الاثنين، 6 رجب، 1430 هـ

!! وكان بورصا

نتيجة لظاهرة الحرّ الظريف .. بقيت باشغل التكييف بتاع الأوضة طول مانا في البيت .. وفي الفترة اللي باخرج فيها برّه البيت بافتح الشباك على مصراعيه عشان ريحة السجاير تخرج , وفي يوم من ظاط الايام راجع البيت ولسه بافتح النور في الأوضة .. واسمع تؤتؤتؤ .. أو صوت بورص يعني
.. وماعرفش ليه البورص بيعمل الصوت ده ومابيعملش صوت محترم زي باقي الحاجات
!!! يعني هاو هاو زي الكلاب .. ناو ناو زي القطط .. أو حتى باك باك زي البطيخ الشيليام
!! ام هند .. سمعت صوت البورص ده .. وقلت ماداهية يكون البورص دخل الأوضة
!! الله .. هو انا ليه موعود بالحركات الغريبه من الظواهر الطبيعية دي
!!!!! يعني مرّه دبّور غبي - راجع الموضوع داهوّن - ودلوقتي بورص
هو مافيش غير أوضتي انا في العمارة دي كلها ولا إيه ياجرعان !!!؟؟
!!!! ياشماته يوسف المصري فيّ

.. فلاش باك سريع
في أحد الجلسات المحترمه بين مجموعة الاصدقاء المناضلين على المقهى .. ظهر بورص مشاغب على قدم صديقنا المناضل يوسف المصري .. وما أن رأيتُ البورص حتى قلت - مداعبا - هوبَّز .. فتحرك البورص صاعدا على قدم يوسف بمقدار ثلاثة سنتيمترات .. فتعجبتُ للغاية .. وقلتُ هوبَّز مرّة أخرى .. فصعد البورص - ياسبحان الله - ثلاثة سنتيمترات أُخَر , فعرفت بنباهتي ان كلمة (هوبَّز) هي كلمة السر للبورص .. و أنه لو قالها أحد لأي بورص .. هيتحرك تلاته سنتيمتر على قدم يوسف .. حتى لو يوسف ماكانش موجود في اللقطه اساسا
طبعا على الهوبَّز العاشره كان البورص خلاص وصل عند بؤ يوسف وهيخش يريّح ساعتين تلاته , الغريب ان يوسف لما شافو اتنفض وقام مفزوع .. لدرجة ان البورص الغلبان وقع على الارض .. وتقريبا استخبى في أحد الشقوق والفلقات الحائطية - وليست البشريّة على ما أعتقد وأرجو - وساعتها يوسف زعل مني جدا وحلف انه هيّورّيني الأنضمون - اللي ماعرفش هو إيه - ولكن بغض النظر عن ماتوعدني به يوسف .. فقد عرفت ولله الحمد .. أن كلمة (هوبَّز) هي المفتاح السري لتحريك أي بورص
----
.. عودة للواقع المرير
بنظرة فاحصه ماحصة على أرجاء الغرفة .. ماعرفتش اعتر عالبورص .. وده شيء طبيعي .. لأن أوضتي عباره عن لوحه سورياليه تعبر عني كمهندس ديكور ينتمي للمدرسة الحلزونية الثانوية بنات
.. قلت بس انا هقول هوبَّز , اقول هوبَّز من هنا .. ولا الهوا .. هوبَّز .. فيش حاجه .. هوبَّز ياعم
سوووو : - مُحدّثاً نفسي - يمكن بورص مابيفهمش عربي .. ما داهية يكون بورص صيني ؟؟؟
.. وهنا لقيت في صوت داخلي .. بيتفاعل مع صوتي الداخلي .. برضك
سوووو النضيف : والله لو قعدت تقول هوبَّز من هنا لبكره .. انت مشكلتك في الأوضة بتاعتك
سوووو البوهيمي : ياسلام .. مالها بقى الأوضة بتاعتي ياعم النضيف !!؟؟
سوووو النضيف : عايز تعتر عالبورص .. نضّف الأوضة و رتبّها
!!!!! سوووو البوهيمي : - مستعجبا - لا ياشيخ .. أنضّف الأوضة .. وأرتبها
سوووو النضيف : أيوان
سوووو البوهيمي : أنضف الأوضه وأرتبها .. ازاي .. أذاكر وأنجح .. طب فرضنا نضّفت الأوضة ورتبتها والبورص ماطلعش .. هبدهلها تاني ازاي ؟؟؟
سوووو النضيف : - منفجرًا - وهو انت لازم تبقى حياتك خراب .. ماتحترم نفسك يا أخي شويه .. انت فاكر نفسك صُغيّر ياجرع .. ده انت خلاص فاضللك كام يوم وتبقى اتنين وتلاتين سنه .. مش كده يا اخي بقى .. عيب يعني .. عيب بجد .. عيب قوي .. ده انا بابقى مكسوف من نفسي قصاد الضماير النضيفه بتاعة صحابك
سوووو البوهيمي : - مندهشًا - ايه يانضيف مالك .. باداعبك ياعم .. ما اداعبكش يعني !!؟
!!! سوووو النضيف : - وهو على آخره - بقولك ايه .. ماتطلّعش زرابيني وتخليني أوّريك الأنضمون
سوووو البوهيمي : - مندهشا - أنضمون .. انت تعرف يوسف المصري !!؟؟؟
سوووو النضيف : - وعينيه بتطُق شرار - إنجز ياااااااااا

وطبعا .. انسقت وراء رغبة ضميري النضيف .. ليس خوفا من بطشه أو خشية من طلوع زرابينه .. والتي لا أعلم كينونتها لا هي ولا الأنضمون الى هذه اللحظه .. ومن أطلق عليهما هذا الاسم , ولكنني آثرت السلامة في النقاش .. كما أنني بقالي شهرين بادعبس على الصندل بتاعي اللي باحب البسو في الصيف ومش لاقيه .. إضافة على ان في تلات بوكسرات اختفو في ظروف غامضه .. وعدد اتنين تي شيرت راحو في الوبا .. و سِت كابات - لزوم مداراة القرعة وحفظها من أشعة الشمس - ضاعو بعد حرب اليمن .. والعديد من ولاعات السجاير والأشياء التي يصعب العثور عليها في وسط كومة الملابس الملقاة في كل ركن من أركان الغرفه

شغلت التكييف وشغلت الكومبوتر على اغنية انا مظلوم انا مظلوم انا مظلوم بتاعة الريس حُفني .. واشتغلي بذمة وضمير يا بت يا لواحظ , وجدير بالذكر .. أنني اكتشفت بلاوي .. بلاااااوي .. ده انا لقيت كارنية كلية تجارة بنها لما كنت فيها لمدة تمنتاشر دقيقة قبل ما اعيد ثانوي وادخل فنون تطبيقية .. والكارنيه ده يعود لسنة ألف تُسعمية سبعه وتسعين ميلادي , ولقيت اربع شرابات بصوابع كنت جبتهم زمان وضاعو في أدغال الغرفة .. لكن سبحان الله .. المال الحلال مايروحش .. أي نعم الشرابات اتاكلو من العِتّه والبراغيت .. واتحللو وبقو عبارة عن نسيج مهلهل .. بس برضك ماراحوش يعني

ومما أثار بداخلي حالة من الشجن والرومانسية المضمحلّه .. أنني وجدت شريطين لعبة أتاري .. واحد بتاع الطيارات اللي بتقعد تجري ورا الحمام عشان تصطاده .. ولما تخبط في زلمُكة الحمامه أو مؤخرتها .. تقعد الحمامه تصوّت وريشها بيقع , والتاني بتاع كورة التلج اللي بتدألج من على جبل تلج .. وكل ما تخبط في أحد المتزلجين بتكبر في الحجم وبيتحسب بونط .. لعب أثريّه أثريّه يعني

وأخيرا وبعد تلات ساعات من الترتيب المتواصل .. لم يتم العثور على البورص .. ولا على الصندل ولا على الولاعات .. لكن مش مشكلة .. ان شاء الله في الحملة التنضيفية اللي على ألفين واتناشر هنلاقيهم
.. لكن البورص .. لازم الاقيه .. لأني لو نمت من غير ما اعتر عليه
!!!! ممكن يعدّي عليّ وانا نايم .. اصحى الصبح الاقيني بُرعي

ومن هنا كان لازم استعين بصديق .. عنها ورحت متصل بالمفتش كورومبو .. وقلتلو أنا شاكك في تلات أماكن .. أول مكان هو الدولاب .. تاني مكان هو الكيسه او التاور بتاعة الكومبوتر .. وتالت مكان هو الكومودينو الشمال اللي مليان عينات رخام من أيام ماكنت باشتغل في شق التعبان زمان
.. وكانت دي الإجابات

الدولاب : طب انا راضي ذمتك يا كورومبو .. انا دولاب محترم .. جاي مع السرير والاتنين كومودينو بتوع الاوضة .. ليه بقى سوووو مابيعبرنيش ولا يحط الهدوم جوايا .. ها .. ليه , ياشيخ ده لما قرر انه يدهن الاوضة من سبع سنين .. دهن الاوضة كلها وكَسّل يدهن الجزء اللي ورايا في الحيطه .. واساسا اساسا بقى .. انا كنت فاضي قبل مايحط الهدوم جوايا بعد ما رتّب الأوضة .. بورص ايه اللي هيستخبى جوايا !!؟؟؟؟

الكيسه بتاعة الكومبوتر : هاتشي .. لا مؤاخذه يا كرومبو ياخويا .. بس انت شايف الدنيا كلها تراب والواحد عمّال يعطس كل شويه من كتر العَفَره .. ده حتى المروحة بتاعة البروسيسر بتشتغل بالعافيه من التراب اللي عليها .. وياما اتحايلت على سوووو انه يجيب بلاور ويُنفُخني شويه يُطرد التراب والأرواح الشريرة اللي جوايا .. لكن هو في البلاله اساسا , ياراجل ده انا بقيت مستوطن امراض والهارد مليان فايرس .. الاقيش معاك رامات تقوّيني شويه يا كورومبو !!!؟؟؟

الكومودينو الشمال : بص بقى .. انا قرفان من أُم العينات الرخام اللي عندي دي .. ياعمنا انا كومودينو .. والله العظيم كومودينو .. معمول عشان يتحط برطمان جيل من بتاع تثبيت الشعر والنسوان .. ولو اني عارف ان سوووو اقرع اساسا ومالوش في شغل التثبيت ..أو يتحط جوايا قزازة برفان .. يتريّح بيها الغادي والعادي .. انما انا مش كده يا كرومبو .. والله ماكده .. ده انا حاسس اني مرمي في الجبل ياجرع !!!؟
----
وطبعا كورومبو عرف البورص فين .. ياترى انتو كمان عرفتو !!؟؟؟
.. اللي يعرف الاجابه يتصل بينا على تليفون زيرو صُفرميه وصفرطاشر صفر وصفرين
!! وابقو قابلوني .. لو لقيتو البورص

.. ملحوظه
!! بعد ما الأوضة اترتبت وبقيت نضيفه .. حاسس بغربه وعندي أرق .. ومش جايلي نوم
آآآه .. هقول البورص كان فين الموضوع الجاي .. بس اتصلو برضك ونفّعونا



سوووو

هناك 34 تعليقًا:

امال يقول...

والله انا بقيت خايفه من المدونة بسبب صورة البورص البشع ده حاسه كانه حيهاجمنى ...بجدلازم تموته انا حخاف ادخل هنا تانى انا بكتب التعليق على عجاله علشان اقفلها بسرعه..:(

شقاوة مراهقة يقول...

هههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههه
هههههههههههههههههههههههههههههههههههه


سووووو

انت فظيع .. شنيع .. مريع .. رهيب .. خطيييييييير .. وهمي بجد

بجد بجد انا متابعه قديمه جدا ومن زمان ولينك مدونتك موزعاه عـ كل اللي اعرفهم ..

احب احييك ع اسلووووووووبك اللي اكتر من تحفه ..

وكمان بيفكرني بحد اعرفه جدا جدا


خااااااالص تحياتي لحضرتك وكويس انك فتحت التعليق للي مش عامل مدونه لاني من زمان كان نفسي ارد عـ حضرتك

أسماء علي يقول...

على فكرة يا سو
البرص أصلا هرب من زمااان و راح لجمعية حقوق الأبراص و اشتاكلهم من الأهوال اللي شافها ف اودتك


هههههههههههههههههههه

MaNoOoSh يقول...

هههههههههههههههههههههه

مش مونكن اللي انت فيه ده

عارف انت ان مكنتش قلت تكييف
كنت قلت دة اخويا الخالق الناطق
كانك بتوصف اوضته وصف تفصيلي تحليلي

باستثناء موضوع الكومودينو يعني والفنون التطبيقية

بثراحة بثراحة ربنا يكون في عون المثكينة اللي هتتجوزك
هههههههههههههههههههههههه

حمادة زيدان يقول...

عمنا الكارثة الجميل حبيب الحتة اللى مستخبية جوة القلب
سووووووووووووووووووووووووووووووووو
البوست يجنن والله انت بتعرف تطلع الضحكة من جوة القلب ازاى ...
بس انا بفكر في البورص فين ومش عارف شكلي هخسر الالف دولار
اوااااااااااء
بس اعتقدر في الدولاب صح !!!
طيب هو كرومبو قتلوا ولا لسه مقضيها عندك
يا خوفي يا بدران لا يجيب بورصايه وهيحولوا المكان الطاهر الشريف ل !!! ربنا يسترها على اعراضنا واعراض كل البواريص
سلاموزات يا كبير

صبرني يارب يقول...

يعنى انت اقرع ادعي عليك بقى واقول ايه اكتر من كده

نص ساعه باقرا البوست وانا تعباااانه ومش قادره اقعد

والاخر الاقي يطلع بورص مش بوست

سو ما تتجوز بقى الهي يسترك عشان نفرح فيك قصدي بيك

بس يا ترى يا هلترى هانلاقي واحده ترضى بالقرعه ازااااااي

لا لا هاتلاقي ومالهم القرع يا اخويا زي الفل والنبى

المره الجايه اجي الاقي متجوز مش عايزه قلق ياعم فى البلوج

قوس قزح يقول...

انا حاسة البورص كان بيقول تؤتؤتؤ اعتراض على منظر الاوضة او بيقول لنفسه لا لا لا انا ايه هيدخلنى فى الشق المهجور من سنين ده ههههههههه

يمكن بس بياخد شوية هوا من التكييف علشان هيغمى عليه من ريحة الاوضة
دور عليه فى التكييف

سلامووووز

حواء يقول...

برص
ينهاااااااااااااار
اكيد لقيته عند الرخام في الكمود

وينكى يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
اااااااااااااااااااه يانى
فرجت عليا اللى فى المكتب عندى والمكاتب المجاورة كمان
انا مش قادرة ابطل ضوحك
انا عرفت ابورص فين
أكيد راح ليوسف المصري
ماهى كلمة هوبز ما بتنفعش الا لو طبقت كافة الشروط .. وانت لما قلتها رجل يوسف ماكانتش موجودة
بس انت اديتله الاوردر فراح يدور على الرجل
:q
صعبان عليا قوى الكيسة بتاعت الكمبيوتر
بصراحه المشبوهين التلاته صعبانين عليا
حراااااااااااااااام عليك دانت غلبتنى
:))))))

ديالا يقول...

بورص

ماهي اخرتها بقت بورص

ايه فيه ايه؟

زعلان اوي انك نضفت الاوضه

ماهو انت فاكر ان الدابور والبورص جم يصيفوا عندك

هما لاقوا بس الجو السريالي الحلزوني الثانويه بنات مناسب ليهم فقالوا يعيشوا معاك

ياابني الدنيا اتغيرت والحشرات بقت بتحب تعيش مع البني ادمين بيشاركونا وجدانيا يعني

تقبل مروري

MǿиY El-Shreef يقول...

ههههههههههههههههه

بتفكرني ف نفسي ف حكايه التوضيب دي :D

بس انا مش بوضب ابدا

بخلي اختي تيجي بقى توضب ده كله :D:D

بس رحله ممتعه ههههههههه

انت وهمي يابني بجد والله العظيم

ربنا يهدي عليك الصندل وتلاقيه ومستنيه اعرف مكان البرص

واتصلت الخطوط مشغوله :P

ست البيت يقول...

خرج من الشباك لازم
تصدق انا ايه اللي دخلني اساسا مدونتك
عموما سلامي لهند وام هند
ولحمزة يا بني بقولك طمني عليه هي دي فيها حاجة
طب ابعتلي ماسيدج
طمني عليه
خلي عندك شوية ..قطط
ولا ابعتلك لولو بعثة ؟

خمسة فضفضة يقول...

السلام عليكم ورحمة الله وبركاته


اكيد طبعا البورص خاف من منظر الاوضه فاخد ديله في سنانه وقال يا فكيك

و المفروض المره دي يا سوو تشغل اغنية انا مش عارفني انا مش انا لخالد الذكر عباسط حموده
هههههههه

مبروك علي النظافه وعقبال المره الجايه


سلام

adel يقول...

هههههههههههه
والله رائع ياسووووووو
انت ضحكتني قوي قوي
واحشني ياعم الشباب و الرياضة و نجوم اف ام
و البرص اعتقد هتلاقيه متشعلق علي مولة السرير بالمقلوب زي الافلام الاجنبي كده

Zika يقول...

انا ماشوفتش البوست ده قبل كده يا اخي مش تديني رنه طيب
انا اكتر حاجه عاجباني في البوست ده سيرة يوسف المصري ياااه ياخي اليوم ده كان فعلا يوم زي الزفت ههههههههه
ال هوبص هوبص ال
ده انت مالاكش امان يا جرع والله
احم انا ماعرفش اذا كنت نزلت بوست بعد ده ولا لأ
لكن انا بارجح ان البورص موجود في الكومودينو
ماعرفش ليه اهو اي اجابه وخلاص عايز الناس تقول عليا ماجاوبتش
وبااااااارضه انا حاسس اني بصورة البورص دي عايز اضرب المدونه بالشبشب

أحمد عمر يقول...

تعرف انا برضه سمعت صوت قريب من دا و ما كنت بعرف انه صوت بورص وان اصلا للابراص صوت هههههه


لكن ع فكره قلتنا اتصلوا وما قلت الجايزه ايه :P

بوركت

أبو العريف يقول...

سووووووووووو
انت يا عم تروح تسأل يوسف المصري
اكيد انت قلت هوبز
راح طالع تسع سنتيمترات
علي رجله
مع انه مش موجود في المشه
اقولك اتصل بيه
هتلاقيه بيريح ساعتين جوه

تحياتي يا هندزه

واحدة مجنونة يقول...

بس شكله برص فظيع اللي عمل فيك كده
ترتب الاوضة مرة واحدة علشان برص
دي مهزلة
ابقى سلملنا على البرص
بجد بوست يجنن
تحياتي

bos bos يقول...

هههههههههههههههههههههههههههههه

موضوع جامد جداااااااااااااااااااااااااااااااااااااااااا

موتنى من الضحك...

وبعدين سؤال كل ده علشان بورص أمال لو فار بقى كنت عملت إيه ده أنت كنت هديت العمارة

بس فعلا الموضوع حلوووووووووووووو قوووووووووووى

:)))))))))

مهندس مصري يقول...

ياه يا أحمد
من زمان ما ضحكتش من قلبي كده
ربنا يكرمك و يسلك لك طريقك

أنا بأقول في الرخام اللي في كومودينو
:)

مخبر قمل دولة يقول...

قاتل الله دماغك :)

مرجانة يقول...

انا بخاف اوي من الحشرات وتقريبا عندي فوبيا
وغالبا يا احمد البورص خرج من مطرح ما دخل
يعني شوف مخارج الاوضة -شبابيكها واذا كنت بتسيب الشباك ؟
اي خرم صغنن ممكن يتسلل اليه لانه لافقريات
والضوضاء والنور يهرب البورص
وربنا يعترك فيه يارب
تحياتي للمدونة المتميزة

Rannon يقول...

هههههههههههههههههههه
ههههههههههههههههههههه
ههههههههههههههههههه
ههههههههههههههههه
هههههههههههههه


بجد فظيع
بوست راااااااائع لأ أكتر من رائع

:))

Memo يقول...

سلام يا كبير
ـ ـ ـ ـ
مش عارف ايه حسن النية اللي انت فيه ده مش ممكن يكون جاسوس اصل شكله
مدرب لأنك لما قلت هوبَّز مردش.
ـ ـ ـ ـ
خلي بالك من نفسك.

faissl يقول...

الكومودينو
:D

فاتيما يقول...

طب سؤال على جنب و بيلعب فى نافوخى زى ديل البورص لما بينقطع
و لازم اسأله ...
لما الدولاب أشاسا مفيهوش حاجة و فااااااااااضى
لما سعادتك جيت تبيض الأوضة كلها مزقيتوش و بيضت الحيطة وراه و خلصت لييييييييييه ؟!!
لو الإبراص بتخليك تنضطر و أسفاً لترتيب الاوضة المسكينة دى ..
يبقى يا رب يطلعلك بورص كل أسبوعين يا شيخ
خالص تحياتى يا خفيف الدم و الروح

كراكيب يقول...

سوووو يا سووووووو
يااااااارب مها اختشي حبيبتشي (أحسن تستاهل) ما تدخلش تقرا البوست ده يااااارااااب

اصل انا وهي لينا اوضة واحدة وانا عملالها في الاوضة اللي انت عامله في اوضتك ده بالظظظببببببببط
فياعيني هي بتعاني من الموضوع ده
ونفسها تعمل جدار عازل يفصل بين سريري وسريرها
ليه؟؟ معرفش.. مع ان الكركبة دي موهبة وفن مش من السهل ابداً تكون عند اي حد

سوووو يا سوووو
تصبح على خير بقى

miro el niro kwaniro

maiosha يقول...

هههههههههههههههه

إيه يا سووو إللى إنت فيه ده؟؟

هههههههههههههههه

والله أنا متأكده إن البرص لما شاف منظر الأوضة هرب تانى
إنت أكيد دخلت الأوضة لحظة هروب البرص منها .. والصوت اللى انت سمعته ده كان صوت البرص ساعتها وهو بيقول " يا منجى من المهالك يارب .. خرجنى من الأوضة دى يا رب على رجلى مش على ضهرى "

ههههههههههه

بس سيبك إنت أهم حاجة إنك نضفت الأوضة.. مع إنى برضه شاكة فى مدى ترتيبها يعنى

وفى إنتظار الحل
مع تحيات المفتش كرومبو

يونيك اوى .... يقول...

اولا حمد لله على السلامة دانا افتكرت نك مقاطعنا..
ثانيا انا عرفت البورص راح فين .. اكيد ابن الايه ماستحملش ريحة الاوضة قال يرجع بقى ويصالح البورصة واهى بردو مش حتبقى اقسى من ريحة الاوضة ..
وبالمناسبة انا بردو بدرس ديكور فى فنون جميلة ومش محتاج تعرف ان عندى دولاب كامل بخاف افتحة .. اكيد فى يوم حينطق بس عشان يطلب الرحمة

آسـلامـ يقول...

حبيب قلبى سووو اذيك وحشنى كلامك الحلو
المشكلة كلها انت مفهمتش كويس
البورص امريكى و اوباما زاقوه عليك من ساعة اخر توبك بس انت لو كنت كلمت الوررص بالانجليزى كنت ممكن تتفاهم معاه كنت تقوله HobZ HobZ HobZ

Soooo يقول...

الف شكر ليكم جميعا
وهقول الاجابه كمان شويه


اسلام

يعني اعمل ايه ؟؟؟
بجد قوللي اعمل ايه ؟؟؟
يا استاذ اسلام .. ياريت المواضيع اللي انت واخدها مني
واللي هي المواضيع دي
حكمة سوووويه
ساعات الغرام
عزيزتي هيفاء وهبي
مجرد تشبيه

ياريت تشيلهم من عندك خالص

عشان انا اتكلمت معاك بالهداوة وقلتلك شيل مواضيعي او على الاقل اكتبهم زي مانا كاتبهم بالظبط وتقول انهم منقولين من عندي وتحترمني ادبيا زي مانا احترمتك ادبيا واتعاملت معاك على انك اخويا الصغير
لكن انت ما عملتش ولا حاجه من اللي قلتلك عليها ومااحترمتنيش
ولا ادبيا ولا اي حاجه
وبجد كده حرام
يعني اعمل ايه .. ما اكتبش خالص عشان ترتاح مثلا ؟؟؟؟؟

رامى ظاظا يقول...
أزال المؤلف هذا التعليق.
رامى ظاظا يقول...

لما تدور على حاجة تضحكك وتلاقى كل القنوات الكوميدية مملة ورتيبة اوعى تحس بالاحباط واقرى اى حاجة كتبها سوو
أكيد هتضحك من قلبك

entrümpelung wien يقول...

شكرا على الموضوع
entrümpelung
entrümpelung
entrümpelung wien