الأحد، ٤ ربيع الأول ١٤٣٠ هـ

!! حكاية التلات بنات

.. في تحديث في آخر الموضوع
----------

.. كان ياما كان - من زمان ما سمعناش الكلمه دي والله - كان في تلات بنات
!! الأولانيه اسمها شحروره .. شايفين الأسماء
!! والتانيه بعروره .. شامّين الأسماء
!! وآخر العنقود بقى .. صرصوره
- هي الأسماء خلصت ولا ايه يا جرعان !!؟؟؟ -
.. مش مشكله .. في داهيه الأسماء .. نبقى نخليهم يغيرو اساميهم خالص
.. نخش على الكلام الكبير ... أوصافهم بقى
- ايوه كده .. خللي القعده تطرى شويه -
التلاته ما يتخيروش عن رجل معزه محروقه .. امها كانت بتتوحم في كلب .. مضروب بعربيه بيجو سبعة راكب .. بعد ما رشقت في اتوبيس نقل عام من ابو ربع جنيه
- !! يا نهار ازرققققق .. دي أشكال ضاله ضاله يعني -

التلات بنات كان عندهم مشكله .. كان نفسهم يصاحبو اي حد .. أي حد .. والله ما هينقو .. انشالله حتى يكون شهيد في الحرب المشهوره بين امبابه ودار السلام .. مش فارق معاهم
- !! بس اشووووفه .. اشووووفه -

في المدرسه .. كان كل صاحباتهم البنات .. لما بيشوفوهم هاللين عليهم .. يقومو يجرو زي مايكون في طاعون داخل .. لدرجة انهم لما كانو بيطلعو من المدرسه .. العيال اللي واقفين عشان يعاكسو البنات بمجرد يشوفوهم .. بيجرو على اقرب بوكس ويسلمو نفسهم
!! البنات كرهو التعليم خالص .. تقولش كانو فالحين فيه أصلا

.. وفعلا .. قعدو ملائكة شارلي في بيتهم
- !! ملائكة شارلي .. قول شياطين السبتيه .. عفاريت بولاق .. انما مش ملائكه خالص -

أمهم - والله صعبانه علي - كانت كل ماتشوفهم .. تقعد تندب حظها الهباب اللي رزقها بتلات حاجات شبه البنات .. ماهو دول مخلوقات خرافيه .. مش بنات خالص يا جرعان

ولما قررت امهم انها تجوزهم .. كان كل ما ييجي واحد .. ويبقى عايز يشوف العروسه .. ام البنات تقعد تقوللو
احنا بناتنا مايتكشفوش على راجل :
- !!! فعلا .. دول يتكشفو على عزرائيل -

!! وطبعا كل جوازه فاشله .. بتنتهي قبل ما تبدأ اصلا .. وده التطور الطبيعي للحاجه البايته

وفي يوم من ذات الأيام .. كانو البنات قاعدين بيقرو في الجرايد والمجلات .. وفجأه شحروره نطت في السما وهي فرحانه ومزقططه وبتقول
شحروره : أوه ماي جاد !!؟؟ - الله يرحم ابوها .. كان بيبيع بمب شُكك في العيد
بعروره : مالك يا شوشو .. في ايه ؟؟؟
صرصوره : لقيتي عرييييس ؟؟ - زمن المعجزات انتهى يا بنتي

.. قامت شحروره هانم قرتلهم الجرنان
يتشرف مستشفى الدكتور بهلول الاعرج .. بالاعلان عن حضور الدكتور فيسكو دي بيجامه خبير التجميل في جامعة استبحس .. وعلى من يرغب في الاستشاره ان يحضر للعنوان التالي

وعادييييييييييييكم على اللي حصل .. تنطيط وزغرته وشغل قرود .. وراحو العنوان بتاع المستشفى .. وحجزو .. واتحدد لهم يوم للاستشاره .. ورجعو بيتهم حرقو كل صورهم القديمه .. ماهو خلاص بقى مافيش داعي يفتكرو الماضي الغابر

وفي اليوم المحدد .. راحو المستشفى وكل واحده منهم معاها صوره كبيره .. دخلو على الدكتور اللي أول ما شافهم اتسرع
وطلعت صورة روبي - I WANT TO BE LIKE THIS : شحروره
وطلعت صورة نانسي عجرم - I WANT TO BE LIKE THIS : بعروره
خالتي هيفاء وهبي - I WANT TO BE LIKE THIS : صرصوره
!! وقعد يعيط - TO BE OR NOT TO BE .. THIS IS THE MOSIBA : الدكتور

.. دخلو غرفه العمليات .. وبعد عشر دقايق الدكتور طلع بره وهو شعره منكوش .. وبيقول
E7NA 3MALNA ELLY 3ALINA .. W ELBAKY 3ALA ALLAH !!
- !! الكلمه دي بياخدوها في سنه تالته طب هناك برضه -


.. وجه اليوم اللي المفروض يشيلو فيه الشاش من على وشهم
- موسيقى تصويريه -

جه الدكتور بطقم المساعدين والتليفزيون وكل البشر عشان يشوفو المعجزه .. وكل واحده من البنات البقر بتقول انا الاول .. لا انا الاول .. انا اللي قلتلكم يبقى انا الاول
!! من الآخر ... قلبوها حضانه
لكن عملو كلو باميه .. وجه الدور على بعروره

أول ما الدكتور شال الشاش .. شحروره راحت راقعه ضحكه جابت آخر شارع فيصل
!! بعروره كان نفسها تبقى هيفاء وهبي .. بس طلعت وهبي .. من غير مايجيب بنته معاه
- الأول -

.. جه الدور على صرصوره .. وأول ما الشاش اتشال .. بانت الحقيقه المرّه
!! عارفين قعر الحله اللي بيسخنو بيها الميه على سبرتايه .. لونه ابيض منها
- التاني -

و آخيرا جه الدور على شحروره .. اللي كان نفسها تخللي الدكتور يسيب الشاش على وشها مدى الحياه .. بس الدكتور قال يمكن تكون العمليه نجحت معاها .. و شال الشاش .. وجاتله حالة عته مغولي مع شلل رباعي مضاعف
!! شحروره بقت شبه كائن السندرليك الأسطوري .. والذي لم يشاهده بشر
- التالت -

.. وتوته توته .. خلصت الحدوته
.. آه صحيح .. نسيت اقول ان امهم عملت اعلان في الجرايد .. بتقول فيه
مطلوب عريس وسندفع له كافه المصاريف
+
بدل انتقال
+
بدل طبيعة مهنه ومخاطر
=
بدل ما بناتي يعنسوووووووووووووووووو


---
ملحوظة

الموضوع ده كتبته من اكتر من اربع سنين ونشرته في منتدى مصر اليوم .. وبعد كده اتسرق كزا مره .. وحقي الادبي ضاع لأن منتدى مصر اليوم وقع وكل الداتا اللي عليه راحت في الوبا

آه .. البت
خيخه عامله حملة خيخية للتبرع بالدم .. يوم الجمعه الموافق سته مارس الفين وتسعة .. هنتجمع الساعه تسعه ونص الصبح قدام المصل واللقاح في العجوزة .. وان شاء الله رايح
.. ياريت كل الناس تيجي لأنه بجد هيكون يوم ظريف جدا جدا .. ان شاء الله يعني
.. ولو في حد مش هيقدر يتبرع بالدم مش مشكله
!!! ييجي ويشجعنا .. واحنا بيتمص دمنا

التحديث
--------

فوجئت بإن الموضوع ده تمت سرقته - ولله الحمد - من أحد اعضاء منتدى جامعة جنوب الوادي
ونسبه الى نفسه دون الاشاره من قريب او من بعيد لكاتب الموضوع .. وعادي خالص اهو
!! وسرق موضوع حكاية التلات بنات .. اللي اصلا اتسرق قبل كده
.. وسرقني هنا كمان .. يعني ده حد متابعني قوي
!! واستغرابي زاد لما لقيته من قنا
يعني المفروض صعيدي وبيفهم في الاصول .. المفروض يعني
عيب يابلدينا .. عيب .. انا صعيدي برضه ومايصحش تعمل كده
!! يعني الواحد يجيب ضرفها ويعتزل ويرتدي الحجاب .. مش فاهم بجد

سوووو

هناك ٣٣ تعليقًا:

تامر علي يقول...

الموضوع ده فكرني بقصة الخنازير التلاته اللي الديب كلهم ... ياريته كان كلهم وخلصهم من الهم ده ...

كان في نكته زمان كنا بنقولها

قال ايه اتنين خلفوا واد وحش جداً اسمه فوزي ... وبعدين مقدروش يستحملوا شكله الفظيع قالوا نرميه في أي ملجأ وكل ما يودوه ملجأ يقفلوه علشان مياخدوش فوزي .... قاموا خدروه وحطوه ادام ملجأ بعيد .... ومرت الأيام وحب الأب والأم يشوفوا ضناهم قامو راحوا الملجأ وقالوا احنا ابننا فوزي وعاوزين نشوفه قاموا شاورولهم على مكان طلعوا أول دور ( أطفال معاقين) مالقوهوش ...أطفال مشوهين ملقوهوش ...الدور اللي بعديه .."أطفال مضروبين بالنابال"م ... مفيش .... "وحوش ضاريه في شكل أطفال" ... مفيش ... "كائنات عجيبة من كواكب أخرى" ...برضه مفيش .... أخر دور لقوا مكتوب عليه "فوزي"

ليلى فى عالم ادم يقول...

ايه يابنى المسخرة دى
دة انا صوت ضحكى جاب اول فيصل بجد
انت مصيبة


تعالى شوف مدونتى الجديدة وقولى رايك ايه؟

adel يقول...

ههههههههه

والله جامد ياسووووووووو

و نتعلم من القصة اننا منعملش عمليات تجميل عند دكاترة اجانب مش بيعرفوا يقولوا

عمالنا اللي علينا و الباقي علي ربنا

البلدي يوكل برضه
ههههههههههههههه

*البت المشمشية *حلوة بس شقية * يقول...

هههههههههههههههه
طب ليه السيرة دى
متفكرنيش بلمأساة
ماحنا حلوين اهو بس عايزين عريس
فيه ولا مفيش

مهندس مصري بيحب مصر يقول...

ههههههههههه
فكرتني بقصة المعزات التلاتة

معزة حاز
و معزة ماز
و معزة بتضرب بالعكاز

هههههههههههه

انا حره يقول...

الله يخرب بيت فقرك يااحمد

انت بتجيب الكلام دا منييييييين

الا ابوها كان بيبيع بمب شكك دى ههههههههه

وبعدين انت كدا بتلعب فمنطقه العرسان ودى منطقه خطر خد بالك

وقد اعذر من فنزر

عاشقة حبيبتى يقول...

مساء الخير
لازم كل انسان يقتنع ان الجمال جمال الروح مش الشكل لان الشكل بيتغير مع السنين لكن يبقى الداخل لا يتغير ابدا

تحياتى

احساس طفلة محبة للرومانسية بس واقعية يقول...

لا مش ممكن انت كنت بتوصف اية
ولا حتى كائنات خرافية
دول كائنات يا انقرضت يا لسة مظهرتش
انت جبتهم منين دوول
هاهاهاهاهاهاهاهاها
بس اكيد فى 3 كائنات زيهم كدا
انقرضو من زمان ينفع يتجوزوهم
هاهاهاهاهاهاهاها

تقبل مرورى

”*°•.˜”*°•..سونه..•°*”˜.•°*”˜ يقول...

hi
السلام عليكم .
بجد اسلوب جميل ومشوق ومضحق
عجبنى اوى
طبعا غير القصه فيها معلومات ونصائح مفيده اكيد
تحياتى ليك (سونه) .

3ala asm masr يقول...

هههههههههه
يا اخى حرام عليك فى بنات وحشه للدرجه دى
صحيح
ابقا خد بالك من دمك بقا يا سووو مش كل شويه كده يمصوا دمك حرام

عاشقه وغلبانه يقول...

هههههههههههههههههههههه
هههههههه

مش عارفه مين الجراح اللي خاطر بسمعته ومد ايديه في المعركه الحربيه دي..؟؟

ساعه الغروب يقول...

انت دايما كدا بتنسى حاجات غريبه ومهمه اوى على فكره :)

يا ترى كان شكلهم قبل العميله اظرف ولا بعد؟؟

وبعدين مقاييس النجاح للعمليات دى هنا بتختلف تماما عن مقاييس النجاح للعمليات دى هناك عندهم
عند الشعب اللى بيعمل كل اللى عليه بجد

ما تعرفش بقى العيب بيبقى فى الماده الخام ولا فى الادوات

!!!!!!!!!!!!!!


يعنى ممكن عمك وهبى يكون احلى من عمتك بعروره مثلا بس بالنسبه للدكتور الاجنبى الشكل النهائى دا غير مرضى
اما لو كان الدكتور مصرى فدا منتهى الانتصار بالنسبه له

انه حولها من بعروره لوهبى وطبعا لاننا شعب بيقتنع بالايحاء كانت هتبقى فى قمه سعادتها

نأسف للاخت بعروره لو كنا غلطنا فى اسمها


ميرسى ليك

بوست بجد رائع جدااااااااااااا

:)

تحياتى

بنت الغربة يقول...

حلوة قوى قوى ياعجوووووز
انا كده عرفت انت ماتجوزتش لغاية دلوقتى ليه؟؟
انت اكيد اكيد جار التلات اماااامير دول..
روح ياعم اتبرع بدمك ...بس اشك انهم يلاقوا حاجه بعد دمك مانشف من شوفة التلات عفاريت دول
تحياتى

حواء يقول...

مش ممكن انت فظيع
من زمان بسمع عن المدونه وقد ايه دمك خفيف بس مكنتش متوقعه انك كده أوي
تحياتي

Unknown يقول...

ياسووووو
تسمحى لى اسالك
بس مش قصدى احرجك
انت بتقصد التريقة على
(وحاشة البنات التلاتة)
ولا على عدم رضاهم
على وحاشتهم؟
بجد حتفرق
عندى!
ارجو الاجابة
ولو فى سرك او بينى وبينك!

marmar يقول...

يالهوووووووووووي
حرام عليك ولله
البنت مهما كانت وحشه وحشه كيلو بودره ونص كيلو اي شادو واتنين كيلو روج "عشان يكفي من تحت المناخير لحد الفك "سفلي اوي علوي مش هتفرق" "
وتضرب شعرها اكسوجين من ابو اتنين جنيه اللي عند الراجل اللي بيبع بمب شكك ده وهئ ومئ وبادي كات وبنتاكور وهيهيهيهيهيهيهيييي يخربيتك يا شقي
صف عرسان هيقف عليها من هنا لحااااااااااد ميدان التحرير
البنت مهما كانت وحشه بردو دلعها ورقتها هيخلوها ملكه جمال
اما الراجل بقى لو كان وحش
ربنا يتولاه بقى برحمته
ان لله وان اليه راجعون


تحياتي

موجة يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يخرب عقلك ياسوووووووو
انت مالكش حل
المفروض يعينوك فى منتدى الاكتئاب العالمى
بقولك ايه ماتيجى نعمل دويتو سوا انا مدونتى كئيبة وانت مدونتك مسخرة
سورى
قصدى يعنى انها تهلك من الضحك
اقولك
انت بجد مواضيعك بتضحكنى واكيد هو ده الهدف من المواضيع اللى بتنشرها
تحياتى ليك وسلامى الممزوج بضحكااااتى العالية جدا

حروف يقول...

ههههههههههههههههههههههه
فكرتني بموجة كوميدي "ضحكة رقيعه"
مش انا طبعا هههههههههههههه
كلعادة جميله ومنه لله اللي سرقها

Amgad يقول...

ٍسوووووووو
مساء الفل عليك يا معلم
انا اتبسطت اوي بكلامك ومتفهمة اوي
وعلي فكرة معاك حق بس انا كي بوردي متبريه مني بقي تعمل ايه
سيبك من ده كله خلينا في البوست
انت اسلوبك مش ساخر بس
ده ساخر لدرجة المسخرة
ولكن تقبل بقي ملحوظتي
رغم ابداعك الساخر في القصة دي
الا اني شايف انها بسيطةاوي
في محتواها والهدف منها
تقبل بقي ملحوظتي ويشرفني التواصل معاك

Unknown يقول...

جميلة يا عم الشباب والرياضة
بوست حلو وجامد واسلوبك متميز

بـراااح يقول...

ضحكتني و انا عندي تسليم مشروع و الفايل حالف ما يتبعت :)))) دي اول مرة ازور مدونتك بس اكيد ان شاء الله مش الاخيرة ... اسلوبك جميل جدا و مشوق و خفيف ما شاء الله
ربنا يديم عليك خفة الروح و الدم و طلاقة التعبير و اكيد يبعد خفة الايد عن البوستات بتاعتك
تحياتي

mohamed ghalia يقول...

أستاذى سعيد جدا إنى أتعرفت على حضرتك فى حفل توقيع الكتاب
محمد غالية

mostafa rayan يقول...

انا فاكر اني علقت على الموضوع دةقبل كدة
بس يا احمد انا عايزاقولك
اي شوفت الموضوع اللي الوادالحرامي دةسرقه
بس بصراحةانت ردك عليه كان مؤدب قوي
ودة واحد حرامي
دةالمفروض يتشتم ويتهزء وتتطلب من ادارةالمنتدى حزف الموضوع وطرده وعدم الماساس بموضوعاتك مرة تانية
يا احمد لازم الحرامية دول يقفو عند حدهم
ودة مش هيحصل إلا لواحنا كنا افوياء معهم الحنية مع الناس دي ماتنفعش ربنا يرحمك من الحرامية بس جامدة حكايةالحجاب دي
صباحك ورديا جميل

غير معرف يقول...

هههههههههههههههه
يا خرابى كده شردت التنانين الصغيره
الى كانت عايزة تعيش
دول عصفر عصفر والله
هههههههههههه

طيب دول وحشين ومعفنين وعندهم حق يحاولو يجملو روحهم امال بقى الى بيعملو العمليات دى عشان الموضه او عشان كل ويك ايند تفاجىء اصحابها بنيولوك جديد يبقو ايه

ومن ناحيه السرقه دى ربنا يستر حاجه تضايق
معلش متزعلش

YHYيــوســف الـمصـرى يقول...

هههههههههههههههههههه
يخرب عقلك يا راجل ...:)

عايز اشوفك ضرورى ضرورى ضرورى :)
:) كلمنى شكرا

dreem يقول...

ازيك يا سووووو
مش عيب تكدب عليا وانا ست كبيرة يابنى !
طب اناما سمعتش شحرورة وهى بتضحك ,,, مع انى لسة مغيرة حجر السماعة هههههههههههه
انتى فقرى والله ودمك خفيف
سلاموز

Zika يقول...

الله يخرب بيت سرقه الافكار يا باشا
البلد باظت
خلاص يا فندم عملت مونتاج للبوست
تعالي بقي
خد اقولك
تعالي بس

صباح الصباح يقول...

بجد يا سووو

لا زم تعمل كتاب.. طب بجد اية المشكلة وانا مستعد احجز عشر نسخ من دلوقتى

فوبيا - سايكولاند يقول...

اشطه جدا يا عجوز على فكرة انا عجوز برضه 30 سنة بصرة

MeDoOoOoOo يقول...

يا عم الحاج ارحمني بقي من تشبيهاتك دي هو الموضوع حلو بس مش هيمنع ان عليك 15 جنيه برضه و الا هشردلك في كل الصحف و الجرائد و الوسائل المرئيه و المسموعه و اعملك بليكه جامده قوي بس انا عايز اسمع الاغنيه بتاعت هنكيد العزال :D يلا......

peace banana
Medo

dahlia.. يقول...

بجد فظيعة..أنا مضحكتش كدة من زماااان و عشان كدة حبيت أعلق عندك عشان أشكرك لأن الضحك بقى نادر قوي في حياتنا(منصحكش بزيارة مدونتي لو عايز تحافظ على موودك);)

sara يقول...

هههههههههههه. الحدوته دي تحححححححححححفه. ياريت تكتر من الحواديت. لانك موهوب فعلا فيها.موتتني من الضحك.

غدغووودة يقول...

هاى سووو انا لسه شايفه مدونتك بالصدفه من كام يوم بس.. و بصراحه انت فظيييييييييييع اخر حاجه ايه الجنان ده اسلوبك اكتر من رااااااائع و معرفش ازاى بتقدر تطلع الضحك من جوه الواحد بالشكل السلس ده و الله انت جواك كاتب ساخر رهيييب او كوميديان كبييير ليه مفكرتش تكتب فى مجله او تعرض كتباتك على حد متخصص و الله خسارة الانتاج الغزير ده يبقى لجمهور المونات بس ده انت ممكن تنافس يوسف معاطى الكاتب الساخر المعروف و لا تنافسه ايه ده انت تسحقه و الله بجد فكر فى كلامى... نسيت اعرفك بنفسى .. غادة من المنيا يعنى صعيدية و دماغى واااعرة جوى و مش اى حد يقدر يضحكنى بالساهل اكده