الأربعاء، 25 جمادى الأولى، 1430 هـ

!! أوعى الزغروف

: واحد صاحبي سألني من كام يوم وقال
مين بقى ابراهيم عبرازق بتاع اغنية اوعى الزغروف اللي كنت هاتجيبه في فرحك انت وهيفاء وهبي ؟؟؟
.. همممم .. طيب .. ده ابراهيم عبرازق
.. أما كلام الأغنية .. فقال الشاعر .. فيما اتنيّل على عينه وقال

ايه اللي الواحد بيعملو ده !!؟
.. ده ربنا خلقنا بالعقل
!! نضيّع احنا العقل ده بالكيف
في ايه !!!؟؟؟
انا تايه كده ليه !!!!؟؟؟؟؟


زهقت طهقت خلاص ملّيت ياخواننا من الإدمان
والبُنّي* والاخضر* والميّه* .. والجري ورا النسوان

اوعي الزغروف* يغريك
هتروللو* هيلعب بيك

راح يسكن في دماغك
و دماغه* مش هتعليك

هيجيب وشك في الارض .. البُنّي البسكويته
وهتمشي يا واد بالعرض .. لا تكون فاكره شاكاليطه

*عالشيشه* ان كان والكنشه* .. اهو كللو بيشقلط
والميّه هتهري في كبدك* .. وتخليك تتمرمط

اوعي الزغروف يغريك
هتروللو هيلعب بيك

راح يسكن في دماغك
ودماغه مش هتعليك

.. حبيبي يا عمرو يا سعيد
.. يابو محمد وبسمله
ايه العسل ده !؟
!! انا ابراهيم عبرازق باحييكم

*تيجي تقابل القمورة أو تتهور .. قول ياد حاحا
تقرب منها .. تلاقي ريحة بؤك .. يا واد فواحه

تيجي تقابل القمورة .. وتقرب جمبها
*وان جيت تتهور حبّه* .. تلقاك زي اختها
خمرة وبُنّي وعرانيس* .. تحلقلك وقتها

اوعي الزغروف يغريك
هتروللو هيلعب بيك

راح يسكن في دماغك
ودماغه مش هتعليك

زهقت طهقت خلاص مليت ياخواننا من الادمان
والبني والاخضر والميه .. والجري ورا النسوان
-----
: مفردات الكلمات

البُنّي : هو الحشيش .. نسبة للون البُني الذي يبدو عليه
الاخضر : البانجو .. نسبة للون الاخضر الذي يبدو عليه .. برضك
!! الميّه : لفظ للتعبير عن الخمره .. وكأن كلمة الخمره حرام .. بينما الميه حلال
الزغروف : الإسم الشعبي لسوجارة أو لفافة المخدّر
!! هتروللو : أي هَتلِفّو .. تجيب ورقة بَفره وتحط فيها تبغ السجاير مع المُخدّر .. وبالشفا إن شاء الله
دماغه مش هتعليك : استعارة مكنية .. وكأن الزغروف كائن له دماغ , والمقصود بلفظ (تعلّيك) أي
!! تجعلك طاير في العلالي .. وتشعر انك مُحَلِّق مع ذبابة الفاكهة .. في موسم تزاوج المشمش
!! الشيشه – الكنشه : هي طرق لضرب الحشيش .. يتعذّر قولها في هذا المكان .. أحسن يتقبض علينا
!!!! بيشقلط : أي بيفلقط .. أي بيكحرت .. ويقال .. شقلط يتشقلط .. فهو صباحو مراجيح
!! الميّه هتهري في كبدك : اعتراف صريح من الشاعر بأضرار الخمره .. والميّه على حد السواء
!!! حاحا : لفظ يُطلب من أي شخص يبدو عليه عدم الإتزان أن ينطقه .. أمام سيادة الأمين
ان جيت تتهور حبّه : أي أن أردت أن تتحبرش بالحونشه أو الموزه بتاعتك
تلقاك زي اختها : لن تستطيع يا ولدي .. فالمخدر جعلك مثلها , وقد يكون الشاعر أراد بهذه الجملة توضيح
!! طرق الوقاية من التحرش .. أي أن تُعطي الفتاة زغروفا للشخص الذي سيتحرّش بها .. فيتزغرف
عرانيس : جمع عرنوس .. والعرنوس هو زهرة أو نبتة البانجو .. ويقال زهرة الزهرة .. أي تلك
!! البضزايه التي تخلو من البذور والرايش و .. وكفايه كده لا الدولاب .. قصدي المكان ده .. يتقفل
-
الجزء المكتوب باللون الاحمر الغامق .. هي أي هرتله بيرتجلها ابراهيم عبرازق .. من منطق انه
!!! صاحب الليله .. والمؤلف وبائع المخدرات والعبد لله .. أبرياء من هذه الهرتله


ملحوظه .. بالدخان الأزرق

.. أعتقد إن نوعية الأغاني دي .. واللي بتحارب المخضروات .. هتوصل أكتر للمستمع
!! لو كان موّلع زغروف
.
سوووو

هناك 31 تعليقًا:

mayada يقول...

والله يابني انت فكرتني بابويا وهو قاعد يشرحلي النصوص في الثانويه العامه وانا عشان العربي ده احبه احبه قوي كانت تنتهي الحصه برمي الكتاب من الشباك
ومن هذا المنطلق في ظل خطه الوزاره لتطوير التعليم يضاف هذا النص المزغرف
الي كتاب الثانويه العامه حيث انها اول مر احل الزغرف بالنسبه للشوباب عشان يتزغرف وهو ع نور

ست البيت يقول...

وانا اقول مين عبد الرازق دا
وايه الكلام البيئة دا يا باشمهندز
ياخسارة تربيه أبو سوووو وأم سوووو
زغروووف !!!!!!!
احيه يا بو سوووو
ابنك بيتكلم في الزغروووف
انت بتجيب الكلام دامنين؟
اشحال ما كنت متربي في المعادي ومربي قطط فاضل
هو فاضل ايه تاني
هيفا واتكلمت عنها
زعروووف
وعرفتنا معناها
تصدق اني كل ما كنت اتفرج ع اللمبو
مش عارفة ايه الزغروف دا
بس كل معلوماتي انه ليه قشر

حلوة بس خطابك هيفا احلى
والبوست اللي قبلة أحلى وأحلى

سوووو
ايه رأيكم في تجمع تدويني محندق في اسكندرية يوم 5/6؟

^ H@fSS@^ يقول...

LOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOOL
مش قادرة
بجد مش قادرة
ايه المناظر دي؟؟
بجد مسخرة
انت دمك شربات يا سوو
بجد دماغك عالية اوي
انا فطست من الضحك
ميرسي على التعريف الخطير ده

MǿиY El-Shreef يقول...

هههههههههههههههه

انا الحق احد بعضي واجري من هنا

احسن يااما هتعدي يا اما هتمسك من قفايا :))

fadfada يقول...

هههههههههههههههه ما تقلقش يا سو اخونا مش بيمسكوا بتوع الزغروف هما بيمسكوا بتوع الجوامع بس هههههههه

المهم انت افدتنى الصراحه فى المصطلحات بفكر اخلى البوست ده مرجع ليا هههههههه

قلب ارهقته الاحلام يقول...

هئ هئ هئ

ماشاء الله درس وافي ومفيد ياحلاوة ياولاد

انا اروح اغنيها لاهلي يمكن يشرحوني ولا حاجه ^^

ايه الفن الراواقي دة مش مونكن

Desert cat يقول...

يا نهار مش باين له الوان يا جرعاااان
لاهو باين بنى ولا اخضر ولا ممطر نسبة الى الميه
هو مين ابراهيم عبرازق ده انا مش سميعه يا جرعان
بس سيبك انت يا كبير طريقة شرحك للكلمات زى السكر تنفع مدرس لغة عربية بجدااااارة
خلاص تم اعتمادك

الشنكوتي الكبير يقول...

اقول ايه بس

على رأي عمرو دياب
نقول ايه حبيبي خلاص مفيش حاجه ناكولها


ايه التعريفات المذهله دي

يا جاااااااااااااااااااااااامد

تسلم يا معلم عرنوس

ههههههههههههههههههههههه


سلااااااااااااااااااااااااااام
اخوك ايهاب

همس الاحباب يقول...

افدتونا افادكم الله
ده قاموس ومصطلحات فشر القاموس المحيط
اخرتها زغروف يا سووووو
روح يا جرع وتعالى بسرعة
هههههههه
بجد بقينا مسخرة واحنا طالعين من المدونة
ربنا يسعدك دنيا واخرة
سلاموووووووز

فاتيما يقول...

و النبى حلوة حصة العربى دى
و آخر ألسطة
ألحق أعلق بسرعة و افيش الهوامش قبل ما يكبسوا عل المطرح و اقولك
أضحكتنى يا فتى
و ربنا يسعد قلبك دايما
أنا سمعت كوبليه من الغنوة دى فى العتبة و كنت ف حالة إزبهلال من مستوى اللغة الرفيع اللى وصلتله الأغانى
خالص ودى
و تحياتى
و إحتراماتى
و أعجاباتى بخفة الدم المصرية الأصيلة يا سوووو

ستيته حسب الله الحمش يقول...

اجمل ما في البوست الهامش التوضيحي والتعبيرات الجمالية
فكرتني بكتاب العربي والإستعارة والكناية والتورية
اروح اتوارى انا كمان قبل ما البني والاخضر يطلع البلا الازرق

ربنا يكرمك بتضحك البشر في النكد الحيسي اللي احنا فيه

مهندس مصري يقول...

أول مرة أسمع عن الشخص ده و الأغنية دي منك
بس مش بعيد تنتشر لإن الحاجات الغريبة دي بقت هي اللي بتسمع اليومين دول

الشعب لابد له من حكومه تشكمه يقول...

ميرسى جداااااااا على الفن الراقى اللى انت قدمته لينا بصراحه..واحييك على الترجمه لانى كنت هسألك على بعض الكلمات اللى استغربت جداااا ازاااااااااى انا معرفهاش ؟؟ازاى موصلتش للرقى دا كله...

عاوزه اغنيه ابو امك المره الجايه لو تسمح؟؟وعلى فكره دى اغنيه بتيجى على مولتى ههههههههههههه

لماضة يقول...

انا اتسطلت على الاغنيه
بقالي فتره بسمع الكلمه دي
على طول انت متفرد بمعجم اللغويات دي يا سوو
وتقولي مينفعش نقولها في المكان ده
:)))

كيكى يقول...

اية الجمال دة
اية البرنس الى مصور ده
لا لا لا انت مش خايف على المراهقات منه
**انا وقعت فى حبه علطوللللللللللل
بالذات الحبل
!!!
عوووووووووو

ola_barakat يقول...

والله بجد نورتنا يا بني
يعني نعتبر ده درس مجاني في شرح طرق الزغرفه المختلفه وعمايل الدماغ مابين الالوان الطايره مع دخان الزغاريف ؟
كويس جدا
بس بجد دمك عثل وواضح اوي ان دماغك عاااااااااااااااااااااااليه انت اكيد ضارب زغروف قبل ما تكتب الموضوع ده ؟صح ؟ اعترف اعترف مافيش حد سامعنا

adel يقول...

حلو قوي قاموس المفردات التحشيشية ده
الي الامام ياسوووووووووو

ههههههههه

و سلمي علي عبرازق

كيــــــــــــارا يقول...

كويس انك نزلت بالترجمه :)

Kontiki يقول...

كأنك مترجم عبرى والله :)

عندما تكون ميمى وحاجات كتير مع بعضها كده يقول...

احنا بعد كده ننزل كتب زى كتب نزار قبانى فيها الأغانى ومعانيها بجد دارس كويس هههههههههههههههه

سما أحمد يقول...

ههههه
لا تعليق يليق
هادي ثقافتنا الجديدة
وتعريفاتك روووووووعه
نقد ساخر انا بحب هيك نوع من النقد
لانه بيوصل اسرع
حقيقي توبيك روعه وطريف وخفيف
تسلم ايدك ياااا رب والف شكر عالبسمة يلي رسمتها على شفاهنا

Memo يقول...

صباااح الفل انا بمسي ياكبير .

هي دي وسائل الثقافة الحديثة.

بس دي ممكن تخلي اللي ميعرفش يعرف.

وفي وجهة نظر اخرى بتقول احنا عندنا بطالة خلي الشباب يروول وكده نبقى بنوجد فرص عمل للشباب.

مساااء الخيييير.

mimi يقول...

ما شاء الله .. البوست ده ينفع قاموس لكلمة لا تصلح لقولها هنا وهناك

بت خيخة وأي كلام يقول...

انت بتعمل كدة ازاى يا سوووو؟

ده انا فطست من الضحك

الصورة اساسا فطستنى من الضحك
عبرازق واقف وقفة رجل واحد
ومتحبل بالحبل وفرحان بشباب امه

وكلمات الاغنية تدل على ان عبرازق هو ومستمعيه كانوا متشقلطين اخر شقلطة وطايرين مع هوا الزغاريف


اما معانى الكلمات اللى حضرتك تفضلت مشكورا وشرحتهالنا
فهى تدل على ان سيادتك كنت دائما وابدا متميز فى اللغة العربية


بجد انت مجرم

سلام
اختك خيخة

Soooo يقول...

الف شكر لكل اللي علقو
بس انا والله العظيم والله العظيم والله العظيم
مش باضرب زغاريف ولا بتاع
وأقلعت عن الإدمان منذ ردح من الزمن والحمدلله

وبالنسبه للناس اللي شافو ان الموضوع ده مش اللي هو .. باقوللهم الف شكر على النقد بالاسلوب الشيك ده .. وفعلا الفترة اللي فاتت المود بتاعي ما كانش متظبط قوي
وربنا يسهل يعني والمود يبقى كويس

وربنا يسعدكم ويكرمكم دنيا وآخره




سلامووووووووووز

ساعد نسرين الايمن يقول...

سوووووووو

لا اعنقد ان تعريفك للزغروف كامل
فلابد ان هناك معاني اخري للزغروف لم تذكرها
والا كيف يستقيم تعريفك مع قول الشاعر
زغرفني الحب زغروف
وكنت اسد بقيت انا خروف

وكيف يستقيم تعريفك مع القول الشعبي الماثور للدلالة عن الرشوة
اطلعه بالزغروف
يمشي ليك شغلك بالمعروف


لذا وجب التنويه

القمر الساهر يقول...

ليه بس كدا يا سو

احنا اقل من اننا نفهم الكلام دة

ارحم ثقافتنا

ربنا يرحمنا .. ويرحم اللي بيسمع الكلام دة

انما الاعمال بالنيات .. الراجل نيته الناس تبطل الاخضر والبنى والازرق ناقس كمان يقول بمبى

Adam يقول...

اد ايه اغنيه جميله وتحمل معاني اجمل

طبعا بتريق

مش عارف ايه القرف الي احنا وصلنا ليه ده

ربنا يرحمنا

تحياتي علي البوست المزعرف

ادم

Moonystar يقول...

واو
واللي كنت فاكرة نفسي بنت مصرية عادية جدا طلعت في عالم تاني
:)
لولا تعريفاتك انا كنت افتكرته بيهزر او بيقول كلام مش مفهوم ماشي مع القافية وخلاص :)
اكيد انت عارف ان دمك خفيف مش عايزة ابقى بايخة واعيد الملحوظة دي
بس اللي مش تعرفه اني اكيد هتابع البلوج بتاعك
دمت بخير

Rannon يقول...

أفادكم الله
صحيح انا ماسمعتهاش قبل كدة بس اذا كنت مفهمتهاش لما قرتها وحسيت اني بقرا طلاسم كنت هفهمها لو سمعتها ازاااااااااااي؟؟!!
بس الحمد لله انت فكيت الطلاسم دي واديتنا درس مهم جدا عشان منبقاش بنسمع قراطيس يعني لازن نكون فاهمين الليلة :))

تحياااااااااااتي:)

entrümpelung wien يقول...

شكرا على الموضوع
entrümpelung
entrümpelung
entrümpelung wien