الثلاثاء، ١٦ رمضان ١٤٢٩ هـ

!! كاكا .. فـِ حارة اليهود

بعد ماخلص يوم مستشفى ابو الريش على خير والحمدلله .. والحقيقه التجمع كان أكبر مما كنت متخيل .. وأكبر مما كان أي حد متفائل يتوقع .. وبعد ما قريت ردود الفعل للموضوع ده .. في مدونات كتير .. وكللهم بيؤكدو ان اللي اتعمل هو بداية لحقبة سوف تشهد انطلاق المدونين وخروجهم من خلف الكيبوردات والشاشات .. حسيت بسعاده رهيبه
هي صحيح أأقل من سعادتي برؤية أي مدون بعد ما خرج من عند الاطفال وبعد ما ادّاهم هديتهم ولعب معاهم شويه وحس انه عمل حاجه بجد .. لكن برضه أنا سعيد قوي

سعادتي اتولدت لأن اللي كنت باحلم بيه في موضوع صحابي المدونين ابتدى يتحقق
سعادتي اتولدت لأني حسيت اني حد ليه دور في المجتمع .. مش مجرد مدوّن بيشجب ويدين ويستنكر .. ويوم مايعمل حاجه يروح يقف في اعتصام ولا في مظاهرة ويهتف بأي حاجه وصوته يتنبح من غير فايده
سعادتي اتوجدت اني اتعرفت على ناس همّهم زي همّي .. ناس خايفه على مصر ومش مستنيه معجزة تنزل من السما عشان يعملو حاجه
سعادتي كبيره قوي لدرجة اني نسيت اليوم اللي قبل التجمع
اليوم اللي اتفقت فيه مع داليا قوس قزح و آآبي بتنجاني و ميرا امرأه بعقل رجل .. اننا نطلع على حارة اليهود نجيب الحاجات اللي عايزين نجيبها للأطفال في يوم المستشفى .. واللي عارف حارة اليهود عارف انها عباره عن مجموعة ممرات صغيره وضيقه ومليانه بياعين بيبيعو كل أي حاجه في الحياه .. ولسانهم طويل قوي .. وهنا كان الصراع

لكم أن تتخيلو منظري وانا معايا تلات مزز - ومعلش يا اابي لو اتضايقتي من الكلمة بس انتو مزز بصراحه - والتلاته لابسين أحمر
.. وخد عندك بقى تريقه ومعاكسه وكلام في سكة
ان كان حبيبك تور البسله أحمر
الأهلي فوق الجميع
أحمر من كده مافيش
حمار وحلاوة يا مزز
أقوى حاجه اتقالت بقى كانت
اتنين على واحد فاول .. وتلاته على واحد يبقى عليه وعالفياجرا

وبالرغم من اني صعيدي ودمي حامي .. لكن كان لازم انسى أصلي واسقع دمي وأتقمص أي شخصيه تانيه طول مانا في الموقف المنيل بنيله ده .. وماحدش يعمل فيها الشيخ شبيّح ولا عنتر جبنه ويقول انا لو كنت مكانك كنت عملت وعملت
.. لأ يا عم الشملول
كنت هتعمل عبيط .. أو بالكتير قوي .. كنت هتعمل خواجه
وانا فعلا كنت خواجه ولا كل الخواجات .. كنت شايل شنطة الحاجات على ضهري زي ما أكون شيال في محطة مصر .. وماشي ومصدر العبيطه عالآخر .. واكتشفت اني مش انا لوحدي اللي عامل خواجه .. لأ .. ده هُم كمان كانو سامعين المعاكسه وعاملين خواجات .. ومش هم وبس .. كل المزز اللي في حارة اليهود كانو خواجات .. لدرجة اني شفت مجموعة خواجات بحق وحقيق .. لابسين من غير هروم .. وسبحان الله عاملين خواجات برضه
تقريبا هنعملها اتجاه فلسفي عميق .. ونظرية اجتماعية انسانيه من الدرجة الأولى
وهيبقى اسم النظرية .. الخوجنه في وقت الحوجنه

لكن الحمدلله .. عدينا مرحلة الخطر وانا كنت خلاص على آخري .. ورايحين على بطوط عشان نحط الحاجات اللي جبناها فيها .. والاقي واحد فارش بشوية فاكهة ومن ضمنهم فاكهة الكاكا
----
تعتبر فاكهة الكاكا فاكهة صيفيه معتدله .. تتميز بكونها غنية بالبوتاسيوم والمغنيسيوم .. وتساعد على تخفيف الشعور بالتوتر والارهاق .. وهنالك أوشاعات تؤكد انها تقلل من تساقط الشعر
أما اذا كنت أقرع زي حالاتي .. فلا تتوقع ان تأكل منها كتير يقوم يطلعلك شعر
زمن المعجزات انتهى يا ضنايا

----
قمت صممت اني اجيبلي كيلو كاكا يريّح اعصابي .. وآآبي كمان عايزالها كيلو .. ولاجل الحق يعني .. دوللي كانت هاتجيب هي كمان .. بس لما مالقتش في أطباق ورق ولا كرتون يتحط فيها الكاكا .. نفضت وما جابتش .. ونصحتنا قالتلنا ماتجيبوش .. لكن احنا طبعا ولا الهسس .. الدماغ الجزمه جزمه يعني .. كل واحد مننا انا واابي جاب كيلو وفرحانين قوي بالانجاز التاريخي اللي هتخلده الانسانيه المضمحله
وافاجأ بعد ما روحت البيت وبافتح الكيس .. ان الكاكا تحولت لكاكا بجد .. عباره عن مربى .. خليط متلخبط بشوية لخبطه
ولما باقول لـ آآبي على اللي حصل للكاكا بتاعتي - وماحدش يفسر كلامي غلط - لقيتها هي كمان بتقولي ان مصير كاكتها نفس مصير كاكتي

وبكده نخرج انك لو رحت حارة اليهود .. عيش خواجه .. وماتجبش كاكا

والحمدلله .. انا في قمة سعادتي باليوم ده

ملحوظه بقى .. بس مش في الكاكا

الف شكر لكل الناس اللي جات اليوم ده .. وجهزو نفسكم .. في مفاجأه ان شاء الله هتتعمل عالعيد الكبير .. أول ماهنحط النقط فوق الحروف .. هنبلغ الكل

سوووو

هناك ١١٨ تعليقًا:

GiGi world يقول...

كل سنه وحضرتك طيب وبخير ودايما رائع ربنا يكرمك ويعزك يارب

TAFATEFO يقول...

كل سنه وانتوا طيبين .. وربنا ييسرلكوا فعل الخير دائماً

الـسـيـدة نـون يقول...

انا مستنية المفجأة بتاعة العيد الكبير
شكلكم كدة هتجيبوا حاجة وتدبحوها وتوزعوها على الغلابة

صح ولا تخمينى طلع فاشوش

عجبنى مبدأ الخوجنة وقت الحوجنة
تستاهل عليه حاجة حلوة

سلام
اختك خيخة

أسيرة الأقدار يقول...

فى حارة اليهود عيش خواجة ومتجبش كاكا .. ههههههههه.. حلوة اوى الحكمة السووية ديى .. انا سمعت قبل كده عن حارة اليهود دى تقريبا فى مسلسل العميل 1001 او غيره مش فاكرة بس عمرى ماروحتها وكويس انى قريت التوبيك بتاعك علشان لو روحتها مبقاش اجيب كاكا ولا البس حاجة حمرا .. بجد اليوم اللى اتجمعتوا فيه ده كان يوم تاريخي انا مكنش ليا نصيب انى اكون معاكم بس كنت مبسوطة جدا وانا بتابع اخبار اليوم على المدونات المختلفة .. حتى النهارده كنت بفطر مع اصحابى وقعدت احكيلهم علي اليوم ده وعلى اللى عملتوه فيه وعجبتهم الفكرة جدا.. وان شاء الله فى مفاجأة العيد الكبير بئا اكون معاكم

AHMED SAMIR يقول...

سووووووو
ازيك....اخبارك ايه؟
يا ريتني كنت معاكو يا راجل
بس انت عارف رمضان بقى والمواعيد الملخبطة
سعدت جدا برؤيتك يوم مدونات مصرية للجيب
فعلا سماهم على وجوههم
تحياتي

Jack Sparrow يقول...

مبدأ الخوجنة في وقت الحوجنة انا اتحطيت فيه مرة واحدة و الغريبة ان كان معايا مزة واحدة بس
و الاغرب انها كانت لابسة ابيض
و نستنتج من كده ان المبدأ واحد و ان اختلفت المواقف
..
بس مش قادر افهم ليه لما بحاول اخلي انا و اصحابي حد معاه مزز يتحط في الموقف ده .. المشهد بيبقى دموي في الاخر
و طبعا تقدر تستنتج الدم بيبقى طالع من مين بالظبط
:D
مش عارف يا اخي هو اكرملي اتخوجن و لا اعمل فيها الشبيح و اتخوزق :D
وحشتني اوي يا عم
و هستنى المفجأة اكيد


سلامووووووووز

2ensan wnsan يقول...

سلام عليكم ازيك يا سوووو

والله نفسي اشوفك يا باشا ومش عارف اجي اي تجمع للمدونين خالص وكنت ناوي اجي المره دي بس ما حصلش نصيب ان شاء الله اكون موجود في مفاجأة العيد ادعيلي

اما عن حارة اليهود في مثل صعيدي قديم ( مسلم وقع في حارة اليهود ) ودا بقى لما واحد بيتحط في موقف مش لطيف زي موفك دا او بيقع عند التوربني زي سوو الصغير - مش الكبير - بس انه يكون مسلم ومعاه مزز وقع في حارة اليهود دي بقى اللي جديده ..

الخوجنه وقت الحوجنه مبدأ زي الفل عشت فيها دور الخواجه قبل كده وبرضه كان معايا 3 مزز ... وعنتر جبنه ما ينفعش في الموقف دا ابدا ما ينفعش تتخانق وانت معاك مزز خالص

ojg يقول...

وهكذا نتعلم ان اللي ياخد معاه مزز ويروح حارة اليهود يبقى اخرته ايه؟؟
كاكا
:))
احساس الناس ان التدوين مجرد اداه سلبية للتعبير عن اراء صعب للواحد انه ينشرها الا من خلال مدونته
أنهاه خروج المدونين من عالم افتراضي حبسوا فيه نفسهم لفترة طويلة
واثباتهم لنفسهم قبل ما يكون للآخرين انهم بجد رجالة ومش مجرد شوية كيبوردات
وان شاء الله دي مجرد بداية
واكيد هيكون في حاجات احسن واقوى
وربنا يقدرني واكون اول المشاركين
:)
حمدالله على سلامتك

رئيس جمهوريه نفسى يقول...

حليب هارتى يا غالى
اولا انا من موقعى هذا خلف الكمبيوتر بعتذر للجميع واللة لانى كان مفترض انى اجى التجمع بس ظروف المرض ربنا ما يوريها لحد عملت عمايلها
ثانيا: من نفس المكان واللة بجد انا شعرت بالفخر باليوم ده رغم انى مشاركتش فخري بانى في يوم من الايام عرفت داليا وريحاب وكل اللى قابلتهم من المدونين في يوم من الايام وفخور اكتر انى مدون وسط المدونين كلهم وباذن اللة يا ريس معاكم في يوم العيد الكبير ان شاء اللة بس ياريت متكونش اول يوم علشان طقوس العيد انت فاهم طبع الصعيد بقاء
تصرفك صح فى موضوع الخوجنة لانى غير كدة كانت البهدلة حتبقى للركب اكيد وانت معاك 3 بنات فلازم تصدر العبيطه للمحافظه عليهم وانا لو مكانك حتصرف كدة
موضوع الكاكا مش كاكا ده بتاع البرازيل ده لا عيب جامد هو بيتباع بالكيلو دلوقت
سلام ياحج

Z_Diva يقول...

wallahy into 3alm medya3a :D
bas elmohm inkm etbsto we basato 3'rkm kman
b2oloko eh b2a, t3mlo kman mofg2a kobra 3al3eed elkbeer danto monthedyny :D

Empress appy يقول...

ليه ما تكمل وتقول آبى نسيتها فى العربيه
ها قول يا اخى
لا نطلع من كده اللى ميسمعش كلام دوللى تبقى فاكهته عصير بس الحمد لله انقذنا ما يمكن انقاذه ولقيت خمسه مش منتحرين فى الكيس ههههههههههه
وبعدين هو انت كنت عاوز تنزل ومتعملش خواجه يبقى بتهزر الا هناك يا خويا مقدرش اشيلك من ايديهم
وبعدين مبدأ الاحمر ده والله جه بالصدفه بس القروود خدوا بالهم
على فكره انت جدع اوى لانك بجد كمان اتبهدلت معانا وكان يومين حلوين اوى والله يا سوو
وبعدين ملحوسه من غير ما حد ياخد باله
اسمها موزاليندا ولا هتفضل هتغيظ فيه كتير ماشى لك خدود تتقرقص منها

مهندس مصري بيحب مصر يقول...

هههههههههههه
و نطلع من البوست ده بدرس مستفاد اننا ما نمشيش مع مزز خالص و خصوصاً لو كانوا لابسين احمر و خصوصاً في حارة اليهود
فكرتني بمشهد محمد هنيدي في فيلم يا انا يا خالتي لما كان ماشي مع خطيبته و اتثبت و قالوا له نفض لنفسك ياد

بس انت اللي عملته صح

و تعيش و تأكل كاكا
:)

و بجد بقى ربنا يجازيكم خير على الخير اللي بتعملوه و منتظر مفاجأة العيد الكبير

Sourah يقول...

هههههههههههه

تحفة يا سوووو

مش بقوللك راسي و كلامك حكم ..

عجبني جدا اللي نتو عملتوه ، و ما اقدرش اقول غير ربنا يجازيكو كل الخير . .

عجبتني اوي "الخوجنة و قت الحوجنة" ,
بس هو العالم البياعين اللي هناك ، ماعندهمش رمضان نازلين تريأة على الخلق و العالم ..

بس بصراحة عيال تجنن ، عجبني تعليقالتهم اوي ، خفة ده المصريين ، بغض النظر عن الموقف طبعا ، و عن حبايبي البنات التلاتة ..

عموما ربنا يسامحهم , و يعفوا عنهم ، و ما تزعلوش يا جماعة ، و ربنا يجعل خوجنتكم دي في ميزان حسانتكم .

و بالمناسبة ، عاوزة اقول اني بأكن لدوللي كل احترام ، لانها واضح انها عندها خبرة كبيرة , و بقوللك انت و آبي تعيشوا وتاكلوا غيرها ..

بس كويس انكو عرفتونا ان الكاكا طلعت عشان اول ما انزل اشتري على طول


اخر الكلام سلاااااام

Doba يقول...

أرجع وأقول لما بتكتب موضوعات فرعية بتكون أجدع كاتب ساخر

وقعتنى من الضحك على
زمن المعجزات انتهى يا ضنايا

بجد كنت أتمنى انى اشارككم هذا اليوم العظيم بس انا عندى لوايح من زوج العزيز بأنى أنضم للفريق الحريمى فقط معرفش خايف عليا ليه وكأنى نازلة البحر بس ده شىء يرجعله وانا بحترم قراره

وانا بضم سعادتى لسعادتك بأن فعلا المدونين ابتدوا يعملوا حاجة بجد من أول بداية تعارفهم وده شىء جميل للغاية ويارب يقدرنا ويقدركم نعمل حاجات حلوة كتير

عجبتنى جدا الفكرة لما حطيت رقم موبايلك ومش عارفة ليه استجدعتك جدا ودلوقتى لما قلت انكم نزلتم مخصوص حارة اليهود تشترو الحاجة استجدعتكم اكتر واكتر

ثم انت معاك تلات موزز زى الفل يابا وهما اساسا كانوا عاملين خواجات لانهم لو ردو هيكسفوك بس هما جدارة وكفاءة يوقفو اى حد عن حده احنا بناتنا ميه ميه مش اى كلام

اتمنى كل التوفيق فى خطة الرووف اللى بعد الحروف او الخروف بتاع العيد

يلا سلام
هبة

غير معرف يقول...

اية هاتجوز انت وواحدة منهم
شكلها اللي عمالة تقرصك في خدك

محمد فاروق الشاذلى يقول...

وهو فى حد برضو يروح الأماكن دى ومعاه بنات ؟؟؟!!!
لكن كله فى ميزان حسناتك والله يا أحمد، وتسلم دماغكم على اليوم ده ومستنين مفاجأة العيد الكبير إن شاء الله.
تعرف إنى عمرى فى حياتى ما فكرت أجرب أكل الكاكا دى خالص، معرفش ليه فى حاجز نفسى بينى وبينها بسبب اسمها ههههههههههههه وعلى فكرة عندى نفس المشكلة مع القرع برضو.
ادعيلى اخف ههههههههههههههه

قوس قزح يقول...

ههههههههههههههههههههههههههههههههههه

يخرب عقلك على كلامك
كده تكسفنا قدام المجتمع التدوينى !!
طيب انا هقولهم بقى انك كنت واخد شنطة الحاجات علشان تدارى فيها و كأنك مش شايف ولا سامع مش جدعنة يعنى و بترحمنا من الشيلة لان كل واحدة كانت شيلة هى كمان شنطة على قلبها

بس المبدا انا موافقة عليه
لان قبل كده جوزى اتخانق بسببى و كان موقف منيل و الدم بقى للركب من الناحيتين و من وقتها اتفقت معاه لو اتخانق ولا اعرفه هههههههههههه

و بعد كده لما اقولكم حاجة تسمعو الكلام علشان افتكرتونى عاملة فيها بنت ناس
تستاهلواااااااااااااااااااا
و متزعلش هبقى اجيبلكم كاكا غيرها

و بقى كده تبقى عارف
اللى ميسمعش كلام دوللى
هفضحه لما يرجع و يقولى
ههههههههههههههههههههههه

Mafrousa يقول...

هههههههههههههههههههههههههههه
هههههههههههههههههههههههههههههه
ههههههههههههههههههههههههه
يعنى بزمتك فى زحمة حارة اليهود ديه
مادوستش\ على حاجه كده و لا كده
ههههههههههههههههههههههههه
المهم اكلت المربي؟؟؟ هههههه
عارف يا سو انا جوزي بيحبها قوي
بس انا اسمها اصلا مش عاطفى
مش بينسجم مع نفساوياتي
هههههههههههههههههههههههههه

همس الاحباب يقول...

ما بلاش فضايح يا عم سوووووووو
وحلو الكاكا بقت كاكا
بجد اليوم كان جميل وربنا يجعله فى ميزان حسناتكم جميعا
وانت نعم الاخ يا سوووووو
تحياتى

غير معرف يقول...

مشطوبة الاسم ولا مشطوب الاسم الغير متنيل معرف
===============================

لا اله الا الله يعنى احنا فى ايام مفترجه غاويين تجيبوا لنفسيكوا الكلام ليه انتى مالك يا بيضه لان اكيد اللى يقول ده بنت
يتجوز ولا ميتجوز انتى تعبانه ليه
ما تشوفى لكى عشه فراخ تلمك بعيد عن هنا
ولا لازم اجيب ابو ورده علشان تعرفى بقى ان الله حق
واساسا اللى زيك ميعرفوش يعنى ايه ناس محترمه تخرج تعمل حاجه للخير ولربنا ولا انهم يبقوا اخوات واصحاب
ولو اتجوز حتى برضه ملكيش فيه ولا اقولك اوعدك هعزمك بس ابقى ادخلى باسمك او حتى لو ولد قولى انت مين وانا اعزمك
جتكم القرف مليتوا الدنيا حقد وغل روحوا استحموا يمكن تنضفوا بقى من جواكوا شويه
معلش يا سوو
اصل اشكال فى شوال بعيد عنك

همس الاحباب يقول...

بعد اذنك يا سووووو
ممكن ارد على الاخ غير معرف
اصله انسان وقح وتلميحاته بايخة
واحنا فى رمضان وبلاش نفطر عليك
لانك بصراحة متستاهلش الواحد يضيع صيامه عليك
يا اخى الناس اللى بتتكلم عنهم دول اناس اخلاقهم واعمالهم اشرف من مليون واحد من عينتك
واحنا فى مجتمع التدوين كلنا اخوات وبنحترم بعض وبنخاف على بعض
اما اصحاب العقول المريضة اللى زيك عمرهم ما يفهموا كده
وبعدين انت مالك يا جدع اللى زناقك قوى كده وحارق دمك
روح يا شيخ ربنا ينتقم من امثالك
اسف يا سووووو
بس انسان استفزازى وحقير

ميرا ( وومن ) يقول...

سووو

ههههههههههههههههههههههههه

اولا موضوع الأحمر دة جه بالصدفة وانت بنفسك شوفت اننا اتخضينا لما لقينا نفسنا عاملين ماتشينج

بس ايه موضوع المعاكسة ده ولا كأني كنت معاكم بس ده طبعا علشان انا كنت مركزة في اللعب وانت عارف شكلي ساعتها كان ازي

نفس احساس علي بابا لما شاف الدهب والياقوت والمرجان

انا بقي لقيت عرايس ودبايب ولعب أحمدك يارب

Soooo يقول...

GiGi

وكل سنه وانتي طيبه يا جيجي وربنا يارب بحق الايام المفترجه دي يكرمك ويسعدك ويبسطك ويهيئلك الخير من عنده يارب




سلامووووووووووز

Soooo يقول...

TAFATEFO

وانت طيب يابو حميد وكان نفسي تيجي اليوم ده بجد
بس ان شاء الله الجايات كتير
وربنا يوفقك ويكرمك يارب




سلامووووووووووز

Soooo يقول...

بت خيخة وأى كلام

خووووووووووخه
والله البلوج نور بزيارتك دي

ولا ياستي مش هنجيب حاجه وندبحها
هنعمل حاجه أكبر من كده ان شاء الله

وباعتذرلك بشده اني ماردتش عليكي في الموضوع اللي طلبتيه منني
بس الحقيقه اتلخمت في كام حاجه وكمان الموضوع ملعبك وانتي مش واخده بالك

ومنتظر الحاجه الحلوه يا اجدع اخت خيخه في بر مصر كلها

سلامي لشرفنطح

ملحوظه
مش عيب عليكي تبقي مدونه ومحترمه ومش ليلى .. وماتبقيش عارفة حسبة بيرما ؟؟؟




سلاموووووووووووز

Soooo يقول...

أسيرة الأقدار

صدقيني انك تسمعي كلام او تقري كلام عن حارة اليهود مش هيوصف الحاله صح
لازم تروحي هناك وتتعاكسي عشان تعيشي التجربه

وياريت تكوني معانا ان شاء الله في حوار العيد الكبير وتساهمي معانا في اللي ان شاء الله عايزين نعملو

وربنا يوفقك ويوفق الجميع




سلامووووووووووز

Soooo يقول...

A.SAMIR

حليب هارتي والله يابو حميد

ماتتصورش انا سعيد قد ايه اني اتعرفت بيك وبجد كان نفسي تكون معانا في اليوم ده

بس ملحوقه ان شاء الله وتشارك معانا في الايام الجايه

وربنا يكرمك يارب ويوفقك ويهيئلك اللي فيه الخير




سلاموووووووووز

Soooo يقول...

Jack Sparrow

والله يا ميدو ياخويا النظريه اللي قلتها هي أسلم نظريه على مر العصور
وصدقني لو الخناق كان هيحل المواقف دي ماكانش حد غلب .. بس الكتره تغلب الشجاعه ياصاحبي

وانت كمان والله واحشني
ونفسي تظهر وتبان عليك الامان وتيجي في التجمعات الخيريه دي .. صدقيني هتحس بحاله حلوه قوي قوي قوي

منتظرك ان شاء الله في الحوار الجاي




سلامووووووووووز

Soooo يقول...

wa7ed 2ensan wnsan

وعليكم السلام ورحمة الله وبركاته يا عبده باشا

وصدقني انا من بعد ما قريت كلامك وسلامك على الفيس بوك قلت انك جاي التجمع بتاعنا وهاعرف اتكلم معاك واتعرف عليك بروقان
لكن ان شاء الله الجايات أكتر من الرايحات

وعلى فكره انا حطيت العنوان بتاع الموضوع في نفس سكة المثل .. بس خفت احسن حد ياخدها اسقاط عالدين ولا حاجه .. قمت خليتها في اطار الكاكا لما لها من تأثير كاكايي على مجريات التاريخ القديم المعاصر

ايه الكلام الكبير اللي بقوله ده؟؟؟؟





سلامووووووووووز

Soooo يقول...

رئيس جمهوريه نفسى

ابو حففي المختفي
فينك يابو خالو .. طب والله العظيم ليك وحشه

وياسيدي احنا مقدرين ظروفك وطول المشوار عليك وعاذرينك
انا باتكلم على الناس اللي من القاهرة وخايفين يعملو حاجه ايجابيه ومكتفين بشوية زعيق عالفاضي

وان شاء الله تكون معانا في الحوار بتاع العيد الكبير اللي جاي ان شاء الله
وماتقلقش .. مش هيكون اول يوم .. هنحاول نخليه تاني او تالت يوم العيد عشان الناس تكون أكتر ان شاء الله

ملحوظه
يعني بذمتك انا هشتري كاكا بتاع البرازيل .. اللي مالحقت اكل كاكا مصر .. هلحق اكل كاكا البرازيل على ماتيجي من برازيليا لغاية المعادي ؟؟؟؟



سلاموووووووووز

Soooo يقول...

appy

بتغيظيني عشان لحقتي خمس كاكايات قبل مايبوظو وكلتيهم
طيب
وديني لاجيب كيلو كاكا واكله عند بتاع الكاكا عشان اغيظك

وفعلا والله كانو يومين حلوين قوي .. ومهما وصفت في جدعنتك انتي ودوللي مش هقدر اوفيكم حقكم
روحي ياشيخه .. ربنا يباركلك في خرفانك ويكرمك فيهم خروف خروف ونعجه نعجه

وبعدين ايه الاستعباط ده
هو اكمني شاب ملظلظ وخدودي منفخه تقومي تقرصي فيهم
ولا اقولك
اقرصي فيهم ياستي
بس اعملي حسابك .. القرصه بعد كده بخمخه وسبعين قرش
احنا داخلين على عيد وعايز اجيب موبيل ثري جي


ملحوظه
يابنتي انتي مش فاهمه
احنا بنطبق نظرية المعلم محمد رضا في قص الكلام .. عشان كده بنقول موز اختصار لموزاليندا .. وحرف الز الزياده في كلمة موزز .. دليل على الجمع المذكر السالم




سلامووووووووز

Soooo يقول...

مهندس مصري

حليب هارتي
والله كان نفسي تكون معانا ياهندزا وتشوف حالة الفرحه والسعاده اللي الكل كان فيها
طبعا في المستشفى مش في حارة اليهود

وياسيدي ماحدش بيتعلم بالساهل .. ادينا عرفنا ان حارة اليهود بيتضايقو من اللون الاحمر في المزز

وربنا يارب بحق الايام المفترجه دي .. يرجعك لأهلك وبلدك سالم غانم ومحقق كل اللي تحلم بيه يارب




سلاموووووووووووز

Soooo يقول...

Sourah

والله يا بنتي هو اكيد عندهم رمضان في حارة اليهود .. بس احنا رحنا بالليل .. واعتقد انهم فاهمين ان رمضان آخره المغرب

فعلا عليهم تعليقات بنت لذينا .. انا كنت خلاص هاين علي اضحك لما سمعت آخر تعليق اللي هو بتاع اتنين على واحد فاول .. بس لو كنت ضحكت يبقى معنى كده اني فاهم كلامهم واني كداب ومش عايش عليهم دور الخواجه

واتطمني .. الكاكا نزلت الاسواق المصريه بقوة .. بس اعملي حسابك لو هتجيبي يبقى يكون معاكي طبق كرتون ولا حاجه ناشفه عشان ماتعيطيش عليهم لما تلاقيهم أشلاء كاكا




سلاموووووووووووز

Soooo يقول...

Doba

اختي العزيزه ام يوسف افندي
ربنا يكرمك يارب على كلامك اللي قلتيه في حقي .. بس صدقيني انا اقل من كل الكلام ده

وياستي لازم تحترمي رغبة ابو يوسف واحنا كمان محترمينه ومحترمين وجهة نظره
ومش مهم تجمعات حريمي ولا رجالي قد ماهي للخير
وربنا يوفق الكل يارب

ولا ياستي .. خروف ايه اللي هنجيبه عالعيد .. ده انا اكله لوحدي يابنتي
احنا ان شاء الله هنعمل حاجه أكبر من كده
بس قولي يارب

وسلامي ليوسف افندي





سلاموووووووووووز

Soooo يقول...

غير معرف

ده نظام حقد عالتقريص في الخدود ولا انت ماعندكش خدود؟؟؟

اقولك .. في حل لو ماعندكش خدود تتقرص فيهم .. ممكن تتقرص في حاجه تانيه .. تعالالي على جنب وانا اقولك ممكن تتقرص فين

وبعدين انت مالك ياجرع .. خدودي وانا حر فيها
واللي انت بعبطك وضيق افقك بتتكلم عنها .. اشرف وأطهر واكثر احتراما منك ومن أمثالك
اه صحيح .. نسيت .. اللي زيك مايعرفوش الكلام ده .. بص .. هاشرحلك الكلام ده لما تيجيلي على جنب عشان افهمك ممكن تتقرص فين

وياريت ما اشوفش وشك هنا .. والا هتلاقيني جايب علبة بيروسول الحجم العائلي ومدوبها في كوباية شاي ومشربهالك

غير معرف يقول...

غريبة اوي موضوع حارة اليهود ده اصل انا كنت لسه هناك من كام يوم كده وكان معايا ابو العزم علشان كنا بنجيب بضاعة لمصنع الثلج الي احنا شركا فيه منت عارف والناس هناك كانو زي الفل ومشفناش اي مزز اساسا هناك علشان يتعاكسو الحاجة الغريبة بجد ان حارة اليهود عباره عن مجموعة ممرات صغيره وضيقه ومليانه بياعين ومع كل ده تلاقي عربيات ماشيه في الممرات وبيكلكسلك علشان توسعله

Soooo يقول...

قلب مصرى

حمايا العزيز اللي ما جابش عروستي معاه يوم التجمع وزعلت قوي عشان حسيت انك بتقف في وش حبنا .. وحبنا أكبر وأقوى من الايام

ايه رأيك في الدخله دي .. تحس ان امرؤ القيس ابن الملوح هو اللي بيتكلم

وبخصوص الكاكا .. فهي فاكهة حلوة قوي على فكره
بس فعلا مشكلتها في اسمها
اقولك .. انا هابقى اجبلك كاكايتين واقولك ده فاكهة جديد اسمها ظاظا
بيتهيألي الاسم ده أظرف شويه

والقرع ده الحقيقه ماجربتش اكله كده ساده .. كلته مره واحده كان معمول صينيه في الفرن .. حسيته زي البطاطا السايحه .. قمت نفضت اكلو تاني

وبجد بجد بجد .. انا سعيد جدا قوي اني اتعرفت عليك اكتر واتكلمت معاك اكتر وان شاء الله معرفة خير

سلملي على عروستي وقولها سوووو هايجيلك على حصان ابيض في اسود وهو لابس حزام الامان والخوذه .. عشان اخد منها المثلث وشنطة الاسعافات




سلاموووووووووز

Soooo يقول...

قوس قزح

يا دوللي يابنتي كان لازم اتدارى في الشنطه .. مش بتشوفي الخواجات لابسين شنط على ضهرهم وماشين ولا هاممهم .. هي دي الخوجنه على حق

وبعدين انا ماقلتش انكم ماكنتوش شايلين حاجه .. انا قلت انكم كنتو عاملين خواجات انتو كمان .. يعني شايلين شنط وعاملين مش شايفين ولا سامعين .. خواجات كلنا في بعض بقى

وفعلا اللي مايسمعش كلام دوللي
هتبوظ منه الكاكا ويقول ياحلولي


ملحوظه
هو جوزك لسه تايه في المعادي؟؟؟




سلاموووووووووز

Princesa ... WHiSPeR يقول...

مستنيه مفاجأتكم بعد العيد ان شاء الله
بس الله يكرمكم قولولنا من قبلها بكتير يعني علشان حضرتي ورايا مذاكرة

زُمُرده يقول...

احجز في ال300 الاوائل

وارد وقت تاني

انت مردتش ع البوست اللي فات لييييييييييه

غير معرف يقول...

هههههههههههههههههههههه
أبقى سلملى على الكاكا و الأحمرات اللى كنت ماشى معاهم

فعلا حاجة حلوة أوى التجمع فى عمل الخير.....كان نفسى اكون معاكوا بس للآسف لسة جديدة فى عالم التدوين و مفيش ناس كتير تعرفنى :(

غير معرف يقول...

سووو
اللى ياكل لوحدة يزور
هههههههه
عشان كدة الكاكا بقت مربى كاكا ههه
اما بالنسبة للقاء فدا ثمرة مجهود
داليا وابى وانت وخيخة من قبل لان
كل ما لقاء بينجح ويمر بسلام ولله الحمد بيشجع ناس تانية على انها تخوض التجربة بلا خوف ولا تردد
وربنا يجمعنا دايما على خير يارب
ويجعلنا دايما متحابين فيه عزوجل


سووو بجد
جزاك الله خير على المجهود فى حجز المطعم
وكجهودك فى ابو الريش ان شالله تعيش

حنين القلب يقول...

سووووووووووووووو
ازيك يا جدع
اى حد مكانك لازم يعمل خواجه والا هيتقطع يا باشا وبعدين منتا ماشى مع قمرات عايز ايه ولابسين احمر كمان
احمد ربنا ان اليوم عدى على كده
لما تيجى اسكندريه هبقى اجيب ليك 3 كيلو مانجه وقرص مشبك اهو احلى الكاكا بتاعتك اللى انضحك عليك فيها
ربنا يجعل تجمعكم دايما على خير

حنين القلب يقول...

الاخ او الاخت غير المعروف
بعد اذنك يا سوووو
اصله مستفز اوى
يعنى لا رمضان نافع فيكم ولا شعبان طيب ما تتلموا كده وخليكو ولو لمرة واحده بني ادمين بجد وبلاش شغل الحيوانات ده اللى بتاكل فى بعضها اللى مش تعرف يعنى ايه صداقه واخوه
بجد ربنا يهديكم
وعلى فكرة انت فعلا عايز تتقرص
تك قرصه فى قلبك ما تعرف تتنفس بعدها تانى
سورى يا سووووو
اصلى متغاظه

shaimaa samir يقول...

اهلا سووووو

جزاكم الله خيرا
بجد بجد
كفاية ان الطفلين اللى دخلتلهم طلبوا لعب بالاسم
عايزين لعب

ربنا يعزك

_اسجل اعتراضى على كام كلمة كدة زورى منزلهاش_
متخودشى فى بالك
بس معرفتش معترضشى

كل الاحترام والتقدير
لشخصكم

رمضان كريم

nona يقول...

اليوم كان جميل و ربنا يجزيكم خير لانكم تعبتوا عشان تخلوا اليوم دة ناجح و قدرتوا تفرحوا الاطفال و كمان الناس الاى جات ما شاء الله اليوم كان منظم و الكل كان فرحان
يا رب ديما نتجمع فى الخير
و يا رايت المفاجاة تبقا على اول 11 لان فى العيد هيبقا صعب بالنسبة للبنات انها تيجى فا يا رايت تبقا مش فى العيد
و كل سنة و انت طيب

nada يقول...

bgd ya soo el yom kan 7elw 2wi we el7 rabena 2darna we basatna el 2tfal dol we bgd isa 3ayzyn nkaraha we 2kyd mesh m7taga 2a2olak 2n anytime lo 7t3mlo 2y 7aga i am in we gazakom alah kol 5yer :):)

mostafa rayan يقول...

كل سنةوانت طيب ويارب دايما متجمعين في الخير
بس انت ماقولتلناش ياتري مربي الكاكا كان طعهما ايه ؟

mostafa rayan يقول...

انا عايز احييك على بوست دكر البط انا ماقدرتش امسك نفسي من كتر الضحك اسلوبك حلو قوي يا سو وبجد لوكتبت فيلم كوميدي هيكسر الدنيا
ربنا يوفقك دايما يا جميل

ابن حـجـر الـعـسـقـلانـى يقول...

معلش يا سوووو أنا هاعلق الأول على المجهول اللى بيهبل

بجد حاجة مستفزة جدا .. و منعول أبو دى أخلاق يا جدع من الناس اللى ما بتشوفش غير صغائر الأمور .. يعنى المجهول دة ساب أو سابت ترتيب اليوم و جمع التبرعات و الهدايا و المشاوير اللى اتعملت لزيارة الأطفال و معرفة حاجاتهم و الجوع و العطش اللى الناس استحملته و هم صايمين و جايين من محافظات تانية و ضحكات الأطفال اللى فى لحظة بقوا بيضحكوا و نسيوا الألم .. ساب كل دة و قفش فى حاجات تدل على دماغه السودة

بص أنا هاوجه له عبارة قالها بن تيمية من سبع قرون فاتوا .. بيقول إيه


إن الجاهل بمنزلة الذباب الذي لا يقع إلا على العقير ( الجريح ) ولا يقع على الصحيح ، والعاقل يزن الأمور هذا وهذا



بص يا سوووو .. هو اختار أو اختارت إنه يبقى ذباب ... و غيره اختاروا إنهم يبقوا رجالة .. رجالة رجالة يعنى حتى لو كانوا بنات

و ربنا يعينا كلنا على عمل الخير

و تعيش و تشترى كاكا يا ابو سوووو

ألا قول لى صحيح .. هو انت رميت الكاكا فى الزبالة ... و لا فى الحمام و شديت عليها السيفوم ؟؟

غير معرف يقول...

الله عليك يا سوووو

أنا كمان نفسي بجد في كده

نفسي صووووتي يعلى

وأعمل حاجة بجد

حاجة بحق وحقيقي

أنا فعلا مش مرتاحة لمجرد شاشة و بعترة كلام

يا ريتني جنبكم أقدر أحط إيدي في إيدكم

بس أنا متفاءلة...إن شاء الله هبقى منكم

---

موضوع الخوجنة ساعة الحوجنة دي حاجة صدقني بتحصل كتير

ما تظلمش نفسك أبدا...كل الناس رجالة وستات بتضطر للأسلوب ده

منعا لأي تهور غير محمود عقباه

أحمد..ربنا يعوضك خير و يرزقك من أوسع أبوابه

و يغفر لوالدتك و يجمعك بيها في الجنان العلى يا رب العالمين

اللهم استجب

سواح النت يقول...

ماهو لو كنت دكر
كنت رديت علي اللي بيعاكسونا
ومسبتش اللي يسوي واللي ميسواش يعاكسونا
انا قلت لداليا وميرا
نروح لوحدنا مش فارقة لكن انت اللي شبطت

Empress appy يقول...

سوو
التعليق بتاع
appy
من غير صورة ده مش انا ابقى اضغط وانت تعرف ده حقير عامل اكونت وداخل يشتم الناس باسمى
ابقى اضغط وانت تعرف

غير معرف يقول...

سوووووووو قلي انت اشتريت الكاكا دي وانت بكامل قواك العقلية وكنت ناوي تاكلها كمااااااااااان ..ياحلاااااااااااوة


****************************


لا بجدبجد انا مبسوطه جدا جدا عشان الأعمال الخيره الجميلة دي وبتمنالك التوفيق من صميم القلب وعمق الفؤاد ويارب يارب كل خطوة من خطواتك تكون في ميزان حسناتك


احتراماتي

شــــهد

محمد فاروق الشاذلى يقول...

أنا كده عرفت نيتك يا انتهازى
يعنى انت عمال ترسم على حب البت وفى الاخر تطلع عايز منها المثلث وشنطة الاسعافات
زمن صعب.

لكن انا هاسمحك علشان انت جدع وبخصوص موضوع الظاظا ده فانا اوعدك اجرب ... بس تفتكر لو روحت للفكهانى وقل له عايز ظاظا هايحدفنى بسنجة الميزان ولا الكفة بس ؟؟؟؟

غير معرف يقول...

انا مستنيه المفاجاه

ممكن اعرف اجى

هستنى

Empress appy يقول...

بالحق علشان تعرف الفرق اضغط هنا واضغط عليه
مش تبارك ليه ده طلع ليه قرين ههههههههههههههههه بقيت ابى وخرفانى وقرينى هههههههههه

مواطن مصرى نايم يقول...

جامد يا سووووو
و الله بجد تعرف انى مش بحب الكاكا
بحس انها عندها اللوز
هههههههههه

ممكن ارد على الخبؤ الغير معرف
و اقوله حمرا


appy اما بقى الخبؤ اللى واخد اسم

بعد اذنك يا ابى حرد انا كمان
احب اقول ان كلنا عارفين اسلوب ابى
و عارفين الطريقة بتاعتها فالكلام
و كمان البروفايل بتاعك

منذ 2008 سبتمبر
عدد مرات العرض 28

appy اما بقى
فالبروفايل بتاعها قديم يا خبؤ
و عدد مرات العرض كتير يا خبؤ

منذ 2007 ديسمبر
عدد مرات العرض 14,097

ابقى استغطى كويس قبل ما تنام
على فكرة احنا مبسوطين ان حد خبؤ زيك متغاظ مننا كلنا و ده دليل على نجاح حد زى ابى
و بقولك

حمرا

الطاحونة على فكرة
(فيلم ظرف طارق)
واخد بالك من اسم الفيلم

Z_Diva يقول...

ed ya3ny mesh radet wolt 7awly tygy elfag2a walla rbna yshl we t2dry t7dry elfg2a, walow 7ta 3zomet markbya ya garra3 :D

FreeKiller يقول...

اولا : اسمحلي اهنيك عالمدونة الجميله
و اسمحلي اهنيك على اسلوبك الرائع

طبعا هتقول دي عيلة هتقيم اسلوبي ازاي يعني و انا اللي عجوز و عندي تلاتيييييييييييييين سنة بحالهم

هقول معلش
عديها عديها
الناس لبعضيها
و انت الكبير برضه

ثانيا

انا مش عارفه الناس بتجيب الكاكا دي على ايه
دي حتى عاوزة معجزة عشان تتاكل
و يا رب تكونوا عرفتوا ان النصيحة بجمل

و كاكا ده من أشهر اللعيبة
اااااااه لو يروح برشلونة


ملاحظة:
عندنا ف جامعه الزقازيق حته اسمها حارة اليهود
بس عندنا مش ضروري تبقى خواجة

ممكن لو اتزنقتوا تبقوا تنورونا
الحمد لله مفيش حاجة موجوده خالص

سلاااااام

Eldebug يقول...

لا حول ولا قوة الا بالله ... فى رمضان وصايمين وسايبين البلد كلها ورايحين تشتروا من حارة اليهود ... ليه خلاص حارات المسلمين والمسيحيين خلصوا من البلد ...
احمد ربنا بقى ان الابتلاء جه فى الكاكا بس مجاش فى حاجة تانية ... اللهم سامحهم واغفر لهم خطاياهم واهدهم واجعلهم يشترون من عبادك الصالحين يارب العالمين

الا بالحق الاسعار هناك عاملة ايه

غير معرف يقول...

أحمد معلش
لسه واخدة بالي من موضوع الغير معرف

أنا مش فاهمة...هم ليه مستقصدينك ؟؟
غاويين سخافة ليه ؟

بس عارف..ده أكبر دليـــل إنك شخص ناجح يا أحمد

وبقولهالك للمرة الألف...ما تلتفتش للضعاف النفوس
إحنا كلنا معاك و بنحبك بأسلوبك اللطيف الخفيف على قلوبنا

دايما للأمام يا أحمد في الخير و التميز يا رب

----
اسمحلي كمان أطلب منك تشرفني بزيارة متواضعة لمدونتي فيه موضوع مهم أحب إنك تطلع عليه..و إن شاء الله ينوبنا جميعا عظيم الأجر والثواب

تحياتي

فاروق عادل يقول...

سوووووووووووو انا بلاك جوست وعملت مدونة جديدة متيجى تنورنى ياباشا

عارف انك بتزعل من اللى بيجوا يرموا اعلانات ويمشوا طبعا الموضوع جامد كالعادة اللى متعودين عليةكان نفسى اجى بس بما انى لسة طالب ثانوى فانا معيش ولا اى اموال خاصة زيكوا ان شاء الله لما مابقاش عالة على حد ابقى اقدر اجى وتعالى نورنى يامعلم

YHYيــوســف الـمصـرى يقول...

سووووووووووووو
حبيب قلبى
هههههههههههه يخرب عقلك يا راجل كاكا !
شكله كان يوم حلو
أنتوا ياعم مش بتقولولى على الحجات دى ليه ولا شكلى مش بيعمل خير ولا ايه ؟!

تحياتى يا باشا وكل سنة وانت طيب وبخير وسعادة
:)

Unknown يقول...

حلو اصبحت المدونات مكان لوجود الحشرات الزاحفة من بلاعات الشوارع
طبعا اعتذر بشدة ياسووو على تدخلى
بس بالله عليك هات البيروسول واقتل الحشرات اللى ماتعرف شئ الا قلة الادب


سوووو احترامى الشديد لك

Asmaa mahaba يقول...

فى انتظار المفاجاه تعرف وانت بتحكى تخيلتك زى مين محمد هنيدى لما اتعاكست دنيا سمير غانم ؟؟ فاكر؟؟
كل سنه وانت طيب وكانت سهره وقاعده جميله تسلموا جميعا

Soooo يقول...

Z_Diva

لا مؤاخذه يا ام زعبولا .. والله كنت كاتبلك تعليق بس تقريبا اتسرق ولا حد طمع فيه

وعموما التعليق كان في سكة اني باتمنى انك تكوني موجوده معانا ومش هايحصل حاجه لما تاخديلك اجازة اسبوعين ولا حاجه وتنزلي مصر وتيجيلنا القاهرة يوم

وبعدين عيب عليكي والله تفتكري اني باعزم عليكي عزومة مراكبيه
دي عزومه صعيدي والله .. بس انتي ياريت تقدري تيجي

وباعتذرلك مره تانيه ان تعليقي ما اتكتبش وحقك علي والمسامح كريم




سلاموووووووووووز

Soooo يقول...

واحدة مفروسة

والله يا مفروسه ياختي لو كنت دوست كنت هاقول
واساسا هناك مافيش حاجه تنداس
الناس مش عارفه تمشي .. كللو بيشوفلو خون يقوم متحرك من خلاله .. نفس نظرية التحرك الجماعي والأواني المستطرقه
!!!!
ايه اللي جاب الفيزيا لحارة اليهود؟؟؟

ولعلمك بقى .. جوزك بيفهم قوي .. الكاكا دي غذاء ملكات النحل اصلا .. بس اللي يقدر قيمتها بقى




سلامووووووووووووز

Soooo يقول...

همس الاحباب

باشا
والله ما اقدر اشكرك ازاي على ردتك لغيبتي
ربنا يارب يحميك ويباركلك في همس وتشوفها عروسه زي القمر .. بس تجوزهاني انا .. انا بقولك اهو يا حمايا



سلاموووووووووز

Soooo يقول...

الغير معرف التاني اللي رد عالغير معرف الأولاني

الف شكر ليك على كلامك وبجد بجد التدوين والنت ومصر كلها هتبقى كويسه طول مافيه ناس زيك

ربنا يحفظك ويحميك من كل شر ويهيئلك الخير من عنده قادر ياكريم




سلاموووووووووز

Soooo يقول...

وومن

يابنتي يعني انا مارضيتش اقول انك كنتي مقضياها لعب في اللعب وبتتفرجي وانتي مستمتعه قوي عشان ماحدش يقوللك غيري اسم مدونتك من امرأه بعقل رجل لامرأه بعقل طفل .. تقومي انتي تقولي بنفسك وتفضحي روحك

وبعدين انا عارف انك كنتي عايزه تقعدي هناك تلعبي ومش عايزه تروحي .. ولولا ان الوقت اتأخر كنتي فضلتي تلعبي لغاية ما تبقي مش عايزه تدي اللعب للاطفال بتوع المستشفى

بس سيبك انتي .. كانو يومين حلوين والله

ربنا يديم الخير والمعروف ويقدرك انك تعملي الخير ويجازيكي عليه احسن جزاء ان شاء الله




سلامووووووووووز

Soooo يقول...

هشام توفيق

تخيل بقى يا اتش لما المنطقه دي اللي مافيهاش مزز يبقى فيها تلات موزز ولابسين احمر مره واحده
مش بذمتك المنطقه هيقوم فيها انتفاضه

ياجرع ده انا كنت خلاص بانطق الشهاده خايف لا يحصللي حاجه

وبالنوسبه لمصنع التلج .. انتو كنتو بتجيبو حاجاتكم من الاول .. انما لو دخلت وعديت الكوبري هتلاقي نفسك دخلت في منطقة الاطفال والسيدات .. والمنطقه دي منطقة خطر يابني
ربنا مايكتبها عليكم ولا تغيرو نشاطكم من التلج للاطفال والحريمي

سلملي على ابو العزم وقوللو واحشني واحشني واحشني



سلاموووووووووز

Soooo يقول...

la Princesa ... WHiSPeR

ماتقلقيش ياستي
هنقول قبلها بفتره عشان الحوار هيكون كبير وهنبقى محتاجين مساعدة الكل

وربنا يقدر الكل انه يعمل حاجه لله وربنا يجازي الكل عليها خير ان شاء الله




سلامووووووووووز

Soooo يقول...

زُمُرده

ياسلام ياسلام
لا ياستي
هنا مافيش حجز
اللي عايز حاجه يقولها

ومنتظر تعليقك ياستي




سلاموووووووووووز

Soooo يقول...

انا ودماغي

حاضر يافندم هوصل سلامك للكل

ومافيش حاجه اسمها لسه جديده ولسه قديمه .. كلنا مع بعض اخوات وعايزين نعمل حاجه كويسه

وان شاء الله تبقي معانا في التجمعات الجايه وربنا يهيئ اللي فيه الخير يارب




سلامووووووووووز

Soooo يقول...

نهر الحب

بجد بجد بجد
مش عارف اقولك ايه ولا ايه

ربنا يارب يسعدك ويكرمك ويبسطك ويوفقك ويهيئلك خير الدنيا والآخره يارب

سلامي لاختك ومعلش باعتذر بشده اني ماقدرتش اقعد معاكم فتره طويله .. بس ان شاء الله ملحوقه




سلامووووووووووووز

Soooo يقول...

حنين القلب

بتعليقك ده بتأكديلي انك فعلا اخت واخت بجد مش أي كلام

ربنا يارب يارب يارب يسعدك ويبسطك ويكرمك ويرضيكي دنيا وآخره



سلاموووووووووز

Soooo يقول...

shaimaa samir

الحمدلله ان ربنا قدرك وقدر الكل اننا نعمل حاجه لله

وياستي لو عايزه تعترضي اتفضلي براحتك وقولي اللي انتي عايزه تقوليه
طالما انها وجهة نظرك وهتعبري عنها باسلوب محترم زي مانا عارفه عنك .. يبقى اهلا وسهلا

ملحوظه
انا من ساعة ما طلبتي مني مجموعة الافلام القصيره اللي طلبتيها وانا حاططها عالفلاش كي .. ولما شفتك في يوم المستشفى حسيتك بتتحاشيني او مش واخده بالك من وجودي .. فقلت بعد المستشفى ابقى اديكي الفلاشايه زي ماطلبتي .. لكن خيرها في غيرها ان شاء الله




سلامووووووووووووز

أحمد سعيد بسيوني يقول...

كل عام وانتم الى الله اقرب

يوسفيات..محمد يوسف يقول...

إبقى أعلن عن المفاجأة ف مكان واضح

عشان لو حلوة ابقى احاول آجي

سي يوز

shaimaa samir يقول...

اتحاشاك
لا ابدا والله
لم يكن هناك داعى للحديث فاتحدث
ورايت هذا عندك ايضا فلم تفعل

هذا كل الامر
باذن الرحمن ساخذها

جزاكم الله خيرا

بخصوص ما اعترض عليه
عندما قلت لك اعترض ولم اذكر الاعتراضات
لانى اعرف انها اعتراضات شخصية
اى انى مثلا لا احب ذكر البنات بذاك المشبه
وغيرها..
لكنه موجود ولا احبه
لذا قلت معترضه ولا داعى ان تشغل بالك

انه ضميرى يا سووو
وجه مبتسم

دمت بخير دوما
وربنا يقدرك على الخير

maha zein يقول...

بلا كاكا بلا باكا بلا كلام خواجات
بقولك ايه يا جرع انت
يعني انت عاوز ايه
خروجة ابو الريش وشبتك تبرطع فيهابراحتك
عاوز مني ايه
انتحر
اضرب انسولين في الوريد
اعملك ايه
فهمني
جاي تفضحني في مدونتي ومعرفش ايه
يعني العالم مخدتش بالها انه اسمه فنناس
ومش نناس
تروح انت جاي مبهدلني يعني
هه
مش تستر عليا
عموما فنناس نناس المهم انه اداه في الهايف وخلاص
عم الحج
يا خواجة
انت عامل ايه
وبخير
كان نفسي ابقه معاكم
بس يا جرع قلت مش هينفع بقه
هي شغلانة
كنت في البلد
اعمل ايه يعني
هه
هه
هه
بس جامدة وربنا بتاعه الاطفال بيقولوا عوزين مها زين مش عوزين انسولين دي
ههههههههههههه
غلب ايه ده

simple girl.. ..simple dream يقول...

ازيك يا سوووو
ليك وحشة يا راجل
بجد كان نفسى اجى معاكو مشوار ابو الريش دة
ان شاء الله المرة الجاية فعلا هاجى

كل سنة وانت طيب ياريس

Soooo يقول...

nona

الحمدلله فعلا اليوم عدى من غير اي مشاكل ولا حاجه ولواحد بجد فرح انه عمل حاجه وربنا يتقبل يارب

وبخصوص تأجيل الموضوع بتاع العيد او تقديمه عشان البنات تقدر تيجي
اسمحيلي احكيلك موقف صغير ولو انه ممكن يكون بيحرق جزء من المفاجأه

احنا الحمدلله عندنا أهل وناس وصحاب بنفرح معاهم بالعيد
انما في ناس مش بتلاقي حد يقولهم كل سنه وانتو طيبين حتى

هي دي بقى .. احنا عايزين نعمل الحاجه دي
وماتقلقيش ياستي .. الموضوع ده هايكون مش أول يوم العيد .. ممكن يكون تاني يوم او تالت يوم .. وبكده نبقى نقضي باق العيد مع أهلنا وناسنا وصحابنا

وربنا يسهل ونعرف نخطط للحوار بشكل كويس ويارب الكل يشارك




سلامووووووووووز

Soooo يقول...

nada

الحمدلله انك جيتي وشرفتينا وجبتي معاكي اختك كمان
ويارب تكونو فعلا انبسطتو من جواكم بجد

ولو اني زعلان انكم ما فطرتوش معانا لان اليوم كان هيحلو بزياده

وعلى أي حال .. ان شاء الله انتو معانا في أي حاجه تانيه .. ولو قدرتو تقولو لكل اللي تعرفوهم وتوصلولهم حالة الفرح اللي عيشتوها يبقى ربنا يجازيكم الف خير يارب

وكل سنه وانتي طيبه





سلاموووووووووووز

Ahmed Fahmy يقول...

هههههههههههههه
تعمل ايه بقي يا عم سووووو
انت توصل اصحاب الرداء الاحمر لبر الامان
و ترجع علي بيتكوا تاخد اللي فيه النصيب
يا حبذا لو كان كوريك مثلا او اي حاجة بتعور و تخوف كمان و تروح نفس الاماكن دي توريهم نفسك
و كدة بقي مالكش حجة و بقي راجل لراجل
الصعايدة اللي دمهم حامي فين ؟؟؟
ههههههههههههههه
و لو مش عايز تعمل كدة ممكن تاخد الكاكا البايظة تحدفهم بيها من بعيد و تجري
ههههههههههههه

تحياتي
رووووومانسي

سمر الشافعى يقول...

سوووو باشا وحشتنى مدونتك الجميله بجد انا انهارده قررت كدا ازوركو كلكو عشان وحشتونى جدا

والله انت عملت عين العقل اصلك ياعينى كنت هتروح فاللى قالو التعليقات دى ايه دا كويس اوىىىىىى انك مضحكتش انا لو مكانك كنت وقعت عالارض من الضحك

وبعدين هيا طلبت مع التلات مزز انهم يلبسو احمر فاليوم دا

بس انت مقولتلناش مصير الكاكا ايه اكلتها بمعلقه يعنى ولا بصباعك مثلا ولا عملتها عصير ولا رميتها فى مكانها الطبيعى هههههههه

كل سنه وانت طيب وربنا يخليك اوعى تنانى من دعائك فالايام الريمه دى عشان محتاجاه

3ala asm masr يقول...

كان نفسى ابقا معاكم ويارب مفاجاة العيد ده ظروفى تسمح واكون معاكم

Ahmed Fahmy يقول...

يا سووووووووووو انا خلصت الكليب
عايزك تنزله و تقول لي رأيك بقي

الفيديو هنا

http://www.zshare.net/video/191525457124b9d5/

و البوست عندي ع البلوج
سلام و لما تدخل هتلاقي تمن الاعلان
:D

Desert cat يقول...

ازيك يا احمد
كل سنة وانت طيب
لو فى حد غبى جه كتب عندك كومنتات باسمى ياريت تتاكد من البروفايل
علشان فى حد اوخد اسم المدونة وصورة البروفايل وبيلفلف يشتم فى الناس

Soooo يقول...

mostafa rayan

كل سنه وانت طيب يادرش وربنا يارب يجمع الكل على الخير يارب

وصدقني ولا اعرف الكاكا طعمها ايه .. اصل ساعتها رحت حاططها لأكل الخرفان اللي بنربيهم عالسطوح .. ممكن نسأل اابي باعتباراها متمرسه في تربية الخرفان وتقولنا قالولها طعمها ايه

وياسيدي ربنا يكرمك على كلامك وربنا يسعدك ويبسطك ويوفقك ويرضيك دنيا وآخره يارب




سلاموووووووووز

Soooo يقول...

ابن حـجـر الـعـسـقـلانـى

عسعوس .. هقول ايه بعد كل اللي قلته

والله باحبك قوي يابو العساعيس
وربنا يارب يسعدك ويكرمك ويحميك ويوفقك ويرضيك دنيا وآخره يارب




سلامووووووووووز

Soooo يقول...

Bannoura

الله يسعدك ياشيخه
وربنا يارب يحميكي ويهيئلك خير الدنيا والآخره يارب




سلاموووووووووووز

Soooo يقول...

appy تقليد

نزلتلك موضوع مخصوص

Soooo يقول...

Appy planet

معقول يا اابي اصدق انك ممكن تقولي حاجه زي دي

ده انا ابقى خروف بجد ساعتها

ربنا يحميكي وينصرك ويهيئلك خير الدنيا والاخره يابتنجاني




سلاموووووووووووز

Soooo يقول...

اختي شهوده العسوله

ربنا يارب يتقبل منكم ومنا صالح الاعمال

وبعدين مالها الكاكا ؟؟
هو كللو مستغرب منها ليه .. طب دي حتى فاكهه حلوة قوي .. كفايه اسمها




سلامووووووووووز

Soooo يقول...

قلب مصرى

ماتقفش في طريق سعادتنا ياعمي
حبنا اقوى من الايام
حبنا اقوى من التاريخ
حبنا اقوى من اتنين كيلو ظاظا


ملحوظه
اعتقد ان بياع الفاكهة لما يسمعك وانت بتطلب كيلو ظاظا منه .. هيطلبك الاسعاف عشان يلحقو يعالجوك




سلاموووووووووووز

Soooo يقول...

MaGn0liA...

مادمتي نويتي النيه وناويه على خير
يبقى اعتبري نفسك جيتي وخدتي ثواب الموضوع ده

وان شاء الله ربنا هيوفقك وتقدري تيجي




سلاموووووووووووز

Soooo يقول...

مواطن مصرى نايم

ههههههههههههههه

انا بجد ضحكت من قلبي على كلمة حمرا .. الكاكا

مش ده قصدك
ولا اهو كللو احمر وخلاص

وسعيد جدا بزيارتك واتمنى انك تعتبر مدونتي زي مدونتك وتيجي تنام عندي براحتك خالص




سلاموووووووووز

Soooo يقول...

FreeKiller

اولا
اهلا بيكي في مدونتي المتواضعه وباتمنى انك تعتبريها زي مدونتك وتنورني دايما ياستي

ثانيا
مافيش حاجه اسمها صغير وكبير في التدوين وفي الكتابه وفي الحياه عموما
احنا كلنا اخوات وكلنا بنساعد بعض
ولو حبيتي توجهيلي اي نقد انا طبعا تحت امرك ومش هقول كاني ولا ماني
المهم ان الكلام والاسلوب يكون باسلوب متحضر .. وانتي باين عليكي انك انسانه محترمه
وربنا يسعدك ويبسطك ويكرمك ويوفقك ويهيئلك خير الدنيا والآخره يارب




سلاموووووووووووز

Soooo يقول...

Eldebug

هههههههههههههههه
حليب هارتي
والله ليك شوقه يا ديبج

وبعدين انت مش واخد بالك
احنا كنا في حارة اليهود بنجيب كاكا
تقريبا في حارة المسلمين وحارة المسيحين معتبرينها حاجه استغفر الله العظيم

وانت عامل ايه وايه اخبارك
والله ليك وحشه




سلاموووووووووووز

Soooo يقول...

طالب ثانوى

انا ياسيدي باروح عندك وباقرالك ماتقلقش
بس المشكله ان وقتي مشحون بطريقه وحشه قوي الايام دي ومش باحب اقول اي تعليق وخلاص

وبعدين ياسيدي لو على انك تتبرع ولا انك لسه مش بتصرف على نفسك .. صدقني مش مهم تبرع بفلوس ولا بهدايا قد ماهو مهم انك تشارك الناس فرحتهم وتتكلم عن ده في مدونتك
هي دي الفايده الاكبر

وان شاء الله هتكون معانا في التجمع الجاي وربنا يوفقك ويوفق الكل




سلاموووووووووووز

Soooo يقول...

YHYيــوســف الـمصـرى

والله يابن منتقتي انا عملت تحديث عالمدونه
والصباغ عمل حدث عالفيس بوك
واكتر من خمس مدونيني تانيين عملو تحديث واتكلمو فيه

ومعلش حقك علي اني ماعرفتش ابلغك بنفسي .. بس بجد كانت فترة زنقه والله

وان شاء الله هتكون معانا في المره الجايه .. وهجبلك كاكا ياعم




سلاموووووووووووز

Soooo يقول...

سومه...مجنونه فى بلد عاقل

نعم ؟؟؟
انتظار ايه ولا مؤاخذه؟؟؟
انتي في الليله اصلا
تقومي تقولي انتظار ومفاجأه

وصدقيني الموقف كان اكبر منني ومن هنيدي ومن دنيا سمير غانم
كان موقف منيل بنيله والله
وختم بالكاكا كمان

بس الحمدلله اليوم كان حلو فعلا .. ونفسي اننا نكون اكبر من كده المره الجايه .. وان شاء الله فعلا هنكون اكتر




سلاموووووووووز

Soooo يقول...

أحمد سعيد بسيوني

وكل سنه وانت طيب وربنا يتقبل منكم ومنا صالح الاعمال




سلامووووووووووووز

Soooo يقول...

يوسفيات..محمد يوسف

لا تقلق يابو حجاج
هنعمل شغل اعلانات جامده بعون الله

وان شاء الله كل الناس هيتم تبليغهم قبلها بفتره





سلامووووووووووز

Soooo يقول...

shaimaa samir

لم يكن هناك داعي للحديث فاتحدث؟؟
ورأيتي هذا عندي ايضا فلم أفعل؟؟

يعني انا شايفك مع ناس تعرفيهم ولسه جاي اسلم عليكي قمتي مشيتي من قدامي وشكلي كان وحش .. وحتى اسألي سومه اللي شافت الموقف وانا قلبت الموضوع ساعتها بهزار وقلت لا اصل انا كنت عايز اديها الفلاش كي وعليه مجموعة افلام قصيره كانت عايزاها .. ولما سومه عرفت ان في افلام قصيره هي كمان قالتلي طب انا عايزاها قلتلها لما تاخدهم شيماء هابقى اديهملك بعدها .. وبعدها جيت اسلم عليكي لقيتك مشيتي

وغير كده اصلا .. هو لو انتي جيتي وقولتيلي ياراجل ياعجوز فين الفلاشايه اللي قلتلي عليها ,, ده مش داعي للحديث؟؟؟
---
وبخصوص اني قلت لفظ دايقك .. فأنا كاتب الموضوع باسلوب ساخر
وبين السطور بارمي تلميحات على اللي كان بيتقال من اللفظ ده او غيره في المكان اللي كنا فيه ونوعية الناس اللي بتقول الكلام ده .. يعني لا ده اسلوبي في التحاور ولا انا باحب اللفظ نفسه .. بس جبت الموقف بشكل ساخر عشان اوّصل الموقف للناس وتعرف ان في ناس بتفكر وبتتكلم بالعقليه دي .. مع العلم ان الناس دي اللي كانو بيعاكسو قالو ماهو ابشع من كده لكن طبعا ماينفعش يتقال هنا

لكن تقريبا قصدي ما اتفهمش كويس



ولو حضرتك حبيتي اجبلك الفلاش كي بعد كده انا تحت أمرك وتحت أمر اللي يطلب منني اي حاجه في مقدرتي
وربنا يعمل اللي فيه الخير




سلامووووووووووز

Soooo يقول...

maha zein

انا زعلان منك قوي قوي




سلامووووووووز

Soooo يقول...

simple girl.. ..simple dream

يااااااااااه
ازيك يا شاهي
والله ليكي وحشه يادكتورة

هو اللي بيتجوزو بيختفو كده برضه
ده انا لما شفت صورة احمد من ضمن الناس اللي هاتيجي يوم المستشفى قلت كويس انكم جايين .. ولما رحت اتضايقت انكم ماجيتوش والله

عموما خيرها في غيرها وتبقو تشرفونا في التجمع الجاي ان شاء الله




سلاموووووووووووز

Soooo يقول...

A7MeD F@hMy

كوريك مين وارجع فين؟؟؟
كوريك من بيتنا في المعادي وارجع للناس في حارة اليهود؟؟؟
واتخانق مع مين ولا مين؟؟؟

اقولك .. انت تيجي معايا ونتخانق سوا
ونوريهم العين الحمرا

وبخصوص الكليب اللي عملته مؤخرا .. انا اتفرجت عليه وهاجي عندك عالمدونه اتكلم على شوية حاجات معينه .. بس اديني اجازة كام يوم اظبط شوية شغل عندي

وربنا يوفقك يابو الرومانسيات كلها





سلامووووووووووووز

Soooo يقول...

سمر الشافعى

طب والله ليكي وحشه

وبخصوص تعليقات الناس اللي هناك .. انا كنت ماسك نفسي بالعافيه والله
اصل انا لو كنت ضحكت كانت هتبقى سكه يدخلو ويعاكسو اكتر وممكن يتطور الموضوع لماهو أكثر من المعاكسه .. وكنتو ساعتها هاتيجي تسلمو عليه في القصر العيني

وبخصوص الكاكا .. احب اطمنك انها راحت للخروف اللي مربينه عالسطوح .. بس ما اعتقدش انه كلها بالمعلقه ولا الشاليمو .. هو ممكن يكون عملهم شندوشت وكلهم مع كوباية شاي بالنعناع

وحاضر ياستي .. هدعيلك اهو
ربنا يارب يسعدك ويكرمك ويوفقك للي فيه رضا ربنا عنك في الدنيا والآخره




سلاموووووووووووز

Soooo يقول...

3ala asm masr

ان شاء الله هتكوني معانا المره الجايه
وكل الناس تساهم في الموضوع بشكل كبير ان شاء الله

وربنا يوفق الكل




سلاموووووووووووووز

Soooo يقول...

Desert cat

ياخبر يا قطه
انا عارف طبعا انك مش ممكن تعملي حاجه زي اللي قلتي عليها

وان شاء الله يومين تلاته والحوار ده هيتنسي واللي بيعمل كده يزهق ويعرف انه بيهبل

وكل سنه وانتي طيبه وربنا يهيئلك الخير من عنده يارب





سلاموووووووووووووز

غير معرف يقول...

بتهزررررررررررررررررر
انا اقسمت فى التعليق الماضى اننى لم اكن اتحاشاك
ليس من اخلاقى والله
يا نهاااااااااارى
كم ضايقتنى الان جدا جدا جدا
طب لازم اعتذرلك لانى ولا اخدت بالى بالموقف والله العظيم

اما بخصوص الفلاشة
انا كنت ناسية خالص
اولا لاننا وقفنا تى المستشفى ما يقرب من الساعة تقريبا وكانت رجلى بتالمنى جدا
ثانيا كنت فى دار قبل المستشفى
فذهنيا فاصلة
وجسديا عايزة سرير

اخيرا اشكر اهتمامك يا فندم
وثق انى عمرى ما بعمل حاجة قليلة ذوق
اعتقد ان عندك يقين من ده ولو بنسبة

بخصوص الكلمات
انبسطت لما قلت ان ده مش اسلوبك فى الحقيقة
احم
اصل الموضوع ده كان مضايقنى جدا
طيب خليبك زى ما انت وبلاش تجسد الواقع فى كل حاجة
ههههههههههههههههههه

رمضان كريم

سلوى يقول...

كل سنه وانت طيب وبخير وسلام

كل ده حصل

:)

ربنا يقدركم دايما على فعل الخير

Soooo يقول...

شيماء سمير

حصل خير يا شيماء
وربنا يكون في عونك ويقدرك على فعل الخير

وانا تحت امرك لو احتجتي الفلاش كي في اي وقت


ملحوظه
في بعض الاراء الفلسفيه .. بتقول ان الفن هو مراية للواقع لتخليد الفتره الزمنيه دي في التاريخ





سلاموووووووووووووز

Soooo يقول...

سلوى

مش ممكن
انا مش مصدق نفسي والله

يامراحب يامراحب

وياستي ربنا يقدركم على فعل الخير في كل مكان
وفي ذلك فليتنافس المتنافسون




سلاموووووووووووز

FreeKiller يقول...

السلام عليكم و رحمه الله و بركاته
متشكرة لحضرتك جدا عالكلام الجميل
و متشكرين اكتر و اكتر عالدعوات الحلوة دي
ربنا يعلم
الواحد ماشي بالدعوات و الله

كل سنة و حضرتك طيب و عيد سعيد عليك ان شاء الله