الأربعاء، ٨ رجب ١٤٣٠ هـ

!! سوووو .. مليونيرًا

.. عليّ النعمة انت غبي .. وحمار
يابهيمة انا اصلا دلوقتي مهندس .. مش هستنى خماشر سنه
!!! وأساسا أساسا أساسا .. انا مجاوب عشان ابقى مليونير

----
كانت دي كلماتي اللي قلتها لما عملت أحد الكويزات المضروبه عالفيس بؤ .. والكويز ده بعلوان كيف ستكون بعد خماشر سنه .. وراح مطلّعلي النتيجه اني هابقى مهندس
!!!!
وبمجرد ما نزل الكويز عالبروفيل بالنتيجة بتاعته دي وبالتعليق اللي قلته .. لقيت محمد غاليه - اللي كنت فاكره صاحبي وحليب هارتي - واللي عامل مدونة اسمها هل تبحث عن السعادة .. بيعلق ويقول
.. ياعم أحمد زعلان ليه بس .. الراجل مش حاسس انك هتبقى مليونير بعد خمستاشر سنه :
يمكن بعد ميه وخمسين سنه

طبعا إستشطت غيظا وغضبا وكمدا منه .. ولو شفته ساعتها قدامي كنت هعضو .. ورحت قايل
!! كده برضك يا محمد ..
كده :
.. وانا اللي قلت انت هتنصفني وتقول ان الكويز ده مضروب
وتعمللي حملة لجعلي مليونيرا في اقل من خماشر سنه .. عشان نقف قدام الكويز ده ونطلعو عبيط
!!؟؟!!

هنا بقى لقيت الرفيق احمد هيما صاحب مدونة انا محتاج براح .. فاجأني ومعلّق وقايل
على فكرة الكويز ده بقى مضروب :
وراح حاطط لينك غريب

.. وادخل عاللينك المحطوط .. الاقي جروب معمول بعلوان
من اجل جعل سوووو مليونيرا في اقل من خماشر سنه
.. ومكتوب تحت العلوان ده
دلوقتى يا جماعه سوووو دخل كويز علشان يطلع مليونير خلال خماشر سنه
الكويز قال ايه يطلعه مهندس
وهو اصلااااااااااااااا اصلاااااااااااا مهندس
كلنا ضد الكويز بقي وم الاخر
----
.. طبعا انا اتاخدت كده وقلت يالهوي دي مسئوليه .. اه طبعا
!! ماهو لما يتعمل جروب عشان ابقى مليونير .. دي حاجه كبيره يعني

وبناءا عليه .. قمت عملت لنفسي لقمة خفيفه عشان اعرف افكر كويس .. حاجه خفيفه واحنا أخر اليوم والفجر خلاص .. طبق شعرية اندومي وحتتين فراخ بانيه - حاجه خفيفه - وأكلتهم وانا باخطط ايه البورنامج بتاعي لما ابقى مليونير .. وازاي هقدر اقنع الناس انهم ينضنضمو للجروب .. وايه هي أهدافي من اني ابقى مليونير
.. أول حاجه .. لما هبقى مليونير ويبقى معايا قد خمسين ستين الف جنيه كده
.. هاهبأ على بلاد برّه .. اضرب بازبور واطفش
.. وأساسي يعني مش هعرف حد من اللي كنت اعرفهم زمان قبل ما ابقى مليونير
طبيعي .. واحد مليونير بقى .. لازم اتنطط عالناس .. وأول واحد هتنطط عليه هيكون الواد هيما اللي عمل الجروب ده عشان يشد من أزري
والناس اللي هينضنضمو للجروب طبعا في الاول هقوللهم انا منكم و ليكم يا جماعه .. اقفو جمب ابن منطقتكم .. جمب اللي زيّكم .. جمب اللي بيتشعبط في الاتوبيسات وبيتقطع منطلونه في الميكروباظات وبيتخنق زيكم من ريحة العرق في المترو
وساعتها ممكن الاقي واحد يروح طالع من وسط الحشود ويسألني ويقول
والفلوس دي يا سوووو .. ناوي تعمل بيها ايه !!؟؟؟ :
وانا اروح مطلع السبحه من جيبي .. واضرب زبيبة صلاه .. واقول وكلّي خشوع و تقوى
هعمل كباريه شرعي .. مش هيشتغل الكباريه ده بالليل .. ماهو حرام يبقى في ناس سهرانه وبتقوم :
الليل .. وانا اجيب مطربات ورقاصات .. حرام يعني
لأ .. الكباريه هيشتغل بالنهار .. والمغنيين مش هيغنو على معازف .. لأ .. هيغنو على الدُفّ والطبله .. والرقاصات مش هيغنو وهم بيرقصو لأن صوت المرأه عورة .. هيرقصو بس
كباريه شرعي ولا مش شرعي !!؟

بعدها ممكن الاقي واحد تاني طالع من وسط الجماهير وأعضاء الجروب ويقول
طب دلوقتي ياسوووو احنا هنلملك الملايين دي ازاي !!؟؟؟ :
هشيل السبحه والزبيبه واحطهم في جيبي احتياطي لوقت حوجه .. واتقمّص شخصية الخبير الاقتصادي .. والبس النضارة وانزلّها على مراخيري واقول بصوت أخنف
هنعمل مشروع بورصة المدونين .. مش قهوة البورصه بتاعة وسط البلد .. لأ .. بورصة للمشاركه :
في شراء أسهم المدونين .. يعني مثلا هنطرح المدوّن من دول في البورصة .. ولنفرض مثلا هنطرحني انا في البورصه .. ونعمل اكتتاب عام عليّ .. ونشوف عدد الناس اللي عايزه تشتريني أسهم .. ونحسب قيمة السهم .. ونوزع صكوك ملكية للأسهم دي عالمستثمرين .. نفس الحكاية على باقي المدونين
عملية تداول السهم بقى هتكون ظريفه قوي .. فرضنا مثلا انا عملت موضوع .. ساعتها قيمتي في البورصه هتعلي عشان عدد قراء الموضوع هيكون كتير نسبيا في أول الموضوع مانزل .. تقوم قيمة السهم بتاعي تزيد .. تقوم الناس بايعه سهمي في البورصة وهو غالي .. ويشترو سهم بتاع واحد تاني مثلا لسه ماعملش مواضيع جديده .. وبمجرد مايعمل موضوع جديد يروح سهمه يعلى وتزيد قيمته .. وهكذا دواليب
.. وأستطرد وانا متقمص شخصية محللين البورصة
طبعا في أسهم قيمتها عاليه ومش بترتبط بحوار المواضيع الجديده بتاعتهم .. زي نوّارة نجم مثلا :
ممكن تعمل تلات اربع مواضيع في اليوم .. الناس ساعتها مش هتبقى عارفه تبيع ولا تشتري ولا تعمل ايه في ليلتها
ولأنها هتكون بورصة جديدة ومش متجرّبه قبل كده .. هيبقى في نسبة خطأ قايمه على الاشاعات .. زي ان مثلا تطلع اشاعه ان أشرف توفيق أو غادة برايد هينزلو مواضيع جديده .. تقوم الناس هوب بايعه اللي معاها ومستنيه المواضيع اللي هتنزل .. وشيء وارد جدا ان ماينزلش اي مواضيع
بس ساعتها الخساره مش هتكون كبيره .. لأن اللي باع السهم ممكن يشتري سهم الصباغ - لأنه كده كده بيعملو نوت عالفيس بؤ وبيتشاف - أو سهم خيخة .. هو أي نعم سهم خيخي شويه .. بس مع مرور الزمن بيثبّت نفسه في السوق هو وسهم فاتيما
!! وبكده يبقى زيتنا في دقيقنا .. وهنيالك يا كاتب موضوع في بلوج سبوت

هيطلعلي واحد فانكي من اعضاء الجروب وهو ماسك بوب بانجو وبيقول وعينه مشبّره من كتر ضرب المخضروات
ياعم انا ماليش في الليلة بتاعة التدويم دي .. عايزين حاجه هلس ياعمنا :
هقلع نضارة المحلل الاقتصادي وامسك الجوزه واهوّي على حجر الحشيش واخدلي نفس واقوللو وانا مطلّع الدخان الازرق في عيني
هنعبي الهسس في قزايز .. آه امال .. هنجيب شوية عالم من بتوع الهسس .. ونخليهم يهسهسو في :
أي شقه مفروشه .. وناخد هسهستهم دي ونحطها في علب كانز أو قزايز .. الكانز لشغل التصدير .. والقزايز للهسس المحلّي , وعلمك علمك علمك .. مافيش حد هينافسنا في سوق الهسس .. ولا حتى الصين .. ليه بقى .. إكمني الهسس المصري مطلوب .. وإكمني الصين مالهاش في الهسس .. وحتى لو هسهسو .. هسسهم هتكون عينيه ضيّقه .. الناس مش هتشوفو .. ومش هياكل مع هسهسنا , واساسا الهسس الصيني أخره اسبوع ويضرب .. وتحتاس بيه ماتبقاش عارف تصللحو فين
ماهو مش هيبقى ليهم مراكز صيانه معتمدة يابرنز .. ماتجيب بوسه !!!؟
----
ظبطت المخطط في دماغي وحددت ايه اللي هيحصل في الجروب وكللو فل .. ولسه داخل عالفيس بؤ عشان اطبّق النظرية بتاعتي دي .. الاقي بيلا راحت كاتبه كومنت عالجروب وبتقول فيه
انا ضد الكويز من الاول وكنت باستغرب كمية الناس اللى بتعملها :
ياريت بقى تغير اسم الجروب وتخليه ضد الكويز المضروب .. علشان الناس تعرف الجروب عن ايه من عنوانه
.. و زيّ ما الرفيق احمد هيما فاجأني بالجروب اللي كان عاملو مخصوص عشاني
فاجأني أكتر ولقيته راح مغيّر اسم الجروب وخلاه
!! ضد الكويزات المضروبة
!!!!!!!!
.. صدمة .. نعم صدمة
.. صدمة إنهارت معها كل آمالي وطموحاتي بالثراء الفاحش السريع
.. صدمة جعلتني لا استطيع أن أضرب نص البطيخه بعد الأندومي والفراخ البانيه
!!!! ووجدت كل أحلامي تنهار معي .. مع انها أحلام مشروعه .. وحلال

ملحوظة

.. بالنسبة للناس اللي كانت بتسأل البورص فين .. البورص كان مستخبي في كيسة الكومبيوتر
.. عشان المروحه بتاعة البروسيسر ماكانتش شغالة والجو كان دافي وملائم ليه
.. ولما جيت أركب مروحة تانيه لقيته .. قمت ضاربه ضربة واحده جابت أجلو
.. وصورته وهو جثة هامده
!! لكن ماحبتش احطها عالمدونة خاصة انها تنتمي لصور الرعب

.. وبكده .. مافيش حد كسب الجايزه
.. واللي كانت عباره عن جثة البورص متحنطه ومحطوطه في ميداليه
!!! يلا .. مالكمش في الطيب نصيب
سوووو

هناك ٣٢ تعليقًا:

غير معرف يقول...

السلام عليكم و رحمة الله و بركاته


قبل ما اقرأ كنت بدعيلك تبئه مليونيراً بعدما ما قرأت .. احم احم .. برضه دعتلك و يارب تكون من نصيبك :<

ههههههه


اسلوبك جداا رائع سو و يارب دايما تكون متميزاً و ياريت طلب بسيط

ما عندكش حاجه للابراص:$

واحدة مجنونة يقول...

مليونير و معاه خمسين الف بس ده انت متواضع جدا
بس الجروب ده فين علشان الواحد يشترك فيه بعد كده

ملحوظة: انا زعلت قوي على البرص اصل شكله في البوست اللي فات كان ابن حلال و طيب. يلا اجله كده هنعمل ايه
تحياتي على البوست اللذيذ

Rannon يقول...

ياعيني أحبطوا آمالاتك
يلا بقى خيرها في جروب آخر :))


بالنسبة للبورص وجايزته الهايلة(يع)

اترحمنا منها الحمد لله فهنيالك الضربة الواحدة :))


بيعجبني ان كل موقف بتعمله حكاية(رغاي رغاي يعني D: )

moustapha achraf يقول...

عظيم جدا :)

Dr.Mohammed Gohary يقول...

دي حاجة عنب عنب يعني
والكويز دا تعبان زي البتنجان الحمضان
إزاي يقول انك هتبقى مهندس مع انك أصلا أصلا أساسا يعني مهندس؟

عجبني أوي حوار الهسس المصري اللي هيحقق مبيعات عن نظيره الصيني
وعجبني وهكذا دواليب
وكمان موضوع ضرب البازبور
ههههههههه
ما تجيب بوسة من بؤك
ف انتظارك وانت مطروح ف البورصة
وبعدها تبقى عريش
إسطة عليك يا كبير
بالتوفيء
سلاااااموووون

Dr.Mohammed Gohary يقول...

هات بوزة من بؤك قصدي

غير معرف يقول...

انا جيت اعمل زيك كده وانق على نوارة نجم اللي عدّيت لها قبل كده 10 تدوينات في يوم واحد
اختفت لمدة اسبوعين..!!
ربنا يخليها يا رب للغلابة اصحاب تدوينة تدوينتين في الشهر :))))

Memo يقول...

الصراحة يا كبير انا اول البوست فرحت جدا قلت انت عامل البوست ده علشان تقلنا منتكسفش نميل عليك اللي عايز عربية ياخد اللي موبايل و ماله مع الإعتذار للمسرحية اتاري الحكاية ان الموضوع فركش

الصراحة انا اتغميت لغاية البوست اللي جاي.

MǿиY El-Shreef يقول...

ههههههههههههه

انا افتحلك جروب ولا يهمك يا سوووو

والله العظيم هعيط من الضوحك هههههههه

والحمدلله انك ماحطتش صورة البرص يع

D:

adel يقول...

بقي كده ياسوووو
بعد العشرة و التسعة دي كلها
ده برضه ياسوووو ياخاين

فين اسمي ياعم فين اسمي


بس والله انا مبضحكش قد عندك هنا :):)
هههههههههههه
ويارب تبقي مليونير و تودي فلوسك البنك و انا اخد قرض و اهرب بيه و تيجي تاخد فلوسك يقولوك عادل اقلبها و هرب
وهابقي افتكرك و ابعت واحد هسس معتبر من بتاع بلاد برة

و بالنوسبة للبرص انا بطلب منك الاحتفاظ بيه لحين الانتهاء فرز الصوات في المسابقة و في حالة التعادل هنخلي كرومبو ياكل البرص و حصل خير

سارة درويش يقول...

ههههههههههههههههههههههههههههههههههههههههههههههههههههههههههههههه لأ الحق يتقال الكباريه شرعي طمنتني يا بني علشان انا اشتركت ف الحملة من قبل ما اعرف اهدافها النبيلة

يونيك اوى .... يقول...

بجد يا سووو انت مالكش حل ...
عجبتنى اوى فكرة الكبارية الشرعى دة .. ممكن يا سووو لو ممكن ادخل شريكة النص بالنص .. اهو بردو الواحد يعمل اى حاجة لاخرته.. !!

خمسة فضفضة يقول...

السلام عليكم ورحمة الله وبركاته

ههههههههه

مشكله مشكله
والله العظيم انت مشكله ومالكش حل
ههههههههههههههههههههههههههه

واذا كان علي المليون جنيه اسلفهملك يا سيدي ولا تزعل نفسك هو احنا دافعين حاجه من جيب اهالينا كله من جيوب الشعب الغلبان

هههههههههه

مهندس مصري بيحب مصر يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

UncŁē Sam يقول...

عمونا سووو
يا عم انت لية حطيت عليه كده فى التوبك اللى قبل ده
انا مسحت مواضيعك خالص من عندى
وانا اسف يا كبير
متزعلش منى

امال يقول...

بجد يا سووو حتعمل كباريه شرعى :)

طب كده ماما حتوافق اجى ارقص

احجزلى بقى..بس المهم يكون مفيش اختلاط

ولو فيه نلبس الزى الشرعى مش مشكلة :)

فاتيما يقول...

تنهيدة طوييييييييلة
يتبعها قولة
يا سلاااااااااااام
بعد هذوها العمر هندخل البورصة كمان على يدك يا سوووو
مش كفاية يا بنى أفضالك السابقة فى مقابلتى ليكم و إنى احدخل فى عالمكم الجميل بشكل إيجابى و مبهر
كمان هتخلينى اسرح بالناس و أبيعهم هدومهم ؟!ّ!
لا يا عم خلينا فى الدرة
و ملناش دعوة بالبيزنس دا خالص
و بعدين يا باشمهندس تعالى هنا
إنت مليونير من زمان
بس إنت بس مش واخد بالك
حد يبقى عنده كل المحبة دى من الناس
و لله ف لله و ميكونش غنى يا بنى
ربنا يسعد قلبك
و يغنيك كمان و كمان
سلامى لحمزة و مش نسياه

شقاوة مراهقة يقول...

ههههههههههههههههههههههههههههههههههه
ههههههههههههههههههههههههههههههههههههه

انت حكااااااااااااااااااااااااااية ..


مش لاقيه كلام اقوله والله ..

ربنا يسعدك ..

وانا كمان فاكرة حمزة ومش ناسياه ..


ربنا يشفيه ياااااااااارب ويبعد عنك وعنه اي حاجه وحشه ..


وكلام فاتيما تمااااااام التمام ..

الغنى غنى النفس ..

تحيااااااتي جدا جدا جدا ..

jehan يقول...

حلو جداا الكباريه الشرعى بيفكرنى بالمايوه الشرعى هههههههههههه

ربنا يكرمك يا سوو ولو عايز تبقى مليونير بسيطه افتح حساب فى البنك واعمل جروب على الفيس بوك انك عايز تبىق مليونر وبتقبل التبرعات على رقم حساب كذا كذا كذا واعمل الشعار
اتبرع ولو بجنيه ههههههههه اى خدعه >>> على فكره انا فكرت فى الفكره دى كتير بس كنت بكسل انفذها التنفيذ عليك بقى يا سوووو وربنا معاك

سارة نجاتى يقول...

ههههههههه قلبتنى ضحك

أنت كان المفروض تشتغل فى السينما , تكتب اسكيتشات كوميدى أو حاجة زى كده

لفت نظرى اللى بتكتبه ع الفيس و انبسطت لما عترت فى مدونتك

بالنوسبة للكباريه الشرعى أنا اساسى معاك, لأن ده مشروع مرى بعد ما اكتفت أن الدراسة مش جابت همها

بالنوسبة للكويزات المضروبة , فأنا تقريبا ح أشترك فى الجروب ده ههههههه

سلام

غير معرف يقول...

سووووووووووووووووووووووووووو
أووووووووووووووووووووووووووو
نووووووووووووووووووووووووووو

يا ابن الايه يا سو النو كوانو
أخبارك إيه بس بسرعة عشان بفكر اتفاوض مع مرام تعملي كوباية شاي بلبن
احم.. ما علينا

المهم بأه بما انك في آخر البوست جبت سيرة بوست البرص فأنا مضطرة اقولك ع الهم اللي عندي في الاوضة
ع الاقل محدش بيتقاسم معاك اوضتك العجيبة.. انما انا والغندورة الامورة معبشاني في الليلة الكبيرة.. معيشاني ف مولد سيدي المرعب

يا سوووو أريد حلا.. أنا بفكر ابني جدار.. اعمل ستارة.. باب اوكورديون بيني وبينها.. بس ما تقلقش هي عارفة وأول ما نتوصل لحل هتكون أول من يعرف عشان تمضي معانا ع الاتفاقية بصفتك زميلها في الكربكة ولا مؤاااااااخذة

نياهاهاهاهاها

مها ميهوووو

الفراغ يقول...

بجد كنت محتاجه اضحك
انت هايل
وخصوصا فى مشروع الكباريه الشرعى ده
بجد افكار هايله
الله يخرب بيت الغم وسنينه
والله يرحم البرص...خدتلك 10 حسنات لقتل البرص
وخدت 100 حسنه لاضحاك قلوب حزينه

كــركــبــة دمـــاغ ㋡ يقول...

احم احم ..

هكون سعيدة جداً اذا شرفت مدونتي ..

والف شكر ..

مرجانة يقول...

سعادة الباشا
مليونير ايه بس ياعيني يابني
انت غالوبة اوي
المليونير يعني مستور يابني
ولا مانع طبعا من طلب الستر
فالمليون بعد خماشر سنة سوف تعني الستر
ولذا اقترح تغيير اسم الجروب الا " من اجل ان يعيش سووو مستورا " وشوف انت بأة الستر بكام؟
ربنا يسترك دنيا وآخرة يابني
بالنوزبة للبورص فمبروك انك وجدته قبل أن يتعرف على بورصة أخرى ويحصل كونتااااااكت
استفسار رفيع؟
ألا المرحوم كان ذكر أم انثى؟؟؟؟

maiosha يقول...

هههههههههههههههه
لما تبقى مليونير .. يعنى معاك خمسين ستين الف جنيه كده

ههههههههههههههه

والله يا سو كان نفسى تبقى مليونير .. وابقى انا مديرة حساباتك .. ده الواحد كان هيهبر هبر

اما بقى بالنسبة لخططك المليونيرية .. وأشكالك المختلفة للإندماج مع الشعب فأنا معنديش ليك غير جملة واحدة

رشح نفسك فى إنتخابات مجلس الشعب فوووووووورا.. إنت تملك كل المؤهلات .. بما فيها الزبيبة طبعا

أسماء علي يقول...

مبدئيا الحمد الله ان ماحدش عرف مكان البرص
عشان الجايزة احم احم كده يعني
ثانيا
هههههههههههههههههههههههههههه

ثانية بس
هههههههههههههههههههههههههههه

احم احم

الموضوع جامد آخر حاجة
و فطست على روحي من الضحك لما شلت السبحة و الزبيبة

بس على فكرة اللي غير اسم الجروب و كسر أحلامك أنا باقول ما تعرفوش تاني

أنا باهدي النفوس بس يا سو
و هنياااالك يا فاعل الخير و الثواااااب

:))

Islam Basheer يقول...

يقطع شرك يا سوو،،عنجد كتير ما كان طبيعي اللي انتا كاتبو،،ههه بس على فكرة الجروب انشالله يعمل شغل كبير كتير

mohamed ghalia يقول...

عينى ياعينى على الأفكار النيرة
خد بالك انى فى ناس متسويش 3تعريفه هتعمل عليهم إكتتاب إزاى
حلو أوى الكبارية الشرعى ده هتجيب الشيخة فيفى والشيخة دينا صح ههههههههههههههههههههه

Zika يقول...

احياة ابوك يا شيخ احياة ابوك
احياة عيالك
تشغلوني معاكوا
صباح الهسس يا حج سوو

سلوى يقول...

كده من أول صدمه تتحطم أحلامك

لا لا لا

الفيس بؤ موجود
إعمل جروب تاني وتالت
وخلي الإفتصاد ينشط بقى بدل الركود ده :)

Unknown يقول...

عااااااااااااااااااا
أنا عاوز صورة البورص
بس فنان يا سوو
مصور صايع كالعادة

Unknown يقول...

طبعا ماقصدش مصور عشان صورة البورص
اللى قصدته هو المعنى الأعمق وانت فاهمنى طبعاً