السبت، ٢٤ جمادى الآخرة ١٤٢٩ هـ

اعتذار وشكر .. وكام تعليق


اعتذار

لكل المدونين اللي انا والله العظيم باحبهم وباحترمهم مهما اختلفو معايا في الرأي واللي بيشجعوني بكلامهم وبتعليقاتهم .. باعتذرلكم عن عدم مقدرتي على التواصل معاكم من خلال مواضيعكم في مدوناتكم والتعليق عليها .. وده لاني نتيجة لعدم استقرار شغلي كمهندس ديكور نتيجة عدم استقرار اسعار مواد البناء من اسمنت وحديد تسليح .. اتجهت للكتابه وزنقت نفسي بنفسي في تلات حاجات

اول حاجه .. هو كتاب عباره عن مجموعة مقالات ساخره وفيها حاجات نزلتها هنا في المدونه وحاجات تانيه باكتبها وباعدل فيها مع المستشار الفني لأحد دور النشر .. خصوصا ان دي اول تجربه لي واني الى حد ما ماليش اسم او اسمي مش معروف غير في نطاق ضيق

تاني حاجه .. هو كتابة سيناريو لفيلم روائي قصير .. والقصه للمدونة الجميله هدى عبد القادر صاحبة مدونة فبدال مانطق يا ولا لأ نضحك .. والقصه بعنوان (من تحت لتحت) .. ولو قريتوها بنفسكم هتحسو بمدى المعاناه اللي باعانيها في كتابة السيناريو وتحويلها من مجرد قصه لمشاهد يتم تصويرها

تالت حاجه .. باعمل حاليا جلسات عمل مع احد المخرجين لمحاولة تنفيذ فيلم روائي طويل من الكام سيناريو اللي عندي .. والموضوع ماقدرش اتكلم عنه ولا اقول غير انه حاجه ان شاء الله هتكون كوميدي وهتكون بتتكلم عن التعليم الخاص واحلام الشباب

-----

شُكر

شكر لكل مدونين الاسكندريه اللي رحبو بينا لما التقينا بيهم في لقاء المدونين يوم الجمعة الموافق امبارح .. واللي بجد كان نفسي اتعرف عليهم واتكلم معاهم من زمان
.. واخص بالشكر كل من
مصطفى مغربي صاحب مدونة غني يابهيه .. واللي كنت باتعرف عليه لأول مره في حياتي ولقيته شاب جميل جدا وجدع جدا
د. منوسي صاحبة مدونة ست البيت .. واللي بجد لقيتها انسانه جميله قوي ومحترمه جدا وكان نفسي انى اتكلم معاها اكتر .. لكن ان شاء الله ملحوقه
والمدونه العزيزة أميرة صاحبة مدونة سهر الليالي .. واللي بجد كان نفسي اتعرف عليها من زمان .. واتضح انها فعلا أميرة اسما وصفة .. ومش عارف اوصفلكم مدى ترحيبها بينا وسعادتها بوجودنا
وطبعا ماقدرش انسى قطقوطة المدونين كلهم .. دكتورة لماضة اختي الصغنونه اللي باحب اتلامض معاها وتتلامض معايا .. واللي بجد بجد بجد اتأكدت انها جدعة بطريقه يالهوووووووووووووي

والناس دي احب اقولهم .. والله العظيم لما تنزلو مصر لو طلبتو مني أي حاجه هعملها .. حتى لو كانت اني اقلعلكم عيني الاتنين .. بس هبقى متضايق عشان نظري ضعيف وانتو تستاهلو احسن حاجه .. لكن ومالو .. ممكن تاخدو النضاره وتمشو نفسكم بيها

-----
كام تعليق

طلبت معايا انزل اغنية المطرب الشيعبي الشهير .. عبد الباسط حموده .. واغنيته الرائعة .. انا مش عارفني .. واللي ممكن تلاقوها هنا

ودي صورة الكفر او غلاف الالبوم بتاعه


وفي اثناء ما الاغنية بتنزل .. قلت اقلب في صفحة التعليقات .. قريت التعليقات واخترت منهم كام تعليق ..
اتمنى انكم تفهمو ايه قصدي من نشرهم

.. محمد الديب يقول
دائما مانشتاق إلى ذكريات مضت وطواها الزمان وعندما نسمع هذا الصوت صوت عبد الباسط فلابد ان تبكى من داخلك على المعانى وعلى الالحان فعلا الزمن بيعيد نفسه وعدويه لسه موجود ياجامد يعبد الباسط


.. الباشا عمر يقول
قيثار الاغنية الشعبية وملك الموال


.. رؤوف طلبة عبد الرؤوف يقول
امبابة عاصمة جهنم وشارع المطار بيضرب نار


.. هتلر يقول
برنس اللياالي ومكدبش اللي قال حكمدار الاغنيه الشعبيه ونجم الموال


.. جون سينا يقول
انا بحبــــــــــك يا عبد الباــــــــــــط حمودة يا ابو شعر جامد جدا اولى انت بتعمل شعرك عند مين
لؤى شـــــــــــــومان


.. عمرو عبدالله بردانة يقول
انا نفسى امشى مع بسمة ونسمة بس مش عارف على فكرة اى كلام هنا متعلق بايمن انا اللى كتبه علشان يكرهوه بس ايمن ماكتابشى حاجة والامارة انا شطلاوى


.. محمد عبد العظيم يقول
من اكتر المطربين الشعبيين اللى بيعجبنى ادائهم عبد الباسط بمعنى احساس بانه شامل بالفن الشعبى بيخاطب جميع طبقات المجتمع ممكن يسمعه الارستقراطى والشعبى مع الاحساس بانة بيقدم فنه بشىء من الاتقان


.. عماد البرنس
عبد الباسط حموده مطرب شعبى من نوع نادر الان فهو من نوع احمد عدويه ومجدى طلعت وهذا النوع غير موجود الان وانا بكتب اغنى شعبى كويسه ونفسى اديهالك ياعم عبد الباسط وده تليفونى
018*******
اخوك عماد البرنس


.. فارس الرومنسيه يقول
احلى البوم برنس والله يا عب البا سط بمناسبه الشريط ممكن اتعرف على بنت من القاهره 17 سنه وايميلى اهو
-------------@yahoo.com


.. نادر يقول
اللى مسمعش عبد الباسط حموده يبقى مسمعش سعبى كان معكم( نادر أحمد الدادوى يوسف) من المنزله شكرا


وتعليقات بالانجليزي كمان

Mohammad Reza Noushzad
Dear Abdolbaset Hamoudeh
I wish you very cool and best.
Thanks for your voice and music.
I search for your album but didnt find more music from you because I live in Boushehr( In IRAN(


سيد عيسوي من افريكانا نت يقول
sank you


اما جايزه التعليق الدهبي .. واللي قلبتني على ضهري زي الصرصار من كتر الضحك .. كان التعليق ده

كاني ميلانو يقول
عفاريت ميلانو بالمرج تشكر الفنان عبد الباسط وبتقولك خسارتك فى الفن يا عبد الباسط انتا بصحيح مش واخد حقك لازم تشترك فى الافلام وتشارك بصوتك الجميل ده انتا مش اقل من احمد عدويه لازم تفكر فى الحفلات التليفزيونيه لان بجد صوتك معشش فى نفوخى
--------------------

.. ملحوظة
نظرا لان في ناس كتير طلبت اني اتكلم عن فيلم كباريه .. مع اني قلت اني مش ناقد ولا محلل سينيمائي وباتكلم عن الحاجه اللي باحبها بس .. لكن انا ماقدرش ماعملش حاجه بتطلب مني .. خصوصا لو كان الطلب جاي من ناس باعزهم وباحترمهم .. زي التعليق بتاع (النمس لتوظيف العمالة المصرية بالخارج) .. واللي جالي في موضوع (سينيماتك .. واقعية مصرية) وعلق هناك
نظرا لكل الحاجات دي .. ان شاء الله هتكلم عن فيلم كباريه في اقرب فرصه
بس على فكره .. الفيلم ماعجبنيش .. وربنا يكفينا شر السُبكيه

سوووو

هناك ٩٧ تعليقًا:

ميرا ( وومن ) يقول...

سوووو
انا اول تعليق
هييييييييييييييييييييييييييييييييييييييه
حلاوة الريدر يا حلاوة
اولا ربنا يوفقك في كل الحاجات اللي انشغلت بيها وان كان علي الكتب متقلقش هانشترية ان شاء الله يعني هانشترية

وممكن استغل الفرصة دي واحي عبد الباسط اللي من يوم مغني الأغنية دي وهي بقت النشيد القومي بتاع سواقين التوك توك واللي ميعرفش التوك توك فهو عبارة عن دي جي بـ 3 عجلات بستخدم احيانا لنقل البني آدمين وعملهم صداع نصفي والأسبرين علي السواق
سلام فراولة علشان المانجة بتاعة المرة اللي فاتت مكنتش قد كدة

Rehab Mostafa يقول...

مبروك يا سوووو على التلات حاجات دول ربنا يكرمك ويوفقك يارب

على فكره الأغنيه دي بسمعها على طوووووووول وانا ماشيه في الشارع
بس أصلاً يعني فين الصوت الجميل اللي التعليقات دي كلها مكتوبه عليه مش فاهمه يعني
وأفلام ايه اللي عايزه يشارك فيها بصوته العفريت ميلانو ده ليه يعني هي ناقصه
ده رأيي في هذا الصوت الفذيييع جداً

وتاني وتالت ورابع ...... مبروك يا سوووو وان شاء الله الحاجات دي تخلص على خير يارب

مصر يا موكوسه .....يا مزارع الكوسه يقول...

موضوع هايل ربنا يوفقك من حسن لاحسن

Mafrousa يقول...

وفقك
و اعتقد ان كل المدونين مش بيتمنولك التوفيق
واكيد الكل بيقدر للكل عدم التعليق عند الكل
هههههههههههه

Z_Diva يقول...

eda bgad ya soooo, i'm fery heebez for youn wallahy, rbna ytmimlk elmashare3 de 3la 5er isa, we nshofo esmk kda 3al3'olav, we nygy ntlb eltawkie3 wenta twak3 lma sawb3ink tetfashfesh :P
ba eb3tly nos5ty Fedex b2a 3la elemarat hna 3shan ana msh nazla msr dew2ty :D

ah wel7al2a elwa7d we 3eshesheen knt 7lwa, bas nono awy -asly tfsa we mymlash 3eny ella el7al2a elly btoul elbrowser mretin we rob3 :D

good luck ya zamiel :) we m3lish iny msh b3lk awl bawel b2a, bas kma sabk an ashrt, eldonya mdawra we kda b2a :D

3ala asm masr يقول...

بجد يا سو انت تستاهل كل خير وكان لازم من زمان فعلا تكتب كتب والناس تقراها انت مش بس بتكتب كلام ساخر بين السطور بيبقى فى حاجات كتير بس اللى يفهم
الف مبروك على التلات حاجات اللى انت زنقت نفسك فيهم بس بجد انا فرحنالك اخر حاجه

Unknown يقول...

اولا مبروك يا راجل يا عجوز على المشاريع مقلتش ليه عليها امبارح دي كانت تستاهل حاجه ساقعه
ثانيا
ايه يا لهوووي الطويله دي تريقه دي بقى ولا ايه
ثالثا
انا كنت هموت واعرف مين بيغني النشيد ده لاني بسمعه تقريبا في كل الميكروبازاااااات
حتى ياربي مره ميكروباز مكنش فيه تسجيل واحد اتبرع وشغلها من موبايله
لا وكمان العيانين بيشغلوها في العنبر
يعنهي تقريبا حفظتها
وعندي تساؤل سيادتك
انا مش عارفني امال يعني انا اللى اعرفك مين ده تايه ولا ايه
من كتر ما سمعتها كنت هموت وانزلها اتامل في كلماتها
رابعا
sank uuuu على الكلام الجامد ده :))

ابن حـجـر الـعـسـقـلانـى يقول...

أول حاجة يا ابو سوووو أنا كان نفسى أبقى معاكم فى السفرية دى بس معلش بقى .. الظرظروف منعتنى .. ربنا يبعد عنك الظرظروف الغير مناسبة

تانى حاجة ... بجد يا سوووو .. أنا بارجو لك من كل قلبى أنك تتوفق فى أعمالك .. و يا رب يا رب تنجح فى كل أعمالك و كتاباتك اللى بتكتبها .. فأنت فنان كبير و كاتب بارع

بخصوص الشعب المصرى و تعليقاته ... الناس دى مالهاش حل .. لأ و إيه ... الباشمهندس عبد الباسط كاتب اسمه بالانجليزى و بادئ كل اسم بحرف كبير عشان نبقى نختصر اسمه فى
ABH

بجد مش عارف أعلق على تعليقاتهم ... تعليقاتهم أبلغ من ميت تعليق الواحد ممكن يكتبه

بس فكرتنى ببرنس الأغنية الشعبية الله يرحمه: رمضان البرنس .. و الله العظيم أنا كنت باحب رمضان البرنس دة جدا و زعلت عليه لما مات هو و مراته و ابنه فى حادث سيارة لما كان مسافر .. هو غنى أغنية:"كل الناس مسافرة" من هنا .. و سافر السفر النهائى من هنا .. الله يرحمه

و بخصوص فيلك كباريه .. الفيلم كان عاجبنى ... بس ماعرفش ليه جالى هاجس إنه مش هايعجبك .. و بالفعل لقيتك كاتب إنه فيلم مش قوى .. على العموم لما نتقابل نبقى نتكلم فيه ان شاء الله

و بالتوفيق يا ابو سوووو فى أعمالك و يا رب نشوفك كدة فى مهرجان كان .. بس ماتنساش تبقى تاخد لى رقم تليفون الباشمهندسة انجلينا جولى

يوميات فنانه مفروسه جداا يقول...

سووووووووووو

انت بجد والله ماشاء الله عليك

بس الاول باركلي لاقيت شغل ديزينر في شركه اللهم لك الحمد.

ثانيا بقي

ربنا يفوفئك في السيناريو والفليم وكل اللي بتعمله وتبقي كمان مهندس ديكور مكسر الدنيا ومحدش يعرف يكلمك

بس تعالي هنا يعني محدش قال يعني علي تجمع للمدونييين يعني ماشي الله يسهلووو


اه الاغنيه بتاعة انا مش عارفني ديه رهيييبه ومكنتش اعرف بتاعة مين ومع انها شعبي وانا ماليش في اللون ده مع كامل احرامي للي بيسمعوه الا انها علقت معايا لدرجة اني نزلتها علي الموبايل اه والله

ويا برنس مكدبش اللي قال عليك حكيمدار المدونين المصريين والف مليون مبروك والتحيه ديه مني ومحدش يحاسب عالطلبات وعيارين كمان في الهوا اهم

طوووخ طووووووخ طوووووخ

غير معرف يقول...

والله خايفة انزل الاغنية يحصل حاجة للجهاز

عبد الباسط حموده؟؟ مش ده بتاع اديني قلبك وخد قلبي واديني عينك وخد عيني وكل حاجة ياخدها تبقى اصاد حاجة؟؟

ليه يا سوووو؟؟ ده احنا اخواتك يا اخي خاف علينا

خاف الله خاااااااااااف،، ارحمني،، ما تضربنيش ههههههههههههه فاكرها :)

سوووو،، طول عمري طول عمري من ساعة 1982 وانا بقول عليك ملك السيناريو يا سوووو آه وربنا وحاطة صورتك كده فوق الحلل على طول

بس بكرة لما الفلوس تجري ف ايدك اوعى تنسى أبلة مها ها؟؟ والنص جنيه اللي بديهولك على طول تشتري بيه الجيلي كولا ها؟؟
ولا لازم اقول ادام الناس؟؟ استغفر الله العظيم يا رب

انا هقوم بأ احسن بسقط شبكة وده مش كويس للي ف سني

بالسلامة يا سوووو وخد بالك وانت بتعدي الشارع :)

مها ميهوووو

شفـقــة و إحســــان يقول...

بجد مبسوطة اوى بيك......ربنا يوفقك يارب والى الامام
شفقة

غني يابهيه يقول...

مبرووووووووك يا ريس

والله وحشتني
بس اشوفك قريب باذن الله

وما قلتش ليه على مشاريعك السينمائيه يعنى
ده انا طالع عينى فى سيناريو اللي باكتبه
اسمه مين اللي حدف الطوبه ؟
ربنا يستر بس عليا

تحيات بهيه يا برنس

عيله مفتريه سابقا يقول...

يا سو يا جامد بالاوىىىىىىىى

اية الحلاوة دى

طيب شهيصنى علشان ارسيك

كده تفك لوحدك

طب كنت قولى على حوار الكتاب ده ونبقى بالربع حتى

بس انا سعيدةةةةةةةةةةةةة

اة عبد الباسط بقى

تانك يو يا سو :D

يا عم دى ازواق

هى المشكلة فى نوعية البشريه
اللى بتسمع الحاجات دى يا برنس:D

سلامى بقى

هناء يقول...

مبروك، موفق ان شاء الله

Asmaa mahaba يقول...

هههههههه انت بتعرفنا بنفسك
تشرفنا يا سيدى طيب بس سؤال وهو حد سالك انت مين يا سووو
وانا اقول شوفتك فين قبل كدا افتركت مش انت اللى سالك سعاد حسنى من انت؟؟
يا سبحان الله الخالق الناطق الواحد حسين فهمى ابن اختى
اه اما عن المطرب الشعبى شوف انا عن نفسى بدايه سماعى لاى مغنى هو انى احترمه والاحترام عندى بييجى من نحيتين يا احترام منظر يا طباع وطبعا انا معرفش طباعه بس منظره مش عاجبنى لا مؤاخذه محبش الرجاله اللى بقصه
سؤال نونو فى اغنيه غريبه بسمعها الزبالين مشغلينها بتقول بصيت فى المرايه معرفتش نفسى تقريبا بتقول كدا دى بتاعه انهى مغنى فى منطقتنا بالظبط
فى انتظار كلامك عن فيلم كباريه
مع ان اسمه مقلقنى
كانت معكم ارخم سومه فى عالم التدوين
متزعلش يا سووو انا اللى اعزه ارخم عليه
;)))

Asmaa mahaba يقول...

ايه دا استنىانا عندى عمش وحول تقريبا كتاب ايه اللى حتكتبه ؟؟
مش تكتب واضح يا اخى عشان انا فهمى بصعوبه
مبرووووووووووووك انا حاجزه اول نسخه بما انى ديما اخر تعليق:)))

Asmaa mahaba يقول...

اه زحيح مادمت حتعمل كوتاب متنساش تحط عليه اسمى ههههه واكتب فيه ارخم المعلقين
وكمان نزل الاهداء فى اوله باسمى حتقولى ليه حقولك اول ما حيتفتح الكتاب الناس تشوف اسمى حتشوف المبيعات اد ايه ... تقريبا انا الوحيد اللى حشتريه...

Asmaa mahaba يقول...

انا عاوزه اسال سؤال بعدين حتكل وابطل لعب فى المدونه بتاعتك انا حطيت كود اغنيه ليه مش سامعاها عندى زى ما بسمع عندكم؟؟؟

الباحث عن الحقيقة يقول...

هههههههه
لا طالما هتبقى مشهور يبقى انا لازم اجيلك واتصور معاك كمان
علشان بعد عشرين سنة ابيع صورك للصحف الصفراء
هههههههههه
ربنا يوفقك يا سووو
ايوه يا بطل عايزين نشوف شغل جامد بقى
سعيد والله بانشغالاتك دي
صحيح هتنشغل عنا
بس المهم اننا هنشوفك ناجح اوي بعدكده
اجمد يا سووو عايزين نشوف اعمال نتشرف احنا المدونين بيها
ايييييييه
وفرحان والله يا سو
من ساعة ما شفت مذاكرات الواد الطخين
وقلت اخ لو تتعمل فيلم علشان اعرف الاجزاء اللى فاتتني
بالتوفيق يا بطل يا رافع راس المدونين

Unknown يقول...

مبروك ياسووووو باشا
والله فرحتلك جدااااااااا وانت تستاهل كل خير وربنا يوفقك يارب دايما ويكرمك
ماتقلقش على الكتاب انت وراك جيش مدونين وهنشتريه بس احنا بس نشم ريحته من بعيد كده وهنخطفه فورا
انا حاجزة اول نسخةنازلة فى بورسعيد

ربنايوفقك
سلام

فاتيما يقول...

البوست دا هيثير أحقاد دفينة عندى
أصلك سافرت أسكندرية
يا بختك
مش بحسد دنا بقر
ربنا يا ياسيدى يسعد ايامك و تتفسح و لا سندباد عصره و اوانه
المهم إنك شفت البحر
و بعدين انا قريت قصة هدى من ساعة ما نزلتها بوست
دى مش صعبة و لا حاجة يا عم
دى مرعبة
هتعملها إزاى دى ؟؟
بس تحدى جميل لقدراتك
و إنت قدها
و بخصوص الأخ عب الباسط
أنا مليش فى النوع الشعيبى دا
و ىخرى عدوية عشان بابا الله يرحمه كان بيحبه و بيسمعنا ساعات أغانيه أيام ما كنا بنركب العربية و مسافرين
بس عموما كل فولة و لها كيال زى ما بيقولو و لولا أختلاف الأذواق ...
تحياتى ليك و لو إنى لما بآجى هنا بتعب
عارف ليه ؟؟
عشان كل مرة مبقدرش أمنع نفسى من التفكير فى أن المطرح دا هيتقفل قريب و مش هدخله تانى بغض النظر عن الأسباب ..
عموماً ربنا يوفقك فى كل حاجة بتعملها
و سلامى يا باشمهندس

غير معرف يقول...

سلام عليكم
سوووو لا هوت ميل نافع ولا مسنجر نافع

:)

GiGi world يقول...

يارب نشوفك اكبر كاتب سيناريو واكبر ناقد فى العالم يمكن يااخي بجد ذوقنا يتصلح باه وننسى السبكي وامثاله اللى افسده كل القيم والمعاني الحلوه فى حياتنا

ابن حـجـر الـعـسـقـلانـى يقول...

بص يا عم سوووو ... مش قادر أمنع نفسى و مش نافع غير إنى أعلق على كلمة "جرعان" اللى فى التدوينة اللى فاتت .. أنا بقالى يومين مش عارف ليه الكلمة دى قافشة فى دماغى مش عايزة تسيبها .. مع إنى سمعتها كتير من مصادرها الحية فى الشوارع المحيطة بيا لكن كونى أشوفها مكتوبة دة ليه دلالات كتيرة قوى

مجرد قراية الكلمة المكتوبة بيرسم فى دماغى بدقة حالة الانفعال اللى انت فيها.. إنفعال مركب من تفاصيل كتيرة قوى

إلى جانب إنى سمعتها كتير .. بس كونها تبقى مكتوبة دة معناه إنك بتاخد بالك من تفاصيل كتير فى حياتنا .. و بتقدر تصطادها .. و تعبر عنها .. مش بس كدة .. لأ و بتوظفها توظيف رائع .. و بالتأكيد يا سوووو انت فى دماغك عشرات بل مئات أو آلاف التفاصيل اللى انت الوحيد اللى واخد بالك منها مع إننا بنشوفها لكن مش بننتبه ليها

كلمة "جرعان" تحس إن فيها جرعة الجدعنة زيادة كتير عن كلمة "جدعان" ... يعنى نقدر نصيغ مفهوم جديد يعبر عن المبالغة فى الجدعنة بلفظ جديد هو الـ"جرعنة" .. و طبعا "جرعان" دى جمع .. مفرده "جرع" .. يعنى هو الشخص اللى الجدعنة معاه زيادة قوى .. أنا متخيله واحد جسمه ضخم و لابس قميص فضفاض أبيض بنص كم و فاتح زرايره اللى عند صدره

مش عارف اكتب إيه تانى بس أنا حاسس إن كلمة "جرعان" لسة مليانة حاجات كتيرة بس أنا مش عارف أخرجها

بس خلاص


حاجة كدة على جنب: ماعرفش ليه أنا حاسس إن فيه حاجة مضايقاك

me يقول...

اولا
ربنا يوفقك و يديك اللى تتمناه

ثانيا
نورت اسكندرية انت و المدونين كلهم و كنت رايحة لولا سفر عائلتى للعمرة لكن شفت البت لماضة انهاردة و حكيتلى كل حاجة و هى كمان بتشكر فيك موووووووووووت

ثالثا
مش هقول غير حسبى الله و نعم الوكيل

رابعا

sank you

سلامى

Unknown يقول...

ربنا يوفقك فى كل اللى بتعمله وبعدين عدم الاستقرار فى الشغل ده اساسى علشان عدم استقرار المواد فى المجالات والانشطة

ثانيا : بجد لقاء مدونى اسكندرية كان يوم رائع وخصوصا انى اتعرفت على ناس اول مرة اتعرف عليهم واقعد معاهم وهما بجد هايلين

موضوع عبد الباسط : لا تعليق

إنجى يقول...

الف مبروك على الاخبار الحلوة

يارب تبقى اكبر سيناريست فى مصر كلها


تحيتى

Ehab يقول...

بيقولوا معرفة الرجال كنوز
وانا راجع علشان الحمد لله عندي كنوز كتير من الصحاب
رجاله
وبنات كمان

تسلم يا صاحبي الجميل

اخوك ايهاب

ست البيت يقول...

سووو،
أيه الكلام الجامد دا،، تصدق بالله أنا قعدت يومها سهرانة لحد الفجر عشان في بالي اشكر الناس كلها وأكتبلك اعتذار وفعلا وبينما استعد للنشر ،، الموقع فوت وطلبت معاه غلاسة على شخصي الضعيف بس ولو ...اعتذاااار واجب أنت أكثصر من رائع يا سوو
كتاباتك رائعة ...ولو أني مش بحب فقرة سينيماتك...
لما روحت كنت حاسة قد ايه اللقاء دا كانه حلم
قلي يا سووو أنت حتنزل كتاب؟ متقلقش مش حنحسدك بس كنت قول كانت تبقى عزومة بحق وحقيق والله لما روحت بالليل عند الشيخ وفيق قلت الحمد لله ان سوو ما جاش انا اتخانقت يا سووو اتخانقت مع الديليفري بتا الشيخ وفيق
كلام لا استحق ربعه ..شكرا يا سو
على فكرة مدونتي http://marwa-mostafa.blogspot.com/
ياريت تشرفنا بالزيارة
وأما البوست الجديد اللي على د.منوسي
فدا الحكاية من طقطق لسلامو عليكو

غير معرف يقول...

هييييييييييييييييه
هيييييييييييييييييييه
بجد بجد فرحاااااااااااانه
ايوه كده ياراجل دوس ولا يهمك

ربنا يارب يكرمك يارب ونشوفلك حاجه انشاءالله قريب

يارب تنجح انشاءالله وتحقق الى نفسك فيه وبتحلم بيه

شد حيلك يا سوووووو بقى وارفع راسنا
ومتقلقش كتاب هنشتريه فيلم هندخله متقلقش
احنا وراك يا كبييييير
:)))))))))))))

سلاخووووووووووخ
:)))

shahy يقول...

ولد ياسوووو
انا بقالي خمس ايام على التوازي بقعد علشان اقرا كل اللي فاتني
اة والله خمس ايام في كل يوم خمس دقايق
هما دول اللي عرفت اخطفهم من العيال
ندخل بقى في الجد
اليوميات اصبحت مثيرة جدا وعاوزين نعرف الباقي بفارغ الصبر


الف مليون مبروك وربنا يوفقك وان شاء الله هاتنجح جدا جدا


انا دخلت فيلم مسجون ترانزيت
وصحيح اقعدت اعيط في الاخر زي العيال بس الفيلم عجبني
هي حاجة واحدة لفتت نظري لما كان نور الشريف في السنيما واشترى فشار بالملح ولما دخل جوة السنيما الفشار تحول الي فشار بالكراميل هههههههههه اظاهر مااخدوش بالهم
حاولت بقى اني افصص الفيلم زي ماانت بتعمل ابدا ياولدي البعيدة طلعت ...... اية هو انت متخيل اني هاشتم نفسي والا اية؟

سلام يا سوووو وبالتوفيق يارب
بكرة ياعم يبقى ليك معجبين ومعجبات بس ابقى افتكرنا

تحياتي

اهو ده عيبه يقول...

ازيك يا سووو
والله يابنى انت فيك شئ لله
لسه بقرا الموضوع ده الاقيك باعتلى تعليق ايه ده توارد خواطر

المهم سيبك من الحديد والاسمنت ربنا يوفقك فى الكتابة وان شاء الله تطلع حاجات كتير لسه مستخبية ونشوف حاجات تسعدنا وتمتعنا فى نفس الوقت

اما بالنسبة لقيثارة الغناء الشعبى فمتجوزش عليه غير الرحمة بقى

ربنا يسعدك ويطعمك ما يحرمك واشوفك احسن الناس يا سوو يابن حوا وادم

بيكيا للبيع يقول...

ههههههههههههييييييي
الف مبروك وبعدين اضحك براحتي على فارس الرومانسيه وتعليقه الراجل هو الراجل حتي فى الشوعبي وبعدين مش دى اغنيه انا مش انا انا ابن خالت امي هههههههههههه
والنبي انت عسل وسكر مقالب يا سوووو

وفيه دكتور بينضف الودان هايل فى ميدان العتبه كاتب اصلح بوابير جاز ههههههههههههههه

غير معرف يقول...

رااااااااااااائع
مبسوطة من موضوع السيناريو
لانى نفسى اجرب الموضوع ده
حبااااه جدا
وحساه رسالة قوية
اعانك الله
ولما اشوف هدى

ربنا يكرمها
ويكرمك
ويوفقنا جميعااااا

سبتلك رد على اسئلتك
دعواتك

كيكى عوووووو يقول...

عوووووووووووووووووو انا جيت اتخديت
...............................
انا جاية اتخانق معالك خانقة كبيرررررررررة
...........................
عارفة انك مشغول مووووووووووت
بجد
بجد فرحت اووووووووووووووووى ليك
انت بجد ياسووووووووووووووو
تستاهل اكتررررررر من كدة كمان..
والله مش بجامل...انت انسان كويس جدااااااااااا..دة واضح بجد
والله ربنا هيكرمك يابنى..الخانقة بقى لييييييييية
علشان افشت لك تعليق عند مدونة
بتاريخ النهاردة
ماشى ماشى.ياعم...كيكى خلاص راحت عليها
اهى اهى......
...................
لو هتيجى فكك من البوست الجديد
وخليك فى البوست بتاع برعى وتفيدة اوك
..........................
اخررررررررررررررررر حاجة
ربنا يكرمك ويسعدك ويهنيك دنيا واخررررررررررررررررررة
عووووووووووووووووووووووووووووو
دومت بالف صحة وخيررررررررررررر

Unknown يقول...

سوووووووووووووووووووووووووو
واحشني جدا والله العظيم
ايه اخبارك وعامل ايه
ربنا يوفقك وييسر لك كل خير
ومنتظرين اعمالك ياعمي ,واكيد هتقدم حاجه فيها فكر وهدف بأذن الله
وتمنياتي بالتوفيق والنجاح
وجزاكم الله كل خير

غير معرف يقول...

معقولة ياسوو فيلم كبارية معجبكش ده كل اصحابي دخلوه وبيقولوا عليه حلو اوي طب انا هستنى تعلقيات على الفليم قبل ما اتدبس وادخله

تحياتي ياسووووووووو

الباحث عن الحقيقة يقول...

انا فيه حاجه مستغربلها

بقالي سنة كل مدخل على البروفايل بتاعك ألاقي سنك تلاتين سنه
هو انت مش بتكبر يا عم ولا ايه

لا بلاش الاونطه دي يا سووو

بطاقتك يا خويا لو سمحت لما نشوف حكاية سنك اللى مش بيكبر ده يا عجوز

مدحت محمد يقول...

اولا حمد الله على السلامة رجوعك من اسكندرية

ثانيا الله يكون فى عونك فى الشغل بتاعك ويوفقك دايما

ثالثا عبد الباسط حمودة

انا الاغنية عجبتنى بجد
لانى انا كتير بحس انى انا مش عارفنى
تحياتى ليك ياباشا

Soooo يقول...

وومن

ياقهلا ياقهلا
ايوه ياعم .. عملتي ريدر وماحدش قدك

والف شكر على دعوتك وعلى تشجيعك

وصدقيني انا باعتقد ان عبد الباسط حموده مشارك في التكاتك وبيوزعو البون ليه مع كل توك توك

فاضل انهم يدخلو وزارة الصحه شريك متضامن عشان توزع شريط ريفو على الركاب .. وشريط صراصير على السواق

وربنا يستر بقى على اللي ماشي على رجليه



سلاموووووووووووز

Soooo يقول...

Rehab Mostafa

الله يبارك فيكي وربنا يستر عشان انا متخوف من التلات حاجات كلهم على بعض

وعلى فكره انا مش باقول التعليقات دي عشان اقلل منه كشخص من وجهة نظر البعض هو مطرب
انا منزل التعليقات دي عشان اوضح ان الناس البسيطه اللي ماكانتش زمان تعرف يعني ايه نت .. بقت بتدخل وبتتكلم
يبقى بالتالي لازم احنا نحطهم في دماغنا واحنا بنتكلم
مش نقتصر الكتابه باللغه العربيه الفصحى بس ونسيب توجيه الناس البسيطه دي

وربنا يخليكي ويسعدك ويبسطك ويكرمك ويوفقك دنيا وآخره يارب



سلاموووووووووز

Soooo يقول...

ابتسم من فضلك

اهلا بيكي في اول زياره ليكي ويارب تعتبري مدونتي زي مدونتك تمام وتشرفيني بتعليقاتك وبزيارتك دايما



سلاموووووووووووز

Soooo يقول...

واحدة مفروسة

ولو اني مش فاهم قصدك بان كل المدونين مش بيتمنولي التوفيق
لكن ربنا يوفق الجميع



سلامووووووووووز

Soooo يقول...

Z_Diva

الله يكرمك يا ام زعبولا يارب
بس لسه الحوار ده قدامه فتره .. خصوصا حوار الكتاب
وان شاء الله تكوني ساعتها في مصر وتعزميني على بلبع في سنكريه وانا ياستي هبقى اجبلك عدد اتنين نسخه ممضيين بي .. ببلاش

وبالنوسبه للحلقه الواحد وعششين .. هو انتي بتاخدي المقياس بالبروازر بتاع اليوندوز .. طب حيث كده بقى هصغر الحلقه واكبر الفونط .. واخلي البراوزر قدها عشر مرات

وياستي بخصوص التعليقات وانك تعلقي .. انا اكيد طبعا بافرح بالتعليقات خصوصا لو من ناس انا باعزهم وباحترمهم زيك .. لكن لو في ظروف مانعاكي يبقى كفايه علي انك تشرفيني وتقريلي حاجه انا كتبتها

وانا اللي لازم اعتذر عن عدم قدرتي على متابعتك والتعليق عندك لكن انتي عارفه اكيد الظروف اللي بامر بيها وارجو انك تقبلي اعتذاري

وربنا يسعدك ويكرمك ويبسطك ويوفقك ويرضيكي دنيا وآخره يارب



سلامووووووووووووز

Soooo يقول...

3ala asm masr

الله يخليكي ياهنوده والف شكر على كلامك الجميل ده وعلى تشجيعك لشخصي المتواضع

وربنا يارب يسعدك ويكرمك ويبسط ويوفقك ويرضيكي دنيا وآخره يارب



سلاموووووووووز

Soooo يقول...

لماضة

الله يبارك فيكي يارب .. بس الحقيقه انا ماقلتش لانه ماجاتش فرصه اتكلم وكمان انا كنت مسافر اغير جو واستجم مش اتكلم عن التدوين والكتابه والحوارات دي

وياستي لهوووي الطويله دي مش تريقه خالص ولا اقدر اتريق عليكي .. دي بس مجرد تعبير مني اني مش لاقي كلام اوصف بيه جدعنتك وترحيبك بينا انتي واميره

واديكي ياستي عرفتي مين بيغني النشيد
هو بقى نشيد خلاص؟؟؟؟

وعلى فكره .. الاغنيه دي بتتكلم عن واحد فقد الذاكره .. ولما بص في المرايه ماعرفش نفسه
قام قال انا مش عارفني

وربنا يسعدك ويكرمك ويبسطك ويوفقك ويرضيكي دنيا وآخره يارب


سلامووووووووووز

Soooo يقول...

ابن حـجـر الـعـسـقـلانـى

ابو العساعيس حليب هارتي
طب والله واحشني ياجرع
وخللي بالك من كلمة جرع دي
عايزك تيجي البورصه ان شاء الله بقميص ابيض فضفاض وتفتح السبعتاشر زرار الاولانين

وياسيدي ربنا يكون في عونك في ظرظروفك وربنا يكرمك على كلامك الحلو ده اللي انا بجد كنت محتاجه في الفتره دي

وعلى فكره يابو العساعيس .. انا لما حطيت التعليقات دي مش حاططها عشان اتريق عليهم .. انا حاططها عشان اوضح للمدونين اللي بيقولو نتكلم باللغه العربيه فقط .. اوضحلهم ان في فئه ظهرت في مستخدمين الانترنت .. الفئه دي بسيطه جدا .. في حين انها ككتله شعبيه عددهم كبير جدا .. يبقى الاحسن لينا كشعب اننا نقرب وجهات النظر من بعض ومانخلقش فجوه في التواصل بيننا وبينهم

اما بخصوص رمضان البرنس الله يرحمه .. فلعلمك انا كنت مره قاعد مع معيد في معهد الموسيقا العربيه وقاللي ان رمضان البرنس كمطرب ليه امكانيات صوتيه رهيبه جدا .. بس اللي كان ناقصه شوية تليمع واختيارات معينه وبعدها ماكنتش هتعرفه
بس ربنا يرحمه ويرحم كل موتانا وموتى المسلمين

وصدقني يابو العساعيس انا والله بافرح بيك لما بتعلق عندي وبافرح كمان لما الباحث بيعلق عندي .. خصوصا وانكم ناس بجد انا باحترمهم فكرا وشخصا
وسلامي لحليب قليبي التمنياوي طه

ملحوظه
بخصوص فيلم كباريه .. انا هقول اللي حسيته كمشاهد لاني مش ناقد ولا محلل ياجرعاااااان


وربنا يسعدك ويبسطك ويكرمك ويوفقك ويرضيك دنيا وآخره يارب




سلامووووووووووز

Soooo يقول...

يوميات فنانه مفروسه جداا

الف الف الف مبروك عالشغل وربنا يارب يوفقك فيه
بس ايه ده .. انتي لحقتي بهدلتي الدنيا عندكم في البيت وخليتي باباكي وافق بسرعه
لااا .. ده انتي الواحد يخاف منك بقى

وبخصوص تجمع المدونين .. احنا سافرنا اسكندريه وكنا حوالي خمس مدونين وكلنا كنا ولاد .. وماكانش فيه مدونين بنات من مدونين القاهره .. اي نعم اتعرفنا هناك بمدونين اسكندريه سواءا ولاد او بنات .. بس المشكله كانت في سفر المدونات اللي من القاهره نفسهم

وسبق وقلتلك يا ياسمين اننا بنبقى على اتصال ببعض من خلال الايميلات مش من مجرد المدونات وبس

وياستي بخصوص اغنية انا مش عارفني .. انا ماعنديش اعتراض عليها كأغنيه او كمغني او كمستمعين .. انا بس حبيت اوضح لبعض المدونين اللي بيقولو لازم نتكلم بلغة عربيه فصحى ان في ناس ابتدت تستعمل النت وابسط من البساطه ومايقدروش يفهمو كلمتين على بعض بالفصحى
ولازم اننا نخلق مابيننا وبينهم حالة تواصل عشان نقدر نعمل حاجه ونحاول نصلح من نفسنا كمجتمع وكمصريين

والف شكر ياستي على حكمدار دي ولو اني مجرد واحد بيشخبط بس مش اكتر

وربنا يارب يارب يارب يكرمك ويبسطك ويسعدك ويوفقك ويرضيكي دنيا وآخره يارب



سلامووووووووووووز

Soooo يقول...

أحسن تـستاهـل

لا تقلقي يامهاميهو
انا اعرف اتنين صحابي نزلو الاغنيه والجهاز بتاعهم ماحصللوش حاجه
اي نعم انا لما نزلتها الويندوز ضربت .. بس دي حاله شاذه .. او اعتقد كده

والحقيقه مش عارف هو فعلا بتاع اديني قلبك ولا التاني حمدي باتشان .. بس ولاد عبد الواحد كلهم واحد يعني

وياستي الله يكرمك على انك واثقه في من سنة اتنين وتمانين من ساعة ماكنت انا لسه مادخلتش ابتدائي
والحمدلله انك حاطه صورتي فوق الحلل عشان افتح نفسكم وتعرفو تاكلو .. ولا انتي حاطه صورتي عشان تساعدك عالرجيم؟؟؟؟

وصدقيني لو عالفلوس لما تجري في ايدي .. فانا والحمدلله مش باعمل ده عشان الفلوس بس .. لان الفلوس بتروح وتيجي .. المهم انها تفضل سيكا يعني

والف شكر على كلامك وربنا يارب يارب يسعدك ويكرمك ويبسطك ويوفقك ويرضيكي دنيا وآخره يارب


سلامووووووووووز

Soooo يقول...

شفقة هانم واحسان بك

اهلا بيكي ياشفقه هانك واهلا باحسان بك
وياستي الف شكر على كلامك الجميل وربنا يسعدك ويكرمك ويوفقك ويبسطك ويرضيكي دنيا وآخره يارب



سلامووووووووز

Soooo يقول...

غني يابهيه

درش باشا حليب هارتي

طب والله وانت كمان وحشتني

وياسيدي تآنس وتنور واحنا نعمل معاك احلى واجب والله

وبالنوسبه اني ماتكلمتش في حوار السيناريو لاني كنت مسافر عايز اريح دماغي ومش طالبه اتكلم في تدوين وكتابه والحوارات دي

بس قوللي انت .. انت بتكتب مع حفظي كإيه يعني .. يعني كسيناريست تحت التمرين واسمك هيبان ولا مجرد كتابة بأجر؟؟؟
اصل انا اتقرصت في الحدوته دي كتير وزهقت منها

عموما ربنا يوفقك ويسعدك ويكرمك ويبسطك ويرضيك دنيا وآخره يارب



سلامووووووووووز

Soooo يقول...

عيله مفتريه سابقا

الله يخليكي ياستي ويباركلك على البؤين الحلوين دول
وماتخافيش .. بمجرد ما افيش الهوامش وارستق المسائل هبقى اديكي رنه

والحمدلله ان اختياري في البورنامج الاذاعي لرائعة عبد الباسط حموده .. انا مش عارفني .. حاز على اعجابك واعجاب الاخوة المستمعين
واهدي الاغنيه لتيته وجدو في الخرطوم .. ولعباس ووحسنيه في زفتى .. ولاخويا وابن منتقتي .. سيد أذيه واقوللو ربنا يفك حبستك وترجع تولع في المنطقه بأنابيب الجاز زي مانت بتعمل

وربنا يسعدك ويكرمك ويبسطك ويرضيكي دنيا وآخره يارب



سلاموووووووووووز

Soooo يقول...

هناء

طب والله العظيم ليكي وحشه وكنت مفتقد زيارتك وتعليقاتك
وانا عارف اني مقصر في حقك بس الظروف زي مانتي عارفه

وربنا يارب يكرمك ويبسطك ويسعدك ويرضيكي دنيا وآخره يارب



سلامووووووووووز

Soooo يقول...

سومه ...مجنونه في بلد عاقل

خبر ايه ياسومه
ده انتي في الكاظوظه خالص
يعني قريتي الموضوع اول مره ومافهمتيش اي حاجه خالص ؟؟
انتي متأكده انك لسه في كامل قواكي المهلبيه ولا اتعالجتي ولا ايه

وياستي حاضر .. ان شاء الله لما ربنا يريد والحوار بتاع الكتاب يطلع .. هابقى احكيلك كنت باتكلم عن ايه

وبخصوص عبد الباسط حموده .. هو نفسه اللي بيغني اغنية الزبالين اللي بتقولي عليها

وانا لما نزلت الموضوع مانزلتوش عشان اتريق عليه وعلى اللي بيسمعوله
لأ
نزلت التعليقات عشان اوضح ان الفئة دي ابتدت تدخل عالم النت وتتكلم وتعبر عن رأيها .. اي نعم كلامهم واسلوبهم مش قد كده .. بس اهم موجودين .. واحنا دورنا اننا نحاول نخلق حالة تواصل فكري مابيننا وبينهم .. مش نقول نكتب باللغة العربيه الفصحى وننسى ان في ناس ممكن ماتعرفش كلمتين على بعض بالفصحى .. في حين انهم بيمثلو اغلبيه في المجتمع المصري ولو قدرنا نخلق حالة تواصل مابيننا وبينهم يبقى اكيد هيكون في مصلحة المجتمع

وبالنوسبه لحوار الاغنيه .. ممكن يكون الكود اللي حطيتيه معمول انه يشتغل لما حد يشغل الاغنيه مش معمول اوتوماتيك
بس نصيحتي ليكي بلاش اغنيه خالص .. عشان بتتقل اي صفحه او اي مدونه ساعة لما حد يجي يفتحها

وياستي انتي ولا رخمه ولا حاجه .. بالعكس انتي عسوله وزي القمر
وربنا يسعدك ويكرمك ويبسطك ويوفقك ويرضيكي دنيا وآخره



سلامووووووووووووز

Unknown يقول...

ربنا يوفقك فى كل حاجة يااااااارب ما يهمكش التاخير ولو انى لو كنت باعرف ازرغد كنت رقعت واحدة اول ما شفت تعليقك عندى فرحت جدا والله...... كنت راكبة المشروع اذ بى افاجا ان فى بنى ادم بيقول بصيت لروحى فجاة تعبت من المفاجاة ماقدرتش اكتم الضحكة بصراحة راحت البنت اللى قاعدة ورايا قالت لى دة عبد الباسط حمودة قلت لها مش دى القضية اصله فكرنى باللمبى وهو بيقول لفيحاء لما بابص لك وبعدين اروح باصص فى المراية احس ان انا شايف حيوان.... وبعدين لما سيادتك حطيت الغلاف عرفت هو ليه تعب من المفاجاة..........
ماتبقاش تقطع الزيارات يا اخويا والنبى سلامووووووووز

Soooo يقول...

الباحث عن الحقيقة

لا ياعم باحث .. بما انها دخلت في صحافه صفرا وانا باحب الصحافه الصفرا .. فيبقى موافق نتصور صورة كده انما ايه
احنا نروح اي كباريه محترم .. ونشوفلنا رقاصتين محترمين .. لابسين من غير هدوم وكللو في الاحترام .. وناخدلنا كام صورة في الاحترام
وعلى رأي ابو العساعيس .. احب سوسو

ربنا يكرمك ياعمنا ويخليك يارب على الكلام الحلو اللي بتقولو واللي انا ماستحقوش ولا استحق ربعه حتى

وبعدين بخصوص السن .. ياخي الاعمار بيد الله .. وربنا عالم انا عندي كام سنه .. واساسان اساسان انا مش مطلع بطاقه
ينفع كارنيه مكتبة سوزان مبارك؟؟؟

ربنا يسعدك ويكرمك ويبسطك ويوفقك ويرضيك دنيا وآخره يارب



سلامووووووووووز

Soooo يقول...

totaaaa

اقولك على سر يا توتا
في موضوع انتي علقتي عليه وقلتي ان حالتك النفسيه كانت مش متظبطه وانتي رحتي داخله عندي والحمدلله قريتي كام حاجه وحالتك بقت احسن

هتصدقيني لما اقولك ان تعليقك ده احسن تعليق جالي ويمكن هو احد اهم الاسباب اني احاول اسعى في حوار الكتاب والفيلم اللي باكتبهم

ربنا يارب يارب يارب يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووووز

Soooo يقول...

فاتيما

لا ياستي وانا مايرضينيش ان احلى فاتيما تحقد وتضايق .. وان شاء الله هنعمل رحلة قريب وكل الناس تروحها

وبمجرد مانشوف بس التظابيط والاتوبيس والفندق والحوارات دي هننزل موضوع بالتفاصيل

وبخصوص القصة اللي كاتباها هدى .. هدى اصلا رهيبه بجد في كتاباتها .. والقصه دي تحديدا استفزتني لانها خدتني في سكة تانيه خاااااالص وانا باقراها وبعد ماخلصت فضلت متنح وقريتها تاني بتاع خمس مرات ورا بعض
وان شاء الله هيطلع حاجه حلوة ويارب يعجب الناس

اما بخصوص الشيعبي .. عدويه حالة تانيه غير عبد الباسط .. وهقولك ليه .. عدويه لما ظهر كان بيعبر عن الناس البسيطه في مصر .. مش شرط شعبيين ولا ارستقراطيين .. ناس بسيطه وخلاص
انما عبد الباسط بيمثل شريحة الناس المطحونه من رجال الاعمال السفليه .. وسفليه لانهم خلو الطبقه دي اسفل سافليين

وبعدين يعني ايه لما باجي هنا باتعب .. ومين قالك ان المدونه هتقفل .. المدونه ان شاء الله هتفضل مفتوحه زي ماهي
بس مواضيعي ممكن تقل شويه وماتبقاش بالغزارة اللي انا فيها

وبعدين خدي هنا .. بتسلميلي على ماما ولا لأ
بلغيها سلامي وقوليلها تدعيلي لاني محتاج دعاها ده قوي الفتره دي

وربنا يارب يارب يسعدك ويسعدها ويبسطكم ويكرمكم ويرضيكم دنيا وآخره يارب



سلامووووووووووز

Soooo يقول...

M

هو ايه الفرق بين الهوت ميل والماسنجر؟؟؟

نرجو التوضيح والافاده



سلاموووووووووووز

Soooo يقول...

GiGi

كلامك ده مسئوليه كبيره قوي وانا خايف ماكونش قدها

بس ربنا يارب يارب يقدرني واعمل حاجه تعجب الناس وربنا يكون راضي عني باللي باعملو يوم القيامه يارب

وربنا يسعدك ويبسطك ويكرمك ويوفقك ويرضيكي دنيا وآخره يارب




سلامووووووووووز

Soooo يقول...

البت قباحة

اهلا بيكي يافندم واهلا بكل اهل اسكندريه واهلا بكل اللي من طرف داكتورة لماضه

وياستي الجايات اكتر من الرايحات وان شاء الله لما اهلك يرجعو بالسلامه يبقى لينا تجمعات تانيه

ملحوظه
الله يكرمك لو مافيهاش تقل منني .. خلي اهلك يدعولي وهم بيعملو العمره ان ربنا ينورلي طريقي

وربنا يسعدك ويكرمك ويبسطك ويوفقك ويرضيكي دنيا وآخره يارب



سلامووووووووووووز

Soooo يقول...

هيثم الدهشان

حليب هارتي والله يابو الدهشنه

ربنا يسعدك ويكرمك ويبسطك ويوفقك ويرضيك دنيا وآخره يارب



سلاموووووووووووز

""""" يقول...

ربنا يوفقك يا سو وتبقى سيناريست وكاتب معروف وجامد جدا
بس متنساناش وقتها
احنا كمان محتاجين يكون فى تواصل بينا عبر المدونات
وربنا يوفقك باذن الله

Soooo يقول...

إنجى

ربنا يارب يارب يسعدك ويبسطك ويكرمك ويوفقك ويرضيكي دنيا وآخره يارب


ملحوظه
بادعيلك وادان الضهر مرفوع .. وربنا يتقبل يااااارب




سلامووووووووووز

Soooo يقول...

الشنكوتي الكبير

يابو الشناكيت لو هنتكلم عن الكنوز .. فانت لوحدك كنز
ده انت اول واحد قرالي في المدونه وشجعني على اني استمر في اللي باكتبه
ودي عندي ليها معاني كتير لو فضلت اقولها مش هيقضيني عمري الجاي

بطل انت دلع بس وعايزين نقرالك حاجات جديده

وربنا يسعدك ويبسطك ويكرمك ويوفقك ويرضيك دنيا وآخره يارب



سلاموووووووووز

Soooo يقول...

ست البيت

يامروه احنا اخوات ومافيش بيننا الكلام ده كللو اصلا

وياستي انا ماقلتش حوار الكتاب ولا الفيلم لانهم لسه في علم الغيب ولاني كنت مسافر اريح دماغي شويه

وصدقيني انا ولا قريت عليكي ولا حسدتك ولا اعرف مين الشيخ وفيق ده من اصلو

وربنا يسعدك ويبسطك ويكرمك ويوفقك ويرضيكي دنيا وآخره يارب



سلامووووووووووز

Soooo يقول...

shayma

الله يخليكي ياشيمو يارب
وبجد انا سعيد ان في ناس محترمين زيك بيشجعوني وبيقفو جنبي
ولو ان ده بيحسسني بخوف مش عايز اقولك عليه

بس ان شاء الله ربنا هيقدرني اعمل حاجه تعجبكم وتعجب كل الناس وربنا يبقى راضي عني بيها يارب


ربنا يسعدك ويكرمك ويبسطك ويوفقك ويرضيكي دنيا وآخره يارب




سلاموووووووووووز

Soooo يقول...

shahy

الحمدلله ان المذكرات عجبتك يا ماما شاهي

وتصدقي اني ماخدتش بالي من حوار الفيشار ابو كراميل ده خالص
شفتي بقى .. اديكي ابتديتي تبصي للحاجات الصغيره وتفصصيها بنفسك
وشويه شويه هتعرفي تنزلي مواضيع تحللي فيها الافلام فشر اجدعها محلحل

سلامي لاخواتي الصغننين وخليهم يلعبو براحتهم ويقعدو عالكومبيوتر براحتهم ويقضو الاجازة وهم مبسطوين

وربنا يارب يارب يسعدكم ويبسطك ويكرمكم ويرضيكم دنيا آخره يارب




سلامووووووووووز

Mkjwe يقول...

.. عمرو عبدالله بردانة يقول
انا نفسى امشى مع بسمة ونسمة بس مش عارف على فكرة اى كلام هنا متعلق بايمن انا اللى كتبه علشان يكرهوه بس ايمن ماكتابشى حاجة والامارة انا شطلاوى
======
أههههخخخخ أحب الأنسان يكون صراحتن صريح ... أنت يا سوووو أنسان فظيييييييييييع أنت جامد يا سووووووووووو الله يوفقك بحياتك

Dr. Ibrahim يقول...

إنجز يا عم انت

نزل الحلقة22

:)

د/هيما

الـجـدة فـصـيـحـة يقول...

السلام عليكم ورحمة الله وبركاته

ربنا يوفقك في حياتك ويوفقك في كل مشاريعك
ويوفقك دائما لما يجب ويرضى


دمت في رعاية الله

•√أريـ السمر ـج√• يقول...

الله يوفقك و يكرمك ان شاء الله فى كل اللى شغلك و ييسر لك طريقك

و اكيد ح توافينا بالأخبار علشان نشاركك فرحتك بأذن الله

على فكرة الاغنية دي انا كتبت عنها قصة قصيرة لكن ما نزلتهاش .. بصرف النظر عن الصوت الكلمات تحفة ..


دمت بكل الخير و لك مني علبتين نسكافيه واجب و دين عليه

زُمُرده يقول...

مبرووووووك يا سوووو
-----------------

وراء الكواليس انسان
قلبه بالاحساس مليان
شايل من الهموم كتير
وعاملي واد خطير
نسي ان الهم ليه ودنين
في الدنيا يشيلوه اتنين
---------------------

انا عايزه اسمي ع الغلاف

اه
حقي مش انا اللي هصممه

اه الغلاف

وانت عليك الباقي

اضحك يا اجمل سوووو

Eldebug يقول...

ايوة كده يا معلم ... شكرلك اقتنعت بوجهة نظر الاخ انيس منصور

وكما ينص شعار شلتنا ... صاحب بالين كداب وصاحب تلاتة منافق ... وصاحب اربعة يبقى واد جامد محصلش

ربنا يوفقك يا كنج ونشوفك على افيش السينما ان شاء الله

Unknown يقول...

طبعامه لله الر اللى السبب فى عدم ورى للقاء المدونين اسكندرية
ثانيا: را يوفك وبالتوفيق فى اللى بتعمله وربنا يعينك
تحياتى

Soooo يقول...

اهو ده عيبه

يادوللي ده انا يشرفني انه يبقى في توارد مخاطر مابيننا وبين بعض

وبعدين ياستي انا شكلي لا فالح في ديكور وحديد واسمنت ولا فالح في كتابه

انا بافكر اعتزل واتجه للتدريب

الف شكر على دعاكي لي وربنا يسعدك ويبسطك ويوفقك ويرضيكي دنيا وآخره


سلامووووووووووز

Soooo يقول...

بيكيا للبيع

انتي بتقولي فيها
انا فعلا وداني بايظه بجد وعايز دكتور يكون كويس لان ودني الشمال تقريبا مش سامع بيها حاجه دلوقتي

بس ده من قبل ما اسمع انا مش انا وعبد الباسط حموده مالوش دعوة بالحوار ده


وربنا يسعدك ويكرمك ويوفقك على دعاكي لي وانك بتتمنيلي الخير



سلامووووووووووز

Soooo يقول...

شيماء سمير

والله يا شيماء مش مهم تتعليمي سيناريو قد ماهو مهم تبيعي دماغك وتكتبي اللي المنتج عايزه

يا اما كده .. يا اما تروحي في ابو نكله

وربنا يوفقك ويكرمك ويرضيكي دنيا وآخره



سلامووووووووووز

Soooo يقول...

كيكى

ياستي ولا تتخانقي ولا حاجه

خلاص بح .. فنيتو
لا كتاب ولا فيلم ولا اي حاجه

واديني اهو فضيت للمدونه وللناس اللي بتعلق

وربنا يسعدك ويكرمك ويبسطك ويرضيكي دنيا وآخره على كلامك الحلو



سلامووووووووووووز

Soooo يقول...

الفاتح الجعفري

والله ياجعفري ياخويا اللي بيفكر يعمل حاجه نضيفه دلوقتي شكلو هيموت من غير مايعمل حاجه
ويعمل ليه من اصلو
ويقول ليه

هو هيفتكر نفسه حاجه ولا ايه؟؟؟؟


الف شكر على كلامك وعلى تعليقك وربنا يسعدك ويبسطك ويكرمك ويرضيك دنيا وآخره




سلاموووووووووز

Soooo يقول...

مدحت محمد

الله يخليك على كلامك وعلى تشجيعك

وكلنا عبد الباسط حموده على فكره
كلنا مش عارفين نفسنا



سلاموووووووووز

Soooo يقول...

enjy

ياستي الله يخليكي على شعورك النبيل ده

وفعلا نوعية عبد الباسط حموده بيغنو لنوعية اللمبي

والنوعيه دي كترت دلوقتي وظهرت عالنت كمان

واللي قصدته من اني اجيب تعليقات بعضهم .. اننا نحاول نخلق حالة تواصل مابيننا وبينهم عشان نعمل حاجه
بدل ماهم في وادي واحنا في وادي
ده احنا في مركب واحده

وربنا يكرمك ويسعدك ويبسطك ويرضيكي دنيا وآخره



سلاموووووووووووز

Soooo يقول...

amal

ربنا يكرمك يارب

وياستي ماتقلقيش .. ولا هبقى سيناريست معروف ولا كاتب مشهور
اللي زينا لازم يبيعو
يبيعو اي حاجه

واخوكي ماحيلتوش حاجه يبيعها


وربنا يسعدك ويبسطك ويكرمك ويرضيكي دنيا وآخره



سلاموووووووووووز

Soooo يقول...

L0vElYGh0sT14


الله يكرمك ويخليك على كلامك الجميل ده واللي انا ماستحقش ربعه

وربنا يسعدك ويبسطك ويكرمك ويوفقك ويرضيك دنيا وآخره



سلاموووووووووووز

Soooo يقول...

Dr- Hema

مش عارف اقولك ايه والله

يعني ابسط حاجه .. ابسط حاجه .. ابسط حاجه يادكتور انك تتمنى التوفيق للانسان اللي بيحاول انه يرسم بسمه على وشك
ياخي ادعي دعوة حلوة حتى لو كانت من ورا قلبك

مش تقولي انجز ونزل الحلقه زي ماكون شغال عندك

مش عارف

Soooo يقول...

الـجـدة فـصـيـحـة

وعليكم السلام ورحمة الله وبركاته

ربنا يكرمك ياجدتي على دعاكي ده

بس تقريبا ربنا مش عايزني اعمل ولا حاجه من التلات حاجات اللي كنت مشغول فيهم
التلاته بخ


ربنا يسعدك ويبسطك ويرضيكي دنيا وآخره



سلامووووووووووووز

Soooo يقول...

•√أريـ السمر ـج√•


الله يخليكي ياسمر على كلامك الحلو ده

وبمناسبة الاخبار وموافاتي ليكي بيها

احب اقولك ان بح كتاب بح فيلم بح اي حاجه

عادي خالص



ربنا يسعدك ويبسطك ويوفقك ويرضيكي دنيا وآخره



سلامووووووووووووز

Soooo يقول...

زُمُرده

الله يبارك فيكي ولو انه خلاص مافيش حاجه اصلا دلوقتي وكللو راح في الوبا

وياستي ولا ورا الكواليس انسان ولا حاجه

ورا الكواليس بقايا انسان .. كانت بتحاول تجمع نفسها وترجع بيه انسان مره تانيه
لكن كل ماتتجمع حتتين .. تضيع التالته

عادي عادي
الواحد متعود على كده


وربنا يسعدك ويكرمك ويبسطك ويوفقك ويرضيكي دنيا وآخره




سلامووووووووووووز

Soooo يقول...

Eldebug

والله بغض النظر عن بعض توجهات انيس منصور بس انا باحب اسلوبه في الكلام والاقناع

وبخصوص انك تشوفني على افيش سينما .. اعتقد ان ده مش هيحصل طول ماحنا في البلد دي

وربنا يسعدك ويكرمك ويبسطك ويوفقك ويرضيك دنيا وآخره



سلاموووووووووووز

Soooo يقول...

ayman badr

والله مافهمت ولا حاجه من اول سطر

بس في العموم

ربنا يسعدك ويبسطك ويكرمك ويرضيك دنيا وآخره




سلامووووووووووز

•√أريـ السمر ـج√• يقول...

أن شاء الله ربنا يكتب لك اللي فيه الخير

و ان شاء الله يوفقك لفرصة افضل

و بعدين انت ما شاء الله عليك موهوب يعني اللي جاي احسن


دمت بكل الخير

Miss. Sosa يقول...

انا عارفة ان تعليقى متأخر اوي (وش مكسوف)

بس والله اختك مزنوقة والشاشة اتحرقت في وشها والدنيا مش ولابد (وش محروق )


بس بجد لما شوفت اخبارك التلاتة فرحتلك جدا .. بجد ربنا يوفقك يارب

انت انسان ممتاز وانسانيتك عالية جدا وانا لاحظت ده فى تعليقاتك وفى متابعتك للمدونات اللي بتحس ان اصحابها في مشكلة .. وكفنان انت فنان جميل وموهوب بجد فربنا يوفقك يارب واتمنالك كل خير صحة وسعادة

ســــــلام

Rosa يقول...

مبروووك يا سووووووووو
ان شاء الله يبقى فيلو ناجح
و الكتاب يبقر رائع
متاكده ان شاء الله انك هتكون حد مشهور جدا
و محدش هيعرف يكلمك غير بمهتد من السوكورتوره
الف الف الف مبروك مقدما ان شاء الله
و يا رب نسمع عنك احبار كويسه كدهعلى طول
و باركلي.. عقبالك ان شاء الله
:)

Soooo يقول...

•√أريـ السمر ـج√•

الله يخليكي ياسمر على الكلام الجميل ده

وصدقيني والله العظيم كلامك وكلام كل اللي بيعلقو وبيشجعوني احسن من مليون كتاب وملين فيلم
وربنا يعمل اللي فيه الخير للكل يارب


وربنا يسعدك ويبسطك ويكرمك ويوفقك ويرضيكي دنيا وآخره يارب



سلاموووووووووز

Soooo يقول...

Miss. Sosa

ياستي ولا تتكسفي ولا حاجه
والف بعد الشر عليكي من اي حاجه وحشه والف سلامه عليكي من اي اصابات كومبيوتريه

وبجد بجد مش عارف اقولك ايه على كلامك الجميل ده
بس صدقيني انا مش باعمل ده لحاجه غير اني في فتره من فترات حياتي كنت محتاج احس ان في حد جنبي حتى ولو بالدعاء فقط
لكن ربنا ما ارادش ان ده يحصل ومريت باسوأ فتره ممكن حد يمر بيها وانا لوحدي
وعشان كده كرهت ان حد يحس الاحساس اللي حسيت بيه

وربنا يسعدك ويسعد الكل ويبسطكم ويوفقكم ويكرمكم ويهيئلكم الخير ويرضي الجميع دنيا وآخره يارب




سلاموووووووووز

Soooo يقول...

Rosa

طب والله عيب عليكي يا داكتوره روزا لما تقولي اني هبقى مشهور ومافيش حد هيعرف يتكلم معايا
لسبب بسيط جدا .. ان ماينفعش ابعد ولا اتكبر على ناس بقيت باعتبرهم اهلي واصحابي المقربين واخواتي وبقو بيشغلو جزء كبير من حياتي

وبعدين شهرة ايه يابنتي
الاهم من الشهره والكلام ده .. اني اعمل حاجه احس اني عايش عشانها .. واقف قدام ربنا يوم القيامه ولما اتسأل عن حياتي عملت فيها ايه .. اقول اني حاولت اعمل حاجه

والف مبروك ياداكتورة على الخبر السعيد وربنا يارب يباركلكم في بعض ويهيئلكم الخير من عنده ويسعدكم ويبسطكم ويرضيكم دنيا وآخره يارب




سلاموووووووووووز

Zika يقول...

ههههههههههههههههههههههههههههههههه
ايه يا عم اللي انت كاتبه ده
انا مش عارف ابطل ضحك
المهم
مبروك علي الابخار الفنيه الادبيه بتاعتك دي وربنا يوفقك
بالمناسبه انا حاليا بمثل في فيلم روائي قصير مدته 40 دقيقه ووالسكربت بتاعي وبالتالي
اقولك ربنا يوفقك ويوفقني :D
تحياتي يا سوو باشا