الثلاثاء، ٢٢ جمادى الأولى ١٤٢٩ هـ

(18)مذكرات طفل .. طخين

(المحطة التمنتاشر .. سيس - هاع (1
-----------------------------

دراكولا : انا اصلا مش من سندبيس .. انا من حات - حري - ايت
سوووو : (حات - حري - ايت) !! دي زي (السي - تي - ايه) ؟؟
دراكولا : دي بلد جديده ؟؟
سوووو : لا دي ركوبه جديده
دراكولا : ياااه .. زي الحصان والحمار كده؟؟
سوووو : ده انت في الطراوه خالص .. (السي - تي - ايه) ده عباره عن اختراع لتوصيل الناس .. والمفروض انه كان يبقى وسيله نضيفه ومريحه وغاليه.. بس دلوقتي بقى وسيله غاليه .. وخلاص
دراكولا : سي - تي - ايه .. طب ودي معناها ايه ؟؟
سوووو : كـايرو تـكييف اتوبيس .. وإيه بقى (حات - حري - ايت) دي؟؟
دراكولا : (حات - حري - ايت) دي عاصمة الاقليم ده .. عاصمة القليوبيه .. قبل ماتبقى بنها العسل هي العاصمه .. زمان قوي .. على ايام الملك احمس كده
سوووو : احمس .. ده انت قديم قوي .. ده انت اقدم من الميكروباظات الرمسيس والالترامكو
دراكولا : ودول ركوب برضه؟؟
سوووو : لا دول شعبطه
دراكولا : - ويقاطعني بضيق - طب اكمل حكايتي ولا تحكي انت؟؟؟
سوووو : لا دوس انت يا غالي .. كنت بتقول انك من (حات - حري - ايت) .. ها وبعديين؟؟
دراكولا : انا اسمي (سيس - هاع) اصلا
سوووو : لا بقى .. ايه (سيس) ده ولا مؤاخذه؟؟؟
دراكولا : ده اسم زي باقي الاسماء .. عادي يعني
!!!! سوووو : ما داهيه تقولي انه كان على ايامكم في اسماء زي (فحت) و(طحن) و(كوول) مثلا
(دراكولا : - مستفيضا في الشرح - و(روش) و(أنتيخ) و(شقيق) و(مستكنيس) و(شوءوس
سوووو : لا ياشييييخ .. طب وفي اسماء مركبه زي (فل - عليك) و(بيس - يا مان)؟؟
دراكولا : اه طبعا .. في (آخر - حاجه) و (كبر - دماغك) و (بونو - بونو) و
سوووو : - مقاطعا - هي وصلت للـ بونو - بونو ؟؟؟
دراكولا : - وهو بيسخر منني - يابني الفراعنه ماسابوش حاجه ماعملوهاش .. انت ايش فهمك ؟؟
سوووو : خلاص ياعم .. كمل انت حكايتك .. وبطل تتريق علي لاحسن وديني وما اعبد .. اطلعلك اصغر تنين من التنانين اللي عندي يقرقشك
دراكولا : لا خلاص خلاص .. هكمل الحكايه .. في يوم لقيت اتنين من الحرس الفرعوني بيلفو السوق وبيغتتو على الناس .. كنت ساعتها واقف في الكشك بتاعي عادي
سوووو : ستوووووب .. كشك ايه الله لايسيئك ؟؟؟؟
دراكولا : كشك لفافات تومباك وحلويات .. وابن عمي جابلي جهاز تخاطب .. كانو الناس بيخاطبو بعض بيه .. والدقيقه كانت بخمسين قرش فرعوني
سوووو : دراكولا ياخويا .. هو حد قالك اني راكن الفيل بره ؟؟
دراكولا : - مبتسما ببلاهه - ما شاء الله .. انت عندك فيل بره غير التنانين اللي جوه ؟؟؟
سوووو : يالهوووووي .. كمل يا سيس .. كمل .. ماهي ليله سيس خالص
دراكولا : المهم .. لقيت الحرس جولي الكشك وفتحو قنينتين مياه مطرقعه
سوووو : دي ايه دي ؟؟
دراكولا : يعني قزازتين بيبس .. وبعد ماشربوهم مش عايزين يدفعو تمنهم .. وانا داخل على حوار جواز وبادفع اقساط هرم صغير في مرتفعات جولف طيبه .. مع اني عندي شقه في اسكان الشباب في منف .. لكن حمايا بقى عنده عقدة الفراعنه .. ده عايزني اعمل فرحي في قاعة امنمحات في هرم زوسر
سوووو : مش وقت زوسر وحماك .. قوللي انت عملت ايه مع الحرس الفرعوني ؟؟
دراكولا : ولا حاجه .. لقيتهم بيهددوني انهم يلغو ترخيص الكشك من المحافظه .. اتحمقت ومادريتش بنفسي .. جيت اضربهم لكن الكتره تغلب الشجاعه .. نزلو في ضرب وخدوني على القسم
!! سوووو : اوعى تقولي انك في القسم قابلت الامين خالد صالح
دراكولا : لا .. قابلت الظابط (لِبّوو - على - قفاه) .. وكان شخصيه وحشه قوي
!! سوووو : واحد بالاسم ده .. اكيد مش بيلعب بيانو بعد الضهر
دراكولا : بعد ما بهدلوني في القسم كام يوم .. طلعوني بعد ما خدو علي تعهد اني لو شفت حاجه غريبه اقولهم عليها
سوووو : يعني شغلوك مخبر .. اما انك سيس صحيح
دراكولا : مين قالك اني كنت هبقى مخبر .. بالعكس .. انا كل اللي كنت بافكر فيه .. اني انتهز أي فرصه عشان احاربهم
سوووو : وياترى جاتلك الفرصه ؟؟
دراكولا : وياريتها ماجات
-----
مصطفى شعبان : مانفعش
منى زكي : هو ايه اللي مانفعش؟
مصطفى شعبان : مانفعش اننا نقول ان سوووو ساكن جنب المحكمة الدستوريه العليا .. لان المنطقه دي تابعه لقسم المعادي
توفيق عبد الحميد : وهو تابع لقسم الزنانيري ؟؟؟
مصطفى شعبان : يادين النبي .. توفيق بيه .. انسى الزنانيري خالص .. الزنانيري دي كانت الحلقه اللي فاتت .. النهارده حلقه جديده خااااالص
منى زكي : انا مش فاهمه .. طب اصلا اصلا سوووو .. مش من المعادي برضه ؟؟
مصطفى شعبان : ايوه .. بس المعادي الجديده
توفيق عبد الحميد : اه .. دي تبع قسم البساتين
منى زكي : غريبه .. والقسم ده تابع لمحافظة حلوان ازاي وهو بعد قسم المعادي ؟؟
مصطفى شعبان : انا عندي اقتراح
توفيق ومنى : اقتراح ايه ؟؟
مصطفى شعبان : نضرب بطاقه جديده لسوووو ونقول انه تبع قسم المعادي
توفيق عبد الحميد : استغفر الله العظيم .. استغفر الله العظيم .. هَنزوّر يا مصطفى .. نزوّر؟؟؟
!!! مصطفى شعبان : لا يافندم .. احنا هنزييف
توفيق عبد الحميد : آه اذا كان كده ماشي .. على بركة الله
-----
بعد ماصحي ابويا وامي من نومة بعد الغدا .. ابويا طلبت معاه شاي سكر بره وجرنان .. لكن لما استوعب الموضوع وانهم مخطوفين .. استكفى بانه يقعد يهسهس مع امي في أي هسس
ابويا : بالك يا حاجه .. العالم دول اللي خاطفينا طلعو طيبين والله
امي : أي والله يا حاج .. بس انا صعبانه علي البت سونيا دي
ابويا : اشمعنا يعني !؟
امي : اصل شكلها كده ياولداه متضايقه من حاجه .. تقريبا اتجوزت واحد ناقص بهدلها معاه
ابويا : اهو انتو كده ياستات .. كل الرجاله في نظركم ناقصين
امي : يوه .. يعني هو عشان بافضفض معاك في الكلام .. تقوم تتحمق وتاخد الكلام على صدرك
ابويا : اخد الكلام على صدري .. ياوليه فاكراني ابو تريكه
امي : مين ابو تلكيكه ده؟؟
ابويا : هقول ايه .. بقى مش عارفه مين ابو تريكه .. يا وليه ده احسن جون في الشرقيه للدخان
امي : ماهو الكورة اللي لحست نافوخك دي .. هي اللي خلت الواد سوووو ينزل الشارع كتير .. وياعالم عمل ايه لما نزل الشارع وخلانا في المزنق اللي احنا فيه
ابويا : ماهو الام لو واخده بالها من ولادها .. ماكانوش يودّو اهلهم في مصيبه زي اللي احنا فيها
امي : ايوه .. جيب اللوم علي بقى واتنصل انت من المسئوليات الأبوبيه
ابويا : انا ولا باتنصل ولا باتنيل .. نهايته .. كنتي بتقولي سونيا شكلها متضايقه من حاجه
امي : آه ياخويا .. وبالامانه انا فكرت في حاجه وكنت عايزه اشورك فيها
ابويا : قولي
!!! امي : بافكر اشوفلها عريس
ابويا : وده مين ممكن يوافق على انه يتجوز واحده مجرمه ؟
امي : يا حاج ده ربك بيغفر وبيسامح .. نقوم احنا يابشر مانسامحش واحده مجرمة بنت ستين كلب !؟
ابويا : مش القصد .. بس انتي في حد معين في دماغك؟؟
امي : بصراحه كده .. في
ابويا : وده مين اللي عليه العين !؟
!! امي : محروس ابن عمتك
ابويا : محروس .. والله لايقين على بعض .. وهو كمان نصاب وابن كلب والاتنين هيعملو شغل مع بعض
وفي هذه الاثناء .. دخل عيد الحارس عليهم في محبسهم ويبدو عليه الفزع .. وقال لهم بلهفه
!!! عيد : مصيبه .. هنروح كلنا في مصيبه
------
يتب
ع

سوووو

هناك ١١٣ تعليقًا:

خمسة فضفضة يقول...

السلام عليكم ورحمة الله وبركاته

اول تعليق عند سوووو مش ممكن

احجز و اروح اقرا وبعدين اجي اعلق


سلام

Soooo يقول...

هييييييييييييه
وانا تاني تعليق
هيييييييييييييه

هروح انام واعلق لما اصحى ان شاء الله



سلاموووووووووز

خمسة فضفضة يقول...

لا لا لا لا بجد يعني ومنغير مازوق الكلام الحلقه دي ملهاش حل

تحفه يابني مش قادره ابطل ضحك والله خصوصا الجزء بتاع دراكولا ده لما راح للبو علي قفاه

ولا حكاية هنزيف دي كمان

ياخبر يا سووو دانت مشكله

استمر يبني علي بركة الله تعالي واوعي تتاخر بالحلقه الجديده

ملحوظة : في دوا مسكن لآلام العظام اسمه بونو

سلام

خمسة فضفضة يقول...

طيب تصبح علي خير بقي
انا كمان هاروح انام عشان الحق انزل بعد 3 ساعات

سلام

ابو لمعه 2008 يقول...

هو انت وخمسه فضفضه حجزين المدونه
اول مره اجى ومحدش يقولى ادخل انت يابولمعه باشا اول تعليق ؟
عامه مش هيخالف
والظاهر كده انى جاى متاخر ولازم اقراء 17 حلقه
يالهوووووووووووووووووووى
دول عايزين اتنين كيلو لحمه لوحدهم
يلا
الحق الطياره
اصلى باجى طيران
احييك فى اول زياره

بنوته مصرية يقول...

قولت احجز كرسي بدل ما باجي وبفضل واقفة

هروح اقرا بقي وارجع تكون صحيت لو مصحتش هرش عليك مية

ههههههههههه

بنوته مصرية يقول...

امي : آه ياخويا .. وبالامانه انا فكرت في حاجه وكنت عايزه اشورك فيها
ابويا : قولي
!!! امي : بافكر اشوفلها عريس
ابويا : وده مين ممكن يوافق على انه يتجوز واحده مجرمه ؟
امي : يا حاج ده ربك بيغفر وبيسامح .. نقوم احنا يابشر مانسامحش واحده مجرمة بنت ستين كلب !؟
ابويا : مش القصد .. بس انتي في حد معين في دماغك؟؟
امي : بصراحه كده .. في
ابويا : وده مين اللي عليه العين !؟
!! امي : محروس ابن عمتك
ابويا : محروس .. والله لايقين على بعض .. وهو كمان نصاب وابن كلب والاتنين هيعملو شغل مع بعض



ههههههههههههههههههههههههههههههههههههههههههههههههههههههههههههههههه

هفطس من الضحك الجزء ده بجد تحفة انت بتجيب المصطلحات دي منين يا سووو

بجد انت خسارة في البلد دي

كيكى عوووووو يقول...

ونبى قول لدركولا...فين حق الرهن بتاع الازازة...جدى جدى جدى جدى...اشترى من عندوا قزازة...من1566585 سنة...ولسة مخدناش الرهن....ونبى يا سوووووووووو...هاتو علشان اخويا عايز يا جوز..وانا ادفع مصاريف الجامعة...وامى عايزة تجيب دهب وابويا عايز يغير الشقة....واحنا مش عايزين نقول لعمى حتاتة..مش مياخدش الفلوس دى كلها..ونبى اوعوا تقولوا...وقول لدركولا هات الفلوس بسرعى علشان امى..ناوية تفضحوا فضيحة..المطاهر الى خدوا منوا الكشك

فاتيما يقول...

إيه دا يا سوووو؟؟
لأ حرام عليك براحة عليه دا طلع بنهاوى من بلد الحاجة أمى و هيا بتدعيلك يعنى لم التعابين بقى
وو النبى الحاج توفيق عب الحميد دا جاى الشغلانة دى غلط و لا حاجة و صعبان عليا الحوسة اللى بيبقى فيها علطول دى ...
و كونت هقولك على جنب كدا إدينى نمرة مامت سووو عشان قدام شوية أبقى أقصدها تشوفى عريس كدا على الماشى بس بعد ما أقترحت محروس غيرت رأيى عشان أنا كنت ناوية أتجوز موش أعمل تشكيل عصابى
و الحلقة تحفة يا سووو
كمل مستنيين بقارغ الصبر
تا حى اتى

غير معرف يقول...

يا نهار ابيض ع الشرقة اللي كنت هشرقها وانا بقرأ وبشرب الشاي بلبن ع الصبح؟؟؟؟
هههههههههههههههههههههههه ايه ده ايه ده؟ عليك انت كمان يا سوووو قفلات؟ نهاياتك مشوقة منتهى التشويق!!

رئيس جمهوريه نفسى يقول...

!! سوووو : اوعى تقولي انك في القسم قابلت الامين خالد صالح
دراكولا : لا .. قابلت الظابط (لِبّوو - على - قفاه) .. وكان شخصيه وحشه قوي
!! سوووو : واحد بالاسم ده .. اكيد مش بيلعب بيانو بعد الضهر
ههههههههههههههههههههههههههههههه مالهوش حل بجد
سلام ياغالى

صوت فيروز يقول...

سووو انا عايزة يومين عشان اقرا من الاول و افهم بس بجد انا مبسوطة اني اكتشفت مدونتك
سلاااااااام

Ehab يقول...

اقولك ايه بس
انت فقري
وبعدين نظام النقل من مشهد لمشهد ده هيروشني
خاصة ان المشهدين في اتجاهين بعاد عن بعض خالص
القصه ابتدت توسع قوي وانا تهت يا واد وخايف احلم بدراكولا بتاعك ده بالليل من كتر التوهان
اقولك ربنا يوفقك وتعرف تلم الخيوط دي كلها وتدينا واحد اقفال مظبوط في النهايه
تسلم ايدك يا معلم
سلاااااااااااااااااااااااام

بنت مصريه يقول...

هههههههههههههههههههههههههههههههههههههههههههههههههههههههههههه
يخرب عقلك
ايه يابنى ده فطستنى م الضحك
بوست هاااايل
اتمنى تنورنى

Unknown يقول...

قابلت الظابط : ( لبو - على - قفاه )

هاهاااهىىى

و الله العظيم معرفتش خاااااص اجى التجمع الاخير و الله كنت قاعدة زعلانة اوى بس لو تعرف الظروف حتعذرنى مرة تانية ان شاء الله

رئـــــيسـة حزب الأحلام يقول...

الحوار اللى بين الوالد والوالدة اكثر من رائع
ناس خيرين اوى وعاوزين يساعدوا
ربنا يعينهم وقاموس الكلمات الجديدة طلع فرعونى يارااااااجل
ههههههههههه
تحياتى لك

رحــــيـل يقول...

سوووو

انت متأكد انهم مخطوفييين؟
دول شكلهم يابنى بيقضوا اجازه عند حد من قرايبهم فى البلد
ههههههههههههههه

هو انت كده دايما بعد مانعيش الاحداث نلاقى مكتوب يتبع ده اسمه كلام
فى انتظار حدوث المصيبه هههههههههه
تحياتى لك

Empress appy يقول...

تصدق بقى يجليك دراكولا يأكلك انت بتتريق واسكان الشباب والله هو فيه هناك كده
وبعدين متفكرنيش بالجواز وسنينه يا سووووووو آآآآآآآآآه يانى يا مامى بقى بجد
والله مش عارفين هنقضيها عش العصفور ولا ايه
وبعدين ده مش بيجيب ليه صوابعين زينب تفتكر اتجوزة هههههههه
بقولك ايه كمل مع دراكولا متبقاش غتت

امل يقول...

السلام عليكم
بوست دمه خفيف جدا وخصوصا دراكولا الفرعوني ده وحوار الاب والام بس انا
محتاجة ارجع ورا شويه عشان افهم ازاي اتجمع سووو مع دراكولا
تحياتي

الباحث عن الحقيقة يقول...

لا بقى انت كده بتهزر
هروح اقرا التاجين يا عم
خد بالك هعلق هناك

يوميات فنانه مفروسه جداا يقول...

(وانا داخل على حوار جواز وبادفع اقساط هرم صغير في مرتفعات جولف طيبه)

ههههههههههههههههههههه في أهرمات اوضتين وريسبشن كبير في منطقة أم الهول حلوه اوي وسعرها كويس أبقي قول لدراكولا يا سوووو هههههههه
لا حلوه والله يا نهار دانا كونت هموت من كتر الضحك ايه يابني ده

هرورح بقي افتحلي قارورة مونتن ديو احسن عطشانه جدا.



ملحوظه

ننجز بقي وأعرف مين هيروح الحفلة ومين لا ونرسي علي بر خليني اظبط نفسي عشان مادتين الغباء اللي عندي دول الله يسامحكو شكل مفيش حد رايح وهروح انا اشتري الكتاب وارجع

ملحوظه رقم2

وربنا ماتجيبلي سيرة امتحانات ولا امشي ذاكري ولا حاجه لازعل بجد وانت اكيد عارف زعل الصعايده بيودي فين ههههههههههه

تقبل مروري

سلام

2ensan wnsan يقول...

استاذ سوووووووووووووووو


الشخصيات اللي انت مختارها جامده واول مره حد يختار شخصيات ممثلين كده بس ملقيتش غير مصطفى شعبان يعني ما علينا

ومين دراكيولا دا كمان دا شكله طالع عين اهله

هو ابن عمة والد سوووووو يبقى نصاب برضه

زيزو الشقى يقول...

اولا السلام عليكم

كتبت تدوينة جديدة ومنتظر رأيق

عز

سلااااام

tamer.sala7 يقول...

الحلقة دي جامدة وعاجبني اوي دراكولا الروش
بس توفيق عبد الحميد تقريبا كدة عنده مشكلة في زنانيري مأثرة عليه في الشغل

همس الاحباب يقول...

هههههههههه
ههههههههه
لا بجد مسخرة يا سووووو
يا بنى انا من كتر الضحك بقيت مسخرة فى الشغل حرام عليك وايه المصطلحات الجامدة وحلو قوى الحوار مع دراكولا
سؤال فى الخباثة هو كان بيتكلم هيروغليفى ولا ديوقراطى ولا عربى
ههههههه
بس بجد حلقة جامد جامدةقوى
ولا الست الوالدة عايز عريس لسونيا الحمد لله انك كنت طفل كنت اتبقى عريس سونيا وكنت فرح فيك بجد يا جوز سونيا
هههههههههههه
يلا مستنيين الباقى بلهفة
تحياتى واشواقى

الـجـدة فـصـيـحـة يقول...

السلام عليكم ورحمة الله وبركاته


يا سلام على دراكولا ده صعب عليا
وبعدين كان عند الفراعنة مغالاة في الشقق كدة عايزين هرم رغم أنه كان مقابر الفراعنة - الحكام ولي العامة - لا بجد طب الكشك يكفي منين بقى ثمن الهرم
ولا الضابط الله اسمه على مسمى شكله كدة

ياعيني عليك يا دراكولا


...

تزيف تفرق عن تزوير طبعًا
عنده حق

...

مامتك طيوبة جدًا

وشكلها عايزة تخلص من محروص

بس كلمة في ودنك كدة بصراحة محبيتش يكون في شتيمة فى موضوع حتى لو لفظ بنسمعه في كل مكان بس مش حلو اقراه كمان

من غير زعل :)


تحياتي

(احمد سكر ) يقول...

يانهارك ابيض يا سووو

ايه المصطلحات دى ياعم
ههههههههههههه

انا ميت من الضوحك

لاء بجد

انت دماااغ عليه اوى

تحياتى اخى الفاضل

اخيك
احمد سكر

Soooo يقول...

خمسة فضفضة

ربنا يكرمك ياست الدكتوره يارب
وياستي انا ولا مشكله ولا حاجه .. كل الحكايه اني حسيت اني نكدت عليكم في حوار التاج قلت اصلح غلطتي

وصدقيني والله مابيفرق معايا اول تعليق ولا عاشر تعليق .. عشان كده رحت معلق على نفسي تاني تعليق .. بدل ما تعملي فتنة بلوجيه ويقولو كاني وماني

ملحوظه
في دوا بجد اسمه بونو بونو؟؟؟؟



سلامووووووووووز

Soooo يقول...

ابو لمعه 2008

اهلا بيك يابو لمعه وياريت تعتبر مدونتي زي مدونتك تمام وتنورني دايما بتعليقاتك

بس انت من اولها جاي بغرامه وعايز اتنين كيلو لحمه .. هو ورك فرخه متاكله قبل كده وظبط طموحاتك بيه .. اخوك عاطل عن العمل يابو لمعه

وربنا يسعدك ويكرمك ويبسطك ويرضيك دنيا وآخره يارب



سلاموووووووووز

Soooo يقول...

بنوته مصرية

حماتي العزيزه
ازيك وازي عروستي .. يارب تكونو كويسين

والحمدلله انك ضحكتي وربنا يقدرني وارسم ابتسامه على وشك وعلى وشوش كل اللي بيتابعوني وبيقرولي

وبلدنا مافيش حاجه خساره فيها .. هي خساره في اللي ماسكينها

ربنا يسعدك ويكرمك ويبسطك ويرضيكي دنيا وآخره يارب



سلامووووووووووز

Soooo يقول...

كيكى

مبعوتلك احر سلام واحلى تحيه من الاخ المناضل الشهيد .. دراكولا السيس
وبيقولك فلوسكم في الحفظ والصون .. وبمجرد مايفك الوديعه اللي عاملها في بنك تحتمس للتنميه والاتمان الفرعوني .. فلوسكم هتكون عندك على داير سحتوت

ربنا يسعدك ويوفقك ويرضيكي دنيا وآخره يارب



سلامووووووووووز

Soooo يقول...

فاتيما

لا ياستي هناك فرق
دراكولا السيس شيء .. وماما اعلزيزة شيء تاني
والدتك دي على راسي من فوق
وبعدين علمك علمك علمك .. انا رحت بنها وقعدت فيها تمنتاشر دقيقه بحالهم .. يعني مش اي حاجه

ولو عايزه عريس قوليلي .. اصل مرحوس ربنا تاب عليه بعد ماطلع من السجن ودلوقتي بقى راجل كسيب وكللو في الحلال
بيتاجر في الاعضاء البشريه
والشغل مش عيب .. لكن العيب انه يشتغلنا

ربنا يسعدك ويكرمك ويبسطك ويرضيكي دنيا وآخره يارب

سلامي لماما العزيزة


سلاموووووووووز

Soooo يقول...

maha miho

على فكره بقى .. الشرقه دي مش من المذكرات
الشرقه دي عشان بتشربي شاي بحليب من غير ماتعزمي علينا

وربنا يسعدك ويكرمك ويبسطك دنيا وآخره يارب


سلامووووووووز

Soooo يقول...

رئيس جمهوريه نفسى

حبيب قلبي
ماهو فعلا يابو حنفي .. تخيل واحد اسمه كده .. هل تعتقد انه بيلعب بيانو بعد الضهر
ده تلاقيه استاذ في الات النفخ والضرب الايقاعي

ربنا يسعدك ويكرمك ويبسطك دنيا وآخره يابو خالو


سلاموووووووووووز

Soooo يقول...

صوت فيروز

ياستي خدي راحتك خالص
يومين تلاته عشره .. المهم انك تفضلي منوراني بتعليقاتك وتعتبري مدونتي زي مدونتك تمام

وانا اللي سعيد اني اتعرفت على مدونتك والله

ربنا يكرمك ويسعدك ويبسطك ويرضيكي دنيا وآخره يارب


سلاموووووووووز

Soooo يقول...

الشنكوتي الكبير

تصدق يابو الشناكيت اني فعلا محتاس ومش عارف هلم الليله ازاي
بس ربنا يستر

وماتخافش ياعمنا .. دراكولا ده طلع سيس قوي
انت مش شايفه خاف من التنانين ازاي يابني

ربنا يكرمك ويسعدك ويبسطك ويوفقك دنيا وآخره يارب


سلاموووووووووز

Soooo يقول...

بنت مصريه

ربنا يكرمك يارب
والحمدلله انك ضحكتي والحمدلله انك ظهرتي عالساحه تاني

وان شاء الله هروح عندك اهو ياستي .. جهزي انتي بس المشاريب والجاتون



سلامووووووووز

Soooo يقول...

عاليا حليم

ربنا ياستي يكون في عونك
وعموما انا رايح بكره ان شاء الله عمر بوك ستورز .. واتمنى انك تكوني هناك

وربنا يوفقك ويسعدك ويرضيكي دنيا وآخره يارب


سلاموووووووووز

Soooo يقول...

رئـــــيسـة حزب الأحلام

ربنا يكرمك يارب

وتخيلي انا فوجئت زيك كده .. فوجئت ان جدودنا الفراعين كانو عايشين في نفس اللي احنا عايشين فيه
حتى المصطلحات الشبابي

ربنا يسعدك ويبسطك ويوفقك ويرضيكي دنيا وآخره يارب



سلامووووووووووز

Soooo يقول...

ra7eel

ايوه طبعا مخطوفين
انتي مش شايفه ابويا اتضايق ازاي لما ماعرفش يشرب شاي ولا يقرا الجزنان

وبعدين انتي مش واخده بالك من حاجه مهمة
كلمة يتبع .. ده السيم اللي بالم بيه الشخصيات واحطهم في نافوخي تاني .. ولما تيجي في دماغي فكره اروح منتروهم يقولو اللي عايزين يقولو
وهلم جرجر


ربنا يسعدك ويكرمك ويبسطك ويرضيكي دنيا وآخره يارب



سلامووووووووووز

Soooo يقول...

appy

اهو ده الجهل بعينه
يابنتي الفراعين وصلو القمر .. يعني كان عندهم اسكان شباب ومساكن الزنزان
وعلمك علمك علمك .. كان عندهم طيبه الجديده .. اللي احنا بنسميها القاهره الجديده دلوقتي .. وابن خالة دراكولا السيس واخد شقه في التجمع التالت كمان
----
وبالنوسبه لحوار الجواز .. راجعي نفسك يابنت الحلال .. اسلام غلبان ومايستاهلش اللي هيجرالو
يلا
ربنا يصبرو على مابلاه
وش واحد مطلعلك لسانه


ربنا يكرمك ويوفقك ويسعدك ويرضيكي دنيا وآخره يا اابي بتنجاني يارب



سلاموووووووووز

Soooo يقول...

امل

اهلا بيكي ياستي ويارب تتابعي المذكرات
وابقي اقري اللي فاتك منها على اقل من مهلك

وربنا يكرمك ويسعدك ويبسطك ويرضيكي دنيا وآخره يارب



سلاموووووووووز

Soooo يقول...

الباحث عن الحقيقة

تصدق وتؤمن بالله
انا جاتلي هيستريا ضحك

انت حظك معايا غريب بجد
ده انا سايب الموضوع بتاع التاج بقالو بتاع اربع تيام دلوقتي .. تقوم انت تيجي عالمذكرات

بص .. اقرا المذكرات بقى وامرك لله


ربنا يكرمك ويسعدك ويوفقك ويرضيك دنيا وآخره يارب



سلاموووووووووز

Soooo يقول...

يوميات فنانه مفروسه جداا

لا .. اهرامات ام الهول مش قد كده
مافيش جنبها ملاعب جولف زي مرتفعات جولف طيبه

ده غير انها مش تسليم مفتاح ولازم الواحد يشطبها بنفسه .. وانتي عارفه الحجر الفرعوني دلوقتي غلي بعد حوار السولار

ملحوظه
ان شاء الله هاجي على عمر بوك ستورز الساعه 5 ونص .. وزي ماقلتي كلمة السر ابو كرتونه
ملحوظه اتنين بقى
انتي منين من سوهاج؟؟؟


سلاموووووووووووز

Soooo يقول...

wa7ed 2ensan wnsan

اهلا بيك وياريت تعتبر مدونتي زي مدونتك وتنورني دايما بتعليقاتك وبزياراتك

وبالنوسبه لمصطفى شعبان .. اهو ده اللي لقيناه .. الباقي كان كللو مزنوق وعنده شغل .. وماكانش فاضل غير هو وماجد المصري
لو كنت مكاني كنت هتختار مين؟؟؟
اما محروص ابن عمة ابويا فهو الحمدلله تاب دلوقتي وبقى بيتاجر في المستكه .. بس المسروقه

ربنا يسعدك ويكرمك ويبسطك ويرضيك دنيا وآخره يارب


سلامووووووووز

Soooo يقول...

زيزو الشقى

وبعدين يازيزو
قلتلك ماينفعش يازيزو تقول للناس تيجي تشوف مدونتك من غير ماتقولهم رأيك في مدونتهم الاول
ولا ايه؟؟؟؟


سلامووووووز

Soooo يقول...

tamer.sala7

لا انت كده هتلخبط الاسماء في بعضها
دراكولا السيس غير دراكولا الروش .. خد بالك من الفرق ده

وتوفيق عبد الحميد فعلا كان عنده مشكله في زنانيرو وراح يعمل عملية استئصال ليهم .. بس استئصلو زنانير تانيه

نورتني ياتيمو وربنا يسعدك ويكرمك ويبسطك ويرضيك دنيا وآخره يارب



سلاموووووووووز

Soooo يقول...

همس الاحباب

خالد باشا
ربنا يبسطك كمان وكمان
وياسيدي اضحك وخللي اللي في الشغل عندك يضحكو براحتهم
ده مافيش احلى من الضحك

وياسيدي دراكولا كان بيكلم دراكولي بس الترجمه كانت بتتكتب تحت .. انت ماخدتش بالك منها ولا ايه؟؟؟

ربنا يسعدك ويكرمك ويبسطك دنيا وآخره يابو همس

سلامي لهمس


سلاموووووووووز

Soooo يقول...

الجدة فصيحة

اهلا بيكي ياجدتي .. منوراني والله
وفعلا الاهرام كانت مقابر حكام المصريين القدماء او الفراعنه .. بس ماهو الناس دلوقتي برضه لسه بيسكنو في المقابر .. واي مقابر مش مقابر الحكام وبس
ولعلمك .. في كشك عندنا في المعادي هنا صاحبه عندو فيلا جوهرة في مارينا .. ومن فلوس الكشك .. وعلى شرط انه مش بيبيع سجاير كمان
يعني الاكشك بتكسب بس لو اشتغلت صح

وانا بجد وشي منك في الارض على ملحوظتك .. واوعدك اني هاخلي بالي من الكلام ده في الحلقات الجايه وفي كل مواضيعي

ربنا يخليكي لي ياجدتي ويسعدك ويبسطك دنيا وآخره يارب



سلامووووووز

Soooo يقول...

سكــر

باشااااا
وانا اقول المدونه منوره ليه .. اتاري سكر باشا منورها بنفسه

ياسيدي انا سعيد جدا بتعليقك وباتمنى ان المذكرات والمدونه كلها تعجبك
وربنا يسعدك ويكرمك ويبسطك ويرضيك دنيا وآخره يارب



سلاموووووووووز

wanna b a physician يقول...

بقا الظابط اسمه لبو على قفاه ؟
ماشى واية سيس دى حد يبقى اسمه سيس
طيب ماشى
بس ياترى الحاجة الساقعة كانت كوكاكولا ولا بيبسى
والحاجه قالت مجرمة وبنت ستين كلب ؟
هى عرفت من فين باقى جرايمها

shahy يقول...

فظيع ياابو حميد مش ممكن
انا انتهزت فرصة ان العيال نامو وقعدت على الكمبيوتر اصلهم كانوا محتلينة من بعد لما اخدوا الاجازة بس شكلهم كدة هايصحوا من صوت ضحكي

انا طبعا قريت كل الموضوعات اللي فاتت وبجد بجد انت تحفة حية جميلة

ربنا يبارك فيك ويكرمك

تحياتي واسفة جدا على تقصيري

اهو ده عيبه يقول...

ازيك يا عم الشباب

تصدق دراكولا صعب على اتارى ياما الهدوم بتدارى
ياعينى ده طلع حالته غلب ومتبهدل وعليه اقساط وكمان كشك وعساكر بتبرشط عليه

بالنسبة لحوار المحافظات والمديريات ده على ما توفيق يفهم هيكون الحلقات خلصت وكل عام وانتم بخير

اما الحوار اللى مسخرة بجد الحجاج اللى مخطوفين دول وبيقيلوا بعد الغدا
لا وقايمين يحكوا مع بعض ولا اللى قاعدين فى البلكونة ساعه عصارى وبيفكروا يوفقوا راسين كرنب فى الحلال

اللهى يطعمك ما يحرمك ويكسبك ما يخسرك يا سووو يابن بنت بنت بنتى
مع السلامو عليكم

زى الهوا يقول...

هههههههههههههه , تحفة بجد بس فى كلمات عمرى ماسمعتها قبل كدة , الجزء بتاع الام والاب روعة كنت حسانى باتفرج على مسلسل بتاع اتنين هبل هههههههههه , انا على فكرة متابعة كل بوستاتك ولونى مش بارد على كله بس متباعاهم بوست بوست , وممكن تسألنى فيهم كمان ههههههه

Soooo يقول...

wanna b a physician


بقا الظابط اسمه لبو على قفاه ؟
----
لو مش مصدقني روح للظابط وقوللو .. بطاقتك لو سمحت
بس تستحمل اللي هيحصل


اية سيس دى حد يبقى اسمه سيس
----
انت يادكتره معترض على الاسم ولا الصفه .. عشان دي تفرق


ياترى الحاجة الساقعة كانت كوكاكولا ولا بيبسى
----
راجع الحلقه هتلاقيني بقول قزازتين بيبس .. يعني مشروب فرعوني قديم .. وتقريبا شركة بيبسي سرقت الاسم .. ولاد الحلال ماخلوش لولاد الخال حاجه



والحاجه قالت مجرمة وبنت ستين كلب ؟
هى عرفت من فين باقى جرايمها
----
ياعمنا دي سونيا جراهاااام .. يعني المدبح .. يعني عزبة الوالده في حلوان .. يعني ترب اليهود في البساتين .. يعني اجرام الدنيا والآخره .. انت ماقريتش العميل رقم تسعتاشر ولا ايه


ربنا يسعدك ويكرمك ويبسطك دنيا وآخره يادكتره


سلاموووووووز

Soooo يقول...

shahy

ماما شاهييييييييييييييي
والله العظيم وحشاني تعليقاتك وطلتك الحلوه عندي في المدونه

وياستي انا مقدر ظروف اخواتي وامتحاناتهم وان شاء الله ربنا هيكرمكهم وينجحو ويجيبو اعلى درجات يارب

وربنا يكرمك ويسعدك ويبسطك ويعطيكي مايحرمك ويرضيكي دنيا وآخره يارب

ملحوظه
كان نفسي اشوفك واشوف ابو الدراويش في حفل توقيع مدونات مصريه للجيب



سلاموووووووووز

Soooo يقول...

اهو ده عيبه

شوفتي بقى يادوللي اننا ظالمين دراكولا معانا وفاكرينه ياما هنا ياما هناك

بس بلاش حوار مسخره .. قولي حوار ساخر .. افضل وابلغ

والف شكر على الدعوة الأطاطيه

وربنا يسعدك ويبسطك ويكرمك ويرضيكي دنيا وآخره يارب



سلامووووووووووز

Soooo يقول...

زى الهوا

ازيك ياميس موحه
الحمدلله انك رجعتي من موسم الامتحانات وخدتي الاجازة

وياستي انتي تنوريني وقت ماتحبي وتعلقي برضه وقت ماتحبي .. دي مدونتك يافندم

ملحوظه
كنت افضل انك تقولي على الجزء بتاع ابويا وامي انهم طيبين جدا او انهم في الطراوه او اي كلمة غير اللي قلتيها


وربنا يسعدك ويكرمك ويبسطك ويرضيكي دنيا وآخره يارب



سلامووووووووووز

الـسـيـدة نـون يقول...

دراكولا : لا .. قابلت الظابط (لِبّوو - على - قفاه) .. وكان شخصيه وحشه قوي
!! سوووو : واحد بالاسم ده .. اكيد مش بيلعب بيانو بعد الضهر


هههههههههههههههه
الحتة دى فطستنى على روحى من الضحك

اللى فطسنى اكتر ردك عليه
هههههههههههههههه

الـسـيـدة نـون يقول...

والحتة دى كمان ضحكتنى اوى

ابويا : محروس .. والله لايقين على بعض .. وهو كمان نصاب وابن كلب والاتنين هيعملو شغل مع بعض


هى صحيح سونيا كانت مضايقة ليه
وايه حكاية الاوضة المقفولة

غير معرف يقول...

هههههههههههههههههههههه
ههههههههههههههههههههه
هههههههههههههه

جاااااااااامده يا سووووووووووو
انا مش عارفه ابطل ضحك

تحفه تحفه تحفه

بجد يا سووو ربنا يكرمك ويسعدك على قد مانت بتبسطنا كده

سلامى الجامد اوى
:))))))))))
سلاخوووووووووووووخ

نسر الشرق يقول...

السلام عليكم

دى اول زيارة لية

هذة المدونة جميلة ودماها شربات

سلااااام

كاميليا بهاء الدين يقول...

ده اسم زي باقي الاسماء .. عادي يعني
!!!! سوووو : ما داهيه تقولي انه كان على ايامكم في اسماء زي (فحت) و(طحن) و(كوول) مثلا
(دراكولا : - مستفيضا في الشرح - و(روش) و(أنتيخ) و(شقيق) و(مستكنيس) و(شوءوس
سوووو : لا ياشييييخ .. طب وفي اسماء مركبه زي (فل - عليك) و(بيس - يا مان)؟؟
دراكولا : اه طبعا .. في (آخر - حاجه) و (كبر - دماغك) و (بونو - بونو) و
سوووو : - مقاطعا - هي وصلت للـ بونو - بونو ؟؟؟
.......

هههههههههههههههههههههههههههههههههه

ههههههههههههههههههههههههه

طلب عاجل للحاج سبوت وولده بلوج

عايزين ايموشنز للضرورة القصوى

(وش مزبهل على مصدوم على مش فاهم)

علشان القاموس الجديد ده

( * * )
X

الحلقات بتزيد روعة وابداع

يسلم المبدع

تحياتى

اهو ده عيبه يقول...

سووووووو

انا مقصدتش الكلمة بمعناها المتعارف
واسفه لو كان خانى التعبير

Coca يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههه
والله انت سكر سكر يعني

Miss. Sosa يقول...

هههههههههه والله امك ديه دماغ يا سوووو
كاتب الحوار بشكل متقن جدا .. حسيت انها الست امينة اللي بتتكلم :D

خوارات المحافظات واللخبطة بتاعت المحكمة الدستورية جميل اوي

وعم دراكولا سيس ده شكله كشك خالص

بجد عليك افيهات ماحصلتش

متابعين باستمتااااع :)

Soooo يقول...

بت خيخة وأى كلام

ياقهلا ياقهلا بام شرفنطح باشا
منوراني والله
والحمدلله انك ضحكتي ويارب تفضل مبسوطه على طول يارب

وبعدين مستعجله على ايه
هتعرفي سونيا كانت متضايقه ليه وفي ايه ورا الباب
بس كللو بأوانه

ربنا يسعدك ويبسطك ويكرمك ويوفقك ويرضيكي دنيا وآخره يارب




سلاموووووووووز

Soooo يقول...

shayma

يااااه ياشيمو
الحمدلله ان ربنا قدرني وعرفت اضحكك ويارب اكون عرفت على الاقل ارسم ابتسامه على وشوش اللي قرو الموضوع

وربنا يسعدك ويكرمك ويبسطك ويعطيكي مايحرمك ويوفقك دنيا وآخره ياااااارب




سلامووووووووز

Soooo يقول...

نسر الشرق

اهلا بيك يا نسر ويارب تكون مدونتي عجبتك

بس هو انت متأكد انها اول زياره؟؟؟؟

ربنا يوفقك ويكرمك دنيا وآخره يارب



سلامووووووووووز

Soooo يقول...

كاميليا

الحاج سبوت وابنه بلوج بيبعتولك شديد السلام وأحر تحيه وبيقولولك انهم هيعملو الايموشن ده في اسرع وقت
هو في كام كاميللو في الدنيا كلها

وبعدين خدي هنا
اانتي عايزه تفهميني ان جرمانيا مافيهاش اسماء في السكه دي
طب ده هناك كل الكلام في سكه أوخ وشاين وناين وياا وبوخشتبيرن .. ليله مش عايزالها قاموس .. دي عايزالها لغة بحالها

وربنا يسعدك ويكرمك ويبسطك ويعطيكي مايحرمك ويوفقك ويرضيكي دنيا وآخره يارب



سلامووووووووز

Soooo يقول...

اهو ده عيبه

خبر ايه يادوللي
اسف ايه وبتاع ايه
هو في حاجه حصلت؟؟؟؟

ربنا يكرمك ويسعدك ويبسطك دنيا وآخره يارب


سلامووووووووز

Soooo يقول...

Coca

كوكا هانم عندنا
يامرحبا يامرحبا

والحمدلله انك ضحكتي ويارب ترجعي تعلقي في المدونه زي زمان

وربنا يسعدك ويكرمك ويبسطك ويوفقك دنيا وآخره يارب



سلامووووووووز

Soooo يقول...

Miss. Sosa

ربنا يخليكي يارب
والحمدلله ان الحوار مابين والدتي ووالدي عجبك
ويارب باقي الحلقات تعجبك وربنا يقدرني اني ارسم ابتسامه على وشك وعلى وشوش كل الناس اللي بيتابعوني وبيقرولي

وربنا يكرمك ويبسطك ويعطيكي مايحرمك ويوفقك ويرضيكي دنيا وآخره يارب



سلاموووووووووز

عروسة ننوسة يقول...

انت بتكتب حلو اوى اوى بجد ....ودمك خفيف

Nani يقول...

السلام عليكم
سوووووووووووو
يخرب شيطانك شو انك نهفة
برضو زي كل مرة صوت ضحكي لعلع في كل الحارة
وابوي بلش يشك في علاقتنا
ههه هاهاههاهههههههخهخهخهخهخهخ
ههخهخههههغه ههههههه
الله يحرسك ويحميك

Z_Diva يقول...

tb belzma meen elly byshar2 eltany ya ragel ya moftry :D

اي كانت بيليف ذيس ايبيسود, اتس هيلاريوس, سيريوسلي, اند دراكولاز ستوري, اوه ماي جود. سو ات واذ ال ذا سايم ايفير سينس ذي تايم اوف ذي فيروز
poor "sies ha3", he's such a victim, and after all these years it turns out that he is a poor egyption like the rest of us, and even have nothing to live upon but a topaco cusek

لا بجد مهزلة, وللا كله كوم و "لبه-على-قفاه" كوم تاني, و لعلمك, مننكن جدا يكون بيلعب بيانو بعد الظهر, ما هو اكيد بيفصل شغله عن حياته الشخصيه :))))))

ich wunsche Sie viel gluck. und ich hoffe das deise geschichte bald als ein buch gemacht

Empress appy يقول...

يا خويا ربنا يكون فى عوونه اه امال الكشف الطبي اللى ععمله ده والشكوي ليه بتبلى عليه ههههههه ماشى
وبعدين ايوت دراكولا جاري خد بالك وهقوله اصلاااام على كل حاجه وهسلمك

كاميليا بهاء الدين يقول...

ich wunsche Sie viel gluck. und ich hoffe das deise geschichte bald als ein buch gemacht
ترجمة للانجليزية
I desire it much luck. and I hope this history soon as a book made
وطبعا مفهوم بالعربى

تحياتى للكاتب العالمى سووووو

خيرالدين يقول...

ياااااااااااااه

ده انا فاتنى كتير قوى يا معلم

Z_Diva يقول...

معليش يا سوووو انا بستاذن اتكلم مع كاميليا :))))

هاي الاول يا كاميليا و ازيك و ايه اخبار المانيا على حسك -مع اني لا اعرفها ولا عمري شفتها :)))))

بصي يا كاميليا ترجمتك هي مظبوطة لغويا, بس مش صح, او صح يعني بس ليها ترجمة تانية و هي كالتالي
i wish you luck, and i hope to see this story made into a book
و عشان تتاكدي, ترجمي كلمة wish & story كلا على حده هتلاقي كلامي مظبوط :))))

انا اصل الالماني بتاعي طشاش اه بس خليت واحد كان عايش في المانيا يظبطلي الجملة و يتاكد من الجراماتيك بتاعها قبل ما اكتبها :)))))))))))

بس شكرا للترجمة, انا فعلا كتبتها لما قريت رد سوووو على الكومنت بتاعك و فهمت انك في المانيا فعرفت انه هيجبلك الجملة تشرحيها :)))))

اوند ايش فونشي زي آوخ فييل جلوك كاميليا :))))))))))

GiGi world يقول...

جميل انت فعلا بتكتب حلو قوي
مدون جميله بجد

غير معرف يقول...

هههههههههههههه
الضابط لبه علي قفاه
وبعدين الهيرغوليفي بتاعك بعافيه ياسو
خدت غطس هنا واتفرجت علي الشعب المرجانيه قصدي البوسطات
جامده ياسوه
يتبع هههههههههه
ناس بتخلص ذنب ناس بقي
تحياتي

truelove يقول...

منك لله يارئيس جمهورية نفسه هو الي رامني على هنا قلت اروح اشوف الواد الي عمال يحكي عليه وعلى جدعنته ده ايه حكايته اجي الاقي نفسي في مقطع خمسة لقلبك ... هههههههه اسعد الله قلبك يافندم لما اشوف الواد محمود بس

son's egypt يقول...

السلام عليكم
بسوت تحفه بصراحة
بس دراكولا ميعرفش يحجز في قاعة خوفو كانت اقرب من زوسر
وكان يعرف يجيب وسطة علشان يستلم الهرم بسرعة

المـــفـــــــقــــــــوعـــــة مــرارتـهــا يقول...

دراكولا طلع بيخاف من المخبرين ياجدعان
ده باين عليه دراكولا ورق

Soooo يقول...

gannah

ربنا يكرمك يارب .. والحمدلله ان شخابيطي عجبتك

وياريت ماتقطعيش الزياره وتعتبري مدونتي زي مدونتك تمام

وربنا يسعدك ويبسطك ويكرمك دنيا وآخره يارب




سلاموووووووووز

Soooo يقول...

Nani

منوراني يابنت عمي من الاردن الشقيق
وياستي اضحكي براحتك وضحكي كل الحاره وكل الناس

بس ياخوفي ان والدك لما يفتكر في بيننا حاجه يجي يسلم علي ومعاه ترسانة الاسلحه الخفيفه اللي حكيتيلي عنها

ده انا ساعتها هابقى طاير .. من ضرب النار

ربنا يسعدك ويكرمك ويبسطك ويوفقك دنيا وآخره يارب



سلاموووووووووز

Soooo يقول...

Z_Diva

انتي هايله بجد يا ام زعبولا
العربي بالانجليزي والانجليزي بالعربي وحاجه ديكشنري خالص

وبعدين انتي عارفه .. لولا اني قريت تعليق كاميللو وفسرتلي اللي قلتيه بالجرماني وبعدين انتي وضحتي التفسير الادق لغويا .. كنت خدت اول ميكروباص وجيتلك اسألك اذا كان اللي قلتيه ده شتومه ولا ايه
اصل انا ثقافتي انجليزي وعربي وصعيدي وجريجي .. وساعات باخبط على قدي في التنزاني

هةىلغقيخ تىتلاغفصثهن ب ننتى تنتتلايبمم

يعني فل عليكي باللغه السوووويه القديمه المعاصره


ربنا يسعدك ويكرمك ويبسطك ويرضيكي دنيا وآخره يارب



سلاموووووووووز

Soooo يقول...

appy

اصلااام ؟؟؟
اصلاااام ؟؟؟
ده انتي مش شحورتي العربي وبس .. ده انتي قتلتلي مفردات اللغه العربيه .. لغتنا الجميله

وبعدين اصلاان اصلاان داراكوليا ده حبيبي والشؤوس بتاعي .. قوليله انتي بس اني عازمه على كباية دم فتله هيموجلوبين بره .. وانا هشرب شاي كشري سكر بره


وسلامي لإسلو



سلامووووووووووز

Soooo يقول...

كاميليا

طب والله العلم نورن بجد
عارفه .. انا كنت هاروح على بلوج ام زعبولا واخد كام مجرم من صحابي ونولعلها في البلوج بتاعها
لكن انتي لحقتيني وفسرتي كلامها واتضح انه مش شتومه زي مانا كنت فاكر

الف شكر يا كاميللو على درأ الجريمه اللي كانت هتحصل

وربنا يكرمك ويسعدك وتفضلي تترجميلي جرماني وانا اترجملك عربي



سلاموووووووووز

Soooo يقول...

e7na

يامعلم ولا فاتك كتير ولا حاجه
مدونتي تحت امرك واقرى اللي عايز تقراه براحتك
ويارب يعجبك

وربنا يكرمك ويسعدك ويبسطك ويوفقك دنيا وآخره يارب



سلامووووووووووز

Soooo يقول...

Z_Diva

والله يام زعبولا مشكرين قوي عالكلام اللي قلتيه
بس ارجع واقولك .. محسوبك ثقافته تنزاني .. يعني كلميني عربي اكلمك عربي
سلمني نضيف اسلمك نضيف

وبعدين لما انتي مش بتعرفي جرماني وعارفه اني اكيد اكيد ماعرفش جرماني .. بتتكلمي جرماني ليه واستشرتي واحد مترجم من جرمانيا وتلاقيكي اديتيلو مبلغ وقدره .. كنتي قولي اللي عايزه تقولي عادي .. واديتيني الفلوس دي

وربنا يكرمك ويسعدك ويبسطك ويرضيكي دنيا وآخره يارب



سلامووووووووووز

Soooo يقول...

GiGi

ربنا يكرمك يارب
وياريت تعتبري مدونتي زي مدونتك تمام وتنوريني بزياراتك وبتعليقاتك دايما

وربنا يسعدك ويبسطك ويرضيكي دنيا وآخره يارب



سلامووووووووز

Soooo يقول...

mayada

اهلا بيكي ياستي ويارب تكون مدونتي المتواضعه عجبتك وياريت تعتبريها زي مدونتك تمام وتشرفيني بزياراتك وبتعليقاتك دايما

وفعلا .. كلمة يتبع دي كلمة خنيقه قوي .. تيجي نبطل نقولها في المواضيع اللي بنكتبها؟؟؟

ربنا يسعدك ويكرمك ويبسطك ويرضيكي دنيا وآخره يارب



سلاموووووووووز

Soooo يقول...

truelove

ميييييييين .. بيبو
ده انا سعيد بتشريفك وبزيارتك والله
وبعدين بتدعي على حوده ابن عمي ليه بس
ده الريس .. حد يقدر يدعي عالريس جهارا نهارا كده .. طب ده يبقى راح مارينا حتى

وياريت تعتبري مدونتي زي مدونتك وتشرفيني دايما بتعليقاتك

وربنا يكرمك ويسعدك ويبسطك ويرضيكي دنيا وآخره يارب



سلامووووووووووز

Soooo يقول...

son's egypt

الله يكرمك يارب
وبالنوسبه لقاعة خوفو فهي اصغر من قاعة زوسر .. وكمان مدير القاعه عامل مشاكل مع حما دراكولا .. عشان اخو خطيبة دراكولا كان عامل فرحه هناك .. بس جاب شوية فراعنه صحابه قعدو يرقصو في الفرح عالترابيزات فبهدلوها .. قام مدير القاعه حلف يمين طلاق مايدخل حد من عيلة دراكولا

ولو انت عندك واسطه عشان تساعد اخوك دراكولا .. قوللو وليك الحلاوة .. وحلاوة فرعوني اصليييي


وربنا يسعدك ويبسطك ويرضيك دنيا وآخره يارب



سلاموووووووووز

Soooo يقول...

المـــفـــــــقــــــــوعـــــة مــرارتـهــا

دراكولا ورق؟؟
هو في نواحيكم دراكولا كرتون ولا بلاستيك طيب

وبعدين اصلا اصلا دراكولا ده واد جدع جدع .. بس لما خطب بقى بيخاف على خطيبته
بالك انتي لما كان عازب زي حالاتي .. يالهوووووي
كان مقطع شارع الهرم كللو


ربنا يسعدك ويكرمك ويبسطك ويرضيكي دنيا وآخره يارب




سلاموووووووووووز

أبو خالد يقول...

أبنى الحبيب الغالى أحمد سوووو
شوف يا أحمد شامبليون أكتشف طلاسم حجر رشيد و من يومها تعرفنا على الهيروغليفية..
و اليوم عجوز و عنده ثلاثون عاما
يكتشف لوغارتيم الحزن الوطنى و مظبطه
قوى ..ده أنت على كده سفرت دراكولا
دمت فنان كبير

Unknown يقول...

ايه ياعم المركز التهييس الجامد دة هو المسلسل الهندى دة حلقات منفصلة؟ طب هو محروس مش لازم يسالوه الاول يمكن مرتبط وللا حاجة وبعدين ابو تريكة اساسا بيلعب فى اسمنت اسيوط

Z_Diva يقول...

loooooooooooooooool

b2a 3eb 3lik walla ya 7aj
ana bta3t shatoumat brdon
mashy ya 3am

ana bas knt 3mlalk medly keda, welola in kol elly a3rfo felyapany arb3 klmat malhmsh ay 3laka beb3d -rbna y5aly oshien we sozoran- knt rw2tk y3am :D

la bas 5las msh h3ml keda tany 7arramt, wallahy a5er marra ya Mr. Soooo :D

mstnyen b2a el7lkat elkatita yalla

special requist 3la gnb kda:
mtgyb ref3at isma3iel wenaby mdam el7okaya ba2a feha dracola :D

Desert cat يقول...

سسيس - هاع
هو كان بيرجع ولا ايه
وبعدين والله الست الواده دى طيبه اوى
عايزة تجيب عريس للبونية اهو تكسب ثواب يمكن تتوب وترجع عن طريق الاجرام

Mafrousa يقول...

ههههههههههههههه
هههههههههههههههههه
مش ممكن يا سو ايه الدماغ العاليه ديه انت مش ممكن
ههههههههههههههه
كل الحوارات مسخره
و تعليقك على فضفضه
و باقى التعليقان ...و الله انت المكفروض يكون مكانك فى حته تانيه غيى قهوة البورصه
أنا معت عنها..ما رحتاش

3ala asm masr يقول...

ليه بس يا اخويا ربنا ميجبش مصايب
احلى حاجه شوفتها بعد امتحان الحضاره

koko يقول...

شرباااااااات يا سوووو كالعاده طبعا .. الواد دراكولا ده عسل عسل عجبنى اوى الحوار بتاعه ..

عارف يا سوووو انت فيك من لينين الرملى على توفيق الحكيم فى الخيال و الافكار المفرقعه

انا عارفه انك عاشق للسينما بس لما بقرا لك بحس انك اقرب لكتابة المسرحية .. و المسرح ابو الفنون كلها

Soooo يقول...

أبو خالد

ازيك يابابا .. يارب تكون كويس وفي اتم صحه يارب
والف شكر على كلامك الجميل ده وربنا يخليك يارب

بس هو من ناحية اني سفرت دراكولا .. فهو بيجهز شنطته لسه .. ولو اني قلتله مايجهزش حاجه لان المكان اللي هنتسحل فيه انا وهو مش هنحتاج فيه ايتها حاجه
والناس موضبين ومجهزين كافة شيء
كهربا على عصيان على كرابيج على كللو
قايمين بالواجب وزياده والله الناس دي

وربنا يسعدك ويبسطك ويرضيك دنيا وآخره يارب


سلاموووووووووز

Soooo يقول...

enjy

اهلا بيكي ياستي في اول زياره ليكي
وياريت تعتبري مدونتي زي مدونتك تمام وتشرفيني بتعليقاتك على طول

وياستي الحلقات مش منفصله .. الحلقات متصله
وبعدين محروس اصلا اصلا اتطلق وهو في السجن .. وهو هيلاقي احلى من سونيا

وابو تريكه اثناء كتابة هذا الموضوع كان في الشرقيه بيجيب دخان
وفي اثناء كتابتك لتعليقك كان في اسيوط
وفي اثناء مانا باكتب ردي ده .. كان في الحمام


وربنا يسعدك ويبسطك ويرضيكي دنيا وآخره يارب



سلاموووووووووز

Soooo يقول...

Z_Diva

ام زعبولا
ماهو حاجه من اتنين
يانتي حاطه تروجان عالجهاز بتاعي وبتقري اللي انا كاتبه .. يانتي هو انا وباشتغلني؟؟؟؟

انتي عرفتي منين رفعت اسماعيل؟؟
اوعي تقولي انك تعرفي اني حاطه في المسلسل هو وعلاء عبد العظيم؟؟؟

انتي بجد بجد .. تنفعي سيناريست حلو قوييييييييي
سلامي لأوشين وسوزوران
هي سوزوران دي .. اخت سوبرمان؟؟؟؟



سلامووووووووووز

Soooo يقول...

Desert cat

لعلمك .. انا لسه قافل مع دراكولا وقلتله ان في واحده بتتريق على اسم سيس - هاع .. وهو قاللي انه هيتصرف معاكي بروقان
فلو اتعضيتي انا ماليش دعوة

وصدقيني امي لما اختارت محروس لسونيا .. كان عندها بعد نظر
عارفه ان الاتنين مجرمين وهيسرقو بعض .. ونتيجة لده .. كل واحد منهم هيعرف التاني ان الله حق
ويتوبو توبه نصوحه

نورتيني وماتبقيش تقطعي الزيارات .. ولا هو عشان انتي بقيتي مشهوره وماضيعك بتتذاع في الراديون يبقى تنسي العالم الغلابه اللي زي حالاتي ؟؟؟


ربنا يسعدك ويكرمك ويبسطك ويوفقك دنيا وآخره يارب



سلاموووووووووز

Soooo يقول...

واحدة مفروسة

ربنا يكرمك ويسعدك يارب
وياستي انا ولا دماغ ولا حاجه
الحكايه ومافيها اني بحاول اخلي اللي بيعلق لما يرجع ويقرى تعليقي عليه يبقى مبسوط شويه

وبعدين علمك علمك علمك
انا رجل اعمال
قعدتي عالبورصه مش من فراخ يعني
لأ
انا باقعد عالبورصه .. عشان اشوف استثماراتي رايحه فين وجايه منين
ده اللي مالوش ضهر .. احسن من عشره عالشجره

وربنا يسعدك ويكرمك ويبسطك ويرضيكي دنيا وآخره يارب

ملحوظه
انا مش باقعد عالبورصه غير يوم الخميس بس .. مش مقيم هناك يعني



سلامووووووووز

Soooo يقول...

3ala asm masr

هنوووووووووووده
انتي يابنتي سايبه المذاكره وجاي تقري هنا
قومي يابنتي ذاكري
ولا اقولك
خليكي على راحتك
ذاكري حبه .. وروقي حبه

وربنا يكرمك ويسعدك ويوفقك في الامتحانات وفي كل حاجه يارب


سلاموووووووووووز

Soooo يقول...

koko

ربنا يكرمك يارب ويسعدك

بس انا اجي ايه جنب الناس دي يابنتي

وفعلا انا باحب اكتب مسرح اكتر من السينما .. بدليل اني كاتب عندي عالجهاز بتاع عشر مسرحيات مثلا .. وتلات افلام بس

وعلى فكره .. القصه اللي باكتبها دي اصلا تمرد على كل انواع القصص
عمرك شوفتي قصه .. يبقى الابطال اللي فيها .. اسماء ممثلين ؟؟
عمرك قريتي قصه .. فيها مزج بين الواقع وبين الخيال بالطرقعه دي؟؟؟

بصي
يا القصه دي تنجح وتعجب الناس .. ياتفشل وانا ابطل كتابه .. واتجه للغناء

ياليييييل
ياعييييييين

باشوف هنفع ولا لأ

وربنا يسعدك ويكرمك ويوفقك ويرضيكي دنيا وآخره يارب



سلاموووووووووووووز

Z_Diva يقول...

loooooooooool

la wenaby rf3t hygy, allaaaaah, da ref3t da ro7y ro7y ro7y, ana mkntsh a3rf ink htgybo ya3am, ana knt b3ml special requisyt, bas tl3t fel5etta el5amsya, mesh adra a2olk ana mbsouta ad eh in ref3t hygy reglo felt72e2 :D

ybny ma war2 eltabe3a de eledman bta3y, ana m2darsh a3esh mn 3'erha, we yaret 7ad yksab fya sawab we y2oly btetb3 fen felimrat wallahy yb2a 5admny 5dmt el3omr

زى الهوا يقول...

تعليق متأخر انا عارفة بس لسة قارئة تعليقك دلوقتى :

مش فاهمة وجهة نظرك فى انك كنت عايز كلمة غير اللى قولتها , هيه دى مش قصة من تأليفك يعنى شخصيات خيالية ؟؟ , دا حتى انا قولت الجزء بتاع الام والاب علشان مانفعش ابدا اقول (مامتك وباباك اللى فى القصة) رغم انها بردك كانت هتتفهم انى اقصد اللى فى القصة , عموما انا اسفة انا كنت بهزر مش اكتر