الاثنين، ٨ جمادى الآخرة ١٤٣٠ هـ

!! كركشنجي .. دبح كبشه

.. نفس صاحبي اللي سألني على ابراهيم عبرازق وأغنية أوعى الزغروف .. سألني برضه وقال
وانت بقى اشمعنا عايز ترقص في فرحك
- في الموضوع ده - على اغنية كركشنجي دبح كبشه .. مع ان عدويه عمل هلس كتير ؟؟؟؟؟

هنا لقيتني اتغظت قوي واتضايقت على كلمة هلس .. مش لأن عدويه قديس ولا نبي استغفر الله العظيم .. بس لأن الاغنية دي بالذات بتحمل معاني كبيره جدا جدا من وجهة نظري .. وفعلا اغنية بتعبر عن شعب مصر .. وباتكلم بجد مش باهزر ولا باتريق .. وده لأن الاغنية دي ليها قصة مصريه مليون في الميه .. وقصتها تبدأ من أول ما الشاعر الكبير مأمون الشناوي شاف المطرب أحمد عدويه على أحد المسارح .. قبل ما يبقى عدويه مشهور ولا حاجه .. كان لسه صغير ومافيش حد سمع عنه .. ساعتها مأمون الشناوي قال لمدير المسرح ان الواد ده - قصده عدويه - هيبقى مطرب حلو قوي .. وهيعبر عن الشعب المصري البسيط

مأمون الشناوي مش أي شاعر ياجرعان .. مأمون الشناوي شاعر كتب لمطربين كبار وكتب أغاني قوية جدا .. يعني كتب اغاني بعيد عنك و دارت الأيام لـ ام كلثوم .. وكتب انا لك على طول و كفاية نورك عليا لـ عبد الحليم حافظ .. مش شاعر صغير يعني ولا بيجامل ولا ليه مصلحه في انه يقول ان عدويه بيعبر عن بساطة الشعب المصري

طبعا عدويه لما سمع الكلام اللي قالو عمنا مأمون الشناوي انبسط قوي .. واتحمس انه فعلا يوّصل صوته للناس .. وبمجرد ما صوته وصل فعلا وابتدت الناس تعرفه .. راح لعمنا مأمون الشناوي وشكره على انه وقف جمبه زمان .. قام عمنا الشناوي قاللو انه بيعبر عن الشعب المصري .. ولازم يحافظ على طبيعة صوته والاغاني اللي بيغنيها .. قام عدويه طلب من عمنا مأمون الشناوي انه يساعده في ان صوته يوصل فعلا للناس .. وهنا كانت بداية الاغنية دي .. اغنية كركشنجي دبح كبشه

.. بصيت لصاحبي وانا أنفخ دخان السوجارة الكولوباطرا البوكس وسألته
سوووو : انت عارف الاول مين هو كركشنجي اللي في الاغنيه ؟؟؟؟
----
كركشنجي ده باختصار راجل فقير غلبان من اللي بنشوفهم بيسرحو الصبح بمبخره وعليها شوية بخور .. يدخل المحلات ساعة صُبحية وهو قاصد رب كريم ويقول اصطبحنا وصبح الملك لله .. عم كركشنجي كان فقير وعنده كوم عيال .. بس عنده عِزة نفس رهيبه .. لدرجة ان تجار المحلات لما كان بيجي العيد الكبير ويحبو يدوله منابه من اللحمه .. ماكانش بيرضى .. وكان بيختفي من السوق طول فترة العيد كمان
وفي مره من المرات اتفقو التجار الكبار انهم يعملو حاجه لعم كركشنجي عشان ولاده يحسو بفرحة عيد اللحمه .. قامو جابوه .. وكل واحد قاللو انت ليك عندي مبلغ مش عارف قد ايه .. ويطلّع نص جنيه .. وواحد تاني يقوللو ليك عندي ربع جنيه .. وتالت يقوللو ليك عندي ريال .. هوب هوب .. جمّعوله سبعه جنيه .. حق الخروف الصغير وقتها
وقالوله كده انت ياعم كركشنجي تقدر تجيب خروف العيد بتاعك .. وتدبحو بنفسك كمان .. لكن هو خاف يكونو بيعطفو وبيتصدقو عليه .. قامو ضحكو عليه واقنعوه بالطريقه ان ده حقه وانهم مش بيتصدقو عليه ولا حاجه .. وصدقهم عم كركشنجي بعد ما لقى ان شيخ الجامع واللي كان وسطيهم هم كمان .. بيقوللو ان ده حقك فعلا

.. فرح عمنا كركشنجي بالموضوع ده .. وجه العيد وهو جايب الكبش بتاعه
.. واتجمعت الناس بعد صلاة العيد وهم فرحانين .. والعيال مبسوطين وبيغنو
كركشنجي دبح كبشو .. يامحلى مرقة لحم كبشو
كركشنجي دبح كبشو .. يامحلى مرقة لحم كبشو
!! وزي ماهو باين .. الغنا والتهليل كان في صيغة انه دبحو خلاص .. مع انه لسه مادبحهوش فعليا
ده مش كده وبس .. ده عم كركشنجي اصلا مش عارف يدبح ازاي !!؟؟
.. عَكَشو
.. يعني عم كركشنجي مِسِك الكبش وحضنو عشان يعرف يسيطر عليه
فَركِش
قام الكبش مالص وفَركِش المسكه او العَكشه بتاعة عم كركشنجي
.. نَكَشو
.. عم كركشنجي اتغاظ من الكبش .. قام قرصه وهو بيهزر معاه ونَكَشه في قرونه
طَنِّش
الكبش طنش هزار ومناكفة ونكش عم كركشنجي
.. قَلَشو
.. يعني كركشنجي حب يدبح الكبش على خوانه .. ويقلش أو يِعَدّي السكينة من تحت رقبة الكبش
اقلـــــــــــــــــــــــش
من لخفنة عم كركشنجي ولخبطته لأنه مابيعرفش يدبح .. السكينه قلشت والخروف هرب في الشوارع .. والناس بتجري وراه .. وعم كركشنجي بيجري هو كمان وراهم

هنا بقى تيجي عبقرية عمنا مأمون الشناوي .. الحالة باختصار ان الكبش بيجري في المنطقه .. الناس بتجري وراه وهي بتضحك وبتهزر من الموقف .. وعم كركشنجي وراهم بيجري هو كمان .. بس بيعيط ويندب حظه

.. سبع سلاطين استسلطناهم من عند المستسلطنين
عم كركشنجي بيندب حظه على السلاطين - جمع سلطانية - اللي كان جايبهم عشان يحط فيهم اللحمه بتاعة الخروف
.. تقدر يا مسلطن يا مستسلطن
.. يعني تقدر ياللي بتتريق وبتضحك عليّ عشان الكبش بتاعي هرب
تستسلطلنا .. سبع سلاطين زي ما استسلطناهم من عند المستسلطنين
!! تجيب الكبش بتاعي اللي بيجري .. عشان ادبحو واحط لحمته في السلاطين اللي معايا

سبع دبابيس استدبسناهم من عند المستدبسين
يعني سبع دبابيس عشان يدبّس بيهم فروة الخروف من أطرافها بعد ما يندبح .. وبالتالي الفروه يتحط عليها ملح وتنشف علي هيئتها وهي مفروده .. ودي هي عملية دبغ الجلود
.. تقدر يا مدبس يا مستدبس
.. يعني تقدر ياللي بتتريق وبتضحك عليّ عشان الكبش بتاعي هرب
تستدبسلنا .. سبع دبابيس زي ما استدبسناهم من عند المستدبسين
!! تجيب الكبش بتاعي اللي بيجري .. عشان ادبحو وادبّس الفروة بتاعته

سبع لحاليح استلحلحناهم من عند المستلحلحين
يعني سبعه جنيه او لحلوح زي ما طلعت عليه زمان .. جبناهم من عند التجار اللي قالوله انها فلوسه وهو صدق كلامهم وبقى بيتحسر عليهم بجد
.. تقدر يا ملحلح يا مستلحلح
.. يعني تقدر ياللي بتتريق وبتضحك عليّ عشان الكبش بتاعي هرب
تستلحلحلنا .. سبع لحاليلح زي ما استلحلحلناهم من عند المستلحلحين
!! تجيب سبعه جنيه تانيين عشان اشتري بيهم كبش او خروف تاني

----
الجميل بقى في الاغنية دي .. انها تعتبر مآساة حقيقيه بتعبر عن الغلابه في الشارع المصري بجد .. لكن لما جه حسن ابو السعود الله يرحمه عشان يلحنها .. ماعملهاش موال عشان يغنيه عدويه .. بالرغم من قوة عدويه في غناء الموال .. لكن ابو السعود لحنها في لحق راقص عشان تفضل وتعيش .. والناس اللي بعديهم يسمعوها ويفهمو الحاله اللي كانو قاصدينها
.. حالة الشعب المصري اللي بيعطف عالغلبان
.. حالة الغلبان اللي زعلان عشان الخروف بتاعه راح خلاص
.. حالة ان الخروف بجلالة قدره .. كان بسبعه جنيه
مش بالفين تلاته زي دلوقتي

.. الحكايه مش حكاية غنوة ورقص وهشك بشك وهلس .. الحكايه في اللي بين السطور
بس للي يشغل عقلو

ملحوظه

الحكايه دي حكهالي واحد كان في فرقة حسن ابو السعود زمان قوي .. وفضلت معلقه في نافوخي
.. ممكن تكون صح .. وممكن تكون هجص .. بس هي عجباني زي ماهي كده
.. على الاقل .. بتخليني افرح لما افتكر المصريين كانو ازاي مع بعض زمان
وبتخليني اقول يارب .. نرجع لبعض تاني

سوووو

هناك ٣٨ تعليقًا:

adel يقول...

ههههههههه

جامدة قوي ياسووووووو

بجد تحفة اوي القصة دي و ممكن اصدقها بسهولة
لانها فعلا واقعية جدا

:):)

و عدوية عبقري من يومه ....انا بعتبره من احسن مطربين مصر

مع احترامي لاي هرم ولا مؤاخذة :):)

Unknown يقول...

تصدق انا كل الوقت بسمع الاغنيه دي مش عارفه بتقول ايه بتعجبني وبيعجبني الموسيقى بتاعتها الي بتقول نوع من التهكم والتريقه على حال البلد الي مش عارفه هو ايه برضه
بس كفايه ان عدوية مغناش اي هجص
تسلم دماغك والله يا سوو
اخيرا بقيت افهم الاغاني دي

الشعب لابد له من حكومه تشكمه يقول...

ايه ده؟؟؟؟؟هى اسمها كركشنجى.تصدق طول عمرى فاكراها كركشندى:)
وعمرى مفهمش الاغنيه دى غير طبعا بعد شرحك المفصل بس الحاجه الوحيده اللى جات فبالى بغض النظر عن انك بتقول انها معبره عن حال الشعب واللى هعمل نفسى مصدق:)
المهم اللى جيه فبالى هموت واشوف حد الدغ فى السين يغنيها اصلى حاسه انها مكتوبه بالعند فى حد الدغ:)

TAFATEFO يقول...

والله انت اللي بتخليني أفرح

:D

تسلم

Ehab يقول...

هايله قوي يا سووو
بجد بجد عجبني الموضوع قوي
قد كده ممكن كلام بسيط نسمعه على انه هبل وخلاص يبقى ليه معاني حلوه كده وقصه تحفه زي دي

الله عليك يا سووو

تسلم يا غالي

سلااااااااااااااااااااام
اخوك ايهاب

Me7'o يقول...

والله 100 100 بس طبعاً مش عارف أقراها أصلاً وخصوصاً المستسلنطتيين دى.... أسبلها كده..... هههههههههه

هيّ يقول...

عمرى ماعرفت معناها بالرغم من انى دايماً حسيتها حاجة توجع القلب على شعبنا الغلبان.
إسمه ايه اللى قالك القصة؟؟

شكراً للشنكوتى اللى جابنى هنا :)

زقطـوطـة يقول...

بجد ؟
الله عليك
: )))))))))))))))))))))))

Desert cat يقول...

يعنى انا لما بسمع الشعبى بتاع دلوقتى وانا عايز سيجارة بنى والمطربة العبقرية بتاعة الميكروبااااز اللى طول الوقت تتأوه مش عارفه الحقيقة من ايه بس فعلا انا سمعت من فترة واحدة فى الميكروباص طول الاغنية تقول اه يانا تعبانة ومش فى اى كلام خالص غير انها بتعرف مصر لكها انها مريضة بمرض عضال المهم وماعلينا ربنا يشفيها بحس ان الزوق العام انحدر
لكن لما اسمع عدوية وخصوصا اغنية يابنت السلطان بترحم على زومان وايام زومان وعايزنا نرجع زمان تيرررا رااا

tamer.sala7 يقول...

علي فكرة انت جامد اوي مع اني واخد علي كتابتك الساخرة وبدخل ديما علشان اضحك لكن المرة دي بجد اتوجعت اوي علي حالنا وقارنت بين اللي كنا فيه واللي بقينا فيه بجد اتضايقت جدا


* ملحوظة كركشنجي تطلق علي اي جزار اسكندراني

تامر علي يقول...

أول مره أسمع الحكاية دي ..لكن فعلاً جميلة ..وأنا كنت فاكرها أغنية هجص طلعت ذات أبعاد ثلاثية :)

كويس الواحد بعد كده ياخد باله من كبشه:)

jehan يقول...

اممممممممممم والله يا سو انا معرفش من الاغنيه دى غير اول كوبليه وبس وكنت هسالك هو باقى الكلام الى انت كاتبه ده بجد الاغنيه ولا تريقه بس اتضح ان دى فعلا الاغننيه والى بستغربله عدويه عرف يغنيها ازاى ؟؟؟؟

المهم على فكره انا كنت اعتقد ان كل الاغانى الشعبيه هجص واغانى عدويه وكمان اغنيه سوو يا سوو بتاعه منير كنت فاكرها اى كلام فى اى كلام
طلعت انا الى مخى اى كلام
!!1

بسمه عبدالباسط يقول...

تصدق اول مرة اعرف معنى الاغنية منك
هههههههههههههههههه

بس بجد جامدة

سلوى يقول...

حلوة فعلا

صحيح لكل شئ سبب

فوكيره يقول...

رااااااااائعه الحكايه

كنت هسألك عرفتها منين ان مكنتش قولت

انا اخترت اصدقها ..

مهندس مصري بيحب مصر يقول...

أول مرة أعرف معنى الكلام بتاعها مع إني حافظها و بأحبها
تشكر يا باشا يا مسلطن يا مستسلطن
:)

احساس طفلة محبة للرومانسية بس واقعية يقول...

مكنتش اعرف انها اغنية لعدوية
ولا كنت اعرف ان معناها كدا
اذهلنى معنى الكلام
بس اللى اذهلنى اكتر قدرة الشاعر على صياغة المعنى دا فى كلمات بالشكل دا

انا برضو عجبانى الاغنية
سواء المعنى حقيقى او لا

بس البساطة والدقة والمعنى اللى فى الاغنية رائعين جدا

شكرا ليك
تقبل مرورى

ابن حـجـر الـعـسـقـلانـى يقول...

أحييك بشدة و من كل قلبى يا سوووو

بجد أحييك

Diyaa' يقول...

تسلم يا كركشنجي :)))))))

بس ما قلتليش..هو عكشه يعني ولا انتهت علي إيه ؟

أسماء علي يقول...

الله عليييييييك

بجد يا سووو عجبتني الفكرة و خلتني اترحم على زمن كان و ما فضلش
:)

بس أنا بحب الأغنية دي أصلا

و ماكنتش أعرف حكايتها
أول مرة سمعتها ماكنتش بصوت عدوية بس كان مع فريق سلالم و بعد كده جبت النسخة الأصلية :)

عالم ماريونت يقول...

يا خبر ابيض

اية الاغنية التحفة دي؟
انا مكنتش اعرف كدة؟
وبصراحة انا كنت شايفة انها اغنية تافهه
بس بجد الاغنية في منتهى الروعة

كان نفسي يلاقي الخروف في الاخر
بس انا عندي احساس كدة او امنية انه بعد الاغنية ما خلصت هيلاقي الخروف ويدبحة لولاده

انا قلبي بيقولي كدة

مدونة متميزة

رنا

ساعد نسرين الايمن يقول...

مرة كنت بتفرج هلي التليفزيون
لقيت مين
لقيت حكيم تقريبا مع انجي علي
اتكلم عن الاغنية ديه
وعلي فكرة هو قال ان كرشنجي ديه معناها : الرجل اللي بيشتغل في الكرشة ولحمة الرس والممبار
فاكر اول مرة سمعتها كانت في مدونة تياترو صاحب السعادة
==============================

وكمان دبحه بره السلخانة ؟
هي ديه حالة الشعب المصري
ارجو ان تنزل في الفترة الجاية بترجمة كل الاغاني الوطنية المصحبة لزيارة اوباما
صبح صبح يا عم الحج

يونيك اوى .... يقول...

هاى يا سوووووو
اتا دخلت البلوجر دة بالصدفة وبجد دى احلى صدفة
لانى تعرفت على مبدع عظيم زيك
لو تسمحلى وتقبلنى معاك من اشد المعجبين بطريقتك وبفكرك ماشاء الله انت عبقرى ولازم تكتب سينما ودراما فى رأييى حتمسح كل الموجوديين
وايه يا سووو التحليل المنطقى للاغنية دى اول مرة افهمها
انا اصلا اتعودت انى مارميش ودانى مع كلام الاغانى دلوقتى عشان بقت تقرف بس خلاص بقى حرجع اركز تانى ... وميرسى يا كبييير

لاسع افندى يقول...

القصه مش غريبه وسهل تتصدق لان الخير موجود فى كل مكان ومولود فى مصر


تقبلوا تحياتى ومرورى

Soul.o0o.Whisper يقول...

"الحكايه دي حكهالي واحد كان في فرقة حسن ابو السعود زمان قوي .. وفضلت معلقه في نافوخي
.. ممكن تكون صح .. وممكن تكون هجص .. بس هي عجباني زي ماهي كده
.. على الاقل .. بتخليني افرح لما افتكر المصريين كانو ازاي مع بعض زمان
وبتخليني اقول يارب .. نرجع لبعض تاني"


ياااااااااااااااااااارب

بوست جميل



دمت بود

قلب ينبض لله يقول...

وانا كمان ها أصدقها زي ما انت حكيتها كدا
قصة جميلة
وعدوية صوته جميل وبيوصل فعلا للناس
بس هو دا السبب اللي هايخليك ترقص علي الأغنية في فرحك;):)

Layla يقول...

يا رااااجل... بقى الحكاية كده
:)))))

كيكى عوووووو يقول...

حلوة اوى ياسووووووو
**بس الى يفهم بين السطور!!1

قلب ينبض بالحب يقول...

هههههههه تصدق والله انت كويس بقى لاني اول مرة افهم معنى الاغنية دي وحتى لو مش صح بس دخل مزاجي بجد بوست في الجون وتسلم ايدك يافندم

ساعه الغروب يقول...

الناس نوعين ناس تتعب لما تفهم هما طبيعتهم كدا وناس تانيه ترتاح لما تفهم

انت بقى بترتاح لما تفهم بس بتتعبنا احنا :)

كل اغنيه عندك مدور على معناها مش ممكن بجد يا احمد
ماشاء الله

ربنا يديك الصحه وتفسرلنا كلمات الاغانى الجديده كمان اصلها بدات ما تبانش من بعضها

شكرا ليك ولمعلوماتكلا القيمه دى بجد
لانه ناس كتير كانت فعلا متهمه عدويه فى الاغنيه دى بالاخص على انه ماكنش وقتها
شكرا ليك

بنت مصريه يقول...

الله يا سووو هههههه
معناها جميل قوى هههههههه
جامده جدا بوست عسل والله يا سوو انا هقولها للى اعرفهم كلهم
اتمنى تنورنى

شمعى أسعد يقول...

بغض النظر عن دقة القصة

الجميل فى الموضوع هو تحليلك واسلوبك

يعنى مش كل حد كان هايسمع الحكاية دى من حد كان هايقدر يكتبها كده

مقال رائع وسلس

انا إتأخرت كتير على دخول مدونتك

Rannon يقول...

بجد بوست تحفة استمتعت بيه جدا وخليتني قالبة النت كله عالأغنية مع اني ماليش في الشعبي اللذيذ :)

تعرفش الاقيها فين؟؟

Rannon يقول...

مش تقول انها عندك :$
مكنتش واخدة بالي :$

غير معرف يقول...

اول مرة اعرف قصة الاغنية دي انا بحبها جدا
شكرا لنشر القصة :)

غير معرف يقول...

ههههههههههههه شكرا جميلة اوى اوى دلوقتى فهمتها تســــلم

محمد فاروق الشاذلى يقول...

طول عمرى مش فاهم معانى كلمات الأغنية وكنت فاكرها هجص وخلاص
طلعت أغنية بجد ومعانيها تقيلة كمان
يمكن علشان كده ماكنتش فاهمها؟؟

غير معرف يقول...

ههههههههههههههااااااي


اغنيه جامدة جدا لـ احمد عدويه