الأربعاء، ٥ ربيع الآخر ١٤٣٠ هـ

!! شقتين .. فول

طلبت معايا اجيبلي شقتين فول بالزيت الحار من عالعربيه اللي في اول الشارع عندنا .. والراجل بصراحه وضبهم توضيبه صح .. يعني حط شطه ولمون وظبط الأناني .. مش كده وبس .. لأ .. ده لف الشقتين في صفحة من جرنان الاهرام عشان وانا باكل اقرى واتسلى
وفعلا .. طلعت عالقهوة وفتحت ورقة الجرنان عشان آكل وبالمره اشوف فيها ايه .. لقيتها بتاريخ حداشر فبراير الفين وتسعه .. قلت فل قوي .. يعني مش قديم قوي يعني .. واكتشفت ان جرنان الاهرام تقريبا تحول لجريده ساخرة من كمية الأخبار اللي فيه

.. أول خبر بعنوان
!!! تنظيم القاعدة يعلن جهاد الغابات في استراليا

الخبر بيقول بالمختصر كده .. ان في غابات بتتحرق في استراليا .. وده عامللهم قلق .. قامو قالو ان اللي بيعمل كده هم تنظيم القاعدة .. وان شبكة فوكس الاخبارية بتقول ان في بيان منشور من ابو مصعب السوري بيحث فيه المسلمين على اضرام النار في غابات استراليا وأوروبا وامريكيا
وقال جاريت برشمان وهو خبير متخصص في تنظيم القاعدة .. إن لحرائق الغابات تسلسل يتسق مع نمط الحوارات في منتديات القاعدة

!!!!
!!!!! يعني هي القاعدة لو فعلا وصلت استراليا .. هتسيب استراليا كلها وتروح تولّع غابات
ولا هم فاكرينهم عشان تنظيم قاعدة .. يبقى كانو قاعدين قاعدة حلوة .. ومولّعين ولعة وبيشربو شيشة وجوزة .. وهوب الولعة مسكت في السجر يا وهيبة
وبعدين هل ابو مصعب السوري .. يقرب لابو مازن السوري .. بتاع الشاورما !!!!؟؟
----
تاني خبر بقى .. واللي تحت الخبر الأولاني اللي لسه قاريه
!! وظيفة للسائق الأمين .. لكن مؤقتة

والحكاية باختصار ان في واحد شغال سواق .. سافر موسم الحج اللي فات عشان يشتغل برضه سواق في نقل الحجاج وكده .. ولقى في الاتوبيس اللي هو شغال عليه هناك شنطة فيها مايعادل مليون وستمية ألف جنية .. قام مسلمها للقيادات السعودية وقالوله الف شكر يا مان ونخدمك يوم طهورك
رجع مصر والموضوع اتعرف .. قامت وزيرة القوى العاملة قابلته واتكلمت معاه .. والراجل يا عيني قاللها انا عايز اشتغل عشان مش شغال وعايز امي تحج بيت ربنا .. قالتله حاضر وهكلملك المسئولين
الاهرام بقى نشرت الخبر ده من كام يوم - ده على حسب ما قالو في الخبر - وبتقول يعني حد يعمل حاجه يابني آدمين .. قام جه المهندس علي ماهر غنيم رئيس مجلس ادارة شركة الدلتا للأسمدة والصناعات الكيماوية بطلخا .. وقال الشاي ده عندي يارجالة .. وراح معين السواق في الشركة عنده .. بمرتب ماحدش يحلم بيه .. مرتب انما ايه .. ميتين وتمانين جنيه .. شاملة البدلات والعلاوات .. لأ وايه .. ده مش تعيين تعيين .. ده عقد مؤقت لمدة ست شهور فقط
!!!!
في اعتقادي بقى .. ان الباشمهندس علي ماهر غنيم رئيس الشركة دي .. حسبها بشكل منطقي .. قال انا مهما عملت ومهما سويت مش هيطلع اسمي في الاهرام .. اقوم انا اعمل اني راجل بتاع واجب .. واقول اني عندي استعداد اعيّن السواق ده عندي لمدة ست شهور بمرتب ميتين وتمانين جنيه في الشهر .. يعني الفترة اللي هيشتغل عندي هياخد مني الف وستمية وتمانين جنيه
يابلاش والله .. اعلان في جرنان الاهرام وبالمبلغ ده !!!؟؟
!!! وكتاب الله ابقى عيل لو شفت نص جنيه مرمي في الشارع .. واديته للمسئولين
----
تالت خبر .. وده تحت الخبرين اللي فاتو دول .. عنوانه ايه بقى
!! ألفين وخمسمائة يورو لكل ألماني .. لشراء سيارة جديدة

والخبر بيقول ان الحكومة الجرمانيه .. عشان تنشط سوق العربيات اللي واقع عندهم وفي العالم كللو - ماعدا مصر طبعا – قامو قالو هيدو الفين وخمسمية يورو لكل واحد عشان يجيب عربية جديدة .. قصاد انه لو معاه عربيه قديمة - فات على تصنيعها تسع سنين أو أكتر – يوديها لمقلب نفايات السيارات
وبالحركة دي يبقو بيشجعو الاستثمار وبيشجعو الشعب عشان يشتري عربيات .. وكمان بيحافظو على البيئة عشان العربيات الجديدة قال ايه .. مزودة بفلاتر لترشيح غاز ثاني اكسيد الكربون – ايشي خيال يا ناس – مع اننا هنا اصلا لو مافيش غاز ثاني اكسيد الكربون .. بنروح للميكانيكي نقوللو حط شوية ثاني اكسيد الكربون .. واتوصى بالكربون الله يكرمك
!!!!
واللي باتخيله انه هيطلع خمسين مستشمر من بتوع وكالة البلح والتوفيقية عشان يجيبو العربيات اللي هتروح مقلب نفايات السيارات .. ويفككوها قطع غيار ويرجعو يبيوعهالنا
!!! والاسم .. دي مستورده من جرمانيا يا هندزا
-----
!!!!!!!!!!!!!!!!!
.. ايه ده .. شقتين الفول خلصو وانا لسه جعان .. الجرنان ده مغشوش .. عشان لو جرنان صح
!!! كان الحبر اللي فيه واللي لحوس الشقتين .. يخليني اشبع

.. ملحوظه

.. نفس العدد ده من جرنان الاهرام هو اللي كان فيه الخبر بتاع سفاح المعادي
.. لما وزير الداخليه قال انهم كانو مجندين خمسين مزه للقبض عالسفاح
!!! مش بقولكم الاهرام هيقلب جريدة ساخرة

سوووو

هناك ٢٨ تعليقًا:

حلوة الدنيا يقول...

صباح الفل يا كبير

فيه حد ينزل موضوع الساعة 9 الصبح قشطة

صيدلانيه طالعه نازله يقول...

الاهرام طول عمره جريده مسخره مش ساخره و طول ما اللى ماسكينه الضاحكون من امثال سرايا و مرسى حيفضل مسخره على طول
و الدليل الاخبار الهلاميه اللى تاحفينا بيها على طول دى
و يعنى جبت فول و عملت دماغ اعزم على الغلابه اللى نوروك دول و لا حط سندوتشات على جنب كده و اكتب عليها بسم الله

حلوة الدنيا يقول...

اخبار لذيذة فعلا يا سووو هو الأهرام بقي لذيذ خالص بيفرفشوا الناس باين
وبعدين تروح تاكل فول لوحدك ينفع كده فين القسم بتاع 304

Soooo يقول...

جعلوني مريض نفساويا

صباحك حليب
بس انت بتراقبني ياض ولا ايه؟؟
وبعدين ايه المشكله انزل الخبر الساعه تسعه الصبح ولا اتناشر العصر ؟؟

عموما الموضوع ده كان في الدرافت .. ولسه مافطرتش
تيجي نضرب فول ونصطبح عالقهوة؟؟؟

نرجو الافاده




سلاموووووووووووز

Soooo يقول...

صيدلانيه طالعه نازله

الجميل في الموضوع انهم قايلين الاخبار دي كأنهم بيعارضو برضه وصحيفة حره

طب عارضو في حاجه ليها لازمة ولا اتكلمو كلام يخش النافوخ

وبعدين انا راضي ذمتك .. انتو مش مقامكم شقتين فول بالزيت الحار
انتو مقامكم فول بالصلصه

صباحك ورد




سلاموووووووووز

محمد حمدي يقول...

بعد كده خلى بياع الفول يلف الفول فى جورنال اكتر احتراما من الاهرام .. ولا اقولك خليه فى الاهرام احسن اهو تضحك شويه على الصبح , حيث ان الاهرام تحول لجريدة هزليه

تحياتى

سوبيا يقول...

طيب ما عندوش وظيفة ليا


صباح الخيرات يا سو

adel يقول...

طب جبت فول لنفسك
مش تعزم

و بعدين الاهرام اساسا جريدة ساخرة طول عمرها

دا انا سمعت انهم هيجيبوا كتاب مجلة ميكي لتطوير اسلوب الكتابة في الاهرام

يعني الحوادث هتبقي الالغاز و هيمسكها عصابة القناع الاسود

و شؤون خارجية هيمسكها بطوط

صفحة العلم طبعا عبقرينو

و البورصة عم دهب

هههههههههههه

V.Hayat يقول...

المهم بالهناء والشفاء والى عدد قادم من الاهرام الاسبوعى

ست البيت يقول...

صباح الجمال يا مآآن
أنا قاعدة اكتب بوست عن الاهرام نشرته وجاية باعت لك لينك لقيتك كاتب في الاهرام كلمتين حلوين
تحياتي
بس ابقى اقرأ الخبر الطازة من مدونتي عن الهرام
http://marwa-mostafa.blogspot.com/2009/04/blog-post.html

ست البيت يقول...

شديدة قوي الاخبار التلاتة
تنظيم القاعدة دا خلي بالك هو اللي وقع صخرة الدويقة
اصل ابو مش عارفة مين الفوشياوي
جاء عن لاصخرة وحخد نفس عميييييييييييييك
راح موقع الصخرة
ايه دا هم فعلا كانوا مجندين بنات عشان يقبضوا ع الواد دا
يا بناتك يا مصر
على رأي أحمد منصور هي المخابرات حيلتها ايه غير سلاح المال والنسوان
-كلمة لغة عربية هما بيقولوها كده في الخليج-
يلا طيبة
وابقى طمني ع الواد حمزة

دمت بحفظ الرحمن

AHMED SAMIR يقول...

هههههههههههههههههههههههههههههههه
دة التعليق المناسب فعلا للبوست الجامد دة
بس على فكرة
ساعات كتير الاهرام بيتحول لجريدة تراجيدية نكدية ضارة بالصحة..خصوصا الصحة الانجابية

همس الاحباب يقول...

شوقتنى والله يا جدع
لا مش للاهرام
لا لشقة الفول يا برنس
انا اشك فى الراجل بتاع عربية الفول ده بصراحة
اعتقد انه عميل مزدوج
هو ما عندوش غير الاهرام
يخلى عنده نظر يا جدع
سلاموووووز

mohamed ghalia يقول...

لا الحمد الله أنا تبت إلى الله وبطلت أقرأ الجرايد الصفراء دى هههههه
وإحتمال أبطل قراءة خالص

kochia يقول...

الحقيقة انا مكنتش بتابعه زمان
كنت بتابع الجمهورية وربنا تاي عليا منها الحمد لله

واديني بجرب مع الاهرام استقر ولا انثل علي الدستور المرة الجاية

بوست ظريف

تحياتي

سلوى يقول...

فول وثقافه أهراميه :)

إجتمعوا إزاي دول :))

بس أخبار مفرحه صراحه

خصوصا السواق الأمين

وأحلي ما في الموضوع بقى تحليلك بعد كل خبر

يظهر الفول عمل عمايله :))

دمت بخير سووووووووو

د. ياسر عمر عبد الفتاح يقول...

انت متأكد إن قريت الكلام ده
يمكن يكون الفول أثر عليك
أصل ساعات الفول بيطلب تهنيج وتهييس
إتأكد بس الله بكرمك

خايف من الحقيقة يقول...

السلام عليكم
فاكرني!!!!!
معتقدش
المهم
والله شوقتني للفول
وفكرتني بذكريات جميله
الاهرام
انا لسه فاكر الجرنال ده

(لان الموجود حاليا مسخ من الجرنال الحقيقي بتاع زمان)
عموما بوس رااااااائع كالعاده
ودمت بخير

موجة يقول...

مممممممممممممممم
نم نم نم نم نم نم نم نم
كلت الشقتين لوحدك
ياساااااااااااااااااتر
طب كنت سيبت لى اوضة حتى
بالهنا والشفا
واوعى تروح لبتاع الفول ده تانى ابدا
ولا عمرك تفكر انك تاكل فول تانى
ولا تفكر اصلا انك تفطر من اصلة
يوة
وتنسى اساسا انك تاكل خالص
طالما هو الاكل اللى سبب فى الموضوع الكبير ده

تامر علي يقول...

والله أحسن استخدام للصحف القومية هو استخدامك ده لكن ليا كمان اقتراح انها تستخدم ورق تواليت (بس ممكن تعمل شوية مشاكل :)

تحياتي

القمر الساهر يقول...

بما اني ضيفة جديدة على المدونة وعلىعالم المدونين

فين واجب الضيافة

وياااااااارت مش يكون طعميةوفول وياااااااريت مش يتلففي جرايد عايزاه عل طبق صفيح تين

على فكرة الغلط مش ف الاهرام الغلط كان فى ساندويتش الفول وسيتم القاء القبض عليه...والعاقبة عندكم فى المسرات

شوية جد بقى.. ربنا موجوووووووود

MǿиY El-Shreef يقول...

هيهيهيهيهيهيهيي ~> ضحكه ساخره :D

انا الحمدلله بكره الاهرام مابحبش فيه غير احمد رجب واديه سابه

وبقالي سنتين مش بقرأ جرايد اصلا عشان مش عايشه ف المحروسه

بس تلت اخبار كوميديا

بس تالتهم بتاع جيرماني والله العظيم يحسر

حرام .. حاجه تغيظ

بنروح للميكانيكي نقوللو حط شوية ثاني اكسيد الكربون .. واتوصى بالكربون الله يكرمك

ههههههههههههههههههههههههههههههه

لا تحفه تحفه ياسوو وحبيبك حبسوو :p

تسلم ايدك

انا اول مره اجي

بس متابعه اوكي

(F)

قوس قزح يقول...

قول الرجل بعد كده يلف فى مجلات ميكى
اصلها واقعية اكتر ههههههههههه
و تمزج الواحد و تخليه ياكل بنفس

طيع عليك السندويتشات
منه لله السفاح

مهندس مصري بيحب مصر يقول...

هههههههههههههههههههههه
معاك حق يا بني

مرجانة يقول...

ههههههههههههههههههههههههه
انا من منطلق هذا القبوست الجامد
قررت وانتم شاهدين علية اني اعود واصالح جريدة الاهرام واقرأها
يمكن اضحك بالشكل دة لاني بدأت اشعر باعراض تكشير وسد نفس وعدم استطعام للحياة من جراء كثرة جرائد المعارضة والبديل و المصري اليوم والدستور

تحياتي الجامدة جدا

Ehab يقول...

يا معلم
شوف يا اخي الثقافه بتاعتناانا وانت
نفس الحكايه
اجيب الفول م العريه واقعد اقرا الكلام اللي جه من نصيبي
بس انا بختي ساعات بيبقى حلو
وبلاقي صفحه من الجرايد التانيه
ويطلع حظي في صوره مزه تحت اعلان تكبير المعرفش ايه
وعلاج سرعة ايه
ونيلة ايه
حظوظ بقى يا كبير

سلاااااااااااااااااام
واحشني يا فقري
اخوك ايهاب

maiosha يقول...

هههههههههههههههههه

الله يعنى فول بالزيت الحار.. وقهوة .. وضحك كمان

والله الواحد لو كان جاب كتاب ميت نكتة ونكتة مكنش ضحك كده

بس انت مش فاهم يا سووو .. دى سياسة دولة عظمى
علشان الشعب اصلا مكتئب وحالة كرب.. فلازم يفرفشوه كده على الصبح بكام خبر حلوين-وخصوصا خبر المزز-علشان الشعب يفوق ويروح شغله وهو معمر الطاسة

Mostafa Safwat يقول...

السلام عليكم
اولا احب اقولك حاجة مهمه انا بقرأ فقط اهرام يوم الجمعة و انت خلتني اقرأ اهرام يوم تاني هههههه
و بعدين فيع سؤال مهم جدا بالنسبالي
انت جبت الفول و قعدت على القهوة بس موضحتش طلبت شاي بلبن ولا لأ
ارجو الافادة
و دمتم