الاثنين، 2 شوال، 1430 هـ

!!! تهييس العيد

في أبليكشن عالفيس بؤ اسمه ميستيك بوكس .. أو بالبلدي كده .. الصندوق الغامض .. حاجه كده في سكة الهزار , الصندوق ده كل ما تفتحه في يوم يطلعلك حاجه جديده .. يعني نوع من أنواع الهزار والدعوة للتفاؤل
-
البتاع ده من ساعة ما ابتديت اعملو وكل ما افتح الصندوق .. تطلعلي حاجه منيّله بنيله , يعني أول يوم طلعلي فار .. تاني يوم طلعتلي قطه - وكأنهم عرفو غلطتهم وقررو يبعتولي قطه تقفش الفار اللي بعتوه قبل كده - تالت يوم طلعلي تعبان كوبرا
-
اللي غاظني بقى مش التعبان .. ماهو انا خلاص اتعودت وجالي حالة تبلد من اللي بيطلعلي في البوكس .. اللي غاظني اني لقيت عسقول جاي بيكتبلي كومنت وبيقوللي فيه انه طلعلو مجلة بلاي بوي , واللي جابلي شلل رعاش بقى .. ان عسقول اصلا اصلا واد محترم ومالوش في السكة دي .. بينما انا اللي مقضيها عربده ومراقص وحاجه استغفر الله العظيم .. طلعلي تعبان , وكأنهم بيؤكدو على رائعة بوحة لما قال
!!! وده تحت السلم .. ده في تعبان
-
.. بعد تعليق عسقول لقيت الواد نيجرو هو كمان داخل وكاتبلي كومنت بيقول
!!! سلام قولا من رب رحيم .. كفايه اللي عندي
-
قلت فل .. مش انا لوحدي اللي متفلقط اهو .. نيجرو كمان طلعلو التعبان .. بس مش عارف تحت السلم ولا فوق الأسانسير الحقيقه , وقلت لروحي مصلحه .. أروح اتريق عليه شويه زي ما اللي بيدخلو عندي بيتريقو
-
وياللهول .. ياللمصيبه .. ياللفاجعه , نيجرو اللي كنت معتبره صاحبي والشؤس بتاعي .. طلع انه بيشتغلني .. واتضح انه ما جالوش تعبان ولا حاجه .. واتضح انه جالو حفنة دورارات أمريكية المنشأ .. أي والله أمريكية المنشأ مش دورارت مضروبه من بتاعة بنك الحظ ,
هنا بقى لقيت الشيطان بتاعي اشتغل
!!! ماهو يومها كان آخر يوم رمضان ووقفة العيد .. والشياطين سارحه ومطلوقه عالبشر
.. قمت داخل وكاتب كومنت للواد نيجرو
: سوووو يقول
-
!! يابني دي دولارات مضروبه.. بص
.. انا هعمل فيك جميل لا مومكن حد تاني يعملو
-
انا هقبل وابدّل التعبان الكوبرا (الأصلي) بالكام ورقة المضروبين دول
-
-
!! يالله .. شالله ماحد حوش
-
فين بوسة العيد الفرنسية الايحاء بتاعتي ياعم !؟؟
-------
طبعا الواد نيجرو عارفني وعارف اني خبيث .. قام كاتب كومنت وقايل فيه
: نيجرو يقول
-
إيه يا جدعان
ماكانوش كبشة دورارت طلعولي في البخت
الواحد كده مش هيعرف يتهنى بيهم يا سوووو
-
طيب أنا عندي فكرة أحسن من دي
- انت تخلي عندك التعبان الكوبرا - اللامؤاخذة الأصلي
و أنا هاشوفك ببتاع ربع عشر المبلغ ده
-
و يا سيدي مضروب مضروب هو حد بياخد باله
عدّاني العيب كده يا أبو السوووووووووووات
-
بالنسبة للبوسة
مش قدام الناس يا جدع .. اختشي
-------
.. اخونا عسقول طول عمره بيحاول يهدّي النفوس على قد ما يقدر .. قام دخل وقال
-
ربع العشر ؟؟
اشمعنى يعنى ؟؟
هو انت بتطلع زكاة المال ؟؟
و لا تقصد تقول إن سوووو ممن تجوز عليهم الزكاة ؟؟
-
آه نسيت أقول إنى جاى أهدى النفوس و لا مؤاخذة

-------
.. ومن هنا بقى .. ابتدى تهييس العيد .. وحصل الحوار التالي
.. وللتوضيح .. سوف نرمز للأخ عسقول باللون الازرق
.. وللأخ نيجرو باللون الأخضر
.. وللعبد لله .. باللون الأحمر إشكمني أهلاوي يعني
-
أبو العساقيل
اجري يا حبيبي و روح اقعد على الأرض في بروفايلك كما كنت
انت هتوقع بيني و بين الراجل
ده الراجل لسه طالب مني بوسة خليعة
شكلك كده هتخليه يسحبها و يطلبها بوسة أخوية
-
ثم و بعدين أنا مش لسه شايفك بإتنين جنيه و بريزة
-
صحيح يا جدعان
خيرن تعمل.. شرق الدلتا
-------
: سوووو يقول
-
.. والله لو هبقى ممن تجوز عليهم الزكاة وتديني ربع العشر
!! انا الزكاة اصلا
-
وبعدين انت بتحِقم علينا ليه يا عسقول ؟؟
!!!! يا اخي بَطّل حِقم بقى
-
هتديني الكاشات امتى يا نيجرو .. وايه كلمة السر !!؟؟
كلمة السر للزكاة .. نياهاهاهههههه
-
جرى إيه يا سوووو
هو عسقول عرف يوقع ما بينما ولا إيه ؟
كلمة سر إيه يا رااااجل
هو إحنا فيه بينا كده برضك
ده أنا هأديهملك على الملأ و في وجود حشد غفير من الناس
و هأسلمهملك دورارية دورارية
و ورا كل دورارية لازم الفرقة الموسيقية اللي هتبقى موجودة تعزف مش أقل من ربع ساعة من موسيقى بالية كسارة البندق لتشايكوفسكي
-
مش كده ولا إيه ؟
-------
: سوووو يقول
-
!!!!! كسارة البندق لتشايكوفسكي
.. اسكت ساكت.. ماتنطقش
!!!! هيقولو ماعرفتش اربّي
-
.. يا ابني كسارة البندق بتاعة عادل الفار
!!! عشان كان بيكسّر البندق .. ويدّيه للفار وش
-
يا خبر
صحيح يا جدعان
العلم لا يكيل بالجوافة
-
بقى كسارة تشايكوفسكي للبندق طلعت بتاع عادل الفار
قال و أنا بقالي ساعة و ربع فاكرها بتاعة أبو تشايكو
-
تسلملي يا سوووو على المعلومات اللوز دي
انت كده بقى مش خسارة فيك بوسة فرنسية الإيحاء
-
آآآآآه بان على حقيقتك يا نيجرو .. عايز تذل الراجل و انت بتديله الفلوس
.. قال و عايز تذله دورار دورار .. ياااه على النفوس
صدق الحكيم الفلتة اللى قال: الفلوس بتغير النفوس
-
باقول لكم إيه .. ما تضربولنا معزوفة "النحلة الطنانة" للباشمهندس ريميسكى كورساكوف
-------
: سوووو يقول
-
.. شايف عسقول الجاهل يا نيجرو
!!! قال بيقوللك النحله الطنانه بتاعة كورساكوف
-
!!!! يا جرعان انا صعبان علي الجهل والظلام اللي انتو عايشين فيه ده
-
.. يا عسقول
.. يا حبيبي
.. النحله الطنانه دي تأليف سمير صبري
.. وجاتلو فكرتها لما لقى النحل عمال يطِنّ عليه وهو بيغني
سكر .. حلوة الدنيا سكر
!!!!
-
.. يعني بلاش نتفاخر بالمعلومات اللي عندنا يا اخواننا
.. بلاش والله
-
.. لأنكم عارفين كويس ان انا احسن واحد في الدنيا
!!!! وأعوذ بالله من كلمة دنيا
-
شكلك إيه دلوقت قدام نفسك يا عسقول
بعد ما العلامة الفهامة الفلتة الحجة الداحضة و إمام أهل المعزوفات " سوووو" وضحلك مدى التدهور المعلوماتي اللي انت فيه
-
يحميك لشبابك يا سوووو
-
و بعدين تعالى هنا يا عسقول
هو انت تنام تنام و تصحى على زمبوء
بطّل زمبئة بقى
-------
: سوووو يقول
-
.. اشكرك يا ابني يا نيجرو
واشكر كل القائمين على البورنامج
-
.. وأوعدكم اني هابنيلكم مرقص ومعزف
.. مرقص للرقص
!!! ومعزف للرقص على اللي بيتعزف فيه
-
والله ولي التوفيق
!! ودقي يا مزيكا
-
.. خلاص .. سيبوكم من المقطوعات الموسيقية
.. يا ترى مين سمع رائعة أشرف وهبة الجديدة "حجرين ع الشيشة" .. و التى بدأ كلماتها الشاعر بالبيت التالى
و شربت حجرين ع الشيشة .. مع توتو و السبع و ويشا
-
.. و زى ما انتم شايفين إن الشاعر التزم كعادة شعراء العصر الجاهلى بالتصريع
و دة تضاد يبرز المعنى و يوضحه .. و أعرب ما تحته خط
-------
: سوووو يقول
-
همممم
.. بيعجبني فيك ياعسقول انك طالب علم
!! واطلبو العلم ولو كان عند سوووو
-
.. بص ياسيدي
.. بالنسبه لرائعة أشرف يا وهبه الجديده .. التصريع كان من منطق الصرع
!!! على أساس انك تشرب الحجر من هنا يجيلك صرع من هنا
-
.. والبعض بيقول انه مش من باب الصرع وانه من باب الصرعه
!!! واللي هي الموضه بلهجة اهل الخليج
وده عشان يمشي على الموضه مع قدماء الشعر والمطربين
-
- يتبع -
-------
: سوووو يقول
-
أما بالنسبه لتوتو والسبع و ويشا .. في هنا تضاد رهيب يؤكد على ان جميع فئات الشعب المصري .. بتشرب شيشه
حيث ان توتو - فرفور - يجلس ندا بند .. مع السبع - مسجل خطر سرقة مباسم - وفي وجود ويشا
!!! ودي تبقى احلى عيشا
-
- يتبع -
-------
: سوووو يقول
-
والاغنية دي تنتمي لوزن التقيل متوسط نهاوند .. مع دخلة وزن الكتوت سيكا نهاوند
.. وده في حد ذاته مزج رائع في المقامات والاوزان
.. والوحيد اللي عمل كده كان الشاعر "حسبو - لا مؤاخذه - لا مؤاخذه" .. لما قال
.. هِس هِس بِس
.. امتى بيّ تِحس
.. انت عمّال تتخن
!!! وانا عمّال باخِس
-
.. ودي قالها لما .. لأ بقولك ايه
صلاة العيد شغاله
هاروح اصلي وارجع احكيلكم باقي الحكايه
-
يلا سي يو
-
فتح الله عليك يا سعادة العلامة البحاثة الفهامة الفرقاطة سوووو
..هو دة الكلام اللى ينخشش فى النافوخ و يطعطع الطاسة
.. و بصراحة الرباعية اللى انت كاتبها دى تنم عن الشاعر "حسبو لامؤاخذة" مرهف الحس
.. فيها هسيس كتير كأن تعبان هو اللى بينطقها
-
بس لي استفهام بعد إذن سعادتك .. أنا فهمت من كلامك إن ويشا هنا أنثى ؟؟
صح ؟؟؟
أموت و اعرف انت عرفت إزاى ؟؟؟؟؟؟؟؟؟
-------
: سوووو يقول
-
.. ورجعنالكم تاني أعزائي القراء والمستمعين في برنامجكم الانتخابي
أماني ومعاني .. في هسس الأغاني
-
وقفنا في الكومنت السابق عند نقطة مهمة جدا .. واللي هي رباعية حسبو - لامؤاخذه - لا مؤاخذه
واللي ألفها الشاعر عشان يعبر عن اعجابه ببنت الجزار اللي تحت الشقه اللي قاعد فيها هو واصحابه لما كان في حقوق المنصورة انتساب موجه
-
.. واللي بيتصادف انها شقه في عمارة ابو البنت برضك .. وكان كاسر عليهم - حسبو ورفاقه - اربع شهور في الايجار
وابو البنت اللي هو الجزار يعني .. كان حالف يمين طلاق يطلعو من الشقه
-
- يتبع -
-------
: سوووو يقول
-
حسبو ورفاقه ما كانوش عايزين يطلعو .. عشان مافيش شقق فيها وصلات نت تانيه في المنطقه
اضافة على كده .. حسبو كان ليه واحد صاحبه متعرّف على بنت من بتوع الفيس بؤ .. البنت دي اصلا كانت واد وبيشتغل صاحب حسبو .. لكن مش موضوعنا
-
قرر حسبو انه يحاول يبلف البت بنت صاحب العماره .. واهو ينوبو ماللحمه جانب , وأساسا البت كانت عبيطه شويه .. يعني كانت طول اليوم بتسمع حماقي على انه هاني سعيد بتاع الزمالك
!!! وماتفهمش ليه فاكره ان هاني سعيد بيغني اصلا
-
- يتبع -
-------
: ومازال سوووو يقول مُهَسهِسًا
-
البت طبعا ماصدقت لقيت حد عبّرها .. قامت زي الدُغُف رشقت واتفقت مع حسبو انهم يضربو تلات ورقات عرفي , ورقتين هيفضلو مع حسبو .. والورقه التالته هياخدها صاحبه اللي كان بيظبط البت بتاعة الفيس بؤ .. لأنه عرف انها ولد وبيشتغلو
-
.. طبعا ابو البت لما عرف .. مسك حسبو وصحابه كلهم .. بمافيهم الواد بتاع الفيس بؤ اللي كان بيشتغل صاحبهم
!!! وعلّقهم على باب المحل نفس تعليقة سليمان الحلبي في فيلم الشيماء
-
.. ويمكن عشان كده طلعت المقوله اللي بتقول
!!! قال ياللي كنت فاكر نفسك حاجه .. اتعلق ومش هتبقى اي حاجه
-
- يتبع -
-------
: ويستطرد سوووو هَسهَسته ويقول
-
.. أما بالنسبه لسؤال صديق البرنامج .. ابننا عسقول
واللي بيستفسر اذا كان ويشا ده انثى !!؟؟
!!!! يا ابني طبعا انثى .. دي هي دي اصلا بنت الجزار
-
ومن ساعة ما حسبو اتعلق واتجنن .. البت دارت على حل شعرها واتعرفت على توتو - هو الواد بتاع الفيس بؤ اللي كان بيشتغل صاحب حسبو - واتعرفت بعديها على السبع
-
-
!!! ياعزيزي .. الغرز كلها منفّده على بعض
-
ملحوظه
-
.. انت مش واخد بالك ان الهسس ده كللو ابعد ما يكون عن اصل الحوار
!!! ومش واخد بالك انك فشلت في التوقيع بيني وبين نيجرو على موضوع الدورارات
-
كل سنه وانتو طيبين
-
والله العظيم باحبكم
--------------
!!! ودي كانت عيّنه من هسس الصحاب مع بعض .. لما بتكون الغزالة رايقه

ملحوظة في الهسس .. برضك

.. جيت افتح الميستيك بوكس النهارده .. طلعتلي الصورة دي
.. حسبي الله ونعم الوكيل فيكم .. حسبي الله ونعم الوكيل
!!! كشفت راسي و.. لأ راسي ايه احنا هنكدب
!!!!! كشفت قرعتي ودعيت عليكم يا ميستك انت وابوك الحاج بوكس
-
سوووو

هناك 27 تعليقًا:

jehan يقول...

ههههههههههههه صباح الخير يا سووو
والله انتم اخر روقااااااااان
كل ده شات على الفيس بوك ياطولة بالكم يااخى هههههه يلا بس الصراحه كانت مناظره رائعه من جهبذ زيك يا سووو
ربنا يحميك يابنى

شـقـاوة مـراهـقـة يقول...

هههههههههههههههههههههههههههههههههههه

انا عرفت بقى الواد نيجرو ضحك شوية ضحك معاااااكم وكان بيشكر فيكم يعني ان جيت للحق ..

ربنا يخليكم لبعض يااااااااارب ..

تعيشو وتهيسو يا شوباب

انتو عيال زي الفل والله

ربنا يكرمكم


كل سنه وانت بألف خير يا سوووو يا مهسهس ..

تصدق ان انا اكتشفت انك فصيح اللسان وبليغ كده وبتتكلم زي بتوع الحزب الوطني هههههههههههههه

عيد سعيد على جناب حضرتك ..

ماء تشرين يقول...

ازيك ياسوو كل سنه وانت طيب بجد التهيس بيعلى ليله العيد بس جميله وانا الصراحه كل يوم بشوف المستك ده ربنا يهديهم ويجبولى حاجه عدله

عاشقه وغلبانه يقول...

انتوا رايقين ياخويا
وبعدين ايه الفيس بوك ده واللي عامله في الناس اومال انا مش عارفه فيه حاجه ليه
ههههههههههههههههههههه

ربنا يرزقك بشويه ريالات سعودي بدل الدورارت بتاع نيجرو

Mo7ammed يقول...

على فكرة انا بقالى كام يوم اانا كمان

بيطلعلى حاجات غريبة

مش عارف لاسلكى ووكى توكى ومرهم بواسير والوش اللى طلعلك ده

عالم عجيبة ياعم


كل سنة وانت طيب

Barracuda يقول...

واعوذ بالله من كلمة دنيا!!!! هههههه
ايه التواضع ده ؟ خدنا في حلمك شوية احنا مش قدك.

مهندس مصري يقول...

ههههههههههههههههههههههههههه

عاشقه الرومانسيه يقول...

هههههههههههههههههه
ده انت مُبخت

adel يقول...

ههههههههههه
مقولتليشليه ياعمونا
كنا كملنا

وبعدين ان يوم الوقفة مشيت تدور علي اي بوسة فرنسية الايحاء كده
مكفكش فضيحتنا علي البروفايل قدام زيكا و الاجانب
هههههههههههههههههه

Desert cat يقول...

هى كل الناس كانت مهيسة ليلة العيد ولا ايه يا رجعاااااااان
ده شكله كان فيروس منتشر

ňįĝŗő يقول...

حبيبي حبيبي حبيبي
و ربنا انت دماغك في البخ على رأي الواد عسقول
تصدق و تؤمن بالله يا سوووو .. هتصدق إن شاء الله
إن أنا ماحسيتش بعيد غير بالشوية اللي هيّسناهم مع بعض دول

ربنا يسعد قبلك و يرزقك من وسع ( علشان ما تبقاش تنبر في لقمة حد غني زيي كده ) و يوفقك لكل خير يا سوووو يا ابن الحاج أبو سوووو

بالنسبة للبوسة فرنسية الإيحاء انت ضربت عليها ولا إيه



يلا سلام

ابن حـجـر الـعـسـقـلانـى يقول...

بصوا يا بشرية
قصيدة الراجل "حسبو لامؤاخذة" دى شعشعت فى دماغى .. و بصراحة قررت أعمل لها إكستنشن .. و إليكم باكورة إنتاجى .. و بصراحة كنت ناوى أكملها .. بس يا ريت أسمع مشاركاتكم .. إقدحوا أزندة أفكاركم

هوب هوب هوب
حبيبى إمتى تطب
أنا باملى لك مية
و انت تروح تكب

هِس هِس بِس
.. امتى بيّ تِحس
.. انت عمّال تتخن
!!! وانا عمّال باخِس

لأ .. لأ .. لأ
كدة ماليكش حق
واقف أنا ع الحرف
تقوم زاققنى زق

بوف بوف بوف
أضرب أنا بالدف
وكمان أولع شمعة
تقوم طافيهالى هوف

إخ .. إخ .. إخ
بقى من أولها تنخ
تختفى ورا الباب
و تقوم قايل لى بخ

و كل سنة و السلام عليكم

shayma يقول...

هههههههههه

كل سنه وانت طيب يا سووووو

صبرني يارب يقول...

حرام عليك يا سو

انا دوخت من الصبح فى البوست بتاعك ده

يا اخي ده انت رغاي اكتر مني

عموما انا قريت نصه على تلاث اربع مرات مش عارفه ليه كل ما افتحه يحصل حاجه واقوم

كل سنه وانتم طيبييييييييين

ده انت تستاهل الهدايا بتاعة الفيس بوك على فكره

صبرني يارب يقول...

اه من الحق

سوووو انا هاشوفلك عروسه بصراحه عشان انت رايق زياده على فكره

هههههههههههههههههه

ننكد عليك بقى

wella يقول...

هههههههههههههههههههههههه

هههههههههههههههههههه

هههههههههههههههه

ههههههههههههه



مابدحكش ولا حاجة

اية كمية التهيس دة

دة انتوا تعدوا على كمية التهيس دة عشر سنين ماتهيسوش بعد كدة

دة باين انو الكعك والبسكوت عمل عمايله وضرب النفوخ


يالذيذ ياريق

يلا ربنا يروق بالكم على طول

wella يقول...

!!! قال ياللي كنت فاكر نفسك حاجه .. اتعلق ومش هتبقى اي حاجه
-



الجملة دى بجد فى الصميم

ňįĝŗő يقول...

جامدة يا أبو العساقيل
ده انت دماغك انت كمان بقت في " البخ " ولامؤاخذة
طيب اشمعنى أنا يعني
خد الشوية دول على السريع كده و في السوكونن و ماتقلش لحد

أح .. اح .. أح
جرحك واجعني يح
اقولك ما تسلّفني
تقوم قايل لي بح

ها .. ها .. ها
باقولك انت يا
انا اصلا كان معايا
و جيوبي متنفخة


قرش قرش قرش
عاملك انت كرش
الله يرحم زمان
دي حاجات ماتتنكرش


يمّ .. يمّ .. يمّ
خوفتني يا عم
بلاش أعملها معاك
و أنا برضه عندي دم


و كفاية كده و مع السلام عليكم




باقولك يا سوووو شكلها هتقلب معانا بمراجيح أنا و أبو عساقل في صفحة التعليقات عندك .. ماتشوفنا بحاجة و تطرقنا

حسبى ربى يقول...

ما شاء الله ايه الثقافة دى ... دا انت المفروض يابنى تدى دروس خصوصية .. حراااااااااام عليك تحرم البشرية علمك وتسيبهم يعيشو فى ظلمات الجهل .. هههههههههههههه هههههههه
كل سنة وانت طيب

ابن حـجـر الـعـسـقـلانـى يقول...

قشطة عليك يا نيجرو .. الموضوع سخن و الليلة احلوت .. و يبدو كدة إن سوووو مش هايعرف يخرجنا من هنا

أحييك على مجهودك الرائع فى إثراء الأدب العربى

خد الشوية دول

بص .. بص .. بص
ع الحيطة واقف برص
أروح بسرعة أنا باصص
تقوم ظارفنى نص

طخ .. طخ .. طخ
دة أنا كنت فاكرك أخ
تخونى من ورا ضهرى
و تقوم ضاربنى طراخ

كح .. كح .. كح
أنا شرقان م الصبح
تعمل لى ماج شاى
و تقوم حاطط لى ملح

زن .. زن .. زن
بالراحة يا واد يا جن
بقى كل دى قسية
طب قول لى إمتى تحن

طار .. طار .. طار
أنا عارزمك ع الفطار
ترزعلك أكلة متينة
و ادفع زى الحمار

بط .. بط .. بط
من غير لا شيل و لا حط
انت فقعتنى مهموز
خلانى اتزبطت

ňįĝŗő يقول...

فل ع الآخر يا أبو العساقيل
دي احلوت و استكنيصت
استلم

هأو .. هأو .. هأو
مهاميزك أرض جو
بس أنا برضك شديد
ماياكلش معايا يا حلو

تَك .. تَك .. تَك
مش قد كلمتك
خلاص تقولها ليه ؟!
مش عيب بزمتك

لوك .. لوك .. لوك
ماشي عمّال تزُك
وتقول كلام ع الفاضي
خليك عمّال تعُك

قول قول قول
متّعني يا عسقول
لابدين هناهو لسوووو
و هأجيب أنا جبنة و فول

مهندس مصري يقول...

لا يا سوو الموضوع كده كبر
و التهييس بقى فل على الآخر
و أنا أقترح إنك ترش مياه نار قدام المحل علشان تشوف حالك
:))
هههههههههههه

شقاوة مراهقة برضه بس البتاع مش راضي يسجل باسمي .. يقول...

ههههههههههههههههههههههههههههههههههههه


يخربيت دماغاتكووووو .. ولا مؤاخذه برضه زي ما بتقولو

ايه ولا مؤاخذه دي هههههههههههه

والله ده انتو دمااااااااغ شعبي
عاليه
عاليه
عاليه

خلاص رقبتي وجعتني من كتر العلووو ههههههههه

ما تردعليهم باي حاجه يا سوووو بقى انت هتسيبهم كده يلعبو لوحدهم ولا ايه ؟؟



----------------------------

جوووووووووووووووون

ابو تريكه جاب جووون في التو واللحظه

راجل بركه صحيح


سلامو عليكووو

اقصوصه يقول...

كل عام وانتم بخير

لماضة يقول...

هاهاهاهااااااااااااااااااااىىىىى
على ضحكة عسقول
صباح الدماغ العاليه
على فكره البوكس ده قليل الادب
انا شيلته من عندي اساسا
مره طلعلي شريط برشام
طلع حاجه قليلة الادب

Ahmed Mubarak يقول...

انت دماااغ
:)

entrümpelung wien يقول...

شكرا على الموضوع
entrümpelung
entrümpelung
entrümpelung wien