الجمعة، ١٧ شوال ١٤٢٩ هـ

!! قرطبه وسيمافرو .. وآخرون

جبت جرنان الاهرام وقلت اصطبح واقراه .. خصوصا ان النهارده الجمعه وانا باحب اقرى بريد الجمعه .. وإذ بي أفوجأ باعلان عالصفحة الاولى بيحذر الناس من اعلان نزل يوم التلات اربعتاشر اكتوبر الفين وتمانيه .. عن مزارع قرطبة
وادي صورة الاعلان التحذيري اللي عملتة وزارة الزراعة تقريبا
وآدي صورة الاعلان اللي عملتة الشركه اللي بتحذر منها وزارة الزراعه
اللي هو اعلان مزارع قرطبه
وزي ماهو باين .. اعلان مزارع قرطبه اللي الوزارة بتحذر الناس منه .. معمول على صفحه كامله .. والاعلان اللي عملته وزارة الزراعه معمول على عمودين من تحت عالشمال في اول صفحه
!!!
مش هاقول ان الوزارة كانت لازم تعمل اعلان على قد الاعلان القديم لمزارع قرطبة .. ومش هتكلم على ان الوزارة - ربنا يبارك فيها - حذرت الناس من التعامل مع الحوار ده
أي نعم حذرت الناس بعد تلات تيام بحالهم .. وربنا هو بس اللي عالم كام واحد وقعو فريسة وضحية للاعلان ده
وطبعا اساسي اصلا .. مش هتكلم عن سعر قطعة الأرض الرخيص جدا جدا جدا .. واللي الواحد بيصرف قده عشر مرات شاي وقهوة بس على البورصه
بس عايز افهم .. دلوقتي احنا كشعب غلبان .. نصدق مين؟؟؟
يعني لما شركة تعمل اعلان على صفحه كاملة .. وفي جرنان الاهرام وتدفع مبلغ وقدره
- ده تلاقيها اقل واجب دافعه قد خماشر عششين ولا خمخه وعششين جنيه بحالهم .. مبلغ يعني -
وفي الاخر يتضح انها شركة بتبيع الوهم .. المفروض بعد كده نصدق مين !!!!!؟؟؟؟
ولا هي الحكومة ربنا يبارك لنا فيها - زياده ماهي مباركة - مش بتهتم بالتدقيق وراء الاعلانات التجاريه في الجرايد .. قد ماهي بتهتم بالاخبار المحليه .. وبيكون في كل جرنان مسئول من الدولة لمراجعة ايه الاخبار اللي تنزل وايه الاخبار اللي ماتنزلش !!!!؟؟؟؟

وغير كده بقى .. الشركة اللي دفعت حق الاعلان بتاع جرنان الاهرام
هل هتاخد الفلوس اللي دفعتها ولا راحت في الحرب مع اللي راحو !!!؟؟؟؟
-----
الحوار ده فكرني بحوار حصل زمان ايام التسعينات .. نزلت حملة اعلانات في التلفزيون .. الحمله كانت عباره عن اعلان عن حاجه اسمها سيمافرو .. والاعلان بتاع التلفزيون كان غامض قوي .. كان فيه مجموعة اصوات لناس بتقول سيمافرو سيمافرو سيمافرو .. وبيطلع عالشاشه ساعتها شكل اشارة مرور .. ولما الاعلان يقرب يخلص .. يروحو كاتبين عالشاشة .. قريبا في كل مصر
!!!!!!!!!!!!!!!!
طبعا مصر كلها بقت عماله تقول سيمافرو .. لدرجة اني لو كنت متجوز وخلفت واد هاسميه سيمافرو من كتر ما الاسم مشهور والبلد كلها بتقوله

وبعد فتره من الاعلان الغامض ده .. كل المحلات اللي في مصر راحت معلقه اشارة مرور على باب المحل .. ومكتوب على المحل نفسه .. هذا المكان تابع لسيمافرو
واللي يشتري أي حاجه من الناس ياخد كوبون عليه رقم مسلسل .. والمفروض انه يستنى نتيجة السحب اللي هتعملها شركة سيمافرو وهتنزلها في الجرنان .. والجوايز بقى عربيات وصواريخ وطيارت وفيلل وعرايس بنات للولاد وعرسان ولاد للبنات .. من الاخر كللو هيكسب والعيشه هتبقى فل الفل
اضافة على ان سيمافرو نفسها نزلت مجموعة كروت يشتريها الواحد .. وبتعمل خصم مش عارف خمسه في الميه تقريبا .. بشرط ان الواحد يشتري بضاعته من المحلات اللي حاطة علامة السيمافرو على المحل .. وبحد اقصى عشرين سلعه تقريبا بشرط ان سعر السلع مايعديش مبلغ معين .. بس المبلغ كان كبير قوي .. يعني حوالي عشرين الف جنيه
لغاية هنا والحياه فل قوي وبيس يا مان .. خصوصا ان اسعار الحاجات ما اتغيرتش بالنسبة لينا كمستهلكين .. بالعكس .. ده الكارت ابو ميه وخمسين جنيه بتاع سيمافرو .. بيجبلي خصم حلو على اللي عايز اشتريه .. وكمان المستهلك اتعشم انه يكسب أي حاجه في رغيف من سيمافرو .. في السحب اللي هيتعمل وهينزل في التلفزيون والجرايد كمان
ومره واحده .. هوسسسسسسسس
بخخخخخخخ

اختفت شركة سيمافرو .. ولا اعلان ولا ترتان
.. واتضح اننا اتنصب علينا نصبايه صح الصح
.. الناس اشترت كروت ومالحقتش تشتري بيها ولا تستفيد من الخصم المزعوم
واصحاب المحلات اللي اتعاملو مع شركة سيمافرو كل واحد منهم دفع خمسمية جنيه .. قصاد ان اسم المحل بتاعه هينزل في الاعلان بتاع الجرنان لما أي حد يكسب .. والناس هتشتري من المحلات اللي حاطه علامة سيمافرو وهتنفض للمحلات اللي مش حاطه العلامة

بجد بجد بجد .. فكرة عبقريه في النصب .. استغلو ان الناس وأصحاب المحلات طمّاعين .. وعملو الحمله الاعلانيه بتاعتهم .. والبلد كلها بقت سيمافرو سيمافرو سيمافرو
وهووووب .. امك في العِشه ولا طارت

كأن بلدنا مالهاش كبير بجد .. اللي عايز يسرق يسرق .. واللي عايز ينصب ينصب .. واللي عايز يعمل أي حاجه يعملها
المهم .. انك ماتغلطش في الذات الإلاهيه
.. ولا اغلط براحتك .. مش يمكن تاخد عفو ملكي
وبعدها تلاقي نفسك بتقول للحكومه - اللي سابتك وماعبّرتكش وسابت كل اللي عايز ينصب عليك ينصب – آسف على الازعاج اللي عملته ليكم يا حكومه ويا نظام
.. وانتو ناس عندكم مسئوليات واهتمامات كتير قوي
وانا بجد .. آسف على الازعاج
----
.. وبمناسبة آسف على الازعاج .. دوس هنا هتلاقي نفسك في سينماتك
وهتلاقيني باتكلم عن فيلم .. آسف على الازعاج
ولو حد حب يدخل على سينماتك على طول .. يدوس عالصورة اللي عالشمال تحت وصيتي
سوووو

هناك ٣٥ تعليقًا:

مهندس مصري بيحب مصر يقول...

ياسيدي و هي 580 الف جنيه بقت فلوس دلوقتي
طبقة الناس الهاي بتتكلم بالمليار لإن المليون بقى فكة
اما الغلابة اللي زينا فعمرهم ما حيجرؤوا يحلموا بقيراط من الارض دي

بس كويس ان الوزارة نزلت تحذير
بس هل يا ترى حتسحب الارض من صاحبها النصاب و لا حتعمل ايه ؟

خمسة فضفضة يقول...

السلام عليكم ورحمة الله وبركاته

ايه سيمافرو ده اول مره اسمع عنه
مع اني كنت موجوده برضو ايام التسعينات بس مش فاكراه خالص

بس هاقولك من الآخر كده احنا بقينا لقيه لاي حد عاوز ينصب ينصب براحته عاوز يسرق ياعم هاتلك شوالين وعبي زي مانت عاوز ولا يهمك

المهم ان انك تكون مظبط الناس اللي فوق وراضيين عنك تمام التمام وينحرق بقي الشعب علي اللي جابوه


سلام

Unknown يقول...

السلام عليكم
ايه أخبارك ياسوو .. مزعل نفسك ليه كده .. مفيش جديد نصب ونهب وسرقة فى عز الظهر
فيه جديد؟
كل واحد بيستخدم الأدوات اللى قدر يغتصبها فى أخد حقوق الناس لصالحه .. من أول الناس اللى بتسرق الحرية لحد الناس اللى بتسرق الأكل علشان جعانة
وكل سنة وانت طيب بمناسبة 17 أكتوبر

nona يقول...

عادى باة ينصبوا على الناس مافيش مشكلة المهم انهم يكسبوا فى الاخير و مش ذنبهم ان الناس بتصدق اى حاجة و السلام اصلنا طماعين و هما مالهمش ذنب
تعرف لو كانوا قسموا مع اصحابنا الكبار قوى ماكنش نزلت ليهم تكديب فى الجرنال شوفت باة

بنت مصريه يقول...

ههههههههههههههههههههههه
اصلنا شعب طيب يا سووو
سهل جدا يتضحك علينا
خصوصا ان احنا غلابه وبنجرى ورا اشايه
عارف لو شبعانين ومكرشين ومبسوطين
ولا هنجرى ورا الهطل دا ولا هيتنصب علينا خالص
حلوه المداخله بتاعه اسف عالازعاج دخلت البوستين ف بعض بطريقه حلوه
سلامووووز

Soooo يقول...

مهندس مصري

على رأيك ياهندزا
احنا الناس الهاي .. المبلغ ده ولا يسوى معانا
ده يادوب شيبسي وترمس للأولاد

ملحوظه
اعتقد ان صاحب الارض واحد من الوزاره نفسها .. ولما مارضيش يقسم معاهم قلبو عليه
وهاياخدو الارض ويدوها لواحد تبعهم .. وهينزل اعلان تاني بس بدل مزارع قرطبه هيبقى اسمها .. مزارع كورتوبا





سلامووووووووووز

Soooo يقول...

خمسة فضفضة

وعليكم السلام ورحمة الله وبركاته

ارجعي كده بالذاكره يا دكتوره .. قبل ما الشمعدان ينزل كتاكيتو
ساعة اعلانات محمود ايه ده يا محمود
سيمافرو طلع بعدها وغطى على محمود وعلى خطيبة محمود وعلى عيلة محمود كلها

وفعلا احنا بقينا صيده صح .. وان شاء الله هتكلم قريب عن حوار الجهاز الصيني اللي اتعمل من وراه احلى سبوبه على قفا الغلابه





سلاموووووووووووز

Soooo يقول...

ـ-ـ- أحمد عبد العدل-ـ-ـ

يا عمونا انا مش ضد النصب
بالعكس
طب ده انا جوايا مجرم صغير نفسه ياكل من الفته دي

بس ضد الغباوه
انصب براحتك .. بس ماتبقاش غبي

ملحوظه
هو سبعتاشر اكتوبر حصل فيه ايه ولا مؤاخذه؟؟؟؟؟؟
اه افتكرت .. الريس طقطق صوابعه
مش كده برضك؟؟؟





سلاموووووووووووز

Soooo يقول...

nona

والله عندك حق

هم فعلا لو كانو قسمو مع الكبار كانت المسائل مشيت حلويات

زي ماعملو زمان مع سعد بتاع الريف الاوروبي .. قسمو معاه في اول المشروع ولما رفض ياخدو حاجه تاني .. راحو مطلعين عين الناس هناك .. والناس ولا عارفه تبني ولا تزرع ولا اي بتاع





سلامووووووووووووز

Soooo يقول...

بنت مصريه

تعتقدي اننا لو فعلا شبعانين ومكرشين مش هنجري ورا ده؟؟
بالعكس .. احنا شعب اتزرعت فيه جمله .. زيادة الخير خيرين
اتزرعت فينا سلبيات ولا مبالاه واهمال وحاجات كتير قوي وحشه
بقالنا اكتر من تلاتين سنه بيتزرع جوانا الفهلوة .. وادي الفهلوة بتتقلب علينا اهو

ولازم كلنا نقول آسف على الازعاج
مش دي الحقيقه؟؟؟؟






سلامووووووووووووووز

ميرا ( وومن ) يقول...

طب كويس والله انهم اخدوا بالهم

احمد ربنا ان حد اتنحرر وعمل حاجة

احسن مع بعد كام يوم كنا نلاقي الضحايا في اي توك شو بيعيطوا ويقولوا راحت فلوسك يا صابر

ومين سيمافرو ده انا مواليد التمانينات بس مش فاكراه خالص

يمكن علشان اخر التمنينات يمكن

حلوة الدنيا يقول...

كنت لسه هفكرك بالجهاز الصيني لقيتك كاتبه في التعليقات هههههههههههه

ساعتها الناس كلها كانت بتتكلم عنه بيعالج الضغط والسكر ويطول القصير ويقصر الطويل ولو عايزه يقوم يرقصلك ماشي شغال
الي انت بتحلم بيه هو هيعمله

علي قكرة حوارات النصب بالطريقة دي بتكون دايما في البلاد الي شعبها جاهل وساذج وسطحي وطماع كمان

صبرني يارب يقول...

سو مش فاكره حكاية سيمافرو دي

يمكن كنت انا مسافره ايامها

عموما ايه الجديد حضرتك

ياابنى احنا بنتباع فى اليوم الف مره

سواء يكون المشتري محلي او اجنبي

وما بنقبضش التمن
فى ناس تانيه بتقبض علينا

وبرضه احنا بلد مافيهاش كبير طبعا

بص حواليش شوف البلطجه الىملت البلد
وانت تعرف انه مولد وصاحبه غايب

قولي يامعلم سمافرو دي علمت عليك فى كام
هههههههههههههههه

3ala asm masr يقول...

اعلانات النصب بقت اشكال والوان لحد ما وصلت ل 09000
حاجه زى الفل والله

غير معرف يقول...

Good article Ahmed...
keep it up

مهندس مصري بيحب مصر يقول...

لا يا حلو قرطبة بعد سقوطها في يد القشتاليين
إتحول إسمها الى كوردوبا
و مازال ده اسمها في أسبانيا لغاية دلوقت
:)
يبقى المفروض يسميها صح

Abo 7anf يقول...

السلام عليكم
مش المهم ان الاعلان نزل
كويس انهم افتكروا وخدوا بالهم
المهم ميكنش حد اشترى

mostafa rayan يقول...

النصاب يا سو مش بينصب إلا لما يشوف طمع الضحية في عنيه
ربنا يكفينا شر الناس دي
تحياتي ليك يا جميل ودمت بخير

همس الاحباب يقول...

طالما هى كده يا سووووووو
طب ما تنزل ياجدع تجيب قطعتين انا وانت
وسيبك من تمن المشاريب بتاعت البورصة مدى الحياة على حسابى
دول 580 الف جند اضرب فى 2
يعنى 1160000 يا بلاش كلام فاضى
يعنى ممكن نشرب بيهم احنا واحفادنا واحفا احفادنا على البورصة ههههه
المهم سيبك انت البلد كلها بقت سيمافرو
وكتر خيرك يا وزارة على التنويه
واسف على الازعاج يا اخى

MKSARAT - SAYED SAAD يقول...

رغم ان مفيش وجه مقارنة بين الاعلان والتنبيه ده صفحة وده حاجة كده على جنب
بس تصدق اول مرة اشوف حاجة صح
الحكومة تعملها
وانت عامل اية دلوقتى
:)
وحشتني يا سو وووو اتمنى تكون بخير
سيد سعد

Asmaa mahaba يقول...

ههههههههههههه تعالى نعمل مشروع نصب يا سووو ماداموا بينفدوا بجلدهم عادى
على راى ماما كان معاها حق اما قالتلى اعلانات الجرايد كلها نصب وانا كنت نازله ادفع فلوس كورس وبالصدفه لاقيت المركز مش مترخص فقعدت فى بيتنا ومنزلتش زمانهم هم كمان كتوا بالفلوس
هههههههههه
بص انا حقولك على حاجه الانسان ربنا مديله عقل يوزن بيه الامور ولازم يعرف ان مفيش لقط فى الزمان دا فبدايه اى نصبايه طعم بيرميه النصاب للى قدامه يطمعه فيه ويعمله البحر طحينه فاذا حدث ووجدت حاجه مش منطقيه المفروض الانسان ميطمعش وميكملش الطريق ويخاطر

Soooo يقول...

وومن

على رأيك والله يا ميرا
كويس انهم عملو الحوار ده ويادوبك فات تلات تيام بس

الخوف بقى ان نفس الحوار يتعمل بس بشكل تاني
يعني ينزل اعلان عن مزارع وبتاع .. وبنفس السعر .. وده يعتبر استعباط لأن السعر مبالغ فيه موووووت في أرض صحراويه لسه هتاخد قد كده استصلاح وشبكات ري وابار جوفيه وليله

وبخصوص سيمافرو .. يمكن تكوني سمعتها عنها وانتي في الحضانه ولا حاجه كده





سلامووووووووووووووز

Soooo يقول...

جعلوني مريض نفسيا

يالهوي عالجهاز الصيني ده يا اتش
ده في يوم واحد يا راجل يا مؤمن جالي اربعه صحابي بيكلموني عنه
وكلهم بيقولولي انه هو ده الاستثمار الصح في الزمن اللي احنا فيه

فعلا تخلف رهيب .. بيشترو جهاز مش عشان العلاج .. لأ
عشان المكسب اللي هايجي لما اشتغل معارفي

حاجه مرار


ملحوظه
الأراجه تعمل بكفائه .. بس انا بوظت ست كليبسات .. الاقيش عند كليبسات سلف ياخويا؟؟؟





سلاموووووووووووووز

Soooo يقول...

صبرني يارب

والله لو انتي كنتي مسافره في ماقبل اتنين وتسعين ولغاية خمسه وتعسين .. يبقى ممكن ماتكونيش سمعتي عنه
لو قبل كده ورجعتي في الفتره دي يعني .. يبقى تحمدي ربنا انك ما وعيتيش عالحوار ده عشان دمك كان هايتحرق

واللي انا باتكلم فيه هو نفسه حوارات النصب والبلطجه والبلد اللي مش عارفينلها كبير

ملحوظه
والله انا في فترة سيمافرو كنت باجيب لوليتا ببريزه وبشلن ارواح .. يعني اساسي ماكنتش هستفيد من حوار سيمافرو ده في اي بطاطا .. وبعدين كارت سيمافرو كان تقريبا بميه وخمسين جنيه .. اجيبهم منين انا ياللي كنت في اعدادي؟؟؟؟؟





سلاموووووووووووووز

Soooo يقول...

3ala asm masr

ومازال مسلسل النصب مستمر
وينتشر
ويتوغل
ويستمر
ويستمر
ويستمر





سلامووووووووووووووز

Soooo يقول...

Bannoura

الله يكرمك يا بنورا يابنت عمي على كلامك الحلو ده
وبالانجليزي كمان
ربنا يسعدك ياشيخه






سلاموووووووووووووز

Soooo يقول...

مهندس مصري

تصدق انك مش فاهم نوعية النصاب المصري
النصاب المصري مايعرفش ميين قشتالين
يعرف مين النشالين
عشان وهو صغير كان من ضمنهم

وبرضه لأن النصاب المصري جاهل .. هيسميها مزارع كورتوبا
او يمكن يسميها
كورتوبا فارمس .. بناة المستهبل .. حلمُ في الضباب





سلاموووووووووووز

Soooo يقول...

Abo 7anf

ومن الاساس ازاي ينزل الاعلان ده يابو حنف
يعني الاعلان ده لشركه
والشركه ليها نشاط معين
وبالتالي ليها سجل تجاري في نوع النشاط
ازاي بقى ينزل اعلان للشركه عن نشاط تاني غير النشاط اللي في السجل التجاري بتاعها واللي بيتقدم لوكالة الاهرام للدعاية والاعلان؟؟

عمرك شفت طبيب بيطري .. ينزل اعلان على انه طبيب اسنان مثلا؟؟؟

وعلى رأيك .. ربنا يستر ومايكونش حد اتنصب عليه واشترى
حاكم انا سمعت ان سعر الارض دي لو لمجرد الزراعه فقط .. يبقى مبالغ فيه بطريقه مهووووووله

وماتبقاش تقطع الزيارات كده ياريس






سلاموووووووووووووووز

Soooo يقول...

mostafa rayan

يا درش ياخويا احنا بقالنا اكتر من تلاتين سنه عمال يتزرع فينا الفهلوة والنصاحه
طبيعي يعني يبقى في عينينا الطمع

الرك بقى عالنظام اللي المفروض يسيطر عالبلد .. مش يسبها تضرب تقلب وبعدين يقول القانون لا يحمي المغفلين
طب وهو كان فين القانون لما نزل اعلان لشركه بتبيع الوهم
زي شركات تانيه كتييييييييير


ملحوظه
انا جيت اشيف الايميل بتاعك قاللي مافيش حد بالاسم ده
تكونش عامل مشاكل مع الحاج هوت ميل؟؟؟

عموما انا هاروحلك واحطلك ايميلي في احد مواضيعك القديمه .. وعليك انك تضيفني وبعد كده تحذف التعليق اللي فيه الايميل بتاعي احسن حد من بتوع مزارع قرطبه ولا سيمافرو يضيفني ويستغل برائتي ويبيعلي المترو






سلامووووووووووووز

Soooo يقول...

همس الاحباب

انا ماعنديش اي مانع اننا ننزل نشتري قطعتين
وايه رأيك بعد ما نشتريهم نقلبهم قهوة زي البورصه
وبكده نشرب براحتنا مشاريب لينا ولأولادنا وأولادهم كمان
وبعدين ده مبلغ هايف .. مش هيأثر في اقتصادنا ولا ميزانيتنا
ها .. أتكل على الله واتصل اقولهم في زباين؟؟؟؟
ولا تعتقد هيقولولي النمره غلط .. وانا اقولهم بعدها آسف على الازعاج؟؟؟؟





سلاموووووووووووووز

Soooo يقول...

MKSARAT SAYED SAAD

ابو السييييييييييييييييد
واحشني واحشني واحشني بطريقه فظيييييييييييعه

سيبك انت من الموضوع ده والحوار كللو
ليك وحشه والله ونفسي اقعد معاك .. جهز الكاجو بقى ياعمنا
المراكب اكيد زمانها جات ومالكش حجه





سلامووووووووووووووز

Soooo يقول...

سومه...مجنونه فى بلد عاقل

وانا موافق يا سومه
شوفي انتي ايه النشاط اللي هننصب فيه ونصلي صلاة استخاره ان ربنا يهيئلنا اللي فيه الخير
وربنا يبعد عننا ولاد الحلال يارب


وعلى فكره .. الكورس والسنتر اللي بتتكلمي عليهم .. مافيش تقريبا ولا سنتر من اللي بينزلو اعلاناتهم في الاهرام مرخصين بده
يعني حالة ضياع شامله

ملحوظه
عقل مين يابنتي اللي الناس توزن بيه .. هي الناس عاد فيها عقل بعد كل اللي بيحصل حواليها من تخبط في القرارات والاحكام ومخالفة القانون .. يا شيخه صلي عالنبي وقولي يا باسط





سلامووووووووووووز

Yahia يقول...

ازيك يا سووووو عامل ايه ؟؟ يا رب تكون تمام

انا فاكر الاعلان ده كويس عشان كنت ايمها بحلم اني اكسب صاروخ ولا طياره بس فعلا كله هوووووب راح ولا نعرف ايه الحكاية ، برده لو تفتكر يجي من حوالي 4 اشهر نزل خبر في بريد الجمعه عن حكاية واحد صاحب مصنع غزل ونسيج في المحله وان المصنع خرب والعمال بوظه رغم ان صاحب المصنع كان انسان محترم وبيساعد الناس وكل القراء ساعتها اتعاطفوا معاه لدرجه اني كنت عايز ابيع الموبايل بتاعي اللي ب 150 جنيه واتبرعه بنصهم. المهم بعد جمعه تانيه الشاب اللي بيحكي الحكاية طلب المساعده وفي الاخر طلع نصاب وكل الحكاية دي وتفاصلها من خياله. فالنصب اصبح عادي

SKOBL- Little Lazy Me يقول...

و الله سيمافرو ده فكرني بالفنكوش بتاع عادل امام ... الفنكوش الفنكوش ، بص يا سو هي مهزلة بجميع المقاييس .. بس أخطر حاجة اعلانات الأعشاب و البلاوي و العلاج من غير حاجة اللي مالية الجرايد و المجلات .. و ف يالنهاية أحب أقول ان الفنكوش و سيمافرو و قرطبة .. كل دي أدلة دامغه تسكت اي من تسول له نفسه ان يتهمنا بالفشر حين قلنا " احنا اللي دهنا الخوا دوكو و عبيناه في قزايز " .. ليظل الانسان المصري رائدا في كل شيء حتى النصب ..

و لك كل التحيات

Unknown يقول...

يا جماعة
بالنسبة لسيمافرو الحصل انه خدو ضرايب علي الشركة و تم وقف النشاط الحصل مش نصب بس تعسيف من الدولة
عاما سيمافرو دى كانت البداية فى فكرة كروت الاكسكلوزيف كارد الموجود حاليا التاخد خصومات بعد اشتراكك فى هذا الكارت و الحاجا ت دى شغالة عادى
و سيمافرو دى فكره كانت موجودة فى العالم كله وقتها و كانت بنفس الاسم و العلامه فى ايطاليا
و شكرا