السبت، ١٠ ذو القعدة ١٤٣٢ هـ

.. أشعر بالسعادة حينما

يشعر النَفَر منّا في بعض الأحيان بالخنقة والضيق .. وعندما أشعر بهذا الشعور - باعتباري نَفَر - أفعل شيء من اثنين .. آخد بعضي واروح السينما اشوف فيلمين تلاته ورا بعض .. أو أتذكر حكاية الدكتور عطيه
ولكنني حينما شعرت بالخنقة هذه المرّه .. لم يكن معايا اي فلوس عشان اروح السينما - منها لله عجلة الانتاج المفسيّه - ولم أرغب في تذكر حكاية الدكتور عطيه ؛ كل ما فعلته أنني كتبت في خانة الستيتس أو الحالة على حسابي في الفيس بوك (أشعر بالسعادة حينما ..) , في محاولة مني لكتابة بعض الأشياء التي تجعلني أشعر بالسعاده

ولكن ما أسعدني حقيقة .. أنني وجدت العديد من الأصدقاء قد شاركوني ايضا فيما يُسعدهم , ولأنني صاحب واجب طول عمري .. وأفضالي مغرّقاك - عزيزي القارئ - قررت أن أغرّقك كمان شويه .. وانقل لك بعض ما يُسعدني ويُسعد أصدقائي

.. أشعر بالسعادة حينما

Soo :
الاقي عشرين جنيه في بنطلون قديم في الدولاب

Soo :
أشوف طفل صغير بيضحك بصوت عالي

Soo :
لما نبقى في رمضان .. وابقى في الشارع وقت آدان المغرب .. والاقي ناس ماعرفهمش ولا يعرفوني بيجروا عليّ عشان يدوني كوباية قمر دين وكام تمره

Soo :
أحس ان في ناس بيحبوني لله فـِ لله

Mohamed Gebril :
الاقيك في اسكندريه في لقاء المدونين اللي جاي

Amr Fathi :
حينما أشوفك رايق
;)

Jasmyn Aassy :
أعرف اني مش هاسيب اسكندريه .. ولو هاسيبها يبقى للقاهرة مش لخمستاشر مايو

Soo :
الاقي ناس بتشاركني الحاجات اللي بتسعدها وبتقولها .. بدل ماهم مقضينها لايك في الصمت

Bassant Osama :
حد من صحابي القدام يكلمني ويسأل عليّ

Bassant Osama :
لمّة العيله في فطار رمضان واحنا كل مره بنزيد عن السنه اللي قبلها

Soo :
اروح اصلي في الجامع واشوف طفل صغير لابس جلابيه وطاقيه وجاي مع ابوه .. ويفضل لاخمنا لغاية مانخلص الصلاة ونبقى مخنوقين منه .. وأول مايشوفنا ويلمح في عينينا نظرة الخنقه .. يروح جاري على ابوه وقاعد جنبه وهو مكسوف

Amr Fathi :
حينما تعشمني بالأكل في يوم عند فرحات بتاع الحمام وتنفَضّ .. واروح مع ناس صحابي واغيظك

Jasmyn Aassy :
أروح اصلي التراويح في جامع حاتم .. والاقي الجامع فيه اكتر من عشرة الاف .. وكل الناس سايعه بعض والجو روحاني لأبعد الحدود

Soo :
اشوف قطه نايمه على جنبها وعيالها بيرضعوا منها وهم متطمنين للي حواليهم

Walid El Doghry :
طب تصدق بالله .. والله العظيم شوفت بعيني قطه بترضع من كلب من اربع شهور .. بس ما كانش معايا كاميرا عدله عشان اصور المشهد الرهيب ده

Jasmyn Aassy :
نخرج نتفسح انا وصحابي ونزقطط ونتصور صور معفنه ونبقى شايفينها احلى صور في الحياه

Menno Gadallah :
لما باتمشى في شوارع اسكندريه بالليل .. وياسلام لو في الشتا

Menno Gadallah :
احضر حفلة لعمر خيرت في مكتبة اسكندريه

Reham Abdallah :
لما اخد بوسه من طفل صغير .. او ينام في حضني

Menno Gadallah :
لما اطفي النور وأولّع اباجورة المكتب واحط رجلي عالمكتب واسمع فيروز

Soo :
لما اقوم اعمل نيسكافيه وارجع الاقي كزا كومنت كلهم حلوين

Jasmyn Aassy :
لما اعمل كنافه وانا ما باعرفش اعملها وبتطلع زي الزفت .. وابقى باكلها وانا فرحانه ان في مخلوق كامل متكامل طلع من تحت ايدي حتى لو وحش

Menno Gadallah :
لما باشرب مج النيسكافيه بتاع الصبح

Mostafa Sabry :
لما اكون سبب في ضحكة حد باحبه

Mostafa Sabry :
لما اصلي الفجر في وقته

Soo :
افتكر ايام الرحلات بتاعة زمان وتهيصنا وغُنانا في الاتوبيس .. والتجهيزات اللي قبل الرحله

Menno Gadallah :
لما باكل سمك وجمبري من عند اللول
:P

Soo :
لما باسمع الراديو على إذاعة القرآن الكريم في محل مقفول

Menno Gadallah :
لما اقعد افكر في حل لمشكله وفجأه الاقيلها حل سهل قوي

Sameh Ezzat khater :
أأكل

Jasmyn Aassy :
لما ابطل اكتب عشان احساس غبي اني فقدت مهارة الكتابه .. واكتب بعد كده
الاقيني باكتب حلو .. بشهادة جمهوري

Mostafa Sabry :
لما اعمل طبق فول بالسدء زي اللي عامله دلوقتي واحس بجو مصر في الغربه المنيله
ماتيجي تاكل ؟
:D

Soo :
لما اروح المطار استنى حد من صحابي ولا قرايبي .. والاقي الناس بتستقبل بعض وهي بتضحك وفرحانه برجوع الغايب

Jasmyn Aassy :
لما اقرى الكلام اللي فات ده كله واحس بفرحه رغم قهرتي اني سايبه اسكندريه

Dalia Raafat :
لما ربنا يقدرني واسعد اي انسان .. بالذات اختي ولاء

Soo :
ابقى في فرح حد من صحابي .. و الدي جي يشغل اغنية سوو يا سوو .. والاقي صحابي بيزقوني ويعملو دايره حواليّه عشان ارقص وسطيهم

Soo :
لما الاقي شباب شكلهم يفرح في الفالنتاين شايلين ورد

Soo :
لما الاقي اسره مصريه مكونه من اب و أم ومعاهم ولدين وراكبين فيزبا .. والعيال فرحانه عشان قاعدين عالناحيه اللي فيها الشباك

Jasmyn Aassy :
لما اقرى آخر كومنت لـ سوو واقع في الارض ضحك واحس بغبطه

Soo :
لما الاقي حد صاحبي لاسع بيتصل بي وبيقول لي : جاي طلعة اسكندريه صَدّ رَدّ !؟

Nour Agour :
لما اخواتي الخمسه يتجمعوا عندنا بزوجاتهم وأطفالهم

Niveen Salem :
لما الاقي سوو كاتب عالوول بتاع "كوشي" القط بتاعي : عامل ايه ياقط !!؟

Mohammed Mamdouh :
لما احلق زلبطه لأول مره في حياتي .. وابقى منشكح جدا على عكس ما توقعت

Mana Gumus :
مانسيتش حاجه كده في النص ...؟؟

Soo :
لما افتكر ان صاحبة الكومنت اللي فوقي مباشرة .. هي الوحيده اللي جابتلي هدية عيد ميلادي .. فانوس خشب صغنون عسول قوي .. واحتفلت معايا بعيد ميلادي قبل ما ييجي اصلا

Mohammed Mamdouh :
لما ابقى هاموت من الحر والخنقه .. وادخل اصلي الضهر في جامع فيه تكييف
باحس بسكينه وارتياح نفسي لا يوصف

Batboot Batoot :
لما الاقي تواليت نضيف

Soo :
لما اسمع صوت المسحراتي وهو بينادي على اسمي للسحور في رمضان

Mohammed Mamdouh :
لما امي الله يرحمها تيجيلي في المنام

Soo :
الله يرحمها ويرحم والدتي ويرحم موتانا جميعا يارب

Mohammed Mamdouh :
الله يرحمها

Mostafa Sabry :
الله يرحمها

Soo :
لما الاقي حد مايعرفنيش معرفة شخصيه ولا يعرف امي الله يرحمها .. وبيدعيلها بالرحمه

Menno Gadallah :
الله يرحمها ويرحم والدي ويرحمنا في الايام المفترجه دي

Soo :
لما الاقي واحد بيثق فيّ ويقوللي انه عايز يقوللي سر

Menno Gadallah :
لما نسرين صاحبتي تاخدني في حضنا واحس بأمان ودفى مالهمش حل

Soo :
لما نسرين صاحبتك تاخدي في حضنها انا كمان
:D

Mohammed Mamdouh :
لما بنت اخويا اللي عندها خمس سنين تقولي انا باحبك قوي ياعمو وعايزه اتجوزك

Menno Gadallah :
لما ماما بتتفشخر بيا وسط اخواتها وصاحباتها

Mohammed Mamdouh :
لما الكهربا تكون قاطعه في الايام الحر اللي مايعلم بيها الا ربنا وترجع تاني واسمع صوت المروحه وهي بتلف .. باحس ان روحي رجعتلي تاني

Soo :
لما كنا في ميدان التحرير قبل خلع مبارك ولقيت واحد و واحده شكلهم بيحبوا بعض .. ولقيته نايم بدماغه على رجلها زي مايكون طفل وهو متطمن في وسط الميدان .. مع ان جنبهم اسره كان شكلها سلفي

Soo :
لما كنت باقف مع جيراني في اللجنه الشعبيه قدام بيتنا واهاليهم بتعمللهم سندوتشات ويبعتولهم ترمس شاي .. وانا ارخم عليهم واقولهم انا عايز نيسكافيه بلاك

Soo :
لما لقيت واحد ولا اعرفه ولا يعرفني في الميدان بعد ما مبارك اتخلع .. بياخدني بالحضن واحنا فرحانين

Mohammed Mamdouh :
لما ابويا يضحك بصوت عالي وهو اصلا مابيضحكش كتير

Menno Gadallah :
لما باروح البلد عند اهل ماما واحس اني في وسط اهلي وشباب ماشاء الله زي الورد في مناسبه حلوه

Mohammed Mamdouh :
لما ابقى انا وسوو والاستاذه منو بنقول اللي بيسعدنا ويبسطنا لبعض .. واحنا مانعرفش بعض

Soo :
لما اجيب برطمان نوتيلا وافتحه وادبّ اول معلقه منه في بؤي

Menno Gadallah :
لما اقف قصاد المرايه واحس اني حلوه

Hesham Diaa :
لما باحس اني قدرت اضحك حد كان متضايق واطلعه من المود

Ahmed Elshafie :
استشعر رضا الله ويكون معايا فلوس كتير عشان ابسط اللي حواليا

Soo :
لما الاقي واحد جديد دخل معانا في لعبة أشعر بالسعادة حينما
:D

Menno Gadallah :
لما باغنّي

Mohammed Mamdouh :
لما بافتكر ان ربنا رزقني بصاحب ما سابنيش وقت الشده وكان لي اكتر من الاخ ونام عالرصيف عشاني وانا باعمل عمليه واخد اجازة اسبوع من شغله عشان يفضل جنبي

Menno Gadallah :
لما احس ان الناس بتحسن من سلوكها في الشارع وبيقفوا طوابير ومابيرموش حاجه عالارض

Adel Ngem :
أعود طفلا

Bassant Osama :
لما اصحى من النوم وأول حاجه اعملها ادور على الستيتس ده عشان اقرى باقي الناس قالوا ايه يفرّحهم

Rasha Orabi :
يا نهار ابيض عالجمال
لما الاقي ستيتس بيتكلم عن السعاده واقرى تعليقات كلها في منتهى البهجه
والاقيني شايفة ابتسامتي من غير ما ابص في المرايه واحس ان الدنيا حلوه بشكل وتستاهل اننا نعافر فيها

Eman Ibrahim :
لما الاقي حد ماعرفوش بييجي يساعدني ولما باديله فلوس مايرضاش ياخدها ابدا

Eman Ibrahim :
لما اقدر اساعد حد غلبان ويدعيلي من قلبه

Eman Ibrahim :
لما اكون نازله الصبح متضايقه والاقي طفل بيضحكلي في العربيه اللي قدامي

Mohammed Mamdouh :
لما اروح فرح والاقي ناس فرحانه من قلبها ومابينمّوش على خلق الله

Soo :
لما بالاقي حد بيقول انه بيحب يدخل على الاكاونت بتاعي عالفيس عشان يقرا حاجه تضحكه

Eman Ibrahim :
لما اقعد مع صحابي ونفتكر الذكريات القديمه ونضحك عليها

Soo :
لما ابقى مسافر مع صحابي وافتكسلهم نوع أكل غريب وياكلوه ويعجبهم .. والاقيهم بيقولولي تاني يوم : هاا .. افتكستلنا ايه النهارده !!؟؟

Soo :
لما باروح مصلحه حكوميه واقدر اضحّك موظف من بتوع فوت علينا بكره ياسيد .. ويخلّصلي الحوار بتاعي عشان ضحكته

Mostafa Sabry :
لما باحجز تذكرة الطياره وتبقى في ايدي .. والاكتر لما باشوف مصر من الطياره
بابقى في قمة قمة قمة قمة السعاده اني خلاص في بلدي

Mohammed Mamdouh :
لما باشوف راجل و ست كبار في السن وماسكين ايد بعض وبيحبوا بعض قوي

Mohammed Mansour :
لما تعملي طبق المكرونه اللي انت أكلتهولي مره فـ الحياه ده .. مش ناوي تكررها ولا ايه ؟؟

Mohamed Metwali :
لما باشوفك .. لما امي ترضى عني .. لما اغمض عيني وافتحها عن يقين والاقي واحد كان تعبان وبقى كويس .. لما احلم اكتب عن حاجه وارسمها في الحلم واصحى الاقي البلد كلها متكلمه عنها
لما احاول اكتب .. واعرف اكتب

Soo :
لما ابقى باعمل فطار في رمضان والاقي ابويا قبل الفطار بنص ساعه مثلا بيقولي : اعمل حسابك فلان هايفطر معانا

Khaled Kamel :
لما تيجي في بالي فكرة اني هاوصل للي عايز اوصله
وهاثبت للي بيراهنوا على فشلي انهم أفشل ناس في الحياه
واني لو ماوصلتش للي انا عايزه .. يبقى هاموت وانا باحاول

Iam AMuslim :
لما تكون في حاجه واقفه قدامي في الشغل وماحدش عارف يعملها .. وفي الاخر اعرف اعملها

Iam AMuslim :
لما اسمع القرآن واكمل معاه .. خاصة لو سورة انا عارفة اني مش حافظاها

Iam AMuslim :
لما اعمل ملوخيه وتطلع مسكره .. اصل الملوخيه دي عليها حركااااااات

Soo :
لما الاقي عشرطاشر حاجه بتسعدنا بجد .. واحنا مش واخدين بالنا
:)
-------


ملحوظه
لقيت ان السعاده عباره عن حاجه بتتنقل بالإيحاء
لو حد سعده الموضوع ده وعايز يسعدني .. يقول اللي بيسعده في كومنت
وبعدها يبعت الموضوع ده لكل اللي يعرفهم .. مش يمكن تقدر تسعدهم !!؟؟



سوووو

هناك ٢٥ تعليقًا:

Ramy يقول...

مش عارف هتصدقنى و لا لأ

بس من الحاجات اللى بتبسطنى

لما ألاقيلك بوست جديد

حتى من قبل ما أقابلك (:

.......................

و كمان لما أروح الشغل و أول ما أفتح ألاقى جست أشترى منى حاجة (:

...............

و كمان لما بكلم بيير أبن أختى

مع انه لسه سنتين ((:

.................

كمان لما بكلم فيليب صحبى لما بكون مضايق (:

..................

ehahe ..soso ..eso iam me :) يقول...

لما اقرى البوست واقول لو بس كنت رديت
لو مكنتش عملت لايك مش ممكن كنت طلعت معاهم ^^
ولما اقرى الاستيت بتاعتك واقول طب بس ماكان يعمل صفحه ولا مدونه واكتشف ان فى فعلا مدونه
اكتر حاجه بتفرحنى بجد لما الاقى حد عمل حاجه نفسه فيها بحس بالتفائل وانى كمان اقدر احقق اللى عايزاه
او لما حد يبقى مكلضم يقولى كلامى ريحنى

يا مراكبي يقول...

جميل

طيب واللي عمل "لايك" يبقى إيه؟

غير معرف يقول...

لما بحلم بحد بحبه أوى وبصحى من نومى ألاقى ابتسامة كبيرة على وشى
بس من غير ما ماما تقولى انتى ليه كنتى بتضحكى وانتى نايمة !

P A S H A يقول...

:)

لما تبقى مش عاوز تشرب آخر سيجارة معاك في العلبة ومخليها لما تطلب معاك قوي ، وتتفاجيء إن فيه سيجارة تانيه !! بتبقى كأنها علبة سجاير لوحدها :)

ياسمين حميد يقول...

لما العصفورة تدق بمنقارها الصبح على شباك مكتبي

لما يكون عندي يوم أجازة في وسط الأسبوع

لما اكون تعبانة من الشغل وابص من الشباك والاقي السماء زرقاء قوي

لما اغني

لما أعمل كباية الشاي الأخضر بالياسمين اللي باحبها

لما ايما الصغيرة (بنت بنت خالتي) تحضنني وتبوسني من غير ما اطلب منها

لما اكون في طيارة، أي طيارة، واشوف من الشباك وهي بتقلع

لما أكون لوحدي

لما يكون حوالي ناس باحبهم وبيحبوني

لما اشوف طفل بيضحك أو بيلعب

لما امشي في شارع متكسر ووسخ والجو حر، وفجأة امر من جنب بيت حواليه شجر وزهور

لما اكون حرانة وعطشانة والاقي بتاع عصير في طريقي واشرب

لما يكون عندي وقت اروح الشغل على رجلي

لما اوصل الشغل الاقيني أول واحدة جات

candy يقول...

بوست مبههههههههج وبسيييييييييييييط
:)
أنا اللى بتفرحنى حاجات كتيييييير قوى قوى قوى ..
أنا الحمد لله على طول مبسوطة :)
بس امبارح فى موقف حصل فرحنى قوى
_
رحت عطارة فى مصر الجديدة مع بابايا ، وبابا قعد يهزر مع الراجل بيقولوا أحنا صعايدة اتوصى
قاله صعايدة منين ؟
قاله المنيا
المهم نهاية الحوار علشان ما زهقكوش طلع الراجل من المنيا !
وعمه ساكن قدام مكان بابايا عمل فيه كوبرى !
فأدالنا كيسين سكر نبات ، وعلبتين بخور ياسمين ولافندر !!!!!!
رغم أنى كنت مشترية حاجات بقد كدة !!!!!
بس كنت حاضنة الحاجات دى كأنها كنز وفرحانة بيها قووووووووووووى
ورغم أنى رجعت المنيا ، بس نفسى أرجع نخصوص أشكر الراجل دا :)))

Emtiaz Zourob يقول...

اشعر بالسعادة حينما اقرأ لك بوست جديد ..

اشعر بالسعادة حينما اجد شخص لا يعرفني ويدعو لامي بالرحمة والمغفرة..

اعجبتني الفكرة كثير

وكلهم للامانة بيسببوا السعادة ..

SAMORA يقول...

لما اخرج من البيت الصبح متنكدة نكد الدنيا ومش عارفة يومى مخبي ايه والاقي بنوتة صغيرة بتمسك هدومى وتقولي انا عايزة واحد زي دا ياااااااااااااه


لما قرأت كل التعليقات اللي قبلي حسيت بفرحة اصحابها بجد

NOUR Kamal يقول...

حتسدق اني حشعر بالسعادة لما تعمل قائمة للأعضاء عشان اضيفك عندي بالقائمة واكون متابعة كل شي جديد..

أنا قرأت هاي التدونية وبجد عجبتني كتير

وقعدت مع اخواتي بالليل للساعة تنتين نتناقش بشو أكتر شي بسعدهم؟؟

كان كل واحد بيحاول يتزكر..

أخويا الزغير قال أنا بشعر بالسعادة لما أقعد مع ستي وأحكيلها قصص عن السيرة

وأخويا التاني قال بشعر بالسعادة لما ياخد علامة حلوة

أنا قلت أشياء كتير
بشعر بالسعادة لما أدخل مدونة جميلة وفيها كلام رائع

بشعر بالسعادة لما أعلم أخويا وأختي لغة انجليزيةوألاقيهم فاهمين وبيجبيبوا علامات حلوة

بشعر بالسعادة لما أروح أجلي الجلي وألاقي أمي بدون ما أطلب منها بتدعيلي بالرضا..

بشعر بالسعادة لما ألاقي في خزانتي ورق قديم ومزكراتي وأقعد أقرءها وأبتسم ع أيام زمان...

بشعر بالسعادة لما أشوف حد بيصلي قدامي..

بشعر بالسعادة لما بشتري حاجة لأختي وبتنبسط عليها وبتشوفها قد الدنيا

بشعر بالسعادة لما أشوف أبويا بضحك

بشعر بالسعادة لما أكون بين أخواتي الولاد وهما مبسوطين وكل واحد بيحكي معي بموضوع معين

بشعر بالسعادة لما يجي واحد من اخواتي يشكيلي همه ويحكيه الي انا دون عن أي حد


بشعر بالسعاده لما أشوف والدتي بتتزكر بأيام وهيا زغيرة

بشعر بالسعادة لما ألاقي بجيبي فلوس ناسياهم من زمان وأنا محتاجة الهم

بشعر بالسعادة لما أشتري شي جديد ويكون الكل عاجبهم جدا وخاطرهم ياخدوه

بشعر بالسعادة بس المحاضرات تخلص وأطير أشوف صحابي ونروح...

كتير شغلات بجد خليتني ابتسم وانا بكتب

احترامي+

غير معرف يقول...

أشعر بالسعادة عندما أعود من العمل و فور فتح الباب أجد إبنتي ذات السنتين تصيح فرحا وتجري لتستقبلني
متتبعة من المغرب

Crystal Lobna يقول...

لما يكون بقالى 3 سنين مش بعمل بلوجينج و ارجع بعد كل السنين دى و الاقى البوست الرائع ده.
يا ترى فاكرنى؟

غير معرف يقول...

يخرب بيت الملل

غير معرف يقول...

ثقافة الهزيمة .. عصابة البقرة الضاحكة‏ 2

فى مارينا مصيف الصفوة السياسية يقول أحد أفراد الأمن بالمنطقة أول فيلا هنا أتبنت كانت لإبراهيم سليمان وزير الأسكان السابق بعدها حدد الناس اللى تسكن المكان، خصوصا أنه أهدى علاء وجمال أبناء الرئيس السابق قصرين على بعد خطوات من فيلته، ثمن الواحد منهم يعدى الـ 40 مليون جنية ( حوالى 7 مليون دولار ) ومسجلين بأسماء هايدى وخديجة زوجاتهم.

و أستطرد: فى لسان الوزراء يسكن إيضا أحمد شفيق رئيس الوزراء السابق وهو عضو فى أتحاد الشاغلين بمارينا، والوحيد من الوزراء السابقين الذى جاء بعد الثورة إلى مارينا، و له فيلا يقدر ثمنها الآن من 15 إلى 20 مليون جنية ( حوالى 3 مليون دولار ) ونفس السعر لفيلا نائب رئيس الجمهورية السابق عمر سليمان .

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us


مصر كلها تتساءل لماذا لم يتم للأن التحقيق مع أحمد شفيق و عمر سليمان بشأن ممتلكاتهم؟

شهووووده يقول...

لما اخد بنت اخويا في حضني

غير معرف يقول...

انا من الحاجات اللى بتسعدنى انى اقرالك
انت تعرف انى ساعات بكون مدايقه ادخل ع المدونة عندك واقعد اقرا ف تدوينات قديمة واكون قارياها اكتر من مرة واقعد اضحك عليها بردو
ROKA

Rosa يقول...

لما بنوتاتي الاتنين يلعبوا سوا :)

entrümpelung wien يقول...

وانا ايضاااااااا

Übersiedlung يقول...

يااااااااارب كلنا نسعد ببلدنا

Kellerräumung Wien يقول...

hahhahahahhza

Privatumzug Wien يقول...

موضوع مميز
بالنسبة لى اشعر بها .. حين يوفقنى الله لشيىء هام كنت اسعى له او يتحقق حلم تمنيته من اعماقى

Unknown يقول...

من الحجات اللي بسطتني اوي انهارده انه اول يوم ليا في التدوين و طلع حظي حلو و قريت الموضوع ده :)

غير معرف يقول...

بتتنقل بالايحاء .
شكرا .
:)

Hausräumung Wien يقول...

تحياتى لكم .. فين الموضوعات الجديدة

Botendienst Wien يقول...

دوماً موفقين ... وبأنتظار الجديد ..