الجمعة، ١٨ ذو الحجة ١٤٢٨ هـ

!!! (4) المهمة .. الصعيديه

اليوم الرابع أو .. الحلقه الرابعه

اييييييييييييييييييه .. دنيااااااااااا


الساعه 5 الفجر .. الناس كلها في البلد عرفت بموت عمي (عبدالراضي) .. وزي ما قلتلكم انه اكبر واحد من عمامي .. ويعتبر كبيرعيله .. والطبيعي ان الناس كلها لازم تيجي .. ولما لقينا الناس كتير قمنا فاتحين المنضره عشان الناس تقعد فيها لحاد ما نعرف المرحوم هايتدفن فين .. في ترب العيله ولا في التربه اللي كان عاملها لاسرته ولولاده
لمّا نزلنا انا و ولاد عمي و ولاد خالي عشان نفتح المنضره .. لقيت ناس كتيييييير .. معقول .. معقول عمي كانت علاقته بالناس كويسه لدرجة ان العدد ده كله جه عشان يمشي في جنازته !!؟ ..
لسه ما كملتش ولقيت (ايمن) بيقوللي
أيمن : الله يرحمه .. كان عايودب مع الناس كلها - بيعمل الواجب مع الناس كلها
فتحنا المنضره وبقينا بندخل الناس .. ومره واحده لقيت (علي) ابن عمي بيقوللي
علي : روح البس حاجه تانيه بدل الدلابيه دي
- بدل جلابية عم (سليمان) اللي انا لبستها لما هدومي اتبلت من الترعه .. فاكرين ؟؟ -
قال الكلمه وهو بيفتكر الموقف .. طبعا كان عايز يضحك بس الموقف اللي احنا فيه ما ينفعش حد يضحك فيه
لما طلعت عشان اغير الجلابيه لقيت عمامي بيزعقو بينهم وبين بعض .. عشان هم عايزين المرحوم يتدفن في ترب العيله .. و(خالد) ابن عمي بيقول لا .. المرحوم يتدفن في الترب اللي هو اشتراها بنفسه قبل مايموت .. والخلاف كان بين الناس كلها في النقطه دي .. وفي الآخر .. عمي (محمد) قال حاجه غريبه
عمي محمد : اجولكم انا .. مش الترب اللي اشتراها المرحوم دنب الترب بتاعة العيله .. يبقى احنا نشيل المرحوم وهو يروح على المكان اللي يعجبه .. - بقى بالذمه ده كلام !!!؟؟
لقيت الناس كلها موافقه .. بس بشرط .. (خالد) و(محمد) ولاد المرحوم هم اللي يبقو شايلينه الحمل من قدام - الكفن يعني - وافق (خالد) وقال انه هايقول ل(محمد) اللي راح البيت عشان يتصل باخواته البنات اللي متجوزين وقاعدين في مصر
نزلت المنضره بعد ما غيرت هدومي ولبست حاجه تانيه .. وفي عز المعمه دي لقيت (سامي) ابن عم (سليمان الجمال) بيقوللي
سامي : فين دلابية ابوي ؟؟- يعني فين جلابية ابوه
سوووو : ياعم يعني هي جلابية الملك فاروق مثلا .. ولا اكونش انا هاسرقها يعني
واحنا بنتكلم لقيت التليفون بتاعي رن .. لقيت (اميره) بنت خالي بتقول انها بتتصل عالموبيل بتاع ابوها لكن مقفول .. وبتقوللي انهم راجعين في السكه .. وانهم دلوقتي في المنيا .. وياريت الجنازه ما تمشيش قبل ما ييجي (احمد) ابن المرحوم .. عشان يمشي في جنازة ابوه

الساعه 12 الضهر .. هنصلي الضهر وبعدها نصلي عالميت والجنازه هاتتحرك ولسه (احمد) ما جاش .. ولا (حماد) جه .. قلت ل(ايمن) يقوللهم يستنو شويه .. لكن عمي (محمد) اللي بقى اكبر واحد في العيله دلوقتي قال
عمي محمد : اكرام الميت دفنه .. احنا نتحركو ولما ييدو يبجو ييدوولنا على الترب - لما يوصلو يبقو يحصلونا
وفعلا .. ابتدت الجنازه والناس شايله المرحوم و(خالد) و(محمد) شايلين من قدام وانا وكام واحد من ولاد عمامي شايلين من ورا
ملحوظه : انا اصريت اني اشيل معاهم .. عشان اشوف المرحوم هايختار يتدفن بنفسه زي ما قال عم (محمد) ازاي !!!!؟؟؟
طلعت الجنازه والناس كلها من ورا بتبكي عالمرحوم .. ومش هاكدب عليكم .. انا كمان كنت حاسس بحاله غريبه .. الراجل كان معانا لما رحنا نبارك للعرسان امبارح .. ودلوقتي .. دلوقتي شايلينه .. ياااااااه .. قد ايه اللحظه دي كل ما افتكرها جسمي يقشعر .. الناس ورانا كتير جدا .. والستات .. الستات كانو بيبكو ويصوتو .. بس عمي (محمد) زعق فيهم وقاللهم
عمي محمد : علي الطلاج .. اللي هاسمع صوتها لاكون ضاربها بالدزمه جدام الخلج كلها
بس ده ما يمنعش ان الستات وخصوصا مراتات ولاد المرحوم .. كانو بيبكو بصوت برضه
الموقف كان صعب جدا علي .. وصعب جدا على ولاد المرحوم .. لدرجة ان (محمد) لما ابتدي يبكي - كان قدامي واحنا شايلين المرحوم - كنت باحس بجسمي كلله بيقشعر .. ومره واحده لقينا (محمد) بيبكي جدا لدرجة انه مش قادر يشيل الكفن .. لسه هاطلع قدام عشان امسك مكانه لقيت واحد راح جه .. وبص ل(خالد) وكان باين عليه الحزن جدا .. وراح شايل معاه .. عارفين ده مين ؟؟؟
فاكرين الخناقه اللي حصلت يوم الحنا .. اللي كانت بين (خالد) ابن المرحوم وبين واحد تاني اسمه (حسن) من عيلة (الجيلاني) والناس كلها جات عشان تصفي الموضوع قبل ما يكبر .. وانا قلتلكم انهم اتصالحو قدام الناس .. بس النفوس ما صفيتش من جوه .. اللي جه ده .. كان (حسن) .. (حسن الجيلاني) .. قد ايه الناس دي بسيطه .. بسيطه لدرجة انهم نسيو انهم كانو متخانقين ومتضايقين من بعض .. هو ده وقت الرجاله فعلا
وصلنا عند مدخل الترب .. ترب العيله على اليمين .. وترب المرحوم لسه قدام شويه المفروض على كلام عم (محمد) .. ان المرحوم يختار هنا اذا كان عايز يتدفن في ترب العيله يبقى الحمل هايتقل علينا .. ويجبرنا اننا نخش اليمين على ترب العيله .. اما اذا كان عايز يتدفن في الترب الجديده اللي اشتراها .. يبقى الحمل هايمشي عادي .. وسبحان الله .. لقيت ان الحمل مش راضي يخلينا نكمل في طريقنا للترب بتاعته الجديده .. الحمل بقى تقيييل جدا .. بصراحه خفت احسن يكون حد من اللي شايلين معانا ساب الحمل .. بصيت حواليا لقيت الناس اللي شايلين معايه باين عليهم ان الحمل تقل .. قام عم (محمد) قال
عمي محمد : المرحوم اختار انه يبجى دنب اخواته و ولاد عمه - جنبهم يعني
ممكن ناس منكم ما تصدقش الكلام ده .. بس بجد ده اللي حصل .. واللي مش لاقيله تفسير علمي لغاية دلوقتي
دخلنا بالحمل وانا جسمي زادت فيه القشعره والخوف .. الواحد مننا مابيحسش بالموت غير لما يبقى قريب منه .. وعلى فكره .. الموت قريب مننا جدا .. بس احنا بنستهبل
واحنا داخلين لقيت (احمد) ابن المرحوم جاي .. وكانت ملامح وشه جامده .. كان واقف زي الصقر .. عينه مانزلش منها دمعه .. (حسن الجيلاني) لما شافه .. راح ماسكه من ايده وخللاه يشيل الحمل مكانه .. وفعلا .. شال (احمد) الحمل وبص لاخوه (خالد) .. لما (خالد) شافه .. بص على الحمل اللي هم شايلينه .. ونزلت منه دمعه .. وكأنه بيقول ل(احمد) .. ده ابونا
- الموقف كان صعب بجد -

الساعه 1 الضهر .. بعد ما دفننا المرحوم .. وقعدنا هناك نقرى قرآن .. رجعنا عالبيت .. وبمجرد ما رجعنا لقيت (احمد) قعد على جنب وابتدى بيبكي .. لكن من غير ما يطلع صوت .. الناس كلها عندها حاله غريبه .. حالة حزن مخلوطه بألم .. حاله بعيد كل البعد عن اللي كنا فيها امبارح .. دخلنا المنضره ودخل معانا الناس اللي مارضيوش انهم يمشو .. وابتدينا نجهز موضوع الجنازه .. الصوان والمقرئين وأكل الضيافه والحاجات دي .. عمي (محمد) قال انه ملزم بكافة المصاريف .. من صوان ومقرئيين وضيافه .. واتفقنا ان الصوان هايتنصب قدام البيت وفي المنضره .. زي ما كان منصوب يوم الفرح .. بس بدال مافي فرقه مزمار .. هانجيب مقرئين
- اييييه ... دنيا -

الساعه 2 الضهر .. الصوان بيتنصب والمقرئين اتفقنا معاهم انهم هاييجو بعد العصر .. وسبحان الله .. نفس الطباخين اللي طبخو يوم الفرح هم نفسهم .. الطباخين اللي هايطبخو الضيافه .. مش بقولكم دنيا
من كتر اللي حصل في اليوم ده .. انا حسيت اني تعبان جدا .. وتقريبا خدت ضربة شمس .. عمي (محمد) قاللي وقال لشباب العيله كلهم
عمي محمد : روحو نامو انتو .. ريحو جسمكم كام ساعه كده لحاد العزا ما يبدأ
وفعلا .. قسمنا نفسنا جزئين .. جزء هيريح ويشيل واجب العزا من تخديم وضيافه .. وجزء هيفضل مع الناس الكبيره دلوقتي وهيبقى يريحو من تخديم العزا .. وانا و(علي) كنا في الجزء الاولاني اللي هيريح دلوقتي ويخدم في العزا .. ورحنا ننام في بيت عمي (محمد) عشان الحريم هايقعدو في بيت عمتي .. وطبعا انتو كلكم بتفكرو في نفس اللي انا بافكر فيه .. هنام ازاي تاني مع (علي) ؟؟؟؟
اذا كان في الايام العاديه اللي مابيعملش فيها مجهود .. كانت رجله بتطلع ريحه تخبللل .. امال النهارده هايطلع ايه .. بترول !!؟؟؟
المواجهه : قررت اني اقول ل(علي) على موضوع ريحة رجله .. وانصحه انه يغسلها عشان كده خطر على الصحه العامه .. وفعلا .. لما بقينا لوحدنا قلتله
سوووو : علي .. انت بتغسل رجليك ؟؟؟
علي : ليه يعني ؟؟
سوووو : علي يا حبيبي .. البني آدم مننا .. لازم يبقى احسن من الحيوان
علي : ........... !!!!!!!!!!! - تناحه ربااااااااااني
سوووو : يعني الواحد مننا لما بيبذل مجهود .. بيبقى حاسس ان جسمه من كتر العرق هايولع يعني .. يعني لازم تستحمى .. - خد لك سااااااااااااااتر
علي : طب وايه المدهود اللي عملناه النهارده ؟؟ - مش معترف اننا بذلنا جهد !!!؟؟؟
سوووو : يعني مشوار التُرب .. واللي كنا بنعمله امبارح .. كده يعني
علي : خلاص ماشي .. لما اجوم من النوم ابجى استحمى
سوووو : لما ايييييييييييه ؟؟؟؟؟ لا والنبي .. لو انت هتعرف تنام .. انا مش هعرف
علي : طب ما تجوم انت تستحمى !!!؟
سوووو : ياعم الحاج .. المشكله مش في انا .. المشكله فيك انت
علي : عاتجول ايييييييه ؟؟؟؟؟؟؟ - الانتقام الرهيب
سوووو : والنبي ناولني الكوفرته من عندك عشان انا نمت خلاص .. خخخخخ - هرووووب
وطبعا عانيت من استمرار الريحه .. بس تخيلو .. مابقتش متضايق منها زي ما شمتها اول مره .. تقريبا خدت مناعه خلاص

نمت وانا بافكر في اللي حصل طول اليوم .. واللي في دماغي حاجه واحده بس .. الدنيا مخبيه ايه للبني آدم مننا .. هل الجو الجميل والضحك والتهريج اللي كنا بنضحكه دي .. هايرجع تاني بعد اللي حصل .. يا عالِم ؟؟؟

الساعه 5 العصر .. لقيت (حماد) بيصحيني .. وكان باين عليه الحزن جدا .. اكتر من اي حد فينا .. وطبعا عنده حق .. امبارح كان فرحه .. والنهارده حصل اللي حصل .. اكيد الناس هاتقول ان وش العروسه وحش علينا .. قمت وحبيت ادخل الحمام عشان آخدلي دش عالسريع كده .. وتخيلو لقيت مين في الحمام .. ايوه .. بالظبط كده .. لقيت (علي) .. تخيلو !!!!؟؟؟

الصوان اتنصب في الشارع قدام البيت .. وفي نفس مكان الفرح .. دخلت انا و(ايمن) و(علي) على المنضره عشان نقعد مع الناس ونشوف هانعمل ايه .. لقيت (مصطفى) ابن المرحوم موجود .. ودخلت عشان اسلم عليه لأني بقالي اكتر من 5 سنين ما شوفتوش
ملحوظه : (مصطفى) ابن عمي بيشتغل مهندس بترول في السويس .. وبقاله حوالي 5 سنين ما جاش البلد .. عمي (عبدالراضي) الله يرحمه .. كان عايزه يتجوز بنت عمي (محمد) .. لكن (مصطفى) كان بيحب واحده زميلته معاه في الكليه .. ومارضيش انه يتجوز حد غيرها .. ودي كانت سبب في شبه قطيعه بين عمي (محمد) وعمي (عبدالراضي) .. وبرضه بين عمي (عبدالراضي) وبين (مصطفى) ابنه .. لكن مع ذلك .. (مصطفى) مارضيش يتجوز غير لما بنت عمي اتجوزت قبله .. ومارضيش انه يتجوز غير لما عمي (محمد) وافق انه يتجوز زميلته اللي كان بيحبها .. يعني من الآخر .. ابن اصول
لما سلمت على (مصطفى) لقيته حاسس انه ندمان على كل ثانيه ماشافش ابوه فيها طول الخمس سنين الي كان شغال فيهم في السويس .. كان نفسه انه يقعد مع المرحوم لمجرد دقيقه أو ثانيه .. كان نفسه انه يسمع من ابوه انه مسامحه عشان عصى امره قبل كده
حد منكم يقوللي احنا بنغلط في اهالينا قد ايه .. ومابنحسش بالحاجه غير لما تضيع مننا
طبعا الكلام ده بيضايق .. خصوصا اننا داخلين النت عشان نفرفش شويه وننسى البلاوي اللي ورانا .. معلش يا اخواننا .. الحقيقه دايما بتزعل

اشوفكم بكره انشاء الله
على فكره .. بكره آخر يوم لي في الصعيد عشان عندي شغل ولازم ارجع مصر .. بس صدقوني .. بكره ده يوم .. مش هايتنسي
وهاتشوفو

سوووو

هناك ٤٢ تعليقًا:

3ala asm masr يقول...

مبسوطه اوى ان انا اول تعليق
هيييييييييييييه
المهم بقى
بجد يا سوو انا حسيت بكل كلمة انت كتبتها عن احساسك وانت ماشى فى جنازه عمك
انا حسيت بالاحساس ده يوم موت اخويا وعمتى
اخويا كان مسلم علينا الصبح وهو ماشى عالشغل وبالليل توفى وكان اخ وحيد معنديش اخوات ولاد غيره
وعمتى كنت عندها قبل ما تموت بيوم
بجد الموت فعلا قريب مننا كلنا

Rehab Mostafa يقول...

أول تعليق :)مع ان الموضوع فعلاً صعب أوي
على فكره حكاية ان الميت بيختار مكانه وان الكفن يتقل وكدده ده فعلاً بيحصل وأعرف كمان ان الناس اللي عملها صالح بيكون الكفن خفيف أوي وكأنه طاير علشان يتدفن
والموضوع ده مالوش تفسير علمي الروح دي علمها عند ربنا وبس... سبحان الله
يالا ربنا يرحم أمواتنا ويرحمن احنا كمان من اللي بنعمله في اهالينا بجد

عجبتني أوي نصيحتك لعلي وانت بتقوله الانسان لازم يكون أحسن من الحيوان :D:D:D

Rehab Mostafa يقول...

مش أول تعليق :( فرقت في الدقيقتين اللي كتبت فيهم التعليق يعني :) يالا مش مشكله

rainbow يقول...

العزيز احمد البقاء لله

اعتذر جدا عن تأخرى كل هذا الوقت فى متابعة مدونتك الغالية لظروف النت والاكتئاب وشوية حاجات كده بين السطور

الموضوع سهل ممتنع كالعادة لانه بيتكلم بصدق واحساس جميل

انا ما لحقتش اقرا انه كان فى فرح قبلها بيوم او اقل من اربع وعشرين ساعة لكن فعلا زى ما اتنهدت وقلت ايييييه دنيا

ربنا يحسن ختامنا جميعا ويوفقك فى كل شىء .. اكيد الوقت مش مناسب لكن لازم برضو اقولك : كل سنة وانت طيب ويا رب تكون 2008 سنة اسعد بكتير من اللى بتخلص فى جميع مجالات حياتك

عميق تحياتى ودعائى

هدى

Unknown يقول...

إنا لله وإنا إليه راجعون

الحلقات مشوقة جدا .. تابعتها كلها ومنتظرة الحلقة القادمة إن شاء الله

:)

Unknown يقول...

والله يا راجل يا عجوز كلامك حكم
فعلا الوالدين دول نعمه يمكن منكنش حاسين بيها دلوقتى
وفراق الاحباب برضه شىء قاسى
والاصعب فراق ريحةرجلين على بعد الحمايه
هههههههه

غير معرف يقول...

والله يا سووو
وجعت قلبي الله يسامحك
عارف ؟؟
بعد ما بضحك كتير..كالعادة و بكل سعادة بقول اللهم اجعله خير
كلامك فكرني بيا لما قلت الدنيا مخبية إيه ورا الضحك ده ؟؟
انت بكتني لما أحمد وصل
و لما حسن شال معاكم الكفن
ربنا يرحمنا جميعا بواسع رحمته
و يرضيك ويراضيك يا سوووو
اللهم آمين
منى المحمودي

غير معرف يقول...

الحلقه المرادى مؤثلاة اوى
دمعت مع دموع خالد واحمد

بجد موقف صعب اوى .. انك تخسر حد كان لسه معاكو ..ده غير رهبه الموت نفسه الموضوع فعلا صعب
بس انت حليت الحكايه شويه مع على
:))))))))))

بس على ده حكايته حكايه
:)))))))

سهر الليالى يقول...

للأسف ملحقتش اعلق البوست اللى فات مع انى قريته اول ما نزل بس الوقت مأسعفنش

حمد الله على سلامتك اولا ويارب تكون كانت اجازة سعيدة

اولا البقاء لله طبعاونحسب عمكان شاء الله فى الجنه وربنا يحسن ختامنا جميعا

ثانيا بقى البوست اللى فات كان زى العسل وخصوصا لما وقعت فى الترعه ومليش دعوه انت كمان ضحكت

البوست ده اثر فيا واى بجد كلامك واحساسك والمعانى الكتير اللى جواه
بس بالرغم من الحزن اللى بيحمله الموضوع إلا انك برضو ملكش حل فى الحكى وسط كل دة برضو ضحكتنى مش بس على على لكن لما قلت ان لما بيبصولك بيفتكرو منظرك بتاع الترعه

بجد طريقتك عسل
وهستنى الحلقه الجاية
تحياتى

Unknown يقول...

وجعت قلبي يا سوووو اكتر ما هو موجوع :(
يومياتك حلوه اوي و طريقتك حلوه اوي في سرد الأحداث
البقاء لله

ابن حـجـر الـعـسـقـلانـى يقول...

ما شاء الله

أصول .. و أخلاق .. و رجولة .. و مسئولية

الله يرحمه

الحكاية مؤثرة جدا

دنيا

غير معرف يقول...

inna lillah wa inna ilayhi rje3oon.. la ilaha illa llah
kal3ada.. 3*1 essahel el momtane3 wel momte3
je suis tellement touchée

بنوته مصرية يقول...

الله يسمحك يا سو والله بجد مش قادرة اوصف حالتي افتكرت موت بابا السنه اللي فاتت

مش هقدر اعلق عليك سامحني غصب عني

هجيلك تاني

اروح اعيط شويا لما افك هبقي اجي علشان اضحك عليك انت وعلي

سلام

Empress appy يقول...

انا اول مرة ليه عندك اولا البقاء لله
اما بقى بالنسبه للكفن فأول مرة وانا بنت احضر جنازة فى حياتى وكانت نفس المشكله جدى وفعلا هو اللى اختار وسبحان الله
تانى حاجه بيقولوا لما يكون الواحد عمله حلو فى الدنيا واخرته كويسه بيكون بيجرى على المدافن والناس اللى بتكون شيلاه عمرها ما بتحس بيه انه تقيل ابدا سبحان الله
بس الله يكرمك النصيحه اللى نصحتها لعلى لقولها لأغلبيه الناس وكمان مشكله ريحه الاسنان

كاميليا بهاء الدين يقول...

هايل ياسووو

جميل اوي ان الواحد يبقى فى وسط عائلة كبيرة متحابة ومجتمعة فى الفرح والحزن
ترابط مش بقى موجود دلوقت
بنفتقده كتير ..

فى انتظار الحلقة الجديدة

Happy New Year

Kamilia

د/اجدع بنوته يقول...

اخيرا على استحمى

.........

ع فكره وصفك للجنازه واحاسيس اولاد المرحوم

والله خلانى ادمع ..

وفعلا موضوع ان الميت يختار يدفن فين .. دى حقيقه

.....

بوست اثر فيا جامد جدااااا بجد

م اجمد البوستات اللى قريتها م يوم مدخلت عالم التدوين

ويتنج البوست الجاى .. اليوم الاخير يعنى

تحياتى

Desert cat يقول...

وجعت قلبى بشرح جنازة عمو عبدالراضى
الله يرحمه ويجعل مثواه الجنة
بس اللى فرحنى ان اخيرا على استحمى
بالنسبة لمصطفى فانا فى الحالة دى مش بلوم عليه انا بلوم على الابهات اللى بيقرروا مصير اولادهم وكانهم بيرحكو قطع شطرنج
متابعه معاك ان شاء الله وترجع من الصعيد بالسلامه

ToOoKa يقول...

السلام عليكم
ازيك يا راجل يا عجوز
على فكره ما شاء الله بجد طريقتك مشوقه جدا
وبجد احساس غريب اوى انو كل الفرح دا يتقلب لحزن
بس تفتكر انو ربنا اكيد ليه حكمه انك كنت موجود فى المناسبتين دول
يمكن كمان علشان تحكلنا عن اللى حصلك واللى والله حببنى انى اروح الصعيد
هو انا من الشرقيه وبردو فى حاجات كتير من اللى بتحكيها عندنا

يعنى المنضره وانو لو فى فرح او ميتم عند حد من القرية الكل لازم يقف جمبو
شوفت طلعنا ولاد عم

على العموم انا حستنا الحلقه الاخيره اللى اكيد مش حنساها زى الحلقات اللى فاتت ودا والله مش مجامله دا حقيقه

اتمنالك الخير وسنه سعيده

اممممممممم
الواحد لما بيسرح بيحس انو الدنيا دى غريبه اوى

aya يقول...

ياه يا سووو
البقاء لله
وربنا يحسن خواتيمنا
ويجعلنا من الناس اللى ممكن الناس تتعبلها وتمشى فى جنازتها

ربنا يعفو عن الجميع ويرحمنا

بجد بوست جميل رغم الحزن اللى فيه
بس جميل اوى

وفى انتظار اليوم الاخير
السلام ختام

Soooo يقول...

3ala asm masr

ده انا اللي مبسوط بتعليقك عندي يافندم حتى ولو كان التعليق رقم مليون .. كفاية انك حبيتي تتفاعلي معايا ومع الموضوع

احساس الموت ده انا جربته يوم وفاة والدتي ربنا يرحمها .. لكن انا ماكنتش كاتب القصه ساعتها وكنت كاتبها من فتره .. وقلت اللي حسيته

وكلنا هنموت آجلا او عاجلا .. وربنا يرحمنا امواتا واحياء

ملحوظه
احنا كلنا اخواتك .. صحيح مش هنقدر نعوضك عن اخوكي ربنا يرحمه برحمته .. لكن برضه ادينا موجودين جنبك اهه


سلامووووووووز

Soooo يقول...

Rehab Mostafa

ياستي اول او تاني او عاشر او حتى مليون .. كفاية انك كلفتي خاطرك وعلقتي وتفاعلتي معايا ومع الموضوع

اما بخصوص نصيحتي لعلي فالحمدلله انها جات بفايده واستحمى .. ويارب يواظب على النضافه كده على طول

ومنوراني والله


سلامووووووووز

Soooo يقول...

rainbow


لا ياست هدى ماينفعش الكلام ده
انا متعود منك على عحمد .. وماعرفش مين احمد اللي انتي كنتي بتكلميه ده خاااالص

وبعدين خدي هنا .. ده انتي الوحيده في المدونين كلهم اللي اسم مدونتها بيدعو للضحك والتفاؤل .. تقومي تكتئبي وبتاع
لاااا .. انتي لو مابطلتيش الدلع بتاعك ده ورجعتي تكتبي وتضحكيني وتضحكي كل المدونين اللي بيدخلو عندك .. انا هاجي اقرصك في ودانك .. مش كده وبس .. لأ .. ده انا هغرمك قزازة حاجه ساقعه لتر
وكيس دوريتوس الحجم العائلي
وباكو بكسويت
وشيكولاتايه سنكرز

ومشاريب الناس دي كلها هتكون على حسابك

روقي بقى .. وبدال مانطق يا ولا .. لأ .. نضحك


كل سنه وانتي طيبه
وواحشاني والله


سلاموووووز

Soooo يقول...

إنـســـانـة

الحمدلله انك متابعه للحلقات وانك شايفاها مشوقه
وهنزل حالا الحلقه الاخيره
ويارب تعجبك

كل سنه وانتي طيبه



سلاموووووووز

Soooo يقول...

لماضة

عارفه يا لماضه .. انا كاتب الموضوع ده من اربع سنين او اكتر تقريبا
لما وصلت عند الجزء ده ماقدرتش امسك نفسي من العياط لاني افتكرت امي ربنا يرحمها برحمته يارب
وافتكرت اني كنت عايز اقضي معاها كل وقت ضيعته في كلام فاضي

ربنا يصبر كل الناس على فراق حبايبهم
ويصبرني على فراق ريحة رجلين علي

كل سنه وانتي طيبه


سلامووووووز

Soooo يقول...

wa7dania

البكاء ظاهره صحيه
لانه دليل واضح وصريح على اننا بشر من لحم ودم ومشاعر
وانتي بطبعك انسانه مرهفه .. يعني طبيعي انك تضحكي من قلبك .. وتعيطي برضه من قلبك

وربنا يرحمنا جميعا امواتا واحياء
ويرضى عننا ويهدينا للي فيه رضاه عننا يوم القيامه

كل سنه وانتي طيبه


سلامووووووز

Soooo يقول...

shayma

رهبة الموت كلنا عارفينها كويس .. بس بنستهبل ومابنحبش نفتكرها

وحوار علي ده طبيعي .. هي دي الحياه .. في وسط الحزن بنلاقي رسمة ابتسامه على شفايفنا
وده من لطف ربنا بينا لاننا بشر ضعيف

كل سنه وانتي طيبه



سلاموووووووز

Soooo يقول...

سهر الليالى

الله يسلمك يارب من كل شر
وسبحان من له الدوام وربنا يرحم كل موتانا ويرحمنا احيائا وامواتا برحمته ان شاء الله

وزي ماقلت لشيماء في ردي اللي قبل ده على طول
من وسط الحزن بنلاقي الابتسام .. ودي هبه ربنا بيديهانا عشان احنا بطبعنا ضعفاء


ويارب تعجبك الحلقة الجايه والاخيره
وتعجبك القصه كلها

كل سنه وانتي طيبه


سلاموووووووز

Soooo يقول...

S


ربنا مايوجع قلبك يارب
وكل ماتقفل الدنيا في وش الواحد مننا .. مايملكش غير انه يقول الحمدلله على كل شيء
ولا حول ولا قوة الا بالله
وربنا ان شاء الله هيدينا ساعتها قوة على تحمل الابتلاءات

ويارب تعجبك القصه وكل سنه وانتي طيبه



سلاموووووز

Soooo يقول...

ابن حـجـر الـعـسـقـلانـى

على فكره يا ابو العساعيس
الحاجات دي مش موجوده في الصعايده وبس
لأ
موجوده في كل واحد مننا .. لو اتربينا زيهم

ويارب الحكاية تعجبك

وكل سنه وانت طيب


سلامووووووووز

Soooo يقول...

awdhal

الصديق اللي انا مش عارف اخاطبه بهيئة الرجل ولا الانثى
لكن مش مهم
المهم انك مستمتع بالقصه
وده في حد ذاته بيحملني مسئوليه باتمنى من ربنا اني اكون قدها .. واحاول اني اطور من نفسي واحسن من مواضيعي الجايه ان شاء الله


ملحوظه
يعني ايه النص السطر اللي بالفرنساوي ده عشان عايز اتنطط على صحابي واقوللهم اني معايا لغات

كل سنه وانت طيب


سلاموووووووز

Soooo يقول...

بنوته مصرية

ربنا يرحم والدك ويرحم والدتي ويرحمنا كلنا احياء واموات

وروقي كده وقولي يارب
والله مافي احن علينا من ربنا

كل سنه وانتي طيبه


سلامووووووز

Soooo يقول...

بنوته مصرية

ربنا يرحم والدك ويرحم والدتي ويرحمنا كلنا احياء واموات

وروقي كده وقولي يارب
والله مافي احن علينا من ربنا

كل سنه وانتي طيبه


سلامووووووز

Soooo يقول...

appy

سبحان الله
بجد بجد بجد .. سبحان الله

على فكره انا دخلت المدونه بتاعتك وكنت عايز اعلق على موضوع من مواضيعك واللي بتتكلمي فيه عن حموم الانسان وحادثة اغتصاب البنت لكن اتزنقت في حاجه وماعلقتش
وسيفت البلوج بتاعك عشان اقرا المواضيع بتاعتك بروقان واعلق بمزاج
لكن انتي سبقتيني وعلقتي عالموضوع ده

بجد بجد بجد .. سبحان الله


ملحوظه

لو على ريحة بق واسنان علي .. الحمدلله ماكنتش شاممها .. تقريبا ريحة رجلية مغطية على اي روائح تانيه

وكل سنه وانتي طيبه
وسعيد بتعليقك وسعيد اكتر بوضع مدونتي المتواضعه عندك


سلامووووووز

Soooo يقول...

كاميليا

الحمدلله ان القصه عاجباكي وانك مستمتعه بيها
ويارب الحلقة الاخيره واللي هنزلها دلوقتي ان شاء الله تعجبك هي كمان


وكل سنه انتي طيبه


سلاموووووووز

Soooo يقول...

كاميليا

الحمدلله ان القصه عاجباكي وانك مستمتعه بيها
ويارب الحلقة الاخيره واللي هنزلها دلوقتي ان شاء الله تعجبك هي كمان


وكل سنه انتي طيبه


سلاموووووووز

Soooo يقول...

د/اجدع بنوته

انتي قاعده عماله تقري الموضوع وسايبه المزاكره؟؟
قومي يابنتي زاكري وسيبك من الحوارات دي

بس بجد بجد بجد .. سعيد بزيارتك لمدونتي المتواضعه وسعيد اكتر بتعليقك عندي

وربنا يوفقك يا دكتورة المستقبل
وكل سنه وانتي طيبه


سلامووووووز

Soooo يقول...

Desert cat

الحمدلله ان الموضوع عاجبك
واسف بجد على تقصيري وعدم متابعتي لمدونتك بشكل متواصل بس ده لظروف خارجه عن ارادتي واوعدك اني ان شاء الله هتابعك واعلق عندك زي مانتي منوراني بتعليقاتك دايما

وبالنسبه للأبهات فانا معاكي في النقطه دي
وربنا يهدي ابهاتنا ويهدينا اننا مانعملش حاجه تغضبهم ولا تغضب ربنا

وكل سنه وانتي طيبه


سلامووووووز

ToOoKa

الشراقوه والصعايده اصلا ولاد عم
والحمدلله انك مستمتعه بالقصه ومتابعاها وربنا يقدرني واقدر اوصل بالموضوع ده لحاجه معينه في دماغي
واللي هي اننا نحاول نرجع لأصولنا الطيبه

وكل سنه وانتي طيبه
ملحوظه
الله يكرمك لو تعرفي اي اخبار عن اوسه طمنيني عليها .. او على الاقل ابعتيلها سلامي عشان انا بجد والله قلقان عليها

سلامووووووز

Soooo يقول...

aya

ربنا يرحمنا ويرحم موتانا واحياءنا مسلمين ومسلمات برحمته وهو ارحم الراحمين

وسعيد بمتابعتك للقصه وسعيد اكتر ان القصه عجبتك

وربنا يستر وتكون اخر حلقة حلوة


وكل سنه وانتي طيبه


سلاموووووووز

بنوته مصرية يقول...

ونعم بالله الله يرحمهم جميعا بس الموقف اللي اتكلمت عليه تعبني اوي وافتكرت بابا اصله كان كل حياتي اول مرا مش اضحك علي البوست بتاعك انت الوحيد اللي بضحك عندك عموما بوست هايل كالعاده

وعلي فكرة انا هنزل البوست الجديد وهكتب لي ولدتك اهداء بسيط

لك كل التحية
رودينا

غير معرف يقول...

بالرغم من اسلوبك يا سوو المليان بخفة الدم
الا انى عيطت وانا بقرا البوست ده
اول مره اقراللك حاجه واعيط
حسين ان البوست ليه نظره فلسفيه فى الموت
ان الانسان مننا بيكون النهارده هنا
وهوب
فى لحظه بيبقى هناك
النهارده كنا بنضحك معاه
وبكره بنبكى عليه

انت جميييللل اوى يا سووو
وزى ما قلتلك قبل كده

انا متأكده ان جواك كتير اوى من المشاعر
ويمكن كمان حزن
مختفى او انت اللى مخبيه
ورا خفة دمك دى

Soooo يقول...

بنوته مصريه

عارفه يا رودي
بجد والله انا مبسوط ان ربنا كتبلي ادخل عالم التدوين عشان الاقي ناس محترمين اعتز بمعرفتهم وبجد بحس اني منهم وانهم مني واننا فعلا فعلا فعلا اخوات

الف شكر على مشاعرك النبيله دي
وربنا يرحم والدتي ويرحم والدك ويرحمنا امواتا واحياء
امين يارب العالمين


سلامووووز

Soooo يقول...

shreen


بجد انا اسف لو كنت خليتك تعيطي
بس هي دي الدنيا
فرح وحزن وحب وغضب .. وحاجات تانيه كتير
ولازم نعيشها
يبقى عشان نعيشها .. الاحسن لينا اننا نبتسم
ونقول يارب



سلاموووووز