الاثنين، ١٣ شوال ١٤٢٩ هـ

!! اتناشر أكتوبر

مش عارف ليه ارتبط شهر اكتوبر بحاجات كتير في حياتنا
أول الحاجات دي .. كان نصر اكتوبر .. واللي كل الناس اتكلمت عنه لغاية ما الواحد حس اننا خلاص مش هنتفلقط تاني .. مع اننا في أزهى عصور الفلقطه

تاني حاجه من حاجات اكتوبر .. هي زلزال اكتوبر .. واللي اعتقد انه حصل بعد ما المطرب علي الحجار غنّى في احتفالات اكتوبر - قبل الزلزال بمافيش خمس ست تيام - ولعلع وجلجل بصوته القوي وقال .. الارض اتزلزلت
وهوووب .. حصل الزلزال

اكتر موقفين فاكرهم بقى عن زلزال اتناشر اكتوبر .. اول ما حصل الزلزال .. كنت راجع من المدرسه وكنت ساعتها في أولى ثانوي تقريبا .. و المرحلة دي كانت مراجيح .. بانجو وكيميا وحشيش وبيره وحاجه شقلطه .. مالاخر .. كنت شاب عار عالبشريه
لسه فاكر اليوم ده قوي .. كنت راجع وانا ضارب كمية مخضرات لا بأس بها .. كيميا على خمره مصري منقوع براطيش .. وخدتلي بوب بانجو تيك آواي وانا مروّح .. ولما رجعت البيت قلت انا هاستغل الدماغ العاليه دي .. وازاكر .. هو انا اقل من الناس اللي بتذاكر يعني .. اه .. ازاكر وانجح
وإمعانا في الحفاظ على الكيف والدماغ الحلوه دي .. قمت عامل كوباية شاي كشري سكر عالي .. ووضبت القعده عالمكتب .. وطلعت كتاب الاحياء
ولسه هاقول يا ملين .. الاقي الكبايه بتاعة الشاي بترقص
!!!!
!!!! لأ بقى .. انا آه ضارب .. بس مش أول مره أضرب يعني
واسمع صوت جاي من العماره اللي جنبي .. العماره بتقع .. يالهوي
طب انا ضارب وبقول يمكن المخضرات هي اللي مهيأه لي الحوار ده .. اللي في العماره اللي جنبي ضارب هو كمان .. لأ بقى .. انا هاقوم اشوف في ايه
واقوم وافتح شباك اوضتي .. وكنت ساعتها ساكن في الدور التاسع .. والاقي العماره بتقرب قوي من الارض .. وترجع تبعد تاني .. تقرب .. وتبعد .. وشمال ويمين .. ويمين وشمال .. ألعب ملاكمه .. وأنط حبال
!!!!!!!!!!!!!!!
ايه يا جرعاااااااان .. هي الكيميا مع البانجو بيقلبو هزهزة في المشاعر ولا ايه !!!؟؟؟
وامد نظري وعلى مرمر البصر .. الاقي الناس بتوع الجامع خارجين من صلاة العصر وبيجرو هم كمان
لأ بقى .. استحاله العالم اللي عارفه ربنا يكون ليها في الضرب .. أكيد في حاجه
ابص الاقي العماره اللي جنبي واللي فيها واحد قال العماره بتقع .. كل اللي ساكنين فيها بيجرو .. وعمارتنا اول تلات اربع تدوار برضه نزلو يجرو
لأ دي حكاية كبيره بحق وحقيق .. رحت اقول لامي يلا عشان العماره شكلها هتقع .. لقيتها بتقولي
!!!! عمارة ايه اللي تقع .. ده ابوك كان قتل المقاول :
يامه مش وقت قتل مقاولين .. العماره شكلها بتقع :
!!!! الله .. طب هننزل من غير ما اعمل لقمة لابوك :
يامه ابويا نفسه لو كان هنا .. كنا هانجيبه من على حدود ليبيا مع تونس :
وهوب .. الهزه وقفت

تاني موقف بقى فاكره عن الزلزال .. لما المدارس خدت اجازة .. وبعد ما رجعنا المدرسه لقيناهم دمجو معانا في نفس المدرسه .. مدرسة الشيماء الثانويه بنات .. ومدرسة ثانوي تجاري بنين .. وبالرغم من اننا مش فارقه معانا نحضر ولا مانحضرش .. وبالرغم من اننا مش ضد ثانوي تجاري بنين لانهم عيال جدعان وياما وقفو معانا في خناقاتنا قصاد مدرسة العروبه لغات وقصاد مدرسة الاورمان سياحه وفنادق .. وطبعا طبعا احنا مش ضد الثانوي بنات .. طب ده احنا الوِدّ وِدّنا نشيلهم على دماغنا من فوق .. اه طبعا امال ايه

لكن اللي احنا كنا ضده ساعتها .. ان ماتبقاش المدرسه مدرستنا وبتاعتنا .. ونبقى احنا تالت فتره .. اول فتره الشيماء ثانوي بنات .. وتاني فتره ثانوي تجاري بنين .. واحنا صحاب المدرسه .. نبقى تالت فتره .. ونروح المدرسه الساعه خمسه العصر ونمشي الساعه عشره ونص بالليل
!!!!!!؟؟؟؟؟؟!!!!!!
!! طب ده حرام .. كده اليوم ضاع ومش هنعرف نصيع براحتنا
!! كده القهاوي هتخسر مجهوداتنا المثمره يا جرعان
!! كده صالات البلياردو مش هتلاقي اللي ينفعها
!! كده الواحد هيبقى بني آدم ولازم يذاكر .. ومش بعيد يذاكر وينجح
وعنها وعملنا ثورة أكثر قسوة من ثورة العبيد .. وانتفضنا انتفاضة التنين المجروح
ثورة وانتفاضه اتكلمت عنها المديريه كلها
جمعنا بعضنا ولَمّينا كل الطوب اللي في الشارع .. وبِغِلّ السنين وحقد الايام .. واضرب ياد ياعوضين .. وقعدنا نحدف المدرسه بالطوب لغاية ما كل القزاز بتاع المدرسه اتكسر .. ولا ضلفة قزاز سليمه - كلمة ضلفة دي متعوب عليها على فكره - ولما المدرسين خارجين عشان يمتصو غضبنا .. رحنا برضه مطلعين عينين اللي يعرفوهم وبطحنا بتاع سبع تسع عشرين مدرس .. والاصابات عندنا كانت لا تتعدى الشد العضلي نتيجة حدف الطوب بقوة
وعربيتين امن دوله جوم واحنا ابدا .. احدف يا عوضين وهات حسنين .. ومحمدين فين .. كللو يحدف يا رجاله
وعلى رأي المثل .. المدرسه مدرستنا .. والمدارس التانيه بِتثبّتنا

والحمدلله .. تم غلق مدرستنا لمدة شهر بحالو .. وكنا حالة استثنائيه .. والوزاره ماعملتش كده عشان احنا رجاله ووقفنا وقفة رجاله .. لأ .. الوزاره عملت كده عشان الناظر ومدير المدرسه واربع مدرسين اوائل .. كانو بيتعالجو من الاصابات اللي لحقت بهم نتيجة العدوان الغاشم من بعض الطلبه المتشردين المجرمين الوحشين
!!! اللي مش عارفين هم مين الى هذه اللحظه
-----
تالت حاجه بقى من حاجات شهر اكتوبر .. هي المدونه دي .. عملتها برضه في نفس ذات التوقيت المحلي .. اتناشر اكتوبر الفين وسبعه
.. سنه بحالها باتكلم وباقول فيها اللي جوايا
.. سنه بحالها اتعرفت فيها على ناس كتير
.. منهم اللي كنت فاكره كويس وبني آدم .. وبعدين ندمت اني اتعرفت عليه
.. ومنهم اللي بجد باعتبرهم اخواتي واهلي وناسي
.. سنه بحالها أثّرت في وعرفت حاجات ماكنتش اعرفها
وأتمنى اني اكون أفدت غيري .. زي ما استفدت منهم

وبهذة المناسبه السعيده
نعلن عن افتتاح فرعنا التاني.. وهو فرع سينماتك
وكل سنه وانتي طيبه يا مدونتي .. واديني خاويتك اهو وجبتلك مدونة تانيه
ومش هتبقى ضرتك يا مدونتي يا أصيله .. يا ام العيال

سوووو

هناك ٦٩ تعليقًا:

ojg يقول...

يشرفني ويوزأططني أن أكون أول المعلقين على موضوع عيد ميلاد مدونتك الفخيمة
:)
وبالنسبة لمواقف الزلزال
أنا مكنتش أعرف انك ليك في الكيميا
بس أكتر حاجة أثرت فيا وخلت الدمعه كانت هتفر من عونيا
انك يوم ما قررت تذاكر
الحظ لعب دوره والزلزال الحمد لله منع المصيبة دي قبل ما تحصل
:))
مبروك على سينماتك
وعقبال مليوووون سنة
يووووه قصدي مليوووون مدونة
:)

Unknown يقول...

هههههه
عجبتني خاويتك دي
خاويتك ورقيتك من كل عين حسود
عقبال يارب ما تجيبلها ضره كده
كل سنه وانت طيب يا راجل يا عجوز

غير معرف يقول...

أنا مبسوطة جدا إني كنت من أوائل الناس اللي قرت البوست ده
وبجد يا أحمد كنت مستنياك تفتح مدونتك
بحس بونس كده وهي available
عزوة
: ))))

بجد أنا بهنيك على المدونة الهايلة بتاعتك
والله أنا فعلا من عشاقها

وألف ألف مبروووك على سينيماتك
أيوة كده
نورنا كمان و كماااااان

من تألق لتألق يا رب

انا حره يقول...

مدونتك الاصليه تقول : اهىء اهىء اه ياخاين العيش والملح تهون عليك سنه بحالها سنه سنويه يامفترى وانا مستحملاك ومستحمله همك وعايشه معاك عالحلوه والمره تفرح تلاقينى تشيل طاجن خالتك وماله ميضرش وفالالالالالاخر تروح تجيبلى مدونه تانيه لا وايه جاى يعلن كدا عيانا بيانا قصادى هيا يعنى عشان ماهى حلوه حبتين وحاطه بوب كورن وضاربه شريط سينما تقوم تخلينى انا نمره اتنين عااااااااا اه يانا يامامااااااا

هههههههههه الف مبروك ياعمنا عالمدونه الجديده وكل سنه وام العيال طيبه

وماشاء الله عالصراحه بانجو وحشيش وكميا وحاجه اخر روقان

غير معرف يقول...

ياااااااااااه
دريم كمان
الله الله
ربنا يعزك : )))))
هتفرج عليها لو الأربع ده
لو الأربع اللي جاي هيبقى عندي مشوار مهم جدا
لسه مش عارفاه بس هروحه مادام قلت كده
: )))))))))))))))))

TAFATEFO يقول...

تعيش وتفتكر

كل عام وسيادتك بخير

هو احنا ليه مش بنعمل تأبين لكل الناس الل ماتوا في الزلزال ده

TAFATEFO يقول...

هو بس سؤال بايخ

بكره التلات أربعتاشر أكتوبر

حضرتك تقصد التلات أربعتاشر

ولا الأربع خمستاشر

أرجو الإفاده حضرتك

فاروق عادل يقول...

انا بقى ساعت الزلزال كان عندى شهرين ومش فاكر حاجة من اليوم دة

prince4ever يقول...

هههههههههههههه
ضحكت كتير جدا يا برنس
ايه يا معلم المزاج العالي اوي اوي ده
هي دي الناس الحلوه اللي على اصلها
صباح الفل يا برنس و كل سنه ومدونتك طيبه و زي العسل زيك كده دايما

اشطات يا برنس
رامي

مهندس مصري بيحب مصر يقول...

ياسلام
كل سنة و مدونتك طيبة و انت بخير دايماً
يا أحلى و اتخن و اجمل سوو في الدنيا
D:
كلامك فكرني بأيام الصياعة الثانوية لما في اولى ثانوي كسرنا الفصل و دشدشناه و غرقنا نص الدور الارضي ميه و خدنا كلنا رفد 3 ايام
:)

اما الزلزال فكان ساعتها عندنا ماتش كورة في دوري الفصول في المدرسة في الفسحة و كنا شغالين تشجيع جامد و محسيناش بيه و معرفناش ان كان فيه زلزال غير لما روحنا

طبعاً مدونتك الجديدة انا بأعشقها مقدماً بسبب بوستاتك السينمائية الروعة القديمة

للأسف البرنامج حيتذاع و انا في الشغل ياريت تنزله يوتيوب علشان اشوفه
:)

mostafa rayan يقول...

حبيبي قلبي عيد سعيد يا جميل وبجد انا بكون سعيد قوي وانا بقرأ مدونتك لأنها بتدخل علي قلبي فرح وسعادة مش متخيل ازاي
- بس انا اتخضيت لما دخلت من يومين ولاقيتك عاملها للقراء المدعوين فقط قلت كدة هنتحرم من كتابات سووالجميلة
والف مبروك ياعم على صباح دريم وعقبال
حلقة الotv
ويارب تتطلع في كل القنوات الحكومية والفضائية كمان
بالنسبة لموضوع الزلازل بجد يا سو وصفك جميل قوي انا مت على نفسي من الضحك وانا بقرأه
ربنا يكرمك يا جميل ويسعدك كمان وكمان

mostafa rayan يقول...

بالنسبة للمشروع فطبعا احب جدا اشارك معاكم فيه
ودة ايميلي ياريت لو نظبط مع بعض علشان في حاجات حلوة عايز اقولك عليها
the_highstar11@yahoo.com
عام تدونين سعيد يا جميل ويارب في ازدهار وتقدم كمان وكمان

Alkomi يقول...

ههههههههههههههه

موضوع صلاة العصر ده يثبت انك بتحكي بدقة شديدة لاني كنت في خامسة ابتدائي و كان عندنا مدرسة موزة بتخطف الضهر و العصر سوا عشان متحطش الايشارب و تقلعه كل شوية المهم الجدية ساعة الزلزال سابت الصلاة و يا فكيك

بس انت مبخوت قعدتوا شهر

احنا قعدنا تلات اسابيع بس

و كل سنة و مدونتك طيبة و طبعا المدونة التانية عرفت بيها من لقائنا سوا

بقولك مشض فاكر كتاب الزلازل الازرق؟

بنت مصريه يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
والله يا سو دمك سكر يا اخواتى سكر

والله يا احمد انا مش عارفه الامهات جرالهم ايه ساعه الزلزال ده
انا امى برضه ماكنتش عايزه تخرج م البيت
عشان اخويا كان لسه مولود وقال يعنى مش عايزاه يصحى هههههههههههه
مش فاهمه يعنى يصحى ولا نتدفن
اضطرينا نقعد احنا لتنين جنبه وهو نايم وندعى
ههههههههههههههههههههه

كل سنه ومدونتك ام العيال طيبه يا سوو
والف مبروك لميلاد المدونه الجديده
تتربى ف عزك ان شاء الله

لا تقلق هصحى بدرى عشان اشوفك واحتمال اسجلك كمان
ابسط يا عم
طولت هه
سلام بقى
انا زعلانه بقالك كتير ما بتزورنيش ف المدونه يا سو

صباح الصباح يقول...

صباح الانوار يا معلم

انا كمان ليا ذكريات عجيبة مع الزلزال بس ماليش تاريخ كبير مع المخضروات زى سيادتك انا يادوب على قد القد

ههههههههههههههههههه

^ H@fSS@^ يقول...

للاسف مالياش ذكريات حلوة مع الزلزال
لان في واحدة من توابعه فقدت صديقه غالية عليا
و ولو تفتكر وقتها كان التهييس شغال على ودنه ف مين مات و مين مامتش
فعشان اتاكد بنفسي انها هي فعلا اللي قالولي انها ماتت في انهيار عمارتها اضطريت ادخل المشرحة و اشوفها
و اتاكدت انها هي
و بعدها حد طفى النور
مش عارفة وصلت بيتنا ازاي
ربنا يرحمها
و يرحم الجميع

لو تاخد بالك
اكتوبر 1999 شهد سقوط طيارة مصر للطيران قبالة سواحل امريكا
و كانت ماساه برضو
انا مش عارفة ليه فعلا موعودين بكوارث في الشهر
ده
الا اللهم نصر اكتوبر

تحياتي
و يا ريت لو تنزل الحلقة اللي حتظهر فيها على اليوتيوب عشانا نا معنديش دريم
و مش حعرف اشوف الحيوار كان على ايه

سلام

محمد فاروق الشاذلى يقول...

أولاً كل سنة وانت طيب بمناسبة مرور سنة بحالها على التدوين
ثانيا ألف مبروك المدونة الجديدة

ميرا ( وومن ) يقول...

كل سنه ومدونتك طيبة وبألف خير

وان شاء الله السنه الجاية تبقي من نجاح لنجاح

الف مبروك علي المدونة الجديدة وفي وقتها تمام

hossam7 يقول...

اولا كل سنه وانت طيب

انا دخلت بالصدفه مدونتك

عند طريق موقع جوجل سيرش

ولم اندم

لاني وجدت مالم اججدة من قبل

روح مصريه جميله نفتقدها

انا زيك برضه ليا ذكريات في يوم الزلزال

انا ماكنتش باضرب واشرب

ولكني كنت بالعب طاوله مع صحابي

وبتفرج علي فيلم مارلين مارلو

(انهم يفضلونها ساخنه)




في منزل صاحبنا واسمه يحي البيه

لما حصل الزلزال وجرينا الخ

لقيت الناس خارجه من الجامع

حسيت ان حنا بعيد خالص عن كل حاجه

ومرت الايام

ورجعنا ذي الاول بس مش طاوله

حاجات تانيه

يالا كفايه عشان انا مبئوء من نفسي

سلام

Unknown يقول...

عيد ميلاد تخين........قصدى سعيد... انت اتشهرت وعديت الكوبرى وهتطلع فى صباح دريم...........هتفرج يعنى هتفرج

Rehab Mostafa يقول...

كل سنه ومدونتك وانت بخير يا سوووو
وان شاء الله تستمر لحد مانشوفها عروسه كده وتتكلم فيها عن أولادك وأحفادك :)
بس انت عايزنا نفتح التليفزيون السعه 9 صباحاً !!!!!! لا لا لا كده كتير على فكره بس ياللا علشان خاطرك بس ... بس للأسف والله مش هكون في البيت كالعاده :(

maha zein يقول...

صحيان بدري
وكلام فارغ
والله العظيم دا انت شكلك غلبان
انت كيفك
عامل ايه
ليك وحشة بجد
عموما صدقني اطلع انت بس بالكسكتة بتاعتك علي الشاشات وانت هتلاقي احلي تشجيع واحلي جو
صضقني

الـسـيـدة نـون يقول...

كل سنة ومدونتك طيبة يا سوووووو

بس انا سخسخت على روحى من الضحك
لما عرفت انك لما نويت تذاكر
القدر كان اكبر من اى نية والزلزال وقف فى وش هذه العملة الحمقاء الى كنت ناوى تقوم بيها


كل سنة وانت طيب يا سوووو
والنهاردة هاقعد اتفرج على دريم لما اشوف اخرتها معاك ايه



ههههههههههههههههههههههههه
ههههههههههههههههههههههه

انا بضحك على البت وزة
اصلها كاتبة كلمة ضحكتنى موت
يوزأططني
ههههههههههههههههههههههه
ههههههههههههههههههههههههههههههه
يوزأططني
هههههههههههههههههههههههههههه

انتوا بتجيبوا الكلام ده منين
هههههههههههههههههههههههههههههههه



سلام
اختك خيخة

TAFATEFO يقول...

مفيش حاجه جت النهارده

الأربعاء الجاي بقى تقريباً

Sha2loob يقول...

كل سنة وانت مدون يا سوووو
واحشني جداً

غير معرف يقول...

سوووووووووو لا ماليش دعوة
تطلع في دريم الساعه 9 الصبح .. وانا في الشغل قدام العنكبوتر للساعه طول النهار .

خيااااااااانة

وش واحدة مفروووووووووسة


شــــهد



حتة جد: مبروك لمدونتك الجديدة ويارب يارب يبقى عندك دشليون مدونة وكل واحدة اروع من التانية

Mina يقول...

ليك عندي تاج
لو فضيت عدي خده
بس بسرعة احسن يبرد

Soooo يقول...

ojg

على رأي خيخه .. ايه يوزأططني دي؟؟؟
اسمها يوزقططني .. بالقاف مش بالهمزه .. هفضل اعلم فيكم لحاد امتى بس

وفعلا .. الحظ دايما معاندني في كل ماهو مفيد للبشريه المضمحله
بس يانا يا الحظ .. والبادي اقرع


والله يبارك فيكي يا ستي .. واتمنى اني اقول حاجه ليها لازمه في سينماتك وفي المدونة دي





سلامووووووووووووز

Soooo يقول...

لماضة

خاويتك ورقيتك
!!!
انتي جايه تهزري شكلك كده
يلا يا لماضه من هنا
قال خاويتك ورقيتك قال

بس تصدقي حلوه





سلاموووووووووووز

Soooo يقول...

Bannoura

الله يكرمك ياستي وان شاء الله مدونتي هتفضل مفتوحه لكل الناس
الحكايه ومافيها اني قفلتها عشان كنت عايز اعمل نيو لوك .. لكن بعدين كسلت واتلخمت في المدونة الجديده
وقلت ابقى اعمل الحوار ده حين ميسره

وبخصوص انك تتفرجي على صباح دريم
مالهاش لازمه يابنتي .. انتي لسه صغار ومش طالبه يجيلك امراض نتيجة رؤيتك لوشي البشوش عالريق






سلاموووووووووووووز

Soooo يقول...

انا حره

يا سلام يا سلام
بقى مدونتي قالت كده
انا اشك في ده
وبعدين الشرع للمدون اربع مدونات
كما قال بلوج سبوت
ولو عمل مدونات تانيه .. يبقى ما ملكت ماوسه
الانترنت يسر مش عسر

الله يبارك فيكي ياستي .. ويارب اقدر اقول في سينماتك حاجه تفيد غيري وتفيدني انا كمان






سلاموووووووووووووز

Soooo يقول...

TAFATEFO

والله اعتقد ان الحكومه مش بتعمل تأبين للناس اللي راحو في الزلزال وفي كل المصايب .. من نفس منطق عدم فتح الجروح القديمه والتنكيل بيها
لأننا لو هنعمل تأبين على كل مصيبه .. يبقى هنعيش في تأبينات لغاية ما يأبنو عليها

والف شكر على تصحيحك للغلط اللي كنت كاتبه بخصوص معاد عرض صباح دريم .. وياسيدي ماتشغلش بالك قوي
ممكن ما يجيوبنيش اصلا
مش بقولك قايم من النوم وبتتاوب
وبعدين مش مستاهله صحيان بدري ياعمنا
خليك نايم مأنتخ احسن




سلاموووووووووووز

كيكى عوووووو يقول...

ازيك ياعم الشباب اخبارك اية؟
واية ياسووووووووو..العدوان الثلاثى الى عملتوة على مدرستكم دة
ههههههههههههههههههه
عوضين وحسنين ومحمدين امال فين الريس جعايدى دة كلام برضة
؟؟؟
يس ياترى المدرسة خدتها استقلالها امتى؟؟
سوال تخين محشور فى زورى؟؟
انت كنت عايز تذاكر لية اصلاااا هااا
دة كلام برضة...كنت عايز تطلع طيار ولا اية
هههههههههههههههههههههههه
مبرووووووووووك يا سووووووووو بجد على مدونتك الجديدة وعلى انك بقالك سنة وان شاء الله كل سنة تخويها وتجبلها فتكات ومرسى وفوزى وربنا يكتر اخواتها امين يااااااارب
وربنا يحفظك ويسعدك المهم ما امين
الابالحق سينا عاملة اية؟
بالتوفيق يا سوووووووو
عوووووووووووووووووووووووووو

Soooo يقول...

طالب ثانوى

والله كويس انك ماعاصرتش الفتره دي
دي كانت ايام سودا يا جرع




سلاموووووووووووز

Soooo يقول...

prince4ever

ايه ياعم البرنز
كل ده
طب الحمدلله ان الموضوع عجبك
وربنا يسعدك ويبسطك ويرضيك دنيا وآخره على كلامك الحلو ده




سلامووووووووووز

Soooo يقول...

مهندس مصري

حليب هارتي
وكل سنه وانت طيب ياهندزا يا أهندز مدون ويارب في زي الايام دي ترجع مصر وتهندز فيها على خير ان شاء الله

ويارب المدونه الجديده تكون حلوه واقدر اقول فيها مواضيع تعجبك وتعجب كل الناس

بس ما تشغلش بالك قوي بالحوار بتاع صباح دريم ده .. انا نفسي مش هاشوفه ياعم وهكون يا اما في الشارع يا اما نايم

ملحوظه
مين اللي كسب في الماتش اللي اتلعب ساعة الزلزال؟؟؟




سلامووووووووووز

همس الاحباب يقول...

هههههههه
ههههههههه
بجد انت مشكلة
فكرتنا بالزلزال والذى مضى
تصدق انا كنت ساعتها فى 3 ثانوى وفرحت قوى بالاجازة
يلا كل راح لحاله
كل سنة وحضرتك طيب
ومدونتك بخير ومنورها دايما بموضوعاتك الجامدة
ومبروك برنامج دريم يا عمنا عقبال ما نشوفك كده فى البيبسى كولا
ومبروك المدونة الجديدة واللى جابلك يخليلك يا عم
وعقبال البكارى بس بيقولوا جوز المدونتين يا قادر يافاجر
سلام يا باشا

Soooo يقول...

mostafa rayan

الله يكرمك يا درش على كلامك الجميل ده يارب

وانا هابعتلك ايميل اقولك ايه الحياه في الحوار بتاع الاذاعة ده عموما ولو تحب تشارك احنا يشرفنا طبعا

وربنا يعمل اللي فيه الخير ان شاء الله





سلامووووووووووووز

صبرني يارب يقول...

ايه ده انا كنت فى اولى ثانوي على فكره يا سو برضه

اه صح انا عندي 30 سنه برضه ايه الذكاء ده

بس بجد انت كنت بتضرب كل الحاجات دي وانت فى ثانوي ؟؟

طب مش كنت تحدف اي حاجه لاختك المسكينه

يا لهوي انا اقصى حاجه ضربتها وانا فى السن ده كان اختي الصغيره

بس هو ايه الكيميا ؟؟


انا يوم الزلزال برضه كنت راجعه من المدرسه
بس كانوا عاملين لنا نظام اليوم الكامل وكنت جايه طلعان عينى يا ابويا

بس انت بطلت طيب وربنا صلح حالك ولا ايه

ومبروك على سينماتك

وانا شوفت منى امبارح فعلا بتتكلم عنا لاذاعه بس ما كملتش مش عارفه جابتهم ولا لا

وكل سنه وانت طيب

واصل اكتوبر ده شهر المناسبات العظيمه
عيد جوازي بعد كام يوم

غير معرف يقول...

هههههههههههههه

والله يا سو
لسه صاحية
ومقريفة من بكالريوس والضغط
قلت الف شوية

اضحكتنى
جزيت الخير

التدوين عموما
ليه مزاياه وعيوبه
زى اى حاجة فى الدنيا

دعواتك

TAFATEFO يقول...

ازاي يعني؟

عموماً أنا كده كده هسجل حلقة الأربعاء الجاي كمان .. ولو عرفت معاد العرض يا ريت تبلغني

مهندس مصري بيحب مصر يقول...

أنا جايب سيرتك و ناشر صورتك في آخر بوست عندي و قلت أعرفك
:)
يا واحشني

بنت مصريه يقول...

ههههههههههههههههههه
حاضر يا عم احمد هنقلب المحطه ههههههههههههه
عايزاك تيجى مدونتى
ومش بكره دلوقتى

Alkomi يقول...

انا معاك في حوار فوزي يا عيم بس هما استلقطوني و انا مش في اي حملة

لاغيني انت بس و انا ادوس معاك

3ala asm masr يقول...

ياريت كنت دخلت من يومين كنت عرفت معاج الحلقه
يلا خير
المهم انت تمام؟
محدش بيشوفك يعنى

غير معرف يقول...

انا عمريماضحكت قد ماضحكت النهارد ياسو
بجد ربنا يسعدك كنت قاعده اذاكر وضاربه بوز شبرين دخلت فكيت عندك بوزي وبوز الجيران كمان
كل سنه ومدونتك طيبه
ومبروك ما جالك ع المدونه الجديد
والف مبروك علي دريم وانا اقول دريم منوره الايام دي ليه
سلام ياعم الشباب

Soooo يقول...

محمد الكومي

حليب هارتي
والله يابرنس اي حد كان مكان المدرسه الموزه بتاعتكم .. كان هيعمل نفس اللي هي عملته

ومافرقتش اجازة تلات اسابيع من شهر ياعمنا .. احنا كنا بنروح اساسا

والحقيقة مش فاكر كتاب الزلزال الازرق .. فاكر كشكول الدخان الازرق بس

وبخصوص فوزي والحمله اللي قلتلك عليها .. استنى يوم تسعتاشر اكتوبر .. يوم حملة كلنا ليلى





سلامووووووووووووز

Soooo يقول...

بنت مصريه

تصدقي فعلا كان رد فعل الامهات ساعة الزلزال غريب قوي
واحد صاحبي بيحكيلي ان امه ساعة الزلزال سابت الشقه كلها ومسكت في التلاجه وبتقول لابنها تعالى شيل معايا التلاجه ننزل بيها الشارع

وياستي الف شكر على صحيانك بدري عشان عايزه تسجلي الحوار بتاع صباح دريم .. بس ريحي نفسك .. احتمال اتمنتج صلا

وحاضر ياستي .. هاجيلك تني مدونتك .. بس انتي اعمليلي كوباية فيسكافيه عشان اقرى اللي فاتني كللو





سلاموووووووووووز

Soooo يقول...

صباح الصباح

حليب هارتي .. فينك ياعم مختفي ليه

وبالنوسبه للمخضروات .. دي كانت ايام غريبه ياجدع والله العظيم
كنا مبرمجين للخراب وبس

ربنا مايعيدها ايام .. لا المخضروات .. ولا الزلزال





سلامووووووووووز

Soooo يقول...

^ H@fSS@^

ربنا يرحم صديقتك ويرحم كل اللي ماتو في الزلزال وفي غير الزلزال يارب
واسف اذا كنت قلبت عليكي المواجع .. بجد ماكنتش اقصد والله

وفعلا الحوار بتاعة الطياره الامريكاني حصل برضه في اكتوبر .. شكله هيقلب شهر نحس من بعد ما كان شهر النصر المبارك

وبخصوص الحوار بتاع دريم .. ماعرفش والله اعمل الحوار بتاع يوتيوب ده
وبعدين اساسا انا يادوب طلعت بتاع دقيقه ولا حاجه .. مش حاجه مهمة يعني
كبري دماغك يا شيخه .. هو انتي هتشوفي محمد حماقي




سلاموووووووووووز

Soooo يقول...

قلب مصرى

وكل سنه وانت طيب يا حمايا العزيز
وقول لعروستي ان المدونتين دول مش هيشغلوني عنها
دي هي الخير والبركه





سلاموووووووووووز

Soooo يقول...

وومن

وانتي طيبه يا ميرا وربنا يارب يكرمك على كلامك الجميل ده يارب

ويارب المدونة التانيه اقدر اقول فيها حاجه كويسه ويارب تعجبك وتعجب الناس





سلاموووووووووووز

Soooo يقول...

hossam7

اهلا بيك يافندم في اول زيارة ليك لمدونتي المتواضعه
ويارب تشرفني دايما بزيارتك وبتعليقاتك وتعتبر مدونتي زي مدونتك تمام

وفعلا .. بعد ما بتحصللنا اي مصيبه وأي كارثه .. بنقعد كام يوم ظابطين نفسنا .. ولما بننسى .. بنقضيها

ربنا يسترها علينا دنيا وآخره





سلاموووووووووووز

Soooo يقول...

enjy

ياسلااااااااااام
بقى عيد ميلاد تخين
مااااااااااشي

ياستي ولا اتشهرت ولا نيله .. دي هي دقيقه ونص .. ويمكن يتمنتجو كمان

وبعدين انتي في اعتقادك اني لما اتشهر هعدي الكوبري؟؟
اطلاقا يابنتي
الكوبري وقع اصلا




سلاموووووووووووووز

Soooo يقول...

Rehab Mostafa

وانتي طيبه يارحاب وربنا يكرمك يارب

وياستي انا اصلا لو كنت في البيت يوم ما هتتعرض البتاعه دي .. هقلب على اي قناة تانيه .. ده لو كنت صاحي يعني





سلامووووووووووز

Soooo يقول...

maha zein

هههههههههههههههههههههه

اهو عشانك انتي بالذات .. انا قلت للناس تكبر دماغها ومش طالبه وجع بطن ويشوفوني عالريق كده

وتصدقي فعلا حاجه لله كده .. اتصورت فعلا بالكسكته وانا مش حاطط في دماغي اي حاجه والله
تعتقدي انهم ممكن مايمنتجوش شغلي بسبب الكسكته؟؟؟

ليكي وحشه والله يابنتي





سلامووووووووووووز

Soooo يقول...

بت خيخة وأى كلام

يااااااااااااه
طب والله ليكي شوقه يا خيخه
اخيرا نورتي مدونتي وجيتي
ده تقريبا أخر تعليق ليكي قبل التعليق ده .. كان إبان حرب اليمن

وعيب عليكي .. انا طول عمري في حروب مع الحظ .. والدليل اني ذاكرت ونجحت ساعتها .. اي نعم ما استفدتش اي بتاع .. بس برضه يعني

ملحوظه
وزه دي ساقطه حساب اصلا .. حد يكتب يوزأططني .. المفروض تكتبها يوزقططني .. بالقاف مش بالعين

سلامي لشرفنطح ابن اختي




سلاموووووووووووووز

Soooo يقول...

TAFATEFO

ياعمنا انا مش فاهم انت عايز تشوفني ليه
والله لو قلبت على اي قناة تانيه افيدلك ياعم

عموما لو سجلتها .. لو طلعت فيها وشغلي ما اتمنتجش او ما اتقصش .. اوعى تجيب سيره .. استر علي يستر عليك ربنا ياشيخ





سلامووووووووووووز

Soooo يقول...

Sha2loob

شقلوووووووووووووووووووب
والله العظيم واحشني بطريقه يالهووووووووووي

والف الف الف مبروك عالخطوبه وربنا يارب يهيئلك اللي فيه الخير ويتمم على خير موضوع خطوبتك ونشوفك عريس قريب يارب
قول آمين






سلامووووووووووووز

Soooo يقول...

شهد العسوله اختي الحبوبه

بجد بجد مش عارف اقولك ايه يا اول واحده تؤمن بي وتشجعني
بجد بجد .. ونعم الاخوات والله العظيم

وياستي ولا تشغلي بالك بحوار دريم ولا بتاع .. خليكي في الشغل يابنتي احسن

ويارب اللي هكتبه ان شاء الله في سينماتك يعجبك ويعجب كل الناس يارب






سلاموووووووووووووز

Soooo يقول...

Manamino

الف شكر عالتاج
وان شاء الله بمجرد ما الاقي وقت اجاوب عليه هعمل موضوع بكده




سلامووووووووووووز

Soooo يقول...

كيكى

ليكي شوقه والله يا كيكي يا بتاعة العوووووووو

وعلى رأيك .. اديني زاكرت ونجحت .. لكن برضه ما اشتغلتش طيار

والله يبارك فيكي ويارب مدونة سينماتك تعجبك وتعجب كل الناس يارب

وسينا الحمدلله كويسه .. بتذاكر عشان عندها اكزام ماث
يعني امتحان رياضه بالبلدي

ملحوظه
المدرسه لسه ماخدتش استقلالها لغاية دلوقتي .. وتحت حكم الرئيس المناضل الديكتاتور .. جعيدي الدهل




سلاموووووووووووز

Soooo يقول...

همس الاحباب

خالد باشا .. ازيك يابرنس وازي عروستي همس

الله يبارك فيك يارب
بس بذمتك وشي ده يطلع على اعلان بيبسي .. انا بالكتير قوي اطلع على علبة بيروسول ياعم

وبخصوص ان الناس هتقول جوز المدونتين .. الشرع للبلوجر اربع بلوجات
والله اعلى واعلم





سلاموووووووووووز

Soooo يقول...

صبرني يارب

كل عيد جواز وانتو طيبين يارب

وللاسف كنت فعلا باضرب البلاوي دي وانا في ثانوي .. طيش شباب بقى هتقولي ايه
انما الحمدلله دلوقتي بطلت .. انا لاقي اكل لما اضرب مخضروات

والكيميا دي ياسيت اللي هي الادويه المخدره اللي مش بتتباع غير بروشته .. كنا بنجيبها من صيدليات بتبيعها بس بسعر غالي

والله يبارك فيكي ويارب اقدر اقول حاجه ليها لازمه في سينماتك ويارب كلامي يعجب الناس

وكل عيد جواز وانتي طيبه مره تانيه وعقبال العيد المئوي يارب





سلامووووووووووووز

Soooo يقول...

شيماء سمير

الحمدلله ان ربنا قدرني وعرفت اخليكي تضحكي وتروقي اعصابك شويه

وربنا يوفقك يارب في بكالريوس واشوفك متخرجه وشغاله وكيل نيابه قد الدنيا





سلاموووووووووووز

Soooo يقول...

3ala asm masr

هنووووده
ازيك يابنتي
يارب تكوني كويسه

والله يابنتي هي الحلقه بتاعة صباح دريم لسه تقريبا ما اتزاعتش وياريت ما تتزاعش اصلا

وحاضر ياستي
هاجيلك مدونتك بس انتي اعملي لقمة .. دي طقة غدا والواحد جعان





سلامووووووووووز

Soooo يقول...

mayada

ربنا يارب يارب يسعدك ويبسطك ويوفقك دنيا وآخره على كلامك وتعليقك الجميل ده

ملحوظه
ياشيخه حرام عليكي .. بقى دريم منوره الايام دي .. ده انا سمعت انهم خسرو قد كده عشان الاعلانات اتسحبت منهم لما عرفو اني هطلع في القناة






سلامووووووووووووووز

زى الهوا يقول...

ههههههههههههههههه انت كنت عايش حياتك اوى كدة ؟؟ ايه الفشل دا ههههههههههه


انا مش هشوف البرنامج دا لأنى طبيعى هابقى فى شغلى , ابقى سجله بليز ونزله فى بوست عندك هنا

مبروك المدونة الجديدة و اكيد هتبقى جامدة زى دى تمام

عارفة انى مقصرة ومش بازرو مدونتك غير كل فين وفين , بس انا لما برجع باحاول اقرأ البوستز اللى فاتتنى , بس والله شغلى هوه اللى معطلنى عن المدونات

Soooo يقول...

زى الهوا

اهلااااااااا
ازيك يا ميس موحه
ليكي وحشه والله يا ميس

ياستي ربنا يكون في عونك .. وتشرفي المدونه في اي وقت براحتك


واي نعم .. لقد كنت شابا عارُ على البشرية جمعاء
كانت ايام غريبه والله يابنتي
ربنا مايعيد الوحش اللي في الايام دي يارب

والله يبارك فيكي ياستي ويارب اللي اقولو سواءا هنا او في سينماتك .. يعجبك ويعجب كل الناس يارب






سلاموووووووووووووووز