!!! خطروف .. بمليار دولار

.. وبينما اجلس منتظرا مبلط الرخام في الغرزة التي اتفقنا عليها في السيدة نفيسه وفي قلب الترب ..

حلوه قوي الدخله دي .. (وبينما) .. محسساني اني كنت خلاص على وشك يعني

ام هند .. وبينما اجلس منتظرا مبلط الرخام في الغرزة التي اتفقنا عليها في السيده نفيسه وفي قلب الترب .. جاتني خاطر او خطروف - من الخطرفه - بإني قال ايه .. لي عم في البرازيل ومات .. وسايبلي ثروة تقدر بمليارات الدولارات الاسترليني .. بشرط اني اصرف كل يوم ولمدة شهر .. مبلغ وقدره مائة الف جنيه مصري .. من غير ما اشتري بيهم اي عقار او حاجه تبقى باسمي

!!!!

خطروف خطروف يعني .. وقعدت اقدح زناد فكري .. وزناد شكري .. وزناد فخري

وقدحت كل الزنانيد اللي اعرفهم في حياتي

!!! مية الف جنيه مصري كل يوم ولمدة تلاتين يوم

!!! ومن غير ما اشتري شقه او عربيه او اي حاجه باسمي خالص

هممممم

طب فل .. انا معايا بتاع 30 الف جنيه في البنك .. اجيب بيهم عربية 128 لونها احمر .. واقضيها كل يوم حادثه واصرف عليها من المية الف جنية دول

وبمجرد ما اصلحها اروح خابط بيها في شجره .. تتصلح اخبط بيها في عامود .. تتصلح اخبط بيها في عربية كارو .. ومش هاخبط في ميكروبازات لانهم بيخبطو فيها من غير اي حاجه اصلا

واقضيها لبس وفسح بقى .. يوم في كريزي ووتر .. يوم في دريم لاند .. يوم في ساقية الصاوي .. واتفرج على اي حفله وكل حفله واي حاجه ادفع فيها اي مليم

وبعدين قلت ايه الهطل ده ؟؟

.. عربية 128 ايه وساقية الصاوي ايه

انا اقضيها ايجار عربيات من اللي هي .. أأجرلي عربية لامبرجيني ديابلو .. وعربية بنتلي .. وعربية جاجوار كوبيه .. وعلى فكره .. العربيات دي اغلى من الـ 128 بمراحل يعني .. وسعرها قريب من سعر الدوجان شاهين لو متظبطه ومتركبلها جنوط وسبويلر وقزاز فيميه .. حاجه فيخمه فيخمه يعني

وبدل ما اتفسح في ساقية الصاوي ولا اكل هارديز ولا بتاع .. اشد الرحال على فرنسا كل يوم بطياره خصوصي

اروح اتمشى في الشانزلزيه .. واكل ترمس فرنساوي عالكورنيش بتاع نهر النيل بتاع فرنسا .. واتعشى كباب وكفته فرنساوي في (ابو رامي) اللي في فم الخليج في فرنسا .. اللي عند مستشفى ام الفرنساوين .. اللي زي ام المصريين عندنا .. ماهو كل دولة فيها (ابو رامي) وقدامه مستشفى ام الدولة دي

.. وبعدين قلت لروحي ايه الهطل والهرتله دي .. اتعشى ايه واتفسح ايه

!! ده بدل ما اعمل اللي نفسي حد يعمله

.. اخد حتة ارض وابني عليها مجمع سكني يكون شكله كويس

.. ومش شرط اني اخد الارض شرا لو المفروض اني ما امتلكش عقار

.. أأجرها من صاحبها

وابني عليها مجموعة عمارات دورين بس .. واجيب صحابي واللي بيفهمو واقولهم احنا عايزين نعمل مجتمع سكني لنفسنا

نعمل دار ايتام نضيفه ونعامل الاطفال زي مايكونو ولادنا واخواتنا ... ونختار موظفين كويسين .. ونريحهم في مرتباتهم .. مش زي موظفين الحكومه اللي بيطفشو الايتام من دور الرعاية

نعمل مدرسة كويسه تعلم الاطفال باسلوب بسيط .. من غير كلكعة المناهج التعليمية اللي كلها حشو مالوش لازمه .. وبتعتمد على نظام تحفيظ الطالب كلمتين يخش يقولهم في الامتحان ويطلع ناسي اسمه

نعمل مستشفى كويسه ودكاتره كويسين واجهزة طبية كويسه .. نعالج حالات الناس اللي مش قادره تصرف على العلاج

نعمل مسجد وكنيسه .. ونجيب مشايخ ورهبان يوضحو للناس ان الدين احترام الاخر مهما كانت ديانته ايه

.. نعمل مجتمع نضيف خالي من اي احقاد مبنيه على حب السلطة والفلوس وبيحكمها الطمع والجشع

الحساب يا استاذ عشان انا هسلم وردية

؟؟؟؟؟؟؟

نعم؟؟

القهوجي : الحساب عشان انا هسلم وردية

سوووو : حساب ايه ولا مؤاخذه؟؟

القهوجي : حساب شاي منو فيه وقهوة مانو .. اتنين جنيه ونص يابيه

.. افتكرت اني كنت باحلم او باخطرف

.. وافتكرت اني على غرزة في السيده نفيسه

.. افتكرت اني قاعد في الترب

وسط الميتين

سوووو