الأحد، 21 رمضان، 1429 هـ

إتناشر متر .. بس

زمان أيام الكليه كنت باقعد مع واحد صاحبي اسمه حسن في شقة فاضيه بتاعته في الجيزه .. نعمل فيها المشاريع بتاعة الكليه .. واللي يعرف يعني ايه مشاريع كلية فنون تطبيقيه .. يبقى عارف ان كلمة النوم دي محذوفه من القاموس بتاعنا في فترة التسليمات

.. اربع تيام انا وهو عمّالين نرسم ونلوّن ونعمل ماكيت المشروع وحاجه خيال علمي
.. اربع تيام متواصلين مادقناش طعم النوم وهاريين نفسنا نيسكافيه وسجاير سوبر
.. اربع تيام شغالين زي البهايم لحاد ماخلاص فيّصنا تماما
.. ومرّه واحده رحت قايل لحسن
سوووو : بقولك ايه .. انا مش قادر
حسن : ولا انا
سوووو : قوم بينا نروح القهوة نشربلنا حاجه ونغير جو
حسن : طب نتصل بزلطه ييجي معانا
سوووو : زلطه .. زلطه مين؟؟؟

اتضح ان في شخص مع حسن في المجموعه اسمه زلطه .. احمد زلطه .. شفته في حياتي كلها في الكليه مره واحده بس .. وكانت مناخيره مكسورة ساعتها .. ولما باسأل هو مناخيره مكسورة ليه .. قالولي اصلو عنده كلبين رود فايلر .. وكان بيفسحهم في يوم .. كان ماسك روتي اللي هي الكلبه من ايد .. وتايجر اللي هو الدكر من الايد التانيه .. الكلاب شافت قطة بتلعب في الشارع قامو جريو وراها .. وكل كلب بيجري في اتجاه .. وزلطه ياعين امه مسحوب ومسحول وراهم .. وفجأه .. راح خابط تننننن .. في عمود نور في النص

رحنا عالقهوة وجه زلطه وجايب روتي معاه .. وبالرغم من انها كلبه شرسه وحالتها مرار
!!! لكن هو مش بيحب يحطلها كمامه على بؤها .. وبيقول
بتضايقها

طبعا كل اللي عالقهوة مخنوقين من الواد زلطه والكلبه بتاعته .. ماهو طبيعي نتخنق من حاجه مكتّفانا ومش عارفين ولا نضحك ولا صوتنا يعلى .. عشان كل ماصوتنا يعلى شويه تروح روتي واقفه وتحس انها هتفترس اللي صوته عِلي أو ضحك

خدنا قعدتنا انا وحسن وقايمين راجعين عالشقه نكمل شغلنا .. وقام عشان يحاسبلنا .. وانا طبيعي يعني قمت وباهزر وبقوللو
ايه ياعم هو انت قاعد مع سوسن عشان تحاسبلي؟؟؟
اتضح ان صوتي كان عالي عن الحد المسموح بيه .. واني ما خدتش الاذن بكده من روتي هانم .. واللي أكدلي احساسي ده .. اني لقيت حسن اللي كان واقف قدامي وشه اتخض واصفرّ .. بصيت ورايا لقيت روتي هانم بتنقضّ على أظئوظتي .. بصيت على حسن لقيته في العربيه خلاص .. وانا كمان لازم اجري عالعربيه .. وبيني وبين العربيه اتناشر متر بس
.. من غير ما احس لقيتني خفيف خفافه ورشيق غزاله
.. باجري ورجلي لا تكاد تلمس الأرض
.. تحولت لشخصية كارتونيه ورجلي بقت بتلف زي العجَل
.. لازم اوصل للعربيه والا روتي هتغتصبني
.. أطول اتناشر متر جريتهم في حياتي
.. مسافه حسيت انها مش هتخلص
.. حياتي كلها بتمر في شريط سينما قدام عيني
.. روتي بتجري وبتهوهو وصوتها كل شوية بيعلى مما يؤكد انها بتقرب اكتر
.. زلطه وقع ووشو بقى مكفي عالارض والكلبه ساحلاه زي المليجي في الأرض لو عطشانه
.. وصلت للعربيه وبافتح الباب لقيت حسن من خضته راح قافل اللوك
.. باخبط عالقزاز وانا مرعوب وحسن مرتبك ومش عارف يعمل ايه
.. روتي خلاص بقى بيني وبينها نص متر ويمكن اقل
حسن فتح اللوك .. فتحت باب العربيه .. دخلت ولسه هقفل الباب .. لقيت روتي هي اللي قفلته من كتر ماهي قريبه مني ومندفعه قوي
.. لحظة صمت .. مابين البشر
.. وصوت الكلبه بس هو المسموع

انفجار في الضحك من الكل .. ماعدا الكلبه .. اللي سكتت
----
مش عارف ليه لقيتني بافتكر الموقف ده لما لقيت اللي بيحصل في عالم التدوين دلوقتي من سرقة اسماء لبعض الشخصيات زي
نوارة نجم .. ومؤخرا زي قطة الصحرا

.. كلاب بتهوهو بأساميهم والناس ساكته
.. بس ده مش خوف
.. ده عدم تصديق ان السفالة توصل للدرجه دي

.. كل اللي اقدر اقولو لكل الناس اللي حصلهم الموقف ده
.. استحملو الاتناشر متر
.. وبعدها صوت الكلب هيقف
وهنضحك كلنا

ملحوظه في الهادي .. ومن غير هَوهَوه

الملحوظه دي موجهة لـ
مها زين .. العباره في الكتابه مش بالاسلوب .. عاميه او فصحى مش مشكله .. المهم انه يكون بيوصل للناس وبيقول حاجه .. ومش عيب انك تقولي في مواضيعك كلام زي يابرنز أو ياجرعان .. أو حتى لو قلتي .. اديني في الهايف وانا احبك يافنناس

قبل ما امشي .. انا باقول اهو .. لو حد لقاني رحت عنده على مدونته وشتمته ولا حاجه .. يبقى عارف انه مش أنا .. واني انا كمان طلعلي كلب .. وبيهوهو بإسمي

سوووو

هناك 70 تعليقًا:

Zianour يقول...

اول مرور ليا

بجد ضحكت من قلبي

خصوصا انني اعاني من فوبيا الكلاب وابني ورث هذه الفوبيا

والحياة الم لاننا نعيش بكندا والكلاب لغز محير ف حياة البشر هنا

تحياتي
ومسير الكلاب هتسكت
:)

قوس قزح يقول...

هههههههههههههههه
الجرى نص الجدعنة

انا مرة و انا صغيرة كنت هغرق و انا ماليش فى العوم لاقيت نفسى عومت حوالى 10 متر لحد ما مسكت فى المركب ازاى معرفش

هى دى الطاقة المخزونة جوه الواحد لوقت اللزوم

اما عن اللهو الخفى فده عادى و موجود فى كل حتة
و بيكون فرصة لك تنضف الليسة بتاعتك من الناس اللى مش تستاهل تعرفك

اما عن مها فعندك حق انا بحب لها العامية اكتر


و حمد على سلامتك و سلامة .... من العض ههههههه


سلامووووووز

Appyplanet يقول...

ههههههههههه
انت تعرف ان الكلاب ساعات بتخاف على صاحبها اكتر من نفسه وبتبقى مدربه لكده
بس اللى بيحصل ده يا سوو مش كلاب لا لان الكلاب اوفياء لاصحابهم والمصيبه لو ده جاي من صديق ربنا يهدي انا اتحملت واتعلمت كمان

بس انا متخيله شكلك كان لازم زلطه ده اديك اتكعبلت فيه ههههههههههههه
وبعدين مش قولنا نتعلم من اللى بيحصل لنا
اما مها انا كمان بحب اسلوبها علشان طالع بتلقائيه والاقويي انها فى الحقيقه حلو ودمها خفيف

kochia يقول...

والله الحكاية معبرة اوي
فعلا

شوية عواء وخلاص لان مش ممكن الغلط وسط الصح يستمر

تحياتي

سمر الشافعى يقول...

ههههههههه الله يجازيك خير ياسو موتنى من الضحك على منظرك وفكرتنى بموقف حصلى انا وزمايلى زيه بالظبط بس كنا لسه فى ثانوى وخارجين ياعين اربع بنات رايحين الدرس ومنسجمين اوى فالشارع ومنشكحين اوى واذ فجأتن لا قينا واحد ماشى ومعاه 3 كلاب ومقابلنا والكلاب فجاه سابت من ايده وطلعت تجرى ناحيتنا هههههههههه يالهوى على منظرنا العيال التلاته طلعو يجرو وانا الدم اتجمد فى عروقى وغمضت عينى واتسمرت مكانى لما فوقت قعدت ادور على صحابى والاقيهوملك فييييين فالدور التانى من البيت اللى فالشارع اللى ورانا هههههههههه لقو الباب مفتوح دخلو وطلعو دورين كمان الله يحرقهم كان ناقص يدخلو يقيلو شويه جنب صحاب البيت

كانت اياااااام فكرتنى باللذى مضى

سمر الشافعى يقول...

بس اموت واعرف بتجيب الكلام دا منين مره تقولنا بوو ومره احبك يافنناس وجرعان عاوزين الترجمه لو سمحت

nona يقول...

هههههههههههههههههههه
بجد موقف لا تحسد علية كلب و بيجرى وراك انا لو منك ما اعرفش زلطة دة تانى و لو قابلنى فى الشارع ادورلى على شارع تانى هو العمر ببلاش
و الناس الاى بتاخد اسماء غيرها و تدخل تشتم دية مالهاش وصف لان الكلاب عندها وفاء و ما بتهجمش غير الاى بتحس منة بخطر اما دول باة زاى ما تقول مالهمش لازمة

2ensan wnsan يقول...

سوووووووو باشا

اربع تيام من غير نوم عشان في الاخر تلاقي كلب رود فيلر .. لا حول ولا قوة الا بالله .. بس علمتوا ايه في استاذ زلطه دا ..

Jack Sparrow يقول...

انت فكرتني ساعة ما تعلمت سواقة الدراجات
كان بسبب كلب بردو ..
بس للأسف الكلاب المرة دي مش هتعلمني غير ان فيه ناس الحقد مالي قلوبها و الغيرة سيطرت عليها لدرجة انتحال اسماء شخصيات تانية و التشهير بيها

معالجة ممتازة للموضوع يا سوووو
و ده مش غريب و لا جديد عليك

تحياتي

maha zein يقول...

يا ابن الايه يا سو
بقه تعملي مقطع عشاني انا
طب اقولك ايه
اجي ازورك يعني بكيلو كاكا طيب
هه
اعمل فيك ايه
اولا انا كنت جاية اتخانق اصلا معاك واقولك بقه جاي عندي مدونتي وناوي علي شر
انت يعني مبتخفش
ملكش كبير يعني
ببص لقيتك اصلا يا عيني عمال بتجري في الاتناشر متر من روتي ولا توتي دي
قلت ارحمك
يا سووو
لو لود قال جرع ولا قال ائزئوظتي دي
عادي
لكن لو بنت بتقول كده صعبة شوية
عموما
انا هكتب بردو عامي
ذي ما انا
بس بلاش من جرع وبرنز والحجات دي
اتفقنا
بلاش بقه مجتش عليهم
يبقه اتفقنا
بقه تجري من الكلب
يا شيخ استر علي روحك
بس بيني وبينك
وربنا لو منك لا كنت قفزت فوق العربية في قفزة واحدة
قفزة يا ابني مش اتناشر جرية
كلام فارغ
مرسي يا سوووو
مش بقولك طيب
ولا شرير لا تصدق روحك

ابن حـجـر الـعـسـقـلانـى يقول...

يابنى أنا صوتى جاب آخر الشقة من الضحك و احنا الساعة اتنين بالليل

أما كلاب ولاد كلب صحيح

طبعا "كلب" هنا بمعناه الحقيقى و المجازى

مسيرهم يهمدوا العالم دول .. و كلها اتناشر متر ... عدى منهم كذا متر ... و هانت

maiosha يقول...

مش ممكن يا سو المواقف الغريبة اللى بتحصلك ده

بس سيبك من كل ده كله كوم والأخ زلطة ده كوم تانى .. يعنى ميخرجش مع كلابه دول غير لما يحصله مصيبة .. وبرضة لسه متمسك بيهم
ههههههههههههههه
يستاهل كل اللى بيجراله ده

بس عالله بقى نضحك احنا فى الأخر .. والأخر ده يجى على طول .. مش بعد اتناشر متر طوااااال

mostafa rayan يقول...

عارف يا سو معنى كدة ايه نجاح للمدونين دول رغم انك ممكن تختلف معاهم في بعض مايكتبون
وفي نفس الوقت غباء وخواء اللي بيقلدوهم مش بس كدة دة ممكن يكون معقدين نفسيا بسببهم واشخاص ليس لديهم القدرة على المواجهة مع الأخر
سو موضوعك ضحكني لكنه خلاني افكر في اللي بيحصل لينا ليها لناس مش بتختلف مع الأخر باحترام ليه لما اختلف معاك مجايش اقولك انت عملت كذاوكذا وانا شايف ان الصح كذا علشان كذا
ليه لما اختلف معاك اشتمك وليه لما حد ينجح انفسن عليه وادور ازاي اهدمه بدل ماادور جوايا على اللي بيميزني واحاول انجح بيه وممكن لوعملت كدةواشتلغت على نفسي كويس اكون احسن منه بكيتر
تفتكر شعب بيفكر كدة ممكن ينجح او يوصل لسشي العيب هنا مش عيب حكومة يا صاحبي دة عيب شعب ونفوس تعبانة
وللاسف دةبتلاقيه في اعلىالمستويات كمان وع ناس مش ممكن تفكر انهمن بيفكرو كدة زي هجوم الكتاب الكبار على الشباب الصغير اللي بدأ في المدونات بدل ماتحتويه وتحاول تكبره لاء تشتمه وتهدمه
وترجع انت نفسك تتكلم عن الحوار واحتواء الأخر ودور الكبار نحو الصغار وكل الكلام اللي علىالورق دة
ربنا يحمينا منهم ويوفقنا للصواب
اسف لوطولت عليك وماتزعلش يا صاحبي من اي حد واي شيئ وكمان ربنا يوفقك لقيام وصيام ودعاء ليلة القدر
بس ابقي ادعيلي معاك سلام يا صاحبي
اخوك مصطفي

Z_Diva يقول...

ya 3am de faydet in elinsan ykoun modawen ma3;mour :D

m3lysh yabny drebt elshohra, we as7ab el32oul fe ra7a :)

bas routy de fakrtny bfilm "america's sweet hearts" m3rafsh shofto walla no, kan fe elmonteg kant elklba bt3t elmomsela 7ga keda dasnanory, we kant brdo thgem 3lih we hya t2oulo 7ram sebha de lesa poppy s3'yara :D

MaGn0liA... يقول...

ههههههههههههههههههههههههه

بجد بجد مسخره

بوست حلو اوى و عميق اوى

و انا طول عمرى لما بيطلعلى كلب

بنفضله و مش بيهمنى حاجه

ياما حصلت فى الكليه عادى

و ولا يهمهم بجد من الناس دى

تحياتى على البوست

سلامات

Sourah يقول...

ازيك يا سووووو

موتني من الضحك ، اصل انا بخاف موت من الكلاب ، و حصللي مرة موقف قريب من موقفك كده ، بس مع وجود بعض الاختلافات ، زي مثلا كنت رايحة اجيب فول عشان العشا ، و الكلب اللي جري وايا كان كلب بلدي من اللي عندهم جرب ، و ماكانش حد ماسكه ، بس الاختلاف الاكيد في الموضوع ده
اني طلعت اجري و فجأة وقفت ، ليه و فين و مين ، مش عارفه، بس النتيجة ان الكلب وقف هو كمان :)

اما بالنسبة للجماعة اللي بيستغلوا الاسامي ، انا من رأيي ، هيه صحيح ماحبكتش ، و كان لازم يشوفوا اسماء تانية ، بس بصراحة مش شايفة وجة شبه بينهم و بين "روتي" ، ومتهيألي مهما لو كانوا سيئين ، هيبقى برضه موضوع الشبة ده صعب شوية ..

عموما دي وجهات نظر ، و احنا عارفين حبيبنا آبي و غيرها عالم محترمة ، و اسلوبهم معروف ، و هو ده اللي بيخللينا نتابعهم ..


و اخر الكلام سلااااام

قلب مصرى يقول...

أنا مش هاتكلم عن موضوع الكلب لأنى بخاف جداً من الكلاب (ودى خليها فى سرك)أنا هاتكلم عن الجزء الأخير من البوست
تسلم دماغك فى اللى كتبته، انا عن نفسى سكت لأن الكلب ماجاش هوهو عندى وبالتالى فانا ماليش حق الكلام لكن قلت فى دماغى إن لو ده حصل أنا مش هامسح التعليق بس هارد عليه رد تقيل شوية واسيبه كده عبرة لمن يعتبر.


فين يا عم المحطة الخمشة وعشييين من مذكرات طفل تخين؟؟؟

وومن يقول...

هههههههههههههههههههه

خلاص بقيت هاطلة رسمي في الشغل من كتر الضحك ودا بقي العادي بتاعي

الغريبة يا سوووو انك بتحط في مواقف مينفعش تحصل غير معاك

بخصوص المعني من ورا القصة والحكمة المستخلصة

خلاص هانت فات الكتير ومتهيئلي اللي حصل له فوايد اكتر من مساوءة علي الأقل كل واحد عرف مقامة صحيح

حمد الله علي السلامة

Doba يقول...

البوست جامد جدا
فرجت عليا المكتب ومتخيلة شكلك وانت بتجرى الاتناشر متر

الحمد لله

بيقولك القافلة تسير والكلاب تعوى
يعنى المدونين المميزين هيفضلو مميزين واللى عنده حبة هوهوه براحته

وبس خلاص
تحياتى
هبة

زُمُرده يقول...

تعرف اني لما قريت الخبر في الفيس بوك
مصدقتش في الاول
متخيلتش ان في ناس كمان هنا ممكن تعمل كده

الص هيستفيدوا منها ايه؟؟؟؟؟؟
مش اكتر من تشويه لصوره الاشخاص الاصليه
واللي اكيد بما انهم بقالهم فتره فناس كتيييير مش هتصدق ان الكلام ده منهم
وهتسعى
وتتأكد غالبا

إن جاءكم فاسق بنبأ فتبينوا

يعني اكيد لو لقيت تعليق من سوووو فيه شتيمه ولا كلام مش طبيعي
اكيد هحسه اولا
وهعقله ثانيا

اللي بيعمل كده تعبان نفسيا
ربنا يهديهم
وعلى رأيك 12 متر هوهوه وبعدها مش هيطلع ليهم صووت تاني

حلو انك ربطت بين الموضوعين
اللي عايز يضحك يضحك
واللي يفهم يفهم

سلام

Bannoura يقول...

فنــــان...من يوم ما اتكعبلت في مدونتك وأدمنت قرائتها

وأنا بقول عليك فنــان
: ))))

فعلا إنت عبقري في الكتابة والله العظيم

كل من مناااا في "كلــب" في حياته

بشكل أو بآخر...هو موجود

: ))))

تحياتي يا عبقري
و ميرسي جدا لتلبيتك الدعوة

شيماء سمير يقول...

سووووووووووووووو
دى احلى تدوينة شفتها
احم
بما انى مش بتابع المذكرات
يمكن عشان يتحوى حاجة عن الكلية ولا حاجة
بس تصدق يا سو
انى عمرى ما طبقت
وعمرى ما افضل الشغل عن النون
انا ممكن انام 10 ساعات واكتر
وااقوم اخلص الشغل فى ساعة
ربنا يستر بقا
والوضع فى بكالريوس ميكونشى غير كدة لانى مش بعرف اعمل اى حاجة فى الدنيا لو مش نايمة
حتى لو هتاوب
هههههههههههه

رمضان كريم
رديت لك على اللى فات

خالد المصري يقول...

حسن وشقه الجيزة وزلطه وكمان روتي

انت يتخاف منك يا اد انت

شكلك كده هتفضح شله الجامعه كلها وربنا يستر يا معلمي

الكلاب
غريب قوي موضوع الكلاب ده
شويه نقول وفي زي الكلاب
وشويه نقول الكلاب تعوي والقافله تسير

وشويه نقول خوف الكلب على صاحبه والصداقه
وشويه نقول

لا تاسفن على غدر الزمان لا طالما
رقصت على جثث الاسود كلاب
لا تحسبن بغدرها تلعوا على اسيادها
فالاسد اسد والكلاب كلاب
تبقى الاسود مخيفه في اسرها
حتى ولو نبحت عليها كلاب


كل سنه وانت طيب يا معلمي

Desert cat يقول...

ازيك يا سووو وايه اخباراتك
من الواضح ان الغبى اللى عامل اكونت زى بتاعى قرى البوست ده اصله جاى يقولى انا مستعد اقول اسمى الحقيقى واسم مدونتى والمعركة هتتنقل لارض الواقع
شكله ناوى يقلد روتى ويجى يهوهو ويجرى ورايا 12 متر

تحياتى يا باشا

مهندس مصري يقول...

ههههههههههههه
ضحكت قوي و انا متخيلك و انت بتجري
بص يا سوو انا بأقول الدعاء
بسم الله الذي لا يضر مع اسمه شئ في الأرض و لا في السماء و هو السميع العليم
3 مرات لأن ساعتها لا شئ يضرك كما قال رسول الله صلى الله عليه و سلم
و ساعتها الكلاب بتعدي من جنبي عادي و لا بأعبرهم و لا بيعبروني
لأن من و انا صغير مش بأحبهم

و معاك حق بالنسبة للناس التانية شوية و حيتعبوا

انا ودماغي يقول...

ههههههههههههههههههههههه
على فكرة أنا فطست على نفسى من الضحك



بص طبعا اللى حصل ده مهزلة بكل المقاييس و البنى آدم اللى عمل كدة ده أقل ما يقال عليه أنه هايف و سطحى و فااااااااضى


و أكيد اللى عارف حد و دخل مدونته و لاقاه بيشتمه حيحس إن فى حاجة غلط خصوصا بعد المهزلة اللى حصلت دى

نهر الحب يقول...

بص الاول
ازاى جالك قلب وقعدت مع الكلبة روتى دى انا لو شفت كلب فى الشارع من باب الاحترام طبعا بعدى من الشارع التانى :)
وسى زلطة داا اخرتة دخل المشرحةولا لسة عامل فيها مرود اسود ؟
هههههههه قصة فى اولها فكاهى جداا
وفى اخرها مرارة ما يحدث الان
بس انت عارف اللى بيعمل كدة اكيد مش كلب اكيد حيوان عايز يشوهة صورة ناس حاسس انهم افضل منهم

عارف انا بقى فى حد نازل فى شتيمة وسب
وبيمضى غير معروف عند المدونين كل ما اعلق الباشا يجى يشتم
الظاهر على حصلتكم واشتهرت ؟!!
يالله منهم لله

بليزز يا سووو
ابقى اسألى على زلطة دا عايش
ولا مدغدغ ههههههه

Sourah يقول...

اخي الفاضل سووو

عندي ليك كام سؤال كده في بوستي الاخراني ، يا ريت تتفضل و تنور مدونتي و تجاوب على الاسئلة..

3ala asm masr يقول...

كمان الاسامى بقت بتتسرق
حلو والله زى الفل
سيبك من كل ده روتى ده اسم حلو اوى

A7MeD F@hMy يقول...

ههههههههههههههههههههههههه
12 متر يا راجل


هيهوهوا شوية بعدين هيسكتوا
بس و الله انا مستغرب الحملة التشويهية دي
و هيستفيدوا ايه ف الاخر يعني
--------------------
ادفع نص عمري بقي و اشوفك وانت بتجري
ههههههههههههههه

كله بيعدي يا باشا
بالنسبة للكليب طبعا خد وقتك انا مش مستعجل
:)

رووووومانسي

Ahmed Al-Sabbagh يقول...

تننننننننننننننننن

والله دى موتتنى من الضحك لانى تخيلت المنظر

بجد انت مالكش حل فى الكتابة الساخرة

تنننننننننننننننننننننن

أسيرة الأقدار يقول...

بجد بوست تحفةةة ودمه خفيف موووووت انا ضحكت كتير بالزات بئا على حسن لما قفل اللوك وسابك بتخبط على ازاز العربية هههههههههههه موقف يفطس من الضحك بس كويس انه لحقك قبل ما كانت افترستك .. انت ازاى تعلى صوتك على زلطة ادامها لا لا انت اللى غلطان من الاول وكمان بتجيب سيرة سوسن وهى مش قاعدة معاكم شكل سوسن دى موصياها عليك ..
بس انا موافقاك على ان موضة انتحال شخصيات المدونين دى هوجة وهاتعدى وشوية وهما هايسكتوا من نفسهم لانهم حاجة من اتنين : يا اما هايحسوا على دمهم وده شىء مستبعد لان الى يعمل كده اصلا معندوش دم .. يا اما هايزهقوا لان محدش معبرهم والهبل اللى بيعملوه ملوش تأثير .. ويارب ميطلعليش كلب انا كمان لحسن انا مش بحبهم ههههههههههههه

maxbeta3zaman يقول...

أخونا سووو
حكايه مثيره ..طبعا انت عارف ان الكلاب لها حاسة شم قويه جدا لدرجة انها تعرف تميز الشخص الخائف من رائحة عرقه وافراز الغدد المنفعله بذلك الخوف (الطبيعى) فمن يأمن كلبا سائبا أنيابه كالموسى وجسمه كالجاموسا ...وانت ذكرتنى بما قابلته من أخطار مشابهة فى الخضه ولكنها قاتله لولم ينجنى الله منها ...اسعدتنى زيارة بلوجك ووعد بعود لتصفح مافاتنى...
ودكاننا جديد ..وبابه ليس من حديد زجاجى بابه ..والبويه لم تجف بعد

Coca يقول...

هههههههههههههههههه
انت عسل عسل عثل
عامل ايه يا جميل يارب تكون بخير وكل سنه وانت طيب في اخر رمضان
كنت بحب الكلاب لحد ما كلبه بنت رفدي
طلعت ايدي من بوقها بالعافيه
ملحقتش اجري ال 12 متر
من ساعتها كرهتهم وقررت المسافه بيني وبينهم تبقي 12 كيلو متر
تحياتي يا جميل

Soooo يقول...

Zianour

سعيد جدا بزيارة حضرتك وباتمنى انك تعتبري مدونتي زي مدونتك وتشرفيني بتعليقاتك دايما

وصدقيني كلنا عندنا فوبيا الكلاب .. لدرجة اني سمعت عن مشروع وهيخترعو جهاز يشفط الفوبيا ويصدروها لبلاد بره

وربنا يسهل ويصدرو شوية للشعب الكندي الشقيق .. ويخافو يربو كلاب



سلامووووووووووز

Soooo يقول...

قوس قزح

والله يا دوللي ياختي في الحاله اللي كنت فيها .. الجري هو الجدعنة كلها

ولو عالمخزون .. لا تقلقي .. انا عندي مواهب كتير وجاري اكتشافها

وفي بيت شعر بيحضرني بالنسبه للي بيحصل للناس اللي بيتشوه صورتهم
لا تستكثرن من الصحاب
فعدوك من صديقك مستطاب

وياريت تكون مها قرت كلامك وترتجع عن الافعال الشيطانيه اللي عايزه تعملها




سلاموووووووووووز

Soooo يقول...

Appyplanet

يابتنجاني يابنتي .. الحكايه مش وفاء الكلاب .. الحكايه صوتها العالي اللي ساعات بيسكت الناس

وبعدين هو انا اللي اتكعبلت ولا اتنيلت .. ماهو حسن صاحبي هو اللي جابه

وياريت مها تشوف تعليقك وتعليق دوللي وتعيد حساباتها




سلامووووووووووز

Soooo يقول...

kochia

اه والله بجد
شوية شواء .. والاكل هيتفرق عالمعازيم

وانتي ايه الاخبار
فينك ياشيخه مش باينه ليه
طب كويس كويس




سلاموووووووووز

Soooo يقول...

سمر الشافعى

يالهوي
تلات كلاب مره واحده
ده انا لو من صحابك كنت فضلت اطلع اطلع اطلع لغاية ما تجيبوني من على حدود كوكب المريخ

وطبعا اكيد لما انتي اتسمرتي في مكانك الكلاب هجمت عليكي وكلتك واللي بيعلق عندي دلوقتي هي روحك .. مش كده برضك؟؟؟

وبخصوص مصطلحاتي .. ان شاء الله هاعمل قاموس سوووو للجيب .. وهيكون فيه شرح لكل المصطلحات اللي بقولها




سلاموووووووووز

Soooo يقول...

nona

ومين قالك ان زلطه ده ليه وجود دلوقتي في قايمة صحابي
ده من ساعتها واتعلّم عليه علامة اكس كبيره قوي

وزي ماقلت في تعليقي على اابي .. المشكله مش في وفاء الكلب .. المشكله في صوته العالي




سلاموووووووووووز

Soooo يقول...

2ensan wnsan

شفت بقى ياعبده ياخويا
اربع تيام وفي الاخر اجري من كلب رود فايلر راسه قد البطيخه الشيليم

واحب ابشرك ان زلطه ده تم اصطياده في مره من غير الكلاب بتوعه ومسكته هريته هزار وتريقه لدرجة انه حلف يمين ماهو معتب القهوة تاني
والحمدلله .. قد كان




سلامووووووووووز

Soooo يقول...

Jack Sparrow

اه والله عندك حق يا ميدو
ناس الحقد واكلهم بطريقه وحشه قوي

بس خد هنا .. ايه الموقف اللي حصللك عشان كده قررت تتعلم تركب دراجات ؟؟؟
منتظرين نعرف الموقف




سلامووووووووووز

Soooo يقول...

maha zein

على فكره يا مها .. كلمة أظئوظة اللي طلعتها خيخه
يعني واحده مش واحد
وبعدين انا اللي اعرفه عنك انك انسانه دماغها متفتحه وعارفه ان مافيش حاجه اسمها واحده او واحد

انا مش بقولك كده عشان تقولي اللفظ ده او غيره
انا عايزك بس تبقي عارفه ان اللي بتكتبيه بيوصل للناس اسرع من الفصحى

وصدقيني .. اللي عارف مين مها زين كويس .. عارف هي قد ايه انسانه محترمه





سلامووووووووووز

Soooo يقول...

ابن حـجـر الـعـسـقـلانـى

يا حليب هارتي اضحك زي مانت عايز وصحي البيت والشارع كللو

وفعلا هم كلاب بالمعنى المجازي والحقيقي

وهي شوية هوهوة والليه مسيرها تخلص ان شاء الله



سلاموووووووووز

Soooo يقول...

maiosha

على فكره يا ميوشا
كلنا بيحصللنا مواقف غريبه .. ولو اتكلمنا عنها هنلاقيها غريبه من وجهة نظر الآخر
المهم اننا نتعلم حاجه من المواقف اللي حصلت

وياستي فات عشره متر .. فاضل مترين .. وهنضحك كلنا




سلامووووووووووووز

Soooo يقول...

mostafa rayan

يالهوي يا درش
تعليقك ده محتاج تنزله موضوع عندك
بتقول كلام كتير وكلام صح بجد

مستني اشوف تعليقك عندي في موضوع في مدونتك
ماشي ياصاحبي .. هدعيلك وربنا يستجيب يارب





سلامووووووووووووز

Soooo يقول...

Z_Diva

الحكايه مش مدون مغمور ومدون مشهور
الحكايه عامله زي ماحنا بنقول عليها بالبلدي .. ضرب من تحت الحزام
والضرب ده على قد ماهو ضعيف بس تأثيراته عالمدى الطويل مضره

واه طبعا شفت الفيلم ده
وهي فعلا كانت كلبه بيبي
بس بيبي ديناصور على رأيك




سلامووووووووووووز

Soooo يقول...

MaGn0liA...

الف شكر على كلامك ياستي

وفعلا لو كل كلب هوهو نفضنالو .. هيسكت لوحده

بس المهم .. ان التنفيض يكون صح





سلاموووووووووووووز

Soooo يقول...

Sourah

لا ماهو انا ماكانش ينفع اقف في وش روتي والا كنتي هتلاقيني في صفحة الوفيات

يابنتي ده قرم صباع ابو زلطه وهو بيلعب معاه .. تقومي تقوليلي اقف وما اجريش

وعايز اوضحلك حاجه بس عشان تقريبا انتي مش مستوعبه الموضوع اللي حاصل بخصوص اسماء المدونين
الحكايه ان في ناس بتعمل بروفيل بنفس اسم المدون او باسم قريب ليه .. وبعدين يروحو عند اي مدونه تانيه ويقعدو يشتمو .. وبالتالي لو حد شاف الشتيمه دي هيقول ان اللي شتم هو المدون المعروف اسمه كزا كزا
انما مش حكاية واحد بيعمل مدونه واختار نفس الاسم ده
فخمتو

وبخصوص التاج اللي اديتيهوني .. فأنا اكسل منك بمراحل
بس اوعدك اني بمجرد ما افضى واقدر اهرش .. هاجاوب عليه




سلاموووووووووووووز

Soooo يقول...

قلب مصرى

حمايا العزيز
عشان تعرف ان جوز بنتك دماغ برضك ومش حاجه سهله

هي المشكله ان الكلب ده بيروح يعلق وبيقل ادبه باسم الشخص اللي هو منتحل اسمه
يعني الموضوع مش تعليق وخلاص .. ومش قلة ادب وخلاص .. لأ
ده تشوية متعمد

ربنا يستر ويغور بقى عشان الواحد بجد زهق من الهبل اللي بيخلينا متخلفين واقل من ناس تانيه كتير

وسلامي لعروستي وقولها سوووو بيقولك .. اذكريني عند انشقاع الشمس في سقف الحديقه


ملحوظه
الحلقه الخمخه وعشيين هتنزل ان شاء الله في اول ايام العيد




سلاموووووووووووووز

Soooo يقول...

وومن

يا ميرا شوفيلك حل
ياتضحكي سايلم .. يا اما تخلي الشغل يضحكو
وياستي هي فعلا هانت .. بس المشكله اننا متكهربين لسه ومش فاهمين مين فين مع مين

ربنا يستر




سلاموووووووووووز

Soooo يقول...

Doba

الله يكرمك يا ام يوسف افندي

وياستي ادينا مستنني هوهوة الكلاب تخلص عشان القافله تعرف تمشي

اما انا سمعت ان الاقافله دي جايبه شوية بضايع من الشام بمناسبة العيد حاجه اييييييييييه




سلاموووووووووووز

Soooo يقول...

زُمُرده

هو الموضوع نزل عالفيس بؤ؟؟
يالهوي يالهوي يالهوي
يعني مش بعيد كمان كام يوم نلاقيه نازل على قناة الجزيره كمان

وفعلا انا مش فاهم ايه الهطل ده بجد
تصرف اهبل فعلا
بس هنقول ايه .. اصحاب العقول في راحه

وانتي ازيك وعامله ايه





سلامووووووووووز

Soooo يقول...

Bannoura

فعلا
كل من منا في كلب في حياته

وياستي الف شكر على كلامك في حقي وحق مدونتي .. وربنا يسترك دنيا وآخره





سلاموووووووووووز

Soooo يقول...

شيماء سمير

الله يكرمك يارب
بس هو انتي قريتي حاجه تانيه غير التدوينه دي وتدوينة الكاكا والمذكرات .. اللي ماقريتيهاش يعني ؟؟؟
أشك

وبخصوص النوم والمشاريع .. جايز تكون الدفعات الجديده اللي بعدنا مافيهاش وجع الدماغ اللي عيشناه .. خصوصا انك بتقولي المشاريع عندكم بتتسلم كومبيوتر واحنا كنا بنعمل كل حاجه بايدينا

وقريت ردك اللي فات .. وانا تحت امرك لو احتجتي الفلاش كي يافندم في اي وقت




سلامووووووووووووز

Soooo يقول...

خالد المصري

ههههههههههههههههههههههههه
طب تصدق وتؤمن بالله يابو لالا .. انا فكرت فعلا اعمل مجموعة مواضيع عن شلة الدخان الازرق اللي عملناها في الكليه
وهاجيب سيرة الكل .. علاء شبايك والالفي وكيوي ووليد ضلام وحسن نوجا وصبري وتامر حامد ومنجد وانا وانت .. ورقصني ياجرع

واحشني والله ياد انت .. هتنزل مصر امتى ياعم عايز اشوف لالا عروستي






سلامووووووووووووز

Soooo يقول...

Desert cat

صدقيني يا نونا .. اللي زي الكلب ده ماعندوش مبدأ عشان يتكلم بيه
والدليل على ضعف وجهة نظره .. انه بيدخل يتكلم باسم تاني غير اسمه

وانتي ازيك وعامله ايه .. فين العيديه بتاعتي صحيح؟؟؟؟؟





سلامووووووووووووز

Soooo يقول...

مهندس مصري

تلات مرات
ده ياعمنا انا لو جيت اقولو مره واحده وروتي بتجري ورايا كان زماني هوت دوج

وعارف .. انا عارف الدعاء ده وبقولو دايما لما باعمل سفاري ولا حاجه عشان مالاقيش عقربه ولا تعبان جاي يقرصني .. بس ساعتها مافيش مخ افتكر اي حاجه

وانت ازيك ياهندزا .. مش ناوي تنزل مصر بقى






سلاموووووووووووز

Soooo يقول...

انا ودماغي

ياستي اضحكي براحتك

وفعلا اللي بيعمل كده .. قمة في الفراغ

بس هنقول ايه .. قدرنا ولازم نصبر





سلاموووووووووووز

Soooo يقول...

نهر الحب

والله يا انوش انا ماعرفش قعدت ازاي في وجود روتي .. بس اهو اللي حصل بقى

وياستي لو جات على شتيمة الغير معرف مقدور عليها .. انا لسه مشتوم امبارح وحذفت التعليق عادي خالص .. وكان تعليق قمة في السفاله ومش عارف اللي كتبه مستوعب اننا في رمضان ولا معتبر رمضان شهر عادي زي يناير ولا ايه

واحب اطمنك .. زلطه دلوقتي زي الفل .. وكلابه خلفو كلاب صغنغنه والاشبال بتوعهم هم اللي بيلعبو دلوقتي عشان الكبار اعتزلو واتجهو للتدريب





سلاموووووووووووز

Soooo يقول...

3ala asm masr

همممم
بقى عاجبك اسم روتي
همممم
خلاص .. احنا نوجه نداء للي بيسرق اسماء الناس وبيقل ادبه .. انه يعمل مدونه ويسميها الكلب الضال .. واسمه في البروفيل يبقى روتي

والله فكره





سلاموووووووووووز

Soooo يقول...

A7MeD F@hMy

بقى عايز تدفع نص عمرك وتشوفني باجري
مااااااشي
انا بقى هوفرلك نص عمرك اللي عايز تدفعه ده .. ومش هجري تاني .. غير وانا باجري على الاتوبيسات

وبالنوسبه للكليب .. خلاص هانت وافضى شويه واشوف الكليب بروقان واقوللك ايه اللي لاحظته
وربنا يوفق الجميع





سلامووووووووووز

Soooo يقول...

Ahmed Al-Sabbagh

صبابيغو ابن منتقتي
الله يكرمك يارب

اه صحيح .. انت ازيك وعامل ايه

وش واحد بيطلع لسانه .. وهبقى اقولك ليه بعدين




سلاموووووووووووز

Soooo يقول...

أسيرة الأقدار

بقى بتضحكي وانا مزنوق ومش عارف ادخل العربيه
مااااااشي

واللي بيعملو كده فعلا مسيرهم يزهقو .. بس المهم ان الناس اللي بتتسرق اساميهم .. مايزهقوش قبله





سلاموووووووووووز

Soooo يقول...

maxbeta3zaman

والله ياعم ماكس .. المعلومة بتاعة الكلب اللي بيشم دي ماكنتش اعرفها لما جريت
انا لو كنت اعرف كنت استحميت وحطيت بادي سبراي وحلقت دقني وظبطت نفسي .. انما ماقالولناش في التعليم على الحوار ده

وصدقني يا استاذي .. انا متابع لمواضيعك وباحبها جدا
لكن مش باقدر اعلق عشان مزنوق زنقة الابل في طلعة المحمل .. لكن اوعدك بمجرد ما افضى من البلاوي اللي انا فيها .. هاهري البلوج بتاعك تعليقات .. بس على الله الواد البلوجاوي يقبلها .. والا هلعب في عينيه لعبة التنشين وهلعب على جتته لعبة القصب





سلامووووووووووووز

Soooo يقول...

Coca

والله انتي اللي عثل وعثل مثفي كمان

وبعدين في حد يحط ايده في بؤ كلب برضك

انتي اكيد بتهزري

انتي تسيبي الكلب هو اللي يحط ايدك في بؤو .. وتبقي غاسله ايدك كمان

كل سنه وانتي طيبه ياستي
فين العيديه؟؟؟؟





سلاموووووووووووز

مهندس مصري يقول...

لهو انت كنت عايز تقوله بعد ما بدأت تجري وراك
لا يا معلم ده تقوله من اول ما شوفتها مع صاحبها و كانت قاعدة هادية
من اول ما تلمحها من بعيد
مش بعد ما تقع الفاس في الراس
:)
لسه مش نازل مصر غير في آخر شهر 4 الجاي
انا بقالي هنا 5 شهور و فاضل 7 شهور كمان علشان اكمل السنة و آخد الشهر الأجازة طبقاً للعقد
و الأيام هنا كلها شبه بعض إمبارح زي النهارده زي بكرة :(
مستني أخبار الفطار الجماعي يا جدع :)

شيماء سمير يقول...

مين قالك مش بقرا
انا بقرا اى تدوينة بخلاف المذكرات
والا مكنتش قلتلك

عامة خيرا
ولو كنت بتيجى عندى المدونة
كنت هتلاقى موضوع كدة من فترة عنوانه علامات اقواس كدة
واوله كان امامى خيارين
اقراه
الموضوع كتباه قبل ما اشوف انك بتشك انى بقرا حاجة تانية غير المذكرات

اشكرك سو

زخرف بنشتغل بايدينا
بس تقدر تقول بركة وقت الحمد لله
ادعيلى بيها فى بكالريوس والمشروع

شكرا لك

Khaled يقول...

هههههههههههههههههه
فكرتنى بمشاريع الكلية ..
منك للة
كنت حافطس من الضحك

mony يقول...

حلوة التورية ديه يا سو


و الله يكون في عونك في الساعة المهببة ديه

انا برضه لما الكلب وقعني و وقف علي يتباهي بقوته كنت حسه ان الوقت كأنه اليوم كله مش اقل من دقيقة


و ربنا يبعد عننا كلاب الانس و الحيوان