السبت، 19 صفر، 1430 هـ

!! سفّاح المعادي

يوم الاربع اللي فات .. اول حاجه عملتها اني مسكت جرنان الاهرام عشان افهم ايه اللي حصل في حوار ابو تريكه والدربكة اللي حصلت .. وإذ بي اتفاجأ ان في خبر بيقولو انهم مسكو سفاح المعادي
يااااه .. طب والله انا كنت نسيت ان المعادي فيها سفاح وعمل زيطه وزمبليطه
---
نبذة تاريخية عن السفّاح : ظهر سفّاح المعادي في صيف سنة الفين وسبعه في منطقة المعادي ودار السلام وصقر قريش وفايده كامل والبساتين .. وعرف الناس بوجوده عن طريق تعدد حوادث تشويه المؤخرات النسائيه .. وذلك لأنه كان يصحى الصبح - وعلى غيار الريق - ويسرح يعوّر ويعلّم على مؤخرات البنات بموس حلاقة أو بمطوة , وبالرغم من التواجد الأمني بكثرة في المناطق التي سبق ذكرها .. الا ان هذا لم يمنع السفّاح عن ممارسة هوايته في التعليم على الأظائيظ - نسبة للمعجم الخيخي - بل انه وحتى في وجود الأمن من أمناء شرطه وظباط متنكرين ومرشدين ومخبرين معروفين شكلا واسما .. استمر السفّاح في اللي بيعملو
لدرجة ان شباب المعادي - وانا واحد منهم - خفنا على أظائيظنا وقلنا هنلبس جلاليب واسعه وبلاها منطلونات .. احسن يكون السفاح أحول ولا حاجه وبدل ماتيجي الطوبه في المعطوبه .. تيجي المطوه في الأظئوظة

---
!!! الجميل انهم مسكو سفّاح المعادي .. في شبرا
هنا بقى لقيتني قلت يالهوي .. هو السفاح اكتشف انه مش عادي في المعادي .. قام ناقل على شبرا وبنات شبرا .. وكأنه بيطبق اغنية ريكو المعروفه .. عادي في المعادي !!؟
!! ده مش بعيد على كده يطلع على الزمالك كذلك .. أو يروح لبنات حلوان أشكال وألوان
ولا يكونش يا ولداه لقى الرزق شح في البلد والمنطقه .. قال انا اهاجر على منطقه تانيه .. ورب هنا رب هناك .. ومافيش حد بيبات من غير عشا .. او حتى من غير مايعوّر أظائيظ !!؟؟

.. فتحت صفحة الحوادث عشان استفهم ايه الحوار اكتر .. ولقيت العنواين دي في الخبر

.. بعد عامين من ارتكابه حوادث أثارت الذعر بضاحية المعادي
القبض على سفاح المعادي في أثناء ارتكابه حادثا بشبرا

.. المتهم يعمل حلاقا ومهتز نفسيا وعمره تلاته وعشرين عام
ويمثل أمام النيابة اليوم للإدلاء بتفاصيل حوادثه

.. الشرطة جندت خمسين فتاة بالمعادي حتى يتم ضبط المتهم
لكنه سقط في منطقة أخرى

!!!!!!!!!!!!!!!
وعند آخر حته لقيتني قلت ايه .. خمسين فتاه .. وجندتهم الشرطه .. طب ليه .. ده على اساس ان المعادي مافيهاش بنات مأظأظه .. طب دي المعادي طول عمرها مأظأظه
!!!!!!!!!!!!!!
وبعدين هو ايه ذنب شباب المعادي انهم يتحطو في المزنق ده .. ويبقو شايفين خمسين مزه - بالإضافة للمزز الموجوده اصلا - من أفخر انواع المزز ماشيين في شوارع المعادي .. وفي حماية المخبرين وأمناء الشرطة
!!!!!!!!!!!!!!
ايه ذنب شباب المعادي مايبقوش عارفين يميزو مين المزز القطاع العام من المزز القطاع الخاص
!!!!!!!!!!!!!!
.. لأ بقى .. انا باعترض .. وهقول زي ما قال السادات زمان
القدس دي أرض الأديان .. بلغ بيجين احتجاجي الرسمي على ضم القدس
.. بس انا هقولها كده لأي ظابط يقابلني
!! المعادي دي أرض الأظائيظ .. بلّغ العادلي احتجاجي الرسمي على قفش السفاح

ايوه .. افرجو عن السفاح .. ونزلوه المعادي تاني .. وكترو المزز يا حكومة .. كتروهم عشان تعرفو تقفشوه بالجرم المشهود .. مش تقفشوه وهو نايم في مدخل عماره
نزلوه المعادي تاني واقفشوه في المعادي .. دي تبقى عيبه في حقي وحق كل معداوي اصيل لما سفاحنا يتمسك في منطقة تانيه غير تابعه لسلطتنا ونفوذنا المعداوي

وبعدين خمسين مزه ايه .. انتو بتهرجو .. ده سفاح يا حكومه .. سفااااااااااااااح .. يعني حاجه كبيره
اقل واجب تغرقو المعادي ببتاع الفين وسبعمية مزه من النوع الفاخر المأظأظ

وياريت لو عملتو فينا معروف وتسيبوهم بعد ماتقفشو السفاح .. آه والنبي .. اصل ايه اللي هيحصل يعني لو سبتوهم .. ولا حاجه .. بالعكس كمان .. لو سبتوهم هيبقو هم دول اللي يقفشو أي سفاح جديد يظهر
آه طبعا .. أي نعم وجودهم هو اللي ممكن يعمل كبت في بعض العقول المريضه - من الشباب اللي مش لاقي شغل ولا عارف يتجوز وبيضرب مخضرات - بس ايه المشكله .. فرويد قال المجرم بيتولد مجرم بالفطره .. يعني كده كده هيبقى سفاح ويعور مؤخرات المزز .. وده كلام علمي واسألو أهل العلم

وحتى لو ماظهرش سفاح جديد .. سيبوهم يظبطو المعادي وشباب المعادي .. وتبقى خدمه جديدة تضاف الي الخدمات النظيفة اللي بتوفرها الحكومة المباركه

وبناءا على ما سبق قوله .. قررت انا ومن معي من جرعان المنطقه .. اننا هنعمل مظاهرة معداويه .. تبدأ من ميدان الحريه ولغاية ميدان صقر قريش .. مرورا ببوابة نادي المعادي وميدان سوارس .. وجراند مول وسينما فونتانا الصيفي .. وشارع الصفا واللاسلكي وميدان مؤمن .. وشارع شركة جابكو والهيئة العامة للبترول .. وشارع تلتمية واربعة والمودرن أكاديمي .. ونهايتنا هتكون في ميدان صقر قريش .. وتحديدا اكتر .. قدام البحث الجنائي ونقطة صقر قريش .. واخدين بالكو .. قدام النقطة مش جواها .. هم هيبقو ياخدونا جواها بعدين
.. وهنهتف بأعلى صوت ونقول
السفاح السفاح .. يا نخلّي عيشتكو جراح
!!!!!!!!!!!!!!!!!!!!!!!!!!!!!
------
.. ملحوظة بطعم الإجرام والسِفاحة

.. انا حطيت موضوع عن فيلم الوعد زي ما وعدت الناس اللي مهتمة بالسينما
وهتلاقوه هنا هو

سوووو

هناك 46 تعليقًا:

صبرني يارب يقول...

تصدق بقى

اول مره اعرف حاجه عن سفاح المعادي ده يا اخويا

طب وانت يا ابنى مش كنت المفروض انت وشوباب المنطقه كنت تسهروا على امان اظائيظ بنات المنطقه ولا ما عادش فى نخوه بقى

ههههههههههههههههههه

تحياتي لك يا سو

اه بالمناسبه انا بقيت عجوزه عااااااااااااااااااااااا بعد بكره ها يبقى عندي 30 سنه

صبرني يارب يقول...

ايه ده انا اول تعليق يا حلولي

طيب ناخد التاني بقى ونلعب براحتنا

mony يقول...

ههههههههه

بس مش ملاحظ ان كل مجرمين مصر عندهم امراض نفسية

لا
و المفارقة ان الراجل السفاح ده طلع حلاق

علشان تتوافر عنده ادة الجريمة


طيب يا ريت تقولنا حضرتك عن ميعاد المظاهرة بالضبط علشان نزوركم بالعيش والحلاوة امام نقطة صقر قريش

امام النقطة
هه

adel يقول...

ههههههههههههههه

بجد تحفة ياسووووووووو

عاجبني قوي المعجم الخيخي ده

عاوز مصطلحات منه تاني

و شفت اتقبض عليه ازاي
ههههههههههه

تيجي علي اهون سبب ياراجل

جعلوني مريض نفسيا يقول...

انا لسة بردوا شايف الخبر الجميل ده في الجرنان امبارح وقعدت اضحك هم مش مكسوفين بعد سنتيين ييجوا يقولوا قبضنا علي السفاح ههههههههه
فكرونا بيه وفكرونا بالمعادي وهي مقلوبة عليه ومش عارفين يجيبوا كانوا فالحين بس طول ما الواحد ماشي يلاقي عربية وقفت او واحد طلعلة من اي حتة ويقوله بطاقتك لحد ما الواحد زهق وعلقها في ياقة القميص

سلوى يقول...

فين شرف المهنه؟
فين أخلاقيات المهنه؟

إزاي يمسكوه بالسهوله دي

صحيح بتيجي على أهون سبب

وال500 اللي اتجندوا دول
تعبهم كده راح ع الأرض

لا لا دي حتى وحشه في حق المعادي
وعندكم حق تطلعوا مظاهره

ياريت الموعد بس بالضبط
علشان
وفد تدويني يزوركم بالعيش والذي منه
:))

جميل نقدك الساخر سوووووو
دمت بكل الخير

فتافيت يقول...

ههههههههههههههههههههههههههههههههههههههههههههههههههههههههههه

ايه ده .. والله شباب المعادي صعبان عليا.. مزز ومش عارفة اللي بتقولها ده

وبعدين ده تعدي سافر على بنات المعادي.. معنى كده ان المعادي مافيهش اي مزز عندها مأظأظة.. ديه اهانة لكل بنت معدواية والحمد لله اني شرقاوية
والا كنت عملت مظاهرة وطلبت بتعويض مادي عن الاهانة دية.. يا سلام

بس سيببك انت بمجرد ما تدخل النقطة ابقى اديني رنه

وانا هاعملك احلى مظاهرة فشر مظاهرة بلالا .. روح ياابني ربنا يوفقك

بجد انت اسلوبك هايل في النقد الساخر

هابقى صديقة للمدونة بجد تحفة

تحياااااااااااتي

همس الاحباب يقول...

هههههه
وانا بقول الواد سوووو
بيجى من غير اظوظته ليه
اتاريك سايبها فى البيت خوفا من السفاح
ههههههههه
يخرب بيت فقرك بجد فطست على نفسى من الضحك
ربنا يسعدك دنيا واخرة
وانا معاك فى المظاهرة وهاجيب عيش وكفته كماااان
يلا هيص يا عم وهاجيبلك فسكافيه بلاك

كيــــــــــــارا يقول...

ههههههههههههههههههههههههه

الحمد لله عزلت من المعادي

والله فكرتني ياااااه اجمل ايام بجد مش تتنسي

وبحدين كول اللي في المحادي مؤدبين انا بقول اهوو

واخير افتكرو ان كان في سفاح في المعادي دا انا كنت نسيت

مهندس مصري يقول...

هههههههههههههههههههههههههههههههه

موجة يقول...

انت دمك خفيف موت
انا شفت اسم المدونة عجوز وعندى تلاتين قلت بقى هدخل اعيط شوية
لكن اول ما دخلت وشفت السفاح المأظأظ دة مقدرتش امسك نفسى من الضحك لدرجة ان ماما جت على صوت ضحكى
تقبل مرورى وتحياتى لك

موجة يقول...

تسمح لى اقول لك كلمة بجد
انت مجرم ضحك
بجد كل ما هكون حاسة انى فاقدة ويائسة من الحياه
هدخل مدونتك واقرا الكلام اللى يهلك من الضحك ده
هو كلام هادف بس بطريقة مضحكة اوى اوى
الا صحيح هو انت سووووو اللى منير بينادى علية فى الاغنية
ويقول سووو يا سووو حبيبى حبسوووووة
سلامى لك

أحسن تـستاهـل يقول...

ايه اللي ما تعرفوش يا سوووو انه ما طلعش هو السفاح عشان الضحايا اللي كانوا شافوه وهو بيتهجم عليهم قالوا مش دي الاوصاف
هما تقريبا جايبين واحد ابيض شعره فاتح وعنيه ملونة
والضحايا قالوا هو مش شكله كده
يعني الجدع السفاح لسه سرحان بس نشاطه خملان
هيهيهيهيهي

عموما انا سبت شغلي في المعادي الحمد لله ع الله بأه يطلعلي سفاح المهندسين عشان أرمي نفسي تحت المترو اللي معصبني وعمالة اكتبلك وانا وربنا وربنا بفكر فيه وفي الارف اللي الواحد بيشوفه كل يوم فيه

بلا خوتة مخ... سيبك انت.. نهارك ابيض من غير سفاحين
:)

مها ميهوووو

Habiba يقول...

انا بيتهيألى سمعت عن حكايه السفاح دى من زمان فعلا

بس هو كده فى بلدنا لما تحصل مصيبه اما مش تتحل او لو اتحلت تتحل بعد ماالناس تنساها

مع كل احترامى لحضرتك ولاسلوبك الساخر اللى بفضله وبحبه جدا فى كتاباتى كمان
حضرتك استخدمت مصطلحات والفاظ من رأيى مكنش مفروض تستخدمها
عفوا لو رأيى معارض لحضرتك بس هى يمكن خلتك تبعد عن الموضوع كتير

اسفه تانى للاختلاف وارجو ان حضرتك تستوعب وجهة نظرى

زهرة الجنة يقول...

تصدق يا سوو
انت احسن من الجرنال
معرفتش انهم مسكوه الا من عندك هنا
كنا نسينا الموضوع ده اصلا
بس اشمعني مسكوه دلوقتي يعني؟

تامر علي يقول...

والله أنا حاسس إن السفاح ده برىء من دم الأظائيظ دي كلها .... لأنهم بيقولوا عليه مختل عقلياً ..طيب بذمتك في واحد مختل ينشن على اللأظائيظ بالدقة دي ... ويعرف يختفي بالبراعة دي ويدوخ الشرطة سنتين .... السفاح ده برىء من الأظأظة دي .... وعليه يجب استمرار حالة التحوط الأظائيظي لأن غالباً السفاح الحقيقي طليق وبيخطط للأظأوظة القادمة وهتكون بعنوان "حمار وحلاوة يا أظائيظ" زي بتاع البطيخ اللي بيعدي من تحت البيت وبينادي "حمار وحلاوة يابظيخ"

maiosha يقول...

هههههههههههههه
ههههههههههههههه
حرام عليك انا مش عارفة ابطل ضحك

يعنى إنت لا همك لا سفاح ولا أى حاجة من العالم ده كله
إنت كل خزفك لا يسحبوا المزز بتاع القطاع الخاص
ههههههههههههههههه

بجد إنت كارثة يا سووووووو

shayma يقول...

هههههههههههههههه
يا سلاااام
ماتعمل كمان اعتصام ونسميك سو الاعتصامى

هههههههه
بس حلوة والله

ABO JOSEF يقول...

إيه ده يا عم
انتا سيبت العالم كله ومسكت في اللأظائيظ
هنيالك يابا
سيبك انتا
انتا راجل مجدعة
سلام يا راجل يا عجوووووووززززززززززززززز

ابو يوسف المتغرَب

أحمد سعيد بسيوني يقول...

ههههههههههه

مش عارف حاسس فيك بذرة سفاح جديد

هههههههههههههه

MaNoOoSh يقول...

ياعينى عليكم يا شباب المعادى
هتعملوا اية من غير مجندات القطاع العام
والله ياخويا لو كنت انا بشنبات كنت جيت معاكم
بس الحمد لله ان انا بنوتة وكمان مش ساكنة لا فى المعادى ولا المهندزين
ههههههههههه

بنت الغربة يقول...

اولا كل سنه وانت طيب ياسووووووووو
وبعدين متشكرين ياعم على التوضيح على موضوع السفاح ده..
انا اساسا معنديش اى فكرة عنه..
وبعدين مالك كده اعصابك سايييبه خااالص على المزز؟؟؟؟
انا عازماك تيجى عندنا فى دبى ..وانت تتفرج على جميع انواع المزز..باختلاف الاحجام والانواع والللغات ..وماتخافش من الامن ..لانه
ماااالوش دعوة بالمزز خااالص
بشرط ماتزعلش ولا مزة..
لانهم هنا عايشين فى امااان تام ..يعنى ممكن يمشوا فى الشارع بلبس ..او من غير...عادى جدا
وانت اتفرج براحتك وصور براحتك ...
لان دى من المعالم السياحيه هناك
لكن ممنوع الاقتراب او اللمس من غير اذن من المزة...وماتعدش بقه فى عدد المزز..اكتر من اللى انت عايزه بكتييييير..
يعنى مش هتلاحق ياضنايا ....وجايز يجيلك حول ...
وربنا يهديك وتتجوز..
تحياتى

norahaty يقول...

الله يسامحك ياسوووووووووو
ياأبن ام سووووووووووووو
زى ما شرقتنى الشرقة اللى شرقتها
دى وكانت الشر بره وبعيد ياخويا
حتاخد اجلى وكانوا ناس كتير اينعم
حيشنكروك على كده شنكرة جامدة
عليها لكن الحمد لله ليا عمر.

موجة يقول...

سووووووووو
انت ماجاوبتش على سؤالى والغريب انك زودت فى راسى سؤال كمان على سؤالى
ياريت ياسوووو تجاوب بقى ع الاتنين
1- هو انت سووو اللى بينادى علية منير طول الاغنية؟؟؟؟؟؟؟؟
2- ياترى جسمك ثشعر لية لما قريت تعليقىىىىى مممممممم؟؟؟؟؟؟؟؟ ليه ياترىىىىى؟؟؟
عموما كل سنة وانت طيب

أميرة الجنة يقول...

اى واحد فيكى يا مصر مادام عمل جريمة يبقى مختل عقليا وخارج لسه من العباسية

ربنا يرحمنا
ويرحمك يا سوسو
ويكتر السفاحين اللى فى المعادى عشان تبقى مبسوط

kareem يقول...

انا بفكر اقلب و اشتغل سفاح يا سووو و اكيد حشرفكوا في المعادي طالما الخير عندكوا كتير اوي كده

ربنا يزيد و يبارك في مززكوا

بت خيخة وأي كلام يقول...

انا من رأيى ان المزز بتاعة الحكومة تنتشر فى مصر كلها ومتكونش مقصورة على منطقة المعادى

خصوصا على رأيك المعادى مأظأظة بأهلها ومش محتاجة حد يأظاظاها من برة

لكن فيه مناطق تانية فى مصر ناشفة اوى
ومحتاجة حاجة طرية زى مزز الحكومة
تطريها شوية


عندك اكتوبر اللعينة
فيها شوية مناطق لعينة بحق ومحتاجة اظاظيظ الحكومة تيجى تطريها


بالنسبة للراى العلمى بتاع الحاج فرويد
ان السفاح بيتولد سفاح بالفطرة
انا اويد هذا الراى

عندى ابن جارتى
لو شفته يا سووو
تقول الواد ده هيطلع سفاح متميز
الواد ملامح الاجرام والسفاحة بتبظ من خلقته
والواد مكملش سبع سنين
لكن تشوفه تقول سفاح متأصل

يلا ربنا معاك فى المظاهرة بتاعتك

وربنا يستر على اظاظيظ الولايا



سلام
اختك خيخة

بت خيخة وأي كلام يقول...

اظاظيظ = أظائيظ
نعتذر عن هذا الخطا الخيخى الغير مقصود

حياتى هتستمر يقول...

على فكرة اسلوبك عجبنى بجد
تقبلى مرورى

الحرامي يقول...

ايه يا عم سووووو
تفتكر اللي اتمسك دا هو السفاح الحقيقي ولا حركه من حركات الحكومه ولبست الواد التهمه

وياما في الحبس مظاليم اسألني انا حرامي ومجرب

علي فكره انا سرقت البت الخيخه اياها

Ghreeb يقول...

اسلوبك اكتر من لذيذ ما شاء الله و الله الواحد كتير مفتقد اخف و احلي دم في العالم المصريين
تحياتي

bembo يقول...

السلام عليكم
ازيك ياعمو سوووو
اولا احب اعرفك اني بقالي بتاع 30ساعه متحركتش من ادام الشاشه قاعد بجيب مدونتك من اولها لأخرها
ديه واحده من المدونات القليله اللي عجبتني وعلقت فيها كمان
انت فعلا مشكله ودمك خفيف
انا بس حابب اقولك اني محبتش مذكرات الواد الطخين ده لأنها طويله قوي
وعجبني قوي كذا موضوع زي مثلا كلنا فوزي:)
وقططك العجيبه
علي فكره انا متابع جيد جدا لمجتمع المدونات ونفسي فعلا ان حلمك في اتحادهم في الواقع يتحقق
بس انا مش عندي مدونه ومش ناوي عموما يعني
بس انا عامل اكونت عشان اعلق بيه وكده
يلا كفايه عليك كده واروح اشوف بلوج تاني استلمه من اوله لأخره بس يارب يشدني زيك

عاليا حليم يقول...

أيوة شكلك خبير فى غمكانيات فتيات المعادى يا سووو
:)
و الله يا جماعة أنا مش مصدقة بصراحة الكلام دهكل الحكاية إن القضية لازم تتقفل و خلاص و لازم يبقى فيه كبش فدا

*البت المشمشية *حلوة بس شقية * يقول...

ملحوظة صغيرة المدونة بتاعتى طارت اللى انا دخلت بيه ده مدونة جديدة بس بنفس الاسم زيها بلظبط ياريت تضيفه لينك المدونة الجديدة عندك وياريت تعملى تنويه بكدة دى خدمة منك يعنىhttp://o0mshmsh0o.blogspot.com/

*البت المشمشية *حلوة بس شقية * يقول...

بص
هو اسم المدونة هو هو عشان متستغربيش
ونفس النظام بس اللينك اتغير
ضيف الجديد بقه عندك
اشطة

قلب مصرى يقول...

يعنى انت مهتم بحوار المزز ولا بحوار السفاح

Soul.o0o.Whisper يقول...

هههههههههههههههههههههههه


بجد بجد مش لاقية حاجة أقولها
بجد ربنا يكون فى عون الشباب المعداوى

ايييييييييييه داااااااااااا؟؟
مش بيقدروكوا كدا ليه؟؟


لا و كمان لسه ماخدكوش جوه ؟؟
لالالالالا .. دا كتير اوى



انا هارفع مذكرة لللسيد الأستاذ الدكتور اللواء المحافظ (( هه هه تعبت تعبت .. / العادلى

كدا ما ينفعش
هههههههههههههههههه





دمت بود

الشنكوتي الكبير يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

خمسون اظأوظه يا لهوي
هو السفاح ليه ميزورش منطقة القريه الذكيه وطريق اسكندريه عند الشغل بتاعي حتى هيخلي الصحرا تعمر
خمسين يا لهوي
هييييييييه
انا هاطالب بسفاح عندنا في الشغل ده هيذود الطاقه الأنتاجيه جدا
هههههههههههههههههههه

سلاااااااااااااااااااااام
اخوك ايهاب

Soooo يقول...

صبرني يارب

اي خدمة ياستي .. بنقول لكم اخبار عن مجرمين ماكنتوش تعرفو عنهم حاجه
ومش بابخل عليكم بأي معلومة قيمة بتوصلني والله
وبعدين شباب المنطقه ايه .. بقولك كنا خايفين ولابسين جلاليب
احنا فرافير في المعادي مش بلطجية السبتيه
وياستي ولا بقيتي عجوزه ولا بتاع
كل سنه وانتي طيبه

وبعدين خدتي اول تعليق .. تبلطجي وتاخدي تاني تعليق كمان؟؟؟

ماااااشي

---

mony

طبعا أي مجرم في مصر لازم يكون مختل عقليا
امال يعني هيقولو ان المجرم ده كان عادي ونتيجة للي شافو تحول للإجرام
لأ طبعا
احنا بلدنا زي الفل ومافيش اي حاجه تخلي الواحد يتجنن ولا يختل عقليا

والمظاهرة تم تأجيلها لحشد جميع القوات الخاصة بشباب وجرعان المنطقه
وكمان لغاية ما النقطه تفضى التخشيبه بتاعتها شويه

---

adel

يا عدولا المعجم الخيخي ده انا كنت ناوي اعملو بروقان .. وكنت طبعا هاخد موافقة خيخة عليه
ولو عايز مصطلحات خيخية تاني .. عليك وعلى مدونة بت خيخة وأي كلام
هتطلع منها بأحلى مصطلحات وأحلى كلام والله

وطبعا لازم يقبضو عليه بالطريقه الكوميدي اللي قبضو عليه بيها
انت عايزهم في مصر يقبضو على سفاح مختل عقليا وهو بيعمل الجرم المشهود بتاعه
!! دي تبقى القيامه هتقوم يا جرع

---

جعلوني مريض نفسيا

آه والله يا اتش
فعلا بقينا ناقص نعلق البطاقة
وبقينا خايفين من امناء الشرطه لا ياخدونا ولا بتاع
وخايفين من السفاح لا ييجي يعلّم علينا

عندك نسخة اوفيس حلوة؟؟؟

---

سلوى

انا عارف يا سلوى ياختي
فين المهنة فعلا
وفين الخمسين مزه اللي جندوهم
انا قالب المعادي علىهم مش لاقيهم

تم تأجيل المظاهرة لغاية مانعرف فين مزز الحكومة .. ونستعين بيهم معانا في المظاهرة
وكمان في التخشيبه لو لزم الأمر





سلاموووووووووووووز

Soooo يقول...

فتافيت

اهلا بيكي ياستي وياريت تعتبري مدونتي المتواضعه زي مدونتك وتشرفيني بزياراتك وتعليقاتك

وفعلا انا كمعداوي ماقدرش ارفع راسي تاني
ازاي المعادي مافيهاش مزز يا جرعان
انا هتجنن

ملحوظه
بلالا هو كمان من المعادي .. وشغال على ميكروباص صقر قريش فايده كامل .. وعارف القهوة اللي بيقعد علها .. وهنوكل محامي عشان صورته ترجع تنور على علب السجاير
والله ولي التوفيق

---

همس الاحباب

لازم كنت اشيل أظئوظتي يا حمايا
هو الراجل مننا حيلته ايه غير أظئظته
بس الحمدلله انهم مسكوه .. عشان الواحد يركّب الأظئظه تاني
بس على الله افتكر انا كنت شايلها فين !!؟

---

كيــــــــــــارا

احب اطمنك ان المعادي آمنة دلوقتي
عودي يا كيارا
عودي يا هاميس

ومش انتي لوحدك اللي نسيتي ان المعادي كان فيها سفاح
السفاح نفسه نسي اصلا

---

مهندس مصري

ايوه اضحك اضحك
مانت مش حاسس بعمق القضيه القومية اللي اهل المعادي حاسيين وعايشين فيها

---

موجة

ربنا يارب يسعدك ويكرمك دنيا وآخره يارب

وبجد تعليقك ده من احلى التعليقات اللي جاتني

ويارب اكون عند حسن ظنك وياريت تعتبري مدونتي زي مدونتك تمام

ملحوظه
لو قلبتي في المواضيع القديمة .. هتلاقي موضوع اسمه يعني ايه سوووو
شوفيه يمكن تفهمي يعني ايه سوووو

---

أحسن تـستاهـل

لا يا شيخه
وهو انتي كنتي مصدقه ان ده هو نفس السفاح اصلا؟؟؟
علمك علمك علمك .. سفاح المعادي اصلا اصلا .. في جسمي كده .. وفي شكلي كده .. واسمه سوووو
بس مش عارفين هو مين لغاية دلوقتي

ملحوظه
انا هعزل اروح المهندسين قرب .. واحتمال السفاح يظهر هو كمان .. ويمارس هوايته في الاجرام والسفاحة في عربات المترو
أن أن آآآآآآآآآآآآآن .. تشششششش





سلامووووووووووز

Soooo يقول...

Habiba

اولا اهلا بيكي في اول زياره او اول تعليق ليكي عندي في مدونتي المتواضعه

ثانيا . انا ممكن اكون بطبعي مش بالجأ للاسلوب اللي فيه قباحه زي ما قلت في الموضوع ده .. ولو قلبتي في مواضيعي القديمة هتلاقيني كده

بس لما الاقي وزارة الداخليه وهي الهيئة المعنيه بالامن والامان بتلجأ لاسلوب تسريح فتيات الليل واللي عليهم احكام ومراقبه في انهم يخدمو الحكومة في القبض على مجرم .. والاقي ان وزارة الداخليه بتقول ده وهي فرحانه في جرايد الحكومة
والاقي ان كل تفاصيل القبض على المتهم انه سفاح المعادي زي ماتكون سيناريو كاتبه عيل في تانيه ابتدائي .. يبقى مالهاش لازمة السخريه من غير ما يترمي عليهم كام كلمة .. عشان الموضوع يوصل للناس بطريقه مقززه زي ما الحكومة عملت

وارجو انك تتابعي مدونتي وماتحكميش علي من موضوع واحد

---

زهرة الجنة

شفتي بقى اني باجيب الكلام المفيد
انا لو منك وانتي خارجه من المدونه تسيبيلي اي حاجه في رغيف
انشالله حتى حتة حلاوة طحيني من بتاعة هارون الرشيدي .. الميزان

---

تامر علي

لأ بقولك ايه يا تيمور
انا ما صدقت ارتحت شويه وبقيت باخرج من غير ما اخاف على أظئوظتي
تقوم تيجي تخليني اقلق
لأ
وبعدين هو احنا هنفهم اكتر من الحكوووووومه
يا راجل
دي حكومتنا مباركه ومعروف انها نظيفة

---

maiosha

ماهي مصيبه يا مي بجد
لما الحكومة تلجأ لأسلوب الاغراء عشان تمسك مجرم .. وماتحطش في دماغها ان الاغراء ده ممكن يخلق مليون سفاح تاني .. تبقى مصيبه وكارثه بجد

---

shayma

طب تصدقي فكره
على الاقل حوار السفاح .. اهم من تغيير النشيد الوطني

ليكي وحشه والله ياشيمو

---

ABO JOSEF

والله يابو يوسف انا لا مسكت أظائيظ ولا غير أظائيظ
انا مسكت في السفاح
والسفاح هو اللي كان غاوي أظائيظ

والف شكر على تعليقك وعلى زيارتك واعتبر مدونتي زي مدونتك تمام





سلامووووووووووووووز

فتافيت يقول...

سووووووووووو

تعالى اقرا اخر بوست عندي.. علشان تعرف اصول الاجرام

دعوة من فتافيت خليفة ابو موته عاااااااااااااااااااااا

Soooo يقول...

أحمد سعيد بسيوني

يا باشا كلنا فينا موهبة السفاحه
بس مش لاقين اللي يوجهنا
!!!

---

MaNoOoSh

اهو بقى
الناس كلها عمالة تتريق علينا
ماشي يا بني ادمين
خليكي شاهدة يا حكومة .. المعادي بيتريقو عليها وعلى رجالتها اهو

---

بنت الغربة

لا لا لا
مش انا اللي تعبان عالمزز ولا اعصابي سايبه
اللي اقصده ان ازاي الحكومة تلجأ لمجموعة من فتيات الليل والدعارة .. وتشغلهم مرشدين
يعني بدل ما يصلحوهم ويخلوهم افراد ومواطنين كويسين .. بيخلوهم يشتغلو في الدعارة لحساب المعلومات اللي يقدرو يجيبوهالهم
انتي فاهمة قصدي؟؟

وبعدين ماهو اللي انتي بتتكلمي عنه .. بقى موجود دلوقتي عادي في اي ديسكو تيك ولا اي كافيه شيك
عادي في المعادي

---

norahaty

بعد الشر عليكي
انشالله السفاح الحقيقي وانتي لأ

ملحوظة
مالاقيش معاكي كارت توصية للاستاذة ريتا ؟؟؟
واهي تجبلي عقد عمل في البلد الخواجاتي اللي راحتها

---

أميرة الجنة

اهلا بيكي في اول زيارة ليكي ويارب تعتبري مدونتي زي مدونتك تمام وتشرفيني بتعليقاتك

وبعدين ماهو لازم اي مجرم يكون مريض عقليا
هو يعني في حاجه تخلي واحد عاقل يعمل اللي بيعملو اي مجرم في بلدنا
واساسا اساسا .. الشعب كلو اتجنن من اللي بيحصل فيه خلاص

ملحوظه
انا قريتلك تعليق في موضوع ماما سوووو .. بتخاطبيني بصيغة المؤنث .. هل ده عشان الموضوع انا جايبه في السكه دي .. ولا انتي فاكراني فعلا فعلا .. مؤنث؟؟؟




سلاموووووووووووز

Soooo يقول...

kareem

اتدارى دلوقتي ياكريم
اتدارى ياجرع
ده بيقولو في سفاح في القاهرة الجديده دلوقتي
اسمه احمد سوووو
وعاملين مكافأه مجزيه للي يبلغ عنه

---

بت خيخة وأي كلام

على فكره يا نوران
انا في الايام العاديه بافرح جدا بتعليقاتك عندي
وفرحتي بتعليقك ده بالذات .. تفوق فرحتي بأي تعليق ليكي

وفعلا لو المسئولين في الحكومه خدو بنصيحتك
ياااااه
ياااااااااه
كانت خربت بضمير يعني

ملحوظه
هو ابن جارتك اللي هيطلع سفاح متميز .. ساكن في الحي المتميز ؟؟؟

---

حياتى هتستمر

الف شكر ليكي ولتعليقك ياستي


---

الحرامي

والله يا حرامي ياخويا .. الحوار كللو تحس ان عيل في تانية ابتدائي هو اللي كاتب السيناريو بتاعه
ومن وجهة نظري .. الموضوع ده اقل محامي هيفكسو ويطلع الواد برائه
بس الاعلام هيطرمخ الموضوع ومش هيقولو حاجه عشان الحكومة مش هتدور تاني على سفاحين

ولازم كنت تسرق خيخه من زمان
وفي ناس تانيه كتير لو ركزت هتلاقي مواضيعهم محتاجه سرقة
وربنا يوفقك ويرزقك بالحلال

---

Ghreeb

الف شكر ليك يافندم والحمدلله ان المدونة عجبتك
وياريت تعتبر مدونتي المتواضعة زي مدونتك وتشرفني بزياراتك وتعليقاتك دايما يارب

---

bembo

وعليكم السلام ورحمة الله وبركاته

عارف .. التعليقات اللي زي تعليقك ده .. وتشجيعك لي ولمواضيعي البسيطه .. وحتى نقدك البناء نفسه
هي احلى حاجه حصلتلي في حياتي

بجد بجد .. الف شكر ليك وربنا يارب يارب يسعدك ويهنيك ويهيألك خير الدنيا والآخرة يارب




سلاموووووووووووز

Soooo يقول...

عاليا حليم

ياقهلا ياقهلا

بصي ياعاليا .. الموضوع مش امكانيات فتيات المعادي وامكانيات فتيات بولاق
الموضوع باختصار شديد .. بدل ما الشرطة تحط طعم عشان يصطادو مجرم .. الشرطه نفسها تكثف الوجود الامني .. مش في فترة ظهور السفاح وبس .. لأ .. في المطلق
ماهو لو انتي قلبتي في المدونة هتلاقي موضوع اسمه اكاديمية الشرطة .. الحوار اللي حصل فيه كان في المعادي نفسها .. اللي في فترة السفاح كان مابين كل امين شرطه وامين شرطه .. عشرين امين شرطه .. وكانو هاريننا بطاقتك يا استاذ بطاقتك ياباشمهندس

ومين قاللك ان ده السفاح
طب انا اهو وانتي اهو .. انه هيطلع من الموضوع برائه زي ماحصل في بتاع بني مزار
في خلل في تطبيق القانون .. والخلل ده في الشرطه

---

*البت المشمشية *حلوة بس شقية *

انتي لحقتي يابنتي
ده انتي عامله المدونه مافيش شهرين تلاته
لحقتي تضيعيها

يالهووووي عليكييييي

حاضر ياستي
هعمل تنويه واقول الحوار
بس هتدفعي كام بالصلاتو عالنبي؟؟؟

---

قلب مصرى

حمايا العزيز
انت عارفني يا حمايا .. انا حياتي بلا مزز
وش واحد بيغمزلك عشان رقيه ماتاخدش بالها

ليك وحشه بطريقه انت مش متخيلها والله العظيم

---

Soul.o0o.Whisper

شفتي بقى اللي بيحصل فينا

وقبل ماترفعي مذكرة للسيد الحاجات الكتير اللي قلتي عليها .. استني لغاية ما نعمل المظاهرة
عشان لو اتقفشنا .. يبقى المذكرة ليها لازمة
وعموما يعني .. احنا هنتقفش .. اتكلي على الله واكتبي المذكره بسرعة عشان الجماعة في التخشيبه ايدهم طرشة

---

الشنكوتي الكبير

هوبا حليب هارتي
والله مشوار عالسفاح في القرية الذكية
مش دي اللي في شرم الشيخ برضك ؟؟؟

وبعدين انتو عالم تكنولوجيا .. يعني ماياكلش معاكم سفاح يعلم على الاظائيظ
انتو عايزنلكم سفاح يعمل فيرس .. يعلم عالرامات .. يسرق نظام تشغيل زي الويندوز
حاجات كده يعني

ليك وحشه والله ياصاحبي





سلاموووووووووووووز

kiki يقول...

情趣用品,情趣,A片,AIO,AV,AV女優,A漫,免費A片,AIO交友愛情館,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,情色論壇,色情影片,微風成人,嘟嘟成人網,成人,18成人,成人影城,成人圖片區,成人圖片,成人貼圖,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,視訊聊天室,視訊聊天

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

情趣用品,情趣,情趣商品,A片,AIO交友愛情館,AIOAV女優,AV,A漫,免費A片,本土自拍,自拍,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,色情影片,情色網,色情網站,微風成人區,微風成人,嘟嘟成人網,成人,18成人,成人影城,成人圖片區,成人圖片,成人貼圖,成人文章,成人小說,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,中部人聊天室,080苗栗人聊天室,苗栗人聊天室,免費視訊聊天,免費視訊,視訊聊天室,視訊聊天

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,AIO交友愛情館,一葉情貼圖片區,情色論壇,色情影片,色情網站,微風成人區,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,A片,AV女優,AV,A漫,免費A片,自拍,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園,080中部人聊天室,080聊天室,080苗栗人聊天室

情趣用品,情趣,情趣商品,愛情公寓,情色,情色貼圖,色情小說,情色小說,情色文學,色情,做愛,寄情築園小遊戲,色情遊戲,AIO交友愛情館,AIO,色情影片,情色網,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人文章,成人小說,成人電影,麗的色遊戲,自拍,A片,AV女優,AV,A漫,視訊交友網,視訊,視訊交友,免費視訊聊天室,免費視訊,視訊聊天,視訊聊天室,UT聊天室,聊天室,豆豆聊天室,哈啦聊天室,尋夢園聊天室,聊天室尋夢園