الاثنين، ١٠ صفر ١٤٣١ هـ

!! توك توك السهرة

.. لما صاحبي - في الحوار ده - طلب مني اكتب أي حاجه للقناة بتاعة المجلة
جه في دماغي على طول برامج زمان .. برامج اخترنا لك و حدث في مثل هذا اليوم و عروستي و سينما الأطفال و داتا داتا كومبيوتر

لكن أكتر برنامج من برامج زمان كان بيستفزني قوي .. هو برنامج تاكسي السهرة
!! يمكن لأن البرنامج كان بيتعرض يوم إتنين .. وساعتها ماكانش في حد بيسهر في وسط الاسبوع

.. وبعدين اسم البرنامج نفسه مستفز .. وكأنك عشان تسهر في أي مكان لازم تركب تاكسي
!! بينما لو هتتشعبط في اتوبيسات او ميكروباصات .. يبقى تتبط وتقعد في بيتكم

.. إضافة على إن نوعية الحاجات اللي بيعرضوها في البرنامج .. كانت حاجات عبيطه
!! ده حتى الفيلم .. كانوا بيعرضوا افلام مقاولات نازله فيديو .. ومافيش حد بيأجرها أساسا

.. ولا المسلسلات اللي كانوا بيعرضوا منها مقتطفات .. يالهوي
!! كانت كلها شبه بعضها .. زي ماهي لغاية دلوقتي

.. ويا عيني عالأغاني اللي كانوا بينفردوا بعرض الكليبات بتاعتها لأول - وآخر - مرّه
!!! اغاني عبيطه ومتصورة في حديقة الأندلس .. الممنوع دخولها للناس
- حاولت ادخلها كذا مرّه زمان مع امي الله يرحمها وخالتي .. لكن منعونا بحجة ان في تصوير -
.. واللي يغيظ اكتر .. ان الكليبات دي كانت من إخراج نفس مخرج البرنامج
!!! المخرج .. شكري ابو عميرة

.. بس .. وعنها وقررت اعمل موضوع عن هاذوها البرنامج الفلته


!! توك توك السهرة
-
مذيعة 1 : أهلا بكم أعزائنا المشاهدين .. وحلقة جديده من برنامج .. توك توك السهرة
-
!! المطربة "جادون" تُغني : توك توك
-
مذيعة 2 : النهارده هنعرف آخر اخبار المطرب "محمود التيسي" .. وهنشوف آخر كليباته
-
!! جادون : توك توك
-
مذيعة 3 : وهنشوف آخر المشاهد اللي اتصورت في أحدث مسلسلات رمضان القادم
-
!! توك توك
-
مذيعة 1 : وهنختتم سهرتنا بفيلم .. أرجوك أعطني هذا الزغروف
-
!! توك توك
-
.. واحد ومراته وعيالهم لابسين فانلات حمالات وحالتهم قحط .. وبيتفرجوا على ماتش لمصر
!! صوت : اللي مش لاقيين اللضى بيشجعوا مصر .. واحنا معاهم
-
!! توك توك
-
المذيعة : أهلا بيكم مشاهدينا .. معانا النهارده المطرب "محمود التيسي" .. ازيك يا تيسي !؟؟
التيسي : الحمدلله تمام .. واحب ارحب بيكي وبكل التكاتك وسواقين التكاتك
المذيعة : تيسي سمعنا انك بعد نجاح آخر البوناتك في احتمال تشتغل سينما .. الكلام ده صح ؟؟
التيسي : هو آه اتعرض علي حوار السيما .. بس ماعرفش استقرا السيماريو .. ولوما الحوار ده كنت على طول افلام
المذيعة : طب ياريت .. عشان الجمهور عايز يشوفك على طول
التيسي : الله كريم
المذيعة : تيسي كلّمنا عن آخر أغانيك المصورة
التيسي : هي غنوة عاتفيه .. كصة حب حصلتلي زمان .. حاجه بتلمس المشاعر الجوّانيه يعني
المذيعة : جميل جدا .. انت اللي مألف كلامها ؟؟
!! التيسي : لأ مشتريها جاهزة .. مشتريها بخمستاشر جنيه والخِتمه الشريفه
المذيعة : ياااه .. كتير قوي يا تيسي
!! التيسي : اصل انا بابعد عن الكلام المبتزز
المذيعة : جميل قوي .. طب مش هنشوف الكليب ولا ايه يا تيسي !!؟
.. التيسي : عيني حالا - يشير للمجاميع اللي بيشربوا سجاير وشاي - يلا يا جدعان هنشتغل

: الراقصات والراقصين يرقصون - رقاصة وبترقص !! - والكورال يغني ويقول
سوو سوو سوو .. الليله نهيصو
ماحنا صُحبتنا حلوة .. وتهيسنا مافيش اخوه
سوو سوو سوو

التيسي : هِس هِس بِس .. امتى بي تحِس
انت عمّال تتخن .. وانا عمّال اخس

الكورال : هو عمّال يخس .. هو عمّال يخس

التيسي : لاع لاع لاع .. اهدى يا واد واسمع
حُبك كلبش في قلبي .. قلبي يا ناس إوجع

الكورال : قلبو يا ناس إوجع .. قلبو يا ناس إوجع
-
.. عيال متشردين واقفين تحت كوبري وبيشدو كوللا .. وبيتفرجوا على ماتش لمصر
!! صوت : اللي بيشدّوا كوللا بيشجعوا مصر .. واحنا معاهم
-
!! توك توك
-
المذيعة : وفي استوديا "الهجاص" بيتصوّر أحدث مسلسل لرمضان الجاي .. بطولة الفنانه "تيتي عندو" .. ازيك يا تيتي ؟؟
تيتي : الحمدلله يا حبيبتشي .. وربنا يجعلها أيام متباركه ويرزقنا الحلال الطيب يارب
المذيعة : إحنا والسامعين يا حاجه , تيتي كلمينا عن المسلسل بتاع السنه دي ؟
تيتي : هو الصراحه بعد ما النقادين قالو ان مسلسل "خدّامه ولكن" اللي عملته السنه اللي فاتت .. هو نفسه مسلسل "غساله ولكن" اللي عملته السنه اللي قبلها , قلت لأ بقى أنا لازم اغير من شخصياتي .. قمت عملت حاجه جديده خالص
المذيعة : بجد .. ايه !!؟
تيتي : مرات بواب ولكن
!!! المذيعة : واااو .. ده تجديد شامل يا تيتي
تيتي : طبعا يا حبيبتشي .. ماهو لازم اثبت للناس اني بقيت ممثله مش رقاصه زي زمان
المذيعة : طب ليه يا تيتي ما بقاش اسم المسلسل "بوابة ولكن" !؟؟
تيتي : عشان ساعتها كنت هاخبط في صديقة عزيزة .. عملت مسلسل بالاسم ده السنه اللي فاتت
المذيعة : الله .. شعور نبيل منك .. فعلا هي دي روح الفن
تيتي : طبعا يا حبيبتشي .. انا فنانه من زمان .. يعني لما كنت بارقص قالو حرام وعيب وكده .. مع ان الرقص مش حرام .. ده عمل .. والعمل عباده
المذيعة : ربنا يكرمك يا حاجه تيتي , ودلوقتي مشاهدينا .. هنشوف مشهد من مسلسل .. مرات بواب ولكن
-
!! توك توك
-
!! مشهد داخلي خارجي .. يعني على بير السلم

تجلس مرات البواب - تيتي عندو- على دِكّة في مدخل عمارة .. ويدخل المهندس "أحمد" وهو أحد سكان العمارة

أحمد : والنبي يام محمد ابقي هاتي الهدوم بتاعتي من عند المكوجي
مرات البواب : لأ .. عيب ياسي أحمد
أحمد : عيب ايه ؟
مرات البواب : احنا صحيح غلابه ومش بنلاقي ناكل .. لكن مانحبش الحرام
أحمد : حرام ايه يا وليّه ؟؟
!!! مرات البواب : لو عايزني يبقى في الحلال
أحمد : حلال ايه يا بنت المجنونة .. وبعدين انتي متجوزه اصلا !!؟؟؟
مرات البواب : وكمان عايز تطلقني من جوزي .. يا خراااااااااااااابي
-
.. مجموعة فتيات في شقة دعارة والبوليس قابض عليهم ومحاوطهم .. وبيتفرجوا على ماتش لمصر
!! صوت : بتوع الهِشك بِشك بيشجعوا مصر .. واحنا معاهم
-
!! توك توك
-
المذيعة : وآخر فقرة من برنامجنا هتكون مع فيلم "أرجوك أعطني هذا الزغروف" .. ابقو معنا
-
!! مشهد ليل نهاري .. يعني وقت الفجر تقريبا

المجرم : انا .. اللي .. قتلت .. ابوك
البطل : انت .. اللي .. قتلت .. ابويا !؟
المجرم : - مندهشا - انت عبيط ياض !!!!؟

.. يستدير البطل ليواجه البطلة ويمسكها من كتفيها
البطل : انا عرفت مين اللي قتل ابويا
البطلة : عرفت مين اللي قتل ابوك !؟؟
المجرم : - مندهشا - هو الفيلم ده كل اللي شغالين فيه عُبط !!!؟؟
-
!! توك توك
-
المذيعة : ومعانا النجم "حسن سوكا" بطل الفيلم .. اهلا بيك
سوكا : اهلا بيكي
المذيعة : كلّمنا عن الفيلم
!! سوكا : هو الفيلم اكشن كوميدي رعب رومانسي .. يعني كل حاجه بعون الله
المذيعة : مافيش خيال علمي !!؟
سوكا : انتي داخله محل فيديو !!؟ , وبعدين مانتي عارفه الخيالي مالوش سوق اليومين دول .. وكمان احنا حاطين شوية رعب .. هي الناس هتنهب يعني !!؟
المذيعة : هل كان في مشاكل في موضوع الأفيش .. خصوصا ان الفيلم بيشهد عودة الممثل الكبير "باراهيم نافاخو" في دور المُجرم ؟
!! سوكا : بالعكس .. ده لما قرا الورق قال انه حابب يشتغل حتى لو ببلاش .. هو لاقي شغل
المذيعة : طب في سؤال بيدور في ذهني وذهن كل المشاهدين .. ايه هو الزغروف ؟؟
!! سوكا : لا بقى .. تعالوا اتفرجوا عالفيلم .. وفي جايزة مالمُنتِج .. زغروف لكل مشاهد
المذيعة : زغروف بحالو .. يا ألف نهار ابيض .. لولولولوللولولولولولويييي
-
اربع أشخاص شبه الزغروف قاعدين فـ غُرزة .. وبيتفرجوا على ماتش لمصر
!! صوت : اللي شبه الزغروف بيشجعوا مصر .. واحنا معاهم
-
!! توك توك
-
المذيعة : وهنا بتنتهي فقرات التوك توك .. ونرجوا أن نكون قد أسعدناكم .. تصبحوا على خير
-
!! توك توك
-
.. مريض في العناية المركزه وقاعد جنبه عالسرير ممرضة و دكتور .. وبيتفرجوا على ماتش لمصر
!!! صوت : اللي هيتشيّعوا في أي لحظه بيشجعوا مصر .. واحنا معاهم

-----
ملحوظه

فكرة وإسم البرنامج .. تم تسجيلهم في الشهر العقاري برضك
!! عشان الحراميه يتعظو شوية ويعرفو ان الله حق
سوووو

هناك ١٩ تعليقًا:

adel يقول...

هههههههههههههه

الزغروف المرة دي للي هيسرقك يعني :):)

لا تمام ياسووو
علي فكرة انا مكنتش بحب تاكسي السهرة دي

كنت مدمن اختارنا لك
وكان نفسي مرة انا اللي اختار

أحمد عبد الحميد يقول...

اللى بيقروا لسوووو بيشجعوا مصر
وإحنا معاهم

غير معرف يقول...

وانا صغير كنت بحب البرنامج دا عشان بيعرض اوقات لقطات من افلام هندي


افلام هندي .. ام العربي
البني ادم كانت عبيط اووي وهو صغير
ويقولك الطفل المصري اذكى طفل في العالم

ايوه ماهو الوحيد اللي في العالم كله بيشد كوله

تسلم وصباح الياسمين

سهر الليالى يقول...

مش البرنامج دة اللى كانت تطلع سيمون وتقولك تى رارارا .. تاكسى
يااااااه على زمان وبرامج زمان بس مكنش عندنا غيرها احنا هنعتريض

بس جامده اوى اعلانات اللى بيشجعو مصر
هههههههه
ممكن بجد يخدو حاجات منها ويعملوها هتبقى جامدة

غير معرف يقول...

ما همّ شالوا تيتي وحطوا توتو
تيتي قالت ماحناش راقصين.

اصلا تيتي وتوتو عندهم نفس اسم العيلة.

بس المهم بعدين توتو ما تشتغلش بوابه عنده.

ضحكني البوست قوي.

Zika يقول...

صوت : بتوع الهِشك بِشك بيشجعوا مصر .. واحنا معاهم

يخرب بيت كده يا جدع
مسخره دي يا سوو
في السوكه

صبرني يارب يقول...

هههههههههههههههههههه

حلوه اوي يا سو

بس والله العظيم انت مش ممكن

ايه الى فكرك بالبرنامج ده
هههههههههههههههههه

ولا الاعلانات بتاعة التشجيع
ههههههههههههههههه

مصطفى عبدربــه يقول...

هههههههههههههههههههههههه

من أجمل التدوينات اللي قريتها في حياتي يا سوو
وفعلا له حق الظابط انه يقولك مشكلتك ان دمك خفيف
:D

البرنامج ده كان ادمان للجيل كله وكنت بنام متأخر عشان اتفرج عليه

وجادون جامدة جداااااااا

ربنا ميحرمكش من خفة دمك يا صاحبي

غير معرف يقول...

انا بصراحه ماوعاش على البرنامج ده ولا عمرى سمعت عنه بس اما قريت البوست حسيت انى كنت بتفرج عليه فعلا تصويرك للاحداث اكتر من رائع والاعلانات جامده اخر حاجه انا مبطلتش ضحك من اول سطر لاخر سطر 00 ربنا يوفقك ويزيد من خفه دمك ويكرمك ويحبب فيك خلقه اكتر واكتر
roka

mostafa rayan يقول...

ياسو يا حبيبي طبيعي طول مانت بتكتب الحاجات الجامده دي هتتسرق مش بس من هواه ومنتديات لاء هتلاقيها في شغل بيتعرض في التلفزيون كمان
تحياتىلك يا سو وللدمغك الجامدد دي

مهندس مصري بيحب مصر يقول...

هههههههههههههههههههههه
كل مرة بتضحكني جداً
انت عبقري يا بني
ربنا يبارك لك

حسبى ربى يقول...

هههههههههههههههههه .... جامدة اوى تيتى دى ......... ومشهد الحلال اللى فى المسلسل الجديد خالص
اجب اقولك انى وبلا فخر ما بتفرجش على التلفزيون خااااااااااالص ما عدا الماتشات طبعا
بس تسلم ايدك بجد بوست رااائع

غير معرف يقول...

ههههههههههههههه
والله خلتنى عايز اقرا كل مواضيعك

دا انت فلته

أحييك بجد ضحكتنى من قلبى

وسلملى عالتوكتوك

أخوك

آسر الشاملى

غير معرف يقول...

شوف دول يا سوووو و هابقى أقول لك أنا مين بعد كدة

http://www.youtube.com/watch?v=ZV2VKXHCFjo&feature=player_embedded

http://www.6rb.com/songs/39560.html

غير معرف يقول...

leh chayel el option delete post

حبات التوت يقول...

هوة انا مش بدخل مدونتك لية كتير

بجد انا ناسية مدونتك خااااالص

بجد بجد بجد بجد بجد انتة تحفة

بجد موتنى من الضحك بجد بفرح وببقى مبسطوطة وانا بقرى مواضيعك
سلام انا هروح اقرى مواضيعك القديمة

بس بعد مااتفرج على الماتش

اللى بيقرو لسوووووو بيشجوا مصر واحنا معاهم

Remas يقول...

سووو

ازيك وعامل ايه

بجد البوست تحفة ويجنن
موتنى من الضحك

عجبنى اوى مسلسل مرات بواب ولكن

هههههههههههههه

والله انت عسول بجد

انا مبسوطة بجد لانى شفتك في اللقاء يوم الجمعة وكنت اتمنى اتكلم معاك اكتر وميرسي لعادل لانه عرفنى بيك ولو انى كنت اعرفك اكيد من المدونة من قبلها بكتير

تحياتى ليك

عاشقة الذكريات يقول...

حلو اوى وجديد

Kellerentrümpelung Wien يقول...

شكراً جزيلاً ع المجهود ... :)