الاثنين، 20 شوال، 1429 هـ

!! كلنا .. فوزي

يوم الجمعة متعود بعد صلاة الضهر اطلع على قهوة المهويه اقابل الجرعان بتوع المنطقه .. نقعد نرغي في أي حوار قد ساعه ولا اتنين واحنا بنحتسي القهوة والبيبس .. ولو اننا بطلنا نحتسي البيبس لأنها غليت وبقو بيقدموها باتنين جنيه بحالهم .. مع انهم مابيعملوش أي بتاع غير ان واحد يروح يجيبها من السوبرماركو اللي جنب القهوة .. ويفتحها في القهوة ويقدمها على صينية وجنبها كباية ميه من الحنفيه .. مش إعجاز يعني
ام هند .. قابلت واحد صاحبي متجوز ومخلف مافيش شهرين مثلا .. وسألني صاحبي ده عن واحد صاحبنا لسه متجوز من اسبوع .. وقلتله ماعرفش عنه حاجه وشكله فُقد في ظروف غامضه .. ولقيت صاحبي الاولاني بيقوللي
انت مش ناوي تتجوز بقى ياسوووو .. اتكل على الله والجواز نص الدين .. الخ الخ الخ
شويه ولقينا واحد صاحبنا متجوز من بتاع ست شهور ولا حاجه .. جاي ومخنوق وبينفخ وينطر وشكله على آخره .. افتكرته في الاول مخنوق من ارتفاع الاسعار والحاله الماديه اللي البلد فيها .. لقيته بيقولي
لعلمك .. آخر حاجه الواحد بيشيل همها في الجواز هي الفلوس .. المهم ان اللي تتجوزها تكون دماغها حلوة
وفجأة لقيت صاحبي اللي كان بيحرضني عالجواز من شويه .. بيؤكد على كلامه .. وابتدو الاتنين يشكو همهم لبعض .. وده مراته اتخانقت معاه عشان مش عارف ايه .. والتاني مراته عملت إيه .. مع انها عارفه انه مش بيحب الإيه اللي عملته .. باختصار .. مش مرتاحين في جوازاتهم وعندهم مشاكل بسبب زوجاتهم
!!!!!!!
مشيت مروّح البيت لقيت واحد صاحبي خاطب بقاله بتاع شهرين وبيجهز شقته .. ماشي في الشارع بيكلم روحه يا كبدي .. في ايه ياعم مالك .. قاللي
حماتي ياعم مطلعه عيني وعايزاني اجيب المايكروويف مع انه من مستلزمات المطبخ ودي عالعروسه .. ولما قلتلهم خلاص هاتو انتو النجفه بتاعة الانتريه .. قالو لأ المعلقات عليك .. وشكلي هعلق نفسي مكان النجفة وانتحر بسببهم عشان يرتاحو
!!!!!!!!
بعد ما اتغديت قلت اتصل بواحد كان معايا في الكليه .. صاحبي ده اتجوز واختفى وماعرفش عنه حاجه من بعدها .. لقيته بيقولي
اسكت .. مش مراتي سابت البيت وبعتت اخوها ومعاه بلطجيه راحو مفوّرين باب الشقه وكسروه .. وسرقو العفش .. لأ وايه .. رافعه علي قضية تبديد منقولات وعايزه تحبسني
!!!!!!!!
زهقت من القعده في الفراغ .. قمت داخل عالنت .. لقيت صاحبي اللي متجوز ومتغرب في الكويت .. بيشكيلي ان مراته اتخانقت معاه وسابتلو البيت .. وخلّفت وجابت بنت .. ولما جه يروح يزورها ويشوف بنته .. اخوات مراته اتعرضوله ومنعوه وكانو هيضربوه
!!!!!!!!!
اتخنقت من العيشه اللي عايشينها صحابي المتجوزين والمرتبطين واللي بيحبو .. قلت لنفسي يا واد نفض للحياه واتفسح شويه في المدونات
.. لقيت في شعار رافعينه اخواتنا المدونات بيقول ايه
كلنا ليلى
!!! نعم
!!! لا بجد نعم
لما كلكم مهضومين كده .. امال احنا والفلقطه اللي فيها كل الولاد اللي اعرفهم دي ايه ؟؟
!!! هوايه مثلا
!!! حابين البهدله اللي عايشين فيها وغاوين شقلطه
!!! أكيد احنا برضه ولاد آدم عندنا مشاكل بسبب بنات حوا
.. وبما ان بنات حوا بيقولو انهم كلهم مهضومين ومكسورين الجناح
فإحنا برضه فينا اللي مكفينا منهم .. ومعظم مشاكلنا في الحياه بسببهم .. ومش عايز حد يعترض من اخواننا ولاد آدم ويقول لأ انا الحياه معايا فل
لا يا حلو .. جايز دلوقتي معاك الحياه فل وبيس يا مان .. لكن اكيد في فتره خدت على قفاك بسبب واحده من بنات حوا .. وأكيد هتاخد على قفاك تاني في المستقبل
.. وبالتالي احب اقول
.. اخواني ولاد آدم
كلنا هذا الرجل .. نعم يا رجال الغد .. كلنا مُفلقط ويبكي على جرحه .. ومن حقنا كرجال ان نقولها وبكل قوه .. نقولها وبكل صدق .. نقولها وبكل صراحه .. نقولها مدوية في الافق
!!!!! كلنا متبهدل .. كلنا متفلقط .. كلنا متشحور .. كلنا .. كلنا .. فوزي
!! أي نعم .. كلنا .. فوزي
ولأننا رجال شيك ومعروفين باحترام الإتيكيت .. وعارفين المقولة الجريجي اللي بتقول ليديز فرست .. يعني الستات في أول الميكروباظ .. هنعلن يوم (كلنا فوزي) بعد يوم (كلنا ليلى) الموافق تسعتاشر اكتوبر من كل عام
وليكن يومنا يا معشر الرجال .. يوم الواحد والعشرين من اكتوبر من كل عام ميلادي
– عشان الهجري مافيهوش شهر اكتوبر بالنباهه كده -
.. لنجلس ونتسامر ونحكي عن معاناتنا وما عانيناه من بنات حوا
.. وليكن شعارنا منذ هاذوها اللحظه
الله .. الوطن .. فوزي
.. ولتكن قصة منا نحن بني آدم .. أمام قصة منهم بنات حوا
.. وفارس لفارس .. قصدي فارس لفارسه
.. والنت واسع
وده مكاننا عالفيس بؤ .. دوس هنا ياعم الحاج

ملحوظه بخصوص فوزي والشعار بتاع الحمله

اللي صمم الشعار ده إحدى بنات حوا .. وده بيؤكد على صدق قضيتنا الانسانيه .. ومدى المعاناة اللي بنعيشها .. واعترافهم الضمني بده
وعلى فكره .. صاحب الصورة .. الشهيد فوزي عبعال .. روحه بترفرف علينا .. وبيقولنا
الى الأمام يا رداله .. الى الأمام يا ددعان .. الى الأمام يا ولود آدم :
ياترى .. حد جاي معايا ؟؟؟؟؟
سوووو

هناك 87 تعليقًا:

انا حره يقول...

هييييييييه انا الاول يافوزى يوووو قصدى ياسوووو

هوا الاخ فوزى كان احول قبل مايستشهد ولا دى من عمايل حواء المفتريه اللى شقلطتو وفقلطتو

سيرو على بركه الله فارس لفارس وانشالله تولع حتى

مهندس مصري يقول...

رغم إني لسه ما إشتبكتش اي إشتباك من اللي انت ذكرتهم بس الإحتياط واجب
:)
عموماً انا عملت إنفايت لكل الرجالة اللي عندي في الفريند ليست في الفيس بوك للإنضمام للجروب
خليها تنتشر
:)

فاتيما يقول...

إيه دا بقى إن شاء الله ؟؟
أغيب حبتين أرجع ألاقيك عاملى حزب مضاد لحزب الليلات و بتشن حرب شعواء - متسألنيش يعنى إيه شعواء - و زعلان من بنات حوا ؟؟!!!
كدا يا سوووو
إكمنك عديت التلاتين محدش هيعرف يكلمك بقى و لا إيه ؟؟
لاااااااااا
دحنا حلوين قوى برضو و مش عشان مهيضات الجناح يبقى خلاص ...
مش كلنا يعنى
عندك أنا مثلاً
و لا الهوا
أنا مفترية و واخدة حقى تالت و متلت
و لا فيش جنس راجل داس لى على طرف
أل ليلى أل
دا مجرد كتابات لنصرة أخواتنا الغلابة اللى مش عارفين ياخدوا حقهم بسبب بعض الظروف المندسة بس ...
سيبك إنت أنتو وحشتونى قوى
و كلامك وحشنى
و خفة دمك كمان
يا رب تبقى دايما بخير
و ملحوظة كدا ف الخباثة
الأخ فوزى دا مبيقبلش ستات فى الحزب بتاعكو ؟؟ يمكن لما آجى نواحيكو الحال يتعدل ...
يمكن !!!

TAFATEFO يقول...

هههههههههههههه

أنا معاك في رفض الزواج

بس مش معاك في حكاية ان كلنا خدنا على قفانا من البنات

أنا تجربة الارتباط الوحيده في حياتي بعد أسبوع تيقنت انها مش هتكمل .. ولما رحت بيتهم كنت ناهي الموضوع من قبلها أصلاً .. بس رحت البيت علشان محرجش البنت

ورحت اتخانقت (أو شديت) مع أبوها وأخوها علشان شايفين نفسهم شويه

هييجي يوم أحكي القصه التاريخيه اللي مش ممكن حد يصدق تفاصيلها دي

عموماً أنا معاك في رفض الزواج .. لكن مش معاك في اننا مقهورين

ده بالعكس .. الرجاله بتطلع على الستات كل القهر والكبت و كل حاجه في الدنيا

صبرني يارب يقول...

سوووووووووو
يخرب عقلك يخرب عقلك
هاموت من الضحك وانا قاعده اقرا البوست العيال فكروني اتهبلت

ايه ياعم فوزي فوزي احنا يهمنا

والله العظيم يا سيدى احنا حركة كلنا ليلى مش بنقول ابدا ان الراجل هو المفتري وظالم اطلاااااااااقا

بالعكس انا شايفه ان طول ما ليلى مش سعيده ومش سويه هايفضل فوزي كمان مش سعيد

زي ما في ستات مظلومين فى الدنيا
فى ستات عايزين قطم رقابيهم عارفه
بس انت اصحابك كلهم كده يا سو؟؟؟؟

طيب يا ابنى ما تفكرش بقى فى الجواز
ماهو المرء على دين خليله
هاتبقى زيهم كده
ماهو ما تفتكرش ابدا ان العيب من مراته بس
لا ربنا ما بيظلمش حد

وما ربك بظلام للعبيد

تحياتي لك وانا الى هاجيبلك عروسه
كفايه كده قعدتواالبنات فى الخزانه

mostafa rayan يقول...

عزيزي سووو
انا معاك في حوار فوزي دة ياما رجالة انجرحو من الستات
بس انا شخصيا الست اللي تحاول تضايقني او تفكر مجرد تفكير مش هسكت لها ابدا انا ماحدش يقدر يلوي دراعي اويدوسلي على طرف اه لا ليلي ولا كل الليالي
تحياتي ليك يا جميل ودمت بكل الخير

- ملحوظة مهمة
بالنسبة للأيميل الياهو هو شغال عادي بس لوفيه مشكلة سيبك منهوابعتلي على ايميل الهوت ميل دة
mostafa114_rayan@hotmail.com

بت خيخة وأى كلام يقول...

انا لولا انى كبيرة وشاحطة انا كنت عملت على نفسى بي بي دلوقتى من كتر الضحك

الله يحظك يا سوووووووووو

اسلوبك يجننننننننننننننن

خلاص بعد ما ضحكنا شوية وعملنا البي بي


نيجى للجد

اولا انا اعترفت من زمان انى مش ليلى فبالتالى انا جاية معاك
بس الاول قولى هانروح فين ؟
علشان انا ورايا غسل مواعين


انا راى من رايك فى نقطة ان القهر غير مقصور على الست

لان كمان فيه رجالة مقهورين
وواضح جدا ان الرجالة المقهورين دول
طلعوا كلهم اصحابك

ايه يا بنى مافيش حد من اصحابك مافيهوش ريحة الفوزي

كلهم كدة فوزي
ده ايه الرجالة الخيخة دى


بس والله براوة عليك يا سووو
علشان فكرت فى الفكرة دى

اشمعنى الستات يعنى
انا احب المساواة والعدل فى كل شئ

وعلى رايك النت واسع
وعايزين نشوف مبارازات بين ليلى وفوزى



سلام
اختك خيخة

بطوط حبوب يقول...

سو ووووووووووو حليب هارتى على رايك
عامل ايه يا مان والله ليك وحشه


تعرف انا لو انت كنت عاملت الحزب ده قبل 6 شهور مكنتش هقتنع بيه ابدا وافضل اقولك الحياه وردى

انما انا دلوقتى معاك يا مان قلبا وقالبا
ولازم صوتنا يوصل لبر مصر كله
والعالم يعرف بمعانتنا من الصنف النص خشن نص ناعم ( مبقاش فى ناعم دلوقتى )
ربنا معاك

خمسة فضفضة يقول...

السلام عليكم ورحمة الله وبركاته

هههههه

ومالو يابني مايضرش برضوا ، منتوا برضو بني آدمين ولكوا الحق في الفضفضة والكلام ، وسمعونوا بقي هاتقولوا ايه

بس خد بالك اننا قلنا ان مش كل مشاكل ليلي سببها فوزي فهل ياتري كل مشاكل فوزي في الدنيا تتوقف عند ليلي ولا في حد تاني مشقلطكم و مفلقطكم ؟؟

مستنيه يوم فوزي بشغف سيروا علي بركة الله

هههههههههههههههههههههههههههههه

زهرة الياسمين يقول...

مش مشكلة ليلى و لا مشكلة فوزى
دى مشكلة ناس مش فاهمه ناس
و ناس بتتخانق مع ناس
و ناس بترمى المسئوليه على ناس
و محدش يقدر يحكم ليلى هى اللى اتظلمت و لا فوزى
يبقى نلم الموضوع و ناخدها من قصيرها
و ليلى و فوزى يستهدوا بالله كده و يقولوا اللهم اخريك يا شوشو

A7MeD F@hMy يقول...

هههههههههههههههههههههههه
انا معاكوا معاكوا معاكوا
كلنا فوزي
كلنا فوزي
ههههههههههه


رومانسي

HaMaDa 3aFshA يقول...

السلام عليكم
اولا المدونة كلها زى الفل ومن حسن حظى انى لاقيتها
اول مرة ارد عندك ادخل على موضوع زى الفل كده واسلوب زى العسل تسلم عليه ههههههههههههههههههههههه
والله ربنا يعينك ياسيدى على رد حقوق الغلابة ورفع الظلم عنا والله
من كتؤر ما بينادو بالمساواة خدوا كل حقوقنا ليهم بس اتعودو على المطالبة ولسه عاوزين صحيح ما يملاش عين حوا غير التراب
الله يصلح حالهم بتوع الجاهلية اول ما تنزل يؤدها ويخلصنا من شرها ههههههههههههههههههههههههههههههههههه
بس ان شاء الله طول ما فيه رجالة لسه قادرة تعترض وتقول لأ يبقا فيه افل ان احنا هناخد حقنا فى قرن من القرون القادمة
لان الست فى البيت دى عاملة زى امريكا ما حدش بيقلها لأ
اما اقوم بقا قبل المدام ماتيجى تمسكنى ماحدش ضامن الظروف وجسمى وجعنى من نوم الارض وضرب القباب هههههههههههههههههههههههههههههههههه
سلام آااااااااااااااااه اتمسكت اقرولى الفاتحة
حد عاوز حاجة من فوزى

عاقلة علي ارض الجنون يقول...

أنا مع فوزي كما أنني مع ليلي ..

الكل بيضطهد .. أنا مع الحق طالما بات حقا ..

ربنا معاكوا و معانا ..:)

mohra يقول...

ههههههههه
موضوع تحفه
هو ده الكلام
بلا ليلى بلا فوزى
انا كان بودى اشارك لولا انى مؤمنه بان الرجاله ماتت فى 73و هاحتاج وقت عشان اغير رأيى
بس حمله لطيفه والله اتمنى لكم النجاح

ابن حـجـر الـعـسـقـلانـى يقول...

بغض النظر عن إنى مت من الضحك

أنا معاك يا كبير

اهو ده عيبه يقول...

بص يا سوو وصلى على النبى
انا لا مع ليلى ولا مع فوزى
انا شايفه ان فيه انسان كويس وانسان مش كويس سواء كان راجل او ست يعنى التسلط ممكن يكون فى الراجل وفى الست وكذلك كل الصفات بس يمكن اللى بيبرزها فى حد منهم اكتر ظروف المجتمع والعادات والموروثات وكل الحبشتكانات اللى انت عارفها
يبقى المفروض يبقى هدفنا ان ليلى تحط ايدها فى ايد فوزى علشان حياة احسن واهدى لان دى مش حرب وعايزين نعرف فيها مين مكسور الجناح اكتر من التانى

سلام

ـ-ـ- أحمد عبد العدل-ـ-ـ يقول...

لأ
أحزاب تانى لأ
أنا كنت معترض على فكرة كلنا ليلى لسبب انها استمرار لعرض خاطئ للقضية
المشكلة ان ليلى و فوزى الاتنين حياتهم فعلا بقت ملخبطة فمش ناقصة كمان ان كل حد يعمل حزب .. بصراحة مطلوب نقاش لمشاكل المجتمع بشقية ومحاولة جماعية لحلها
دى كانت فكرتى عن كلنا ليلى وهى نفس فكرتى عن كلنا فوزى - مع احترامى طبعاً للشهيد فوزى والفلقطة اللى اتفلقطها-
طول ما فوزى فى جروب وليلى فى جروب عمر المجتمع ما هينصلح حاله .. القضية انسانية بدون تذكير أو تأنيث
تحياتى لكل ليلى ولكل فوزى ودعوة للقاء فى المساحة المشتركة

محمد الكومي يقول...

انا في البيان التاسيسي يا ريس

بس يا ترى منصبي ايه

لماضة يقول...

فوزي ابو رجلين حلوة
ههههه
بهزر بهزر
انا معاك قلبا وليس قالبا طبعا
فوزي بالدماغ بس لكن مش هقلب فوزيه يعني لفوزي
ربنا يوفقكم يا مان

أحمد سعيد بسيوني يقول...

وانا فوزي برضه

šσяšαяαα يقول...

لا حول ولاقوة الا بالله

اتارى المساواة فى القهر والنكد برضو ياجدعان وانت انت ولا انتش دارى

رحم الله الاب والقائد الهومام والفارس اللومام فوزى المجدع اللى صورته وان دلت على شىء فإنما تدل على مدى القهر والعدوان الذى يعانيه شعب افغانستان...
ايه التهييس دا

نرجع للحاج فوزى

كلنا معاك ياريس وسايبنلك المركب تغرقها.. قصدى تمشيها نحو الحرية والمعزة والكرامة

واصحابك المتجوزين دول ياحاج سووو كان الله فى عونهم وصبرهم على البلاء والشقاء

وأى ليلى من النوع النكدى دا ماما حوا متبرية منها ومن نسل نسلها الى الابدددددددد

وانا لله وانا اليه راجعون

والسلام عليكم ورحمة الله

nona يقول...

اية يا عم سوو شوية نسمع كلنا ليلى و دلوقتى تقول كلنا فوزى
هو خلاص الكل باة مهضوم حقة فى البلد دى
كبر دماغك بلا فوزى بلا ليلى هى ناقصة وجع قلب
و سيبك من اصحابك دول شكلهم مبسوطين و سعداء بس عايزين يبعدوا العين عنهم بس اتجوز انت و مالكش دعوة هههههههههههه
بس تعالى هنا انت اسمك فوزى و الا احمد حدد باة عشان ما نتلخبطش

Z_Diva يقول...

niahahahahahaaaaaaaaaaaaa

tab wallahy gamda gidam, asln ana mesh bal3a 7war klhm laila da, sa7 fe bnat 7alha karb we yss3b 3alkafer, bas donno 7ssa innhm 3mlo mel7bba 2obba, bas brdo mesh mwaf2a 3la klko fawzy, mel2a5er b2a, btallo kloko tmseel we salbta, elrgala btda3y in e7na wo7oush ftaka, welstat y3n omohm mdrobeen belnar 24 sa3a, eh ya3am enta we hya raw2o kda, bas we t3alo eshrbolko fnganen balala 3andy fe lala land we wallahy htb2o zay elsamna 3al3asal :D

bas law hntklm gad, howa fe laylat we fawzies m7tagyen 7ad ywaseehm y3ny, bas ana mesh shayfa el7mlart de hya elly ht7l, y3ny mesh ht3'yr mo5 elab elmot5lef egtma3yan walla elzog elmoftry, rkz 3alashbal, we zabtolhm dma3'hm, we 3lmoh izay y7trmo eltraf ela5r swa2 kan laila aw fawzy, we ymkn hma ytmr fehm eltrbya ??!!!

ست البيت يقول...

عاجبكم كده اهوه سو عمل حزب فوزي
عموما بما أني لا أرى القهر في ليلي ولا تمثل اي تمثيل بالنسبة لي واقترح على اصحاب الحملة يخلوها كلنا بخيتة
افضل
فأنا مع فوزي
بس بجد بقينا كلنا في الهوا سوا
ود يا سو
محدش شايفك اليومين اللي فاتو ليه
يا خبر اوعاك تكون اتجوزت
حقول لهند

Doba يقول...

على الرغم من السخرية والكلام اللى وقعنا من الضحك الا ان فيه كلمتين واقفين فى زورى وعاوزة اقولهم

بالنسبة ل

كلنا ليلى
و
كلنا فوزى

فاحب اقول ان للأسف مش هيحصل تغيير فى المجتمع غير لما نغير نفسنا بنفسنا لان اللى بيعاملو ليلى وبيقرفوها هيفضلوا زى مهما واللى بينكدو على فوزى برده موجودين وهيفضلوا كده طول مهما زى مهما ومحدش بيربيهم صح وبيعلمهم آداب التعامل مع الزوج

يعنى صاحبك اللى حماته قرفاه علشان يجيب المايكرويف معتقدش ان بنتها هتفرق عنها لانها بادية باستغلال واكيد بنتها شايفه ان محدش محترمه وهيه كمان هتتجوزه وهيبقى جواها الطمع والاستغلال يقما ننكد ونقرفه

الجواز اسهل وابسط من كده مدام مقام على أسس مظبوطة واهم عامل فى الأسس دى ان الراجل يكون متدين وعارف يعنى ايه زوجة وبناء أسرة وتربية اولاد بعدين

هو مهواش طالع رحلة وهيتجوز واحدة حلوة وخلاص لا ده بيأسس أسرة ولازم يكون عارف ومقدر ان ده مش بالساهل

الموضوع محتاجة مرونة ومودة ورحمة ما بين الاتنين وكلمة أخيرة ليك - لو مش عاجبك اصحابك وطريقتهم يبقى انت تأسس علاقة من البداية صح وبالفعل البنت اللى تفكيرها ناضج كنز لوحدها - دور عليها كويس

تحياتى يا افندم
هبة

Monzer يقول...

انا بس خايف من الفضيحة الى بعد كده
وتتقلب وتبقى كلنا فوزية

يا خوفي :(

قلب مصرى يقول...

اولا انا مت من الضحك من اسلوب البوست ده
ثانيا انا مش شايف اننا سبب ظلم ليلى انما هى نظرة عامة فى المجتمع وده اللى خلا ليلى تتوحش على فوزى قوى كده وانى الحمد لله (وبجد والله) عايش زى الفل مع مراتى وبنتى ومش شايف مشكلة تخص فوزى.
وعموما انا ضد فكرة تحزب الستات ضد الرجالة وكمان العكس ولو عايز رأى على بلاطة
انا شايف ان مشاكل الحياة الزوجية بقت بسب اننا مش بنطبق فكرة (السكن) اللى اتقالت فى القران صح (ولقد خلقنا لكم من انفسكم ازواجا لتسكنوا اليها) الى جانب ضغوط الحياة الاقتصادية المهببة والكبت العام اللى احنا فيه.

لكن برضو هانضم لحزب فوزى من اجل تحسين الوضع مش من اجل محاربة الستات

حنين القلب يقول...

والله يا فوزى ولا كلكم فوزى ولا كلنا ليلى
يعنى فيه فيكم المفترى اللى مطلع عنينا
وفيه فينا النكديه اللى مطلعه عنيكم

المهم انك تختار صح
مش كلكم وحشين ولا كلنا وحشين
والدنيا مش بتمشى فى طريق واحد
لازم حبه نكد وحبه فرح

المهم انت سيبك شوف انت بس بنت الحلال وربنا هيوفقك
وسيبك من صورة فوزى
الا جبت الصورة دى منين ياخويا ده متصور بعد ما مات صوووووح
ربنا يكرمك ويوفقك ويحفظك ويقدرك على بنات حوا ويرزقك ببنت مش ليها جناحات خاااااااااالص علشان ولا تكسرها ولا تعرف تطير
سلاموز

totaaaa يقول...

هههههههههههههههه
موتنى من الضحك بجد ياسووووو
اسلوبك يجنن خصوصا بصورة عمو فوزى الامور ده .. ده متبهدل خالص ياسووووو ياحرام شكل ليلى مطلعة عينه
بس على فكرة بقا انت اللى كل اصحابك فوزى يعنى تقريبا اصحابك خلصو كل فوزى اللى فى البلد
بس انا مش مع كلنا ليلى ولا مع كلنا فوزى ..انا مستقل :)
القهر والاضطهاد موجود فى الراجل والست ..وان كان الست مقهورة اكتر وده ماتقدرش تنكره ياسووووو


وحشانى مدونتك وكلامك اوى اوى اوى
سلام يااحلى سوووو

3ala asm masr يقول...

هههههههههههههه
فى ايه يا جماعه هى حرب ولا ايه انتوا تعملوا فوزى وهما يعملوا ليلى
يا جماعه خلونا نتعايش مع بعض
ههههههههههه
ونعمل معاهدة سلام

mony يقول...

هههههه


حلو اوي موضوع يوم فوزي ده


علي فكرة لما صبرني (ام مريم)قالتلي علي موضوع يوم ليلي قلتلها انا عن نفسي شايفة ان انا كليلي واخدة حقي تالت و متلت


بس انا عارفة ان فوزي غلبان يا عيني

بشوف بنفسي


في حاجات كتير تامر(جوزي) مش بيعرف يحلها لو في مصالح حكومية لما بروح انا و اقعد اقاوح معاهم حاجتي كلها بتخلص من اول مرة

طبعا بيبقي في حرق دم

بس ليلي نًفًسها اطول من فوزي في الموضوع ده

و غير كده الناس اللي تحب تخدم كتير علشان ياعيني ست و معاها عيال و مش عايزين نمرمطها


معاااااااكم يا فندم

L.G. يقول...

أيوة
فوزي في الآخر بيحب ليلي وليلي متستغناش عن فوزي

والدتي دايماً بتقولي كلمة حكمة صاحباتك المتجوزين بيجوا يكلموكي بس عن المشاكل لأن الانسان بيلجأ لصاحبه ساعة الضيق لكن ساعة السعادة محدش بيكلمك

روح اسأل واحد من أصحابك لما يخلف كاره العيشة
لما يلاقي مراته جنبه في فرح وانت لوحدك ويمكن تلاقيه بيرقص معاها ساعتها زعلان لما يلاقي لقمة حلوة وهدمة نضيفة لما يلاقي حد يرجعله منور بيته

متصدقهمش في لحظات حلوة كتير في الجواز زي اللحظات الوحشة سيبك منهم اتجوز وخلف بس اختار واحدة طبايعها مناسباك وربنا ييسر لليلى ولفوزي معا
تحياتي

بنت مصريه يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

حذارى اقابلك ف المعركه يا سوو حذارى
اعلنوا الحرب ودجو الطبول

احنا مبنحولش حد يا اخويا انتوا اللى بتجولنا حولانين خلقه


يعنى ان شاء الله يا سوو كده بعد ما تتجوز
بعد الشر يعنى بعيد بعيد هيبقى شكلك كده

بوست جامد جامد جامد جامد يا سوووو

وانا ليلى بقى اذا كان عاجبكوا

Zianour يقول...

هههههههههه

حرام عليك والله

انت بهدلت الحركة
بس فوزي ده عاطفي عاطفي بجد
ربنا معاكوا

امال لما الكل بيعاني من الكل
الله امال فين الناس المرتاحة؟؟؟؟؟

يلا وسلام كبير لفوزي

:)))

قوس قزح يقول...

هههههههههههههههه
و الله يا احمد انت فظيع
و الصورة افظع

بس انا عايزة اعمل شعار:

كلنا فى الهوا سوا

و يكون هدفه يا نعيش عيشة فل يا نموت احنا الكل :)

يعنى من الاخر كده مش لازم نتخانق مين فينا المظلوم اكتر
لازم نتفاهم ان محدش فينا يكون مظلوم
ولازم كل واحد ياخده حقه
يا اما عليا و على اعدائى
حاسب شوية علشان المعبد ميقعش عليك انت لسه يا حرام ورور و لسه مدخلتش معبد .. اقصد دنيا :))

سلامووز يا فوزى

الا صحيح هو فوزى ده اللى كان اسم الدلع بتاع سوسن !!! :)

زوج مخنوق يقول...

رغم رفضي الكامل للانضمام لاي أحزاب
الا اني اعلنها مدوية ( يعني ايه مدوية دي)
انا فوزي
انا فوزي
انا فوزي
انا فوزي
انا فوزيييييييييييييييييييييييييييييي

كلنا فوزي
كلنا مقهورين
كلنا مطهدين
كلنا نريد قانون ينصفنا
كلنا نريد ان نجد نصير للاطهاد الذي نعيشة

سوو
كلنا هذا الرجل
و اللي مش مصدق يقرى بوست أهلا بأبغض الحلال عندي علشان يصدق

فوزي فوزي اوه اوه

ojg يقول...

حرام والله يا سوووو
احنا اه واخدين حقنا تالت ومتلت
بس مش كلنا زي خطيبة صاحبك ده ومرات صاحبك التاني ولا طليقة صاحبك دهوه
ورغم ده انا معاك ان في رجالة كتير فوزي
وفوزي جدااا كمان
ويستاهلوا الدعاء مش بس الشفقة والتعاطف
:)
عشان كده أنا يا سيدي متضامنه معاك
واشتركت كمان في الجروب
واعتقد ان عشان فوزي يرد على الاتهامات العبيطة الموجهه إليه
لازم يكون صاحب أفعال لا أقوال
وانكو تعملو كده اضراب ولا انتفاضة
عايزين دم
عايزينها تولع
وإلى الأمام يا فوزي
بس خد ليلى في إيدك

همس الاحباب يقول...

هههههههه
ههههههههه
لا يا عم انا مش مع فوزى خالث
انا ممكن ابقى مع عبعال
فوزى مين يا جدع
ده احنا بقينا فوزية فى المجتمع الهباب ده
بس احلى حاجة انك جبت صاحبك كلهم مكسورين الجناح ومتنكد عليهم
اخوك بقى اللى اخترع النكد
ومنكد على ليلى واللى حواليها
بس مش دايما بصراحة يا اخ فوزى
يلا ربنا يوفقك بفوزية على قدك كده

غير معرف يقول...

سلامو عليكو الاول يا جماعه
اناكلامى دلوقتى لفوزى وليلى مع بعض ،طول ما فوزى وليلى معتبرين الحياه صراع بينهم، والاقوى هو الى حيفوز ،طول ما هما حيفضلو طول حياتهم فى مشاكل ،لكن لو كل واحد منهم اقتنع ان له دور التانى بيكمله ان الحياه تعاون بينهم،اكيد حيرتاحو وحيعرفو يتفاهمو،بجد يا جماعه الحياه بين الزوجين مش صراع بينهم، بالعكس ربنا عمل لكل واحد دور لازم يكون مقتنع بيه،ولوكل واحد ركز انه يتقن دوره فى الحياه اكيد الحياه حتكون احلى،ده غير ان كل واحد لو ركز وفكر فى اسعاد الى بيحبه مش حيكون فى مشاكل والحياه حتكون احلى ،انابكلمكو الكلام ده وانا مجرباه لانى متجوز بقالى خمس سنين،وبقول مش كل الرجاله وحشين ومش كل الستات مظلومين ،وعلى فكره البنت الى بتعامل جوزها وحش حتلاقيها بتعامل كل الناس وحش برضه، يعنى العيب فى الشخصيه،وصدقونى لو كل واحد عامل حسابه ان بيعامل ربنا وبياخد حسنات على تصرفاه الكويسه مع الناس من غير ما ينتظر مقابل من غيره، حنقدر نكمل حياتنا فى راحه نفسيه تامه .
واقولكو على سر السعاده الزوجيه؟
ان كل زوجين يختاروا صح من الاول،
ويعبدوا ربنا مع بعض دايما ،لان تجمعهم على الطاعه بيرضى ربنا وبيحببهم فى بعض اكتر والكلام ده عن تجربه،
وجربو وقولولى....

وفى النهايه اتمنى حياه سعيده وهادئه لكا زوجين فى ظل طاعة ربنا ...

غير معرف يقول...

ههههههههههههههههههههههههههههههههههههههههههههه.. ضحكتني يا سووووووو

ياعيني عليك يافوزي .. معلش ياضانايا .. كل ده من عمايل ليلي..

كده يا لولو .. ده حتى فوزي طيب وبيسمع الكلام..خليكي انتِ رقيقة بس

وخليك انت حونين وكله يبقى فل!!!





عقلي المستخبي: ولارقة ولا بتاع .. اديها ساطور يالولوووووووووو..

وانت كمان اياااااااااك تسكتلها يا ابو الفوووووووووز..تديك ساطور .. الحق نفسك .. واعملها كفته


مع تحيات .. عم مطوووووووووة





شـــــــــهد

بنوته مصرية يقول...

ههههههههههههههههههههههههههههههههههه

اهدي كدا يا فوزي وصلي علي النبي


ايه حكاية فوزي وليلي دي


انا اغيب كم شهر ارجع الاقيكم مسكين في شواشي بعض كداا

النت واسع اه بس بلاش ضرب بلكراسي والنبي

اسلوبك يجنن يا سووووو

وحشني موضيعك يا فوزي :D

brokenheart يقول...

كلنا وراك يا معلم ولا يهمك
وبمناسبة فوزى يذكرنى فى هذا الموقف نكتة عن واحد اسمه فوزى
بيقولك ايه يا معلم ...
كان فيه فيل معدى فى الغابة على عش نمل راح دايس على عش النمل بهدل الدنيا وهد العش يا معلم ... قوم ايه النمل اجتمع انه ينتقم من الفيل اياه راحوا مجمعين الجيش وشوية طلعه على راسه وشوية على ودنه اليمين وشوية على ودنه الشمال وشوية على ضهره قام الفيل عمل كدة وقع الشوية اللى على ودنه اليمين وعمل كدة وقع الشوية التانين اللى على ودنه الشمال اتبقى واحد على رقابته كل النمل قال موته يا فوزى ....... هع هع هع هع ... بايخة اه انا عارف معلش يا معلم اصل الجواز بالخطوبة بالارتباط كله بيخلي الحياة ماسخة وبايخة ورخمة يعنى ... بس ولا يهمك استنى بس اعمل الدخلة واخش واجرب وارجع اقعد معاكوا على قهوة فوزى .... وممكن نعمل لينا مقر فى القهوة بتاعتى اللى ان شاء الله حاستلمها السنة اللى جاية 12/2009 باذن الله لو ربنا ادانا عمر لهذا الوقت وابقى سلملى على فوزى يا معلم

dina seliman يقول...

ههههههههههههه

كلنا فتكات
ليلى ايه بس

حيث لامجال الا للافترا
واللى بيخاف يطلع بره

....................
بجد بوست رائع
وربنا يبعد عنك وجع الدماغ

Miss. Sosa يقول...

انا مع نفسي
انا مع نفسي

لا فوزي ولا ليلي المجتمع باظ اصلا وشكل حد لعب في جيناته واختلط الحابل بالنابل

فوزي بقي مايص وهايف وروش طحن ويستاهل ياخد على قفاه

وليلي توحشت واستأسدت ورفعت شعار لان بسط الي يدك يا فوزي لتلطشني بالفلم لاكسرهالك ولاهريك عض

لا يا عم انا ماليش دعوة بالمجتمع ده
لما الرجالة ترجع رجالة والستات تبقي ستات ابقي اناصر طرف منهم لكن دلوقت كلا الطرفين مدان


سلاااااااام

سومه...مجنونه فى بلد عاقل يقول...

هع هع هع صوره الراجل دا بتفكرنى بنفسى ايام عزى

زهرة الجنة يقول...

ايه يا سوو
ايه الحرب دي وأعلنتها بدري كده ليه

الرجالة فعلا اصبحت مقهورة هههه
يارحام من كتر اللي بيحصل فيهم
النت لما بتتجوز جوزها بيكتشف انه اتجوزها هي ومامتها

ولو مكنش عندها ام بيتجيب له شوية يعال بيقرفوه وبيخلوه مقهور

معلش يا سوو كلكم لها
وعقبال ما نمشي في جوزتك (:

مهندس مصري يقول...

ربنا يشفيه و يدي له الصحة و يعافيه من كل سوء

ـ-ـ- أحمد عبد العدل-ـ-ـ يقول...

ألف سلامة لحمزة ياسوو
يارب تكون حاجة بسيطة ان شاء الله
ربنا يشفيه ويعافيه ويبارك لكم فيه يارب
ألف سلامة وطمنّا عليه

ojg يقول...

إن شاء الله خير يا أحمد
صدقني
ربنا يسلم ويشفيه ويبارك فيه
سلم الأمر لله وربنا لن يضيمك

أذكرك بدعاء النبي
أعوذ بعزة الله وقدرته من شر ما أجد وأحاذر

كاميليا يقول...

ههههههههههه

مش عارفة اقول ولا كلمة

بس الحمد لله انا لحقت فوزى بتاعى قبل ما يشوف البوست ده وينضم للجروب ع الفيس بووك.


ربنا يسعد قلبك بزوجة صالحة

تكون لك فاطمة وتكون لها علياً يارب

تحياتى لاخى العزيز

غير معرف يقول...

اولا ربنا يشفيه ويكون فى عون ابوه وامه

ثانيا انت فعلا بنى ادم غريب ابن اخوك مريض وانت بتبعت انفتيشن للناس على الفيس بووك بجروب كلنا فوزى
ربنا يشفيك يا رب
من اللى انت فيه ده وتبطل اللى انت بتنيله ده وتبطل تظهر بوش حمل وانت غير كده خالص الناس هتكشفك يا ابنى وتشوف تصرفاتك انت فى ايه ولا ايه بزمتك

وبجد ربنا يشفى ابن اخوك

Soooo يقول...

غير معرف

بجد مش عارف اقولك ايه

انا لما عملت الجروب وبعت للناس الانفتيشن كان من اكتر من اربع تيام .. ومابعتتش انفتيشن لحد تاني من بعد ما الجروب اتعمل

وموضوع مرض حمزه ابن اخويا لسه عارفه امبارح بس

ومش عايز ادعي واقول يارب تتحط في نفس الموقف

----

وبعدين مين قال اني بحاول اظهر بوش غير اللي انا باظهر بيه
مين قال اني عامل حمل
انا انسان
واي انسان ليه اخطاء
وانا ما انكرتش اخطائي

وايه الغريب في ان الواحد يطلب من الناس تدعي لمريض

ايه المرض في ده

وبجد بجد .. انت اللي صعبان علي
عشان اللي يتكلم بالاسلوب ده
مش انسان اصلا

بتشمت من واحد لحظة ضعفه؟؟

ojg يقول...

أنا أسفة يا أحمد بجد
مش هقدر ما أردش ع التعليق الغبي من الغير معرف ده
أنا مش فاهمه ازاي واحد يشمت أو يتكلم في وقت زي ده
هو الغباء وصل لكده؟؟؟؟؟؟
هو المرض ده بإيدينا؟؟؟؟؟؟
ربنا بيبتلي عبيده
وممكن الإبتلاء ده يبقى ليا أو لأي حد فينا
ايه فيها يعني ان أحمد يطلب مننا الدعاء
زي ماهو كتير دعى ووقف جنب ناس كتير
واللي مش عايز يدعي مايدعيش
بس ع الأقل ما يجرحش
وجروب الفيس بوك معمول فعلا من فترة
وموقع الفيس بوك بيبعت رسايل تذكيرية كل فترة رغم ان الدعوة الأصلية اتبعتت من كذا يوم
وبعدين ايه وش الحمل ده؟؟؟
مش وقت تصفية خلافات شخصية دلوقت
وبأسلوب مبتذل كمان
انا بجد متأكده ان الأخ مدون وكمان يعرف أحمد
عشان وصلته الدعوة
وبجد أسفة لما ألاقي في التدوين عقليات كده
أنا أسفة يا أحمد
ربنا يشفي حمزة وإن شاء الله ربنا يطمنا عليه

Miss. Sosa يقول...

شفاه الله وعافاه

ربنا يشفيه يارب شفاء لا يغادره سقما

بس هو عنده ايه ؟!
احتمال يكون مرضه مر علينا قبل كدا فنقدر ننقل لك خبراتنا

ربنا يشفيه يارب ويشفي سائر المسلمين
دمتي بكل خير و صحة وسعادة

Abeer Soliman يقول...

دمك شربات... حلو قوى البلوج بتاعك وألف سلامة على ابن اخوك .. ربنا يشفيه با رب

أرجو منك ومن ضيوفك زيارة مدونتى
http://yawmiyat3aness.blogspot.com/

SKOBL- Little Lazy Me يقول...

من مدينة الرجال المظاليم أعلن السيد سكوبل فوزي تضامنه مع جميع المواطنين و ..و كلنا من اليوم فصاعدا .. فوزي

و للفوزيين كل التحيات

SKOBL- Little Lazy Me يقول...

على فكرة نسيت أقولك .. أولا واحشني يا سوووو .. ثانيا أنا متضامن مع بني جلدتي بني فوزي .. بس أنا بصراحة عمري ما اتضربت على قفايا و لا على ايدي حتى .. أصلي دايما بامشي بمبدأ " الحكمة أن تتعلم من أخطاء السابقين " و ما جنى فوزي من ليلى الا الندم ... فعلام أكون فوزيا غير حكيم ..

و سمعني سلام عظيمة يا مصر يا أرض فوزي ..

سومه...مجنونه فى بلد عاقل يقول...

ربنا يشفيه يا رب:(

MeDoOoOoOo يقول...

اولا ربنا يشفي حمزه و كل المرضي يا رب .
كنت ناوي اعلق بس في شخص خد اهتمامي لأني لقيت ريحة بيئة واطيه في الموضوع و هو الشخص الي مسمي نفسه غير معرف .
سيبك من انك مش راجل و مش قادر تخش باسم لأن الراجل لما يجي يشتم بيخش يشتم باسمه مش زي ال....
ثانيا انت بتشتم في وقت مفيش حد بيشتم فيه و ده ان دل يدل علي البيئة الي انت و اهلك اتربتوا فيها .

ثالثا لو انت فعلا راجل متيجي نتكلم مش علي النت بقي نتقابل و ساعتها اوعدك انك مش هتروح لمامي غير و انت زيها بالظبط .

رابعا انا بعتذر للناس كلها لأن اضطريت اتكلم بالطريقه دي لكن الناس الي من البيئه دي ميتردش عليهم غير كده

mostafa rayan يقول...
أزال المؤلف هذا التعليق.
mostafa rayan يقول...

اخي العزيز سوووو
ربنا يشفي حمزة يارب ويشفي كل مريض
- وبالنسبة للأخ غير معرف حرام عليك بجد
ترضى لما تكون مريض حد يقولك كدة ؟
بجد ربنا يشفيك

ahmed_k يقول...

أسأل الله العظيم أن يمن
على حمزه بشفاء عاجل غير آجل
لا يغادر سقما
وأن يجعل ما الم به من مرض
والم آخر ما يؤلمه وما يصيبه
وأن يديمه سالما معافا

سومه...مجنونه فى بلد عاقل يقول...

الاخ عديم الاسم مجهول الهويه
كلامك ان دل على شىء يدل على انك فعلا حد مريض ومعندوش ولا وش من الاصل
ولو انت انسان سوى وشجاع كدا اكتب اسمك وخليك على اد كلامك
وعرف عن نفسك كما يعرف الرجال عن اسمائهم

الشنكوتي الكبير يقول...

يعني اقول ايه بس
ربنا يشفيه يارب ويطمن قلبكم عليه يا احمد

اما البني ادم اللي كاتب التعليق السخيف
احب اقوله بلاش نظام السم في العسل
عامل نفسه مؤدب وبيتكلم بمنطقيه وهو كل غرضه سافل
ولما هو جدع كده مكتبش اسم جنابه ليه
ولا هي نظام انا مش قصدي والحركات الزباله دي

ارحمونا بقى وياريت اللي فاضي وعايز يستهبل يختار مواضيع مفيهاش علاقه بمريض او بحاجه في اسرتنا
حسبي الله ونعم الوكيل

سلاااااااااااااااااااااام

بت خيخة وأى كلام يقول...

ربنا يشفى حمزة
بس ما تفهمنا هو عنده ايه يا سوووو

طب طمنا عليه برضه

nona يقول...

اسال الله العظيم رب العرش العظيم ان يشفية

اللهم اتمم علية الشفاء و ابعد عنة المرض يا رب العالمين

Bannoura يقول...

ألف سلامة لحمزة
وإن شاء الله يقوم بألف ألف سلامة
أما غير المعرف ده
فانا مازلت بقولك سيبك من السفهاء اللي قرفونا كلام و مرض
دول ناس....ربنا يديهم على قد نواياهم بجد
---
مش احنا يا أحمد اللي هنستنى غير معرف
يقولنا مين هو أحمد سوووو

سيبك منه
وربنا يقوم حمزة بالسلامة يا رب

Zianour يقول...

سو

انا ام ووجعتني قوي صورة ابن اخوك
ربنا يشفيه
هو قادر على كل شئ

والمرض اختبار زيه زي اي اختبار صعب ف الحياة
عليكم بالصبر والدعاء والله لا يخيب حسن ظن عبده
ربنا يشفيه ويزيح عنه هو والمسلمين
وابقى طمنا عليه لو سمحت
من فضلك

زهرة الجنة يقول...

سووو
الف سلامة علي حمزة وربنا يشفيه يارب
ان شاء الله خير
ومش تزعل من الناس الغبية اللي بتعلق من غير ماتفهم
الناس اللي زي دول محدش يزعل منهم ولا يعاتبهم
ربنا يكون في عونك
وان شاء الله حمزه يكون بخير

خمسة فضفضة يقول...

السلام عليكم ورحمة الله وبركاته

الف الف سلامة علي حمزه و ربنا يشفيه ويطمنكم عليه في القريب العاجل


انت ليه قافل تعليقات بوست حمزه ؟؟

سلام

شـــــهد يقول...

ربنا يحفظ حمزة من كل سوء ويشفيه ويبارك فيه


شـــــهد

حنين القلب يقول...

ربنا يشفيه ويبارك فيه ويحفظه ليكم يا رب
اسئل الله العظيم رب العرش العظيم ان يتم شفائه عليه

حنين القلب يقول...

غير معروف

بجد يا اخى ربنا يشفيك انت
بقى سووو هو اللى غريب والله انت اللى مريض ومرض مفيش منه شفا لانك مريض بقله الاحساس
ازاى تشمت فى حاجه زى دى
معلش اصلا انت مش بنى ادام وخسارة معاك اى كلام
حسبيا الله ونعم الوكيل فيك زى ما انت خنقه انسان انت بتقول عنه انه بيظهر بوش غير وشه بس احنا كلنا عارفين انه انسان نضيف ومحترم وطيب واخلاق
ويا اخى لو سووو مدونته مش عجباك غور فى داهيه فى اى حته تانيه من غير استفزاز

اسفه يا سووو
وارجو ان مش اى كلام من اى حد ياثر عليك

ابو النجوم يقول...

سووووووووو
على أيامنا كان فيه قيس وليلى وجميل ولبنى . أما على ايامكم فضلت ليلى زى ماهى وقيس بقى فوزى . بزمتك مش حاجه تكسف لما ييجى يوم نشوف الرداله بتطالب بالمساوه مع ليلى. والله انتم شباب تقصروا الرقبه . صحيح جيل هيثم وتامر ...وعجبى

جيهان علي يقول...

السلام عليكم ورحمة الله وبركاته

حاجة غريبة فعلا
من الجانبين
سواء رجال أو إناث
الكل بيدعي انه المظلوم وأن الطرف الأخر ظالم
ودخلنا في حرب عصابات
نسينا اننا شركاء على أرض واحدة ومشوارنا واحد
اتلخبطت في دماغنا حاجات كتير اوى ادت اننا بقينا بناكل في بعضنا بدل ما نحاول نفهم بعض ونستوعب بعض ونحتوي بعض .. وده الأصل في العلاقة في الأساس

انا ضد اننا نكون فريقين
انا مع فريق واحد نسعى فيه لفهم انفسنا وفهم بعضنا البعض

:)

تحياتي

ROSE يقول...

لاحول ولاقوه الا بالله
قطع قلبى البوست ده
شوف ياكتور مهما رحت ولا جيت _سواء عملت حزب فوزى ولا ليلى_ مسيرك هتتجوز وتبقى زى الغلبانين اصحابك
استعد بقى يابطل

;)

حنين القلب يقول...

سوووو ايه اخبار حمزة
يا رب يكون بخير ويكون اتحسن باذن الله
ربنا يتم شفاه عليه
ابقى طمنا عليه وعليك

shaimaa samir يقول...

شفاه الله وعفاه

ادعوا له

دمت بخير

عاليا حليم يقول...

ربنا يكرم ابن اخوك الامور ده
هو ماله ؟

--------

اوعى تجوز يا سوووو يا انت كده حلو

EmY يقول...

سووووو
اولا واحشني جدا جدا جدا
عامل ايه يا سوو باشا
يا عم بلا جواز بلا نيله خليك كده تجيب واحده تقرفك و تكرهك في نفسك ليه ده العمر غالي
ايه يا سوو الحقد ده بس انا وراكو يا رجاله في موضوع فوزي ده
احنا طول عمرنا رجااااله و وقفنا وقفة رجاله

نهر الحب يقول...

ربنا يشفى حمزة يارب
ويرجع بالسلامه زى الاول واحسن
اسال الله العظيم رب العرش العظيم ان يلبسه ثوب العافية وان يشفيه شفاء تام بلا سقم

koukawy يقول...

لطيفه جدا الفكره
انا مؤمنه ان لا ليلي مظلظمه علي طول الخط و لا فوزي ملاك علي طول الخط برضو
احنا كلنا بني ادم و عندنا هفواتنا و غلاطتناو في النهايه لا ليلي تقدر تعيش من غير فوزي و لا فوزي يقدر يستغني عن ليلي

Hannoda يقول...

بما اني عارفة انك بتكتب كلام كبير جدا باسلوب فيه مزح و تهريج لكن في الآخر بتبقى شايل كتير فكلامك

يبقى حاتكلم عادي براحتي

أنا ولا عاجبني حكاية يوم ليلى و لا يوم فوزي ده

أصل الحكاية مش ناقصة اختلاف و تفررقة
المشكلة مش في الستات ولا في الرجالة

لو تعد مع البنات حاتسمع حكايات تبكيك
و بالمثل مع الولاد زي ما انت بتحكي

عارف الحكاية كلها ايه
اننا عايشين في بلد نست المعايير الاخلاقية و الاجتماعية

الارتباط من ورى الااهل بقى شيء عادي و مقبول و فارض نفسه و حتى ماحدش بيناقش الغلط اللي فيه و لا حد ناوي يغيره

اهتزاز صورةالراجل في عين اولاده و مراته و حبيبته ولا حد واخد باله منها و قلقان منها ولا حاسس ايه ممكن تأدي له

تجرد البنات من انوثتهم و امومتهم وخضوعهم اللي مش معناه ولا ضعف و لا قلة حيلة ده مش شاغل حد ولا مخوف حد ولا حد بيقول ان ده له يد في مشاكلنا ده كلها

و الحكاي ة زي البيضة و الفرخة
مين الاول
لما الراجل تخلى عن أخلاقه و مسئوليته و اعتماده على نفسه و قدرته على تكوين أسرة
ده خلى الست تركبه و تقيى و تقوى و تتبلطج وتتعافى وتدور ع الماده قبل العشرة و الحب
ولا العكس لما هي بدأت بكده هو سحب نفسه من مسئولياته و بقى يدور على اللعب و الشرب و التهريج و بس

ولا عمرك حاتعرف ايع فيهم اللي حصل الاول
وهو ده اللي بيخلي كل اتنين يتصادموا

أنا معاك الجواز مشروع فاشل جدا

و حتاج اتنين عندهم صبر أيوب و قوة تحمل لا يعلى عليها و هدوء أقرب للبرود

بس مش الحل فيقين
الحل نبص على عيوبنا احنا و نقى فريق واحد بيصلح نفسه

totaaaa يقول...

الف سلامة على حمزة ياسووو
ياريتك تطمنا عليه وعليك بجد
وان شاء الله يكون بخير وفى احسن حال دايما يارب يشفيه باذن الله

romantic angil يقول...

h

kiki يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品

kiki يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣商品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣,情趣商品,自拍,UT聊天室,聊天室,豆豆聊天室,哈啦聊天室,尋夢園聊天室,080聊天室,080苗栗人聊天室,H漫,A片,AV,AV女優,A漫,免費A片,愛情公寓,情色,情色貼圖,色情小說,情色小說,情色文學,色情,寄情築園小遊戲,色情遊戲,SEX,微風成人,嘟嘟成人網,成人,18成人,成人影城,成人圖片,成人貼圖,成人圖片區

情趣用品,情趣用品,情趣,情趣,情趣商品