اعتذار وشكر .. وكام تعليق

اعتذار

لكل المدونين اللي انا والله العظيم باحبهم وباحترمهم مهما اختلفو معايا في الرأي واللي بيشجعوني بكلامهم وبتعليقاتهم .. باعتذرلكم عن عدم مقدرتي على التواصل معاكم من خلال مواضيعكم في مدوناتكم والتعليق عليها .. وده لاني نتيجة لعدم استقرار شغلي كمهندس ديكور نتيجة عدم استقرار اسعار مواد البناء من اسمنت وحديد تسليح .. اتجهت للكتابه وزنقت نفسي بنفسي في تلات حاجات

اول حاجه .. هو كتاب عباره عن مجموعة مقالات ساخره وفيها حاجات نزلتها هنا في المدونه وحاجات تانيه باكتبها وباعدل فيها مع المستشار الفني لأحد دور النشر .. خصوصا ان دي اول تجربه لي واني الى حد ما ماليش اسم او اسمي مش معروف غير في نطاق ضيق

تاني حاجه .. هو كتابة سيناريو لفيلم روائي قصير .. والقصه للمدونة الجميله هدى عبد القادر صاحبة مدونة فبدال مانطق يا ولا لأ نضحك .. والقصه بعنوان (من تحت لتحت) .. ولو قريتوها بنفسكم هتحسو بمدى المعاناه اللي باعانيها في كتابة السيناريو وتحويلها من مجرد قصه لمشاهد يتم تصويرها

تالت حاجه .. باعمل حاليا جلسات عمل مع احد المخرجين لمحاولة تنفيذ فيلم روائي طويل من الكام سيناريو اللي عندي .. والموضوع ماقدرش اتكلم عنه ولا اقول غير انه حاجه ان شاء الله هتكون كوميدي وهتكون بتتكلم عن التعليم الخاص واحلام الشباب

-----

شُكر

شكر لكل مدونين الاسكندريه اللي رحبو بينا لما التقينا بيهم في لقاء المدونين يوم الجمعة الموافق امبارح .. واللي بجد كان نفسي اتعرف عليهم واتكلم معاهم من زمان
.. واخص بالشكر كل من
مصطفى مغربي صاحب مدونة غني يابهيه .. واللي كنت باتعرف عليه لأول مره في حياتي ولقيته شاب جميل جدا وجدع جدا
د. منوسي صاحبة مدونة ست البيت .. واللي بجد لقيتها انسانه جميله قوي ومحترمه جدا وكان نفسي انى اتكلم معاها اكتر .. لكن ان شاء الله ملحوقه
والمدونه العزيزة أميرة صاحبة مدونة سهر الليالي .. واللي بجد كان نفسي اتعرف عليها من زمان .. واتضح انها فعلا أميرة اسما وصفة .. ومش عارف اوصفلكم مدى ترحيبها بينا وسعادتها بوجودنا
وطبعا ماقدرش انسى قطقوطة المدونين كلهم .. دكتورة لماضة اختي الصغنونه اللي باحب اتلامض معاها وتتلامض معايا .. واللي بجد بجد بجد اتأكدت انها جدعة بطريقه يالهوووووووووووووي

والناس دي احب اقولهم .. والله العظيم لما تنزلو مصر لو طلبتو مني أي حاجه هعملها .. حتى لو كانت اني اقلعلكم عيني الاتنين .. بس هبقى متضايق عشان نظري ضعيف وانتو تستاهلو احسن حاجه .. لكن ومالو .. ممكن تاخدو النضاره وتمشو نفسكم بيها

-----
كام تعليق

طلبت معايا انزل اغنية المطرب الشيعبي الشهير .. عبد الباسط حموده .. واغنيته الرائعة .. انا مش عارفني .. واللي ممكن تلاقوها هنا

ودي صورة الكفر او غلاف الالبوم بتاعه

وفي اثناء ما الاغنية بتنزل .. قلت اقلب في صفحة التعليقات .. قريت التعليقات واخترت منهم كام تعليق ..
اتمنى انكم تفهمو ايه قصدي من نشرهم

.. محمد الديب يقول
دائما مانشتاق إلى ذكريات مضت وطواها الزمان وعندما نسمع هذا الصوت صوت عبد الباسط فلابد ان تبكى من داخلك على المعانى وعلى الالحان فعلا الزمن بيعيد نفسه وعدويه لسه موجود ياجامد يعبد الباسط


.. الباشا عمر يقول
قيثار الاغنية الشعبية وملك الموال


.. رؤوف طلبة عبد الرؤوف يقول
امبابة عاصمة جهنم وشارع المطار بيضرب نار


.. هتلر يقول
برنس اللياالي ومكدبش اللي قال حكمدار الاغنيه الشعبيه ونجم الموال


.. جون سينا يقول
انا بحبــــــــــك يا عبد الباــــــــــــط حمودة يا ابو شعر جامد جدا اولى انت بتعمل شعرك عند مين
لؤى شـــــــــــــومان


.. عمرو عبدالله بردانة يقول
انا نفسى امشى مع بسمة ونسمة بس مش عارف على فكرة اى كلام هنا متعلق بايمن انا اللى كتبه علشان يكرهوه بس ايمن ماكتابشى حاجة والامارة انا شطلاوى


.. محمد عبد العظيم يقول
من اكتر المطربين الشعبيين اللى بيعجبنى ادائهم عبد الباسط بمعنى احساس بانه شامل بالفن الشعبى بيخاطب جميع طبقات المجتمع ممكن يسمعه الارستقراطى والشعبى مع الاحساس بانة بيقدم فنه بشىء من الاتقان


.. عماد البرنس
عبد الباسط حموده مطرب شعبى من نوع نادر الان فهو من نوع احمد عدويه ومجدى طلعت وهذا النوع غير موجود الان وانا بكتب اغنى شعبى كويسه ونفسى اديهالك ياعم عبد الباسط وده تليفونى
018*******
اخوك عماد البرنس


.. فارس الرومنسيه يقول
احلى البوم برنس والله يا عب البا سط بمناسبه الشريط ممكن اتعرف على بنت من القاهره 17 سنه وايميلى اهو
-------------@yahoo.com


.. نادر يقول
اللى مسمعش عبد الباسط حموده يبقى مسمعش سعبى كان معكم( نادر أحمد الدادوى يوسف) من المنزله شكرا


وتعليقات بالانجليزي كمان

Mohammad Reza Noushzad
Dear Abdolbaset Hamoudeh
I wish you very cool and best.
Thanks for your voice and music.
I search for your album but didnt find more music from you because I live in Boushehr( In IRAN(


سيد عيسوي من افريكانا نت يقول
sank you


اما جايزه التعليق الدهبي .. واللي قلبتني على ضهري زي الصرصار من كتر الضحك .. كان التعليق ده

كاني ميلانو يقول
عفاريت ميلانو بالمرج تشكر الفنان عبد الباسط وبتقولك خسارتك فى الفن يا عبد الباسط انتا بصحيح مش واخد حقك لازم تشترك فى الافلام وتشارك بصوتك الجميل ده انتا مش اقل من احمد عدويه لازم تفكر فى الحفلات التليفزيونيه لان بجد صوتك معشش فى نفوخى
--------------------

.. ملحوظة
نظرا لان في ناس كتير طلبت اني اتكلم عن فيلم كباريه .. مع اني قلت اني مش ناقد ولا محلل سينيمائي وباتكلم عن الحاجه اللي باحبها بس .. لكن انا ماقدرش ماعملش حاجه بتطلب مني .. خصوصا لو كان الطلب جاي من ناس باعزهم وباحترمهم .. زي التعليق بتاع (النمس لتوظيف العمالة المصرية بالخارج) .. واللي جالي في موضوع (سينيماتك .. واقعية مصرية) وعلق هناك
نظرا لكل الحاجات دي .. ان شاء الله هتكلم عن فيلم كباريه في اقرب فرصه
بس على فكره .. الفيلم ماعجبنيش .. وربنا يكفينا شر السُبكيه

سوووو