السبت، ٢٦ جمادى الأولى ١٤٢٩ هـ

سينماتك .. واقعية مصرية

.. احتار الفلاسفة في توصيف العمل الفني ومنطقيته
هل هو العمل الذي يجمل الواقع .. ولا هو تجسيد صريح للواقع !؟؟؟
----------------------------------------------------------
شدني من فتره خبر قريته في الجرنان .. كان بيقول ان فيلم الغابة بيمثل مصر في مهرجان كان .. ولما قريت الخبر كللو لقيتهم بيقولو انه بيعرض على الهامش .. زي فيلم ليلة البيبي دول .. بس اللي انا فاكره ان الفيلم ده اتعرض تقريبا في مهرجان القاهرة السنيمائي في الدورة اللي فاتت .. ومالحقتش اشوفه .. واستنيته يتعرض في السينما بعد المهرجان لكن ما اتعرضش .. قلت لنفسي خلاص .. فيلم الغابة .. راح في الوبا يا هنادي

يوم الخميس بعد ماخلصت قعدتي عالبورصه وانفض الجمع .. قلت آخد بعضي واروح اشوف أي فيلم .. خصوصا ان اليوم ده ماكانش متظبط معايا وحصل لي موقف وحش قوي قوي .. قمت شديت الرحال واتجهت اشوف في ايه بيتعرض .. وفي وسط مانا باشوف ايه الحياه .. لقيت بوستر فيلم الغابة
الحق اقفش اقطع ادخل اقعد .. وقعدت في السينما
مع بداية الفيلم .. شدتني المزيكا .. وعرفت ان الموسيقا التصويريه لـ عمرو اسماعيل حتى من قبل ما اشوف اسمه .. لانه ملحن خد لنفسه طابع مصري اصيل .. والحقيقه .. استبشرت خير وقلت هشوف حاجه حلوة ان شاء الله
--------
الفيلم قصة وسيناريو وحوار ناصر عبد الرحمن وأحمد عاطف .. وناصر عبد الرحمن هو مؤلف فيلم هي فوضى وفيلم حين ميسره مع خالد يوسف .. وبالتالي وضحت الصورة وان الفيلم بيتكلم عن العشوائيات بواقعية .. لكن وجود أحمد عاطف مخرج الفيلم مع ناصر في الكتابه .. ادى للفيلم طابع تاني
خصوصا ان احمد عاطف كمخرج ليه فكره الخاص .. واللي بان من أول افلامه (عمر الفين) .. واللي انا شايف انه اكتر فيلم بيعبر عني كـعجوز وعندي تلاتين سنه
وعن جيل كامل فقد الهويه وفقد الحلم وفقد كل حاجه
--------
القصه والسيناريو والحوار في المجمل .. واقعية الواقعيه بجد .. واللي يشوف الفيلم ويقول لأ مصر مش كده .. اقوللو خد بعضك وانزل الكُـلحا في البساتين .. أو بير ام سلطان .. أو انزل حكر امبابه .. شوف ارض يعقوب في السيده زينب وزخانيقها
الاماكن دي ابشع مليون مره من اللي اتعمل في الفيلم
القصه والسيناريو والحوار .. اديهم تسعه من عشره .. والواحد الناقص عشان في بعض الحاجات غير ممنطقه .. زي مثلا ان برشامه - البنت العاهرة - بعد ما اتشوهت بقت بتتشقط بميتين جنيه .. في حين انها قبل ماتتشوه وكانت مزه مزه .. كانت بتتشقط بخمسين جنيه بس .. وزي آخر اربع خمس مشاهد .. او المشاهد اللي بعد ما بتنضرب جميله بالسنجه .. واللي حسيت انهم اتكتبو في لوكيشن التصوير وماخدوش حقهم في السيناريو صح
--------
.. التمثيل كان عباره عن مباراه في الاداء مابين مجموعة متناغمه من الممثلين
احمد عزمي وباسم سمره وعمرو عبد الجليل وحنان مطاوع وريهام عبد الغفور ومجموعة أطفال .. سمعت انهم بجد أطفال شوارع .. ولو ده حقيقي .. يبقى أحمد عاطف لازم يتعمللو تمثال في ميدان رمسيس لقدرته على السيطره عليهم من ناحية الكلام والألفاظ .. خصوصا ان اطفال الشوارع مافيش عندهم اسهل من الشتيمه والألفاظ الخارجه خروج سافر عند القمر
لو مسكنا التمثيل .. هنلاقي ان كل ممثل من فريق العمل .. عمل دور عمره بجد
أحمد عزمي في دور حموسه - زي حمؤه بس بالسين - بيؤكد للناس انه ممثل عنده كتير عايز يقدمه .. وبيمثل بعينيه وبيقول بيهم كلام كتير .. مش مجرد واحد بيبي فيس وقمور وبس .. لأ ده هيبقى ممثل ليه تقله .. بس ادوله فرصه وورق مكتوب كويس .. وتشجيع من مخرج واعي .. وساعتها شوفو عزمي ده هيعمل ايه
باسم سمره .. في دور التوربيني - مالوش علاقه بالتوربيني بتاع اغتصاب اطفال الشوارع - بيقفل الدور بالضبه وبالمفتاح على أي ممثل عايز يعمل دور البلطجي .. كفايه أول ظهور ليه في الفيلم وهو في السجن ومخنوق حبتين .. وباين فعلا انه ممثل اتعامل مع مدارس مخرجين ليهم تقلهم واتعلم منهم حاجات كتير .. وبان ده في كزا مشهد .. بس اكتر مشهد عجبني ليه.. مشهده هو والاعرج لما بيشرب خمره مضروبه وبيقولو انا اللي فكيتك من على شريط القطر .. ربطتك والقطر عدّى قطع رجلك .. وبعدها فكيتك .. ممثل تقيل بجد
عمرو عبد الجليل .. الظابط اللي منفض للناس اللي في العشوائيات ومكتفي بس انه يخلي صاحبه يصوره بالموبيل وهو بيضرب الناس بالقلم وينزل فيهم تلطيش .. ده في كومبارس اتضرب ضرب .. ضرب ضرب بجد مش تهريج .. ربنا يكون في عونه والله
حنان مطاوع .. أو برشامه اللي بتشتغل عاهرة عشان تجيب حق البرشام .. واللي بتنضم للتوربيني بعد مايخرج من السجن وتحاول تساعده عشان يودي حموسه في داهيه .. ونتيجة مساعدتها بتنضرب بالموس ووشها بيبوظ وبتشتغل بزياده عشان تجيب حق عملية التجميل .. وليها كام مشهد في الجون بجد .. زي لما بتبص عالجرح في المرايه وهي عند الدكتور
ريهام عبد الغفور .. جميله .. البنت اللي هربت من بيتها والشارع بهدلها لغاية ما اتعرفت على حموسه وتكفل بيها وبقت في حماه وحملت منه وبقو هم الاتنين بيخططو ازاي يأمنو مستقبل ابنهم او بنتهم .. وعلاقتها الحلوة بأطفال الشوارع وانها بتهزر معاهم وبتشرب معاهم مخدرات .. دي عملت مشهد انا سقفتلها عليه .. مشهدها وهي بتشرب سيجارة المخدرات
والتمثيل ده اديلو تسعه من عشره .. والواحد اللي ناقص ده .. خصمته لبعض الهفوات .. زي لحظة الصمت اللي طولت مابين باسم سمره وريهام عبد الغفور في اول مشهد بيجمعهم .. وماكانتش مبرره .. وزي مشهد حنان مطاوع وهي بتضرب البنت اللي سرقتها في فلوس البرشام واللي حسيت انها بتمثل بمبالغه فيه.. وزي لحظة انكسار احمد عزمي لما بيحصلو اللي بيحصلو - مش عايز احرق الاحداث - والمفروض انه كان يراعي انه انكسار حموسه المجرم البلطجي مش احمد عزمي الممثل
--------
الموسيقا التصويريه .. عمرو اسماعيل عامل موسيقا مصريه اصيله ميه في الميه .. بيزيد ايقاعها في المشاهد القويه وبيقل بطريقه ناعمه جدا جدا في المشاهد البسيطه لدرجة انك ممكن تعتقد انه مافيش مزيكا .. وهي دي قمة العبقرية بجد .. وللموسيقا التصويريه وشريط الصوت - الاتنين مع بعض - اديهم تمانيه ونص من عشره .. عشان صوت المزيكا بيعلى ساعات بطريقه مزعجه وبيغطي على صوت الناس كأنه فيلم تسجيلي مثلا
--------
التصوير .. رؤوف عبد العزيز في الفيلم ده محتاج خمسين بوست ليه هو لوحده .. شوية لقطات وزوايا تصوير ولعب إضاءه .. يالهووووووي
عشرين من عشره بجد .. ده مشهد هروب باسم سمره بعد ماضرب جميله بالسنجه في الخرابه .. في حتة فلته وحركة طبيعيه مش ممكنه .. الكلب اللي بيجري من الخوف في اسفل يمين الكادر
ولا آخر مشهد في الفيلم والعيال بيعومو في النيل وهم قالعين وعالناحيه التانيه من الكورنيش مبنى أوراسكوم
--------
الديكور وتنسيق المناظر .. أحمد عاطف من نوعية المخرجين اللي مابيسبش حاجه للظروف .. مختار شوية أماكن للتصوير .. منتهى الواقعيه .. خصوصا ان الفيلم بيتكلم عن العشوائيات .. بس اموت واعرف هو شاف كل الخرابات دي امتى وازاي .. ده من كتر الخرابات اتنين قاعدين قدامي في السينما واحد بيسأل التاني بيقوللو هي الخرابات دي كلها في مصر .. قام التاني قاللو
يابني مصر اصلا خرابه
عشره من عشره
--------
المونتاج .. احمد عبد الله مونتير حلو قوي .. اتنقل مابين المشاهد بطريقه حلوه جدا .. خصوصا ان الفيلم بيتكلم في تلات محاور او تلات حكايات في نفس الوقت .. والشغل اتمنتج بطريقه ناعمه جدا وماخلاش الواحد يحس بأي لحظة ملل او انفلات في تسلسل الاحداث .. ومع زيادة ايقاع الاحداث والفيلم .. التقطيعات كانت سريعه لدرجة ان الواحد حس انه مش قادر ياخد نفسه .. وبعدها لما الايقاع هدي في اخر مشهدين .. الايقاع رجع ناعم قوي .. ايقاع سينما بجد
عشره من عشره
--------
الاخراج .. أعز انا المخرج اللي بيبقى مؤمن بقضيه وعنده استعداد يصرف عليها .. واحمد عاطف عشان مؤمن بفنه ومؤمن انه لازم يكون ليه دور في المجتمع من خلال أعماله .. هو اللي انتج الفيلم وهو عارف انه ممكن مايكسبش من وراه
أحمد عاطف في الفيلم ده .. بيعتبر امتداد لمخرجين واقعيين زي صلاح ابو سيف و عاطف الطيب .. لدرجة اني حسيت في بعض اللحظات اني باتفرج على فيلم البريء او سواق الاتوبيس لعاطف الطيب .. وفي لحظات تانيه حسيت اني باتفرج على خيري بشاره في العوامه سبعين
استمر يابو حميد .. فنك بيوصل صدقني .. كفايه انك خليت الناس اللي داخله الفيلم وهي معتقده انهم هيشوفو لقطه كده ولا كده عشان مكتوب عالبوستر للكبار فقط .. خليتهم بعد ماخلص الفيلم وهم مروحين يسألو نفسهم ..
احنا ايه اللي خلانا نبقى كده ؟؟؟
عشره من عشره
-------
معلش اتكلمت كتير ورغيت كتير .. بس بجد الفيلم يستاهل ان الكل يشوفه ويفكر فيه .. خصوصا اني حاسس انه هيتشال من السينما نظرا لدخول موسم افلام الصيف .. وصدقوني اللي هيشوف الفيلم مش هيندم
.. وانا اهو وانتو اهو
الفيلم ده بعد عشرين تلاتين سنه هيبقى مرجع تاريخي .. للحقبة المباركه .. اللي احنا فيها

كام فلحوظه بقى عالسريع
لو عايزني استمر في اللي انا باعملو من مواضيع سينيماتيك خصوصا واننا داخلين على لبشة أفلام زي ليلة البيبي دول وكباريه وحسن ومرقص وباقي افلام الصيف .. يبقى تجمعولي فلوس عشان اخوكوعاطل .. وتعاطفكم بس مش كفايه

وانا في وسط الفيلم وبعد مشهد خناقه بين باسم سمره واحمد عزمي .. حصلت خناقه بين اتنين في السينما .. وكل واحد معاه صحابه .. ووقفو العرض وخرجو الناس وجابو البوليس
هل تعتقدو ان ده ليه دعوة بالشحنه اللي حسوها واتنقلت ليهم من الفيلم؟؟؟

سوووو

هناك ١٠٥ تعليقات:

2ensan wnsan يقول...

اول تعليق عندك اخيرا

هقرا وارجع اكمل

انا عارف ان انت بتتخنق من الكلام ده بس يللا كله ايزي

2ensan wnsan يقول...

قريت كل لكامك وعجبني جدا بس انت كده تعتبر حرقت الفيلم

انا للاسف مش هعرف اتفرج على الفيلم دا خالص بس على رأيك هو هينضم لهي فوضى وحين ميسره كتأريخ للحقبه المباركه الميمونه الي احنا عايشين فيها دي وهيكون زي افلام العوامه سبعين والكرنك والبرئ واحنا بتوع الاتوبيس وثرثره فوق النيل ومجموعة افلام بتجيب الواقع بكل ما فيه من سواد وكآبه وحقيقه كئيبه

ردا على فلحوظتك الاولي انا طبعا عايزك تكمل السينيماتيك بس انا شكلي هنضم لحزبك للعاطلين ان شاء الله
اول ما تعمله هخش معاك فيه كعضو مؤسس ومقره هيكون في بير ام سلطان ان شاء الله

فاتيما يقول...

متفقة مع التعليق السابق
إن النوعية دى من الأفلام موجودة فى كل فترة زمنية و بتأرخ للواقع مهما كانت بشاعته و صدقه
إستمر يا سى ناقد و إديك بتدى فكرة للى لسه هيشوف
و أقعد إنتا غيظ فيا كل شوية
رايح فين يا سوووو
رايح السينما
جاى منين يا سوووو
جااااى من السينما ....
و حكاية لم الفلوس دى عينيا ليك
بس انت حط حصالة كبيرة شويتين ورا عداد المدونة زى ما عملت خيخة و إحنا هنبقى نحط اللى فيه القسمة ...
و تعالى هنا
إيه البوظان دا ؟؟
عاوز تلم تبرعات مننا و تدخل بيها السيما ؟؟!!!

Soooo يقول...

wa7ed 2ensan wnsan

ياقهلا ياقهلا بالناس اللي قاعده على باب المدونه وهوووب راحت معلقه من قبل حتى ما اخلص توضيب الموضوع وتظبيطه والالوانات والحبشتكانات

وصدقني انا ولا حرقت الفيلم ولا حاجه
الفيلم ده مش قصه ولا مناظر .. الفيلم ده حاله حلوه جدا
اقولك .. ادخل شوفو وعلى ضمانتي

وفي حاجه كمان .. الفيلم ده انضف في التناول من هي فوضى وحين ميسره .. فيلم نضيف وراقي بجد


وبعدين هو في ايه؟؟
هي المشرحه ناقصه قتله
يعني انا باشحت وانت عايز تشاركني في لقمتي
اقولك .. هبقى انصص معاك في السكرته .. بس اعمل انك هتديني جنيه وهتلاقي كل الناس نقح عليها عرق الكرم المصري الاصيل


وربنا يكرمك ويسعدك ويوفقك ويبسطك دنيا وآخره يارب


سلاموووووووووز

Soooo يقول...

فاتيما

ياقهلا بالناس اللي بتقضيها سهر وفيسكافيه ياقهلا

وبعدين حصالة ايه .. انا مش باطلب احسان .. انا باطلب صدقه
وليكي ياستي اني اخد الصدقه دي من هنا .. واجري في الشارع من هنا
عشان تبقى صدقه جاريه

وبعدين معلش يعني .. هو عشان اسماء افلام الصيف ده كباريه وليلة البيبي دول .. تفتكريني رايح انحرف
حاشا وماشا .. انا رايح اشوف فن .. واتكلم عن فن
الفن رساله
والفن ايضا .. لا يكيل بأي فلوس

وبعدين سكرتي انتي وهابقى انصص معاكي .. عايزك بقى تروحي مطلعه جنيه وتقولي ادي اول جنيه .. وانتي هتلاقي الناس تروح على طول مطلعه الفلوس
ماحنا شعب نموت في المنظره


وربنا يسعدك ويكرمك ويبسطك ويوفقك ويرضيكي دنيا وآخره يارب


سلامي لماما العزيزة



سلاموووووووووز

بنوته مصرية يقول...

قولت احجز اول صف علشان اشوف كويس

بس هختار الكرسي اللي في النص لو سمحتي يا فاتيما اقعدي علي الكرسي اللي جمبي
هههههههههههههه

بنوته مصرية يقول...

هههههههههههههههه

يا سووو انت بصراحه ناقض ممتاز

امبارح جوزي جاب فيلم 100.000 قبل الميلاد عارف واحنا بنتفرج بحكي له
قالي انتي دخلتيه امتي قولت له اصله اتحكالي

انا بقي مصممه ادخل فيلم الغابة من كتر ما انت بتشكر فيه

اصل انت ليك نظرة حلوة اووي في الافلام

فانت تدخل الفيلم وتقولي ادخلة وادفع فلوس ومش اندم ولا لاء

يعني انت دليلي في السينما هههههههههههههههههه

اما بنسبة اني ادفع حاجه فانا هدفعلك حق ماعونه الشتاء اللي بياخدوها دي كفايه ربع جنية هههههههههه علي اعتبار اني مش بشتغل وعاطله زيك

(@_@)
سلاموووووووووز

2ensan wnsan يقول...

انت كده فهمتني غلط يا عم سوو هو انا بسألك قصه ولا مناظر

يعني انا فهمت كده قصة الفيلم ايه اللي هيخلين اخشه

انت جبت معظم الشخصيات الاساسيه اللي في الفيلم وحكيت النقط الرئيسيه بتاعت شخصيتها وبتاعت قصة حياتها كمان فانا كونت قصه للفيلم دا في دماغي



للاسف يا برنس انا من المحله ومعندناش غير سنيمتين بس واحده بتعرض للشركه العربيه وافلام الشركه العربيه والسبكي وانت كناقد عارف افلامهم عامله ازاي والتانيه بتاعت العدل جروب وبيعرضوا فيها لبقية الشركات ييعني امل ان الفيلم دا يتعرض عندنا ضعيف جدا دا غير انه مفهوش مناظر يعني مش هيلاقي قبول في المحله يعني مش هييجي برضه ادعيلي بس انه يكون موجود في القاهره وميكونش اتشال بعد الامتحانات بس

aya يقول...

سيبك من ان احنا بقينا قايمين نايمين فى كآبة وحتى الافلام بقت تكئب اكتر

لكن بجد انت عبقرى نقد
بجد اول مرة اخد بالى ازاى اركز مع كل عناصر الفيلم وكل عوامل الاخراج والتمثيل والتصوير والديكور


انا من اول المؤيدين انك طبعا طبعا طبعا طبعا طبعا اكيد
ان شاء الله تفضل تعملنا سينيماتيك

بجد يابوحميد الله ينور عليك

وكويس انك واضحتلى هو بيتكلم عن ايه عشان انا شفت الاعلان ومش فهمت حاجة خالص

الله ينور يا عمنا

اهو ده عيبه يقول...

شوف يا سوووو
بدون مجاملات انا بحس من تحليلك للفيلم انى بشوفه قدامى

واضح ان الفيلم تحفه ويستاهل الواحد يدخله بجد

وانا بقولك استمر ومتشيلش هم التذاكر م العين دى قبل العين دى

بس معاك خمسين جنيه سلف؟

ابن حـجـر الـعـسـقـلانـى يقول...

يا سوووو انت لو بتاخد رأينا فى موضوع بوستات "سينيماتيك" دة يبقى اسمحلى أسجل اعتراضى

أنا قبل نهاية البوست بشوية قلت احنا نحاول ننظم نروح فيلم كل أسبوع بس يكون حفلة تسعة عشان نطلع منه على الساعة اتناشر و نلحق نقعد على القهوة ساعة نعيش مع بعضنا فى أحداث الفيلم ... ألاقيك جاى بتقول تكمل و لا ما تكملش .. يا راجل قول كلام غير دة

إيه رأيك يكون يوم الجمعة الجاى نروح أى فيلم ؟؟

يعنى يوم الخميس نقعد على - لامؤاخذة- زوجة البرص (اللى هى البورصة يعنى) .. و يوم الجمعة نضربها فيلم

شوف كدة يا برنس .. و انا معاك يا كبير

قوس قزح يقول...

ايه ده ؟
ده انت مفصص الفيلم حتة حتة يا جرع
ده انت شاطر اوى بقى و انا مش واخدة بالى
هخاف منك انا كده .. ده انت ناقد هايل
بعد كلامك - مع انى مش بروح سينما كتير و بحب انتخة البيت و الفشار و البيبسى - لازم اروح اتفرج عليه وسط الناس قبل ما يتشال

لو هتفصص الفيلم كل مرة كده و تقولنا نتعب نفسنا و نروح ولا لا يبقى انا عزماك يا سيدى على الفيلم الجاى

بالنسبة للخناقة جايز كده الفيلم جيه على جرح حد فيهم

تحياتى لك مع رفع الشابوه

Sha2loob يقول...

حب قلبي أبو كرش جنان
ايه الحلاوة والجمال ده يا وله
ايه ده
لاتقولي الصبان ولا رزق الله ولا الناس دي
سوووو وبس
المهم, بعد وصلة النفاق
أنا متبرعلك بأول جنيه يا عم سوووو
بس أقبض النهارده بس وأنا أظبطك
وأنا شايفك من الصبح عمال تقول للناس هنصص معاكوا بس افتحوا باب التبرعات وكله في الحليقه
شكلهم كده خايفين بعد أما يدفعوا تديهم بمبه
بس أنا واثق فيك وأديني بقوها بعلو حسي
أنا متبرع لسوووو بأول جنيه

Rehab Mostafa يقول...

بجد تحليلك للفيلم يفتح النفس اني أدخل وأشوف الفيلم :)
استمر يا سوووو في التحليل والنقد ده
بس أنا مش معايا فلوس أدفعلك ممكن أنا ألملك وليا 20% :)) موافق مش كده ؟
طيب أنا واقفه على باب المدونه أهو بلم الفلوس

Doba يقول...

الخناقة اللى فى آخر الفيلم خلت كل واحد افتكر انه مجرم مسجل خطر واهى خناقة بخناقة بقى
=============

تحليلك حلو قوى بجد
ماشاء الله عليك يا بنى
===
مش عارفة ليه حسيت انك داخل جوه شاشة السينما بجد ودايب جوه أحداث الفيلم علشان يأثر فيك كده
===

انا على أتم استعداد انى اشارك فى المساعدة وانى اقف على الشباك والم من اللى داخلين المدونة وتروح تكملنا باقى تحليل الافلام = بجد بجد انت هاااااااايل

يا جدعان اللى يعرف حد بيكتب فى اى جرنال يورى اللى سووو كاتبه وخلوه ينشره فى جرنال لانه بجد موهوب جدا

====
بالتوفيق دايما يا أحمد

هبة

رئـــــيسـة حزب الأحلام يقول...

نقد جميل للفيلم
ياريت تكررها تانى احنا اتفرجنا على الفيلم من غير مانشوفة
جزاك الله خيرا
تحياتى لك

غير معرف يقول...

يا تحليلاتك يا سوووووووووو

بجد اسلوبك تحفه
هتخلينى اروح اشوف الفيلم بس يارب يبقى نازل عندنا

ومن ناحيه التبرعات ولا يهمك
معاك من جنيه لاتنين جنيه الا ربع
:)))))))

خلاص يا عم سووو
مستنيين بقى باقى الافلام

وسلاخوووووووووووخ
:)))

سلوى يقول...

لو الفيلم بالصورة اللي نقلتها

يبقى فيلم ممتاز

وغنت ناقد قوى

استمر

على الأقل اللي عنده صعوبه في دخول السينمات

تجيب له السينما لحد عنده :)

جميل يا سوووووو

غير معرف يقول...

انا اسمي سوووو
وعندي مشكلة، عاطل
هتساعدني

يا نهار ابيض ع الدنيا!! ليه كده يا بابا؟؟

بس اقولك،، ما انت يا تركز في النقد يا تركز في كتابة السيناريو انا خايفة البوست الجاي الاقيك بتقولنا وناوي اعمل فيلم عن قصة حياتي والبوست اللي بعديه يكون عن شريطك اللي هيكسر الدنيا واللي بعده عن المعرض المتواضع اللي حاطط فيه لوحاتك

لألألأ عيني عليك بارده استمر يا إبني استمر واحنا ورا وراك والله معاااااك ومعاك قلوبنا

بص هتلاقيني على طول في ضهرك
إيه ف ضهري دي! أتب يعني

كخخخخخخخخخخخخخخ بضحك معاك

Eldebug يقول...

انا اديلك تسعة من عشرة على التحليل ده
الواحد ده علشان انت حرقتلنا الفيلم ... هههههههههههههههه
جامد واللهى بس اوعى تكررها تانى اصلك لو كررتها هتضطرنى اروح اتفرج على الافلام اللى هتتكلم عنها واخوك مفلس اليومين دول

Soooo يقول...

بنوته مصرية

حماتي ملاك
اي خدعه ياستي .. بس خلي بالك .. بعد كده انا هنزل اي بوست واخد عليه فلوس

وايه ربع جنيه معونة الشتا
ربع جنيه
ده على اساس اني فار هجيب منديل ورق اتكلفت بيه يعني في الشتا؟؟؟

طب اقولك يا حماتي
انا نتيجة للزنقة اللي انا فيها .. هصرف من فلوس مهر نور .. وانتو الخير والبركه بقى

ربنا يسعدك ويبسطك ويكرمك دنيا وآخره يارب

ملحوظه
القعده هنا مش بمزاجكم .. عايزه تقعدي جنب فاتيما يبقى تدفعي بزياده .. قال ربع جنيه معونة الشتا قال
آآه صحيح .. اسمها نقد وناقد .. مش نقض وناقض .. بس انا مش ناقد اساسا



سلامووووووووز

Soooo يقول...

wa7ed 2ensan wnsan

لما بقولك الفيلم مش قصه ولا مناظر مش قصدي انه سيكو سيكو ولا حاجه
قصدي ان حلاوة الفيلم في الحاله الفنيه والحرفيه اللي معمول بيها
وماتقولليش انا حرقتلك القصه
اقولك
ايه قصة الفيلم بقى اللي انا حرقتها
يعني بيبدأ بإيه وبينتهي على ايه




سلاموووووووووووز

Soooo يقول...

aya

ربنا يكرمك يارب
بس على فكره .. احنا كلنا لازم لما نشوف حاجه ناخد بالنا من كل تفصيله فيها
مش من باب التخصص
لكن من باب الاستمتاع بالحاجه نفسها
زي زمان لما ابهاتنا كانو بيسمعو ام كلثوم وكانو يتمزجو قوي من نبرة صوتها لما تتغير في كلمة

وياستي لو عايزياني افضل ان شاء الله اعمل مواضيع سينيماتيك
شوفيلي اي حاجه في رغيف
ربنا يسترك ويسعدك ويبسطك ويرضيكي دنيا وآخره يارب
وهنيالك يافاعل الخير



سلاموووووووووز

Soooo يقول...

اهو ده عيبه

الفيلم حاله حلوة قوي بجد
ونصيحتي لازم تدخليه والله

وبعدين منين استمر ومنين اشوفلك خمسين جنيه سلف؟؟
انتي جايه تبيعي ميه في حارة السقايين


ربنا يسعدك ويكرمك ويبسطك ويرضيكي دنيا وآخره يارب



سلاموووووووووز

Soooo يقول...

ابن حـجـر الـعـسـقـلانـى

عسقوووووووول
طب والله انا باحبك يابني
وباحس انك منور منور يعني
تقريبا الرايق مظبطكم حلو قوي عالتونجر

وياسيدي انا ماعنديش اي مانع اننا نروح سينما جماعه
بالعكس .. ده انا كنت باتحايل يوم الخميس على عبد الرحمن فارس وعلى الدوح انهم مايروحوش بيوتهم ونخش الفيلم

وماشي ياسيدي .. يوم الخميس نضرب البورصه ونضرب جوزها
ويوم الجمعه الجاي ان شاء الله .. نروح الكباريه .. قصدي فيلم كباريه

استبينا يابو العساعيس ؟؟؟

ملحوظه
هتعزمني؟؟؟؟


سلاموووووووز

tamer.sala7 يقول...

علي فكرة انت جامد اوي انا بجد بدأت اشك ان كل ده شوفته من او مرة تدخل فيها وتقريبا كدة انا حدخل الفيلم ده علشان اتفرج علي سووووو

ابن حـجـر الـعـسـقـلانـى يقول...

هانروح الكباريه .. قشطة لوووز .. معاك يا كبييييييير .. شكلها كدة هاتبقى ليلة أنس

أحب سوسو

Z_Diva يقول...

5sara in hna mfesh aflam 3rby, 3shan bynzlo awl bawel m3 hollywood :s, walwena ana b7b elaflam elenglish aktar sra7a, bas f3lan s3at bykoun fe aflam falta we lazm tel72 tshofha, we dy 3'aliban mesh htet3rd hna 5alis, hna bygybo aflam hnedy we 7lmy we sa3d we kda y3ny, we b3den howa bykoun felm 3rby wa7d felsinmat, we sa3at filmen, da delw2ty 7tta elly byt3rdi hma morgan a7md morgan, we 5arg 3an elkanoun -dol kda motakdmyn 7tta, ana lma get mn a2al mn sana kno by3rdo mtab sna3y :S
we yaret tekm 3shan enta btnkod aflm kwaysa, we nkd2 kwayes we shklk btfhm fel7war :D
wkman 3shan ana b7b elfilm yt7r2ly abl mshofo -3shan a3rf ystahl el flous walla ageb behom 7ga tetakl agda3 :D-
ylla ya fandem beltwfee2 bgd, we rbna yfrgha 3lik we ykrmk isa :)

Soooo يقول...

قوس قزح

شوفتي بقى اني شاطر واستاهل نور بنت رودي .. وان كصة حبنا فعلا تستاهل ان تكلل بالنجاح

ربنا يكركم ويخليكي يارب على كلامك الحلو ده
وانا على فكره برضه زيك من هواة الانتخه في البيت .. بس في بعض الحاجات ماينفعش الواحد يأنتخ في البيت ويشوفها .. زي الفيلم ده

وبالنوسبه لعزومتك لي عالسينما .. انا راشق
ولو مش هتقدري .. هاتي حق الفيلم وانا اعزمني .. وهابقى اقولك ايه الحوار قبل ما انزل الموضوع للناس .. يعني هيبقى في سبق صحفي ليكي

وصدقيني لو الفيلم جه على جرح حد من اللي اتخانقو .. يبقى جه على جروح ناس كتير قوي


سلاموووووووووز

Soooo يقول...

Sha2loob

طبعا .. حيثما تذكر السينما يبقى حسن فايق وعبد الفتاح القصري وعبد السلام النابلسي والعالم الحلوة دي

ازيك يابو علي .. وازي كرشك اللي لجوه مش زي باقي مخاليق ربنا كروشهم لبره

وبعدين انت عمال تقرى التعليقات عالناس ليه .. خش نافق وقول حلو وهايل وامشي من سكات .. فرضنا انهم قرو باقي التعليقات وقرو تعليقك .. يفقدو المصداقيه في كلامي ؟؟

وانا عند وعدي
كل اللي هيتبرعلي بحاجه .. والله العظيم هياخدها اضعاف مضاعفه
في الجنه ان شاء الله

نورتني يابو علي
وربنا يكرمك ويسعدك ويبسطك دنيا وآخره يارب



سلامووووووووز

Soooo يقول...

Rehab Mostafa

ربنا يخليكي يارب
بس هستمر ازاي وانا مش معايا غير تلاته جنيه وربع
وبعدين تاخدي عشرين في الميه عشان واقفه عالمدونه ؟؟
ده البواب على كده المفروض يتعمللو تمثال رخام عشان بياخد عشرين جنيه في الشهر

لكن ومالو .. هو احنا عندنا كام رحاب
عشرين في الميه عشرين في الميه
انا مش عشاني انا طلخا



سلامووووووووووز

Soooo يقول...

Doba

اختي ام يوسف افندي
ربنا يكرمك ياااارب على كلامك الحلو ده
بس الحكايه ومافيها اني لما باحب حاجه جامد قوي باندمج معاها .. طب مانا شفت افلام كتير غيره وغير اللي اتكلمت عنهم في المدونه
بس اتكلمت على الافلام اللي شدتني بجد

-----
انا على أتم استعداد انى اشارك فى المساعدة وانى اقف على الشباك والم من اللى داخلين المدونة
!!!!
لا بجد بجد .. ونعم العون حقيقي


والف شكر على كلامك الجميل وربنا يسعدك ويبسطك ويوفقك ويكرمك ويرضيكي دنيا وآخره يارب

سلامي ليوسف



سلاموووووووووووز

Soooo يقول...

رئـــــيسـة حزب الأحلام

ربنا يخليكي ياسيادة الريسه بجد

وصدقيني كل اللي قلته ده مايوفيش حق الفيلم
ولو مش مصدقاني .. روحي شوفيه

وربنا يسعدك ويكرمك ويبسطك دنيا وآخره يارب



سلامووووووووووز

Soooo يقول...

shayma

ان شاء الله هتلاقيه نازل عندكم
واتفرجي عليه وبعدها انتي بنفسك اللي هتحكمي

ومن ناحية التبرع .. الف شكر على الاتنين جنيه الاربع .. ماهو انا مش هاخد جنيه يعني .. ده الحبر اللي كاتب بيه الموضوع ده .. دخل في بتاع خمسه وتسعين قرش .. من غير التمغة

وربنا يسعدك ويكرمك ويبسك ويوفقك دنيا وآخره يارب



سلاموووووووووز

Soooo يقول...

free heart

اهلا بالناس اللي عامله عشرين بروفيل وسبعتاشر مدونه وتسع قمصان واربع بنطلونات ووووو

وصدقيني والله لو شفتي الفيلم هتعرفي اني مش بابالغ
حاله حلوة قوي
هي اي نعم نكد .. بس نكد بنضافه من غير لا مشاهد قبيحه ولا طولة لسان وشتايم

وانا مستعد اجيب السينما لكل الناس .. بس حق المشوار يعني

وربنا يسعدك ويكرمك ويبسطك ويرضيكي دنيا وآخره يارب



سلامووووووووز

Soooo يقول...

maha miho

آآآه
احنا هنتريق بقى
علك علمك علمك يامها .. انا كنت باعزم بالاربعه والخمسه عالسينما لما ظروفي كانت كويسه
ولو مش مصدقاني .. روحي بصي على صدق او لا تصدق في جرنان الاهرام

وبعدين افهمي حاجه معينه .. السينما سواءا كانت نقد او كتابة سينيمائيه .. متصلين ببعض بشكل من الاشكال
نفس منطق ان الواحد ماينفعش يلعب كوره من غير مايتفرج على ماتشات كورة كتير

وبالنوسبه لجزئية اني اعمل معرض .. الحقيقه انا من ساعة ما اتعلمت الاوتوكاد وبقى شغلي في سكه بعيد عن الورق والالوان .. خلاص نسيت الرسم .. لكن بنات اخويا بسم الله ماشاء الله عليهم
فنانين فنانين يعني
بافكر اعمللهم معرض واخد حق التغطيه
بس على الله الاقي كوفرتات كبيرع تساع انها تغطي المعرض


وربنا يسعدك ويكرمك ويبسطك ويوفقك يارب



سلاموووووووووز

Soooo يقول...

Eldebug

حليب هارتي
انت فين ياجرع وايه الغيبه دي

وياسيدي اخصم كل العشره بحالها .. بس ترجع تنورني هنا بكلامك وتعليقاتك

وعلى فكره .. بالرغم من كل اللي قلته .. لكن مايجيش واحد على عشره من ميه .. من الفيلم

ولا تقلق .. هتنضم معايا في نقابة العواطليه وهنبقى اغنيا بتبرعات اهل الخير من المدونين والمدونات


وربنا يسعدك ويكرمك ويبسطك ويرضيك دنيا وآخره يارب



سلاموووووووووز

Soooo يقول...

tamer.sala7

عارف يا تيمور لما تكون بتحب حاجه قوي .. بتبقى مشدود معاها ومركز كأنكم انتو الاتنين من بعض

وياسيدي روحه مره واتنين وتلاته وتسعه
بس مش هتلاقيني


ملحوظه
فين التبرع ياعم ؟؟؟؟


وربنا يسعدك ويكرمك ويبسطك دنيا وآخره يارب



سلامووووووووووز

Soooo يقول...

ابن حـجـر الـعـسـقـلانـى

تعز الانحراف مووووووز انت يابو العساعيس

بس خلي بالك .. سوسو اللي بتحبها مش في الكباريه .. سوسو في ليلة البيبي دول

حدد اتجاهاتك وأوضاعك عشان كل فيلم وليه اوضاعه الخاصه

واليوم خمر ونساء .. وغدا .. نضرب حواوشي




سلامووووووووووز

Soooo يقول...

Z_Diva

ام زعبولا .. قرينتي في منظمة الفكر والتفكير

تصدقي ان موضوع ان الافلام العربي مش بتتعرض عندكم وفي الخليج عموما وقت مابتتعرض هنا في مصر .. موضوع خطير جدا
لانه لو حصل ان الافلام اتعرضت هنا وفي الخليج في وقت واحد .. ده هيقلل من حوارات تصوير الافلام في السينما واللي انتشرت قوي .. وحتى كمان مش بتبقى حلوه ومتصورة بالموبيل وحاجه مرار

وانا هكلم المسئولين في الحته دي .. واوعدك اننا نوصل لقرار سليم ويرضي كافة الاطراف المعنيه

ملحوظه
دوري كده في مركز توزيع الاهرام عندكم في الامارات .. يمكن تلاقي بيتباع سلسلة ما وراء الطبيعه .. ولو مالقيتيش .. قوليلي وانا هتصرف

وفين التبرع ؟؟؟؟؟؟


وربنا يسعدك ويكرمك ويبسطك ويوفقك دنيا وآخره يارب



سلاموووووووووز

wanna b a physician يقول...

على فكرة انا هاسمع كلامك ان الفيلم حلو
لان ناس قالت عليه هبل من الاعلان
انا حتى مش شوفت الاعلان
بس انا باثق فى رايك بجد
تحياتى

Asmaa mahaba يقول...

تعرف يا سوو فى كلكوعه حقد منى عليك عشان بتروح السيما اعاااااااااااااا
واحسن حاجه باجى اقرا تحليل الافلام واعرف القصص بتاعتها عشان احنا عندنا يوم ما نحط فيلم فيديو كارتون ممكن بابا يقولنا يا منحلييييين
بس بتابع الاجنبى والبركه فى تشانل تووو
عموما تحليل رائع انا مقدرش احكم على فيلم منغير ما اشوفه
بس اللى بعترض عليه هو عجز المخرجين على انهم يتنازلوا عن المشاهد الخارجه فى الافلام لان بامكاننا عكس الواقع بمزيد من الاحترام وتجنب الابتزال اللى واضح فى الاعلانات عن الافلام....
المفروض يا سوو حقك اللى يدخل يدفع خمسه جنيه حق تذكره السيما متسيبهاش مفتوحه كدا لاناس بقيت وحشه قوى

من منوفيه جدااا تحب التوفير
سومه_87

Unknown يقول...

جميل يا سووو
هديك برضه 9من عشره
عشان نقدك الهايل ده والواحد الناقص ده عشان عطلتني بقالي ربع ساعه بقرا البوست واتاخرت على النبطشيه

Soooo يقول...

wanna b a physician

اهلا بيك يادكتره
وعلى فكره .. انا ماشفتش اعلان الفيلم
بس عارف انه مش هيبقى اعلان يشد الناس
لان الفيلم مش هيشد اغلب الناس اللي داخله تضحك ولا تتفرج على شوية ضرب ولا تسمعلها افيه ورقصه
ومعظم الناس دلوقتي بقت كده

الفيلم بيتكلم بمنتهى الواقعيه والاحترام في موضوع صعب جدا انه يتم تناوله بالشكل ده

وروح وشوفه .. ولو ماعجبكش .. يبقى ليك عزوم فيلم عندي



سلاموووووووووز

Soooo يقول...

سومه...مجنونه فى بلد عاقل

اقولك على حاجه .. خدي بابكي اللي بيقول انكم منحلين على افلام الكارتون .. وروحي شوفي معاه الفيلم ده
وصدقيني هتلاقي باباكي بعد كده مهتم انكم تروحو افلام زي ده

وعلى فكره
الفيلم مافيهوش ولا لقطة خارجه
ولا لفظ جارح
وتناول مواضيع خطيره جدا باحترام شديد جدا .. في حين مخرجين كتير ممكن يتناولو حاجه اقل من الحاجه دي بطريقه فجه وقليلة ادب ومشاهد عري والفاظ مايصحش ان الناس تسمعها

والجميل في الموضوع .. ان افلام المخرجين التانيه مفتوحه لكل فئات الجمهور .. بينما الفيلم ده وعلى الرغم من انه فيلم محترم وشيك جدا .. لكن كاتبين للكبار فقط .. عشان القائمين على الفيلم مش عايزين يخلو الاطفال حتى يتضايقو لما يشوفوه .. ولو كانت مضايقه خفيفه
عمرك شفتي احترام كده؟؟؟

وياستي ايدي على كتفك .. ولو كل واحد دفع خمسه جنيه .. انا عايز تلاته وخدي انتي اتنين جنيه بحالهم

من صعيدي بيحب يفرق اللي في جيبه


وربنا يسعدك ويكرمك ويوفقك دنيا وآخره يارب



سلاموووووووووز

Soooo يقول...

لماضة

هههههههههههههههههههههههه

اما انك لمضه بجد
طب وانا ذنبي ايه انك فاتحه المدونه بتاعتي وانتي متأخره على شغلك


ربنا يكرمك ويسعدك ويبسطك ويوفقك ويرضيكي دنيا وآخره يارب



سلاموووووووووووز

جيهان علي يقول...

السلام عليكم ورحمة الله وبركاته

نقد جميل جدًا ومفصل بطريقة تدل على فهم واعي للكيفية التي يجب أن يكون عليها الفيلم السنمائي

نقدك جميل وياريت تكمل في الموضوع


تحياتي

mohra يقول...

لسه سامعه عنه انه فيلم وحش من بعض اللى اتفرجوا عليه...بس انت كده شجعتنى ادخله

الـسـيـدة نـون يقول...

انا اسمى سوووو
وبحب السيما
قرائتك للبلوج مش كفاية
اتبرع ولو بتمن تذكرة سيما


ايوة يا سوووو
انا بستمتع جدا لما بقرالك تحليل لاى فيلم
يعنى انا دلوقتى هاموت واروح اشوف الفيلم ده

ليك عليا ابقى اقطعلك تذكرة لاى فيلم من الافلام اللى انت ذكرتها فى الاخر دى
علشان تمتعنا بتحليلك لاى فيلم بتشوفه

وبالنسبة للاطفال اللى فى الفيلم
ايوة دول فعلا اطفال شوارع
علشان كان فيه برنامج اسمه شبابيك بيجى على قناة دريم ومن كام شهر كدة كانوا مستضيفين باسم السمرة وهو اكدلهم ده فعلا

وفاكرة انه قال كمان اللى انتوا شفتوه فى الفيلم ده يا جماعة واحد على عشرة من الحقيقة

كان بيتكلم وهو متألم جدا للى شافه لما جم علشان يختاروا اطفال شواره
وراح هو احمد عزمى والمخرج كام اصلاحية وحاجات زى كدة
وشافوا حاجات هما نفسم مش قادرين يوصفوها
بيقولوا احنا لو وصفناها محدش هيصدقنا

علشان كدة انا متفقة معاك فى وصفك للفيلم
انه واقعية الواقعية
انا مشفتهوش
بس من كلام باسم السمرة عليه وكمان كان احمد عزمى عمل مداخلة فى البرنامج

وكلامك انت دلوقتى ووصفك او تحليلك للفيلم
خلانى اتحمس انى اشوف الفيلم ده

المهم
هو ايه الموقف الوحش اللى حصل معاك يوم الخميس وانت على البورصة

سلام
اختك خيخة

Z_Diva يقول...

mashy y3am klmlna elmas2olyn so7abk -shaklk a3dt m3 3bdo elray2 kteer- :D
we merciez 3altip bt3t mrkz twzee3 elahram, ela da al2yh fen 7drtak asln hna ????
ama b2a bellnsba l7war eltabro3 da y3ny msh 3rfa a2olak eah, esh7al mkntsh 3rf elly feha :'(, mna m3ko fe7zb elmesh 3omal :S
lma asht3'al b2a we yb2a m3aya draheem, hb2a atbar3, we beldrhm kman -ay na3m howa bysawy bas 1.56 gond, bas aho y2adyha brdon-
t7yaty ya fandem :D

الباحثة عن السعادة يقول...

انت شوقتنى بجد للفيلم وانا شوفت إعلاناته ولحظت أنه بيعبر عن واقعنا
طريقتك شيقه جدا فى العرض وجميله اوى وتعبير بتتشقط جامد وجديد بالنسبالى
وادعيلنا ان قنوات محدودى الدخل تعرضلنا الفيلم

magnona يقول...

سووو...انا نفسى اكتب اول تعليق مره واحده بس.........
الموضوع جامد جداا ولو كده انا ممكن ادخل الفليم..ولو على فلوس السينما انا ممكن اعملك جمعيه هنا وانا اللى المهالك..بس بالنص ..قلت ايه؟؟

.:.-=- ELGaZaLy-=-.:. يقول...

ازيك يا سعودى؟؟

اخبارك اية كتير باجى هنا...ومش بعلق..يعنى انت عارفنى مش اى حاجة بجب اعلق عليها...

بس سيبك انت المرة دى انت رجعت الى قواعدك سالما

دة احمد سعودى الى بحب اقراله...

بجد رهيب التحليل يا سعودى وجميل اوى

منظم ومنسق وبيوصل فكرة..

ياريت تستمر بالكيفية دى...

يوميات فنانه مفروسه جداا يقول...

عاطل عن العمل لا حول ولا قوة الا بالله وانا اللي بطلب منك شغل بعد ماتخرج بوكرا ان شاء الله
أكمني وانت بتديني التليفون اكلم ابي كأن بتديلي روحك والله هههههههههههه
خايف عاكارت يخلص (بسرعه يا ياسمين)وبعد مادتهولك تقولي حراااااام اديكي بدأتي الدقيقه التنيه ههههههههههه
لا هنلملك تدخل سيمناحاضر.

وبعدين نيجي بقي للنفد اللي برا ده
بجد يا سو أيه الابداع ده انا درست خمس سنين نقد في الكليه مع اختلاف ان اللي درسته تشكيلي عمري ما حسيت بأهميته زي دلوقت بجد ما سبتش الهوا في الفلم الا لو اتكلمت عنه يا نهاررررررر ما شاء الله .
وفي سؤال بقي للناقد العظيم سو انت قولت ان الفلم ده يشبه البرئ واحنا بتوع الاتوبيس ونوعية الافلام ديه كلها بس يا تري هل الافلام ديه اما ظهرت وقتها عملت حاجه او أثرت في حاجه أو حلت حاجه بالعكس بنتكلكع أكتر وبتعقد وبنلعن اليوم اللي اتولدنا فيه من اساسه لاننا مش قادرين نعمل حاجه والدليل ان اكيد اكيد الخناقه اللي حصلت زي ماحضرتك قولت شحنه خرجت من الشاشه عقدتهم فقاموا اتخانقو وبهدلو بعض.
من غير ما حد يتدخل بجد ويحل اللي احنا فيه لو عملنا ميت فيلم زي ده مش هيتصلح حالنا
ولوني ماليش في السينما يعني بستخسر العشرين جنيه واقول خلاص هيتعرض في الفلفسيون بس هدخل الفلم لانك شوقتني ادخله بجد.
وربنا منتج الفيلم لو شاف البوست ده ليشغلك معاه دانت عامله دعايا جامده

أتشرفت جدا جدا بمعرفت حضرتك يا أستاذ ناقد سوووو ولوني مكنتش متخيلاك كده اساسا اكمن بوستاتك كلها مذكرات طفل تخين وبتجيب في سيرت التنانين والوحوش يعني كنت فاكراك حاجه كده مديه علي علاء ولي الدين بس طلع العكس خالص
معلش طولت عليك أدعيلي بكرا ان شاء الله أخر امتحان مادة نقد ههههههه
سلام

غير معرف يقول...

يعنى هى مصر مافيهاش غير العشوائيات و الغم و سده النفس ماهى مسدوده طبيعى ..

انا عندى لك فكرة كويسه ايه رأيك تحط اعلانات جوجل ادسنس فى المدونة بتاعتك و اهى لو جابت خمسين دولار فى الشهر يبقى رضا حق السينما و المشاريب على القهوة

http://www.google.com.eg/intl/ar/ads/

tamer.sala7 يقول...

بمناسبة التبرع انتي ليكي عندي عزومة علي فيلم من لبشة الأفلام اللي جاية بس في اسكندرية يعني تعالي اسكندرية واقسملك بالله العظيم ليك عندي عزومة علي السنيما اي فيلم انت تحبه

tamer.sala7 يقول...

sooooo
معلش الكلام بصيغة المؤنث ده غلطة مطبعية حرف الـ ي ده مش عارف بيتكتب ليه

Soooo يقول...

جيهان علي

الله يكرمك يارب
بس الموضوع ولا نقد ولا فهم ولا بتاع .. كل الحكايه اني حسيت حاجه ورحت كاتبها

ولو فعلا الموضوع عجبك وعايزاني اكمل فيه .. يبقى شوفي اخوكي بأي مبلغ رمزي .. سبعتلاف ستميه اتنين وسبعين جنيه كويس !؟؟


وربنا يكرمك ويسعدك دنيا وآخره يارب




سلاموووووووووز

Soooo يقول...

mohra

اولا اهلا بيكي وياريت تعتبري مدونتي زي مدونتك تمام وتشرفيني دايما

ثانيا .. لولا اختلاف الاذواق لبارت السلع .. انا في افلام باشوفها ومش بتعجبني .. في حين ان في ناس تانيه بتطير بيها

ثالثا .. التجربه خير برهان .. روحي شوفي الفيلم بنفسك .. لو ماعجبكيش .. قوليلي وانا وانتي ندورلنا على حد يعزمنا على فيلم تاني

وربنا يسعدك ويكرمك دنيا وآخره يارب



سلامووووووووووووز

Soooo يقول...

بت خيخة وأى كلام

الف شكر يام شرفنطح على مساندتك النفسيه لي وياريت بدل ماتقطعيلي تذكرة فيلم واحد .. هاتي سبعين جنيه وانا اصرفهم بمزاجي

ولو فعلا دول أطفال شوارع بجد زي مابتقولي .. يبقى احمد عاطف المخرج يستحق جايزة خاصة عشان عرف يسيطر عليهم بالشكل ده والله

وبعدين ياستي هو انتي لازم يعني تعرفي ايه الموقف؟؟
هقولك
اصل نور عيانه وخيخه تعبانه
هههههههههههههههههه

روقي يا ام شرفنطح
انا الحمدلله كويس

ربنا يكرمك ويسعدك ويبسطك يا احلى اخت جدعه مش خيخه في الدنيا كلها



سلاموووووووووووز

Soooo يقول...

Z_Diva

خبر ايه يا ام زعبولا .. انت مش مصدقاني ولا مصدقه عبد الرايق .. لأ
خلي بالك .. الرايق لو قرى كلامك هيقولك فين التبرع بتاعي انا كمان

وياستي لو ماعرفتيش فين مركز توزيع الاهرام عندكم قوليلي وانا هحاول اشوف سكه عشان ابعتلك آخر اعداد ما وراء الطبيعه وسفاري وكل اللي عندي

وربنا يفرجها عليكي وعلينا يارب .. ومش مهم دراهم ولا جنيه .. المهم انك تتبرعي وماتغيريش مبادئك


ربنا يسعدك وينصرك ويكرمك ويرضيكي دنيا وآخره يارب




سلامووووووووووز

Soooo يقول...

الباحثة عن السعادة

اهلا بيكي يافندم في اول زياره ليكي لمدونتي المتواضعه واتمنى انها تعجبك وانك تعتبريها زي مدونتك تمام

وتصدقي ان لفظ يشقط ده هو اللفظ الوحيد اللي جه في بالي او اللي ممكن يكون بيعبر بجد عن الموقف ده

وماعتقدش ان قنوات محدودي الدخل هتجيبه .. او على الاقل دلوقتي .. الناس مش ناقصه حرقة الدم .. وجهاز التلفزيون بيبقى ليه سياسه معينه في ايه اللي يتذاع .. وايه اللي مايتذاعش

وربنا يسعدك ويكرمك ويبسطك ويرضيكي دنيا وآخره يارب



سلامووووووووووز

Soooo يقول...

magnona

ياستي اول تعليق من آخر تعليق .. والله العظيم الكلام ده مابيفرق معايا
كفايه انك علقتي .. ودي عندي ليها معنى كبير قوي والله

وياستي روحي شوفي الفيلم وان شاء الله مش هتندمي

وايه النصاحه اللي انتي فيها دي؟؟
تلمي فلوس الجمعيه وتاخدي النص؟؟
طب اقولك .. لمي فلوس الجمعيه براحتك خالص .. وخدي التلتين كمان مش النص .. بس هاتي ميه تمانيه وستين جنيه دلوقتي

ربنا يسعدك ويكرمك ويوفقك دنيا وآخره يارب

ملحوظه
ماتنسيش حوار العروسه اللي قلتلك عليه



سلاموووووووووز

Soooo يقول...

.:.-=- ELGaZaLy-=-.:.

غزغز
على فكره انا ماسميش سعودي
ده اولا يعني
ثانيا .. انا بقى في مدونات كتير مش بابص عليها .. ولا بافكر حتى اروحها اعلق فيها
بالاقي صحابها مرضى نفسيين .. عندهم بارنويا العظمة بدرجة لا توصف .. في حين انهم ولا ليهم لازمه خالص في الحياه
والغريب انهم عاملين نفسهم ياما هنا وياما هناك والمفروض - من وجهة نظرهم المريضه - ان الناس تفرح لمجرد انهم علقو عندهم .. مع ان زي ماقلتلك .. وجودهم زي عدمه .. بالعكس .. عدمه احسن

بس غريبه قوي ان الموضوع ده عجبك وباقي الهسس اللي باهيسه ماعجبكش .. وعجب ناس كتير .. فعلا ياجرعان .. الناس فيما يعشقون مذاهب

ابقى خلينا نشوفك ياغزغز

ملحوظه
سعودي اللي كنت تعرفه مات .. انا سوووو .. يعني مصيبه .. كارثه .. بلوه مسيحه


سلامووووووووز

Soooo يقول...

يوميات فنانه مفروسه جداا

ياستي العاطل مسيره ربنا يفرجها في وشه .. مش الناس تعايره بمكالمة موبيل ولا كلمه قالها على سبيل الهزار

وصدقيني انا مااستفدتش من النقد اللي درسناه في الكليه قوي .. الاستفاده الحقيقيه كانت من كورسات قصر السينما على الفرجه الكتير على افلام من اي دوله مش مصري وامريكاني وبس .. ولو انتي عايزه تعلمي نفسك حاجه .. هتجري تتعلميها بنفسك

وعلى فكره .. افلام البريء وسواق الاوتوبيس - انا ماقلتش فيلم احنا بتوع الاتوبيس خالص - والافلام اللي من النوعيه دي .. بتعرض حالة بلد في فتره معينه .. مش وظيفتها الاصلاح ولا انها تغيير القوانين وتغير الشعب .. الشعب هو اللي المفروض يتحرك .. مش يتفرج ودمه يتحرق ويمسك في خناق بعضه وبس

وانا سعدت اكتر بالجزء من الدقيقه اللي اتكلمت فيه معاكي عالواقف الحقيقه


ملحوظه
الغريب انك قلتي لما قابلتك انك نفسك قوي قوي تقابلي اابي .. بس لما رحت قريت تعليقاتك عندها .. ماجبتيش سيرة انك عايزه تقابليها خالص .. ولا انك رايحه المكتبه ولا البورصه عشان تقابليها هي بس وباقي الناس ياكلهم قطر


ربنا يكرمك في امتحاناتك




سلامووووووووز

Soooo يقول...

koko

والله ياكوكو مصر فيها حاجات كتير حلوة
بس ساعات عشان نفوق ونتحرك ونعمل حاجه .. لازم نشوف الجزء الاسود في حياتنا عشان نتحرك بجد .. بدل ماحنا بنمصمص شفايفنا وقاعدين ساكتين

وبالنسبه لحوار اعلانات جوجل .. كذا واحد قالولي عليه .. بس الحقيقه انا مش عارف اعمل ايه ولا ازاي .. لو عرفتي تشرحيلي ايه النظام وازاي .. اوعدك اني هعزمك على فيلم من اول قبض .. واعزمك على موكا بالمارشميلو من كوستا .. فشر الجادورويو خالص


ربنا يكرمك ويسعدك ويوفقك دنيا وآخره يارب



سلامووووووووز

Soooo يقول...

tamer.sala7

ياسيدي الله يكرمك يارب .. بس المشكله في اني اروح سنكريه ازاي وانا مش معايا غير تلاته جنيه خمسه وتلاتين قرش في جيبي

والف شكر على العزومه وعارف انها مش عزومة مراكبيه ولا فنجرة وطق حنك .. والف شكر على توضيحك لحرف الـ ي اللي انا اول ماقريت التعليق قلت يالهوي .. هو انا باين علي الرقه بالشكل ده؟؟؟؟


ربنا يسعدك ويكرمك ويوفقك ويرضيك دنيا وآخره يارب



سلاموووووووووز

يوميات فنانه مفروسه جداا يقول...
أزال المؤلف هذا التعليق.
يوميات فنانه مفروسه جداا يقول...

انا اسفه جدا والله يا سو انا مقصدتش حاجه ولا بعاير ليه يعني ماعذا الله انا بس كنت بهزر والله وبالنسبه للتليفون انا برضو بعمل كده في بيتكلم من تلفوني عادي مقصدش يعني.

تاني حاجه انت قولت فيلم البرئ وانا اللي زودت احنا بتوع الاتوبيس علي اساس انو من نفس النوعيه

بالنسبه لابي انا اسمع عن ابي من زمان من قبل حتي ما ابتدي ادون من مدونة اسمها يوميات دكتور مخنوق واسمع انها شخصيه جدعه جدا وكان نفسي فعلا اشوفها علي الطبيعه ولو حضرتك شوفت تعلقي علي بوست الحفله عند ابي هتلاقيها قايلالي انها عالبورصه كل خميس وبعدين برضو قولت فرصه اشوف بقيت الناس ليه يعني يدوسهم قطر .
باين ان حضرتك زعلت مني عشان قواتيلي ربنا يكرمك بس من غير يسعدك ويبسطك ويوفكك دنيا واخره
انا اسفه علي الاطاله وعلي التعليق مره تانيه
سلام

.:.-=- ELGaZaLy-=-.:. يقول...

احمد
انا فاكر انك مسمكش سعودى وانك قلت ان دة كان لقبك...
فى ابتدائى او اعدادى باين ...مش كدة
دة اولا
ثانيا ..
اية علاقة ردك بردى اساسا,,,
المفروض انى افهم من ردك انى انا واحد من اصحاب المدونات الى بتتكلم عليها دى..!
الى سعادتك مش بتروحها ولا بتبص عليها ولا بتفكر تروح تعلق فيها.,,

ماشى يا سو وماله,,
بسم الله ما شاء الله مرضى نفسيين...هايل
وبارنويا العظمة كمان..دة كلة برضة ابة علاقتة بردى..!

كلحوظة صحيح بحكم البارنويا بقى

مفيش درجات فى البرانويا يا سو يا مجنون عظمة يا مش مجنون مفيهاش حد نص نص يعنى درجة توصف او لا توصف جمله ملهاش محل من الاعراب..

الغريبة انك حكمت على البشر دى انهم ملهمش لازمه ودة من وجة نظرك..بس فى انهى حياة تقصد التدوينية ولا تقصد انهم فشله فى حياتهم بالعموم ..!!

وبرضة اية علاقة دة بردى يا سو!
انا الى مليش لازمة فى الحياة من وجة نظرك...ولا ناس اعرفهم ولا بتوجة رسالة لمين!!!

مش هاعلق على الباقى غير لما تفهمنى..!

لا مش غريبة خالص ان الموضوع دة يعجبنى يا سوو والباقى يعنى يبقى كويس بس مش على نفس مستواك من وجة نظرى..وبعدين انا مهاجمتكش فى الى فات انا بس عجبنى دة فعلقت وبعدين كفاية اوى انة عجب ناس كتير .وطبعا الناس مذاهب .....
وتشوفنى لية يا باش مهندس بعد الرد الهايل دة !!

البقية فى حياتك...

Soooo يقول...

يوميات فنانه مفروسه جداا

حصل خير


شدي حيلك في مذاكرتك



سلامووووووووز

Soooo يقول...

.:.-=- ELGaZaLy-=-.:.


وانت خدت الكلام على نفسك ليه؟؟؟

انا بقولك مش اي مدونه بعلق فيها زي مانت بتقول انك مش اي موضوع بتعلق فيه
يعني ردي مرتبط بردك من ناحية المواضيع اللي انت وانا مش بنعلق عليها

ولو عايز تعلق عن اي حاجه بخصوص الموضوع اللي انا كاتبه فقط .. اهلا وسهلا



اه حاجه كمان
انا لا سعادتي ولا حضرتي .. انا واحد بيشخبط اي كلام




سلاموووووووووز

كيكى عوووووو يقول...

لا ياسوووووووووووووووو شوف حل فى المدونة ..بتاعتك بتعلق معايا كتيرررررررررررر اووووووووووى...اوع تكون ظبطها علية انا بالذات علشان معلقش..اممممممممممممممم..شكة فيك...والله اجبلك دراكولا..ولا الحانوتى ولا بتستا.....فيلم الغابة بيشكروا فى جداااااااااااا..والصيف دة نازل افلام جميلة جدا زى كبارية والوان السما السبعة حسن ومرقص..الريس عمر حرب..ليلة البيبى دول...وانا شخصية بحاول احوش علشان اخش فيلم كبارية...واول ما اشوفة هجى اقولك..ما تسلفنى يا سووووووووووووو ...من تحت الى بلاطة الى عندك...بطل بخل وهات فلوس احسنلك...على العموم انا عارفة حسابك فى البنك..دراكولا قالى

Ehab يقول...

ونقول كمان مليون تحيه لسووووو

بجد بجد بحب تعليقك على الأفلام قوي
خاصة انك بتوفر عليا اني مادخلش اللي مالوش لازمه
او اللي فكرته مش هتعجبني
واللي بيعجبني بدخله

بس الفكره اني بقالي كتير مش بقدر ادخل سينما ظروف ماديه ووقتيه من ده على ده

لكن حبيب قلبي بيظبطنا اهو وبيجيب المفيد
تسلم ايدك يا برنس
انت يا واد فنان في ايه بالظبط
زلا انت باطني بتاع كله يعني

ههههههههههههههه

تسلم يا برنس

سلااااااااااااااااااااام
اخوك ايهاب

غير معرف يقول...

http://help.blogger.com/bin/static.py?page=faq.html&hl=ar#anchor_link_14

خد اللينك ده كوبى و بيست هيدخلك على الشرح و اذا ماعرفتش اقرا الكلمتين دول انا جبتهملك من هناك

كيف يمكنني وضع برنامج AdSense في مدونتي الإلكترونية؟

لإضافة برنامج AdSense إلى مدونتك الإلكترونية، انقر فوق علامة التبويب "القالب" أو "التنسيقات" بتلك المدونة الإلكترونية. وفي مدونة إلكترونية تدعم استخدام التنسيقات، أضف عنصر صفحة جديدًا وحدد خيار AdSense. وإذا كنت تستخدم قالبًا كلاسيكيًا، فما عليك إلا تحديد رابط "AdSense" في علامة التبويب "القالب". وسيكون بمقدورك اختيار حجم الإعلانات التي يتم وضعها وكذلك تخصيص مظهرها في مدونتك الإلكترونية.

shahy يقول...

انت ازاي يابني بتعرف تفصص كل حاجة كدة
دة على كدة بقى انا مابفهامش حاجة دة انا بدخل السينيما وبخرج مش فاكرة اسم الفيلم اية

ربنا يبارك فيك انا مش بحسدك ولا حاجة اهو
بس انا عاوزة اعرف اية الحاجات الوحشة اللي حصلت معاك؟
ام حشرية ورخمة تقول اية بقى

تحياتي

الـسـيـدة نـون يقول...

هههههههههههههههههههههههههه
هههههههههههههههههههههههههههههههه
اصل نووووووووووور عيااانمة
وخيييييخة تعباااااانة
ههههههههههههههههههههههههههههههه
هههههههههههههههههههههههههههههه
هههههههههههههههههههههههههههه
يابن الايه
والله ضحكتنى جدا
هههههههههههههههههه
طب فاكر دى


ايه النظاااااااااااااااااااااام؟
هههههههههههههههههههههههههههههه
هههههههههههههههههههههههههههههههه
هههههههههههههههههههههههه

روح ياواد ياسووو
ربنا يسعدك ويفرح قلبك دايما

والسبعين جنيه تحت امرك
بس لما اشوفك

تحياتى يا ابو قلب ابيض زى الفل

اختك خيخة

Ahmed Al-Sabbagh يقول...

صحيح انا ما كنتش متابع لكتاباتك حول السينما - سينما تك

لكن بصراحة قعدتى الاخرنية حببتنى اوى فيها

بجد انت دماغك جبارة فى الاتجاة ده

ولازم تستغل

امممممم

بجد لازم تاخد مكانك

تحياتى ليك يا فنان

احمد الصباغ

حاجات جوايا يقول...

ما شاء الله أخى الكريم
أنت ناقد سينيمائى بجد عشرة على عشرة
دى دراسة ولا هواية ولا ايه ؟
مخدتش بالى من البروفيل بصراحة
بس مسيبتش فتفوتة فى الفيلم الا واتكلمت عليها بوصف معبر وشامل

جزاك الله خيرا

دمت مبدع أخى الكريم

سالى

حمادة زيدان يقول...

ســـــــــــــــــــــــــــوووووو

انت سبقتني ولحقت الفيلم ده ... بصراحة الفيلم طالع من عيني وعاوز اشوفه ... عجبني أوى نقدك للفيلم واتمني تستمر في النقد وتكون عنينا إللي هانشوف بيها الأفلام ... طبعاً هستني منك نقد لفيلم ليلة البيبي دول وكمان فيلم عادل امام الجديد مش عارف أسمه لغاية دلؤتي الصراحة بس أعتقد أنه هيكسر الدنيا وكمان فيلم كبارية

سلاموز بقي أحسن انا طولت عليك

nigro يقول...

أحمد بيه سوووو
عم الشباب و الرياضة
واحشني جدا
إزيك و أخبارك إيه؟
و أخبار الطفل الطخين إيه؟
أنا إذ ربما كده لامح بعيني الحلقة التمنتاشر
يا خبر ده أنا كنت واقف عند التلتاشر
ملحوووقة
يخلصوا حالاً دلوقت

واحشني كلامك بجد يا أحمد

إنت بجد يا أحمد فنان
بس قوللي يا أحمد
هو اهتمامك بتفاصيل الفيلم الرفيعة دي مش بيشغلك عن متابعة الأحداث و العيشة مع القصة ولا إيه؟
بس برده أنا مش مستغرب لإنك بجد عبقري
و العباقرة يعملوا اي حاجة

عارف يا ابو حميد انا وقفت قدام كلمتين في البوست ده

يابني مصر اصلا خرابة

احنا ايه اللي خلانا نبقى كده ؟؟؟

واجعين قوي

بجد يا أحمد كنت واحشني موت

يلا سلام

Zika يقول...

انت كده عملتلي حاجه في دماغي ولازم ادخل الفيلم وانا عندي امتحانات
وانا لما بقرا اي تحليل لفيلم ببقي عايز ادخله
كده .. بارضه تعمل فيا كده وانا عندي امتحانات ؟
:D :D :D
اوعدك اني لما اخلص امتحانات , هادخل الفيلم واجيلك تاني
بس بجد تحليلك رائع
تحياتي

Soooo يقول...

كيكى

اديني ياستي شيلت فايل المزيكا قلت يمكن هو اللي يكون متقل المدونه

ويارب تكون خفت عشان ماتحرمينيش من تعليقاتك

وعلمك علمك علمك .. انا لا بخاف من دراكوليا ولا باطسطا ولا الحانوتي
انا اتربيت على هوجان وجيمي سوبر فلاي سنوكا واندريه العملاق .. يعني واد مخلص مخلص مخلص

وربنا يسعدك ويكرمك ويبسطك ويرضيكي دنيا وآخره يارب

ملحوظه
دراكولا ده بيضحك عليكي .. وانا برضه عايز التبرع



سلاموووووووز

Soooo يقول...

الشنكوتي الكبير

حليب هارتي .. ازيك ياهوبا يابو الشناكيت
الحمدلله ان اللي كتبته عجبك .. وعلى فكره .. في افلام كتير باشوفها لكن مش باكتب غير على اللي بيأثر في وباحس انه حالته حلوة

وياسيدي لو على الزنقه الماديه .. خليك معايا في حملة التبرعات اللي باطالب بيها رواد وقراء المدونه
وان شاء الله هتفرج

وربنا يسعدك ويكرمك ويبسطك ويرضيك دنيا وآخره يارب

ملحوظه
انا لو حصلت ممارس عام .. ابقى كويس .. بس انا اصلا مش دكتور



سلاموووووووووز

Soooo يقول...

koko

والله ماعارف اشكرك ازاي على اهتمامك ومتابعتك لكلامي وردي على تعليقك

بجد بجد بجد .. ربنا يسعدك ويكرمك ويوفقك ويرضيكي دنيا وآخره يارب

ملحوظه
اخوكي مافهمش حاجه من الحوارات اللي هناك .. تفتكري مافيش امل مني خالص؟؟؟؟



سلاموووووووووز

Soooo يقول...

shahy

ماما شاهي .. منوراني والله
والف شكر على كلامك الجميل ده كللو

وبجد انا مش باعرف افصص ولا حاجه .. كل الحكايه اني بعد مابشوف اي فيلم .. لو عجبني قوي .. باتكلم عنه

وبخصوص الموقف الوحش اللي حصل معايا .. فتقدري تقولي انه طبق الاصل اللي حصل ساعة موضوع صحابي المدونين

وربنا يسعدك ويكرمك ويبسطك ويوفقك ويرضيكي دنيا وآخره يارب

وسلامي لاخواتي الصغننين



سلامووووووووووز

Soooo يقول...

بت خيخة وأى كلام

هههههههههههههههههه

طب خدي النكته دي
بيقولك واحده ست عندها بنت عندها واحد وعشرين سنه .. حست ان بنتها حامل .. راحت جايبه من الصيدليه الاختبار بتاع الحمل واكتشفت ان بنتها حامل فعلا .. قالتلها هاتي اللي عمل العمله السوده يصلح غلطته .. يومين والبنت راحت جايبه راجل ملو هدومه كده ومتريش ولابس بدله مش عارف ايه وشكله غني قوي .. قاللهم للاسف انا عندي ظروف تمنعني اتجوز بنتكم .. بس اوعدكم انها لو خلفت بنت هكتبلها نص مليون دولار وفيلا باسمها .. ولو خلفت ولد هكتبلو مليون دولار ومصنع باسمه .. ولو خلفت توأم هكتب لكل واحد منهم مليون دولار ومصنع من مصانعي باسمه .. بس لو طلع الحمل كاذب ومافيش حاجه في بطن بنتكم .. هتدوني ايه؟؟
قام ابوها قاللو .. هنديك فرصه تانيه يابني


ربنا يسعدك ويكرمك ويبسطك ويوفقك ويرضيكي دنيا وآخره يارب



سلاموووووووووووز

Soooo يقول...

Ahmed Al-Sabbagh

صبابيغو .. ابن منتقتي البار
ربنا يكرمك يارب ويسعدك ويبسطك ويرضيك دنيا وآخره على الكلام الحلو ده

وماتختفيش كده ياعم .. عايزك كل ماتيجي تعلق

ملحوظه
كلملنا حد من صحابك المسئولين يكتشفني ياعم .. وانا هشوفك برغيف سمين من عند الراجل اللي قصاد القهوة




سلامووووووووووز

Soooo يقول...

Sally

اهلا بيكي يافندم وياريت تعتبري مدونتي زي مدونتك وتشرفيني بتعليقاتك دايما

ويافندم انا ولا ناقد ولا حاجه .. الحكايه ومافيها اني حابب الموضوع على كام كورس سيناريو في قصر السينما بالاضافه لدراستي في كلية فنون تطبيقيه

وربنا يكرمك ويسعدك ويبسطك ويرضيكي دنيا وآخره يارب




سلاموووووووووز

Soooo يقول...

حمادة زيدان

باشا
الله يكرمك يارب
بس نصيحتي .. ادخل الفيلم ده قبل مايتشال عشان حاسس انه مش هيصمد وسط هوجة افلام الصيف

ولو كنت قريت الملحوظه الاخرانيه كنت عرفت ان اخوك مشحور وبيقوللكم حسنه قليله تمنع بلاوي كتير .. عشان اعرف اخش الافلام اللي قلت عليها دي واعرف اتكلم عنها

وربنا يسعدك ويكرمك ويبسطك ويوفقك ويرضيك دنيا وآخره يارب


وماتختفيش كده ياعم .. خلينا نشوفك على طول




سلامووووووووووز

Soooo يقول...

nigro

نيجروووووووووووووووو
والله وانت واحشني قوي
طمنني عملت ايه في الامتحانات والمشروع
ربنا يوفقك يارب

وصدقني يابني انا ولا عبقري ولا حاجه .. كل الحكايه اني بعد مابشوف الفيلم باقعد افتكره واشوف في ايه علق في دماغي واتكلم عنه
انما ولا باشغل نفسي بجماليات ولا بتاع
باعيش الفيلم .. وبعدها لو اتأثرت بيه باتكلم عنه


وربنا يسعدك ويكرمك ويبسطك ويوفقك ويرضيك دنيا وآخره يارب




سلاموووووووووووووز

Soooo يقول...

Zika

بريء يابييييييييييه

ياسيدي خلص امتحاناتك على خير ان شاء الله وبعدها روح شوف كل اللي انت عايزه

ولو الفيلم ماعجبكش .. تعالى قوللي وانا ابقى اعزمك على فيلم تاني


وربنا يكرمك ويسعدك ويوفقك ويرضيك دنيا وآخره يارب



سلامووووووووووووز

MeDoOoOoOo يقول...

سووو بيه لازم أعترف ان ده أحسن نقد موضوعي للفيلم قريته لحد دلوقتي طول عمرك رأيك في السينما محترم .

Ahmed Atef-أحمد عاطف يقول...

شكرا يا سو على النقد الجميل و الواعى اللى اعمق من كل اللى كتبوه كل نقاد مصر عن الفيلم - انت بجد موهوب و لازم تحترف النقد فى الجرائد
ارجو ان اكون دائما عند حسن الظن واقدم افلام تعبر عن قضايا بلدنا و همومك و همومى و كمان افراحنا بدون ابتزال او اسفاف او فجاجة
احمد عاطف

Soooo يقول...

MeDoOoOoOo

ميييين .. ميدو ابن اختي
انت ياد سايب الامتحانات والمذاكره وقاعد بتقرى مدونات
قوم ياد ذاكر
قوم
مش ناقصه كلمه من امك اللي هي اختي

وياسيدي الف شكر على كلامك .. بس فين التبرع يعني؟؟
ولا اقولك .. خد الموضوع اللي انا كاتبه ووديه المجله اللي بتكتب فيها
ولو قالولك كويس .. هاهريهم مقالات
وليك نسبه ياعم

وربنا يوفقك ويسعدك ويكرمك ويرضيك دنيا وآخره يارب


سلامووووووووز

Soooo يقول...

Ahmed Atef-أحمد عاطف

الله يخليك ياباشا
انا والله ماعملتش اكتر من اللي انت واللي اشتغلو في الفيلم يستحقوه

بجد تجربه محترمه جدا وتستاهل ان الواحد يتكلم عنها

وربنا يوفقك وتعمللنا انت وكل اللي اشتغلو معاك .. افلام حلوه ونضيفه وبتناقش مواضيع جاده

وربنا يوفقك ويسعدك ويكرمك يارب



سلاموووووووووز

zahra يقول...

انت اللى المفروض تاخد عشرة على عشرة على التحليل المميز للفيلم
فعلا شوقتنى انى اشوفه

Soooo يقول...

زهرة الياسمين

اهلا بيكي يافندم وياريت تعتبري مدونتي زي مدونتك تمام وتنوريني بتعليقاتك وبزياراتك دايما ان شاء الله

وصدقيني لو رحتي الفيلم وشوفتيه .. انتي بنفسك هتقولي اكتر من كده
ولو ماعجبكيش ياستي .. ليكي عزومه على اي فيلم تاني

وربنا يسعدك ويكرمك دنيا وآخره على كلامك الجميل ده



سلاموووووووووز

غير معرف يقول...

فيه كونسورتيوم من كبار رجال الأعمال أبدوا إهتمام بتحليلاتك السينيمائية وبيفكروا يتبنوك مالياًِ بس محتاجين يقروا تحايلك لفيلم كباريه الأول. الدفع بعد الإستلام.

Soooo يقول...

النمس لتوظيف العمالة المصرية بالخارج

يشرفنا التعامل مع مؤسسه قوميه وصرح اقتصادي عظيم زيكم الحقيقه
ولو فيها فلوس تأكدو اني هحاول جاهدا اخد كل مليم منكم

هذا .. وسوف افكر في عرضكم بجديه اذ ان هنالك عرض مقدم من شركة (الدُّهُل للتوظيف الداخلي والاشتغالات) .. ولذلك فعلي ان اختار بين الانسب لي ولقدراتي الفنيه

والله ولي التوفيق




سلاموووووووووز

غير معرف يقول...

يخرب عقلك.....التحليل جامد جداً...هو صحيح البوست متأخر موت بس أنا لقيت مدونتك صدفة....للاسف هتخليني أتابعك.....مع اني مش عجبني أوي موضوع المذكرات دة...بس واضح إن فيه حاجة في دماغك...ربنا يوفقك.....go on man!!! thanx for the post

Soooo يقول...

Hazem eshazly

اهلا بيك يافندم وياريت تعتبر مدونتي المتواضعه زي بيتك وتنورني دايما بزياراتك وبتعليقاتك

وياسيدي انا ولا محلل ولا ناقد ولا حاجه
انا قلت اللي حسيت بيه بجد

وبالنسبه للمذكرات .. انا فعلا باجرب حاجه معينه وعايز اشوف تأثيرها عالناس
بس لسه هيبان بعد ما اخلصها
وان شاء الله فاضل اربع حلقات وتخلص وبعدها هشوف ايه الايقاع العام

والف شكر على زيارتك .. وياسيدي لو عندك ظروف هتمنعك عن متابعة مواضيعي اول بأول .. في اي وقت تعالى وشرفني واقرى اللي تحبه

وربنا يسعدك ويكرمك ويوفقك ويرضيك دنيا وآخره




سلامووووووووووز

غير معرف يقول...

سوووو بجد تعليقك على الافلام اللى بتشوفها في منتهى الجمال
ويستاهل نقدك لافلام انه ينزل في الجرايد زى النقاد اللي بنسمع عنهم
لانك بتتكلم على كل حاجه الصوت والديكور والتمثيل بحرفيه عاليه قوى
ربنا يوفقك ومنتظرة منك التعليق علي فيلم كباريه في اقرب فرصه لانى كنت عايزة اشوفه بس انت قلت انه ماعجبكش
وانا بقيت بثق في رأيك جدا ومنتظريين كل حاجه جديدة منك وياريت متتأخرش علينا

Soooo يقول...

sooosaia

ربنا يكرمك يارب على كلامك الجميل ده
وصدقيني تعليقك وتعليق كل اللي بيتابعو مدونتي المتواضعه احسن عندي والله من ان كلامي ينزل في جرايد ولا مجلات ولا اي حاجه

وان شاء الله في خلال الاسبوع ده هكون متكلم عن فيلم كباريه ولو اني ماكنتش احب اتكلم غير عن اللي باحبه لكن هحاول اعيش في دور الناقد وربنا يستر

والف شكر على كلامك الجميل ده وربنا يارب يكرمك ويبسطك ويسعدك ويوفقك ويرضيكي دنيا وآخره يارب




سلاموووووووووووز

غير معرف يقول...

قريت كل لكامك وعجبني جدا بس انت كده تعتبر حرقت الفيلم

انا للاسف مش هعرف اتفرج على الفيلم دا خالص بس على رأيك هو هينضم لهي فوضى وحين ميسره كتأريخ للحقبه المباركه الميمونه الي احنا عايشين فيها دي وهيكون زي افلام العوامه سبعين والكرنك والبرئ واحنا بتوع الاتوبيس وثرثره فوق النيل ومجموعة افلام بتجيب الواقع بكل ما فيه من سواد وكآبه وحقيقه كئيبه

ردا على فلحوظتك الاولي انا طبعا عايزك تكمل السينيماتيك بس انا شكلي هنضم لحزبك للعاطلين ان شاء الله
اول ما تعمله هخش معاك فيه كعضو مؤسس ومقره هيكون في بير ام سلطان ان شاء الله