السبت، ١٩ ذو الحجة ١٤٢٨ هـ

!!! (5) المهمة .. الصعيديه

اليوم الخامس أو .. الحلقه الاخيره

جايلك يا مصر .. جايلك يا طاهره

الساعه 6 المغرب .. المقرئين جم .. وابتدينا نجهز القعده عشان لما الناس تيجي ما يبقاش في حاجه ناقصه .. وجه الراجل اللي هايعمل القهوه وينزل الميه في الجنازه .. راجل كبيييير .. اسمه (سيد) الراجل ده حكايته حكايه
الراجل ده تقريبا عنده فوق المية سنه .. ومع ذلك بيشتغل ولا شاب عنده 20 سنه .. الراجل ده في بلدنا من ايام ثورة اليمن تقريبا
- والله ما اعرف ثورة اليمن كانت فين وامتى اصلا -
عم (سيد) اصلا مش صعيدي .. من البحيره .. كان بيحب واحده من بتوع الحلبه - يعني غازيه أو رقاصه كانت بترقص في الموالد في القرى التابعه لمركزنا او لبلدي .. في الساحه الشعبيه واللي اسمها الحلبه .. وعشان كده طلع مسمى واحده من بتوع الحلبه - اتعرف عليها في مولد من الموالد اللي كانت بتيجي ترقص فيه .. حبها .. وهي كمان حبته .. بس اخوها قاللها لو عايزك .. يبقى لازم ييجي معانا .. وفعلا .. جه معاهم الصعيد قرية قرية ومولد مولد .. لغاية ماتعب من نظرة الناس ليه ولمراته .. قام قاللها تسيب الشغل وهو هيشتغل في اي غيط باليوميه .. ووافقت عشان كانت بجد بتحبه .. لكن اخوها ما ينفعش يسيب الفرخه اللي بتبيضه كل يوم بيضه دهب زي ما بيقولو .. قام ملبسه تهمه وسرق مواشي او بهايم من الغيط اللي هو كان غفير عليه .. مش كده وبس .. لأ ده حرق محصول الدره في الغيط وقتل غفير تاني كان مع عم (سيد) .. واتحبس فيها عم (سيد) 10 سنين ظلم .. ولما طلع .. لقى ان مراته اتجوزت واحد تاني .. وكانت واخده ابنه معاها .. وطبعا عم (سيد) ماينفعش يرجع بلدهم تاني .. خصوصا ان اهله واخواته كلهم قاطعوه لما اتجوز الغازية .. وكمان عرفو انه اتحبس بعد ما الغازيه سابته .. لكن ولاد الحلال في القرية اللي هو كان فيها جمعوله مبلغ وخلوه يسرح بسجاير ولبان وكده .. واتعرف على راجل طيب كان بيديه بضاعه ..الراجل ده عنده بنت كانت متجوزه وجوزها مات .. وهي مخلفه منه واد وبنت .. الراجل ده قال لعم (سيد) .. تتجوز بنتي واخليك تمسك المحل .. عم سيد كان كبر .. قال ارتاح يومين .. وفعلا اتجوز بنت صاحب المحل .. ومسك المحل .. وحياته كانت مستوره لحاد ما الراجل حماه مات .. ساعتها بنته .. او مرات عم (سيد) جاتلاه شوطه في نافوخها .. من كتر زعلها على ابوها تقريبا اتجننت .. حاول انه يعالجها لكن مافيش فايده .. وفي الآخر .. قامت الست دي حرقت نفسها .. الموقف كان صعب على عم (سيد) .. هو ملزم انه يربي العيال الصغيرين .. وفعلا ربّاهم بالرغم من انهم مش ولاده .. وكبّر التجاره لحاد ما بقى عنده بدال المحل اربعه .. ابن مراته كبر .. بقى عنده بتاع 24 سنه .. وحب يتجوز .. عم (سيد) كان معتبره ابنه .. وفرح بيه قوي .. وكان ناوي يعمله فرح ولا في الاحلام .. لكن الواد كان عايز اكتر من كده .. كان عايز ياخد المحلات اللي كان واخد باله منها عم (سيد) .. كان بيقوللو .. انت مش ابويا اصلا .. وكمان اصل راس المال مش بتاعك .. ده بتاع جدي .. وكفايه عليك انك كنت بتاكل وتشرب وعايش مستور
شفتو الجحود .. بقى معقول حد يعمل كده في الراجل اللي رباه .. طب ايه اللي كان اجبر عم (سيد) من الأول انه يربيهم .. كان ممكن يوديهم عند اي حد من عمامهم .. او حتى يوديهم ملجأ .. لكن مارضيش انه يخون الراجل اللي آمنه على بنته وجوزهاله .. مارضيش انه يخون مراته حتى وهي ميته .. ياااااااااااه .. لسه في ناس زي عم (سيد) .. ما اعتقدش

ومن ساعتها عم (سيد) شغال بيخدّم على الناس في الجنايز وبس .. ولما استغربت وسألته
سوووو : عم سيد .. انت ليه مافكرتش انك تفتح قهوه .. او حتى تشتغل في قهوه .. او حتى تخدم على الناس في الافراح بدل مانت شغال في الجنايز وبس؟؟
سيد : واروح من ربنا فين .. فلوس القهوه حرام .. حتى لو كنت شغال في القهوه بس .. والغرض من خدمتي في الجنايز اني الاقي الموت قدامي كل شويه .. واترحم على اللي مات حتى لو ماكنتش اعرفه .. عشان لما اموت .. الاقي اللي يترحم علي

يااااااه يا عم (سيد) .. بالرغم من كل اللي حصلك ده .. ولسه متمسك بايمانك بربنا .. ومش عايز تعمل حاجه تغضبه .. بقى بالذمه ده كلام .. مش لو واحد مننا حصل معاه ربع اللي حصل لعم (سيد) .. كان عمل اللي ما يتعملش .. ابسطها كان كفر وقال ليه تعمل في كده يارب .. ليه
مش هاطول عليكم في حكاية عم (سيد) .. عشان انا بجد .. ناوي اعمله قصه لوحده .. خصوصا اني بجد احترمته وحبيته كمان
- ياخواننا عليه فنجان قهوه مظبوط .. مشششششكله -

الساعه 8 مساءا .. الناس ابتدت تيجي على المنضره .. واحنا كنا بنعمل حاجه لذيذه جدا .. كان كل ما حد يدخل علينا في الصوان .. تلاقو قرايب المرحوم كلهم بيقفو احتراما للي جاي يعزي .. انا في الساعتين الاولانين تقريبا وقفت وقعدت اكتر من 200 مره بس .. تقولوش تمرين 9 استعد .. بتاع الجيش
الناس من كتر ما كان عم (سيد) بيجيبلهم ميه ساقعه عشان يشربو .. خصوصا اننا كنا دخلنا في اغطسطس والجو كان حررررر مووووت - وده اثبات اكثر دقه لمصايب شهر اغطسطس معايا – لدرجة ان التلاجه ما بقتش مشهله عليهم .. قام (احمد) ابن المرحوم قالنا انا و(علي) نجيب تلج من المصنع اللي في الشارع الكبير .. والشارع الكبير ده تقريبا عرضه تلاته متر .. كبير كبير يعني .. رحت انا و(علي) بالعربيه بتاعتنا عشان نجيب تلج زي ما قالنا (احمد) .. جبنا حوالي خمس تلواح تلج .. وحطيناهم على سقف العربيه
- والله احسن من التكييييييف .. بس يا خوفي من اللي هايعمله معايه ابويا -

الساعه 10 بالليل .. امي اتصلت بي وقالتلي آجي آخدها من بيت خالي عشان تعزي في المرحوم .. أصل امي كانت قاعدة في بيت خالي عشان (اميره) كانت هاريه نفسها عياط .. وزعلانه عشان الكلام ده حصل بعد ما اتجوزت (حماد) .. وامي كانت قاعده معاها بتهديها .. طبعا بعد ما ابوي وافق ان امي تقعد هناك شويه وبعدين تيجي تعزي
رحت عشان اجيب امي من بيت خالي .. بعد ما استأذنت من ابويا وكل الناس الكبيره .. تبقى عيبه برضه لما امشي من غير ما اقولهم .. دخلت على بيت خالي مالقيتش غير الحريم الكبيره اللي كانت مستنياني آجي عشان اوصلهم بيت عمي عشان يعزو .. ولقيت (اميره) حالتها مبهدله .. هاريه نفسها عياط وزعلانه مووووت .. وبيني وبينكم عندها حق برضه .. بس اللي هي ماتعرفهوش .. ان عمامي كانو زعلانين على زعلها هي و(حماد) .. و(احمد) ابن المرحوم كان قاعد مع عمي (محمد) وعمي قاللوانه لازم يبعت مراته تروح بيت خالي عشان يهدي (اميره) .. وتقولها انها مالهاش ذنب في اللي حصل وان دي ارادة ربنا ولا راد لقضاء الله
قعدت شويه في بيت خالي على ما الستات يلبسو ويجهزو نفسهم .. في خلال ما انا قاعد لقيت بنت خالي (ناديه) ودي اكبر واحده من بنات خالي .. عندها تقريبا اربعين سنه .. وانا باعتبرها كأنها امي الصغيره
ملحوظه : انا اتولدت قبل ما (ناديه) بنت خالي تتجوز بحوالي اسبوع بس .. وساعة لما كانت بتتجوز في الفرح .. خدتني في حجرها واتصورت وهي شايلاني ودي كانت اول صوره لي في حياتي .. وتقريبا من كتر الزيطه حواليا واللمه والفرح وفلاش الكاميرا .. قمت عملتها على روحي .. وكل ما تشوفني تفتكر الموقف ده .. وتعقد تضحك .. وانا وشي يحمررررر ويخضررررر ويصفررررر .. اصلها بتجيب سيرة الموضوع ده .. قدام الستات
- احراااااااااااااااااااااج -
وانا قاعد .. لقيت (ناديه) بتقوللي ان بنتها (دنيا) بتعرف ترسم - فاكرين لما كنت قولتلكم ان (ناديه) عندها بنت بسم الله ماشاء الله .. جميله جدا .. بس الحلو ما يكملش .. وان بنتها دي مابتتكلمش .. ومع ذلك فنانه جداااا - بنتها دي .. اسمها (دنيا) .. وبتعرف ترسم .. ومش اي رسم .. لا .. دي كانت لما بتقعد بالليل لوحدها .. تروح جايبه حتة فحم من فحم الشيشه بتاعة ابوها .. وتقعد ترسم وشوش الناس .. والغريب في الحكايه دي .. اني انا لما كنت صغير كنت باعمل حاجه زي كده .. كنت باجيب اي قلم وارسم على اي ورقه .. انشالله حتى تكون ورقة جرنان قديم .. (ناديه) بنت خالي جابتلي رسم بنتها .. وقالتلي شوف يا باشمهندس وقولنا رأيك ايه .. البنت فعلا فنانه .. احساسها بالظل والنور والنسبه والتناسب .. وحركة القلم او حتة الفحم في ايديها بتقول انها موهوبه جدا .. وفي وسط الورق اللي هي راسماه .. لقيتها راسماني .. بس الغريب .. انها مطلعه شكلي قمور وحليوه
- ربنا مايوريكم شكلي في الحقيقه .. تقولوش عفركووش ابن فانتكووش -
لما (دنيا) شافتني وانا باشوف رسمها .. اتكسفت ودخلت المطبخ .. وبيني وبينكم .. انا كمان اتكسفت .. وساعتها حسيت بحاجه غريبه .. حسيت اني معجب بيها .. انا عمري ماحد قاللي كلمة حلوة في الحياه .. اقوم الاقي واحده راسماني .. وراسماني بشكل حلو قوي كده كمان
سوووو : شكلك كده حبيتها .. يكونش هو ده الحب من اول نظرة ؟؟؟
سوووو : مافيش حاجه اسمها حب من اول نظرة .. وبعدين ماينفعش اصلا
سوووو : ماينفعش ليه .. انت قلبك وعقلك مشدودين ناحيتها وماتنكرش
سوووو : بس ازاي ؟؟؟؟
سوووو : مافيش حاجه اسمها ازاي في الحب .. الحب لما بيجي .. مابيستأذنش
مافوقتش من الحوار اللي كنت سرحان فيه ده .. غير لما امي هي وباقي الستات بيقولولي انهم لبسو وجاهزين يروحو العزا .. بس (اميره) مش هاتيجي معاهم .. وطبعا ده ما ينفعش .. (اميره) دلوقتي بقت واحده من عيلتنا .. ما ينفعش انها ماتجييش .. قمت عشان اكلمها واعقلها واخليها تيجي معانا .. دخلت المطبخ عشان اكلمها .. لقيتها زعلانه .. بس بتحاول تداري زعلها.. لما شفتها قلتلها
سوووو : ايه يا عروستنا ... مش عايزه تيجي ليه ؟؟؟
أميرة : عروسه ؟؟؟؟ عروسه ايه دلوك - دلوقتي يعني
سوووو : ياسلااااااااام ؟؟؟ عروستنا طبعا .. وعروسة (حماد) .. ولا نسيتيه ؟؟؟
أميرة : - وهي بتداري دمعة هتنزل من عينيها - صعبان علي ولد عمك
سوووو : وبعديييييييين بقى .. بقولك ايه (اميره) .. والنبي .. عشان خاطري .. الحكاية مش مستحمله كل ده .. وبعدين انتي مالكيش ذنب في اللي حصل .. ده قضاء ربنا وقدره .. مافيش حد مننا بينقي وقت موته .. ولا بيختار الساعه اللي بيموت فيها
أميرة : - وهي بتعيط - بس الناس ماتعرفش الكلام ده .. الناس تلاجيهم دلوك عايجولو اني وشي وحش عليهم
سوووو : مين قال الكلام الاهبل ده ؟؟ وناس مين دول ؟؟ انا كنت معاهم وعارف ومتأكد ان مافيش حد منهم بيقول كده .. وبعدين لو هانتكلم عن النحس بقى .. يبقى انا
أميرة : انت ؟؟؟؟؟؟؟؟؟؟؟؟؟؟
سوووو : ايوان .. انا
أميرة : كيف يعني ؟؟؟؟؟؟
سوووو : انا يا ستي كان عيد ميلادي امبارح .. شوفتي بقى
أميرة : ههههه .. دانت وشك فجر جوي .. ههههههههههه
سوووو : شوفتي بقى .. هههههههه انا موعووود .. عارفه يوم عيد ميلادي اللي فات .. الاهلي اتغلب من الزمالك هههههههههههه
أميرة : ههههههههههههههههههههههههههههههههههههههههههههههههههههه
لما لقيتها بتضحك .. فرحت اني عرفت اطلعها من الجو اللي هي فيه .. ورحت قايلها
سوووو : ياللا بقى عشان ما نتأخرش على الناس
أميرة : مش هاينفع آآجي .. عشان (دنيا) ماينفعش نسيبوها وحديها
سوووو : (دنيا) .. ونسيبها ليه يعني ؟؟؟.. تيجي معانا هي كمان .. ولا هي مش من العيله
أميرة : ماشي .. اجوللها واخليها تلبس وتيجي معانا
سوووو : yesssssssssssssss - في سريّ طبعا
طلعت من بيت خالي .. وقعدت في العربيه على ما الباقي يجهزو وييجو ورايه .. لما امي والباقي جم .. لقيت ان عددهم كتير .. كانو حوالي سته .. امي ومرات خالي (كمال) ومرات خالي (انور) و (ناديه) و(اميره) و(دينا) .. يعني المساعدين بتوع العربيه خلاااااااااااااص
- ابوي هايجتلني جاتيييييييييل -
وبعدين العدد ده كله هايركب ازاي ؟؟؟ .. لقيت امي بتقول
أمي : الاوزان التقيله .. يقعدو في الكنبه من ورا
- هي ومرات خالي (انور) ومرات خالي (كمال) و(ناديه) -
امي : و(اميره) و(دنيا) يقعدو عالكرسي القدماني
- اقتراح هاااايل .. امي ذكيه جداااااااااااااااا .. مش عارف انا طالع غبي لمين -
وفعلا .. قعدت (اميره) عالشباك .. و(دنيا) من جوه .. جنبي
- نفس الاحساس بييجيلي تاني .. غريبه .. مش كده -
مشينا واحنا بنتكلم في مواضيع غريبه .. مواضيع ستات يعني .. زي مثلا
مرات خالي كمال : هي مرات (عبدالحميد ابو غريب) هاتيجي ولا لأ ؟؟؟
- يطلع مين هو ده اصلا ؟؟؟ -
مرات خالي انور : انتي مالجيتيش غير الفستان ده تييجي بيه
بتقول كده لامي .. عشان امي كانت لابسه حاجه كحلي مش اسود .. اصلنا جايين على فرح ابن عمي .. مش على جنازة عمي

(دنيا) كانت كل شويه تبصلي .. وانا كمان .. وتقريبا كده (اميره) لاحظت الموضوع ده .. لقيت امي بتسألني
امي : وانت يا منيل على عينك هتسافر بكره خلاص - امي بتحترمني جداااااا
سوووو : ايه يا منيل دي ؟؟؟ وبعدين انا مستني تليفون من مصر .. لو عايزيني ارجع يبقى لازم ارجع
لقيت اميره بتقوللي
أميرة : يعني مش هاينفع تجعد التلات تيام !!؟
التلات تيام ده مصطلح عندنا في الصعيد .. التلات تيام دول اللي هم الجنازه .. لازم اهل المرحوم يقعدو عشان الجنازه وكده
سوووو : مش عارف والله يا (اميره) .. انا اذا كان علي عايز اقعد .. آهو ارتاح من زحمة مصر وخنقتها ومن الشغل شويه
(دنيا) تقريبا فهمت من حركة الشفايف ايه الموضوع .. لقيت في عينيها نظره غريبه .. كأنها بتقوللي لأ .. ماتمشيش
- وبعديييييين بقىىى !!!!!!!!؟؟ -

الساعه 11 بالليل .. وصلنا عند بيت عيلة ابويا .. والحريم دخلو من الباب الوراني .. وانا دخلت على المنضره من باب مطبخ .. ولقيت عم (سيد) .. لسه جاي اقوللو يعمللي فنجان قهوة .. لقيت (ايمن) ابن عمي بيقوللي اكلم ابويا عشان عايزني
- ياخوفي يا بدراااان -
لقيت ابويا واقف بره الصوان وبيقوللي
ابويا : محمود زميلك في الشغل اتصل بيك عالموبيل بتاعك لقاه خارج نطاق الخدمه .. وبيقولك لازم تكون في مصر بكره عشان في عندك شغل الصبح
سوووو : خلاص .. هاتصل بيه واشوف
ابويا : ما ينفعش تاخد اجازه كام يوم .. على الاقل عشان الجنازه
سوووو : مش عارف والله .. عموما هاحاول
بعد ماخلصت كلام مع ابويا قمت متصل بمحمود زميلي في الشغل .. وقلتله
سوووو : الوووووووووون .. ايه يا ابني ؟؟؟
محمود : انت فييين ؟؟ انت لازم تيجي بكره الصبح .. ضروريييييي
سوووو : في ايه بس .. هدي اعضائك كده وقوللي في ايه
محمود : يا ابني الشغل كله متدربك .. وانا مش عارف اعمل حاجه
سوووو : ههههههههههه .. هشان تعرفو قيمتي يا بقر
محمود : ياسيدي انا عارف والله .. بس هانعمل ايه
سوووو : خلا ص خلاص .. ماتتحايلش علي اكتر من كده .. هاشوف ايه النظام وربنا يسهل
محمود : والنبي يا سوووو .. عشان خاطري لازم تيجي
سوووو : خلاص يا ابني ماتعيطش .. قلتلك هاشوف وابقى ارد عليك
محمود : خلاص .. مستني تليفون منك
سوووو : اوك .. مش عايز حاجه من هنا ؟؟ - طبعا عزومة مراكبيه
محمود : آآآآه .. ياريت تجيب معاك بتاع قرصين تلاته فطير بلدي وكام كيلو لحمه
سوووو : ......... - ده انت العشم واكلك مووووت
محمود : وياسلام لو فيهم كام بطايّه على كام جوز حمام .. ومش هاوصيك بقى في الفراخ البلدي وياريت
سوووو :- مقاطعا - الو .. الو .. الصوت بيقطع .. الو
محمود : ايوه يابني بقولك هاتلي كام جوز حمام على كام بطايه على
سوووو : يادي النيله .. الشبكه بايظه بايظه .. الو .. الو .. مش سامع حاجه يابني
محمود : خلاص ماتجبش حاجه معاك
سوووو : خلاص زي ماتحب
محمود : ايه ده .. مانت سامع اهه وبتستعبط !!؟
سوووو : الو .. الو .. مش سامعك يابني
وقفلت السكه قبل مايقوللي اجيب محافظة سوهاج كلها وانا جاي مصر .. هو فاكرني قاعد في كارفور ولا ايه !!!؟؟
خلصت المكالمه ورحت عشان اقول لامي اني لازم انزل مصر النهارده .. طلعت الدور الاولاني .. بس ماشفتش اي حريم خالص .. هم راحوفين .. لسه هاطلع الدور التاني لقيت (دنيا) نازله من على السلم .. لما شفتها .. حسيت اني فرحان .. او مبسوط .. مش عارف .. عايز اسألها على امي .. بس مش عارف هاتفهمني ولا لأ .. وخايف اني لو سالتها ومافمهتنيش يبقى منظري وحش قدامها .. او منظرها وحش قدامي انها مافهمتنيش .. قربت منها .. وهي باصاللي .. وعينيها بتقول كلام كتير .. لأ لأ يمكن انا بيتهيألي .. عايز اتكلم ... بس لساني مربوط .. مش عايز ينطق .. زي ما يكون لساني بيقوللي هي ما ببتكلمش .. يبقى انت كمان ماتتكلمش .. انت لازم تحس بيها من غير ماتقول كلمه واحده .. امال بيقولو عليك شاعر ازاي
سوووو : في فرق بين اني اكون شاعر .. واني اكون باحلم
سوووو : مافيش فرق .. الاتنين حاله واحده .. بس عقلك هو اللي بيخللي لسانك يعبر عن الحلم في هيئة شعر
سوووو : شعر ايه وحلم ايه .. انا اكيد بيتيهألي .. مش ممكن اكون .. انا .. باحب !!!!؟؟
سوووو : ومش ممكن ليه .. انت انسان .. من حقك انك تحلم وانك .. انك تحب
سوووو : ياااااااااااااااه .. يعني هو ده الحب اللي بيقولو عليه ؟ هو ده الحب اللي انا قريته في روايات (السباعي) و(يحي حقي) .. هو ده الحب اللي بيغنوله ؟؟؟
سوووو : ايوه يا اخي .. مش عيب انك تحب .. العيب .. انك ماتعترفش بالحب
الكلام ده كله كان حوار بيني وبين نفسي .. قدام (دنيا) .. الي تقريبا سامعه كل كلمه منه .. او حاسسه بيه .. او يمكن انا باتمنى انها تكون حاسسه بيه .. لسه هابدأ اتكلم معاها .. سمعت صوت ستات نازلين من على السلم .. (دنيا) لما شافتني بصيت فوق .. وحست انه ممكن يكون في حد نازل .. قامت ماشيه .. عيني جات في عينها . وكأني باقولها .. ماتمشيش .. ردت علي بابتسامه بسيطه .. وكأنها هي كمان .. بتقولي .. ماتمشيش

الساعه 12 بالليل .. الناس اللي جايين يعزو مشيو .. واللي قاعدين .. احنا وقرايبنا ونسايبنا وبس .. يعني حوالي اربعين او خمسين واحد بس .. لقيت عمي (محمد) بيقول ل(ايمن) يشوف الطباخين اذا كانو خلصو الاكل عشان الناس ياكلو .. نزلت معاه .. وتقريبا نفس اللي حصل في فرح حماد .. حصل تاني في جنازة عمي .. انا لغاية دلوقتي .. الموضوع ده عامل لي ارتباك في عقلي .. ويمكن انتو كمان كده
المره دي قعدنا انا وولاد عمي عشان ناكل مع الناس .. كلنا قرايب في بعض يعني .. بعد ما خلصنا اكل .. قعدنا نشرب شاي ونتكلم عن المرحوم .. وكل واحد من عمامي وقرايبي يفتكرله موقف كويس .. من الحاجات اللي اتقالت انه كان مره راجع من الغيط .. لقى خناقه بين اتنين شباب .. مايعرفهمش .. لكن نزل وفض الخناقه بينهم .. ومشي تاني .. الحكايه دي على قد ماهي بسيطه .. ومافيهاش اعجاز علمي ولا حاجه .. انما انا الوحيد اللي كانت شاغلاني .. ويمكن شاغلاكم انتو كمان .. في كام خناقه بنشوفها واحنا ماشيين كل يوم .. هل في مره واحده حاولنا اننا نفض الخناقه دي .. ما اعتقدش .. عارفين ليه .. عشان العلاقات عندنا في مصر او في القاهره او في الاسكندريه او اي بلد كبير نسبيا عن الصعيد .. مش زي العلاقات في الصعيد .. احنا بنخاف اننا ندخل نفض خناقه .. بنقول لروحنا
- ياعم وانا مالي
- ماينوبك يا مخلص .. غير تقطيع الهدوم
- ياعم دول عيال حراميه .. وتيجي تفض ما بينهم ينشلوك

انما مافكرناش اننا ندخل بين اتنين بيتخانقو .. ونفض مابينهم
ياترى ده خوف ؟؟؟
ولا لامبالاه ؟؟؟

في حكايه تانيه عمي (محمد) حكاها .. كانت زمان قوي على ايام جدي .. في واحد من ولاد الليل او المطاريد .. خطف ابن واحد كان شغال في الغيط بتاع جدي .. عامل غلبان .. ولما خطفه كان فاكر انه واحد من عمامي .. وبعت واحد من رجالته يقول لجدي انه عايز الفين جنيه .. لكن جدي قاللو ان ده مش من ولاده .. وان العيل الصغير ده ابن فلاح غلبان .. مايعرفش يجيب ميت جنيه حتى .. قام المرسال طلع لابن الليل ده وقاللو الكلام ده .. ابن الليل قال انه هايقتل الواد بما ان الحكايه مش جايبه همها .. ومادام مايقربش لعيلة (العطيفي) وده اسم عيلة ابويا .. يبقى مافيش حد هايدور على تار ولا حاجه .. عمي (عبد الراضي) لما عرف الكلام ده من واحد من المطاريد .. راح لجدي وقاللو باللي هيعملوه في الواد الصغير .. جدي كان عايز يعمل حاجه اويبعتلهم الفلوس حتى .. بس ازاي .. مين اللي يقدر يطلع للمطاريد فوق في الجبل والدنيا ليل .. عمي قال انه هايطلع .. بس جدي كان خايف عليه .. لكن عمي قاللو
عمي عبد الراضي : لو ماطلعتش جبل الصبح .. ممكن يكونو جتلوه
جدي : بس يا ولد اخوي انا خايف عليك .. دول مطاريد وماعيهمش حد
عمي عبد الراضي : ياعمي لو مت .. ابقي مت وانا باعمل حاجه زينه .. وبعدين يا عمي .. اعتبر الواد ده واحد من عيالك .. اكيد كنت هاتطلع انت بنفسك .. مش كده ؟؟
جدي : معاك حج يا ولدي .. انا هاجي معاك
عمي عبد الراضي : لا يا عمي .. عشان مايمسوش شعره واحده من راسك .. سيبني آنا هاجدر اتكلم معاهم .. ياللا يا عمي جبل النهار ما يطلع
وفعلا .. طلع عمي الجبل .. لما المطاريد شافوه وهو راكب على فرسه .. قالو ده مين ده ؟؟؟
واحد منهم : انت مين ؟؟ وداي هنا ليه ؟؟ - جاي هنا ليه
عمي عبد الراضي : انا (عبدالراضي العطيفي) .. داي رايد خير للواد الصغير اللي عندكم
واحد تاني : انت ما عارفش احنا مين ؟؟؟؟؟
عمي عبد الراضي : عارف .. وقلتلكم انا رايد خير
واحد تاني : يعني ما خايفش مننا اياك ؟؟؟
عمي عبد الراضي : لو قلتلكم اني ما خايفش ابجى كداب .. انما خايف على الواد .. مش على روحي
لما المطاريد شافو الاصرار في عيون عمي .. وشافو ان قلبه ميت .. راحو سايبن الواد .. والفلوس كمان
- مجرد حكايه من الحكايات اللي سمعتها .. تصدقوها او ماتصدقوهاش .. عادي -

الساعه 2 بالليل .. بعد ماقلت لكل الناس اني لازم انزل مصر عشان عندي شغل وكده .. شافو اني عندي عذري .. واني عملت الواجب وزياده كمان
روحت على بيت عمي عشان اجهز الشنطه بتاعتي .. كان معايه (مصطفى) الدبابه البشريه .. فاكرينه .. ابن بنت عمي اللي اكبر منني بسنتين وبيقوللي يا خال .. وهو نفسه اللي لعب معايا تحطيب وكان هيخرشمني .. الواد ده غلبان قوي يا اخواننا .. كان زعلان اني هارجع مصر .. كان شويه ويعيط .. زي ما اكون مش هاشوفه تاني ولا حاجه
- يا عالِم .. الاعمار بيد الله -
طلعت على محطة القطر وكان معايه ولاد عمي وولاد خالي .. ولما مالقيتش حجز في القطر اللي جاي كمان نص ساعه تقريبا .. قررت اني اركب وابقى ادفع الغرامه وخلاص .. قعدت مع ولاد عمي شويه .. وكان معانا (محمد) ابن المرحوم .. وقعدنا نهزر .. عشان نخرجه من حالة الحزن اللي هو فيها .. وفعلا .. قعد يضحك .. افتكرنا يوم الغيط لما وقعت في الترعه .. وافتكرنا ساعة لما اتلمينا وأكلنا يوم الفرح في الاوضه وشغل التخطيف في الاكل والهزار ده .. وقلتلهم على ريحة رجل (علي) ابن عمي .. واتضح انهم كلهم عارفين الموضوع ده .. وقعدنا نضحك
بصراحه .. انا كنت زعلان اني هامشي .. زعلان اني مش قاعد هناك معاهم .. بس هاعمل ايه .. ماينفعش اني اسيب شغلي وحياتي في مصر .. وآجي اقعد هنا .. مش عشان حاجه وحشه .. بس عشان انا ما اتعودتش على الجو ده .. للاسف

الساعه 4 الفجر .. القطر جه .. وسلمت على ولاد عمي .. وطبعا بوس واحضان تاني
- زعبله القله رجع تاني -
دخلت العربيه وقعدت على كرسي كان جنب الشباك .. سلمت عليهم تاني .. بس المره دي كان من بعيد .. من خلال القزاز بتاع الشباك .. وبدأ القطر يتحرك .. كانت في واحده قاعده قدامي معاها بنوته صغيره .. قموره جدا .. قعدت الاعبها واضحك معاها .. شويه ولقيت المفتش راح جه .. قلتله اني مش قاطع تذكره .. قاللي ممكن ادفع غرامه واقعد زي ما انا هنا .. سألته اذا كان الكرسي ده محجوز ولا حاجه .. يعني عشان لونمت وجه صاحب الكرسي ما يعملش مشاكل .. قاللي لا .. استغربت قوي .. يعني الكرسي ده فاضي ومع ذلك في المحطه مش عايزيني اقطع تذكره وبيقولولي مافيش اماكن فاضيه .. ازاي يعني ... دفعت التذكره والمخالفه وانا مستغرب .. وقعدت بافكر .. يعني هم عارفين في المحطه .. ومع ذلك ماقطعوليش تذكره .. يبقى اكيد بياخدو نسبه من المخالفات .. او بياخدو المخالفات ليهم

ما حبتش اوجع دماغي في الموضوع ده .. وقعدت بافتكر .. افتكر كل المواقف اللي مرت بي في الرحله دي .. الرحله دي غيرت فيّ حاجات كتير .. الرحله دي ما كانتش للصعيد .. لأ .. الرحله دي كانت جواي انا .. عشان اعرف اصولي .. اصولي اللي انا وانتم ابتدينا ننساها

البنت الصغيره اللي قاعده قدامي .. شافتني .. قعدت اطلعلها لساني واعملها حواجبي .. ضحكت
وضحكت انا كمان معاها
ضحكت وانا باسأل نفسي
ياترى يا بكره .. هاتيجي ومخبّي ايه لينا
ياترى يا بكره .. هاتعود تاني .. أفراحنا وليالينا
ولا هاتبقى .. انت كمان .. يا بكره .. علينا

ونمت على صوت البنوته الصغيره البريئه .. وهي بتضحك



النـــــــهايــــــــــة

سوووو

هناك ٥٧ تعليقًا:

Empress appy يقول...

انت حبيت يا ولد العم شكلك كده حرام عليك حركت مشاعيرى هو ده الحب اه بجد هو ده انا جربت الموقف ده قبل كده بس بعيد عنك هو عامل زى ابو الهول بس بيتيأ ليه ان ابو الهول هينطق قبله معنكش طريقه والنبى نحركه بيها حتى الصم والبكم اوعى تعمل زيه
اما عم سيد فبجد حرام انا عنيه دمعت عليه امانه عليك لما تقبله تسلم ليه عليه جدااااااا وربنا يجعله ممن فى الجنه ان شاء الله

Unknown يقول...

ودينا لا لا
مينفعش المسلسل يقفل على النهايه دى
مش انت المخرج
غير النهايه
الاحداث المره ده اكتر من اى حلقه فاتت على ما اعتقد
داخل فيها عم سيد واميره ودينا ومحمود صاحبك
بس برضه عجبتنى اوى كلمة ابوي دى ههههه مش تريقه والله بس عجبتنى صحيح
طلب اخير
ممكن تورينا اول صورة ليك
:D

بنوته مصرية يقول...

احسن شئ انك مبقتش بتغيب زي الاول

قولت احجز اول 3 تعليق وارجع تاني


مش هتاخر

ابن حـجـر الـعـسـقـلانـى يقول...

و الله حكاية جميلة جدا ... زعلت إنها انتهت فى الحلقة دى

و جميلة جدا الحتة الرومانسية اللى فى الآخر دى ... قفلتها قفلة حلوة بصراحة

مستنيين المزيد يا عم سوووو

بنوته مصرية يقول...

لا يا سو مش ممكن دي تكون النهايه

مش ممكن تنتهي قصه الحب الجميلة كدا
مش ممكن البنت البريئة دي يكون ده حالها وانها متحققش حلمها وحبها لك
مش ممكن تقسي عليها كدا
مش ممكن يكون قلبك حجر وتكسر بخاطرها
هل علشان مش بتتكلم
انت حبتها وفهمتها من نظرة عيونها وهي فهمتك
هل علشان مش بتتكلم سبتها ؟
لا بجد انت وحش اووي ليه تربطها بيك من الاول انت بتقول اميرة لحظت واكيد مامتك كمان

مش عارفة يا سوو انا متعطفه مع دنيا اووي صعبانه عليا اووي

ToOoKa يقول...

السلام عليكم
قال راجل عجوز قال بتضحك علينا دا انت طلعت شقى اهو
بجد مش لاقيه كلام يوصف اعجابى بالقصه كلها على بعضها وخصوصا انها فيها متناقضات كتير يعنى فى وسط الحزن بيكون فى لحظات حب ولحظات هزار وشجاعة الصعايده اللى هما رجاله فعلا وانت لازم تكون فخور انك بجد من بلد بالرغم من بساطتها ولكن فيها رجاله كتير ومبادىء واصول

انا سعيده انى عرفت اخر الرحلة دى بس والله زعلانه انها خلصت
ربنا يكرمك كده وتكملهلنا بخبر سعيد فهمت قصدى يا شقى (*-) دى مفروض غمزة عين هههههههه

سنه سعيده

ToOoKa يقول...

السلام عليكم
اه صحيح على فكره انا معرفش حد اسمو اوسه تقريبا انت اتلخبطت على العموم ولا يهمك
سلام

غير معرف يقول...

الرحله انتهت
لاااااااااااااا
بجد مش عايزاك ترجع خليك هناك شويه واحكيلنا تانى
:)))))))))))
طيب ودنيا ...ليه.........ايييييييييه هتسيبها وخلاص وتبقى لحظه وعدت

بجد اسلوبك حلو اوى خلانى احس بيها بجد

الحلقه فى المجمل جميله كالعاده
سلامى

MKSARAT - SAYED SAAD يقول...

بقي كدة تخلص الحلقات بالسرعة دية
بالنسبة للحب اللي صادفك دة يترى انت مكملتوش علشان اية عدم اقتناع ولا عدم استعداد
يارت في اجازاتك تروح تاني هناك لأن كلامك حسسنى بالمكان هناك وبطبيعتة
انت في اسلوب الحكاوي جميل يا سو بجد ربنا يوفقك
ومنتظر منك حلقات عم سيد الجديدة
اكيد هتبقى جميلة انا واثق في طيرقتك الجميلة
ربنا يوفقك

rainbow يقول...

عحمد

كل سنة وانت طيب وحمدلله عالسلامة من احلى رحلة قريت عنها بعد 80 يوم حول العالم

الجو كله ساحر اسلوبك اكثر من جميل ويجذب الانسان لهذا الجو الصعيدى المشبع بالحكى العميق

لا اعرف اى جزء كان الاجمل هل هى قصة عم سيد ؟ ام علاقتك بأولاد عمومتك واصدقائك ؟ ام تلك اللحظة السحرية التى قابلت فيها رعشة الحب ؟ ام خاتمة القصة المليئة بالتأمل والوعود الغامضة ؟

كل شىء يجعلنا ننظر داخلنا ونتأمل كل واحد على حدة جزوره ومشاعره

قلمك ملىء بحبر الموهبة
وروحك مسكونة بانسانية دافئة

عميق تحياتى لكل منهما

هدى

aya يقول...

ياه
ووصل القطار بالسلامة
مطلقا فى الجو بخارا يتحول لجملة خفيفة محزنة ولكن مطمئنة
ويعلنها
النهاية

حقا كم استمتعت بتلك القصة

بجد رائعة يا سووو

حمدالله على سلامتك

ويارب يكون قلبك طب ودب وقال خلاص قفلناه على كده واحنا راضيين

ربنا كده يطمنا عليك
وفى انتظار اخبار ك اهلك من اول مصطفى وعلى ومحمد وحماد واميرة وعم سيد واكيد دينا

فى انتظارك يا سووو

والسلام ختام

سهر الليالى يقول...

لا ياعم مش لاعبه
أحنا متفقناش على كدة
انت قلت ان الحلقه الأخيرة هتبقى مشوقه
طب سبت البنت ليه ورجعت
يا راجل حرام عليك دة انا قلت هنفرح اهه

بجد يا سو الحلقه كانت جميلة ومشوقه فعلا صحيح زعلانين انك مشيت بس فعلا كل مكان بيبقى له حلاوته بمقدار اللى انت عايزة منه يعنى مينفعش تقعد فى مصر على طول من غير ما تزورهم وكمان مينفعش تقعد هناك على طول عشان حياتك اللى اتعودت عليها وشغلك ودة مش عيب ابدا

عم سيد بقى بجد ربنا يجازيه جزاء الصابرين إن شاء الله وعلى فكرة الدنيا ياما فيها قصص كتير بالشكل دة

اكيد متضايقين ان الحلقات خلصت وخصوصا انى حسيت انى واحدة من العيلة بعد حكيك الممتع يا سوووو يعنى مش تطفل منى يعنى

صعبت عليا بجد العروسة الجميلة اميرة مش عشان فرحتها باظت واللى هتفضل ياعينى فاكراها طول العمر لكن كمان عشان احساسها بلوم عيون الناس ربنا يسعدها
وطبعا انا بعتز بأسمها جدا واكيد عارف ليه

المهم يا سوووو بصراحة انت لازم تطمنا على الناس اللى احنا حبناهم دول وعشنا معاهم الحلوة والمرة ومتسبناش كدة منعرفش عنهم حاجة

تحياتى وتسلم ايديك يا ابو قلب طيب

Unknown يقول...

تصفيق حاااااااااااااااااااد

بجد تسلم ايدك يا سو عيشتنا معاك وسط اهلك وحسيت بطيبة قلبهم اوى

بس ماقولتش عملت ايه مع دينا .. فى اى تطورات؟؟؟

وكله كوم ولا عم سيد ده كوم تانى خاااااااااالص .. صحيح وبجد فى وشوش الناس حكايات فيها الفرح وفيها آهات .. فيها اللى مابيتنسى وفيها اللى عدى ومر وفات

سبحان الله ... ربنا يكرمه ويباركله عم سيد ده .. وانت كمان وعيلتك كلها .. ودينا
;)

غير معرف يقول...

I really loved the se3idi man in you
I have a question: eeh hya el mandara ? el kelma di etkarrarette aktar men marra !
thank you sooooooo much

Rehab Mostafa يقول...

وانت بتحكي على عم سيد حسيت اني بتفرج على فيلم رومانسي على دراما بس درامي أكتر فعلاً الراجل ده حكايه
انت قلت أحداث كتيير أوي وكلها بجد جميله أوي
عجبتني أوي لما قدرت تضحك أميره واللحظات بينك وبين دنيا

على فكره أنا لما بروح الفيوم برضه بيكون احساسي وانا راجعه زي احساسك كده بالظبط وكل اللي هناك بيبكوا علشان بيشوفونا كل فيييييين وفيييييين وبيبقى احساسي برضه اني نفسي اقعد هناك على طول بس زي مانت قلت احنا اتعودنا على حاجه معينه وعلى جو معين مانقدرش نعيش غير فيه
بجد يوميات رائعه أحييك على اسلوبك :)

الـسـيـدة نـون يقول...

اسفة اسفة اسفة
اتاخرت عليك ياسووو
وجيت لقيتك حاطط المهمة الصعيدية الرابعة والخامسة
معلش انا قريتهم مع بعض بقى
مش قادرة اقولك انك عملتلى حالة غريبة من الضحك على الالم على العياط
البوستين دول كانوا فيهم كمية مشاعر رهيبة
اولا مشاعرك ناحية دنيا كنت عايزة اعرف هل فيه جديد تم بعد كدة ولا الجكاية انتهت من قبل حتى ماتبتدى
وحكاوى الناس عن عمك وحكايته لما طلع الجبل عند المطاريد علشان الولد الصغير
اثرت فيا اكتر
واللى اثر فيا اكتر كمان ان المطاريد دول طلعوا رجالة هما كمان وجدعان اوى لما ماعملوش حاجة فى الولد الصغير وفى عمك وكمان ماخدوش الفلوس
حكاية ان لو حد شاف خناقة هنا وماحولش انه يفضيها
انا بعتقد انها بقت خوف مش مبالاة
حكاويك اكثر من رائعة
عارف كان نفسى اوى اكون واحدة من عيلتك
ساعات كتير بحن انى اقعد فى حتة بعيدة عن القاهرة وعن الزحمة والمناطق دى
بجد ربنا يكرمك ويعزك باهلك دايما
وبجد البوستات بتاعتك المرة دى كانت فيها مشاعر كتير اوى
بس ياريت تقولنا عملت ايه مع دنيا
هل يوجد جديد
سلام اختك خيخة

Desert cat يقول...

انا كان قلبى حينخلع وانت بتحكى حكاية عمك عبدالراضى وهو طالع للمطاريد
نط فى دماغى ذئاب الجبل على طول
بالنسبة للدروس المستفاده من الرحلة فكويس اوى انها اثرت فيك
الصعيد يعنى الجدعنه والشهامة
الصعايده ينى ولاد عم الشراقوة احلى ناس يعنى
happy new year

Unknown يقول...

تفاصيل حلوة قوي ياسوووو ودمهاخفيف وضحكت من قلبي بس
فيييييييييييييييين دنيا

رااااااااااااحت فيييييييييين؟

لا ياسوووو لأ
بعد ماشعلقتنا في البنت وقلنا بقا قيس وليلي هيرجعوا تاني سيبتنا ومشيت كدة؟؟؟؟

ماينفعش ياسوووو
راحت فين؟

زُمُرده يقول...

هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير

د/اجدع بنوته يقول...

بجددددددد انا حبيت عم سيد جدا

وتعاطفت معاه جدا جدا جدا ..

كمان فعلا مصدقه كل الحكايات عن عمك الله يرحمه

شهامة ورجولة الصعايده بينضرب بيها المثل

لكن ايههه انا مستنيه ف الاخر الاقى

ورجعت طلبت ايد دنيا .. قولت لدنيا .. كلمت دنيا ..

المهم تعمل اى حاجه

لا احنا كده اتعلقنااااااااا

وانا محبش النهايات المفتوحه والمتروكه لخيال القارىء ده

وانا م مزنقى هذا اطالب بتكملة دور دنيا ف حياتك

وع فكره شكلها عسول اوى وحساسه جداااا

واخيرا عليك دقة وصف محصلتش بتخلينى بشوف فيلم ثرى دى مش بقرى كلام ع النت

وبعد الاخيرا هابى نيو يييير .. وان شاء الله تتكرر رحلتك للصعيد وتبقى كلها فرح ف فرح

فاهمنى طبعا فرح مين ...ده ف حال انك تكون لسه متجوزتش .. بس ف الاغلب كده صح ..

يالهوى لو تكون مرتبط وتدخل تشوف الكلام اللى كتبنهولك ده

هههههههههههههههه ربنا يكون ف عونك وقتها

بالتوفييييييييق

MohmdFthy يقول...

استمتعت جدا مع هذه القصة
وفكرتني بالبلد عندنا احنا اولاد عمكم الشراقوه
تحياتي

غير معرف يقول...

سوووووووووو يا اخي الغالي جدا
اسلوبك الرائع وخفة دمك مالهاش مثيل .. قرأت الموضوع زمااان وهلكت من كثر الضحك.. وبرضه لسه بستمتع بقرائته الأن وفي كل مرة يتأكد احساسي بأنك كاتب له فنه ومهارته الخاص به هو فقط..بالفعل كاتب يستحق كل الأحترام

تحياتي .. شهــــــــــد

غير معرف يقول...

سوووو
نهاية جميلة
لرحلة أجمل
عم سيد...ياااااااه على الإنسان ده...هو مش راجل..هو إنسان جميــــــــــل
إنسان حقيقي..مش زينا
إنسان...مش موجود بينا دلوقت للأسف..
بس القصة دي قديمة المفروض, صح ؟؟
دنيا عاملة إيه ؟؟
أد إيه النقطة دي أثرت فيا جدا يا سوووو
إحساس ناعم بالحب
بريء لأقصى حد
رقيق جدا وصفك لإحساسك
و لدنيا
: )
خسارة إن العقل بيتدخل..عشان يحكم اختيارات قلوبنا
سنة سعيدة عليك
منى المحمودي

Rosa يقول...

ايه دا طب و دنيا !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
كدا :(
فين دنيا من الموضوع يا سووو
حبك الاولاني؟؟؟؟؟؟؟؟؟؟؟؟؟؟؟؟؟؟؟؟؟؟
زعلانه منك
----------
بعيدا عن زعلى منك عشان دنيا
انا قاعده تقريبا بقالي ساعتين بقرا الخمس مهمات و بجد ماقدرتش اقوم غير لما اخلصهم كلهم مره واحده
مافيش تعليق مناسب يتقال
انت ماسفرتش لوحدك لمكان تاني غير الصعيد انت اخدتنا كلنا لاحداث و حاجات كتير جوانا
الحياه و الموت و الحب و الصداه الوفاء و الرضا يقضا ربنا
الجدعنه و الرجوله
البراءه و التسامح
بجد مرسي يا سوووو على المهمه الجامده دي
-----
و ماتنساش دنيا

Soooo يقول...

appy

هابي نيو يير اولا
ثانيا .. الحب طول عمره جميل .. لكن للأسف .. مابيكملش لغاية اخره .. ده لو وصلنا لآخره فعلا

ثالثا .. اوعدك اني لو سافرت البلد وقابلت عم سيد .. هسلملك عليه ان شاء الله

وربنا يكرمك على متابعتك لقصتي المتواضعه


سلامووووووووز

Soooo يقول...

لماضة

هابي نيو يير يا داكتوره
اسمها دنيا مش دينا
وهو الحب كده .. مابيكملش غير في الافلام والروايات
انما في الحياه .. بيبقى مختلف
وبعدين هي دي الدنيا .. ساعة تبقى ماشيه معانا كويس .. وساعات تانيه تبقى شايفانا وساكته .. وساعات تالته مانشوفهاش
اييييه .. دنيا


ملحوظه
انا نفسي مش عندي اول صورة لي .. بس ممكن قبل ما انتحر قريب .. اتصور وابعتلك صورتي
وهتبقى اخر صورة لي


سلاموووووووووووز

Soooo يقول...

بنوته مصرية

مش كل قصص الحب بتنتهي بزغروته ومباركه من الاهل .. لأ
دنيا بالنسبه لي عامله زي الدنيا اللي عايشنها
عمرك لقيتي الدنيا ماشيه معاكي زي السكينه في الحلاوه على طول
وبعدين لولا قصص الحب اللي بنعيشها في حياتنا .. ماكناش هنقدر نتكلم ونقول اللي جوانا .. حتى لو فشلت قصصنا في الحقيقه


سلامووووووووووز

Soooo يقول...

ابن حـجـر الـعـسـقـلانـى

ابو العساعيس .. هابي نيو يير
الحمدلله ان القصه عجبتك .. وانك استمتعت بيها

وربنا يقدرني اني اكتب مواضيع تعجبك وتعجب كل اخواتي المدونين


سلاموووووووووووز

Soooo يقول...

ToOoKa

الحكايه دي كانت من حوالي خمس سنين
كنت لسه شباب يعني
انما انا دلوقتي خلاص يابنتي عجزت
مش عجز في السن وبس
عجز من جوايا .. مش في الشكل

والحمدلله ان القصه عجبتك .. وطبعا لازم افتخر باصلي الصعيدي .. حتى لو ماكنتش عايش هناك

وتكملة قصتي مش في ايدي دلوقتي .. في ايد الدنيا اللي احنا عايشنها .. وبنحبها وبنكرهها في نفس الوقت

ملحوظه
اسف جدا على اللخبطه اللي حصلت .. انا كنت باقول اللي قلته لقطة الصحراء وتقريبا رديت عليكو انتو الاتنين رد واحد واتلخبطت الحاجات .. وده لاني ساعتها ماكنتش نايم كويس
كل سنه وانتي طيبه



سلامووووووووز

Soooo يقول...

shayma

حاضر ياستي
اوعدك اني لما اروح هناك قريب هبقى اطول شويه .. بس بشرط .. تقولي للناس اللي باعملهم شغل هنا يسيبوني اقعد هناك فتره
لو وافقو انا ماعنديش اي مشاكل

وبالنسبه لقصتي انا ودنيا .. هي دي الدنيا
مش كل حاجه بنحلم بيها وبنتمناها بتجيلنا
عادي بقى
دنيا غدارة يعني


والحمدلله ان القصه عجبتك
وهابي نيو يير


سلاموووووووووووز

Soooo يقول...

MKSARAT SAYED SAAD

ابو السيد يابتاع المكسرات والسهره
هابي نيو يير ياريس

قصة الحب دي ماكملتش لانها مش مكتوبلها تكمل
هل اول قصة حب عيشتها كملت لغاية الاخر وانتهت نهايه سعيده؟؟

لو اجابتك اه .. يبقى انت حالة نادره وتحمد ربنا انها تمت على خير
لو اجابتك لأ .. يبقى اهلا بيك في الدنيا

وان شاء الله كل ما اروح الصعيد تاني هبقى اكتب كل اللي بيحصل معايا
وربنا يحعلها خير يارب

والف شكر على كلامك الجميل ده

وكل سنه وانت طيب يابو السيد


سلامووووووووووووز

Soooo يقول...

rainbow

ايوان .. هي دي هدى اللي انا اعرفها

وكل سنه وانتي طيبه ويارب في السنه الجديده تكوني محققه كل احلامك والسنه الجايه تكون احلى من اللي فاتت يارب

وصدقيني انا ماستحقش كل الكلام الحلو ده
الحكايه ومافيها اني حاولت اكتب اللي باحسه

والحمدلله انك ظهرتي على الخريطه من تاني
وان شاء الله تفضلي منوره المدونه بتاعتي بكلامك وتشجيعك

وهابي نيو يير


سلاموووووووووز

Soooo يقول...

aya

الحمدلله ان القصه عجبتك وان تأثرتي بيها وبشخصياتها
واوعدك اني هدون كل حاجه عنهم اول بأول

وعلى فكره .. اسمها دنيا
بس ماتتوقعيش منني اني اجيب اخبار عنها

وهابي نيو يير


سلاموووووووووووز

Soooo يقول...

سهر الليالى

هابي نيو يير الاول
وبعدين مش لاعبه ليه بس
هي دي الدنيا .. وهي دي حكايتي
والحزن والفرح متفاوتين

واوعدك اني بمجرد ما اروح هناك هدون كل حاجه بتحصل اول بأول

وانا يشرفني انك معتبره نفسك من اهلي .. والحقيقه انا معتبر كل المدونين اللي بينوروني بتعليقاتهم اهلي واخواتي من غير اي حاجه

وكل سنه وانتي طيبه



سلامووووووووز

Soooo يقول...

إنـســـانـة

الله يخليكي ياستي .. بس انا بجد ماستحقش كل الكلام الحلو ده
انا مجرد واحد حاول يكتب اللي حس بيه
اما بالنسبه لحكايتي مع دنيا .. فهي دي الدنيا
مش كل قصه بتكمل .. ولا كل حدوته حب بتستمر
وكفاية اننا عيشناها وفرحنا بيها


ملحوظه
انتي شكلك بتحبي محمد عدويه .. انا كمان باحبه وباحب ابوه

هابي نيو يير


سلاموووووووز

Soooo يقول...

Awdhal-

الحمدلله ان القصه عجبتك وان جو الصعيد عجبك

والمنضره دي مكان بيبقى في كل بيت عيله .. بيبقى عباره عن قاعه او تقدر تقول انه الدور الاولاني في بيت العائله .. وبيبقى مكان للمناسبات وكده
وكنت زمان فاكر كلمة المنضره من المنظره والفشخره .. لكن بعدين عرفت انها جايه من الانتظار .. لان الناس بتنتظر بعض فيها وبيتجمعو فيها

وهابي نيو يير


ملحوظه
انا لسه لغاية دلوقتي مش عارف اوجه خطابي ليك بهيئة المذكر ولا المؤنث .. فأرجو انك ماتضايقش او ماتتضايقيش مني لو حصل اي سوء تعبير منني


سلامووووووووووز

Soooo يقول...

Rehab Mostafa

الحمدلله ان القصه عجبتك وعجبك الجو العام
وفعلا احنا للاسف اتعودنا على نظام حياه معين .. ممكن يكون غلط او مش مريح بالنسبه ليهم لو جوم مكاننا .. بس احنا اتعودنا عليه خلاص

وياريت لما تسافري تبقي تحكيلنا عن الحياه هناك
اشمعنى انا يعني اللي اتكلم واقول؟؟


هابي نيو يير


سلامووووز

Soooo يقول...

بت خيخة وأى كلام

يا خيخة انتي تنوريني وقت ماتحبي ووقت ماتفضي
حلوة يا خيخه دي

والحمدلله ان الحكاية عجبتك واستمتعتي بيها

اما بخصوص دنيا .. فهي دي الدنيا
مش بتضحكلنا على طول

وهابي نيو يير


سلاموووووووووز

Soooo يقول...

Desert cat

سلامتك وسلامة قلبك ياقطه
لا ياستي خدي بالك من نفسك .. انا ماعنديش استعداد الاقي متابعين مدونتك بيقولولي اني كنت سبب في حاجه وحشه لا سمح الله تحصللك .. ويطالبوني بحق عرب وحوارات .. واخوكي بيكح تراب اليومين دول الحقيقه

والحمدلله ان القصه عجبتك وانك استمتعي بيها وبجو العائلة وبلمتهم .. وطبعا الشراقوة ولاد عم الصعايده

ملحوظه
هي ملحوظه انا كتبتها في ردي على تعليقك اللي فات بس طلعت في رد على تعليق تووكا غلط نتيجة خطرفة قلة النوم
الملحوظه بقى هي .. ماعندكيش اخبار عن اوسة الله يكرمك .. عشان انا فعلا قلقان عليها لانها بقالها فتره مش باينه
ياريت لو عارفه حاجه تطمنينا الله يكرمك

وهابي نيو يير


سلاموووووووووز

Soooo يقول...

fanan fa2eer

الحمدلله ان القصه عجبتك واستمتعتي بيها

قيس وليلى كانو قصه
وهم
ممكن يكون مبني على شيء من الحقيقه
بس مش كل قصص الحب بتنتهي نهايه جميله
هي دي الدنيا

استفسار .. هي قصة قيس وليلى .. انتهت نهايه سعيده؟؟؟

هابي نيو يير


سلامووووووز

Soooo يقول...

زمرده المتمرده

هابي نيو يير تو يو تووون
وربنا يجعل السنه دي سنه سعيده .. مش مباركـ ـه



سلاموووووووووز

Soooo يقول...

د/اجدع بنوته

وكتاب الله انتي دمك عسل
فعلا انا لو مرتبط واللي انا مرتبط بيها لو قرت الكلام ده هروح في ابو نكله

سيبك انتي
المهم ان القصه عجبتك وانك استمتعتي بيها وتخيلتي احداثها قدامك وعيشتيها

وهابي نيو يير ياستي


سلاموووووووز

Soooo يقول...

Mohammad Fathy محمد فتحي

اهلا بيك يافندم واهلا بكل الشراقوة
ويارب تكون القصه عجبتك ويارب تفضل منورني بتعليقك عندي وتعتبر مدونتي هي مدونتك تمام

وهابي نيو يير



سلامووووووز

Soooo يقول...

شهــــد

هابي بيرزداي تو يوووورز
هابي بيرزداي تو يوووورز
هابي بيرزداي تو شهووووووووده
هابي بيرزداي تو يوووورز

يلا حالا بالا حيو ابو الفصاد
هيكون عيد ميلاده الليله اسعد الاعياد
فليحيا ابو الفصاد

يا كل المدونين .. الحاضر يعلم الغايب
عيد ميلاد اختي شهوووده كان يوم رأس السنه
او على رأيها هي .. يوم الفساد العالمي
بس انا بقولها اليوم ده احلى يوم .. كفايه انه جه فيه احلى اخت لي وانا ماقربلهاش
وكل سنه وانتي طيبه
وعقبال ديشيليار مليون سنتليار سنه ضوئيه


سلامووووووووووووز

Soooo يقول...

wa7dania

منى يابنت عمي
منوراني
ومنورني تعليقك عندي
والحمدلله ان القصه عجبتك واستمتعتي بيها

وفعلا .. ساعات الدنيا مابتمشيش معانا زي ماحنا فاكرين
بس عادي

والحمدلله انا لسه عايشين .. وقادرين نفتكر اللحظات الحلوة في حياتنا

هابي نيو يير


سلامووووووووووووز

Soooo يقول...

Rosa

طب والله العظيم انا كنت قلقان عليكي وقلقان على اختفاءك ده
لولا تعليقك ده انا كنت ممكن اصاب بحالة لوثة عقليه وقلق واضطراب مصاحب لمغص شديد
لكن الحمدلله انك كويسه

وبعدين هي دي الدنيا فعلا
حب اولاني بيموت وبيجي حب تاني وممكن يموت وحب تالت ورابع وخامس
لغاية مانلاقي الشخص اللي ربنا رايدلنا اننا نكمل مع بعض

والحمدلله ان القصه شدتك وقريتيها كلها على بعض من غير ماتزهقي

وماتطوليش الغيبه علينا تاني ياستي الداكتووووره


هابي نيو يير


سلاموووووووووز

Unknown يقول...

هو ده الحب ؟ ربنا يبعدنا بعيد عنه و لا نستناه و لا يتنانا ، كفاية نكتب عنه و نقراله و نشوفه افلام الطيب احسن يا عم سو

كل سنة و انت طيب سعدت بمعرفتك و ان شاء الله الاعوام الى جاية تقوى صداقتنا

سلامووووووووووووووز

Unknown يقول...

هيه هيه انا التعليق 48 هههههههههه

الحلقات كلها جامده اووووي بس مش عارفه اشكرك ولا ازعل منك
اشكرك انك عيشتني جو الصعيد في فرحهم و زعلهم و لعبهم وخصوصا ريحه رجلين علي ههههههه
ازعل منك عشان مش هيبقي في مهمات صعيديه تاني :(

بس ايه النهايه دي مش واقعيه خالص فين البوسه بتاعت السيما هههههههه :)

بعتذر بشده عن التأخير نظرا لظروف خارجه عن ارادتي

كل سنه وانت طيب

Keep up the good work :)

غير معرف يقول...

سوووو
ما تزعلش منى
بس انا دماغى قفلت دلوقت
بعد ما عيطت من البوست اللى فات
خلاص قفلت معايا
هارجع وقت تانى واقرا البوست ده
واقولك راىى
ما تزعلش
والله قفلت

Nani يقول...

السلام عليكم
ماشاء الله حبابك كتار
يا سوو بالله عليك تفرح قلبي وتقلي انك حبيت ولقيت نصك التاني
وان كان عن جد في الموضوع زواج الله يباركلك فيها وتتهنو
بس فرحنا وليك النقطة الكبيرة
:)

Soooo يقول...

عاليا حليم


انا بجد مستغرب ان الكلام ده يطلع منك وانتي مقتبسه اسم اكثر الشخصيات اللي عبرت عن الحب

بس بيني وبينك .. الحب فعلا اجحمل شعور في الدنيا
والاحمل منه .. اننا نحارب عشانه
والاجمل واجمل بقى
انه ينتصر

كل سنه وانتي طيبه
واتمنى فعلا ان صداقتنا تزيد في الفتره اللي جايه



سلاموووووووووز

Soooo يقول...

s


ههههههههههههههههههه
حلو قوي التعليق رقم تمانيه واربعين ده
وبعدين ياستي انتي تعلقي وقت ماتحبي
كفاية انك علقتي
والحمدلله ان الحكايه عجبتك
بس بلاش ريحة رجلين علي الله يسترك عشان انا نظري بقى شيش بيش من ساعتها

سعيد بجد بتشريفك وتعليقك
واتمنى من ربنا انه يقدرني اقول مواضيع تعجبك يارب

وكل سنه وانتي طيبه



سلاموووووووووز

Soooo يقول...

shreen

لا انا زعلت طبعا
اه طبعا
عايزاني ما ازعلش فعلا
ارجعي وعلقي تعليق يكون فيه ضحكه حلوة زي الفل
وعلى رأي عمنا صلاح جاهين
فبدال مانطق يا ولا .. لأ نضحك

منتظر تعليقك .. وضحكتك



سلامووووووووووز

Soooo يقول...

Nani

ياسلام ياسلااام
وانتي بقى مش من ضمن حبايبي واخواتي ولا ايه؟؟؟

لا يافندم .. لم يتم المراد
بس ده مايمنعش اني محتاج نقطه برضه
اخوكي مشحور اخر حاجه

كل سنه وانتي طيبه وهابي نيو يير .. وهنيالك يافاعل الخير والثواب
حسنه قليله تمنع بلاوي كتيره



سلاموووووووووووز

Nani يقول...

السلام عليكم
الله يخليك لاهلك
مين مراد ده، قريبك؟
معلش سوووو ما فهمت شو معنى مشحور اخر حاجة؟!
مشحور عندنا معناها متبهدل على الاخر من كلمة الشحبار الاسود اللي بيطلع من المداخن
:)

Hany Rizk يقول...

ايه يا سو يا ابن ابو سو

هيا خلصت على كدة وللا ايه ...
بقى بعد التشويق دة كله تخلص كدة قوام ...؟؟ انا كنت فاكرها حاتتعمل زى المسلسلات العربي

على كل لو فيه تانى انا مستنيه

غير معرف يقول...

فات 56 تعليق ..
مش عارفه انا جايه دلوقت ليه ههههههههه
( أكيد عشان ابقى 57 :D ) ما علينا .. المهم انى جيت
انا معرفش اى حد هنا ولا اعرف بلوج مين دا بصراحه .. بس وصلتله صدفه كدا بجد اسلوبك جميل اوى .. انا لو تعرف الجهاز معذبنى ازاى .. كل شويه يطلعلى رساله مستفذه ( ريستارت ناو ) وانا متتخيلش بجاهد ازاى هههههههه عشان اكمل البوست لاخره ..
بجد عايزا اقولك اسلوبك جميل اوى .. تسلم ايديك ..
ربنا يوفقك يارب ..

على فكرا دى اول مره احط رد فى بلوج اى حد فى الدنيا .. ( عشان تحس بالفخر وبتاع ههههههههه )

أختك الصغيره .. أم حنين