الخميس، ٥ ذو القعدة ١٤٢٨ هـ

!! اغطسطس .. الفين وخمسه

طول عمري باكتئب لما بيهل علي شهر اغطسطس .. يمكن عشان ده الشهر اللي اتولدت فيه واللي لما بيجي بافتكر اني كبرت سنه من غير ما احس بقيمة حاجه عملتها ولا بتاع
ويمكن برضه لانه من اكثر شهور الصيف سخونه وانا بطبعي تخين وبكرش وباكره اني اروح البحر عشان انزل الميه لاني ساعتها هاقلع هدومي ويبان العار
بس المره دي انا فعليا تأكدت ان شهر اغطسطس مش ماشي معايا ولا ماشي مع هوايا خاااالص
------
يوم الاربع بافتح الجهاز بتاعي عادي خالص عشان اخش عالنت اعمل شوية حاجات لقيت في رساله طالعالي من شركة لينك اللي انا مشترك فيها بتقولي ان علي مبلغ 370 جنيه ونتيجة لعدم دفعي المبلغ ده فصلو الخدمه عني
كان ده رد فعلي لاني بادفع دايما اي فلوس متأخره علي .. قلت لأ بقى
انا هتصل ببتوع خدمة العملا واقولهم عالحوار
اتصلت واتلطعت لمدة تلاته واربعين دقيقه على ماحد فضيلي ولما بقولو كزا كزا كزا .. قاللي هو الواضح عندي ان حضرتك فعلا عليك المبلغ ده والخدمه مفصوله عنك
زي مايكون بسم الله ماشاء الله انصح اخواته
طب مانا عارف ياعم ان الخدمه مفصوله بس عايز اعرف المبلغ ده جه منين؟؟؟
لأ حضرتك تروح للشركه وتستفسر عن الموضوع ده
طبق رد الفعل اللي حصل ساعة ماشوفت المبلغ
---------
توكلت على الله واتجهت للشركة وبما اني اعرف واحد صاحبي اسمه هاني امام - اخو انتيمي احمد امام - شغال هناك قلت يبقى ان شاء الله هخلص بدري بدري والحق كام مشوار شغل عندي
دخلت من باب الشركة القزاز السيكوريت - والباب ده ليه دور حيوي في القصه - ورحت رايح اخد رقم وانا بهزر مع الشاب اللي بيدي الارقام وبيقولي اي خدمه .. قلتله وانا مبتسم الحقيقه انا جاي اتخانق وعايز رقم اتخانق بيه
رد علي بابتسامه برضه وراح مديني رقم
قعدت مع جملة الناس اللي قاعدين مستني دوري في الخناق .. والغريب ان المفروض يكون في اربع موظفين لخدمة العملاء لكنني لقيت اتنين بس منهم .. ومالقتش هاني صاحبي اللي انا رايح ومعتمد على الله ثم عليه في ان الحوار بتاعي يخلص بسرعه .. ولقيت موظف من الاتنين دول واحد محتاس يا عين امه في مشكله مع واحد ومش بيتكلم مع اي عملا تانين .. وبالتالي الضغط كللو كان على شاب كده شكله صغنطوط في السن .. وعنده بتاع واحد وعشرين سنه ولا اتنين وعشرين سنه .. وشكله كده جاي الشغلانه دي بواسطه .. ولانه ماتبهدلش في حياته ولا نزل الشارع قبل مايتخرج من محهد كومبيوتر .. فتحسو انه بيغرق في شبر ميه مع كل عميل بيكلمه
المهم .. قلت اسلي نفسي واتفرج على التلفزيون في الشاشه الال سي دي المحطوطه واللي كانت عماله تعرض سباق عربيات .. وانا باموت في العربيات اصلا ومستني اتفاقية الجات تتطبق صح عشان اجبلي عربيه نوعها اوعى وشك موديل الفحت الفحت الفحت .. لكن شكل الاتفاقيه دي ولا هتتطبق ولا هتتنيل طول ماحنا في العصر المبارك اللي احنا فيه
اخيرا جه الدور علي بعد اربع ساعات قعدة وفرجه عالعربيات والمواتير لدرجة اني بقيت ميكانيكي درجة اولى
رحت للاخ اللي قلتلكم عليه في الاول واللي الضغط كللو عليه ياعين امه .. قاللي خير .. قلتله والله في عندي مشكله كزا كزا وده رقم تليفوني
قعدت يخبط شويه عالكيبورد ويكتب في حاجات وسايبني واقف قدامه بتاع نص ساعه مثلا وهو قاعد على كرسي بار ومريح رجليه وانا لاني تخين فرجلي بتشد علي من الوقفه .. مريض بقى
المهم .. قام بعدها وراح للبرنتر اللي جنبه وسحب منها ورقه كان بيطبعها .. ورجعلي ولقيته بيبص في الورقه وبيقولي لا حضرتك المبلغ اللي حضرتك هتدفعه مش تلتميه وسبعين جنيه .. قلت في عقل بالي الحمدلله ظهر الحق وزهق الباطل .. قاللي حضرتك المبلغ بالظبط بالظبط .. ربعميه خمسه واربعين جنيه وتلاتين قرش
رد الفعل ده ملازمني طول اليوم بطريقه غريبه ,, قلتله ازاي بقى الكلام ده .. راح حاطط الورقه قدامي وقالي ركز معايا .. وعايز الكل يركز في الحته اللي جايه
حضرتك في شهر اغطسطس سنة الفين وخمسه مادفعتوش .. اضافة الى اننا كنا عملنا اوفر عشان الناس المشتركه في خدمة النت من سنة الفين واتنين ورخصنالهم ايجار الراوتر وعملنا كده غلط مع حضرتك .. ولما عرفنا انك مشترك في الخدمه من سنة الفين وخمسه شيلنا الاوفر ده من حسابك .. وبالتالي حضرتك لازم تدفع الفرق في الايجار اللي احنا غلطنا وحسبناه لحضرتك .. وفي حضرتك شهر اغطسطس سنة الفين وسبعه وحضرتك مادفعتوش برضه .. وبالتالي يبقى الاجمالي اللي حضرتك لازم تدفعه ربعمية خمسه واربعين جنيه .. وتلاتين قرش
!!! عروستي
!!! لأ بجد عروستي
يعني ايه شهر اغطسطس الفين وخمسه مادفعتوش وانا ساعتها كنت باتعامل مع شركة فيرست اللي انتو مكلفينها انها تحصل الفلوس واللي عمرها في يوم ما اتأخرت علي
؟؟؟؟؟
ويعني ايه شهر في سنة الفين وخمسه ما اتدفعش وانتو نسيتو خالص لمدة سنتين وجاين تتكلمو عنه دلوقتي
؟؟؟؟؟؟
ويعني ايه غلطتو وخصمتو من ايجار الراوتر بتاعي وبتطالبوني اني انا اللي اصلح غلطتكم
؟؟؟؟؟؟؟
وازاي ماحدش اتكلم من بتوع التحصيل لما جيت ودفعت آخر مره وقاللي اني مادفعتش شهر اغطسطس
؟؟؟؟؟؟
لقيته تنح ومش عارف يتكلم يا ضنايا .. رحت سايبه وانا متنرفز وعلى آخري ومتجه على باب الخروج .. مش عشان امشي قد مانا متجه للباب اللي جنب باب خدمة العملاء .. واللي فيه الاداره بتاعة الشركه
وبمجرد ما فتحت باب الشركة القزاز السيكوريت .. ومشيت خطوه في التانيه في التالته سمعت صوت تشششششش
ابص ورايا.. الاقي ضلفه من الباب تحولت لحبيبات تلج
الري أكشن ده انا شكلي هصاحبه وهعملو في كل حياتي بجد
لقيت الموظف اللي اداني الرقم بتاعي في اول الحدوته خالص طالع يجري ورايا وبيقولي لو سمحت يا استاذ اتفضل معايا لحظه .. قلتله وانا على اخري .. وهو انا هجري منك .. انا طالع على المدير ولا المسئول بتاعكم افهم ايه السرقه دي .. قالي خلاص يافندم حضرتك اتفضل معايا جوه وانا هبلغ المسئولين
بيني وبينكم .. انا فرحت قوي انه هيبلغ المسئولين .. لأني من زمان قوي نفسي اتعرف عالاستاذ لينك ذات نفسه واضرب معاه صحوبيه واهو يمكن يقوللي عايزك توضبلي شقتي في مرتفعات جولف اسيوط .. او حتى في دار السلام هايتس .. انشالله حتى لو كانت شقه في السيده زينب جاردنز .. باعتبار اني مهندس ديكور وسمعتي انضف من الاطباق البلاستيك بتاعة الكشري اللي بيجيب فيرس سي بتاع الشوارع
دخلت الاوضه ورحت متصل بهاني صاحبي بس لقيته مابيردش .. رحت متصل باخوه الكبير احمد .. لقيته نايم .. قلتله ابعتلي اخوك في الشركة بتاعة لينك عشان انا كسرتلهم الباب السيكوريت ابو الفين جنيه .. و شكلها كده هبات في الحجز بتهمة ازدراء اديان .. قاللي طب خد اخويا كلمه اهو .. وانا باتكلم مع اخوه لقيت شخص كده هيبه دخل علي الاوضه .. صاحبي بيقوللي انت فين دلوقتي .. قلتله انا في المكتب اللي عالشمال اول ماتدخل من باب الشركة .. قالي اه .. وفي حد معاك ولا انت لوحدك .. قلتله لأ في معايا استاذ .. ورحت باصص للراجل اللي دخل وقلتله معلش بس اسم حضرتك ايه .. قاللي كريم .. كريم سوكا - عايزكم تفتكرو الاسم ده كويس - رحت قايل لصاحبي انا في المكتب ومعايا استاذ كريم .. لقيت صاحبي بيقولي وهو خايف .. استاذ كريم !! كريم سوكا !!! قلتله اه
سكت هنيهة كده وقالي بصوت فيه نبره (لا حول ولا قوة الا بالله .. وانا لله وانا اليه لراجعون) طب يا سوووو .. انا جايلك حالا
مش قلتلكم رد الفعل ده بقى صديقي الصدوق
استاذ كريم زي ما سبق وقلت .. ليه هيبه كده وبيفكرني باحمد زكي في فيلم زوجة رجل مهم .. لقيته راح قاعد ومبتسم .. وكاد ان يخلع ساعته
ولكن الله سلم .. وقاللي وهو مبتسم .. ايه المشكله
قلتله حصل كزا كزا ولقيت الموظف بتاع الفرانت ديسك بيقوللي ان في شهر اغطسطس الفين وخمسه لسه مادفعتوش وبيقوللي ان حصل غلط في خصم ايجار راوتر والمفروض مايتخصمليش ومن الاخر كده انا حاسس اني باتحمل غلطات الاخرين مع اني لما باغلط في شغلي باتحمل نتيجة غلطتي وبادفع كامل المصاريف من جيبي الخاص وما اقولش للعميل اللي انا باعمللو الشغل اني غلطت عشان ابسط حاجه احافظ على شكلي قدامه اني قد كلمتي .. لكن اللي حصل معايا بيؤكدلي بما لا يدع مجال للشك ان في اخطاء كتير بتحصل هنا ومابيتمش محاسبة المخطئين وبيتم تحميل كل ده عالعميل
الراجل قاللي طب ثانيه واحده وقام
انا قلت بس .. هيجبلي بوليس الاداب ويلفوني في ملاية من عندهم ويلفقولي قضية فعل فاضح .. اضافة الى قضية ازدراء الاديان
رحت مكلم صاحبي وشريكي في الشغل .. حسن ناجي وقلتله تعالى عشان شكلي كده هروح في ابو نكله .. فوجدته هب لانقاذي - حلوه قوي كلمة هب دي .. محسساني اني مصاحب اسد مثلا
جالي حسن صاحبي في سرعة البرق وكان ساعتها استاذ كريم بيتكلم معايا والراجل بمنتهى الشياكه والجنتله قاللي يافندم احنا هنشيل المبلغ بتاع شهر اغطسطس الفين وخمسه .. وهنشيل المبلغ بتاع ايجار الراوتر اللي غلطنا فيه .. ومش هيفضل غير شهر اغطسطس الفين وسبعه .. وده لو حضرتك كنت دافعه شوفلنا الايصال .. ولو ماكنتش دافعه فممكن تدفعه دلوقتي ولو حضرتك لقيت الايصال يبقى يتحول المبلغ ده لشهر نوفمبر اللي احنا فيه دلوقتي
صراحه صراحه صراحه .. اذبهليت .. الراجل حل المشكله بعقل وهدوء وكياسه يحسد عليها الحقيقه
وقصاد شياكته في التعامل دي رحت قايللو وانا معاك في كل كلامك تمام .. وهبعت لحضرتك حد ياخد مقاسات الباب السيكوريت اللي اتكسر واركبه في اقرب وقت
لقيته بيقوللي .. باب ايه .. الباب وقع لوحده يافندم وحضرتك ماعملتش حاجه
مش بقوللكم رد الفع ده بقى انتيمي خلاص
-----------
انتهى الموضوع على كده .. وعلى اني اشوف الايصال بتاع شهر اغطسطس الفين وسبعه ولو مالقيتهوش يبقى ادفعه
وده مش مشكله .. مع اني بصيت في السايت بتاع الشركه ولقيت اني بالرغم من اني دافع كل الفواتير في كل الشهور من اول ما اتعاقدت معاهم لغاية دلوقتي .. في علي 60 جنيه .. وانا مش فاهم الستين جنيه دول بتوع ايه
بس شكلها لازملها روحه تانيه لهناك
بس ان شاء الله .. المره دي من غير تكسير حاجه
--------------
شكر خاص
شكر خاص لـ أحمد امام واخوه هاني امام اللي شغال في شركة لينك واللي قاللي انه جايلي لما سمع اني باتكلم مع الاستاذ كريم سوكا
!! شكر خاص لحسن صاحبي وشريكي وعشرة عمري .. واللي هب لنجدتي كما تهب الاسود لأكل الفريسه
شكر خاص جدا جدا جدا جدا لاستاذ كريم سوكا واللي باتمنى انه يقرا الموضوع ده .. ويسلملي على الاستاذ لينك ابن الحاج دي اس ال سلام حار جدا .. ويبوسهولي من هنا ومن هنا .. ويقوللو لو محتاج اي شغل تشطيبات وديكور.. في مهندس اسمه سوووو دماغه مطرقعه
وشكر خاص للسيد رئيس المجلس المحلي واللي ناوي انه يسفلت الشارع بتاعنا بقاله عشر سنين
وشكر خاص للسيد عم سيد البقال اللي بيديني السجاير البوكس بسعر اتنين جنيه ونص مش بتلاته جنيه الا ربع
--------------
سؤال يدور في ذهني .. ليه كل المصايب بتحصل في شهر اغطسطس .. بداية من مولدي .. لغاية الشهر اللي ماتحسبش وبيتم مطالبتي بدفعه .. سواءا في سنة الفين وخمسه .. او الفين وسبعه ؟؟؟
!!! ربنا يستر علي في شهر اغطسطس .. الفين وتمانيه
..: ملحوظه
شهر اغطسطس سنة الفين وسته .. تعرضت لعملية تثبيت في منطقة شق التعبان .. وتم ضربي بسنجة في ايدي عشان عملت فيها عبده بوند ومارضتش ادي اللي بيسبتوني اي حاجه .. وسيلي سرد التفاصيل في موضوع لااااااااحق



سوووو

هناك ٦٦ تعليقًا:

Desert cat يقول...

ههههههههههههههههه
ده انت محظوظ مع شهر اغسطس ده
انا بئه ابقا كدبة ابريل اللى بيقولوا عليها
وقبل عيد ميلادى ب 10 ايام اتسرقت وانا ماشية فى الشارع اهئ اهئ اهئ اعاااااااااااااا ( الاقيش معاك مناديل طب كوم القميص اهو ينفع )
بس كويس ينى استاذ كريم سوكا حل لحضرتك المشكله وحضرتك طلعت من عنده مبسوط لكن ايه كمية حضرتك اللى قالها لك موظف خدمة العملاء دى كلها ...
لكن مش ملاحظ ان سوكا م راكبة على كريم خالص
ولا الناس مش باسميها المهم انه حل المشكلة
سلامى لهانى امام واحمد امام وحازم امام لو اخوهم مش اخوهم يبقا مش تسلمى لى عليه

كاميليا بهاء الدين يقول...

وسلام كبييييييييييييييييير اووووووووووى

من كاميليا لسووووووووووووو اللى خلاها تضحك بصوت من القلب بعد توقف عن الضحك دام ثلاثة اشهر ((تقدر تقول كده تقريبا من شهر اغطسطس بتاعك ده اللى فات)

بجد بوست فى منتهى الروعة,, انا كنت حاسة انك قاعد وبتحكيلى وبتمثل المواقف كمان ادامى.

انت مهندس عظيم فى رسم الضحكة جوا القلب.

تحياتى بالجامد لك

كاميليا

Unknown يقول...

سلالالالالالالالاموز

انا جاية أسجل الحضور و راجعة تانية أصل البوست طويل و عاوز تركيز عشان اعلق تعليق كويس

و عايزة أوضح ان مدونتك عجبتنى و كنت أقصد بغريبة انها غير تقليدية فيها روح حلوة تجذب غير بقية المدونات و حواراتك و اسلوبك بيشدوا بس هو ده قصدى

و انت ازيك عامل أيه ؟

رحــــيـل يقول...

ده انا كنت حاسه انى هاجى احجز بقى وانك هتضرب علقة مووت
طب خير والله ان الموضوع عدى على خير والناس طلعت زوق كده
والباب وقع لوحده
اما بقى لشهر اغسطس فمش لازم ابقى عديه اومال الريموت كنترول بيعمل ايه

اهههه دنيا مكنش حد غلب فعلا لو فى ريموت كنترول

سووووووووو انت دمك خفيف جدا
تحياتى واحلى سلاموووووووووووووووز

إيمان يقول...

أصبح طبيعى ندخل مدونتك
ولا نستطيع ان نملك نفسنا من الضحك ربنا يكرمك ويسعدك زى ما بتسعدنا

بس انت فكرتنى بيوم الثلاثاء لما كنت فى الثانوى تحديدا وكان دايما مصادف ملاقيش ميكروباصات اروح وافضل استنى من الساعة الثانية ظهرا الى الساعة أربعة

كل التحية والحمد لله انها عدت على أخير
بس كان نفسى تتحقق أمنيتك وتشوف الاستاذ لينك

زُمُرده يقول...

السلام عليكم
بوست طويل...آآآه
بس شدني وخفت لتقول كاتبه من غرفة العمليات
الحمدلله عدت على خير بس بلاش تهور
وانسى 60 وبلاش تخرج شهر اغسطس تاني

تعرف لو مكنتش اتصرفت كده زيي ناس كتيييييييييير
كنت هتلاقيهم كل كام شهر يقولولك عليك 400 او 550 او 888 جنيه

مادامت تعرف ناس في الشركه
اتأكد انهم شغالين في اليوم ده مش اجازه
ولاتلقي بنفسك في التهلكه
********
بعد ما خلصت القرآءه قلت
ياترى لو كنت رحت الشركه في اغسطس
ايه اللي كان هيحصل؟؟؟؟؟
الحمدلله

فرنسا هانم يقول...

سوووو يا سوووو
الازاز كسرووووووووه
مسا الطرقعه والكلام المحبش
فرنسا بتمسى على كل اللى انت ذكرتهم
وازود من عندى
سلام للسواق اللى وصلك للشركه
وتحيه للى رجعك تانى
ولكل رجاله المرور
ويعنى احنا بالصلاه على النبى
لا يهمنا لا كريم سوكا
ولا حتى بزوكا
سمعنا يابنى
سلام الضوء الشارد

Coca يقول...

هههههههههههههههههههههه
بوست تحفه والله
اصل انا بردو شركه لينك بس بصراحه لما حصلت نفس المشكله دي معايا
اتكلمت في التليفون وخلصولولي كل حاجه من غير ما اروح الشركه ولا حاجه
بس هبقي استعين بالاستاذ هاني بعد كدا
علشان اللي مالوش ضهر في لينك يمكن يضرب في فاتورته

Dr. Diaa Elnaggar يقول...

العزيز سووووو

ليه وصفت نفسك يا سو في التدوينة، حطمت الصورة اللي في خيالي، اللي ما عرفشي هي ايه بالضبط، المهم تدوينتك دي اديتني أمل أن جايز الأوضاع تتعدل عندنا.

عميق تحياتي من شبيه لك في الجسد والروح أظن أيضا

ضياء

كلبوزة لكن سمباتيك يقول...

انا بضت بيضة بريشت علشان اخلص البوست ده
بوسطين تلاتة كمان و يبقى عندك احلى طبق امليت في البلد

مع سو تتحدى الملل و اوعى تخزق عنيك


نياهاهاي
تحياتي

هناء يقول...

دمك عسل

Soooo يقول...

Sampateek

؟؟؟؟
افندم ؟؟؟
لا مؤاخذه يعني ايه بضتي بيضه بريشت دي حضرتك؟؟؟
دي مدح ولا ذم في الموضوع وفي شخصي؟؟؟
لو هي ذم .. كان سهل جدا ماتقريش الموضوع مادمتي لقيتيه طويل قوي وكان اسهل ليكي تمشي ولا تسيبي تعليق زي ده

ولو هو مدح وحضرتك بتحبي البيض قوي وخصوصا البيض الاومليت
في اسلوب اجمل من كده عشان الواحد يقول ان الموضوع كويس
ولا ايه؟؟؟

Soooo يقول...

Desert cat

حضرتك نورتيني يافندم بتشريفك وبتعليق حضرتك اللي بجد كنت ابتديت افتقده ولو اني انا مقصر في زياراتي لمدونتك .. حضرتك



سلاموووووووز
حضرتك

Soooo يقول...

كاميليا


منوراني والله يا كاميليا ومنورني تعليقك الظريف والجميل ده
وصدقيني والله .. مافيش احسن من اننا نسكن جراحنا وننسى همومنا بالضحك
او بالمخدرات .. بس المخدرات غاليه وشاحه من السوق


سلاموووووووز

Soooo يقول...

عاليا حليم


مستني تعليقك على الموضوع يافندم
وان شاء الله هيكون تعليق كويس
لانه طالع من انسانه ذوقها مرهف وحساسه


انا الحمدلله كويس


سلاموووووز

Soooo يقول...

ra7eel


خصيمك النبي ياشيخه لو عرفتي تجيبي الريموت كونترول تبقي تديهوني لفه كده عشان محتاج اعمل شوية حاجات في حياتي


ونورتيني ياستي وربنا مايحرمني من تعليقك عندي في مدونتي


سلامووووووووز

Unknown يقول...

ههههههههههاهاى
ازيك يا راجل يا عجوز
والله انا متابعه مدونتك من زمان من ايام ما كانت بتناديك بس كنت بتحرج اسيب تعليق عندك
سيبك انت
كسر ياعم ازاز ولا يهمك
على فكره انا كمان من مواليد شهر اغسطس واضح انه شهر مبارك
ههههههه
ولا بلاش مبارك دى
يجعل كلامنا خفيف عليهم

منى يقول...

تصدق يا سووو يبدو ان كل واحد بيقابل حاجات غريبه فى شهر ميلاده

بس انت بقى طلعت جامد قوى وعرفت تحلها من غير هانى امام

ولذا
تحياتى الى سووووووووو

Soooo يقول...

إيمان

تصدقي وتؤمني بالله يا ايمان
اني ارسم ابتسامه في وش واحد مخنوق من الدنيا وبلاويها دي عندي والله العظيم بالدنيا ومافيها

وربنا يكرمك ويسعدك ياستي .. وتلاقي ميكروباصات يوم التلات والاربع والخميس .. والجمعه اجازة


سلامووووووز

Soooo يقول...

زُمُرده

انا معاكي فعلا انه بوست طويل زي ما في ناس قالت .. بس اللي مش عاجبه مايقراش ولا يضيع وقته لو حس انه مش كويس

وشكلي كده والله يا زمرده فعلا هنفض للستين جنيه دي بس مؤقتا لغاية ما اروق شوية من حالة الكركبه اللي في حياتي دلوقتي

وان شاء الله قبل ما اروح هناك هبقى اتأكد ان اللي اعرفهم هناك شغالين في اليوم ده

*****
هو انتي مواليد اغطسطس انتي كمان عشان تخافي تروحي الشركه في اليوم ده؟؟؟؟؟


سلاموووووووز

shreen يقول...

سوووو
صديقى العزيز
والله عندك حق ان كل المصايب بتحصل فى شهر اغسطس
كفايه انه الشهر اللى اتولدت انا فيه
ومن يومها اعلن شهرا رسميا للمصايب
صحيح انى اتولدت فى رمضان
وفى ليله القدر
وساعة اذان المغرب

بس
برضه ما خففش من مصيبة
وجودى فى الدنيا فى الشهر ده

وبصراحه
بصراحه يا سوووو
انت تستاهل
ليه دايما تبقى رد فعلك كده

!!!!!@@%^&**$$%%@!!!!

انا باتضايق جدا
لما الاقى الناس بتستعمل الصوت العالى وازعيق علشان تحل مشاكلها

انت مش عارف ان فى مقوله بتقول
صوتك العالى دليل على ضعف موقفك

شفت الموقف اتغير 180 درجه ازاى لما صاحبك جه
واتكلم بهدوء ومنطق
فادك بايه بقى
!!!!!@@%^&**$$%%@!!!!

غير رد الفعل ده شويه
وبعدين قوللى بقى
انت برج العذراء ولا الاسد

علشان نعرف
!!!!!@@%^&**$$%%@!!!!
جايه منين بالضبط

و سلاموووووووووز

Soooo يقول...

فرنسا هانم


يا اهلا بالاتحاد الاوروبي كللو

منوراني والله يا فرنسا
والحمدلله ان الموضوع عجبك
بس ليه كده البلطجه .. وبعدين انتي مش فاهمه لقطه
انا عامل الحوار ده عشان الاستاذ لينك لما يدخل ويلاقيني عامل موضوع باشكر فيه وفي الاستاذ كريم .. يخليني اعمللو شقته اللي في البساتين فيلج .. بعد الامام التونسي سنتر .. عند فرايداي ماركت .. او سوق الجمعه يعني


سلامووووووووز

Soooo يقول...

coca

ليه بقى التفرقه دي؟؟؟؟
ولا اكمنك بنوته يقومو يخلصولك الحوار في التليفون وانا راجل وشنحف يقومو يمشوروني
عموما اهي جات على دماغهم وكسرتلهم باب بالفين جنيه
وسمعت من صاحبي ان اي حاجات زي كده بتتخصم من مرتبات العالم بتوع خدمة العملا

نياهاهاها
وش واحد لونه احمر وديله شوكه وبيضحك ضحكه بصدى صوت .. يكونش ده الشيطان؟؟؟


منوراني وارجو انك تعتبري مدونتي هي مدونتك تمام



سلامووووووووز

Soooo يقول...

د. ضياء النجار


دكتوري العزيز
منورني والله وفعلا المدونه كانت مفتقده طلتك الحلوة دي

وبعدين انا ماوصفتش نفسي ولا حاجه
انا مش تخين ولا بكرش
انا جسمي رياضي جدا
زي مصارعين السومو
سومو تصحو


ملحوظه:

قريت مابين سطوري في الموضوع ده يادكتور
انا فعلا كان قصدي اننا لو اتعاملنا بالحسنى وبالذوق والاقناع .. هنقدر ناخد حقوقنا كامله
الله عليك يا استاذ
دكتور برضه يا جدعان


سلاموووووووز

Soooo يقول...

هناء


يعيشك برشه برشه خيتو دخيل الله كلامك زين والله زين

كوكتيل مغربي على تونسي على خليجي على شامي



سلامووووووز

Soooo يقول...

لماضة


داكتورة المستقبل .. واللي ان شاء الله هتتحول للكتابه الساخره
وانا اهه وانتي اهه

وليه بقى ياستي ماكنتيش بتتكلمي وبتاع .. مش كنتي ريحتيني من الف والروحه والجايه .. اهو كنت ساعتها دخلت على مدونتك وضحكتلي ضحكايتين قبل الضحك مايغلى

وفعلا فعلا .. شهر اغطسطس ده شهر مبارك
مش اغطسطس وبس وحياتك .. ويناير وفقراير .. السنه كلها بتاعته .. والبلد كمان


سلاموووووز

Soooo يقول...

منى


نورتيني ياستي وياريت تعتبري مدونتي هي مدونتك تماااااااااااااام

وربنا يكرمك وتدخلي الجنه ويجمعنا مسلمين ومسلمات في حضرة اشرف الخلق سيدنا محمد عليه الصلاه والسلام



سلامووووووووووز

Soooo يقول...

shreen

على فكره ياشيرين
رد فعلي كان صامت اصلا ومش اكتر من شوية تعبيرات على وشي على شويه حاجات بتضرب في نافوخي من جوه من استغراب ودهشه وكده

وبعدين صاحبي مين ؟؟
اقري الموضوع تاني هتلاقيني انا اللي كنت باتكلم مع الراجل بالعقل والمنطق مش حد تاني

وغير كده كمان انا سبب اندفاعي وغضبي وكده مش لحاجه غير اني لقيت الموظف بتاع خدمة العملا صغير في السن وبيتعامل معايا باسلوب هو ده اللي عندنا ولو مش عاجبك اشتكي .. زي ماهو متبع في الحكومه والوظائف الحكوميه

ملحوظه
لو معنى انك اتولدتي في اغطسطس مصيبه .. يبقى اسمحيلي بقى اقول لأ
انتي بس ناقصك حاجه واحده بس وتبقي فل الفل والله .. انك تضحكي ضحكه من قلبك


سلاموووووووووووووز

truelove يقول...

انتي مشكلتك مع اغسطس انا بقى مشكلتي مع نوفمبر ده كله نكد وقرف ومشاكل والغريبة اني مشفش حد الا لما يقولي كده طب فيها مش عارفة لو عرفت هو فيه عدوى ولا ايه ابقى قولي

غير معرف يقول...

حضرتك بتغلط في اغسطس وبتعلنها كده عادي طيب اسكت وخلي الطابق مستور مش لازم الشوشرة اللي انت عاملها دي انا بردو اتولدت في اغسطس عادي يعني ومازلت صامدة زي ما انت شايف عمري انا اشتكيت ولافضحت الدنيا كده بالرغم كوارث ومصائب عديدة

العيب مش في الشهر يااستاذ العيب فينا احنا اللي مش عارفين نفهمو كويس

تحياتي ياسووووووووووووووووووو

Doba يقول...

وتقولى واقف قدام الراجل تخين وبكرش ومش قادر ورجلك وجعتك

اه يا عجوز
على فكرة انا هفضحك على صفحات الانترنت واسميك كعبول

هههههههههههههههه

بوست زى العسل خليت الناس يقعدو يقولو ايه الهبلة دى بتضحك على ايه

عقبال متدفع ال 60 جنيه ودلفة اللازاز التانية

بالتوفيق
هبة

shahy يقول...

ياخبر ابيض
فقري صحيح

مش ممكن خفة الدم دي خلاص انا هافطس من كتر الضحك

ربنا يسعد ايامك

تحياتي

3ala asm masr يقول...

سووووووووووو
فى الاول انا عايزه اقول حاجه قبل ما اعلق انا عايزه اشكرك اوووووووووووووووى على انك ديما بتزور مدونتى وبتسيب تعليقك وبجد لما بلاقى تعليق ليك على مواضيعى بفرح جدا وبحس ان الموضوع خد شكل تانى

ثانيا بقى احنا ناس مخلصين وميهمناش اى حد ياباشا ولا باب ازاز بالفين ولا بتاع احنا ناس جامده اوى
واى خدمه اختك الصغيره موجوده يعنى نخلص اى حاجه بالصلاه عالنبى
اشجع بس مش اتخانق


تحياتى ليك ولكلامك اللى بجد يطلع الضحكه من القلب

ابن حـجـر الـعـسـقـلانـى يقول...

انت لما وصفت الباشمهندس سوكا ... فكرتنى بسعيد صالح فى مسرحية "العيال كبرت" لما فتح الباب و لقى ركب بنى آدم

ثم حد يروح شق التعبان لوحده ... كنت خد معاك سوكا كان قام بالواجب

و مستنى تدوينة "أحداث التثبيت الجنان .. فى أرض شق التعبان" ..تحياتى

3ala asm masr يقول...

صحيح نسيت اقولك حاجه يا سووووو
انا مش من مواليد شهر اغسطس لكن سبحان الله الشهر ده حصلت فيه كوارث ما يعلم بيها الا الله
وبلاش اقول ايه هى احسن
سلام يا باشا

Unknown يقول...

ياخبر أبيض؟

والله فطست من الضحك

بس بص هو العيب مش في شهر أغسطس أكيد جايز عشان انت حاطط في دماغك انه الشهر ده بالذات لازم يحصلك فيه حاجة مش مظبوطة

انا بقا كنت متوقعة انهم هيدفعوك تمن الباب هيدفعوك

بس كله بقا اتصلح أول ما كريم سوكا دخل

بس مش كان يبقي اسمه حاجة غير سوكا ده؟ عشان يليق علي الهيبة اللي هو فيها؟


والله بجد ضحكت جامد وكنت محتاجة أضحك بجد

تحياتي

سلوى يقول...

يا سووووووووو
الناس طلعت ذوق .. ذوق .. صراحه

الموضوع خلص على 60 جنيه

والباب وقع لوحده .. يعني إنت لا كسرته ولا حاجه

يعني كل الأمور متسهله وموووز

يبقى إيه ؟
شهر أغسطس ده أحلى شهر ... صح

المهم بالتجربه تجد
إن التعامل بالحسنى وبالهدوء بيسهل كتير
بس هدوء مع قوة

يعني إنت كان معك الحق علشان كده كنت بتتكلم من منطق قوى

طولت أنا
المهم
تحياااااتي

كاميليا بهاء الدين يقول...

(((وصدقيني والله .. مافيش احسن من اننا نسكن جراحنا وننسى همومنا بالضحك
او بالمخدرات .. بس المخدرات غاليه وشاحه من السوق)))

ينهاااااار
انت بتحرضنى؟
لأ.. خلينى فى الضحك أحسن ..
أنا مش ناقصة توهان

تحياتى لاجمل سوووو
كاميليا

Rehab Mostafa يقول...

لولا الاستاذ سوكه كنت زمانك دلوقتي الله اعلم بقى بيك بقى :D
على فكره انا لسه حاصلالي مشكله شبيهه بس مش اني عليه فلوس او ادعاء اني عليه فلوس هي حاجه كده عفاريتي خالص برضه النت كان مفصول لمدة اسبوعين لسبب ماحدش عارفه بس الفلوس كنا دافعين شهر 12 كمان اللي لسه ماجاش والراوتر شراء مش ايجار وكله سليم بس احنا كنا بنتعامل مع الشركه تليفونياً وكانوا قارفينا وكانوا عايزين 50 جنيه لو واحد جيه عندنا شاف المشكله ... واللي جيه من حظنا انه زي الاستاذ سوكا ظبط الدنيا من السنترال ومارضيش ياخد ال50 جنيه رغم انها مش ليه ولحسابات الشركه
بس مش الحاج لينك ده الباشمهندس تي اي داتا
يالا ماعلينا :D
أهي حاجات بتحصل كده مالهاش تفسير
ماترميش مشاكلك على اغسطس ده شهر ابن حلال العيب على أخوه الكبير يوليو

MKSARAT - SAYED SAAD يقول...

على فكرة كرشك السبب مش شهر اغسطس
انت عارف يا سووووو انتى بتخلي الواحد بيضحك من قلبة بجد انت جميل
تحياتي الدائمة

غير معرف يقول...

انت جيت علي الجرح بجد لان انا كمان من مواليد شهر 8 واكتر شهر مبحبوش لانة في الصيف وانا بكرة الصيف ولانة فية عيد ميلادي الي بيفكرني برضة اني كبرت ولسة معملتش حاجة وكمان عمر ماحد افتكر عيد ميلادي وانا بقترح اني انا وانت وكل الي متغاظ من شهر 8 اننا نعمل اضراب نطالب فية انهم يشيلوة من السنة علي الاقل السنة تصغر كدة وتعدي بسرعة وتحياتي استاذ سوكا الي كنت فاكرة في الاول انة هيشيل منك فلوس الغرامة دي وهيدفعك تمن الباب يعني هتطلع برضة مديون بس خيب ظني وتحياتي لية بجد
ووحشتنا اوي ياسوو ووحشني مواقفك الي بتموتني من الضحك وبتشد انتباهي اوي وعايزة اقولك حاجة مهمة انت كان لازم تطلع ممثل اكيد السينما هي الي خسرانة

Soooo يقول...

truelove


شاكرين مهللين على تعليقكم الظريف يافندم
وفعلا السنه كلها بقت مشاكل دلوقتي مش اغطسطس ونوفمبر وبس


ملحوظه
وكتاب الله انا راجل


سلاموووووز

Soooo يقول...

أيامنا الحلوة

تصدقي منطق برضه
بس قوليلي .. هو الواحد يفهمه ازاي؟؟؟


الاقيش معاكي التتالوج بتاع اغطسطس؟؟؟



سلامووووووز

Soooo يقول...

Doba


كده برضه يا ام يوسف تتريقي علي وتقولي علي كعبول
طب الاهي وانت جاهي .. اشوف يوسف زيي كده
بهزر طبعا
يارب يكرمه ويوفقه في حياته ويبقى من احسن شباب الدنيا كلها
ومايبقاش زيي

شوفتي انا احسن منك ازاي؟؟؟

ملحوظه
اضحكي يابنتي براحتك قبل الضحك مايغلى ولا يتخصخص


سلاموووووووووووز

Soooo يقول...

shahy


شاااااااااااااااهي
والله العظيم انا بفرح وباشرئب كده لما بتعلقي على موضوع عندي
بس انا عايز افهم حاجه .. هو ليه بيتم ربط خفة الدم بالفقر؟؟؟

يعني يارب هو انا مكتوب علي ابقى فقير في الفلوس .. وفقر في التعامل والضحك

الحمدلله .. جمال عبد الناصر قالها في مؤتمر شعبي بيهدي شعبه زمان
قال .. الفقراء يدخلون الجنه
بس هل افهم من كده اني ماصليش ولا اصومش بقى ولا ايه



سلامووووووووووووز

Soooo يقول...

3ala asm masr


شايلينك لوقت عوزه يا معلمه
ولو عالبق .. اخوكي افنجر بق فيكي يا جمهورية مصر يا مباركه


ياخوفي بقي يوديني ورا الشمس


سلاموووووووووز

Soooo يقول...

ابن حـجـر الـعـسـقـلانـى


منورني يابن حجر والله
بس علمك علمك علمك .. انا لما حصل معايا حوار شق تعبان ماكنتش رايح هناك اول يوم وخلاص .. انا كنت شغال هناك بقالي تسع شهور .. بس لما حصل الحوار ده كنت نازل من المصنع اللي شغال فيه بالليل متأخر .. الساعه تلاته ونص الفجر
وسيلي باقي التفاصيل في فيلم .. شقوني .. في شق التعبان


سلامووووووووز

سهر الليالى يقول...

ايه يا عم سووو بس
ايه اللى انا سامعاه دة
مشكلة ايه دى بس اللى مع شهر أغسطس يا راجل
دة شهر زى الفل والله وانا بموت فيه ومولودة كمان فيه لو عندك مشكلة معاه تعالى وانا هحلهالك ياراجل ما احنا ولاد شهر واحد برضو

هو انت العادى بتاعك انك تموتنا من الضحك كدة حتى لو بتتكلم عادى
:D
بجد ببقى مبسوطة جدا وانا بقرا اى بوست عندك وفضلت ورا البوست دة لانك كنت شوقتنى انى اعرف ايه اللى هيحصل فى الاخر بس الحمد لله انها جت على خير

وبعدين كل من كان له جسم ممتلىء فله قلب طيب
تحياتى يا باشا
وأضحك دايما وضحكنا معاك

Soooo يقول...

fanan fa2eer


ياااااااااه
اخيرا نورتيني
ده انا كنت قربت انساكي والله
بس الحمدلله انك رجعتي وظهرتي تاني
والحمدلله انك ضحكتي .. اضحكي ياشيخه حد واخد منها حاجه


سلامووووووووووز

Soooo يقول...

Salwa


تصدقي ان منطقك عجبني
بجد يعني

وبالنسبه للعقل من غير قوة .. جدودنا مرسي الزناتي والأباصيري في مدرسة المشاغبين قالوها فعلا حكمه
انا المخ وانت العضلات
الغريبه بقى .. اني ساعتها اتعاملت بمنطق تاني خالص
منطق ماتحط راسك حط رجليك


سلاموووووووز

Soooo يقول...

كاميليا


ايه ياستي؟؟
انا حرضتك في حاجه دلوقتي؟؟
وصفتلك انواع المخدرات مثلا؟؟
وصفتلك اماكن بيع المخدرات مثلا؟؟
اديتك ارقام تجار المخدرات مثلا؟؟؟

كل اللي عملته اني نبهتك لنقطه غاية في الاهميه .. اللي هي ان المخدرات غاليه
وبالتاتي .. مش هتفكري تجيبي مخدرات
وبالتاتي برضه .. هتقري مواضيعي .. واللي اتمنى من ربنا انها تعجبك وتعجب كل الناس اللي بيقرولي يارب .. وولو ماضحكتهمش .. كفاية اني حاولت اضحكهم
ولا ايه



سلاموووووووووز

Soooo يقول...

Rehab Mostafa


لا بقى
العيب مش في يوليو
العيب في اغطسطس .. والحاج تي اي داتا

ملحوظه
تقريبا الشركات دي بتعين ناس مش بالواسطه وبيبقو محترمين فعلا زي اللي جالكم ده وزي كريم سوكا
بس ياهل ترى .. الناس دي بتعمر في الشغل ولا على اول حوار يروحو مشينهم



سلامووووووووووز

Soooo يقول...

MKSARAT


لا يابو السيد
علمك علمك علمك
انا زي ماقلت للدكتور ضياء انا جسمي رياضي جدا
بس رياضة مصارعة السومو
سومو تسحو

نورتني يابو السيد
واللحمدلله ان الموضوع عجبك وضحكت



سلامووووووووووز

Soooo يقول...

مشمش يا صاحبي

واحشاني مووووووووز يابنتي
وفعلا انا معاكي في اننا نلغي شهر اغطسطس .. واوعدك اني لما ربنا يكرمني وابقى رئيس جمهورية .. اول قرار اني اشيل اغطسطس .. عشان افضل شباب قدام شعبي
وما اكبرش
واعمر مليون سنه .. عالعرش





سلامووووووز

Soooo يقول...

سهر الليالى


الحمدلله اني لقيت واسطه تتوسطلي عند الاستاذ اغطسطس .. غير الواسطه بتاعتي في شركة لينك
شكل الحياه هتزهزه معاك ياد ياسوووو .. ولأول مره تستخدم واسطتك في اي حاجه تفيدك


شرفتيني ونروتيني والحمدلله ان الموضوع عجبك وضحكتي
وربنا يقدرني اني اقدر او احاول ارسم بسمه بسيطه على وشوش الناس الغلابه اللي بيدخلو مدونتي المتواضعه




سلاموووووووووووز

Rehab Mostafa يقول...

الناس دي بتخسرهم علشان كده مع اول حوار زي مانت بتقول يبقوا مع السلامه
ياسلام بجد لو كل الناس زي كريم والراجل اللي جالنا ده هنبقى حاجه تانيه والله

Soooo يقول...

Rehab Mostafa


استفغر الله العظيم من كل ذنب عظيم
ياسلام لو .. لو

انتي يابنتي ماتعرفيش ان (لو) دي بتفتح عمل الشيطان؟؟؟

سامحها يارب
سامحوها ياللي فوق
سامحوها ياسياد



سلامووووووووز

Unknown يقول...
أزال المؤلف هذا التعليق.
Unknown يقول...

معلش التعليق اللى فات غلطه مطبعيه لتدهور الاحوال الجويه وشبكة النت المركزيه عندى جارى النقل يا افندم

Hannoda يقول...

قريت البوست ده يمكن من 3 أيام فاتوا و ما سيبتش كومنت

وانا بقرا كنت فكرة اني حاقرا خبر سيء-لاقدر الله- عنك في الآخر.. لكن الحمد لله انها عدت على خير

بس انت ظالم عيد ميلادك و شهر أغسطس و حاتشوف شهر أغسطس اللي جاي

حاتلاقيه عدّى زي النسمة من غير أي مشاكل

بس لو حصل حاجةأنا ماليش دعوة
:)


تحياتي

Esmat يقول...

ربنا يسترها معاك من
كل اغسطس قادم
وغير شهر ميلادك مادام
اغسطس مقفل معاك كده
حد يتولد فى عز الحر برده
دى غلطتك
بس حركة شيك منك عرضك
تركيب الباب الزجاجى
تحياتى لك يا سوووووو

Complicated Simplicity.. يقول...

انا معجبه قوى يا سووو بخفه دمك واسلوبك ,,الواحد لما بيقرا البوستس بتاعتك بيحس انه يعرفك من زمان

الحقيقه ان شركات الدى اس ال دلوقت كلها بتعمل كده.. يعنى انا مثلا كل اخر شهر كده قبل الشهر الجديد بكام يوم الشركه بتفصل الخدمه عنى بدون سبب مع انى عمرى ما اتأخرت فى الدفع و كل ما الاستاذ المحصل الحليوه ابو شعر ناعم ييجى احم بكون جاهزة بالفلوس و مستنيه ورا الباب.. قصدى قاعدة فى الليفنج روم!!! اتاريهم بيعاملونى زى العيال الصغيرين بيرفعوا الخدمه عنى عشان لو فكرت العب بديلى كده ولا كده ومادفعتش يكون عقابى جاهز.

بكرة لما افتح شركه دى اس ال.. ودينى لاقطع عنهم المصروف..قصدى الخدمه

المهم انى ليا تعليق ادبى صغير انت عارف بقى اداب انجليزى والعقد اللى كانوا بيعملوهالنا الدكاتره ايام النقد وذروة الاحداث
الموضوع شيق جدا وانت بارع فى رسم التفاصيل وعجبنى قوى رد الفعل اللى واكل معاك عيش وملح فى القصه بس فى اوقات معينه كان محتاج يتكتب لوحده من غير تعليق زى "ده بقى اخويا وانتيمى" وهكذا.. لانه لوحده بيوصل المعنى ويعمل كده زى الموسيقى التصويريه اللى بنسمعها فى الفيلم فا نعرف ان الحرامى هايدخل من السطوح دلوقت
تانى حاجه القصة نهايتها قضت على كل الحماس اللى انت بنيته اثناء سرد الاحداث طبعا دة مش بايدك عشان انت مش هاتختلق احداث ماحصلتش عشان تعجبنى لكن كان ممكن النهاية تتكتب بشكل مثير شويه يليق بالتنبيهات اللى انت كاتبها زى "خلو بالكوا من الاسم ده" او "ركزوا معايا فى الحتة دى قوى" وهكذا زى ما بيقولوا كدة واعذرنى لانى مش عارفه اعبر عنها باللغه العربيه
بالتفصيل بس فيما معناه ان النهايه لازم تتناسب مع حاله الترقب اللى عند القارىء اللى انت خلقتها من البداية ووظفتها حلو قوى فى الذروه معلش يا سوووو والله غصب عنى انا كنت طبيعيه جدا لحد ما دخلت الكليه دى!!
بس لما تلاقى الدكاتره فى الجامعه بيقولولك "ان حله المحشى المحطوطه على حرف الطربيزه الشمال مش بتوحى بالصراع الداخلى اللى بيختلج فى نفس هاملت وهو بيتفرج على بنت عمه حماته وهى بتطبخ" لازم تتجنن
عموما ده رأيى المتواضع اللى مايأثرش ابداعلى روعه كتاباتك :)
نسرين

Soooo يقول...

لماضة

لأ بقولك ايه ياستي الداكتوره .. انا هلاقيها منك ومن لماضتك ولا من تخريف النت عندك

نصيحه .. اشربي اكسير تفاؤل من اللي عندك .. واعمليه سيديهات وادي الكومبيوتر والنت .. يمكن حالهم يتصلح ويبطلو هسس


سلامووووووز

Soooo يقول...

Esmat

والله يا عصمت او يا قسمت انا فكرت اضرب شهادة ميلاد فعلا من كتر الاكتئاب اللي بيجيلي في اغطسطس .. لكن احترت .. اكتبها بالتاريخ الافرنجي ولا الميلادي
يعني اقول اني مولود في شباط او ايار
انا فكرت في نيسان .. نيسان ساني


ملحوظه مهمه جدا جدا جدا فحت
اني اتحمل نتيجة حاجه غلطتها ده ممكن .. انما اتحمل غلطات الاخرين لا ممكن ابدا
ملحوظه تانيه عالسريع
خصيمك النبي ياشيخه قوليلي انتي اسمك عصمت ولا قسمت عشان انا مكسوف والله ومش عارف اقولك يا مين فيهم

سلاموووووووز

Soooo يقول...

Reena

ياااااااااه
اخيرا قررت انك تكتبي تعليق يا نسرين .. طب والله انا سعيد جدا جدا جدا

بصي يا ستي
لو هنتكلم على خدمة النت او الدي اس ال فدي يبقى نعمللها مدونات كامله ومواضيع كامله .. لان كل واحد مننا اكيد ليه مواقف معاهم ومشاكل وحوارات

ولو هنتكلم على السرد القصصي والحكي والروايه وكده
ماينفعش انك باي حال من الاحوال تقارني موضوع زي اللي انا كاتبه بهاملت او باي عمل قصصي ادبي خالص
انا اجي ايه جنب الناس دي يابنتي
وبعدين انا باقول بشكل ساخر .. ممكن التعبير يخونني ساعات وده شيء وارد مافيهاش كلام .. وممكن ربنا يوفقني في اني اوصل لنقطة الحوار ان الغرض من الحدوته ويوصل للناس .. وممكن الناس تكتفي بانها تقرى وتضحك وبعدها بدقيقه تنسى الحدوته
كل ده ممكن
انا اولا واخيرا مش متخصص ولا روائي ولا قاص .. انا مجرد واحد بيحاول يتعلم الحكي عن طريق اني اتكلم واقول اللي باحس اني عايز اقوله

وبعدين علمك علمك علمك .. حلة المحشي دي ماكانتش في هاملت يابنتي
كانت في ماكبث .. ايوان .. واصلا اصلا اللي كان عاملها الساحره الشريره اللي كلت دماغ ماكبث .. وعملتها عشان لما ماكبث ياكل منها يقوم يطلب ايدها عشان تتجوزه .. وبكده تبقى ضربت عصفورين بصباع محشي واحد
اول عصفور انها هتبقى مرات الملك
تاني عصفور .. انا ساعتها هتقدر تدخل نت بسرعة اتنين ميجا من غير ماتدفع ولا مليم .. مش مرات الملك بقى


سلميلي على انوش وتوتا ومنه وحماده احر سلام

ومستني اني اقرى مواضيعك في البلوج بتاعك واللي انا متأكد انك هتقولي فيه احلى كلام

سلامووووووووز

غير معرف يقول...

soooo
i like ur blog so much wallah : )
u make me laugh in each post
regards : )
Mona