الاثنين، 5 شعبان، 1430 هـ

!! سينماتك .. ريـلودد

في تحديث في آخر الموضوع

وانا في سنة تانيه اعدادي كان عندي مدرس علوم اسمه ندا .. آه والله اسمه ندا .. مع انه مش ندا خالص .. ده المفروض يبقى براكين .. زوابيع .. زلازيل .. أي كارثة من الكواريث وخلاص , ده كان مربّي شنب قدّي على بعضي دلوقتي .. شنب شنب يعني , وياسلام على عصايته .. هي لوحدها كده كانت بتبث الرعب في قلوب الطلبه .. بل والمجرمين على حد السواس , أما أسلوبه في الضرب .. فحدّث ولا حرج .. لدرجة اني بعد ما شفت فيلم الكرنك .. ربطت بينه وبين فرج اللي كان بيغتصب سعاد حسني في الفيلم

الراجل ده كان مستقصدني .. مش مستقصدني لوحدي .. كان مستقصد كل الطلبه .. اللي مابياخدش درس عنده كان يهريه ضرب , وأتذكر على ما أتذكر انه في مره عمل امتحان شفوي مفاجئ .. و العيال اللي بياخدو عنده درس - كانو اربعه - ماحدش فيهم انضرب لأنهم كانو عارفين الإجابات .. باقي السبعين واحد اللي في الفصل - أو خمسه وستين مش فاكر - اتعبطو على الأظئوظه أو المؤخرة , والاربعه اللي بياخدو الدرس هم اللي كانو مسئولين عن تجهيزنا للعبط .. واحد يمسك إيد والتاني يمسك الإيد التانيه .. و واحد يمسك الرجلين .. والرابع بيصدّر الأظئوظه للي يقدّرها .. قصدي للمدرس
في اليوم ده رجعت البيت وقلتلهم عالحوار .. خصوصا اني ماكنتش عارف اقعد خالص والدنيا وحوحه يابن عمي , قامت امي - الله يرحمها - باعتبارها كانت مُدرّسه وليها في التربيه والتعليم .. أخدت على عاتقها انها تشرحلي العلوم .. وفعلا شرحتلي .. وياريته ما فعلا وياريتها ما شرحتلي , لأن ندا لما لقاني باجاوب استغرب قوي .. وبقى بيتعمد انه يسألني في حاجات تانيه خالص
!! ده سألني عن الجدول الدوري الحديث وانا في تانيه اعدادي ياجرعان

وبعد فترة ليست بالكتير .. لوحظ عليّ عدم القدره على القعود .. وعدم القدرة على الوقوف أيضًا - اصل بتاع المواد الاجتماعيه كان بيمدّنا على رجلينا - و قرر ابويا وامي انهم يدّوني دروس في المواد العنيفه
!!!! تقريبا خافو لا الأظئوظه تكبر أو رجلي تفلطح
وقد كان .. وبقيت باروح المدرسه تاني يوم بعد كل حصه خصوصي .. و انا عارف المدرسين هيسألو في إيه .. ومذاكر اللي هيسألوني فيه وحامي ضهري
-----
افتكرت الموقف ده لما لقيت ان في ناس كتير بتسأل هو انا ليه مابقتش اتكلم عن السينما في مدونة سينماتك .. خصوصا اننا في موسم صيف وكل يومين بينزل فيلم

وانا مديون للناس اللي سألوني دول بالتوضيح , الحكاية ومافيها اني من ساعة آخر موضوع هناك واللي كان فيلم الوعد .. جالي تعليق من شخص مجهول , وبالرغم من ان التعليق لم يكن من منطق النقد الإيجابي وكان من منطق التقليل من شأن اللي باكتبه .. لكن بجد باشكره .. لأنه نبّهني لحاجة غابت عني

نبهني اني بقيت باتقمّص شخصية الناقد .. بقيت باروح اتفرج على أي فيلم مش عشان استمتع بالفيلم .. لأ .. عشان اعمل موضوع عنه في سينماتك , وبكده ضاعت متعة الفرجه عالفيلم .. وضاعت كمان متعة الكلام عن حاجه باحبها

كأني كنت باذاكر عشان ندا - بتاع العلوم - أو سامي - بتاع المواد الاجتماعية - مايضربونيش
مش عشان عايز اذاكر وافهم .. والنجاح ده حاجة بتاعة ربنا

وبناءا عليه .. قررت اني اتكلم عن الفيلم اللي يعجبني قوي قوي قوي .. حتى لو كان فيلم قديم ومش معروض حاليا في السينما .. حتى لو كان فيلم روائي قصير اتفرجت عليه في مهرجان .. حتى لو كانت مسرحية كمان
!!! ولو اني ماعرفش ازاي مسرحية في سينماتك بس براحتي بقى

ملحوظه

في موضوع عن فيلم عين شمس في سينماتك دلوقتي .. والفيلم ده من أروع الأفلام اللي شفتها بجد .. بالرغم من انه ماخدش حقه عشان اتعرض في أول الموسم .. وبعديه على طول انفجرت ماسورة أفلام الصيف .. واتشال الفيلم واتحط مكانه عمر وسلمى الجزء التاني .. عودة الهُبل

آه .. ندا - بتاع العلوم - و سامي - بتاع المواد الاجتماعية - اتحوّلو للتحقيق بعد ما جه مفتشين من وزارة الداخليه .. قصدي وزارة التعليم , لأن المفتشين كانو بيسألونا واحنا ماكناش عارفين نجاوب , ماهو احنا مذاكرين اللي هيسأل العيال فيه ويضربهم لما مايعرفوش يجاوبو
!!! مش مذاكرين عشان - استغفر الله العظيم - نفهم

-----
فيلم عين شمس هيتعرض بكره الاربعاء ٢٩/٧/٢٠٠٩ في جمعية النقاد ٣٦ شارع شريف وسط البلد الساعة سبعه مساءًا

سوووو

هناك 28 تعليقًا:

كيــــــــــــارا يقول...

ههههههههههههههههههههههه حلوه عشان استغفر الله العظيم نفهم دي

يااااه ايام المدرسة دي ايام يلا انا رايحه اشوف عين شمس دا نظامه ايه اصلي اول مره اسمع عن الاسم

adel يقول...

سووووووووو
مين قال كده انا اكتر واحد اتعلمت من مناقشتك للافلام و مش ناقد بالعكس انت بتدخلني في الجو
انا مش شايف انك كده علي فكرة و اكتب ياعم انا عاوز ااقرااااااااااااا

متعصبنيش

و فين ايام ندا ياسلام
شكلك شايل ياما منه
هههههههه

مي يقول...

هههههههه ازيك ؟ يارب تكون بخير
اسمه ندا هههههههههه وبشنب سبحان الله
كل المدارس فيها كده يا خويا وياما اضربنا اه يانى بس ربنا ستر الحمد لله
والحمد لله قررت اكون مدرسة وفعلا والله انا خايفة على التعليم نيهاااااا بس حب انتقام هههههههههه
تحياتى ليك يا قمر

ايوشة يقول...

هههههه ندا وبشنب الاشكال دى اللى بتكره الواحد فى التعليم اهو اتخرجت وبقيت مدرسة عاطلة وبردو بكره التعليم

صيدلانيه طالعه نازله يقول...

هههههههههههههههههه
انت بتجيب الحكايات التحفه دى منين يا اخى
حلوه قوى ربطت بينه و بين فرج بتاع فيلم الكرنك و طبعا كنت انت سعاد حسنى قصدى الضحيه
انا عماله اضحك و انا بتخيل ندا ده و بتخيل شكله الخارجى لان الشكل ده كان موجود فى كل المدارس زمان عندنا كان اسمه فخرى بس هو كان شكله بس اللى مرعب انما صوت على الفاضى و طيب جدا

عاشقه الرومانسيه يقول...

واضح ان ندا عامل لك عقده بشنيطه
هههههههههههههه

حـــلـــم كــــان يقول...

ندا اسمه ندا طب يكسف على اسمه ويعد ساكت

ايام الاعدادى دى كانت ايام

-:::خوخة:::- يقول...

يالاااااااااهوي .. ولا عارف تقعد ولا تقف
الحمد لله اني مدخلتش مدارس في مصر ..وقال ايه اسمه ندا قال هههههههههههههه

اما بلانوسبة لسينيماتك
طبعا احنا يهمنا ان عم الشباب واللياقة يستمتع بالافلام اللي بيدخلها بس الفكرة انك كنت بتشوقنا للفيلم لو حلو وبتخلينا نتفرج عليه بنظرة تانية خالص..
واحنا موافقين ياسيدي عالمقرتح المفيد المزيد اللي قولتو .. بس بلاش تركن سينيماتيك كده والنبي لانها من افضل المدونات اللي بتتكلم في السيما..

وعجبتني عوده الهبل دي اوي ههههههههههههههههههههههه
ربنا يتوب علينا من شعر السدر حسين ده اللي مش مصدق نفسه:((

dodi يقول...

ربنا يخليك لينا ولمصر ياسو أنت دمك خفيف شربااااااااات ووحياتك ندا ده كان عندنا بس أسمه سراج وكان العيال اللى انا مش منهم يعنى ممكن يعملوا على روحهم لو زغر لهم بس مش ضربه يالله منهم لله بقى

Rannon يقول...

ههههههههههههههههه
فكرتني بزمان
أخويا مرة المدير مده في الطابور ما اكتفيناش بأسفه حتى والله جالنا لحد البيت يترجانا منزعلش ونسامحه :))
ومرة مدرس شدني من ودني تاني يوم خالي كان عندي في المدرسة بيشوف ازاي يفكر يعمل معايا كدة :))

انا ودماغي يقول...

لاااااااا يا سوو كدة ازعل
انا يمكن مكونتش برد فى سينماتك بس كنت بقرا كل بوست جديد يأما كنت بدخل الفيلم على اساس كلامك يأما يأما كنت بقارن اللى شوفته باللى انت كاتبه

بس لو خلاص قررت انك تقلب المدونة كدة براحتك بس متبقاش تتأخر فى البوستات

انا من إعلان عين شمس كنت حموت و ادخله بسس للآسف اول ما خلصت إمتحانات لقيته اتشال :(

كان نفسى اتفرج عليه

و ياريت تبقى تسلملى على ندا و تقوله انا 100 100

يونيك اوى .... يقول...

الف سلامة عليك الحمد لله خلصت تعليم
بس الله يخليك ياسوووو استمتع بالسينما وخلينا احنا كمان نستمتع بنقدك لانة بيبقى فى الجون
نصيحة اخوية ... : ادخل (طير انت ) فيلم زى العسل

Soooo يقول...

فيلم عين شمس هيتعرض بكره الاربعاء ٢٩/٧/٢٠٠٩ في جمعية النقاد ٣٦ شارع شريف وسط البلد الساعة سبعه مساءًا

همس الاحباب يقول...

يااااااااه دنيا
وانا بقول سوووو بقى بيخرج من غير اظئوظته ليه
كله من ندا الله يسامحه
هههههههه
تحياتى

مهندس مصري يقول...
أزال المؤلف هذا التعليق.
مهندس مصري يقول...

ياه يا أحمد
دا كل واحد فينا عنده حكايات بلاوي من أيام المدرسة
بس مش كل واحد فينا يعرف يصوغها زيك كده

و إكتب في سينماتك تاني لإني بجد بأحب كتاباتك فيها جداُ و باستمتع بيها و بأستفيد منها

sonrisa يقول...

hi
sorry i haven't an arabic keyboard
I will use english:-)
sI visit ur blog since along time et it's will be the first time i leave a comment.
Thanks for bringing me a smile in this dark days

أحسن تـستاهـل يقول...

(وش بيتمطع وبيتاوب وبيهرش في راسه)

بابا قالي اقفلي الجهاز الساعة 12.. الساعة دلوقتي واحدة؟؟؟؟؟
انا نايمة ع الكي بورد ولا ايه؟؟
ايه الصوت اللي جاي من بعيد ده؟؟ رجلين بابا وصوت دخان طالع من ماراخيره؟؟

(وش بيتمطع وبيتاوب بسرعه وبيهرش في راسه أسرع)

مين اللي جابني هنا.. ايه الصفحة دي!!! هو انا لسه ما علقتش من ساعتها؟؟

لأ يوم تاني وعليك خير بأه..

نكملىوانلتبلانتولاتلغاعغهومنوغخوى ... احم ...
جت سليمة.. لا ده بس كرسي اتحدف خبط في الشباك ماجاش فيا الحمد لله.. تصبحوا على خير وبابا يكمل معاكو السهرة بأه

مها ميهوووو

غير معرف يقول...

طيب ندا

ضرب العيال


عدم الفهم والكر من غير فهم

بس أحنا نفسنا نشو ف فيل عين شمسسسسسسسسسسسسسسسسسسس

maiosha يقول...

سوووووووووووو

شوف بقى انا عايزة اقول تعليق بعيدا عن العوم والدراسات والضرب والعبط و ندا ابو شنب والمفتشين

انا عايزة اقولكان من امتى يعنى التعليقات ممكن تأثر فيك بسرعة كده وتغير تفكيرك
يا سيدى المدونة بتاعك اكتب فيها اللى انت عايزة فيلم مسرحية انشاله حتى سيت كوم
بس انك تعرف تاخد بالك من التفاصيل فى فيلم معين وتحلله بالطريقة دى .. دى موهبة بجد
انا مرة حاولت اعمل زيك كده .. محستش غير بالغباء المطلق ( او المخلوع يعنى)

ده انا من ساعة ما قريت تحليلك عن فيلم عين شمس وانا هتجنن واشوفه

بجد فكر فى القرار ده كويس ومتتسرعش كده

GeHaD-----(male) يقول...

انت فعلا ناقد كويس وعادي يعني لو بتدخل علشان تنقد الفيلم وتقولنا رأيك ما انت اكيد بتستمتع بس تلاقيك ياعيني مخلص مصروفك علي السينما


انا مش عارف ليه كل اما ادخل عندك لازم انزل صوره الضيف احمد نزلتها اكتر من عشرين مره قبل كدا

Memo يقول...

والله زمان

همس الاحباب يقول...

كل سنة وانت طيب
وعقبال 100 سنة

يا خوف فؤادي من غدي يقول...

السلام عليك
انا احبو في عالم التدوين الدي عرفته من خلال مدونتك واحببت ان ادخله انا خطوت الخطوة الاولى وانشئت مدونة لكن ربما اكون وصلت لمرحلة وقف حمار الشيخ في العقبة لدا ارجو منك المساعدة ان كان هدا ممكنا ولك مني جزيل الشكر
قارئة وفية لدونتك

Sharm يقول...

ههههههه

كان عندي مدرس عصايته بتجيب العيال من اخر الشارع !!

ايام

Sonnet يقول...

السلام عليكم
مررت لأقول
كل رمضان و أنتم إلى الله أقرب
تحياتى

سلوى يقول...

كل سنه وانت طيب وبخير وصحه وسلام
أنت وكل من حولك :)

entrümpelung wien يقول...

شكرا على الموضوع
entrümpelung
entrümpelung
entrümpelung wien