السبت، ٧ شوال ١٤٣٠ هـ

!! تهييس .. كليب

بعد أن تقرّحت القريحة الشعريه للشعراء عسقول الليل الحزين و نيجرو فلنكات , تخيلت لو عملنا فيديون كليب – بمجرد ما يرجع نيجرو بالسلامه ان شاء الله – وهيكون كليب شعبي شعبي .. على ابوه وعلى امه وعلى كل اللي يعرفوه يعني
-------
المكان .. حارة شعبيه أصلي
الوقت .. نهارا بعد الضهريه بشويه .. وقت راحة الغدا بتاعة الصنايعية كدا

.. يظهر في الحارة طفل صغير متشرد ممسكا بكيس كوللا .. وقاعد عمال يشفط في ام الكيس وينفخ فيه
.. تدخل فتاة رشيقه ولابسه فستان أحمر بترتر وعليها عباية سودا .. حاجه كده خيال علمي
.. تقوم بخلع شبشبها ونازله ضرب في الواد .. والواد قاعد عمال يضحك
!! تستغرب الموزه من ضحك الواد الاهبل
.. يشير الواد على مجموعة فتيات تنافس الفتاه الموزه في المزازه
.. تقف الموزز صفًا واحدًا في مواجهة الفتاة الموزه الأولانيه
.. يخلعو عبايتهم .. وهاتك يارقص وهم بيقولو
سوو سوو سوو
الليله نهيصو
احنا صحبتنا حلوه
وتهييسنا مافيش أخو
وتهييسنا مافيش أخوه
تهييسنا مافيش اخوه

.. يطلع عسقول الليل الحزين من ورشة نجارة .. وهو ممسكا بـ دُف ويقوم بالتطبيل عليه
وينظر بقرف واشمئناط للموزه الأولانيه
بوف بوف بوف
أضرب أنا عـ الدف
وكمان اولّع شمعه
تقوم طافيهالي هوف

هوب هوب هوب
حبيبي إمتى تطُب
أنا باملى ليك الميه
وانت تروح تكُب

يطلع نيجرو فلنكات من المستوصف الخيري اللي على إمّة الحارة .. وهو متعوّر في صباعه ولافف عليه بتاع تلاته كيلو شاش وقطن .. وينظر للموزه برضك وهو مشمئنط جدا
أح .. أح .. أح
جرحك واجعني يَح
أقولك ماتسلّفني
تقوم قايللي بَح

قرش قرش قرش
عامللك انت كرش
الله يرحم زمان
دي حاجات ماتتنكرش

يطلع سوووو أبو شفطورة من الغرزة اللي على أول الحارة .. وهو واضعا سوجاره كولوباطرا في بؤه
!!! وممسكا بماج فيسكافيه فاضي .. وناظرا للموزه بـ شمئنطة أيضا
قطره قطره قطره
وسجايري كولوباطرا
دي غذاء ملكات النحل
بس ملفوفه في بَفره

إيه إيه إيه
انا عايز نيسكافيه
الماج يكون مليان
سعره بنص جنيه

يقف الجميع جنب بعضيهم .. عسقول و نيجرو و سوووو
.. وطقم الموزز - اللي مالهمش لازمه اصلا - شغالين رقص و هَزّ وراهم
والواد ابو كيس كوللا – اللي مالوش لازمه برضك – واقف هو راخر وبيشد الكوللا
هِس هِس بِس
.. امتى بيّ تحِس
.. انت عمّال تتخن
!! وانا عمّال باخِس


يتحرك عسقول ناحية الموزه في محاولة للتحبرش بها
لأ .. لأ .. لأ
كده ماليكش حق
واقف انا عالحرف
تقوم زاققني زق


يتحرك نيجرو ناحيتها لكي يتحبرش بها أيضا
ها .. ها .. ها
باقولك انت يا
انا اصلا كان معايا
وجيوبي منفّخه

سوووو هو كمان رايح يتحبرش
لاع لاع لاع
يا حبيبي اهدى واسمع
حبك كلبش في قلبي
قلبي يا ناس إوجع


يقف عسقول و نيجرو و سوووو في دائرة والبت الموزه وسطيهم ياعين امها
إخ .. إخ .. إخ
بقى من أولها تنِخ
تِدّارى ورا الباب
وتقوم قايل لي بِخ


يَمّ .. يَمّ ..يَمّ
خوّفتني ياعم
بلاش اعملها معاك
مانا برضه عندي دم

تيت تيت تيت
الحلو بتاع تظبيط
وعشان ما يرضى عني
محتاج انا لتخطيط


طقم الموزز يرددون بحراره
تيت تييت تيت تييت تيت تيت
تيييييييييييييييت
تيت تييت تيت تييت تيت تيت
تيييييييييييييييت


يتجه عسقول ويقف جمب الموزه وينظر لها
بُص .. بُص ..بُص
عالحيطه واقف بُرص
أرح بسرعة انا باصص
تقوم ظارفني نُص


يقف نيجرو من الناحية الأخرى بجوار الموزه وينظر لها
هأو .. هأو .. هأو
مهاميزك أرض و جَوّ
بس انا برضه شديد
ما ياكلش معايا ياحلو


يدخل سوووو من خلف الموزه ويمسكها من شعرها وينزل فيها بالبوكسات والبونيّات
بوم بوم بوم
حلّفتك أنا بالأم
اهدى يا واد واسمعني
ده انا برضك واد شيكابوم


يقوم عسقول بظرف الموزه نص فتقع عالارض .. وهاتك يا شلاليت فيها
كُح .. كُح .. كُح
انا شرقان م الصبح
تعمل لي ماج شاي
وتقوم حاططلي ملح


يتجه نيجرو لمساعدة الفتاه وبمجرد أن يخلصها من أيديهم .. ينظر لها مبتسما بشماته
لوك .. لوك .. لوك
ماشي عمّال تزُك
وتقول كلام ع الفاضي
خلّيك عمّال تُعُك

يقف الجميع جمب بعضهم .. عسقول و نيجرو و سوووو
هِس هِس بِس
.. امتى بيّ تحِس
.. انت عمّال تتخن
!! وانا عمّال باخِس

يتجه عسقول ناحية الموزه في محاولة لتهدئة الجو والتظبيط
طار .. طار .. طار
انا عازمك عالفطار
ترزعلك أكله متينه
وادفع زي الحمار


ينظر نيجرو لـ عسقول باستخفاف
تَك .. تَك .. تَك
مش قد كلمتَك
خلاص تقولها ليه !!؟
مش عيب بذمتَك

ينظر عسقول لـ نيجرو وهو متحفز للخناق
طخ .. طخ .. طخ
ده انا كنت فاكرك أخ
تخونّي من ورا ضهري
وتقوم ضاربني طراخ


يمسك نيجرو في هدوم عسقول وخلاص هتبقى عركه
تؤ .. تؤ .. تؤ
انت عيّل بؤ
ولا ليك أيتها لازمه
ومعايا بلاش تهؤ

يدخل سوووو في وسطهم بعد أن يضرب البت بالكوع تقوم واقعه عالارض
إهدو إهدو إهدو
يا عسقول ويا نيجرو
ده احنا صحاب مع بعض
وتهييسنا ده هنفتكرو


يهدأ نيجرو ويمد يده لـ عسقول ليصافحه
سيس سيس سيس
فُل يا عسقل بيس
ده احنا عِشرة عمر
زي الكاكا في كيس

يحتضن عسقول نيجرو ويقول
اشي اشي اشي
ماشي يانيجرو ماشي
احنا صحاب ده حقيقي
وعن بعض مانستغناشي


يبتسم سوووو وهو في وسطيهم ويقول
تاب تاب تاب
و راح نعمل كتاب
هيكون كللو تهييس
وحكاوي عن الصحاب


.. تقف البت – اللي كانت موزه قبل ماتتخرشم – وتجري في اتجاه الحاره وهي تبكي
ينظر لها الجميع وهم يضحكون ويغنون

سيكا سيكا سيكا
حبيبي بتاع مزيكا
يغيب عني يوم
الاقيني بقيت انتيكا


بط .. بط .. بط
من غير لا شيل ولا حط
انت فقعتني مهموز
خلاني اهو اتظبطت


قول قول قول
متّعني ياعسقول
احنا اهو لابدين
وهاجيب انا جبنه وفول

يقف الجميع جمب بعضهم .. عسقول و نيجرو و سوووو
هِس هِس بِس
.. امتى بيّ تحِس
.. انت عمّال تتخن
!! وانا عمّال باخِس

.. انت عمّال تتخن
!! وانا عمّال باخِس

.. انت عمّال تتخن
!! وانا عمّال باخِس

تخفت الموسيقا وينصرف طقم الموزز والواد بتاع الكوللا وخلاص الاغنية المفروض خلصت
.. لكن لأ طبعا

يظهر ابو البت الموزه - ربنا يقوّمها بالسلامه يارب - وخلفه مجموعة من المجرمين والمسجلين خطر
!!! ومعاهم سلاح ابيض ومسدسات ودبابات وطيارتين إف سطاشر .. حرب يعني
.. يقف ابو البت ويبدو عليه الغضب ويقول
مين ضايقك في دول يا نسمه ؟؟؟؟

يختبئ عسقول و نيجرو وراء سوووو
.. يمسك سوووو بـ مايك أفراح - ماعرفش جابه منين - ويتقمّص شخصية نبشطجي النقطه

.. والنقطه اللي جايه دي من عند أبو نسمه
.. أبو نسمه يعني الأمل في غدٍ مشرق
.. أبو نسمه يعني الحياه في ظل رياح الخماسين
.. سمّعني سلام الخماسين
.. سمّعني سلامك الحزين
.. وإديني في القاسي يا ناي
.. إلعب في مشاعري .. إلعب في عواطفي
إلعب وانا رايح .. واحتمال مش جاي
إجري يلاااااااا

يجري الجميع .. عسقول و نيجرو و سوووو

CUT
------------
.. تهييس وإخراج
سوووو أبو شفطورة

هناك ٢٠ تعليقًا:

adel يقول...

وربنا مسخرة

بس كل دي اغنية يا مفتري

قول سينوفكية و اخلص

ودهع مش فيديو كليب
ده فيلم مدة تتجوز النص ساعة

بس مليانت مشاعر و دراما و بداية و حبكة و نهاية منطقية

عاش يا رجالة

Vegie يقول...

يااااه ده كلها اغنيه عشانها ^^

غير معرف يقول...

Awdal__
Unbelievable !!!
Great mood like usual !
With all my appreciation

خالد فوده يقول...

هههههههههههههههه
تهييس تي في

ايه الاغنيه دي
طويله جدا والرقابه مش هتسمح بيها

وكل اللي في الكليب مالهمش لزمه اومال مين اللي ليه
الجمهووور

ربنا يخلي الشباب

كيكى عوووووو يقول...

يااااااه ياجرع!!!
الاغنية دى أثرت فى نفسويتى اوى !!!
انت ظبطت الكلام كدة ازاى!!؟؟
ودة صح مش كليب دة فيلم
سمك لبن تمر هندى

الـسـيـدة نـون يقول...

فسح فسح فسح
انا جيت يا واد ما تفسح
سيبلى انا الليلة
وانت روح اتفسح


لب لب لب
انا عايزة اعمل كليب
المزة مش احسن منى
ده انا بعرف اقزقز لب


قول قول قول
ما تقول حاجة يا عسقول
و وصي عليا سوووو
ده بينا عيش وفول



اجرو اجروا اجروا
وسيبولى انا نيجرو
ده اخويا الصغنن
وهاعرف اشد رجلو


تيت تيت تيت
انا عايزة اعمل عبيط
وعايزة ابعبع فى كلامى
واقول الفاظ تييييييت


هش هش هش
انا سامعة سوووو بيهش
واكمنى يعنى خيخة
سوووو عليا هايطنش


لأ لأ لأ
مش كل شوية تؤ
ده انا عندى مواهب تانية
واقدر اعمل سجؤ


فاية فاية فاية
انا هامشى كدة وكفاية
هاروح اكل شكولاتة
وهاعمل مساج لقفايا

عاشقه الرومانسيه يقول...

هههههههههههههه
حلوه حاله التهيس دى
حتى خيخه اتنقلت لها العدوه
هههههههههههههههههههههه

مهندس مصري بيحب مصر يقول...

لا حول و لا قوة إلا بالله
و ده تهييس طبيعي و لا كيماوي يا سوو
و بعدين بوظت دماغ خيخة و لسعتها أكتر ما هي لاسعة

هههههههههههههههههههههههههههههه

غير معرف يقول...

مش حلوووووووووووووووووو

MKSARAT - SAYED SAAD يقول...

دايما جميل ومجنون في كتابتك علشان كده ليك شكل مختلف جميل
بقالي فترة لا زورتك ولا زرتني
فجيت اسلم واطمن
تقبل مروري
سيد سعد

Sha2loob يقول...

الله يعمر بيتك
أنا قريت البتاع وأنا في الشغل
وبقالي ربع ساعة مش عارف أنا مين وامتى وازاي
وجيبت أعلق خيخة كملت عليا
ذنبي في رقبتك
أنا هروح أستخبى في أي حته لحد أما أفوق قبل المدير ما يقفشني
سلام

حبات التوت يقول...

انا عندى سؤال واحد هوة انتوا لية كنتوا بتضربوا المزة

بجد مش لاقيلخا تفسير

بتضربوا المزة لية حراااااااااام

وانا انادى جمعيات حقوق المزات انهم يرفعوا قضية ضدكم

حرام المزة حرام والله


ههههههههههههه

بجد اغنية تهبل

سيكا سيكا سيكا
حبيبي بتاع مزيكا
يغيب عني يوم
الاقيني بقيت انتيكا

مع تحياتى ويلا

زقطـوطـة يقول...

جامده بس طووووووووووويلةةةةةة
بس واضح إنكم ثلاثي تهييس البلوج سبوت
القادمون بقوة
;)))

ربنا يوفق نسمة :))))

Bravo_fox يقول...

إجري يلاااااااا

والهريبة تلتين المراجل متل ما بيقول المثل.

Unknown يقول...

msh tabi3i elfilm el3`ena2i da :)
to7fa

غير معرف يقول...

ههههههههههههههههههههههههههههههههههههههه

تحفه بجد

ايه المقاطع دي كلها ده هيبقي كليب يجنن


بس لو سمحت بعد اذنك يعني
إيه إيه إيه
انا عايز نيسكافيه
الماج يكون مليان
سعره بنص جنيه

:)))))))))))))))))))))))))))

ابن حـجـر الـعـسـقـلانـى يقول...

مش معقولة يا سوووو .... جامدة جدا جدا .. انت موظف المقاطع و ملائمها مع أحداث الكليب بشكل جااامد

أنا متخيل نفسى قاعد باتنطط على أنغام الأغنية .. و باقول كلماتها و هى طالعة من قلبى

بس الله يخليك بلاش نضرب المزة .. عشان كنت طمعان فيها بعد التصوير الصراحة .. و ياريت تختار لنا مزة حلوة كدة .. فلنكة يعنى و لا مؤاخذة

أنا بقالى كذا يوم عايز أدخل أعلق بس الويندوز ضرب عندى و باصلحة من بتاع تلات ايام .. و فى الشغل ماعرفتش أعلق برضه

سبهللة يقول...

هههههههههههههههههه
هههههههههههه
دة فيلم شعبى
بس خدوا بالكوا من خيخة
شضكلها هاتعمل كليب ينافسكوا

ابن حـجـر الـعـسـقـلانـى يقول...

بص يا سوووو

تصوير الأغنية دة مشعشع فى دماغى من ساعة ما قريت البوست .. ماتيجى ناخد الموضوع بجد و نصوره لما نيجرو ييجى إن شالله حتى بكاميرات موبايل

أنا متخيل البنات المزز دول إنهم مش بنات بحق و حقيقى .. أنا متخيلهم أصحابنا الرجالة بس لابسين بواريك شعر و هدوم حريمى .. و بصراحة نفسى اللى يقوم بهذه الأدوار الصباغ .. و يوسف المصرى و الدوح .. أنا أعتقد إنهم مش هايوافقوا بس أهو نسمع رأيهم .. على العموم لو ماوافقوش ابقى اتصرفلنا فى كام مزة و أهو يبقى مصلحة برضه

بصراحة مش عارف أتوقف عن اتلفكير فى تصوير الأغنية

على العموم لو انت شايف إن تصويرها هايبقى سهل و يمكن تحقيقه ابقى قول لنا .. و ظبط الدنيا فى دماغك

أما لو تصويرها هايعد ضربا من الخيال فيبقى آدينى اسمتعت بيها كأنى باسمع راديو

طب حتى و الله لو ما صورناهاش ممكن نبقى نكتفى إننا نسجلها صوت

Bravo_fox يقول...

ناطرة شوف التهييس .. كليب على اليوتيوب. كأنه ثلاثي اضواء المسرح من جديد.