الجمعة، 27 شوال، 1430 هـ

!!! تي شيرك العيد

نتيجة لظروف معيّنة ماعرفتش افطر مع المدونين اللي راحوا الحوار ده .. وقلت اقابلهم عالبورصه بعد الفطار , بعد ما قابلتهم وقعدنا شويه مع بعض .. خطفت رجلي و رحت محل رافين بتاع الهدوم اللي في أول الشواربي .. وده لأن خطوط الموضه بتاعتهم جريئة شويه .. بيفكروني بكونكريت زمان أول ما كان لسه فاتح , وبالرغم من ان رافين فاتح فرع في المعادي في شارع اللاسلكي .. يعني بيني وبينه بتاع عشر دقايق مشي من بيتنا .. لكن مش بالاقي هناك مقاسي .. وشغالين عالأجسام الفرافيري بتاعة شباب اليومين دول
الحمدلله لقيت في فرع الشواربي كام حاجه عجبتني على مقاسي - الاتنين مع بعض وماعرفش ازاي - منهم تي شيرك لونه رمادي .. وفيه شغل سمبوكسات لونها اسود ونازله بديجراديه أو تدريج من فوق لتحت .. يعني السمبوكسات اللي فوق لونها رمادي غامق .. وبتغمّق كل مابتنزل لغاية مايبقى لونها اسود خالص من تحت .. من الناحية الشمال للتي شيرك بقى .. في نقشه زي ما تكون زخرفه هاند ميد .. والنقشه دي معموله بالقطيفه .. عجبتني الحركة الجريئة دي .. قمت سألت بكام لقيته بمية جنية .. أو بمعنى أدق .. بتسعه وتسعين جنيه ونص , وبالرغم من ان كان في تخفيض على كل حاجه معروضه هناك .. لكن التي شيرك ده ماعملوش عليه تخفيض .. ولما سألت ليه يعني .. قاللي البياع اللي واقف ان الخط ده لسه نازل من اسبوع .. وعليه طلب كتير .. والإدارة مش بتعمل تخفيض غير على الحاجات اللي الطلب عليها خفيف شوية , همممم .. بصراحه هو يستاهل .. وكمان افتكرت اني من يومين جبت تي شيرك من محل عندنا في المعادي - كان عامل تخفيض - بتلاتين جنيه .. قمت قلت في عقل بالي .. اعتبر التي شيرك بتاع المعادي مع التي شيرك ده .. الاتنين كل واحد منهم بخمسه وستين جنيه .. يعني معقول .. وجبت التي شيرك , واهو يعتبر تي شيرك العيد
!!! أصل انا مابعرفش ادخل عالعيد غير وانا جايب أي حاجه جديده .. انشالله حتى بوكسر

اقسم بالله العظيم .. يمين أُحاسب عليه يوم القيامة .. لبست التي شيرك ابو مية جنيه ده مرتين .. لأ يا ربي .. تلات مرات عشان الحلفان , مرّه لما قيسته في المحل .. ومرّه لما خرجت وقابلت اخواننا المدونين في الحوار ده .. وآخر مرّه لما رحت احضر حفلة لـ نصير شمّه هو وباقي عازفين بيت العود في قصر الأمير طاز , لما جيت اغسله بعد المرتين دول .. حطيته في طشط فيه ميّه بس .. لأني عارف ان الحاجات الجديدة لازم يتعمل فيها كده عشان الالوان ماتروحش , حطيت التي شيرك وسبته خمس دقايق فقط .. جيت لقيت النقشة اللي عالشمال - اللي مشتري التي شيرك عشانها أصلا - راحت
!!!!!!!!
أتاري ولود الايه .. لازقين فتافيت القطيفة على غرا او مادة لاصقه .. وبمجرد ما اتحطت في الميه مع الاملاح اللي طالعه من جتتي - باعتباري باعرق بمُعدّل عشرة ليتر ميّه بملح في اليوم - اللزق فك .. وباظت النقشة .. وباظ التي شيرك

.. طبعا رحتلهم وانا على آخري بمعنى كلمة على آخري .. بقى يا ولود اللذين تقولوا البتاع عليه طلب
!!!!! ومش عاملين عليه تخفيض .. ولما اغسله بميّه بس من غير أي صابون ولا حاجه الاقيه باظ
أمال لو كنت حطيته في الغسالة الفول أوتوماتيك كان ايه اللي حصل !!!؟
!!!!!! كنت هلاقي ورقة بدالو مكتوب فيها عفوا .. التي شيرك الذي جبته ربما يكون قد باش

كان قدامي حل من اتنين .. اروح اتخانق معاهم وادخل عليهم دخلة بلدي .. أو أدخل دخلة معدّاوي

تعريف الدخلة البلدي : وتنطق "الدخلة" بفتح الدال وليس بضمها .. لأن "الدخلة البلدي" ام دال مضمومة حاجه تانيه خالص .. والمدونة بتاعتي هتعتبر مدونه سكس لو قلت تعريفها
الدخلة البلدي - ام دال مفتوحه - هي أن تدخل على المحل من دول .. ومن غير أي مقدمات تروح زاعق ويا ولود يا ولود يا ولود ويك ويك ويك , وساعتها تبقى عارف انك مش هتاخد حقك و هتاخد على قفاك .. بس أهو أي زيطه ولبش للمحل وخلاص , ويتم اللجوء لهذه الدخلة وهذا الاسلوب في محلات من عيّنة التوحيد والنور .. لطفي و زلط بتوع الجزم .. داندي بتاع زمان قبل ما يعمل لنفسه مصنع وخط انتاج

الدخلة المعدّاوي : سُميت بهذا الاسم نسبة لسلوك معظم شباب المعادي .. وذلك لأنها تتميز بالدهاء والفهلوة المعدّاوية .. حيث تدخل المحل بمنتهى الهدوء راسماً على وجهك ابتسامه هادئة .. وواثقاً من نفسك .. وتقول بصوت معتدل : فين "البرانش مانجر" !!؟ - يعني فين مدير الفرع بس بالجريجي - ولما يجي مدير الفرع تروح بنفس الابتسامه ونفس الهدوء تقول : هو مش المفروض انكم عايزين تعملو اسم "براند" ولا دي شركة عبد الحميد الترزي !!!؟؟
ساعتها المدير هيقول انه بيتكلم مع ابن عضو في مجلس الشعب .. او ابن عضو في شبكة مافيا عالمية - والاتنين واحد تقريبا - ويقولك وهو عنده استعداد ينفذ كل طلباتك .. خير يافندم !!!! , هنا بقى خلاص .. لو قلتله عايز المحل كللو .. هيدوهولك وهو فرحان انه عمل شغلو صح

قمت داخل عالمحل الدخلة المعدّاوي .. وقلت للي واقف لو سمحت فين "البرانش مانجر" !!؟ , قام الواد اتخض واتنفض وقام من مطرحه وقاللي ثانيه واحده .. ومشي من قدامي
!!!!!!!!
لاجل الحق اتخضيت .. قلت يمكن "البرانش مانجر" دي كلمة سِر لتسليم شحنة مخدرات ولا حاجه .. والواد قام ينفذ المطلوب وهيديني البضاعه وهو بيقوللي
!!!!! البرانش الكبير بيسلّم عليك .. وبيقولك فوت عليه في البرانشيشه بتاعته :
هوب لقيت الواد جه .. ووراه واحد شكلو البرانش مانجر بجد .. قمت نفذت الدخلة المعداوية بحذافيرها .. وقلتله كما يقال في التعريف بتاعها فوق .. والغريب انه رد عليّ نفس الرد اللي بيترد بيه في التعريف فوق .. قمت قلتله حصل كزا كزا كزا .. قاللي خلاص يافندم تحت أمرك .. ممكن حضرتك تختار القطعة اللي تعجبك بنفس القيمة
طلعت عالدور اللي فوق بتاع الملابس الرجالي .. ولمحت بطرف عيني اخو البتاع اللي انا جبته
ولقيته نزل عليه تخفيض وبقى بخمسين جنيه .. هنا بقى لقيتني باضرب كف على كف وباقول في
!!!! عقل بالي يالهوي .. في شهر نزل سعره النص .. النص .. من مية جنية لخمسين جنيه
لما سألت البياع قاللي ماهو الموديل ده حصل فيه مشاكل والمُرتجع كان عالي قوي .. وبرضه لنفس السبب بتاع مشكلة حضرتك .. قامت الادارة عملت عليه التخفيض ده
!!!!!
!!!! حمرا .. تي شيرك حمرا شفتها وعجبتني , عشان ما ابقاش قليل ادب
سوووو : يعني ايه المُرتجع عالي .. هو حصل الحوار ده مع حد غيري كتير !!!؟؟
البياع : لغاية دلوقتي اربع تي شيرتس رجعو من عشره اتباعو .. بما فيهم تي شيرت حضرتك
يعني في حوالي سته شيرتاتهم باظت وقالوا لروحهم خلاص بقى مية جنيه وراحت .. و فداك ياحبيبي
- ده لو أم باظ تي شيرت ابنها منها .. او واحده باظ تي شيرت جوزها منها -
ايه ده ؟؟؟
بجد ايه ده ؟؟؟
احنا ليه بنسكت على حقوقنا مع اننا قادرين ناخدها !!؟؟؟
لأ بجد يعني ايه !!!!!؟؟؟؟؟
يعني السته اللي اتدبسوا في الهدوم اللي باظت دي .. مارجّعوهاش ليه .. فيها ايه لو قالوا انه باظ يعني .. ولا هي الفلوس سهلة قوي كده .. دي مية جنيه ياخواننا .. المية جنيه دي اسره كامله بتعيش عليها لمدة اسبوع بحالو .. واحنا بنصرفها في تي شيرت بمنتهى السفه .. نقوم نبقى منتهى منتهى منتهى السفه .. ونقول خلاص بقى .. كويس انها جات على قد كده
!!!!!!!!!!
لأ بقى .. انا مش سفيه .. اه باجيب تي شيرك بمية جنيه - وفي ناس ممكن تكون شايفاهم مبلغ كبير في تي شيرت - وبيطلع عيني و ربنا عالم انا باجيب القرش ازاي .. لكن مش هانضرب على قفايا واقول معلش وكلام المحايله ده
واللي بيطالب بحقه مش بيروح منه .. بدليل انه اهو .. البرانش مانجر - عاجباني قوي الكلمة دي - قاللي اختار اللي يناسب حضرتك بنفس قيمة القطعة المُرتَجعه .. وبقيمتها الأصلي قبل التخفيض كمان
بنسكت ليه بقى على حقوق كتير بتضيع مننا !!!!!؟؟؟؟

ملحوظه

التي شيرك ابو تلاتين جنيه اللي جبته من المحل اللي كان عامل تخفيض .. بانام بيه .. وباخرج بيه .. وتقريبا باستحمى بيه .. واتغسل عشرطاشر مره .. وزي الفل والحمدلله

آه .. كنت بافكر بجديه - والله العظيم - اجيب اتنين تي شيرك من نفس ستايل التي شيرك اللي باظ
!!! تقريبا العرق الصعيدي النبيه اللي جوّايا .. اشتغل

سوووو

هناك 23 تعليقًا:

magi يقول...

انا حصلت معايا الحكايه دى كتير اوى بس بصراحه كنت بتكسف ارجع الحاجه الى باظت لكن كويس انك عرفت ترجعه انا هبقى اعمل الحكايه الى انت عملتها ديه لو حاجه باظت تانى

صوت من مصر يقول...

على راى المثل
قررت البس قمصان واريح الدماغ كلها
ياعم التيشرك ده بتاع الفرافير
وعموما مقاساتى فى محل المعادى صح

ايوشة يقول...

هو الازمة دى كمان فى هدوم الشباب يووووو انا ياما بتحصل معايا بس مش برجع حاجة بدعى على صاحب المحل دعى الحسرة والندامة ^_^
اصل انا عارفة محل الهدوم عندنا فى الصعيد لبط جداااا ومش هتعرف تاخد معاهم حق ولا باطل جاتهم الهم هى دى بقيت هدوم دى بقيت مسخرة

غير معرف يقول...

طيب ليه مجبتش 2 تى شيرت زى اللى باظ صحيح ؟!!!!!!!!!!

فاتيما يقول...

ميت جنيه مش كتير يا سوووو و لا سفه
اصل التشيريكات القطن دى
لو مش من خامة كويسة
بعد غسلتين تلاتة بتحدف على شمال و مينفعشى تتلبس تانى
فالواحد المفروض يدفع فيها و هوه مش مسترخص
الواد ماجد اخويا برضو بيعمل كدا لما بيجيب تشيريكات
بيجيبها غالية و لما بيطلع فيها عيب فى حاجة بيروح يرجعها و مبيسكتش
و الحاجة بتشجعه بصراحة أصلها الاول بتتسرع من تمن الحاجة و تشهق ...و بعدين بيصعب عليها انه يندفع فيها فلوس كتير كدا و فى الآخر ننسك على قفانا فتقوله رجعه و طربق المحل على نافوخهم ؟!!!....
بس ولاد الإيه دول معندهموش ضمير خالص فعلاً و كويس إنك روحت عملت دخلة معدواى
فطست على روحى من الضحك اثناء درس التعبيرات الإصطلاحية دا
يحربيت خفة دمك يا شيخ

عندما تكون ميمى وحاجات كتير مع بعضها كده يقول...

هوالمشكلة ان الناس ممكن تخاف من رد فعل الراجل الى بيبيع خصوصا لومحل مش معروف فمش فارق معاه حاجه او ان المحل يكون اصلا بعيد فالى هو لسه هرجع كل ده بس اصلا نحن البنات لا يوجود امامنا سوى الطريقة المعادية :)

koko يقول...

سوووو
انت مش بتكتب فى اى جريده او مجله .. بجد يابنى انت من ظرفاء مصر

adel يقول...
أزال المؤلف هذا التعليق.
adel يقول...

اكلمك من علي سرير المرض

ايه يابنتي ده :)
زعلت علي التي شيرت كان جامد :):)
بس وربنا ما حستدش ولا قرريت :):)

بس جامد يا سووو في دخالاتك

بدراوى يقول...

جميل يا سووو باشا
قوللى بقى التى شيرك - شيرك و العياذ بالله

اللى ظهرت بيه فى اسكندرية كان من ابو ثلاثين و لا من ابو 100
:-)

hatimitah يقول...

تسلم يا باشا على موضوعك و على رصدك القيم للحركة و نقلك للصورة و كانى فى المحل و كانى أرى التى شيرك بالله وليعاذ بالله ههههههههه،
و نشكرك على موقفك الإيجابى الذى إتخذته و بالتى نقلته للكثيرين الذين بيكبروا دماغهم تكبير دماغ أو كسوف من أنهم حيحطوا نفسهم فى موقف مش حلو
و ثانيا زدنا يا باشا من أعمالك و تضن علينا فنحن فى الإنتظار دوما

Hager Za3bal يقول...

انت من اكتر الناس اللي بيضحكوني في الدنيا دي :))

واكتر اسلوب بحبه اوي وبحس انني بتعلم منه :)

اما بالنسبه للتي شرت بقي
متجبش منهم تاني مدام فقدت مصداقيتهم .. وبعدين مالو ابو 30 جنيه ؟؟ اهو كلو بيطلع في الغسيل :)))))))))

تحياتي

خواطر شابة يقول...

انا مشكلتي اني أوقات بشتري من محل بس لان انكسفت اخرج من غير مشتري حتى لو الحاجة معجبتنيش خصوصا لو البائع بدل مجهود معايا واداني قطعة والتانية بنكسف اخرج من غير مشتري وأوقات والله حصلت مبلبسش اللي اشتريته نهائي لآنه مش عاجبني نقول ايه ربنا يشفي كل مريض

ست البيت يقول...

جامدة يا سوو
وبجد حسيت اني في المحل بجد
عامل زي الواد عكرووت اخويا
بيموت في تمبرلاند ولما اقوله غالي
يقولي هناك بتتعامل معاملة محترمة
ولو في مشكلة بتجيب الG.M الجنرال منجر زي الماسنجر كده
وتبستفه وتاخد ما يقابل فلوسك
بس من {ايي
أنك ممكن تشتري بتمن تي شيرت من دول تي شيرتين من ام 30 وزي الفل وشغال

غير معرف يقول...

يعنى اية تى شيرك؟
متهيألى قصدك تى شيرت مش كدة!

صوت فيروز يقول...

تصدق انا بحترمك كل يوم اكتر من اليوم اللي كان قبله (لا لا مش اغنية حماقي و لا غزل في حضرتك) لكن بجد عجبتني انت عشرة علي عشرة بصراحه

بسمة ثروت يقول...

ههههههههههههههههههههههههههههههههههههههههههههههههههه حلو الكلام اوى و طبيعى هايل

Memo يقول...

صباح الفل يا كبير

البلد كلها بايظة من ناحية الهدوم يعني
انا عايز اربي العيال

كراكيب يقول...

سووووو يا سوووووو
انت فييين يا راااااجل

ده انا ف شهر واحد رجعت سماعتين بايظين وكتاب صفح منه ممسوحة وفلاشة مش شغالة و... و......
خلاص انا بقيت دلوقتي عايزة اجرب واشوف وابص على كل وأي حاجة اجيبها
وحاجات اشتريها من حتت بعيدة وفعلا مش هعرف اروح وارجعها
يووووووووه دي عالم مقرفة

سووووو.. مبروك ع التيشيرك ابو تلاتشين جنيه وابو ميت جنيه وعقبال التيشرك والبلوفر (بالـf مش بالـv) بتاع العيد الكبير
;)

miro el niro kwaniroooo

أميرة يقول...

برافوا عليك يا سو انا بعمل كده زيك وما بسكتش على حقي ابداً في اي حاجة لكن مشكلتي بقى ان اهلي بيعتبروني كده بتاعت مشاكل ودايما يتقالي مفيش فائدة ومش هتاخدي حقك وريحي دماغك وفداكي والكلام ده وبالرغم من اني كل مرة الحمد لله بعرف اجيب حقي لكن لازم اكون سمعت المقدمة دي في الاول

نفسي الناس تفهم ان طول ما احنا سلبيين كده هنفضل ناخد على دماغنا وان فعلا ما ضاع حق وراه مطالب وحتى لو فشلنا نبقى كسبنا شرف المحاولة

م/ الحسيني لزومي يقول...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

SAYED SAAD يقول...

سووووووووو

ازيك يا جميل ليك وحشة والله اخبارك
يارب تكون بخير

اخر سطر تقريبا
(بنسكت ليه بقى على حقوق كتير بتضيع مننا !!!!!؟؟؟؟)

بيت القصيد زي ما بيقولوا جمله بجد لو عملنا بيها كلنا نبقي احسن شعوب الارض



كون بخير صديقى
سيد سعد

entrümpelung wien يقول...

شكرا على الموضوع
entrümpelung
entrümpelung
entrümpelung wien