنى والشعب والاخ الى كتب
:))))))
سلامى يا س ..اودى
:))))))
Hi hoooo
A beautiful place here!
Excellent post! You are Master.
Thank you.
have a good day
كده ضمنت ان محمد منير مش هيغنى حاجه بعد النهارده
بس انت عملت فين جميلتين كبار اوى
اول حاجه عرفتنا باسمك يعنى ايه لانى كنت محرجه اسال يطلع حاجه احم احم لا مؤاخذه لا مقصدش حاجه وحشه اقصدتحرجنى ولا حاجه واتكبس فيها
تانى جميه انك ترجمت الاغنيه لانى بحبها جدا وكنت هموت وابعت ايميل لمحمد منير يرأف بحاى ويبعتلى ترجمتها
سووو يا سووو منير هيحبسووووووو
hi soooo
ازيك يا سعودي
بجد حلوه وملعوبه بس انت كده خربت بيت اتنين
1- منير والسبب كلنا عارفينه
2- اودي والسبب انت عارفه
على فكره يا جماعه انا خالد صاحب سعودي من ايام الجامعه وزميل مسرح ومحدش عارف هنروح فين بعد كده ربنا يستر
يا دماغك يا معلم بقى اربع دواير يعنى اودى و س يعنى سعودى .. دماغ دماغ يعنى مش اى كلام ..
تصدق و تآمن بايه قول لا اله الا الله انا كنت لسه امبارح بفكر فى اسم سوووو .. ده انت مكشوف عنك الحجاب يا راجل ..
اما بقى تفسير الاغانى للسعودانى دى عجبتى موت .. حلوه صحيح.
يا سلاااااااااام
بقى هي الحكايه كده
سعودي
سعودي كده مره واحده
اه يا واصل
عموما يا سيدي سعودي ولا ليبي حتى المهم انك احمد صاحبنا
اما حكاية الأغنيه فبرغم عبقريتي الفنيه اول مره اخد بالي من المعاني دي
جامد اوي الشرح ده
سلاااااااااام
فعلا فعلا
سووووو
مبسوطة إنك أخيرا
قلت إيه معنى سوووو
صحيح أنا مش بفهم في العربيات
بس بفهم أوي في مأساة اللهجات دي
والألقاب واللذي منه
تحياتي يا أحمد...يا صعيدي
و بجد ميرسي على غنوة منير
تسلم
منى
سوووو يا سوووو
nice post ya bro
Tab Ya soo howa mohamed mounir be3'any lesha3b el noba laih??
homa 3andhom mshakel?
السلام عليكم
انا كنت مفكر انك تقصد
Soooo what!x
شكرا على التوضيح
انا متخيل شكلك متل تبع ميلودي
كلبوظ وحليوة
ههههه هههههه
:)
ههههههههههههه
انت عسل يا سووووووووووو
..............
احلى حاجة فهمتنى اغنية بقالى 400 سنة مش فهماها
ايدك ابوسها
ههههههههههههههههه
:)
أنا بصراحة كنت مفسرة الاسم فعلا تبعا لأغنية محمد منير الشهيرة سوسو لأن أسلوبك ساخر و انا عارفة معنى و شرح الاغنية فقلت انت بتقول يا مصيبتى كسخرية من الاوضاع الى بتنقدها ما جاش فى بالى عشان موضوع السعودية
تحياتى
هو انت اسمك احمد سعودى
وكان لازم تعترف لى
اصل نفس الاسم ده لشخص جارنا ولا بيقبلونى ولا بطيقه وفى الراحة والجاية عاملى قرف لما نفسى فى سوووووو تشيله من البلد كلها ... هو برضه كان عايش فى السعودية بس ده جه بعد ثانوى يعنى جه على دخول الجامعه ولو انك قايل قبل كدا خريج فنون جميلة وهاذوه الصخص تجارة انجلش كنت افتكرت ان هو صاحب البلوج ومكنتش هسامح نفسى ابدا ابدا انى طول الوقت ده باخد على قفايا وبكتب له هاذوه الكلام لكن كويس اوى ان فى فرق ان رجعت من السعودية فى اعدادى وهو ثانوى وانت فنون حلوة وهو حاجات وحشة
بطل بقى غيبة ونميمة يا سو وعمال تحكى لى من الصبح على الواد اللى اخد نفس اسمك علشان نفس اللخبطة اللى كانت بتحصل فى اللغة واصحابكو اطلقوا عليكو اسم احمد سعودى
وخلينا فى موضوع البوست
لاول مرة اعرف ترجمة الاغنية جزاك الله خير يا ولدى
أنت فعلا سووو يا سووو
بس سوو زى العسل والله
والى متى
هنفضل نغنى بالرمز ونمثل بالرمز و الحدق يفهم على راى المثل
سوووو
انت فعلا سوووو يا سوووو
:D
كنت حاسه انك اسمك احمد
عشان كل الي اسمهم احمد اكيد سووو سوووو
:D
و مرسي على تفسير اغنية سوو عشان هيا فعلا سوووووو
:D
و مرسيييي سوووو ماتش
:D
هاى احمد
هاى سوووو
هاى احمد سعودى
هاى يا فنان الشعب
هما الناس كترو كده ليه هنا
ايه النصيبة دى
وبعدين بقىىىىى
الواد سوووو اتاكل من كل دول ولا ايه
============
على فكرة انت كاتب تاريخ ميلادك غلط لان البروفايل بتاعك عامل انك برج الجدى يعنى انت حاطط عيد ملادك تمانية يناير مش واحد اغسطس يا بتاع برج الاسد انت - يعنى العيب مش على بلوج سبوت مش هو النصاب - الجهل خيبة بعيد عنك
اتعلموها بقى
زهقتونا
يلا باى ياعجوز ياللى ماشى فى الواحد وتلاتين ونص - وش مطلع لسانه يا عجوز
سلامنتوز
هبة
ههههههههههههه
لا بجد انا كنت بغنى اغنيه لخالتى لان اسمها سلوى وبقولها سووووووو بس حلوة قوى حبستنا والحمد لله يا منير باغانيك والناس ماشيه تغنيها وبتوع النوبه بس اللى عارفين معناها طيب خبى التفسير بدل ما الجماعه دول يوصل لهم التفسير يقبضوا علينا فى البلوجات
طيب واحنا بقى نقولك برضو
ياسوووو بعد ماعرفنا معناها؟؟؟؟
انت كدة حيرتنا
ممكن نقولك ياسوووووكر بقى
دمت بكل الود
كاميليا
دى اول مشاركة ليا معاكم
انا مكنتش اعرف معنى سووو الا دلوقتى
قصة اسم المدونة دي اعتقد ان اللي اشار عليك بيهاحد من المخابرات
ايه يا عم الشفرة دي
اودي وكدة
بس فعلا اذا كانت سووو بالنوبي يعني مصيبة او كارثة فانت تبقى فعلا اسم على مسمى
مدونة رائعة اسمح لي اني اكون صديق ليها
تحياتي واحتراماتي
افادكم الله يا مصيبة قصدي يا سووووووو يوة ياأحمد
كان لازم طبعا تشرح قصدك من اسم سوووو لان ماكانش في حد هايقدر يفهم اللي انت قصدتة دة ولا حتى اذكى جهاز مخابرات
سلام ياعجوز
سوووو
انا هكتبها اربعه واو بس اصل اوقات كانت الحماسه تاخدنى واكتبهم اكتر من كده
شكرا لتفسير اغنيه منير فعلا معاناها اختلف تماما
تحياتى وتقديرى سوووو
ToOoKa
وعليكم السلام ورحمة الله وبركاته
انتي يابنتي سايبه مزاكرتك وداخله البلوج عندي
وبعد كده تقولي الامتحان كان صعب ومش عارف ايه
لكن وماله ياستي
نورتيني ونورني تعليقك
وياستي اول تعليق ولا تاني تعليق مش فارقه
المهم انك اهتميتي بالموضوع وشدك وانتي تفضلتي وعلقتي
وربنا يوفقك في مزاكرتك يارب
وان شاء الله عزومتك موجوده ياستي بس انتي اتجدعني وخلصي امتحاناتك
سلاموووووووووز
Rehab Mostafa
يا ستي ولا حد مستقصدك ولا بتاع
وبعدين هو انتو هتعلقو في مدونة تامر حسني مثلا
صدقيني والله اول تعليق بالنسبه لي زي اخر تعليق
المهم انك علقتي واتكلمتي معايا وبس
وعلى فكره .. انا باحس ان اسم سوووو اقرب لي من احمد ومن سعودي
واديني ياستي باتكلم اهه وباقول كل حاجه من غير تاج ولا بتاع
سلاموووووووووز
سهر الليالى
الحمدلله ياستي انك عرفتي معنى الاسم اهه
والحمدلله ان البوست عجبك
وبالنسبه للخوف اللي جوايا ده .. فانا سلمت امري لربنا
وهو يصرفني كيفما يشاء
واللي عند ربنا مابيروحش
وهنيالك يافاعل الخير
وحسنه قليله تمنع بلاوي كتير
وتعاطفكم بس مش كفاية
سلامووووووووووز
S
والله يابنتي انا مالي حكايه
انا واحد عادي خالص زي اي حد
كل الحكايه اني لما باعمل حاجه في الحياه .. باحب افهمها مش باحفظها
وبعدين ايه دلع احمد ده؟؟؟
عشان انا عمري ماحد دلعني الحقيقه
مافيش غير امي بس الله يرحمها كانت بتقولي ياد
!!!!
والتاج ده ياستي كاس وداير عالكل
مجموعة اسئلة وبتتجاوب بتفسر شخصية المدون
لكن انا والحمدلله مفسر نفسي جاهز
واللي عايز حاجه يسألني
بس بلاش اسئلة محرجه عشان انا عارفك تموتي في الزيطه
سلامووووووووووووووووووووز
موجة
الحمدلله انك عرفت الحقيقه
بس الله يكرمك اوعى تبلغ عني عشان انا كبرت ومابقتش استحمل برد التخشيبه
سلامووووووووووووز
ابن حـجـر الـعـسـقـلانـى
يا ابو العساعيس يا حبيبي انا طول عمري معقد
عايزني يوم ما اختار اسم وهمي .. اختار اسم دارج
لأ طبعا
لازم اخليك تقدح زناد فكرك .. وتقدح وتقدح وفي الاخر تقول خلاص
تقوم راجعلي
اقوم افسرلك
تقولي يااااه
وتروح واخد بعضك وماشي وتقول الواد ده انا مش عايز اعرفه تاني
منورني يا ابو العساعيس
ومش بعيد فعلا تكون اغنية شجر اللمون في نفس السكه دي
اصل منيب ومنير دول طاقين ياعم .. وبيتكلمو بالسغه لمون
سلاموووووووووز
shayma
ياستي انطقيه زي ماتحبي
مش هتفرق
اللي هيفرق في تعاملك مع الشخص ده
مش كده ولا ايه؟؟؟
وبخصوص الحبس .. قولي يارب ماحد يشوف حاجه
وبعدين انا مالي
انا اصلا باهيس
انا ماعرفش حاجه
انا بافتي اساسا
انا بريء يابيه
سلامووووووووووز
لماضة
ياستي ولا يحبسوه ولا حاجه
بالعكس بقى
واحد زيه بشعبيته وجماهيريته يخلي الحكومه تفكر مليون مره انها تستقطبه يغنيلهم زي ماحصل ساعة انتخابات الرئاسه
وبعدين ولا هكبسك ولا حاجه
انتي اصلا مابتتكبسيش
ده انتي لماضه ياعم
سلاموووووووووووز
خالد المصري
حليب قلبي
ازيك يا ابو ساره وازي ساره
والله واحشني يا مان وواحشاني قعدتك
فاكر ياد ساعة البروفات لما كنا بنعمل بروفه والبنت المجنونه بتاعة قسم نسيج دي اغمن عليها وانا طلعت اجري على الدكتورة مفيده اقولها الحقيني
يااااااااااه
كانت ايام والله يا ابو خالد
سلامووووووووووز
koko
لا اله الا الله
محمد رسول الله
ياعم ولا دماغ ولا بتاع
دي حته تهييس مركبه مش اكتر
وشوفتي بقى ان قلبي بيحس باللي بيتابعوني
طب اقولك حاجه كمان
انتي دلوقتي قريتي التعليق بتاعي وبتقولي يا سلاااااام
وماتنكريش
وجاري البحث عن كل اغاني منير اللي ليها اسقاطات سياسيه وسيتم وضعها
بس على الله مايضعونيش في المديريه بعدها
سلامووووووووووز
الشنكوتي الكبير
يا ابو الشناكيت انت تقولي يا صاحبي وخلاص
من غير احمد ولا سوووو ولا سعودي
وانا عارف انك عبقري مما لاشكل فيه .. بس عادة العباقرة اللي زينا .. مابياخدش من تفسير اغنيه بسيطه
ربنا يكون في عوننا
عباقره بقى وبنخترع كل يوم اختراع جديد
سلامووووووز يا صاحبي
wa7dania
منى يابنت عمي .. الحمدلله انك فهمتي يعني ايه سوووو
وبعدين احنا ولاد عم .. يعني اي خدعه
سلاموووووووووز
Mohamed
انت يابني خلاص وصلت ارض الوطن
يبقى مافيش برو دي
في يا شقيييييييييق
افهمو اللغة بتاعة بلدكم بقى
سلامووووووز
Emmo
يلا يا امام من هنا
يلا ياد
عشان انا اكتر حاجه اكرهها هي الغباوة
سلاموووووووووووز
Nani
ياريييييت كنت شبه بتاع ميلودي
ده كفاية المزه اللي معاه
لا يابنتي انا شبه سيد قشطه
اقرع وتخين وبكرش
بس بنضاره
غير سيد قشطه .. اصله مركب عدسات
سلامووووووووووز
مروة الزارع
ربنا يكرمك دنيا وآخره قولي امين
والحمدلله انك عرفتي معنى الاغنيه .. واي خدمه ياستي
محسوبك قاموس معاني لاغاني منير ووجيه عزيز وعلى الحجار
سلامووووووووووووز
عاليا حليم
تعددت الاسباب والنتيجه واحده
اسمي سوووو
وحياتي عباره عن سوووو .. كبيره
سلامووووووووووز
Desert cat
تصدقي وتؤمني بالله ياقطه
انا غيرت اسمي ده مخصوص عشان في واحد ظهر مؤخرا في المنطقه عندنا بيضرب بانجو وحشيش ومقضيها بنات ومدلع نفسه واسمه احمد سعودي
خفت احسن الناس تفتكرني هو
ولو اني بصراحه بصراحه .. نفسي اكون مكانه
وياستي انا اسمي سوووو .. وبس
سلامووووووووووووز
3ala asm masr
الله يكرمك يا ستي دنيا وآخره
ويوفقك كده واشوفك جرنالجيه قد الدنيا
سلامووووووووووووز
ايوية
ساعات تأثير الرمز بيكون اقوى من اي ثورة
زي اغنية سيد درويش اللي غناها لسعد زغلول يوم مارجع من المنفى
وزي حاجات تانيه كتير
بتعيش جوه زاكرة الشعب
سلامووووووووووز
Rosa
داكتوره روزا الشرطه المدرسيه
منوراني ياستي ومنورني تعليقك بأمانه
واعاهدك امام زملائي المدونين والقارئين
ان اكون ذخرا للمدرسه
وذخرا لحصة الالعاب
سلاموووووووووووز
Doba
محسوبك سوووو
سوووو وبس
ولا فنان شعب ولا سعودي
سوووو مصري ابن مصريين
ملحوظه
يعني كنتي لازم تسيحيلي اني حمار قدام المعجبيني والمعجبات
طب دلوقتي لو واحده فكرت انها ترتبط بي وقرت تعليقك ده هتقول ايه
جاهل ومالوش في الفرنساوي
سلامي ليوسف افندي
سلامووووووووووووووز
appy
اي خدمه
ولو ربنا اراد وتم تجميعنا مع بعض في زنزانه واحده .. ساعتها انا اول واحد هبيع الليله واقول اني بانعر وفشار
وماعرفش حد من النوبه
ومش فاكر حد
وفقدت الذاكره
انا مين ياعم؟؟؟؟
سلامووووووووووووز
كاميليا
والله انتي اللي سكر بجد
وانا زي مانا
سوووو
سلامووووووووووز
غادة الكاميليا
منوراني يافندم
وياريت تعتبري مدونتي هي مدونتك تمام
وبعدين انتي من البروفيل بتاعك بنت منطقتي ومعاداويه اصيله
وكمان مهتمه بالفنون عموما وبالتمثيل والاخراج
امال ليه بقى مدونتك فاضيه
عايزك تمليها مواضيع
واكيد هتبقى مواضيع قويه ان شاء الله
منتظرين جديدك
سلاموووووووووووز
A.SAMIR
تفتكر بجد؟؟
يعني انا بقيت دلوقتي عميل مزدوج ولا جاسوس اهبل؟؟
الله يكرمك فهمني عشان انا كده حسيت اني وشيت باللي اعرفهم
ولو عايز تبقى صديق لي انا لي الشرف يافندم
بس هل ياترى لما هتحبس .. هتبقى لسه عايز تبقى صديقي؟؟؟
نورتني ياباشا بجد
وياريت تعتبر مدونتي هي مدونتك تمام وتعلق عندي دايما
سلامووووووووووووز
shahy
ليه بس كده يا ماما شاهي
طب ده انا حتى مفضوح من يومي
وكل اللي يشوفني يعرف انا قصدي ايه من غير ما افتح بقي
وبعدين علمك علمك علمك .. المخابرات مش محتاجين يعرفو حاجات زي دي
لأ
دول محتاجين يعرفو .. مين اللي سرق العامووووووود
سلاموووووووووووووز
ra7eel
يا رحيل انتي تكتبيها بعشرميت واو لو حبيتي
ده كفايه ان اسمي بيتكتب من ايديكي بس .. ده في حد ذاته شرف كبير لي يافندم
والحمدلله انك فهمتي اغنية منير .. ولو عايزه تفهمي اي اغاني تاني قولي
سلاموووووووووووز
هاى يا سووووو
انا اول مرة ازور المدونة اللذيذة دى بس انتا فعلا اسم على مسمى انتا فعلا كارثة فى خفة الدم بجد دمك خفيف اوى
بس انا من راى كاميليا
احنا فعلا ممكن نقولك يا سووووكر
تحياتى الشديدة لك
سوووووووووو
اتأخرت في ان اجيلك كتير معلشي بس كنت وحشنى جدا
واخيرا عرفنا مين هو سوووووو
تحياتي يا احلى سووووووووووووو
سلام
الاخ العزيز سوووو
اللى اصبح له معنى دلوقت الحمد لله
بعتذر عن التأخر بجد محرجة جدا .. البوست معمول ردا على تساؤلى وانا فى البطاطا
لكن حقيقى عندى ازمة شغل هطول شوية زحمة كده وربنا يفرجها لازم اسلم حاجات وبشتغل فى الشغل والبيت وربنا يسهل
تفسيرك لسوووو لذيذ جدا
لكن الالذ طبعا ترجمة منير
من مدمنة قديمة لمنير اقدر اقولك ان ما فيش اغنية حتى لو الناس اعتقدت هيافتها بتكون هايفة ابدا .. لازم وراها سوووو !!0
انا شاكرة ليك جدا كلماتك وشعورك الصادق دا شىء شرفنى واسعدنى واتمنى اكون دايما عند حسن ظنك
دمت بكل خير
وربنا يحفظك من اى سوووو
بما انك سوووو / فا سو ضد سو ما يئذيش !!0
هدى
انت طلعت فعلا سوووو
تصور اول مرة اخد بالي من معنى كلمات الاغنية دي, انا من عشاق منير, بس اضافة النهاردة فعلا تسلم ايدك عليها
سوووو هههههههههههههههههههه
والله حاجة ولا فى الأفلام
ال س أودى ال
وأنا اللى كنت فاكراه إسم الدلع على أساس أول حرف من إسمك سين
عجبنى أوى تفسيرك لأغنية منير
ربنا بقى يستر عالراجل كنت تسيب المعنى فى بطن الشاعر وخلاص
نفسى أقفشلك تعليق بدرى عن كدة
بس أعمل ايه بقى مليش نصيب
سسسسسسسسلامووز ;)
السلام عليكم ورحمة الله وبركاته
ادينى خلصت اهو وبقالى يومين ولا شوفنا عزومه ولا حتى مبروك
بس انا لن اتنازل عن المصاصه وتكون شوباتشوبس
شكلك يا سوووو كده بكاش وبتاع كلام
اهو خلاص سفرى يوم الحد وماشوفتش ولا حتى ربع جنيه
يلا عوضنا عليك يارب
سمو الانسه توكا حفظنى الله
سوووووو ياسوووووووووو
شكرا جدا ع انك فهمتنا كلمات الاغنيه والله
الواحد كان حاسس ان وراها حاجه برده
جامد يامنير كالعاده
نوراى
اهلا بيكي ياستي ومنوراني بتعليقك وباتمنى انك تعتبري مدونتي هي مدونتك تمام وتقولي كل اللي تحبي تقولي
والحمدلله ان المدونه عجبتك والف شكر على كلامك الجيل ده وربنا يقدرني يارب اني اساعد في رسم ابتسامه على وشوش كل اللي بيتابعوني وبيقرو مواضيعي
سلامووووووووز
MKSARAT SAYED SAAD
ابو السيد يا بتاع المكسرات والسهره
واحشني والله يا ريس
والحمدلله انك بخير وان اختفاءك ده ان شاء الله ما كانش لظروف كده ولا كده
وبعدين خبر ايه يا ابو السيد
مافيش مره تخشلي المدونه بقرطاس لب سوبر .. فول سوداني .. اي حاجه ياعم انشالله حتى اتنين كيلو كاجو
منتظرين مكسراتك وجديدك يا ريس
سلاموووووووووووز
rainbow
كنت هزعل جدا لو ما قلتيش تعليق عالبوست ده
خصوصا اني مأجل بوستين تانين لغاية ماتشوفي البوست ده وتعرفي قصدي ايه بسوووو
لكن الحمدلله انك جيتي وان شاء الله تخلصي زنقة الشغل دي على خير يارب
واكيد منير كفنان لازم بيبقى عامل حسابه ومش بيغني اي حاجه وخلاص
ده بيغني لاجيال تانيه بعدينا بكتير
سابق عصره بجد
سلاموووووووووز
S H A H
يا قهلا بيك يا قهلا
والحمدلله انك متابعني ومتابع مواضيعي
والحمدلله ان البوست عجبك
بس نصيحه منني بخصوص اغاني منير
اغاني منير لو عايز تفهمها صح .. اشربها وانت عالي
اقولك حاجه
اسمع اغنية امبارح كان عمري عشرين
وانت عالي قوي
هتلاقي فيها بلااااااااااااااوي
سلاموووووووووووز
ghalia
انتي مختفيه ليه يابنتي
انا قلت بس دي تلاقيها اتقفشت لما عرفو انها بتدخل عندي عالمدونه
وقلت الدور جاي علي
لكن الحمدلله ربنا ستر
وبعدين ياستي كفاية انك علقتي .. اول ولا اخر صدقيني مش هتفرق معايا
سلامووووووووووز
ToOoKa
الف الف الف مبروك انك خلصتي ياستي
وعقبال ماتاخدي الماجستير يارب
بس انا قلتلك هجبلك مصاصه صحيح .. انما اللي انتي قايله عليه ده شكله دوا كحه يابنتي
في مصاصه اسمها كده بجد؟؟
انا مش عارف اقراها ولا انطقها اصلا؟؟
ياسلاااام .. زمان كانت الحياه اي مصاصه عندنا والسلام
دلوقتي المصاصات بقى ليها اسم ونوع وماركه
معاها كتالوج؟؟؟؟
ملحوظه
انتي مسافره فين؟؟؟
سلاموووووووووووز
د/اجدع بنوته
العفو ياستي
اي خدعه
ولو احتجتي اي تفسير لاي اغنية عاملها منير انا تحت امرك
سلامووووووووووز
السلام عليكم
ياسووو ماتخفش المصاصه دى مش غاليه فى بخمسين قرش وفى بجنيه ونص خلاص يا عم اي حاجه منك حتكون حلوه
انا مسافره السعوديه (جده)
علشان اجدد الاقامه واعمل عمره وارجع طوالى مسافت السكة
كلها ان شاء الله 20 يوم مش حطول يعنى
سلام
يااااااااااااااه يا سوووو
اخيرا عرفت معناها
كتير كنت اقول هو ليه اسمه كدا بدون معني ولا طعم ولا ريحه حتي هههههههههههه
بس الاغنية تحفة مكنتش متخيلة اني ده المعني المستهدف
كنت فاكره اغينة عبيطة وكلامها اي كلام
بس بجد اغنية طلعت مية مية
طبعا اسمي معروف صح وبنسبالي
انا لما كنت عايشة في الكويت ليا صحبتي كنت لما اتصل بيها مامتها تقولها
صحبتك المصريةوكنت بفتخر جداا من الاسم ده لما جيت دخلت علي النت سنه 1997 مكنش لسه عندي ايميل بس كنت بدخل علي الشات باسم بنت مصرية وكل اصحابي كانو بيقولو عليا بنوته مصرية لما عملت الايميل عملته برضة بنوته مصرية وبقيت حياتي كلها بنوته مصرية حتي بعد ما اتجوزت وخلفت اصحابي بيقولو ليا بنوته بنوته
هههههههههههههههههه
شوفت الخيبة اللي انا فيها والنبي
معلشي بقي طولت عليك بس بقالي كتير متكلمتش معاك يا ابن عمي
يلا سلامووووووووووووز
(*_^)
السلام عليكم
طيب ايه رايك نعمل انا وانت
زي الواد بتاع ميلودي وبوبي المزة الي معاه؟
لذيذة اوي المدونة بتاعتك يا سوووو
وحلو كمان الاسم وتفسير الاغنية روعة انا كنت بقول ايه العلاقه بين الحاجات دي وبعضها
تسلم يا باشا
طب تصدق بقي ياعم سوووو
دي أول مرة أعرف إن الأغنة بتاعة منير فيها كل الكلام ده
يا نهار أبيض
دا الواحد طلع ما بيعرفشي يسمع خالص
ايه بقي اللي انت عامله دة بصراحة
حرام عليك فيه حد يشرح أغنية زي ما بنشرح درس بيولوجي كدة!!
يلا زي بعضه، بما اني أول مرة أجيلك وبما ان المدونة عاجباني، يبقي سماح
يااه لو عرف الناس معاني الأشياء
الغنية طلعت ذات قيمة عظيمة مش مجرد كلام ونغم وخلاص
المجتمع النوبي ده له أسراره ومفاتيحه شايلينها بعيد عن السجان عشان كده عمرهم ما حيتحبسوا زينا .
إرسال تعليق