الاثنين، ٧ ذو الحجة ١٤٢٨ هـ

!!! (2) المهمة .. الصعيديه


اليوم التاني أو .. الحلقه التانيه

الليله عيد .. والعريس هايتجوز

الساعه 4 العصر .. بعد المجهود اللي حصل ليلة امبارح وبعد الاكل الغباوه اللي انا كلته كان لازم انام وكأني بهيمه نايمه بعد ما اتعلفت .. بغض النظر عن الروائح المنبعثه من اقدام ( علي ) ابن عمي
المهم .. جه (حماد) ابن عمي او العريس عشان يصحيني وكمان عشان يعرف يسلم علي بضمير لأنه كان امبارح مشغول مع الضيوف اللي جم عشان يباركوله وكده .. وخدني بالحضن وانا لسه قايم من النوم .. وسمعت طقطقة جميع فقرات ضهري من قوة الحضن اللي خدني بيه .. ماعلينا .. لقيته بيشدني من عالسرير
زي أي حمار او فرخه مثلا عشان نتغدى
ياربي .. توب علي بقى
!!! الغدا عباره عن .. حوالي عشر تجواز حمام محشي بالفريك وجنبيه صينية (فوسفور صعيدي)
الفوسفور الصعيدي : يختلف الفوسفور الصعيدي عن الفوسفور السكندري أو الفوسفور البورسعيدي .. أي انه وباختصار شديد يختلف عن أي فوسفور في الفسافير كلها .. حيث انه يتكون من .. مش عارف اقولها ازاي بس هاحاول - يتكون من مخخخخازن الحيوانات المنويه في العجل - فهمتو قصدي ؟؟ - وتقطع هذه المخخازن بعد ان يتم سلقها الى مكعبات ثم يتم تحميرها جيدا في السمن البلدي - انتو لسه شوفتو حاجه - وبعد ان تحمر هذه المخخازن توضع في صينيه ثم يضاف اليها شوربة الحمام وتوضع في الفرن حتى تتشرب هذه القطع الشوربه جيدااااااااا
يا خرااابيييييييييييييييي
لقيت مافيش حد قاعد على الطبليّه - السفره الصعيدي - قمت سألت (حماد) ابن عمي
سووووو : امال الناس فين ؟؟؟
حماد : - وهو بياكل .. والاكل طالع من بقه - تجريبا .. راحو شرجه - يعني راحو بيت خالي في شرق البلد
سوووو : طب انا هاستنى لما ييجو عشان آكل معاهم - محاوله هروب فاشله طبعا
حماد : لاااااااااا .. هم كلو .. وسايبين منابنا - ده هو نصيبنا في الأكل
!!!! سوووو : يعني ايه ؟؟ الاكل ده بتاعنا احنا بس
حماد : ايوه .. ولازم يخلص .. فاهم جصدي
وياريتني ما فهمت
طب خليكم انتو مكاني .. قدامي حوالي خمس تجواز حمام منابي انا بس .. طبعا غير صينية الفوسفور .. طب هو عريس والليله ليلته .. انما انا هاعمل ايه ؟؟؟؟
نهاره تقلباااااااااات في السرييير
الحمد لله عرفت آكل اللي فيه النصيب والباقي اديته لقطه كانت بتحوم حوالين الطبليّه عشان حد يعبرها .. والغريب انها ما راحتش لابن عمي خالص .. وكأنها عارفه انه مش هايديها حاجه .. لأ ده ممكن ياكلها هي كمان .. وبعد ما كلنا لقيته راح قايم وجايب من التلاجه تقريبا قفص منجه بس محطوط في طبق كبير وقاللي
حماد : كل منجه .. ولا دي كمان فيها حاجه ؟؟؟؟؟
!!! سوووو : لا .. ازاي .. ودي تيجي
- شوفولي اقرب تربه ادفن نفسي فيها -
في اثناء مانا باكل المانجا لقيت القطه اللي اديتها اكل من منابي بتنونو وصوتها علي قوي .. تقريبا كان قط دكر وبيعلن رجولته في المنطقه .. والغريب اني لقيت بتاع عشر قطط متدلعين ومنعنشين جاين بيتمخترو .. ادي فايده الفوسفور الصعيدي .. بيشتغل وقتي وقتي .. ربنا يستر على اللي هيجرالي
الساعه 6 المغرب .. لقيت تليفون جايلي من امي بتقوللي اني لازم اروح بيت خالي عشان ابارك للعروسه حالا .. وانا زي ما قلتلكم في الاول بقالي كتييييير ما روحتش الصعيد .. يعني ما اعرفش الطريق لبيت خالي ازاي
!!! تتصرف كيف يا سوووو .. تتصرف كيف يا سووووو ؟؟
بس .. تاهت ولقيتها .. انا هاركب توك توك واقوله يوديني هناك عند بيت الطماوي - ده اسم عيلة امي
طبعا مش عارفين ايه التوك توك ؟؟؟
(((الموضوع ده اتكتب من حوالي اربع سنين قبل ما تنتشر ظاهرة التوك توك)))
التوك توك : هي وسيلة مواصلات حديثه .. دخلت بلدنا في عصر الفضائيات و نانسي عجرم .. وهي عبارة عن فيسبا ولكن مضاف اليها فردتين عجل من الخلف .. أي انها اصبحت اكبر من الخلف مما يجعلها تتسع لحوالي ثلاث افراد يقعدو عالكنبه الورانيه
طلعت من بيت عمي بعد ما اتخذت القرار اني هاركب التوك توك .. وفعلا لقيت توك توك معدي قمت موقفه وراكب معاه .. الواد اللي سايق التوك توك تقريبا عنده اتناشر سنه بس .. ولما لقاني باتكلم مصري عرف اني مش من البلد .. شوفو قاللي ايه
سائق التوك توك : ويا ترى حضرتك منييين في مصر ؟؟؟
سوووو : من المعادي .. ليه انت تعرف حد هناك ؟؟؟
سائق التوك توك : ايوه .. في وحده جريبتي ساكنه جنبيكم .. في الدييزه - الجيزه
!!!! سوووو :
سائق التوك توك : هي مش جريبتي وبس .. لا .. دي تبجى بنت ولد عم امي شقيقته .. ومتجوزه واحد شغال في المطاار .. في الجوازات
سوووو : طب كويس .. فاضل كتير على بيت الطماوي ؟؟؟؟
سائق التوك توك : لا .. آخر الشارع ده .. بعد الرهبه اللي دايّه - بعد الميدان اللي جاي
الحمد لله وصلت .. بس على وعد مني اني اروح اسلم على قريبة السواق وابعتلها سلامه معايه
- والله ما اعرف اسمه اصلا -

الساعه 7 مساءا .. دخلت بيت خالي او بيت العيله .. لقيت في حوالي تلاتين طفل بيلعبو في مدخل البيت وكلهم لما شافوني راحو جايين علي و واخدني بالحضن .. واللي بيقول منهم ازيك يا خال .. واللي بيقول ازيك يا عم .. وانا ما اعرفش مين فيهم يبقى ايه بالظبط .. بس وماله .. ازيكم يا حبايبي وبتاع ..ودخلت على باقي افراد العصابه في البيت
انا لي بنت خال متجوزه وكبيره شويه .. عندها بتاع خمسه واربعين سنه مثلا .. مخلفه بنت .. بسم الله ماشاء الله جميله جدا .. بس الحلو ما يكملش .. البنت دي وهي صغيره جاتلها حمى شوكيه وبعد ماخفت منها افقدتها حاستي السمع والنطق .. يعني مابتتكلمش ومابتسمعش .. ومع ذلك فنانه جدا وهاقولكم ليه .. بس مش دلوقتي
سلمت على كل الناس اللي ماكنتش سلمت عليهم قبل كده .. واللي ما جوش البيت عندنا لما عرفو اننا وصلنا البلد .. وبعد ما قعدت شويه سألت على العروسه عشان اباركلها
العروسه او (أميره) بنت خالي دي اكتر واحده انا باحبها من بنات اخوالي وخالاتي كلهم .. وماتفهمونيش غلط .. (اميره) دي اختي في الرضاعه عشان ماحدش يتكلم
المهم .. دخلت عشان اباركلها ولقيتها بسم الله ماشاء الله .. اجمل عروسه انا شفتها في حياتي .. وعلى فكره .. ابن عمي برضه راجل ملوهدومه ما يعيبوش حاجه .. راجل صعيدي صعيدي يعني .. وجدع بطريقه غبيه جدا - ربنا يوفقهم يارب - سلمت عليها و لقيتها فرحانه جدا جدا ... خصوصا انهم - هي وحمّاد - كانو بيحبو بعض من ايام ما كانو صغيرين .. وحتى لما كبرو دخلو كليه واحده .. بس ابن عمي كان اكبر منها بسنتين .. قعدت معاها ومع بنات خالي التانين واخواتهم و باركتلها .. وبعدين اكتشفت اني لازم اروح بيت عمي عشان اجيب هدوم الفرح بتاعتي - بدله وحركات .. شكلي مسسسسسخره فيها - لقيت ابن خالي بيقوللي أروح معاه خصوصا انه رايح هناك برضه عشان يجيب (حماد) عشان الزفه هاتطلع من بيت خالي .. رحت معاه على بيت عمي ولبست البدله بس من غير كرافته خصوصا ان الدنيا حر ومش ناقصه خنقه .. وجبنا (حماد) وباقي بيت عمي قالو انهم هاييجو ورانا
بعربياتهم يعني .. مش بالتوك توك

الساعه 9 بالليل .. بعد ما رجعنا بيت خالي والعريس دخل سلم على الناس .. وخصوصا عروسته .. وقعد معاها شويه - طبعا في وجود الناس كلها - وقعدنا نتكلم والكلام جابنا و ودّانا .. وبعد كده جه المصوراتي وراح واخدلهم كام صوره وبتاع يعني .. والناس جات كلها .. وهانطلع بالزفه دلوقتي من بيت خالي ونروح بيت عيلة ابوي .. وطلعت الزفه واتفقنا كلنا كشباب العيله اننا نلف البلد كلها .. من شرقها لغربها .. ومن قبلي لبحري .. وانا كنت شايل هم حاجه واحده بس
انا اللي هاسوق العربيه بتاعتنا .. وابوي هايشتغل تاااااااااااااااااني

الساعه 10 بالليل .. وصلت الزفه عند بيت عيلة ابويا ونزلنا كلنا والزفه ابتدت .. بس المره دي كان فيه فرقة مزمار تانيه غير بتاعة امبارح .. كانت احسن .. وأكتر من ناحية العازفين
طبعا في خلال الزفه ماهي طالعه من بيت خالي ولحاد بيت عمي كانت البنادق الآلي شغاله على ودنه .. وكمية الذخيره اللي اتضربت كانت كفيله باخراج اسرائيل من فلسطين .. أواخراج اي حد من اي حته .. العريس سلم على عروسته وراحت مع الستات في الدور الفوقاني من المنضره - الحريم لوحدهم والرجاله لوحدهم .. احنا ماعندناش الكلام الفاضي والمسخره دي - وهو دخل على المنضره والناس كلها جات تسلم عليه .. والفرقه اشتغلت
اديييها يا ابوووووووووووي

الساعه 11 بالليل .. الفرح بقى حلو والناس كلها بترقص والتنقيط كان شغال على ودنه على الفرقه - خدو نقطه تكفي سداد ديون مصر - ابتدى شباب العيله يلعبو تحطيب .. واظن انكم عارفين ايه التحطيب .. ولو مش عارفين هو اللعب بالنابوت .. كل اتنين يقفو قصاد بعض ويبدأو تحطيب .. بس في هيئه استعراض مش اكتر - مش زي الافلام يعني - وطبعا كان لازم العريس هو كمان يلعب .. والجو كان زي الفل .. حبيت العب تحطيب بس مع واحد يكون في سني مثلا او حاجه كده .. ما لقيتش غير (مصطفى) ابن بنت عمي اللي قلتلكم عليه وقلتلكم انه اكبر منني بسنتين ومع ذلك بيقوللي يا خال .. واول ما مسكت النابوت لقيته تقييييييييل .. بتاع 15 كيلو ولا حاجه
اجمد يا واد يا سوووو لا يقولو عليك فرفور من المعادي
وابتدينا لعب .. اصول لعبة التحطيب - خصوصا في الافراح مش في الخناقات - انك تلعب لعب استعراضي الاول وبعدين تبدأ في الضرب بس بحنيه عشان ما تفلتش منك وتعور حد ولا حاجه .. وده عكس اللي حصل معايه تماماااااااااااااااااا
الواد (مصطفى) زي ما يكونو قالوله ان اللي بيلاعبك ده هو الارهابي بن لادن وانك هتاخد مليار دولار لو قتلته .. ويضرب بعزم ما فيه .. وانا اقوله ياااد اهدى .. وهو ابدا .. ياااد عيب عليك ده انا خالك والخال والد .. يقوللي انا ابن حرام .. ياعم يهديك يرضيك .. مافيييييييش .. هو دماغه قفلت خلاااااص .. ما نجدنيش منه غير ابوه اللي حس اني خلاص ابتديت انهار ويغمى علي من المجهود اللي انا بابذله للحفاظ على حياتي .. وفعلا .. توقفت المهزله

الساعه 12 بالليل .. لقيت عمي ( محمد ) بيقول للفرقه توقف شويه عشان الناس تاكل .. ولقيت ولاد عمي راحو خاطفني معاهم على البدروم .. وهناك لقيت بتاع عشر طباخين وكميات مهووله من الصواني والحلل .. ولقيت ولاد عمي بيقولولي شييل .. رحت واخد بتاع عشرين طبق على عشرين معلقه وطلعت احطهم على الترابيزات اللي اترصت قدام الناس وهم قاعدين على الدكك .. وابتدو الناس يحطو الاطباق قدامهم والصواني جات وفيها لحمه وفته ورز واكل بكميات عبط عبط عبط .. وشويه ولقيت كام واحد من ولاد عمي راحو واخدين اكل للحريم فوق ونزلو ومعاهم بتاع تلاتين صندوق حاجه ساقعه .. وافتح على قد ما تقدر يا ابوكرش
لما عمي قعد ادى الاشاره للمعازيم انهم يبدأو في الاكل
وكأنها طبول الحرب قد دقت ..أورشاليييييييييييييييييم ... هجووووووووووووووم
اللغ بقى على ودنه .. لسه جاي عشان اقعد آكل مع المعازيم لقيت ولاد عمي راحو مقوميني وقالولي عييييييييييب .. لما الضيوف يخلصو أكل الاول .. قلتلهم يعني ايه .. قالولي اكلنا موجود على جنب .. وفعلا قعدنا نخدم على المعازيم ونجيبلهم ميه وحاجه ساقعه واللي يخلص قزازه نفتحلو واحده تانيه وكده .. بيني وبينكم .. انا شفت الاكل والكلام ده كله نفسي اتفتحت .. لقيت ابن عمي بيقولي : ماتخافش .. اكلنا متشال على جنب
الناس خلصت الاكل والكلام ده كله والفرقه رجعت تلعب تاني واحنا نزلنا البدروم نحط الصواني والاطباق والكلام ده كله .. وطلعنا في الدور التاني عند الحريم وقعدنا في اوضه كبيره لوحدنا ..وجابولنا اكل مخصوص .. واديها ماترحمهاااااااش
انا تحولت الى ذئب من كتر اللي انا كلته وشفته

الساعه 2 فجرا .. فاكرين اكبر واحد من ولاد عمي اللي قام امبارح في ليلة الحنا ورجع بعدها بشويه ومعاه تلات عربيات نص نقل مليانين بيره .. طبق الاصل العلقه اللي فاتت .. بس المره دي معاه بتاع عشر عربيات ومنهم اللي جايب بيره ومنهم اللي جايب مشروبات تانيه وطبعا السجاير بتلف على المعازيم .. وعيب انك ما تاخدش حتى لو كنت ما بتشربش سجاير .. ده غير الحشيش اللي بقى سلامو عليكم
مش بقولكم .. الليله عيد والعريس هايتجوز

الساعه 4 الفجر .. الفرقه ابتدت تشطب والناس ابتدت تمشي بعد ما تبارك للعريس وكل واحد من المعازيم يديله ظرف مقفول .. فيه النقطه بتاعته يعني - انا عايز اتجوز حالاااااااااااااااااااااا
اتلمينا كلنا كشباب العيله ورحنا شايلين العريس لحاد فوق عند الحريم - معظم الستات اللي مش من العيله كانت مشيت .. يعني مافيش حد غريب - ورحنا مسلمين العريس للعروسه .. اول ما العروسه شافته وشها احمرررررررر قوي - يا سلام يا شييييخه .. قال مكسوفه قال - وراح العريس بايسها في قورتها وكان هايبوسها على خدها بس امه لحقته وقالتله : يا واد مستعجل على ايييييييييييييييه
ضحكنا كلنا .. وراح العريس شايل عروسته قدام الناس كلها وهي مكسوفه موووت وراح طالع بيها على بيتهم
اجمل لحظه ممكن حد يشوفها

الساعه 5 الفجر .. ابتدينا انا وولاد عمي وولاد خالي نشيل الدكك اللي كانت موجوده في الشارع وندخلها المنضره .. عشان خلاص بقى .. والشباب كلهم كانو بيضحكو وفرحانين الا انا .. عارفين ليه ؟؟؟؟
عشان هارجع ابات تاني في بيت عمي مع ابن عمي (علي) ذو السلاح الكيميائي
يمهل ولا يهمل

--------
وبكره انشاءالله اكملكم الحكايه .. عشان في حاجات غريبه جدا وتطورات كتييييير

سوووو

هناك ٦٤ تعليقًا:

سهر الليالى يقول...

قلت اسجل حضور اووووول تعليق
واقولك كل عام وانت بخير
هقرا وأرجع أعلق تانى
بس ما صدقت

تحياتى يا أبو قلب طيب

ToOoKa يقول...

السلام عليكم
بجد يومياتك فى الصعيد دى جامده اوى
وعجبتنى جدا
وعقبالك يارب لما يعملولك فرح احسن من دا كمان
وتلم فلوس كتير
وكل سنه وانت طيب

3ala asm masr يقول...

فعلا يومياتك جامده أخر حاجه
ربنا يجعل كل أيامك فرح يا سووو
كل سنه وأنت طيب

سهر الليالى يقول...

بجد يا سوووو حكيك ملوش حل
فتحت نفسى على الاكل وعلى الجواز وعلى زيارة الصعيد
ههههههههههه

بجد ما شاء الله كنت مبسوطة جدا جدا طول ما انا بقرا اصلى بحب جو الحب والعيلة دة اوى
واتبسط معاكو اوى فى الفرح على فكرة

بصراحه من كتر حكيك جالى أقتراح كدة يا سوووو ايه رايك ما تعملنا رحله نطلع كلنا لحد عندكو هناك
وياريت يكون فى فرح عشان نتظبط

عجبتنى اوى
وراح العريس شايل عروسته قدام الناس كلها وهي مكسوفه موووت وراح طالع بيها على بيتهم
اجمل لحظه ممكن حد يشوفها

أثرت فيا أوى اللحظة دى واكيد بنات كتير بيحلموا بيها

يلا كل عام وأنت بخير والف مبروك وعقبالك
تحياتى يا أبو قلب طيب

بنوته مصرية يقول...

هههههههههههههههههههههه

بصراحه مكنتش اعرف اني فيه فسفور صعيدي غير السي فود بس ايه ده ده متهيقلي لو حد اكلة هيموت ههههههههه انت اكلته ازاي بس بجد تاكل !!

بذمتك مش مكسوف وانت بتقول .....
لسه جاي عشان اقعد آكل مع المعازيم لقيت ولاد عمي راحو مقوميني وقالولي عييييييييييب

يعني انت من شويا واكل كم جوز حمام ومانجه ليك نفس ههههههههههه

انت كدا هتنزل المعادي هيحصل فيها مجاعه منك هههههههه

بجد مشاء الله مش بحسد علي فكرة :)

بجد يوميات جامده موت وخصوصا الاكل ده دانت زمانك زيت يجي عشرين كيلو اليومين دول ههههههههه

الله يكون في عون مجاري المعادي بعد كدا هههههههههه

منتظرة باقي الحلقات بفارغ الصبر

تحياتي يا سووو

Desert cat يقول...

قريت الحلقتين ورا بعض ما شاء الله طريقة سردك للموضوع حسستنى زى ميكون كنت معاكو ... انا عايزه احضر فرح صعيدى حالا بس من غير على علشان ريحة رجليه

Rehab Mostafa يقول...

لأ بجد اسلوبك تحفه
نسيت تقول ان كمية الأكل اللي انت شوفتها وكلت منها دي تكفي مجاعات الصومال
وفتحت نفسي على الأكل أوي بصراحه :$

كل سنه وانت طيب بمناسبة العيد

ابن حـجـر الـعـسـقـلانـى يقول...

هو إيه موقف شرطة مكافحة المخدرات بالضبط من اللى بيحصل ؟؟ و ليه القوات المسلحة ما بتدخلش ؟؟ أو حلف شمال الأطلنطى مثلا ؟؟


بس حرام عليك يا سوووو .. موتنى من الضحك

Unknown يقول...

ههههههههههههههه
يا خبر ابييييييض الحلقه دى بالحلقه اللى فاتت بعشر حلقات قدام
بقولك ايه
الاجيش عريس صعيدى حداكوا يا بوى
وسمعنى سلام الضوءالشارد

هناء يقول...

سلام خاص مني لابن عمك الكيماوي
تحفة يا سوووو

Nani يقول...

السلام عليكم
سووووو
انت محولتش تشتغل سيناريست؟
سؤال لو سمحت
انا اعرف المجتمع الصعيدي محافظ فازاي يجيبو بيرة وحشيش وبتاع؟ مفضلش الا يجيبو شوية غوازي
انا رايحة البلد اول يوم العيد وطبعا كل الي انت قلته عن الاكل حيحصل معايا
ربنا يستر

Unknown يقول...

حلو اوي اوي....شوقتني اشوف بلدكم و عقبالك ان شاء الله

غير معرف يقول...

ده انتو الجواز عندكوا زي العسل اهو قولتلك نتجوز و قولتلي تدفعي كام يعني غير اللي انا حادفعه النقطة اللي حتجيلك من الجواز شوفت يعني الموضوع كله مكاسب و انت الكسبان بس النقطة بالنص ماشي يابا

فرنسا هانم يقول...

حمام محشى بالهنا والشفا
طبعا انت كنت بتشوفه فى الصور بس
ولا فى عالم الحيوان
لكن يتاكل ؟؟؟؟؟
اظن جديده دى ياسووووووووو
حمام محشى يتاكل
لا
ومانجه كمان
لا
انت فجرت ياسوووووووووووو
ومحدش هيعرف يكلمك بعد كده
وخدت نصيبك من التحطيب
يا سووووووووووو
فى تحطيب بعصايه اللولى باب
ولا بالقلم الرصاص
على فكره ياهندسه
كنت هامشى قبل
ما اقولك
كل سنه وانت طيب

Doba يقول...

ماليش دعوة
انا لسه راجعة من صلاة العيد وعاوزة العيدية يعنى عاوزة العيدية

مش انت الكبير وابو كرش كمان
ازاى شاب وفى الثلاثون ربيعا ويبقى بكرش - مش عيب كده؟

كل سنة وانت طيب وبكل خير والسنة الجاية تكون بتتجوز وتاخد الظرف المقفول وتاكل الفسفور الصعيدى بس الصينية كلها تبقى بتاعتك

هستنى اعرف موضوهع البنوتة الفنانة لانى لقيتك مقلتش حاجة عنها

تحياتى يا سوووو
هبة

ملحوظة: متهفش فى اللحمة كتير
مانتا صحيح نازل طالع بتاكل لازم يكون عندك كرش

Unknown يقول...

يومين حلوين قوي ياسووو وتفاصيل دمها خفيف جدا

أحلي حاجة في الدنيا لمة الأهل وانك تحس ان الناس دي كلها قرايبك وبيحبوك

وساعات كتير بيبقوا يومين بس فيهم أحداث تساوي شهور

تحياتي

Hany Rizk يقول...

سو يا سو حبيبي جوزوه

انا مش حاقول رايي لانى قولته قبل كدة بس كل اللى حاقوله انى مستنى باقى الحلقات اللى ماقريتهاش قبل كدة وانت عارف طبعا فبسرعة كدة رص باقى الحلقات علشان الحق اقراها قبل ما اموت باذن الله
وسلامى الى العريس وعقبالك يا عريس

غير معرف يقول...

100/100
والله قصه رااااائعه
عيشنا معاك لحظه بلحظه
ربنا يتمم لهم على خير يا رب
وعقبااااااااااااااالك
قول امين بسرعه

cinderella يقول...

نسيت امضي

cinderella

Unknown يقول...

والله شى جميل اول مرة ازورك الاقى عندك فرح ربنا يكتر افراحك وعقبالك ان شاء الله ويتعغبولك كدة زى متعبت لابن عمك
والله عادتنا الجميلة القديمة اللى لسة موجودة فى الريف والصعيد ولو ان فيها بذخ كتير بس تصدق تحسسك بالفرحة اكتر من افراح القاهرة
مبروك مرة تانية

عمر بوك ستورز يقول...

مرحبًا جدو ....
فاصـل إعلاني :
زورونـا تجدون ما يسركم، وبأقل الأسعار، قائمة كبيرة من الكتب ، ودور النشر تحت سقف واحد، وبأسعار لا تقبل المتافسـة )

كل عيد وأنتم مضحيين


تحياتي

الـسـيـدة نـون يقول...

انا بقى ايه
انا كنت جاية اعيد عليك وجايبالك معايا صنية فتة وشوية لحمة
بس بعد ماقريت البوست بتاعك حسيت انك مش جعان اوى
وانك نفسك مصضوضة
فقلت ارجع بالاكل لحسن ترجع فى وشى

بجد يا سووووووو بوست جميل
انا كنت جاية علشان اقولك فين البوست الجديد لقيتك كتبته والحمد الله
بس والنبى يا سوووووو ماتتاخرش علينا فى باقى حلقات المهمة الصعيدية
علشان عايزة اعرف باقى التطورات
كل سنة وانت طيب وبالف خير
اختك خيخة

MKSARAT - SAYED SAAD يقول...

كل سنة وانت طيب وعقبال فرحك
بوست جميل زي ما عودتنى معاك
تحياتي يا جميل

غير معرف يقول...

مش ممكن
بجد بجد
إنت رهيــــــــــــــب جدااااا
على فكرة أنا صعيدية
بس مش جوانية أوي
عجبني جدااااا جداااا
وصفك للفرح والليلة
عقبال ليلتك كده إن شاء الله
ونجيلك كلنا كده بربطة المعلم
نحييلك فرحك

shahy يقول...

واد ياسوووو هو كل دة ولسة بكرة ماجاش
هو عندكم في الصعيد بكرة بيجي امتى؟
مش تاني يوم زي عندنا
اوعى يكون جرالك حاجة من اكل اللحمة في العيد
عاوزين نطمن عليك
ياواد وجعت قلبي عمالة اندة عليك

ممكن سؤال صغير
هما الناس اللي بياكلو المخازن بالطريقة اللي انت قلت عليها دي بيعيشوا بعد كدة انا اعرف انها بتتاكل مشوية او مع الكبدة لكن الوصفة دي صعبة قوي اللة يكون في عون المعدة

ابقى طمنا عليك

Hannoda يقول...

كل سنة و انت طيب يا راجل يا طيب
:)
أنا جاية أعيد متأخر
:(

بس و اللها لغيبة غصب عني

جاية تاني اقرى البوست الطويييل ده و أعلق
:)
تحياتي لسوووووو

الـسـيـدة نـون يقول...

ايه يا بنى
فين الحلقة التالتة
هو بكرة بتاعك لسة ماجاش ولا ايه
شوقنا اكتر شوقنا
فين يا عم الحاج باقى التطورات


متتاخرش ولو جيت ابقى خبط عليا علشان اعرف ان جيت

اختك خيخة

Unknown يقول...

ايه ياسووو انت فينك ياراجل

عل المانع يكون خير

وتكون المشكلة في النت وبس

:))

كل سنة وانت طيب

سهر الليالى يقول...

أين أنت يا سوووو
وفين باقى الحلقات

هو العيد عمل فيك حاجة ولا ايه
طمنا عليك
تحياتى

Unknown يقول...

انت فين يا عم سوووو مش باين, غطسان فين يا تري يا هل تري , لعل المانع يكون خير ان شاء الله
وحشتنا اوي و وحشتنا البوستس الجامده بتاعتك
انا قاعده مستنيه المهمه الصعيديه 3و 4 و5 الخ ههههههه
بس ياريت قبل ما تكتبهم تقولنا كنت فين الفتره اللي فاتت دي كلها :))

غير معرف يقول...

ça sera quand la 3éme partie de l'émission se3idi?
c'étaient tellement amusantes les deux premières!! t'es super cool soooooo

shreen يقول...

سوووو انا بعلق قبل ما اقرأ البوست
انا جيت علشان اقولك انى منزله بوست هيهمك انك تقراه
انا عارفه اهتماماتك
شويه يعنى
هارجع تانى للبوست بتاعك واقراه واعلق

shreen يقول...

سوووووووو
كالعاده
السهل الممتنع
كلماتك غايه فى البساطه والانسايبيه
لا تستطيع الا ان تكمل القراءه للنهايه
و بأنسانيتك المعهوده لم تنسى القطط
لا اكلا
ولا ذكرا فى البوست

بس كان نفسى الاقى فى الحلقه دى ليه سميت بنت بنت خالك فنانه
فضول بقى تعمل ايه !

وبعدين ياعم ايه ام المخازن اللى انت لغيتها دى
يععععععععععع

احلى حاجه بقى ان العريس والعروسه متجوزين عن حب

ربنا يخليهم لبعض

Clandestino يقول...

اهلا بالاخوة
اخ سوو هل تنظم الينا يوم السبت في تسجيل البرنامج الاذاعي لاذاعة الرديون التونسية حول المدونين العرب ؟؟

ملاحظة : تحصلت على عنوان مدونتك من الاخت هناء الجزائرية

Soooo يقول...

سهر الليالى

يافندم انتي تحجزي اي مكان في التعليقات عندي براحتك
كفايه تشريفك وتعليقك عندي ... بغض النظر عن اي ترتيب
والحمدلله ان الحلقه عجبتك وانك اتفتحت نفسك للجواز وربنا يرزقك يارب بابن الحلال اللي يسعدك وتسعديه دنيا واخره يارب

ومعلش على تأخيري في الرد على تعليقك وعلى تأخيري في وضع الحلقه التالته من القصه وده لظروف سفري في العيد .. بس مش البلد .. لأ
اصلي عيدت السنه دي في دهب
وهنزل موضوع قريب عن اللي حصل معايا هناك .. وان شاء الله هيكون على هيئة حلقات برضه
شكلي كده هقضيها مسلسلات في البلوج ده

منوراني


سلاموووووووووز

Soooo يقول...

ToOoKa


الحمدلله ان اليوميات عاجباكي واتمنى انك تتابعيها للآخر
واعتذر عن ردي على تعليقك واعتذر برضه عن تأخيري في تنزيل الحلقه التالته من القصه

وكل سنه وانتي طيبه


سلاموووووووووز

Soooo يقول...

3ala asm masr

اللهم امين يارب
وكل سنه وانتي طيبه والحمدلله ان المواضيع عاجباكي واتمنى انك تتابعيها لآخرها
وشكرا على تشريفك لي بتعليقك وزيارتك

سلامووووووووووز

Soooo يقول...

بنوته مصرية

ماتتصوريش يا رودي انا بابقى سعيد قد ايه لما اشوف حد بيعلق على بوست من بوستاتي والاقيه بيضحك
بجد بابقى فرحان ان ربنا قدرني ارسم ضحكه او حتى بسمه على وشوش الناس
وبعدين بالنسبه لاني اقعد اكل مع المعازيم انا كنت فاكر انه عيب ان الاكل يتحط وما اقعدش اكل معاهم .. لكن اتضح العكس
وبعدين بذمتك انتي .. مش لما بتشوفي ناس بتاكل ونفسها مفتوحه بتلاقي نفسك انتي كمان اتفتحت للاكل حتى لو كنتي واكله خروف قبلها
وعلمك علمك علمك .. انا فضلت مزنهر ومنور وعمال اعرق بطريقه رهيبه من الفوسفور الصعيدي ده
تقريبه سره بااااااااااااتع
كل سنه وانتي طيبه
ومنوراني بتعليقك وتشريفك عندي في مدونتي


سلامووووووووووز

Soooo يقول...

Desert cat

طب والله العظيم واحشاني ياقطه وواحشني تعليقك عندي
والحمدلله ان الحكاية عجبتك وارجو انك تتابعيها لاخرها
وبعدين الصعيد ماينفعش من غير علي ورجليه
ده هو ده اللي اسمه .. عبق التاريخ
كل سنه وانتي طيبه


سلاموووووووووز

Soooo يقول...

Rehab Mostafa

الحمدلله ان الحكاية والموضوع عاجبك
وبعدين المجاعات مش في الصومال وبس
لأ
دي في كل دول العالم
في الجيزة وامبابه وبولاق الدكرور

والحمدلله ان نفسك اتفتحت على الاكل واحنا في عيد لحمه
يعني هتهيصي

وكل سنه وانتي طيبه


سلامووووووووووز

Soooo يقول...

ابن حـجـر الـعـسـقـلانـى


والله يا عس عس .. دلع عسلقاني يعني
موقف مكافحة المخدرات من اللي كان بيحصل ان مأمور المركز والنايب بتاعه دول من العائله الكريمه
وكانو قاعدين وحاضرين الفرح .. وخدو نصيبهم
اما بالنسبه للقوات المسلحه .. فاحب اقولك ان في مناطق في الصعيد ماينفعش تدخلها ولا حتى تهوب منها اي قوة عسكريه
ولا حتى شمال الاطلسي
اطلنطي ممكن

الحمدلله ان الموضوع عجبك وارجو انك تتابع القصه لآخرها ويارب تعجبك اكتر
كل سنه وانت طيب يابن حجر

سلامووووووووووووووووز

Soooo يقول...

لماضة

ستي الداكتوره جات يا رداااله
كل سنه وانتي طيبه يالماضه ويارب في زي الايام دي تكوني محققه اللي بتحلمي بيه يارب
ويوجد لدينا تشكيلة عرسان صعيدي وارد الخارج .. بواقي تصدير
وسمعني سلام ذئاب الجبل

سلامووووووووووووز

Soooo يقول...

هناء

اختي الشقيقه من الجزائر الشقيق
كل سنه وانتي طيبه
ومتشكر جدا على تشريفك وتعليقك عندي بالرغم من تقصيري في التفاعل معاكي في مدونتك الجميله
وهبلغ ابن عمي سلامك يافندم
وكل سنه وانتي طيبه


سلاموووووووووووووز

Soooo يقول...

Nani

والله يا ناني انا باكتب سيناريوهات افلام روائيه قصيره وساعات طويله
وباكتب مسرحيات وساعات اشعار غنائيه
لكن مشكلة الوسط الفني ككل .. انه عامل زي الدايره المقفوله
ماينفعش حد يخترقها غير لما يسمحوله نتيجة كوسه او واسطه او حاجه من هذا القبيل
وعشان كده انا فضلت اني اهتم بشغلي الطبيعي كمهندس ديكور واعتبر الكتابه هوايه امارسها من خلال البلوج ده او من خلال بعض المواضيع اللي بابعتها لبعض الجرايد والمجلات

اما بالنسبه لجزئية ان المجتمع الصعيدي محافظ .. دي فعلا حقيقه
وهتصدقيني لو قلتلك انهم بيعملو كده مش لحاجه غير ان ده فرح والشباب هم اللي بيعملو ده .. اما الناس الكبيره في العائلات فبتبقى معترضه على ده لكن مابتحبش تبوظ الليله ولا تنكد على الشباب ولا على العريس وعروسته
اما جزئية الغوازي والرقاصات فدي بتحصل فعلا بس مش عندنا .. في القرى اللي تابعه لبعض المراكز

يعني باختصار شديد .. طقوس الافراح بتختلف من كل منطقه عن غيرها
حسب بعض المتغيرات والمتحكمات في الحياه عندهم

ارجو اني اكون وصلتلك وجهة نظري
وربنا يرجعك بالسلامه من بلدكم
ملحوظة:
انتي بلدكم ايه؟؟؟؟؟


سلامووووووز

Soooo يقول...

s

الحمدلله ان الموضوع عجبك
وان شاء الله هنظم رحلة لبلدي في الصعيد
والسعر هيكون رمزي جدا جدا
سبعتلاف تسعميه تمانيه وتلاتين جنيه مصري فقط لا غير
والاقامه هتكون فول بورد .. شامله التنقلات بالتوكتوك .. والنوم في اوضة علي ابن عمي المبخره بعبق التاريخ

وكل سنه والناس كلها طيبه


ملحوظه:
انا سبب تأخري عن متابعة الحلقات اني سافرت دهب .. وان شاء الله هبقى انزل مجموعة حلقات او مواضيع عن الحوار ده
وربنا يسهل


سلاموووووز

Soooo يقول...

Nadosha

شفتي بقى ان ربنا مبارك في
اهو انتي بمجرد ماقلتي يا جواز .. ربنا كرمك بعريس اهه
ربنا يوفقك يارب دنيا واخرخ ويهيئلك الخير من عنده يارب

وبيني وبينك .. انا شخص لا يطاق ويلا حد يقدر يعاشره .. كويس ان ربنا رحمك منني يا شيخه

وكل سنه وانتي طيبه

سلاموووووووووووز

Soooo يقول...

فرنسا هانم

خبر ايه يا فرنسا
علمك علمك علمك
انا اعرف واحد صاحبي خالو على طول بياكل حمام محشي
واعرف كمان واحد صاحب ابن خالتي بيعرف ناس على طول بتشرب مانجه
يعني الحمدلله مش اي حاجه يعني

وطبيعي اني اتعرف على حاجات غريبه ي الحمام المحشي وزي المانجه
هي دي الحياه يابنتي
وعلى رأي يوسف بيك وهبل
وما الدنيا الا تلاجه كبيره .. فيها حمام وفراخ وبط .. وساعات كده ربنا بيكرم وبيبقى فيها جبنه شيدر

وكل سنه وانتي طيبه


سلامووووووووووز

Soooo يقول...

Doba

ايه ده بقى
يعني داخله حامي وعايزه العيديه وبعدين تروحي متتريقه على كرشي اللوذعي
لا ياعم مش لاعب
انا صحيح بكرش .. لكن اديكي عيديه .. مافتكرش

وكل سنه وانتي طيبه وبخير يارب
وان شاء الله في زي الايام دي تكوني فرحانه بيوسف افندي .. وربنا يباركلك فيه وفي بيتك يارب

هذا .. وسيلي سرد باقي الحكايه وهتعرفي ايه حكاية البنت الفنانه

ملحوظه
انا ماكلتش لحمه العيد ده خالص لاني وبمجرد ما دبحت رحت مجهز شنطتي ومسافر دهب .. وهناك احسن حاجه تتاكل هي السمك


سلاموووووووووووز

Soooo يقول...

fanan fa2eer

الحمدلله اني قدرت اعيشك في الجو بتاع القصه
بس على فكره .. القصه لسه ماخلصتش
وفعلا هي كانت مجرد تلات تيام .. بس باحداث كتير جدا
وصدقيني .. غيرت في حاجات كتير

كل سنه وانتي طيبه


سلاموووووووووز

Soooo يقول...

brokenheart

هاني باشا
منورني والله
والحمدلله انك هتتابع القصه هنا
وان شاء الله تعجبك
وان شاء الله نجوزك قبل ما ارمي بنفسي في التهلكه

كل سنه وانت طيب يا ابو رزق


سلاموووووووووووز

Soooo يقول...

غير معرف
او
cinderella

الحمدلله انك استمتعتي بالكام حلقه دول
بس القصه لسه ماخلصتش
واتمنى انك تتابعيها وتحكمي بنفسك بعدين

وعقبالك ياستي لما ربنا يكرمك بابن الحلال اللي يحبك وتحبيه ويجمع مابينكم في الخير ان شاء الله
وكل سنه وانتي طيبه

سلامووووووووووز

Soooo يقول...

ايوية


شرفتيني يافندم بزيارتك وتعليقك في مدونتي المتواضعه وعلى مواضيعي البسيطه
وارجو انك تعتبري مدونتي هي مدونتك وتشرفيني بتعليقاتك دايما

وعلى فكره .. الاصل في مصر مش في القاهرة ولا اسكندريه ولا بورسعيد
الاصل دايما في بساطة المصري الفلاح او الصعيدي
هو ده المصري
وهي دي بجد بجد مصر

وكل سنه وانتي طيبه


سلامووووووووووووز

Soooo يقول...

عمر بوك ستورز

بالرغم من حبي للقراءه بصفه عامه
لكن باكره مبدأ اقحام اعلانات داخل اي موضوع ولو على سبيل الضحك
وكنت بافكر بجديه اني امسح تعليقك لانه ببساطه خارج اي حاجه في سياق الموضوع اللي انا كاتبه
لكن قلت اسيب تعليقك عشان اوضحلك ان ده بقى طبع المصريين
مابيفكروش في اي حاجه غير مصلحتهم
وعشان تفرح اكتر
احب اقولك اني مش هتابع مدونتك ولا هفكر اني ادخلها ولا هفكر اني اجيب كتاب واحد من طرفكم
لعدم احترامك لشخصي ولمدونتي ولاقحامك باسلوب غريب بتعليق اغرب بدون حتى ماتقول رأيك في المدونه ولا في الموضوع

خلو عندكم دم بقى


سلاموووووووووووووووز

Soooo يقول...

بت خيخة وأى كلام


يوووه يا خيخه
لزومه ايه التكليف ده
عموما هديتك مقبوله .. سيبيها في الصاله وانا هاخش اجبلك باقي الحلقات

كل سنه وانتي طيبه
وسيلي سرد باقي الحلقات حالا ان شاء الله

واتمنى من الله ان تعجبك


سلاموووووووووووز

Soooo يقول...

MKSARAT SAYED SAAD

ابو السيد يابتاع المكسرات والسهره
كل سنه وانت طيب يا باشا
انا عارف اني مقصر في متابعتي لمدونتك بس اوعدك اني ان شاء الله هتابعها وهعلق عندك زي مانت بتنورني دايما بتعليقاتك الجميله دي
وكل سنه انت طيب مره تانيه


سلامووووووووووز

Soooo يقول...

wa7dania

الحمدلله ان الموضوع عجبك
والحمدلله انك متابعه القصه
والحمدلله انك بلدياتي
وربنا يكرمك دنيا واخره يارب

وكل سنه وانتي طيبه


سلاموووووووووووز

Soooo يقول...

ماما شاهي

منوراني والله
علمك علمك علمك
انا الى هذه اللحظه ماكلتش حاجه من لحمة العيد
الحكاية ومافيها اني سافرت بعد الدبح رحت دهب ولما رجعت بعد تلات تيام كان النت مفصول
وعلى ماشغلته تاني والحوارات دي
وان شاء الله هنزل الحلقه التالته حالا
وكل سنه وانتي طيبه


ملحوظه
اذا كانت معدة الانسان المصري اللي عايش في القاهرة بتهضم الكبده المستورده والفراخ المجمده والاكل البايظ .. يبقى معدة الصعيدي مثال الرجوله في كل العصور التاريخيه .. مش هتقدر تهضم شوية مخخخازن
!!!!


سلاموووووووووووز

Soooo يقول...

Hannoda

ياستي انك تيجي متأخر احسن من انك ماتيجيش خالص
وربنا يكون في عونك في الظروف اللي اخرتك عن متابعة المدونه
وكل سنه وانتي طيبه

ومنتظر تعليقك


سلاموووووووووز

Soooo يقول...

غير معرف


والله انا لو فاهم اللي بتقوله ده كنت هقول على طول
بس معلش اعذرني
علاقتي بالجريجي زي علاقتي بالياباني
علاقة غير شريفه

بس اتمنى ان الموضوع يكون عجبك

ملحوظه
عقلي الباطن بيقوللي اني وصلت للعالميه وبنافس عمرو دياب وعن قريب هاخد جايزة اوسكار احسن بلوجر


سلاموووووووووووز

Soooo يقول...

shreen

تصدقي وتؤمني بالله
اول مانتي قلتي في موضوع انتي كتبتيه وممكن يعجبني قلت بس تلاقيه عن القطط
والله العظيم ماعرف ليه

والحمدلله ان الموضوع عجبك
وربنا يجعل انقاذك للقطه اللي انقذتيها في ميزان حسناتك يوم القيامه

كل سنه وانتي طيبه

سلاموووووووووووز

Soooo يقول...

Clandestino

اهلا بيك يافندم واهلا بكل اهل تونس واهلا بكل الوطن العربي في مدونتي المتواضعه
واهلا باي شخص من طرف الاخت العزيزة هناء او من طرف اي شخص محترم بيتعامل معايا باحترام واكن له كل احترام وتقدير
والحقيقه انا يشرفني اني انضم ليكم بس اعتقد ظروف شغلي ممكن تعوقني عن المشاركه
لكن اوعدك اني لو قدرت افضى هتلاقيني طابب عليكم زي القضا المستعجل
بس اعمل ايه يعني مش واخد بالي؟؟؟




سلامووووووووووز

مشمش يقول...

جميلة مووووووت
انا مستنية باقي الحلقات علي احر من الجمر

د/اجدع بنوته يقول...

طبيعى الاسكندرانيه والبورسعيديه وكل انحاء مصر اخرهم الكافيار والجمبرى والكابوريا

لكن دول صعايدددددددده .. لازم يبقى فسفورهم بالشكل ده

......................

شوفولى اقرب تربه ادفن فيها

هموت م الضحك ههههههههههههه

....................

مش قد التحطيب .. بتحطبوا ليـــــه

....................

هو انت مش هتترحم م النومه م على ... والله صعبان عليا

تحفههههههههههههههههههههههههه

ههههههههههههههههههههههههههههههههه

زُمُرده يقول...

السلامووووووووعليكم
اااااااااااااه ممكن اموت بالسكته القلبيه منك
بُقي وجعني يارااااجل
مرديتش عليا في الحلقه اللي فاتت
طب هترد هنا
ولا انط للآخر يمكن تفتكرني
كله علق بس اكيد مخلصش الكلام
انا مستنيه تقولنا المهمه الصعيديه دي
غيرت ايه في سوووووووو
واستفاد ايه
لأنها واضح جدا كانت تجربه ممتعه ومؤثره جدا