الاثنين، ٢٩ ربيع الآخر ١٤٢٩ هـ

!!ياخي أوبجكشن

مش من طبعي اني انزل موضوعين عالمدونه في اقل من اربعه وعشرين ساعه
ولا كنت ممكن اتخيل اني اعمل كده في يوم
ولا كنت اتخيل انه يحصل فينا اللي حصل النهارده
!!!!!!!!!!!!!!!!!
؟؟؟؟؟؟؟؟؟؟؟؟؟
علاوة الريس طلعت بعته
اي نعم
واتبعتنا .. اتبعتنا .. انا وانت يا مواطن اتبعتنا اتبعتنا
ليه بقى اتبعتنا
بقى الريس عمل العلاوة دي واجبر الحكومه انهم ينفذو كلامه لانه قلبه كبير ويساع من الحبايب الف .. وفي نفس ذات التوقيت المحلي .. الحكومه كانت مخططه انهم يزودو اسعار حاجات زي البنزين والسولار عشان سعرها ارتفع في الدنيا كلها .. ولو كانو قالو كده كانت هتحصل مشاكل
لأن الشعب فقد المصداقيه في خطابات الحكومه والريس
مش كده وبس .. لأ .. ده على حس العلاوة ومبدأ نصرة الغلبان والوقوف بجانب مستحقي الدعم والعطف والشفقه من الحكومه .. زودو ضرايب العربيات اللي فتحوها عالبحري وبقى كل الناس معاها عربيات جايبنها قسط ومتكحرتين في دفع اقساطها
مش كده وبس برضه .. دول عملو ضرايب جديده عالمدارس الخاصه الوحشه اللي بتعلم الولاد وبتخليهم يفهمو بدل مدارس الحكومه الجميله اللي كل الناس ابتدت تهرب منها .. والسبب مجهول
مش كده وبس .. دول أنهو تراخيص المشروعات الاستثمارية في المناطق الحره .. وعملولها تعريفه جديده وبقى اي مشروع لازم يدفع مبلغ حلو كده .. يا اما يلغي نشاطه ويشرد العمال والموظفين ويقعدو عالقهاوي
مش كده وبس كمان .. دول زودو اسعار الغاز الطبيعي المستخدم في الصناعات .. بدل مايطالبو اسرائيل انها تدفع الفرق بتاع سعر الغاز الطبيعي اللي اتفقت معانا زمان على انها تاخده بسعر رخيص
يعني نزعل اسرائيل مننا .. دي تبقى عيبه
-----
شفتو بقى بعتة علاوة الريس
بعته صح الصح
-----
بجد بجد بجد .. ملعوبه ياريس
ملعوبه يا حكومه
كوره صح الصح .. وفي التمانيات
وجووووووووووووووووووووون
-----
.. سيدي الرئيس المبجل
!! ياخي أوبجكشن
سوووو

هناك ٨٨ تعليقًا:

الساحرة يقول...

امال الحكومه هتجبلك العلاوة

منين من جيب ابوهم دة احنا شعب

مفتري مش عاجبه حاجه

بجد حكومه ذكيه لعبتها صح

دة جون عالمي بس مش في الشبكه

في دماغنا هههههه

أم أحمد يقول...

لازم كلنا نعترض وكل من له قلم يكتب وكل من له كي بورد يدوس
لازم يبقالنا موقف
لو كل العلاوات بالشكل ده مش عاوزينها
مــــــــــــــش عاوزينــــــــها

اهو ده عيبه يقول...

احب اهدى للسيد الرئيس اغنية لو مكنتش انت تبعتنى مين هيبعتنى

حنستنى يعنى تيجى م الغريب طب ده حتى جحا اولى بلحم اخوه

الراجل عايز يقضى على الطبقه البرجوازية المتعفنه اللى بتركب عربيات لادا وبتودى عيالها مدارس تجريبية وعايزة تتساوى باسيادهاولا يمكن عايزين يعملوا راسهم براس اسرائيل

والا اللى بيفكروا فى مشاريع وحاسبين نفسهم رجال اعمال ونسيوا ان مصر فيها 3 رجال اعمال بس معروفين
ابو شنب فضى
وابو رجل خشب
وابو ترعه فى وشه

ياخى احم احم

Doba يقول...

عجبتنى قوى يا اخى اوبجكشن دى
دى المؤدبة منها ولا ايه النظام
==========
مش هما كانوا ناوين يعملوا إضراب علشان الاسعار تقل هو ادالهم علاوة تخليهم يتكتمو وفى نفس ذات الوقت الاسعار كلها تزيد اكتر واكتر واللى ميشترى يتفرج

والدنيا هتبقى نار وكله هيجرى ورا بعضه والسرقة هتزيد والاغتصاب والقتل كمان

ده احنا هنشوف زمن العجب العجاب
=============

انا ليا سؤال بقى
لما هو جاب ال 80 سنة مهواش قادر يعمل وقفة مع نفسه قبل ميقابل وجه رب كريم هيتحاسب قدامه على كل البشر دى

==========
ربنا يرحمنا برحمته
===

بس بقى انا هدخل يوسف المدرسة متجيبش سيرة المدارس احسن انا قرفانة خلقة لوحدى

اوبجكشن
اوبجكشن
اوبجكشن

Empress appy يقول...

لاااااااااا انا من امبارح بقولها طول الليل لا مش قادرة بجد حراااااااااااااااام حكومه قذرة وومزورين وحراميه ويقولك معلش معلش ايهههههههههههههه يا حكومه
القرار اتمضى
ده بيضحك علينا يا سوووو
ده نايم وبيهز فى رجليه وحاططها فى وشنا وبيضحك
انا عاوزة ثورة لااااااا والله تولع البلد عليه انا مش قادرة بجد حررررررررررراااااااام ابن الحرام كل حاجه هتزيد يا رب خده بقى والنبى يا رب خده خالص

رئيس جمهوريه نفسى يقول...

بتستفذنى يا سووووو
الى محدش خد باله فى خطاب الرئيس فى عيد العمال قال انا وضحت للحكومه( يقصد الوزراء) المرحله الى احنا دخلينا عليهاوالى ممكن يحصل وفشلـــــــــــت الحكومه فى وضع حلول لتلك المشكله طيب لما هى فشلت مشالهمش ليه
-------------------------------
يا غالى البلد كانت ماشيه على سياسيه بيع مصنع بيع غازك شوف الشارى مين علشان تصرف على البلد وتغضى عجز الموازنه وقرارت غير مدروسه زى المحافظتين الجداد الى بسببهم الموازنه حتتكلف 2 مليار جنيه اعتمادات جديده و7.5 مليار دولار فرق دعم بيع غاز طبيعى لاسرائيل بناقص 7.5 دولار فى كل وحده عن السعر العالمى وهو نفس السعر الى بيتباع بيه لمصانع الحديد والاسمنت وكمان الاسمده على فكره كل اصحاب المصانع دى من اقطاب الحزب الوطنى زى احمد عز حديد وحسن راتب اسمنت ونجيب سويسرا قبل ما يبيع الحصه بتعته فى سوق الاسمنت لشركه لارفاج الفرنسيه تقريبا واحمد عز بيفكر يبيع لشركه ميتال الهنديه وحسين سالم بيصفى وعايز يبيع كل حاجه ليه
المركب بتغرق والفران كوشت على كل حاجه وبتهرب
اوبجشكن ما قلت مش حدون

رئيس جمهوريه نفسى يقول...

فى غلط نجيب سويرس مش نجيب سويسرا بس مختلفتش كتير

walaa يقول...

ايوه والله يا سووو
وبعدين يقولك ايه الريس طلع رحييم اهو وزود المرتبات بلاش نظلم الراجل
تصدق احنا شعب بيضحك عليه هنفضل لحد امتى منهوبين ومظلومين كده
وياريت وبس وكمان مسلوبين الاراده

باع المصانع والغاز مدعم لعدونا وباع بلدنا
الراجل ده مش خايف من ربنا ولا ايه
تحياتى ولاء

Asmaa mahaba يقول...

الله يسامحك يا سووو
مكنتش عارفه ادخل ميلى جيت اعلق لاقيت ممنوع مجاهيل يعلقوا عموما
انا حفول الحمار تنك بتاع العربجىسيدس وبعدين ابقى اقولك الموضوع ماشى ازاى اقول على حاجه انا مش متفائله
اه خليك فاكره بقى انا لتعليق التاسع وكان مكن اكون الخامس بسببك
عمرى ما حانساهالك يا سوو
غنى معايا ياله يا ماكلن ومشربن ومهستكنا ومشخعنا ومدلعنا ومنشورنا وماشرفنا يا حبيب الملايين
تحياتى ليك سومه_87

خمسة فضفضة يقول...

السلام عليكم ورحمة الله وبركاته

لسه امبارح معلقه عند بيلا بنفس كلامك ده

هما كانوا ناوينهالنا من زمان سواء بقي العلاوة 30 ولا حتي 3 في الميه

يلا كل علاوه واحنا طيبين

Unknown يقول...

اذا كنت تعرف محمود معرفة شخصية يا سووو كلمه ارجوك لحسن كاتب بوست جديد بيقول انه عرف الى خاض فى عرض والدته و مصمم يسيبنا

كلمه ارجوك

Miss. Sosa يقول...

تفتكر يا سو حد هيقدر يقول اوبجشكن على النت تانى بعد اللي حصل لاسراء عبد الفتاح ؟!

غير معرف يقول...

ياخراااااااابى وعينى عينك كده
انا قلتها كلمه حكمه
الحدايه متحدفش كتاكيت
كان قلبى حاسس ان فى مصيبه

حسبنا الله ونعم الوكيل

بجد حاجه تقرف طيب هو عمل كده على الموظفين خدهم فى دوكه العلاوة
طيب والناس الى تحت الى مالهاش علاوات تعمل ايه

بجد احنا شعب يستاهل ضرب الجزمه
هل احنا فعلا نستاهل ضرب الجزمه؟؟؟؟
قولى يا سوووو نستاهل؟؟
ولو منستاهلش ساكتين ليه
بناخد بالجزمه ونقول كمان ليه؟؟

مش عارفه يا سوو
هنروح فين بعد كده .. بجد مش عارفه

بنوتة من وسط البلد يقول...

حلو اوى البوست بتاعك يا سووو

هو الريس ما بعتناش ... هو عمل حاجة تانية .. بس قليلة الادب

وبعدين ده طلع الراجل فى وادى والدنيا فى وادى تانى .. الراجل كان ملخوم لاتورتة والشمع وفى عز فى هو سخنان قام فنجر وقال هديكوا 30%


قامت الحكومة ضربت حيص بيص هنجيب منين يا ريس ... قالهم ولعوا فى عين ام الشعب .. بس يا ترى هيكفونا بنزين منين ؟؟؟؟؟؟؟؟

koko يقول...

كلنا بنسرق بعض يا سوووو .. تعرف كام واحد شريف و امين و بيقوم بعمله بأمانه و اخلاص و كام واحد نصاب و حرامى و بؤ على الفاضى .. من اول سواق التاكسى و الميكروباص لغاية زمايلك و مديرك مرورا بالسباك و النجار و بتاع السيرامك و الخضرى و الفكهانى .. الخ

فكر بجد و قولى ..

dodda يقول...

اما شعب تيييت
ولا انا هبله ولا انت عبيط
من امتى الحدايه بتحدف كتاكيت؟؟
تعرف ان الريس كان مضغوط عليه فى ميعاد الخطاب وان دى مش علاوه دى رشوه يكسروا بيها عين الشعب عشان ميحصلش حاجه فى عيد ميلاده
وهو ليه الافترا ده عايزين علاوه والحاجه متغلاش؟؟؟؟؟
تييت تييت باعته

Unknown يقول...

يعني الراجل يقطع نفسه اهو بيدي باليمين و يدي بالشمال بس طبعا اليمين بتاخد اضعاف

بس الي مستغربالو اوي سامح فهمي ازاي قادر يطلع و يقول البترول غلي و هو لسه من 3 اسابيع قال لاااااء و دي اشاعه ولا مساس شكله ايه علي الاقل قدام نفسه

تحياتي

إيمان يقول...

كل هذا يؤكد بكل المقاييس أن إنت أكيد أكيد فى مصر....أنا اول ما سمعت حكاية العلاوة قلبى أتقبض...ما هى الحدية متحتفش كتاكيت...وقد كانت المفاجأة اللى كنت أنتظرها...وكله على حس المدعوة المظلومة الأسعار العالمية ...
وضع يجعلك تشعر إنك تهبط تهبط تهبط إلى حيث تدوسك الأقدام...بلا أى رحمة
المواطن يموت من أجل يعيش الريس وحكومته
بجد أنا حاسة بمرارة ووجع ليس له أخر
مش قادرة اقولك لية يا سووو قلبت علينا المواجع لأنها بقيت الحديث العام والخاص بين الناس وحديث الجنون اللى بقت الناس تكلم بيه نفسها..كوابيس النوم...

تحياتى وتقديرى

Maha Omar يقول...

امال انتا كنت توقع ايه يا ابني
علاوة عليك يا رب
انا ضفت مدونتك عندي عشان هية مدونة في الجون
تحياتي
مها عمر

DayDreaming يقول...

شيء متوقع كالعاده اللي بيدوه باليمين بياخدوه اضعاف مضاعفه بالشمال
صيح ملعوبه بس لعبه محفوظه وسئمنا منها

.:.-=- ELGaZaLy-=-.:. يقول...

loooooooooooooooooooool

يا عم براحتك....

قول اوبشجكشن واخبط راسك فى الحيط هي دى مصر...ولو معجبكش ...


ولا بلاش ازيك يا سعودى يارب تكون بخير

انين الحزن يقول...

سووووووووو

ازيك الاول

أوبجكشن دي يعني ايه اوعي تكون زي تيييييت كدا


اه عايزة اقول حاجه كمان لمحمود رئيس جمهورية نفسه

انا اتبسط لما شفت تعليقك بجد هنا ما ترجع بقه

كلمه ياسووووووو قول حاجه يابني ..

سلامووووووووووز

وزة

Rosa يقول...

أوبجكشن زي مانت عايز
احنا بلد ديموقراطي
يكفلك الدستور (دستور يا اخوانا يالي تحت الارض .. ربنا يجعل كلامنا خفيف عليهم) انك تؤبجكشن بجميع الطرق الممكنه و الغير ممكنه
بس ابقى قابلني الساعه اتنين الضهر جنب الأسد اليمين الي فوق الكبري الي فوق النيل الي في بلدنا الديمقراطي لو حد سمع للأوبجكشن بتاعك
شكلك هتودينا في سوووو يا سوووو
و سوووو يا سوووو
سيدي سوووو المبجل .. أوبجكشن
:D

Rosa يقول...

صحيح انا كمان عندي أوبجكشن بعيد عن الموضوع بس بما انه يوم الوبجكشانات
انت بقيت عاملي مقاطغعه في مدونتي و لا ايه
أوبجكشـــــــــــــــــــــــن
أكبر من الي موجه للريس

Dr. Ibrahim يقول...

صح والله عارف يا عم سوووووووو

لازم يغلى حاجة قصاد حاجة
وكله ضحك على الدقون يا سووووو
هو فيه حاجة ببلاش اليومين دول حتى العلاوة عادت بغلو البنزين

وودنك منين يا جحا

الـسـيـدة نـون يقول...

سووووو
ممكن تسمحلى اقول اوبجكشن بالعربى
ولا انت كاتب البوست ده علشان خريجى اللغات فقط

ولا اقولك بلاش
انا هاقولها مع نفسى هنا فى بيتى
علشان محدش يمكسكها عليا كلمة

تحياتى ليك
اختك خيخة

aya يقول...

اوبجيكسيوا

ديه كلمة فى منتهى الادب والاخلاق والعلو والرقى
بالنسبة للى نفسنا نقوله

طب هو احنا رايحين لحد فين

يعنى هو عايز يدخلنا فى الحيط

حد يقولوا ان الحيط وقع
وخلاص بقينا فى الشارع يا ريس

ارحم من فى الارض
جايز ...
احتمال..
يمكن...يرحمك من فى السماءء

كاميليا بهاء الدين يقول...

يمكن يكون ده اول بوست قرأته عن موضوع زيادة الاسعار
لكن مش قدرت اعلق وقتها ،، لانى كنت مصدومة
قولت ايه الافترا ده؟
هو فيه فى الدنيا كده؟
الحكومة دى فين؟ فى اى بلد يعنى؟ فى مصر؟
لا ، لا ، لا، اكيد لا

دخلت مدونات كتير
لاقيت الكل بيصرخ بنفس الموضوع
قرأت كل التعليقات
فى كل المدونات

مش لاقيت إلا إنها

كلمــــات مكتوبـــة بحبــــر القهـــــــــر


حسبنا الله ونعم الوكيل

تحياتى

رحــــيـل يقول...

هههههههه

يالا بقى لا اهى اول بتعه ولا اخر باعته
ايه الجديد يعنى

مش عارفه مكنتش مرتاحه للعلاوه دى ولا حتى فرحت بيها ولا سألت عنها
احسن الواحد يفضل يعشم نفسه وفى الاخير
تطيييييير

سلامووووز

Soooo يقول...

الساحرة

تدصقي انا اول ما الخبر بتاع العلاوة اتقال حسيت الكورة اتشاتت
بس ماكنتش عارف انها هاتيجي في .. في دماغنا


سلامووووووووووز

Soooo يقول...

أم أحمد

ماحنا بنقول اهو
ولو لقيت اي تنظيم للتصريح باعتراضي على اللي بيحصل هكون اول واحد ينضم ليه
وقل لن يصيبنا الا ماكتب الله لنا



سلامووووووووووز

Soooo يقول...

اهو ده عيبه

انا هوصل كلامك للريس كلمة كلمة وحرف حرف
ان ماكانش لسه وصللو
وبعدين انتي نسيتي شخصيه مهمة جدا في عالم الاقتصاد
ابو رجل مسلوخه



سلامووووووووووز

Soooo يقول...

appy

معلش هو في استفسار
هو نايم على بطنه ولا نايم على ضهره؟؟
عشان كل وضع وليه تكنيك مختلف

ارحمنا يارب



سلامووووووووووز

Soooo يقول...

رئيس جمهوريه نفسى

ايوه اظهر كده وبان
ده انا على آخري منك والله يامحمود
بص ياد انت
انا مش هارد على تعليقك عالموضوع ده
ولا هارد على اي تعليق ليك خالص
غير لما ترجع للتدوين تاني
ولو مارجعتش
هقول انا كنت اعرف واحد اسمه محمود وكان اكتر من اخويا
وكان صعيدي
ومجدع

غير كده
ماعرفكش




سلامووووووووووووز

Soooo يقول...

walaa

لا مش خايف من ربنا
اديني أماره واحده لخوفه من ربنا
ده اشترى الدنيا ومش واخد بالو من الاخره
ده هيتفلقط فلقطه في الاخره
يالهوووووووووووي





سلامووووووووووووز

Soooo يقول...

somaa mahaba

اه يا جبانه
كنتي عايزه تعلقي بغير معرف
لا ياختي
يانتفلقط احنا الكل
يانتفلقط احنا الكل برضه


ومالكيش حاجه عندي
وش واحد بيطلع لسانه وبيمون بنزين خمسه وتسعين




سلاموووووووووز

Soooo يقول...

خمسة فضفضة

وعليكم السلام ورحمة الله وبركاته

المشكله مش في ان الناس تعلق
ولا ان الناس تتكلم
المطلوب ان الناس تتحرك




سلامووووووووووز

Soooo يقول...

عاليا حليم

محمود ياستي اهو وشايف كلامك
وانا قلتله اللي في نفسي خلاص

احنا هنلاقيها من رئيس الجمهوريه بتاعتنا ولا من رئيس جمهورية نفسه

واخد بالك يا حوده




سلاموووووووووز

Soooo يقول...

Miss. Sosa

مافيش حد بيموت ناقص عمر
انا عندي اموت راجل ولا اعيش بعلاوة



سلامووووووووووز

Soooo يقول...

shayma

وادي المصيبه حصلت
هنحط ايدنا على خدنا
هنقبل ننضرب بالجزمه ونسكت
انا عن نفسي مش هاسكت
ولو على موتي مش هسكت




سلاموووووووووووز

Soooo يقول...

بنوتة من وسط البلد

هو فعلا عمل حاجه تانيه
وعملها صح
لدرجة اننا استمتعنا بيها وساكتين اهو وبنضحك
لكن اللي عملو هيطلع عليه اضعاف مضاعفه
وانا اهو
وانتي اهو

بس بعد تسع شهور ان شاء الله





سلاموووووووووووز

Soooo يقول...

koko

لما الناس تنسى ان في حاجه اسمها حساب ربنا
وتنسى ان في حاجه اسمها حرام
وتفتكر بس ازاي تاكل حتى لو كان اكل اي كلام
يبقى على الدنيا السلام



ملحوظه
انا كنت هفتح مكتب وعايز اشغل ناس معايا
دلوقتي هفتح قزازة بيبس صاروخ




سلامووووووووووز

Soooo يقول...

dodda

المشكله انه هو اللي ضغط نفسه بنفسه
من اول مامسكت حكومة الحزب الوطني الحكم في عهد الرئيس والسرقه زادت قوي
فضلو يسرقو يسرقو يسرقو لغاية لما وصلنا للازمه اللي احنا فيها دي




سلامووووووووووز

Soooo يقول...

EmY

يابنتي هم ماقالوش ان البنزين والسولار زي ماهم
قالو بالنص .. لا مساس في اسعار الوقود طالما لا زيادات في الدخل
زودو الدخل لمدة شهر
وهيفلقطونا باقي العمر
فهمتي التيته




سلامووووووووووز

Soooo يقول...

إيمان

طب والحل؟؟
هنفضل نتكلم يعني؟؟
هنسكت ومش هنقول حاجه؟؟؟
لا بقى ده احنا فعلا شعب يستاهل كل اللي يجراله




سلاموووووووووز

Soooo يقول...

Maha Omar

انا عن نفسي ولا كنت متوقع ولا متنيل
انا وغيري وكلنا
كنا مغيبين
بفعل فاعل معروف مش مجهول


والف شكر على كلامك ويارب مدونتي المتواضعه وشخابيطي تعجبك



سلامووووووووووز

Soooo يقول...

DayDreaming

طب ولما احنا حفظناها
هنشوفها تاني وهنسكت
طب مانقوم نشجع شويه



سلامووووووووز

Soooo يقول...

.:.-=- ELGaZaLy-=-.:.

والله يابو غزغز انا قلت اوبجكشن
بس مش لاقي حيط اخبط دماغي فيه
الناس كلها عماله تخبط ومش سايبنلي حته
الاقيش عندك حيطه فاضيه؟؟؟؟



سلامووووووووووووز

Soooo يقول...

انين الحزن

لا ياستي
انا باعترض باحترام
مش باقول تيييت ولا اي حاجه

وياريت يكون محمود قرا كلامك
عشان انا قلت اللي عندي ليه خلاص




سلاموووووووووووز

Soooo يقول...

Rosa

المشكله دلوقتي مش في الاعتراض
المشكله ان الاسد اليمين .. اللي على يميني وانا جاي منين ورايح فين؟؟؟
احسن يكونو واقفين في مكان تاني وانا ماحبش الحكومه تزعل مني
----

وبعدين انتي بتأوبجكشني لي ليه؟؟؟
الباست بارتسبل بتاع أوبجكشن يعني

انا بجد متابع مواضيعك وبادخللك كل ما اقدر .. بس بجد كنت مطحون قوي الفتره اللي فاتت
وعموا ياستي حقك علي




سلاموووووووز

Soooo يقول...

Dr-hema

جحا تعب من كتر اللف حوالين نفسه عشان يعرف ودنه فين
واللي بيلف كتير بيتجنن
واللي بيتجنن ممكن يعمل اي حاجه
وليس على المجنون حرج




سلاموووووووووووز

Soooo يقول...

بت خيخة وأى كلام

والله ياخيخه ياختي انا نويت والنيه لله اني امسك لساني على قد ما اقدر
لكن مش قادر
انا من الصبح عمال اقول اوبجكشن بالبلدي
حتى لما نزلت القهوة قلت للقهوجي هاتلي أ.. سكر بره
أوبجكشن سكر بره يعني




سلاموووووووووز

Soooo يقول...

aya

عارفه الحيطه وقعت ليه
عشان اتبنت من غير حديد تسليح
اصلو غالي ومحتكر في دوله عملت ثوره من يجي اكتر من خمسين سنه ضد الاحتكار

فهمتي ليه هو بيعمل فينا كده


ملحوظه
الحاجه الوحيده اللي ممكن تخليه يترحم يوم القيامه
انه ينتحر ويولع في روحه
ساعتها هيموت كافر رسمي



سلامووووووووووز

Soooo يقول...

كاميليا

تخيلي بقى لما كلنا نكتب بحبر القهر
هيكون الورق ايه غير جلدنا اللي بيتمزع مننا واحنا مش قادرين نعمل حاجه


ارحمنا ياااااااااااااارب




سلاموووووووووووز

Soooo يقول...

ra7eel

بتضحكي يارحيل
بتضحكي والسجاير غليت
طب الواحد يحرق في ايه دلوقتي


اقولك
انا هاروح احرق احلامي اللي كنت باحلمها لبلد تقدر ولادها




سلاموووووووووز

wanna b a physician يقول...

وانتى ياسوووو عايزهم ينهبوا لا سمح الله
يعنى الناس بيزودوا دخلهم عشان يغطوا العجز بتاع العلاوة
تصدق بلد بنت ...... اوبجكشن فعلا
والى اللقاء فى علاوات اخرى

د/اجدع بنوته يقول...

لا كلام ع كلامك

يااخى اوبجيكششن

وسكت الديك المباح عن الصياح

ونامت شهرزاد وراح ف داهيه شهريار

Soooo يقول...

wanna b a physician


ياسيدي انا مش ضد انهم ينهبو
بس يجيبو الفلوس اللي بره وينهبوها
فلوس الغاز الطبيعي اللي اتكروتنا وبعناه بأقل من السعر العالمي

وبعدين اساسا اللي احنا فيه دلوقتي تأثير النهب اللي عمالين ينهبوه من مليون سنه
لدرجة ان مابقاش في حاجه تتنهب خلاص




سلامووووووووووز

Soooo يقول...

د/اجدع بنوته

طب والله العظيم كنت مفتقد زيارتك ومفتقد تعليقك

ماتغيبيش كده يابنتي واظهري وتفاعلي في الحياه
واقري موضوع خبر ايه
وافهمي قصدي منه




سلاموووووووووووز

Ahmed Al-Sabbagh يقول...

عزيزى سوو

انت عارف حمدين صباحى قال ان سعر المليون سعر حرارى من البترول سعرة 3 دولار

احنا بنبيعه لاسرائيل 1.5 دولار

يعنى بندعم المحتل يا ابن منطقتى

بس عجبنى اوى اوى تعليقك عند نواااارة

هههههههههههههه

تحياتى

Eldebug يقول...

اوبجكشن على اوبجكشنك علشان احنا بناوبجكت كتيييييير والاوبجكشن بتاعنا بيضيع فرستنا فى الهوا ...

الناس بتغلى والحكومة خلاص بقت بتبصلنا من فوووووووق وشايفانا صغيريييين اوى ... واللى شايف نفسه كبير عمره مابينزل للصغير بس حاجة من اتنين يااما الصغير يوريله حجمه الطبيعى ... يااما يطلعله فوق ويسكعه على قفاه يفوقه

سمية يقول...

يانهار اسسسسسسسسسسسسسسسسسسسسسسسسسسوح
انا اول مرة انهارده ادخل و أقرا كل التعليقات اللى اتكتبت و ردودك عليها

ده خلاص كده .. القيامة قربت تقوم ..
انا السنة اللى فاتت اما نزلت مصر لقيت الناس كلها مسعورين على بعض .. امال السنة دى اما انزل هيحصل ايه .. الناس هيكونوا اتحولوا لفامبيرز وبياكلوا فى لحم بعض و بيمصوا دم بعض ..

مهوا دى الحاجة الوحيدة اللى بقت فى متناول يد الجميع .. لحوم البشر .. والحمد لله ان متوفر منها كتير اوى ..

وبعدين اصل حتى لو اتكلمنا و ثورنا و بهدلنا الدنيا هنصلح ايه و للا ايه ..

التصليح ده ممكن نعمله اما يكون البلد لسه فيها امل .. لكن ده كده خلاص لازم يتجاب عاليها واطيها و تتبنى من اول و جديد و حتى اللى هيبنيها ميبنيش مكانها .. يروح يشوفله حته تانيه يقدر يكون متفائل فيها لحسن ده حتى ارضها و ترابها بقو منحوسين و مفيهمش خير و مليانين بلاوى و امراض تكفى لأذيه البشر لمدة قرون قدام ..

والله العظيم انا من كتر ما انا مصدومة مش عارفة انا بخرف بقول ايه ..

بقولك ايه
سلام..

Mafrousa يقول...

هو انت ما دريتش مش الحمد لله دخلنا موسوعة جينس من اوسع ابوابها
و حكومتنا حتاخد جايزة نوبل
ياعم ديه مسابقه عالميه بتتعمل على قفانا...
تصدق انا ماليش نفس حتى امشى فى الشارع..كله بيضحك على كله ...و بيستعبطونا و احنا ساكتين...و الشاطر اللى يضحك على التانى و ياخد فلوسه بشطاره

tamer.sala7 يقول...

سؤال ملهوش دعوة خالص بالموضوع
يعني امتي الريس بتاعنا انشاء الله يطلع معاش انا اعرف ان الريس موظف حكومة وموظفين الحكومة بيطلعو تقريبا علي ستين سنة الريس بتاعنا جاب الستين سنة من عشرين سنة لو انا فاهم غلط حد يفهمني الصح ؟؟؟؟؟

أبو خالد يقول...

أبنى الحبيب /سوووو
صدقنى لا حياة لمن تنادى
و حكومة و مجلس شعب خونة
دى ناس فى وادى و احنا فى وادى
دمت إنسان عزيز النفس

يوميات فنانه مفروسه جداا يقول...

جراي ايه يا سووو انت
معلش يا باشا والله الرجل بس معاه شوية مشاكل مأثره علي نفسويته وبيهلفط بأي كلام اوبجيشن ايه وزفت ايه
روح شوفلك كلمتين ذاكرهم يلا.......
ايه خلصت المذاكره طب روح شوفلك حاجه تعملها مالنا احنا بالحكومه واللي بتعمله والكلام ده وبعدين المفروض نسمع كلام الاكبر مننا هما اكبر ويعرفو اكتر
يلا جدع شاطر وانا هجيبلك حاجه حلوه ماشي
موضوعك للاسف يا بني هايل
ربنا يرحمنا برحته بقي
تحياتي

Soooo يقول...

Ahmed Al-Sabbagh

هي جات عالبترول وبس ياصباغ
ده احنا بنتباع
بنتباع جمله والله
اشتري عشر مصريين نكمل الدسته ببلاش
وماتقلقش
لو حد منهم مات ولا حاجه
اخواتو هيكملو المسيره
----
تعليقي عند نواره عشان بجد انا حاسس باحتقان في الزور .. والبواسير طلعت تاني

تعرفش دكتور محترم يعمللي عمره ويرجعني شباب؟؟؟؟؟




سلامووووووووووووز

Soooo يقول...

Eldebug

الكبير في الاكبر منه
والصغير مسيره يكبر
مش شرط يكبر بالنفوذ والفلوس
بس لما هيكبر ويقدر يقول للظالم اوبجكشن
ساعتها هايقولها وهو مش خايف

ومسيرنا هنكبر



سلاموووووووووووز

Soooo يقول...

سمية

ياستي انا والله العظيم من امبارح وانا مش عارف انام
كل ما عيني تغمض الاقيني باقوم واقول اوبجكشن

الناس فعلا كلت في بعض خلاص
والثورة جايه جايه
بس المشكله انها ممكن تيجي متأخر
هتيجي بعد ماهنكون خلاص
مافيش اي موارد

ونصيحتي ليكي
ماتنزليش مصر في الاجازة الجايه
روحي دبي
حلوة دبي
وهاتيلي معاكي لابو توب وشاشة سبعين بوصه ال سي دي واربع خمس موبيلات هديه


سلامي لفتكات
سلامووووووووووووز

Soooo يقول...

واحدة مفروسة

مين سمعك
والله انا مالي نفس اكل ولا اشرب ولا اعمل حمام

احنا خلاص رخصنا قوي
رخصنا على نفسنا قبل مانرخص على حكومتنا
منه لله
حسبي الله ونعم الوكيل



سلاموووووووووز

Soooo يقول...

tamer.sala7

الريس يطلع معاش؟؟؟
انت باين عليك مابتاكلش كرانشي




سلامووووووووووووز

Soooo يقول...

أبو خالد

يا استاذي زمان وفي حكاياتك لما كنا محتلين كان في ناس بتتحرك
دلوقتي مافيش
حرام ده ولا حلال
نسكت ونبقى شياطين خرسا ولا نصرخ ونقول للاعور انت اعور في عينه
ماهو احنا هنموت هنموت
يبقى نموت على حق




سلاموووووووووووز

Soooo يقول...

يوميات فنانه مفروسه جداا

الريس بيهفلط؟؟
الريس مايهفلطش ابدا
ده كلامه نازل في القرآن والكتب السماويه والفضائيه والمجلات العلميه كمان
تقومي تقولي بيهفلط؟؟
سامحوها ياللي بتقرو تعليقها
جاهله ياسيادنا




سلامووووووووووز

همس الاحباب يقول...

ان لم تستحى فافعل ما شئت
طب دول كدابين ولاد ستين فى سبعين
مش الريس قلهم لا مساس لمحدودى الدخل ولا زيادة فى الاسعار طب يختشوا شوية لحد الناس ما تقبض العلاوة وتكون نسيت شوية الكلام ولا دول حكومة بجحة بجد
هو الريس لما قال الكلام كان بيغمز بعينه الشمال للحكومة ولا ايه
اصلى انا نظرى على قدى ومسمعتش الخطاب يعنى انا اهو اشاغلهم وانتوا اضربوا على قفاهم
كفاية كده احسن الضغط بدا يعلى يا باشا
سلاموووووووووز

رئـــــيسـة حزب الأحلام يقول...

حلوة اوى سونيا هى اتعلمت الاتيكيت دة فين ياريت تدينا كورس فى خرم كيس الطرشى وشربة وكمان تمسحة فى كمها ولا حوجة للمناديل والكلام الفاضى دة

مدحت محمد يقول...

هههههههههههههه
ياخى ستين اوبجيكشن

بس بينى وبينك
نستاهل

mohamed يقول...

امال الريس هيدفعلك العلاوة من جيب ابوه مش هو قال العلاوة تلاتين فى المية وشوفولكم موارد اهم شافولهم موارد الراجل مضحكش علينا احنا اللى طيبين وفاكرين الحداية بترمى كتاكيت

Soooo يقول...

Doba

آسف جدا والله تعليقك وقع مني تقريبا بسبب قلة النيكوتين في الدم نتيجة ارتفاع سعر السولار

لكن انا فاكر اني كتبتلك تعليق فحواه كانت اني بقول اوبجكشن المؤدبه عشان طالبه معايا انضف لساني شويه .. اديلو اجازة وبعدين ارجع لأصلي الراقي

وبخصوص ابنك .. انا باقترح تديهوني لمدة سبع سنين وانا هتكفل بمصاريفه تماما
واوعدك انه هايبقى صنايعي رخام ميه ميه
ويوميته هتوصل لمية جنيه
والعلم في الراس مش في الكراس



سلامووووووووووز

Soooo يقول...

همس الاحباب

فعلا الريس قال لا مساس بمحدودي الدخل
وماتنساش ان الوزرا موظفين ودخلهم محدود
وكمان ظباط الجيش والشرطه موظفين ودخلهم محدود
وكمان بتوع الحراسات الخاصه والتشريفه موظفين ودخلهم محدود

واعتقد انه كان بيتكلم عنهم .. مش عن العمال والموظفين والناس الغلابه دول

لنا الله يابو همس
لنا الله




سلاموووووووووز

Soooo يقول...

رئـــــيسـة حزب الأحلام

ده انتي في الطراوه خالص ياريسه
انتي يابنتي ايه اللي جابك الشقه دي؟؟
تعليقك على الشقه اللي في الدور الاخير مش هنا

عموما الف شكر على تعليقك وماتزعليش مني .. انا باهزر معاكي



سلامووووووووووز

Soooo يقول...

مدحت محمد

انت بتقول فيها
اه والله نستاهل
الشعب اللي مصيره بايدو
هو الحاكم هو الحارس
والاحلام مش عايزه فوارس
الاحلام بالناس تتحقق




سلاموووووووووووز

Soooo يقول...

mohamed

ماهو هنا بقى راس الحوار
هي الموارد علينا احنا ولا على الحكومه وتشجيعها للاستثمار وفلوس قناة السويس وفلوس تشريفات وحراسات ومواكب الوزرا والمباني الحكوميه اللي بتتبني وخلاص والموظفين اللي مكتوبين عالحكومه موظفين وهم بطاله مقنعه وووووو

هي دي الموارد بجد
مش جيوب محدودين الدخل برضه




سلاموووووووووووووز

جيهان علي يقول...

السلام عليكم ورحمة الله وبركاته

كنت ناوية أكتب عن الموضوع بتاع العلاوة وزيادة الأسعار لكن بصراحة الموضوع استهلك كلام ومناقشات مباشرة في حياتنا
علاوة للموظفين
طيب والحرفيين والناس اعمال حرة اللى ملهمش زيادة راتب ولقوا الأسعار زادت في كل حاجة كدة هايعملوا ايه

يعني كالعادة الحكومة عطيت باليمين وأخدت بنفس الأيد برضوا اليمين اصل الناس لسه ملحقتش تاخد اصلا



تحياتي

Salma Amer يقول...

اللي اديته الحكومة باليمين اخدتة باليمن والشمال امال ايىة حكومة نصحة حقيقي مش رجال اعمال بقى بيعرفوا يحسبوها كويس ولازم يطلعوا كسبانين

ست البيت يقول...

الحكومة اتعذرت في قرشين ...
الشعب يقفل جيبه في وشها؟؟؟؟؟؟

أم شعب غريب صحيح أمال فين
ما تقولش أيه ادتنا مصر (على قفانا)
تقول حندي ايه لمصر
اسمعك احلى لافتة شفتها مكتوب يارب العالمين أحفظ مصر ومبارك من الحاقدين
هو اشمعنى مصر مبارك؟ ما ينفعش يعني مصر جمال...مبارك برده مخك ما يروحش بعيد؟

Soooo يقول...

جيهان علي

وعليكم السلام ورحمة الله وبركاته

والله ياجيهان انا لما حصل الموضوع ده وقتي وقتي جاتلي حالة عته منغولي
ماعرفتش اعمل ايه ولا اقول ايه
رحت قايل شوية الكلام دول بدل مانفجر ياختي

ومشكلة الحكومه انها مش واخده بالها من اننا كلنا في مركب واحده
يعني الحرفيين زادت اجورهم نتيجة الحوار ده
سواقين التكسيات زودو الاجره نتيجة الحوار ده
كل حاجه زادت .. من قبل ماالموظفين ياخدو العلاوة اصلا

وربنا يستر بقى





سلاموووووووووووز

Soooo يقول...

Salma Amer

وياريتهم رجال اعمال شرفاء ياسلمى
دول مجموعة لصوص بينهبو فينا ومبهدلينا ولا كأننا شعب بيشتغل بالسخره
ربنا ينتقم منهم بنفس اللي بيعملوه فينا يارب




سلاموووووووووووز

Soooo يقول...

ست البيت

اتعذرت في قرشين؟؟
دول اتعذرو في بتاع سبعه جنيه
مبلغ مبلغ يعني

وبعدين على فكره .. مصر ادتنا كتير قوي قوي قوي .. على قفانا .. وجه الدور اننا نديها .. ياخوفي نديها بالجزمه

سعيد بزيارتك الحقيقه وبتعليقك واتمنى انك تتابعي مدونتي ومواضيعي ويارب تحوذ على اعجابك

ملحوظه
انا شفت بقى يافطه مكتب عليها
يا جمالك يامصر




سلامووووووووووز