الجمعة، ٢٣ ذو القعدة ١٤٣٢ هـ

عَهد المُشير



حينما رأيت هذه الصورة وجدتني أبتسم واتذكر مقولة "مشكلة الناصريين أنهم كانو ناصريين أكتر من عبدالناصر" , والذي قال لي هذه المقوله .. أراد أن يوضح لي ان المشكله في الاساس هي في التعصب لفصيل معين .. دون النظر لعيوب هذا الفصيل او الحديث عنها لإصلاحها .. مع ان المَثَل بيقول .. يا بخت من بكّاني وبكى عليّ .. ولا ضحكّني وضحّك الناس فيّ

ولكن دعنا من التعصب عزيزي القارئ .. فالتعصب يسهل علاجه لو كان الإعلام مُحايد وعقلاني , وللأسف جهاز الاعلام أراد أن يكون متعصبا لمن يحكم البلاد .. تطبيقا للمَثل الشعبي اللي يتجوز امي اقوله ياعمي ! , ولكن مالايعلمه القائمون على المنظومة الاعلاميه .. ان ماهم فيه ليس تعصباً .. بل تعريصاً , واعذرني عزيزي القارئ على أباحتي .. فوالله الذي لا اله الا هو .. لم أجد لفظا مناسبا مؤدبا يصلح لوصف حالة الجهاز الإعلامي في هذه الفتره

ولكن دعنا - عزيزي القارئ - من التعريص .. و دعنا كذلك من التعصب ؛ فما يجب علينا ان نفعله الآن ان نتذكر ماقد حدث في "عهد المُشير" .. تطبيقا للقول المأثور
إذا كانَ رَبُّ البَيتِ بِالدُفِّ مُولِعاً .. فَشيمَةُ أهلِ البَيتِ كُلِهِمُ الرَقصُ
ولأنني راقص بارع وواخد كورسات في الباليه - وباعرف اعمل سَحبة مايكل والله العظيم - قررت اقول كل الحاجات المؤثرة في حياتي .. في عهد المشير

في عهد المشير .. عملت أول صينية مكرونه باشاميل باستخدام الغاز الطبيعي .. اللي كانوا بدأوا يركبوه من قبل الثورة بحوالي شهر وتوقفوا عن العمل أثناء الثورة والانفلات الامني

في عهد المشير .. شوفت واحد بيبيع إليكتريك شوك عالقهوة .. واللي اعرفه ان الإليكتريك شوك يعتبر سلاح بيمنع بيعه في الاسواق

في عهد المشير .. لقيت سماعين البواب بيعرض عليّ اننا نجيب مسدسين تلاته ونحتفظ بيهم لأيام الأزمات .. والغريب ان سماعين عرَض الحوار على ابويا .. وابويا وافق واستغربني لمّا قلتله لأ

في عهد المشير .. كنت لأول مره باروح استفتاء وانا شايف السعاده في عيون الناس اللي رايحه .. بالرغم من اني اتكفّرت في آخر اليوم

!! في عهد المشير .. اتكفّرت .. دي ماحصلتش ايام مبارك ياجدع

في عهد المشير .. قطعت مع اتنين من أعز اصدقاء الطفوله , واحد منهم صدّق بيان المجلس العسكري اللي قالوا فيه ان سته ابريل بتاخد تمويل من برّه عشان تخرّب البلد - مع اني اعرف ناس من سته أبريل مش لاقيين ياكلوا وبيبرشطوا عليّ عشان اعزمهم عالقهوة ! - وأساسا أساسا مش فاهم ايه لزوم البيان المُعلن .. والحُكم والسُلطه في إيد المجلس العسكري وقادر انه يحولهم للتحقيق من غير بيانات , والصديق التاني اللي قطعت معاه .. كان مصدّق المنظومه الاعلاميه اللي بتعرّص - معذرةً عزيزي القارئ - للسلطه الحاكمه اثناء حوار ماسبيرو

! في عهد المشير .. الزمالك لا أخد دوري ولا كاس , حبّه نكد عالزملكاويه

في عهد المشير .. كنا بعد ما اتخلع مبارك بنتكلم في السياسه بأمان ومن غير خوف .. لكن دلوقتي بنتكلم في ارتفاع سعر السجاير واحنا خايفين

في عهد المشير .. الموبيل النوكيا الـ إن 8 بتاعي .. اتدَشدِشِت شاشته التاتش - الجُملة دي صعبه قوي على بعضها ! - واتصلّح من غير ما ادفع ولا مليم لما مسكت اللي خبطني وكان السبب في دشدشة الموبيل .. وكدت أن أقلع له مَلط لكي يعلم انني بلطجي على قديمُه .. مش بلطجي من بتوع الثورة اللي ظهروا وطلعلهم صوت مؤخراً

في عهد المشير .. اتقبض على ناس اعرفهم لمجرد انهم بيقولوا لأ للظلم .. بينما اللي بيبلطجوا فعلا وبيسرقوا وخاربين المناطق الشعبيه والعشوائيه .. ولا جه ناحيتهم عسكري شطرنج حتى , مع العلم إن مكانة الجيش في المناطق الشعبيه والعشوائيه دي مكانه كبيره .. والناس هناك بيحترموه وهايساعدوه للقضاء على البلطجه بجد

في عهد المشير .. استمريت في الدايت اللي بدأت اعمله قبل عهد المشير

! في عهد المشير .. مش لاقي شغل .. زي ماكنت في عهد ما قبل المشير برضك

في عهد المشير .. سمعت هتاف الجيش والشعب إيد واحده .. ثم تحول الهتاف الى الجيش والمسلم إيد واحده .. في شارع رمسيس اثناء موقعة ماسبيرو

في عهد المشير .. نمت على الرصيف في ميدان التحرير وانا متطمن عشان اللي بيحمي الميدان خليط من الناس وعساكر الجيش

في عهد المشير .. مش عارف انام في بيتنا وانا متطمن .. عشان اللي بيحمي البلد خليط من الناس وعساكر الجيش برضه

في عهد المشير .. لقيت برامج الترفيه بتتحول لبرامج سياسيه وبتستضيف ممثلين ومغنيين بيدلوا بدلوهم فيما لا يعرفوا فيه اي بطيخ .. وكل اللي يعرفوه لفظ فوتوشوب

! في عهد المشير .. ظهر واحد اسمه احمد سبايدر

في عهد المشير .. حبيت واحد اسمه
باسم يوسف

في عهد المشير .. لقيت الاخوان المسلمين عملوا حزب سياسي .. ولقيت توجهاتهم وتصرفاتهم بتقول انهم الحزب الوطني .. فرع التعاملات الإسلاميه

في عهد المشير .. ارتفع سعر البرينجلز عشان سعر صرف الدولار زاد عندنا في مصر .. مع انه بيقل في كل دول العالم

في عهد المشير .. اشتريت عدد سته بوكسر مقاس اكس لارج .. مش كوتونيل والمصحف

!! في عهد المشير .. اتعمل إعلان كوتونيل

في عهد المشير .. سمعت وعرفت ان في ناس بتتكلم في السياسه بتتاخد من بيوتها ومن عالقهاوي بطريقه اسوء من قبل عهد المشير .. لدرجة اني افتكرت فيلم "الكرنك" وبقيت منتظر ظهور
فرج

في عهد المشير .. لقيت ان لو مجموعه عملت مظاهرة عشان تعبّر عن رأيها وكأنها بتقول آه من الوجع .. بيتقال لهم اخرسوا ماتقولوش آه .. عايزين نعرف ننام

في عهد المشير .. عرفت يعني ايه صناعة الديكتاتور .. وعرفت اننا عايشين بالمثل القائل "اللي مالوش كبير .. يشتريله كبير" , وكأننا كشعب .. مش عارفين اننا فعلا كبار

في عهد المشير .. سمعت اعلى نكته في حياتي , اتنين مساطيل واحد منهم بيسأل التاني ايه الفرق بين عهد الله و عهد المشير ؟؟
التاني : عهد الله .. ده يمين بنحلِف بيه
.. الأولاني : وعهد المشير
!! التاني : ده يمين .. في شمال .. في انتظار

ملحوظه

! في عهد المشير .. كتبت التدوينه دي




سوووو

هناك ٢٩ تعليقًا:

Ramy يقول...

استمكالاً للملحوظة

فى عهد المشير ... قريت أنا التدوينة ديا

(:

أحمد البصراتى يقول...

"مع اني اعرف ناس من سته أبريل مش لاقيين ياكلوا وبيبرشطوا عليّ عشان اعزمهم عالقهوة"

أوعى يكون اللى ف بالى يابا الحاج !!!
:D :D :D

البنفسج الحزين يقول...

في عهد المشير ضفت سوووووو كصديق ع الفيس بوك وبقيت باستمتع جدا بالاستاتس بتاعته اللي دايما بتكون لطيفه وفي نفس الوقت ذات مغزي عميق بجد والله من غير مجامله ...

التووو يقول...

وفي عهد المشير ... مابقتش بخرج من البيت وجالي أكتئاب
وفي عهد المشير ... مراتي حامل وفي الشهر التاسع بقالها شهرين ... والواد مش عاوز ينزل !!

قلم رصاص يقول...

وعهد الله انت راجل جدع
:)

مهندس مصري بيحب مصر يقول...

معاك حق يا سوو والله

Carol يقول...

:))
جامدة جدا التدوينة دي :)
رغم بساطة الاسلوب اللي يدخل القلب عدل
كل اللي قولتة حقيقي جدا و ملموس جدا و يحلل أشياء كثير بتحصل

شكرا على تدوينتك

Emtiaz Zourob يقول...

تدوينة في الجووووووون !

Ahmed يقول...

الله عليك كلام يتقل بالدهب

3abdo me7tas يقول...

فى عهد المشير عرفت حقيقة البلد على حق

غير معرف يقول...

تصفيق حاد جداً عشان التدوينة دي.
في عهد المشير..خسرت أصحابي أنا كمان
و لنفس الأسباب بس عددهم كان أكتر من 2 ، وفي عهد المشير برضه اتكفرت..بس كان بتحصل برضه في عهد مبارك.
في عهد المشير ، موبايلي خرب أول يوم عيد و متصلحش
في عهد المشير ترجمت قصيدة شعرية اسمها في البدء قد جاءوا و قلبتها جملة و سبحان الله لقيتها دخلت الويكيبيديا بترجمتي الغلط و اتحطت على صفحة الدستور و 6 أبريل بدون ما حد يكلف نفسه يصلحها !
في عهد المشير عرفت وشوش منافقة كتير قوي.
و في عهد المشير عيطت على البلد دي و قلت ليه مصريين يكرهونا فيها بالعافية

غير معرف يقول...

ثقافة الهزيمة .. عصابة البقرة الضاحكة‏ 3

وأنا تقديري الشخصي لهذه العملية الخاصة بسعاد حسني أنه لم يكن ثمة ما يدعو لأقتحام الغرفة عليها أثناء وجودها مع ممدوح والأكتفاء بمواجهتها بالصور التي حصلنا عليها من عملية الكنترول خاصة وأن الأقتحام تم أثناء ممارسة أوضاع جنسية وكانت سعاد عريانة،

وأذكر أنه في مرحلة من مراحل العملية كانت سعاد وممدوح متغطيين بملاية وكان ذلك من ضمن الأسباب التي دفعت إلى التفكير في الأقتحام أنما هذا لا يمنع من أننا ألتقطنا لهم صور قبل ما يتغطوا بالملاية، وقد كانت هذه العملية الخاصة بسعاد حسني هي أول عملية نلجأ فيها إلى هذا الأسلوب في التجنيد وهو ضبطها متلبسة.

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

www.ouregypt.us

Hany Rizk يقول...
أزال المؤلف هذا التعليق.
Hany Rizk يقول...

حبيب قلبي سوووووو
احمد ربك انك عرفت تكتب التدوينة اصلا ....
بس اكتر حاجة عجبتنى الجملة التالية((في عهد المشير .. لقيت الاخوان المسلمين عملوا حزب سياسي .. ولقيت توجهاتهم وتصرفاتهم بتقول انهم الحزب الوطني .. فرع التعاملات الإسلاميه)) بجد سخسخت على روحى من الضحك وافتكرت حاجات قريتها زمان عن الاخوان ... انهم عاملين زى العالمة بترقص على كل حبل شوية

انامل تتحدث يقول...

فى عهد المشير أول مره أكتب تعليق على تدوينه لحضرتك رغم انى متابعه ةمدونتك من زمان

غير معرف يقول...

احسن تدوينه سياسيه شوفتها

غير معرف يقول...

فى عهد المشير رجعت اقرا لسووو

omnia

غير معرف يقول...

تحفة يا سوو بجد راااااااااااااائع
انا لسه سامعة خبر انك رجعت تكتب تانى ف المدونة كان بجد احلى خبر سمعته من زمان .. وحشتنى جداً بجد طريقتك وكتابتك واسلوبك اللى بموت فيه.. الفترة اللى فاتت كنت هاتجنن واعرف فين اراضيك وسألت طوب الارض ان حد يدلنى عليك واعرف انت بتكتب فين او كداا وملقيتش ابوس ايدك حللى انت بقاا المشكله دى وقولى اما ملقيكش هنا الاقيك فين .. يارب تكون دايما بخير
ROKA

بوبو يقول...

ازيك يا سو.. عامل ايه؟ عمر بيسلم عليك جدا
هو انت عملتلي بلوك على الفيس عندك؟ انا مش لقياك وسط الاصدقاء ، وبعمل بحث على الاكونت بتاعك مش لقياه.. لو عملتلي بلوك احب اعرف الاسباب لو سمحت

بوبو يقول...

ازيك يا سو.. عامل ايه؟ عمر بيسلم عليك جدا
هو انت عملتلي بلوك على الفيس عندك؟ انا مش لقياك وسط الاصدقاء ، وبعمل بحث على الاكونت بتاعك مش لقياه.. لو عملتلي بلوك احب اعرف الاسباب لو سمحت

يسري يقول...

بص يا سو
انا عندى سؤال ملوش دعوة بموضوع التدوينه
بما انك ليك خلفيه سينمائية لا بأس بها

ابحث عن فيلم اجنبى
يدور حول فتاه ليل يحتل جسدها روح و تبدا فى النطق بنصوص مسيحية و تتحدث بلغه لاتينيه و تكتب على الجدران

و الفيلم يتحدث عن بعض النصوص التى انكرتها الكنائس الغربية
تقريبا انجيل برنابا

المطلوب : اسم الفيلم و تاريخ انتاجه

و شكرا لمجهودك
بالمناسبه
التعليق دا اتكتب فى عهد المشير D:

Hany Rizk يقول...

احمد ربك انك لسة عايش فى عهد المشير وربنا يطول فى عمرك برضه فى عهد المشير ويارب تشتغل وتتجوز برضه فى عهد المشير ..... يقطع المشير على عهده على عهد اللى جابوه وسمحولو يبقى له عهد

Übersiedlung يقول...

تعيش وتكتب
ومن حقك تختلف بس مش من حقك تخون اى احد كائنا ما كان

Kellerräumung Wien يقول...

اللهم ولى من يصلح :)

Lagerung يقول...

Allah is with you ... :)

Umzug in die Schweiz يقول...

موفقين .. وعايزيين نشوف الجديد !؟

Hausräumung Wien يقول...

تحياتى لكم .. فين الموضوعات الجديدة

Botendienst Wien يقول...

دوماً موفقين ... وبأنتظار الجديد ..

entrümpelung wien يقول...

شكرا لكم ..)